အခန်း (၈၁-၈၂)

အခန်း။ ၈၁

မကြာမီမှာပင် မိန်းကလေးငယ် ယွီကျွမ်းသည် အသီးတစ်ရာ ဖျော်ရည်သုံးခွက်ကို သယ်ဆောင်ကာ ပြန်လည်ရောက်ရှိလာသည်။ ဤဖျော်ရည်တွင် ရှားပါးသစ်သီးများ ပါဝင်

သည့်အပြင် ကျန်းဟူလောကမှ နာမည်ကျော် ဆရာဝန်တစ်ဦး၏ လျှို့ဝှက်ချက်နည်းလမ်းကို အသုံးပြုထားသည်။ ၎င်း၏ အရည်အခြေခံကို နေ့ရောညပါ အချိန်အတော်ကြာအောင် ကျိုချက်ထားရသဖြင့် ဈေးနှုန်းမှာလည်း အတော်ပင် ကြီးမားလှသည်။

သူမသည် စုယောင်ကို သတိပြုမိပြီးဖြစ်ကာ သူမသည်လည်း သခင်ကြီး၏ မိတ်ဆွေတစ်ဦးဟု ထင်မှတ်ထားသဖြင့် သူမအတွက်ပါ တစ်ခွက် အပိုသယ်လာခဲ့ခြင်း ဖြစ်သည်။

သို့သော် စုယောင်က ခေါင်းယမ်းကာ ငြင်းပြောလိုက်သည်။ သူမသည် အချိုအရသာကို မမြည်းစမ်းခဲ့သည်မှာ ကြာပြီဖြစ်သည်။ သူမ၏ နှလုံးသားထဲမှ ခါးသီးမှုများကို အချိုဓာတ်ဖြင့် မျိုချ၍ရနိုင်မည် မဟုတ်ပေ။

"ငါတို့ဂိုဏ်းက အကြီးအကဲတွေကို အရင်သွားအကြောင်းကြားလိုက်ဦးမယ်"

ထိုသို့ပြောကာ စုယောင်က ထရပ်လိုက်သည်။

စုန်ယန်က "ငါ့ကို ကတိပေးထားတဲ့ကိစ္စကိုတော့ မမေ့နဲ့ဦး" ဟု သတိပေးလိုက်ရာ စုယောင်က အေးစက်စွာပင် "ငါ့အသက်နဲ့ ရင်းပြီး အာမခံပါတယ်" ဟု ပြန်ဖြေသည်။

စုန်ယန်မှာ ဆွံ့အသွားပြီး "အသက်နဲ့အသေအလဲတွေ မလုပ်ပါနဲ့... အလေးအနက်ထားဖို့ပဲ ပြောတာပါ" ဟု ပြန်ပြောလိုက်သည်။

စုယောင်သည် လှည့်ထွက်သွားတော့သည်။ စုန်ယန်က သူ၏ ယခင်က ကျောက်စိမ်းဆွဲပြားတစ်ခုကို ထုတ်ယူကာ ချောင်ယွီကျွမ်း၏ လက်ထဲသို့ ထည့်ပေးလိုက်သည်။ ထို့နောက် သူမဘက်သို့ ကိုင်းညွတ်ကာ တိုးတိုးလေး ကပ်ပြောလိုက်သည်

"သူမနာမည်က စုယောင် လို့ ခေါ်တယ်။ နန်ဝူဓားဂိုဏ်းက စုမိသားစုရဲ့ သတ္တမမြောက် သမီးပေါ့။ အကယ်၍ မင်းသာ ဝူနိုင်ငံထဲကို ရောက်ခဲ့ရင် ဒီကျောက်စိမ်းကိုပြလိုက်။ တစ်စုံတစ်ယောက်က မင်းကို သူမဆီ ခေါ်သွားလိမ့်မယ်။ သူမက မင်းကို စောင့်ရှောက်ပေးလိမ့်မယ်"

အသီးဖျော်ရည်ကို အရသာခံသောက်နေသော ယွီကျွမ်းလေးမှာ ဤမျှ မျှော်လင့်မထားသော သတင်းစကားကြောင့် မျက်လုံးလေးများ ပြူးသွားပြီး ကြောင်အမ်းကာ ကျန်ရစ်ခဲ့သည်။

စုန်ယန်က "ငါပြောတာကို မှတ်ထားနော်" ဟု ထပ်လောင်းပြောလိုက်ရာ ယွီကျွမ်းလေးက ဘာမှနားမလည်သော်လည်း စက်ရုပ်တစ်ရုပ်လိုပင် ခေါင်းကို အသာအယာ ငြိမ့်ပြရှာသည်။

ယွီကျွမ်းလေးသည် စိတ်ဓာတ်ပိုင်းဆိုင်ရာအရသာ တောင့်တင်းသွားတတ်သော်လည်း ငတုံးမဟုတ်ပေ။ သူမသည် စုန်ယန် ခုနကပြောသွားသည်များကို အသံတိုးတိုးလေးဖြင့် တစ်လုံးမကျန် ပြန်လည်ရွတ်ဆိုပြလိုက်သည်။

စုန်ယန်က ကျေနပ်သွားကာ "အဲဒီကျောက်စိမ်းကို သေချာဝှက်ထားနော်" ဟု ထပ်လောင်းမှာကြားလိုက်သည်။

ယွီကျွမ်းလေးသည် ခေါင်းညိတ်ပြရင်း ကျောက်စိမ်းကို ဂရုတစိုက် သိမ်းဆည်းလိုက်သော်လည်း မျက်မှောင်ကြုတ်လျက် အလေးအနက် စဉ်းစားခန်းဝင်သွားတော့သည်။ မည်သို့သော အခြေအနေမျိုးတွင် ဤကျောက်စိမ်းကို အသုံးပြုရမည်ကို သူမ မသိသလို သခင်ကြီးက သူမအား ဤပစ္စည်းပေးရခြင်း၏ ရည်ရွယ်ချက်ကိုလည်း နားမလည်နိုင်ပေ။

ရှစ်နှစ်တာမျှ ကြုံတွေ့ခဲ့ရသော ငရဲခန်းအလား ဘဝသည် သူမ၏ စိတ်ထဲမှ ထွက်ပြေးချင်သည့် အတွေးအာရုံများကို ဖျောက်ပစ်ခဲ့ပြီးဖြစ်သည်။ သူမအား လွတ်မြောက်ရန် ကူညီပေးမည့်အရာမှန်သမျှကို သူမက စမ်းသပ်မှု တစ်ခုအဖြစ်သာ မြင်ယောင်နေမိသည်။

လွန်ခဲ့သော နှစ်အနည်းငယ်က သူမ ထွက်ပြေးရန် ကြိုးစားခဲ့ဖူးသည်။ တစ်ခါက တောင်အောက်ဆင်းလမ်းတွင် လူသူကင်းရှင်းနေစဉ် သူမ၏အစ်မက သူမအား လက်တွဲ၍ တစ်လှမ်းချင်း ခေါ်ဆောင်သွားခဲ့သည်။ တောင်တံခါးဝသို့ ရောက်လုနီးနီးအချိန်တွင် နောက်ဘက်မှ ဆူညံသံများ ထွက်ပေါ်လာခဲ့သည်။

သူမ၏အစ်မမှာ သိုင်းပညာအနည်းငယ် တတ်ကျွမ်းသူဖြစ်ရာ လက်နက်ကို ဝှေ့ယမ်းလျက် သူမအား အသည်းအသန် ကာကွယ်ပေးခဲ့သည်။

"ပြေး... မြန်မြန်ပြေးတော့"

ထိုသို့အော်ဟစ်ကာ သူမအား လွတ်မြောက်အောင် ကြိုးစားပေးခဲ့သည်။

သူမသည် ထိတ်လန့်တကြား အသည်းအသန် ပြေးလွှားခဲ့သော်လည်း နောက်ဆုံးတွင် ပြန်လည်ဖမ်းဆီးခြင်း ခံခဲ့ရသည်။ ယုတ်မာလှသော မိစ္ဆာဂိုဏ်းမှ တပည့်မတစ်ဦးက သူမ၏ အရေပြားကို အပ်ဖြင့် တစ်ချက်ချင်း ထိုးနှက်ခဲ့သည်။ ထိုအပ်တွင် အလွန်တရာ နာကျင်စေသော အဆိပ်များ လူးထားရာ သူမခမျာ နာကျင်လွန်းသဖြင့် အော်ဟစ်နေရစဉ် ထိုမိစ္ဆာဂိုဏ်းဝင်က လှောင်ပြုံးပြုံးလျက် ပြောခဲ့သည်မှာ "ဒါတွေအားလုံးက နင့်ကို စမ်းသပ်တာပဲ။ နင်သာ ထွက်မပြေးရင် ဘာမှဖြစ်မှာ မဟုတ်ဘူး" ဟူ၍ပင်။

တဖြည်းဖြည်းနှင့် သူမ ယဉ်ပါးသွားခဲ့သည်။ သူမကိုယ်သူမ အချိန်မရွေး သေနိုင်သော၊ နေ့စဉ်ရက်ဆက်သာ အသက်ရှင်နေရသော အောက်ခြေလူတန်းစား ပုရွက်ဆိတ်တစ်ကောင်အဖြစ်သာ သတ်မှတ်ထားတော့သည်။ မည်မျှကြာကြာ အသက်ရှင်ရမည်ဆိုသည်မှာ သခင်ကြီး၏ အလိုဆန္ဒအပေါ်တွင်သာ လုံးဝမူတည်နေသဖြင့် သူမသည် သခင်ကြီးအား အစွမ်းကုန် စိတ်ချမ်းသာအောင် ထားရမည်ဖြစ်ပြီး ပြောသမျှစကားကိုလည်း နားထောင်ရမည်ဟု ခံယူထားသည်။

သူမသည် စုန်ယန်အား စိတ်ချမ်းသာအောင် အစွမ်းကုန် ကြိုးစားနေသည်ဟု ယုံကြည်ထားပြီး စုန်ယန်၏ သူမအပေါ် ထားရှိသော သဘောထားကြောင့် "သခင်ကြီးကို ဖားရသည့်စာမေးပွဲတွင် သူမ အမှတ်ကောင်းကောင်း ရထားသည်" ဟု တွေးတောမိကာ သူမသည် အသက်ရှည်ရှည် နေရဦးမည်ဟုလည်း စိတ်ချနေခဲ့သည်။

ဒါပေမဲ့ ဒီကျောက်စိမ်းဆွဲပြားက ဘာကို ဆိုလိုတာလဲ။

သခင်ကြီးက ငါထွက်ပြေးမလားဆိုတာကို ထပ်ပြီး စမ်းသပ်နေတာလား။

ယွီကျွမ်းလေး၏ ဦးနှောက်ငယ်လေးထဲတွင် ရှုပ်ထွေးလှသော အတွေးများဖြင့် ပြည့်နှက်နေတော့သည်။

စုန်ယန်သည် အဝေးသို့ တစ်ချက်လှမ်းကြည့်လိုက်ရင်း တစ်စုံတစ်ခုကို ရုတ်တရက် သတိရသွားသည်။ သူက ပတ်ဝန်းကျင်ကို ဝေ့ကြည့်လိုက်ရာ မလှမ်းမကမ်းရှိ အေးစက်သော စမ်းအိုင်

ချိုင့်ဝှမ်းမှ တံတားကလေးတစ်ခုပေါ်တွင် အကြည့်က ရပ်တန့်သွားသည်။

ဈေးကွက်၏ ခင်းကျင်းပြင်ဆင်ထားမှုအရ တံတားတစ်ဝိုက်တွင် ကျောက်သားခုံတန်းရှည် အများအပြားကို ထားရှိပေးထားသည်။ ကျွမ်းကျင်လှသော ကျန်းဟူ လက်မှုပညာရှင်များ ဖန်တီးထားသည့် အရောင်စုံမီးအိမ်များမှာလည်း ဝန်းကျင်တစ်ခုလုံးကို လင်းထိန်စေသည်။ အရောင်ငါးမျိုး ဖြာထွက်နေသော ထိုမီးအလင်းရောင်များမှာ အနီးနားရှိ ထူးကဲမြက်နှင့် ဝိညာဉ်ပန်းများပေါ်သို့ ကျရောက်နေပြီး ပိုမိုတင့်တယ်လှပသော မြင်ကွင်းကို ဖန်တီးပေးထားသည်။

"ယွီကျွမ်း... ခဏနေရင် ဧည့်သည်တွေ လာလိမ့်မယ်။ ဟိုဘက်မှာသွားထိုင်ပြီး စားနှင့်တော့" စုန်ယန်က ရွှေစေ့အချို့နှင့် ထူးကဲကျောက်စိမ်းစေ့တစ်စေ့ကို ထုတ်ပေးလိုက်ရင်း "စားပြီးရင် ဒီနားတစ်ဝိုက်မှာ လျှောက်ကြည့်နေဦး။ ငါခေါ်မှ ပြန်လာခဲ့" ဟု ပြောလိုက်သည်။

ချောင်ယွီကျွမ်းမှာ သခင်ကြီးက သူမကို အနှောင့်အယှက်ဖြစ်သည်ဟု ယူဆသွားပြီဟု ထင်မှတ်ကာ သူမ၏ သစ်သီးဖျော်ရည်နှင့် သခင်ကြီးပေးသော မုန့်ဖိုးကို အမြန်ယူ၍ ထွက်ခွာသွားတော့သည်။

သူမ ထွက်သွားပြီး မကြာမီမှာပင် လမ်းမအဆုံးမှ လူအချို့ အပြေးအလွှား ရောက်ရှိလာကြသည်။

ရှေ့ဆုံးမှ ဦးဆောင်လာသူမှာ ဝတ်ရုံကောင်းများကို ဝတ်ဆင်ကာ ကျောက်စိမ်းခါးပတ် ပတ်ထားသော သဘောကောင်းသည့် အပြုံးပိုင်ရှင် လူလတ်ပိုင်းအရွယ် အမျိုးသားတစ်ဦး ဖြစ်သည်။ စုယောင်မှာမူ ထိုသူ၏နောက်မှ လိုက်ပါလာသူအချို့ထဲတွင် နောက်ဆုံးမှ ကပ်ပါလာသည်။

ထိုလူလတ်ပိုင်းအမျိုးသားမှာ စုန်ယန်အနီးသို့ ချဉ်းကပ်လာပြီး ခေတ္တမျှ စေ့စေ့စပ်စပ် ကြည့်ရှုစစ်ဆေးသည်။ ထို့နောက် အပြုံးကို ဖျတ်ခနဲ သိမ်းဆည်းလိုက်ကာ အလေးအနက်ထားသော လေသံဖြင့် "ညီအစ်ကိုစုန်... မင်း တကယ်ကို ပင်ပန်းဆင်းရဲခဲ့ရတာပဲ" ဟု ပြောလိုက်သည်။

စုန်ယန်က နေရာမှထပြီး "အကြီးအကဲစွန်းကို ဂါရဝပြုပါတယ်" ဟု နှုတ်ဆက်လိုက်သည်။

ထို့နောက် သူတို့နှစ်ဦးမှာ ချက်ချင်းပင် ဝင်ထိုင်လိုက်ကြသည်။

အကြီးအကဲစွန်းမှာ တခြားအကြောင်းအရာများ ဘာမျှမပြောသေးဘဲ စုန်ယန် ကြုံတွေ့ခဲ့ရသော အခက်အခဲများအတွက်သာ ညည်းတွားပြောဆိုနေတော့သည်။ ထို့နောက်တွင် သူလျှိုဘဝဖြင့် ရှင်သန်ရခြင်း၏ ခါးသီးမှုများကို ချဲ့ကားပြောဆိုပြီး "ဂိုဏ်းအနေနဲ့ ဒီလိုညီအစ်ကိုဟောင်းတွေအပေါ်မှာ အကြွေးတင်နေတာပါ။ နောင်တစ်ချိန်မှာ သေချာပေါက် ပြန်လည်ပေးဆပ်ပါ့မယ်" ဟု ကိုယ့်ကိုယ်ကိုယ် အပြစ်တင်သည့်ဟန်ဖြင့် ပြောရှာသည်။

စုန်ယန်မှာမူ ရင်ထဲတွင် အနည်းငယ် ဆွံ့အသွားမိသည်။

သူ့ရှေ့မှ လူက ရိုးသားဖြောင့်မတ်မှု ကင်းမဲ့နေခြင်းပင်။

သူသည် စုယောင် စကားပြောသည့်ပုံစံကိုသာ ပို၍ သဘောကျသည်။ သူမကဲ့သို့ အေးစက်သောသူမျိုးသည် မရိုးသားသော သို့မဟုတ် ဟန်ဆောင်မှုအပြည့်ရှိသော စကားများကို ပြောဆိုသည့်အခါ မိမိကိုယ်ကိုယ် အထင်သေးသည့် အရိပ်အယောင်များ သူမ၏မျက်ဝန်းတွင် အထင်းသား ပေါ်လွင်နေတတ်သောကြောင့်ပင်။

ယခင်က သူ၏ နန်ဝူဓားဂိုဏ်းအပေါ် ထားရှိသော အမြင်မှာ စုယောင်နှင့် သခင်ကြီး စုစန်းကဲ့သို့သော လူများအပေါ်တွင်သာ အခြေခံထားခဲ့သည်။ ထိုသူများမှာ တရားသောလမ်းစဉ်ကို လိုက်နာသူများပီပီ သမာဓိရှိကြသဖြင့် "တကယ့်ကို လေးစားထိုက်တဲ့ ဂိုဏ်းပဲ" ဟု သူ တွေးခဲ့ဖူးသည်။

ထိုကြောင့်ပင် မင်းနေပြည်တော်တွင် မြေခွေးအဘွားအို၏ လက်ထဲသို့ ကျရောက်ခဲ့စဉ်ကပင် မြေခွေးလုပ်ကြံရေးမဟာမိတ်ကို သူ တတ်နိုင်သမျှ ကူညီပေးခဲ့ခြင်းဖြစ်သည်။ တကယ်တမ်းတွင်လည်း သူ၏အကူအညီကြောင့် မဟာမိတ်အဖွဲ့မှာ အရေးသာခဲ့သော်လည်း ပညာချင်း မယှဉ်နိုင်သောကြောင့်သာ နောက်ဆုံးတွင် ကျရှုံးခဲ့ရခြင်းပင်။

ယခု အကြီးအကဲစွန်း၏ အပြုအမူကြောင့် စုန်ယန် တစ်ခုကို သဘောပေါက်သွားသည်။ မည်သည့် အင်အားစုအတွင်းမှာမဆို အသံတစ်မျိုးတည်းသာ ရှိနေသည်မဟုတ်ပေ။

တစ်ဖက်တွင်လည်း အကြီးအကဲစွန်းမှာ သူ၏ စိတ်ရင်းမှန်ကို ဖော်ပြနိုင်သည်ဟု ယူဆရသော စကားများကို အတော်ကြာ ပြောဆိုပြီးနောက် ဘေးပတ်ဝန်းကျင်ရှိ လူများကို ဆုတ်ခွာသွားရန် လက်ရိပ်ပြလိုက်သည်။ ထို့နောက် စုန်ယန်အနီးသို့ တိုးကပ်ကာ အသံကိုနှိမ့်လျက် ပြောလိုက်သည်။

"စုန်လေး... အချိန်တန်ပြီ"

အခန်း။ ၈၂

စုန်ယန်က "ဘယ်အချိန်လဲ" ဟု ပြန်မေးလိုက်သည်။

အကြီးအကဲစွန်းက အသံကို ပိုနှိမ့်လိုက်ပြီး "ကျောက်သားအကြီးအကဲရဲ့ လျှို့ဝှက်

အတတ်ပညာဟာ မိစ္ဆာဂိုဏ်းက ဆင်းသက်လာတာမှန်ပေမဲ့ အဲဒါကို ကောင်းကောင်းအသုံးချနိုင်ရင် လူအများကြီးရဲ့ အသက်ကို ကယ်နိုင်လိမ့်မယ်။ အဲဒါကို ငါ့ကို အမြန်ပေးလိုက်စမ်းပါ။ ငါ ဂိုဏ်းကို ပြန်သယ်သွားပေးမယ်။ မင်းရဲ့ ကြိုးစားအားထုတ်မှုတွေက အချည်းနှီး ဖြစ်မသွားစေရဘူး။ ဓားဂိုဏ်းကလည်း မင်းရဲ့ စွမ်းဆောင်ချက်ကို မှတ်တမ်းတင်ထားမှာပါ"

စုန်ယန်: ...

သူက ခါးသီးစွာ ပြုံးလိုက်ပြီး "အကြီးအကဲ... ဂူဟွမ်ကျီရဲ့ စရိုက်ကို အကြီးအကဲ မသိတာမှမဟုတ်တာ။ ကျွန်တော့်ဆီမှာ အဲဒီပစ္စည်းရှိနေရင်တောင် ဘယ်လိုလုပ် အပြင်ကို ထုတ်လာနိုင်မှာလဲ"

အကြီးအကဲစွန်းက မျက်မှောင်ကြုတ်သွားပြီး "ဒါဆိုရင်လည်း မင်းမှတ်မိသလောက် ချရေးပေး။ ငါတို့ဂိုဏ်းမှာလည်း သုတေသနလုပ်နိုင်တဲ့ အရေခွံပြုပြင်သူတစ်ယောက် ရှိတယ်။ အဲဒီ လျှို့ဝှက်အတတ်ရဲ့ နာမည်၊ အာနိသင်၊ ဘာနဲ့ ပြန်တိုက်ခိုက်လို့ရမလဲဆိုတဲ့ အချက်တွေနဲ့ အဓိက မန္တန်တွေကိုပဲ ရေးပေးရင် ရပါပြီ"

စုန်ယန်သည် သက်ပြင်းတစ်ချက်ကို အရှည်ကြီးချလိုက်ပြီး စကားစစ်ထိုးပွဲကို စတင်တော့သည်။ သူသည် အပေါ်ယံတွင် နန်ဝူဓားဂိုဏ်း၏ သူလျှိုတစ်ဦးအဖြစ် ဟန်ဆောင်နေရဆဲဖြစ်ရာ ဤနေရာတွင် မျက်နှာပျက်စရာ မဖြစ်စေရန် ထိန်းသိမ်းနေရသည်။

သို့သော် စကားဝိုင်း ကြာလာသည်နှင့်အမျှ နန်ဝူဓားဂိုဏ်းအပေါ် ထားရှိသော သူ၏ စေတနာမှာ တရှိန်ထိုး ကျဆင်းလာခဲ့သည်။ အနည်းဆုံးတော့ မိစ္ဆာဂိုဏ်းက တန်ဖိုးတူ ပစ္စည်းတစ်ခုခုနဲ့ လဲလှယ်တတ်ကာ သို့မဟုတ်ပါကလည်း ဗြောင်ကျကျ လုယူတတ်သည်။

ယခု စွန်းမိသားစုကမူ သူ၏ ဘေးကင်းရေး သို့မဟုတ် အခြေအနေကို လုံးဝထည့်မတွက်ဘဲဟာလာဟင်းလင်း ကတိကဝတ်များ၊ ကိုယ်ကျင့်တရားဆိုင်ရာ ဖိအားပေးမှုများဖြင့် ပုံသဏ္ဌာန်တစ်ရာ နတ်ဘုရားထိန်းချုပ်မှုကို အလကား ရယူလိုနေကြသည်။

ဒါဟာ ဘယ်လိုမျိုး ဓားသမားတွေရဲ့ စိတ်ဓာတ်လဲ သူတို့ ရူးနေကြတာလား။

ဈေးပွဲတော်နှင့် အလှမ်းဝေးသော တဲနန်းငယ်တစ်ခုတွင်...

ဝတ်ရုံဖြူဝတ် ကျင့်ကြံသူတစ်ဦးနှင့် စက္ကူရုပ်တစ်ခုတို့သည် မျက်နှာချင်းဆိုင် ထိုင်နေကြသည်။ ထိုကျင့်ကြံသူ၏ နားထင်တွင် ဆံပင်ဖြူနှစ်စင် ကျနေပြီး ကျယ်ပြန့်သော လက်အင်္ကျီစများမှာ လေထဲတွင် လွင့်ပျံ့နေကာ လွတ်လပ်ပေါ့ပါးသော အရှိန်အဝါမျိုး ရှိသည်။

စက္ကူရုပ်မှာမူ ပါးပြင်တွင် နီမြန်းသော ဆေးများ ခြယ်သထားပြီး အစိမ်းရောင် ဝတ်ဆင်ထားကာ ထူးဆန်းအေးစက်စွာ ထိုင်နေသည်။

နန်ဝူဓားဂိုဏ်း၏ အကြီးအကဲက အားမနာတမ်း ပြောလိုက်သည်။

"ဂူဟွမ်ကျီ... မြေခွေးတွေကို တိုက်ခိုက်ဖို့ ပြင်ဆင်နေတဲ့ ဒီလိုနေ့မျိုးမှာတောင် မင်းရဲ့ ကိုယ်ပွားက ဒီအနီးအနားမှာ ပုန်းနေတုန်းပဲလား မင်းရဲ့ စိတ်ရင်းမှန်ကို ငါ ဘယ်လိုယုံကြည်ရမလဲ"

စက္ကူရုပ်က ထူးဆန်းသော အသံဖြင့် ပြန်လည်တုံ့ပြန်သည်။

"ခင်ဗျားတို့ရဲ့ ဂိုဏ်းချုပ်ကော ရောက်မလာဘူး မဟုတ်လား ခင်ဗျားတို့မှာကော ဘယ်လို စိတ်ရင်းမျိုး ရှိလို့လဲ"

အကြီးအကဲချုပ်က "ဂိုဏ်းချုပ်က တံခါးပိတ်ကျင့်ကြံနေတယ်" ဟု ပြောလိုက်သည်။

စက္ကူရုပ်ကြီးက ခပ်ယုတ်ယုတ် ရယ်မောလိုက်ပြီး "ခရမ်းရောင်နန်းတော်အဆင့်ရဲ့ နောက်ဆုံးအဆင့်ကို တက်လှမ်းဖို့ ကြိုးစားနေတာလား။ သူ့မှာ လုံလောက်တဲ့ အခြေခံအုတ်မြစ်ကော ရှိရဲ့လား။ တကယ်ရော တတ်နိုင်ပါ့မလား။ ဒါမှမဟုတ်... အဆင့်တက်တာ ကျရှုံးပြီး ဒဏ်ရာရသွားတာလား" ဟု စမ်းသပ်၍ မေးမြန်းလိုက်သည်။

အကြီးအကဲချုပ်က "စုံစမ်းနေဖို့ မလိုပါဘူး။ မြေခွေးတွေကို တိုက်ခိုက်မှာဖြစ်တဲ့အတွက် ငါတို့နှစ်ယောက် ကောင်းကောင်းပူးပေါင်းဆောင်ရွက်သင့်တယ်။ အရာအားလုံးကို မြေခွေးတွေကို ရှင်းလင်းပြီးမှ ဆွေးနွေးကြတာပေါ့"

သူ၏ အကြည့်များမှာ ထက်ရှသော ဓားနှစ်လက်ကဲ့သို့ အေးစက်သွားပြီး "ငါတို့ကြားမှာ ထိပ်တိုက်တွေ့ဆုံမှုက ရှောင်လွှဲလို့မရပေမဲ့ အခုတော့ မဟုတ်သေးဘူး" ဟု ဆက်ပြောလိုက်သည်။

"ကောင်းပြီ... ကောင်းပြီ..."

စက္ကူရုပ်ကြီးသည် ရယ်မောရင်း ယိမ်းထိုးနေပြီးမှ ရုတ်တရက် အပြုံးရပ်ကာ "မဟာမိတ်အဖွဲ့ရဲ့ အဓိကအချက်ကို ပြောကြရအောင်။ အမြီးမြောက်မြားစွာပါတဲ့ နဂါးမြေခွေးက ကြောက်စရာကောင်းပေမဲ့ မိစ္ဆာတစ်ကောင်ဖြစ်တဲ့အတွက် အရမ်းတန်ဖိုးရှိတဲ့ အရင်းအမြစ်တစ်ခုပဲ။

မြေခွေးအဘွားအိုရဲ့ ကိုယ်ထဲမှာ သွေးနှစ်မျိုးရှိတယ်။

တစ်ခုက အမြီးမြောက်မြားစွာပါတဲ့ မြေခွေးမျိုးနွယ်ရဲ့ သွေးပဲ။ အဲဒီသွေးက ထူးကဲချီကို သိုလှောင်ထားနိုင်တယ်လို့ ပြောကြတယ်။ အမြီးသုံးချောင်းရှိရင် ထူးကဲချီကို သုံးကြိမ်တိုင်တိုင် ချက်ချင်းပြန်လည်ပြည့်ဖြိုးစေနိုင်တယ်။ အဲဒါကြောင့်လည်း ငါတို့တစ်ဦးတည်း မတိုက်နိုင်တာပေါ့။

အခြားတစ်ခုကတော့ နဂါးဘိုသွေးပဲ...

ဒါက အပြင်ကနေ ရရှိထားတဲ့ သွေးမျိုးရိုးတစ်ခုပဲ။ ခင်ဗျား အဲဒီအကြောင်း ဘယ်လောက်သိလဲ"

အကြီးအကဲချုပ်က စဉ်းစားလိုက်ပြီး "မင်း သွေးမျိုးစေ့ ရှေးဟောင်းရေကန်အကြောင်း သိလား" ဟု မေးလိုက်သည်။

စက္ကူရုပ်က "ဒါဆို မြေခွေးအဘွားအိုကို သတ်နိုင်ရင်တောင် နဂါးဘိုသွေးကို ရမှာမဟုတ်ဘူးပေါ့။ တောင်နှင့်ပင်လယ် မိစ္ဆာနိုင်ငံမှာ ဒီမျိုးနွယ်ကို အမြီးမြောက်မြားစွာပါတဲ့ နဂါးမြေခွေးလို့ ခေါ်တာကြောင့် သူတို့မျိုးနွယ်စုမှာ နဂါးဘိုသွေးကို ထုတ်ယူနိုင်မယ့် နဂါးဘိုသွေးမျိုးစေ့ ရှေးဟောင်းရေကန် တစ်ခု သေချာပေါက်ရှိရမယ်"

အကြီးအကဲချုပ်က ခေါင်းညိတ်ပြကာ "ငါနားမလည်တာက မြေခွေးအဘွားအိုက ဘာလို့ ဒီနေရာကို ရောက်လာတာလဲ ဆိုတာပဲ"

စက္ကူရုပ်က နှာခေါင်းရှုံ့ကာ "ဘယ်သူသိမှာလဲ။ ဝေဘုရင် ဆိုတဲ့ လူမိုက်က ဒီမှာ စားသောက်ခန်းမ နောက်တစ်ခုရှိတယ်လို့ သွားပြောလို့ ဖြစ်မှာပေါ့"

အကြီးအကဲချုပ်က ခေါင်းကို ဖြည်းညှင်းစွာ ယမ်းလိုက်ပြီး သတိထားရမည့် အမူအရာဖြင့် "တောင်နှင့်ပင်လယ် မိစ္ဆာနိုင်ငံရဲ့ နယ်မြေအကြောင်း... ငါ အနည်းငယ် နားလည်ထားတာ ရှိတယ်။

သူတို့ဆီမှာ အစားအစာက မရှားပါဘူး။ အထူးသဖြင့် နဂါးဘိုသွေးကို စုပ်ယူထားတဲ့ အမြီးမြောက်မြားစွာပါတဲ့ မြေခွေးမျိုးနွယ်က အဲဒီနိုင်ငံမှာ အလယ်အလတ်အဆင့် အင်အားစုတွေဖြစ်လို့ အစာကွင်းဆက်ရဲ့ အောက်ဆုံးမှာ ရှိမနေဘူး။

တကယ်တော့ သူတို့အတွက် ငါတို့ရှိတဲ့နေရာမျိုးကို လာဖို့ လုံးဝမလိုအပ်ဘူး... ဒါပေမဲ့ ဘာလို့ ရောက်လာတာလဲ"

စက္ကူရုပ်က "ဘယ်သူသိမှာလဲ။ လက်တွေ့ကျတဲ့ ကိစ္စတွေကိုပဲ ဆွေးနွေးကြစို့" ဟု ပြတ်ပြတ်သားသား ပြောလိုက်သည်။

"အဲ့ဒါဆိုရင်လည်း ငါတည့်တည့်ပဲ ပြောမယ်။ တကယ်လို့ ငါတို့ မြေခွေးအဘွားအိုကို သတ်နိုင်ခဲ့ရင် သူမရဲ့ အနှစ်သာရသွေးတစ်ဝက်ကို ခင်ဗျားတို့ဆီ ပေးမယ်။ ဒါပေမဲ့... သူမရဲ့ ခန္ဓာကိုယ်တစ်ခုလုံးကိုတော့ ငါတို့ယူမယ်"

အကြီးအကဲချုပ်က ရယ်မောလိုက်ပြီး "နဂါးဘိုသွေးဆိုတာ ကိုင်တွယ်ရလွယ်တဲ့အရာ မဟုတ်ဘူးဗျ။ ခင်ဗျားကော သူ့ရဲ့ အားနည်းချက်ကို သိလို့လား"

စက္ကူရုပ်ကြီး တိတ်ဆိတ်သွားသည်။

ဂူဟွမ်ကျီသည် နိုင်ငံသုံးနိုင်ငံကို ခြိမ်းခြောက်နိုင်သော ဂိုဏ်းချုပ်တစ်ဦး ဖြစ်သော်လည်း ကောင်းကင်တစ်ခုလုံးကို မှောင်အတိကျသွားစေသည့် မြေခွေးမိစ္ဆာ၏ ဧရာမအရိပ်ကြီးနှင့် တောက်လောင်နေသော အဖြူရောင်အမြီးကြီးသုံးချောင်းကို ပြန်တွေးမိတိုင်း မယုံကြည်

နိုင်အောင် ဖြစ်ရဆဲပင်။ အကြောင်းမှာ ထိုစွမ်းအားသည် အခြေခံအားဖြင့် ခရမ်းရောငနန်းတော်အဆင့်၏ စွမ်းအားနှင့်ပင် မတူတော့သောကြောင့် ဖြစ်သည်။

ကြောက်စရာကောင်းလွန်းတယ်...

ပြန်တွေးမိရုံနှင့်ပင် ရင်ထဲ၌ ထိတ်လန့်မှုတို့ ကိန်းအောင်းနေဆဲ ဖြစ်သည်။ သူသည် လူပေါင်းမြောက်မြားစွာကို သတ်ဖြတ်ခဲ့သည့် ရုပ်သေးဂိုဏ်းချုပ် ဖြစ်သော်လည်း ထိုမိစ္ဆာကိုတော့ ကြောက်ရွံ့မိသည်။

အကြီးအကဲချုပ်သည်လည်း ထိုမြင်ကွင်းကို ပြန်လည်အမှတ်ရသွားပုံရပြီး သူ၏နှလုံးသားမှာ သံတုံးဖြင့် အချည်ခံထားရသလို လေးလံသွားကာ အလေးအနက် ပြောလိုက်သည်။

"ခင်ဗျားက အကျိုးအမြတ်အများဆုံးကို လိုချင်တယ်ဆိုတော့ ရုပ်သေးဂိုဏ်းချုပ်မှာ တိုက်ပွဲအစီအစဉ်တစ်ခုခု ရှိပြီးသားဖြစ်ရမယ်။ ပြောပြပါဦး"

စက္ကူရုပ်သည် ခဏမျှ စဉ်းစားပြီးနောက် တိုးတိုးလေး ပြောသည်။

"ငါ သတင်းတစ်ခု ရထားတယ်။ အဲ့ဒီ စုမိသားစု က လူတစ်စု မင်းနေပြည်တော်ကိုသွားပြီး မြေခွေးအဘွားအိုကို လုပ်ကြံတုန်းက သူတို့ လက်ဗလာနဲ့ ပြန်လာခဲ့တာ မဟုတ်ဘူး။

တစ်စုံတစ်ယောက်က မြေခွေးအဘွားအိုဆီကနေ အလွန်တရာ အရေးကြီးတဲ့ အရာတစ်ခုကို ယူဆောင်သွားခဲ့တယ်။ အခု အဘွားအိုက အဲ့ဒီအရာကို နေရာအနှံ့ လိုက်ရှာနေတာ။ အဲ့ဒါ ဘာလဲဆိုတာ ခင်ဗျား သိလား"

အကြီးအကဲချုပ်က ခေါင်းယမ်းလိုက်ပြီး "မဟာမိတ်တွေဖြစ်နေပြီဆိုတော့ ငါ ခင်ဗျားကို ဖုံးကွယ်မထားပါဘူး။ မြေခွေးလုပ်ကြံရေးမဟာမိတ် ထဲက တစ်ယောက်မှ အသက်ရှင်လျက် ပြန်မလာနိုင်ခဲ့သလို ဘာကိုမှလည်း ယူမလာနိုင်ခဲ့ကြဘူး။ ငါ အမှန်အတိုင်း မသိဘူး"

စက္ကူရုပ်က စိတ်တိုသွားပြီး "အဲ့ဒါက ဘာပဲဖြစ်ဖြစ်ပေါ့ဗျာ။ မြေခွေးအဘွားအိုက အဲ့ဒီအရာကို အသည်းအသန် ရှာနေမှတော့ ငါတို့က သတင်းအမှားတစ်ခု လွှင့်လိုက်မယ်။ သူမ ရှာနေတဲ့အရာက ငါ့ရဲ့ ရုပ်သေးဂိုဏ်းနောက်ကွယ်က မိစ္ဆာမြေရိုင်းထဲမှာ ရှိနေတယ်လို့ပေါ့။

အဲ့ဒီမြေရိုင်းက အန္တရာယ်များပြီး ဝိညာဉ်သရဲတွေ အဆုံးမရှိတဲ့နေရာပဲ။ မြေခွေးအဘွားအိုသာ အဲ့ဒီထဲကို ကျသွားပြီး ငါတို့ဂိုဏ်းနှစ်ခုက ဝိုင်းပြီး ခြုံခိုတိုက်ခိုက်မယ်ဆိုရင် သူမမှာ အမြီးသုံးချောင်းရှိပြီး ထူးကဲချီကို ချက်ချင်းပြန်ဖြည့်နိုင်ရင်တောင် အဲ့ဒီမှာပဲ သေရလိမ့်မယ်။ တိုက်ပွဲက ငါ့ဂိုဏ်းနယ်မြေထဲမှာ ဖြစ်မှာဆိုတော့ ငါတို့က အကျိုးအမြတ်အများဆုံး ယူမယ်ဆိုတာ မလွန်ဘူးမလား"

အကြီးအကဲချုပ်က "ခင်ဗျားတို့ရဲ့ မိစ္ဆာမြေရိုင်းထဲမှာ မျက်နှာနှစ်ဖက်ပါသူနဲ့ မီးတောက်သရဲ အစစ်အမှန်လူသားအပြင် တခြား ဘယ်သူရှိသေးလို့လဲ" ဟု မေးလိုက်သည်။

စက္ကူရုပ်က နာမည်တစ်ခုကို တိုးတိုးလေး ရွတ်လိုက်သည်။

"ကျန်းဟန်"

"ကျန်းဟန်... သူ... သူက..."

အကြီးအကဲချုပ်မှာ ဆွံ့အသွားတော့သည်။ အကြောင်းမှာ ထိုနာမည်ပိုင်ရှင်သည် တစ်ချိန်က နိုင်ငံသုံးနိုင်ငံကို စိုးမိုးခဲ့သူဖြစ်ပြီး သူသေဆုံးပြီးနောက်တွင် တရားသောလမ်းစဉ်နှင့် မိစ္ဆာလမ်းစဉ်တို့ကြား ရုတ်ရုတ်သဲသဲ ဖြစ်ခဲ့ရသည်။ သို့သော် သူ၏ခန္ဓာကိုယ်ကို အသုံးပြုပြီး ဝိညာဉ်တစ်ခု ပြန်လည်ရှင်သန်လာလိမ့်မည်ဟု မည်သူကမျှ ထင်မှတ်မထားခဲ့ကြပေ။

ယုတ္တိဗေဒအရ ပြောရလျှင် သက်တမ်းကုန်ဆုံးသွားသော ခန္ဓာကိုယ်တစ်ခုသည် ထူးကဲအမြစ်ရှိနေလျှင်တောင်မှ ဝိညာဉ်တစ်ခုက ဝင်ရောက်ပူးကပ် သိမ်းပိုက်ရန်အလွန်ခဲယဉ်းလှသည်။

အကယ်၍ သိမ်းပိုက်နိုင်ခဲ့လျှင်တောင်မှ ကျင့်စဉ်အဆင့်မှာ အကြီးအကျယ် ကျဆင်းသွားရမည်ဖြစ်ပြီး ခရမ်းရောင်နန်းတော်နှောင်းပိုင်းအဆင့်မှ အစောပိုင်းအဆင့်အထိ ထိန်းထားနိုင်လျှင်ပင် တော်တော်လေး အခြေအနေကောင်းသည်ဟု ဆိုရမည်။

စက္ကူရုပ်ကြီးက ဆိုသည်မှာ "ဝိညာဉ်ကျင့်ကြံသူတွေရဲ့ အကြောင်းကို ငါ သိပ်နားမလည်ပေမဲ့ ကျန်းဟန်ကတော့ လျှို့ဝှက်အတတ်တစ်ခုခုနဲ့ ဝိညာဉ်ကျင့်ကြံသူ ဖြစ်လာတာတော့ အမှန်ပဲ။ ဒါပေမဲ့... သူဟာ အရင်က အကြီးအကဲကျန်း မဟုတ်တော့ဘူး။ သူနဲ့မဆိုင်တဲ့ ဝိညာဉ်တစ်ခု ဖြစ်သွားပြီ။

ကံကောင်းတာတစ်ခုက အဲဒီလျှို့ဝှက်အတတ်ရဲ့ ဘေးထွက်ဆိုးကျိုးတွေက တော်တော်လေး ပြင်းထန်တယ်။ အနည်းဆုံးတော့... သူဟာ မိစ္ဆာမြေရိုင်းရဲ့ ဗဟိုချက်ကနေ အပြင်ကို ထွက်လို့မရဘူး။ တစ်လှမ်းတောင် မခွာနိုင်ဘူး။ သူက အချည်ခံထားရတဲ့ ကြောက်မက်ဖွယ် သရဲတစ်ကောင်လိုပါပဲ"

အကြီးအကဲချုပ်က ခဏမျှ စဉ်းစားပြီးနောက် "ဒါဆို ဒီအစီအစဉ်အတိုင်းပဲ လုပ်ကြတာပေါ့။ ငါတို့ ဂိုဏ်းနှစ်ခုစလုံး ပြင်ဆင်စရာရှိတာပြင်ဆင်ပြီး မိစ္ဆာမြေရိုင်းထဲမှာ ခြုံခိုတိုက်ခိုက်ဖို့..."

သူ စကားပြောနေစဉ်မှာပင် စက္ကူရုပ်ကြီး၏ ထူးဆန်းသော အမူအရာကြောင့် စကားစပြတ်သွားရသည်။

စက္ကူရုပ်ကြီးမှာ အကြီးအကျယ် တုန်လှုပ်ချောက်ချားသွားဟန်ဖြင့် ငြိမ်သက်သွားသည်။ မျက်တောင်မခတ်၊ ပါးစပ်အဟောင်းသားနှင့် ပါးပြင်ပေါ်မှ နီမြန်းသော ဆေးရောင်များမှာ အရေးအကြောင်းများကြောင့် ပို၍ပင် ကြောက်စရာကောင်းနေတော့သည်။ သူသည် မယုံကြည်နိုင်လောက်အောင် တုန်လှုပ်ဖွယ် သတင်းတစ်ခုခုကို ရုတ်တရက် ရရှိလိုက်ပုံပင်။

ဒါပေမဲ့ သူ့လိုဂိုဏ်းချုပ်တစ်ဦးအနေနဲ့ ဒီလောက် အလွယ်တကူ တုန်လှုပ်သွားနိုင်ပါ့မလား။

အကြီးအကဲချုပ်က မနေနိုင်ဘဲ စပ်စုကာ မေးမြန်းလိုက်သည်။

"ဘာဖြစ်လို့လဲ"

စက္ကူရုပ်ကြီးသည် သူ၏ခေါင်းကို စက်ရုပ်တစ်ရုပ်ကဲ့သို့ ဖြည်းညှင်းစွာ လှည့်လိုက်ပြီး သရဲမြင်လိုက်ရသည့် အသံမျိုးဖြင့် "မြေခွေးအဘွားအို... အခု မိစ္ဆာမြေရိုင်းထဲကို ရောက်နေပြီ..."

အကြီးအကဲချုပ်: ဟင်..

စက္ကူရုပ်က ဆက်ပြောသည်။

"သူမက... ငါတို့အားလုံး ဈေးပွဲတော်ဖွင့်ပွဲကို အာရုံရောက်နေတဲ့အချိန်မှာ လျှို့ဝှက်ပြီး ခိုးဝင်သွားတာပဲ"

အကြီးအကဲချုပ်က "ဒါပေမဲ့ သူမက ဘာလို့ မိစ္ဆာမြေရိုင်းထဲကို သွားရတာလဲ။ သူမရှာနေတဲ့ ရတနာက တကယ်ပဲ အဲဒီထဲမှာ ရှိနေလို့လား" ဟု မေးလိုက်သည်။

စက္ကူရုပ်ကြီး ခဏမျှ တိတ်ဆိတ်သွားပြီးနောက် မျက်နှာတစ်ခုလုံး ပျက်ယွင်းသွားကာ စူးစူးဝါးဝါး အော်ဟစ်လိုက်တော့သည်။

ချက်ချင်းဆိုသလိုပင် ဈေးပွဲတော်အတွင်းမှ သက်တံအလင်းတန်း အများအပြား ပျံထွက်သွားကြသည်။ သူတို့မှာ ဈေးပွဲတော်သို့ လာရောက်ကြသော ရုပ်သေးဂိုဏ်း၏ တောင်ထိပ်

သခင်များနှင့် အကြီးအကဲများပင်။ ထိုအလင်းတန်းများသည် စက္ကူရုပ်နှင့်အတူ ရုပ်သေးဂိုဏ်း၏ မိစ္ဆာမြေရိုင်းဆီသို့ အပြင်းအထန် ဦးတည်သွားကြတော့သည်။

အပြင်မှာ ဈေးရောင်းနေတုန်း အိမ်ထဲမှာ အခိုးခံလိုက်ရသလိုခံစားချက်မျိုးမှာ တကယ့်ကို ခါးသီးလှသည်။

အကြီးအကဲချုပ်သည်လည်း သူ၏လူများကို အမြန်စုရုံးကာ နောက်မှ ထပ်ကြပ်မကွာ လိုက်ပါသွားတော့သည်။ ဘယ်လိုပင်ဖြစ်စေ ဤသည်မှာ မြေခွေးအဘွားအိုကို အနိုင်တိုက်ရန် အကောင်းဆုံး အခွင့်အရေးပင်။

အခြားတစ်ဖက်တွင်မူ... ဂိုဏ်းချုပ်၏ တိုက်ရိုက်တပည့် ယင်ဝူထိုင်သည် ဈေးထဲတွင် လျှောက်လည်နေစဉ် သူ၏ ဆက်သွယ်ရေးကျောက်တုံးမှာ ရုတ်တရက် လင်းလာသည်။

၎င်းအတွင်းမှ ဂူဟွမ်ကျီ၏ အေးစက်စက် အမိန့်သံ ထွက်ပေါ်လာသည်။

"ဂိုဏ်းထဲမှာ အပြောင်းအလဲတစ်ခု ဖြစ်နေပြီ။ မြေခွေးမိစ္ဆာက တိုက်ခိုက်နေတယ်။ မင်းရဲ့ ဂျူနီယာညီလေး စုန်ယန်ကို သေချာစောင့်ကြည့်ထား။ သူ့ကို ထွက်ပြေးခွင့် မပေးနဲ့"

ယင်ဝူထိုင်သည် ရက်စက်သော အပြုံးတစ်ခုကို ပြုံးလိုက်သည်။ သူ သိထားသည်မှာ ညီလေးဖြစ်ဖြစ်၊ ဘာဖြစ်ဖြစ် ဈေးပွဲတော်ပြီးသည်နှင့် စုန်ယန်မှာ နေအိမ်အကျယ်ချုပ် ကျခံရတော့မည်ဖြစ်ရာ သူသည် အနီးကပ် စောင့်ကြည့်ရန်သာ ပြင်ဆင်လိုက်တော့သည်။