အခန်း (၄၀၉-၄၁၀)
Vol. 41 Ch. 409-410
အခန်း ၄၀၉ - နဂါးသွေးမျိုးဆက်
စကြာဝဠာမှန် ၏ စကားကို ကြားလိုက်ရသော်လည်း ဖန့်ချန်၏ မျက်နှာတွင် ဘာမှ မပေါ်လွင်ပေ။
သူသည် ကျောက်စိမ်းသေတ္တာကို ဖွင့်ကာ အထဲသို့ တစ်ချက်ကြည့်လိုက်သည်။ အထဲတွင် ဖန်ခါးသီးအရွယ်ခန့် ရှိသော ဆေးလုံးတစ်လုံး ရှိနေသည်။
ထိုဆေးလုံးမှာ တစ်ခုလုံး အနီရောင်ဖြစ်ပြီး ဆေးမျက်နှာပြင်မှာ သတ္တုရောင်ခြည်ကဲ့သို့ ဖျော့ဖျော့လေး တောက်ပနေသည်။
သေတ္တာကို ဖွင့်လိုက်ရုံဖြင့် လူကို လန်းဆန်းသွားစေသော ထူးခြားသည့် ရနံ့တစ်ခုမှာ ပျံ့လွင့်လာတော့သည်။
"လက်ဆောင်အတွက် ကျေးဇူးတင်ပါတယ် ဘိုးဘေးကြီး"
ဖန့်ချန်က သေတ္တာကို ပြန်ပိတ်ကာ ဖန့်ဝမ်လီကို ဂါရဝပြုလိုက်သည်။
"ကျေးဇူးတင်နေဖို့ မလိုပါဘူး"
ဖန့်ဝမ်လီက ပြုံးလိုက်သော်လည်း သူ၏မျက်နှာတွင် ရှုပ်ထွေးသော အရိပ်အယောင်တစ်ခု ဖြတ်ပြေးသွားသည်။
"ဒီဆေးလုံးက တကယ်တော့ နှစ်ပေါင်း ရာနဲ့ချီပြီး လက်ဆင့်ကမ်းလာခဲ့တာပါ"
"ဘာကို ဆိုလိုတာလဲ ဘိုးဘေး"
ဖန့်ချန်က နားမလည်သလို မေးလိုက်သည်။
"ဦးလေး ထင်ယွမ် အနှင်ခံရပြီး မကြာခင်မှာပဲ ငါ့ရဲ့ အဘိုး ဆိုလိုတာက မင်းရဲ့ ဘိုးဘေးရဲ့ ဘိုးဘေးပေါ့ သူ ကွယ်လွန်ခါနီးမှာ ဒီ အခြေခံတည်ဆောက်ခြင်းဆေးလုံးကို ချန်ထားခဲ့တာ"
"ဦးလေး ထင်ယွမ်ရဲ့ မျိုးဆက်တစ်ယောက်ယောက် မိသားစုဆီ ပြန်ရောက်လာပြီး ပါရမီလည်း ရှိခဲ့မယ်ဆိုရင် ဒီဆေးလုံးကို ပေးလိုက်ပါလို့ သူက မှာခဲ့တာ"
ဟု ဖန့်ဝမ်လီက ပြုံးလျက် ရှင်းပြသည်။
"ဒါကြောင့် မင်းမြင်တဲ့အတိုင်း ဒီဆေးလုံးက မူလကတည်းက မင်းနဲ့ ဆိုင်တာပါ အဲဒါကြောင့် ငါ့ကို ကျေးဇူးတင်နေဖို့ မလိုဘူး"
ထိုသို့ပြောပြီးနောက် ဖန့်ဝမ်လီက ကျန်းထျန်းအိုက်၏ ခေါင်းကို ခပ်ဖွဖွ ပုတ်လိုက်သည်။
"မြေးမလေး အားရင် ဘိုးဘေးဆီ လာလည်ပြီး စကားပြောဦးနော် ဘိုးဘေးကြီးက မြေးမလေးကို အထင်ကြီးနေတာ"
" မြေးမလေးက သာမန်နောက်ခံတော့ မဟုတ်လောက်ဘူး ဒါကြောင့်လည်း ကျွယ်မိသားစုက မြေးမလေးကို ရန်လုပ်ချင်နေတာပေါ့"
ကျန်းထျန်းအိုက်က ခေါင်းညိတ်သည်။
"ဘိုးဘေးကြီး ကျွန်မ အားရင် လာရှာပါ့မယ်"
ဖန့်ဝမ်လီက တဟားဟား ရယ်မောကာ လှည့်ထွက်သွားတော့သည်။
လီချန်းနှင့် ချန်ဖေးလန်တို့က ဖန့်ချန်ကို အပြေးအလွှား ဂုဏ်ပြုကြသည်။
"ဂုဏ်ယူပါတယ် သခင်လေး"
"အစ်ကို ဖန့် က မကြာခင် အခြေခံတည်ဆောက်ခြင်းအဆင့်ကို ရောက်တော့မှာပေါ့ ဦးလေးကျန်း က ပြောတယ် အခြေခံတည်ဆောက်ခြင်းအဆင့်ကို ရောက်ရင် ကျင့်ကြံခြင်းလောကမှာ နေရာတစ်ခု ရပြီတဲ့"
ဟု ကျန်းထျန်းအိုက်က ဝမ်းသာအားရ ပြောသည်။
ဖန့်ချန်က ပြုံးကာ ခေါင်းညိတ်ပြလိုက်သည်။
သူသည် ဘာမှမပြောဘဲ သူ၏ တိတ်ဆိတ်သော ကျင့်ကြံရာ အခန်းထဲသို့ လျှောက်လှမ်းသွားတော့သည်။
အခန်းထဲသို့ ရောက်သည်နှင့် သူသည် စကြာဝဠာမှန် ကို ထုတ်ယူကာ မေးလိုက်သည်။
"မှန်ချပ်လေး မင်း ခုနက ပြောတာ ဘာလဲ ဘာလို့ ဒီဆေးလုံးက ငါ့အတွက် အသုံးမဝင်တာလဲ"
ဓားငယ်လေး ၏ အသံက ဝင်လာသည်။
"ချန်လေး သူက မင်းဆီက ဝိညာဉ်ကျောက်တုံးတွေကို လိမ်ယူချင်နေတာ သူ့ကို မမေးနဲ့"
စကြာဝဠာမှန်က ပြန်ပြောသည်
"ဒီကလေးစုတ် ငါသာ ငါ့အစ်ကို ကို လိမ်ချင်ရင် လိမ်တာ ကြာပြီ မင်းရဲ့ အနိမ့်စား စိတ်ဓာတ်နဲ့ တခြားသူတွေကို လိုက်မတိုင်းတာနဲ့"
"မင်းကမှ အနိမ့်စား"
ဓားငယ်လေးက ပြန်အော်သည်။
စကြာဝဠာမှန်က သူ့ကို အဖက်မလုပ်တော့ဘဲ ဖန့်ချန်ကို ပြောလိုက်သည်။
"အစ်ကိုကြီး အစ်ကိုကြီးရဲ့ အခြေခံက အရမ်းခိုင်မာတယ် ပြီးတော့ အဲဒါက အင်မော်တယ်ဓား မျိုးဆက်ရဲ့ အခြေခံမျိုး"
" ဒီလို အခြေခံမျိုးက အင်မော်တယ်လောကမှာတောင် ရှားတယ် ဒီလိုနေရာမျိုးမှာဆို ပြောနေစရာတောင် မလိုဘူး"
"သာမန် အခြေခံတည်ဆောက်ခြင်းဆေးလုံးတွေက အင်မော်တယ် ဓားမျိုးဆက်ရဲ့ အခြေခံကို လုံးဝ မလှုပ်ခတ်နိုင်ဘူး တကယ်လို့ အကျိုးရှိချင်ရင် သူတော်စင်အဆင့် ဆေးလုံး ဖြစ်မှ ရမယ်"
"သူတော်စင်အဆင့် ဆေးလုံး ဟုတ်လား"
ဖန့်ချန်၏ အမူအရာ ပြောင်းလဲသွားသည်။
"ဒါဆို အခြေခံတည်ဆောက်ခြင်းဆေးလုံးတွေမှာလည်း အဆင့်တွေ ခွဲထားတာလား"
"ဟုတ်တယ် ဒါက အဝါရောင်အဆင့်အလယ်အလတ် ဆေးလုံးဆိုပေမဲ့ သူ့ရဲ့ အရေးပါပုံက အနက်ရောင်အဆင့် ဆေးလုံးအချို့ထက်တောင် ပိုသေးတယ်"
" ဆေးလုံးရဲ့ အရည်အသွေးက အခြေခံတည်ဆောက်ခြင်း အောင်မြင်မှုကို အဆုံးအဖြတ်ပေးတာပဲ ဥပမာ အစ်ကိုကြီး လက်ထဲက ဆေးလုံးဆိုရင် အစ်ကိုကြီး သောက်သောက် မသောက်သောက် ဘာမှ ထူးမှာ မဟုတ်ဘူး"
ဟု စကြာဝဠာမှန်က ရှင်းပြသည်။
"ဆေးလုံးတွေကို လူသားအဆင့် ၄ ဆင့်နဲ့ သူတော်စင်အဆင့် ၃ ဆင့် စုစုပေါင်း ၇ ဆင့် ခွဲထားတယ် အစ်ကိုကြီး လက်ထဲကဟာက လူသားအဆင့် ပဲ ရှိသေးတယ်"
"အခြေခံအကျဆုံး ဆေးလုံးပေါ့ သာမန်ကျင့်ကြံသူတစ်ယောက် သောက်ရင်တောင် အောင်မြင်နှုန်း ၂၀ ရာခိုင်နှုန်းထက် မပိုဘူး အစ်ကိုကြီးအတွက် ဆိုရင်တော့ သောက်လိုက်ရင် အောင်မြင်နှုန်း ဝ ရာခိုင်နှုန်းပဲ"
ဖန့်ချန်မှာ အံ့သြသွားသည်။
"ဖန့်မိသားစုက ဘိုးဘေးနှစ်ယောက်တောင် ဒါကို သိပုံမရဘူး"
စီနီယာ ယွမ်ဟယ် ကလည်း ဒါကို ဘာမှ မပြောခဲ့သဖြင့် ဖန့်ချန်၏ အခြေခံက ထိုမျှအထိ ခိုင်မာနေလိမ့်မည်ဟု သူ ထင်မထားခဲ့ခြင်း ဖြစ်နိုင်သည်။
"ဟုတ်တယ် အဲဒီနှစ်ယောက်က အပေါ်ယံလောက်ပဲ သိတာ အစ်ကိုကြီးရဲ့ အခြေခံနဲ့ဆိုရင် အနည်းဆုံး သူတော်စင်အဆင့် ၁ ဆေးလုံး ရှိမှ အောင်မြင်နှုန်း ၂၀ ရာခိုင်နှုန်း ရှိမှာ"
ဟု စကြာဝဠာမှန်က ဆိုသည်။
ဖန့်ချန်က မျက်မှောင်ကြုတ်ကာ
"အဲဒီလို ဆေးလုံးမျိုး ဘယ်မှာ ရှာရမလဲကုန်သွယ်ရေးညီလာခံမှာတောင် အဲဒီအဆင့်မျိုး ရှိနိုင်မှာ မဟုတ်ဘူး"
သူသည် ညီလာခံပြီးလျှင် မဟာရှသို့ ပြန်ရန် စီစဉ်ထားသည်။
မဟာရှရောက်မှသာ အခြေခံတည်ဆောက်ခြင်းအတွက် ဂူအောင်းကျင့်ကြံမည်ဟု တွေးထားခြင်း ဖြစ်သည်။
"အစ်ကိုကြီး ကျွန်တော့်ကို အဆင့်နိမ့် ဝိညာဉ်ကျောက်တုံး တစ်သောင်း ပေးမယ်ဆိုရင် ကံကောင်းရင် ၃ ရက်အတွင်း အစ်ကိုကြီး လက်ထဲက ဆေးလုံးကို သူတော်စင်အဆင့် ၁ ဆေးလုံးဖြစ်အောင် ကျွန်တော် ပြောင်းလဲပေးနိုင်တယ်"
ဟု စကြာဝဠာမှန်က ဆိုသည်။
"မင်းက တကယ့်ကို အရှက်မရှိတာပဲ နည်းလမ်းရှိရင် ပြောပြလိုက်ပါလား ဘာလို့ ဝိညာဉ်ကျောက်တုံး တစ်သောင်း လိုရတာလဲ"
ဓားငယ်လေးက ကြားဖြတ်ပြောသည်။
"ကလေး ဒါက စည်းကမ်းပဲ မင်းက ငါ့ရဲ့ အခက်အခဲတွေကို နားမလည်ရင်လည်း ငါ မင်းကို အပြစ်မတင်ပါဘူး ဒီတိုင်း ငြိမ်ငြိမ်နေစမ်းပါ အစ်ကိုကြီး က ဆုံးဖြတ်လိမ့်မယ် အရင်တုန်းက ငါသာ မရှိရင် မင်း တိုးတက်နိုင်ပါ့မလား"
စကြာဝဠာမှန်က ပြန်ပက်လိုက်သည်။
ဖန့်ချန်၏ စိတ်က လှုပ်ရှားသွားသည်။
"၃ ရက်အတွင်းလား ဒီဆေးလုံးကို သူတော်စင်အဆင့် ဖြစ်အောင် ပြောင်းနိုင်တယ်လို့ မင်းပြောတာလား"
"ဟုတ်တယ် အခြေခံတည်ဆောက်ခြင်းဆေးလုံးတွေက ထူးခြားတယ် ဆေးလုံး ဖြစ်ပြီးသွားရင်တောင် ဒုတိယအကြိမ် ပြန်လည်ချက်လုပ် လို့ ရတယ်"
" တကယ်တော့ သူတော်စင်အဆင့် ဆေးလုံးတွေကို ဒီနည်းနဲ့ပဲ ဖန်တီးတာ တိုက်ရိုက်ချက်လုပ်ဖို့က မဖြစ်နိုင်သလောက်ပဲ"
ဖန့်ချန်က ခေါင်းညိတ်ကာ ဝိညာဉ်ကျောက်တုံး တစ်သောင်းကို စကြာဝဠာမှန်ဆီသို့ တိုက်ရိုက် လွှဲပေးလိုက်သည်။
စကြာဝဠာမှန်၏ အရှိန်အဝါများ မြင့်တက်လာပြီး ကျောက်တုံးများကို စုပ်ယူတော့သည်။
အမွှေးတိုင်တစ်တိုင် ကုန်ဆုံးချိန်ခန့်တွင် စကြာဝဠာမှန်မှာ ကျောက်တုံးတစ်သောင်းလုံးကို စားသုံးပြီးသွားကာ ကျေနပ်အားရနေပုံရသည်။
ဖန့်ချန်သည် စကြာဝဠာမှန်၏ အရှိန်အဝါမှာ သိသိသာသာ ပိုမိုအားကောင်းလာသည်ဟု ခံစားလိုက်ရသည်။
"အာ နေလို့ကောင်းလိုက်တာ ဒီလို သက်သောင့်သက်သာ ဖြစ်တာမျိုး မတွေ့ရတာ ကြာပြီ"
စကြာဝဠာမှန်က ဟားတိုက်ရယ်မောသည်။
"အစ်ကိုကြီး စာမျက်နှာ ၂၅ ကို လှန်လိုက်"
ဖန့်ချန်သည် စာမျက်နှာ ၂၅ သို့ လှန်လိုက်ပြီး သူ၏ ဝိညာဉ်အသိကို ထိုစာမျက်နှာပေါ်သို့ အာရုံစိုက်လိုက်သည်။
အဝေးတစ်နေရာတွင် ကျင့်ကြံသူ အများအပြား ဝန်းရံထားသော ဝဝကစ်ကစ်လူငယ်တစ်ဦးကို တွေ့လိုက်ရသည်။
သူတို့အားလုံးသည် ဦးတည်ချက်တစ်ခုသို့ ပျံသန်းနေကြသည်။
"သခင်လေး ကျွန်တော်တို့ မဟာချန်း မြို့တော်ကို ရောက်တော့မယ်"
ဟု အသံတစ်သံ ထွက်လာသည်။
ထိုလူငယ်က တဟီးဟီး ရယ်ကာ
"ကောင်းလိုက်တာ ကြားတာတော့ မိုးပြာအင်ပါယာက နတ်သမီး ထျန်းယဉ် လည်း ကုန်သွယ်ရေးညီလာခံကို လာမယ်ဆိုပဲ အနှောင့်အယှက်ပေးတဲ့ လူတွေနဲ့ မတွေ့ရအောင် ငါ မြန်မြန်သွားမှ ဖြစ်မယ်"
"ဘိုးဘေးကြီးက မဟာချန်းကို သွားရင် သတိထားဖို့ မှာလိုက်တယ်နော် မဟာချန်းက မဟာဝေ နဲ့ အမြဲ ရန်လိုနေတာ ပြဿနာမဖြစ်အောင် ခပ်အေးအေးပဲ နေတာ အကောင်းဆုံးပဲ သခင်လေး"
ဟု နောက်ထပ် အသံတစ်သံက အကြံပေးသည်။
"စိတ်မပူပါနဲ့ ငါ့ကို ဘယ်သူက ရန်လုပ်ရဲမှာလဲ မဟာဝေကို မျက်နှာမထောက်ရင်တောင် တုန်းဖန်းမိသားစု ကိုတော့ မျက်နှာထောက်ရမှာပေါ့"
ဟု ထိုလူငယ်က ဂုဏ်ယူစွာ ဆိုသည်။
သူသည် မဟာဝေ အင်ပါယာထက် သူ၏ တုန်းဖန်းမိသားစုကို ပို၍ တန်ဖိုးထားပုံရသည်။
ဖန့်ချန်၏ မျက်လုံးများ လက်ခနဲ ဖြစ်သွားသည်။
"စကြာဝဠာမှန်က စာမျက်နှာထဲက အသံတွေကိုပါ ကြားရစေတာပဲ တကယ့်ကို ဆန်းကြယ်လိုက်တာ"
"အစ်ကိုကြီး အဲဒီ ဝတုတ် ကောင်လေးကို မြင်လားသူ့ရဲ့ သွေးကြောထဲမှာ နဂါးသွေး စီးဆင်းနေတယ် သူ့ရဲ့ အနှစ်သာရသွေး ၁၀ စက်လောက် ရမယ်ဆိုရင် အစ်ကိုကြီး လက်ထဲက သာမန်ဆေးလုံးကို သူတော်စင်အဆင့် ၁ ဆေးလုံးဖြစ်အောင် ပြောင်းလို့ရပြီ သွေး ပိုရလေ အဆင့် ပိုမြင့်လေပဲ"
ဟု စကြာဝဠာမှန်က ဆိုသည်။
"သူက တုန်းဖန်းမိသားစုရဲ့ သခင်လေးလား သူ့ရဲ့ နောက်ခံက ဘာလဲ ဘာလို့ သူ့မှာ နဂါးသွေး ရှိနေရတာလဲ"
ဖန့်ချန်က သူ၏ အသိစိတ်ကို ကိုယ်ခန္ဓာထဲ ပြန်သွင်းကာ တိုးတိုးလေး မေးလိုက်သည်။
"အစ်ကိုကြီး မသိသေးလို့ပါ ရှေးခေတ်တုန်းက နဂါးတွေက နေရာတိုင်းမှာ ရှိခဲ့တာ နဂါးစစ်စစ်တွေက သူတို့အတွက် အဆင်ပြေအောင် သာမန်လူတွေကို သူတို့ရဲ့ အစေအပါးအဖြစ် ရွေးချယ်ခဲ့ကြတယ်"
"အစေအပါးအဖြစ် အမှုထမ်းပြီး အောင်မြင်မှုရတဲ့သူတွေကို နဂါးတွေက နဂါးသွေးတွေ ဆုချခဲ့တယ်အဲဒီကနေ နဂါး မျိုးဆက်တွေ ဖြစ်လာတာပေါ့"
"နောက်ပိုင်းမှာ နဂါးစစ်စစ်တွေ တဖြည်းဖြည်း ပျောက်ကွယ်သွားတဲ့အခါ နဂါးသွေး ပါတဲ့သူတွေက သူတို့ကိုယ်သူတို့ နဂါးသွေးမျိုးဆက် လို့ ခေါ်ကြတယ်"
"နဂါးသွေးက နတ်ဘုရားဆန်တဲ့ အစွမ်းတွေ ရှိနေတော့ ကျင့်ကြံသူ အများအပြားက ဒီမျိုးဆက်တွေကို လိုက်လံ သတ်ဖြတ်ကြတော့တာပဲ"
"ကြာလာတော့ နဂါးသွေးမျိုးဆက်တွေက လူမြင်ကွင်းကနေ ပျောက်ကွယ်သွားပြီး နောက်ဆုံးမှာတော့ လူတွေက သူတို့ မျိုးသုဉ်းသွားပြီလို့တောင် အထင်မှားခဲ့ကြတယ်"
"ဒါဆို တုန်းဖန်းမိသားစုက တကယ့်ကို ထူးခြားတဲ့ နောက်ခံရှိတာပဲ အဆင့် ၄ အင်ပါယာ ဒါမှမဟုတ် အဆင့် ၃ အင်ပါယာတွေနဲ့တောင် ပတ်သက်နေနိုင်တယ် ဒါကြောင့်လည်း ဝိညာဉ်သွေးဂိုဏ်းက ဒီကောင်လေးကို သတ်ဖို့ ကြိုးစားနေတာကိုး"
ဖန့်ချန်က ခဏမျှ စဉ်းစားပြီးမှ ဆက်ပြောသည်။
"ဒါပေမဲ့ သူ့ဆီက အနှစ်သာရသွေးကို ဘယ်လို ယူရမလဲ သူတို့က လူ့လောကမှာ ပုန်းနေတယ်ဆိုတာ သူတို့ရဲ့ နဂါးသွေးမျိုးဆက် အထောက်အထားကို မပေါ်စေချင်လို့ပဲ ဖြစ်မှာ ငါသာ တိုက်ရိုက် သွားတောင်းရင် ငါ့ကို နုတ်ပိတ်ဖို့ ကြိုးစားကြမှာ မဟုတ်လား"
အခန်း ၄၁၀ - မင်းက ငါ့ကို ဓားပြတိုက်ခိုင်းနေတာလား
"အဖြေက ရိုးရိုးလေးပဲ မဟုတ်လား အစ်ကိုကြီးမျက်နှာဖုံးလေးတစ်ခု စွပ် သူ့နားကပ်ဖို့ အခွင့်အရေးရှာပြီး သူနဲ့ ကောင်းကောင်းမွန်မွန်လေး စကားပြောလိုက်ပေါ့"
"ဒါဆိုရင် သူက သူ့ရဲ့ အနှစ်သာရသွေးကို လိုလိုလားလား ပေးပါလိမ့်မယ်"
ဟု စကြာဝဠာမှန် က လျှို့ဝှက်ဆန်းကြယ်စွာ အကြံပေးသည်။
ဖန့်ချန်၏ မျက်မှောင်များ ကြုတ်သွားသည်။
"မင်းက ငါ့ကို သူ့ဆီကနေ ဓားပြတိုက်ခိုင်းနေတာလား"
ထပ်ပြီး စဉ်းစားကြည့်သောအခါ တစ်ဖက်လူမှာ ဝိညာဉ်သွေးဂိုဏ်း ကျင့်ကြံသူများက သူ့ကို သတ်ရန် ကြံစည်နေသည့် အန္တရာယ်ရှိသော အခြေအနေကို လုံးဝ မသိသေးပေ။
"ငါက မင်းကို ကယ်မယ် မင်းက ငါ့ကို သွေးပေးမယ် ဒါက မျှတတဲ့ အလဲအလှယ်ပဲ"
ဟု ဖန့်ချန်က တစ်ယောက်တည်း ရေရွတ်လိုက်ပြီး မေးလိုက်သည်။
"သူ မဟာချန်း မြို့တော်ကို ရောက်ဖို့ ဘယ်လောက် လိုသေးလဲ"
"ဒီနေ့ပဲ ရောက်လိမ့်မယ်"
ဟု စကြာဝဠာမှန်က ပြန်ဖြေသည်။
"သူ့ဘေးမှာ ဝိညာဥ်သန္ဓေသားအဆင့် ကျင့်ကြံသူ တစ်ယောက် ပါလာနိုင်တယ် သူ့နားကပ်ဖို့က မလွယ်ဘူး"
ဟု ဖန့်ချန်က တွေးတောနေမိသည်။
"နဂါးသွေးမျိုးဆက်တွေက ဝိညာဥ်ရင်းမြစ်ကျောက်တုံး တွေကို အာရုံခံနိုင်စွမ်း အလွန်ကောင်းကြပြီး အဲဒါတွေကို စုဆောင်းတတ်ကြတယ်"
"မြို့ပြင်က ဝိညာဥ်ရင်းမြစ်ကျောက်စျေးကွက် ရှိတာကို မမေ့နဲ့ဦး အဲဒီမှာ မင်းအတွက် အခွင့်အရေးတွေ အများကြီး ရှိလိမ့်မယ်"
ဟု စကြာဝဠာမှန်က သတိပေးလိုက်သည်။
ညသို့ ရောက်သောအခါ မဟာချန်း မြို့တော်ကြီးမှာ မီးရောင်စုံများဖြင့် လင်းထိန်နေပြီး နေ့ခင်းဘက်ထက်ပင် ပို၍ စည်ကားနေပုံရသည်။
ချန်းဖုန်းနှင့် ချန်းကျိုယဲ့တို့သည် မင်းသမီး ရှင်းလုံ၏ နောက်တွင် လိုက်ပါရင်း မြို့တံခါးဝတွင် တိတ်ဆိတ်စွာ စောင့်ဆိုင်းနေကြသည်။
"အဒေါ် ကျွန်တော်တို့က မဟာဝေ အင်ပါယာနဲ့ ဆက်ဆံရေး မကောင်းဘူးလေ ဘာလို့ တုန်းဖန်းမိသားစုရဲ့ သခင်လေးကို ကိုယ်တိုင်လာကြိုရတာလဲ"
ဟု ချန်းကျိုယဲ့က သူ၏ သိချင်စိတ်ကို မထိန်းနိုင်ဘဲ မေးလိုက်သည်။
ချန်းဖုန်းက ချးန်ကျိုယဲ့ကို တစ်ချက်ကြည့်လိုက်စဉ် သူ၏ မျက်လုံးထဲတွင် အေးစက်သော အပြုံးတစ်ခု ဖြတ်ပြေးသွားသည်။
သူက ထိုကိစ္စကို အနည်းငယ် သိထားသည်။
မဟာဝေရှိ တုန်းဖန်းမိသားစုမှာ ဒေသခံမျိုးနွယ်မဟုတ်ဘဲ အခြားနေရာမှ ပြောင်းရွှေ့လာခြင်းဖြစ်ကြောင်း သူတို့၏ နောက်ခံမှာ အလွန်ဆန်းကြယ်ပြီး အဆင့် ၄ သို့မဟုတ် အဆင့် ၃ အင်ပါယာများအထိ ပတ်သက်နေနိုင်ကြောင်း သတင်းများ ထွက်နေသည်။
"မဟာဝေက မဟာဝေပဲ တုန်းဖန်းမိသားစုက တုန်းဖန်းမိသားစုပဲ သူတို့က မတူကြဘူး"
ဟု မင်းသမီး ရှင်းလုံက အသေးစိတ် ရှင်းမပြဘဲ အေးဆေးစွာ ပြောလိုက်သည်။
ဝေဟင်တွင် ရပ်နေသော ဖန့်ချန်သည် ထိုစကားကို ကြားလိုက်သောအခါ မဟာချန်း တော်ဝင်မိသားစုသည်လည်း တုန်းဖန်းမိသားစုအကြောင်းကို အထိုက်အလျောက် သိထားကြောင်း နားလည်သွားသည်။
မကြာမီမှာပင် မင်းသမီး ရှင်းလုံ၏ အကြည့်မှာ ပြောင်းလဲသွားပြီး အလင်းတန်း ဒါဇင်ပေါင်းများစွာသည် ကောင်းကင်ကို ဖြတ်ကျော်ကာ သူတို့ရှေ့သို့ ဆင်းသက်လာကြသည်။
တည်ကြည်သော မျက်နှာရှိသည့် လူလတ်ပိုင်း အမျိုးသားတစ်ဦး ရှေ့သို့ လှမ်းလာပြီး လက်နှစ်ဖက်ကို စုကာ ဂါရဝပြုလိုက်သည်။
"ကျွန်တော်က တုန်းဖန်းမိသားစုက နျဲ့ထျန်းယွမ် ပါမင်းသမီး ရှင်းလုံကို ဂါရဝပြုပါတယ်"
"မိတ်ဆွေ နျဲ့ ကိုး"
မင်းသမီး ရှန်လုံ၏ အကြည့်က နျဲ့ထျန်းယွမ်၏ နောက်က ဝဝကစ်ကစ် ပုံရိပ်ဆီသို့ ရောက်သွားသည်။
"ဒါက..."
"ဒါက ကျွန်တော်တို့ရဲ့ သခင်လေးပါ"
နျဲ့ထျန်းယွမ်က တိုးတိုးလေး ပြောပြီး ထိုဝဝကစ်ကစ် လူငယ်ဘက်သို့ လှည့်လိုက်သည်။
"သခင်လေး ဒါက မဟာချန်းက မင်းသမီး ရှင်းလုံပါ"
ဝဝကစ်ကစ် လူငယ်က မင်းသမီး ရှင်းလုံကို ချက်ချင်း လက်အုပ်ချီလိုက်သည်
"ကျွန်တော် တုန်းဖန်းဟောက်ကျဲ ပါ စီနီယာကို ဂါရဝပြုပါတယ်"
ထို့နောက် သူက ချန်းဖုန်းနှင့် ချန်းကျိုယဲ့တို့ကို တစ်ချက် ကြည့်လိုက်သည်။
"လောလောဆယ် နန်းတော်မှာပဲ ခဏ တည်းခိုပါ"
ဟု မင်းသမီး ရှင်းလုံက ဆိုသည်။
"ဘိုးဘေးကြီးက မင်းတို့ မဟာချန်းမှာ ရှိနေစဉ်အတွင်း လုံခြုံရေးကို အသေအချာ ဂရုစိုက်ပေးဖို့ ကျွန်မကို မှာထားပါတယ်"
တုန်းဖန်းဟောက်ကျဲ က အလျင်အမြန် ပြန်ဖြေသည်။
"အားနာစရာကြီးပါ စီနီယာ ကျွန်တော်တို့ တည်းခိုခန်းမှာပဲ နေပါ့မယ် ကျန်တာတွေကို စိတ်မပူပါနဲ့ ကျွန်တော်တို့က ဒီအတိုင်း လည်ပတ်ဖို့ လာတာပါ အခမ်းအနားတွေ မလိုပါဘူး"
မင်းသမီး ရှင်းလုံက မျက်မှောင်အနည်းငယ် ကြုတ်ကာ နျဲ့ထျန်းယွမ်ကို ကြည့်လိုက်သည်။
"မိတ်ဆွေ နျဲ့"
"သခင်လေး နန်းတော်မှာ နေတာက ပိုပြီး ဘေးကင်းပါတယ်"
ဟု နျဲ့ထျန်းယွမ်က တိုးတိုးလေး ဖျောင်းဖျသည်။
တုန်းဖန်းဟောက်ကျဲက နျဲ့ထျန်းယွမ်ကို စိုက်ကြည့်ကာ နှာခေါင်းရှုံ့လိုက်သည်။
"မင်း ငါ့စကားကိုပဲ နားထောင်ရမယ် ပြီးတော့ ဒီမှာက ဘာတွေ အန္တရာယ်ရှိလို့လဲ တုန်းဖန်းမိသားစုက ဘယ်သူ့ကိုမှ ရန်စထားတာ မဟုတ်ဘူး"
နျဲ့ထျန်းယွမ်က ခါးသီးစွာ ပြုံးလိုက်ပြီး မင်းသမီး ရှင်းလုံကို ကြည့်လိုက်သည်။
"မင်းသမီးရဲ့ စေတနာကို ကျေးဇူးတင်ပါတယ်ကျွန်တော်တို့ တည်းခိုခန်းမှာပဲ နေပါ့မယ်"
မင်းသမီး ရှင်းလုံသည် ခဏမျှ တိတ်ဆိတ်သွားပြီးနောက် ခေါင်းညိတ်လိုက်သည်။
"တစ်ခုခု အကူအညီ လိုအပ်ရင် လမ်းပေါ်က စစ်သည်တွေကို ခေါ်လိုက်ပါ ပြဿနာ တစ်ခုခုဖြစ်ရင် ချက်ချင်း ဖြေရှင်းပေးဖို့ ကျွန်မ သူတို့ကို မှာထားလိုက်ပါ့မယ်"
ချန်းဖုန်းနှင့် ချန်းကျိုယဲ့တို့မှာ တုန်းဖန်းမိသားစု သခင်လေးနှင့် ရင်းနှီးမှု ရချင်သော်လည်း စိတ်ပျက်လက်ပျက်ဖြင့်သာ ကျန်ရစ်ခဲ့တော့သည်။
လမ်းခွဲပြီးနောက် တုန်းဖန်းဟောက်ကျဲနှင့် အဖွဲ့သည် နွေဦးအာရုဏ် တည်းခိုခန်းတွင် ဝင်ရောက် တည်းခိုကြသည်။
ဖန့်ချန်၏ ဝိညာဉ်အသိသည် နျဲ့ထျန်းယွမ် အပါအဝင် တုန်းဖန်းဟောက်ကျဲ၏ နောက်လိုက်များကို အစဉ်မပြတ် စောင့်ကြည့်နေသည်။
သူတို့က မင်းသမီး ရှင်းလုံ၏ နန်းတော်တွင် တည်းခိုရန် ကမ်းလှမ်းချက်ကို ငြင်းပယ်ပြီး တုန်းဖန်းဟောက်ကျဲ၏ စကားကိုသာ နားထောင်သောအခါ ဖန့်ချန်မှာ အနည်းငယ် သံသယဝင်လာသည်။
"သခင်လေ ဒီနေ့တော့ အနားယူလိုက်ပါ မနက်ဖြန်ကျရင် ကျွန်တော် သခင်လေးနဲ့အတူ ဝိညာဥ်ရင်းမြစ်ရပ်ကွက် ကို လိုက်လည်ပေးပါ့မယ်"
ဟု နျဲ့ထျန်းယွမ်က တိုးတိုးလေး ပြောလိုက်သည်။
တုန်းဖန်းဟောက်ကျဲ က ပြုံးစိစိဖြင့် ခေါင်းညိတ်သည်။
"ကောင်းပြီ ကောင်းပြီ ပြီးတော့ နတ်သမီး ထျန်းယဉ် ရောက်ပြီလားဆိုတာကိုလည်း စုံစမ်းပေးဦး"
နျဲ့ထျန်းယွမ်က ခေါင်းညိတ်ကာ ထွက်သွားပြီးနောက် သူသည် မိမိအခန်းသို့ ပြန်သွားပြီး ကျင့်ကြံခြင်း မပြုဘဲ ငြိမ်သက်စွာ ထိုင်နေသည်ကို ဖန့်ချန် သတိပြုမိသည်။
တစ်နာရီခန့် ကြာသောအခါ နျဲ့ထျန်းယွမ်သည် ရုတ်တရက် ထလာပြီး တည်းခိုခန်းရှိ အခြားအခန်းတစ်ခုသို့ သွားလိုက်သည်။
ထိုအခန်းထဲတွင် လူတစ်ဦးက စောင့်နေသည်မှာ ကြာပြီဖြစ်သည်။
နျဲ့ထျန်းယွမ် ဝင်လာသည်နှင့် ထိုလူက ဝိညာဉ်အတားအဆီးတစ်ခုကို အလွယ်တကူ တည်ဆောက်လိုက်သည်။
ထိုအတားအဆီးမှာ ရွှေအမြုတေအဆင့် ပညာရှင် တစ်ဦးပင်လျှင် ဖောက်ထွက်ရန် ခက်ခဲသော ခိုင်မာသည့် အတားအဆီးမျိုး ဖြစ်သည်။
သို့သော် ဖန့်ချန်အတွက်မူ ထိုအရာက အတားအဆီး မဟုတ်သဖြင့် အေးအေးဆေးဆေးပင် နောက်မှ လိုက်ဝင်သွားသည်။
ထုံဟု က နျဲ့ထျန်းယွမ်ကို ပြုံးစစဖြင့် ကြည့်လိုက်သည်။
"မင်းတို့ သခင်လေးကို နေရာချပေးပြီးပြီလား"
နျဲ့ထျန်းယွမ်က ခေါင်းညိတ်သည်။
"ပြီးပါပြီ ငါတို့ ဘယ်တော့ စလုပ်ကြမလဲ"
ထုံဟု က ခပ်ဖျော့ဖျော့ ပြုံးလိုက်သည်။
"မလောပါနဲ့ မိုးပြာအင်ပါယာ က ဝိညာဥ်သန္ဓေသားအဆင့် ပညာရှင် သုံးယောက် လာလိမ့်မယ် ခရမ်းရောင်ဝင်ရိုးစာပေသင်တန်း က အင်မော်တယ် ရှုချန်း ကျောက်စိမ်းလွတ်လပ်တောင် က အင်မော်တယ် အဖြူရောင်ကျား နဲ့ ချန်ရှန်းဘုရားကျောင်းက ဆရာကြီး နဂါးသစ်သား တို့ပဲ"
သူက ဆက်ပြောသည်
"တုန်းဖန်းဟောက်ကျဲ သေမယ်ဆိုရင်တောင် သူတို့ မျက်မြင်တွေ့မှ ဖြစ်မယ် ဒါမှ မိုးပြာအင်ပါယာ တစ်ခုလုံး ရှုပ်ထွေးသွားမှာ ဒါပြီးရင် ငါတို့ရဲ့ အစီအစဉ်တွေကို ဘယ်သူမှ မသင်္ကာဘဲ ချောချောမွေ့မွေ့ လုပ်လို့ရမယ်"
နျဲ့ထျန်းယွမ်က မျက်မှောင်ကြုတ်သည်။
"အဲဒီလိုဆိုရင် လုပ်ကြံတဲ့သူကလည်း အဲဒီနေရာတင် အသတ်ခံရမှာပေါ့ ဒါက ဘယ်လိုလုပ်ပြီး နှစ်နိုင်ငံကြားမှာ စစ်ပွဲဖြစ်အောင် လုပ်နိုင်မှာလဲ"
"ငါတို့ အဆိပ် သုံးမယ်"
ဟု ထုံဟု က အေးဆေးစွာ ဆိုသည်။
"အဆိပ်"
နျဲ့ထျန်းယွမ်က နှာခေါင်းရှုံ့လိုက်သည်။
"တုန်းဖန်းမိသားစုရဲ့ သွေးကြောက ထူးခြားတယ်ဆိုတာ မင်းမသိဘူးထင်တယ် တိုက်ရိုက်မျိုးဆက်တွေက အဆိပ်အတော်များများကို ခုခံနိုင်စွမ်း ရှိတယ် ငါ ကိုယ်တိုင် စမ်းသပ်ကြည့်ဖူးတယ်"
ထုံဟု က ပြုံးလိုက်သည်။
"သာမန်အဆိပ်တွေကတော့ အလုပ်မဖြစ်မှာ မှန်ပါတယ် ဒါပေမဲ့ ငါ့ဆီမှာ ရှိတဲ့ အဆိပ်က ခွန်လုံစစ်သူကြီး ကိုယ်တိုင် ပေးထားတာ ဒါကိုတော့ မင်း မသံသယဖြစ်ပါဘူးနော်"
နျဲ့ထျန်းယွမ်မှာ အံ့သြသွားသည်။
"ခွန်လုံစစ်သူကြီးက မင်းဆီကို ကိုယ်တိုင် လာတွေ့တာလား သူ အခု မဟာချန်းမှာ ရှိနေတာလား"
ဖန့်ချန်၏ အမူအရာမှာ လေးနက်သွားသည်။ ခွန်လုံစစ်သူကြီးက မဟာချန်းကို ရောက်နေပြီလား ဒါက သတင်းကောင်း မဟုတ်ပေ။
"ခွန်လုံစစ်သူကြီးက မဟာချန်းမှာ အမြဲ ရှိနေတာပါ"
ဟု ထုံဟု က ပြုံးလျက် ဆိုသည်။
"မင်း ဒီအတောအတွင်း တုန်းဖန်းဟောက်ကျဲကိုပဲ စောင့်ကြည့်ထားပါ ကျန်တာတွေကို အချိန်တန်ရင် ငါ မင်းကို အကြောင်းကြားမယ်"
နျဲ့ထျန်းယွမ်မှာ ထိုစကားကြောင့် တုန်လှုပ်သွားပုံရသော်လည်း ထပ်ပြီး မမေးဝံ့တော့ပေ။
သူသည် ခေါင်းညိတ်ပြကာ အခန်းထဲမှ ထွက်လာခဲ့သည်။ သူ ထွက်လာသောအခါ သူ၏ မျက်နှာမှာ အလွန်ပင် ညိုမှောင်နေသည်။
"ထုံဟု က ခွန်လုံစစ်သူကြီးရဲ့ ယုံကြည်ရသူ ဖြစ်နေတာပဲ ဒါဆို ငါက ဘာလဲ"
ဖန့်ချန်၏ အမူအရာမှာ အလွန်ပင် တည်ကြည်သွားသည်။
"ခွန်လုံစစ်သူကြီးက မဟာချန်းမှာ အမြဲ ရှိနေတာလား"
သူ့စိတ်ထဲတွင် လူပေါင်းများစွာ၏ မျက်နှာများ ဖြတ်ပြေးသွားသည်။
ဖန့်ထန်ကျန့် ဖန့်ဝမ်လီ ကျွယ်ဖေးချန် နဲ့ မင်းသမီး ရှင်းလုံ တို့အထိပင်။
"သူတို့ထဲက ဘယ်သူမှ ခွန်လုံစစ်သူကြီး မဖြစ်နိုင်ဘူး တကယ်လို့ ဖြစ်ခဲ့ရင် အဲဒီ စီနီယာကြီးက ရိပ်မိမှာပဲ"
ဟု ဖန့်ချန်က လေးလေးနက်နက် တွေးနေမိသည်။
တကယ်လို့ ထုံဟု ပြောတာသာ အမှန်ဆိုရင် ခွန်လုံစစ်သူကြီးဟာ သာမန်လူတစ်ယောက်အဖြစ် ဟန်ဆောင်ပြီး မဟာချန်း ပြည်သူတွေကြားထဲမှာ ပုန်းနေတာ ဖြစ်နိုင်တယ်။
အဲဒီလိုဆိုရင်တော့ သူ့ကို ရှာဖို့က ခက်ခဲလိမ့်မယ်
"ဝိညာဥ်သန္ဓေသားအဆင့် ပညာရှင်တစ်ယောက်ရဲ့ အကူအညီနဲ့ ချီသန့်စင်ခြင်းအဆင့် ကျင့်ကြံသူလေးတစ်ယောက်ကို လုပ်ကြံဖို့ ကြံစည်နေကြတာလား ဒီကျင့်ကြံသူလေးကို ကယ်ဖို့ ငါ့ရဲ့ အခွင့်အရေးကသုည ရာခိုင်နှုန်းပဲ ရှိတော့တယ်"
ဟု ဖန့်ချန်က တိုးတိုးလေး ရေရွတ်လိုက်မိတော့သည်။