အခန်း (၆၀၅-၆၀၆)

အခန်း ၆၀၅ - ကိုးဆက်မြောက်ဘုရင်

"ဒါကို ရှင်စိုးရိမ်နေဖို့ မလိုပါဘူး ဒီစစ်ပွဲကို ရပ်တန့်မှာလား မရပ်တန့်ဘူးလားဆိုတာပဲ ငါ့ကို ပြောပါ"

မိန်းကလေးက တည်ငြိမ်အေးဆေးစွာ မေးလိုက်သည်။

မသေမျိုးချင်မျိုးနွယ်စု ဘိုးဘေး၏ မျက်နှာမှာ စိတ်ရှုပ်ထွေးမှုများဖြင့် ပြည့်နှက်နေသည်။ သူက လေသံတိုးတိုးဖြင့် ပြန်ဖြေသည်မှာ

"စစ်ပွဲက စတင်နေပြီ နတ်ဘုရားမ အခုချိန်မှာ ကျွန်တော် ရပ်ချင်တယ်ဆိုရင်တောင် ရပ်လို့မရတော့တဲ့ အခြေအနေကို ရောက်နေပြီ ကျေးဇူးပြုပြီး ကျွန်တော့်ကို ခွင့်လွှတ်ပေးပါ နတ်ဘုရားမ ရှန်ကျီ"

ချင်ဘိုးဘေးသည် ထိုလျှို့ဝှက်ဆန်းကြယ်သော အမျိုးသမီးကို အတော်လေး ကြောက်ရွံ့ရိုသေနေသည်ကို ဖန့်ချန် အထင်အသား သိမြင်နေရသည်။

သို့သော်လည်း သူသည် စစ်ပွဲကို ရပ်တန့်ရန် လုံးဝဆန္ဒမရှိပေ။

သူ၏ စိတ်ထဲတွင် လန်ယာမျိုးနွယ်စုကို အောင်နိုင်လိုသော စွဲလမ်းမှုမှာ အမြစ်တွယ်နေပြီ ဖြစ်သည်။

"အဖိုးကြီးချင် ရှင် ကိုယ့်ကိုယ်ကိုယ် ပြင်ဆင်ထားသင့်တယ် ဒီစစ်ပွဲက တစ်နှစ်၊ နှစ်နှစ်နဲ့ ပြီးမှာမဟုတ်ဘူး တကယ်လို့သာ စစ်မီးတောက်ခဲ့ရင် အနှစ် ရှစ်ဆယ်၊ ကိုးဆယ်လောက်အထိ ကြာသွားနိုင်တယ်"

"အဲဒီအချိန်ကျရင် အပြာရောင်တာအိုနယ်မြေမှာ ဘာတွေကျန်ခဲ့မလဲ ရှင့်ရဲ့ မသေမျိုးချင်မျိုးနွယ်စုမှာရော ကျင့်ကြံသူ ဘယ်နှယောက် ကျန်ရစ်မလဲ အဆုံးသတ်မှာတော့ နှစ်ဖက်စလုံး အကြီးအကျယ် ဆုံးရှုံးရုံပဲ ရှိလိမ့်မယ်"

မိန်းကလေးက ခေါင်းခါရင်း ဆိုသည်။

"နတ်ဘုရားမ ရှန်ကျီ ကျွန်တော် ဒီနယ်မြေမှာ နေလာတာ နှစ်ပေါင်းများစွာ ကြာပါပြီ ကျွန်တော်က ဂူအောင်းပြီး ကျင့်ကြံနေရုံတင် မဟုတ်ဘဲ နယ်ပယ်အသီးသီးက မိတ်ဆွေတွေနဲ့လည်း အမြဲ ဆွေးနွေးတိုင်ပင်လေ့ ရှိပါတယ်"

ချင်ဘိုးဘေးက ယုံကြည်မှုအပြည့်ဖြင့် ပြောသည်။

"ဒီစစ်ပွဲရဲ့ အလားအလာကို ကျွန်တော် ကောင်းကောင်း နားလည်ထားတယ် ဝိညာဉ်သွေးဂိုဏ်းက နောက်ကွယ်ကနေ ဘယ်လိုပဲ အကွက်ဆင်ဆင် ဒါက စစ်ပွဲတစ်ခုလုံးအပေါ်မှာ အနည်းငယ်ပဲ သက်ရောက်မှု ရှိမှာပါ"

"ဝိညာဉ်သွေးဂိုဏ်းဆိုတာ နေရာတိုင်းမှာ ရှိနေတာပဲ သူတို့ကို ကြောက်ပြီး ရှောင်နေရင် ဘယ်တော့မှ တိုးတက်မှာ မဟုတ်ဘူး ချင်မျိုးနွယ်စု ရှေ့ဆက်သွားနိုင်ဖို့ဆိုရင် ဒီတိုက်ပွဲက ရှောင်လွှဲလို့ မရဘူး"

မိန်းကလေး၏ မျက်မှောင်များ အနည်းငယ် ကြုံ့သွားသည်။

"ဆွေးနွေးဖို့ လမ်းစ လုံးဝမရှိတော့ဘူးပေါ့"

ချင်ဘိုးဘေးက ပြုံးလိုက်ကာ

"နတ်ဘုရားမ ကျွန်တော့်မျိုးနွယ်စုဆီ မရောက်တာ ကြာပြီပဲ ကျွန်တော့်ရဲ့ တပည့်တွေကို ခေါ်ပြီး မျိုးနွယ်စုထဲမှာ လိုက်ကြည့်ပါဦးလား"

"မလိုတော့ပါဘူး ငါ သွားတော့မယ်"

မိန်းကလေး၏ မျက်နှာမှာ မည်သည့် ခံစားချက်မျှ မရှိပေ။

သူမက နှုတ်ဆက်ပြီးနောက် လှည့်ထွက်သွားတော့သည်။

မိန်းကလေး ထွက်သွားသည်နှင့် ချင်ဘိုးဘေး၏ မျက်နှာမှာ အလွန်အမင်း တည်ကြည်လေးနက်သွားကာ တစ်စုံတစ်ခုကို အပြင်းအထန် စဉ်းစားနေဟန် ရသည်။

ခဏအကြာတွင် သူသည် ကောင်းကင်လျှိုဝှက်ကြေးမှန် ကို ထုတ်ယူကာ အဆင့်နိမ့် ဝိညာဉ်ကျောက်တုံး အချို့ကို အားဖြည့်လိုက်သည်။

ဖန့်ချန်သည် အစက ထိုမိန်းကလေး နောက်သို့ လိုက်သွားရန် စိတ်ကူးရှိသော်လည်း ချင်ဘိုးဘေး၏ အပြုအမူကို မြင်သောအခါ နေရာမှာပင် ငြိမ်၍ စောင့်ကြည့်နေလိုက်သည်။

မကြာမီ မှန်အတွင်း၌ မြူခိုးများ ဖုံးလွှမ်းနေသော ပုံရိပ်တစ်ခု ပေါ်လာသည်။

"ညီအစ်ကိုချင် မင်း ဆုံးဖြတ်ချက် ချပြီးပြီ မဟုတ်လား ဘာလို့ ငါ့ကို အခုမှ ဆက်သွယ်တာလဲ"

မှန်ထဲမှ ပုံရိပ်က စိတ်မရှည်သလို ပြောလိုက်သည်။

ချင်ဘိုးဘေးက ဦးညွှတ်ကာ လေးနက်စွာ ဆိုသည်။

"နယ်စားမင်းခင်ဗျာ ဒီကိစ္စရဲ့ နောက်ကွယ်မှာ ဝိညာဉ်သွေးဂိုဏ်းက ကျင့်ကြံသူတွေ ရှိနေတယ်လို့ ကျွန်တော် သတင်းရထားပါတယ်"

"ဝိညာဉ်သွေးဂိုဏ်း"

မှန်ထဲမှ ပုံရိပ်သည် ခေတ္တမျှ တိတ်ဆိတ်သွားကာ ထိုစကား၏ အတိမ်အနက်ကို စဉ်းစားနေဟန် ရှိသည်။

ဖန့်ချန် မျက်မှောင်ကြုတ်မိသည်။

အပြာရောင်တာအိုနယ်မြေ၏ နယ်စားမင်းသည် စစ်ပွဲကို မျက်ကွယ်ပြုရန် လာဘ်ထိုးခံထားရသည်ဟု သူ ထင်ခဲ့သော်လည်း အခြေအနေမှာ ထိုထက်မက ပိုမို ရှုပ်ထွေးနေပုံရသည်။

"မင်း သေချာလား အဲဒီသတင်းက ယုံကြည်စိတ်ချရရဲ့လား"

"ဒါက နတ်ဘုရားတာအိုဂိုဏ်း က နတ်ဘုရားမ ရှန်ကျီ ပြောပြတာပါ"

"ဘာမှ မစိုးရိမ်နဲ့ ဝိညာဉ်သွေးဂိုဏ်းဆိုတာ ပုန်းအောင်းနေတဲ့ ပိုးမွှားတွေပဲ သူတို့ ရသလောက် အမြတ်ထုတ်ပါစေဦး"

"စစ်ပွဲစတာနဲ့ သူတို့မှာ ဘာမှ ထိန်းချုပ်နိုင်စွမ်း ရှိမှာမဟုတ်ဘူး မင်းက လန်ယာမျိုးနွယ်စုကို မြန်မြန်သိမ်းပြီး မင်းရသင့်တာယူ ငါကလည်း ငါရသင့်တာကို ယူမယ်"

ချင်ဘိုးဘေးက စိုးရိမ်တကြီးဖြင့်

"ဒါပေမဲ့ နတ်ဘုရားမ ရှန်ကျီက စစ်ပွဲကို ရပ်ဖို့ ပြောတာကို ကျွန်တော် ငြင်းလိုက်မိတယ် ဒါက နတ်ဘုရားတာအိုဂိုဏ်းရဲ့ မကျေနပ်မှုကို ဖြစ်စေမလား"

မှန်ထဲမှ လူက ဂရုမစိုက်သလို ဆိုသည်။

"နတ်ဘုရားတာအိုဂိုဏ်းရဲ့ မကျေနပ်မှုက ဘာမှ မဟုတ်ဘူး စစ်ပွဲရဲ့ ရလဒ်ကသာ အရေးကြီးတယ် မင်း အောင်နိုင်ဖို့ပဲ သေချာအောင် လုပ်၊ အားလုံး အဆင်ပြေသွားလိမ့်မယ်"

"ရှန်ကျီ ဆိုတာ နတ်ဘုရားမ တစ်ယောက်သက်သက်ပဲ သူမက နတ်ဘုရားတာအိုဂိုဏ်း တစ်ခုလုံးကို ကိုယ်စားမပြုနိုင်ဘူး တကယ်လို့ သူမက အကြီးအကဲ တစ်ယောက်ဆိုရင်တော့ တစ်မျိုးပေါ့"

"ဒါပေမဲ့ မင်းက သူမကို ဘာလို့ ကြောက်နေတာလဲနတ်ဘုရားတာအိုဂိုဏ်းက ဘယ်လောက်ပဲ တန်ခိုးကြီးကြီး အလယ်ပိုင်းတိုက်ကြီးရဲ့ အင်ပါယာ ကိုတော့ ဦးညွှတ်ရတာပဲ ငါ့နောက်ကွယ်မှာ ရှိတဲ့ ကိုးဆက်မြောက်ဘုရင် ဟာ နတ်ဘုရားတာအိုဂိုဏ်းကို ကြောက်နေမှာ မဟုတ်ဘူး"

ကိုးဆက်မြောက်ဘုရင် ဟူသော အမည်ကို ကြားလိုက်ရသည်နှင့် ချင်ဘိုးဘေးမှာ စိတ်သက်သာရာ ရသွားဟန် တူသည်။

သူတို့ အနည်းငယ် ထပ်မံစကားပြောဆိုပြီးနောက် မှန်ကို သိမ်းဆည်းကာ ဘိုးဘေးမှာ သီးသန့်ကျင့်ကြံရန် ထွက်ခွာသွားတော့သည်။

'နတ်ဘုရားတာအိုဂိုဏ်း... ကိုးဆက်မြောက်ဘုရင်...'

ဖန့်ချန်၏ မျက်လုံးများထဲတွင် အတွေးကိုယ်စီ ရှိနေသည်။

ထိုအခြေအနေမှာ သူထင်ထားသည်ထက် ပိုမိုနက်ရှိုင်းနေသည်။

နယ်စားမင်း ပြောသွားသော ကိုးဆက်မြောက်ဘုရင်ဆိုသည်မှာ ကောင်းကင်ဘုရင် ကျန့် ကဲ့သို့ပင် မသေမျိုးဘုရင် အဆင့်ရှိသည့် အလွန်တန်ခိုးကြီးသော ပုဂ္ဂိုလ်ဖြစ်နိုင်သည်။

ဖြစ်နိုင်သည်မှာ ကိုးဆက်မြောက်ဘုရင်သည် လန်ယာမျိုးနွယ်စုထံမှ တစ်စုံတစ်ခုကို လိုချင်နေခြင်း ဖြစ်လိမ့်မည်။

သူကိုယ်တိုင် တိုက်ရိုက် လှုပ်ရှားရန် မသင့်တော်သဖြင့် နယ်စားမင်းနှင့် ချင်ဘိုးဘေးကို သုံးကာ လန်ယာမျိုးနွယ်စုကို ချေမှုန်းရန် အကြောင်းပြချက် ရှာခိုင်းနေခြင်း ဖြစ်နိုင်သည်။

အကယ်၍ ထိုသို့သာ မှန်ပါက ဝိညာဉ်သွေးဂိုဏ်းသည်ပင်လျှင် ထိုလျှို့ဝှက်ချက်ကို သိရှိမည် မဟုတ်ပေ။

ဖန့်ချန်က ထိုမိန်းကလေးကို သူ၏ ဝိညာဉ်အာရုံဖြင့် လိုက်ရှာသော်လည်း သူမက အရိပ်အယောင်ပင် မကျန်ဘဲ ပျောက်ကွယ်သွားပြီ ဖြစ်သည်။

သူ၏ ကိုယ်ထဲသို့ ဝိညာဉ်ပြန်ဝင်လာပြီး မျက်လုံးဖွင့်လိုက်ရာ

သူ၏ ရှေ့တွင် ထိုမိန်းကလေး ရပ်နေသည်ကို တွေ့လိုက်ရသဖြင့် မှင်သက်သွားသည်။

"ရှေးဦးနတ်ဘုရားမျက်လုံး ကျင့်စဉ်က ဘယ်လိုလဲ"

မိန်းကလေးက တည်ငြိမ်စွာ မေးလိုက်သည်။

"အခုတော့ အခြေခံအဆင့် ကို ရောက်နေပြီလို့ ထင်ပါတယ်"

ဖန့်ချန်၏ မျက်လုံးများထဲတွင် ရွှေရောင်လိုင်းများ လင်းလက်လာသည်။

ထိုအချိန်တွင် သူ၏ ရှေ့မှ မိန်းကလေး၏ ပုံရိပ်မှာ တုန်ခါနေသလို ခံစားရသည်။

ထူးဆန်းသည်မှာ အခြားသူများ၏ ကိုယ်ထည်လိုင်းများကို မြင်ရသော်လည်း ထိုမိန်းကလေး၏ ကိုယ်ထည်လိုင်းများမှာမူ ရှုပ်ထွေးနေပြီး ပုံဖော်၍ မရနိုင်ပေ။

"အခြေခံအဆင့် ရောက်နေပြီပဲ မင်းရဲ့ ပါရမီက မဆိုးဘူးလို့ ပြောရမယ် မင်း ဝိညာဉ်သုတ်သင်ရေးဌာန ထဲ ရောက်တာ ဘယ်လောက်ကြာပြီလဲ"

မိန်းကလေးက အေးဆေးစွာ မေးသည်။

ဖန့်ချန်၏ မျက်နှာတွင် ဇဝေဇဝါ ဖြစ်သွားသည်။

"ဝိညာဉ်သုတ်သင်ရေးဌာန"

မိန်းကလေးက မျက်မှောင်ကြုတ်လိုက်သည်။

"မင်းပဲ ချင်ဘိုးဘေးကို ဖျောင်းဖျပေးဖို့ ငါ့ကို ခေါ်တာ မဟုတ်ဘူးလား ငါ စောစောက သူ့ကို ပြောနေတုန်းကလည်း မင်း ရှိနေတာပဲလေ"

ဖန့်ချန်၏ နှုတ်ခမ်းတွင် ခါးသီးသော အပြုံးတစ်ခု ပေါ်လာသည်။

နောက်ထပ် နတ်ဆိုးအဖိုးကြီး တစ်ယောက်နဲ့ တွေ့ပြန်ပြီပေါ့....

သူ၏ ဝိညာဉ်အာရုံကို လူသုံးယောက်သာ သိရှိနိုင်သည်။

ပထမတစ်ယောက်မှာ ပုဒု မသေမျိုး ဖြစ်ပြီး၊ ဒုတိယမှာ သစ်စိမ်းဂိုဏ်း ဘိုးဘေးဖြစ်ကာ၊ ယခု မိန်းကလေးမှာ တတိယမြောက် ဖြစ်သည်။

ဖန့်ချန်က မတ်တပ်ရပ်ကာ ရိုသေစွာဖြင့်

"စီနီယာ ကျွန်တော်က ဝိညာဉ်သုတ်သင်ရေးဌာနက ထာဝရ ကောင်းကင်ဘုရင် ပါ စီနီယာရဲ့ ဘွဲ့နာမကို သိခွင့်ရှိမလား"

"မင်းက တကယ် ပျင်းတာပဲ၊ နာမည်ကို အဲဒီလို ပေးထားရလား"

မိန်းကလေးက ဖြေသည်။

"ငါ့ဘွဲ့က ရှန်ကျီ ပဲ"

ဖန့်ချန် မျက်ခုံးပင့်လိုက်သည်။

"ရှန်ကျီ"

ချင်ဘိုးဘေးက သူမကို ရှန်ကျီဟု ခေါ်ခဲ့သည်။

သူမက သူမ၏ နာမည်ရင်းကိုပဲ သုံးနေတာလား

"ဟုတ်တယ်၊ ငါ့ရဲ့ နာမည်ရင်းကိုပဲ သုံးတာ"

မိန်းကလေးက ဖန့်ချန်၏ အတွေးကို သိနေသကဲ့သို့ ခေါင်းညိတ်ပြသည်။

"ချင်ဘိုးဘေးက ငါ့စကားကို နားမထောင်ဘူးဆိုတော့ ဒီစစ်ပွဲကတော့ ဖြစ်မှာပဲ သူက တစ်စုံတစ်ခုကို ယုံကြည်မှု ရှိနေပုံရတယ် မင်းက ဟိုမှာ နည်းနည်း ပိုကြာကြာနေခဲ့တာဆိုတော့ ဘာသတင်းတွေ ရခဲ့လဲ"

ဖန့်ချန်က ခေတ္တစဉ်းစားပြီးနောက် ချင်ဘိုးဘေးနှင့် နယ်စားမင်းတို့၏ စကားဝိုင်းကို အကုန် ပြန်ပြောပြလိုက်သည်။

"ဒီကိစ္စမှာ ကိုးဆက်မြောက်ဘုရင် ပါဝင်ပတ်သက်နေတယ်လို့ ကျွန်တော် ထင်တယ်"

ဖန့်ချန်က ဖြည့်စွက်ပြောလိုက်သည်။

ရှန်ကျီသည် အချိန်အတော်ကြာ စဉ်းစားနေပြီးနောက် တစ်စုံတစ်ခုကို နားလည်သွားဟန်ဖြင့် ခေါင်းညိတ်သည်။

"မင်း ထင်တာ မှန်တယ် ကိုးဆက်မြောက်ဘုရင်က ဒီကိစ္စမှာ ပါဝင်နေတာပဲ ဒါပေမဲ့ ဒါက သူ့ရဲ့ တိုက်ရိုက် ဆုံးဖြတ်ချက် မဟုတ်ဘဲ သူ့နန်းတော်ထဲက လူတချို့ရဲ့ လုပ်ရပ် ဖြစ်လိမ့်မယ်"

"သူတို့က လန်ယာမျိုးနွယ်စုရဲ့ အမွေအနှစ်ကို လိုချင်နေကြတာ ဖြစ်နိုင်တာက ရှေးဟောင်းကျင့်စဉ် တစ်ခုခုကို ဖော်ထုတ်ဖို့အတွက် အဲဒီအမွေအနှစ်က လိုအပ်နေလို့ပဲ"

"ငါ သိသလောက်တော့ ကိုးဆက်မြောက်ဘုရင်ရဲ့ ကိုးယောက်မြောက် သားတော်ဟာ တာအိုကျင့်စဉ်တွေကို လေ့လာရတာ အလွန်ဝါသနာပါတယ်"

"သူက တစ်ခါက သူ့လက်အောက်ငယ်သားတွေကို တာအိုတစ်ထောင်ဂိုဏ်း နဲ့ ပတ်သက်တဲ့ လျှို့ဝှက်ချက်တွေကို ရှာဖွေဖို့တောင် အမိန့်ပေးခဲ့ဖူးတယ်"

အခန်း ၆၀၆ - နတ်ဘုရားတာအိုဂိုဏ်း

ဖန့်ချန်၏ မျက်လုံးများ ချက်ချင်း တောက်ပသွားသည်။

"တာအိုတစ်ထောင်ဂိုဏ်း နဲ့ ပတ်သက်တာ ဟုတ်လား"

ဒါဟာ ကောင်းကင်လှည့်စားခြင်းကျင့်စဉ် နဲ့ ပတ်သက်နေတာများလား တကယ်လို့ ကိုးဆက်မြောက်ဘုရင်ရဲ့ ကိုးယောက်မြောက် သားတော်ကသာ ဒီကိစ္စရဲ့ နောက်ကွယ်မှာ ရှိနေတာဆိုရင်၊ သူဟာ လန်ယာမျိုးနွယ်စုရဲ့ တာအိုအမွေအနှစ်ကို သုံးပြီး ထူးခြားတဲ့ ကျင့်စဉ်တစ်ခုခုကို ဖော်ထုတ်ဖို့ ကြံစည်နေတာ ဖြစ်နိုင်ပါတယ်။

"ဒီကိစ္စက မင်းရဲ့ လက်ရှိ စွမ်းဆောင်ရည်နဲ့ ဝင်ရောက်စွက်ဖက်ဖို့ မဖြစ်နိုင်သေးဘူး ငါ ဒီကိစ္စကို ကိုင်တွယ်ဖို့ ဝိညာဉ်သုတ်သင်ရေးဌာနက တခြားလုပ်ဖော်ကိုင်ဖက် တစ်ယောက်ကို တာဝန်ပေးလိုက်မယ် စစ်ပွဲရဲ့ သက်ရောက်မှု အနည်းဆုံးဖြစ်အောင် ငါတို့ ကြိုးစားပေးမယ်"

နတ်ဘုရားမ ရှန်ကျီက ဆိုသည်။

"ဒါပေမဲ့ အဲဒီလူ ဒီကို ရောက်လာဖို့ အနည်းဆုံး ခြောက်လလောက်တော့ ကြာလိမ့်မယ် အဲဒီကာလအတွင်းမှာ အပြာရောင်တာအိုနယ်မြေကတော့ မငြိမ်မသက် ဖြစ်နေမှာပဲ မင်းလည်း မလိုလားအပ်တဲ့ ပြဿနာတွေထဲ မပါအောင် ဒီနေရာကနေ ထွက်သွားတာ အကောင်းဆုံးပဲ"

ဖန့်ချန် သက်ပြင်းတစ်ချက်ကို အသာအယာ ချလိုက်သည်။

ဝိညာဉ်သုတ်သင်ရေးဌာနက လုပ်ဖော်ကိုင်ဖက် တစ်ယောက်က လာရောက်ကိုင်တွယ်ပေးမည်ဆိုလျှင် စိတ်ချရပြီဖြစ်သည်။

ထိုသူသည်လည်း သေချာပေါက် အစွမ်းထက်သည့် ပုဂ္ဂိုလ်တစ်ဦး ဖြစ်ပေလိမ့်မည်။

"ငါ သွားတော့မယ် နှုတ်ဆက်ပါတယ်"

ရှန်ကျီက လှည့်ထွက်ရန် ပြင်လိုက်သည်။

ဖန့်ချန်က အလျင်အမြန် လက်အုပ်ချီ ဦးညွှတ်ကာ တားလိုက်သည်။

"စီနီယာ ရှန်ကျီ ကျွန်တော် နောက်ထပ် မေးခွန်းတစ်ခုလောက် မေးပါရစေ"

သူသည် ပုဒု မသေမျိုး ထံမှတစ်ဆင့် ဖန့်ထင်ယွမ် သည်လည်း ဝိညာဉ်သုတ်သင်ရေးဌာန၏ အဖွဲ့ဝင်တစ်ဦးဖြစ်ကြောင်း သိထားခဲ့သည်။

ရှန်ကျီသည်လည်း ဝိညာဉ်သုတ်သင်ရေးဌာနကပင် ဖြစ်သဖြင့် သူမသည် ယခင်က ပြောစမှတ်ပြုခဲ့ကြသော မိစ္ဆာမ ပင် ဖြစ်နိုင်ခြေရှိသည်။

"မင်းက ဖန့်ထင်ယွမ် အကြောင်းကို မေးချင်တာလား"

ဖန့်ချန်က ခေါင်းညိတ်ပြလိုက်သည်။

"ဟုတ်ပါတယ် စီနီယာ"

"သူကတော့ တကယ့်ကို လျှို့ဝှက်ဆန်းကြယ်တဲ့ လူတစ်ယောက်ပဲ"

ရှန်ကျီ၏ မျက်ဝန်းများထဲတွင် အတိတ်ကို ပြန်လည်အောက်မေ့သည့် အရိပ်အယောင်များ ဖြတ်ပြေးသွားသည်။

"ငါ သိသလောက်တော့ ဖန့်ထင်ယွမ်ဟာ သူ့ရဲ့ ကျင့်ကြံခြင်း အဆင့်အတန်းကို အလွယ်တကူ ဖျက်ဆီးခံမယ့်သူ မဟုတ်သလို၊ အလွယ်တကူ သေမယ့်သူလည်း မဟုတ်ဘူး"

"သူ သေချာပေါက် အသက်ရှင်နေဦးမှာပါ ဒါပေမဲ့ တစ်စုံတစ်ခုသော အကြောင်းပြချက်ကြောင့် သူက လူလုံးမပြချင်သေးတာ ဖြစ်လိမ့်မယ်"

"မင်း နတ်ဘုရားသန့်စင်သောမြေ မှာ စိတ်ဖောက်ပြန်ခဲ့တုန်းက မှတ်မိသေးလား အဲဒီတုန်းက ပြဿနာကို ဖြေရှင်းပေးခဲ့တာ သူပဲလို့ ငါ သံသယရှိမိတယ် နှမြောစရာကောင်းတာက အဲဒီအချိန်မှာ ငါ အဲဒီမှာ မရှိနေခဲ့တာပဲ"

သူမက ခပ်ဖွဖွ သက်ပြင်းချလိုက်ပြီးနောက် စကားလမ်းကြောင်းကို ပြောင်းလိုက်သည်။

"မင်း ဝိညာဉ်သွေးဂိုဏ်းက ကျင့်ကြံသူ တချို့ကို သိထားတယ် မဟုတ်လား သူတို့ကို ရှင်းပစ်ဖို့ ငါ့ကို ကူညီစေချင်လား"

ထိုစဉ်က နတ်ဘုရားသန့်စင်သောမြေတွင် ဖြစ်ပျက်ခဲ့သည့် ကိစ္စ....

ဖန့်ချန် အတော်လေး အံ့သြသွားသည်။

အကြီးအကဲ တစ်ယောက်က ဝင်ရောက်စွက်ဖက်ပြီး သူ့ရဲ့ သွေးစွန်းနေတဲ့ အသိစိတ်ကို နှိမ်နင်းပေးခဲ့တာကြောင့် သူ အသက်ဘေးက လွတ်ခဲ့တာကို နတ်သမီးယွီ ထံမှ သူ ကြားခဲ့ရဖူးသည်။

တကယ်လို့ ထိုအကြီးအကဲသာ မကူညီခဲ့ပါက ယခုအချိန်တွင် သူ ဘာဖြစ်နေမလဲဆိုသည်ကို သူ ကိုယ်တိုင်ပင် စိတ်မကူးရဲပေ။

ထိုအကြီးအကဲဆိုသည်မှာ ဖန့်မျိုးနွယ်စုရဲ့ ဘိုးဘေး ဖန့်ထင်ယွမ်များလား

ဒါပေမဲ့ ထိုအဆင့်ကို ရောက်ဖို့ဆိုလျှင် အနည်းဆုံး မသေမျိုး အဆင့် ရှိရပေမည်။

ဖန့်ထင်ယွမ်သည် လွန်ခဲ့သော နှစ်ပေါင်းလေးရာခန့်က ရွှေရောင်အမြုတေ အဆင့်သာ ရှိသေးသည်။

နှစ်ပေါင်းလေးရာအတွင်းမှာ မသေမျိုးအဆင့်ကို ရောက်သွားသည်ဆိုလျှင် ထိုကျင့်ကြံခြင်း အရှိန်အဟုန်မှာ ကြောက်ခမန်းလိလိပင်။

"ရပါတယ် စီနီယာ အဆင်ပြေသလိုပဲ ကိုင်တွယ်လိုက်ပါ "

ဖန့်ချန် အတွေးထဲမှ ပြန်ထွက်လာချိန်တွင် ရှန်ကျီမှာ အရိပ်အယောင်ပင် မကျန်တော့ဘဲ ပျောက်ကွယ်သွားပြီ ဖြစ်သည်။

ဖန့်ချန်သည် ခဏမျှ စဉ်းစားပြီးနောက် စကြဝဠာမှန် ကို ထုတ်ယူလိုက်သည်။

"မှန်ချပ် မင်း နတ်ဘုရားတာအိုဂိုဏ်း အကြောင်း ကြားဖူးလား ဒါကို ဖြေဖို့ မင်းကို ဝိညာဉ်ကျောက်တုံး ဘယ်လောက် ပေးရမလဲ"

"နတ်ဘုရားတာအိုဂိုဏ်းဆိုတာ ကံကြမ္မာနဲ့ သိပ်မသက်ဆိုင်လို့ ဝိညာဉ်ကျောက်တုံး ပေးစရာမလိုဘဲ တပည့်တွေကို မေးရင်တောင် သတင်းရနိုင်ပါတယ်"

စကြဝဠာမှန်က တုံ့ပြန်လိုက်သည်။

"နတ်ဘုရားတာအိုဂိုဏ်းဟာ အလယ်ပိုင်းတိုက်ကြီး အင်ပါယာရဲ့ အကြီးဆုံး ဂိုဏ်းကြီးငါးဂိုဏ်းထဲက တစ်ခုပဲ မင်း သိထားတဲ့ ဝိညာဉ်သွေးဂိုဏ်းကလည်း အဲဒီထဲမှာ ပါတယ်"

" နတ်ဘုရားတာအိုဂိုဏ်းကို အဓိက အင်အားစု လေးခုနဲ့ ဖွဲ့စည်းထားတယ် ဆင်စိမ်းဂိုဏ်း ၊ မဟာတာအို စာကြည့်တိုက် ၊ လင်ယွင် ဓားဂိုဏ်း နဲ့ နတ်ဘီလူးဂိုဏ်း တို့ပဲ "

"အင်အားစု လေးခု ဟုတ်လား"

ဖန့်ချန်သည် နတ်ဘီလူးဂိုဏ်း အကြောင်း ကြားလိုက်ရသဖြင့် အနည်းငယ် အံ့သြသွားသည်။

သူသည် ထိုဂိုဏ်းက တပည့်တစ်ယောက်ကို သတ်ခဲ့ဖူးရာ၊ ဆိုလိုသည်မှာ သူသည် နတ်ဘုရားတာအိုဂိုဏ်းဝင် တစ်ယောက်ကို သတ်ခဲ့မိခြင်းပင်။

"ဟုတ်တယ် အရင်တုန်းကဆိုရင်တော့ ကျန်းမျိုးနွယ်စု လည်း ပါတာပေါ့ ဒါမှမဟုတ် နတ်ဘုရားတာအိုဂိုဏ်းကို ကျန်းမျိုးနွယ်စုကပဲ စတင်တည်ထောင်ခဲ့တာလို့ ပြောလို့ရတယ်"

စကြဝဠာမှန်က ရှင်းပြသည်။

"ဒါပေမဲ့ ကျန်းမျိုးနွယ်စုက အင်အားချည့်နဲ့သွားပြီး ဂိုဏ်းကနေ ဖယ်ထုတ်ခံရတာ ကြာပါပြီ"

ဒါကြောင့်လည်း ရှန်ကျီက ကျန်းထျန်းအိုက် ကို သိနေပြီး နတ်ဘီလူးဂိုဏ်းနဲ့လည်း ပတ်သက်နေတာကိုး

"ဒါဆို ရှန်ကျီက နတ်ဘုရားတာအိုဂိုဏ်းမှာ ဘယ်လို အဆင့်အတန်းရှိလဲ"

"ဂိုဏ်းလေးခုရဲ့ အထူးချွန်ဆုံး တပည့်တွေဟာ စမ်းသပ်မှု အမျိုးမျိုးကို ဖြတ်ကျော်ရတယ် နောက်ဆုံးမှာ တစ်ယောက်တည်းကိုပဲ ရွေးချယ်ပြီး နတ်ဘုရားတာအိုဂိုဏ်းရဲ့ တကယ့် အနှစ်သာရ ကျင့်စဉ်တွေကို လက်ဆင့်ကမ်းပေးတယ်"

" အဲဒီလူက နောင်တစ်ချိန်မှာ ဂိုဏ်းရဲ့ ဘိုးဘေးအဆင့်အထိ ဖြစ်လာနိုင်တယ် ရှန်ကျီက အဲဒီလို ရွေးချယ်ခံရတဲ့ လူပဲ"

"ဒါပေမဲ့ ဒါက ဖြစ်နိုင်ခြေ တစ်ခုပဲ မျိုးဆက်တစ်ခုရဲ့ ရွေးချယ်ခံရသူတိုင်း အဲဒီအဆင့်ကို ရောက်မယ်လို့ အာမမခံနိုင်ဘူး"

"တကယ်တော့ လက်တွေ့မှာ အဲဒီအဆင့်ကို ရောက်တဲ့သူ အလွန်နည်းပါတယ် ကျင့်ကြံခြင်းဆိုတာ ခန့်မှန်းရခက်ပြီး မမျှော်လင့်တဲ့ အဖြစ်အပျက်တွေနဲ့ ပြည့်နှက်နေတာကိုး"

ထိုစဉ်မှာပင် အခန်းအပြင်ဘက်မှ အသံတစ်ခု ကြားလိုက်ရသည်။

"သခင်လေးဖန့် ဟဲပိုင်ယန် က တွေ့ခွင့်တောင်းနေပါတယ်"

ဟဲပိုင်ယန် ဟူသောအမည်ကို ကြားလိုက်ရသဖြင့် ဖန့်ချန်၏ စိတ်ထဲတွင် လှုပ်ရှားသွားသည်။

သူသည် စကြဝဠာမှန်ကို သိမ်းဆည်းလိုက်ပြီး အစေခံမိန်းကလေး နောက်သို့ လိုက်ကာ ဧည့်ခန်းသို့ ထွက်လာခဲ့သည်။

ဟဲပိုင်ယန့်သည် အချိန်အတော်ကြာ စောင့်ဆိုင်းနေပုံရသည်။

သူသည် ဖန့်ချန်ကို မြင်သည်နှင့် ရှေ့သို့ တိုးလာကာ နှုတ်ဆက်လိုက်သည်။

"တာအိုမိတ်ဆွေဖန့် ကျွန်တော် ခင်ဗျားရဲ့ လူနေမှုစရိုက်ကို အလျင်စလို အကဲဖြတ်မိခဲ့တယ် ကျွန်တော့်ရဲ့ မှားယွင်းတဲ့ အယူအဆတွေအတွက် ကျေးဇူးပြုပြီး ခွင့်လွှတ်ပေးပါ"

"ဘာကို ဆိုလိုတာလဲ တာအိုမိတ်ဆွေဟဲ"

ဖန့်ချန်က အံ့သြဟန်ဖြင့် မေးလိုက်သည်။

ဟဲပိုင်ယန့်၏ မျက်နှာမှာ အနည်းငယ် အနေရခက်ဟန် ရှိနေသည်။

"အစတုန်းကတော့ ကျွန်တော်ကလည်း တခြားသူတွေလိုပဲ ခင်ဗျားကို လူလိမ်တစ်ယောက်လို့ ထင်ခဲ့မိတာ အခုမှပဲ ခင်ဗျားမှာ သခင်လေးချင်ဖုန်းကို အသက်ဘေးက ကယ်နိုင်တဲ့ တကယ့် စွမ်းရည်ရှိမှန်း ကျွန်တော် သိလိုက်ရတော့တယ်"

"ဪ အဲဒီကိစ္စလား ဒါက စိတ်ထဲ ထည့်နေစရာ မလိုပါဘူး တာအိုမိတ်ဆွေ ကျွန်တော် ဂရုမစိုက်ပါဘူး"

ဖန့်ချန်က ခပ်ဖွဖွ ပြုံးလိုက်သည်။

"ဒါပေမဲ့ ကျွန်တော် တကယ်ကို ရှက်မိပါတယ် ဒါကြောင့် ဒီနေ့ ခင်ဗျားကို တောင်းပန်တဲ့အနေနဲ့ ထမင်းစားပွဲတစ်ခု ပြင်ဆင်ထားပါတယ် ခင်ဗျား ကြွရောက်ပေးမယ်လို့ ကျွန်တော် မျှော်လင့်ပါတယ်"

ဟဲပိုင်ယန့်က အားနာစွာဖြင့် ဖိတ်ကြားလာသည်။

ဖန့်ချန်က အစက ငြင်းပယ်ရန် စိတ်ကူးရှိသော်လည်း ချက်ချင်းပင် စိတ်ကူးပြောင်းသွားသည်။ သူက ခေါင်းညိတ်ပြလိုက်ကာ

"တောင်းပန်နေဖို့ မလိုပါဘူး တာအိုမိတ်ဆွေဟဲ ခင်ဗျားက သူမကို စိတ်ပူလို့ လုပ်ခဲ့တာပဲလေဒါပေမဲ့ ထမင်းစားပွဲ ပြင်ဆင်ထားတယ်ဆိုမှတော့ မတက်ရောက်ရင် မကောင်းပါဘူး"

ဖန့်ချန် သဘောတူသည်ကို မြင်သောအခါ ဟဲပိုင်ယန့်၏ မျက်နှာတွင် အပြုံးများ ဝေဆာသွားသည်။

သူတို့နှစ်ဦးသည် အပြင်သို့ ထွက်လာရင်း အေးအေးလူလူ စကားပြောလာခဲ့ကြသည်။

ထိုစဉ်မှာပင် လီတောက်ယဲ့သည် သူတို့ကို မြင်သွားပြီး စပ်စုချင်စိတ်ဖြင့် အနားသို့ ရောက်လာသည်။

လီတောက်ယဲ့ကို မြင်သောအခါ ဟဲပိုင်ယန့်က ပြုံးပြလိုက်ပြီး

"တာအိုမိတ်ဆွေလီ ကျွန်တော် တာအိုမိတ်ဆွေဖန့်ကို တောင်းပန်တဲ့အနေနဲ့ ထမင်းစားပွဲ လုပ်ပေးမလို့ပါ ခင်ဗျားလည်း လိုက်ခဲ့ပါဦး"

"ပြီးခဲ့တဲ့ ရက်တွေတုန်းက ကျွန်တော် ခင်ဗျားအပေါ်မှာလည်း မကောင်းတာတွေ လုပ်ခဲ့မိတဲ့အတွက် ခွင့်လွှတ်ပေးစေချင်ပါတယ်"

"စားစရာတွေ သောက်စရာတွေ အကောင်းစား ပါမှာလား ဒါဆိုရင်တော့ ကျွန်တော် သေချာပေါက် လိုက်ရမှာပေါ့ သွားကြစို့ သွားကြစို့"

လီတောက်ယဲ့က ရယ်မောရင်း ချက်ချင်း သဘောတူလိုက်သည်။

သူသည် အလကားရလျှင် ဘာမဆို လုပ်မည့်သူပင်

ဖန့်ချန်က သူ့ကို တစ်ချက်ကြည့်လိုက်ကာ နောက်မှလည်း ဒီလိုပဲ ပျော်နိုင်ပါစေဦးလို့ ဆုတောင်းပေးလိုက်မိသည်။

ဟဲပိုင်ယန့် ပြင်ဆင်ထားသော ထမင်းစားပွဲမှာ ချင်မျိုးနွယ်စု နေအိမ်နှင့် အနည်းငယ် ဝေးကွာသော နေရာတွင် ရှိသည့် အလွန်လှပပြီး ဆိတ်ငြိမ်သည့် ခြံဝင်းတစ်ခု ဖြစ်သည်။

အစေခံများမှာ ကောင်းမွန်သော စားဖွယ်စုံများကို သယ်ဆောင်ကာ အလုပ်ရှုပ်နေကြသည်။

လီတောက်ယဲ့၏ မျက်လုံးများမှာ ထိုဟင်းပွဲများကို မြင်သည်နှင့် တောက်ပသွားသည်။ ထိုအနံ့ကို ရုံဖြင့်ပင် သူ ဗိုက်ဆာလာလေပြီ။

"ဒါက ချင်းဖုန်း ခြံဝင်း လို့ ခေါ်တယ်အလယ်အလတ် နယ်ပယ်သုံးခုက ကျင့်ကြံသူ တစ်ယောက် တည်ထောင်ထားတာပါ"

"နေရာအသီးသီးက ရှားပါးတဲ့ စားဖွယ်တွေကို ဒီမှာ စုစည်းထားတာဖြစ်လို့ ကျွန်တော်တို့ အရေးကြီးတဲ့ ဧည့်သည်တွေကို ဧည့်ခံရင် ဒီမှာပဲ လုပ်လေ့ရှိတယ်"

ဟဲပိုင်ယန့်က ရှင်းပြရင်း သူတို့နှစ်ဦးကို ဝါးပင်လေးများဖြင့် ဝန်းရံထားသော သီးသန့် အခန်းတစ်ခုထဲသို့ ခေါ်ဆောင်သွားသည်။

"ကျွန်တော်တို့ သုံးယောက်တည်းလား"

လီတောက်ယဲ့ အနည်းငယ် အံ့သြသွားသည်။

ဟဲပိုင်ယန့်သည် ချင်မျိုးနွယ်စုက တခြားကျင့်ကြံသူတွေကိုလည်း ဖိတ်ထားလိမ့်မည်ဟု သူ ထင်ခဲ့ခြင်းဖြစ်သည်။

ဒါက တောင်းပန်တဲ့ပွဲဆိုတော့ သူ လူအများကြီး မဖိတ်ချင်တာ ဖြစ်မှာပေါ့ လီတောက်ယဲ့က သူ့ဘာသာ ကောက်ချက်ချလိုက်သည်။

"ထိုင်ကြပါဦး မကြာခင်မှာ အရေးကြီးတဲ့ ဧည့်သည်တစ်ယောက် ရောက်လာပါလိမ့်မယ် သူက မျိုးနွယ်စု ခေါင်းဆောင်ရဲ့ အယုံကြည်ရဆုံး လက်ရုံးတစ်ယောက်ပါ"

သူတို့ ထိုင်လိုက်သည်နှင့် ဟဲပိုင်ယန်က အစေခံကို လက်ဖက်ရည် တည်ခိုင်းလိုက်သည်။

"သခင်လေးဖန့် ဒီလူက ခင်ဗျားကို စည်းရုံးသိမ်းသွင်းဖို့ ကြိုးစားနေတာလား မသိဘူး"

လီတောက်ယဲ့က ဖန့်ချန်ထံသို့ လျှို့ဝှက် အသံလှိုင်း ပေးပို့လိုက်သည်။

ဖန့်ချန်က ပြုံးရုံသာ ပြုံးပြပြီး ဘာမှ ပြန်မပြောပေ။

ခဏအကြာတွင် အခန်းထဲသို့ ပုံရိပ်တစ်ခု ဖြည်းညှင်းစွာ လမ်းလျှောက်ဝင်လာသည်။

ထိုသူကား အခြားသူမဟုတ် ယွီလုံ ပင် ဖြစ်သည်။

ဖန့်ချန်ကို မြင်သောအခါ ယွီလုံ၏ မျက်နှာတွင် ပြုံးရွှင်သော အမူအရာ ပေါ်လာသည်။

ထို့အတူ ဖန့်ချန်ကလည်း သူ့ကို မြင်သည်နှင့် လှိုက်လှိုက်လှဲလှဲ ပြုံးပြလိုက်လေသည်။