အခန်း (၅၈၇-၅၈၈)

အခန်း ၅၈၇ - အချုပ်အနှောင်

ချင်နယဲ့က ကြားဝင်စေ့စပ်ပေးသည့် လေသံဖြင့် အရိပ်အယောင်ပြလိုက်သည်နှင့် ဟွာချန်းချီသည် ထိုအခွင့်အရေးကို ချက်ချင်းပင် လှမ်းဖမ်းလိုက်သည်။

သူ၏ မျက်နှာတွင် ရှက်ရွံ့သည့် အရိပ်အယောင်ထက် အကြံအဖန် လုပ်နိုင်သွားသည့် အပြုံးတစ်ခုက အစားထိုးဝင်ရောက်လာပြီး ခေါင်းကို တရစပ် ညိတ်လိုက်၏။

"ဟုတ်တယ် ဒါက နောက်ပြောင်တာ သက်သက်ပါပဲ တာအိုမိတ်ဆွေဖန့် ခင်ဗျားလည်း အတည်ကြီး ယူမနေပါနဲ့တော့ ကျုပ်တို့လို ကျင့်ကြံသူတွေကြားမှာ ဒီလောက် နောက်တာလေးတော့ ရှိမှာပေါ့"

ဘေးပတ်ဝန်းကျင်ရှိ လူများက ဟွာချန်းချီကို မျက်ခုံးပင့်ကြည့်လိုက်ကြသည်။

သူတို့၏ အကြည့်များတွင် အထင်သေးမှုများ ပါဝင်နေသော်လည်း ဟွာချန်းချီကတော့ ဘာကိုမှ ဂရုမစိုက်နိုင်တော့ပေ။

ထိုအလောင်းအစားသည် သူ၏ ပုဂ္ဂိုလ်ရေး ဂုဏ်သိက္ခာထက် ကျိန်းယန်ဂိုဏ်း၏ သိက္ခာနှင့် ပိုမိုသက်ဆိုင်နေသည်။

သူသည် လူလိမ်၊ ကတိဖျက်သူဟု အခေါ်ခံရပါစေဦးတော့၊ ကျိန်းယန်ဂိုဏ်း၏ ပါရမီရှင်တစ်ယောက်က လူပုံအလယ်မှာ ဝပ်တွားထွက်သွားရသည်ဆိုသော သမိုင်းဆိုးကိုတော့ အဖြစ်မခံနိုင်ပေ။

"မင်းကတော့ တကယ့်ကို အရှက်မရှိတဲ့ကောင်ပဲ အလောင်းအစားလုပ်တုန်းက တစ်မျိုး၊ အခုကျတော့ တစ်မျိုး မင်းရဲ့ စကားက ခွေးဟောင်တာထက်တောင် တန်ဖိုးမရှိဘူးလား"

လီတောက်ယဲ့က နှာခေါင်းရှုံ့လိုက်ရင်း သခင်လေး ချီဖာဘက် လှည့်လိုက်သည်။

"သခင်လေးချီဖာ ခင်ဗျားက မြို့စားမင်းရဲ့ သားပဲတရားမျှတတဲ့ စကားတစ်ခွန်းတော့ ပြောပေးသင့်တယ် မဟုတ်လား"

ချီဖာက ခေတ္တမျှ စဉ်းစားဟန်ပြုပြီး ခေါင်းညိတ်ပြသည်။

"တကယ်လို့ မင်းတို့က စာချုပ်စာတမ်း လက်မှတ်ထိုးထားမယ်ဆိုရင်တော့ ငါက တရားဝင် ဝင်ပြောပေးလို့ ရပါတယ် ဒါပေမဲ့ ဒါက နှုတ်ကတိ သက်သက်ပဲ ဖြစ်နေတော့ ဟွာချန်းချီက ဝန်မခံဘူးဆိုရင် မင်းတို့မှာ အတင်းအကျပ် လုပ်ပိုင်ခွင့် မရှိဘူး"

ထို့နောက် ချီဖာက ဟွာချန်းချီကို ထူးဆန်းသော အပြုံးဖြင့် ကြည့်လိုက်သည်။

"ဟွာချန်းချီ မင်း သေချာ စဉ်းစားပြီးပြီလား ဒီလို ကတိဖျက်တာက ချင်းတာအိုစံအိမ်တော် မှာ မင်းရဲ့ နာမည်ပျက်သွားနိုင်တယ်နော်"

"ချီဖာ ငါ့မှာ ဘာနာမည်ရှိလို့လဲ ငါက ကျင့်ကြံခြင်းလောကထဲက အမည်မသိ ကျင့်ကြံသူတစ်ယောက်ပါ"

ဟွာချန်းချီက ခပ်အေးအေးပင် ပြန်ဖြေလိုက်ပြီး ဖန့်ချန်ဘက် လှည့်ကာ မောက်မာစွာ ဆိုလိုက်သည်။

"ဒါပေမဲ့ ငါပြောတာ အားလုံးတော့ နောက်ပြောင်တာ မဟုတ်ပါဘူး မင်းကို ဝိညာဉ်ကျောက် အလယ်အလတ်အဆင့် တစ်ရာတော့ ငါပေးပါ့မယ် ဒါက ငါ့ဘက်က အလျှော့ပေးတာပဲ"

ထိုစကား၏ အဓိပ္ပာယ်မှာ ရှင်းနေသည်။

"ဝိညာဉ်ကျောက်ကို ယူပြီး ပါးစပ်ပိတ်လိုက်တော့ ငါ့ကို ဒူးထောက်ခိုင်းဖို့တော့ မစဉ်းစားနဲ့တော့"

ဟု ဆိုလိုခြင်းပင်။

"ဖန့်ချန် ဒီကောင်ကတော့ ကတိဖျက်ဖို့ အပိုင်တွက်ထားပုံရတယ်"

လီတောက်ယဲ့က သက်ပြင်းချရင်း ဆိုလိုက်သည်။

သခင်မကြီး ချူလန်က တစ်ခုခု ပြောရန် ပြင်သော်လည်း ချင်မျိုးနွယ်စု အကြီးအကဲ၏ စူးရှသော အကြည့်ကြောင့် ပါးစပ်ပိတ်သွားရသည်။

အကြီးအကဲ ချင်တျန်းက ချင်နယဲ့၊ ချင်ရွှမ်းနှင့် အခြားသူများကို ကြည့်ကာ အေးစက်စက် အမိန့်ပေးလိုက်သည်။

"မင်းတို့ လူငယ်တွေ ကျင့်ကြံခြင်းကို အာရုံမစိုက်ဘဲ ကျောက်မျက်လောင်းကစားတာနဲ့ အချိန်ဖြုန်းနေကြတယ်"

" ရည်မှန်းချက်တွေ ပျောက်ဆုံးပြီး ကလေးကလားတွေ လုပ်နေကြတာ နောင်ကို ချင်မျိုးနွယ်စုရဲ့ တာဝန်တွေကို ဘယ်လို ထမ်းဆောင်ကြမလဲ အားလုံး ငါ့နောက် လိုက်ခဲ့ကြစမ်း"

သူက လှည့်ထွက်သွားသဖြင့် အခြားသူများလည်း မတတ်သာဘဲ ဖန့်ချန်ကို တစ်ချက်ကြည့်ကာ လိုက်သွားကြရတော့သည်။

ချင်နယဲ့နှင့် ချီဖာတို့ ထွက်သွားသည်ကို မြင်သောအခါ ဟွာချန်းချီလည်း ဆက်ရှိမနေချင်တော့ပေ။

သူက ဖန့်ချန်တို့ကို ခပ်ထေ့ထေ့ ပြောလိုက်သည်။

"ဝိညာဉ်ကျောက် တစ်ရာကိုတော့ တစ်လအတွင်း ငါ စုဆောင်းပေးမယ် အချိန်တန်ရင် ကျိန်းယန်ဂိုဏ်းကို လာယူလိုက်တော့"

ကျိန်းယန်ဂိုဏ်းကို လာယူရမည် ဟု ဆိုခြင်းမှာ လုံးဝ ပေးရန် အစီအစဉ် မရှိခြင်းပင်။

ဖန့်ချန်တို့သာ ထိုဂိုဏ်းထဲ ရောက်သွားပါက အရှင်ထွက်နိုင်ရန်ပင် ခဲယဉ်းပေလိမ့်မည်။

ဟွာချန်းချီက လှည့်ထွက်ရန် ပြင်လိုက်သော်လည်း သူ၏ ရှေ့တည့်တည့် ဆိုင်တံခါးဝတွင် ဖန့်ချန်က ရပ်နေသည်ကို မြင်လိုက်ရသဖြင့် လန့်သွားသည်။

ဖန့်ချန်၏ မီးခိုးရောင် မျက်ဝန်းများက သူ့ကို စူးစိုက်ကြည့်နေပြီး ထိုအကြည့်များအောက်တွင် ဟွာချန်းချီမှာ အေးစိမ့်သွားသလို ခံစားလိုက်ရသည်။

"ဘာကျန်သေးလို့လဲ"

ဟွာချန်းချီက မထင်မှတ်သလို မေးလိုက်သည်။

"တာအိုမိတ်ဆွေ ဟွာ အလောင်းအစားက မပြီးသေးဘူးလေ"

"ဘာအလောင်းအစားလဲ ငါက နောက်ပြောင်တာပါလို့ ပြောပြီးပြီပဲ မင်းက တကယ်ကြီး မှတ်နေတာလား"

ဟွာချန်းချီက ပြုံးစစဖြင့် ဆိုသည်။

"မင်းက ကံကောင်းလို့ တစ်ကြိမ်နိုင်သွားတာကို မင်းကိုယ်မင်း တကယ် တတ်လှပြီ ထင်နေတာလား"

"ဒါဆို မင်းနဲ့ တွေ့ရတာက ငါတို့အတွက် ကံကောင်းခြင်းပေါ့ ဟုတ်လား"

လီတောက်ယဲ့က အံ့သြသလို မေးလိုက်သည်။

ဟွာချန်းချီ၏ မျက်နှာ ပျက်သွားသည်။

"ငါက ကျောက်တုံးကို ပြောတာ"

"ဒါဆို မင်းက အလောင်းအစားအတိုင်း လုပ်ဖို့ လုံးဝ ဆန္ဒမရှိဘူးပေါ့"

ဖန့်ချန်က အေးစက်စွာ မေးလိုက်သည်။

"မင်းက ငါ့ကို တိုက်မလို့လား အဲဒါ ငါအလိုချင်ဆုံးပဲ တာအိုတစ်ထောင်ဂိုဏ်းဆိုတဲ့ အမည်ခံကောင်တွေမှာ ဘာပညာရှိလဲ ငါကြည့်ရသေးတာပေါ့"

ဟု ဟွာချန်းချီက ဟက်ဟက်ပတ်ပတ် ရယ်မောလိုက်သည်။

ချက်ချင်းပင် သူ၏ ခန္ဓာကိုယ်မှ ဝိညာဉ်စွမ်းအင်များ ဝုန်းခနဲ ထွက်ပေါ်လာပြီး လေထုထဲတွင် ဖိအားတစ်ခု ဖြစ်ပေါ်လာသည်။

နောက်တစ်စက္ကန့်တွင် ဟွာချန်းချီ၏ ပတ်ပတ်လည် ဟင်းလင်းပြင်ထဲမှ ရွှေရောင်ကြိုးများ ရုတ်တရက် ထွက်ပေါ်လာသည်။

ထိုကြိုးများသည် သတ္တုဓာတ်စွမ်းအင်များဖြင့် ကျစ်လစ်စွာ ဖွဲ့စည်းထားပြီး အလွန်ပင် ခိုင်မာ လေးလံလှသည်။

ပတ်ဝန်းကျင်ရှိ လူများမှာ ထိုနည်းစနစ်ကို မြင်ပြီး အံ့သြနေကြသည်။

သို့သော် ဟွာချန်းချီ ကိုယ်တိုင်မှာမူ ထိုရွှေရောင်ကြိုးများက သူ့ကို ချက်ချင်း ရစ်ပတ်ချုပ်နှောင်လိုက်သဖြင့် ထိတ်လန့်သွားတော့သည်။

သူ၏ လည်ပင်း၊ ပုခုံး၊ ခါး၊ လက်နှင့် ခြေထောက်များ တစ်ကိုယ်လုံး အချုပ်ခံလိုက်ရသည်။

ဟွာချန်းချီ၏ ဝိညာဉ်ကာကွယ်ရေး အလွှာမှာ ထိုရွှေရောင်ကြိုးများရှေ့တွင် တို့ဖူးကဲ့သို့ နူးညံ့နေပြီး ဘာမှ မကာကွယ်နိုင်ခဲ့ပေ။

သူသည် ဖန့်ချန်၏ ရှေ့မှောက်တွင် ဒူးထောက်လျက်သား ပြုတ်ကျသွားတော့သည်။

ရွှေရောင်ကြိုးများက သူ့ကို မတ်တတ်ရပ်၍မရအောင် ချည်နှောင်ထားခြင်း ဖြစ်သည်။

ကြည့်နေသူများမှာ ဆွံ့အသွားကြသည်။ ဟွာချန်းချီသည် ကျိန်းယန်ဂိုဏ်း၏ ထိပ်တန်းပါရမီရှင် ဖြစ်သလို၊ ဆယ်နှစ်အတွင်း ရွှေအမြုတေအဆင့် ကို တက်လှမ်းနိုင်မည်ဟု နာမည်ကြီးသူ ဖြစ်သည်။

သို့သော် ယခုမူ သူသည် တုံ့ပြန်ချိန်ပင် မရဘဲ အချုပ်ခံလိုက်ရပြီ။

"ဒါ... ဒါ ဘယ်လိုနည်းစနစ်လဲ"

ဟွာချန်းချီက ဒေါသတကြီး အော်ဟစ်လိုက်သည်။

သူသည် အတင်းရုန်းကန်သော်လည်း ကြိုးများက လုံးဝ မပြေပေ။

သူ၏ မျက်နှာမှာ အရှက်ရမှုကြောင့် နီမြန်းနေပြီး တာအိုတစ်ထောင်ဂိုဏ်းသားတစ်ယောက်ရှေ့မှာ ဒူးထောက်နေရခြင်းက သေတာထက် ပို၍ နာကျင်စရာ ကောင်းနေသည်။

"ကျိန်းယန်ဂိုဏ်းက တပည့်တစ်ယောက်က ဓာတ်ကြီးငါးပါး နည်းစနစ် ကိုတောင် ကောင်းကောင်း မသိဘူးလား"

ဖန့်ချန်က အသာအယာ ပြုံးလိုက်သည်။

"ငါ မှတ်မိသလောက်ဆိုရင် ဒါက ကျင့်ကြံသူတိုင်း စတင် သင်ယူရတဲ့ အခြေခံ နည်းစနစ်ပဲ မဟုတ်လား"

"ဒါ ဓာတ်ကြီးငါးပါး နည်းစနစ် မဟုတ်ဘူး"

ဟွာချန်းချီက ဒေါသတကြီး ပြန်အော်သည်။

ဓာတ်ကြီးငါးပါး နည်းစနစ်က အခြေခံ စွမ်းအင်တွေကိုပဲ ထိန်းချုပ်နိုင်တာ ဖြစ်ပြီး အခု ရွှေရောင်ကြိုးတွေက သတ္တုဓာတ်စွမ်းအင်ကို အဆင့်မြင့်စွာ အသုံးချထားခြင်း ဖြစ်သည်။

လီတောက်ယဲ့က ဘေးမှနေ၍ ဟားလိုက်သည်။

"မင်း ခုနက ပြောသလိုပဲ တာအိုမိတ်ဆွေဖန့်က မျက်စိကန်းတဲ့ကြောင် ဆိုရင် မင်းကတော့ ကြွက်သေ ပဲပေါ့"

ဟွာချန်းချီသည် လူအုပ်ကြီး၏ လှောင်ပြောင်သည့် အကြည့်များကို ခံစားနေရသဖြင့် ဒေါသတကြီး ဟိန်းဟောက်ကာ ဖန့်ချန်ကို အတင်း ခုန်အုပ်ရန် ကြိုးစားလိုက်သည်။

ထိုအော်ဟစ်သံက ဆိုင်ပြင်သို့ ရောက်နေပြီဖြစ်သော ချင်မျိုးနွယ်စု အကြီးအကဲတို့၏ နားထဲအထိ ရောက်သွားသည်။

"ဝုန်း"

ဆိုင်တံခါးမကြီးမှာ တစ်စစီ ပွင့်ထွက်သွားပြီး လူရိပ်တစ်ခု လမ်းမပေါ်သို့ လွင့်ထွက်သွားသည်။

ထိုလူရိပ်မှာ လမ်းမပေါ်တွင် တရွတ်တိုက် ပါသွားပြီး ဘေးရှိ ဆိုင်ခန်းများကိုပါ တိုက်မိ လဲပြိုကုန်သည်။

"ဟိုမှာ စီနီယာ ဟွာ မဟုတ်လား ဘာဖြစ်တာလဲ"

ချင်ရွှမ်းက အံ့သြတကြီး အော်ဟစ်လိုက်သည်။

ချင်မျိုးနွယ်စုဝင်များမှာ ဟွာချန်းချီ၏ ပုံစံကို ကြည့်ပြီး ချင်နယဲ့ကို အလိုလို လှည့်ကြည့်မိကြသည်။

ချင်နယဲ့က မျက်မှောင်ကြုတ်ကာ ဖန့်ချန်ကို စိုက်ကြည့်လိုက်သည်။

"ချင်နယဲ့ ကြည့်ရတာ တာအိုတစ်ထောင်ဂိုဏ်းရဲ့ နည်းစနစ်က တော်တော် အားကောင်းပုံရတယ်နော် ဟွာချန်းချီတောင် ရှုံးသွားတယ်"

ချီဖာက လှောင်ပြုံးဖြင့် ဆိုသည်။

"မင်း ငါ့ကို တရားမျှတစွာ တိုက်ရဲလား.....အား"

ဟွာချန်းချီက လမ်းပေါ်တွင် ချည်နှောင်ခံထားရသည့် ပုံစံဖြင့် အော်ဟစ်နေသည်။

ထိုစဉ် ကောင်းကင်မှ ဖုန်မှုန့်များ ပေကျံနေသော ခြေထောက်တစ်ဖက် ဆင်းသက်လာပြီး ဟွာချန်းချီ၏ မျက်နှာကို နင်းချလိုက်ကာ သူ၏ အော်ဟစ်သံကို ပိတ်ပစ်လိုက်သည်။

"ငါတို့ အခုပဲ တရားမျှတစွာ တိုက်ခဲ့တာပဲလေ မင်းက ငါ့ရဲ့ တစ်ကွက်တောင် မခံနိုင်တာကိုး"

ဖန့်ချန်က ဟွာချန်းချီကို ငုံ့ကြည့်လိုက်သည်။

"ကဲ အခု အလောင်းအစားကို တည်တော့မလား"

တစ်ကွက်တောင် မခံနိုင်ဘူး ဟုတ်လား

ချင်မျိုးနွယ်စုဝင်များ အားလုံး တုန်လှုပ်သွားကြသည်။

ဟွာချန်းချီသည် လူငယ်မျိုးဆက်ထဲတွင် ထိပ်တန်းက ဖြစ်ပြီး ချင်နယဲ့ပင်လျှင် သူ့ကို အနိုင်ရရန် ခဲယဉ်းလှသည်။

ထိုသို့သော ပါရမီရှင်တစ်ဦးက တာအိုတစ်ထောင်ဂိုဏ်းက ကျင့်ကြံသူတစ်ယောက်ကို တစ်ကွက်တည်းနှင့် ရှုံးသွားသည်မှာ မယုံနိုင်စရာပင်။

အခန်း ၅၈၈ - ဘာမှ အထင်ကြီးစရာ မရှိပါဘူး

ချင်မျိုးနွယ်စု၏ အကြီးအကဲဖြစ်သူ ချင်တျန်းသည် သိမြင်ခြင်းဆင့် သို့ ရောက်ရှိထားသည့် ကျင့်ကြံသူပီပီ မြင်ကွင်းတစ်ခုလုံးကို ခြုံငုံသုံးသပ်နေသည်။

သူ၏ ဘေးတွင် ရပ်နေသော ချူလန်နှင့် ဟယ်ပိုင်ယန်တို့မှာလည်း ဝိညာဉ်သန္ဓေသားအဆင့် ၏ အထွတ်အထိပ်တွင် ရှိနေကြသူများ ဖြစ်သဖြင့် ဖန့်ချန်၏ လှုပ်ရှားမှုတိုင်းတွင် ပါဝင်နေသော ဝိညာဉ်စွမ်းအင် အကြွင်းအကျန်များကို သတိမပြုမိဘဲ မနေနိုင်ကြပေ။

သူတို့အားလုံး၏ အကြည့်မှာ ဟွာချန်းချီကို တုတ်တုတ်မျှ မလှုပ်နိုင်အောင် ချည်နှောင်ထားသည့် ထိုရွှေရောင်ကြိုးများပေါ်တွင် ရောက်ရှိနေသည်။

ထိုကြိုးများသည် သာမန်အားဖြင့် ကြည့်လျှင် အခြေခံအကျဆုံးဖြစ်သော သတ္တုဓာတ်စွမ်းအင် များဖြင့်သာ ဖွဲ့စည်းထားခြင်း ဖြစ်သော်လည်း ၎င်း၏ သန့်စင်မှုအဆင့်မှာမူ ကြောက်ခမန်းလိလိ ဖြစ်နေသည်။

ထိုစွမ်းအင်သည် သာမန်ကျင့်ကြံသူတစ်ဦး ထိန်းချုပ်နိုင်သည့် အဆင့်ထက် အဆပေါင်းများစွာ သာလွန်နေပြီး အလွန်တရာ ကျစ်လစ်သိပ်သည်းလှသဖြင့် မည်သည့်စွမ်းအားနှင့်မျှ ဖြတ်တောက်၍ မရနိုင်သကဲ့သို့ ထင်ရသည်။

ချူလန်နှင့် ဟယ်ပိုင်ယန်တို့သည် အတွင်းစိတ်ထဲမှနေ၍ တိတ်တဆိတ် ထိတ်လန့်သွားကြရသည်။

သူတို့ကိုယ်တိုင်ပင်လျှင် အထူးလျှို့ဝှက်နည်းစနစ်တစ်ခုခုကို မသုံးစွဲဘဲနှင့် ထိုမျှ သန့်စင်သော စွမ်းအင်မျိုးကို ဖန်တီးနိုင်မည် မဟုတ်ကြောင်း ဝန်ခံလိုက်ရသည်။

ဤမျှ စွမ်းအင်ချင်း ကွာခြားနေမှတော့ ဟွာချန်းချီအနေဖြင့် တုံ့ပြန်ချိန်ပင်မရဘဲ တစ်ချက်တည်းနှင့် အရှုံးပေးလိုက်ရခြင်းမှာ အံ့သြစရာ မဟုတ်တော့ပေ။

ဖန့်ချန်၏ နောက်ခံမှာ သူတို့ထင်ထားသည်ထက် ပိုမိုနက်ရှိုင်းနေသည်မှာ အသေအချာပင်။

ချင်နယဲ့၏ မျက်လုံးများက ဖန့်ချန်ကို အေးစက်စွာ စူးစိုက်ကြည့်နေသည်။

ဖန့်ချန်က ကျိန်းယန်ဂိုဏ်း၏ ပါရမီရှင် ဟွာချန်းချီကို လူပုံအလယ်တွင် ဒူးထောက်ခိုင်းကာ အရှက်ခွဲနေသည်ကို ကြည့်ပြီး သူက အမိန့်ပေးသည့် လေသံဖြင့် ကြားဝင်ပြောဆိုလိုက်သည်။

"တာအိုမိတ်ဆွေ ဖန့် ဒါက ချင်မျိုးနွယ်စုရဲ့ နယ်မြေပဲ ဒီမှာ ငါတို့ရဲ့ ကိုယ်ပိုင် စည်းမျဉ်းတွေ ရှိတယ် ကျင့်ကြံသူတွေအနေနဲ့ ခွင့်ပြုချက်မရှိဘဲ ပုဂ္ဂလိကအငြိုးနဲ့ တိုက်ခိုက်တာကို ငါတို့ လုံးဝ ခွင့်မပြုဘူး"

"တကယ်လို့ သာမန်လူတွေကို ထိခိုက်အောင် လုပ်မယ်ဆိုရင် ဘယ်သူ့နောက်ခံပဲဖြစ်ဖြစ် ငါတို့ ချင်မျိုးနွယ်စုရဲ့ ဥပဒေအတိုင်း ပြင်းပြင်းထန်ထန် အရေးယူရလိမ့်မယ်"

" ဒါကြောင့် တာအိုမိတ်ဆွေ ဟွာကို အခုချက်ချင်း လွှတ်ပေးလိုက်ပါ ပြဿနာရှိရင်လည်း ငါတို့ အေးအေးဆေးဆေး ထိုင်ပြီး ဆွေးနွေးလို့ ရတာပဲ မဟုတ်လား"

ဖန့်ချန်က ပြုံးလိုက်သော်လည်း သူ၏ အပြုံးမှာ ခနဲ့လှောင်ပြောင်မှုများ ပြည့်နှက်နေသည်။

သူက ချင်နယဲ့ကို အကြောက်အလန့်မရှိ ပြန်လည် စိုက်ကြည့်လိုက်၏။

"ချင်မျိုးနွယ်စုရဲ့ နယ်မြေမှာ တကယ်ပဲ စည်းမျဉ်းတွေ ရှိတယ်ဆိုရင် ဘာလို့ ခုနက ဒီကောင် ကတိဖျက်တုန်းက သခင်လေး ချင်နယဲ့က ကြားဝင်ပြီး တရားမျှတအောင် မလုပ်ပေးခဲ့တာလဲ"

"အခုမှ စည်းမျဉ်းတွေအကြောင်း လာပြောနေတာက သခင်လေး ချင် ပြောတဲ့ စည်းမျဉ်းဆိုတာက အပြင်လူတွေအတွက်ပဲ သက်ရောက်တာ ဖြစ်နေမှာပေါ့"

"ချူလန် မင်းဖိတ်လာတဲ့ တာအိုမိတ်ဆွေက ငါ့သား နယဲ့ကို ဒီလောက်တောင် စော်ကားနေတာကို မင်းက ဘာမှ မပြောတော့ဘူးလား"

ချင်နယဲ့ကို ဖန့်ချန်က တိုက်ရိုက် ထိုးနှက်လိုက်သည့်အခါ ချင်နယဲ့၏ မိခင်ဖြစ်သူ ဝူဝမ်က ဒေါသတကြီး ကြားဝင်လာတော့သည်။

သူမသည် ဖန့်ချန်၏ စကားများကို သူမ၏ သားအပေါ် စော်ကားမှုအဖြစ် ယူဆလိုက်ပုံရသည်။

သို့သော် ချူလန်ကတော့ တည်ငြိမ်နေဆဲပင်။

"တာအိုမိတ်ဆွေ ဖန့် နယဲ့က စည်းမျဉ်းတွေကို အမြဲ လေးစားတတ်သူပါ သူ့ကို အထင်မလွဲပါနဲ့ခုနက သူလုပ်တာက သူငယ်ချင်းတစ်ယောက်ကို ကူညီချင်တဲ့ စိတ်နဲ့ လုပ်လိုက်တာပါ"

ဟု ချူလန်က အေးဆေးစွာပင် ပြန်ပြောသည်။

ဝူဝမ်နှင့် ချင်နယဲ့တို့၏ မျက်နှာများ ချက်ချင်း မည်းမှောင်သွားသည်။

ချူလန်၏ စကားက ကာကွယ်ပေးသယောင် ရှိသော်လည်း အမှန်တကယ်မှာ ချင်နယဲ့သည် ဟွာချန်းချီဘက်က ဘက်လိုက်ခဲ့ကြောင်းကို လူပုံအလယ်တွင် အတည်ပြုပေးလိုက်ခြင်းပင် ဖြစ်သည်။

ထိုအခြေအနေသည် ချင်မျိုးနွယ်စုအတွင်းရှိ အာဏာလုပွဲများ၏ အစိတ်အပိုင်းတစ်ခု ဖြစ်နေမှန်း ဖန့်ချန် ကောင်းကောင်း သတိပြုမိသည်။

သခင်လေး ချီဖာက သက်ပြင်းတစ်ချက် ချလိုက်ရင်း ဟွာချန်းချီကို ကြည့်လိုက်သည်။

"အင်း ဟွာချန်းချီ၊ မင်း အလောင်းအစားကို ကတိတည်လိုက်တာက ပိုကောင်းမယ် ထင်တယ် ဒီလောက်ထိ အရှက်ကွဲနေတာ ဒီသတင်းသာ ပြင်ပကို ပျံ့သွားရင် မင်းအတွက်ရော မင်းဂိုဏ်းအတွက်ပါ ဘာမှ အကျိုးရှိမှာ မဟုတ်ဘူး"

"မဖြစ်ဘူး လုံးဝ မဖြစ်နိုင်ဘူး"

ဟွာချန်းချီက သွားကြားထဲမှ ကြိတ်ကာ အော်လိုက်သည်။

သူ၏ ဒေါသက အထွတ်အထိပ်သို့ ရောက်နေသော်လည်း ခန္ဓာကိုယ်ကိုမူ လုံးဝ လှုပ်ရှား၍ မရပေ။

သူသည် ဤကဲ့သို့ အရှက်ရနေရသည်ထက် သေလိုက်ရသည်က ပို၍ ကောင်းမည်ဟုပင် တွေးတောနေတော့သည်။

ထိုစဉ် ဝိညာဉ်ရင်းမြစ်ရပ်ကွက်အတွင်းရှိ ကျင့်ကြံသူများစွာ စုရုံးလာကြပြီး ဟွာချန်းချီကို ဝိုင်းအုံ ကြည့်ရှုနေကြသည်။

ကျိန်းယန်ဂိုဏ်းက ထိပ်တန်းပါရမီရှင် ဆိုသော ဂုဏ်ပုဒ်သည် ယခုအခါ လှောင်ပြောင်စရာ ပြက်လုံးတစ်ခု ဖြစ်လာခဲ့သည်။

ဖန့်ချန်က လူအုပ်ကြီးကို တစ်ချက်ဝေ့ကြည့်လိုက်ပြီး ခေါင်းကို ခပ်ဖွဖွ ခါလိုက်သည်။

"ကျိန်းယန်ဂိုဏ်းက ချင်မျိုးနွယ်စု နယ်မြေထဲမှာ ဂိုဏ်းတွေအားလုံးရဲ့ ခေါင်းဆောင်လို့ လူတွေ ပြောကြတယ်"

"အခုကြည့်ရတာတော့ တခြားဂိုဏ်းတွေနဲ့ ဘာမှ မထူးပါဘူး မျိုးဆက်သစ် ပါရမီရှင်ဆိုသူက ကတိမတည်တဲ့ လူလိမ်တစ်ယောက် ဖြစ်နေတာပဲ မင်းတို့ ဂိုဏ်းက လူကြီးတွေကကော ဘယ်လိုနေမလဲ"

ပြောပြောဆိုဆိုနှင့် ဖန့်ချန်က သူ၏ လက်ကို အသာအယာ ဝေ့ယမ်းလိုက်ရာ ဟွာချန်းချီ၏ ခန္ဓာကိုယ်သည် လေပေါ်သို့ မြောက်တက်သွားတော့သည်။

လူအုပ်ကြီးမှာ အံ့သြတကြီး အော်ဟစ်လိုက်ကြ၏။

ထို့နောက် ဖန့်ချန်သည် ဝိညာဉ်ရင်းမြစ်ရပ်ကွက်၏ အမြင့်ဆုံး အဆောက်အအုံဆီသို့ မြှားတစ်စင်းကဲ့သို့ လျင်မြန်စွာ ပျံသန်းသွားပြီး ဟွာချန်းချီကို ထိုအဆောက်အအုံ၏ အထိပ်တွင် ဇောက်ထိုး ချိတ်ဆွဲထားလိုက်တော့သည်။

ယခုဆိုလျှင် ဝိညာဉ်ရင်းမြစ်ရပ်ကွက်အတွင်းရှိ ကျင့်ကြံသူများသာမက လမ်းတစ်ဖက်ကမ်းမှ လူများပင် ဟွာချန်းချီ၏ အရှက်ရဖွယ် ပုံသဏ္ဌာန်ကို ရှင်းရှင်းလင်းလင်း မြင်နေရပြီ ဖြစ်သည်။

ဟွာချန်းချီသည် ထိုမျှလောက်ထိ လူသိရှင်ကြား အရှက်ခွဲခံရမှုကို မခံစားနိုင်တော့ဘဲ ဒေါသနှင့် အရှက်ကြောင့် မျက်လုံးများ ပြူးထွက်ကာ သတိလစ် မေ့မြောသွားတော့သည်။

"သခင်မကြီး ဒုက္ခပေးမိတဲ့အတွက် တောင်းပန်ပါတယ် ကျုပ်နဲ့ တာအိုမိတ်ဆွေ လီကတော့ ဒီရပ်ကွက်ထဲမှာပဲ ဆက်ပြီး လည်ပတ်ပါဦးမယ်"

ဖန့်ချန်က ချူလန်ကို နှုတ်ဆက်ကာ လီတောက်ယဲ့နှင့်အတူ ထွက်ခွာခဲ့သည်။

ချင်နယဲ့နှင့် ချီဖာတို့သည် လက်ဖက်ရည်ဆိုင်တစ်ခု၏ ဒုတိယထပ်မှနေ၍ ဟွာချန်းချီ ချိတ်ဆွဲခံထားရသည်ကို စောင့်ကြည့်နေကြသည်။

သူတို့၏ မျက်နှာများမှာ တည်ငြိမ်နေသော်လည်း စိတ်ထဲတွင်တော့ အစီအစဉ်များစွာ ရှိနေသည်။

"အစ်ကိုနယဲ့ ကျိန်းယန်ဂိုဏ်းဆီကို သတင်းပို့ပြီးပြီလား"

ချင်ရွှမ်းက မေးလိုက်သည်။

"ပို့ပြီးပြီ မကြာခင် လူရောက်လာလိမ့်မယ်"

ချင်နယဲ့က ခေါင်းညိတ်ပြသည်။

"ဟွာချန်းချီကို ဒီလောက်ထိ စော်ကားထားတာ ကျိန်းယန်ဂိုဏ်းက ငြိမ်နေရင် သူတို့ရဲ့ နာမည်ပျက်သွားလိမ့်မယ် အဲဒီလူလိမ် နှစ်ယောက်ကတော့ အဆုံးသတ်လှမှာ မဟုတ်ဘူး"

ထို့နောက် သူတို့သည် လန်ယာမျိုးနွယ်စု နှင့် ဖြစ်ပွားတော့မည့် စစ်ပွဲအကြောင်းကို ဆက်လက် ဆွေးနွေးကြသည်။

"နေမင်းသီး က အဘိုးဘေးကြီးတွေအတွက် သိပ်အရေးကြီးတယ် လန်ယာမျိုးနွယ်စုနဲ့ စစ်ဖြစ်ရင် ငါတို့ဘက်မှာ အင်အားကြီး မျိုးနွယ်စု ၇၀၊ ၈၀ လောက် ရှိတယ်"

"သူတို့မှာ နိုင်ခြေ လုံးဝ မရှိဘူး ဒီစစ်ပွဲက ၃ ရက်ကနေ ၅ ရက်အတွင်းမှာတင် ပြီးသွားလိမ့်မယ်"

ဟု ချင်နယဲ့က ယုံကြည်မှုအပြည့်ဖြင့် ဆိုသည်။

ထိုစကားများကို ဟင်းလင်းပြင်ထဲမှနေ၍ ဖန့်ချန်၏ ဝိညာဉ်အာရုံက ကြားနေရသည်။

သူသည် အဝေးသို့ ရောက်ရှိနေသော်လည်း သူ၏ ဝိညာဉ်အသိ မှာ ထိုနေရာတစ်ခုလုံးကို လွှမ်းခြုံထားဆဲပင်။

ဖန့်ချန်က ခေါင်းကို ခပ်ဖွဖွ ခါလိုက်သည်။ ချင်နယဲ့၏ စကားများသည် အခြေအနေမှန်ကို မသိသူများကိုသာ လှည့်ဖြားနိုင်ပေလိမ့်မည်။

သူသည် ဝိညာဉ်သွေးဂိုဏ်း က လူများက ချင်နယဲ့နှင့် ပူးပေါင်းပြီး ထိုစစ်ပွဲကို နှစ်ရှည်လများ ကြာအောင် ဆွဲဆန့်ရန် ကြံစည်နေကြောင်း အပိုင် သိထားပြီးဖြစ်သည်။

ဤစစ်ပွဲသည် မြန်မြန်ပြီးမည့် စစ်ပွဲ မဟုတ်ဘဲ အားလုံးကို အင်အားပြုန်းတီးသွားစေမည့် ထောင်ချောက်တစ်ခုသာ ဖြစ်ပေတော့သည်။