အချိန်မှတ်နာရီ
Vol. 3 Ch. 30
၁၅:၀၀
၁၄:၅၉
၁၄:၅၈
...
အချိန်မှတ်နာရီမှ ကိန်းဂဏန်းများ စတင်လျော့ကျလာသည်နှင့်အမျှ အိုင်ဗီ မျက်မှောင်ကြုတ်လိုက်မိသည်။
ဘာတွေဖြစ်နေတာလဲ။ ထိုမေးခွန်းက သူမ၏ခေါင်းထဲတွင် ကြီးစိုးနေစဉ်မှာပင် သူမ၏အကြည့်က ကြမ်းပြင်ပေါ်ရှိ အစားအသောက်များပေါ်သို့ ကျရောက်သွားသည်။
"ဒါ... ဒါက ဘယ်လိုဖြစ်နိုင်မှာလဲ!" အိုင်ဗီ အော်ဟစ်မိလုနီးပါး ဖြစ်သွားသည်။
သူမ၏မျက်လုံးများကိုပင် သူမ မယုံနိုင်အောင် ဖြစ်နေရသည်။
အိမ်ခေါင်မိုးတစ်ခုလုံးတွင် ဆန်ထုပ်အမျိုးမျိုး ပြန့်ကျဲနေသည်။ ဒီမြင်ကွင်းတင်သာဆိုလျှင် အိုင်ဗီ ဤမျှ တုံ့ပြန်မိမည်မဟုတ်ပေ။
သို့သော် သူမ ထိတ်လန့်သွားရသည်မှာ ဇမ်ဘီများသည် ထိုဆန်ထုပ်များကို ဘာမှမရှိသလိုမျိုး ဖြတ်သန်းသွားလာနေကြခြင်းပင်။ ထိုဆန်ထုပ်များသည် ဤလောကတွင် တကယ်ရှိမနေသကဲ့သို့ပင်။
တကယ့်ကို ထူးဆန်းလွန်းလှသည့် ကမ္ဘာကြီးပါလား။
အိုင်ဗီသည် သူမ၏ အာရုံခံစားမှုများကိုပင် သံသယဝင်စပြုလာသည်။ စက္ကန့်အနည်းငယ်ကြာမှ သူမ သတိပြန်ဝင်လာပြီး...
'မဟုတ်ဘူး အိုင်ဗီ။ ဒါက အရာအားလုံးကို သံသယဝင်နေရမယ့် အချိန်မဟုတ်ဘူး။ ရသမျှ အထောက်အပံ့တွေကို အမြန်စုဆောင်းရမယ်'
ထိုသို့တွေးပြီး အိုင်ဗီသည် ငုံ့ကာ ၂၀၀ ဂရမ်ရှိသော ဆန်လုံးညိုထုပ်ကို ကောက်ယူလိုက်သည်။
အိုင်ဗီ၏ လက်ချောင်းများက ဆန်လုံးညိုထုပ်ကို ထိတွေ့လိုက်သည်နှင့် သူမ၏လက်ဖဝါးထဲသို့ ထူးဆန်းသော နွေးထွေးမှုတစ်ခု ပျံ့နှံ့သွားသည်။
တစ္ဆေတစ်ကောင်လို ဝေဝါးကြည်လင်နေသော ဆန်ထုပ်သည် သူမ ဆုပ်ကိုင်လိုက်သည်နှင့် ဤလောကတွင် အမြဲရှိနေခဲ့သကဲ့သို့ ခိုင်မာသော အရာဝတ္ထုတစ်ခုအဖြစ် ပြောင်းလဲသွားသည်။
ဒေါင်!
[ဤပစ္စည်းအား ၂၅ ဆ ပွားယူလိုပါသလား။ ၁ ကီလိုဘိုက် ကုန်ကျမည် ဖြစ်သည်။ သို့မဟုတ် သိမ်းဆည်းထားပြီးနောက်မှ ပွားယူမည်လား]
အိုင်ဗီ မတွန့်ဆုတ်တော့ပါ။ နှလုံးခုန်သံများ မြန်နေသော်လည်း သူမ၏ ဦးနှောက်ကတော့ ထက်မြက်နေဆဲပင်။
"သိမ်းထားလိုက် နောက်မှ ပွားမယ်" သူမ တိုးတိုးလေး အလျင်စလို ပြောလိုက်သည်။ တစ်စက္ကန့်လေးတောင် အလဟဿ အဖြစ်မခံနိုင်ပါ။
ဆန်ထုပ်သည် သူမလက်ထဲမှ အလင်းတန်းလေးတစ်ခုနှင့်အတူ ပျောက်ကွယ်သွားပြီး စွမ်းအင်သိုလှောင်မှုဟင်းလင်းပြင်ထဲသို့ ရောက်ရှိသွားသည်။ အိုင်ဗီ အသက်ပြင်းပြင်းတစ်ချက်ရှူကာ နောက်ထပ်တစ်ထုပ်ကို ထပ်ကောက်ပြန်သည်။
ဘက်စမာတီဆန် ၄၀၀ ဂရမ်ထုပ်။
သူမ၏ အသားနှင့် ပလတ်စတစ်အိတ် ထိတွေ့လိုက်သည်နှင့် ထိုနွေးထွေးမှုက လက်ဖဝါးထဲ စိမ့်ဝင်လာပြီး ဆန်ထုပ်က အစစ်အမှန် ဖြစ်လာသည်။
[၂၅ ဆ ပွားမလား? ၁ ကီလိုဘိုက် ကုန်ကျမည်။ သို့မဟုတ် သိမ်းထားမလား?]
"သိမ်းထားနောက်မှ ပွားမယ်" အိုင်ဗီ့အသံက တိုးသော်လည်း ပြတ်သားနေသည်။
ဘက်စမာတီဆန်ထုပ် ပျောက်ကွယ်သွားပြီးနောက် သူမသည် ဒူးထောက်လျက်ပင် ၃၀၀ ဂရမ်ရှိ ဆန်ဖြူထုပ်ကို ထပ်ယူသည်။ နောက်ထပ် အလင်းတန်း၊ နောက်ထပ် နွေးထွေးမှု။
"သိမ်းထားနောက်မှ ပွားမယ်"
သူမ၏ လှုပ်ရှားမှုများမှာ ကကွက်တစ်ခုလို ချောမွေ့လာသည်။
ကောက်ညှင်းဆန် ၂၅၀ ဂရမ်၊ တောဆန် ၅၀၀ ဂရမ်နှင့် အာရပ်ဆန် ၃၅၀ ဂရမ်တို့ကို တစ်ထုပ်ပြီးတစ်ထုပ် အမိန့်ပေးကာ သိမ်းဆည်းလိုက်သည်။ သိုလှောင်နယ်မြေကလည်း အမှားအယွင်းမရှိ အကုန်လက်ခံပေးနေသည်။
သူမ၏ ပတ်ပတ်လည်တွင် ဇမ်ဘီများသည် ရည်ရွယ်ချက်မဲ့စွာ လျှောက်သွားနေကြပြီး ၎င်းတို့၏ မျက်တွင်းဟောင်းလောင်း မျက်လုံးများက အိုင်ဗီ့ဘက်သို့ ကြည့်သော်လည်း သူမကို တကယ် မြင်ပုံမရပေ။
အိုင်ဗီနှင့် ၎င်းတို့ကြားတွင် မမြင်ရသော အတားအဆီးတစ်ခု ရှိနေသကဲ့သို့ပင်။ ၎င်းတို့သည် ညည်းတွားသံပင် မပြုဘဲ သူမအတွက် လမ်းဖယ်ပေးနေကြသည်။
၀၇:၀၀
၀၆:၅၉
အချိန်မှတ်နာရီက တဖြည်းဖြည်း လျော့နည်းလာနေပြီး စက္ကန့်တိုင်းမှာ အိုင်ဗီ၏ အာရုံကြောတွေကို ဓားနဲ့မွှန်းနေသလို ခံစားရသည်။ နဖူးမှ ချွေးများ စီးကျလာသော်လည်း သူမ မရပ်တန့်ပါ။
ဂျက်စမင် ဆန် ၂၀၀ ဂရမ်၊ ဆန်နီ ၄၅၀ ဂရမ်၊ ဆန်နက် ၄၀၀ ဂရမ်နှင့် ပေါင်းဆန် ၃၀၀ ဂရမ်တို့ကို စုဆောင်းလိုက်သည်။
သူမ အသက်ရှူသံများ ပြင်းထန်လာသော်လည်း လက်များကတော့ မတုန်မရင် ရှိနေဆဲ။
၀၂:၀၀
၀၁:၅၉
အိုင်ဗီ အချိန်မှတ်နာရီကို လှမ်းကြည့်လိုက်ရာ နှလုံးခုန်သံ တစ်ချက် ရပ်သွားမတတ် ခံစားရသည်။ လင်းထိန်နေသော ကိန်းဂဏန်း များသည်လဲသတိပေးမီးနီကဲ့သို့ နီရဲနေပြီ။
'တစ်မိနစ်ပဲ ကျန်တော့တယ်... မဟုတ်ဘူး၊ တစ်မိနစ်တောင် မပြည့်တော့ဘူး။ တောက်စ်'
ထိတ်လန့်မှုများ သွေးကြောထဲ စီးဆင်းလာသော်လည်း သူမ အတင်းဖိနှိပ်ထားလိုက်သည်။
ဆန်လုံးတို ၅၀၀ ဂရမ်၊ ဆူရှီဆန် ၂၅၀ ဂရမ်နှင့် ဝေဟနီ ဆန် ၃၅၀ ဂရမ်တို့ကို လက်လှမ်းသမျှ အမြန်ကောက်ယူလိုက်သည်။
"သိမ်းထား နောက်မှ ပွားမယ်"
သူမ၏ ခြေလှမ်းများ ပိုမြန်လာပြီး ဖိနပ်နှင့် ကြမ်းပြင်ထိတွေ့သံများ ဆူညံနေသည်။ ဇမ်ဘီများကတော့ သူမကို ညဘက်တွင် ဖြတ်ပြေးသွားသော အရိပ်တစ်ခုလိုပင် လျစ်လျူရှုထားဆဲ။
၀၀:၃၀
၀၀:၂၉
အချိန်မှတ်နာရီက သူမ၏အာရုံထဲမှာ တောက်လောင်နေသော်လည်း အိုင်ဗီ ဆက်လုပ်နေသည်။
ကောက်ညှင်း ၃၀၀ ဂရမ်၊ အမွှေးစပါး ၄၀၀ ဂရမ်နှင့် အာဘိုရီယို ဆန် ၅၀၀ ဂရမ်တို့ အားလုံး ဘေးကင်းစွာ သိမ်းဆည်းပြီးပြီ။ သူမ၏လက်များ တုန်ယင်နေသော်လည်း သူမ မရပ်တန့်ပါ။ ရပ်တန့်၍ မရပါ။
၀၀:၀၅
၀၀:၀၄
အိုင်ဗီသည် နောက်ဆုံးတွေ့ရသော ဘွန်ဘာ ဆန် ၂၅၀ ဂရမ်ထုပ်ကို လှမ်းဆွဲလိုက်သည့်အချိန်မှာပင် အိမ်ခေါင်မိုးတစ်ခုလုံးသည် ပျောက်ကွယ်တော့မည့် ရိပ်ယောင်ကဲ့သို့ ဝေဝါးလာသည်။
"သိမ်းထား" သူမ အသက်မောစွာ ဟစ်အော်လိုက်သည်။
ထို့နောက်... ၀၀:၀၀
ကျန်ရှိနေသော ဆန်ထုပ်များသည် ဘာမှမရှိခဲ့သလို လေထဲတွင် ပျော်ဝင်ကွယ်ပျောက်သွားတော့သည်။
အိုင်ဗီသည် ရုတ်တရက် ကျရောက်လာသော တိတ်ဆိတ်မှုထဲတွင် မတ်တပ်ရပ်နေမိသည်။ တစ်ကိုယ်လုံး တောင့်တင်းနေပြီး အဝတ်အစားများမှာလည်း ချွေးများဖြင့် စိုရွှဲနေသည်။
သူမ လုပ်နိုင်ခဲ့ပြီ။
ခြေလက်များ နာကျင်ကိုက်ခဲနေသော်လည်း အိုင်ဗီသည် ရရှိလာသည့် ပစ္စည်းများကို နောက်မှ စစ်ဆေးရန် ဆုံးဖြတ်လိုက်သည်။ ဇမ်ဘီများကြားတွင် အကြာကြီးနေခြင်းမှာ မကောင်းလှပေ။
အိမ်ခေါင်မိုးမှ ထွက်ကာ တံခါးပိတ်ပြီး လှေကားထစ်ပေါ်တွင် ထိုင်လိုက်ရင်း သူမ အမိန့်ပေးလိုက်သည်။
"သိုလှောင်မှု ရေ၊ ငါ့ရဲ့ ရလဒ်တွေကို ပြစမ်း"
သူမ၏ လေသံထဲတွင် စိတ်လှုပ်ရှားမှု အရိပ်အယောင်လေး ပါဝင်နေသည်။
[ဟုတ်ကဲ့]
အံ့သြစရာကောင်းသည်မှာ ယခုတစ်ကြိမ်တွင် သူမ တုံ့ပြန်မှု ရရှိခဲ့ခြင်းပင်။
[ဆန်လုံးညို - ၂၀၀ ဂရမ်၊ ဘက်စမာတီ - ၄၀၀ ဂရမ်၊ ဆန်ဖြူ - ၃၀၀ ဂရမ်၊ ကောက်ညှင်းဆန် - ၂၅၀ ဂရမ်၊ တောဆန် - ၅၀၀ ဂရမ်၊ အာရပ်ဆန် - ၃၅၀ ဂရမ်၊ ဂျက်စမင်ဆန် - ၂၀၀ ဂရမ်၊ ဆန်နီ - ၄၅၀ ဂရမ်၊ ဆန်နက် - ၄၀၀ ဂရမ်၊ ပေါင်းဆန် - ၃၀၀ ဂရမ်၊ ဆန်လုံးတို - ၅၀၀ ဂရမ်၊ ဆူရှီဆန် - ၂၅၀ ဂရမ်၊ ဝေဟနီဆန် - ၃၅၀ ဂရမ်၊ ကောက်ညှင်း - ၃၀၀ ဂရမ်၊ အမွှေးဆန် - ၄၀၀ ဂရမ်၊ အာဘိုရီယို - ၅၀၀ ဂရမ်၊ ဘွန်ဘာဆန် - ၂၅၀ ဂရမ်။]
အိုင်ဗီ အမြန်တွက်ချက်ကြည့်လိုက်ရာ ပမာဏမှာ များသလို ထင်ရသော်လည်း လူတစ်ယောက်အတွက် ၄ လစာထက် ပိုမလောက်နိုင်မှန်း သိလိုက်သည်။
သို့သော်လည်း 'ပွားယူခြင်း' စွမ်းဆောင်ချက်နှင့် သူမ၏ စွမ်းအားကို ပေါင်းစပ်လိုက်လျှင် အိုင်ဗီ စိတ်ချသွားရသည်။
'ငါ ပြန်လည်မွေးဖွားလာတာ နောက်ကျခဲ့ရင်တောင်မှ... ဒီစွမ်းအားနဲ့ဆိုရင်တော့ အစားအသောက် ပြတ်လပ်မှာကို ဘယ်တော့မှ စိုးရိမ်စရာ မလိုတော့ဘူး!' အိုင်ဗီ့စိတ်တွေ တက်ကြွသွားသည်။
တစ်ချိန်တည်းမှာပင် သူမ၏ စွမ်းအားအကြောင်း အချက်အလက်အချို့ကိုလည်း သိရှိလိုက်ရသည်။
"နေရာက အမျိုးမျိုး ကွဲပြားနိုင်တယ်... ဒါပေမဲ့ ငါ့ရဲ့ ပင်ကိုယ်သိစိတ်က အဲ့ဒီနေရာကို ရောက်အောင် လမ်းပြပေးလိမ့်မယ်။ အဲ့ဒီကို ရောက်တာနဲ့ အထောက်အပံ့တွေကို စုဆောင်းဖို့ ၁၅ မိနစ်ပဲ အချိန်ရမယ်၊ ၁၅ မိနစ်ပြည့်တာနဲ့ အရာအားလုံး ပျောက်ကွယ်သွားလိမ့်မယ်။
တစ်ခေါက်မှာ ပစ္စည်းအမျိုးအစား တစ်ခုတည်းကိုပဲ တွေ့နိုင်ပေမယ့် ကံကောင်းတာက... အဲ့ဒီပစ္စည်းရဲ့ အမျိုးကွဲတွေ အစုံအလင် ပါဝင်နေတာပဲ"