တုန်လှုပ်ဖွယ်ရာ ရှာဖွေတွေ့ရှိမှု

‎အိုင်ဗီသည် ရာဗင်ခရော့ဖ် အိမ်တော်သို့ ပြန်ရောက်လာခဲ့သည်။

‎ပတ်ဝန်းကျင်တစ်ခုလုံးမှာ ထူးဆန်းစွာ တိတ်ဆိတ်နေပြီး ဇမ်ဘီတစ်ကောင်တစ်လေမျှ မတွေ့ရပေ။ အာရုံခံစားမှု ပိုမိုထက်မြက်လာသည့် အိုင်ဗီသည် ဒီတိတ်ဆိတ်မှုမှာ ခဏသာဖြစ်ပြီး မကြာခင် မုန်တိုင်းလာတော့မည်ကို သိနေသည်။

‎သူမသည် ပျင်းရိငြီးငွေ့သော အမူအယာဖြင့်ပင် အိမ်ရှေ့ဘဲလ်ကို နှိပ်လိုက်သည်။

‎"ဘယ်သူလဲ" ဆာဖီနာ၏ အသံမှာ အနည်းငယ် အလှမ်းဝေးရာမှ ထွက်ပေါ်လာသည်။ အိုင်ဗီကတော့ ဘဲလ်ကို မရပ်မနား ဆက်တိုက်နှိပ်နေခဲ့သည်။

‎အဆက်မပြတ် မြည်နေသော အသံကြောင့် စိတ်တိုသွားသည့် ဆာဖီနာသည် တံခါးကို ဝုန်းကနဲ ဖွင့်လိုက်ပြီး ကြောင်အသွားသည်။ အိုင်ဗီက သူမကို ပျင်းရိစွာ ပြုံးပြလိုက်ပြီးနောက် တွန့်ဆုတ်မနေဘဲ ပါးကို ဖြတ်ရိုက်လိုက်တော့သည်။

‎"အား..."

‎ဆာဖီနာသည် အိုင်ဗီ့ထံမှ ဒီလောက်ရဲတင်းသော အမူအယာမျိုးကို တစ်ခါမျှ မမျှော်လင့်ထားခဲ့ပေ။ ရုတ်တရက် နာကျင်သွားမှုကြောင့် သူမ ကြမ်းပြင်ပေါ်သို့ လဲကျသွားသည်။ သူမ အခြေအနေကို ပြန်လည် သုံးသပ်နိုင်ချိန်မှာတော့ အိုင်ဗီက အိမ်ထဲသို့ ဝင်သွားနှင့်ပြီ ဖြစ်သည်။ ဆာဖီနာ၏ မျက်ဝန်းများ ဒေါသကြောင့် ပြူးကျယ်သွားကာ ပြန်ထရပ်လိုက်ပြီး...

‎"နင်... ဒီမိန်းမယုတ်! အခုချက်ချင်း ရပ်စမ်း။ ဘယ်သူ့ခွင့်ပြုချက်နဲ့ အိမ်ထဲဝင်တာလဲ။ ငါက နင့်ကို ဝင်ခွင့်ပေးလို့လား"

‎သူမသည် အိုင်ဗီ၏ ရဲတင်းမှုကို မယုံနိုင်အောင် ဖြစ်နေသည်။ ဒီဟာမကို သူမကိုယ်တိုင် ကောက်ယူခဲ့တာမဟုတ်လား။ ဆာဖီနာသာ မရှိလျှင် အိုင်ဗီတစ်ယောက် အအေးဒဏ်ကြောင့် သေဆုံးသွားခဲ့ရပြီဖြစ်သည်။

‎သူမက ဒီဟာမကို အိမ်ထဲ ခေါ်လာခဲ့ရခြင်းမှာလည်း သူမ မေးမြန်းခဲ့ဖူးသော ဗေဒင်ဆရာက အိုင်ဗီသည် အိမ်သို့ ကံကောင်းမှုများ ယူဆောင်လာပေးမည်ဟု ပြောခဲ့ခြင်းကြောင့်သာ ဖြစ်သည်။

‎ရာဗင်ခရော့ဖ် မိသားစုအတွက် ပါးစပ်တစ်ပေါက် ပိုကျွေးရသည်မှာ ခက်ခဲလှသော်လည်း ဆာဖီနာက သူမကို မွေးစားခဲ့သည်။ အဲ့ဒီတော့ အိုင်ဗီ့ကို ရိုက်နှက်မိရင်ကော ဘာဖြစ်လဲ။ သူမရဲ့ ဒေါသတွေကို အိုင်ဗီ့အပေါ်မှာ နည်းနည်းပါးပါး ဖြေဖျောက်လို့ မရဘူးလား။

‎ပြီးတော့ အိုင်စလာက ဆိုင်းလပ်စ်ကို ချစ်နေတာမို့ အိုင်ဗီက ခွေးကောင်းတစ်ကောင်လို လမ်းဖယ်ပေးသင့်တယ် မဟုတ်လား။ ဒါကို ဒီ‌ ကောင်မက သူမကို ပြန်အာခံရဲတယ်၊ သူတို့ကို ရိုက်နှက်တယ်၊ ပြီးတော့ ဆိုင်းလပ်စ်ရဲ့ ဧည့်ခန်းမှာတောင် အိပ်ခဲ့သေးသည်။

‎ဆာဖီနာသည် အိုင်ဗီတစ်ယောက် ပညာတော်သင်ဆုများစွာနှင့် ပြိုင်ပွဲများစွာမှ ရရှိသောဆုများဖြင့် သူမကိုယ်သူမသာမက သူမ၏ မောင်နှမတွေကိုပါ ထောက်ပံ့ပေးခဲ့သည်ကို လုံးဝ မေ့လျော့နေခဲ့သည်။

‎အလယ်တန်းအထိတော့ အိုင်ဗီသည် ရာဗင်ခရော့ဖ် မိသားစု၏ ငွေကို သုံးခဲ့သည်မှာ အမှန်ပင်။ သို့သော်လည်း အချိန်ပိုင်းအလုပ်များ၊ အိမ်အလုပ်များနှင့် ပြိုင်ပွဲအမျိုးမျိုးတွင် ပါဝင်ယှဉ်ပြိုင်ခြင်းဖြင့် ထိုငွေများကို ပြန်လည်ပေးဆပ်ရန် ကြိုးစားခဲ့သည်။

‎အကယ်၍ စုစုပေါင်းကြည့်မည်ဆိုလျှင် အိုင်ဗီသည် ကျောင်းတက်နေစဉ်အတွင်း ဒေါ်လာ ၁၉၄,၇၂၀ အထိ ရှာဖွေနိုင်ခဲ့ပြီး သူမ၏ မုန့်ဖိုးအဖြစ် ဒေါ်လာ ၄၀၀၀ သာ ပြန်ယူခဲ့သည်။ အထက်တန်းကျောင်းရောက်ကတည်းက ရာဗင်ခရော့ဖ် မိသားစုက သူမကို မုန့်ဖိုးပေးခြင်းကို ရပ်ဆိုင်းခဲ့သည်။

‎အိုင်ဗီ ရှာဖွေခဲ့သမျှထဲမှ ဒေါ်လာ ၁၉၀,၀၀၀ ခန့်ကို ရာဗင်ခရော့ဖ်တွေက အရှက်မရှိ ဝါးမျိုခဲ့ကြသော်လည်း အိုင်ဗီသည် သူတို့အပေါ် အကြွေးတင်နေသည်ဟုသာ စွပ်စွဲနေကြဆဲပင်။

‎"ငါ သူ့ကို သေချာ ပညာပေးရမယ်။ အရိုက်ခံရပြီးရင်တောင် ဒီလို အေးစက်စက် နေနိုင်ဦးမလား ကြည့်ကြသေးတာပေါ့။ ငါ့ကို ပါးရိုက်ရဲတယ်ပေါ့လေ။ ငါက နင့်ရဲ့ အရင်းခေါက်ခေါက် အမေမဟုတ်ပေမယ့် နင့်ကို ကျွေးမွေးပြုစုလာတာလေ။ ဒါတွေက နင် ငါ့ကို ပြန်ပေးရမယ့် အကြွေးတွေပဲ"

‎ထိုသို့တွေးပြီး သူမသည် အိုင်ဗီ့ဆီသို့ အရှိန်အဟုန်ဖြင့် ပြေးဝင်တိုက်ခိုက်လိုက်သည်။ အိုင်ဗီကတော့ နောက်ကျောတွင် မျက်စိပါသကဲ့သို့ပင် အသာအယာ ရှောင်လိုက်ရာ ဆာဖီနာသည် အရှိန်မထိန်းနိုင်ဘဲ မှောက်ရက်လဲကျသွားပြီး အော်ဟစ်တော့သည်။

‎"အား..."

‎သူမ၏ ထပ်ခါတလဲလဲ အော်သံကြောင့် ဆိုဖာပေါ်မှာ အချိန်ဖြုန်းနေကြသည့် မောင်နှမနှစ်ယောက်၏ အာရုံကို ဆွဲဆောင်လိုက်သလို ဖြစ်သွားသည်။

‎ဒေမီယန်နှင့် အိုင်စလာတို့သည် စင်္ကြံဆီသို့ အပြေးအလွှား ရောက်လာကြပြီး အိုင်ဗီနှင့် တိုက်မိလုနီးပါး ဖြစ်သွားသည်။

‎အိုင်ဗီကတော့ ထိုဟန်ဆောင်ကောင်းလှသော မောင်နှမနှစ်ယောက်နှင့် အသားချင်း မထိချင်သဖြင့် နောက်သို့ ဆုတ်လိုက်ရာ အိုင်စလာက သူမကို အပြစ်ရှိစိတ်နှင့် ကြောက်ရွံ့နေသည်ဟု အထင်မှားသွားသည်။

‎အိုင်စလာသည် အိုင်ဗီ့ကို ကျော်သွားပြီး သူမ၏ အမေကို ပွေ့ချီကာ စိုးရိမ်တကြီး အမူအယာဖြင့်...

‎"မေမေ... ဘာဖြစ်တာလဲ။ အိုင်ဗီက မေမေကို တိုက်ခိုက်တာလား"

‎ဆာဖီနာသည် အိုင်စလာကို ဖက်ထားရင်း မျက်ရည်များ တလိမ့်လိမ့် ကျလာသည်။ သူမသည် ဒေါသကြောင့် တုန်ယင်နေသော လက်ဖြင့် အိုင်ဗီ့ကို ညွှန်ပြကာ...

‎"ဒီမိန်းမ... ဒီကောင်မက ငါ့ကို ပါးရိုက်တယ်၊ ပြီးတော့ တွန်းထုတ်လိုက်သေးတယ်။ ငါ့ကို ထပ်ပြီး တိုက်ခိုက်ဖို့ လုပ်နေတုန်း သမီးတို့နှစ်ယောက် အချိန်မီ ရောက်လာလို့ပေါ့။ ဒေမီယန်... မင်း မေမေ့အတွက် တရားမျှတအောင် လုပ်ပေးရမယ်နော်"

‎ဒေမီယန်က အိုင်ဗီ့ကို အေးစက်စက် စိုက်ကြည့်နေစဉ် အိုင်ဗီ၏ အာရုံကတော့ ဒေမီယန် ဝတ်ထားသည့် လက်စွပ်ဆီမှာ ဖြစ်နေသည်။

‎"ဘာလို့လဲ။ မဟုတ်ဘူး... သူက ဘယ်လိုလုပ်ပြီး အဲ့ဒီလက်စွပ်ကို ရနေတာလဲ။ အရင်ဘဝတုန်းကတော့ သူက ငါ့ဆီကနေ အတင်းလုယူသွားတာလေ... ဒါပေမဲ့ ဒီဘဝမှာတော့ ငါ ဒီလက်စွပ်ကို မရှာတွေ့ခဲ့ပါဘူး... ဒါဆို လက်စွပ်က ဘယ်လိုဖြစ်ပြီး သူ့ဆီ ရောက်နေတာလဲ။ တစ်ချို့အရာတွေကို ပြောင်းလဲလို့ မရဘူးလို့ ဘုရားသခင်က ငါ့ကို အရိပ်ပြနေတာလား"

‎ထိုမေးခွန်းများကြောင့် သူမ၏ ရင်ထဲမှာ လေးလံသွားသည်။ သို့သော်လည်း သူမ၏ ဦးနှောက်က အခြေအနေကို ပိုမိုမြန်ဆန်စွာ ဆန်းစစ်လိုက်သည်။

‎"မဟုတ်ဘူး... ပြောင်းလဲလို့မရတဲ့ အရာဆိုတာ မရှိဘူး။ အတိတ်က သေးငယ်တဲ့ လှုပ်ရှားမှုတစ်ခုကို ပြောင်းလဲလိုက်ရင်တောင် လိပ်ပြာတောင်ပံ ခတ်သလို အကျိုးသက်ရောက်မှုကြောင့် အချိန်ကာလ ပဟေဠိ တွေ ဖြစ်လာနိုင်တာပဲ။ ငါ တစ်ခုခုကို လွဲချော်နေတာ ဖြစ်ရမယ်"

‎သူမကို စူးစူးဝါးဝါး ကြည့်နေသော ဒေမီယန်နှင့် မျက်လုံးချင်း ဆုံလိုက်ပြီး မေးလိုက်သည်။

‎"ဒီလက်စွပ်ကို ဘယ်က ရတာလဲ"

‎ဒေမီယန်၏ မျက်ဝန်းထဲတွင် ဇဝေဇဝါ ဖြစ်သွားသော်လည်း အိုင်စလာက လှောင်ပြောင်လိုက်သည်။

‎"ဘာလဲ... နင်က ကြိုက်နေတာလား။ စိတ်တောင်မကူးနဲ့။ ဒါက အစ်ကို့ရဲ့ ရည်းစားက ပေးထားတဲ့ လက်ဆောင်"

‎အိန်ဂျလီနာလား။

‎အိုင်ဗီ၏ မျက်ဝန်းများ ဒေါသကြောင့် တောက်လောင်သွားသည်။ သို့သော်လည်း သူမ၏ အသိတရားဖြင့် စီးဆင်းလာသော အတိတ်မှတ်ဉာဏ်များကို ထိန်းချုပ်လိုက်ပြီး ဇဝေဇဝါ ဖြစ်သွားရပြန်သည်။

‎အိုင်ဗီ ဘရင်းစတုန်း တောင်ပေါ်တက်တဲ့နေ့မှာ အိန်ဂျလီနာက ဈေးဝယ်ထွက်နေရမှာ မဟုတ်ဘူးလား။

‎ဘာလို့ အစီအစဉ်တွေက ရုတ်တရက် ပြောင်းလဲကုန်တာလဲ။ နေဦး... အိန်ဂျလီနာကော အရင်ဘဝကလို ပြန်လည်မွေးဖွားလာတာ လား။

‎အိုင်ဗီ အံ့သြသွားပြီး သူမ၏ ခန့်မှန်းချက်ကို အတည်ပြုရန်အတွက် အချက်အလက် ထပ်မံရယူဖို့ ဆုံးဖြတ်လိုက်သည်။

‎"သြော်... သူမက ကုန်တိုက်ကနေ ဝယ်လာတာလား။ ဘယ်ကုန်တိုက်လဲ"

‎အိုင်စလာ၏ အမြင်တွင်တော့ အိုင်ဗီသည် ကြောက်နေသဖြင့် စကားလမ်းကြောင်း လွှဲနေသည်ဟု ထင်လိုက်သည်။

‎"ဒီလောက်အထိ တုံးအတဲ့ မိန်းမ။ ဒါမျိုးတွေကို ကုန်တိုက်မှာ ရှာလို့မရဘူးဟဲ့။ သူမက တောင်ပေါ်မှာ ရှာတွေ့ခဲ့တာ။ စကားလမ်းကြောင်း လွှဲဖို့ မကြိုးစားနဲ့"

‎အိန်ဂျလီနာသည် ပြန်လည်မွေးဖွားလာသူဖြစ်ကြောင်း အိုင်ဗီ ၇၀ ရာခိုင်နှုန်းခန့် သေချာသွားပြီဖြစ်သည်။ သို့သော် ပိုမိုသေချာစေရန် သူမ ထပ်မေးလိုက်သည်။

‎"ငါ သိသလောက်တော့ အိန်ဂျလီနာက ဒေမီယန်နဲ့ ရန်ဖြစ်နေတာ မဟုတ်လား။ ဘာလို့ သူ့ကို လက်စွပ် လက်ဆောင်ပေးရတာလဲ"

‎အိုင်စလာက တဟားဟား ရယ်လိုက်သည်။

‎"နင်က အပြင်မှာနေနေတော့ ဘာမှမသိဘူးပေါ့။ အိန်ဂျလီနာက အခုဆိုရင် အစ်ကို့နားမှာ နေရဖို့အတွက် တောင်းပန်တိုးလျှိုးနေတာ။ အစ်ကိုသာ သဘောတူမယ်ဆိုရင် သူက မယားငယ်အဖြစ်တောင် နေဖို့ အသင့်ပဲတဲ့"

‎အိုင်ဗီ အံ့သြသွားကာ မျက်ခုံးပင့်မိသွားသည်။

‎ဘာကြောင့်လဲဆိုတော့ အရင်ဘဝတုန်းက အိန်ဂျလီနာသည် ကပ်ဘေးကြီး ဖြစ်ပြီး ၂ နှစ်အကြာမှာ ဒေမီယန်နှင့် လမ်းခွဲကာ တခြားယောက်ျားတစ်ယောက် နောက်ကို လိုက်သွားခဲ့ခြင်းကြောင့် ဖြစ်သည်။

‎အိန်ဂျလီနာ နောက်ပိုင်းမှာ ဘာဖြစ်သွားလဲဆိုတာ သူမမသိသော်လည်း ဒေမီယန်ကတော့ အဆင့် ၁ စွမ်းအားရှင်ကနေ အဆင့် ၇ စွမ်းအားရှင်အထိ ဖြစ်လာခဲ့သည်။ သူ နိုးထလာသည့် စွမ်းအားမှာ စိတ်စွမ်းအား ဖြစ်သည်။

‎ဒေမီယန်သည် သူ၏ အရည်အချင်းကြောင့် လူမှုအသိုင်းအဝိုင်းတွင် အဆင့်အတန်း မြင့်မားလာခဲ့ပြီး နောက်ဆုံးတွင် ယုတ်မာလှသော စခန်းခေါင်းဆောင်၏ လက်ရုံးဖြစ်လာခဲ့သည်။

‎မိန်းကလေးများစွာက ဒေမီယန်နှင့် ပတ်သက်ချင်ကြသော်လည်း သူကတော့ မည်သူ့ကိုမျှ ဂရုမစိုက်ခဲ့ပေ။

‎တကယ်လို့ အိန်ဂျလီနာသာ ပြန်လည်မွေးဖွားလာခဲ့ရင်တော့ သူမသည် ဒေမီယန်နားမှာနေဖို့ အစွမ်းကုန် ကြိုးစားမှာ သေချာပါသည်။

‎အခုတော့ အရာအားလုံးက အဓိပ္ပာယ်ရှိသွားပါပြီ။

‎"အင်း... ဒီလူတွေကို သတ်ရတာ အတော်လေး ပျော်ဖို့ကောင်းတော့မှာပဲ"

‎အရာအားလုံးကို ပြောင်းလဲဖို့ အခွင့်အရေးရတာ သူမတစ်ယောက်တည်း မဟုတ်ဘူးဆိုတာကို အိုင်ဗီ လုံးဝ မတွေးမိခဲ့ပါဘူး။

‎