အခန်း (၁၅၉)
Vol. 16 Ch. 159
ကျိုးထောင်ဟွား သံသယဝင်သွားသော်လည်း အချိန်မစောတော့သဖြင့် မနက်ဖြန်မှ ထပ်မံစစ်ဆေးရန် ဆုံးဖြတ်လိုက်သည်။ တောင်ပေါ်ရှိ နတ်ဆိုးလေးများသည် လေထဲတွင်ပျံသန်းနေသော ကျိုးထောင်ဟွားနှင့် ပိုးဖလံနတ်ဆိုးတို့ကို အားကျစွာကြည့်နေကြသည်။ အတောင်ပံရှိတာ အရမ်းကောင်းတာပဲ။
ညနေခင်း
ကျိုးကျားရွာရှိအိမ်တိုင်းမှ မီးခိုးငွေ့များ ထွက်ပေါ်နေပြီး လေထဲတွင်ဟင်းရနံ့များ မွှေးပျံ့နေသည်။ ကျိုးထောင်ဟွား ရှန်းမိသားစုခြံဝင်းထဲသို့ ဆင်းသက်လိုက်သည်နှင့် မီးဖိုချောင်ထဲရှိ ရှန်းမင် ချက်ချင်းသတိထားမိလိုက်သည်။ ခြံထဲသို့ ကောင်းကင်မှတစ်ခုခု ကျလာသည်ဟု ထင်ကာ ဂေါ်ပြားတစ်လက်ကို သူကိုင်၍အပြင်ထွက်လာခဲ့၏။ မထင်မှတ်ဘဲ ၎င်းမှာကျိုးထောင်ဟွားနှင့်.....
ကျိုးထောင်ဟွား ရှန်းမင်ကိုမိတ်ဆက်ပေးလိုက်သည်။
"အစ်ကိုရှန်းမင် ခူယားကောင်နတ်ဆိုးက လူအသွင်ပြောင်းသွားပြီ"
လေထဲ၌ပျံသန်းခြင်းကို ယခုလေးတင် ခံစားဖူးသဖြင့် သူမအလွန်တရာစိတ်လှုပ်ရှားနေသည်။ ရှေးခေတ်မှာ ခေတ်သစ်ထက်ပိုပြီး သက်သောင့်သက်သာရှိလှ၏။ သူမသည် ခူယားကောင်နတ်ဆိုး၏ကျောဘက်ရှိ အတောင်ပံများကို ကျေနပ်စွာကိုင်တွယ်ကြည့်လိုက်သည်။ ဧည့်ခန်းမထဲရှိ ခူယားကောင်အိမ်များပါသော ခြင်းတောင်းနှစ်လုံးသည် ကျိုးထောင်ဟွားစကားကိုကြားသောအခါ လှုပ်ရှားလာကြ၏။ သူတို့လည်း အိမ်ထဲကနေထွက်ချင်နေကြပြီပင်။ သူတို့လည်း လူအသွင်ပြောင်းချင်ကြသလို အတောင်ပံတွေပါ လိုချင်ကြ၏။
"ဂါရဝပြုပါတယ် သခင်မနဲ့ သခင်"
ခူယားကောင်နတ်ဆိုးမှာ ရှန်းမင်ကို ဦးညွှတ်နှုတ်ဆက်လိုက်သည်။ ရှန်းမင်သည် ထိုနတ်ဆိုးထံတစ်ချက်ကြည့်လိုက်၏။ သူတို့အိမ်တွင် နတ်ဆိုးများပိုမိုများပြားလာသဖြင့် တစ်နေ့တခြားစည်ကားသက်ဝင်လာလေသည်။ ထိုသို့တွေးရင်း သူသည် ကျိုးထောင်ဟွား၏ဝမ်းဗိုက်ဆီသို့ လှမ်းကြည့်လိုက်ပြီး နောက်ထပ်လူတစ်ယောက်သာ ထပ်တိုးလာရင် သေချာပေါက်ပိုစည်ကားလာမှာပဲဟု တွေးလိုက်မိ၏။
"ဇနီးလေး လက်ဆေးပြီးထမင်းစားရအောင်၊ ညစာကျက်တော့မယ်"
ရှန်းမင် စားပွဲပြင်ပြီးသည်နှင့် ရုတ်တရက် မေးလိုက်သည်။
"ဇနီးလေး ကိုယ်တို့ ကလေးဘယ်နှယောက်ရမလဲဆိုတာ တွက်ပေးလို့ရမလား၊ ယောင်္ကျားလေးလား မိန်းကလေးလား"
ကျိုးထောင်ဟွား ဟင်းတစ်လုတ်ကိုပါးစပ်ထဲထည့်လိုက်ရုံရှိသေးရာ သူ့စကားကိုကြားပြီး မှင်သက်သွားလေသည်။
ကလေးလား
ကလေးရမယ်ပေါ့လေ
ကျိုးထောင်ဟွားသည် ရှန်းမင်မျက်နှာထံ တစ်ချက်ကြည့်လိုက်ရုံဖြင့် သူကလေး ဘယ်နှယောက်ရမည်ကို သိနိုင်လေသည်။ လိင်အမျိုးအစားများကိုပင် ရှင်းရှင်းလင်းလင်းသိနေ၏။
ဒီလောက် အများကြီးလား
ကျိုးထောင်ဟွားရင်ထဲ ထိတ်ကနဲဖြစ်သွားသည်။
သူတို့က ဝက်ပေါက်လေးတွေများဖြစ်နေမလား
ကျိုးထောင်ဟွား မျက်လွှာအမြန်ချလိုက်ပြီးပြောလာ၏။
"သားသမီးများရင် ကံကောင်းမှုတွေများတာပေါ့"
များတယ်ပေါ့လေ။
ရှန်းမင် မျက်ခုံးပင့်လိုက်သည်။
"ကိုယ်တို့ရဲ့ပထမဆုံး ကလေးက ဘယ်တော့လာမှာလဲ"
ကျိုးထောင်ဟွား သူ့မျက်နှာထံမော့ကြည့်လိုက်သည်။
"ဒီနှစ် စက်တင်ဘာလမှာ ကိုယ်ဝန်ရှိလိမ့်မယ်"
သို့သော် ဒီဇင်ဘာလတွင် စစ်တပ်တစ်တပ်သည် ကျိုးကျားရွာသို့ရောက်ရှိလာပြီး ရွာတစ်ရွာလုံးကိုဝိုင်းရံထားလိမ့်မည်။
ကျိုးထောင်ဟွား ရုတ်တရက်အန္တရာယ်ရှိသည့်ခံစားချက်ကို ခံစားလိုက်ရသည်။
နှစ်လပဲ ကျန်တော့တယ်။
ကိုယ်ဝန်ရှိပြီးနောက်တွင် သူမခန္ဓာကိုယ်ထဲတွင် ဝိညာဉ်စွမ်းအင်အလုံအလောက်ရှိနေမည်လားဆိုသည်ကို သူမ,မသိပေ။ ကျိုးထောင်ဟွား၏မျက်နှာထား လေးနက်သွားရသည်။ အချိန်မှာအလွန်တရာအရေးကြီးနေပြီး နှစ်လအတွင်းအရာအားလုံးကို သူမပြင်ဆင်ထားရမည်။ သူမအတွက် အသုံးပြုရန် ကျင့်ကြံခြင်းအမြုတေများကို တတ်နိုင်သမျှ များများရှာဖွေရမည်ဖြစ်ပြီး နတ်ဆိုးများကိုလည်း တတ်နိုင်သမျှများများဖမ်းဆီးရမည်။ တစ်ချိန်တည်းမှာပင် မြို့ရိုးများကိုလည်း တတ်နိုင်သမျှ ပြီးပြည့်စုံအောင်တည်ဆောက်ရမည်ပင်။ ကျိုးထောင်ဟွား မေးလိုက်၏။
"အစ်ကိုရှန်းမင် မနက်ဖြန်ညီမနဲ့အတူ တောင်ပေါ် လိုက်ခဲ့မလား"
သူမသည် အချိန်မရွေးဝိညာဉ်စွမ်းအင် ဖြည့်တင်းရန်လိုအပ်ပြီး တိုက်ပွဲကိုမြန်မြန်ဆန်ဆန်အဆုံးသတ်ရမည်။ နောက်တစ်နေ့မနက်စောစောတွင် အိမ်ရှိကိစ္စများကိုစီစဉ်ပြီးနောက် သူတို့နှစ်ဦးတောင်ပေါ်သို့ ချက်ချင်းထွက်ခွာခဲ့ကြသည်။ လမ်းတစ်လျှောက်တွင် ကျိုးထောင်ဟွားသည် နတ်ဆိုးငယ်တချို့ကို သတ်ဖြတ်ပြီး သူတို့အမြုတေများကိုယူဆောင်ခဲ့၏။ သို့သော် တောင်ပေါ်ရှိနတ်ဆိုးငယ်များသည် အန္တရာယ်ကိုအာရုံခံမိပြီး ပုန်းအောင်းနေကြပုံရကြောင်း ကျိုးထောင်ဟွားသတိထားမိလိုက်သည်။ တောင်များထဲသို့ ပိုမိုနက်ရှိုင်းစွာဝင်ရောက်သွားသည်နှင့်အမျှ ယမန်နေ့ညနေခင်း၌ လေထဲမှမြင်တွေ့ခဲ့ရသော ရေကန်ဖြူကြီးကို ကျိုးထောင်ဟွား ချက်ချင်းသတိရသွား၏။
ထိုနေရာကို သူမယခင်က တစ်ခါမှမမြင်ဖူးခဲ့ပေ။ ခူယားကောင်နတ်ဆိုးကို လေထဲမှနေ၍ တည်နေရာကိုအတည်ပြုခိုင်းပြီးနောက် ကျိုးထောင်ဟွားသည် ရှန်းမင်ကိုခေါ်ကာ တောနက်ထဲသို့ ပိုမိုနက်ရှိုင်းစွာ ဝင်ရောက်သွားလေသည်။ အချိန်မည်မျှကြာအောင် လျှောက်ခဲ့မိသည်မသိ၊ သူတို့ပတ်ဝန်းကျင်တွင် လူသူမရောက်ဖူးသော သဘာဝတောအုပ်ကြီးတစ်ခုဖြင့် ဝန်းရံထားသကဲ့သို့ဖြစ်နေ၏။ ရှန်းမင်ရှိနေခြင်းကြောင့် နတ်ဆိုးငယ်လေးများသည် သူတို့နှင့် ခပ်ခွာခွာတွင်သာနေကြလေသည်။
ရုတ်တရက် ရှန်းမင်သည် ကျိုးထောင်ဟွားလက်ကို လှမ်းဆွဲလိုက်ပြီး ရှေ့ဆက်မသွားရန်တားလိုက်၏။
"အစ်ကိုရှန်းမင်"
ကျိုးထောင်ဟွား စကားမပြောနိုင်ခင်မှာပင် ရှန်းမင် သူမပါးစပ်ကို လက်ဖြင့်ပိတ်လိုက်သည်။ သူ သူမနား,နားကပ်ကာတိုးတိုးလေးပြောလာ၏။
"ညီမထောင်ဟွား အသံမထွက်နဲ့၊ တစ်ခုခု ချဉ်းကပ်လာနေသလိုပဲ"
စကားပြောနေစဉ်မှာပင် သူ့နားရွက်များ လှုပ်ရှားသွားပြီး အဝေးမှထွက်ပေါ်လာသောအသံကို အာရုံစိုက်နားထောင်နေလေသည်။
"ဒီအသံက ထူးဆန်းတယ်၊ ဝံပုလွေခြေသံနဲ့ မတူဘူး၊ တစ်ခါတလေပြင်းပေမယ့် တစ်ခါတလေကျ အသံသဲ့သဲ့လေးပဲ"
ရှန်းမင် ဆက်ပြောရင်း ကျိုးထောင်ဟွားနားထဲသို့ တိုးတိုးလေးပြောလိုက်သည်။ နွေးထွေးပြီး ယားကျိကျိဖြစ်စေသော သူ့အသက်ရှူငွေ့များသည် စကားလုံးတိုင်းနှင့်အတူ သူမနားရွက်အားပွတ်တိုက်သွားလေ၏။ ကျိုးထောင်ဟွား နှုတ်ခမ်းကို ကိုက်လိုက်ပြီး သူမဦးနှောက်သည် တွေးတောနိုင်စွမ်း ဆုံးရှုံးသွားသကဲ့သို့ ခံစားလိုက်ရသည်။ ရုတ်တရက် လေထဲတွင် ပျံသန်းနေသော နတ်ဆိုးလေးများကို သူမမြင်တွေ့လိုက်ရ၏။ ကျိုးထောင်ဟွားသည် ခူယားကောင်နတ်ဆိုးကို အာရုံဖြင့်လှမ်းခေါ်လိုက်ပြီး ပတ်ဝန်းကျင်ကိုကြည့်ခိုင်းလိုက်သည်။
နတ်ဆိုးမှ သူတို့ကိုမမြင်စေရန် ရှန်းမင်သည် ကျိုးထောင်ဟွားကိုပွေ့ချီကာ သစ်ပင်ပင်စည်အနောက်တွင် အသာပုန်းအောင်းလိုက်၏။ ခူယားကောင်နတ်ဆိုး လေထဲရောက်သွားသည်နှင့် သစ်တောထဲတွင်ရွေ့လျားနေသော နှင်းဆီပွင့်အလား ဖြူဖွေးသည့်ပုံရိပ်တစ်ခုကိုတွေ့လိုက်ရသည်။ သစ်ပင်များမှ ၎င်း၏ပုံသဏ္ဍာန်ကို ဖုံးကွယ်ထားသဖြင့် နတ်ဆိုးပုံစံအား သေချာမမြင်ရပေ။ ခူယားကောင်နတ်ဆိုးမှာ ကျိုးထောင်ဟွားကို စိတ်ဖြင့်ဆက်သွယ်၍ပြန်ပြောလိုက်သည်။
ကျိုးထောင်ဟွား : အဖြူရောင်ပေါ့လေ နှင်းဝံပုလွေလား၊ နှင်းမြေခွေးဖြူလား။
ထိုစဉ်မှာပင် မလှမ်းမကမ်းရှိမြက်ခင်းပြင်ပေါ်တွင် နှင်းလိုဖြူဖွေးနေသောမြင်းတစ်ကောင် ဖြည်းညှင်းစွာပေါ်ထွက်လာသည်ကို ကျိုးထောင်ဟွားမြင်တွေ့လိုက်ရသည်။ ၎င်းသည် ရပ်တန့်ကာ မြက်အချို့ကိုစားနေလေ၏။ သို့သော် ၎င်းမှာသာမန်မြက်မဟုတ်ဘဲ ဝိညာဉ်စွမ်းအင် အနည်းငယ်ပါဝင်သော ရေခဲနွယ်မြက်ပင်အစုအဝေးလေးသာဖြစ်ကြောင်း ကျိုးထောင်ဟွားချက်ချင်း သိလိုက်သည်။
ဒီမြင်းက ပါးနပ်တာပဲ။ ရေခဲနွယ်မြက်ပင်များကို စားထားသောကြောင့်လားမသိပေသိ ၎င်း၏လည်ဆံမွှေးများသည် ဆောင်းရာသီပိုးသားအလား ချောမွေ့တောက်ပနေလေ၏။ ၎င်း၏ခြေလက်များသည် ရှည်လျားသန်မာကာ ကြွက်သားများဖြင့် တင်းရင်းနေလေသည်။ ၎င်းသည်မြို့ပေါ်ရှိ မြင်းဇောင်းများတွင် သူမမြင်ဖူးသမျှ မြင်းများနှင့် လုံးဝမတူပေ။ ကျိုးထောင်ဟွားသည် မြင်းများနှင့်ပတ်သက်၍ သိပ်နားမလည်သော်လည်း ၎င်းသည်မြို့ပေါ်ရှိ မြင်းဇောင်းများတွင်ရောင်းချသော မြင်းများအားလုံးထက် သေချာပေါက်ပိုကောင်းသည်ဟု ခံစားမိသည်။
အဲဒီမြင်းတွေကသာ တစ်ကောင်ကိုတေးတစ်သောင်းတန်တယ်ဆိုရင် ဒီမြင်းက အနည်းဆုံးတေးတစ်သိန်းတန်တယ် မဟုတ်ဘူး တေးတစ်သန်းတောင်တန်တယ်။
ရေခဲနွယ်မြက်ကိုစားပြီးနောက် မြင်းသည် အထူးတလည်စိတ်ကြည်နူးသွားပြီး ၎င်း၏အမြီးကို ကျေနပ်စွာယမ်းနေလေသည်။ မြက်နံ့ကိုရသဖြင့် ခရီးရှည်ကြီး လာခဲ့ရသည်မှာတန်သွားလေပြီပင်။ ရှန်းမင်သည် တောနက်ထဲ၌မြင်းရိုင်းတစ်ကောင်ကိုတွေ့ရလိမ့်မည်ဟု ထင်မထားခဲ့မိပေ။ သူ တောင်ပေါ်မှာ အမဲလိုက်လာသည်မှာကိုးနှစ်ရှိပြီဖြစ်သော်လည်း ထိုအချိန်၌မြင်းရိုင်းတစ်ကောင်ကို တစ်ခါမှမမြင်ဖူးခဲ့ပေ။
*ဂျွတ်*
မြင်းရိုင်းသည် ခြေသံကြားလိုက်ရသဖြင့်မော့ကြည့်လိုက်ရာ ဆယ့်ငါးနှစ်အရွယ်မိန်းကလေးတစ်ဦး တိတ်တဆိတ်ချဉ်းကပ်လာသည်ကိုတွေ့လိုက်ရသည်။
ကျိုးထောင်ဟွားသည် သူမဤမျှမြန်မြန် အမိခံရလိမ့်မည်ဟု ထင်မထားခဲ့မိပေ။
သူတို့နှစ်ဦးသား အကြည့်ချင်းဆုံသွားကြသည်။ ၎င်း၏မျက်လုံးများတွင် ပျူငှာမှုမရှိသော ရိုင်းစိုင်းမှုနှင့် သတိရှိမှုတို့ထင်ဟပ်နေလေ၏။