အခန်း (၈၅-၈၆)

အခန်း။ ၈၅

စုန်ယန် ခေတ္တမျှ တွန့်ဆုတ်သွားသည်။

သွေးအလောင်းတောင်ထိပ် တပည့်က "ဈေးတော့ နည်းနည်းကြီးတယ်။ ဒါပေမဲ့ ငါက ရုပ်သေးဂိုဏ်းသားပဲ။ ဒီဈေးပွဲတော်က ငါတို့ဂိုဏ်းက လုပ်တာ။ ငါ့မျက်နှာပြပြီး ရောင်းနေမှတော့ ဒါက အတုမဟုတ်ဘူးဆိုတာ စိတ်ချလို့ရတယ်" ဟု အာမခံလိုက်သည်။

စုန်ယန်က "ဒါဆိုရင် မင်း ဒါကို ဘယ်ကရခဲ့တာလဲဆိုတာ ငါ့ကို ပြောပြရမယ်" ဟု ကမ်းလှမ်းလိုက်သည်။

စုန်ယန်၏ အချက်အလက်မှာ အလွန်အကန့်အသတ်ရှိသည်။ သူနှင့် အဆင့်တူ ကျင့်ကြံသူများသည် အပြင်လောကတွင် မည်သို့သော အခွင့်အရေးများ ကြုံတွေ့ရတတ်လဲ။ ရတနာများကို ဘယ်လို စုဆောင်းကြတာလဲဆိုသည်ကို သူ သိချင်မိသည်။ ရုပ်သေးဂိုဏ်းအတွင်းမှာပင် လဲလှယ်၍မရနိုင်သော ဤကဲ့သို့သော ကျင့်စဉ်အပိုင်းအစကို ဒီတပည့်က ဘယ်နေရာကနေ ရခဲ့တာလဲ။

သွေးအလောင်းတောင်ထိပ် တပည့်က ခဏစဉ်းစားပြီး "ကောင်းပြီလေ" ဟု သဘောတူလိုက်သည်။

ထို့နောက် စုန်ယန်က အနည်းငယ် ပဲ့ကြွေနေသော ထူးကဲကျောက်စိမ်းခဲနှစ်တုံးကို ထုတ်ပေးလိုက်သည်။ ထိုတပည့်မှာ အံ့အားသင့်သွားပြီး "ဒါတွေက ဘာလို့ ပျက်စီးနေတာလဲ" ဟု မေးရာစုန်ယန်က "ငါက မင်းတို့လို ဂိုဏ်းကြီးသားမှ မဟုတ်တာ။ ဒါပေမဲ့ အလေးချိန်ကတော့ အတိအကျပဲ" ဟု ပြန်ဖြေလိုက်သည်။

ထိုတပည့်သည် အလေးချိန်ကို နှစ်ခါပြန်ချိန်တွယ်ပြီးနောက် သူ၏ ဝတ်ရုံအတွင်းမှ အသစ်စက်စက် စက္ကူမိတ္တူတစ်ခုကို ထုတ်ပေးလိုက်သည်။ ၎င်းပေါ်တွင် စာလုံးသုံးလုံး ရေးထားသည်မှာ သွေးသားပေါင်းစပ်ခြင်းအတတ်ဟူ၍ပင်။

စုန်ယန်သည် ၎င်းကို အမြန်လှန်လှော စစ်ဆေးကြည့်သည်။ ဤကဲ့သို့သော နက်နဲသည့် ပညာရပ်ကို သူကိုယ်တိုင် အစမှအဆုံး မှန်းဆတွက်ချက်နေပါက အချိန်နှင့် လုပ်အား အလွန်ကုန်မည်ဖြစ်ရာ အသင့်အတင့် ပြည့်စုံသော ဗားရှင်းတစ်ခု ရှိထားခြင်းက များစွာ ပိုကောင်းသည်။

"စိတ်မပူပါနဲ့ ငါတို့ တောင်ထိပ်သခင်ကိုတောင် ပြပြီးပြီ။ ဒီကျင့်စဉ်မှာ ဘာပြဿနာမှ မရှိဘူး"

သွေးအလောင်းတောင်ထိပ် တပည့်က ပြောကာ ရယ်မောလိုက်သည်။

"အေးစက်သော စမ်းအိုင်ချိုင့်ဝှမ်း ဈေးပွဲတော်က ငါတို့ရဲ့ အမှတ်တံဆိပ်ဖြစ်လာတော့မှာ။ ငါ ဒါကို မဖျက်စီးဝံ့ပါဘူး"

စုန်ယန်က အမြန်ဖတ်ကြည့်ပြီးနောက် "ဒါပေမဲ့ စိတ်ကူးပုံဖော်နည်းကော ဘာလို့ မပါတာလဲ" ဟု မေးလိုက်သည်။

"အဲဒါသာ ပါရင် ဒီဈေးနဲ့ ဘယ်ရပါ့မလဲ"

ထိုတပည့်က ပွင့်ပွင့်လင်းလင်းပင် ပြောလိုက်သည်။

စုန်ယန်လည်း မတတ်သာဘဲ ကျင့်စဉ်ကို သိမ်းဆည်းလိုက်ရသော်လည်း ၎င်းတွင် အရေးကြီးသော အချက်အလက်များစွာ ပါဝင်နေသဖြင့် နောက်မှ သေချာလေ့လာရန် ဆုံးဖြတ်လိုက်သည်။

သွေးအလောင်းတောင်ထိပ် တပည့်က ဆက်ပြောသည်။

"ဒီသွေးသားပေါင်းစပ်ခြင်းအတတ်ကို ငါက ဧရာမဆင်ပြောင်လွင်ပြင်လို့ခေါ်တဲ့ လျှို့ဝှက်နယ်မြေထဲက ရခဲ့တာ။ အဲဒီနေရာက လျှို့ဝှက်ချက်တော့ မဟုတ်ပါဘူး။ ဒီကနေ အနောက်ဘက် မိုင် ခြောက်ရာ၊ ခုနစ်ရာလောက် ဝေးတဲ့နေရာမှာ ရှိတာပါ"

"အဲဒီနေရာကို ကန့်သတ်ချက်အတားအဆီးတစ်ခုနဲ့ စောင့်ကြပ်ထားတာ။ နွေရာသီမှာပွင့်ပြီး ဆောင်းဦးပေါက်မှာ ပြန်ပိတ်တယ်။ ဒါကြောင့် အဝင်အထွက်ကို မြန်မြန်လုပ်ရမယ်။ အချိန်တန်ရင်တော့ တခြားကျင့်ကြံသူတွေနဲ့တွေ့ပြီး အဖွဲ့ဖွဲ့ရမှာပေါ့"

ဧရာမဆင်ပြောင်လွင်ပြင်…

လျှို့ဝှက်နယ်မြေ….

ကန့်သတ်ချက်အတားအဆီး….

စုန်ယန်သည် မြွေအလောင်းဈေးကွက်တုန်းက မိစ္ဆာရွှံ့နွံလျှို့ဝှက်နယ်မြေကို ရုတ်တရက် သတိရသွားသည်။ ထို့ကြောင့် သူက ထပ်မံမေးမြန်းလိုက်သည်။

"ဒီလျှို့ဝှက်နယ်မြေက တည်နေရာ ပြောင်းလဲတတ်သလား"

သွေးအလောင်းတောင်ထိပ်တပည့်က "ဒါကို မင်းမသိဘူးလား" ဟု အံ့အားသင့်စွာ ပြန်မေးသည်။

စုန်ယန်က "ကျေးဇူးပြုပြီး ရှင်းပြပေးပါဦး" ဟု ပြောရာ ထိုတပည့်က လျှို့ဝှက်နယ်မြေဆိုတာ တည်နေရာ ဘယ်တော့မှ မပြောင်းဘူးကွဟု ပြောပြီးနောက် အရောင်းအဝယ်ပြီးဆုံးကြောင်း လက်ဝှေ့ယမ်းပြကာ ထွက်ခွာသွားတော့သည်။

စုန်ယန် မျက်မှောင်ကြုတ်မိသည်။ သူမှတ်မိသလောက် မြွေအလောင်းဈေးကွက်ရှိ လျှို့ဝှကနယ်မြေမှာ ဈေးကွက်နှင့်အတူ ရွှေ့လျားတတ်သည်။

ဒီနေရာမှာ ဘာတွေဖြစ်နေတာလဲ။

ကွမ်းဝူနှင့် စုယောင်တို့သည် ဈေးပွဲတော်ကို ပတ်ကြည့်ပြီးနောက် စုန်ယန်နှင့်အတူ ဂိုဏ်းသို့ ပြန်ရန် စားသောက်ဆိုင်သို့ ရောက်လာကြသော်လည်း အတားအဆီးတစ်ခုနှင့် ကြုံရသည်။

ယင်ဝူထိုင် ပေါ်လာပြီး အတော်ပင် အာဏာပါပါဖြင့် "မင်းတို့ ဂိုဏ်းကို ပြန်ချင်ရင် အရင်ပြန်

နှင့်ကြ ညီအစ်ကိုစုန်က ငါနဲ့အတူ လိုက်ရမယ်" ဟု ပြတ်ပြတ်သားသား ပြောလိုက်သည်။

ကွမ်းဝူက တစ်ခုခု ထပ်မေးရန် ကြိုးစားသော်လည်း ယင်ဝူထိုင်က လက်ကာပြကာ လှည့်ထွက်သွားခဲ့သည်။ တည်းခိုခန်း၏ အပေါ်ထပ် ဝရန်တာမှနေ၍ ဤမြင်ကွင်းကို စုန်ယန် တိတ်တဆိတ် စောင့်ကြည့်နေမိသည်။ သူ၏ ရင်ထဲတွင် သံသယများ ပိုမိုကြီးထွားလာသည်။

ယင်ဝူထိုင်သည် သူ့ကို ဤနေရာတွင် အကျယ်ချုပ် ချုပ်ထားသည်မှာ ထင်ရှားသည်။

ဒါပေမဲ့... သူ ဘာကို စောင့်နေတာလဲ။

…..

စုန်ယန်သည် သူဝယ်ယူလာသော ကျင့်စဉ်စာမျက်နှာများကို တစ်ရွက်ချင်း လှန်လှောဖတ်ရှုနေသည်။ စာမျက်နှာများ မြန်မြန်ဆန်ဆန် လှန်လိုက်သံမှာ တိတ်ဆိတ်သော အခန်းထဲတွင် ထင်ရှားနေသည်။

ဤကျင့်စဉ်၏ အနှစ်သာရမှာ ခရမ်းရောင်နန်းတော်အဆင့်သို့ တက်လှမ်းရာတွင် မိစ္ဆာသွေးကို မိမိ၏ သွေးသားထဲသို့ မည်သို့ ဘေးကင်းစွာ စုပ်ယူပေါင်းစပ်ရမည်ကို ဖော်ပြထားခြင်းပင်။

ကျင့်စဉ်ပေါ်မှ လက်ရေးလက်သားများမှာ သပ်ရပ်လှပပြီး မှင်နံ့သင်းသင်းလေး ကျန်ရှိနေသေးရာ တစ်စုံတစ်ဦးက လတ်တလောမှ ကူးရေးထားခြင်းဖြစ်ကြောင်း သိသာလှသည်။

သွေးအလောင်းတောင်ထိပ်တပည့်၏ စကားများကို ပြန်တွေးကြည့်ရင်း စုန်ယန် ရုတ်တရက် သဘောပေါက်သွားသည်မှာ ဤအရာသည် ရုပ်သေးဂိုဏ်းက အေးစက်သော စမ်းအိုင်ချိုင့်ဝှမ်း ဈေးပွဲတော်၏ ဂုဏ်သိက္ခာကို မြှင့်တင်ရန် တမင်တကာ ထုတ်ရောင်းခိုင်းထားခြင်း ဖြစ်

နိုင်သည်။ ဤဈေးပွဲတော်တွင် ခရမ်းရောင်နန်းတော်အဆင့် ကျင့်စဉ်များပင် ဝယ်ယူရရှိနိုင်သည်ဟူသော သတင်းမှာ ပြင်ပကျင့်ကြံသူများအကြား ဂယက်ရိုက်သွားမည်မှာ အမှန်ပင်။

ကျင့်စဉ်ပါ အကြောင်းအရာများမှာ ရှည်လျားထွေပြားလှသော်လည်း ခရမ်းရောင်နန်းတော်အဆင့်နှင့် ပတ်သက်၍ ဘာမျှမသိသေးသော စုန်ယန်အတွက်မူ အလွန်ပင် သင့်တော်လှသည်။ အသေအချာ လေ့လာပြီးနောက် စုန်ယန် အကြမ်းဖျင်း နားလည်သွားခဲ့သည်မှာ

ခရမ်းရောင်နန်းတော်အဆင့်၏ အနှစ်သာရမှာ ပြင်ပမှ အစွမ်းထက်သော သွေးမျိုးရိုးများကို အသုံးပြု၍ မိမိ၏ အသက်ဓာတ်အဆင့်အတန်းကို မြှင့်တင်ခြင်းပင်။

အခြေခံအုတ်မြစ်သွေးသည် လူသားများအတွက် ခန္ဓာကိုယ်ထဲသို့ ဦးဆုံးသွင်းယူသော ဤသွေးသည် အလွန်အရေးကြီးသည်။ ၎င်းသည် ခရမ်းရောင်နန်းတော်၏ ဗဟိုချက်တွင် နေရာယူမည်ဖြစ်ပြီး တစ်ခါသတ်မှတ်ပြီးပါက ကျင့်စဉ်ကို အစမှ ပြန်မဖျက်မချင်း ပြောင်းလဲ၍မရနိုင်ပေ။

ခရမ်းရောင်နန်းတော်ဆေးလုံးသည် ဘေးကင်းစွာ စုပ်ယူနိုင်ရန်အတွက် ဆေးဆရာများက ဝိညာဉ်ပန်းများဖြင့် ထိုသွေးကို သန့်စင်ရသည်။ အဆိပ်အတောက်များကို ဖယ်ရှားပြီး အာနိသင်တိုးအောင် လုပ်ဆောင်ခြင်းဖြင့် ထူးကဲချီ သန့်စင်ခြင်း ကိုးခုမြောက်အဆင့် ကျင့်ကြံသူများအတွက် သင့်တော်သော ဆေးလုံးများ ဖြစ်လာစေသည်။

လူသားများမှာ ပြင်ပသွေးကို အခြေခံယူရသော်လည်း မိစ္ဆာများမှာမူ မွေးရာပါ သွေးမျိုးရိုးကပင် သူတို့၏ အခြေခံအုတ်မြစ်သွေးပင်။ ထို့ကြောင့် မိစ္ဆာများတွင် မျိုးရိုးမြင့်ခြင်း၊ နိမ့်ခြင်းဟူသော အဆင့်အတန်း ကွာခြားချက်မှာ အစကတည်းက ရှိနေခြင်းဖြစ်သည်။

ဤအဆင့်သည် ခန္ဓာကိုယ် ကြံ့ခိုင်မှုကို မြှင့်တင်ပေးသော အဆင့်ဖြစ်သည်။ ထူးကဲချီမှာ အထောက်အပံ့သက်သက်သာ ဖြစ်သွားပြီး ခန္ဓာကိုယ်၏ စွမ်းအားကသာ အဓိက ဖြစ်လာသည်။ သို့သော် အသုံးပြုသော ပြင်ပသွေးအမျိုးအစားပေါ် မူတည်၍ ရရှိလာမည့် အာနိသင်များမှာလည်း ကောင်းကင်နှင့် မြေကြီးကဲ့သို့ ကွာခြားသွားနိုင်သည်။

စုန်ယန်သည် သူ၏ သိုလှောင်အိတ်ထဲတွင် ရှိနေသော မြေခွေးအဘွားအို၏ အနှစ်သာရသွေးကို ပြန်လည် စဉ်းစားမိသွားသည်။ ၎င်းသည် သာမန်မိစ္ဆာသွေး မဟုတ်ဘဲ အမြီးမြောက်မြားစွာပါသော နဂါးမြေခွေး၏ အဖိုးတန်သွေး ဖြစ်သည်။ ၎င်းကို အခြေခံအုတ်မြစ်အဖြစ် သုံးနိုင်ပါက သူ၏ အဆင့်အတန်းမှာ ဘယ်လောက်အထိ မြင့်မားသွားမလဲ။

သို့သော် စဉ်းစားနေရန် အချိန်မရှိတော့ပေ။ ဈေးပွဲတော်၏ အပြင်ဘက်တွင် မြေခွေးအဘွားအို၏ လူသတ်လိုသော အရှိန်အဝါမှာ တည်းခိုခန်းရှိရာသို့ တရှိန်ထိုး တိုးဝင်လာနေပြီ ဖြစ်သည်။

သွေးသားပေါင်းစပ်ခြင်းအတတ်ထဲတွင် အသုံးများသော နမူနာအချို့ကိုလည်း ဖော်ပြထားသည်။

[ဥပမာအားဖြင့် ထူးကဲချီ သန့်စင်ခြင်း ကိုးခုမြောက်အဆင့်နှင့် ညီမျှသော ငွေရောင်

သံချပ်ကာဆင်၏ သွေးကို အသုံးပြုပါက သင်၏အရေခွံသည် မယုံနိုင်လောက်အောင် မာကျောသွားမည်ဖြစ်ပြီး ခရမ်းရောင်နန်းတော်အဆင့် ခန္ဓာကိုယ်သန့်စင်ခြင်းပညာရပ်နှင့် တွဲဖက်လိုက်ပါက တစ်ကိုယ်လုံးမှာ ခုခံကာကွယ်မှုအပြည့်ရှိသော ထူးကဲရတနာတစ်ခုကဲ့သို့ ဖြစ်သွားမည်ဖြစ်သည်။

မှတ်ချက်: သန့်စင်ခြင်းအဆင့်ရှိ ပစ္စည်းများကို ထူးကဲကိရိယာဟု ခေါ်ဆိုပြီး ခရမ်းရောင်

နန်းတော်အဆင့်ရှိ ပစ္စည်းများကိုမူ ထူးကဲရတနာဟု ခေါ်ဆိုကြသည်။

အလားတူပင် ထူးကဲလေကြိုးကြာသွေးကို အခြေခံအုတ်မြစ်အဖြစ် အသုံးပြုပါက လှုပ်ရှားမှုမှာ အလွန်လျင်မြန်လာမည်ဖြစ်ပြီး ကိုယ်ပျောက်အတတ်၊ အသွင်ဖျောက်အတတ်တို့နှင့် တွဲဖကလိုက်ပါက သရဲတစ္ဆေတစ်ကောင်ကဲ့သို့ ဖမ်းဆီးရခက်ခဲသွားမည်ဖြစ်သည်]

စုန်ယန်သည် သူ၏ လက်ကောက်ဝတ်ရှိ အေးစက်သော ငရဲဘုံ၏ဘဝမျောလက်ပတ်ကို စဉ်းစားရင်း ဝိညာဉ်နှင့် ပတ်သက်သော အချက်အလက်များကို ရှာဖွေကြည့်သည်။ ဤစာအုပ်ငယ်တွင် စိတ်ကူးပုံဖော်နည်းမပါဝင်သော်လည်း အခြေခံသဘောတရားများကို ရှင်းပြထားသည်။

၎င်းတွင် ခန္ဓာကိုယ်နှင့် ဝိညာဉ်တို့၏ အပြန်အလှန် ထောက်ကူမှုနှင့် တန်ပြန်တိုက်ခိုက်မှုအကြောင်း ဖော်ပြထားသည်။

အပြန်အလှန် ထောက်ကူမှုသည် သန်မာသော ခန္ဓာကိုယ်က ဝိညာဉ်ကို ပြန်လည်အာဟာရပေးနိုင်ပြီး ခရမ်းရောင်နန်းတော်အဆင့်တွင် ဝိညာဉ်ကို ပုံသဏ္ဌာန်မဲ့သော ဓာတ်ငွေ့အခြေအနေမှ အရည်အခြေအနေသို့ ကူးပြောင်းစေသည်။ သို့သော် ဤအကူးအပြောင်းမှာ အလိုအလျောက်မဖြစ်ဘဲ စိတ်ကူးပုံဖော်နည်းနှင့် ပြင်ပဖြည့်စွက်ချက်များ လိုအပ်သည်။

တန်ပြန်တိုက်ခိုက်မှုသည် အလွန်အစွမ်းထက်သော ဝိညာဉ်က အားနည်းသော ခန္ဓာကိုယ်ကို တိုက်ရိုက်ထိခိုက်စေနိုင်သလို သန်မာလွန်းသော ခန္ဓာကိုယ်သည်လည်း အားနည်းသော ဝိညာဉ်ကို တိုက်ရိုက်လောင်ကျွမ်းစေနိုင်သည်။

ဤအချက်များကို ဖတ်ပြီးနောက် စုန်ယန် မျက်မှောင်ကြုတ်လိုက်မိသည်။ သူ၏ လက်ပတ်သည် ဝိညာဉ်ကို အာဟာရကျွေးသော ပစ္စည်းမျိုးဖြစ်သော်လည်း ၎င်းမှာ မိစ္ဆာအိုကြီး ဂူဟွမ်ကျီ ပေးထားသည့်အရာဖြစ်ရာ ကြီးမားသော ပြဿနာတစ်ခု ရှိနေသည်မှာ သေချာသည်။

ထိုပြဿနာမှာ ဘာလို့ ယခုထက်ထိ မပေါ်လာရသေးတာလဲအကြောင်းမှာ သူသည် ယန္တရားကို မနှိုးဆွရသေးသောကြောင့်ပင်။

စာအုပ်၏ ဖော်ပြချက်အရ သန်မာသော ခန္ဓာကိုယ်သည် အားနည်းသော ဝိညာဉ်ကို လောင်ကျွမ်းစေသည်ဆိုပါက ခန္ဓာကိုယ် ကြံ့ခိုင်မှုမှာ အချို့သော သတ်မှတ်ချက်သို့ ရောက်ရှိသွားချိန်တွင် လက်ပတ်အတွင်းရှိ ထောင်ချောက်မှာ အသက်ဝင်လာမည်ဖြစ်ပြီး ဂူဟွမ်ကျီ ချက်ချင်း သိရှိသွားပေလိမ့်မည်။

စုန်ယန်၏ စိတ်ထဲတွင် ကြောက်မက်ဖွယ်ကောင်းသော အတွေးတစ်ခု ဝင်လာသည်။

ဒါက ပိရမစ်ပုံသဏ္ဌာန်ရှိတဲ့ ဝိညာဉ်လှောင်အိမ်တစ်ခုလား။

အောက်ဆုံးအဆင့်သည် သူ မြင်တွေ့ခဲ့ရသော ဝိညာဉ်များဖြစ်ပြီး ဝိညာဉ်အာဟာရပေးနေရသူများဖြစ်ပြီး အလယ်အဆင့်မှာ လက်ရှိ သူရှိနေသော အဆင့်ဖြစ်ကာ ထိပ်ဆုံးအဆင့်သည် ထိုအာဟာရအားလုံးကို စုပ်ယူမည့်သူဖြစ်သည့် ဂူဟွမ်ကျီပင်။

အချိန်တန်လျှင် သူ၏ပတ်ဝန်းကျင်မှ မြူထုများ လွင့်စင်သွားပြီး သူကိုယ်တိုင်လည်း အောက်ခြေမှ ဝိညာဉ်များကဲ့သို့ လှောင်အိမ်ထဲတွင် ပိတ်မိကာ ဂူဟွမ်ကျီအတွက် ဝိညာဉ်

အာဟာရ ပေးနေရသူတစ်ဦး ဖြစ်သွားနိုင်သည်။

အခန်း။ ၈၆

မျက်တောင်တစ်ခတ်အတွင်းမှာတင် နှစ်ရက်တာ အချိန်ကုန်ဆုံးသွားခဲ့သည်။

ထိုနှစ်ရက်အတွင်း စုန်ယန်သည် ကောင်းကောင်းမွန်မွန် စားသောက်နေထိုင်ရင်း သွေးသားပေါင်းစပ်ခြင်းအတတ်ကို အသည်းအသန် လေ့လာခဲ့ရာ နောက်ဆုံးတွင် ၎င်းပညာရပ်ကို သူ၏ စနစ်ရှိ ကျင့်စဉ်ကဏ္ဍထဲသို့ အောင်မြင်စွာ ထည့်သွင်းနိုင်ခဲ့သည်။ တစ်ဖက်တွင်လည်း သူသည် ယင်ဝူထိုင်ထံမှ သတင်းအချက်အလက် တစ်ခုခုရရန် ကြိုးစားခဲ့သော်လည်း ဘာမျှ ထူးခြားမလာခဲ့ပေ။

...

ထိုနေ့ မွန်းတည့်ချိန်တွင် စုန်ယန်မှာ အခန်းထဲ၌ ထိုင်နေစဉ် အပြင်ဘက် ဝရန်တာမှနေ၍ အလောတကြီး ပြေးလွှားလာသော ခြေသံများကို ကြားလိုက်ရသည်။ ထို့နောက် ဘုန်းဆိုသော အသံနှင့်အတူ အခန်းတံခါးမှာ အပြင်မှနေ၍ ကြမ်းတမ်းစွာ တွန်းဖွင့်ခြင်း ခံလိုက်ရသည်။

ယင်ဝူထိုင် ပေါ်လာသည်။ သူ၏မျက်လုံးများမှာ သွေးတက်နေပြီး စုန်ယန်ကို သတိကြီးစွာ စိုက်ကြည့်လျက် "ငါ့နောက် လိုက်ခဲ့" ဟု အမိန့်သံဖြင့် အော်ဟစ်လိုက်သည်။

အနားတွင် အမွှေးနံ့သာများ ပြင်ဆင်နေသော ယွီကျွမ်းလေးမှာ ထိတ်လန့်သွားတော့သည်။ စုန်ယန်ကမူ ယင်ဝူထိုင်၏ လောကတ်နေမှုကို သတိပြုမိသော်လည်း တည်ငြိမ်စွာဖြင့် "စီနီယာအစ်ကိုက ဘာလို့ ဒီလောက်တောင် အလောတကြီး ဖြစ်နေရတာလဲ" ဟု မေးလိုက်သည်။

"အခုချက်ချင်း လိုက်ခဲ့စမ်း"

စုန်ယန်က အေးအေးလူလူပင် ဦးညွှတ်လိုက်ရင်း "အစ်ကို... ပစ္စည်းတွေ သိမ်းဖို့ နာရီဝက်လောက်တော့ အချိန်ပေးပါဦး"

"မင်းမှာ ဘာပစ္စည်းတွေ ရှိလို့လဲ"

"ကျွန်တော့်မှာ မရှိရင်တောင် ကျွန်တော့်ရဲ့ ယွီကျွမ်းလေးက ဝယ်ထားတာတွေ အများကြီး ရှိသေးတယ်လေ"

"သူ့ကို ခေါ်မလာနဲ့ မင်းတစ်ယောက်တည်း လိုက်ခဲ့"

စုန်ယန်က မလှုပ်မယှက် ရှိနေသည်ကို မြင်သောအခါ ယင်ဝူထိုင်မှာ ရှေ့သို့ ဝုန်းခနဲ တိုးလာပြီး သူ၏ ဝတ်ရုံလက်စွပ်ကို ခါယမ်းကာ စက္ကူမိန်ကလေးရုပ် တစ်ရုပ်ကို ထုတ်လွှတ်လိုက်သည်။ ယင်ဝူထိုင်နှင့် ထိုစက္ကူရုပ်တို့ထံမှ တစ်ပြိုင်နက်တည်း ခြိမ်းခြောက်သံ ထွက်ပေါ်လာသည် "သွားမယ်"

စုန်ယန် ခဏမျှ ကြောင်အသွားသော်လည်း ပြန်လည်ခုခံခြင်း မပြုခဲ့ပေ။ သူသည် ယွီကျွမ်းလေးကို တစ်ချက်ကြည့်ကာ "ငါ အရင်က ပြောခဲ့တာတွေကို မှတ်ထားပါ" ဟု မှာကြားလိုက်ပြီး ယင်ဝူထိုင်၏နောက်သို့ လိုက်ပါသွားတော့သည်။

ယွီကျွမ်းလေးမှာ ယခုမှ သတိဝင်လာပြီး လက်ထဲမှ နံ့သာတိုင်များကို ချကာ ပြတင်းပေါက်ဆီသို့ အပြေးအလွှား သွားကြည့်သော်လည်း ဘယ်သူ့ကိုမျှ မမြင်ရတော့ပေ။

"သခင်..."

သူမ တိုးတိုးလေး ရေရွတ်မိသည်။

ရုတ်တရက် သူမသည် ရင်ဘတ်ပေါ်ရှိ ကျောက်စိမ်းဆွဲသီးကို တင်းတင်းဆုပ်ကိုင်လိုက်သည်။ ဤနှစ်ရက်အတွင်း သခင်က မှာကြားခဲ့သည်မှာ အကယ်၍ တစ်စုံတစ်ရာကြောင့် လူချင်းကွဲသွားခဲ့လျှင် ဤကျောက်စိမ်းဆွဲသီးကို အသုံးပြု၍ စုမိသားစုမှ သတ္တမမြောက်သခင်မလေးကို သွားရောက်ရှာဖွေရန် ဖြစ်သည်။

အခြားတစ်ဖက်တွင်မူ စုန်ယန်သည် ယင်ဝူထိုင်၏နောက်သို့ လိုက်ပါရင်း အေးစက်သော စမ်းအိုင်ချိုင့်ဝှမ်း ဈေးပွဲတော်မှ ထွက်ခွာလာခဲ့ပြီ ဖြစ်သည်။ လမ်းအနည်းငယ် ကွေ့ပတ်ပြီးနောက် သူတို့သည် လူသူကင်းမဲ့သော တောင်လမ်းလေးထဲသို့ ရောက်ရှိလာကြသည်။

"စီနီယာအစ်ကို... ဘာလို့ အရိပ်ရုပ်သေး ဟင်းလင်းပြင်သင်္ဘောကို အသုံးမပြုတာလဲ"

စုန်ယန်က ရုတ်တရက် မေးလိုက်သည်။

သူ စကားပြောပြီးသည်နှင့် တစ်ပြိုင်နက် စက္ကူရုပ်ကြီးမှာ စုန်ယန်၏နောက်သို့ ဝှစ်ခနဲ ရောက်လာပြီး ဓားသွားကဲ့သို့ ထက်မြက်သော လက်သည်းများဖြင့် စုန်ယန်၏ လည်ပင်းကို ဖိထားလိုက်သည်။

ယင်ဝူထိုင်က စိတ်မနှံ့သူတစ်ဦးကဲ့သို့ တုံ့ပြန်လိုက်သည်။

"စကားမများနဲ့ ဟိုမေးဒီမေး လုပ်နေရင်... မင်း သေချင်လို့လား"

စုန်ယန်က မျက်မှောင်ကြုတ်ကာ "ဒါကို ဆရာကြီးဂူဟွမ်ကျီ သိရဲ့လား" ဟု ထပ်မေးသည်။

ယင်ဝူထိုင်က "ဒါ ဆရာကြီးရဲ့ အမိန့်ပဲ" ဟု ပြောသော်လည်း စုန်ယန်က "ဒါဆို ဆရာကြီးက ဘာလို့ ကျွန်တော့်ကို ကိုယ်တိုင်မပြောတာလဲ" ဟု ထပ်မံ စမ်းသပ်မေးမြန်းလိုက်သည်။

ယင်ဝူထိုင်မှာ ပို၍ စိတ်လှုပ်ရှားလာပြီး ပြတ်သားစွာ ပြန်ပြောလိုက်သည်။

"အခု မင်း သိထားရမှာက ဆရာကြီးက မင်းကို ငါ့လက်ထဲ အပ်ထားတယ် ဆိုတာပဲ။ အခုကစပြီး မင်း ဘာစားရမယ် ဘာသောက်ရမယ်ဆိုတာကအစ ငါ့စကားကိုပဲ နားထောင်ရမယ်"

ယင်ဝူထိုင်သည် သူ၏စိတ်အာရုံကို အသုံးချကာ စက္ကူရုပ်ကြီးအား စုန်ယန်၏ကျောကို အတင်းအဓမ္မ တွန်းထုတ်ရန် ခိုင်းစေလိုက်သည်။

သို့သော်... တွန်း၍မရပေ။ စုန်ယန်မှာ ကျောက်တုံးကြီးတစ်ခုကဲ့သို့ အုတ်မြစ်ခိုင်မာစွာ ရပ်တန့်နေသည်။

ယင်ဝူထိုင် ခဏမျှ ကြောင်အသွားသည်။ နောက်တစ်စက္ကန့်တွင် သူ၏ရင်ထဲ၌ ဖော်ပြမရနိုင်သော အန္တရာယ်အရှိန်အဝါကို ခံစားလိုက်ရသည်။ ထူးကဲချီ သန့်စင်ခြင်း သတ္တမအဆင့်သာ ရှိသည်ဟု သူထင်ထားသော ဂျူနီယာညီလေး၏ ဝတ်ရုံလက်စွပ်အတွင်းမှ အဖြူရောင်အလင်းတန်းတစ်ခု ဝှစ်ခနဲ ထွက်ပေါ်လာသည်ကို မြင်လိုက်ရ၏။

ထိုအဖြူရောင်အလင်းမှာ လူတစ်ယောက်၏ ပေါင်လုံးခန့် ထူထဲပြီး ကောင်းကင်ယံတွင် တွန့်လိမ်ပျံသန်းနေသော ဧရာမမြွေကြီးတစ်ကောင်နှင့် တူလှသည်။ အလွန်တရာ မြန်ဆန်လွန်းလှသည်။

ယင်ဝူထိုင် မယုံကြည်နိုင်ဖြစ်သွားရသည်။

"ဒီကောင်က ငါ့ကို ပြန်တိုက်ရဲတယ်ပေါ့ ဒါက ဘာဓားကွက်လဲ"

သူသည် ပေါ့ဆ၍မရမှန်း သိလိုက်သဖြင့် စိတ်အာရုံကို ချက်ချင်းအသုံးချလိုက်ရာ သူ၏ခန္ဓာကိုယ်ပေါ်တွင် အနက်ရောင်အကြေးခွံပါသော ထူးကဲချီ သံချပ်ကာတစ်ခု ဖုံးလွှမ်းသွားသည်။ တစ်ချိန်တည်းမှာပင် အခြားလက်တစ်ဖက်ကို ခါယမ်းလိုက်ရာ စက္ကူရုပ်ကလေးမှာ လေထဲတွင် ကြီးထွားလာပြီး လက်နှစ်ဖက်စလုံးတွင် ဓားမြှောင်များ ကိုင်ဆောင်ထားသော အရုပ်မကြီးအဖြစ် ပြောင်းလဲသွားသည်။

စက္ကူအရုပ်မနှင့် စက္ကူမိန်ကလေးရုပ် နှစ်ခုစလုံးသည် ယင်ဝူထိုင်၏ ကိုယ်ပွားနှစ်ခုကဲ့သို့ စုန်ယန်ဆီသို့ အပြင်းအထန် တိုက်ခိုက်ရန် ပြေးဝင်သွားကြတော့သည်။

စုန်ယန်၏ မျက်နှာအမူအရာမှာ အနည်းငယ်မျှ ပြောင်းလဲခြင်းမရှိဘဲ ဓားကွက်ကို လက်ချောင်းဖြင့် ကျစ်ကျစ်ပါအောင် ဖမ်းဆုပ်ထားသည်။ အဖြူရောင်အလင်းတန်းမှာ ယင်ဝူထိုင်၏ ရှေ့မှောက်သို့ ချက်ချင်း ရောက်ရှိလာသည်။

ယင်ဝူထိုင်သည် ထူးကဲချီကို အသုံးပြု၍ သံချပ်ကာ၏ အပြင်ဘက်တွင် ကြက်ဥခွံကဲ့သို့ အကာအကွယ်အလွှာတစ်ခုကို ဖြန့်ကျက်လိုက်သည်။ သူ၏အစီအစဉ်မှာ ထိုအကာအကွယ်ဖြင့် ခဏမျှ ခုခံထားစဉ်အတွင်း စက္ကူရုပ်နှစ်ရုပ်က စုန်ယန်ကို ဖမ်းဆီးရန် ဖြစ်သည်။

သို့သော် ထိုအဖြူရောင်အလင်းတန်းအတွင်းမှ ပျံသန်းနေသော ဓားကို မြင်လိုက်ရချိန်တွင် သူ၏မျက်လုံးများမှာ ပြူးကျယ်သွားရသည်။

ဓားသည် အကာအကွယ်၏ မျက်နှာပြင်နှင့် ထိတွေ့သွားသည်။

ရှဲ...

အကာအကွယ်ပေါ်ရှိ ထူးကဲချီများသည် ပူပြင်းသော ဟင်းရည်နှင့်တွေ့သည့် နှင်းပွင့်များကဲ့သို့ အရည်ပျော်ကျသွားသည်။ ထိုအဖြူရောင်အလင်းက အကာအကွယ်ကို ဝါးမြိုသွားသကဲ့သို့ပင်။

ယင်ဝူထိုင်သည် "မဖြစ်နိုင်ဘူး" ဟူသော အမူအရာဖြင့် တုန်လှုပ်သွားရသည်။

ဒိုင်း..

အကာအကွယ်မှာ အစိတ်စိတ်အမွှာမွှာ ကွဲအက်သွားသည်။ ပျံသန်းနေသော ဓားမှာ ရှေ့သို့ ဆက်လက်တိုးဝင်သွားပြီး ယင်ဝူထိုင်၏ ထူးကဲချီ သံချပ်ကာကို ထိုးဖောက်သွားတော့သည်။ ယင်ဝူထိုင်မှာ အရှိန်ပြင်းစွာ နောက်သို့ လွင့်ထွက်သွားပြီး မြေပြင်ပေါ်သို့ အလဲလဲအပြားပြား ကျဆင်းသွားကာ ပါးစပ်မှ သွေးများ ယိုစီးလာသည်။

ထိုအနှောင့်အယှက်ကြောင့် စက္ကူရုပ်များမှာလည်း ထိန်းချုပ်မှု လွတ်ကင်းသွားကာ ခေတ္တမျှ ရပ်တန့်သွားသည်။

စုန်ယန်က အဝေးမှ လက်ယပ်ခေါ်လိုက်ချိန်တွင် တောအုပ်ထဲမှ အနက်ရောင် ဝတ်စုံဝတ်ထားသော အရိပ်တစ်ခု ဝှစ်ခနဲ ထွက်ပေါ်လာပြီး အနက်ရောင် အလင်းတန်းတစ်ခုကို ထုတ်လွှတ်လိုက်သည်။ ထိုအနက်ရောင်အလင်းသည် မီတာ ဒါဇင်ပေါင်းများစွာကို တစ်ခဏချင်း ဖြတ်ကျော်ကာ ယင်ဝူထိုင်ကို ထိမှန်သွားသည်။

ဝုန်း…

အနက်ရောင်အလင်း ထိမှန်သည့်နေရာတွင် ပြင်းထန်သော ပေါက်ကွဲမှုတစ်ခု ဖြစ်ပေါ်ပြီး ယင်ဝူထိုင်၏ သံချပ်ကာမှာ လုံးဝအက်ကွဲသွားတော့သည်။ အနက်ရောင်အလင်းမှာ မရပ်တန့်ဘဲ ယင်ဝူထိုင်၏ ရင်ဘတ်ကို ထိုးဖောက်ကာ သူ့ကို မြေပြင်ပေါ်တွင် ကပ်လျက်သားဖြစ်အောင် စိုက်ချလိုက်သည်။

သူ၏ ရင်ဘတ်မှာ သွေးနှင့် အသားတို့ ရောနှောကာ ကြည့်မကောင်းအောင် ပျက်စီးသွားခဲ့သည်။

ယင်ဝူထိုင်သည် အသည်းအသန် မော့ကြည့်လိုက်ရာ သူ၏ မျက်လုံးများထဲတွင် ထိတ်လန့်မှုတို့ ပြည့်နှက်နေသည်။ အမြဲတမ်း ရိုးသားအေးဆေးသည်ဟု သူထင်ထားသော ဂျူနီယာညီလေးသည် သူ့ထံသို့ အရှိန်အဟုန်ဖြင့် လျှောက်လှမ်းလာနေသည်။

စုန်ယန်၏ လက်နှစ်ဖက်စလုံးတွင် ဓားကွက်များ ရှိနေပြီး အနက်ရောင်နှင့် အဖြူရောင် ဓားအလင်းတန်းများမှာ သူ့ကို ဗဟိုပြု၍ ဝန်းရံနေကြသည်။ ၎င်းတို့မှာ ဓားများဖြစ်သော်လည်း ဖော်ပြမရနိုင်သော ထူးဆန်းသည့် မိစ္ဆာအရှိန်အဝါနှင့် ရက်စက်လှသော အရှိန်အဝါတို့ ထွက်ပေါ်နေသည်။

အနက်ရောင်အလင်း တစ်ချက်လက်သွားပြီး စက္ကူမိန်ကလေးရုပ် ပျက်စီးသွားသည်။

အဖြူရောင်အလင်း တစ်ပတ်လည်သွားပြီးနောက် စက္ကူအရုပ်မကြီးလည်း ချေမှုန်းခံလိုက်ရသည်။

စုန်ယန်သည် စကားတစ်လုံးမျှ မပြောဘဲ ယင်ဝူထိုင်၏ရှေ့သို့ ရောက်လာသည်။ ယင်ဝူထိုင်၏ နှုတ်ခမ်းများမှာ အသနားခံရန် သို့မဟုတ် မေးမြန်းရန် တစ်ခုခု ပြောဖို့ ဟန်ပြင်ရုံသာ ရှိသေးသော်လည်း စုန်ယန်က သူ၏ နဖူးအလယ်တည့်တည့်သို့ လက်ညှိုးဖြင့် ပြတ်သားစွာ ထိုးစိုက်လိုက်တော့သည်။

မိစ္ဆာချီများ တဟုန်ထိုး တက်လာကာ သရဲတစ္ဆေတို့၏ ဝိညာဉ်ရှာဖွေခြင်းအတတ်မှာ ယင်ဝူထိုင်၏ ဝိညာဉ်ကို စတင်ဝါးမြိုကာ သူသိရှိထားသမျှ အချက်အလက်အားလုံးကို စုန်ယန်ထံသို့ ကူးပြောင်းပေးလိုက်တော့သည်။

စုန်ယန်သည် ယင်ဝူထိုင်၏ ဦးနှောက်ထဲမှ မှတ်ဉာဏ်အပိုင်းအစများကို အရှိန်အဟုန်ဖြင့် စစ်ဆေးကြည့်လိုက်သည်။ ထိုမှတ်ဉာဏ်များသည် ဖရိုဖရဲဖြစ်နေသော်လည်း ဂူဟွမ်ကျီ၏ စေခိုင်းချက်များကို ရှင်းရှင်းလင်းလင်း မြင်တွေ့လိုက်ရသည်

လွန်ခဲ့သော ၂ ရက်က ဂူဟွမ်ကျီက စုန်ယန်ကို အလွတ်မပေးရန်နှင့် သတိထားစောင့်ကြည့်ရန် ယင်ဝူထိုင်ကို ပထမဆုံး သတိပေးခဲ့သည်။

မနေ့ညက ဂူဟွမ်ကျီသည် စုန်ယန်အား ဂူရုဖုန်းကို သတ်ခဲ့သူအဖြစ် သတ်မှတ်လိုက်ပြီး ဂိုဏ်းသို့ ပြန်ရောက်သည်နှင့် အကျယ်ချုပ်ချထားရန် အမိန့်ပေးခဲ့သည်။ စုန်ယန်၏ လှည့်ကွက်များကို မယုံရန်လည်း မှာကြားခဲ့သည်။

လွန်ခဲ့သော နာရီဝက်ခန့်က မြေခွေးသခင်မကြီးသည် ကျောက်သားအကြီးအကဲကို သတ်ပြီးနောက် အေးစက်သောစမ်းအိုင်ချိုင့်ဝှမ်းဆီသို့ ဦးတည်သွားကြောင်း ဂူဟွမ်ကျီ သိရှိသွားသည်။ ထို့ကြောင့် စုန်ယန်ကို ချက်ချင်းဝှက်ထားရန်နှင့် လိုအပ်ပါက ခြေထောက်ကိုရိုက်ချိုး၍ဖြစ်စေ အသက်ရှင်လျက် ဖမ်းခေါ်လာရန် ယင်ဝူထိုင်ကို အရေးပေါ်အမိန့်ပေးခဲ့ခြင်းဖြစ်သည်။

စုန်ယန်သည် ယင်ဝူထိုင်ကို အပြတ်ရှင်းလိုက်ပြီးနောက် သူ၏ သိုလှောင်အိတ်ကို သိမ်းဆည်းကာ အတွေးနက်သွားတော့သည်။ အခြေအနေမှာ သူထင်ထားသည်ထက် ပိုမိုရှုပ်ထွေးနေပြီဖြစ်သည်။

မြေခွေးသခင်မကြီးက ဘာလို့ ငါ့ကိုလိုက်ရှာနေတာလဲ။ ငါယူထားတဲ့ အနှစ်သာရသွေးက သူမအတွက် အသက်သွေးကြောလိုမျိုး အရေးပါနေပုံပဲ။

စုန်ယန်သည် တောင်လမ်းတစ်လျှောက် တိုက်ခတ်နေသော ပြင်းထန်သည့် လေကြမ်းများကို ကြည့်ရင်း စိတ်ကို တည်ငြိမ်အောင် ထားလိုက်သည်။ ဂူဟွမ်ကျီသည် ဂိုဏ်းသို့ ပြန်ရောက်နေပြီဖြစ်ရာ စုန်ယန်၏ လက်ပတ်မှတစ်ဆင့် အာရုံခံနိုင်သော်လည်း လက်ရှိတွင် လူချင်းဝေးကွာနေသဖြင့် တိုက်ရိုက်လာရောက် ဖမ်းဆီးနိုင်ခြင်း မရှိသေးပေ။

သူ့တွင် ရွေးချယ်စရာ လမ်းနှစ်သွယ်ရှိသည်။

ဈေးပွဲတော်သို့ ပြန်သွားပြီး လူအုပ်ကြားတွင် ပုန်းအောင်းကာ မြေခွေးသခင်မကြီး၏ အာရုံကို လွှဲပြောင်းရန် ကြိုးစားခြင်းနှင့် ယခုရရှိထားသော သွေးသားပေါင်းစပ်ခြင်းအတတ်ကို အသုံးပြု၍ မြေခွေးသွေးကို အမြန်ဆုံး စုပ်ယူပြီး အဆင့်မြှင့်တင်ကာ ကိုယ့်အားကိုယ်ကိုး၍ ထွက်ပြေးခြင်းပင်။

စုန်ယန်သည် သူ၏ အရိပ်ရုပ်သေးကို အနားသို့ ခေါ်လိုက်သည်။ ယခုအချိန်တွင် သူသည် သားကောင်အဖြစ်မှ မုဆိုးအဖြစ်သို့ ပြောင်းလဲရန် ပြင်ဆင်ရတော့မည်။

စုန်ယန်သည် သူ၏အခြေအနေကို အမြန်သုံးသပ်လိုက်သည်။ သူ၏ လက်ထဲတွင် အစွမ်းထက်သော်လည်း အမည်မသိရသေးသော မိစ္ဆာသွေးရှိနေသည်။ ခရမ်းရောင်

နန်းတော်ဆေးလုံးမရှိသော်လည်း၊ သူ၏ ထာဝရသက်တမ်းကို အသုံးချကာ အကြိမ်ပေါင်းများစွာ သေစမ်းကြည့်ခြင်းဖြင့် အောင်မြင်သည့်လမ်းစဉ်ကို ရှာဖွေနိုင်မည်ဖြစ်သည်။

ယခုအချိန်သည် အန္တရာယ်အကြီးမားဆုံးဖြစ်သလို အခွင့်အလမ်း အကောင်းဆုံးလည်း ဖြစ်နေသည်။ အေးစက်သောစမ်းအိုင်ချိုင့်ဝှမ်းသည် နိုင်ငံသုံးနိုင်ငံအတွင်း ထူးကဲချီအားအကောင်းဆုံးနေရာများထဲမှ တစ်ခုဖြစ်ရာ ဤနေရာတွင် အဆင့်တက်ခြင်းက သက်တမ်းကုန်ဆုံးမှုကို များစွာသက်သာစေမည်ဖြစ်သည်။

စုန်ယန်သည် သူ၏ ဝိညာဉ်ပုံသွင်း မြေခွေးမိစ္ဆာကို သိုလှောင်လက်စွပ်ထဲသို့ သိမ်းဆည်းလိုက်ပြီး အမည်မသိဝတ်စုံကို ဝတ်ဆင်ကာ ဈေးပွဲတော်အတွင်းရှိ လူသူထူထပ်သော အရက်ဆိုင်တစ်ခုတွင် တိတ်တဆိတ် တည်းခိုလိုက်သည်။ ထို့နောက် ခြေရာဖျောက်စီရင်စုကို အခန်းထောင့်တွင် အလွန်ကျဉ်းမြောင်းသော အတိုင်းအတာဖြင့် အသက်သွင်းလိုက်သည်။

သူသည် စနစ်ကို ကြည့်လိုက်ရာ သက်တမ်းမှာ ၇၅၂၂ နှစ် အထိ ရှိနေသည်ကို တွေ့ရသည်။ သူသည် သွေးသားပေါင်းစပ်ခြင်းအတတ်ကို အခြေခံကာ အဆင့်တက်ရန်အတွက် သက်တမ်းကို စတင်ရင်းနှီးမြှုပ်နှံလိုက်တော့သည်။

ကျင့်စဉ်ကို စတင်သည်နှင့် စနစ်တွင် အချက်အလက်များ တရစပ် ပေါ်လာတော့သည်။

[သင်သည် အမည်မသိသွေးကို သောက်သုံးလိုက်ကာ ပြင်းထန်သောအဆိပ်ကြောင့် သင်သေဆုံးသွားသည်...]

[သင်သေဆုံးသွားသည်...]

[သင် ထပ်မံသေဆုံးသွားသည်...]

စက္ကန့်အနည်းငယ်အတွင်းမှာပင် စုန်ယန်မှာ အကြိမ်ပေါင်း ဒါဇင်နှင့်ချီ၍ သေဆုံးခဲ့ရသည်။ သို့သော် သေဆုံးမှုမှာ မြန်ဆန်လွန်းသဖြင့် သက်တမ်းကုန်ဆုံးမှုမှာ အလွန်နည်းပါးသည်။ အကြိမ် ၁၀၀ ကျော် သေဆုံးပြီးနောက်တွင် ထူးခြားသော အချက်အလက်တစ်ခု ပေါ်လာသည်။

[သင်သည် ချန်းဝမ်ကျားမျိုးနွယ်၏ သွေးတစ်စက်ကို အောင်မြင်စွာ စုပ်ယူနိုင်ခဲ့သည်။ သို့သော် တစ်စက်တည်းသာဖြစ်သဖြင့် သင်သေဆုံးသွားသည်... ]

"ချန်းဝမ်ကျားမျိုးနွယ်"

စုန်ယန် ဤအမည်ကို တစ်ခါမျှ မကြားဖူးပေ။ ချန်းဝမ်ဆိုသည်မှာ သေဆုံးသွားသော ဝိညာဉ်များကို စေခိုင်းတတ်သည့် သရဲတစ္ဆေတစ်မျိုး ဖြစ်သည်။ ၎င်းသည် ရုပ်သေးအတတ်နှင့် ဆက်စပ်နေသော မိစ္ဆာမျိုးနွယ်တစ်ခုပင်။

"ငါကတော့ ရုပ်သေးတွေနဲ့ တကယ်ကို ရေစက်ပါတာပဲ..."

စုန်ယန်က ကိုယ်ကိုကိုယ် သရော်ပြုံး ပြုံးလိုက်မိသည်။