အခန်း (၂၁)

အခန်း (၂၁)

‎

‎နာကျင်မှုက တစတစနှင့် ပိုမိုပြင်းထန်လာကာ တစ်ကိုယ်လုံးကို ပုရွက်ဆိတ် ထောင်သောင်းချီ အကိုက်ခံနေရသလို အိုင်ဗီ ခံစားနေရသည်။

‎သူမသည် စားပွဲဆီသို့ အားအင်ကုန်ခမ်းနေသည့် မျက်ဝန်းများဖြင့် အသည်းအသန် သွားခဲ့သည်။ အရင်ဘဝတုန်းကတော့ ပင်ပန်းနွမ်းနယ်မှုများကြောင့် စွမ်းအင်မိုးရွာသွန်းသည့် အချိန်တစ်လျှောက်လုံး သူမ အိပ်ပျော်နေခဲ့ဖူးသည်။

‎သို့သော် ယခုဘဝတွင်မူ ဘယ်လောက်ပင် ပင်ပန်းနွမ်းနယ်နေပါစေ အိုင်ဗီတစ်ယောက် မျက်လုံးမှိတ်၍မရ။

‎စားပွဲဆီရောက်ဖို့နဲ့ မတ်တပ်ရပ်နိုင်ဖို့ကို မိနစ် ၃၀ ခန့် အချိန်ယူခဲ့ရသည်။ အိုင်ဗီသည် ခက်ခက်ခဲခဲပင် ဆေးပုလင်းကိုဖွင့်ကာ အိပ်ဆေးတစ်လုံး သောက်လိုက်သည်။

‎နောက်ထပ် မိနစ် ၂၀ ကြာသည်အထိ နာကျင်မှုကို အောင့်ခံရင်း ဆေးအာနိသင်ပြမည့်အချိန်ကို စောင့်နေခဲ့ရာမှ တဖြည်းဖြည်းနှင့် မျက်ခွံများ စေ့ကျသွားသည်။

‎ပတ်ဝန်းကျင်တစ်ခုလုံး မှောင်အတိကျသွားပြီး အိုင်ဗီသည် ရှည်လျားသော အိပ်မက်တစ်ခုကို စတင်မက်တော့သည်။

‎အိပ်မက်ထဲတွင်မူ သူမ၏မျက်ဝန်းများ အလင်းကွယ်နေပြီး လောကကြီးတစ်ခုလုံး အမှောင်ထုသာဖြစ်နေခဲ့သည့် နေ့ရက်များဆီ ပြန်ရောက်သွားသည်။

‎ဘာအရောင်မှမရှိဘဲ သူမနှင့် သူမ၏ အမှားအယွင်းများသာ ရှိနေခဲ့သည့် အချိန်ဖြစ်သည်။ စိတ်ကူးထဲက ကျောက်ခဲများကို တိုက်မိပြီး လဲကျနေသည့်အခါတိုင်း ညီမအရင်းဖြစ်သူက လှောင်ရယ်နေတတ်ပြီး မိဘများကမူ ညီမဖြစ်သူကို ဆူပူကြသည်။

‎"မမအိုင်ဗီ ကျောက်ခဲနဲ့ ထပ်တိုက်မိပြန်ပြီလား။ ညီမလေးက ချီပေးရမလား" ဟု စနောက်သည့် လေသံနှင့် မေးခဲ့ဖူးသည်။

‎အဲ့ဒီအချိန်တုန်းက အိုင်စလာကြောင့် ညီအစ်မဆိုသည့် ပတ်သက်မှုကို အိုင်ဗီ အရမ်းမုန်းတီးခဲ့သည်။ သူမက မဲ့ပြုံးပြုံးကာ အေးစက်သည့်လေသံနှင့် ပြန်ပြောခဲ့သည်။

‎"နင် သေချင်နေတာလား"

‎သူမက အတည်ပြောနေခြင်း ဖြစ်သော်လည်း သူမ၏ညီမကမူ ဘယ်တော့မှ အလေးအနက်မထားဘဲ ရယ်မောနေမြဲဖြစ်သည်။

‎"မမက တကယ်ပဲ နှလုံးသားမရှိသလို အေးစက်လွန်းတယ်။ ဒီနားကိုလာပါ။ ညီမလေးက နွေးထွေးအောင် လုပ်ပေးမယ်လေ"

‎အဲ့ဒီနောက်တွင် ညီမဖြစ်သူက အိုင်ဗီကို ဖက်ထားပေးတတ်သည်။ အလွန်အမင်း အေးစက်နေသည့်အချိန်တွင် အိုင်ဗီ အနည်းငယ် ရုန်းကန်မိသော်လည်း ညီမဖြစ်သူ၏ ရင်ခွင်က တကယ်ပင် နွေးထွေးခဲ့သည်။

‎တဖြည်းဖြည်းနှင့် သူမ၏ အမုန်းတရားများ အရည်ပျော်သွားပြီး ညီမဖြစ်သူ၏ ဖက်လဲတကင်းရှိမှုကို မျှော်လင့်လာမိသည်။ သို့သော် ညီမလေးကို ချစ်သည်ဆိုခြင်းဖြစ်စေ၊ ဂရုစိုက်သည်ဆိုခြင်းဖြစ်စေ၊ ကျေးဇူးတင်သည်ဆိုခြင်းဖြစ်စေ သူမ တစ်ခါမျှ ထုတ်မပြောခဲ့။

‎သူမ၏ လုံခြုံအောင် ပိတ်ဆို့ထားသည့် နှလုံးသားက ခွင့်မပြုခဲ့ခြင်းဖြစ်သည်။

‎ဒါပေမဲ့ အခုတော့ သူမ နောင်တရနေပြီ။ ချိုသာလှသည့် သူမ၏ညီမလေးသည် သူမကို ကာကွယ်ပေးရင်းနှင့် ဇမ်ဘီတစ်ပိုင်း ဖြစ်သွားခဲ့ရသည်။

‎ညီမဖြစ်သူ နောက်ဆုံးပြောသွားသည့် စကားများကို သူမ မှတ်မိနေဆဲဖြစ်သည်။

‎"မမ နောက်ဘဝမှာလည်း ညီအစ်မတွေ ထပ်ဖြစ်ကြမယ်နော်။ အဲ့ဒီအခါကျရင် ညီမလေးက မမဆီကို အရင်ဆုံး အရောက်လာခဲ့မယ်။ မမက ညီမလေးအပေါ် အခုလို အေးစက်မနေရအောင်လို့ပေါ့။ ညီမလေးကို စောင့်နေပါနော်"

‎မျက်ရည်များသည် ကြမ်းပြင်ပေါ်မှာ သတိမေ့နေသည့် အိုင်ဗီ၏ မျက်ဝန်းထောင့်မှ တသွင်သွင်စီးကျလာသည်။

‎"မသွားပါနဲ့။ ငါ့ကို ထားမသွားပါနဲ့ အမ်ဘာ။ ငါ နင့်ကို ချစ်ပါတယ်။ တကယ်ချစ်တာပါ။ ငါ နင့်အပေါ် မအေးစက်တော့ပါဘူး။ ငါ့ကို ထားမသွားပါနဲ့နော် ညီမလေးရဲ့။ ကျေးဇူးပြုပြီးတော့" ဟု အိပ်မက်ထဲမှာ တိုးတိုးလေး ရေရွတ်နေမိသည်။

‎သူမ၏ အသံတွင် အသည်းအသန် ဖြစ်တည်မှုများ ပါဝင်နေပြီး ရှိုက်သံသဲ့သဲ့သည် ဧည့်ခန်းထဲမှာ ပျံ့လွင့်နေသည်။

‎...................

‎

‎ဆိုင်းလပ်စ် မျက်လုံးပွင့်လာသည့်အခါ အလင်းရောင်နှင့် နေသားကျဖို့ အချိန်အနည်းငယ် ယူလိုက်ရသည်။ တိုးတိုးလေး စကားပြောသံများကြောင့် သူ မျက်မှောင်ကြုတ်မိသွားသည်။

‎"မေမေ။ အိုင်ဗီက ဆိုင်းလပ်စ်ကို သူ့အခန်းထဲမှာ ကျွန်မအတွက် ထားခဲ့ပေးတယ်ဆိုတာ မယုံနိုင်စရာပဲ။ ဒါက သူမရဲ့ တောင်းပန်တဲ့ လက်ဆောင်များလား မသိဘူး" ဆိုသည့် အိုင်စလာ၏ စိတ်လှုပ်ရှားနေသည့် အသံကြောင့် ဆိုင်းလပ်စ် ရွံရှာမိသွားသည်။

‎သို့သော် သူ့ကို ပို၍ ထိခိုက်စေသည်က အိုင်ဗီက သူ့ကို အိုင်စလာအတွက် ထားခဲ့သည် ဆိုသည့် အချက်ပင်ဖြစ်သည်။ သူ မတ်တပ်မရပ်ခင်မှာ တုန်လှုပ်မှုနှင့် စိတ်ပျက်မှုများကို ခံစားလိုက်ရသည်။

‎တစ်ကိုယ်လုံး နာကျင်နေပေမယ့် နှလုံးသားထဲက စိတ်ပျက်မှုလောက်တော့ မပြင်းထန်။

‎"အိုင်ဗီ ဘာလို့လဲ။ ဘာလို့လဲ။ ငါက မင်းအတွက် အချစ်မခံရနိုင်လောက်အောင် ဖြစ်နေလို့လား။ ငါ့ကို အိုင်စလာနဲ့ သဘောတူပေးနေတာကို ရပ်လိုက်လို့ မရဘူးလား။ ငါ့မျက်လုံးထဲမှာ မင်းကလွဲလို့ ဘယ်သူမှ မရှိတာကို မင်းမမြင်ဘူးလား။ မဟုတ်ဘူး။ ဒီအတိုင်းတော့ အဖြစ်မခံနိုင်ဘူး"

‎"ငါ အိုင်ဗီနဲ့ မပေါင်းဖက်ရရင်တောင် တခြားဘယ်သူနဲ့မှ မပေါင်းဖက်ချင်ဘူး။ ငါ သူမကို မချစ်တော့သလို ဟန်ဆောင်ထားတာက ပိုကောင်းလိမ့်မယ်။ အဲ့ဒါဆိုရင် ဒီလူယုတ်မာတွေက အိုင်ဗီကို အသုံးချတာ ရပ်သွားလိမ့်မယ်"

‎"သူတို့တွေ အိုင်ဗီကို မရှိတော့ဘူးလို့ ထင်သွားတဲ့အခါ ငါ အိုင်ဗီကို သူတို့ဆီကနေ ခေါ်ထုတ်သွားပြီး ငါ့ကို ချစ်လာအောင် တဖြည်းဖြည်း လုပ်ယူသွားမယ်"

‎မျက်ဝန်းထဲတွင် ခိုင်မာသော ဆုံးဖြတ်ချက်များနှင့်အတူ သူ ကုတင်ပေါ်က ဆင်းပြီး အပြင်သို့ ထွက်လာခဲ့သည်။ သူ့ရှေ့တွင် မြင်လိုက်ရသည့် မြင်ကွင်းကြောင့် သူ မှင်တက်သွားရသည်။

‎အိုင်ဗီသည် ကြမ်းပြင်ပေါ်မှာ သတိလစ်ကာ လဲကျနေသည်။

‎"သူမ သူတို့ရဲ့ သစ္စာဖောက်မှုကို ထပ်ခံလိုက်ရပြန်ပြီ ထင်တယ်" ဟု သူ ခါးခါးသီးသီး တွေးမိသည်။ ရာဗင်ခရော့ဖ် မိသားစုဆိုသည်မှာ အမြဲတမ်း ဤသို့ပင် မဟုတ်ပါလား။

‎သူတို့က အိုင်ဗီကို အလုပ်တစ်ခု ခိုင်းမည်၊ အဲ့ဒါပြီးရင်တော့ သူမကို အပြစ်ပေးကြပြန်သည်။

‎သို့သော် နောင်တွင်မူ အဲ့လို အဖြစ်မခံတော့‌ ပေ။

‎အိုင်ဗီ သူ့အပေါ် ပြခဲ့သည့် အတုအယောင် ချိုသာမှုများကို သူ မြည်းစမ်းဖူးလို့ စွဲလန်းနေခဲ့ပြီ။ အဲ့ဒါတွေက သရုပ်ဆောင်နေခြင်းမှန်း သိပေမယ့်လည်း သူကတော့ အရှုံးပေးရန် အသင့်ပင်ဖြစ်‌ နေသည်။ အိုင်ဗီသည် သူ့အတွက်တော့ ငြင်းဆန်၍မရသည့် ဆွဲဆောင်မှုတစ်ခု ဖြစ်သည်။

‎သူမသည် အအေးဒဏ်ကြောင့် တုန်ရီနေသူအတွက် နွေးထွေးမှုပေးသည့် အလင်းတန်းလေးလိုပင်။ မနေ့က သူမနှင့် နီးနီးကပ်ကပ် ရှိခဲ့သည့် အခြေအနေကြောင့် ဆိုင်းလပ်စ်သည် သူမကို ပို၍ တမ်းတမိသွားသည်။

‎ထို့ကြောင့် ကြမ်းပြင်ပေါ်က အိုင်ဗီအတွက် စိုးရိမ်နေသော်လည်း သူမကို လျစ်လျူရှုထားလိုက်ကာ သူ နိုးလာတာကို ကြည့်ပြီး အံ့သြနေသည့် ရာဗင်ခရော့ဖ် မိသားစုရှေ့တွင် လှောင်ရယ်လိုက်သည်။

‎"ဘာလဲ။ မင်းတို့အားလုံးက ငါက အိုင်ဗီကို ယုံကြည်ပြီး သူမ ခိုင်းသမျှ လုပ်နေမယ်လို့ တကယ်ပဲ ထင်နေကြတာလား"

‎အိုင်ဗီ၏ မျက်တောင်လေးများ အနည်းငယ် လှုပ်ခတ်သွားသည်ကို ဆိုင်းလပ်စ် မြင်ခဲ့လျှင် သူ ရပ်တန့်သွားနိုင်သည်။ သို့သော် သူကတော့ သရုပ်ဆောင်ကောင်းနေဆဲ ဖြစ်သည်။

‎"ငါ သူမကို မချစ်တော့ဘူး။ အဲ့တော့ ငါ ဘာလို့ အဲ့လို လုပ်မှာလဲ"