အန္တရာယ်ဖြစ်လုနီးဆဲဆဲ

‎"တော်တော့" ဒေမီယန်၏ အမိန့်ပေးသံဟိန်းထွက်လာမှုက စင်္ကြံတစ်လျှောက် ပဲ့တင်ထပ်သွားပြီး မိခင်နှင့် သမီးဖြစ်သူတို့အား ကျေနပ်ပီတိဖြစ်စေသည်။ "ငါ့အမေကို ရန်လုပ်ရဲတယ်ပေါ့။ နင့်ကို ငါဘယ်လိုပညာပေးမလဲဆိုတာ စောင့်ကြည့်နေလိုက်"

‎အိုင်ဗီကတော့ မျက်လုံးတစ်ချက်ဝှေ့ယမ်းလိုက်ရုံသာ။ ဒေမီယန်၏ စကားများကို သူမ အလေးအနက်မထားပေ။ ထို့ပြင် သူမရဲ့ အခန်းဆီသို့သာ ဆက်လျှောက်သွားသည်။

‎သူမက ဂရုမစိုက်ဘဲ လျစ်လျူရှုသွားသည်ကို မြင်သောအခါ ဒေမီယန်ရဲ့မျက်နှာမှာ ဒေါသကြောင့် နီမြန်းလာသည်။ သူက အိုင်ဗီ၏ အင်္ကျီကော်လာကို ဆွဲကိုင်ကာ နောက်သို့ ဆောင့်ဆွဲလိုက်သည်။

‎သို့သော် ထိုသို့ဆွဲလိုက်သည့် အရှိန်မှာတင် အိုင်ဗီက လျင်မြန်စွာ လှည့်ပြီး သူ၏ဗိုက်ကို အားပြင်းသော ကန်ချက်ဖြင့် ကန်ချလိုက်တော့သည်။

‎ဒေမီယန်၏ ဆုပ်ကိုင်ထားမှု ပြေလျော့သွားပြီး ကြမ်းပြင်ပေါ်သို့ ခွေကျသွားသည်။ သူသည် ဗိုက်ကို အလိုအလျောက် ဆုပ်ကိုင်ထားမိပြီး ပြင်းထန်သော နာကျင်မှုဝေဒနာက တစ်ကိုယ်လုံးသို့ ပျံ့နှံ့သွားသည်။

‎"အား..."

‎"နင် ဘယ်လိုတောင် ရဲတင်း..." အိုင်စလာက ပြန် ပြောရန် ပါးစပ်ဟလိုက်သော်လည်း အိုင်ဗီက ဖြတ်ပြောလိုက်သည်။

‎"ငါ ဘယ်လိုရဲတင်းရတာလဲလို့ ထပ်မမေးနဲ့။ တစ်ခါလုပ်နိုင်ရင် နောက်တစ်ခါလည်း ထပ်လုပ်နိုင်တယ်"

‎ထိုသို့ပြောပြီးနောက် သူမသည် အခန်းထဲဝင်ကာ တံခါးပိတ်ပြီး ကုတင်ပေါ်၌ လှဲလျောင်းလိုက်သည်။ အိုင်ဗီသည် အခြားအရာများကို တွေးတောရန်ပင် အလွန်ပင်ပန်းနေပြီဖြစ်သည်။ သူမ၏ စွမ်းအားများကို အသုံးပြုပြီးနောက်တွင် ခေါင်းမူးဝေကာ အားအင်ကုန်ခမ်းသလို ခံစားနေရသောကြောင့်ဖြစ်သည်။

‎နောက်တစ်နေ့

‎စတီဖင် ဘလက်ခ်သော်န် သည် မှန်ထဲ၌ မိမိကိုယ်မိမိ ပြန်ကြည့်ရင်း အင်္ကျီကော်လာကို ပြင်လိုက်သည်။ သူ၏ ထက်မြက်သော မျက်ဝန်းညိုများက မှန်ထဲကပုံရိပ်ကို စိုက်ကြည့်နေသည်။

‎သေသပ်လှပသော စစ်စိမ်းရောင် ယူနီဖောင်းသည် သူ၏ အရပ်ရှည်ရှည် ကိုယ်ခန္ဓာနှင့် ကွက်တိဖြစ်နေပြီး ရင်ဘတ်မှ ဂုဏ်ထူးဆောင်တံဆိပ်များက ရုံးခန်းအတွင်းရှိ မီးရောင်အောက်တွင် ဖျတ်ဖျတ်လက်နေသည်။ သူသည် ဆံပင်ကို တစ်ချက်သပ်ကာ ဦးထုပ်ကိုကောက်ကိုင်လိုက်ပြီး သက်ပြင်းတစ်ချက်ကို ခပ်ပြင်းပြင်း ချလိုက်သည်။

‎စစ်ဖိနပ်သံသည် စကျင်ကျောက်ကြမ်းပြင်ပေါ်တွင် တချက်ချက်မြည်လျက် စင်္ကြံတစ်လျှောက် ပဲ့တင်ထပ်နေသည်။ သူသည် အစည်းအဝေးခန်းမ၏ တံခါးနှစ်ချပ်ကို တွန်းဖွင့်ကာ ဝင်လိုက်သည်။

‎အတွင်း၌ သူ၏ အထက်လူကြီး မေဂျာကာတာ သည် စားပွဲနောက်တွင် ရပ်နေပြီး မျက်နှာမှာ အလွန်တည်ကြည်လေးနက်နေသည်။ သူ၏ဘေးတွင်တော့ စတီဖင်၏ လုပ်ဖော်ကိုင်ဖက်ဖြစ်သလို ပြိုင်ဘက်ဟောင်းဖြစ်သူ ဖရန့်ခ် ရှိနေသည်။

‎စတီဖင် ဝင်လာသည်ကို မြင်လျှင် မြင်ချင်းပင် ဖရန့်ခ်၏ ကပ်စေးနှဲလှသော အပြုံးမှာ ပျောက်ကွယ်သွားသည်။ အခြားအရာရှိများသည် စားပွဲဘေး၌ မတ်မတ်ရပ်နေကြပြီး အခန်းအတွင်း၌ တင်းမာမှုများ ဖုံးလွှမ်းနေသည်။

‎"စတီဖင်၊ မင်းရောက်ပြီပဲ။ ကောင်းပြီ" မေဂျာကာတာက တည်ငြိမ်သောအသံဖြင့် ဆိုသည်။ "စကြရအောင်"

‎စတီဖင်က စနစ်တကျ အလေးပြုလိုက်သည်။ "ဟုတ်ကဲ့ ဆရာ"

‎ကာတာသည် အချိန်မဖြုန်းတော့ဘဲ စားပွဲပေါ်၌ ဖြန့်ခင်းထားသော မြေပုံကို ညွှန်ပြလိုက်သည်။ မြို့ဆင်ခြေဖုံး နေရာများကို အနီရောင်ဖြင့် မှတ်သားထားသည်။

‎"မင်းတို့သိတဲ့အတိုင်း အခြေအနေက ပိုဆိုးလာပြီ။ ဆင်ခြေဖုံးက အရပ်သားတွေဟာ တိုက်ခိုက်ခံနေရတယ်လို့ သတင်းပို့လာကြတယ်။ အဲ့ဒီက ရောဂါပိုးကူးစက်ခံထားရသူ အရေအတွက်ဟာ ထိန်းချုပ်မရအောင် များလာပြီလို့ ငါတို့ သံသယရှိတယ်။ မင်းတို့အဖွဲ့ဟာ နောက် ၂ နာရီအတွင်း ထွက်ခွာရမယ်။ မိုးမချုပ်ခင် ဆင်ခြေဖုံးကိုရောက်အောင်သွားပြီး ကူးစက်ခံရသူတွေကို ရှင်းလင်း၊ ပြီးရင် အရပ်သားတွေကို စကိုင်းလိုင်း လူနေရပ်ကွက်ဆီကို ခေါ်ထုတ်လာခဲ့ပါ။ အသွားပြန်ခရီးက အသွားဆိုရင် ၆ နာရီလောက် ကြာနိုင်တယ်"

‎စတီဖင်၏ ရင်ထဲ၌ ထိတ်ကနဲ ဖြစ်သွားသည်။ အိုင်ဗီ သတိပေးခဲ့သည့် တာဝန်နှင့် ထပ်တူကျနေသည်။

‎သူ ဘာမှမပြောရသေးမီ ဖရန့်ခ်က ရှေ့သို့တိုးလာပြီး ဟန်ဆောင်ဝမ်းနည်းမှုများဖြင့် "မေဂျာ... ကျွန်တော် ဒီစစ်ဆင်ရေးမှာ မပါနိုင်တော့ဘူး ထင်တယ်။ ကျွန်တော့်ဇနီးက မီးဖွားဖို့ စောပြီး ဗိုက်နာနေလို့ပါ။ ကျွန်တော် အနားမှာ ရှိနေပေးရမယ်"

‎စတီဖင်၏ မျက်ဝန်းများ အန္တရာယ်ရှိစွာ ကျဉ်းမြောင်းသွားသည်။ ဘယ်လောက်တောင် တိုက်ဆိုင်လိုက်သလဲ။

‎မေဂျာကာတာက ဖရန့်ခ်နှင့် မြေပုံကို တလှည့်စီကြည့်ကာ တုံ့ဆိုင်းနေသည်။ "ဒါက အချိန်မဟုတ်ဘူး..."

‎"နားလည်ပါတယ် ဆရာ။ ဒါပေမဲ့ ကျွန်တော့်မိသားစုက..."

‎စတီဖင်၏ ဦးနှောက်က အလုပ်လုပ်နေပြီဖြစ်သည်။ 'အိုင်ဗီပြောတာ မှန်နေတာပဲ။ အကြောင်းပြချက်ကအစပေါ့။ သူမက ဒီအသေးစိတ်အချက်အလက်တွေအထိ ကြိုတင်ဟောကိန်းထုတ်နိုင်ခဲ့တာပဲ'

‎သူမ၏ ကြိုတင်မြင်နိုင်စွမ်းအပေါ် သူ၏လေးစားမှုမှာ ပိုမိုနက်ရှိုင်းသွားသည်။ သူက လက်သီးကို ကျစ်ကျစ်ပါအောင် ဆုပ်ထားလိုက်သည်။

‎မေဂျာကာတာက သက်ပြင်းချလိုက်ပြီး "ကောင်းပြီလေ။ မိသားစုက အရေးကြီးဆုံးပဲ။ စတီဖင်၊ မင်းပဲ ဒီယူနစ်ကို ဦးဆောင်လိုက်တော့"

‎"ဟုတ်ကဲ့ ဆရာ" စတီဖင်၏ အသံမှာ ခိုင်မာနေသော်လည်း အတွေးများမှာတော့ လှုပ်ခတ်နေသည်။ ဖရန့်ခ်က နောင်တရသလို ဟန်ဆောင်နေသော်လည်း သူ၏မျက်ဝန်းထဲမှ စိတ်သက်သာရာရမှုကို စတီဖင် မြင်နေရသည်။

‎အိုင်ဗီသည် သူမပိုင်ဆိုင်သော ပစ္စည်းအနည်းငယ်ကို ထုပ်ပိုးလိုက်သည်။ သူမသည် ရာဗင်ခရော့ဖ် မိသားစုနှင့် ဆက်နေရန် အစီအစဉ်မရှိတော့ပေ။ အဲ့အပြင်ဒီအဆောက်အအုံသည် မကြာမီ ဇမ်ဘီများဖြင့် ပြည့်နှက်သွားတော့မည်ဖြစ်သည်။

‎ဇမ်ဘီဗိုင်းရပ်စ်ကို သုတေသနပြုနေသော ပညာရှင်များ၏ တစ်ဝက်ခန့်သည် မကြာမီတွင် စွမ်းအားရှင်များ ပေါ်ပေါက်လာမှု၊ ဘေးထွက်ဆိုးကျိုးများနှင့် 'စွမ်းအင်မိုး' ၏ အကျိုးကျေးဇူးများကို သတိပြုမိကြတော့မည်။ ထိုအချိန်တွင် တကယ့်စစ်မှန်သော ထိတ်လန့်စရာများ စတင်ပေတော့မည်။

‎ဇမ်ဘီအရေအတွက်မှာ ပိုမိုများပြားလာမည်။ လုယက်မှုနှင့် တိုက်ခိုက်မှုများမှာ နေ့စဉ်ဖြစ်ရိုးဖြစ်စဉ်ကိစ္စများ ဖြစ်လာမည်။ ကိုက်ခံရခြင်းမှ ကူးစက်မှုများမှာ ပိုပြီးပြင်းထန်လာမည်။ အခြားသော ဒုက္ခသည်များမှာ အန်န် မြို့ သို့ အလုံးအရင်းနှင့် တိုးဝင်လာကြမည်။ စိတ်ဒဏ်ရာလွန်ဝေဒနာ နှင့် အခြားစိတ်ပိုင်းဆိုင်ရာ ရောဂါများမှာ တုပ်ကွေးထက်ပင် မြန်ဆန်စွာ ပြန့်နှံ့သွားလိမ့်မည်။

‎ဦးနှောက်မဲ့စွာ လျှောက်သွားနေသော ဇမ်ဘီများကို ဉာဏ်ရည်ရှိသော ဇမ်ဘီများက ထိန်းချုပ်ကာ အိမ်ရာဝင်းများအတွင်းရှိ လူများကို စတင်တိုက်ခိုက်လာကြလိမ့်မည်။ အချို့သော ထက်မြက်သည့် ဇမ်ဘီများသည် ပြတင်းပေါက်များကို ခွဲကာ အခန်းတွင်းသို့ ဝင်လာကြမည်။

‎ဤရှုပ်ထွေးမှုများအားလုံးသည် နောက်ထပ် ၃ လခန့်အတွင်း ဖြစ်ပွားလိမ့်မည်။ ထို့နောက်တွင်တော့ စစ်မှန်သော ပြဿနာကြီး ရောက်လာလိမ့်မည်။ ၎င်းမှာ ရာသီဥတု ဖောက်ပြန်ပြောင်းလဲမှု ပင် ဖြစ်သည်။

‎နောင်လာမည့်နှစ်များကို ရာသီ ၃ ခုသာ ခွဲခြားထားတော့မည်။ အလွန်အမင်း ပူပြင်းခြင်း၊ အလွန်အမင်း မိုးသည်းထန်ခြင်းနှင့် အလွန်အမင်း အေးခဲခြင်းတို့ဖြစ်သည်။ ဤမပြီးဆုံးနိုင်သော သံသရာဆိုးကြီးသည် လူသားတို့၏ ၉၀ ရာခိုင်နှုန်းကို စိတ်ဓာတ်ပြိုကွဲစေရန် လုံလောက်လှသည်။ ဤဖြစ်ရပ်သည် တစ်ကမ္ဘာလုံးတွင် ဖြစ်ပွားနေခြင်းကြောင့် လူသားများ ရှင်သန်ရန် မဖြစ်နိုင်သလောက်ပင်။

‎ဆင်းရဲဒုက္ခတစ်ခုပြီးတိုင်းတစ်ခုမှာ စိတ်ဓာတ်ခိုင်မာသော စစ်သည်တော်များ၏ နှလုံးသား‌များကိုပင် ကျိုးပဲ့စေခဲ့သည်။ ကောင်းကင်ဘုံကပင် လူသားမျိုးနွယ်ကို အသက်မရှင်စေချင်တော့သလိုပါပဲ။

‎အိုင်ဗီ၏ စွမ်းအား ဆင့်ကဲပြောင်းလဲလာပြီးနောက်တွင်မူ ထိုစွမ်းအားသည် လူသားမျိုးနွယ် ရှင်သန်ရေးအတွက် တစ်ခုတည်းသော အကြောင်းပြချက် ဖြစ်လာခဲ့သည်။ သို့သော် ဤစွမ်းအားသည်ပင်လျှင် အိုင်ဗီနှင့် သူမချစ်ရသူများ သေဆုံးရသည့် အကြောင်းရင်းလည်း ဖြစ်လာခဲ့သည်။

‎ထုပ်ပိုးမှုများပြီးသောအခါ အိုင်ဗီသည် ရုတ်တရက် ခေါင်းမူးလာသည်။ သူမ နဖူးကို ကိုင်ထားရင်း သတိလက်လွတ်ဖြင့် အခန်းထဲမှ ထွက်လာမိသည်။

‎"ဖေဖေ၊ တစ်ခုခုလုပ်မှဖြစ်မယ်! အိုင်ဗီက သိပ်ကို လက်လွန်နေပြီ" အိုင်စလာ၏ နှာသံပါသော အသံသည် ဧည့်ခန်းအတွင်း ပဲ့တင်ထပ်နေသည်။

‎"အိုင်စလာ စိတ်မညစ်နဲ့၊ အစ်ကို နင့်အတွက် လက်စားချေပေးမယ်" ဒေမီယန်၏ အလိုလိုက်သော အသံက ထပ်ချပ်မကွာ ထွက်ပေါ်လာသည်။

‎အိုင်ဗီသည် ဂါထာဖြင့် မန်းမှုတ်ခံထားရသူကဲ့သို့ ဆက်လျှောက်သွားသည်။ ရာဗင်ခရော့ဖ် မိသားစုဝင်များမှာ စကားပြောကောင်းနေကြသဖြင့် အိုင်ဗီ ထွက်သွားသည်ကိုပင် သတိမထားမိကြပေ။

‎...

‎ဂျောက်... ဂျောက်...

‎အိုင်ဗီ မျက်လုံးဖွင့်လိုက်သည့်အခါ သူမသည် အိမ်ခေါင်မိုးပေါ်သို့ ရောက်နေသည်ကို တွေ့လိုက်ရသည်။ အရေပြားများ ပုပ်သိုးနေကာ ခြေလက်များ ကောက်ကွေးနေသည့် ဇမ်ဘီအချို့က ရင်နင့်စရာကောင်းသလို ကြောက်မက်ဖွယ်ရာကောင်းသော မြင်ကွင်းကို ဖန်တီးထားသည်။

‎အိုင်ဗီအတွက်တော့ ဤမြင်ကွင်းမှာ အကျွမ်းတဝင်ဖြစ်နေသည်။ အိမ်ခေါင်မိုးတံခါး ပွင့်သွားသည်နှင့် ဇမ်ဘီအားလုံးက အိုင်ဗီ့ဘက်သို့ လှည့်ကြည့်ကြပြီးနောက် အကြည့်လွှဲသွားကြသည်။ ရှေ့ဆုံးက ဇမ်ဘီများသည် အိုင်ဗီသွားရန် လမ်းပင် ဖယ်ပေးကြသေးသည်။ ဤမြင်ကွင်းမှာ အတော်ပင် ရယ်စရာကောင်းလှသည်။

‎သို့သော် မိန်းမောနေသော အိုင်ဗီကတော့ ဂရုမစိုက်ပါ။ သူမသည် အလယ်ဗဟိုသို့ ရောက်သည်အထိ ဆက်လျှောက်သွားသည်။

‎"စွမ်းအား စတင်အသုံးပြုမည်" သူမ တိုးတိုးလေး ရေရွတ်လိုက်သည်နှင့် သူမ၏ မိန်းမောနေသည့် အခြေအနေမှာ ချက်ချင်း ပျောက်ကွယ်သွားသည်။

‎အိုင်ဗီသည် မျက်တောင်ခတ်ကာ ပတ်ဝန်းကျင်ကို ဇဝေဇဝါဖြင့် ကြည့်လိုက်သည်။ သူမ၏ မျက်ဝန်းများတွင် သတိဝိရိယများ ပြည့်နှက်လာပြီး သူမ၏ အရှိန်အဝါမှာလည်း စက္ကန့်နှင့်အမျှ အေးစက်လာသည်။

‎"ဘယ်သူလဲ" သူမက ခုခံသည့်အနေအထားကို ယူလိုက်ရင်း ပတ်ဝန်းကျင်ကို သတိကြီးစွာ ကြည့်လိုက်သည်။ ထိုစဉ် သူမ၏ မျက်လုံးများက လေထဲတွင် လွင့်မျောနေသော အချိန်မှတ်နာရီပေါ်သို့ ကျရောက်သွားတော့သည်။

‎