အင်မော်တယ်လောက၏ ပထမဆုံးတိုက်ပွဲ

သွေးများပန်းထွက်သွားပြီး ဦးခေါင်းနှင့်ခန္ဓာကိုယ်တခြားစီဖြစ်သွားသည်။ ကျန်းချန်၏တိုက်ခိုက်မှုမှာ သပ်ရပ်လွန်းပြီး လိုသည်ထက်ပိုသောလှုပ်ရှားမှု တစ်ချက်ပင်မပါဝင်ချေ။

သူသည် သူတော်စင်နယ်ပယ်အထွတ်အထိပ်တွင်ရှိစဉ်ကပင် သူ၏သာမန်တိုက်ခိုက်မှုများသည် အစစ်အမှန်အင်မော်တယ်တစ်ယောက်ကို ချေမှုန်းနိုင်ခဲ့သည်။ ယခုအခါ သူကိုယ်တိုင်မှာ အစစ်အမှန်အင်မော်တယ်တစ်ဦး ဖြစ်နေပြီဖြစ်ရာ သူ၏သူတော်စင်ဝိညာဉ်မှာလည်း အင်မော်တယ်ဝိညာဉ်အဖြစ် အဆင့်တက်သွား၏။

အင်မော်တယ်လောကသို့ရောက်ရှိပြီးသည်နှင့် သူသည် စနစ်သိုလှောင်ခန်းအတွင်းမှ အင်မော်တယ်အဆင့်ကျင့်စဉ်တစ်ခုနှင့် အင်မော်တယ်အဆင့်တိုက်ကွက်သုံးခု ထုတ်ယူခဲ့သည်။ ၎င်းတို့ကိုအသက်သွင်းလိုက်သည်နှင့် လက်ရှိနယ်ပယ်အတွက် အမြင့်ဆုံးအဆင့်သို့ ရောက်ရှိသွား၏။

သူ၏ကျင့်ကြံခြင်းအဆင့်မှာ အစစ်အမှန်အင်မော်တယ်ပထမအဆင့်သာ ရှိသေးသော်လည်း သူ၏နည်းစနစ်နှင့် တိုက်ကွက်များမှာ အစစ်အမှန်အင်မော်တယ်အဆင့်အတွက် မဟာပြီးပြည့်စုံခြင်းအဆင့်သို့ ရောက်ရှိနေပြီဖြစ်ရာ သူသည် အစစ်အမှန်အင်မော်တယ် အဆင့် ၉ အယောက် ၁၀၀ တွင် ၉၉ ယောက်ကို ချက်ချင်းသတ်ဖြတ်နိုင်စွမ်းရှိသည်။

ထို့ထက်ပို၍ကြောက်မက်ဖွယ်ကောင်းသည်မှာ စည်းမျဉ်း ၉၉၂ ခုဖြင့်တည်ဆောက်ထားသော သူ၏သူတော်စင်နယ်ပယ်မှာ တာအိုနှလုံးသားအဖြစ်သို့ ကူးပြောင်းသွား၏။ ၎င်းသည် ရန်သူအတွက် သေမင်းတမန်ပင်။

အမှန်အတိုင်းဆိုရလျှင် ချောင်းမြောင်းတိုက်ခိုက်စရာပင်မလိုဘဲ သူသည် ကောင်းကင်အင်မော်တယ်တစ်ယောက်ကို ပုရွက်ဆိတ်တစ်ကောင်လို ချေမှုန်းနိုင်သည်။

ခေါင်းမရှိသောအလောင်းကြီး လဲကျသွားချိန်တွင် တစ်လောကလုံးတိတ်ဆိတ်သွား၏။ ကောင်းကင်အင်မော်တယ် အဖွဲ့ခေါင်းဆောင်များသာမက တင့်ထျန်းမြို့စားမင်းပင်လျှင် သူမြင်လိုက်ရသည်ကိုမယုံနိုင်ဘဲ ပါးစပ်အဟောင်းသားဖြစ်သွားရသည်။ သူသည် အမိန့်မနာခံသောအင်မော်တယ်များကို မြင်ဖူးသော်လည်း ဤကဲ့သို့သောလူစားမျိုးကိုတော့ တစ်ခါမှမမြင်ဖူးချေ။

ကွေ့ချန်းနှင့် အခြားသူများလည်း ဆွံ့အသွား၏။ သူတို့မှာ ကျန်းချန်၏တိုက်ခိုက်နိုင်စွမ်းကြောင့် အံ့ဩခြင်းမဟုတ်ဘဲ သူအမှန်တကယ်လက်ဦးမှုယူ၍ သတ်ဖြတ်လိုက်ခြင်းကြောင့်ဖြစ်သည်။ ယခုတော့ နောက်ဆုတ်ရန်လမ်းမရှိတော့ချေ။

"သူလုပ်လိုက်ပြီဟေ့"

ဟင်းလင်းပြင်မျိုးနွယ်စုခေါင်းဆောင်ပိချန်းက ပထမဆုံးအော်ဟစ်လိုက်သည်။

"ငါလည်းသည်းခံနေရတာကြာပြီ... ကျန်းချန်နောက်ကိုလိုက်ကြစမ်း"

"သတ်"

သူ၏ကျောက်တုတ်ကြီးကိုဝှေ့ယမ်းကာ သူ့အဖွဲ့ကိုတာဝန်ယူထားသော ကောင်းကင်အင်မော်တယ်ထံသို့ ပြေးဝင်သွား၏။ ထိုအရှိန်က ဟင်းလင်းပြင်မိစ္ဆာနယ်မြေမှ ကျင့်ကြံသူအားလုံးကို နိုးကြားသွားစေပြီး ဒေါသတကြီးဖြင့်တိုက်ခိုက်ကြတော့သည်။

"ဟင်း..."

ဓားသူတော်စင်ကွေ့ချန်းက သက်ပြင်းချလိုက်သည်။ ဤပုန်ကန်မှုမှာ သေလမ်းဖြစ်ကြောင်း သူသိသော်လည်း ကျန်းချန်က သူတို့အသက်ကို အကြိမ်ကြိမ်ကယ်တင်ခဲ့သူ မဟုတ်ပါလား။

"ဓားနယ်မြေ... ငါ့နောက်ကိုလိုက်ပြီး လမ်းဖွင့်ကြစမ်း"

သူ့အမိန့်နှင့်အတူ ဓားနယ်မြေမှကျွမ်းကျင်သူများသည် သူတို့၏တာအိုနှလုံးသားများကိုနှိုးဆော်ကာ ကောင်းကင်အင်မော်တယ်တပ်မှူးများထံသို့ ဓားအလင်းတန်းများပစ်လွှတ်လိုက်ကြသည်။ အခြားတစ်ဖက်တွင်လည်း ရွှေနဂါးမင်း၏အမိန့်ကိုပင်စောင့်မနေဘဲ စစ်မျောက်မင်း၏ခန္ဓာကိုယ်မှာ ကောင်းကင်ထိအောင်ကြီးမားလာပြီးနောက် လက်သီးဖြင့်ထိုးချလိုက်လေ၏။

တက်လှမ်းလာသူတစ်သိန်းနှစ်သောင်းလုံးသည် သူတို့ ကိုယ်ပိုင်စွမ်းရည်များကို အစွမ်းကုန်ထုတ်သုံးကြတော့သည်။ မိစ္ဆာကျင့်ကြံသူ၊ နတ်ဆိုးကျင့်ကြံသူနှင့် အင်မော်တယ်ကျင့်ကြံသူများ၏ ပေါင်းစပ်တိုက်ခိုက်မှုကြောင့် နေရာတစ်ခုလုံးမှာ ခဏအတွင်း သွေးပင်လယ်ပြင်ကြီး ဖြစ်သွားလေတော့သည်။

မြို့ပြင်မှကြည့်နေသော မြို့သူမြို့သားများမှာ မျက်နှာများဖြူဖျော့ကုန်၏။ ဤကိစ္စမျိုးကို သူတို့တစ်ခါမှမမြင်ဖူးကြချေ။ အသစ်တက်လှမ်းလာသူများထဲတွင် အစစ်အမှန်အင်မော်တယ် ၂၀၀ ခန့်သာရှိပြီး ရန်သူနှင့်ယှဉ်လျှင် ၉ ဆခန့် နည်းပါးနေသည်။

ထို့ထက်ပိုဆိုးသည်မှာ သူတို့ဘက်တွင် ကောင်းကင်အင်မော်တယ် သို့မဟုတ် မြင့်မြတ်အင်မော်တယ် တစ်ယောက်မှမပါဝင်ခြင်းပင်။ ဤမျှ လူအင်အားကွာခြားနေသည်ကို တိုက်ခိုက်ခြင်းမှာ ကိုယ့်ကိုယ်ကိုယ်သတ်သေခြင်းမဟုတ်ပါလား။

မြို့စားမင်းက ဒေါသတကြီးဖြင့် အမိန့်ပေးလိုက်သည်။

"သူတို့အားလုံးကိုသတ်ပစ်ကြ"

အင်မော်တယ်စစ်တပ်ကြီး (အစစ်အမှန်အင်မော်တယ် ၂,၀၀၀ နှင့် သူတော်စင် ၅,၀၀၀) မှာ စနစ်တကျတိုက်ခိုက်ရန် ပြင်ဆင်လိုက်ကြသည်။ သို့သော် စစ်သူကြီးအမိန့်ပေး၍မဆုံးသေးမီမှာပင် ဧရာမမီးနဂါးကြီးတစ်ကောင်က သူ့ကိုဝါးမြိုသွား၏။

ကျန်းချန်သည် သူ၏ဆယ်ဆတိုက်ခိုက်မှုကို အသုံးပြုလိုက်ခြင်းဖြစ်သည်။ သူသည် ဓားကိုပစ်လွှတ်လိုက်ရင်း အံကြိတ်ကာရေရွတ်လိုက်သည်။

"အမှတ် ၁၀ ဘီလီယံတောင်ကုန်သွားပြီ... တကယ်ကို ဓားပြတိုက်ခံရတာပဲ"

တစ်ချက်တည်းနှင့် မြင့်မြတ်အင်မော်တယ်တပ်မှူးပျောက်ကွယ်သွား၏။ အော်ဟစ်ချိန်ပင်မရလိုက်ချေ။ ၎င်းတင်မကဘဲ မီတာတစ်ထောင်အတွင်း တန်းစီနေသော အစစ်အမှန်အင်မော်တယ်များနှင့် ကောင်းကင်အင်မော်တယ် ၁၀၀ ကျော်မှာလည်း ဝိညာဉ်ပင်မကျန်အောင် ချေမှုန်းခံလိုက်ရပြီး နေရာတစ်ခုလုံးတွင် မိုင်ပေါင်းများစွာရှည်လျားသော မီးလောင်ပြင်လမ်းကြောင်းကြီး ဖြစ်ပေါ်သွားတော့သည်။

အင်မော်တယ်လောက၏ဟင်းလင်းပြင်မှာ အောက်လောကထက်ပိုမိုခိုင်ခံ့သဖြင့် မြေပြင်အနေအထားကိုဖျက်ဆီးရန် အလွန်ခက်ခဲ၏။ ထိုမျှပြင်းထန်သောတိုက်ခိုက်မှုကို မြင်လိုက်ရသဖြင့် အောက်လောကသားများ၏စိတ်ဓာတ်မှာ ထိုးတက်သွားတော့သည်။

"အမလေး... အစ်ကိုကြီးချန်က အခု ဒီလောက်တောင် ကြောက်ဖို့ကောင်းနေပြီလား"

သူ့နောက်တွင် ကပ်လိုက်နေသော မျက်စိသုံးလုံးကျားက မျက်လုံးပြူးမျက်ဆန်ပြူးဖြင့်ဆိုလေ၏။ အစစ်အမှန်အင်မော်တယ်ကျုံးထိုက်ကိုသတ်ခဲ့စဉ်ကထက် အဆပေါင်းများစွာပိုပြင်းထန်သည်။

"ဂိုဏ်းချုပ်ကျန်းက အနှိုင်းမဲ့ပဲ"

ဓားသူတော်စင်ကွေ့ချန်းနှင့် အခြားသူများမှာ ကောင်းကင်အင်မော်တယ်တစ်ယောက်ကို ဝိုင်းတိုက်နေရင်းမှ ကျန်းချန်ကိုလက်မထောင်ပြလိုက်ကြသည်။

ကျန်းချန်၏ ဤတိုက်ခိုက်မှုကြောင့် ရန်သူ့စစ်သူကြီးသေဆုံးသွားရုံတင်မကဘဲ အရာရှိ ၁၀၀ ကျော်သေသွားသဖြင့် ရန်သူ့စစ်တပ်မှာခေါင်းဆောင်မဲ့ကာ ပျက်စီးသွားတော့သည်။ ဘေးမှကြည့်နေသော မြို့စားမင်းမှာလည်း ဆွံ့အသွား၏။

သူကိုယ်တိုင်ပင်လျှင် မြင့်မြတ်အင်မော်တယ် အဆင့် ၅ ဖြစ်ပြီး သေဆုံးသွားသောစစ်သူကြီးမှာ အဆင့် ၃ ဖြစ်သည်။ အကယ်၍ သူသာ ထိုလမ်းကြောင်းပေါ်တွင်ရှိနေပါက ယခုအချိန်တွင် ပြာဖြစ်နေချေပြီ။

စစ်မြေပြင်ကိုကြည့်လိုက်သောအခါ အခြားသူများမှာလည်း သာမန်မဟုတ်သည်ကို တွေ့လိုက်ရ၏။ အစစ်အမှန်အင်မော်တယ် ၂၀၀ ကျော်မှာ ကောင်းကင်အင်မော်တယ် ၅၀ ကို ခဏချင်းအတွင်း ရှင်းပစ်နိုင်ခဲ့သည်။ နယ်ပယ်တစ်ခုလုံး ခြားနားနေသော်လည်း အောက်လောကသားများမှာ အဆင့်ကျော်၍တိုက်ခိုက်နိုင်စွမ်းရှိနေ၏။

နှစ်ပေါင်းဆယ်သန်းကျော်ပိတ်ဆို့ခံထားရသော အောက်လောကသားများသည် အင်မော်တယ်လောကသို့ရောက်ရှိလာပြီး ပထမဆုံးစစ်ပွဲကို သွေးဖြင့်စတင်လိုက်ကြလေပြီ။