အခန်း (၁၅၂)
Vol. 16 Ch. 152
ကျိုးလျန်ဟွား သကြားလုံးအခွံကိုခွာပြီး သူ့ကိုပေးလိုက်သည်။ ကျိုးရှန့်တနောက်ဆုံးတော့ သကြားလုံးကိုစားရသွားပြီး ၎င်း၏ချိုမြိန်မှုကို ခံစားနေလေ၏။
ကျိုးရှန့်တ ကျေနပ်စွာစားနေသည်ကိုမြင်သောအခါ ရှစ်ရှီသည် ကျိုးလျန်ဟွားထံစိတ်သက်သာရာရသွားသောအပြုံးဖြင့် ကြည့်လိုက်သည်။ ရှစ်ရှီမှ ကျိုးရှန့်တကိုခေါ်ပြီး တောင်အောက်ဆင်းရန်ပြင်လိုက်စဉ် ကျိုးထောင်ဟွား သူမကိုတားကာပြောလိုက်၏။
"အဒေါ်ရှစ် ရှန့်တလည်ပင်းကဒဏ်ရာက သာမန်ပွန်းပဲ့ဒဏ်ရာမဟုတ်ဘူး၊ သူက နတ်ဆိုးတစ်ကောင်ရဲ့ တိုက်ခိုက်မှုကိုခံထားရတာ၊ ကြည့်လိုက် ရှန့်တက အခုမငိုတော့ပေမယ့် မျက်နှာပေါ်မှာချွေးသီးတွေ ဆက်တိုက်ကျနေတုန်းပဲ၊ သူအရမ်း နာကျင်နေတာ"
ထိုသို့ပြောရင်းကျိုးထောင်ဟွား ရှေ့သို့ တိုးသွားပြီး ကျိုးရှန့်တအင်္ကျီကော်လာကို ဆွဲဖွင့်ကာ ဆက်ပြောသည်။
"ဒါက ခူယားကောင်နတ်ဆိုးကြောင့်ဖြစ်ရတာ၊ သူ့ကိုနည်းနည်းလေးထိမိတာနဲ့တောင် အရမ်းနာကျင်နေလိမ့်မယ်"
ရှစ်ရှီသည် ခူယားကောင်များအကြောင်းကို သိထားသည်။ ဤသတ္တဝါများသည် နေရာအနှံ့အပြားတွင် ပေါက်ဖွားတတ်ပြီး အပင်များ၏အရောင်နှင့် တစ်ထပ်တည်းကျအောင် ရုပ်ဖျက်ရာတွင်အလွန် ကျွမ်းကျင်ကြသည်။ သာမန် ခူယားကောင်များပင်လျှင် လုံလောက်အောင် အဆိပ်ပြင်းနေပြီဖြစ်ရာ ယခု ခူယားကောင်နတ်ဆိုးမှာ ရှန့်တကိုဒဏ်ရာရစေခဲ့ပြီပင်။
"ထောင်ဟွား ရှန့်တရဲ့နာကျင်မှုကို သက်သာစေမယ့် နည်းလမ်းလေးကူစဉ်းစားပေးပါဦး"
ရှစ်ရှီသည် ကျိုးရှန့်တမျက်နှာပေါ်ရှိ ချွေးသီးချွေးပေါက်များကို အနီးကပ် ကြည့်ရင်း ရင်ကွဲမတတ်ဖြစ်နေရသည်။
သို့သော် ကျိုးထောင်ဟွားမှာလည်း အခက်ကြုံနေရ၏။
"သူက ခူယားကောင်နတ်ဆိုးနဲ့ထိမိထားတာဆိုတော့ ဘယ်ဆေးမှမတိုးဘူး၊ သူ့ဆီကထွက်တဲ့ အရည်ကပဲကူညီပေးနိုင်မှာ"
ရှစ်ရှီထိတ်လန့်သွားသည်။ သူမဘာလုပ်နိုင်တော့မှာလဲ။
"ထောင်ဟွား အဲ့ခူယားကောင်နတ်ဆိုးစုတ်ကိုဖမ်းပြီး ရှန့်တကိုလိမ်းပေးဖို့သူ့အရည်ကိုယူပေးပါဦး အဒေါ့်ကိုကူညီပါကွယ်၊ ရှန့်တ ဒီလောက်နာကျင်နေတာကို ဘယ်လိုလုပ်ခံနိုင်ရည်ရှိမှာလဲ"
ရှန့်တတစ်ယောက် ဤမျှထိနာကျင်နေရသည်ကို သူမ,မကြည့်ရက်နိုင်တော့ပေ။
ကျိုးရှန့်တမျက်နှာ ဖြူဖျော့နေပြီကို တွေ့လိုက်ရသဖြင့် ကျိုးထောင်ဟွားသည် အဆောင်လက်ဖွဲ့တစ်ခုကို ထုတ်ကာပြောလိုက်သည်။
"အဒေါ်ရှစ် ဒီအဆောင်ကို ရှန့်တကိုယ်ပေါ်မှာ ကပ်ထားလိုက်ပါ၊ သူ့ကိုနည်းနည်းတော့ သက်သာသွားစေလိမ့်မယ်၊ သမီး အခုပဲအဲ့ဒီခူယားကောင်နတ်ဆိုးကို သွားဖမ်းလိုက်ဦးမယ်"
ကျိုးရှန့်တကိုကူညီရန် ခူယားကောင်နတ်ဆိုးကိုဖမ်းခြင်းမှာ အကြောင်းအရင်းတစ်ခုသာဖြစ်သည်။ ဒုတိယအချက်အနေဖြင့် သူမသည် ခူယားကောင်နတ်ဆိုးများကို မြို့ရိုးတစ်လျှောက်လုံးတွင် ဖြန့်ကျက်ထားချင်ခြင်းပင်။ ထိုအခါ မြို့ရိုးကိုကျော်တက်ပြီး ကျိုးကျားရွာထဲသို့ ဝင်ရောက်ရန်ကြိုးစားသူတိုင်း အံ့အားသင့်မှုကြီးများနှင့် ကြုံတွေ့ရလိမ့်မည်။ နတ်ဆိုးလေး၏လမ်းပြမှုဖြင့် ကျိုးထောင်ဟွားသည် အဆိပ်ပြင်းခူယားကောင်နတ်ဆိုး ပုန်းအောင်းနေသည့် နေရာကို လျင်မြန်စွာရှာတွေ့သွားလေသည်။ ၎င်းသည် သစ်ရွက်တစ်ရွက်၏ ကျောဘက်တွင်ကပ်နေပြီး သေချာမကြည့်လျှင် လုံးဝမမြင်ရသလောက်ပင်။
၎င်းသည် အစိမ်းရောင်တောက်တောက်အင်္ကျီကိုဝတ်ဆင်ထားပြီး အရောင်အသွေးစိုပြည်ကာ ၎င်း၏ကျောကုန်းတစ်လျှောက်တွင် အပြာရောင်အစက်အပြောက်တစ်တန်း ပါရှိသည်။
၎င်း၏အစွန်းနှစ်ဖက်နှင့် ဘေးပတ်လည်ရှိ အာရုံခံအမွေးအမျှင်များအား အမွှေးထူထူဆူးချွန်များဖြင့် ဖုံးလွှမ်းထား၏။ ကျိုးရှန့်တသည် ဤဆူးချွန်များဖြင့်အထိုးခံလိုက်ရသဖြင့် ထိုကဲ့သို့ဖြစ်သွားရခြင်းဖြစ်ရမည်။
ကျိုးထောင်ဟွား ဆောင့်ကြောင့်ထိုင်ချကာ ထိုအဆိပ်ပြင်းခူယားကောင်နတ်ဆိုးလေးကို ကြည့်လိုက်သည်။ ဤတစ်ကောင်သည် ယခုမှနတ်ဆိုးအဖြစ်သို့ ပြောင်းလဲလာခြင်းဖြစ်ပြီး အများဆုံး ကျင့်ကြံခြင်းစွမ်းအား အနှစ်နှစ်ဆယ်သာ ရှိသေးသည်။ သူတစ်ကောင်တည်းနှင့် ကျိုးကျားရွာ၏မြို့ရိုးတစ်လျှောက်လုံးကို ဖုံးလွှမ်းရန်မလုံလောက်နိုင်ပေ။ ထို့အပြင် ၎င်းသည် ကျင့်ကြံခြင်းစွမ်းအား အားနည်းသောသားလောင်းတစ်ကောင်သာဖြစ်သဖြင့် သိပ်အသုံးဝင်မည်မဟုတ်ချေ။ ကျိုးထောင်ဟွား စိုးရိမ်ပူပန်စွာဖြင့် မော့ကြည့်လိုက်ရာ သူမခေါင်းထက်ရှိသစ်ရွက်တိုင်း၏ကျောဘက်တွင် အဆိပ်ပြင်းခူယားကောင်နတ်ဆိုး အများအပြားကိုတွေ့လိုက်ရသည်။ ကျိုးထောင်ဟွား မျက်လုံးများတောက်ပသွားရ၏။
ဒါက သူမလိုချင်နေတဲ့ဟာ အတိအကျပဲ။ သူတို့ကရောက်လာတာကို ဖုံးကွယ်ထားကြတာကိုး။
ကျိုးထောင်ဟွားသည် ဝိညာဉ်စွမ်းအင်အိတ်တစ်ခုဖန်တီးရန် သူမဝိညာဉ်စွမ်းအင်ကို ထုတ်လွှတ်လိုက်သည်။ ရုတ်တရက် ချွန်ထက်သောတံစဉ်းတစ်ခုသည် သူမအထက်ရှိသစ်ပင်ပင်စည်အနောက်မှ တိတ်တဆိတ်ပေါ်ထွက်လာလေ၏။ ၎င်းသည် ရှေ့သို့တစ်လှမ်းတိုးလာရာ ၎င်း၏တစ်ကိုယ်လုံး ပေါ်လွင်လာလေသည်။ ကျိုးထောင်ဟွား မျက်ဝန်းအိမ်များ ကျုံ့ဝင်သွားသည်။
ရှိခိုးကောင်နတ်ဆိုးလား။ ဒါဆို ခူယားကောင်နတ်ဆိုးတွေကို ပစ်မှတ်ထားနေတာ သူမတစ်ယောက်တည်း မဟုတ်ဘူးပေါ့။
၎င်း၏ တံစဉ်းစွန်းရှိလွှသွားများသည် ဓားများအလား ချွန်ထက်နေပြီး သစ်ရွက်များပေါ်ရှိ ခူယားကောင်နတ်ဆိုးများကို ချက်ချင်းတိုက်ခိုက်လေတော့သည်။ ၎င်း၏ တံစဉ်းကဲ့သို့သော ရှေ့ခြေလက်များသည် လေထဲတွင်လျှပ်စီးလက်သကဲ့သို့ လျှပ်တစ်ပြက်လှုပ်ရှားသွားပြီး ဖက်ကနဲ ခူယားကောင်နတ်ဆိုးများကို တိတိကျကျညှပ်ဖမ်းလိုက်လေ၏။ ခူယားကောင်များမှာ အသည်းအသန် ရုန်းကန်နေကြပြီး သူတို့၏အမွှေးထူထူဆူးချွန်များဖြင့် ရှိခိုးကောင်နတ်ဆိုးကို အားပါးတရထိုးစိုက်ကြသော်လည်း ၎င်း၏မာကျောသောအခွံကြောင့် ဘာအန္တရာယ်မှ မဖြစ်ခဲ့ပေ။ ၎င်းသည် ခူယားကောင်နတ်ဆိုးများကို သစ်ပင်ပင်စည်နှင့် ဖိကပ်ထားပြီး ချွန်ထက်သောသွားများပြည့်နှက်နေသည့် ၎င်း၏မေးရိုးများဖြင့် သူတို့၏အပြင်ဘက်အရေခွံကို လျင်မြန်စွာဆွဲဖြဲကာ သူတို့ခန္ဓာကိုယ်ထဲမှအရည်များကို အငမ်းမရစုပ်ယူလေတော့သည်။
ကျိုးထောင်ဟွားမျက်လုံးများ အေးစက်သွား၏။ သူမပစ္စည်းတွေကို လုယူဖို့ ကြိုးစားနေတာလား။
သူတို့အားလုံးမှာ သားလောင်းများဖြစ်နေပေသိ ကျင့်ကြံခြင်းစွမ်းအားအနှစ်နှစ်ဆယ်ရှိနေပြီပင်။ ကျိုးထောင်ဟွား သူမလက်ဖဝါးမှနေ ဝိညာဉ်စွမ်းအင်ကြာပွတ်တစ်ခုကို ရုတ်တရက်ထုတ်လွှတ်လိုက်သည်။ လက်ကောက်ဝတ်ကို တစ်ချက် ရမ်းလိုက်ရာ အဖြူရောင်ကြာပွတ်သည် အဆိပ်ပြင်းမြွေတစ်ကောင်အလား လေတိုက်သံနှင့်အတူ ရှိခိုးကောင်နတ်ဆိုးထံသို့ ရိုက်ခတ်သွားလေ၏။
"???"
ရှိခိုးကောင်နတ်ဆိုး အံ့အားသင့်သွားသည်။ ဒီမှာ နောက်ထပ်လူတစ်ယောက် ရှိနေတာလား။ အစွမ်းထက်တဲ့ဆရာသခင်တစ်ယောက်ဖြစ်နိုင်တယ်။
၎င်းသည် လျင်မြန်စွာတုံ့ပြန်လိုက်ပြီး ကာကွယ်ရန် ၎င်း၏ရှေ့လက်တစ်ဖက်ကို ချက်ချင်း မြှောက်လိုက်သည်။ ကျယ်လောင်သော ခွပ်ကနဲအသံတစ်ခု ထွက်ပေါ်လာပြီး ဝိညာဉ်စွမ်းအင်ကြာပွတ်မှာ ၎င်း၏မာကျောသောအခွံကို ရိုက်မိသွားရာ မီးပွားများလွင့်စင်သွားလေ၏။
၎င်းသက်ပြင်းချနိုင်သွားရသည်။
ကံကောင်းလို့ ကာကွယ်နိုင်ခဲ့တာ။ သူမက အတော်လေးအစွမ်းထက်တာပဲ။
"ဂျွတ်"
ပြတ်သားပြီးနားကွဲလုမတတ် ကျိုးပဲ့သံတစ်ခု ပဲ့တင်ထပ်သွားလေသည်။ ၎င်း၏ မျက်နှာပေါ်တွင် စိတ်ပျက်အားငယ်မှုများဖြင့် ပြည့်နှက်သွားလေသည်။
မဖြစ်နိုင်ဘူး။
၎င်းငုံ့ကြည့်လိုက်ရာ ၎င်း၏ရှေ့လက်တစ်ဖက် ကျိုးပဲ့သွားသည်ကို တွေ့လိုက်ရသည်။
"ရှီး"
ရှိခိုးကောင်နတ်ဆိုး နာနာကျင်ကျင်ဖြင့်အော်ဟစ်လိုက်သည်။ ဒေါသထွက်သွားသဖြင့် ၎င်းသည် သစ်ပင်ပေါ်မှခုန်ဆင်းလာပြီး ၎င်း၏နောက်တံစဉ်းတစ်ဖက်ကို ကျိုးထောင်ဟွား၏ငယ်ထိပ်ဆီသို့ ရွယ်ကာလွှဲယမ်းလိုက်လေ၏။ ကျိုးထောင်ဟွား အေးစက်စက်ဖြင့်သာ စိုက်ကြည့်နေသည်။ ဝိညာဉ်စွမ်းအင်လုံးတစ်ခုသည် သူမဘေးပတ်လည်တွင် လျင်မြန်စွာဖြစ်ပေါ်လာပြီး သူမတစ်ကိုယ်လုံးကို လွှမ်းခြုံကာ ၎င်း၏တံစဉ်းကိုကာကွယ်တားဆီးလိုက်လေသည်။ ရှိခိုးကောင်နတ်ဆိုးသည် ထိုအဖြူရောင်အလင်းဝန်းကို ဖောက်ထွင်း၍မရသဖြင့် ၎င်း၏ပေါင်းစပ်မျက်လုံးများမှာ သွေးရောင်လွှမ်းသွားပြီး စိုးရိမ်မှုနှင့်ဒေါသတို့ ရောထွေးနေလေသည်။ ၎င်းသည် မာကျောသောအဖြူရောင်အလင်းဝန်းကြောင့် ဘာလုပ်ရမှန်းမသိ ဖြစ်နေစဉ် အတွင်းမှလက်တစ်ဖက် ရုတ်တရက် ထွက်ပေါ်လာပြီး အေးစက်စက်အလင်းတန်းတစ်ခု လက်ကနဲဖြစ်သွားကာ ဝိညာဉ်စွမ်းအင်ဓားတစ်လက်သည် ၎င်း၏မျက်လုံးများကို ဖောက်ထွင်း၍ ခေါင်းထဲသို့ စိုက်ဝင်သွားလေ၏။ အိမ်ထောင်ကျပြီးနောက်တွင်တော့ နှစ်ပေါင်းသုံးရာကျော် ကျင့်ကြံခြင်းစွမ်းအားရှိသော နတ်ဆိုးတစ်ကောင်ကိုဖြေရှင်းရသည်မှာ သူမအတွက်အရင်ကထက် အများကြီး ပိုမိုလွယ်ကူနေပြီပင်။
"!!!"
ရှိခိုးကောင်နတ်ဆိုး ပြင်းပြင်းထန်ထန်တုန်ယင်သွားပြီး အားအင်ကုန်ခမ်းကာ မြေကြီးပေါ်သို့ လဲကျသွားလေသည်။
၎င်း ရှုံးနိမ့်သွားပြီပင်။ သူမက အရမ်းအစွမ်းထက်တာပဲ။
ကျိုးထောင်ဟွား ၎င်းကိုခြေထောက်ဖြင့် ကန်လိုက်သည်။ ဒါတောင်သူမရဲ့ခူယားကောင်နတ်ဆိုးတချို့ကိုတောင် စားပစ်လိုက်သေးတယ်။ သူမ ဝိညာဉ်စွမ်းအင်ဓားကိုကိုင်ကာ ရှိခိုးကောင်နတ်ဆိုး၏ခေါင်းကို ခွဲလိုက်ပြီး နှစ်ပေါင်း သုံးရာကျင့်ကြံခြင်းစွမ်းအား ပါဝင်သောအမြုတေကို ထုတ်ယူလိုက်သည်။ ထိုအခါမှသာ သူမအပြုံးမှာပြန်လည်ပေါ်လာတော့၏။
ခူယားကောင်နတ်ဆိုးတွေကိုကျွေးဖို့ ဒါကို သူမ လိုအပ်တယ်လေ။ အမြုတေကိုသိမ်းဆည်းပြီးနောက် သူမသည် သစ်ပင်ပေါ်ရှိ ခူယားကောင်နတ်ဆိုးအားလုံးကို ဖမ်းယူလိုက်ရာ နောက်ဆုံးတွင်အိတ်တစ်လုံးအပြည့် ရရှိသွားသဖြင့်ပြန်ယူလာခဲ့သည်။ ရှစ်ရှီနှင့် သူမသားကျိုးရှန့်တတို့သည် ထိုနေရာတွင်စောင့်နေဆဲပင်။ ကျိုးထောင်ဟွား၏ ကာကွယ်ရေး အဆောင်လက်ဖွဲ့ကြောင့် ကျိုးရှန့်တအများကြီး သက်သာသွားသည်။ သို့သော် အချိန်ကြာလာသည်နှင့်အမျှ သူ့ဂုတ်ပိုးတွင် ရေနွေးပူလောင်ထားသကဲ့သို့ အနီကွက်ကြီးတစ်ခုပေါ်လာပြန်၏။
"ထောင်ဟွား ပြန်လာပြီလား၊ အဲ့ဒီခူယားကောင်နတ်ဆိုးကို တွေ့ခဲ့လား"
ကျိုးထောင်ဟွားကိုမြင်သည်နှင့် ရှစ်ရှီစိုးရိမ်တကြီး မေးလိုက်သည်။ ရွာတစ်ရွာလုံးတွင် နတ်ဆိုးများအားဖြေရှင်းနိုင်စွမ်း ရှိသည်မှာ ထောင်ဟွားတစ်ယောက်တည်းပင်။ ကျိုးထောင်ဟွား ခေါင်းညိတ်လိုက်ပြီး သူတို့ထံလျှောက်သွားကာ သူမကိုင်လာသော ဝိညာဉ်စွမ်းအင်အိတ်ကို အောက်ချလိုက်သည်။ အိတ်ကိုဖွင့်လိုက်သည်နှင့် ရှစ်ရှီနှင့်ကျိုးလျန်ဟွားတို့ ထိတ်လန့်သွားကြ၏။
ဒီလောက်တောင် အများကြီးလား။