အခန်း (၄၂၇-၄၂၈)
Vol. 43 Ch. 427-428
အခန်း ၄၂၇ - သခင်ကို ပြန်ပုန်ကန်တဲ့ ကျွန်လား အကုန်သတ်ပစ်လိုက်
နတ်လှေကြီး နီးကပ်လာတာနဲ့အမျှ အဲဒါ ဘယ်လောက်တောင် ကြီးမားလဲဆိုတာ လူတိုင်း သတိထားမိသွားကြတယ်။
အဲဒီလှေကြီးက မဟာချန်းမြို့တော်ရဲ့ တစ်ဝက်လောက်ကို ဖုံးလွှမ်းသွားနိုင်တဲ့အထိ ကြီးမားလွန်းလှပါတယ်။
လှေပေါ်မှာ ကပြနေတဲ့ နတ်သမီးလေးတွေကလည်း ပေ ၂၀၊ ၃၀ လောက် မြင့်တဲ့ လူသားဘီလူးမကြီးတွေ ဖြစ်နေတာကို မြင်လိုက်ရတဲ့အခါ လူတိုင်း ထိတ်လန့်သွားကြတယ်။
ထိုမြင်ကွင်းကြောင့် လူတိုင်းဟာ ရင်ဘတ်ပေါ်ကို ကျောက်တုံးကြီးတစ်ခုနဲ့ ဖိထားသလို ခံစားရပြီး အသက်ရှူဖို့တောင် ခက်ခဲလာကြပါတယ်။
မြင့်မြတ်တဲ့ အသံကြီးကို ကြားလိုက်ရတဲ့အခါ ကျွယ်မိသားစုက ရွှေအမြုတေအဆင့်နှောင်းပိုင်း ကျင့်ကြံသူနဲ့ ကျွယ်ဖေးချန် တို့ဟာ ရုတ်တရက် ကြောက်လန့်သွားကြပြီး ၇ ရက်သား အလောင်းကောင်တွေလို ဖြူလျော်ကာ တစ်ကိုယ်လုံး တုန်ယင်လာကြပါတယ်။
ထိုအသံကြီးက လူတိုင်းရဲ့ နားထဲမှာ ဆက်လက် ပဲ့တင်ထပ်နေပါတယ်။
"ဒီမှာ ကျန်းမိသားစုရဲ့ မျိုးဆက် ရှိသလား"
ဝိညာဉ်သန္ဓေသားအဆင့် ပညာရှင် သုံးဦးက အရင်ဆုံး တုံ့ပြန်လိုက်ပြီး နတ်လှေဆီကို ရိုသေစွာ ဦးညွှတ်လိုက်ကြတယ်။
"ဂျူနီယာတွေက စီနီယာတို့ကို ဂါရဝပြုပါတယ်"
'ဒါက ဟိုဝတ်စုံရိုးရိုးနဲ့ အမျိုးသမီး ပြောခဲ့တဲ့ ကျန်းမိသားစုရဲ့ မိတ်ဆွေဆိုသူများလား'
ဖန့်ချန် စိတ်ထဲကနေ ရေရွတ်လိုက်ပါတယ်။
ဖန့်ချန်ကတော့ တည်ငြိမ်စွာပဲ နေနေပါတယ်။
သူ့ရဲ့ ဝိညာဉ်အသိကို ဟိုဟိုဒီဒီ လျှောက်မလွှတ်ရဲပါဘူး။
ဘာလို့လဲဆိုတော့ ဒီလို အစွမ်းထက်တဲ့သူတွေက သူ့ရဲ့ ဝိညာဉ်အခြေအနေကို သိသွားမှာ စိုးလို့ပါပဲ။
အစွမ်းထက်တဲ့သူတိုင်းက စီနီယာယွမ်ဟယ် လို စိတ်သဘောထားကောင်းတာ မဟုတ်ဘူးလေ။
သူတို့ထဲမှာ မသေမျိုး ပုဒု လို ကြောက်စရာကောင်းတဲ့သူတွေလည်း ပါနိုင်တာပဲ မဟုတ်လား။
နတ်သမီးယွီ ရဲ့ ဘေးက အမျိုးသမီးဓားကျင့်ကြံသူရဲ့ မျက်လုံးထဲမှာတော့ အံ့သြရိပ်တွေ ဖြတ်ပြေးသွားပါတယ်။
"ဒါ နတ်ဘီလူးဂိုဏ်း မဟုတ်လား နတ်ဘီလူးဂိုဏ်းက အစွမ်းထက်တဲ့သူတစ်ယောက်က ဘာလို့ ဒီကို ရောက်လာတာလဲ"
နတ်သမီးယွီက စိတ်အာရုံနဲ့ အလျင်အမြန် မေးလိုက်တယ်။
"စီနီယာအစ်မ နတ်ဘီလူးဂိုဏ်း ဆိုတာ ဘာလဲ"
သူမရဲ့ စီနီယာအစ်မ ဒီလောက်အထိ အံ့သြတာမျိုး မြင်ရခဲပါတယ်။
ပုံမှန်ဆိုရင် သူတို့က ဟင်းလင်းပြင်ထာဝရဓားဂိုဏ်း ကမှန်း သိတဲ့သူတွေကသာ သူတို့ကို ဒီလို အကြည့်မျိုးနဲ့ ကြည့်ကြတာလေ။
"ဒါက နှစ်ပေါင်းများစွာ လူသူမသိအောင် တသီးတသန့် နေထိုင်ခဲ့တဲ့ ရှေးဟောင်းဂိုဏ်းကြီးတစ်ခုပဲ ဒီနေ့ ဒီမှာ မြင်ရလိမ့်မယ်လို့ မထင်ထားဘူး"
" နတ်ဘီလူးဂိုဏ်းက ကျင့်ကြံသူတွေကို ကြည့်လိုက် သူတို့ ကျင့်ကြံမှုအဆင့် မြင့်လေလေခန္ဓာကိုယ်က ပိုကြီးလေလေပဲ"
" ခန္ဓာကိုယ်ကြီးလေ အစွမ်းက ပိုထက်မြက်လေပဲ ဒီမှာ ကပြနေတဲ့ အစေခံမလေးတွေတောင် ပေ ၂၀၊ ၃၀ မြင့်တဲ့ တောင်ငယ်လေးတွေလိုပဲ တစ်ယောက်ချင်းစီက အလယ်ပိုင်းအဆင့် ၃ ဆင့် ထဲမှာ ရှိနေပုံရတယ်"
နတ်သမီးယွီ တစ်ယောက် ကြောင်အမ်းသွားတယ်။
"အလယ်ပိုင်း အဆင့် ၃ ဆင့်"
ချီသန့်စင်ခြင်း၊ အခြေခံတည်ဆောက်ခြင်း၊ ရွှေအမြုတေနဲ့ ဝိညာဉ်သန္ဓေသား အဆင့်တွေက အောက်ပိုင်းအဆင့် ၄ ဆင့် သာ ရှိပါသေးတယ်။
အလယ်ပိုင်းအဆင့် ၃ ဆင့်ကို ရောက်တယ်ဆိုတာ ဒီလောကမှာ ထိပ်တန်းပညာရှင်တွေ ဖြစ်နေကြပါပြီ။
ဟင်းလင်းပြင်ထာဝရဓားဂိုဏ်းမှာတောင် ခဏခဏ မတွေ့နိုင်တဲ့သူတွေလေ။
အခုတော့ သူတို့ရှေ့က အစေခံမလေးတွေကတောင် အဲဒီအဆင့်မှာ ရှိနေတယ်ဆိုတော့ ဒီလှေကြီးရဲ့ ပိုင်ရှင်က ဘယ်လောက်တောင် ကြောက်စရာကောင်းမလဲ
ထိုအသံကြီးက နတ်ဘုရားတောင်ကြီး တစ်လုံးလို ဖိနှိပ်ရင်း ထပ်မံ ထွက်ပေါ်လာပါတယ်။
"ငါ နောက်ဆုံးအကြိမ် ထပ်မေးမယ် ဒီမှာ ကျန်းမိသားစုရဲ့ မျိုးဆက် ရှိသလား"
ဝိညာဉ်သန္ဓေသားအဆင့် ပညာရှင် သုံးဦးဟာ ကြီးမားတဲ့ ဖိအားကို ခံစားနေရပါတယ်။
အရှင်ကျားဖြူက အနိုင်နိုင် ပြန်ဖြေလိုက်ရတယ်။
"စီနီယာတို့ကို တင်ပြပါတယ် ဒီမှာ ကျန်းမိသားစုရဲ့ မျိုးဆက် ရှိပုံမရပါဘူး"
"ထျန်းအိုက် မင်းရဲ့ ဘိုးဘေးတွေရဲ့ မိတ်ဆွေက မင်းကို လာခေါ်တာပဲ မြန်မြန်သွားပြီး ဒီစီနီယာနောက်ကို လိုက်သွားတော့"
ဖန့်ချန်က ရုတ်တရက် အော်ဟစ်လိုက်ပါတယ်။
အားလုံး ဆွံ့အသွားပြီး ကျန်းထျန်းအိုက် ကို ကြောင်ကြည့်နေကြပါတယ်။
ဖန့်မိသားစုဝင်တွေလည်း မယုံနိုင်အောင် ဖြစ်နေကြတယ်။
"တကယ်ကြီးလာ သူမမှာ ဒီလောက်အထိ ကြီးမားတဲ့ နောက်ခံ ရှိနေတာလား"
လျီချန်း နဲ့ ချန်းဖေးလန် တို့လည်း တုန်လှုပ်သွားကြတယ်။
သူတို့ ဒီကောင်မလေးကို စောင့်ရှောက်လာတာ ကြာပြီဖြစ်ပေမယ့် သူမရဲ့ နောက်ခံက ဒီလောက်အထိ ကြောက်စရာကောင်းလိမ့်မယ်လို့ မထင်ထားခဲ့ဘူး
"ကျွယ်မိသားစုက ရူးသွားတာလား ဒီလောက် နောက်ခံရှိတဲ့သူကို ရန်စရဲတယ်ပေါ့"
"ငါ့အထင်တော့ ဒီတစ်ခါ ကျွယ်မိသားစု သွားပြီပဲ"
လူတွေက တိုးတိုးတိတ်တိတ် ဝေဖန်နေကြပြီး ကျွယ်မိသားစုကို လက်ညှိုးထိုးနေကြပါတယ်။
စီနီယာကြီးက သူတို့ပြောတာကို ကြားနိုင်မယ်လို့လည်း ယုံကြည်နေကြတယ်။
"အင်း ဟုတ်တာပေါ့ သူမက ကျန်းမိသားစုရဲ့ မျိုးဆက်ပဲ"
နတ်လှေပိုင်ရှင်ရဲ့ အသံက ထပ်မံ ထွက်ပေါ်လာပါတယ်။
ဘယ်သူလဲဆိုတာ မမြင်ရပေမယ့် သူ့ရဲ့ အကြည့်က ကျန်းထျန်းအိုက် ဆီကို ရောက်နေတယ်ဆိုတာ လူတိုင်း ခံစားမိပါတယ်။
"ဒီကောင်မလေးက..."
ဝိညာဉ်သန္ဓေသားအဆင့် ပညာရှင် သုံးဦးဟာ တစ်ဦးကိုတစ်ဦး ကြည့်လိုက်ကြပြီး အံ့သြမှုတွေကို မြင်နေရပါတယ်။
ဖန့်ဝမ်လီ ကလည်း ထူးဆန်းတဲ့ မျက်နှာပေးနဲ့ ဖန့်ချန်ကို တစ်လှည့်၊ ကျန်းထျန်းအိုက်ကို တစ်လှည့် ကြည့်နေမိတယ်။
သူက ဖန့်ထင်ကျန့် ကို စိတ်အာရုံနဲ့ အသံလှမ်းပို့လိုက်တယ်
"ဦးလေး..."
"ပါးစပ်ပိတ်ထား"
ဖန့်ထင်ကျန့် က သူ့ကို စိုက်ကြည့်လိုက်ပြီး အခြေအနေကိုပဲ ဆက်စောင့်ကြည့်နေပါတယ်။
နတ်လှေပိုင်ရှင်က ဆက်ပြောပါတယ်။
"သမီးလေး ငါက သမီးရဲ့ ဘိုးဘေးတွေနဲ့ ရင်းနှီးခဲ့ဖူးတယ် ကျန်းမိသားစုရဲ့ မျိုးဆက်တွေကို စောင့်ရှောက်ပေးမယ်လို့ သူတို့ကို ကတိပေးခဲ့ဖူးတယ် ငါနဲ့ လိုက်ခဲ့ပါ"
ကျန်းထျန်းအိုက်ရဲ့ မျက်နှာလေးက အနည်းငယ် ပြောင်းလဲသွားပြီး ဖန့်ချန် ရှိရာဆီကို ပြေးသွားပါတယ်။
အရှင်ကျားဖြူက စိတ်အာရုံနဲ့ အကာအကွယ်ကို ချက်ချင်း ဖယ်ရှားပေးလိုက်တယ်။
ကျန်းထျန်းအိုက်က ဖန့်ချန်ရဲ့ ရင်ခွင်ထဲကို တိုးဝင်လိုက်တယ်။
"အစ်ကိုဖန့် သမီး ကျင့်ကြံမှုမှာ အောင်မြင်သွားတဲ့အခါ အစ်ကိုဖန့်ဆီကို လာလည်ပါ့မယ်"
ဖန့်ချန်က တစ်ဖက်မှာ ကျွယ်ဝူတိကို ကိုင်ထားပြီး ကျန်တဲ့တစ်ဖက်နဲ့ သူမရဲ့ ခေါင်းလေးကို အသာအယာ ပုတ်ပေးလိုက်ပါတယ်။
"သွားတော့"
ကျန်းထျန်းအိုက်က လှည့်ထွက်သွားပြီး ကျန်းကျုံး ကို ခေါ်ကာ နတ်လှေဆီကို လျှောက်သွားပါတယ်။
ဒီအချိန်မှာ ကျွယ်ဖေးချန် က သူမကို ဘယ်မှာ တားရဲတော့မလဲ။ ခေါင်းငုံ့ပြီး တိတ်တိတ်လေးပဲ နေနေရပါတယ်။
ကျန်းထျန်းအိုက် နဲ့ ကျန်းကျုံး တို့ရဲ့ ခြေထောက်အောက်မှာ အလင်းတန်းလေးတွေ ပေါ်လာပြီး သူတို့ကို နတ်လှေဆီကို ခေါ်ဆောင်သွားပါတယ်။
ကျန်းကျုံး ကတော့ ကြည့်ရတာ စိတ်လှုပ်ရှားနေပုံရတယ်။
"စီနီယာ ကျွန်တော်မျိုးနဲ့ သခင်မလေးက မဟာချန်းကို လာခဲ့တာက ကျွယ်မိသားစုဆီမှာ ခိုလှုံဖို့ပါ သူတို့က တစ်ချိန်က ကျွန်တော်တို့ မိသားစုရဲ့ ကျွန် တွေ ဖြစ်ခဲ့ဖူးပါတယ်"
"သူတို့က ဒီလောက်အထိ ယုတ်မာပြီး သခင်မလေးကို ဒုက္ခပေးလိမ့်မယ်လို့ မထင်ထားခဲ့ဘူး စီနီယာ ကျွန်တော်တို့အတွက် တရားမျှတမှုကို ရှာပေးပါဦး"
"ဘာ ကျွယ်မိသားစုက ကျွန်တွေလား"
"မဖြစ်နိုင်တာ"
"ဒါ ဖြစ်နိုင်တယ်လေ ဒီနှစ်ယောက်ရဲ့ နောက်ခံက ထူးခြားနေတာပဲဥစ္စာ"
"ကျွယ်မိသားစုက ကျေးဇူးကို တုန့်လှည့်တာလား"
ကျန်းကျုံးရဲ့ စကားကြောင့် တစ်ကွင်းလုံး ရုတ်ရုတ်သဲသဲ ဖြစ်သွားပါတယ်။
ကျွယ်မိသားစုရဲ့ မျိုးဆက်တွေကတော့ ဘာတွေဖြစ်ကုန်လဲဆိုတာ မသိဘဲ ကြောင်အမ်းနေကြတယ်။
ကျွယ်မိသားစုက ရွှေအမြုတေအဆင့်နှောင်းပိုင်း ကျင့်ကြံသူနဲ့ ကျွယ်ဖေးချန် တို့ကတော့ မျက်နှာတွေ ပျက်သွားပြီး သူတို့မျက်လုံးထဲမှာ ကြောက်ရွံ့မှုတွေ ပြည့်နှက်နေပါတယ်။
နတ်လှေပိုင်ရှင်က အေးစက်စွာ ပြောလိုက်တယ်။
"သခင်ကို ပြန်ပုန်ကန်တဲ့ ကျွန်လား အကုန်သတ်ပစ်လိုက်"
လှပစွာ ကပြနေတဲ့ နတ်သမီးတစ်ဦးက ရုတ်တရက် ရပ်တန့်လိုက်ပြီး ကျွယ်မိသားစုက ရွှေအမြုတေအဆင့် ပညာရှင် နှစ်ဦးကို ငုံ့ကြည့်လိုက်ပါတယ်။
သူတို့နှစ်ဦးဟာ ချက်ချင်းဆိုသလို ဒူးထောက်ကျသွားပြီး အော်ဟစ်လိုက်ကြတယ်။
"စီနီယာ ကျန်းမိသားစုမှာ ကြီးမားတဲ့ ကံကြမ္မာကြွေး တွေ ရှိနေလို့ပါ သူတို့နား ကပ်တဲ့သူတိုင်း ကံကြမ္မာရဲ့ ဝါးမျိုခြင်းကို ခံရမှာမို့လို့ ကျွန်တော်တို့ ဒါကို လုပ်ရတာပါ စီနီယာ ကျွန်တော်တို့ကို အပြစ်မတင်ပါနဲ့"
နတ်လှေပိုင်ရှင်ရဲ့ အသံက ထပ်ထွက်လာပြန်တယ်။
"ကျန်းမိသားစုရဲ့ ကံကြမ္မာကြွေးတွေက ဒီနှစ်တွေအတွင်းမှာ ကုန်သလောက် ရှိနေပါပြီ ကျန်နေသေးရင်တောင် ငါ့ရဲ့ ကျင့်ကြံမှုအဆင့်နဲ့ဆိုရင် ဒါကို ဖြတ်တောက်လိုက်လို့ ဖြစ်လာမယ့် နောက်ဆက်တွဲတွေကို ငါ တာဝန်ယူနိုင်တယ်"
ကျွယ်မိသားစုက ပညာရှင်ကြီးဟာ ရုတ်တရက် တွေဝေသွားပါတယ်။
ကျန်းမိသားစုက အရင်လို မဟုတ်တော့ဘူးလား
အလင်းတန်း တစ်ခု လျှပ်ခနဲ ဖြတ်သွားပြီး ကျွယ်မိသားစုက ပညာရှင်ရဲ့ ခေါင်းဟာ မြေပြင်ပေါ်ကို ဘုန်းခနဲ ပြုတ်ကျသွားပါတယ်။
အားလုံး မင်သက်နေတုန်းမှာပဲ နောက်ထပ် အလင်းတန်းတစ်ခု ဖြတ်သွားပြန်ပြီး ကျွယ်ဖေးချန် ရဲ့ ခေါင်းလည်း မြေပေါ်ကို ပြုတ်ကျသွားပြန်ပါတယ်။
"ဒီနှစ်ယောက်ပဲ အမှန်တရားကို သိတာမို့ သူတို့ပဲ အပြစ်ရှိတာ၊ ကျန်တဲ့သူတွေကတော့ အပြစ်မရှိဘူး"
နတ်လှေပိုင်ရှင်က ကျန်းကျုံး ကို ပြောလိုက်ပါတယ်။
ကျန်းကျုံး က သေဆုံးသွားတဲ့ သူနှစ်ဦးကို ကြည့်ပြီး စိတ်မကောင်းသလို ဖြစ်သွားပေမယ့် ဖန့်ချန် ရှိရာဘက်ကို လှည့်ပြီး ရိုသေစွာ ဦးညွှတ်လိုက်ပါတယ်။
"သခင်လေးဖန့် နောက်မှ ပြန်ဆုံကြတာပေါ့"
ဖန့်ချန်ကတော့ ဘာမှမပြောဘဲ ခေါင်းပဲ ငြိမ့်ပြလိုက်ပါတယ်။
သူ့ရဲ့ အာရုံထဲမှာတော့ ကျန်းထျန်းအိုက်တို့ နတ်လှေပေါ် ရောက်သွားပြီး ဘီလူးမကြီး နှစ်ယောက်ရဲ့ လိုက်ပါပို့ဆောင်မှုနဲ့ လှေကြီးထဲကို ဝင်သွားတာကို သိလိုက်ရပါတယ်။
နောက်တစ်စက္ကန့်မှာပဲ နတ်လှေကြီးဟာ ဟင်းလင်းပြင်ထဲကို ပျောက်ကွယ်သွားပြီး ဘာမှမရှိခဲ့သလိုပါပဲ။
မြေပြင်ပေါ်က ရွှေအမြုတေအဆင့် အလောင်းနှစ်လောင်းကသာ အစွမ်းထက်တဲ့သူတစ်ယောက် ရောက်လာခဲ့တယ်ဆိုတာကို သက်သေပြနေပါတယ်။
တစ်ကွင်းလုံးဟာ လုံးဝ တိတ်ဆိတ်သွားပါတယ်။
ကျွယ်မိသားစု တပည့်တွေကတော့ ကြောက်လန့်တကြားနဲ့ ကြောင်ကြည့်နေကြတုန်းပါပဲ။
ကျွယ်မိသားစုက အခြေခံတည်ဆောက်ခြင်းအဆင့် ကျင့်ကြံသူတွေဟာ အလောင်းနှစ်လောင်းဆီ ပြေးသွားကြပေမယ့် အသက်ဓာတ်တွေ လုံးဝ ကုန်ခမ်းသွားပြီဆိုတာ သိလိုက်ရတဲ့အခါ သူတို့ မျက်နှာတွေ ပြာနှမ်းကုန်ပါတယ်။
ရွှေအမြုတေအဆင့် ပညာရှင်တွေ မရှိတော့တဲ့အတွက် ကျွယ်မိသားစုဟာ အာဏာစက် ပြုတ်ကျသွားပါပြီ
အခန်း ၄၂၈ - ငါ လုပ်ချင်လို့ လုပ်လိုက်တာ
"တကယ့် အစွမ်းထက်တဲ့ ပညာရှင်တွေရဲ့ မျက်စိထဲမှာတော့ ရွှေအမြုတေအဆင့်နှောင်းပိုင်း ကျင့်ကြံသူတွေတောင် ပုရွက်ဆိတ်တွေလိုပဲလား အရမ်းကို လွယ်လွယ်ကူကူ အသတ်ခံလိုက်ရတာပဲ"
လူအတော်များများက တိုးတိုးလေး ရေရွတ်နေကြပါတယ်။
သူတို့ရှေ့မှာ မြင်တွေ့ခဲ့ရတဲ့ မြင်ကွင်းက အရမ်းကို တုန်လှုပ်စရာ ကောင်းလွန်းပါတယ်။
အခြေခံတည်ဆောက်ခြင်းအဆင့် ကျင့်ကြံသူတစ်ယောက် သေဆုံးတာကိုတောင် သူတို့ မမြင်ဖူးကြတာ များပါတယ်။
အခုတော့ ရွှေအမြုတေအဆင့်ရှိတဲ့ မိသားစုဘိုးဘေးကြီးတွေ ပြုတ်ကျသွားတာကို မြင်လိုက်ရတာလေ။
သူတို့ရဲ့ အသိဉာဏ်ထဲမှာတော့ ရွှေအမြုတေအဆင့် ကျင့်ကြံသူတွေဟာ သက်တမ်း အလွန်ရှည်ကြပါတယ်။
အချိန်အတော်များများမှာ သူတို့ သေဆုံးတယ်ဆိုတာက သက်တမ်းကုန်လို့ သေတာမျိုးပဲ ရှိပြီး အသတ်ခံရတာမျိုးက ရှားပါတယ်။
တစ်နေ့မှာ ရွှေအမြုတေအဆင့် ပညာရှင်တွေဟာ ဒီလောက်အထိ လွယ်လွယ်ကူကူ အသတ်ခံလိုက်ရလိမ့်မယ်လို့ ဘယ်သူက ထင်ထားပါ့မလဲ။
"မဖြစ်နိုင်ဘူး... ဒါ မဖြစ်နိုင်ဘူး..."
ကျွယ်ဝူတိကတော့ သူ့ဘာသာသူ ရေရွတ်နေမိတယ်။
ကျွယ်မိသားစုရဲ့ ရွှေအမြုတေအဆင့် ပညာရှင် နှစ်ယောက်က ဒီလိုမျိုး သေသွားရတယ်လို့လား။
ရုတ်တရက် ကျွယ်ဝူတိ တစ်ယောက် ကံကောင်းတယ်လို့ ခံစားလိုက်ရပါတယ်။
'ကံကောင်းသေးတယ် ငါရှိနေသရွေ့ ကျွယ်မိသားစု ပြိုလဲမှာ မဟုတ်ဘူး'
သူ့ရဲ့ ဆရာက ခုနက နတ်လှေပိုင်ရှင်ထက် မနိမ့်ကျတဲ့ ကြီးမားတဲ့ နောက်ခံရှိသလို သူ့ရဲ့ စီနီယာအစ်ကိုကြီးကလည်း ဝိညာဉ်သန္ဓေသားအဆင့် ပညာရှင်တစ်ယောက် မဟုတ်လား
ထိုစဉ် ကျွယ်ဝူတိရဲ့ နားထဲမှာ အသံတစ်ခု ဟိန်းထွက်လာပါတယ်။
"မင်းရဲ့ ဘိုးဘေးတွေတောင် သွားကြပြီဆိုတော့ မင်းလည်း သူတို့နောက်ကို လိုက်သွားတာ ပိုကောင်းပါလိမ့်မယ် ဝိညာဉ်သွေးဂိုဏ်းက ကျွယ်ဝူတိ"
ကျွယ်ဝူတိဟာ ရုတ်တရက် ခေါင်းလှည့်ကြည့်လိုက်ပြီး ဖန့်ချန်ကို ထိတ်လန့်တကြားနဲ့ မယုံနိုင်သလို စိုက်ကြည့်လိုက်တယ်။
ဖန့်ချန်က ဒါကို ဘယ်လိုလုပ် သိနေတာလဲ
သူ ဘာမှပြန်မမေးနိုင်ခင်၊ ဒါမှမဟုတ် ထုံပိုင်ကျိုး တို့ဆီကို အသံလှမ်းမပို့နိုင်ခင်မှာပဲ ဖန့်ချန်ရဲ့ ကိုယ်ထဲက ဓားဆန္ဒတွေက ပေါက်ကွဲထွက်လာပါတယ်။
အဖြူရောင် အလင်းတန်းတွေက ကျွယ်ဝူတိရဲ့ ခန္ဓာကိုယ်ကို လွှမ်းခြုံသွားပြီး သူ့ကိုယ်ထဲကနေ အလင်းတိုင်တွေ ထိုးထွက်လာပါတယ်။
သူ့ရဲ့ အသားတွေဟာ အပေါက်အပြဲတွေ ဖြစ်သွားပြီး ခဏချင်းမှာတင် ဖုန်မှုန့်တွေအဖြစ် ပြိုကွဲကာ လေထဲမှာ ပျောက်ကွယ်သွားတော့တယ်။
အားလုံးကတော့ အံ့သြတုန်လှုပ်နေရာကနေ သတိပြန်ဝင်လာပြီး ဖန့်ချန်ဆီကို အကြည့်တွေ ရောက်သွားကြပါတယ်။
"ကျွယ်... ကျွယ်ဝူတိ သေသွားပြီလား"
ကျွယ်ဝူတိရဲ့ ခန္ဓာကိုယ်က ဖုန်မှုန့်တွေအဖြစ် ပြောင်းလဲသွားတာကို သူတို့ မျက်မြင်ကိုယ်တွေ့ မြင်လိုက်ရတာဟာ အိပ်မက်တစ်ခုလိုပါပဲ။
မဟာချန်းရဲ့ နံပါတ်တစ် ပါရမီရှင်လို့ အသိအမှတ်ပြုခံထားရတဲ့ ကျွယ်မိသားစုက ကျွယ်ဝူတိဟာ ဒီလိုမျိုးပဲ သေသွားခဲ့တာလား
ချင်းဟူအင်ပါယာက မင်းသမီးလေးကတော့ မျက်ရည်တွေကို မထိန်းနိုင်တော့ဘဲ ဖန့်ချန်ဆီ ပြေးသွားဖို့ လုပ်ပေမယ့် သူမရဲ့ ဆရာက ခိုင်ခိုင်မာမာ တားဆီးထားတာကြောင့် မလှုပ်နိုင်ဘဲ အော်ဟစ်နေမိတယ်။
"စီနီယာအစ်ကိုကျွယ်"
"မင်း ဘာလို့ သူ့ကို သတ်လိုက်ရတာလဲ"
ဖန့်လင်ရှင်းက ရုတ်တရက် ဟိန်းဟောက်လိုက်ပါတယ်။
သူမက ဖန့်ချန်ဆီ ပြေးသွားဖို့ လုပ်ပေမယ့် ဖန့်မိုရှန့် က သူမကို မြဲမြဲဆုပ်ကိုင်ထားပါတယ်။
"မမိုက်မဲနဲ့ ကျွယ်ဝူတိက သေသွားပြီ ဖန့်ချန်ကို ထပ်ပြီး ရန်မစနဲ့တော့"
ဖန့်မိုရှန့်က ဖန့်လင်ရှင်းကို ဝိညာဉ်စွမ်းအားနဲ့ တားဆီးထားရင်း ဖန့်ချန်ဆီကို လေးနက်တဲ့ အကြည့်နဲ့ ကြည့်လိုက်ပါတယ်။
သူ့ရဲ့ စိတ်ထဲမှာတော့ ဟိုမိန်းကလေးငယ်လေးကို ကြောက်နေမိတာပါ။
သူမမှာ ဒီလောက်ကြီးမားတဲ့ နောက်ခံရှိနေပြီး အစွမ်းထက်တဲ့သူက လာခေါ်သွားပြီဆိုတော့၊ ဖန့်ချန်နဲ့ သူမရဲ့ ဆက်ဆံရေးအရ ဖန့်ချန်မှာလည်း အဲဒီပညာရှင်ကြီးနဲ့ ပတ်သက်မှု ရှိနေသလိုပါပဲ။
ဒီလိုအခြေအနေမျိုးမှာ သူတို့ ဖန့်ချန်နဲ့ ရန်သူ မဖြစ်သင့်တော့ပါဘူး
မဟာချန်း မြို့တော်က လူငယ်ကျင့်ကြံသူတွေကတော့ ရုပ်တုတွေလိုပဲ ဖန့်ချန်ကို ကြောင်ကြည့်နေကြပါတယ်။
အားလုံးက ကြည်ညိုရတဲ့ စီနီယာအစ်ကိုကြီး ကျွယ်ဝူတိက ဒီလူ့လက်ထဲမှာ သေသွားတာလား
ကျွယ်မိသားစုရဲ့ အခြေအနေကို စဉ်းစားမိတဲ့ တစ်စုံတစ်ယောက်က ရုတ်တရက် အော်ဟစ်လိုက်တယ်။
"သေတာ ကောင်းတာပဲ ကျွယ်မိသားစုက သခင်ကို ပြန်နှိပ်စက်တဲ့ ယုတ်မာတဲ့ ကျွန်တွေပဲ သူတို့ သေထိုက်တယ်"
အဲဒီနောက်မှာတော့ အလားတူ အသံတွေ ထွက်ပေါ်လာပါတယ်။
ကျွယ်ထျန်းကန်း နဲ့ တခြား အခြေခံတည်ဆောက်ခြင်းအဆင့် ကျင့်ကြံသူတွေရဲ့ မျက်နှာကတော့ ပျက်နေပြီး သူတို့မျက်လုံးထဲမှာ ကြောက်ရွံ့ရိပ်တွေ ရှိနေပါတယ်။
ရွှေအမြုတေအဆင့် ဘိုးဘေးတွေလည်း မရှိတော့ နာမည်ဂုဏ်သတင်းလည်း ပျက်သွားပြီဆိုတော့ ကျွယ်မိသားစုဝင်တွေဟာ လမ်းဖြတ်ကူးတဲ့ ကြွက်တွေလို ဖြစ်သွားပြီး လူအများရဲ့ မကောင်းတဲ့ အကြည့်တွေကို ခံနေရပါတယ်။
မကြာခင်မှာပဲ ကျွယ်မိသားစု ပိုင်ဆိုင်သမျှ အရာအားလုံးဟာ မဟာချန်းက တခြား ရွှေအမြုတေအဆင့် ကျင့်ကြံသူတွေရဲ့ ဝါးမျိုဖျက်ဆီးခြင်းကို ခံရတော့မှာ သေချာသလောက်ပါပဲ
"အကြီးအကဲဖန့် ကျွန်တော်တို့ ဘိုးဘေးတွေ ဘာလုပ်ခဲ့လဲဆိုတာ ကျွန်တော်တို့ လုံးဝ မသိခဲ့ပါဘူး ဟိုစီနီယာကြီးကလည်း မသိတဲ့သူမှာ အပြစ်မရှိဘူးလို့ ပြောခဲ့တယ် မဟုတ်လား"
ကျွယ်ထျန်းကန်းက သွားကြိတ်ပြီး ဖန့်ထင်ကျန့် ကို ဦးညွှတ်လိုက်ပါတယ်။
တခြား အခြေခံတည်ဆောက်ခြင်းအဆင့် ကျင့်ကြံသူတွေလည်း ခဏတာ တွေဝေသွားပြီးနောက် အတူတူ ဦးညွှတ်လိုက်ကြပါတယ်။
သူတို့ သိပါတယ်။
ဘုရင့်မိသားစုကို ဦးညွှတ်လည်း အပိုပဲဆိုတာရယ်၊ ဝိညာဉ်သန္ဓေသားအဆင့် ပညာရှင် သုံးဦးကလည်း ဟိုနတ်လှေပိုင်ရှင်နဲ့ ပတ်သက်နေတာကြောင့် ဒီကိစ္စထဲ ဝင်ပါမှာ မဟုတ်ဘူးဆိုတာရယ်ကိုပေါ့။
အခု ကျွယ်မိသားစုကို ကယ်တင်နိုင်မှာက သူတို့ ရန်သူလို့ သတ်မှတ်ထားတဲ့ ဖန့်မိသားစုပဲ ရှိပါတော့တယ်။
သူတို့ရဲ့ ဘိုးဘေး ကျွယ်ဖေးချန် ပြောခဲ့တာကိုလည်း သူတို့ မှတ်မိနေပါတယ်။
မဟာချန်းက ရွှေအမြုတေအဆင့် ကျင့်ကြံသူတွေထဲမှာ လူကြီးလူကောင်းလို့ ခေါ်လို့ရတာ ဖန့်ထင်ကျန့် တစ်ယောက်ပဲ ရှိတယ်ဆိုတာပါပဲ။
"ဟုတ်တယ် မသိတဲ့သူမှာ အပြစ်မရှိပါဘူး မင်းတို့ရဲ့ ရွှေအမြုတေအဆင့် ပညာရှင် နှစ်ယောက်လည်း ပြစ်ဒဏ်စီရင်ခံရပြီးပြီဆိုတော့ ကျန်တဲ့ကိစ္စတွေက မင်းတို့နဲ့ မဆိုင်တော့ဘူး"
" အရင်လိုပဲ ဆက်နေနိုင်ပါတယ် ဒါပေမဲ့ မင်းတို့ ဆက်ပြီး မပိုင်ဆိုင်သင့်တဲ့ ပစ္စည်းအချို့တော့ ရှိလိမ့်မယ်"
" အဲဒါတွေကို စွန့်လွှတ်လိုက်မယ်ဆိုရင်တော့ ဘယ်သူမှ မင်းတို့ အသက်ကို ရန်ရှာမှာ မဟုတ်ဘူး"
ဖန့်ထင်ကျန့်က တခြား မိသားစုကြီး ၅ ခုက ရွှေအမြုတေအဆင့် ပညာရှင်တွေကို ဝေ့ကြည့်ရင်း ပြောလိုက်ပါတယ်။
ထိုလူတွေက ဖန့်ထင်ကျန့်ရဲ့ အကြည့်ကို ဆုံတဲ့အခါ တစ်ဖက်ကို လွှဲလိုက်တာ ဒါမှမဟုတ် ခေါင်းငြိမ့်ပြတာတွေ လုပ်ကြပါတယ်။
ဖန့်ထင်ကျန့် ပြောတဲ့ အဓိပ္ပာယ်ကို သူတို့ နားလည်သွားကြပါပြီ။
ကျွယ်ထျန်းကန်း တို့လည်း သက်ပြင်းချနိုင်သွားပါတယ်။
ကျွယ်မိသားစုအနေနဲ့ နာမည်ပျက်ပြီး ဒုတိယတန်းစား မိသားစု ဖြစ်သွားနိုင်ပေမယ့် အနည်းဆုံးတော့ အသက်ရှင်ခွင့် ရသွားပြီလေ။
ကျွယ်မိသားစုဝင် တစ်ယောက်က ရုတ်တရက် ပြောလိုက်တယ်။
"ဦးလေးကြီး ဒါပေမဲ့ ဖန့်ချန်က ကျွယ်ဝူတိကို သတ်လိုက်တာလေ"
ဖြောင်း
ကျွယ်ထျန်းကန်းက သူ့ကို ပါးရိုက်လိုက်ရာ ပါးရိုးတွေပါ ကြေသွားပြီး မြေပေါ် လဲကျကာ သွေးတွေ အန်နေတော့တယ်။
သူ့မျက်နှာမှာတော့ ထိတ်လန့်မှုတွေ ပြည့်နေပါတယ်။
ကျွယ်ထျန်းကန်းက မျက်နှာထား တင်းတင်းနဲ့ ပြောလိုက်တယ်။
"ကျွယ်ဝူတိ သေသွားတော့ ဘာဖြစ်လဲ သူက မင်းတို့ ထင်သလို ပြည့်စုံတဲ့သူလို့ တကယ် ထင်နေတာလား သူက ယုတ်မာတဲ့ အကြံအစည်တွေ ဖုံးကွယ်ထားတာ ဒီနေ့ ပွဲဖြစ်ရတာကလည်း သူ့ကြောင့်ပဲ"
ကျွယ်မိသားစု တပည့်တွေလည်း အံ့သြသွားပြီး ထပ်မပြောရဲကြတော့ပါဘူး။
အဲဒီနောက် ကျွယ်ထျန်းကန်းက အကြီးအကဲတွေကို ဦးညွှတ် နှုတ်ဆက်ပြီး ကုန်သွယ်ရေး ညီလာခံမှာ ဆက်မနေတော့ဘဲ လူအုပ်ကို ခေါ်ကာ ထွက်သွားပါတယ်။
တစ်လျှောက်လုံးမှာ သူ ဖန့်ချန် ရှိရာဘက်ကို လှည့်တောင် မကြည့်ခဲ့ပါဘူး။
ကျွယ်ဝူတိ သေသွားတာကို သူ တကယ်ပဲ ဂရုမစိုက်သလိုပါပဲ။
"အဟမ်း... အဟမ်း"
အရှင်ကျားဖြူက ချောင်းနှစ်ချက် ဟန့်လိုက်ပြီး ပေါ့ပေါ့ပါးပါးပဲ ပြောလိုက်တယ်။
"ကဲ. ကုန်သွယ်ရေး ညီလာခံကို စကြစို့"
သူ့ရဲ့ စကားက ဒီလောင်းကြေးပွဲကြီး တရားဝင် ပြီးဆုံးသွားပြီဆိုတာကို အသိပေးလိုက်တာပါပဲ။
လူတိုင်းလည်း ခုနက ဖြစ်ပျက်ခဲ့တာတွေကို ပြန်စဉ်းစားရင်း စိတ်ကို ပြန်ပြင်ကာ ကုန်သွယ်ရေးပွဲကို စတင်လိုက်ကြပါတယ်။
အဆုံးမှာတော့ ကိုယ့်အတွက် အခွင့်အရေးက ပိုအရေးကြီးတာ မဟုတ်လား။
ယွီယွဲ့ဖန် တစ်ယောက် ဖန့်ချန်က ဖန့်မိသားစုဆီ လျှောက်သွားတာကို မြင်လိုက်ရပြီး တောင်ပိုင်းကောင်းကင်ဂိုဏ်း ဘိုးဘေးရဲ့ မျက်နှာက ဒီလောက်အထိ ပျက်ယွင်းသွားတာကို သူ ပထမဆုံးအကြိမ် မြင်ဖူးတာပါပဲ။
"ဘိုးဘေး"
"သွား မင်းဝယ်စရာရှိတာ သွားဝယ်တော့"
တောင်ပိုင်းကောင်းကင်ဂိုဏ်း ဘိုးဘေးက ရုတ်တရက် တည်ငြိမ်သွားပြီး ဘာမှမဖြစ်ခဲ့သလိုမျိုး ယွီယွဲ့ဖန်ကို ခေါ်ကာ ပွဲထဲမှာ ပတ်ကြည့်နေပါတယ်။
"အဖေ... ကျွယ်ဝူတိက ဒီအတိုင်း သေသွားတာလား"
ထုံပိုင်ကျိုး က ထူးဆန်းတဲ့ မျက်နှာပေးနဲ့ ပြောလိုက်တယ်။
"သူ့ရဲ့ စီနီယာအစ်ကိုက ဒီကိစ္စအတွက် ငါတို့ကို အပြစ်တင်မှာ မဟုတ်ဘူးလား"
"ဘာကြောက်စရာ ရှိလဲ ခွန်လုံစစ်သူကြီး ကလည်း အညံ့စား မဟုတ်ဘူး ဘာမှ မဖြစ်နိုင်ဘူး"
ထုံဟု က တည်ငြိမ်နေပါတယ်။
"ဒီအချိန်မှာ ဘာသဲလွန်စမှ မပေါ်စေနဲ့ ငါတို့ရဲ့ မစ်ရှင်ကို ပြန်ပြင်ဖို့ လိုမယ်"
"ဟုတ်ကဲ့"
ဖန့်လင်ရှင်းဟာ ဖန့်ချန်က ဖန့်ကျွယ် တို့နဲ့အတူ ရယ်မော စကားပြောနေတာကို မြင်တဲ့အခါ သူမရဲ့ မိဘတွေကို သတ်ထားတဲ့ ရန်သူကို ကြည့်သလိုမျိုး မုန်းတီးမှုတွေနဲ့ ဖန့်ချန်ကို စိုက်ကြည့်နေမိတယ်။
"ဖန့်ချန် စီနီယာအစ်ကိုကျွယ်က ရှုံးသွားပြီပဲဥစ္စာနင် ဘာလို့ သူ့အသက်ကို ယူရတာလဲ"
ဖန့်ချန် ဘာမှမပြောရသေးခင်မှာပဲ ဖန့်ယွင် က ပြုံးပြီး ပြောလိုက်တယ်။
"ဖန့်လင်ရှင်း ကျွယ်ဝူတိ သေတာပဲကို ဘာလို့ ဒီလောက် အော်နေတာလဲ သူက မင်းရဲ့ ကျင့်ကြံဖော် လည်း မဟုတ်ဘဲနဲ့ မင်းတို့ ကံကြမ္မာက ဆုံတောင် မဆုံသေးဘူးလေ"
ဖန့်ကျွယ် ကလည်း မျက်မှောင်ကြုတ်လိုက်တယ်။
"ဖန့်လင်ရှင်း ဒါက လောင်းကြေးပွဲပဲ အသေအပျောက် ရှိတာက သဘာဝပဲလေ မင်း ဒါကို မမြင်ဘူးလား"
ဖန့်လင်ရှင်းက တခြားသူတွေကို ဂရုမစိုက်ဘဲ ဖန့်ချန်ကိုပဲ စိုက်ကြည့်ပြီး ထပ်မေးတယ်။
"ဘာလို့လ ဘာလို့ ဘာလို့လဲ"
အားလုံးရဲ့ မျက်နှာမှာ စိတ်ပျက်တဲ့ အရိပ်အယောင်တွေ ပေါ်လာပါတယ်။
ဖန့်ချန်က ခဏလောက် စဉ်းစားပြီး ခေါင်းခါလိုက်တယ်။
"အကြောင်းပြချက် မရှိဘူး ငါ လုပ်ချင်လို့ လုပ်လိုက်တာ"
အဲဒီလို ပြောပြီး ဖန့်ချန်က လူအစည်ကားဆုံး နေရာကို လျှောက်သွားပါတယ်။
အဲဒီမှာ မိုးတိမ်ပြာအင်ပါယာ က ကျင့်ကြံသူတွေ ပစ္စည်းတွေ ရောင်းနေကြပါတယ်။
သူက လက်ထဲမှာ ရှိသမျှ အဆင့်နိမ့် ဝိညာဉ်ကျောက်တုံး ၅ သောင်းလုံးကို သုံးပြီး ဝိညာဉ်သွေးဂိုဏ်းရဲ့ တိုက်ခိုက်မှုတွေအတွက် ပြင်ဆင်ဖို့ ရည်ရွယ်ထားတာပါပဲ။