အခန်း (၆၃၇-၆၃၈)
Vol. 64 Ch. 637-638
အခန်း ၆၃၇ - မတရားဘူး ဟုတ်လား
"ဟုတ်တယ်၊ ဟုတ်တယ် နတ်ဘီလူးဂိုဏ်းက မိတ်ဆွေတွေကိုပဲ တရားမျှတတဲ့ စကားပြောခိုင်းကြရအောင် ဒီပဋိပက္ခကို လန်ယာမျိုးနွယ်ကပဲ အရင်စခဲ့တာ သူတို့ဘက်က လျော်ကြေးပေးသင့်တာ မဟုတ်ဘူးလား"
ဟု ဝေမျိုးနွယ်စုမှ အကြီးအကဲကလည်း ဘေးကနေ ထောက်ခံအားပေးလိုက်သည်။
"ကြည့်ရတာ မင်းက ငါ့ရဲ့ အကြံပေးစကားကို နားမထောင်ချင်ဘူး ထင်တယ် ရှင်းကျိုး ကောင်းပြီလေ အုပ်ချုပ်ရေးမှူးတစ်ယောက်အနေနဲ့ ငါ့ရဲ့ ရပ်တည်ချက်က မလုံလောက်ဘူးဆိုရင်လည်း နတ်ဘီလူးဂိုဏ်းက မိတ်ဆွေတွေကိုပဲ ဆုံးဖြတ်ခိုင်းလိုက်ကြတာပေါ့"
ချီကျန့်က လန်ယာရှင်းကျိုးကို တစ်ချက်ကြည့်ကာ ပြောလိုက်သည်။
ကျန်းထျန်းအိုက်နှင့် ဖန့်ချန်တို့ ရင်းနှီးသည်ကို အားလုံး မြင်တွေ့ထားသော်လည်း ၎င်းမှာ ပုဂ္ဂိုလ်ရေးအရသာ ဖြစ်သည်ဟု သူတို့ ယူဆထားကြသည်။
ထိုကိစ္စမှာ အဆင့်မြင့် အင်အားစုများအကြား ထိပ်တိုက်တွေ့မှု ဖြစ်သဖြင့် ပုဂ္ဂိုလ်ရေး ခင်မင်မှုက အရေးပါလိမ့်မည်မဟုတ်ဟု သူတို့ ယုံကြည်နေကြသည်။
နတ်ဘီလူးဂိုဏ်းအနေဖြင့် ပုဂ္ဂိုလ်ရေး ခင်မင်မှုတစ်ခုအတွက်နှင့် နဝမမင်းသား၏ နန်းတော်ကို ရန်သူတော်ပြုလိမ့်မည်မဟုတ်ဟု သူတို့ အခိုင်အမာ ယုံကြည်နေခြင်းပင်။
"အစ်ကိုကြီးဖန့် ဒီလျော်ကြေးပေးရမယ့် အချက်တွေက တရားမျှတပြီး သင့်တော်တယ်လို့ ထင်လားဟင်"
ကျန်းထျန်းအိုက်က ရုတ်တရက် မေးလိုက်သည်။
တစ်ဝိုင်းလုံး မှင်တက်သွားကြသည်။
ချီကျန့်နှင့် အခြားသူများမှာမူ တစ်ဦးကိုတစ်ဦး ကြည့်ကာ မျက်နှာပျက်သွားကြသည်။
"ဒီလူက တကယ်တော့ ဘယ်သူလဲ"
"ငါလည်း မသိဘူး ဒါပေမဲ့ သူက တာအိုတစ်ထောင်ဂိုဏ်းက ကျင့်ကြံသူတစ်ယောက်နဲ့ တူတယ်"
"တာအိုတစ်ထောင်ဂိုဏ်း မဖြစ်နိုင်တာ"
သူတို့သည် စိတ်လှိုင်းဖြင့် အချင်းချင်း ဆက်သွယ်နေကြသည်။
ဖန့်ချန်၏ နောက်ခံကို သူတို့ အကဲမဖြတ်နိုင်သဖြင့် မျက်မှောင်ကြုတ်ကာ ဇဝေဇဝါ ဖြစ်နေကြသည်။
"သူက နတ်ဘီလူးဂိုဏ်းရဲ့ ကိုယ်စားလှယ်လား"
"သူ့ရဲ့ ကျင့်စဉ်အဆင့်က မမြင့်ဘူး ဒါပေမဲ့ သူကပဲ အဆုံးအဖြတ်ပေးနေတာဆိုတော့ ကျန်တဲ့လူတွေက သူ့ကို ဝန်းရံစောင့်ရှောက်ပေးဖို့ လိုက်လာတာပဲ ဖြစ်ရမယ်"
" ဝိညာဉ်ခွဲဖြာခြင်း၊ ပေါင်းစပ်ခြင်းအဆင့် တွေကတောင် သူ့နောက်မှာ ရှိနေတာဆိုတော့ သူဟာ နတ်ဘီလူးဂိုဏ်းမှာ အဆင့်အတန်း တစ်ခုခု ရှိရမယ်"
"သူက တိုက်ရိုက်မဆုံးဖြတ်ဘဲ လန်ယာမျိုးနွယ်က ခေါ်လာတဲ့ ဒီကျင့်ကြံသူဖန့်ကို တိုင်ပင်နေတယ် သူကများ လန်ယာမျိုးနွယ်ရဲ့ ဝှက်ဖဲလား"
လူအုပ်ကြီးမှာ မရေမရာ ဖြစ်နေကြပြီး စိုးရိမ်ပူပန်လာကြသည်။
ချင်မိသားစုဘက်မှ ရပ်တည်ခဲ့သော ခေါင်းဆောင်အချို့မှာမူ မသက်မသာ ဖြစ်လာကြပြီး ဖန့်ချန်၏ နောက်ခံကို တိတ်တဆိတ် စုံစမ်းရန် ကြိုးစားကြသော်လည်း မည်သည့်သတင်းအချက်အလက်မျှ မရရှိခဲ့ပေ။
လန်ယာဘိုးဘေးကြီး၏ မျက်နှာတွင် အပြုံးအရိပ်အယောင် ပေါ်လာသည်။
လန်ယာတာကျောက်နှင့် အခြားသူများမှာမူ ရင်ထဲတွင် ဝမ်းသာနေကြသော်လည်း အပြင်ပန်းတွင်မူ တည်ငြိမ်ဟန်ဆောင်ကာ ဘာမှမသိသလို နေနေကြသည်။
"မိန်ကလေးကျန်း ဒီလောက် အရေးကြီးတဲ့ ကိစ္စကို ဒီလိုမျိုး သက်ဆိုင်မှုမရှိတဲ့ လူတစ်ယောက်ကို တိုင်ပင်နေတာက သိပ်ပြီးတော့ မသင့်တော်ဘူးလို့ မထင်ဘူးလား"
ဖန့်ချန် ပြန်မဖြေနိုင်ခင်မှာပင် ချီကျန့်က ကြားဖြတ် ပြောလိုက်သည်။
"နတ်ဘီလူးဂိုဏ်းက ဘယ်သူ့ကို တိုင်ပင်ရမယ်ဆိုတာကို အပြာရောင်တာအိုနယ်မြေရဲ့ စည်းမျဉ်းတွေနဲ့ ကန့်သတ်ထားရမှာလား ကျွန်မက ဆရာ့ရဲ့ အမိန့်နဲ့ ဒီကို လာခဲ့တာဆိုပေမဲ့ ကျွန်မ စိတ်ကြိုက် ဆောင်ရွက်နိုင်တယ်လို့ ဆရာက မှာထားပါတယ်"
ကျန်းထျန်းအိုက်က မျက်မှောင်ကြုတ်ကာ ပြန်ပြောလိုက်သည်။
ချီကျန့်မှာ အံ့အားသင့်သွားပြီး အခြား နတ်ဘီလူးဂိုဏ်းဝင်များကို လှမ်းကြည့်လိုက်သည်။
သူတို့အားလုံးမှာ ဝိညာဉ်ခွဲဖြာခြင်း သို့မဟုတ် ပေါင်းစပ်ခြင်းအဆင့် ကျင့်ကြံသူများ ဖြစ်ကြသဖြင့် တစ်ခုခု ပြောလိမ့်မည်ဟု သူ မျှော်လင့်ထားခြင်း ဖြစ်သည်။
သို့သော်လည်း သူတို့က ချီကျန့်၏ အကြည့်ကို လျစ်လျူရှုထားကြသည်။
သူတို့ထဲမှ တစ်ဦးက ခပ်တိုးတိုး ပြောလိုက်သည်
"ကျွန်တော်တို့က ထျန်းအိုက် အပြင်ထွက်တဲ့အခါ အဖော်လိုက်ပေးရုံ သက်သက်ပါ သူမ သင့်တော်သလို ဆောင်ရွက်ပါလိမ့်မယ်"
" သူမရဲ့ လုံခြုံရေးကိစ္စကလွဲလို့ ကျန်တာတွေကို ကျွန်တော်တို့ ဝင်မစွက်ဖက်နိုင်ပါဘူး ဒါကို နားလည်ပေးဖို့ မျှော်လင့်ပါတယ် အုပ်ချုပ်ရေးမှူးချီ"
ချီကျန့်၏ မျက်နှာထားမှာ ထူးဆန်းသွားပြီး
"နားလည်ပါပြီ..."
ဟု ဆိုကာ ခေါင်းညိတ်လိုက်ရတော့သည်။
'သူမရဲ့ အဆင့်အတန်းက နတ်ဘီလူးဂိုဏ်းမှာ ဒီလောက်အထိ မြင့်တာလား'
ဟု လန်ယာဝင်ချိုးက စိတ်ထဲတွင် အံ့ဩနေမိသည်။
နတ်ဘီလူးဂိုဏ်းသည် ဟင်းလင်းပြင်ထာဝရဓားဂိုဏ်းနှင့် ယှဉ်လျှင် အများကြီး နိမ့်ကျသည်ဟု သူမ ယုံကြည်ထားသော်လည်း၊ ဓားဂိုဏ်းတွင်ပင် ကျန်းထျန်းအိုက် ရရှိထားသော အခွင့်အရေးမျိုး ရသူ မရှိပေ။
"အစ်ကိုကြီးဖန့် ချင်မိသားစုက တောင်းဆိုထားတဲ့ အချက်တွေရဲ့ တရားမျှတမှုအပေါ် သခင်လေး ဘယ်လို ထင်သလဲဟင်"
ကျန်းထျန်းအိုက်က ထပ်မေးလိုက်သည်။
လူအုပ်ကြီး၏ အကြည့်များမှာ ဖန့်ချန်ထံသို့ စုပြုံရောက်ရှိသွားသည်။
အချို့က ထိတ်လန့်နေကြပြီး အချို့ကမူ အလေးအနက် စောင့်ကြည့်နေကြသည်။
"ဒါပေါ့... အဲ့ဒါတွေက သိပ်ပြီး တရားမျှတမှု မရှိဘူးလေ"
ဟု ဖန့်ချန်က ပြောလိုက်သည်။
ကျန်းထျန်းအိုက်က ခေါင်းကို အနည်းငယ် ညိတ်လိုက်ပြီး
"ကျွန်မလည်း အဲ့ဒီလိုပဲ ထင်တယ် ဒါဆိုရင် ကျွန်မတို့ ဘာလုပ်သင့်တယ်လို့ အစ်ကိုကြီး အကြံပေးချင်လဲ"
ချင်မိသားစုခေါင်းဆောင်၏ မျက်နှာမှာ အတော်လေး ပျက်သွားသည်။
သူက ချီကျန့်ကို လှမ်းကြည့်လိုက်သော်လည်း ချီကျန့်မှာလည်း ထိုအခြေအနေကို မည်သို့ကိုင်တွယ်ရမည်ကို အလေးအနက် စဉ်းစားနေပုံရသည်။
"လက်ရှိ အခြေအနေအရဆိုရင် ဆွေးနွေးပွဲ မတိုင်ခင်အထိ လန်ယာမျိုးနွယ်စုက ချင်မိသားစုကို အပြတ်အသတ် အနိုင်ရထားတာပါ ဆွေးနွေးပွဲ လုပ်မယ်ဆိုရင်တောင် အားနည်းတဲ့ဘက်ကပဲ အားသာတဲ့ဘက်ကို လျော်ကြေးပေးရမှာ မဟုတ်လား"
ဖန့်ချန်က ပြုံးလျက် ပြောလိုက်သည်။
သူက ဆက်ပြောသည်
"ကျွန်တော့်အမြင်အရဆိုရင် ချင်မိသားစုက လန်ယာမျိုးနွယ်ကို သူတို့ နယ်မြေရဲ့ သုံးပုံနှစ်ပုံ ပေးအပ်သင့်ပြီး၊ အလယ်အလတ်အဆင့် ဝိညာဉ်ကျောက်တုံး ၂,၀၀၀ နဲ့ အဆင့်နိမ့် ဝိညာဉ်ကျောက်တုံး ၄၀၀,၀၀၀ ကို လျော်ကြေးပေးသင့်ပါတယ် သူတို့ရဲ့ တာအိုအမွေအနှစ်ကိုတော့ လန်ယာမျိုးနွယ်က စိတ်ဝင်စားပုံ မရပါဘူး"
လန်ယာမျိုးနွယ်စုမှ ကျင့်ကြံသူများသည် ထိုစကားကို ကြားသောအခါ ဝမ်းသာအားရ ဖြစ်သွားကြသည်။
လန်ယာရှင်းကျိုးကလည်း ပြုံးလျက် ခေါင်းညိတ်လိုက်သည်
"မှန်ပါတယ် သူတို့ရဲ့ တာအိုအမွေအနှစ်ကို ငါတို့ စိတ်မဝင်စားပါဘူး"
လန်ယာတာကျောက်နှင့် သူ၏ဇနီးတို့၏ မျက်လုံးများမှာ အရောင်တောက်သွားပြီး ဖန့်ချန်ကို ကြည့်ကာ အလွန်ပင် ကျေနပ်နေကြသည်။
'သိပ်ကို လိမ်မာတဲ့ ကလေးလေးပဲ'
'တော်သေးတာပေါ့ အစ်ကိုကြီးဖန့်ကို ခေါ်လာမိလို့ မဟုတ်ရင် ဒီနေ့တော့ ငါတို့မျိုးနွယ်စု ဒုက္ခရောက်မှာ အမှန်ပဲ'
ဟု လန်ယာဝင်ချိုးက တွေးကာ ဖန့်ချန်က သူမမိသားစုဘက်မှ ရပ်တည်ပေးနေသည်ကို မြင်ရသဖြင့် ဝမ်းသာပီတိ ဖြစ်နေမိသည်။
အဓိက မျိုးနွယ်စု ခေါင်းဆောင်များသည် တစ်ဦးကိုတစ်ဦး ကြည့်ကာ ဇဝေဇဝါ ဖြစ်နေကြပြီး၊ အခြေအနေက မည်သည့်ဘက်သို့ ဦးတည်မည်ကို မသိနိုင်သေးသဖြင့် နှုတ်ဆိတ်နေရန်သာ ဆုံးဖြတ်လိုက်ကြသည်။
ချင်ဘိုးဘေးကြီး၏ မျက်နှာမှာ မည်းမှောင်သွားပြီး ဖန့်ချန်ကို စိုက်ကြည့်လိုက်သည်။
သူ စကားမပြောနိုင်ခင်မှာပင် အသံတစ်ခု ကြားဖြတ်ထွက်ပေါ်လာသည်
"တာအိုမိတ်ဆွေဖန့် ကျွန်တော် မှတ်မိသလောက်ဆိုရင် ခင်ဗျားက ချင်မိသားစုရဲ့ ဂုဏ်ထူးဆောင် ဧည့်သည်တော်တစ်ယောက် မဟုတ်လား အခုကျမှ ဘာလို့ လန်ယာမျိုးနွယ်စုနဲ့ ဒီလောက်တောင် ရင်းနှီးသွားရတာလဲ"
ချင်မိသားစုရဲ့ ဂုဏ်ထူးဆောင် ဧည့်သည်တော်
ဤစကားကြောင့် လူအုပ်ကြီးမှာ ရုတ်ရုတ်သဲသဲ ဖြစ်သွားသည်။
"ချီဖာ... ဒါ မင်းစကားပြောရမယ့် နေရာမဟုတ်ဘူး"
ဟု ချီကျန့်က သူ့သားကို ဟန့်တားလိုက်သည်။
လူတိုင်း၏ အာရုံမှာ ချီဖာထံသို့ ရောက်သွားသော်လည်း သူက အပြစ်ကင်းစင်သော အပြုံးဖြင့် ပြန်ဖြေသည်
"အဖေ ကျွန်တော်က နှောင့်ယှက်ချင်လို့ မဟုတ်ပါဘူး တာအိုမိတ်ဆွေဖန့်က တစ်ခါတလေ ချင်မိသားစုရဲ့ ဧည့်သည်ဖြစ်လိုက်၊ အခုကျတော့ လန်ယာမျိုးနွယ်စုနဲ့ ရင်းနှီးနေလိုက်ဆိုတော့ သိချင်ရုံ သက်သက်ပါ"
လန်ယာမျိုးနွယ်ဝင်များကလည်း ဖန့်ချန်ကို စူးစမ်းလိုစိတ်၊ သံသယစိတ်များဖြင့် ကြည့်လိုက်ကြသည်။
"ဟုတ်တယ် ကျွန်တော်လည်း သူ့ကို ချင်နန်းတော်မှာ တွေ့ခဲ့ဖူးတယ်"
ဟု ချင်မိသားစုမှ တစ်ဦးက ထပ်လောင်း ပြောလိုက်သည်။
"သခင်မချူလန်က သူ့ကို ဖိတ်ခဲ့တာလေ"
ဟု နောက်တစ်ဦးက ဆိုသည်။
လန်ယာဝင်ချိုးက အံ့ဩတကြီးဖြင့်
"စီနီယာအစ်ကိုကြီး... အစ်ကိုကြီးက ချင်မိသားစုနဲ့ ပတ်သက်မှု ရှိနေတာလား"
ဟု မေးလိုက်သည်။
"ဟုတ်တယ် သခင်မချူနဲ့ ကျွန်တော် သိကျွမ်းပါတယ်"
ဟု ဖန့်ချန်က ပြုံးလျက် အတည်ပြုလိုက်သည်။
ဖန့်ချန်သည် အင်အားစု အသီးသီးအကြား ကူးလူးဆက်ဆံနေသူ ဖြစ်နိုင်သည်ကို သိလိုက်ရသောအခါ လူအုပ်၏ မျက်နှာထားများမှာ ထူးဆန်းသွားကြသည်။
ချူလန်၏ မျက်လုံးများတွင် နားမလည်နိုင်မှုများ ရှိနေသော်လည်း ချင်မိသားစုခေါင်းဆောင်မှာမူ မျက်မှောင်ကြုတ်ကာ စဉ်းစားနေသည်။
"တာအိုမိတ်ဆွေဖန့် ခင်ဗျားက သခင်မချူနဲ့ ပတ်သက်မှု ရှိနေရက်နဲ့ အခု လန်ယာမျိုးနွယ်ဘက်ကနေ ကာကွယ်ပြောဆိုနေတာက ကိုယ်ကျင့်တရားပိုင်းအရ ကြည့်ရင်တော့ မေးခွန်းထုတ်စရာ ဖြစ်နေပြီနော်"
ဟု ချီဖာက ပြုံးလျက် ပြောလိုက်သည်။
ဖန့်ချန်က ခပ်ဖွဖွ ရယ်မောလိုက်ပြီး
"ကိုယ်ကျင့်တရား လန်ယာဝင်ချိုးက ကျွန်တော့်ရဲ့ ဂျူနီယာညီမလေးပါ ကျွန်တော်က သူမဘက်ကနေ စကားမပြောပေးဘဲ ခင်ဗျားဘက်ကနေ စကားပြောပေးရမှာလား သခင်လေးချီဖာ"
"ဟုတ်တယ် စီနီယာအစ်ကိုကြီးဖန့်က ဟင်းလင်းပြင်ထာဝရဓားဂိုဏ်းရဲ့ အစွန်းဆုံးဓားတောင်က တပည့်တစ်ယောက်ဖြစ်သလို အကြီးအကဲတွေရဲ့ အလေးပေးခြင်းကို ခံရတဲ့သူပါ သူက ကျွန်မဘက်ကနေ ပြောပေးရမှာပေါ့ ရှင်တို့ဘက်က ပြောပေးစရာလား"
လန်ယာဝင်ချိုးက ချက်ချင်းပင် တုံ့ပြန်လိုက်သည်။
တစ်ဝိုင်းလုံးမှာ တုန်လှုပ်မှုများနှင့်အတူ လေထုမှာ တင်းမာသွားတော့သည်။
သူကလည်း ထာဝရဓားဂိုဏ်းက တပည့်တစ်ယောက်လား
ထိုအချိန်တွင်မှ ချူလန်သည် ဖန့်ချန် ဘာကြောင့် ဓားကျင့်ကြံသူတစ်ဦး ဖြစ်နေရသည်ကို သဘောပေါက်သွားသည်
'ဒါကြောင့်ကိုး...'
ဟင်းလင်းပြင်ထာဝရဓားဂိုဏ်းသည် ဖန့်ချန်၏ တကယ့် ကျောထောက်နောက်ခံ ဖြစ်နေမှန်း သူမ သိလိုက်ရသည်။
ချင်မိသားစုခေါင်းဆောင်မှာ သိသိသာသာ အံ့ဩသွားသည်
"သူက ထာဝရဓားဂိုဏ်းက တပည့် ဖြစ်နေလိမ့်မယ်လို့ မထင်ထားခဲ့ဘူး"
သူက ချူလန်ထံသို့ စိတ်လှိုင်းဖြင့် မေးလိုက်သည်
"သူ့ရဲ့ အထောက်အထားကို ကြိုသိထားလား ဘာလို့ ငါတို့ကို အကြောင်းမကြားခဲ့တာလဲ"
"ကျွန်မလည်း လုံးဝ မသိခဲ့ဘူး အခုမှပဲ သိရတာပါ"
ဟု ချူလန်က ပြန်ဖြေလိုက်သည်။
ချင်မိသားစုခေါင်းဆောင်မှာ မသက်မသာ ဖြစ်နေသော်လည်း ဝေမျိုးနွယ်စု ခေါင်းဆောင်ကမူ အခြေအနေများ ဆိုးဝါးလာပြီဟု တွေးနေမိသည်။
ထာဝရဓားဂိုဏ်းမှ နောက်ထပ် တပည့်တစ်ဦး ရောက်နေသည့်အပြင် နတ်ဘီလူးဂိုဏ်းကပါ ဘက်လိုက်နေသဖြင့် သူတို့အတွက် အခြေအနေမှာ အလွန်ပင် မကောင်းတော့ပေ။
အခန်း ၆၃၈ - မျက်နှာဖုံးကို ခွာချခြင်း
ချီဖာ၏ မျက်နှာမှာ တောင့်တင်းသွားပြီး အလွန်ပင် အရှက်ရသွားဟန် ပေါ်သည်။
ဒီလောက်အချိန်အကြာကြီးမှ တစ်ဖက်လူကလည်း ဟင်းလင်းပြင်ထာဝရဓားဂိုဏ်းရဲ့ တပည့်တစ်ယောက် ဖြစ်နေတာလား။
သူသည် ထိုအခွင့်အရေးကို အသုံးချပြီး တစ်ဖက်လူကို နောက်ဆုတ်သွားအောင် သို့မဟုတ် လန်ယာမျိုးနွယ်စုကို ကူညီလျှင်ပင် သိသိသာသာကြီး မလုပ်ရန် တားဆီးဖို့ ကြံရွယ်ခဲ့ခြင်း ဖြစ်သည်။
သို့သော် တစ်ဖက်လူက သူ၏ နောက်ခံကို ဤမျှ ပွင့်လင်းစွာ ချပြလိမ့်မည်ဟု သူ မထင်ထားခဲ့ပေ။
ချင်ဘိုးဘေးကြီးက ရုတ်တရက် နှာခေါင်းရှုံ့ကာ အေးစက်စွာ ပြောလိုက်သည်
"သူက ဓားဂိုဏ်းက ဖြစ်နေတော့ရော ဘာဖြစ်လဲ"
သူက ဆက်ပြောသည်
"ဟင်းလင်းပြင်ထာဝရဓားဂိုဏ်းက တပည့်တစ်ယောက်က နယ်မြေတစ်ခုလုံးရဲ့ ပဋိပက္ခ ရလဒ်ကို ဆုံးဖြတ်နိုင်လို့လား အလယ်ပိုင်းတိုက်ကြီးရဲ့ စည်းမျဉ်းတွေက အကြာကြီးကတည်းက ရှိနေခဲ့တာပါ လန်ယာမျိုးနွယ်ကပဲ အရင်ပြဿနာရှာခဲ့တာဖြစ်လို့ သူတို့ပဲ တာဝန်ယူရမယ်"
ထို့နောက် သူက ကျန်းထျန်းအိုက်ကို လှည့်ကြည့်ကာ
"မိန်းကလေးကျန်း ဆုံးဖြတ်ချက် မချခင်မှာ နတ်ဘီလူးဂိုဏ်းက အကြီးအကဲတွေကို အရင်မတိုင်ပင်သင့်ဘူးလား အကြီးအကဲတွေကမှ တရားမျှတတဲ့ ဆုံးဖြတ်ချက်ကို ပေးနိုင်မှာဖြစ်သလို နတ်ဘီလူးဂိုဏ်းရဲ့ ဂုဏ်သိက္ခာကိုလည်း ထိခိုက်မှုမရှိအောင် ကာကွယ်ပေးနိုင်မှာပါ"
သူ၏ စကားလုံးများမှာ ကျန်းထျန်းအိုက်ကို သတိပေးနေခြင်း ဖြစ်သည်။
အကယ်၍ သူမက မဆင်မခြင် ဆောင်ရွက်ပါက နတ်ဘီလူးဂိုဏ်း၏ နာမည်ကို ပုပ်ခတ်အောင် လုပ်ရာရောက်လိမ့်မည်ဟု ခြိမ်းခြောက်လိုက်ခြင်းပင်။
"စီနီယာချင် ဒါက တစ်ခုခုတော့ မှားနေပြီ မဟုတ်လား"
ဖန့်ချန်က နားမလည်ဟန်ဖြင့် ပြောလိုက်သည်
"ကျွန်တော် မှတ်မိသလောက်ဆိုရင် အဲ့ဒီတုန်းက ခင်ဗျားတို့က လန်ယာယွီကို ဖမ်းဆီးခဲ့တယ် သူမက နေမင်းအသီးကို မစားခဲ့ဘူးလို့ ဝန်ခံခဲ့ပေမဲ့ နောက်ထပ် စကားမပြောနိုင်ခင်မှာပဲ ခင်ဗျားက သူမကို လက်ဝါးချက်တစ်ချက်နဲ့ သတ်ပစ်လိုက်တယ်"
ဖန့်ချန်က ခေတ္တရပ်လိုက်ပြီး
"ဒါ့အပြင် ကျွန်တော်ကိုယ်တိုင်လည်း သခင်မချူလန်အတွက် နေမင်းအသီးတစ်လုံးကို ရှာပေးခဲ့သေးတယ် ဘယ်လို နားလည်မှုလွဲတာမျိုးပဲ ဖြစ်ဖြစ် နောက်ထပ် ပဋိပက္ခ ဖြစ်စရာ အကြောင်းမရှိတော့ဘူး"
"တကယ်လို့ အငြင်းပွားစရာ ရှိနေသေးတယ်ဆိုရင်လည်း လန်ယာမျိုးနွယ်က စတာလား ချင်မိသားစုက စတာလားဆိုတာကို ဟင်းလင်းပြင်ထာဝရဓားဂိုဏ်းက တရားမျှတစွာ ဆုံးဖြတ်ပေးနိုင်လိမ့်မယ်လို့ ကျွန်တော် ယုံကြည်ပါတယ်"
လန်ယာမျိုးနွယ်ဝင်များ၏ မျက်နှာထားများ ချက်ချင်း ပြောင်းလဲသွားသည်
"ဘာ လန်ယာယွီက ချင်မိသားစုလက်ထဲမှာ သေသွားတာလား အဲ့ဒါကြောင့် ငါတို့ သူမကို ရှာမတွေ့တာကိုး"
လန်ယာရှင်းကျိုးက ချင်ဘိုးဘေးကို စူးစိုက်ကြည့်ကာ ဖန့်ချန်ကို မေးလိုက်သည်
"မိတ်ဆွေဖန့် မိတ်ဆွေက သူတို့အတွက် နေမင်းအသီး နောက်တစ်လုံး ရှာပေးခဲ့တယ် ဟုတ်လား"
ဖန့်ချန်က ခပ်ဖွဖွ ခေါင်းညိတ်ပြသည်
"ဟုတ်ပါတယ် ဒါပေမဲ့ အဲ့ဒါက ချင်မိသားစု ပျောက်ဆုံးသွားတဲ့ အသီး ဟုတ်မဟုတ်တော့ ကျွန်တော် မသေချာဘူး"
"အစ်ကိုချင် ဒါက မတရားလွန်းဘူး မဟုတ်လား မင်းမှာ နေမင်းအသီး ရှိနေပြီဆိုရင် ငါတို့နဲ့ ဒီစစ်ပွဲကို ဘာလို့ ဆက်တိုက်နေရဦးမှာလဲ"
လန်ယာရှင်းကျိုးက အေးစက်စွာ ပြောလိုက်သည်။
လူအုပ်ကြီးမှာ ဇဝေဇဝါ ဖြစ်လာကြသည်။
မျိုးနွယ်စု ခေါင်းဆောင်အားလုံးမှာ အကြောင်းစုံကို မသိကြသဖြင့် ယခုအခါတွင် ချင်မိသားစုနှင့် လန်ယာမျိုးနွယ်စုအကြား ပဋိပက္ခမှာ တကယ်ပင် နေမင်းအသီးကြောင့်လား၊ သို့မဟုတ် အခြား အကြောင်းအရင်းများ ရှိနေသလားဟု သံသယ ဝင်လာကြသည်။
ချင်ဘိုးဘေးကြီးသည် ဖန့်ချန်ကို ဖြည်းဖြည်းချင်း လှည့်ကြည့်လိုက်သည်။
ခေတ္တမျှ တိတ်ဆိတ်သွားပြီးနောက် လူတိုင်းက သူ မည်သို့ ရှင်းပြမည်နည်းဟု စောင့်ကြည့်နေစဉ် သူက ရုတ်တရက် ရယ်မောလိုက်သည်
"မိတ်ဆွေဖန့်ရဲ့ ကျင့်စဉ်အဆင့်က နိမ့်လွန်းနေလို့ နေမင်းအသီးကို သေချာ မခွဲခြားနိုင်ခဲ့တာပါ မိတ်ဆွေ ရှာပေးတဲ့အသီးက တကယ့် နေမင်းအသီး မဟုတ်ပါဘူး"
သူက ပြုံးလျက်
"ငါက ငါ့ရဲ့ မြေးတွေကို မိတ်ဆွေ ကူညီပေးနေလို့ လိုက်လျောပေးခဲ့ရုံပါ မိတ်ဆွေ ကတော့ နားလည်မှု လွဲသွားပုံရတယ်"
"ဟုတ်တယ် သူက ရွှေအမြုတေအဆင့်ပဲ ရှိသေးတာ နေမင်းအသီးကို ဘယ်လိုလုပ် မှတ်မိမှာလဲ"
ဝေဘိုးဘေးကြီးကလည်း ချက်ချင်းပင် ပြုံးလျက် ထောက်ခံလိုက်သည်
"မင်းက အစ်ကိုချင်ရဲ့ စေတနာကို နားမလည်ဘဲ နားလည်မှု လွဲနေတာပါ"
"မှန်ပါတယ် နေမင်းအသီးလို ရှားပါးပစ္စည်းမျိုးက အပြာရောင်တာအိုနယ်မြေမှာ အရမ်း ရှားပါတယ် ဂိုဏ်းချုပ်ကိုယ်တိုင်တောင် ဝယ်ဖို့ လမ်းကြောင်း မရှိပါဘူး"
ချီကျန့်က ခေါင်းညိတ်ပြသည်
"ကျွန်တော်ကိုယ်တိုင်တောင် တစ်ခါတလေဆိုရင် မှတ်မိဖို့ မလွယ်ဘူး"
ဖန့်ချန်က ခပ်ဖွဖွ ပြုံးလိုက်ပြီး
"ခင်ဗျားတို့ကတော့ အဓိပ္ပာယ်မရှိတာတွေ ပြောနေကြတာပဲ"
လန်ယာရှင်းကျိုးက ချင်ဘိုးဘေးကို အေးစက်စွာ ကြည့်လိုက်ပြီး
"တကယ်လို့ ငါ အခု နေမင်းအသီးတစ်လုံး ရှာပေးလိုက်မယ်ဆိုရင် မင်း ဘာလုပ်မလဲ"
"ဒါဆိုရင်တော့ ငါ ဘာမှပြောစရာ မရှိတော့ဘူးတကယ်လို့ မင်း ရှာပေးနိုင်ရင် ဒီကိစ္စကို နားလည်မှုလွဲတာလို့ပဲ သတ်မှတ်ပေးမယ်"
ချင်ဘေးဘေးက အေးစက်စွာ ပြန်ဖြေသည်။
"နားလည်မှုလွဲတာ နားလည်မှုလွဲရင် ဖြေရှင်းရမယ် ငါတို့က ဒီမှာ ဆွေးနွေးဖို့ လာတာဆိုတော့ အဖြေတစ်ခု ရှိရမယ် ဒါကြောင့် ငါ့ကို နေမင်းအသီး ရှာဖို့ အချိန်ပေးပါ အဲ့ဒီအချိန်အတွင်းမှာတော့ ငါတို့က အရင်လိုပဲ ပြင်းပြင်းထန်ထန် ဆက်တိုက်ကြတာပေါ့"
လန်ယာရှင်းကျိုးက အေးစက်သော အပြုံးဖြင့် ပြောလိုက်ပြီး ယခင်က သူတို့ဘက်မှ ပါဝင်ခဲ့ဖူးသော မဟာမိတ်ဟောင်းများကို အကြည့်ဖြင့် ဝေ့ကြည့်လိုက်သည်။
ယခုအခါ ထို မဟာမိတ်ဟောင်း များမှာ မည်သည့်ဘက်မှ ရပ်တည်ရမည်ကို ဆုံးဖြတ်ရတော့မည် ဖြစ်သည်။
ချင်ဘိုးဘေးကြီး၏ မျက်လုံးများမှာ အရောင်တောက်သွားသည်
"ဆက်တိုက်မယ် ဟုတ်လား..."
"မဖြစ်နိုင်ဘူး ဒီနေ့မှာတင် အဖြေတစ်ခု ထွက်ရမယ်"
ချီကျန့်က လန်ယာရှင်းကျိုးကို ကြည့်ကာ အလေးအနက် ပြောလိုက်သည်
"တကယ်လို့ မင်းက နေမင်းအသီးကို ဆယ်နှစ်အနှစ်တစ်ရာလောက် ကြာအောင် ရှာမတွေ့ရင် စစ်ပွဲက အမြဲတမ်း ဆက်ဖြစ်နေမှာလား အပြာရောင်တာအိုနယ်မြေက လူသားတွေရဲ့ အသက်ကိုရော မင်း မငဲ့ဘူးလား"
သူက ကျန်းထျန်းအိုက်ဘက် လှည့်လိုက်ပြီး
"မိန်းကလေးကျန်း အခြေအနေက ဘယ်လိုပဲဖြစ်ဖြစ် လန်ယာမျိုးနွယ်က အမှားလုပ်ခဲ့တာပါမိန်းကလေး ဒီကို ရောက်လာတာဆိုတော့ မိန်းကလေးရဲ့ ဆရာက တစ်ခုခု မှာကြားလိုက်တာမျိုး ရှိမှာပေါ့ မဟုတ်ဘူးလား"
'မိန်းကလေးထျန်းအိုက် ဒီကိစ္စရဲ့ နောက်ကွယ်မှာ နဝမမင်းသားရဲ့ အရိပ်အယောင်တွေ ရှိနေပုံရတယ် နောက်ထပ် ပြဿနာတွေ မဖြစ်အောင် ရှောင်တာက ပိုကောင်းလိမ့်မယ်'
ဟု နတ်ဘီလူးဂိုဏ်းမှ အမျိုးသမီးကျင့်ကြံသူတစ်ဦးက စိတ်လှိုင်းဖြင့် သတိပေးလိုက်သည်။
ကျန်းထျန်းအိုက်က ခေတ္တမျှ စဉ်းစားပြီးနောက် တည်ငြိမ်စွာ ပြန်ပြောလိုက်သည်
"လက်ရှိ အခြေအနေအရ ကြည့်ရင် လန်ယာမျိုးနွယ်က အသာစီး ရနေတာကို မြင်နေရတာပဲ အုပ်ချုပ်ရေးမှူးသာ ကြားဝင်မပါခဲ့ရင် ချင်မိသားစုက အခုလောက်ဆိုရင် အပြတ်အသတ် ရှုံးနိမ့်နေလောက်ပြီ"
"ဆွေးနွေးပွဲ လုပ်တာဖြစ်လို့ လက်ရှိ အခြေအနေအပေါ်မှာပဲ မူတည်ပြီး ဆွေးနွေးရမှာပါ အခုက လန်ယာမျိုးနွယ်က ချင်မိသားစု နယ်မြေထဲကို ကျူးကျော်နေတာလား၊ ဒါမှမဟုတ် ချင်မိသားစုက လန်ယာမျိုးနွယ် နယ်မြေထဲကို ရောက်နေတာလား"
ချင်ဘိုးဘေးကြီး၏ မျက်နှာမှာ ပြာနှမ်းသွားတော့သည်။
လူအုပ်ကြီးမှာ တိတ်ဆိတ်နေကြသည်။
အမှန်တကယ်ပင် လန်ယာမျိုးနွယ်က ချင်မိသားစု နယ်မြေထဲကို သိမ်းပိုက်ထားခြင်းဖြစ်ပြီး နေရာအတော်များများတွင် သူတို့၏ တပ်ဖွဲ့များ ရှိနေဆဲ ဖြစ်သည်။
စစ်ပွဲစကတည်းက ချင်မိသားစုသည် လန်ယာမျိုးနွယ်၏ နယ်မြေထဲသို့ ခြေတစ်လှမ်းပင် မချနိုင်ခဲ့ပေ။
၎င်းမှာ သူတို့ မသွားချင်၍ မဟုတ်ဘဲ မသွားနိုင်ခဲ့ခြင်းကြောင့်သာ ဖြစ်သည်။
ကျန်းထျန်းအိုက်က အေးစက်စွာ ပြုံးလိုက်သည်
"ဒါဆိုရင်တော့ အစ်ကိုကြီးဖန့် အကြံပေးတဲ့အတိုင်းပဲ လုပ်ကြရအောင် ချင်မိသားစုက လန်ယာမျိုးနွယ်ကို သူတို့ နယ်မြေရဲ့ သုံးပုံနှစ်ပုံ ပေးအပ်ရမယ်၊ အလယ်အလတ်အဆင့် ဝိညာဉ်ကျောက်တုံး ၂,၀၀၀ နဲ့ အဆင့်နိမ့် ဝိညာဉ်ကျောက်တုံး ၄၀၀,၀၀၀ ကို လျော်ကြေးပေးပြီး ဒီစစ်ပွဲကို အဆုံးသတ်လိုက်ကြတာပေါ့"
တစ်ဝိုင်းလုံး တိတ်ဆိတ်သွားတော့သည်။
ထိုအချိန်တွင် ဝေမျိုးနွယ်စုမှ လူငယ်တစ်ဦး ထွက်လာသည်။
သူသည် ဝေမျိုးနွယ်စု ခေါင်းဆောင်၏ သားဖြစ်သူ ဝေဟိုင်ရှန်း ဖြစ်သည်။
သူက ကျန်းထျန်းအိုက်ကို ကြည့်လိုက်ပြီးနောက် ဖန့်ချန်ကို ကြည့်ကာ ပြောလိုက်သည်
"ဒီပဋိပက္ခက နဝမမင်းသားဆီကိုတောင် ရောက်သွားပြီ မင်းသားက ဒီကိစ္စမှာ လန်ယာမျိုးနွယ်က အမှားလုပ်ခဲ့တာလို့ ယူဆပြီး ချင်မိသားစုရဲ့ အချက်တွေအတိုင်း ဖြေရှင်းရမယ်လို့ မိန့်ကြားထားတယ်"
" တကယ်လို့ သဘောတူညီမှု မရရင် နဝမမင်းသားရဲ့ နန်းတော်က ကိုယ်တိုင် ကြားဝင် ဆောင်ရွက်လိမ့်မယ်"
နဝမမင်းသား
လူအုပ်ကြီးမှာ အံ့အားသင့်သွားကြသည်။
ဝေမျိုးနွယ်စုမှ လူငယ်လေးတစ်ဦး၏ စကားကို ယုံရမလား၊ မယုံရမလား ဝေခွဲမရ ဖြစ်နေကြသည်။
ဝေဘိုးဘေး သို့မဟုတ် အဆင့်မြင့် ကျင့်ကြံသူတစ်ဦးမှ ပြောခြင်း မဟုတ်သောကြောင့် ဖြစ်သည်။
"ဟူး... ငါက ဒါကို တိုက်ရိုက် မပြောချင်ခဲ့ပါဘူးဒါပေမဲ့ လန်ယာမျိုးနွယ်ရဲ့ လုပ်ရပ်တွေက သိပ်ကို ရှက်စရာကောင်းလွန်းတယ်"
"အပြာရောင်တာအိုနယ်မြေဟာ အနောက်ပိုင်းတိုက်ကြီးရဲ့ အစိတ်အပိုင်းတစ်ခု ဖြစ်တာကြောင့် ဒါကို သိရတဲ့အခါ နဝမမင်းသားက သိပ်ကို စိတ်မရှည် ဖြစ်သွားခဲ့တယ်"
ချီကျန့်က သက်ပြင်းခပ်ဖွဖွ ချလိုက်ပြီး သူ၏ စကားကြောင့် မျိုးနွယ်စု ခေါင်းဆောင်များမှာ အသက်ရှူပင် မှားသွားကြသည်။
တကယ်ပဲလား နဝမမင်းသားကိုယ်တိုင် ဝင်ပါလာတာလား
တော်သေးတာပေါ့ ငါတို့ စောစောက ရပ်တည်ချက် မမှားခဲ့လို့ နဝမမင်းသားက ချင်မိသားစုဘက်မှာ ရှိနေရင် လန်ယာမျိုးနွယ်တော့ ဒုက္ခရောက်ပြီပဲ။
ဟင်းလင်းပြင်ထာဝရဓားဂိုဏ်းက တပည့်တွေနဲ့ နတ်ဘီလူးဂိုဏ်းက ပါရမီရှင်တွေ ပေါင်းရင်တောင် နဝမမင်းသားရဲ့ အဆင့်အတန်းကို မယှဉ်နိုင်ဘူးလေ...
လူအုပ်ကြီးမှာ တစ်ဦးကိုတစ်ဦး စိတ်လှိုင်းဖြင့် ဆက်သွယ်နေကြပြီး သူတို့၏ စိတ်နှလုံးမှာ မအေးမချမ်း ဖြစ်လာကြသည်။
နဝမမင်းသားဆိုသည်မှာ သာမန်တပည့်များ လက်လှမ်းမမီနိုင်သော အဆင့်အတန်း ဖြစ်သည်။
ထိုကဲ့သို့ ပုဂ္ဂိုလ်မျိုး ခရီးထွက်သည့်အခါ အနည်းဆုံး မသေမျိုး သို့မဟုတ် တာအိုပေါင်းစည်းခြင်းအဆင့် ကျွမ်းကျင်သူများပင် အဖော်လိုက်ရသည်။
သူတို့ ချောင်းတစ်ချက် ဟန့်လိုက်ရုံဖြင့် အနောက်ပိုင်းတိုက်ကြီး တစ်ခုလုံး တုန်လှုပ်သွားနိုင်သည် မဟုတ်ပါလား
ချီကျန့်၏ မျက်နှာမှာ မည်းမှောင်နေသည်။ သူသည် မဖြစ်မနေ အခြေအနေမျိုးမှလွဲ၍ နဝမမင်းသား၏ အရှိန်အဝါကို မသုံးချင်ခဲ့ပေ။
သို့သော် အခြေအနေက ဆိုးဝါးလာပြီး လန်ယာမျိုးနွယ်က ချင်မိသားစု၏ တာအိုအမွေအနှစ်ကို သိမ်းပိုက်သွားမည်ဆိုပါက နဝမမင်းသားက သူ့ကို အပြစ်တင်လိမ့်မည်မှာ သေချာသည်။
ဒီပြဿနာ အားလုံးက ဖန့် ဆိုတဲ့လူနဲ့ နတ်ဘီလူးဂိုဏ်းက ကျန်း ဆိုတဲ့ မိန်းကလေးကြောင့်ပဲ
"ဘယ်သူ့ရဲ့ အမိန့်ပဲဖြစ်ဖြစ်..."
လန်ယာရှင်းကျိုးက အသက်ကို ပြင်းပြင်းရှူလိုက်ပြီး ဖြည်းဖြည်းချင်း ပြောလိုက်သည်
"ငါတို့ရဲ့ တာအိုအမွေအနှစ်ကို ပေးဖို့ဆိုတာ လုံးဝ မဖြစ်နိုင်ဘူး"
"ဒါဆိုရင် မင်းက ဆက်တိုက်ချင်တာလား ကောင်းပြီလေ နောက်ထပ် ခြောက်လအတွင်းမှာ မင်းရဲ့ မျိုးနွယ်စု တစ်ခုလုံးကို ငါ ချေမှုန်းပြမယ်"
ချင်ဘိုးဘေးက ဒေါသတကြီး အော်ဟစ်လိုက်သည်။
ချီကျန့်ကလည်း အေးစက်စွာ ထရပ်လိုက်သည်
"ဒါဆိုရင်တော့ ဆက်ပြီး ဆွေးနွေးနေဖို့ မလိုတော့ဘူး အားလုံးပဲ ပြန်ပြီးတော့ တိုက်ပွဲအတွက် ပြင်ဆင်ကြတော့"
ထိုအချိန်တွင် တိမ်တိုက်များကြားမှ မသေမျိုးသင်္ဘော တစ်စင်း ရုတ်တရက် ထွက်ပေါ်လာပြီး အထဲမှ အသံတစ်သံ ထွက်ပေါ်လာသည်
"အပြာရောင်တာအိုနယ်မြေက ပရမ်းပတာ မဖြစ်စေရဘူး မင်းတို့လည်း တိုက်ပွဲမဖြစ်ရဘူး အသေအလဲ တိုက်ပွဲ ဟုတ်လား ချီကျန့် ဘယ်သူက မင်းကို ဒီလို ကြေညာခွင့် ပေးလိုက်တာလဲ"
ချီကျန့်၏ နာမည်ကို တိုက်ရိုက် ခေါ်လိုက်သဖြင့် အားလုံး ထိတ်လန့်သွားကြသည်။
ထ်ုသူမှာ သာမန်လူ မဟုတ်ကြောင်း သိသာလှသည်။
"အဲ့ဒါ ဘယ်သူလဲ အသံက တစ်နေရာရာမှာ ကြားဖူးသလိုပဲ..."
ဖန့်ချန်က အံ့ဩတကြီးဖြင့် မှတ်ချက်ပေးလိုက်သည်။