သူက ဒဏ်ရာ အခုသုံးရာကျော်ကို ခံလိုက်ရပေမဲ့ သေစေနိုင်တဲ့ဒဏ်ရာမျိုး မရထားပါဘူး

ထိုနေ့ မွန်းလွဲပိုင်းတွင်

အပြင်စည်း ပြိုင်ပွဲကို စီစဉ်ထားသည့်အတိုင်း ပြန်လည် စတင်ခဲ့သည်။

ဝမ်ပေါင်လဲ့ စင်မြင့်ပေါ်သို့ အားအင်ပြည့်ဝစွာဖြင့် တက်လာသည်ကို မြင်သောအခါ သူ၏ ဓားကိုပင် တည်ငြိမ်အောင် မကိုင်နိုင်တော့သည့် ကျန်းချန်က ချက်ချင်း အရှုံးပေးရန် ရွေးချယ်လိုက်သည်။

ဗိုလ်လုပွဲသည်လည်း အလားတူပင် ပြီးဆုံးသွားခဲ့သည်။ ဝူမင် သတိမလည်သေးသလို လျူလီသည်လည်း စင်ပေါ်ရောက်သည်နှင့် တစ်ပြိုင်နက် အရှုံးပေးလိုက်သည်။

ပွဲစဉ်နှစ်ခုစလုံးသည် တရားဝင် လုပ်ထုံးလုပ်နည်းများ အပါအဝင်မှ အမွှေးတိုင် တစ်တိုင်စာ လောင်ကျွမ်းချိန်မျှသာ ကြာမြင့်ခဲ့သည်။

ထို့ကြောင့် ယခုနှစ်၏ အပြင်စည်း ဗိုလ်လုပွဲကို တပည့်များကြားတွင် အမွှေးတိုင်တစ်တိုင် ဗိုလ်လုပွဲ ဟု နောက်ပြောင်ခေါ်ကြတော့သည်။

အပြင်စည်း ပြိုင်ပွဲကြီး ပြီးဆုံးသွားသည်နှင့် နောက်တစ်နေ့တွင် အတွင်းစည်း၏ ထိပ်သီးတစ်ရာ ပြိုင်ပွဲကို စတင်တော့သည်။

ချူဖုန်းသည် ချောင်ရို့ချန်နှင့် ချင်းချင်းတို့၏ ပွဲများကို စောင့်ကြည့်ရန် ကြေးမုံရေကန်၏ ပွဲကြည့်စင်သို့ စောစီးစွာ ရောက်လာသည်။

ပထမဆုံး ထွက်ပေါ်လာသူမှာ ချင်းချင်းဖြစ်ပြီး သူမ၏ ပြိုင်ဘက်က အခြားသူမဟုတ်ဘဲ မိတ်ဆွေဟောင်းဖြစ်သည့် လင်းဇီထုံ ပင် ဖြစ်သည်။

သူတို့၏ ပွဲ မစတင်မီ တစ်ဖက်လူ၏ အမည်ကို ကြားလိုက်ရချိန်တွင် နှစ်ဖက်၏ အမူအရာများမှာ ကွဲပြားနေသည်။

ချင်းချင်းက သူ့ကို လုံးဝ မမှတ်မိသည့်အလား တည်ငြိမ်နေသည်။

လင်းဇီထုံကမူ သူ၏ မျက်လုံးများကို မှေးကျဉ်းလိုက်ပြီး အမူအရာမှာ အထူးပင် တင်းမာနေ၏။ ဝမ်တောက်ကျောင်းတော်သို့ ဝင်ရောက်ပြီးနောက် လအနည်းငယ်အတွင်းမှာပင် သူသည် စစ်မှန်ကံကြမ္မာအဆင့်သို့ တက်နိုင်ခဲ့သည်။

ထူးချွန်သော ဆရာတစ်ဦး၏ လမ်းညွှန်မှုဖြင့် သူ၏ ကျင့်ကြံခြင်းက လျင်မြန်စွာ တိုးတက်လာခဲ့ပြီး ကိုယ်ပိုင် လှံဆန္ဒကိုပင် နားလည်သဘောပေါက်ခဲ့သည်။

အတွင်းစည်း၏ ထိပ်သီးတစ်ရာထဲသို့ မနည်း ဝင်ရောက်ခဲ့ရသော်လည်း ထိုရလဒ်အပေါ် သူ ကျေနပ်နေခဲ့ပြီပင်။ တစ်ပွဲလောက် ယှဉ်ပြိုင်ခွင့်ရလျှင်ပင် လုံလောက်ပြီဖြစ်ကာ နောင်တရစရာ မရှိတော့ချေ။

သူ မမျှော်လင့်ထားခဲ့သည်မှာ သူ၏ ပထမဆုံး ပွဲစဉ်မှာပင် ချင်းချင်းနှင့် ရင်ဆိုင်ရမည် ဟူသောအချက် ဖြစ်သည်။ လွန်ခဲ့သော လအနည်းငယ်အတွင်း သူမအကြောင်း သတင်းများကို သူ မနည်းမနော ကြားသိခဲ့ရပါသည်။

အထူးသဖြင့် သူမ နတ်ဘုရား ခန္ဓာကိုယ်ကို နိုးထခဲ့သည့်နေ့က ထိုသတင်းမှာ ကျောင်းတော်တစ်ခုလုံးကို တုန်လှုပ်သွားစေခဲ့သည်။ သူ့ကို အမြဲ မျက်နှာသာပေးခဲ့သည့် သူ၏ဆရာ အကြီးအကဲချီ ပင် သက်ပြင်းရှည်ကြီးကိုသာ ချနိုင်ခဲ့သည်။

အကြီးအကဲချီက မည်သည့် စိတ်ပျက်မှုမျိုးကိုမျှ မပြသခဲ့သော်လည်း လင်းဇီထုံသည် သူ့ဆရာ၏ မျက်လုံးထဲမှ နှမြောတသဖြစ်မှုကို ရှင်းလင်းစွာ မြင်တွေ့ရသည်။

၎င်းကို တွေးမိရင်း သူသည် ရေကန်မျက်နှာပြင်ပေါ်သို့ ခြေဖျားဖြင့် ထောက်ပြီး နဂါးပုံစံ ငွေရောင်လှံကို ကိုင်ဆောင်လျက် ခုန်တက်သွားသည်။ တစ်ချိန်တည်းမှာပင် ချင်းချင်းက စင်မြင့်ပေါ်မှနေ၍ ကျက်သရေရှိစွာ ခုန်ဆင်းလာပြီး ရေပြင်အထက်တွင် တင်ပျဉ်ခွေ ထိုင်လိုက်သည်။

“ စီနီယာအစ်ကို လင်း “

ချင်းချင်းက တည်ငြိမ်စွာ ဦးညွှတ်၍ နှုတ်ဆက်လိုက်သည်။

“ ဂျူနီယာညီမလေး ချင်း... မတွေ့ရတာ ကြာပြီ။ ဂျူနီယာညီမလေးက နည်းနည်းလေးတောင် မပြောင်းလဲသွားဘူးပဲ။ ဒီနေ့တော့ ဝမ်တောက်ကျောင်းတော်ကို ရောက်လာပြီး ဘယ်လောက်ထိ တိုးတက်လာလဲဆိုတာ ကြည့်ချင်တယ် “

လင်းဇီထုံ၏ လေသံက ရန်လိုနေပြီး သူ့ထံမှ ကြမ်းကြုတ်ဖွယ်အရှိန်အဝါသည် တစ်မိုင်ပတ်လည်ထိတိုင် ပျံ့နှံ့လာသည်။

ကမ်းစပ်တစ်လျှောက်ရှိ ပွဲကြည့်ပရိသတ်များသည် သူတို့နှစ်ဦးကြားရှိ ရုတ်တရက် တင်းမာသွားမှုကြောင့် အံ့အားသင့်သွားကြပြီး သူတို့ကြားတွင် ဘယ်လို ရန်ငြိုးရန်စမျိုး ရှိနေသနည်းဟု တီးတိုး ပြောဆိုနေကြသည်။

“ စီနီယာအစ်ကို လင်းက ပုံမှန်ဆို လူကြီးလူကောင်း တစ်ယောက်ပါ။ ဒီနေ့ ဘာလို့ ဒီလောက် ရန်လိုနေရတာလဲ “

“ မင်း မသိဘူးလား။ သူ့မျက်နှာချင်းဆိုင်က မိန်းကလေးက ဌာနမှူးချူ ကိုယ်တိုင် ရွေးချယ်ခဲ့တဲ့သူလေ “

“ မင်းဆိုလိုတာက စီနီယာအစ်မချင်းက အဲဒီကလား “

“ ရှူး... စကားကို ဆင်ခြင်ပြော။ တချို့ကိစ္စတွေက အသံထွက်ပြီး မပြောသင့်ဘူး “

ပွဲကြည့်စင်ပေါ်တွင် ချောင်ရို့ချန်နှင့် အခြားသူများပင် လင်းဇီထုံ၏ ရုတ်တရက် ရန်လိုလာမှုကြောင့် ဇဝေဇဝါ ဖြစ်သွားကြသည်။

ချောင်ရို့ချန်က ချူဖုန်းဘက်သို့ လှည့်ကာ မေးလိုက်သည်။ “ ဆရာ... ဒီ လင်းဇီထုံဆိုတဲ့ ကောင်ကလေ... ဟိုလူတွေထဲက တစ်ယောက်တော့ မဟုတ်ပါဘူးနော် “

ချူဖုန်း ပြုံးလိုက်သည်။ “ သေချာပေါက် မဟုတ်ဘူး။ သူနဲ့ ချင်းအာက ဝမ်တောက်မြို့မှာတည်းက သိခဲ့ကြတာ “

ချောင်ရို့ချန် ချက်ချင်း သဘောပေါက်သွားပြီး ရယ်မောလိုက်သည်။ “ အဲဒီတုန်းက ဥပဒေဌာနက လုခေါ်သွားတဲ့ တပည့်ဆိုတာ သူပဲကိုး “

ထိုစကားကြောင့် ဝမ်ပေါင်လဲ့၏ စပ်စုလိုစိတ်များ နိုးကြားလာသည်။ သူ အတင်းအဖျင်း စတင်ပြောတော့မည့် ဆဲဆဲမှာပင် ရေကန်ပေါ်မှ ချင်းချင်း၏ အသံ ရုတ်တရက် ထွက်ပေါ်လာသည်။

“ ကောင်းပါပြီ။ စီနီယာအစ်ကိုက အဲဒီလောက်တောင် မြင်ချင်နေမှတော့ ကျွန်မကလည်း ပြပေးရတာပေါ့ “

စကားပြောနေရင်း ချင်းချင်းသည် သူမ၏ လက်ချောင်းများကို ဇီသာပေါ်တွင် တင်လိုက်ပြီး ကြိုးများကို ညင်သာစွာ တီးခတ်လိုက်သည်။

ဒေါင်... ဒေါင်... ဒေါင်...

သာယာနာပျော်ဖွယ်ကောင်းသော တေးသွားများ ထွက်ပေါ်လာသည်။

အသံလှိုင်းများသည် လင်းဇီထုံထံသို့ တိုးဝင်သွားသော်လည်း သူက နဂါးပုံစံ ငွေရောင်လှံကို ပေါ့ပေါ့ပါးပါး လွှဲယမ်းကာ ဝင်လာသော တိုက်ခိုက်မှုကို အလွယ်တကူ ပိတ်ဆို့လိုက်သည်။

“ ဒါပဲလား “

လင်းဇီထုံက သရော်လိုက်ပြီးနောက် ရုတ်တရက် ရှေ့သို့ တိုးကာ လှံဖြင့် ပြင်းထန်စွာ ထိုးစိုက်လိုက်သည်။

“ နဂါးဟိန်းဟောက် ဖျက်ဆီးခြင်း “

လှံချက်က နဂါးတစ်ကောင်ကဲ့သို့ ထွက်သွားသည်။

တိုက်ခိုက်မှုသည် ဟိန်းဟောက်သံကြီးနှင့်အတူ လေထုကို ဆုတ်ဖြဲသွားပြီး လုံးဝ တားဆီး၍ မရတော့ဟန်ပင်။

ဒုန်း...

ချင်းချင်းသည် ဇီသာကြိုးများကို လက်နှစ်ဖက်ဖြင့် ပြင်းထန်စွာ တီးခတ်လိုက်သည်။ ပဲ့တင်ထပ်သွားသော အသံလှိုင်းသည် လင်းဇီထုံ၏ လှံစွမ်းအားကို ချက်ချင်း ဖျက်ဆီးပစ်လိုက်ပြီး သူ့ထံသို့ တည့်မတ်စွာ ဝင်ဆောင့်သွားတော့သည်။

ဖူး...

လင်းဇီထုံသည် နောက်သို့ လွင့်ထွက်သွားရင်း သွေးတစ်ပွက် အန်ထုတ်လိုက်ရသည်။ သို့သော် ရေကန်မျက်နှာပြင်နှင့် မထိမီမှာပင် သူ၏ အမြင်အာရုံများမှာ အမှောင်အတိကျသွားပြီး သတိလစ်သွားတော့သည်။

သို့တိုင် ရေကန်ပေါ်ရှိ တေးဂီတမှာ ရပ်တန့်မသွားခဲ့ပေ။ လင်းဇီထုံသည် ရေမှ ခုန်တက်လာသော ငါးတစ်ကောင်ကဲ့သို့ ခန္ဓာကိုယ် ကွေးညွတ်လျက် လေထဲတွင် တွဲလောင်းဖြစ်နေရှာသည်။

ဇီသာမှ တေးသွားတစ်ချက် ထွက်ပေါ်လာတိုင်း သူ၏ ခန္ဓာကိုယ်ပေါ်တွင် ဒဏ်ရာအသစ် တစ်ခု ပေါ်လာတော့သည်။

ကြည့်ရှုနေကြသော တပည့်များသည် စကားမပြောနိုင်အောင် ဆွံ့အသွားကြသည်။ စီနီယာအစ်မချင်းသည် နူးညံ့သိမ်မွေ့ပုံပေါ်သဖြင့် သူမ ဤမျှ ကြမ်းကြုတ်စွာ တိုက်ခိုက်လိမ့်မည်ဟု မည်သူမျှ မမျှော်လင့်ထားခဲ့ကြချေ။

နောက်ဆုံး တေးသွား အဆုံးသတ်သွားသောအခါ ချင်းချင်းသည် ဇီသာကြိုးများကို တီးခတ်ခြင်းမှ ရပ်တန့်လိုက်သည်။

ဗွမ်း...

လင်းဇီထုံ ရေကန်ထဲသို့ ပြုတ်ကျသွားတော့သည်။

ဆက်မကြည့်နိုင်တော့သည့် ဒိုင်လူကြီးက အလျင်အမြန် ကြေညာလိုက်သည်။ “ ချင်းချင်း အနိုင်ရပါတယ် “

ချင်းချင်းသည် မတ်တပ်ရပ်ကာ ဒိုင်လူကြီးကို ဦးညွှတ်လိုက်ပြီးနောက် အင်္ကျီလက်ကို ကျက်သရေရှိစွာ ဝှေ့ယမ်းရင်း ပွဲကြည့်စင်ဘက်သို့ ပျံသန်းသွားသည်။

ဥပဒေဌာနမှ တပည့်များသည် လင်းဇီထုံကို ဆယ်ယူရန်အတွက် ရေကန်ထဲသို့ ချက်ချင်း ခုန်ဆင်းသွားကြသည်။

အကြီးအကဲချီ အပြေးရောက်လာပြီး စိုးရိမ်တကြီး မေးလိုက်သည်။ “ ဇီထုံ အခြေအနေ ဘယ်လိုနေလဲ “

လင်းဇီထုံ၏ အခြေအနေကို စစ်ဆေးနေသော တပည့်တစ်ယောက်က ပြန်ဖြေလိုက်သည်။ “ ဆရာ... စီနီယာအစ်ကို လင်းက အဆင်ပြေပါတယ်။ ဒါပေမဲ့... “

အကြီးအကဲချီက တပည့်ဖြစ်သူ တုံ့ဆိုင်းနေသည်ကို မြင်သောအခါ ချက်ချင်း ဒေါသထွက်သွားသည်။ “ မြန်မြန် ပြောစမ်းပါ။ “

တပည့်ဖြစ်သူက ပြန်ဖြေသည်။ “ စီနီယာအစ်ကို လင်းဆီမှာ ဒဏ်ရာ အခု သုံးရာကျော် ရှိနေပါတယ် “

လူအုပ်ကြားထဲ အံ့သြသံများ ပျံ့နှံ့သွားသည်။

‘ စီနီယာအစ်မချင်းက လက်ရဲဇက်ရဲပဲ ‘

အကြီးအကဲချီ၏ အသံက အေးစက်သွားသည်။ “ ကျွင်းချိုက်... မင်းက အဲဒါကို အဆင်ပြေတယ်လို့ ခေါ်တာလား “

လီကျွင်းချိုက်က ဘာမှမတတ်နိုင်စွာ ပြန်ဖြေလိုက်သည်။ “ ဆရာ... စီနီယာအစ်ကို လင်းရဲ့ ဒဏ်ရာတွေ အားလုံးက အပေါ်ယံ တွေချည်းပါပဲ။ သူ အနာရှိန်ကြောင့် သတိလစ်သွားရုံပါ။ နားခိုင်းလိုက်ရင် မနက်ဖြန်ကျ ပြန်သက်သာလာပါလိမ့်မယ် “

အကြီးအကဲချီ “ ... “

သူ ဒေါသပေါက်ကွဲချင်နေသော်လည်း ဘယ်ကနေ စရမှန်း မသိဖြစ်သွားသည်။

ကြည့်ရှုနေသူများသည် အသက်ပြင်းပြင်း ရှူသွင်းလိုက်မိကြသည်။ ယခုတော့ လူလိမ်လူကောက်တစ်ယောက်ကို စော်ကားမိခြင်းထက် မိန်းမတစ်ယောက်ကို စော်ကားမိခြင်းက အဘယ်ကြောင့်ပို၍ ကြောက်စရာကောင်းမှန်း နားလည်သွားသည်။ နောက်တစ်ခါ စီနီယာအစ်မ ချင်းနှင့် လမ်းတွင်ဆုံမိပါက ရှောင်သွားတာက ပိုကောင်းပေမည်။ နောက်တစ်ကြိမ်ဆိုလျှင် ဒဏ်ရာအခု သုံးရာကျော်လောက်နဲ့ ပြီးချင်မှ ပြီးတော့ ပေမည်။

“ သွားကြစို့ “ အကြီးအကဲချီက ဘာမှမတတ်နိုင်သော အမူအရာဖြင့် ပြောလိုက်သည်။ ဤနေရာတွင် ဆက်နေခြင်းက ပို၍ အရှက်ကွဲရုံသာရှိသည်။ ဇီထုံအနေဖြင့် ဤအရှုံးကို အရမ်းကြီး ခံစားမနေရန်သာ သူ မျှော်လင့်ရတော့သည်။

ချင်းချင်းအပေါ် ရန်ငြိုးထားရန်မှာမူ ရိုးရိုးသားသား ပြောရလျှင် သူ ထိုသို့ မခံစားရပေ။ သူမက ထိန်းချုပ်ပေးထားခဲ့သည်မှာ ထင်ရှားနေသည်။ အကယ်၍ သူသာ ရန်ငြိုးဆက်ထားနေပါက ပို၍ သဘောထားသေးသိမ်သွားရုံသာ ရှိပေမည်။

ပွဲကြည့်စင်ပေါ်တွင် ချူဖုန်းနှင့် အခြားသူများက ချင်းချင်း ပြန်ရောက်လာသည်ကို ကြိုဆိုလိုက်ကြသည်။

“ ချင်းအာ... ကောင်းကောင်း လုပ်နိုင်ခဲ့တယ် “

“ ပထမဆုံး ပွဲကို အနိုင်ရသွားတဲ့အတွက် ဂုဏ်ပြုပါတယ် ဂျူနီယာညီမလေး ချင်း “

“ စီနီယာအစ်မ ချင်း...တကယ် အံ့ဩစရာပဲဗျာ “

ချင်းချင်းသည် အသာအယာ ပြုံးလိုက်သည်။ “ ဆရာနဲ့ စီနီယာအစ်ကိုတို့က ကျွန်မကို အရမ်း မြှောက်ပင့်နေကြပါပြီ။ ကျွန်မက သန်မာနေတာ မဟုတ်ပါဘူး။ လင်းဇီထုံက သိပ်မတိုးတက်လာခဲ့လို့ပါ “

လူတိုင်း ရယ်မောလိုက်ကြပြီး နောက်ပွဲစဉ် စတင်မည့်အချိန်ကို စောင့်ဆိုင်းနေကြသည်။

နောက်ထပ် သုံးရက်အတွင်း ချင်းချင်းနှင့် ချောင်ရို့ချန် နှစ်ဦးစလုံးသည် ပြိုင်ပွဲတစ်လျှောက် စိန်ခေါ်သူ အားလုံးကို အနိုင်ယူပြီး အတားအဆီးမရှိ ကျော်ဖြတ်ကာ ထိပ်သီးလေးဦးစာရင်းသို့ တက်လှမ်းသွားနိုင်ခဲ့ကြသည်။

ကံကောင်းထောက်မစွာဖြင့် သူတို့နှစ်ဦးသည် အကြိုဗိုလ်လုပွဲတွင် အချင်းချင်း မဆုံတွေ့ခဲ့ကြချေ။

တစ်ချိန်တည်းမှာပင် အဓိကတပည့် ပြိုင်ပွဲ၏ ထိပ်သီးတစ်ရာ တိုက်ပွဲကြီး စတင်တော့မည် ဖြစ်သည်။

မနက်ဖြန်တွင် အတွင်းစည်း ပြိုင်ပွဲ ပြီးဆုံးသွားသည်နှင့် ဝမ်တောက်ကျောင်းတော် ပြိုင်ပွဲ တစ်ခုလုံး၏ အဓိကပွဲစဉ်ကြီးက နောက်ဆုံးတွင် စင်မြင့်ထက်သို့ ရောက်ရှိလာတော့မည် ဖြစ်သည်။