အခန်း (၃၈၅-၃၈၆)
Vol. 28 Ch. 385-386
အခန်း ( ၃၈၅ ) - ကုချန်၏ ကတိစကား၊ ဟွမ်သွမ့် ရောက်ရှိလာခြင်းနှင့် ပြောင်းလဲသွားသော မျက်နှာသွင်ပြင်
ဝမ်လုံအင်မော်တယ်အရှင်၏ အမြင်တွင် သူသည် ရှေးဟောင်းမကောင်းဆိုးဝါးအင်မော်တယ်ဘုရင်ထံ ဆက်သရန်နှင့် စိတ်ကြိုက်ခြယ်လှယ်ခံရမည့် လက်ဆောင်တစ်ခုအဖြစ် သတ်မှတ်ခံထားရပြီဖြစ်ကြောင်း ကုချန် မသိရှိခဲ့ပေ။
" ကောင်းပြီ... မင်း သွားလို့ရပြီ... အနာဂတ်မှာ ဒီဟွမ်သွမ့်ပင်လယ်ထဲက ကြောက်မက်ဖွယ်ကောင်းတဲ့ တစ်ခြားလျို့ဝှက်နယ်မြေတွေကို မင်း ထပ်တွေ့ခဲ့ရင် ငါအရှင်ကို ဆက်သွယ်လိုက်ပါ "
အထွတ်အထိပ်အဆင့် ဝေလငါးအိုကြီး၏ လမ်းညွှန်မှုဖြင့် ဟွမ်သွမ့်ပင်လယ်၏ လျို့ဝှက်နယ်မြေများစွာကို လုယက်သိမ်းပိုက်ပြီးနောက် ကုချန်သည် ဝေလငါးအိုကြီးအား ထွက်ခွာသွားရန် အချက်ပြကာ လက်ယမ်းလိုက်လေသည်။
အချိန်မရွေး ရောက်လာနိုင်သော ဟွမ်သွမ့်အင်မော်တယ်ဘုရင်ထံမှ မကောင်းဆိုးဝါးရည်ရွယ်ချက်ကို သူ ယခုလေးတင် ခံစားသိရှိခဲ့ရသည်။ ကုချန်သည် အကြောက်အလန့်မရှိသော်လည်း ဝေလငါးအိုကြီးကိုတော့ မထိခိုက်စေချင်ခဲ့ပေ။
မည်သို့ပင်ဆိုစေကာမူ အင်မော်တယ်အဆင့် စွမ်းအားရှင်များ၏ တိုက်ပွဲတွင် ထွက်ပေါ်လာမည့် အသေးအဖွဲ တုန်ခါမှုလေးတစ်ခုသည်ပင်လျှင် ဤအထွတ်အထိပ်အဆင့် ဝေလငါးအိုကြီးအတွက် ခံနိုင်ရည်ရှိမည်မဟုတ်ချေ။
" ဝူး...! "
ကုချန်၏စကားကို ကြားသောအခါ ဝေလငါးအိုကြီးသည် မခွဲခွာချင်သောဟန်ဖြင့် သူ၏ပတ်လည်တွင် အကြိမ်အနည်းငယ် လှည့်ပတ်သွားလေသည်။
နှစ်များစွာကြာ ကုချန်နောက်သို့ လိုက်ပါခဲ့ရာတွင် ၎င်းသည် ကြီးမားလှသော ကံကောင်းမှုများကို ရရှိခဲ့သည်။ ကုချန် ချီးမြှင့်ခဲ့သော စစ်မှန်သော အင်မော်တယ် ကျင့်စဉ်နည်းစနစ်နှင့် အင်မော်တယ်အရှင် ကျင့်စဉ်နည်းစနစ်တို့သည်ပင် ဤဝေလငါးအိုကြီးအတွက် အတုနှိုင်းမဲ့ မဟာကံကောင်းမှုများ ဖြစ်လေသည်။
ဤအင်မော်တယ်အဆင့် ကျင့်စဉ်နည်းစနစ်နှစ်ခုဖြင့် ၎င်းသည် ထျန်းကျွင်းအဆင့်အထိ ကျင့်ကြံနိုင်ရန် အခွင့်အလမ်းများစွာ ရှိနေလေသည်။ အနာဂတ်တွင် ထပ်မံတက်လှမ်းကာ ဧကရာဇ်အဆင့်သို့ ရောက်ရှိနိုင်ခြင်း ရှိမရှိဆိုသည်မှာ ၎င်း၏ ကိုယ်ပိုင်ကံကြမ္မာအပေါ်တွင်သာ မူတည်ပေလိမ့်မည်။
ဝေလငါးအိုကြီးမှာ အလွန်တရာ နှမြောတသဖြစ်နေခဲ့သည်။
ဤကံကောင်းမှုများနှင့် ယှဉ်လျှင် ကုချန်နောက်သို့ ဆက်လက်လိုက်ပါခွင့်ရခြင်းက ၎င်းအတွက် အကြီးမားဆုံးသော ကံကောင်းမှုဖြစ်ကြောင်းကို ၎င်း သိရှိထားလေသည်။
ထို့ကြောင့် ကုချန်မှ ထွက်ခွာရန် အမိန့်ပေးခဲ့သော်လည်း ဝေလငါးအိုကြီးသည် ကုချန်၏အနီးတစ်ဝိုက်တွင် ရစ်ဝဲနေဆဲဖြစ်ကာ ထွက်ခွာသွားလိုပုံ မရချေ။
ဝေလငါးအိုကြီး၏ မခွဲခွာချင်ဖြစ်နေမှုကို မြင်သောအခါ ကုချန်သည် မပြုံးဘဲ မနေနိုင်ခဲ့ချေ။
" တကယ်လို့ အနာဂတ်မှာ မင်း ထျန်းကျွင်းအဆင့်ကို တက်လှမ်းနိုင်ခဲ့ရင်... ငါကိုယ်တော်ကိုရှာဖို့ အဆုံးမဲ့ကမ္ဘာကို မင်း လာခဲ့လို့ရတယ်လို့ ငါကိုယ်တော် ကတိပေးပါတယ်... အဲဒီအချိန်ကျရင် ငါကိုယ်တော်က မင်းကို လက်အောက်ခံအဖြစ် သတ်မှတ်ပေးမယ် "
ဤဝေလငါးအိုကြီးသည် ဟွမ်သွမ့်ပင်လယ်အတွင်း၌ အချိန်ကြာမြင့်စွာ ရှင်သန်နိုင်ခဲ့ကာ ဟွမ်သွမ့်ပင်လယ်အတွင်းရှိ လျို့ဝှက်နယ်မြေများစွာကိုလည်း ရှာဖွေတွေ့ရှိခဲ့ရာ ၎င်းသည် ကံကြမ္မာ မဟာတာအို၏ မျက်နှာသာပေးမှုကို အတော်လေး ရရှိထားရပေမည်။
အကယ်၍ ၎င်းသာ အနာဂတ်တွင် ကိုယ်ပိုင်ကြိုးစားအားထုတ်မှုဖြင့် ထျန်းကျွင်းအဆင့်သို့ ရောက်ရှိနိုင်ခဲ့ပါက သူ့အား လက်ခံရန် ကုချန် တုံ့ဆိုင်းနေမည်မဟုတ်ချေ။
မည်သို့ပင်ဆိုစေကာမူ ဤဝေလငါးအိုကြီးသည် သူ၏ကိုယ်စား ဟွမ်သွမ့်ပင်လယ်ကို အဆက်မပြတ် စူးစမ်းရှာဖွေပေးမည်ဆိုပါက ပြဿနာများစွာကို ကင်းဝေးသွားစေနိုင်မည်ဖြစ်သည်။
" ဝူး! "
အနာဂတ်တွင် လက်ခံမည်ဟူသော ကုချန်၏ ကတိစကားကို ကြားသောအခါ ဝေလငါးအိုကြီးသည် စိတ်လှုပ်ရှားစွာဖြင့် ၎င်း၏အမြီးကို ရိုက်ခတ်လိုက်ကာ ကြီးမားလှသော ခေါင်းကြီးဖြင့် ကုချန်၏ အဝတ်အစားများကို ချစ်ခင်မြတ်နိုးစွာ ပွတ်သပ်လိုက်ပြီးနောက် တွန့်ဆုတ်စွာဖြင့် ထွက်ခွာသွားလေတော့သည်။
ထျန်းကျွင်းအဆင့်သို့ တက်လှမ်းရမည်ဆိုသော ကုချန်၏ သတ်မှတ်ချက်နှင့် ပတ်သက်၍မူ ဝေလငါးအိုကြီးအတွက် ခက်ခဲသော လုပ်ငန်းစဉ်တစ်ခု ဖြစ်ပုံမရချေ။
ယခုအခါ ၎င်းသည် အင်မော်တယ်တာအို ကျင့်စဉ်နည်းစနစ် နှစ်ခုကို ပိုင်ဆိုင်ထား၏။ ယင်းတို့အနက် တစ်ခုမှာ အင်မော်တယ်အရှင် ကျင့်စဉ်နည်းစနစ်ပင် ဖြစ်သည်။ ထို့ကြောင့် အင်မော်တယ်တက်လှမ်းရန် ခက်ခဲနိုင်သော်လည်း ထျန်းကျွင်းအဆင့်သို့ တက်လှမ်းရန်မှာ မည်သို့ ခက်ခဲနိုင်မည်နည်း။
၎င်းမှာ သဘာဝကျကျ ဖြစ်ပေါ်လာမည့် ကိစ္စတစ်ခုမျှသာ ဖြစ်လေသည်။
ဝေလငါးအိုကြီး ထွက်ခွာသွားပြီးနောက် ကုချန်သည် အခြား မည်သည့်လှုပ်ရှားမှုကိုမျှ မပြုလုပ်ခဲ့ချေ။ ထိုအစား သူသည် ထိုနေရာ၌ပင် တင်ပျဉ်ခွေထိုင်ကာ ကောင်းကင်ဧကရာဇ်ကျမ်းစာကို အသက်သွင်းလိုက်၍ သူ၏ အသိစိတ်ပင်လယ်အတွင်းရှိ လျှို့ဝှက်ဆန်းကြယ်သော လူအိုကြီးထံမှ ရရှိခဲ့သည့် 'စက္ကူ' များကို ဆက်လက် လောင်ကျွမ်းဖြိုခွဲနေလေတော့သည်။
ဤမျှ အချိန်ကြာမြင့်ခဲ့ပြီးနောက်၌ပင် သူ၏အသိစိတ်ပင်လယ်ထဲမှ လွင့်စင်ကျဆင်းလာသော များပြားလှသည့် ကျင့်စဉ်နည်းစနစ်များနှင့် နတ်စွမ်းရည်များ ပါဝင်သည့် ထိုအဝါရောင်စက္ကူများသည် ရပ်တန့်သွားမည့် အရိပ်အယောင် လုံးဝ မပြခဲ့ချေ။
၎င်းတို့သည် ဆက်လက် ကျဆင်းလာခဲ့ကာ ကုချန်၏ ကောင်းကင်ဧကရာဇ်ကျမ်းစာမှ ဖန်တီးထားသော အဆုံးမဲ့တာအို မီးဖိုဖြင့် သန့်စင်ခံရကာ သူ၏ကိုယ်ပိုင်စွမ်းအားအဖြစ် ပြောင်းလဲသွားပြီးနောက် ကောင်းကင်ဘုံအလုံးစုံ အမှန်တရား နားလည်ခြင်း၏ မြှင့်တင်မှုလုပ်ငန်းစဉ်ကို တွန်းအားပေးနေလေသည်။
အချိန်မည်မျှ ကုန်ဆုံးသွားခဲ့သည်ကို မည်သူမျှ မသိနိုင်ချေ။
ရုတ်တရက်ဆိုသလို ကုချန်၏ပတ်ဝန်းကျင်ရှိ မှိုင်းညို့ကာ လှုပ်ခတ်နေသော ဟွမ်သွမ့်ချီများသည် အရာအားလုံး အေးခဲသွားသကဲ့သို့ စီးဆင်းမှု ရုတ်ချည်း ရပ်တန့်သွားလေသည်။
ဤတိတ်ဆိတ်ငြိမ်သက်မှုထဲတွင် ကုချန်သည် တစ်စုံတစ်ခုကို ခံစားသိရှိလိုက်ပုံရကာ ရုတ်တရက် မျက်လုံးများကို ဖွင့်လိုက်ပြီး သူ၏ လက်ဖဝါးကို ကြည့်လိုက်လေသည်။
သူ၏လက်ဖဝါးထဲရှိ ဟွမ်သွမ့်အမှတ်အသားသည် ရှင်သန်နိုးထလာသကဲ့သို့ စူးရှတောက်ပသော အလင်းတန်းများကို ထုတ်လွှတ်နေလေပြီ။
နောက်ဆုံးတော့ ရောက်လာခဲ့ပြီလား။
ဤအတွေး ကုချန်၏စိတ်ထဲတွင် ပေါ်လာသည်နှင့် တစ်ပြိုင်နက် ကျယ်ပြောလှသော လေဟာနယ်ထဲမှ အနည်းငယ် အေးစက်စက်နိုင်သော ရယ်မောသံတစ်ခု ပဲ့တင်ထပ်လာသည်ကို သူ ကြားလိုက်ရသည်။
" ဟက်ဟက်... မင်းကို ငါ နောက်ဆုံးတော့ ရှာတွေ့ခဲ့ပြီ "
ထိုအသံ ထွက်ပေါ်လာသည်နှင့်အမျှ ဟွမ်သွမ့်ချီများသည် တစ်ဖန် ပြန်လည်စီးဆင်းလာခဲ့ကာ သူ တွေဝေငေးမောနေစဉ် 'ဝုန်း' ခနဲ မြည်ဟည်းနေသော မြစ်တစ်စင်း၏အသံ ထွက်ပေါ်လာလေသည်။
ကုချန်သည် မသိစိတ်အလျောက် မော့ကြည့်လိုက်မိ၏။
အဆုံးအစမရှိ ကျယ်ပြောလှသော ဟွမ်သွမ့်ပင်လယ်၏ အနက်ရှိုင်းဆုံးနေရာတွင် လှိုင်းလုံးကြီးများ ကောင်းကင်ယံသို့ ရိုက်ခတ်ကာ မည်သည့်နေရာမှ စတင်၍ မည်သည့်နေရာတွင် အဆုံးသတ်မှန်း မသိနိုင်သော ကျယ်ပြောပြင်းထန်သည့် မြစ်ရှည်ကြီးတစ်ခု ထွက်ပေါ်လာသည်ကို သူ မြင်တွေ့လိုက်ရသည်။
၎င်းမှာ အချိန်မြစ်ပင် ဖြစ်သည်။
ယခုအချိန်၌ ထိုအချိန်မြစ်၏ အထက်တွင် အဆုံးမဲ့ ဟွမ်သွမ့်ချီများဖြင့် ဖုံးလွှမ်းထားသော ပုံရိပ်တစ်ခုသည် တစ်လှမ်းလျှင် တစ်နှစ်၊ တစ်လှမ်းလျှင် စကြာဝဠာတစ်ခုနှုန်းဖြင့် ပြင်းထန်သော မြစ်ကြီးကို ဖြတ်ကျော်ကာ ကုချန် ရှိရာနေရာဆီသို့ တိုက်ရိုက် ဦးတည်လာနေလေသည်။
ဟွမ်သွမ့်ချီများ ဖုံးလွှမ်းနေသော ထိုပုံရိပ်မှာ အတုနှိုင်းမဲ့ အင်မော်တယ်ဘုရင်တစ်ပါးကဲ့သို့ ဩဇာတိက္ကမ ကြီးမားလှပေသည်။ သူ၏ဘေးနားရှိ နေ၊ လနှင့် ကြယ်များသည်ပင်လျှင် သူ၏ ခြေအောက်တွင် နင်းချေခံရကာ အရေးမပါသော နောက်ခံအလှများအဖြစ်သာ ရှိနေနိုင်လေသည်။
ပြင်းထန်လှသော အချိန်လှိုင်းလုံးများသည် သူ၏အဝတ်အစားများကို အနည်းငယ်မျှပင် စိုစွတ်စေခြင်း မရှိခဲ့ချေ။
ဟွမ်သွမ့်အင်မော်တယ်ဘုရင်!
အလှမ်းဝေးကွာသော နေရာမှ အချိန်မြစ်ကို နင်းဖြတ်ကာ ရောက်ရှိလာသော ဤပုံရိပ်ကို မြင်သောအခါ ကုချန်သည် သူ မည်သူဖြစ်ကြောင်းကို ချက်ချင်း ခန့်မှန်းမိလိုက်သည်။
သူ၏စစ်မှန်သော ကိုယ်ခန္ဓာသည် အင်မော်တယ်နယ်မြေတွင် ရှိနေဆဲဖြစ်ကာ အချိန်မြစ်ကို ဆင့်ခေါ်၍ ပစ္စုပ္ပန်ကာလရှိ ကောင်းကင်ဘုံများကို ရှာဖွေပြီးနောက် သူ၏တည်နေရာကို အတိအကျရှာဖွေရန် ဟွမ်သွမ့်အမှတ်အသားကို အသုံးပြု၍ ဆင်းသက်လာခြင်းလော။ ဤသည်မှာ ဟွမ်သွမ့်အင်မော်တယ်ဘုရင်၏ နည်းလမ်းဖြစ်မည်လော။
ဟွမ်သွမ့်အင်မော်တယ်ဘုရင် အချိန်မြစ်ကို နင်းဖြတ်၍ ရောက်ရှိလာသည်ကို မြင်သောအခါ ကုချန်သည် သူ၏ နည်းလမ်းများကို ချက်ချင်း နားလည်သွားလေသည်။
အချိန်ကိုက်ပင်.....
ကုချန်၏မျက်လုံးများမှာ အနည်းငယ် မှေးကျသွား၏။ အဆုံးမဲ့ကမ္ဘာတွင်ရှိသော သူ၏ ပင်မကိုယ်ခန္ဓာသည်လည်း ဟွမ်သွမ့်ပင်လယ်မှ သတင်းကို ပထမဆုံးအချိန်မှာပင် သိရှိသွားခဲ့လေသည်။
ချီတစ်ခုမှ သန့်စင်သူသုံးပါး ခွဲထွက်ခြင်း နည်းစနစ်သည် တိတ်ဆိတ်စွာ လည်ပတ်သွားလေသည်။ ဤဟွမ်သွမ့်အင်မော်တယ်ဘုရင်၏ 'အရည်အသွေး' ကို စမ်းသပ်ရန်အတွက် ဤတတိယကိုယ်ပွားကို သူ၏ပင်မကိုယ်ထည်နှင့် အချိန်မရွေး ပေါင်းစည်းရန် ကုချန် ကြိုတင်ပြင်ဆင်ထားပြီး ဖြစ်လေသည်။
" ငါ့ရဲ့ အမွေအနှစ်တွေက ဘယ်သူမဆို စော်ကားဖျက်ဆီးလို့ရတဲ့ အရာများလား "
လူးလွန့်နေသော အချိန်မြစ်၏အထက်တွင် ဟွမ်သွမ့်အင်မော်တယ်ဘုရင်သည် ကောင်းကင်ဘုံများနှင့် စကြာဝဠာများစွာကို ဖြတ်ကျော်ကာ ဟွမ်သွမ့်အမှတ်အသား၏ အာရုံခံမှုနောက်သို့ လိုက်ပါလျက် လျင်မြန်စွာ ချဉ်းကပ်လာလေသည်။
သူသည် ဟွမ်သွမ့်ပင်လယ်အတွင်းသို့ အမှန်တကယ် ဆင်းသက်လာခြင်း မရှိသေးသော်လည်း ဟွမ်သွမ့်အမှတ်အသား၏ တည်နေရာကို လုံးဝ သော့ခတ်ထားပြီးဖြစ်ကာ မကြာမီ ရောက်ရှိလာတော့မည် ဖြစ်သည်။
ဟွမ်သွမ့်အမှတ်အသားဖြင့် သော့ခတ်ခံထားရသော သက်ရှိကို သူ မမြင်တွေ့ရသေးသော်လည်း ဟွမ်သွမ့်အင်မော်တယ်ဘုရင်သည် ၎င်း၏ မျက်နှာပေါ်ရှိ ထိတ်လန့်မှုနှင့် မျှော်လင့်ချက် ကင်းမဲ့နေသော အသွင်အပြင်ကိုပင် စိတ်ကူးပုံဖော်ကြည့်နိုင်လေသည်။
ကြောက်ရွံ့လော့၊ မျှော်လင့်ချက် ကင်းမဲ့လော့၊ တုန်လှုပ်လော့!
ဤဘုရင် ဆင်းသက်လာချိန်တွင် မင်း၏ သေဆုံးခြင်းလည်း ရောက်ရှိလာလိမ့်မည်။
" ဝုန်း! "
နောက်ဆုံးတွင် အချိန်မြစ်လှိုင်းလုံးများ၏ ဝင်ရောက်စီးနင်းမှုကို တစ်ဖန် ထိုးဖောက်ဖြတ်ကျော်ပြီးနောက် လွှမ်းမိုးနိုင်စွမ်းရှိသော အင်မော်တယ်ဘုရင် အငွေ့အသက်များနှင့်အတူ ဟွမ်သွမ့်အင်မော်တယ်ဘုရင်၏ ကိုယ်ပွားသည် ကောင်းကင်ဘုံများနှင့် နယ်မြေများစွာကို တိုက်ရိုက် ဖြတ်ကျော်ကာ ဟွမ်သွမ့်ပင်လယ်အတွင်းသို့ ဆင်းသက်လာတော့သည်။
" ဘယ်သူက ဒီလောက်တောင် ရဲတင်းနေရတာလဲဆိုတာ ငါအရှင်ကို ကြည့်ခွင့်ပေးစမ်းပါ "
အချိန်မြစ်ကို ထိုးဖောက်ဖြတ်ကျော်ကာ ပစ္စုပ္ပန်ကမ္ဘာသို့ ဆင်းသက်လာပြီးနောက် ဟွမ်သွမ့်အင်မော်တယ်ဘုရင်၏ အကြည့်များသည် ဟွမ်သွမ့်အမှတ်အသားရှိရာ ဦးတည်ရာဆီသို့ ချက်ချင်း ကျရောက်သွားလေသည်။
ကုချန်၏ပုံရိပ်သည်လည်း တစ်ပြိုင်နက်တည်း သူ၏အမြင်အာရုံထဲတွင် ထွက်ပေါ်လာလေသည်။
တဖြည်းဖြည်း ချဉ်းကပ်လာသော ဟွမ်သွမ့်အင်မော်တယ်ဘုရင်၏ ပုံရိပ်ကို ကြည့်လျက် ကုချန်၏မျက်လုံးများမှာ အနည်းငယ် မှေးကျသွားသော်လည်း သူသည် လျှို့ဝှက်စွာဖြင့် ပြင်ဆင်မှုများ ပြုလုပ်ထားပြီး ဖြစ်လေသည်။
သို့သော် ထိုအခိုက်၌ သူ လုံးဝ မျှော်လင့်မထားခဲ့သော အရာတစ်ခု ဖြစ်ပျက်သွားခဲ့လေသည်။
ဟွမ်သွမ့်အင်မော်တယ်ဘုရင်သည် ပစ္စုပ္ပန်ကမ္ဘာသို့ ဆင်းသက်လာကာ ကုချန်ထံသို့ ကြည့်မိသွားချိန်တွင် မူလက ဂရုမစိုက်ဘဲ မောက်မာနေခဲ့သော ဟွမ်သွမ့်အင်မော်တယ်ဘုရင်၏မျက်နှာမှာ ကြောက်ရွံ့မှု၊ မယုံကြည်နိုင်မှုများဖြင့် ချက်ချင်း ပြင်းထန်စွာ ပြောင်းလဲသွားလေတော့သည်။
အခန်း ( ၃၈၆ ) - ဘာလို့ မင်းဖြစ်နေရတာလဲ။ လုံးဝမမှားနိုင်ဘူး။ ဒါက တစ်သက်မှာ တစ်ခါကြုံရခဲတဲ့ အခွင့်အရေးပဲ
ဟွမ်သွမ့်အင်မော်တယ်ဘုရင်၏ မျက်နှာအမူအရာ ပြောင်းလဲသွားမှုမှာ မယုံနိုင်လောက်အောင် မြန်ဆန်လွန်းလှသည်။ မယုံကြည်နိုင်ဖွယ်ရာ တစ်စုံတစ်ရာကို မျက်ဝါးထင်ထင် မြင်တွေ့လိုက်ရသကဲ့သို့ သူ၏မျက်နှာပေါ်ရှိ ထိတ်လန့်မှုနှင့် အံ့အားသင့်မှုတို့မှာ အစစ်အမှန်ပင် ဖြစ်ဟန်တူသည်။
" မင်းလား "
ဟွမ်သွမ့်အင်မော်တယ်ဘုရင်သည် ကုချန်အား စူးစိုက်ကြည့်ကာ ရုတ်တရက် ဗြုန်းစားကြီး အော်ဟစ်လိုက်လေသည်။
" ဘာလို့ မင်းဖြစ်နေရတာလဲ..... "
ဟွမ်သွမ့်အင်မော်တယ်ဘုရင်၏ ရုတ်ခြည်းပြောင်းလဲသွားသော မျက်နှာအမူအရာကို ကြည့်လျက် ကုချန်မှာလည်း နားမလည်နိုင်အောင် ဖြစ်သွားရသည်။ အဘယ်ကြောင့် ဟွမ်သွမ့်အင်မော်တယ်ဘုရင်၏ တုံ့ပြန်မှုမှာ ရုတ်တရက်ကြီး ဤမျှ ပြင်းထန်နေရသနည်း။
ကုချန်အနေဖြင့် ဤဟွမ်သွမ့်အင်မော်တယ်ဘုရင်နှင့် ယခင်က တစ်ကြိမ်တစ်ခါမျှ မဆုံဖူးခဲ့သည်မှာ သေချာလှသည်။ သို့ဆိုလျှင် အခြားတစ်ဖက်မှလူသည် သူ့အား မြင်သည်နှင့် အဘယ်ကြောင့် ဤမျှ ရုတ်တရက် တုံ့ပြန်ရခြင်းနည်း။
ကုချန်သည် စိတ်ရှုပ်ထွေးသွားကာ မေးမြန်းရန် ပြင်လိုက်သော်လည်း သူ့အား ဆွံ့အသွားစေသည့် နောက်ထပ်မြင်ကွင်းတစ်ခုကို မြင်တွေ့လိုက်ရပြန်သည်။
ဟွမ်သွမ့်အင်မော်တယ်ဘုရင်သည် ကုချန်အား ကြောက်ရွံ့တုန်လှုပ်စွာ ကြည့်လိုက်ပြီးနောက် မည်သည့် တုံ့ဆိုင်းမှု၊ တုံ့လှုပ်မှုမျှ မရှိဘဲ သူ၏ ကိုယ်ပွားကို တိုက်ရိုက်ပင် ဖောက်ခွဲပစ်လိုက်တော့သည်။
" ဝုန်း...! "
ဟွမ်သွမ့်အင်မော်တယ်ဘုရင်၏ ခန္ဓာကိုယ်သည် အချိန်မြစ်ပေါ်တွင် ပေါက်ကွဲသွားခဲ့ရာ မြစ်ရေများကို အဆုံးအစမရှိ လှိုင်းထန်သွားစေခဲ့သည်။ သို့သော် ခဏအကြာတွင်မူ မည်သည့်အရာမျှ မဖြစ်ပျက်ခဲ့သည့်အလား တိတ်ဆိတ်ငြိမ်သက်သွားခဲ့ပြန်သည်။
အချိန်မြစ် ပြန်လည်ငြိမ်သက်သွားသည်ကို ကြည့်ကာ ကုချန်မှာ ဆွံ့အသွားခဲ့ရသည်။
ဘာတွေ ဖြစ်ကုန်တာလဲ။
ဤဟွမ်သွမ့်အင်မော်တယ်ဘုရင်သည် သူ့အား ပြဿနာလာရှာရန် ရန်လိုစွာ ရောက်လာခဲ့ခြင်း ဖြစ်သော်လည်း တွေ့ဆုံပြီးနောက် စကားတစ်ခွန်းမျှပင် မဆိုဘဲ သူ့ကိုယ်သူ ဖောက်ခွဲပစ်လိုက်သည်လော။
ဤသည်မှာ ကုချန်အား 'မီးပန်းပြပွဲ' လာပြရန်အတွက်သာ အခက်အခဲခံ၍ လာရောက်ရှာဖွေခဲ့သကဲ့သို့ ဖြစ်နေသဖြင့် အလွန်ပင် နားလည်ရခက်လှပေသည်။
" ဒီလူ ငါ့ကို အရင်က မြင်ဖူးနေတာလား "
ကုချန်သည် စောစောက ဟွမ်သွမ့်အင်မော်တယ်ဘုရင်၏ မျက်နှာအမူအရာကို ပြန်လည်သတိရလိုက်၏။ သူ၏ အံ့အားသင့်မှုနှင့် ထိတ်လန့်မှုတို့မှာ အစစ်အမှန်ပင် ဖြစ်ဟန်ရ၍ ကုချန်နှင့် ယခင်က ဆုံဖူးကာ ကုချန်မှ သူ့အပေါ်တွင် အလွန်နက်ရှိုင်းသော 'အထင်ကြီးစရာ မှတ်မှတ်ရရဖြစ်မှု' တစ်ခုခု ချန်ရစ်ခဲ့သကဲ့သို့ပင် ဖြစ်နေ၏။
သို့သော် ပြီးခဲ့သော ကပ်ကမ္ဘာပေါင်းများစွာကတည်းက တည်ရှိခဲ့သော ဤဟွမ်သွမ့်အင်မော်တယ်ဘုရင်နှင့် သူသည် မည်သို့လုပ်၍ ဆုံဖူးနိုင်မည်နည်း။ ဤဟွမ်သွမ့်အင်မော်တယ်ဘုရင်ကို ထားလိုက်ဦး၊ သူ ယခင်က တိုက်ခိုက်ခဲ့ဖူးသော ဆေးဖိုကိုးဖိုမဟာဧကရာဇ် သက်ရှိထင်ရှားရှိစဉ်ကပင် သူ မမွေးဖွားသေးချေ။
သူသည် ဤဟွမ်သွမ့်အင်မော်တယ်ဘုရင်နှင့် ယခင်က လုံးဝ ဆုံဖူးခဲ့မည် မဟုတ်ပေ။ သို့ဆိုလျှင် အခြားတစ်ဖက်မှလူသည် အဘယ်ကြောင့် ဤမျှ ထိတ်လန့်တုန်လှုပ်နေသော အမူအရာကို ပြသရသနည်း။ သူ လူမှားသွားခြင်းများလော။
ကုချန်မှာ ကိစ္စ၏ အဓိကသော့ချက်ကို နားမလည်နိုင်ဘဲ မျက်မှောင်ကျုံ့သွားလေသည်။ အင်မော်တယ်ဘုရင်တစ်ပါးအနေဖြင့် မျက်နှာတစ်ချက် မြင်လိုက်ရုံမျှဖြင့် စကားတစ်ခွန်းမျှပင် မဆိုရသေးဘဲ တွန့်ဆုတ်ခြင်းအလျင်းမရှိ ကိုယ့်ကိုယ်ကို ဖောက်ခွဲပစ်လိုက်သည်အထိ ထိတ်လန့်သွားသည်ကို ကြည့်လျှင် ၎င်း၏နောက်ကွယ်တွင် ပုန်းကွယ်နေသော ကြောက်ရွံ့မှု အတိမ်အနက်ကို သဘာဝကျကျပင် မှန်းဆနိုင်ပေသည်။
သို့သော် ဟွမ်သွမ့်အင်မော်တယ်ဘုရင် အတိအကျ ဘာကို ကြောက်ရွံ့နေသနည်း ဆိုသည်ကိုမူ ကုချန် ယခုတိုင် မသိသေးချေ။
" ကံကောင်းတာက ဒီဟွမ်သွမ့်အမှတ်အသား ကျန်နေသေးလို့ပဲ "
ကုချန်သည် အောက်သို့ ငုံ့ကြည့်လိုက်ရာ ဟွမ်သွမ့်အမှတ်အသားသည် သူ၏လက်ဖဝါးထဲတွင် ငြိမ်သက်စွာ ရှိနေဆဲဖြစ်သည်။ သို့သော် ယခုလေးတင် တောက်ပနေခဲ့သော ဟွမ်သွမ့်အမှတ်အသားသည် ယခုအခါ အလင်းရောင် တစ်စက်မျှပင် မထွက်ပေါ်တော့ဘဲ သေဆုံးနေသည့်အလား တိတ်ဆိတ်သွားခဲ့ပြီဖြစ်သည်။
ဤဟွမ်သွမ့်အမှတ်အသားသည် ဟွမ်သွမ့်အင်မော်တယ်ဘုရင် ချန်ရစ်ခဲ့ခြင်း ဖြစ်သည်။ အကယ်၍ ဟွမ်သွမ့်အင်မော်တယ်ဘုရင်မှ ၎င်းကို အသုံးပြု၍ ကုချန်အား ခြေရာခံနိုင်ပါက ကုချန်သည်လည်း ဤဟွမ်သွမ့်အမှတ်အသားကို အသုံးပြု၍ ဟွမ်သွမ့်အင်မော်တယ်ဘုရင်၏ တည်နေရာကို ပြန်လည်ရှာဖွေ ဖော်ထုတ်နိုင်ပေသည်။
စောစောက အခြားတစ်ဖက်မှလူ အဘယ်ကြောင့် ဤမျှ ပြင်းပြင်းထန်ထန် တုံ့ပြန်ခဲ့သည်ကို သူ နားမလည်ခဲ့သော်လည်း ကိစ္စမရှိပေ။ နောင်တစ်ချိန် အင်မော်တယ်နယ်မြေသို့ ရောက်သွားပါက သူသည် ဤဟွမ်သွမ့်အမှတ်အသားကို အသုံးပြု၍ ဟွမ်သွမ့်အင်မော်တယ်ဘုရင်၏ တည်နေရာကို နောက်ကြောင်းပြန် ရှာဖွေနိုင်သည်ဖြစ်ရာ ရှင်းလင်းသော အဖြေတစ်ခုရရန် သွားရောက်တွေ့ဆုံနိုင်ပေသည်။
သို့သော်လည်း ဤဟွမ်သွမ့်အမှတ်အသားသည် မည်သို့ပင်ဆိုစေ ဟွမ်သွမ့်အင်မော်တယ်ဘုရင် ချန်ရစ်ခဲ့ခြင်း ဖြစ်ရာ ၎င်းအား ဖျက်စီးပစ်နိုင်သည့် နည်းလမ်းတစ်ခုခု သူ့တွင် ရှိနေနိုင်ပေသည်။
ကုချန်သည် ခဏတာ တွေးတောလိုက်ပြီးနောက် ဟွမ်သွမ့်အင်မော်တယ်ဘုရင်မှ ဟွမ်သွမ့်အမှတ်အသားကို ရုတ်တရက် ရုပ်သိမ်းသွားခြင်းမျိုး မဖြစ်စေရန် အင်မော်တယ်ဘုရင်အဆင့် စွမ်းအားဖြင့် ကန့်သတ်အစီအရင်အား ထပ်မံ အားဖြည့်လိုက်၏။
ထိုသို့မှသာ ကုချန်အနေဖြင့် သူ၏ တိကျသော တည်နေရာအား နောက်ကြောင်းပြန် ရှာဖွေနိုင်မည်ဖြစ်သည်။
. . . . . . . . .
" သူပဲ... သူပဲကွ "
အင်မော်တယ်နယ်မြေရှိ အမည်မသိ နေရာတစ်နေရာတွင် ဟွမ်သွမ့်အင်မော်တယ်ဘုရင်သည် မျက်လုံးများကို ရုတ်တရက် ဖွင့်လိုက်၏။ သူ၏ မျက်လုံးအစုံ၏ နက်ရှိုင်းသောနေရာတွင် ဖျောက်ဖျက်၍မရသော ကြောက်ရွံ့မှု အရိပ်အယောင်များ ကိန်းအောင်းနေလေသည်။
အောက်ကမ္ဘာမှ ပုရွက်ဆိတ်တစ်ကောင်အား သွားရောက်သတ်ဖြတ်ရုံမျှဖြင့် သူ၏ ကျန်ရှိနေသေးသော ဘဝတစ်လျှောက်လုံး ခြောက်လှန့်နေမည့် အိပ်မက်ဆိုးတစ်ခုနှင့် ကြုံတွေ့ရလိမ့်မည်ဟု သူ လုံးဝ ထင်မှတ်မထားခဲ့ချေ။
ဒါ သူပဲ။ ဒါပေမယ့် ဘယ်လိုလုပ်ပြီး သူဖြစ်နေရတာလဲ။ သူက အရင်ကတည်းက မရှိတော့ဘူးလေ.....
ဟွမ်သွမ့်အင်မော်တယ်ဘုရင်၏ မျက်နှာအမူအရာမှာ ထပ်မံပြောင်းလဲသွားပြန်၏။ သူသည် တစ်စုံတစ်ခုကို သဘောပေါက်သွားဟန်ဖြင့် ဟွမ်သွမ့်အမှတ်အသားကို အလျင်အမြန် ဖျက်စီးပစ်ရန် ကြိုးစားလိုက်သော်လည်း ဟွမ်သွမ့်အမှတ်အသားမှာ သူ၏ ထိန်းချုပ်မှုအောက်မှ ရုန်းထွက်သွားကာ သူ့အား နာခံခြင်း မရှိတော့ကြောင်းကိုသာ ထိတ်လန့်ဖွယ်ရာ တွေ့ရှိလိုက်ရတော့သည်။
" သူပဲ... လုံးဝ အမှားအယွင်းမရှိနိုင်ဘူး "
ဟွမ်သွမ့်အမှတ်အသားကို ထပ်မံ မထိန်းချုပ်နိုင်တော့ကြောင်း သဘောပေါက်သွားသောအခါ ဟွမ်သွမ့်အင်မော်တယ်ဘုရင်သည် နောက်ဆုံးတွင် အတည်ပြုလိုက်နိုင်လေပြီ။
သူ ယခုလေးတင် မြင်တွေ့ခဲ့ရသူသည် သူ၏ဘဝတွင် အကြောက်မက်ဖွယ်အကောင်းဆုံးသော တည်ရှိမှုပင် ဖြစ်သည်။ ထိုသူသည် သူချန်ရစ်ခဲ့သော ဟွမ်သွမ့်အမှတ်အသားကို ရှင်းရှင်းလင်းလင်း ဖျက်ပစ်နိုင်စွမ်းရှိပါလျက် အဘယ်ကြောင့် သိမ်းဆည်းထားခဲ့သနည်း။ သူ့ကို ငါးစာချနေခြင်းများလော။
ဟွမ်သွမ့်အင်မော်တယ်ဘုရင်၏ မျက်နှာမှာ မှုန်ကုပ်သွား၏။ သူသည် 'အမှန်တရား' ကို မှန်းဆမိပြီဟု ယုံကြည်နေ၏။
" ကံကောင်းလို့ ငါအရှင် သတိထားပြီး ကိုယ်ပွားတစ်ခုပဲ စေလွှတ်လိုက်တာ... ငါအရှင်ရဲ့ ခန္ဓာကိုယ်အစစ်နဲ့ ဆင်းမသွားလို့ပေါ့.....
ဒါပေမယ့် အချိန်တွေ ဒီလောက်တောင် ကြာခဲ့ပြီကို မင်းက ငါအရှင်ကို လွှတ်မပေးချင်သေးဘူးလား.....
အဲဒီ ဟွမ်သွမ့်အမှတ်အသားနဲ့ဆိုရင် သူက ငါ့ကို အစောကြီးမဟုတ်ရင်တောင် တစ်ချိန်ချိန်တော့ ရှာတွေ့သွားမှာပဲ "
ဟွမ်သွမ့်အင်မော်တယ်ဘုရင်၏ မျက်နှာအမူအရာမှာ တစ်ချက်တစ်ချက် ထိတ်လန့်သွားလိုက်၊ တစ်ခါတစ်ရံ တုံ့ဆိုင်းသွားလိုက်နှင့် အဆက်မပြတ် ပြောင်းလဲနေလေသည်။ နောက်ဆုံးတွင် သူသည် ဆုံးဖြတ်ချက်တစ်ခုခုကို ချလိုက်ဟန်ဖြင့် သူ၏မျက်လုံးများထဲတွင် ပြတ်သားသော အရိပ်အယောင်တစ်ခု ပေါ်လာခဲ့၏။
ဤအခြေအနေသို့ ရောက်နေပြီဖြစ်ရာ သူ့တွင် အခြားရွေးချယ်စရာ မရှိတော့ပေ။ သူ လုပ်နိုင်သည်မှာ.....
ဤသို့ လုပ်ရန်သာ ရှိတော့သည်။
. . . . . . . . .
" မျှော်စင်သခင်... စောစောက တစ်ခုခုများ ခံစားလိုက်ရလား "
အဆုံးအစမရှိသော ဟွမ်သွမ့်ပင်လယ်ထဲတွင် ချုံးဟွာထျန်းကျွင်းနှင့် ဝမ်လုံအင်မော်တယ်အရှင်တို့သည် ကုချန်၏တည်နေရာကို ရှာဖွေရန် ယခင်က တွေ့ရှိထားခဲ့သော သဲလွန်စများနောက်သို့ လိုက်နေကြခြင်း ဖြစ်သည်။
သို့သော် ရုတ်တရက်ဆိုသလို ချုံးဟွာထျန်းကျွင်းသည် တစ်စုံတစ်ခုကို ခံစားလိုက်ရဟန်ဖြင့် အဆုံးမဲ့ဟွမ်သွမ့်ပင်လယ်ကြီးကို ဖြတ်သန်းကာ ကျယ်ပြောလှသော ဟွမ်သွမ့်ချီများ၏ အနက်ရှိုင်းဆုံးနေရာသို့ စူးစိုက်ကြည့်လိုက်၏။
ယခုလေးတင် ထိုဟွမ်သွမ့်ချီများ၏ အနက်ရှိုင်းဆုံးနေရာမှ ကြီးကျယ်ခမ်းနား၍ ကြောက်မက်ဖွယ်ကောင်းသော အရှိန်အဝါတစ်ခု ထွက်ပေါ်လာသည်ကို သူ ခံစားလိုက်ရသကဲ့သို့ပင်။
သို့သော် ထူးဆန်းသည်မှာ ထိုအရှိန်အဝါသည် အလွန်တိုတောင်းသော အခိုက်အတန့်လေးတစ်ခုသာ ကြာမြင့်ခဲ့ကာ ချုံးဟွာထျန်းကျွင်း ဆက်လက်စုံစမ်းရန် မကြိုးစားမီမှာပင် ထိုကြောက်မက်ဖွယ် အရှိန်အဝါမှာ တစ်ခါမှ မပေါ်ပေါက်ခဲ့ဖူးသည့်အလား ပျောက်ကွယ်သွားခဲ့ခြင်းဖြစ်သည်။
" ငါအရှင်လည်း ခံစားလိုက်ရသလိုပဲ "
ဝမ်လုံအင်မော်တယ်အရှင်သည်လည်း သူ၏ မျက်လုံးများထဲတွင် တည်ကြည်လေးနက်သော အမူအရာဖြင့် အဝေးသို့ လှမ်းကြည့်လိုက်သည်။
" မျှော်စင်သခင်... ကျွန်တော်တို့ ဆက်ပြီး..... "
ချုံးဟွာထျန်းကျွင်း၏အသံတွင် သူတို့ ရှာဖွေခြေရာခံနေသော ကုချန်နှင့် ဤအရှိန်အဝါတို့ ဆက်စပ်နေမည်ကို စိုးရိမ်နေသကဲ့သို့ စိုးရိမ်ပူပန်မှု အရိပ်အယောင်တစ်ခု ပါဝင်နေလေသည်။
" မင်းက ဘာကို ကြောက်နေတာလဲ... အခုလေးတင် ထွက်လာတဲ့ အရှိန်အဝါက အဲဒီ ကုချန်ဆိုတဲ့ကောင်နဲ့ သက်ဆိုင်နေလိမ့်မယ်လို့ မင်း တကယ်ပဲ ထင်နေတာလား "
ဝမ်လုံအင်မော်တယ်အရှင်သည် ချုံးဟွာထျန်းကျွင်းအား တစ်ချက်ကြည့်လိုက်၍ မထီမဲ့မြင်ပြုလျက် ဆက်ပြောလေသည်။
" ချုံးဟွာ... အဲဒီလောက်ထိ လွန်လွန်ကျွံကျွံ စိုးရိမ်နေစရာ မလိုပါဘူး... စောစောက ပေါက်ကွဲထွက်လာတာက အင်မော်တယ်ဘုရင်အဆင့်နဲ့ ညီမျှတဲ့ အရှိန်အဝါတစ်ခုပဲ.....
ကုချန်ဆိုတဲ့ ကောင်လေးက ဧကရာဇ်အဆင့်မှာ ရှိနေရင်တောင် အင်မော်တယ်ဘုရင်အဆင့်နဲ့ ယှဉ်ရင် အဝေးကြီး လိုနေသေးတယ်... ပြီးတော့ ဒီနေရာက ဟွမ်သွမ့်ပင်လယ်လေ၊ ကောင်းကင်ဘုံအားလုံးမှာ အလျှို့ဝှက်ဆုံးနဲ့ ခန့်မှန်းရအက်ဆုံး နေရာပဲ.....
အင်မော်တယ်ဘုရင်အဆင့်နဲ့ ညီမျှတဲ့ အရှိန်အဝါတစ်ခု ဒီမှာ ပေါက်ကွဲထွက်လာတယ်ဆိုတာ ရှေးဟောင်းအမွေအနှစ် တစ်ခုခု ပေါ်လာလို့လည်း ဖြစ်နိုင်တာပဲ... ဒါက ငါတို့အတွက် တစ်သက်မှာ တစ်ခါကြုံရခဲတဲ့ အခွင့်အရေးကြီးပဲဟာကို... ဘာကို ကြောက်နေစရာ လိုသေးလို့လဲ "
ဟုတ်ပေသည်။ ဤနေရာသည် ဟွမ်သွမ့်ပင်လယ်ဖြစ်ရာ တကယ်ပင် ကောင်းမွန်သော ကံကြမ္မာအကျိုးပေး တစ်ခုခု ရှိလာနိုင်ကောင်းသည်။
ဝမ်လုံအင်မော်တယ်အရှင်၏စကားကို ကြားပြီးနောက် ချုံးဟွာထျန်းကျွင်း၏ရင်ထဲမှ စိုးရိမ်ပူပန်မှုများမှာ အတန်ငယ် လျော့ပါးသွားခဲ့ရသည်။ ၎င်း၏နေရာတွင် အနည်းငယ် မျှော်လင့်တကြီး ဖြစ်နေသော အရိပ်အယောင်များ အစားထိုး ဝင်ရောက်လာခဲ့တော့သည်။