လေးပွင့်ဆိုင် သဘောတူညီချက် (၃)
Vol. 9 Ch. 85
ဂိုဏ်းချုပ်ဟန်ချင်းလင်း၏ တောင်းဆိုမှုကို တုံ့ပြန်နိုင်ရန်အတွက် တိန်ချောင်မှာ မိမိကိုယ်ကို ပြန်လည်ထိန်းချုပ်ရန် အချိန်အနည်းငယ် ယူလိုက်ရသည်။
ကြာပန်းဝါဂိုဏ်း၏ အခြေအနေများက သူ့အတွက်တော့ အတိတ်က အဖြစ်အပျက်များကို ပြန်လည် တူဆွပေးသကဲ့သို့ ဖြစ်နေသည်။
ကြည်လင်သော ကျောက်စိမ်းလက်ဝါးဂိုဏ်းမှာ လွန်ခဲ့သော နှစ်ပေါင်း ၄၀၀ ကတည်းက ပျက်စီးသွားခဲ့သော်လည်း၊ သူ့အတွက်မူ မနေ့တစ်နေ့ကမှ ဖြစ်ပျက်ခဲ့သကဲ့သို့ လတ်ဆတ်နေဆဲပင် ဖြစ်သည်။
သူ၏ အားနည်းနေသော ဝိညာဉ်ကြောင့် နှစ်ပေါင်း ၃၈၀ ကျော်ကြာ သတိလစ်နေခဲ့ရပြီး၊ ပြတ်တောက်နေသော မှတ်ဉာဏ်များကြောင့် သူ ဘယ်သူဘယ်ဝါဖြစ်သည်ကိုပင် မသိခဲ့ရပေ။
လွန်ခဲ့သော အနှစ် ၂၀ ကျော်လောက်ကမှ သူ၏မှတ်ဉာဏ်များ ပြန်လည်ကြည်လင်လာခဲ့ပြီး၊ ၎င်းနှင့်အတူ သူ၏ဂိုဏ်းကြီး ပျက်စီးသွားခဲ့ရသည့် နာကျင်မှုများလည်း ပြန်လည် ရှင်သန်လာခဲ့သည်။
အခြားသူများအတွက်တော့ ဤအရာများအားလုံးမှာ လွန်ခဲ့သော နှစ်ပေါင်း ၄၀၀ က ဖြစ်ပျက်ခဲ့ခြင်း ဖြစ်သော်လည်း၊ သူ့အတွက်မူ လွန်ခဲ့သော အနှစ် ၂၀ ကမှ ဖြစ်ပျက်ခဲ့သကဲ့သို့ ဖြစ်နေပြီး နှစ်တွေ ကုန်လွန်လာသည်နှင့်အမျှ အသေးစိတ်အချက်အလက်များက ပိုမို ပီပြင်လာသဖြင့် သူ၏စိတ်ပိုင်းဆိုင်ရာအတွက် ထိုမှတ်ဉာဏ်အချို့ကို အချိန်အတိုင်းအတာတစ်ခုအထိ ချိတ်ပိတ် သိမ်းဆည်းထားခဲ့ရပေသည်။
“ငါက ရောက်လေရာ နေရာတိုင်းကို ဘေးဒုက္ခတွေ ဖိတ်ခေါ်တတ်တဲ့ ကံကြမ္မာဆိုးတဲ့ ကြယ်ဆိုးအဖြစ်နဲ့များ မွေးဖွားလာခဲ့တာလား။”
“တစ်ကြိမ်ဆိုရင် မတော်တဆမှုလို့ ခေါ်နိုင်ပြီး၊ ဒုတိယအကြိမ်ကို ကံဆိုးတဲ့ တိုက်ဆိုင်မှုလို့ ပြောလို့ရပေမဲ့ အခု တတိယအကြိမ်ကျတော့...” ဟု တိန်ချောင်က ရှုပ်ထွေးသော အမူအရာဖြင့် တိတ်တဆိတ် ရေရွတ်လိုက်သည်။
“ငါ့ရဲ့ မျိုးနွယ်စုကြီး ပျက်စီးသွားချိန်တုန်းက ငါက အရမ်း အားနည်းလွန်းနေခဲ့တယ်။ အဲဒီအချိန်က မျိုးနွယ်စုနယ်မြေထဲမှာ မရှိနေခဲ့တာက ငါကံဆိုးတာလား၊ ကံကောင်းတာလားပဲ။”
“ဒုတိယအကြိမ်မှာတော့ ငါ စွမ်းအားကြီးနေပြီလို့ ထင်ခဲ့ပေမဲ့လည်း အနည်းငယ် လိုအပ်သွားခဲ့သေးတယ်။”
“ဒါပေမဲ့ ဒီတစ်ကြိမ်မှာတော့ ဒီလိုအခြေအနေမျိုးနဲ့တောင် အရင်နှစ်ကြိမ်က ငါ မလုပ်နိုင်ခဲ့တာတွေကို လုပ်နိုင်ကောင်း လုပ်နိုင်လိမ့်မယ်”
တိန်ချောင်က ပြောလိုက်ရာ၊ သူ၏ မျှော်လင့်ချက် ကင်းမဲ့နေသောအမူအရာမှာ ခိုင်မာပြတ်သားသူတစ်ဦး၏ အမူအရာဖြင့် အစားထိုး ဝင်ရောက်သွားလေသည်။
“ဂိုဏ်းချုပ် ဟန်ချင်းလင်း... ခင်ဗျားကို ကျုပ် ကူညီပါ့မယ်။ ခင်ဗျားရဲ့ တပည့်တွေကို ကာကွယ်ပေးတဲ့နေရာမှာတော့ မဟုတ်ဘူး။ ဒါပေမဲ့ အဲဒီမတိုင်ခင်...”
တိန်ချောင်က စကားကို ခဏရပ်လိုက်ပြီး ဝန်ခံချက်များကြောင့် တွေဝေနေဆဲဖြစ်သော ကျောက်ချီဘက်သို့ လှည့်လိုက်သည်။
“ရှောင်ကျောက်... မင်းက ငါပြောသမျှ အရာအားလုံးကို အမြဲတမ်း လုပ်ခဲ့တယ်။ ဒါပေမဲ့ ဒီကိစ္စအတွက်တော့ ငါတို့ရဲ့ နောက်တစ်လှမ်းက ဘာဖြစ်မလဲဆိုတာကို ဆုံးဖြတ်ဖို့ မင်းကို အပြည့်အဝ အာဏာလွှဲပေးမှာပါ။”
“မင်း ဘာပဲဆုံးဖြတ်ဆုံးဖြတ် ငါ့မှာရှိတဲ့ စွမ်းရည်အားလုံးနဲ့ မင်းကို ကူညီသွားမယ်။ ဒါဆို ရှောင်ကျောက်... မင်း ဘာလုပ်ချင်လဲ”
တိန်ချောင်က ဆွံ့အမှင်သက်နေသော ကျောက်ချီအား ကြင်နာသော အပြုံးဖြင့် မေးလိုက်သည်။
“အဘိုး ဒါပေမဲ့.....” ကျောက်ချီမှာ စကားများဆွံ့အကာ တွေဝေသွားခဲ့သည်။
သူ၏ ဘဝတစ်လျှောက်လုံးတွင် အဓိက ဆုံးဖြတ်ချက်များအားလုံးကို တိန်ချောင်၏ အကြံပြုချက်အောက်တွင်သာ ပြုလုပ်ခဲ့ခြင်း ဖြစ်သည်။
သူကိုယ်တိုင်အတွက် ကြီးမားသော ဆုံးဖြတ်ချက်တစ်ခုကို တစ်ကြိမ်တည်းသာ ချမှတ်ခဲ့ဖူးပြီး၊ ၎င်းမှာ သူ၏ဆရာ ဝေဖန်ကို ရွေးချယ်ခဲ့စဉ်က ဖြစ်သည်။
ထိုစဉ်ကလည်း တိန်ချောင်က ထိုကိစ္စနှင့် ပတ်သက်၍ သူ၏ ထင်မြင်ချက်ပေးရန် ပြတ်သားစွာ ငြင်းဆန်ခဲ့သောကြောင့်သာ ထိုသို့ လုပ်ဆောင်ခဲ့ခြင်း ဖြစ်သည်။
“ကျောက်ချီ... လိမ္မာရေးခြားရှိတာက ကောင်းပါတယ်။ ဒါပေမဲ့ အဲဒါကို မင်းရဲ့ တွေးခေါ်ဆုံးဖြတ်နိုင်စွမ်းအတွက် အဟန့်အတားတစ်ခု အဖြစ်တော့ အသုံးမချပါနဲ့။”
“ကျင့်ကြံသူတွေဆိုတာ လွတ်လပ်တဲ့ တွေးခေါ်မှု ရှိဖို့ လိုအပ်တယ်။”
“တပည့်တွေဆိုတာ သူတို့ရဲ့ ကျင့်ကြံခြင်း ခရီးစဉ်မှာ ဆရာတွေဆီက လမ်းညွှန်မှုကို ရရှိကြပေမဲ့၊ နောက်ဆုံးမှာတော့ ဘယ်လမ်းက သူတို့နဲ့ အသင့်တော်ဆုံးလဲ ဆိုတာကို သူတို့ကိုယ်တိုင်ပဲ ဆုံးဖြတ်ရတာပဲလေ။”
“မင်းကိုယ်တိုင် စဉ်းစားဆုံးဖြတ်ဖို့ အခွင့်အရေး တစ်ခါမှ မပေးဘဲ၊ ငါကပဲ မင်းအတွက် အမြဲတမ်း ဆုံးဖြတ်ချက်တွေ ချပေးခဲ့တာက ငါ့အမှားပါ။”
“ငါ့ရဲ့ အကြောက်တရားတွေကြောင့် ငါ့ရဲ့ လုပ်ရပ်တွေက မင်းနဲ့ မင်းရဲ့ အနာဂတ်အပေါ်ကိုပါ လွှမ်းမိုးသွားစေခဲ့ရတယ်။”
“အဆင်ပြေပါတယ် ရှောင်ကျောက်။ မင်း ဘာပဲဆုံးဖြတ်ဆုံးဖြတ် နောက်ဆုံးအချိန်အထိ ငါ မင်းဘေးမှာ ‘အမြဲတမ်း’ ရှိနေမှာပါ။”
“ မင်းမှာ ဒါကို လုပ်နိုင်တဲ့ ခွန်အားနဲ့ သတ္တိတွေ ရှိနေတာမို့ ကိုယ့်ကိုယ်ကိုယ် အထင်မသေးပါနဲ့။”
“မင်းက သူစိမ်းတွေချည်းပဲ ရှိနေတဲ့ နေရာမှာတောင် အသက်ရှင်သန်နိုင်ခဲ့ပြီး၊ သေမတတ် ကြောက်နေခဲ့ရတဲ့ကြားက သူငယ်ချင်းတွေရအောင် လုပ်နိုင်ခဲ့သေးတာပဲ။”
“ဒါကြောင့် ငါ ဘယ်လိုတွေးမလဲဆိုတဲ့ အကြောက်တရားကြောင့် မင်း နောက်မဆုတ်ပါနဲ့။ မင်း ရှေ့ထွက်လာတာကို မြင်ရတာကိုက ငါ့အတွက် ဝမ်းသာစရာပါပဲ”
တိန်ချောင်က အပြုံးဖြင့် ပြောလိုက်ရင်း ကျောက်ချီ၏ ဆံပင်များကို ထိုးဖွလိုက်သည်။
ကျောက်ချီမှာ သူ ပြောချင်သည့်အရာကို ထုတ်ဖော်ပြောဆိုရန် ကြိုးစားနေစဉ် မျက်ရည်များမကျစေရန် အတင်းအကျပ် ထိန်းချုပ်နေရပုံပေါ်သော်လည်း၊ သူ့ကိုယ်သူရော တိန်ချောင်ကိုပါ ဖွင့်ဟဝန်ခံရန် အလွန်ပင် ကြောက်ရွံ့နေခဲ့သည်။
“ကျွန်တော် ဂိုဏ်းကို ကာကွယ်ချင်တယ် အဘိုး” ဟု ကျောက်ချီက လေးနက်တည်ကြည်စွာ ပြောလိုက်ရာ သူ၏အသံမှာ တရားရုံးတော်အတွင်း ပဲ့တင်ထပ်သွားလေသည်။
ဂိုဏ်းချုပ် ဟန်ချင်းလင်း ပြောခဲ့သည့် စကားများအားလုံးက အမှန်တရား ဟုတ်မဟုတ်ကို သူ သေချာမသိသော်လည်း၊ အကယ်၍ သူသာ ဤအချိန်တွင် ဂိုဏ်းမှထွက်ခွာသွားမည်ဆိုပါက သူ့ကို တဲအိုကြီးတစ်ခုထဲတွင် သေရန် စွန့်ပစ်ခဲ့သည့် တစ်ခါမျှမမြင်ဖူးသော မိဘများနှင့် ဘာမျှ ကွာခြားမည်မဟုတ်ကြောင်း သူ သိနေပေသည်။
“ကောင်းပြီ”
တိန်ချောင်က ဂုဏ်ယူမှုနှင့် ကျေးဇူးတင်မှုများ ရောယှက်နေသော အပြုံးဖြင့် ပြတ်သားစွာ ပြောလိုက်သည်။
ယန်ချင်းနှင့် ကျန်သူများမှာ ကျောက်ချီ၏ စိတ်နေသဘောထားကို မလေးစားဘဲ မနေနိုင်ခဲ့ကြပေ။
သူ ဖြတ်သန်းခဲ့ရသမျှ အရာအားလုံးနှင့် ယှဉ်လျှင် ထိုရွေးချယ်မှုကို ပြုလုပ်ရန်မှာ လွယ်ကူခဲ့မည် မဟုတ်ပေ။
ဂိုဏ်းချုပ် ဟန်ချင်းလင်း၏ မျက်လုံးများမှာ ကျယ်ဝိုင်းသွားပြီး ကျောက်ချီ၏ ရွေးချယ်မှုကြောင့် အံ့အားသင့်သွားကာ၊ သူ၏ အပြစ်ရှိစိတ်ကို ပိုမို နက်ရှိုင်းသွားစေခဲ့သည်။
“မင်းရဲ့ ပြတ်သားမှုအတွက် ငါ ကျေးဇူးတင်ပါတယ် ကျောက်ချီ။ ဒါပေမဲ့ မင်း ငါတို့နဲ့အတူ သေစရာ မလိုပါဘူး။ မင်းက မင်းရဲ့ဘဝကို အခုမှ စတင် ရှင်သန်ရုံပဲ ရှိသေးတာလေ။”
“ အခုချိန်မှာ အသက်စွန့်လိုက်ရတာက နှမြောစရာကောင်းလွန်းပါတယ်။ မင်းအနေနဲ့ ရှေ့ဆက် ကြိုးစားပြီး အဆုံးမဲ့ တာအိုလမ်းစဉ်ကို လိုက်စားသင့်တယ်။”
“အဲဒီလမ်းစဉ်က မင်းကို ဘယ်အထိ ခေါ်ဆောင်သွားမလဲဆိုတာကို ကြည့်သင့်ပါတယ်။”
“ပြီးတော့ မင်း ချစ်မြတ်နိုးတဲ့ အရာတွေကို ယုံယုံကြည်ကြည်နဲ့ လုံခြုံအောင် စောင့်ရှောက်နိုင်တဲ့ အမြင့်တစ်နေရာကို ရောက်လာတဲ့အခါ... ဂိုဏ်းကို ပြန်လည် အသက်သွင်းပြီး၊ တပည့်တွေ လုံခြုံစေဖို့အတွက် သူတို့ရဲ့ နာမည်ဂုဏ်သတင်းကို ဖျက်ဆီးပစ်စရာ မလိုတဲ့ ဂိုဏ်းတစ်ခုဖြစ်အောင် မင်း ဖန်တီးနိုင်မယ်လို့ ငါ မျှော်လင့်ပါတယ်”
ဂိုဏ်းချုပ် ဟန်ချင်းလင်းက မိမိကိုယ်ကို နှိမ့်ချသော အပြုံးဖြင့် ပြောလိုက်သည်။
“တောင်းပန်ပါတယ် ဂိုဏ်းချုပ်။ ဇာတ်သိမ်းက ဘယ်လိုပဲဖြစ်နေပါစေ နောက်ဆုံးအချိန်အထိ ဂိုဏ်းမှာပဲ ဆက်နေဖို့ ကျွန်တော် ဆုံးဖြတ်ပြီးပါပြီ။”
“ကျွန်တော်က သေနေသင့်ပြီ ဖြစ်ပေမဲ့ ကျွန်တော့်ကိုတောင် မသိတဲ့လူတစ်ယောက်က အခွင့်အရေးတစ်ခုယူပြီး ပြုစုပျိုးထောင်ပေးခဲ့တယ်။”
“အကယ်လို့ ခင်ဗျား ပြောသလို ဂိုဏ်းက သေချာပေါက် ပျက်စီးရတော့မယ့် အခြေအနေမှာ ဆိုရင်တောင်မှ၊ ကျွန်တော်ဆက်နေဖို့ အကြောင်းပြချက် ပိုခိုင်မာသွားတာပေါ့။”
“ကျွန်တော် အကူအညီ လိုအပ်ချိန်မှာ အကူအညီ ရခဲ့သလိုမျိုး၊ ကျွန်တော်လည်း ပြန်ကူညီရပါမယ်။ ဒါ့အပြင် ကျွန်တော့်အဘိုးက စွမ်းအားကြီးပါတယ်။”
“ဒီနေ့ ကျွန်တော် ရရှိထားတဲ့ အောင်မြင်မှုတွေ အားလုံးက သူ့ကြောင့်ပါ။ ကျွန်တော်က ဂိုဏ်းချုပ်လောက် ပါရမီမပါပါဘူး။”
“ ကျွန်တော့်အဘိုးရဲ့ လမ်းညွှန်မှုတွေကြောင့်သာ ဒီအထိ ရောက်လာခဲ့တာပါ”
ကျောက်ချီက တိန်ချောင်၏ ထူးချွန်ပြောင်မြောက်မှုအကြောင်းကို ဂုဏ်ယူစွာ ပြုံးရင်း ပြောလိုက်သည်။
“ကဲ ရှင်းသွားပြီမဟုတ်လား။ ကျောက်ချီနဲ့ ဒီမှာပဲ ဆက်နေမယ်။ ပြီးတော့ ခင်ဗျားတို့ရဲ့ အခြေအနေက ထင်ထားသလောက်လည်း မဆိုးသေးပါဘူး။”
“ အထွတ်အထိပ် နယ်မြေအဆင့် ကျွမ်းကျင်သူ တစ်အုပ်ကြီးနဲ့ ရင်ဆိုင်ရတာမျိုး မဟုတ်သရွေ့တော့ ခင်ဗျားတို့ အသက်ရှင်သန်နိုင်ဖို့ သေချာစေမယ့် နည်းလမ်းတွေ ရှိပါတယ်။”
“ငါ့ရဲ့ အစွမ်းအစ အပြည့်အဝကို အသုံးမချနိုင်သေးပေမဲ့၊ အရင်းအမြစ်တွေသာ ရှိမယ်ဆိုရင် ဂိုဏ်းကို အနည်းဆုံး ဆယ်နှစ်လောက် ကာကွယ်ထားနိုင်မယ့် ကျင့်စဉ်တွေ ရှိတယ်။”
“ခင်ဗျား နန်းတော်အဆင့်ကို ချိုးဖောက်ဖို့အတွက် အဲဒီအချိန်ရဲ့ တစ်ဝက် ဒါမှမဟုတ် အဲဒီထက်တောင် ပိုနည်းတဲ့အချိန်ပဲ လိုမယ်ဆိုတာ ငါသိတယ်။”
“ပြီးတော့ အဲဒီအဆင့်ကို ရောက်သွားပြီဆိုရင်၊ ခင်ဗျားတို့ရဲ့ ရန်သူတွေထဲမှာ အမြုတေဖွဲ့စည်းခြင်းအဆင့်တုန်းက ရွှေရောင်အမြုတေ ရှိခဲ့ဖူးတဲ့ နန်းတော်အဆင့် ကျွမ်းကျင်သူတစ်ယောက်ကို ရင်ဆိုင်နိုင်မယ့်သူ ရှိဖို့ဆိုတာ ကျွန်တော် သံသယဖြစ်မိတယ်”
တိန်ချောင်က ပြောလိုက်ရာ သူ၏မျက်လုံးများထဲတွင် စိတ်ဝင်စားမှု အရိပ်အယောင်တစ်ခု ဖြတ်ပြေးသွားလေသည်။
သူသည် ဟန်ချင်းလင်း၏ ပါရမီကို မလေးစားဘဲ မနေနိုင်ခဲ့ပေ။
သူ၏ သွေးသောက်ညီအစ်ကိုများကို ပါရမီရှင်များဟု ခေါ်ဆိုခဲ့ကြသော်လည်း၊ သူတို့သည် ဂိုဏ်းချုပ် ဟန်ချင်းလင်းနှင့် ယှဉ်လျှင် အနည်းငယ် လိုအပ်နေသေးသည်ဟု သူ ထင်မြင်မိသည်။
အကြောင်းရင်းများစွာရှိသည့်အနက် တစ်ခုမှာ ဂိုဏ်းချုပ်သည် သူတို့ထက် အဆင့်တစ်ဆင့်နိမ့်သော ကျင့်စဉ်ရှိသည့် အဆင့် ၄ ဂိုဏ်းတစ်ခုတွင် ကြီးပြင်းလာခဲ့သော်လည်း၊ သူ၏ ရွှေရောင်အမြုတေ အခြေခံအုတ်မြစ်မှာ သူ့ကိုပင် ယှဉ်နိုင်လောက်အောင် ခိုင်မာနေသောကြောင့် ဖြစ်ပေသည်။
အကယ်၍သာ သူ၏ အခြေအနေများ ပိုမိုကောင်းမွန်ခဲ့ပြီး အဆင့် ၁ ဂိုဏ်းတစ်ခု သို့မဟုတ် မြင့်မြတ်နယ်မြေများကသာ သူ့ကို တွေ့ရှိခဲ့မည်ဆိုလျှင်၊ ဒဏ္ဍာရီလာ ခရမ်းရောင်အမြုတေကိုများ သူ ပိုင်ဆိုင်နိုင်မည်လားဟု တိန်ချောင် တွေးတောမိလေသည်။
“ငါ့ခန္ဓာကိုယ်ကို ပြန်လည် မဖွဲ့စည်းနိုင်ခင်မှာ ရှောင်ကျောက် ဘေးကင်းကင်းနဲ့ ကျင့်ကြံနိုင်ဖို့ အရိပ်အာဝါသပေးနိုင်မယ့် သစ်ပင်ကြီးတစ်ပင် ဖြစ်လာအောင်၊ ဒီကောင်လေးကို လမ်းညွှန်မှုတချို့ ပေးလိုက်ရင် ကောင်းမယ်ထင်တယ်” ဟု တိန်ချောင်က တိတ်တဆိတ် တွေးလိုက်မိသည်။
“ဒါက...”
ဂိုဏ်းချုပ် ဟန်ချင်းလင်းမှာ ဘာပြောရမှန်း မသိတော့ပေ။
စက္ကန့်နှင့်အမျှ ပို၍ပို၍ နက်နဲသိမ်မွေ့လာပုံရသော တိန်ချောင်အား သူ ထပ်မံ၍ အကဲဖြတ်ခြင်း မပြုဘဲ မနေနိုင်ခဲ့ပေ။
“ကျောက်ချီရဲ့ အဘိုးက ဘယ်သူများလဲ။ အထွတ်အထိပ် နယ်မြေအဆင့် ကျွမ်းကျင်သူတွေအကြောင်း ပြောတဲ့နေရာမှာတောင် ပေါ့ပေါ့ပါးပါးနဲ့ ပြောနေပုံထောက်ရင် သူက သာမန်လူတစ်ယောက်တော့ မဖြစ်နိုင်ဘူး။ သူများ...”
ဂိုဏ်းကြီး၏ ရှင်သန်ရေးကို သေချာစေရန်အတွက် အရေးတကြီး ဖြေရှင်းရမည့် ကိစ္စရပ်များ ရှိနေသဖြင့်၊ သူ၏ခေါင်းထဲတွင် ပေါ်လာသော ကြောက်မက်ဖွယ်ကောင်းသည့် အတွေးများကို ခါထုတ်ပစ်လိုက်လေသည်။
သူ့ကို ကောက်ရိုးတစ်မျှင် ကမ်းပေးလိုက်ခြင်းဖြစ်ပြီး၊ ထိုအရာကို လက်နှစ်ဖက်ဖြင့် ဆုပ်ကိုင်မထားပါက သူသည် လူမိုက်တစ်ယောက်သာ ဖြစ်ပေလိမ့်မည်။
“ဂိုဏ်းကိုယ်စား... ခင်ဗျားရဲ့ အကူအညီအတွက် ကျွန်တော်တို့ရဲ့ နက်ရှိုင်းတဲ့ ကျေးဇူးတင်မှုကို ရိုသေစွာနဲ့ ကမ်းလှမ်းပါတယ်။”
“ခင်ဗျားရဲ့ အကူအညီကိုလည်း ကျွန်တော် အရှက်ကင်းမဲ့စွာနဲ့ပဲ လက်ခံရပါလိမ့်မယ်။”
“အကယ်လို့ ခင်ဗျား ဒါမှမဟုတ် ကျောက်ချီ တစ်ခုခု လိုအပ်ခဲ့ရင်၊ ဂိုဏ်းရဲ့ တတ်နိုင်စွမ်းဘောင်ထဲမှာ ရှိနေသရွေ့ ဘယ်လိုတောင်းဆိုမှုမျိုးကိုမဆို ဖြည့်ဆည်းပေးဖို့ ကျွန်တော်တို့ ဝမ်းသာစွာနဲ့ ဆောင်ရွက်ပေးပါ့မယ်”
ဂိုဏ်းချုပ် ဟန်ချင်းလင်းက ကျေးဇူးတင်စွာဖြင့် ဦးညွှတ်ရင်း ပြောလိုက်သည်။
“ကောင်းပြီ... အဲဒီလို ကမ်းလှမ်းလာတာ ကောင်းပါတယ်။ တကယ်တော့ ငါ လိုအပ်နေတဲ့ အရာတချို့ ရှိပါတယ်”
“အဘိုး..”
ကျောက်ချီက တိန်ချောင်ကို မျက်လုံးလှန်ကြည့်ရင်း အလျင်စလို ကြားဖြတ်ပြောလိုက်သည်။
“ရှောင်ကျောက်... ဒါက သူတို့အကျိုးအတွက်ရော၊ ငါ့အကျိုးအတွက်ပါ ဖြစ်တယ်။ ငါက ဂိုဏ်းဝင်တစ်ယောက် မဟုတ်ဘူး။”
“ဒါကြောင့် ငါ သူတို့ကို ကူညီတာနဲ့ မင်း သူတို့ကို ကူညီတာက မတူဘူး။ တကယ်လို့ ငါက ဘာမှ ပြန်မတောင်းဘဲ ကူညီလိုက်မယ်ဆိုရင်၊ သူတို့ ငါ့ကို အကြွေးတင်သွားသလိုမျိုး အမြဲတမ်း တင်းမာမှုတစ်ခု ရှိနေလိမ့်မယ်။”
“ အဲဒီတင်းမာမှုက မင်းဆီကိုပါ ကူးစက်လာပြီး ဂိုဏ်းနဲ့ မင်းရဲ့ ဆက်ဆံရေးကိုပါ ထိခိုက်စေလိမ့်မယ်။”
“ဒါပေမဲ့ အဖိုးအခ တောင်းလိုက်ခြင်းအားဖြင့် ဂိုဏ်းက ဒီကိစ္စမှာ သူတို့လည်း တန်းတူ မိတ်ဖက်အဖြစ် အတိုင်းအတာတစ်ခုအထိ ခံစားရစေမှာပါ” ဟု တိန်ချောင်က စိတ်ရှည်လက်ရှည် ရှင်းပြလိုက်သည်။
တိန်ချောင် ပြောနေသည့် စကားအများစုကို သူ နားလည်ပုံမပေါ်သော်လည်း၊ ကျောက်ချီက ဝတ်ကျေတမ်းကျေ ခေါင်းညိတ်ပြလိုက်သည်။
တိန်ချောင်မှာ ဤသည်ကို မြင်သောအခါ ခေါင်းခါရင်း ပြုံးရုံသာ တတ်နိုင်တော့သည်။
ကျောက်ချီသည် လူများနှင့် ဆက်ဆံရေး အလွန်နည်းပါးပြီး၊ ဂိုဏ်းထဲတွင်ပင် သူ၏အချိန်အများစုကို ကျင့်ကြံခြင်းဖြင့်သာ ကုန်ဆုံးစေခဲ့သောကြောင့် သူငယ်ချင်း အလွန်နည်းပါးလေသည်။
ထို့ကြောင့် ထိပ်တန်းအဆင့်ရှိသူများ ပါဝင်ပတ်သက်လေ့ရှိသော လူမှုရေး အရှုပ်အထွေးများသည် သူ၏ တွေးခေါ်နိုင်စွမ်းနှင့် များစွာ ကွာလှမ်းနေသည့် အရာများ ဖြစ်နေပေသည်။
“စီနီယာရဲ့ ဘယ်လိုတောင်းဆိုမှုကိုမဆို ဖြည့်ဆည်းပေးဖို့ ကျွန်တော်တို့ ဝမ်းသာပါတယ်။”
ဂိုဏ်းအတွက် ရပ်တည်စရာ နေရာတစ်ခုပေးရန် စဉ်းစားပေးသည့် တိန်ချောင်၏ စေတနာကို ကျေးဇူးတင်သောအားဖြင့် ဂိုဏ်းချုပ် ဟန်ချင်းလင်းက ပြုံးရင်း ပြောလိုက်သည်။
“ပထမဆုံးအနေနဲ့... ငါ့ရဲ့ ခွင့်ပြုချက်မပါဘဲ ဂိုဏ်းတွင်းက တခြားသူတွေကို ငါ့ရဲ့တည်ရှိမှုကို ထုတ်ဖော်မပြောရဘူး။”
“ငါ့အနေနဲ့ လုံးဝ သိုသိုသိပ်သိပ် နေချင်ခဲ့ပေမဲ့၊ ငါ့ရဲ့ နောက်ထပ် တောင်းဆိုချက် နှစ်ခုကို ချောချောမွေ့မွေ့ ဖြည့်ဆည်းနိုင်ဖို့အတွက် ရာထူးမြင့် အကြီးအကဲတချို့ကတော့ ငါ့ရဲ့တည်ရှိမှုကို သိထားဖို့ လိုအပ်လိမ့်မယ်။”
“ငါ့ရဲ့ အထောက်အထားကို သိတဲ့ အကြီးအကဲတွေ အားလုံးကို အမှားအယွင်း တစ်စုံတစ်ရာ မဖြစ်စေဖို့ ဝိညာဉ် တံဆိပ်ခတ်နှိပ်ထားရမယ်။”
“ဒါက ငါ့ရဲ့ နောက်ခံကို ထည့်သွင်းစဉ်းစားရင် ခင်ဗျားတို့ ဂိုဏ်းအတွက်ရော ငါ့အတွက်ပါ လုံခြုံရေး အာမခံချက်တစ်ခုပဲ။”
“ငါ့ရဲ့ နောက်ခံနဲ့ ပတ်သက်လို့တော့ ခင်ဗျားတစ်ယောက်တည်းကိုပဲ ဖွင့်ပြောပြမယ်။ ဝိညာဉ်ကန့်သတ် ဂါထာ အခတ်ခံထားရတဲ့ အကြီးအကဲတွေကိုတောင်မှ ဖွင့်ပြောမှာ မဟုတ်ဘူး။”
“ဂိုဏ်းချုပ်တစ်ယောက်အနေနဲ့ အရေးကြုံရင် သိထားဖို့က တရားမျှတပါတယ်။”
“နောက်ထပ် တောင်းဆိုချက် နှစ်ခုနဲ့ ပတ်သက်လို့တော့... တစ်ခုက ငါ့အတွက်ဖြစ်ပြီး၊ နောက်တစ်ခုက ကျောက်ချီအတွက်ပါ။”
“ငါ့ရဲ့ တောင်းဆိုချက်က ခင်ဗျား နန်းတော်အဆင့်ရဲ့ အလယ်အလတ်အဆင့်တွေကို အနည်းဆုံး ရောက်ရှိတဲ့အထိ စောင့်ရလိမ့်မယ်။”
“ပြီးတော့ ဂိုဏ်းကလည်း မပျက်မစီးဘဲ အပြည့်အဝ လည်ပတ်နေဖို့ လိုအပ်လိမ့်မယ်။ ခင်ဗျားရဲ့ လက်ရှိအဆင့်နဲ့ ဂိုဏ်းရဲ့ လက်ရှိအဆင့်မှာ ရှာဖွေဖို့ ခက်ခဲမယ့် အရင်းအမြစ်တချို့ကို လိုအပ်တယ်။”
“အနည်းဆုံးအနေနဲ့ ငါလိုအပ်တဲ့ အရင်းအမြစ်တွေထဲက အနည်းဆုံးကို ရဖို့အတွက်တောင် ခင်ဗျားက နန်းတော်အဆင့်ရဲ့ အလယ်အလတ်အဆင့်တွေကို အနည်းဆုံး ရောက်နေဖို့ လိုတယ်။”
“ဒီလောက်နိမ့်တဲ့ လိုအပ်ချက်ဖြစ်နေရတဲ့ တစ်ခုတည်းသော အကြောင်းရင်းက ခင်ဗျားမှာ ရွှေရောင်အမြူတေ ရှိနေလို့ပဲ။”
“မဟုတ်ရင် အဲဒီအရင်းအမြစ်တွေကို ရဖို့အတွက် နန်းတော်အဆင့်ရဲ့ နှောင်းပိုင်းအဆင့်တွေမှာ ရှိတဲ့ လူတစ်ယောက်ကို လိုအပ်လိမ့်မယ်။”
“ကျောက်ချီရဲ့ တောင်းဆိုချက်ကတော့ သိပ်မခက်ပါဘူး။ သူ့နာမည် ရှင်းသွားအောင် လုပ်ပေးတာအပြင်၊ ခင်ဗျားတို့ရဲ့ အဓိကကျင့်စဉ်ဖြစ်တဲ့ ‘ကြာဝါရွက် ၃၆ ကွက်’ ကို သူ့ကို သင်ယူခွင့်ပေးဖို့ ဂိုဏ်းကို လိုအပ်တယ်။”
“အဲဒီကျင့်စဉ်က အမွေဆက်ခံမယ့် တပည့်တွေအတွက်ပဲ ကန့်သတ်ထားပြီး၊ စတင်သင်ယူဖို့အတွက် အခြေခံတည်ဆောက်ခြင်းအဆင့်ရဲ့ နှောင်းပိုင်းအဆင့်တွေကို ရောက်ဖို့ လိုအပ်တယ်ဆိုတာကို ငါသိပါတယ်။”
“ဒါပေမဲ့ သူ့ကိုတော့ ချွင်းချက်အနေနဲ့ ခွင့်ပြုပေးစေချင်တယ်။ သူ့ရဲ့ အောင်မြင်မှုတွေက ငါ့ကြောင့်လို့ သူပြောခဲ့ပေမဲ့ သူကိုယ်သူ အထင်သေးလွန်းတယ်။”
“သူ့မှာ ကျင့်ကြံဖို့အတွက် ပါရမီရှိပြီး၊ အဲဒီလိုကျင့်စဉ်မျိုးကို သူ စောစောစတင်နိုင်လေလေ၊ သူ ပိုမိုမြင့်မားတဲ့ အဆင့်တွေအထိ တက်လှမ်းနိုင်ဖို့ တကယ်ကို အထောက်အကူ ဖြစ်စေမှာပါ။”
“အပြန်အလှန်အနေနဲ့... ငါရှိနေကြောင်း သိခွင့်ရလောက်အောင် ခင်ဗျား ယုံကြည်ရတယ်လို့ ယူဆတဲ့ အကြီးအကဲတချို့ကို ကျွန်တော့်ရဲ့ လမ်းညွှန်မှုတွေနဲ့ ထိုးထွင်းသိမြင်မှုတွေကိုတောင် ပေးဖို့ ဆန္ဒရှိပါတယ်။”
“ဒါပါပဲ။ ဒီတောင်းဆိုချက် သုံးခုကို ခင်ဗျား သဘောတူသရွေ့ကူညီပေးဖို့ ဆန္ဒရှိတယ်” ဟု တိန်ချောင်က ပြောလိုက်သည်။
“သဘောတူပါတယ်”
ဂိုဏ်းချုပ် ဟန်ချင်းလင်းက စက္ကန့်ပိုင်းမျှပင် မစဉ်းစားဘဲ ပြောလိုက်သည်။ သူ့အတွက်တော့ ထိုတောင်းဆိုချက်များက ရက်ရောလွန်းနေပေသည်။
တိန်ချောင်က သူ့ကို ကျောက်ချီအတွက် ဂိုဏ်းချုပ်ရာထူးမှ ဆင်းပေးရန် တောင်းဆိုခဲ့လျှင်ပင် သူ သဘောတူခဲ့မည် ဖြစ်သည်။
ထိုသို့ သဘောတူရခြင်းမှာ ဂိုဏ်းကို ကူညီရန်အတွက် တစ်စိတ်တစ်ပိုင်း ပါဝင်သော်လည်း၊ နောက်ထပ် တစ်စိတ်တစ်ပိုင်းမှာမူ ဂိုဏ်းချုပ်ဖြစ်ရခြင်းကို သူ ‘လုံးဝ’ မနှစ်သက်သောကြောင့် ဖြစ်ပေသည်။