အခန်း (၃၈၁-၃၈၂)
Vol. 39 Ch. 381-382
ဖန့်ချန်
ဘာသာပြန် အရှင်ငယ်
အခန်း ၃၈၁ - အကြွေးနဲ့ ဝယ်လို့ရမလား
အရိပ်ထဲတွင် ဓားငယ်လေးသည် ဖန့်ချန် ဝယ်ယူခဲ့သော အခြားရတနာနှစ်ခုကို စတင်ဝါးမြိုနေပြီဖြစ်သည်။
ဖန့်ချန်ကမူ ချည်နှောင်ခြင်း ခေါင်းလောင်း ကို လက်ထဲတွင်ကိုင်ကာ စစ်ဆေးနေမိသည်။
"ဒီလို အဆင့်မြင့်ရတနာမျိုးကို သန့်စင်ဖို့ဆိုရင် ရက်ပေါင်းများစွာ ကြာလိမ့်မယ်"
ဟု ဖန့်ချန် တွေးလိုက်သည်။
သူသည် လာမည့်ရက်အနည်းငယ်အတွင်း အရိပ်ထဲတွင်သာ ပုန်းကွယ်နေရန် ဆုံးဖြတ်ထားသည်။
ဤသည်မှာ အန္တရာယ်အနည်းဆုံးနှင့် ပြဿနာ အရှင်းရဆုံးနည်းလမ်းပင်။
မိစ္ဆာနှိမ်နင်းရေး စက်ဝိုင်း ကို ရရှိသည်နှင့် ဓားငယ်လေးကို ကျွေးကြည့်မည်။
အကယ်၍ တတိယအဆင့်ကို မရောက်သေးပါက ထိုခေါင်းလောင်းကိုပါ ထပ်ကျွေးရန် သူ ပြင်ဆင်ထားသည်။
ယခုတစ်ခေါက်တွင် သူသည် ဝိညာဉ်ကျောက်တုံး ၁၁၀၀၀ သုံးစွဲခဲ့ပြီးဖြစ်ရာ လေလံပွဲအတွက် ၁၈၀၀၀ သာ ကျန်တော့သည်။
ဖန့်ချန်သည် စကြာဝဠာမှန်ချပ် ကို ထုတ်လိုက်သည်။
မှန်ချပ်သည် ထွက်လာသည်နှင့် ဓားငယ်လေးက ရတနာများကို ဝါးမြိုနေသည်ကို မြင်ကာ မနာလိုဖြစ်သွားပြီး ဖန့်ချန်ကို ချက်ချင်းဆိုသည်
"အစ်ကိုကြီး အကူအညီလိုရင် ပြောနော်"
"အနီးအနားမှာ ပိုင်ရှင်မဲ့နေတဲ့ အဝါရောင်အဆင့် အမြင့်ရတနာတွေ ဒါမှမဟုတ် ပစ္စည်းတွေ ရှိလားဆိုတာ ငါသိချင်တယ်"
ဟု ဖန့်ချန်က ပြုံးလျက် မေးသည်။
မှန်ချပ်က ဝမ်းသာအားရဖြင့်
"ရှိတာပေါ့ ဝိညာဉ်ကျောက်တုံး ၁၀၀၀၀ ပဲ ပေး အဲဒါတွေ ဘယ်မှာလဲဆိုတာ ငါပြောပြမယ်"
"သူ့ကို မပေးနဲ့"
ဟု ဓားငယ်လေးက လှမ်းအော်သည်။
"မင်း အစာပဲ အေးအေးဆေးဆေးစားစမ်းပါ"
မှန်ချပ်က နှာခေါင်းရှုံ့လိုက်သည်
"သူက မင်းအတွက် မေးပေးနေတာကို ကျေးဇူးမကန်းနဲ့"
"ကျောက်တုံး ၁၀၀၀၀ လား"
ဖန့်ချန်က တွန့်ဆုတ်စွာ ရေရွတ်သည်
"အဲဒီလောက်ဆိုရင် အထွတ်အထိပ်ရတနာ တစ်ခုတောင် ဝယ်လို့ရတယ်"
"အစ်ကိုကြီးကို အမှန်အတိုင်း ပြောရရင် မင်း မဟာချန်းမှာတုန်းက ဒီမေးခွန်းမေးရင် မရှိဘူးလို့ပဲ ငါဖြေမှာ"
" ဒါပေမဲ့ ကံကောင်းချင်တော့ ဒီမိစ္ဆာတိမ်တိုက် အင်ပါယာမှာတော့ မင်းလိုအပ်ချက်နဲ့ ကိုက်ညီတဲ့ ပိုင်ရှင်မဲ့ ရတနာတစ်ခု ရှိနေတယ် မဝေးဘူးလေ"
"သုံးရက်အတွင်း သွားပြန် လုပ်လို့ရမလား"
မှန်ချပ်က တွန့်ဆုတ်နေသည်
"အဲဒါကတော့ အတိအကျ သိချင်ရင် ကျောက်တုံး ထပ်လိုလိမ့်မယ်"
ဖန့်ချန်က တိုးတိုးလေး ဆိုသည်
"ငါ့မှာ ကျောက်တုံး ၁၈၀၀၀ ထက် မပိုတော့ဘူး မင်းကို ၁၀၀၀၀ ပေးလိုက်ရင် လေလံပွဲအတွက် မလောက်တော့ဘူး ဒီကိစ္စကို အကြွေးနဲ့ အရင် ယူလို့မရဘူးလား"
"မရဘူး အဲဒါ မဖြစ်နိုင်ဘူး"
မှန်ချပ်က ငြင်းသည်။
"ဒါဆို တစ်ဝက်အရင် ပေးရင်ကော"
"အဲဒါဆိုရင်တော့ ရတယ် တစ်ဝက်ပေးရင် သွားပြန် ဘယ်လောက်ကြာမလဲဆိုတာ ပြောပြမယ်"
ဟု မှန်ချပ်က ချက်ချင်းဆိုသည်။
ဖန့်ချန်က ကျောက်တုံး ၅၀၀၀ ကို မှန်ချပ်ထဲ ပစ်ထည့်လိုက်သည်။ မှန်ချပ်က တစ်ကျိုက်တည်း ဝါးမြိုလိုက်ပြီးနောက်
"အစ်ကိုကြီး အဲဒီရတနာက မဝေးဘူး သွားပြန် ဆယ်ရက်ပဲ ကြာမယ်"
"ဆယ်ရက်လား"
ဒါဆိုရင် လေလံပွဲအရင်တက်ပြီးမှ သွားရတော့မည်။
သူသည် သုံးရက်တာကို အရိပ်ထဲတွင်သာ စောင့်ဆိုင်းနေလိုက်သည်။
ကံကောင်းသည်မှာ ထိုရတနာက သိပ်မဝေးခြင်းပင်။
"အဲဒါက ဘယ်လိုရတနာလဲ ဝိညာဉ်တံဆိပ် ဘယ်နှစ်ခုရှိလဲဆိုတာ မသိချင်ဘူးလား"
ဟု မှန်ချပ်က ဆွပေးသည်။
ဖန့်ချန်က ပြုံးလျက်
"သိချင်တာပေါ့ ဒါပေမဲ့ အခုတော့ ကျောက်တုံး မဖြုန်းနိုင်သေးဘူး ခဏစောင့်ဦး"
"ချန်လေး ဒီကောင်ကို ငါ မယုံဘူး သူသာ ငါတို့ကို လိမ်ရင် သူ့ကိုပါ ငါ စားပစ်မယ်"
ဓားငယ်လေးက ဒုတိယရတနာကို ဝါးမြိုရင်း ခြိမ်းခြောက်သည်။
မှန်ချပ်ကလည်း ပြန်ပက်သည်
"မင်းက ငါ့ကို စားမလို့လာ မင်းက နုပါသေးတယ် မင်းရဲ့ ဓားခန္ဓာကိုယ် ပေါက်ကွဲသွားမှာ မကြောက်ဘူးလား မင်းက သံသရာထဲတောင် မဝင်ရသေးတဲ့ကောင်ပါ"
မှန်ချပ်သည် ကျောက်တုံး ၅၀၀၀ ရထားသဖြင့် ကျေနပ်နေပြီး ဓားငယ်လေးနှင့် ဆက်ရန်မဖြစ်တော့ဘဲ အနားယူရန်အတွက် သိုလှောင်လက်စွပ်ထဲ ပြန်ဝင်သွားသည်။
သုံးရက်မှာ မျက်စိတစ်မှိတ်အတွင်း ကုန်ဆုံးသွားသည်။
ဖန့်ချန်သည် ကောင်းကင်ရတနာရှေ့သို့ ရောက်လာသည်။
တိုက်တိုက်ဆိုင်ဆိုင်ပင် နဂါးကျောရိုးမြို့ တွင် သူတွေ့ခဲ့သော လူငယ်တစ်စုကိုလည်း တွေ့လိုက်ရသည်။
သူတို့မှာ အတော်လေး ဖရိုဖရဲ ဖြစ်နေပြီး စီနီယာဖြစ်သူမှာ အတွင်းဒဏ်ရာ အတော်လေး ရထားပုံပေါ်သည်။
သူတို့သည် ဘေးပတ်ဝန်းကျင်ကို အလွန်အမင်း သတိထားနေကြသည်။
အစေခံတစ်ဦးက ထိုလူငယ်များကို ချဉ်းကပ်လာသည်။
သူတို့သည် ဤနေရာသို့ ပထမဆုံးအကြိမ် ရောက်လာခြင်းဖြစ်ပြီး မိစ္ဆာတိမ်တိုက် အင်ပါယာမှ မဟုတ်ကြောင်း သူ အလွယ်တကူ သိနိုင်သည်။
"ဧည့်သည်တော်တို့ ဘာဝယ်ချင်လို့လဲခင်ဗျာ"
လူငယ်က ဖြည်းဖြည်းချင်း ဆိုသည်
"ဒီမှာ မြွေဝိညာဉ်သီး ရောင်းတယ်လို့ ကြားလို့ပါ"
အစေခံက ပြုံးလျက်
"ရှိပါတယ် ဒါပေမဲ့ အခုတော့ ရောင်းဖို့ မဟုတ်ပါဘူး"
"မရောင်းဘူး ဟုတ်လား"
လူငယ်မှာ အံ့သြသွားသည်။
အစေခံက ရယ်မောကာ
"အော် ကျွန်တော် စကားမှားသွားလို့ပါ ရောင်းမှာပါဒါပေမဲ့ ဆိုင်ရှင်က ဒီအသီးကို ဒီနေ့ လေလံပွဲမှာ ထည့်သွင်းဖို့ ရွေးချယ်ထားလို့ပါ စိတ်ဝင်စားရင် လေလံပွဲ တက်ရောက်နိုင်ပါတယ်"
ထို့နောက် အစေခံသည် ဖန့်ချန်ကို မြင်သွားပြီး
"ရောက်လာပြီပဲ လာပါ လေလံပွဲကို လိုက်ခဲ့ပါ"
ဟု ရိုသေစွာ ခေါ်ဆောင်သွားသည်။
ဖန့်ချန်က ခေါင်းညိတ်ပြီး အနောက်မှ လိုက်သွားသည်။
ထိုလူငယ်အုပ်စုမှာလည်း အံကြိတ်ကာ နောက်မှ လိုက်လာကြသည်။
လေလံပွဲကို ခန်းမကျယ်ကြီးထဲတွင် ကျင်းပနေခြင်း ဖြစ်သည်။
ကျင့်ကြံသူများစွာ ရောက်နေကြပြီး ချီသန့်စင်ခြင်းအဆင့်မှသည် အခြေခံတည်ဆောက်ခြင်းအဆင့်အထိ ပါဝင်သည်။
အချို့မှာ သိသိသာသာပင် နက်နဲသော အငွေ့အသက်များ ရှိကြရာ ရွှေအမြုတေအဆင့် ပညာရှင်များ ဖြစ်ကြောင်း ထင်ရှားသည်။
လူငယ်အုပ်စုထဲမှ မိန်းကလေးမှာ ကြောက်လန့်နေသည်
"စီနီယာအစ်ကို ငါတို့ အသီးကို ဝယ်နိုင်ရင်တောင် ဒီအင်ပါယာကနေ အသက်ရှင်လျက် ပြန်ထွက်နိုင်ပါ့မလား"
ခန်းမထဲတွင် ရက်စက်သော အကြည့်များစွာက သူတို့အပေါ် ကျရောက်နေသည်။
"မစိုးရိမ်ပါနဲ့ ဝယ်ယူသူတွေရဲ့ အကြောင်းကို လျှို့ဝှက်ထားပေးမယ့် နည်းလမ်းတွေ ရှိပါတယ်"
ဟု အစေခံက ဖန့်ချန်ကို အဓိကထား၍ ပြောကြားလိုက်သည်။
ဖန့်ချန် ထိုင်လိုက်သောအခါ ရွှေအမြုတေအဆင့် ပညာရှင်အချို့က သူ့ကို ကြည့်လိုက်ကြသည်။
သူတို့ပင် ဖန့်ချန်၏ ကျင့်ကြံမှုကို အကဲမဖြတ်နိုင်သဖြင့် အတွေးနက်သွားကြသည်။
မိန်းကလေးက သူမ၏ စီနီယာအင်္ကျီစကို ဆွဲကာ ဖန့်ချန်ကို မေးငေါ့ပြသည်
"စီနီယာအစ်ကို သူက နဂါးကျောရိုးမြို့မှာ တွေ့ခဲ့တဲ့လူနဲ့ တူတယ်နော်"
"တခြားလူအကြောင်း ကွယ်ရာမှာ မပြောပါနဲ့ ညီမလေး ဒုက္ခရောက်တတ်တယ်"
ဟု လူငယ်က သတိပေးလိုက်သည်။
သို့သော် သူ ဖန့်ချန်ကို ကြည့်လိုက်သောအခါ မျက်ခုံးများ တွန့်သွားသည်။
ဒီအဝတ်အစားတွေ တော်တော် ရင်းနှီးတာပဲ
နဂါးကျောရိုးမြစ်မှာ ဘုရားရှင် ကို တစ်ချက်တည်း သတ်သွားတဲ့သူဝတ်ထားတာနဲ့ အရမ်းတူနေသည်။
အချိန်က ခဏလေးမို့ သေချာမမြင်ရသော်လည်း ထိုသူသာ ဖြစ်နိုင်ခြေများသည်။
အခြေခံတည်ဆောက်ခြင်းအဆင့်ကို တစ်ချက်တည်း သတ်နိုင်သူဆိုလျှင် ထိုပုဂ္ဂိုလ်၏ ခွန်အားမှာ မမှန်းဆနိုင်ပေ။
မကြာမီ ဆိုင်ရှင်လင်း ထွက်လာပြီး နှုတ်ဆက်သည်
"အားလုံးကို ကျေးဇူးတင်ပါတယ် အချိန်မဖြုန်းတော့ဘဲ လေလံပွဲကို အခုပဲ စတင်ပါ့မယ်"
အခန်း ၃၈၂ - တိမ်မြုပ်တိမ်တိုက် နယ်မြေ
ဆိုင်ရှင်လင်းသည် စိတ်ဆိုးခြင်းမရှိပေ။
ထိုအရပ်ရှိ ကျင့်ကြံသူများသည် စိတ်တိုလွယ်မှန်း သူသိထားသဖြင့် တည်ငြိမ်စွာပင် လေလံတင်မည့် ပစ္စည်းများကို စတင်မိတ်ဆက်ပေးသည်။
ပထမဆုံး လေလံတင်သည့် ပစ္စည်းမှာ ကုသရေးပစ္စည်းဖြစ်သော မြွေဝိညာဉ်သီး ဖြစ်သည်။
ဆိုင်ရှင်လင်းက အသာအယာပြုံးကာ
"အားလုံးပဲ မြွေဝိညာဉ်သီးအကြောင်း ကြားဖူးကြမှာပါ ဒါက ဒဏ်ရာပေါင်း ရာချီကို ကုသပေးနိုင်တဲ့ အဝါရောင်အဆင့် အထွတ်အထိပ် ဝိညာဉ်သီး ဖြစ်ပါတယ်"
"ရွှေအမြုတေအဆင့် မြွေမိစ္ဆာတွေ ကောင်းကင်ဘေးဒုက္ခကို မကျော်ဖြတ်နိုင်ဘဲ သေဆုံးသွားတဲ့ သေမင်းတမန်ဇုန်တွေမှာပဲ ပေါက်ရောက်တာမို့ အရမ်းရှားပါးပါတယ်"
လူငယ်အုပ်စု၏ အသက်ရှူသံများမှာ အနည်းငယ် မြန်ဆန်လာသည်။
"ဒီအသီးရဲ့ အခြေခံဈေးက ဝိညာဉ်ကျောက်တုံး ၁၀၀၀ ဖြစ်ပြီး တစ်ကြိမ်တိုးရင် အနည်းဆုံး ၅၀ တိုးရပါမယ် စိတ်ဝင်စားသူများ လေလံဆွဲနိုင်ပါပြီ"
ချီသန့်စင်ခြင်းအဆင့်နှင့် အခြေခံတည်ဆောက်ခြင်းအဆင့် ကျင့်ကြံသူများအတွက် ကျောက်တုံး ၁၀၀၀ မှာ မနည်းလှပေ။
ကုသရေးပစ္စည်းတစ်ခုတည်းအတွက် ထိုမျှသုံးရန် လူအများစုက တွန့်ဆုတ်နေကြသည်။
ဆိုင်ရှင်လင်းက ပြုံးကာ သတိပေးသည်
"လေလံဆွဲတဲ့အခါ အသံလွှင့်ကျင့်စဉ် ကို သုံးပါ ဈေးအမြင့်ဆုံးပေးသူက ရမှာပါ"
လူငယ်မှာ အံ့သြသွားသည်
"အသံလွှင့်ပြီး လေလံဆွဲရတာလား"
သူက ချက်ချင်းပင်
"၁၀၅၀ ကျောက်တုံး"
ဟု လှမ်းပြောလိုက်သည်။
ခဏအကြာတွင် ဆိုင်ရှင်လင်း၏ အသံက လူငယ်၏ စိတ်ထဲတွင် ပေါ်လာသည်
"ညီလေး တစ်ယောက်က ၁၁၀၀ ပေးထားတယ်"
လူငယ်သည် ဘေးပတ်ဝန်းကျင်ကို သံသယဖြင့် ကြည့်လိုက်သည်။
အသံလွှင့်စနစ်မှာ ဒုက္ခမရောက်အောင် ကာကွယ်ပေးသော်လည်း လေလံပွဲ စီစဉ်သူများက ဈေးတင်ရန်အတွက် ပြိုင်ဘက်အတုများကို ဖန်တီးကာ လိမ်လည်ရန်လည်း အလွန်လွယ်ကူသည်။
သို့သော် သူ၏ ဆရာဒဏ်ရာအတွက် ထိုအသီးကို ရအောင်ယူရမည်ဟု အံကြိတ်ကာ ဆက်၍ လေလံဆွဲတော့သည်။
လက်ဖက်ရည်တစ်အိုးစာ အချိန်ကုန်လွန်ပြီးနောက်.ာ
ဆိုင်ရှင်လင်းက ရယ်မောကာ ကြေညာသည်
"မြွေဝိညာဉ်သီးကို ၁၃၅၀ ကျောက်တုံးနဲ့ ရောင်းချလိုက်ပါပြီ"
ဖန့်ချန်ကတော့ ပြုံးနေမိသည်။
ထိုလူငယ်များသည် ဆိုင်ရှင်လင်းနှင့် ကောင်းကင်ရတနာခန်းမ တစ်ခုလုံးမှာ ဤအရပ်ရှိ အကောက်ကျစ်ဆုံး ရာဇဝတ်ဂိုဏ်းကြီးဖြစ်သည်ကို မသိကြရှာပေ။
အသံလွှင့်စနစ်မှာ သူတို့၏ အကြံအဖန်များအတွက် အလွန်အဆင်ပြေစေသည်။
နောက်ထပ် ပစ္စည်းများစွာကို လေလံတင်နေစဉ် ဖန့်ချန်က ငြိမ်သက်နေခဲ့သည်။
မွန်းလွဲပိုင်းသို့ ရောက်သောအခါမှ မိစ္ဆာနှိမ်နင်းရေး စက်ဝိုင်း ထွက်ပေါ်လာသည်။
၎င်းမှာ လခြမ်းပုံသဏ္ဌာန်ရှိပြီး အနက်ရောင် ဝိညာဉ်သတ္တုဖြင့် ပြုလုပ်ထားကာ ခက်ထန်သော ဝိဇ္ဇာဓိုရ် ရုပ်ပုံ ၈ ခု ထွင်းထုထားသည်။
ထူးခြားဆန်းကြယ်သော အငွေ့အသက်များ ထွက်ပေါ်နေသည်။
"ဒီစက်ဝိုင်းက ကျွန်တော်တို့ဆိုင်မှာ ရှိနေတာ ကြာပါပြီ ဝိညာဉ်တံဆိပ် ၈၀ ရှိပေမဲ့ ယခင်ပိုင်ရှင်က ၄၀ ကို ပိတ်ထားခဲ့လို့ စွမ်းအားအပြည့် မထုတ်နိုင်သေးပါဘူး"
"ဒါပေမဲ့ အဝါရောင်အဆင့် အထွတ်အထိပ်ရတနာ ဖြစ်နေတုန်းပါပဲ အဲဒီအပိတ်တွေကို ဖွင့်နိုင်မယ့်သူဆိုရင် အစွမ်းထက်တဲ့ လက်နက်တစ်ခု ရမှာပါ"
ဆိုင်ရှင်လင်းက ဆိုသည်
"အခြေခံဈေး ၅၀၀၀၊ တစ်ကြိမ်တိုးရင် ၂၀၀ ပါ"
ခန်းမတစ်ခုလုံး တိတ်ဆိတ်သွားသည်။ ဖန့်ချန်သည် အသံလွှင့်ကာ လေလံဆွဲလိုက်သည်။
ဈေးနှုန်းမှာ မျက်စိတစ်မှိတ်အတွင်း ၆၈၀၀ သို့ ရောက်သွားသည်။ ဖန့်ချန် မျက်မှောင်ကြုတ်လိုက်မိသည်။ ဆိုင်ရှင်လင်းက ဈေးကစားနေတာပဲ
ပုံမှန်ဆိုလျှင် ဝိညာဉ်တံဆိပ် ၈၀ ရှိသော အထွတ်အထိပ်ရတနာမှာ ၈၀၀၀ မှ ၉၀၀၀ ကြား ရှိသော်လည်း ထိုပစ္စည်းမှာ တစ်ဝက်အပိတ်ခံထားရသဖြင့် အဆင့်မြင့်ရတနာနှင့်သာ တူညီသည်။
ထိုမျှ မြန်မြန် ဈေးတက်လာစရာ အကြောင်းမရှိပေ။
ဖန့်ချန်က ဈေးထပ်တင်လိုက်သည်
"၇၀၀၀ ဆိုင်ရှင်လင်း အဲဒီထက် ပိုပေးမယ့်သူရှိရင် သူတို့ကိုပဲ တိုက်ရိုက် ရောင်းပေးလိုက်တော့"
မျှော်လင့်ထားသည့်အတိုင်း ဆိုင်ရှင်လင်းက ၇၀၀၀ ဖြင့် ရောင်းချလိုက်ကြောင်း ကြေညာသည်။
ရွှေအမြုတေအဆင့် ပညာရှင်အချို့က မကျေမနပ်ဖြင့် ဘေးဘီကို ဝေ့ကြည့်နေကြသည်။
အရောင်းအဝယ် အဆင့်ကို ရောက်သောအခါ ဖန့်ချန်သည် သီးသန့်အခန်းသို့ သွားကာ ၇၀၀၀ ပေးချေပြီး မိစ္ဆာနှိမ်နင်းရေး စက်ဝိုင်း ကို ရယူလိုက်သည်။
ဆိုင်ရှင်လင်းက အလိုက်တသိ သတိပေးသည်
"သခင်လေး သတိထားပါဦး မိစ္ဆာတိမ်တိုက် အင်ပါယာက မအေးချမ်းဘူး တခြားသူတွေက မင်းဆီက လုဖို့ ကြံစည်နေနိုင်တယ်"
"ငါ ဝယ်လိုက်တာကို ဘယ်သူမှ မှ မသိတာ ဘယ်သူက လုမှာလဲ တစ်ယောက်ယောက်က လာလုတယ်ဆိုရင် မင်းတို့ ကောင်းကင်ရတနာခန်းမ ကလူတွေပဲ ဖြစ်မှာပေါ့"
ဟု ဖန့်ချန်က ပြန်ပြောသည်။
ဆိုင်ရှင်လင်း၏ အပြုံးမှာ ပျက်မသွားဘဲ ပို၍ပင် နွေးထွေးသွားသည်
"သခင်လေးက နောက်ပြောင်တတ်သားပဲ ကျွန်တော်တို့ရဲ့ လုပ်ငန်းက တိမ်မြုပ်တိမ်တိုက် နယ်မြေ တစ်ခုလုံးမှာ ပြန့်နှံ့နေတာပါ ဒီလောက် အမြတ်အစွန်းလေးအတွက်နဲ့ ဂုဏ်သိက္ခာ အပျက်မခံပါဘူး"
ဖန့်ချန်သည် ခေါင်းညိတ်ကာ ထွက်ခွာလာခဲ့သည်။
ဖန့်ချန်သည် လမ်းတွင် စဉ်းစားနေမိသည်။ တိမ်မြုပ်တိမ်တိုက် နယ်မြေ...
"ရှောင်ကျိုး သူပြောတဲ့ တိမ်မြုပ်တိမ်တိုက် နယ်မြေဆိုတာ ဘာလဲ"
စကြာဝဠာမှန်ချပ်က ရှင်းပြသည်
"တိမ်မြုပ်တိမ်တိုက် နယ်မြေဆိုတာ မိုးပြာတိမ်တိုက် အင်ပါယာနဲ့ တိမ်မြုပ်ထာဝရ အင်ပါယာတို့ရဲ့ နယ်မြေတွေကို ခေါ်တာ"
" အဲဒီထဲမှာ အဆင့် ၅ အင်ပါယာ ၃၇ ခု၊ အဆင့် ၆ ၁၉၃ ခု၊ အဆင့် ၇ ၅၇၁ ခု၊ အဆင့် ၈ ၉၂၈ ခုနဲ့ အဆင့် ၉ အင်ပါယာပေါင်း ၃၅၀၆ ခု ပါဝင်တယ်"
ဖန့်ချန် အံ့သြသွားသည်။
မဟာဝေအင်ပါယာသည် တိမ်မြုပ်ထာဝရ အင်ပါယာအောက်မှာ ရှိခြင်းဖြစ်သည်။
ထိုမျှ ကျယ်ပြောလှသော နယ်မြေများကြားတွင် မဟာရှ ကဲ့သို့ နိုင်ငံငယ်လေးမှာ သမုဒ္ဒရာထဲက ရေတစ်စက်မျှသာ ရှိပေမည်။
"ရှောင်ကျိုး ဝိညာဉ်သွေးဂိုဏ်းရဲ့ ရည်ရွယ်ချက်က မဟာချန်းနဲ့ မဟာဝေကို စစ်တိုက်ခိုင်းရုံတင် မကဘဲ အထက်က အဆင့် ၄ အင်ပါယာကြီးနှစ်ခုကိုပါ စစ်ဖြစ်အောင် ဆွပေးနေတာ ထင်တယ်"
"ဒီအင်ပါယာကြီးတွေ စစ်ဖြစ်ပြီဆိုရင် သူတို့အောက်က ထောင်ချီတဲ့ နိုင်ငံတွေပါ ပါဝင်လာပြီး လူသန်းပေါင်းများစွာ သေကြေပျက်စီးရလိမ့်မယ်"