အခန်း (၄၈၃-၄၈၄)
Vol. 49 Ch. 483-484
အခန်း ၄၈၃ - မထိတွေ့နိုင်သော အရာ
ခရမ်းရောင်ဝင်ရိုးစာပေသင်တန်း အတွင်းရှိ တိတ်ဆိတ်သော အခန်းတစ်ခုတွင် ဖြစ်သည်။
ဖန့်ချန်သည် သူ၏လက်ထဲမှ ကျောက်စိမ်းပြားကို ကိုင်ထားရင်း ဝိညာဉ်စွမ်းအင်များကို ထည့်သွင်းလိုက်ရာ သတင်းအချက်အလက်များစွာ သူ၏စိတ်ထဲသို့ စီးဝင်လာသည်။
တောက်ပသော နတ်ဘုရားမျက်လုံး ၏ ကျင့်စဉ်မှာရှေးဦးနတ်ဘုရားမျက်လုံး နှင့် နှိုင်းယှဉ်လျှင် အနည်းငယ် ပို၍ ရိုးရှင်းပါသည်။
ခဏမျှ ကျင့်ကြံပြီးနောက် ဖန့်ချန်၏ မျက်လုံးများထဲတွင် ထူးဆန်းသော အပြာရောင်အလင်းတန်းများ စတင်ပေါ်ထွက်လာသည်။
တဖြည်းဖြည်းနှင့် ဖန့်ချန်သည် ပတ်ဝန်းကျင်ရှိ ဓာတ်ကြီးငါးပါး ဝိညာဉ်စွမ်းအင်များကို ယခင်ကထက် ပို၍ ရင်းနှီးကျွမ်းဝင်လာပြီး ထိုစွမ်းအင်များကို ထိန်းချုပ်ရန်မှာ အလွန်လွယ်ကူသည်ဟု ခံစားလာရသည်။
"ရှေးဦးနတ်ဘုရားမျက်လုံးက ဝိညာဉ်စွမ်းအားကို မြှင့်တင်ပေးတယ်၊ တောက်ပသော နတ်ဘုရားမျက်လုံးကတော့ ဓာတ်ကြီးငါးပါးနဲ့ လိုက်လျောညီထွေဖြစ်မှုကို မြှင့်တင်ပေးတာပဲအာနိသင်ချင်း မတူပေမဲ့ နှစ်ခုစလုံးက ထူးခြားတဲ့ အတတ်ပညာတွေပဲ"
ဟု ဖန့်ချန် ရေရွတ်လိုက်သည်။
ထိုစဉ် အပြင်ဘက်မှ နွားချေးတုံးလေး၏ အသံထွက်ပေါ်လာသည်။
"ဆရာ ဧည့်သည်တစ်ယောက် ရောက်နေပါတယ်"
ဖန့်ချန် အပြင်သို့ ထွက်ကြည့်လိုက်ရာ မလှမ်းမကမ်းတွင် ရပ်နေသော အရှင်ဝေဟင်ပြေး ကို တွေ့လိုက်ရသည်။ ဖန့်ချန်က လက်အုပ်ချီ နှုတ်ဆက်က
"စီနီယာ ဝေဟင်ပြေး"
ဟု လေးစားစွာ ခေါ်လိုက်သည်။
နွားချေးတုံးလေးမှာ အံ့သြသွားသည်။
သူ၏ဆရာကပင် စီနီယာ ဟု ခေါ်ဆိုရသဖြင့် ဤပုဂ္ဂိုလ်၏ အဆင့်အတန်းမှာ မသေးလှကြောင်း သိလိုက်ရသဖြင့် ဖန့်ချန်ကို အတုယူကာ အမြန်ဦးညွှတ်လိုက်သည်။
အရှင်ဝေဟင်ပြေးက ခေါင်းညိတ်ပြပြီး
"အပြင်ဘက်မှာ စကားပြောကြရအောင်"
ဟု ဆိုသည်။
အခန်းနှင့် ဝေးရာသို့ ရောက်သောအခါ အရှင်ဝေဟင်ပြေးက မေးလိုက်သည်။
"ခွန်လုံစစ်သူကြီး ရဲ့ တည်နေရာက တကယ်ပဲ မှန်ကန်ရဲ့လား"
ဖန့်ချန်က ပြုံးလျက် ခေါင်းညိတ်လိုက်သည်။
"သေချာပေါက် မှန်ပါတယ်"
အရှင်ဝေဟင်ပြေး၏ မျက်လုံးထဲတွင် စူးစမ်းလိုစိတ်များ ပေါ်လာသည်။
နာမည်ကျော် ဝိညာဉ်သန္ဓေသားအဆင့် ပညာရှင် ခွန်လုံသည် ဂျူနီယာလေးတစ်ယောက်ဖြစ်သော ဖန့်ချန်၏ လက်ချက်ဖြင့် နှစ်ကြိမ်တိုင်တိုင် အရှုံးပေးခဲ့ရသည်။
ဖန့်ချန်သည် ခွန်လုံ၏ တည်နေရာကို မည်သို့ သိရှိသွားသနည်းဆိုသည်မှာ သူမအတွက် အလွန်စူးစမ်းစရာပင်။
သို့သော် ဖန့်ချန်က ပြောပြမည်မဟုတ်ကြောင်း သိထားသဖြင့် သူမ မမေးတော့ပေ။
"တကယ်လို့ ခွန်လုံကို ငါတို့ ဖမ်းမိခဲ့မယ်ဆိုရင် မင်းက နောက်ထပ် အောင်မြင်မှုကြီးတစ်ခု ရရှိမှာပဲ"
ဟု သူမက ဆိုသည်။
"စီနီယာ လုံချင်းစစ်သူကြီး အကြောင်း ကြားဖူးပါသလား"
ဖန့်ချန်က မေးလိုက်သည်။
အရှင်ဝေဟင်ပြေး၏ မျက်နှာမှာ ချက်ချင်းပင် တည်ကြည်လေးနက်သွားသည်။
"လုံချင်းစစ်သူကြီး အဲဒီနာမည်ကို မင်း ဘယ်က ကြားတာလဲ"
ဖန့်ချန်က ပြန်မဖြေဘဲာ
"သူက အရမ်းသန်မာလို့လား ခွန်လုံနဲ့ ယှဉ်ရင် ဘယ်လိုနေလဲ"
ဟု မေးသည်။
အရှင်ဝေဟင်ပြေးက ဝိညာဉ်အကာအကွယ်တစ်ခုကို ဖန်တီးလိုက်ပြီးမှ ရှင်းပြသည်။
"ခွန်လုံရဲ့ နည်းလမ်းတွေက မရိုးရှင်းပေမဲ့ သူက ဝိညာဉ်သန္ဓေသားအဆင့် အစောပိုင်းမှာပဲ ရှိသေးတာ၊ ငါတို့နဲ့ အဆင့်တူပဲ။ ဒါပေမဲ့ လုံချင်းကတော့ မတူဘူး"
"သူက ဝိညာဉ်သွေးဂိုဏ်း ရဲ့ သူတော်စင် စစ်သူကြီးလေးဦး ထဲက တစ်ယောက်ပဲ သူက ဝိညာဉ်သန္ဓေသားအဆင့် အထွက်အထိပ် မှာ ရှိနေတာ"
"သူ နောက်ဆုံးပေါ်လာတုန်းက တောင်ပင်လယ်ဒေသမှာ ပျက်စီးဆုံးရှုံးမှုတွေ အများကြီး ဖြစ်ခဲ့ပြီး ဝိညာဉ်သန္ဓေသားအဆင့် ပညာရှင်အတော်များများတောင် သေဆုံးခဲ့ရတယ်"
ဖန့်ချန် တုန်လှုပ်သွားသည်။
လုံချင်းစစ်သူကြီးက ဝိညာဉ်သန္ဓေသားအဆင့် အထွက်အထိပ်တောင် ဖြစ်နေသည်လား အကယ်၍ ထိုသို့ဆိုလျှင် စီနီယာဟွမ် ထားခဲ့သည့် ဓားစိတ်ဆန္ဒသည် လုံချင်းစစ်သူကြီးကို အနာတရဖြစ်စေနိုင်ပါ့မလား။
"လုံချင်းက ငါ့ကို သတ်ဖို့ လာနေတာလို့ ကြားတယ်"
ဟု ဖန့်ချန်က ပြောလိုက်သောအခါ အရှင်ဝေဟင်ပြေးမှာ ဆွံ့အသွားသည်။
ဖန့်ချန်သည် အရာအားလုံးကို ဆင်ခြင်လိုက်သည်။
မသာပေါ် သွားပြီဖြစ်သော ကျွယ်ဝူတိ၏ စီနီယာအစ်ကိုသည် သူ့ကို လွှတ်ပေးမည်မဟုတ်ပေ။
ထို့ပြင် ယွင်ထျန်းချန်းနှင့် မူကျောက်ဟဲတို့ကလည်း သူ့ကို ဖမ်းဆီးရန်အတွက် ဝိညာဉ်သွေးဂိုဏ်းနှင့် ပူးပေါင်းနေကြသည်။
"စီနီယာ ကျုပ်ရဲ့ ဒီတပည့်လေးကို ခရမ်းရောင်ဝင်ရိုးစာပေသင်တန်းမှာ ထားခဲ့ပြီး ကျင့်ကြံခွင့် ပြုနိုင်မလား"
ဖန့်ချန်က မေးလိုက်ရာ အရှင်ဝေဟင်ပြေးက ခဏမျှ စဉ်းစားပြီးမှ သဘောတူလိုက်သည်။
သုံးရက်တာ အချိန်မှာ မျက်စိတစ်မှိတ်အတွင်း ကုန်ဆုံးသွားသည်။
ထိုသုံးရက်အတွင်း ဖန့်ချန်သည် သူ၏ဝိညာဉ်အာရုံကို အပြင်သို့ လွှတ်ကာ စုံစမ်းမှုများ ပြုလုပ်ခဲ့ရာ ယွင်ထျန်းချန်းနှင့် မူကျောက်ဟဲတို့နောက်ကွယ်တွင် ရှိနေသော ဝိညာဉ်သွေးဂိုဏ်းသား အတော်များများကို ရှာဖွေတွေ့ရှိခဲ့သည်။
ဖန့်ချန်သည် ဝိညာဉ်သွေးဂိုဏ်းသားများစာရင်းကို အရှင်ဝေဟင်ပြေးထံ အပ်နှံလိုက်သည်။
ထိုစာရင်းထဲတွင် ရွှမ်ဟွမ်နန်းတော် ၏ အမွေခံတပည့် နှစ်ဦးစလုံး ပါဝင်နေသဖြင့် သူမမှာ အံ့သြနေတော့သည်။
"စီနီယာ ကျုပ် ထွက်သွားတော့မယ်တစ်စုံတစ်ယောက်က ကျုပ်အကြောင်း လာမေးရင် အမှန်အတိုင်းသာ ပြောပြလိုက်ပါ"
ဖန့်ချန်က နှုတ်ဆက်လိုက်သည်။
သူသည် ဖန့်ကျွယ်နှင့် တုန်းဖန်းဟောက်ကျဲတို့ကိုလည်း သွားရောက်နှုတ်ဆက်ကာ နွားချေးတုံးလေးကို စောင့်ရှောက်ပေးရန် ဝိညာဉ်ကျောက်တုံးများစွာ ပေးအပ်ခဲ့သည်။
ဖန့်ချန် ထွက်ခွာသွားပြီး ခုနစ်ရက်အကြာတွင် ချင်းဟူအင်ပါယာ မြို့တော်ရှိ လက်ဖက်ရည်ဆိုင်တစ်ခုတွင်
"သူ ထွက်သွားပြီလား ငါတို့ တစ်လှမ်း နောက်ကျသွားပုံပဲ"
ဟု ဝတ်စုံဖြူဝတ် လူငယ်တစ်ဦးက ဆိုသည်။
သူ၏ မျက်နှာချင်းဆိုင်တွင် ထိုင်နေသော မိန်းကလေးက
"စာပေသင်တန်းက သတင်းအရ သူ ထွက်သွားတာ ခုနစ်ရက်ရှိပြီတဲ့ ဘယ်ဘက်ကို ဦးတည်သွားလဲဆိုတာတော့ ဘယ်သူမှ မသိကြဘူး"
ဟု ပြန်ပြောသည်။
"လမ်းတိုင်းကို စောင့်ကြည့်ခိုင်းလိုက် ငါ့ရဲ့ ဂျူနီယာညီလေး နှစ်ယောက်ကတော့ အလကား အသေမခံနိုင်ဘူး"
ဟု လူငယ်က အေးစက်စွာ ပြုံးလျက် ဆိုလိုက်သည်။
ထိုမိန်းကလေးသည်လည်း သတင်းပို့အဆောင် တစ်ခုကို မီးရှို့ကာ သတင်းပေးပို့လိုက်တော့သည်။
အခန်း ၄၈၄ - နေဝင်ချိန်မျက်လုံး
ကျယ်ပြောလှသော ပင်လယ်ပြင်ကြီးထဲတွင် ပေရာချီမြင့်မားသော ဧရာမသင်္ဘောကြီးတစ်စင်းသည် လှိုင်းလုံးများကို ခွင်းလျက် အံ့သြဖွယ် အရှိန်အဟုန်ဖြင့် ခရီးနှင်နေသည်။
ထိုသင်္ဘောကြီးသည် ရေပြင်ပေါ်တွင် ရွေ့လျားနေသော မြို့တော်ကြီးတစ်ခုသဖွယ် ခံ့ညားလှပြီး အထပ်ပေါင်း တစ်ရာနီးပါး ရှိကာ အထပ်တိုင်း၌ ကျင့်ကြံသူများ သီးသန့်ကျင့်ကြံနိုင်ရန် အစီရင်များ တပ်ဆင်ထားသည့် ကျင့်ကြံဆောင် များစွာ ပါရှိသည်။
ထိုကျင့်ကြံဆောင်များကို အဆင့်သုံးဆင့် ခွဲခြားထားသည်။
ကောင်းကင် အဆင့်အခန်းများသည် ဝိညာဉ်စွမ်းအင် အလွန်သိပ်သည်းသဖြင့် ကျင့်ကြံမှုအတွက် အကောင်းဆုံးဖြစ်သော်လည်း ငှားရမ်းခမှာ သာမန်ကျင့်ကြံသူများ မတတ်နိုင်လောက်အောင် မြင့်မားလှသည်။
ထိုသင်္ဘောသည် အင်အားကြီးဂိုဏ်းတစ်ခုမှ ပိုင်ဆိုင်ပြီး တောင်ပင်လယ်ဒေသ ကို ဖြတ်ကျော်နေခြင်းဖြစ်ကာ ခရီးစဉ်တစ်ခုလုံးအတွက် အနည်းဆုံး ငါးနှစ်ခန့် ကြာမြင့်မည်ဟု ခန့်မှန်းရသည်။
ဖန့်ချန်အတွက်မူ သူ၏ ရှေးဦးနတ်ဘုရားမျက်လုံးနှင့် တောက်ပသော နတ်ဘုရားမျက်လုံး ကျင့်စဉ်နှစ်ခုစလုံးသည် ပြင်ပဝိညာဉ်စွမ်းအင်အပေါ် အဓိကမမှီခိုဘဲ ကိုယ်ပိုင်ပါရမီနှင့် နားလည်သဘောပေါက်မှုအပေါ်သာ မူတည်သည်။
ထို့ကြောင့် သူသည် ဈေးအသက်သာဆုံးဖြစ်ပြီး တစ်ရက်လျှင် ဝိညာဉ်ကျောက်တုံး တစ်တုံးသာပေးရသော လူသား အဆင့်အခန်းကိုသာ ရွေးချယ်ခဲ့သည်။
ခရီးစရိတ်နှင့် တခြားကုန်ကျစရိတ်အားလုံး ပေါင်းလိုက်လျှင်ပင် ထိုငါးနှစ်တာ ခရီးအတွက် ဝိညာဉ်ကျောက်တုံး ၃,၀၀၀ ခန့်သာ ကုန်ကျမည်ဖြစ်သည်။
ဤပမာဏမှာ အဝါရောင်အဆင့်မြင့် ရတနာတစ်ခု၏ တန်ဖိုးမျှသာ ရှိသော်လည်း ဖန့်ချန်အတွက်မူ အဖိုးတန်လှသော ငါးနှစ်တာ အချိန်ကို ဝယ်ယူလိုက်ခြင်း ဖြစ်သည်။
သူသည် ခရီးသွားလာရင်း အချိန်မဖြုန်းဘဲ ကျင့်ကြံခြင်းကိုသာ အာရုံစိုက်နိုင်မည်ဖြစ်ရာ ကျင့်ကြံသူများအတွက် သက်သာသွားသောအချိန်သည် သက်တမ်းတိုးသွားခြင်းနှင့် အတူတူပင် ဖြစ်သည်။
သင်္ဘော၏ ဦးတည်ရာမှာ အဆင့်သုံးအင်ပါယာဖြစ်သော ထိုက်ချူ ဖြစ်ပြီး၊ ထိုမှတစ်ဆင့် တယ်လီပို့အစီရင်များဖြင့် ဆက်သွားရမည်ဖြစ်သည်။
ထိုလမ်းကြောင်းမှာ ရှကျီ သွားခဲ့သည့် လမ်းကြောင်းပင် ဖြစ်သည်။
တကယ်လို့ မမျှော်လင့်ထားသော ဘေးအန္တရာယ်များ မရှိပါက နောက်ထပ် ၁၀ နှစ်ကျော်အကြာတွင် ဖန့်ချန်သည် ဒဏ္ဍာရီလာ အဆင့် (၁) အင်ပါယာရှိရာ အလယ်ပိုင်းတိုက်ကြီး သို့ ရောက်ရှိမည်ဖြစ်သည်။
သင်္ဘောပိုင်ရှင်ဂိုဏ်း၏ ဩဇာတိက္ကမကြောင့် မည်သည့်ပင်လယ်ပြင်ကို ဖြတ်ကျော်ရစေကာမူ မည်သည့်ပင်လယ်ဓားပြ သို့မဟုတ် မိစ္ဆာကျင့်ကြံသူကမျှ လမ်းမှ ပိတ်ဆို့နှောင့်ယှက်ရန် မဝံ့ရဲကြပေ။
သင်္ဘောပေါ်တွင် နေထိုင်လာသည်မှာ သုံးလကျော်ရှိပြီဖြစ်သည်။
ထိုအတောအတွင်း ဖန့်ချန်သည် တောက်ပသော နတ်ဘုရားမျက်လုံး ကို သိသိသာသာ တိုးတက်အောင် ကျင့်ကြံနိုင်ခဲ့သည်။
ထိုကျင့်စဉ်တွင် အဆင့် (၄) ဆင့် ရှိပြီး ယခု သူသည် ယွင်ထျန်းချန်း ရောက်ရှိခဲ့သည့် ပထမအဆင့်ကို ခိုင်မာစွာ ရောက်ရှိသွားပြီဖြစ်သည်။
ထိုအဆင့်တွင် သူသည် ဓာတ်ကြီးငါးပါး စွမ်းအင်များကို ယခင်ကထက် အဆတစ်ရာမက ပိုမိုထိန်းချုပ်လာနိုင်သည်။
တကယ်လို့ ယွင်ထျန်းချန်းသည် သူ၏ အခြေခံဖြင့် ပေရာချီမြင့်သော ရွှေရောင်ချပ်ဝတ်တန်ဆာ စစ်သည် (၄) ယောက်ကို ဖန်တီးနိုင်လျှင်၊ ဖန့်ချန်သည် သူ၏ နက်ရှိုင်းသော အခြေခံကြောင့် အခက်အခဲမရှိဘဲ (၆) ယောက်အထိ ဖန်တီးလာနိုင်သည်။
အကယ်၍ ဖန့်ချန်သာ ယွင်ထျန်းချန်းကဲ့သို့ အခြေခံတည်ဆောက်ခြင်း အထွက်အထိပ်အဆင့်သို့ ရောက်ရှိပါက စစ်သည် (၁၀) ယောက်ထက်မနည်းကိုပင် ခေါ်ယူနိုင်မည်ဖြစ်သည်။
ထိုသို့သော စွမ်းအားမျိုးကို ရွှေအမြုတေအဆင့် ကျင့်ကြံသူများပင် ခုခံရန် ခက်ခဲလိမ့်မည်ဖြစ်သည်။
"မှန်ချပ်လေး ဒီကျင့်စဉ်က တော်တော်ထူးဆန်းတာပဲ ဒုတိယအဆင့်အတွက် ရတနာတွေ လိုအပ်နေပြန်ပြီလား ပြီးတော့ နေဝင်ချိန်မျက်လုံး ဆိုတာကရော ဘာလဲ"
ဖန့်ချန်က စိတ်ထဲမှ မေးလိုက်သည်။
"အစ်ကိုကြီး အဲဒီအဖြေအတွက် ဝိညာဉ်ကျောက်တုံး ၁,၀၀၀ ပေးရမယ်"
ဟု မှန်ချပ်လေး က ဆိုသဖြင့် ဖန့်ချန်က ၅၀၀ နှင့် ဈေးဆစ်လိုက်ရသည်။
"ရှေးဟောင်းခေတ်တုန်းက နေဝင်ချိန် လို့ခေါ်တဲ့ မိစ္ဆာမျိုးနွယ် တစ်ခု ရှိခဲ့ဖူးတယ် သူတို့ရှိတဲ့နေရာမှာ နေရောင်ခြည် လုံးဝပျောက်ကွယ်သွားပြီး ထာဝရမှောင်မိုက်နေတတ်တာ"
"နေရောင်မရှိရင် သက်ရှိတွေ မရှင်သန်နိုင်လို့ ကျင့်ကြံသူတွေက သူတို့ကို ဝိုင်းဝန်းသုတ်သင်လိုက်တာ အခုဆိုရင် မျိုးတုံးသွားပြီ"
ဟု မှန်ချပ်လေးက ရှင်းပြသည်။
"အခုခေတ်မှာ အဲဒီမျက်လုံးကို ဘယ်မှာရှာရမလဲ သိချင်ရင်တော့ ဝိညာဉ်ကျောက်တုံး သန်းနဲ့ချီ လိုလိမ့်မယ်"
ဖန့်ချန် သက်ပြင်းချလိုက်သည်။
"နှမြောစရာပဲ ဒါဆိုရင် ဒုတိယအဆင့်ကို တက်ဖို့က အခုခေတ်မှာ မဖြစ်နိုင်သလောက်ပဲ"
သို့သော် ပထမအဆင့်ကပင် သူ၏စွမ်းအားကို များစွာ မြှင့်တင်ပေးထားသည်။
သူသည် ဓာတ်ကြီးငါးပါးကို အခြေခံသော မည်သည့်အတတ်ပညာကိုဆို ယခင်ကထက် များစွာ ပိုမိုအားကောင်းအောင် အသုံးချနိုင်ပြီ ဖြစ်သည်။
ဖန့်ချန်သည် တောက်ပသော နတ်ဘုရားမျက်လုံး နှင့် ရှေးဦးနတ်ဘုရားမျက်လုံးတို့ကို နှိုင်းယှဉ်ကြည့်မိသည်။
တောက်ပသော နတ်ဘုရားမျက်လုံး သည် ဓာတ်ကြီးငါးပါးနှင့် ဆက်နွှယ်ပြီး တိုက်ခိုက်ရေးစွမ်းအားကို မြှင့်တင်ပေးသော နည်းစနစ်တစ်ခု ကဲ့သို့ ဖြစ်သော်လည်း၊ ရှေးဦးနတ်ဘုရားမျက်လုံး မှာမူ ဝိညာဉ်စွမ်းအားကို မြှင့်တင်ပေးသော ကျင့်စဉ် နှင့် ပိုတူသည်။
ရှေးဦးနတ်ဘုရားမျက်လုံး ကို ဖွင့်လိုက်လျှင် သူသည် ဝိညာဉ်ကို ထုတ်ရန်မလိုဘဲ အစီရင်များ၏ အားနည်းချက် သို့မဟုတ် လောကကြီး၏ ဝိညာဉ်စွမ်းအင် စီးဆင်းမှုများကို မြင်ကွင်းကျယ်ကျယ် မြင်နိုင်စွမ်း ရှိသည်။
ထိုအကျိုးကျေးဇူးမှာ တိုက်ရိုက် တိုက်ခိုက်ရေးထက် ပို၍ နက်ရှိုင်းလှသည်။
"ငါ့ကို ဒီကျင့်စဉ် ပေးခဲ့တဲ့ အဲဒီအမျိုးသမီးက ဘယ်သူများလဲ ဖန့်ထင်ယွမ် ဘိုးဘေးနဲ့ရော ဘယ်လို ပတ်သက်တာလဲ"
ဟု ဖန့်ချန် တွေးနေမိသည်။
ထိုစဉ် မှန်ချပ်က သတိပေးသည်။
"အစ်ကိုကြီး မင်းမှာ ဝိညာဉ်ကျောက်တုံး ၁၃,၀၀၀ ပဲ ကျန်တော့တယ် ဓားငယ်လေးကို ကျွေးဖို့နဲ့ ငါ့ကို အသုံးချဖို့ဆိုရင် ပိုက်ဆံထပ်ရှာဖို့ လိုပြီ"
ဖန့်ချန်လည်း သဘောတူသည်။ သူသည် ပိုက်ဆံရှာရန်အတွက်
စစ်မှန်သော မီးတောက်အဆောင် များကို ရေးဆွဲရန် ဆုံးဖြတ်လိုက်သည်။
ထိုအဆောင်များသည် မီးဓာတ်စွမ်းအင်ကို အသုံးချရသဖြင့် တောက်ပသော နတ်ဘုရားမျက်လုံး ၏ အကူအညီဖြင့် သူ၏ ရေးဆွဲမှုနှုန်းမှာ အရင်ကထက် နှစ်ဆမက မြန်ဆန်လာသည်။
အဆောင်တစ်စောင်လျှင် ဝိညာဉ်ကျောက်တုံး ၂၀၀ ခန့် ရနိုင်မည်ဟု သူ တွက်ချက်ထားသည်။
ရက်အနည်းငယ်အတွင်း သူသည် အဆောင်(၁၆၀) ကျော် ရေးဆွဲပြီးစီးခဲ့ရာ၊ အားလုံး ရောင်းရပါက ဝိညာဉ်ကျောက်တုံး ၃၀,၀၀၀ ကျော် ရရှိမည်ဖြစ်သည်။
ဖန့်ချန်သည် ကျေနပ်စွာ ပြုံးလျက် သူ၏ အဆောင်များကို ရောင်းချရန် သင်္ဘောပေါ်ရှိ အရောင်းအဝယ် နယ်မြေ သို့ ထွက်လာခဲ့တော့သည်။