အခန်း (၈၅၁-၈၅၂)
Vol. 86 Ch. 851-852
အခန်း (၈၅၁) ပြုပြင်ပြောင်းလဲမှု ရလဒ်များ
ဖန့်ချန်က ပြုံးလိုက်ပြီး
"အခု မင်္ဂလာဆောင်မယ့်သူက ယူဟွမ်းမြို့ရဲ့ နေခင်းကင်းလှည့်စစ်သည်အသစ် ချင်ဆွေ့ပဲ ငါ့နောက်ကလူတွေက သတို့သားနဲ့ သတို့သမီးရဲ့ ဆွေမျိုးတွေပေါ့ မင်း အားတယ်ဆိုရင် ခဏနေရင် မင်္ဂလာသောက်ပွဲကို လာခဲ့ဦးလေ"
"လာမှာပေါ့၊ အသေအချာ လာခဲ့ပါ့မယ်"
ရွှီပိုင်ကျိုးက ထပ်တလဲလဲ ခေါင်းညိတ်လိုက်သည်။
ဖန့်ချန်ကိုယ်တိုင် ဖိတ်ကြားခြင်းကို ထားလိုက်ဦး သတို့သား၏ ရာထူးအဆင့်အတန်းကပင် သူ့အတွက် လက်ဆောင်အကြီးအကျယ်ယူပြီး လာရောက်ဂုဏ်ပြုရန် လုံလောက်နေပြီ ဖြစ်သည်။
ခမ်းနားသော လှေကြီးမှာ မကြာမီ ကမ်းကပ်သွားသည်။
ယခုတစ်ခေါက် ချင်ဆွေ့နှင့်အတူ လိုက်ပါလာသူမှာ ကျောင်းအုပ်ဟောင်း ပင် ဖြစ်သည်။
သူသည် ယင်စစ်သည်ဝတ်စုံကို ဝတ်ဆင်ထားပြီး သူ၏နောက်တွင် ယင်စစ်သည်အချို့လည်း ပါလာရာ သူ၏ဆန္ဒအတိုင်း ယင်စစ်သည်ဌာန၏ ငါးဦးစီး ဖြစ်လာခဲ့ပြီ ဖြစ်ကြောင်း သိသာလှသည်။
ချင်ဆွေ့သည် စိတ်လှုပ်ရှားမှုများဖြင့် လူအုပ်ကြီးကို အကြည့်ဖြင့် နှုတ်ဆက်လိုက်ပြီးနောက် ကမ်းပေါ်သို့ ခုန်ဆင်းကာ ဖန့်ချန်ကို လက်အုပ်ချီ အရိုအသေပေးလိုက်သည်
"အောက်ခြေဝန်ထမ်းက လူကြီးမင်းကို ဂါရဝပြုပါတယ် "
ရွှီပိုင်ကျိုးက လက်ကို အတင်းခါယမ်းပြသည်
"မင်း လူမှားနေပြီထင်တယ် ကျုပ်က လူကြီးမင်း မဟုတ်ပါဘူး"
အဝေးမှ အောက်ဆင်းသူအချို့မှာ တစ်ဦးကိုတစ်ဦး ကြည့်လိုက်ကြပြီး မျက်နှာထားများမှာ ပို၍ပင် ထူးဆန်းသွားကြသည်။
လူတိုင်းမှာ ခေတ္တမျှ ကြောင်သွားကြပြီး ရွှီပိုင်ကျိုးကို ထူးဆန်းသော အကြည့်များဖြင့် ကြည့်လိုက်ကြသည်။
ထိုစဉ် ကျောင်းအုပ်ဟောင်းက အော်ဟစ်လိုက်သည်
"ဟေ့... အောက်ဆင်းသူ ချင်လူကြီးမင်း ဂါရဝပြုနေတာက ဖန့်လူကြီးမင်းကိုကွ မင်းနဲ့ ဘာဆိုင်လို့လဲ "
ဖန့်လူကြီးမင်း
ရွှီပိုင်ကျိုးမှာ ခဏမျှ မှင်တက်သွားပြီးမှ ဖန့်ချန်ကို အံ့ဩတုန်လှုပ်စွာဖြင့် ကြည့်လိုက်သည်
"အစ်ကိုဖန့်... ခင်ဗျားက အစိုးရထဲက လူတစ်ယောက် ဖြစ်နေတာလား "
သူ၏ ရင်ထဲတွင် တုန်လှုပ်မှုများက တရစပ် ဖြစ်ပေါ်လာတော့သည်။
နေခင်းကင်းလှည့်စစ်သည်က ဂါရဝပြုရသည်ဆိုလျှင် တစ်ဖက်လူမှာ အနည်းဆုံး နေခင်းကင်းလှည့်ဗိုလ်ချုပ် အဆင့် ရှိရမည် ဖြစ်ရာ၊ ၎င်းမှာ သာမန် ပုဂ္ဂိုလ်မျိုး မဟုတ်ပေ။
ယင်လောကတွင် နေခင်းကင်းလှည့်ဗိုလ်ချုပ် ရာထူးကို ရယူနိုင်ရန်မှာ လူ့လောကရှိ ကျင့်ကြံမှုအရ အနည်းဆုံး ရွှေအမြုတေအဆင့်မှ စတင်ကာ ဝိညာဥ်သန္ဓေသားအဆင့်အထိ ရှိရမည် မဟုတ်ပါလား။
"ငါက ကြည့်ရတာ အစိုးရဝန်ထမ်းနဲ့ မတူလို့လား"
ဖန့်ချန်က ပြုံးလျက် မေးသည်။
ရွှီပိုင်ကျိုး၏ မျက်နှာတွင် ခါးသီးသော အပြုံးတစ်ခု ပေါ်လာသည်
"ဖန့်လူကြီးမင်းမှာ ထူးခြားတဲ့ အရှိန်အဝါ ရှိတာကိုတော့ ကျုပ် သိပါတယ် ဒါပေမဲ့ ကျုပ်မိန်းမက လူကြီးမင်းလို ပုဂ္ဂိုလ်မျိုးကို အကူအညီတောင်းနိုင်လိမ့်မယ်လို့တော့ မထင်ထားမိဘူး..."
"ဒါက ရေစက်ပါပဲ ကဲ... လှေပေါ် တက်ကြရအောင်"
ဖန့်ချန်က အသာအယာ ပြောလိုက်သည်
"ဒါပေမဲ့ ဒီလှေခကိုတော့ မင်း မင်္ဂလာပွဲလာတဲ့အခါ တစ်ခါတည်း ပေးခဲ့ဖို့ မမေ့နဲ့ဦး"
"ရပါတယ်၊ ရပါတယ် "
ရွှီပိုင်ကျိုးက ထပ်တလဲလဲ ခေါင်းညိတ်သည်။
ဒါက စည်းမျဉ်းဖြစ်ကြောင်း သူ မည်သို့ မသိဘဲ နေမည်နည်း။
လူတိုင်းမှာ လှေကြီးပေါ်သို့ လျင်မြန်စွာ တက်လိုက်ကြပြီး မကြာမီတွင် ယူဟွမ်းမြို့ တံခါးဝသို့ ရောက်ရှိလာကြသည်။
ထိုနေရာတွင် လူစည်ကားလှပြီး နေရာအနှံ့တွင် လေလွင့်ဝိညာဉ်များကို မြင်ရသောအခါ ချင်အိမ်တော်နှင့် ကျန်းမိသားစုမှ လူများမှာ အံ့ဩမှင်တက်နေကြသည်။
စတင်ခါစတွင် သူတို့ အနည်းငယ် ကြောက်ရွံ့နေခဲ့သော်လည်း ယခုမူ တဖြည်းဖြည်း ကျင့်သားရလာကြပြီး၊ ဤယင်လောကနှင့် လူ့လောကမှာ ထူးထူးခြားခြား ကွာခြားမှု မရှိကြောင်း တွေ့ရှိလိုက်ရသည်။
ပုံပြင်စာအုပ်ဟောင်းများထဲတွင် ပါသလို လျှာထွက်နေသော ကြိုးဆွဲချသေသည့် ဝိညာဉ်၊ ငတ်မွတ်နေသော ဝိညာဉ် သို့မဟုတ် ကြောက်စရာကောင်းသော ဝိညာဉ်ဆိုးများကဲ့သို့ ရုပ်ဆိုးလှသော အရာများကိုလည်း မတွေ့ရပေ။
လူတိုင်းနီးပါးမှာ မသေဆုံးမီက ပုံစံအတိုင်း ရှိနေကြသော်လည်း၊ ရုတ်တရက် သေဆုံးခဲ့ရသော ဝိညာဉ်အချို့မှာမူ သေဆုံးစဉ်က ဒဏ်ရာများကို သယ်ဆောင်ထားသဖြင့် ကြည့်ရသည်မှာ အနည်းငယ် ထိတ်လန့်စရာ ကောင်းလှသည်။
ဖန့်ချန်နှင့် လူအုပ်ကြီး မြို့တံခါးဝသို့ ရောက်သည်နှင့် လီပါးတောင်း နှင့် ဝမ်ဟု တို့ နှစ်ဦးသည် ယင်စစ်သည်အုပ်စုကို ဦးဆောင်ကာ အပြေးအလွှား ရှေ့သို့ တက်လာကြသည်။
"ပိကျန်းမြို့ ရဲ့ နေခင်းကင်းလှည့်ဗိုလ်ချုပ် ဝမ်ဟု ဖန့်လူကြီးမင်းကို ဂါရဝပြုပါတယ် "
"စိုက်ကျိုးမြို့ ရဲ့ နေခင်းကင်းလှည့်စစ်သူကြီး လီပါးတောင်း ဖန့်လူကြီးမင်းကို ဂါရဝပြုပါတယ် "
ယူဟွမ်းမြို့ရှိ ယင်စစ်သည်ဌာနမှ ယင်စစ်သည် ရာပေါင်းများစွာ တပြိုင်နက်တည်း ဂါရဝပြုလိုက်သံမှာ အလွန်ပင် ကျယ်လောင်လှရာ၊ ပတ်ဝန်းကျင်ရှိ လေလွင့်ဝိညာဉ်များမှာ ထိတ်လန့်တုန်လှုပ်စွာဖြင့် လှည့်ကြည့်ကြကုန်သည်။
အောက်ဆင်းသူများပင်လျှင် အဝေးမှနေ၍ ရိုသေစွာဖြင့် စောင့်ကြည့်နေကြရသည်။
သူတို့သည် မာမင်လုံနှင့် သူ၏ညီဖြစ်သူတို့၏ အဆုံးသတ်ကို မြင်တွေ့ခဲ့ရပြီးနောက်၊ မိမိတို့မှာ အပြစ်ပေးခြင်း မခံရသေးသော်လည်း ထိုလျှို့ဝှက်ဆန်းကြယ်သော လူကြီးမင်းက မည်သို့သော သဘောထား ရှိမည်ကို မသိသဖြင့် အနားမကပ်ရဲကြသလို လျစ်လျူရှုထားရန်လည်း မရဲကြပေ။
"ပိကျန်းမြို့ရဲ့ နေခင်းကင်းလှည့်ဗိုလ်ချုပ် ဝမ်ဟု သူက ရာထူးတက်သွားတာပဲ ဒါပေမဲ့ စိုက်ကျိုးမြို့ရဲ့ နေခင်းကင်းလှည့်စစ်သူကြီး ဆိုတာကရော ဘာလဲ"
ရွှီပိုင်ကျိုးမှာ အံ့ဩမှင်တက်နေတော့သည်။
ယခုတစ်ခေါက်တွင်မူ တစ်ဖက်လူက လူမှားပြီး ဂါရဝပြုသည်ဟု သူ မထင်တော့ပေ ထိုသူများမှာ အစ်ကိုဖန့်ကို သေသေချာချာ ဂါရဝပြုနေခြင်း ဖြစ်သည်။
နေခင်းကင်းလှည့်စစ်သည်က လူကြီးမင်း ဟု ခေါ်သည်ကို သူ နားလည်နိုင်သေးသော်လည်း၊ ယခုမူ သူ လုံးဝ ဇဝေဇဝါ ဖြစ်သွားရပြီ ဖြစ်သည်။
အလယ်သုံးဆင့် ကျင့်ကြံသူများသာ နေခင်းကင်းလှည့်စစ်သူကြီး ရာထူးကို တာဝန်ယူနိုင်ခြင်း ဖြစ်သည်။
စိုက်ကျိုးမြို့၏ နေခင်းကင်းလှည့်စစ်သူကြီး အဆင့်မှာ မမြင့်လှသော်လည်း စိတ်ဝိညာဥ်ထွက်ခွာခြင်း အဆင့် ကျင့်ကြံသူနှင့် ညီမျှသည်။
သို့သော် နေခင်းကင်းလှည့်စစ်သူကြီး အချင်းချင်းတွင် အထက်အောက် မရှိပေ သူ့ကိုပင် လူကြီးမင်းဟု ခေါ်စေနိုင်သောသူမှာ... ပိုမိုမြင့်မားသော နေခင်းကင်းလှည့်ဗိုလ်ချုပ်ကြီး သာ ဖြစ်ရမည်။
ဒါဟာ အထက်သုံးဆင့် ရဲ့ အစဦးဖြစ်တဲ့ တာအိုပေါင်းစပ်ခြင်း အဆင့်ရှိတဲ့ ကျင့်ကြံသူတွေမှ ရနိုင်တဲ့ ရာထူးမျိုးပဲ...။
ဝမ်ဟုနှင့် လီပါးတောင်းတို့၏ နောက်တွင် အဆင့်အတန်း မြင့်မားပုံရသော ဝိညာဉ်သုံးဦးလည်း ရှိနေသည်။
ဖန့်ချန်က အမှတ်မထင် မေးမြန်းလိုက်ရာ ထိုသုံးဦးမှာလည်း ကပျာကသီ ရှေ့သို့တက်ကာ ဂါရဝပြုကြသည်။
သူတို့မှာ ယူဟွမ်းမြို့ ယင်စစ်သည်ဌာန၏ စီရင်ရေးနတ်ဘုရား ၊ ညကင်းလှည့်စစ်သည် နှင့် မြို့တော်ဝန် တို့ ဖြစ်ကြသည်။
"ဒီမှာ လမ်းပိတ်မနေကြနဲ့တော့၊ မြို့ထဲ ဝင်ကြစို့"
ဖန့်ချန်က ပြုံးလျက် ပြောသည်။
လီပါးတောင်းက ချက်ချင်း လက်ဝှေ့ယမ်းလိုက်သည်
"မြို့ထဲ ဝင်မယ်"
မူလက ချင်အိမ်တော်နှင့် ကျန်းမိသားစုမှ လူ ၁၅၀ ကျော် ရှိရာမှ ယခုအခါ ယင်စစ်သည် ရာပေါင်းများစွာ ထပ်တိုးလာသဖြင့် တစ်ဖွဲ့လုံးမှာ ခမ်းနားထည်ဝါလှရာ၊ ယင်စစ်သည်ဌာနမှ ယင်မိစ္ဆာများကို နှိမ်နင်းရန် ထွက်ခွာလာသည်ဟုပင် ထင်မှတ်ရတော့သည်။
ကျန်းမိသားစု ခေါင်းဆောင်မှာ တစ်လမ်းလုံး သူ၏သမီးဖြစ်သူနှင့် စကားပြောလာခဲ့ပြီး၊ သူ၏မျက်နှာတွင် မဖုံးကွယ်နိုင်သော နှမြောတသမှုနှင့် နောင်တများ ပြည့်နှက်နေသည်။
ရွှီပိုင်ကျိုးမှာ ထိုအခြေအနေကို မြင်ပြီး သက်ပြင်းချရန် ပြင်နေစဉ်မှာပင်၊ လမ်းဘေးရှိ လူအုပ်ထဲမှ ပုံရိပ်တစ်ခုက သူ့ကို စိုက်ကြည့်နေသည်ကို တွေ့လိုက်ရသည်။
"မိန်းမ "
ရွှီပိုင်ကျိုးက စိတ်လှုပ်ရှားစွာဖြင့် လက်လှမ်းပြလိုက်သည်။
ဝမ်ဖန့် သည် သူ၏ ရင်ခွင်ထဲသို့ ချက်ချင်း တိုးဝင်လာပြီး၊ ယင်အငွေ့အသက်များဖြင့် ဖြစ်တည်နေသော မျက်ရည်စများမှာ တစ်စက်ပြီးတစ်စက် ကျဆင်းလာတော့သည်။
အနက်ရောင်ဝတ် အမျိုးသမီးမှာ ဝမ်းသာပီတိဖြစ်နေပြီး၊ အဖွဲ့၏ ရှေ့ဆုံးမှ ဖန့်ချန်ကို ကြည့်သော အကြည့်များမှာ ပိုမို ရိုသေလေးစားမှုနှင့် ကျေးဇူးတင်မှုများ ပြည့်နှက်လာတော့သည်။
ချင်းဆွေ့မှာ မိမိ၏ မင်္ဂလာပွဲသည် ဤမျှအထိ ခမ်းနားကြီးကျယ်လာလိမ့်မည်ဟု မထင်မှတ်ထားခဲ့ပေ။
ကြိုတင်ပြင်ဆင်ထားသော စားပွဲဝိုင်းများကိုပင် နောက်ထပ် ဒါဇင်နှင့်ချီကာ အလျင်အမြန် ထပ်တိုးလိုက်ရသည်။
မြို့တော်ဝန်ရုံး၊ ယင်စစ်သည်ဌာနနှင့် ယူဟွမ်းမြို့ရှိ အောက်ဆင်းသူများမှာ တစ်ယောက်ပြီးတစ်ယောက် လာရောက်ဂုဏ်ပြုကြပြီး လက်ဆောင်များ ပေးအပ်ကြသည်။
လက်ဆောင်များမှာ အနည်းဆုံး ယင်သက်တမ်း ၂ လ၊ ၃ လမှ အများဆုံး ၁ နှစ်၊ ၂ နှစ်အထိ ရှိသော်လည်း၊ အရေအတွက် များပြားလှသဖြင့် အားလုံးပေါင်းလိုက်သောအခါ မူးဝေသွားလောက်သော ကိန်းဂဏန်းတစ်ခု ဖြစ်လာသည်။
နောက်ဆုံးတွင် အသုံးစရိတ်အားလုံးကို နှုတ်လိုက်သော်လည်း ယင်သက်တမ်း နှစ် ၁၀၀ ကျော် ပိုလျှံနေသေးသည်။
ရက်အနည်းငယ်အကြာတွင် ချင်အိမ်တော်နှင့် ကျန်းမိသားစုမှ လူများကို လူ့လောကသို့ ပြန်လည် ပို့ဆောင်ပေးလိုက်ပြီး၊ ယူဟွမ်းမြို့မှာလည်း ယခင်ကကဲ့သို့ ပြန်လည် တည်ငြိမ်သွားတော့သည်။
ဖန့်ချန်သည် ခြံဝင်းအတွင်းရှိ ဝိညာဉ်မြဲမိုးမခပင် ရှေ့တွင် ရပ်နေသည်။
ရွှမ်ဖျင့် မှာ သူ၏ ညာဘက်လက်မောင်းတွင် ရစ်ပတ်ထားပြီး ဦးခေါင်းကို သူ၏ပုခုံးပေါ်တွင် တင်ထားသည်။
ယင်လောက၏ အငွေ့အသက်မှာ ၎င်းယခင်က နေထိုင်ခဲ့သော ယင်မြစ် နှင့် အလွန်ဆင်တူသလိုရွှမ်ဖျင့် အတွက်လည်း ပိုမို သင့်တော်လှသည်။
ထို့ကြောင့် ယင်လောကသို့ ရောက်လာပြီးနောက် ယခင်က သွေးအနှစ် များ ကုန်ဆုံးခဲ့သဖြင့် နွမ်းနယ်နေသော စိတ်ဓာတ်မှာ တဖြည်းဖြည်း ပြန်လည် တက်ကြွလာခဲ့သည်။
သို့သော် ယင်လောကသည် ရွှမ်ဖျင့် အမြဲတမ်း နေထိုင်ရန် မသင့်တော်ပေ၊ ၎င်းလိုအပ်သော အသားများမှာ လုံလောက်သော ယန်စွမ်းအင် ရှိရန် လိုအပ်သောကြောင့် ဖြစ်သည်။
"အစ်ကို... ခင်ဗျားက ယင်လောကမှာ တကယ့်ကို ရေထဲက ငါးလိုပဲနော် တစ်ခုခု ကံထူးထားတာလား"
စကြာဝဠာမှန် က စပ်စုစွာ မေးမြန်းသည်။
"မှန်လေး... မင်းက ယင်လောကအကြောင်းကို သိပ်မသိသလိုပဲနော်"
ဖန့်ချန်က ပြုံးလျက် မေးသည်။
စကြာဝဠာမှန်မှာ ခဏမျှ တိတ်ဆိတ်သွားပြီးနောက် ရယ်ကျဲကျဲဖြင့် စကားလမ်းကြောင်း လွှဲလိုက်သည်။
ဤသည်ကို ကြည့်ခြင်းဖြင့် ဖန့်ချန်မှာ ပို၍ပင် သေချာသွားသည် ၎င်းပိုင်ဆိုင်သော ဗဟုသုတနှင့် သတင်းအချက်အလက်များမှာ နတ်ဘုရားလောကနှင့် လူ့လောကအတွင်း၌သာ ကန့်သတ်ထားသည်။
ယင်လောကသည် ၎င်းကျွမ်းကျင်သော နယ်ပယ် မဟုတ်ပေ။
ယခင်က ဖန့်ချန် အောက်ဆင်းမည့်ကိစ္စတွင် စကြာဝဠာမှန်က အလွန်အမင်း စိုးရိမ်ပူပန်ပြခဲ့ခြင်းမှာလည်း ယင်လောကရှိ ကိစ္စရပ်များသည် ၎င်း၏ ထိန်းချုပ်မှုနယ်ပယ်ပြင်ပတွင် ရှိနေသောကြောင့် ဖြစ်ကြောင်း သိသာလှသည်။
"အစ်ကို... ခင်ဗျားက အခု ဝိညာဥ်သန္ဓေသား အထွတ်အထိပ် အဆင့်ကို ရောက်နေပြီဆိုတော့ စိတ်ဝိညာဥ်ထွက်ခွာခြင်း အဆင့်ကို တက်လှမ်းဖို့ ပြင်ဆင်ရတော့မယ် မဟုတ်လား လူ့လောကကို ပြန်ပြီး အေးအေးဆေးဆေး ကျင့်ကြံဖို့ စိတ်ကူးရှိလား"
"အေးအေးဆေးဆေး ကျင့်ကြံရုံနဲ့ ငါ့ရဲ့ ကျင့်ကြံမှု တိုးတက်ဖို့က မလွယ်ဘူး ငါ့မှာ အစီအစဉ် ရှိပြီးသားပါ"
ဖန့်ချန်က အမှတ်မထင် ပြောလိုက်သည်။
စကားပြောနေစဉ်မှာပင် ရွှေနီရောင် စစ်ဝတ်တန်ဆာကို ဝတ်ဆင်ထားသော တုယွန်းရွှီ ဝင်လာသည်။
ဖန့်ချန်၏ ပုခုံးပေါ်ရှိ ရွှမ်ဖျင့်ကို မြင်သောအခါ သူ ခေတ္တမျှ စိုက်ကြည့်လိုက်ပြီးမှ လက်အုပ်ချီ ဂါရဝပြုသည်
"လူကြီးမင်း... ပြီးခဲ့တဲ့ ရက်ပိုင်းအတွင်း ပြုပြင်ပြောင်းလဲမှုတွေ လုပ်ခဲ့ရာမှာ အဟန့်အတားအချို့ ရှိခဲ့ပေမဲ့ ကျုပ်တို့ စုပေါင်းပြီး ဖယ်ရှားနိုင်ခဲ့ပါတယ် အောက်ဆင်းသူ သုံးပုံတစ်ပုံလောက်ကတော့ ကျုပ်တို့ကို ပူးပေါင်းဆောင်ရွက်ဖို့ သဘောတူခဲ့ကြပြီး၊ အခွန်ကို ဆယ်ပုံ လေးပုံ အဖြစ် သတ်မှတ်ခဲ့ပါတယ်"
ပြောပြီးနောက် သူသည် ရင်ဘတ်ထဲမှ ပိုက်ဆံအိတ် အချို့ကို ထုတ်ပေးလိုက်သည်။
အိတ်တစ်အိတ်စီတွင် ယင်သက်တမ်း ၂,၀၀၀ စီ ပါဝင်ပြီး စုစုပေါင်း အိတ် ၅ အိတ် ရှိသည်။
ယင်သက်တမ်းပြား စုစုပေါင်း တစ်သောင်း တိတိ။
ဒါဟာ ဖန့်ချန်က နေခင်းကင်းလှည့်လမ်းစဉ် ကို ပြုပြင်ပြောင်းလဲခိုင်းခဲ့တဲ့ ရလဒ်ပဲ ဖြစ်ပါတယ်။
ဒီယင်သက်တမ်းပြားတွေဟာ မူလကဆိုရင် ယင်အရှင် အသီးသီးရဲ့ လက်ထဲကို စီးဝင်သွားမယ့် အရာတွေ ဖြစ်ပါလိမ့်မယ်။
အခန်း (၈၅၂) ရှရွှမ်ကျိ ကို ပြောလိုက်ပါ၊ ဖန့်ချန် လာခဲ့ပြီလို့
ဖန့်ချန်က အသာအယာ ခေါင်းညိတ်လိုက်ပြီး
"ယင်သက်တမ်း တစ်သောင်းဆိုတာ မနည်းဘူးဆိုပေမဲ့ သိပ်များလှတာလည်း မဟုတ်ဘူး အောက်ဆင်းသူ သုံးပုံတစ်ပုံလောက်ကပဲ စည်းမျဉ်းကို လက်ခံတယ်ဆိုတာ မလုံလောက်သေးဘူး ငါလိုချင်တာက ဆယ်ပုံဆယ်ပုံ ပဲမင်းတို့ နောက်ထပ် ကြိုးစားကြဦးမှ ဖြစ်မယ်"
"ဆယ်ပုံဆယ်ပုံ ဟုတ်လား"
တုယွန်းရွှီ၏ မျက်နှာတွင် ခါးသီးသော အပြုံးတစ်ခု ပေါ်လာသည်
"လူကြီးမင်း... ဒီလိုသာဆိုရင် ယင်အရှင် အသီးသီးရဲ့ ထမင်းအိုးကို ရိုက်ခွဲလိုက်သလို ဖြစ်သွားပါလိမ့်မယ် သူတို့တွေကတော့..."
"ပူးပေါင်းဆောင်ရွက်လိုတဲ့သူတွေကတော့ သဘာဝအတိုင်း ငတ်မွတ်တဲ့အထိ ဖြစ်မှာမဟုတ်ပါဘူး အကယ်လို့ မပူးပေါင်းချင်ဘူးဆိုရင်လည်း ယင်အရှင် ရာထူးကနေ ဖယ်ပေးလိုက်ရုံပါပဲ"
ဖန့်ချန်က ပြုံးလျက် ပြောသည်။
သူသည် ယခုအခါ ငရဲမင်းတံဆိပ် ကို လက်ဝယ်ပိုင်ဆိုင်ထားသူဖြစ်ပြီး အမည်နာမအရဖြစ်စေ၊ လက်တွေ့အရဖြစ်စေ သူသည် ယင်လောက၏ ငရဲမင်း ပင် ဖြစ်သည်။
သို့သော် လက်ရှိတွင် သူ၏ ခွန်အားက မလုံလောက်သေးသဖြင့် ယင်လောကကြီးတစ်ခုလုံးကို ကြီးမားသော သက်ရောက်မှု မပေးနိုင်သေးဘဲအန္တရာယ်များစွာကလည်း သူ့ကို စောင့်ကြည့်နေကြပေလိမ့်မည်။
သို့သော် ဤယင်လောကငယ် ဘက်တွင်မူ မတူပေ။
ယင်လောကငယ်၏ အာဏာစက်ကိုသာ လက်ဝယ်ပိုင်ဆိုင်နိုင်ပါက ငရဲမင်းတံဆိပ်ထဲသို့ ယင်သက်တမ်းများ အစဉ်တစိုက် စီးဝင်လာမည်ဖြစ်ပြီး၊ ငရဲမင်းတံဆိပ်ကို ရှိသင့်ရှိထိုက်သော တန်ခိုးအာဏာများ ပိုင်ဆိုင်လာစေမည် ဖြစ်သည်။
သူ့ရင်ထဲတွင် စိုးရိမ်ပူပန်မှုအချို့ ရှိနေသေးသည်။
သူ၏ နေခင်းကင်းလှည့်အရှင် ရာထူးမှာ ယင်လောကငယ်၏ ငရဲမင်းက ဘွဲ့နှင်းသဘင် ပေးအပ်ခဲ့ခြင်း ဖြစ်သည်။
ထိုငရဲမင်းသည် ဝိညာဥ်သုတ်သင်ခြင်းဌာန ၏ ဌာနချုပ်မှ ပုဂ္ဂိုလ်ဖြစ်မဖြစ် သူ မသေချာသေးပေ။
ထို့ကြောင့် ယခုအချိန်အထိ ထိုငရဲမင်းကို သူ သွားရောက် မတွေ့ဆုံသေးခြင်း ဖြစ်သည်။
အကယ်၍ သူတို့နှစ်ဦးကြားတွင် မည်သည့် ကံတရားအကျိုးဆက် မျှ မရှိပါက၊ သူသည် ရှီလုံကို ခေါ်ယူပြီး အင်တိုက်အားတိုက် လုပ်ဆောင်ကာ ယင်လောကငယ်၏ စည်းမျဉ်းများကို ခဏချင်းအတွင်း တည်ဆောက်နိုင်ပေလိမ့်မည်။
တုယွန်းရွှီ ရင်ထဲတွင် ခါးသီးစွာ ပြုံးမိသည်။
ဤလူကြီးမင်းမှာ တကယ့်ကို အာဏာရှင်ဆန်လှပေသည်။
ယင်လောက၏ စည်းမျဉ်းများကို လုံးဝဥဿုံ ပြုပြင်ပြောင်းလဲရန် ကြံစည်နေသည်။
အကယ်၍ ယင်အရှင်များ အားလုံး စုပေါင်းပြီး ခုခံကြပါက နေခင်းကင်းလှည့်လမ်းစဉ်မှာ ခဏချင်းအတွင်း ပြိုကွဲသွားမည်လား သူ မတွေးရဲပေ။
ထို ညကင်းလှည့်အရှင် ပင်လျှင် သူတို့ဘက်က ရပ်တည်ပေးလိမ့်မည် မဟုတ်ပေ။
ဤသည်ကို တွေးမိသောအခါ တုယွန်းရွှီက စကားအချို့ဖြင့် ဖျောင်းဖျရန် ပြင်လိုက်သော်လည်း ဖန့်ချန်က ဦးအောင် မေးလိုက်သည်
"ပြုပြင်ပြောင်းလဲမှုတွေ လုပ်နေတဲ့အချိန်မှာ ငရဲမင်းဘက်က ဘာသဘောထားမျိုး ပြသလဲ "
တုယွန်းရွှီက အသာအယာ ခေါင်းယမ်းသည်
"ငရဲမင်းဘက်က ဘာသဘောထားမှ မပြပါဘူး"
"သိပြီ၊ မင်း ဆက်ပြီး ပြုပြင်ပြောင်းလဲမှုတွေ လုပ်ပါ"
ဖန့်ချန်က ပြောသည်။
တုယွန်းရွှီက ခေတ္တစဉ်းစားပြီးနောက် တိုးတိုးလေး မေးသည်
"လူကြီးမင်း... အကယ်လို့ အောက်ဆင်းသူအချို့က လုံးဝ မပူးပေါင်းဘူးဆိုရင် ကျုပ်တို့ ဘယ်လို အရေးယူရမလဲ "
"ယင်လောကကနေ မောင်းထုတ်လိုက် နောက်နောင် အောက်ဆင်းခွင့် မပြုနဲ့တော့ လာသမျှ တစ်ခါလာ တစ်ခါရိုက်ပဲ ယင်သက်တမ်းကို သုံးပြီး ကျင့်ကြံမှုကို မြှင့်တင်ချင်ကြတယ် ဒါပေမဲ့ အခွန်တော့ မဆောင်ချင်ကြဘူးဆိုတာ ဘယ်မှာရှိမှာလဲ"
"တကယ်လို့ အဲဒီလူတွေက ယင်အရှင်တွေနဲ့ ကျင့်ကြံမှုအဆင့် တူညီနေမယ်ဆိုရင် ငါကိုယ်တိုင် ထွက်ပြီး ရိုက်မယ် တစ်ခါရိုက်လို့ မကြောက်ရင် နှစ်ခါရိုက်မယ် မင်း အရင်ဆုံး စာရင်းတစ်ခု ပြုစုထားလိုက်"
"ဒါအပြင် သွေးဝိညာဉ်နတ်ဘုရား ကို ကိုးကွယ်တဲ့ လေလွင့်ဝိညာဉ်တွေနဲ့ အောက်ဆင်းသူတွေ အားလုံးကိုလည်း စာရင်းထဲမှာ ထည့်သွင်းပြုစုထားပါ"
ဖန့်ချန်၏ မျက်လုံးများ လှုပ်ရှားသွားပြီး တုယွန်းရွှီကို တည်ငြိမ်စွာ စိုက်ကြည့်လိုက်သည်
"ဒီစာရင်းကိုတော့ မင်း အထူးသတိထားပြီး လုပ်ဆောင်ရမယ်၊ အပြင်လူတွေ မသိစေနဲ့"
တုယွန်းရွှီ ခေတ္တ ကြောင်သွားပြီးနောက် ကပျာကသီ ခေါင်းညိတ်သည်
"သိပါပြီ"
"အဖြူလေးနဲ့ အမည်းလေး က ဘယ်မြို့နှစ်မြို့ကို တာဝန်ယူထားတာလဲ"
ဖန့်ချန်က မေးသည်။
"လူကြီးမင်းဖြူ တာဝန်ယူထားတာက ရှန်းယန်မြို့ ပါ လူကြီးမင်းမည်း တာဝန်ယူထားတာက ဟူကျောင်မြို့ ပါ"
တုယွန်းရွှီက ဖြေသည်။
"ဒီမြို့နှစ်မြို့က လူ့လောကရဲ့ ဘယ်နေရာတွေနဲ့ ဆက်စပ်နေလဲ"
တုယွန်းရွှီ ခေတ္တစဉ်းစားလိုက်သည်
"ရှန်းယန်မြို့က ဓာတ်ငါးပါးနယ်မြေ နဲ့ ဆက်စပ်နေပြီး၊ ဟူကျောင်မြို့က ကိုးကြယ်နယ်မြေ နဲ့ ဆက်စပ်နေပါတယ်။"
သူ ခေတ္တရပ်ပြီးနောက် ရယ်ကျဲကျဲဖြင့်
"အသေးစိတ်ကိုတော့ အောက်ခြေဝန်ထမ်းအနေနဲ့ စာရင်းဇယားတွေကို ပြန်စစ်ကြည့်မှ သိရမှာပါ"
"ကိစ္စမရှိပါဘူး၊ မင်း လုပ်စရာရှိတာ သွားလုပ်တော့"
ဖန့်ချန်က ပြုံးလျက် လက်ဝှေ့ယမ်းပြလိုက်သည်။
တုယွန်းရွှီက အသာအယာ ခေါင်းညိတ်ပြီး လှည့်ထွက်သွားသည်။
"ဓာတ်ငါးပါး၊ ကိုးကြယ်၊ ရှေးဟောင်း ၊ ဝိညာဥ်သိုင်း..."
ဖန့်ချန်က တိုးတိုးလေး ရေရွတ်ရင်း သက်ပြင်းချလိုက်သည်
"အထက်ဘုံလောက က လူ့လောကထက် ပိုကျယ်ပြောမယ်လို့ မဆိုလိုနိုင်တာ မဆန်းပါဘူး လူ့လောကရဲ့ နယ်မြေတစ်ခုတည်းမှာတောင် မရေမတွက်နိုင်တဲ့ ကြယ်တာရာတွေ ရှိနေတာပဲ၊ နယ်မြေကိုးခုလုံးဆိုရင်တော့ မတွေးရဲစရာပဲ"
မှန်လေး (စကြာဝဠာမှန်) က အနည်းငယ် အံ့အားသင့်သွားသည်
"အစ်ကို... ခင်ဗျား ဒါတွေကို ဘယ်ကနေ သိတာလဲ..."
"တစ်ယောက်ယောက် ပြောပြတာပေါ့"
ဖန့်ချန်က ပြုံးလိုက်သည်
"အချိန်လည်း မစောတော့ဘူး ငါတို့ ရှေးဟောင်းနယ်မြေ ကို ပြန်ကြစို့"
ပိုင်ယွဲ့မြို့
ဖန့်ချန်သည် ရှောင်းစစ်သူကြီး နှင့် ထပ်မံတွေ့ဆုံခဲ့သည်။
ပိုင်ယွဲ့မြို့၏ နေခင်းကင်းလှည့်စစ်သည်တစ်ဦးအနေဖြင့် ရှောင်းစစ်သူကြီးသည် ထိုကာလအတွင်း လူ့လောကသို့ မကြာခဏ သွားရောက်ခဲ့ပြီး အသုံးဝင်သော သတင်းအချက်အလက်များစွာကို ရရှိထားသည်။
"မင်းပြောချင်တာက... ဒီနှစ်တွေအတွင်း ရှရွှမ်ကျိ က နေရာအနှံ့မှာ စစ်တိုက်နေပေမဲ့ ကြီးကြီးမားမား အသေအပျောက် မရှိဘူးပေါ့ စစ်သည်တစ်ယောက်မှ မဆုံးရှုံးဘဲနဲ့ နိုင်ငံတစ်ခုရဲ့ နယ်နိမိတ်တွေကို သိမ်းပိုက်နိုင်ခဲ့တာလား "
ဖန့်ချန်၏ မျက်လုံးများ လှုပ်ရှားသွားသည်။
ဒါဟာ သွေးဝိညာဥ်ဂိုဏ်း ရဲ့ လုပ်ထုံးလုပ်နည်းတွေနဲ့ မကိုက်ညီဘူး။
ဒီ ရှရွှမ်ကျိက ဘာတွေ ကြံစည်နေတာလဲ
ရှောင်းစစ်သူကြီးက အသာအယာ ခေါင်းညိတ်သည်
"ကျုပ် စုံစမ်းရသလောက်တော့ တကယ်ပါပဲ ဒါကြောင့်လည်း ရှမင်းဆက် ဟာ ဒီနှစ်ပိုင်းအတွင်း နယ်မြေချဲ့ထွင်မှုတွေ လုပ်ခဲ့ရာမှာ အရင်ကထက် အဆပေါင်း ရာချီ၊ ထောင်ချီ ကျယ်ပြန့်လာခဲ့တယ် ပတ်ဝန်းကျင်က ကိုးဆင့်၊ ရှစ်ဆင့်၊ ခုနစ်ဆင့် အင်ပါယာ နိုင်ငံတွေ အားလုံးကို သူက ဝါးမြိုလိုက်ပြီ"
"အဲဒီထဲမှာ သေဆုံးတဲ့အရေအတွက်က ကျုပ်အမြင်အရဆိုရင် တကယ့်ကို သာမန်ပါပဲ ကျုပ် ထင်ထားတာထက်တောင် နည်းနေသေးတယ် အခုဆိုရင် မဟာရှရဲ့ နယ်စပ်က မီးတောက်နိုင်ငံ အထိ ရောက်လုနီးပါး ဖြစ်နေပြီ"
သူ ခေတ္တရပ်ပြီးနောက်
"တိုက်ပွဲတစ်ခုကို ကျုပ် အစကနေ အဆုံးအထိ စောင့်ကြည့်ခဲ့ဖူးတယ် သွေးဝိညာဥ်ဂိုဏ်းက ကျင့်ကြံသူတွေ ထွက်လာပြီး သွေးဝိညာဉ်ဆေးလုံး ဖော်စပ်တာမျိုး လုံးဝ မတွေ့ခဲ့ရဘူး"
"သူ ဘာလုပ်ချင်နေတာလဲ"
ဖန့်ချန်က ရှောင်းစစ်သူကြီးကို ကြည့်ကာ မေးသည်။
ရှောင်းစစ်သူကြီးက ခဏမျှ စဉ်းစားပြီး ခေါင်းယမ်းပြသည်
"ကျုပ်လည်း မသိဘူး"
"သူ အခုလို ဆက်တိုက်နေရင် မီးတောက်နိုင်ငံလို နိုင်ငံတွေတင်မကဘူး မဟာချန်း လို အဆင့် ၈ အင်ပါယာတွေတောင် ဝါးမြိုခံရလိမ့်မယ် သူက တိမ်မြုပ်နယ်မြေ တစ်ခုလုံးကို မဟာရှရဲ့ နယ်နိမိတ်အဖြစ် သိမ်းပိုက်ချင်နေတာလား "
ဖန့်ချန် တွေးတောနေမိသည်။
ဤကိစ္စမှာ ရှရွှမ်ကျိ ယခင်က ပြောခဲ့ဖူးသည့် ကိစ္စနှင့် ပတ်သက်နေမလား
သို့သော်လည်း တစ်စုံတစ်ခုသော အဆင့် ၂ အင်ပါယာက အဆင့် ၁ အင်ပါယာအဖြစ် အဆင့်တိုးမြှင့်မည့်ကိစ္စနှင့် ရှရွှမ်ကျိ ယခုလုပ်နေသည့် ကိစ္စမှာ ဘာမှ မသက်ဆိုင်လှပေ။
"ကျုပ် သိတာ တစ်ခုပဲ ရှိတယ် သူက အကျိုးမရှိတဲ့ အလုပ်ကို ဘယ်တော့မှ မလုပ်ဘူး"
ရှောငစစ်သူကြီးက ဆန်းစစ်ပြသည်
"သူ့ရဲ့ ကျင့်ကြံမှုအဆင့်နဲ့ဆိုရင် တကယ်တော့ မဟာရှမှာ နေနေဖို့ မလိုပါဘူး အခုလို ပြန်လာပြီး လှုပ်ရှားနေတာက မဟာရှထဲမှာ သူ မဖြစ်မနေ ပြန်လာရမယ့် အကြောင်းရင်းတစ်ခုခု ရှိနေလို့ ဖြစ်မယ်လို့ ကျုပ် သံသယရှိတယ်"
"မဟာရှက အရင်က အဆင့် ၉ အင်ပါယာလေး တစ်ခုပဲ၊ မင်းတို့ရဲ့ ချင်းစုန် ကြောင့် ပျက်သုဉ်းလုနီးပါးတောင် ဖြစ်ခဲ့တာ ရှရွှမ်ကျိ မဖြစ်မနေ ပြန်လာရမယ့် ဘယ်လို အကြောင်းရင်းမျိုး ရှိနိုင်မှာလဲ ဒါပေမဲ့ မင်းရဲ့ ခန့်မှန်းချက်ကလည်း လုံးဝ အဓိပ္ပာယ်မရှိတာတော့ မဟုတ်ဘူး"
ဖန့်ချန် တိတ်ဆိတ်စွာ စဉ်းစားနေမိသည်။
ရှရွှမ်ကျိ နှင့် မြောက်ပိုင်းကျွန်းစု မှ နဂါးစားဘုရင်တို့ကြားတွင် ထူးခြားသော ပတ်သက်မှုတစ်ခု ရှိနေသည်။
အကယ်၍ ထိုသို့သာ မှန်ကန်ပါက မဟာရှကဲ့သို့ နယ်စွန်နယ်ဖျားနေရာလေးသို့ ရှရွှမ်ကျိကဲ့သို့ ပုဂ္ဂိုလ်မျိုး ရောက်ရှိလာခြင်းမှာ လေးလေးနက်နက် စဉ်းစားစရာပင်။
"ဒါနဲ့... မင်း ဝမ့်ချွမ်းမြစ်ကနေ ခေါ်လာတဲ့ စစ်သည် တစ်သိန်းကို ဘယ်မှာ ထားခဲ့တာလဲ"
ရှောင်းစစ်သူကြီးက ထူးဆန်းသော မျက်နှာထားဖြင့် မေးသည်။
ပိုင်ယွဲ့မြို့ရှိ လေလွင့်ဝိညာဉ်များမှာ မရေမတွက်နိုင်အောင် များပြားလှသဖြင့် စစ်သည် တစ်သိန်း ဝင်လာခြင်းမှာ ရေပုံးထဲသို့ ရေတစ်စက် ကျလိုက်သလိုပင် ဖြစ်သော်လည်း၊ သူတို့၏ အဆင့်အတန်းက ထူးခြားလှသဖြင့် မည်သူမျှ သာမန်အတိုင်း မထားရဲကြပေ။
"လူတွေက မစုံသေးဘူး လူစုံရင် သူတို့ကို ခေါ်သွားမယ့်သူ ရှိလိမ့်မယ်"
ဖန့်ချန်က ပြုံးလျက် ပြောသည်။
ရှောင်းစစ်သူကြီးကလည်း ထပ်မမေးတော့ပေ။
အသေးစိတ် အခြေအနေကို သူ မသိသော်လည်း ဖန့်ချန်၏ ယင်လောကရှိ အဆင့်အတန်းမှာ သာမန်မဟုတ်ကြောင်း သူ ခန့်မှန်းမိပြီးသားပါ။
တစ်ခါတစ်ရံ သူ တွေးမိသည်မှာ... သုံးလောကတောင် တိုက်ပွဲတုန်းက သူသာ ဖန့်ချန်ကို သတ်လိုက်မိပါက ယခု မည်သို့သော မြင်ကွင်းမျိုး ဖြစ်နေမည်နည်း
ဖြစ်နိုင်သည်မှာ သူ၏သမီးဖြစ်သူမှာ အနိုင်ကျင့်ခံနေရဆဲ ဖြစ်နိုင်သလို၊ သူကိုယ်တိုင်လည်း ဝမ့်ချွမ်းမြစ်ထဲတွင် နစ်မြုပ်နေဆဲ ဖြစ်ပေလိမ့်မည်။
"ကံ... တရား..."
ရှောင်းစစ်သူကြီးက ထိုစကားလုံးကို တိုးတိုးလေး ရေရွတ်ရင်း တွေးနေမိသည်။
သူ သတိပြန်ဝင်လာချိန်တွင် ဖန့်ချန်မှာ ထွက်ခွာသွားပြီ ဖြစ်ကြောင်း တွေ့လိုက်ရသည်။
မဟာရှ နေပြည်တော်
နန်းတော်ရှေ့
အစောင့်စစ်သည်များမှာ စုတ်ပြတ်သတ်နေသော ဝတ်စုံကို ဝတ်ဆင်ထားသည့် တာအိုဆရာတစ်ဦး အေးအေးဆေးဆေး လျှောက်လာသည်ကို မြင်သောအခါ တစ်ဦးကိုတစ်ဦး ကြည့်လိုက်ကြသည်။
တာအိုဆရာမှာ စပ်စုပြီး လာကြည့်ခြင်းသာ ဖြစ်မည်ဟု သူတို့ ထင်ထားခဲ့သော်လည်း၊ သူက နန်းတော်ထဲသို့ ဝင်ရန် ပြင်နေသည်ကို မြင်သောအခါ ခေါင်းဆောင်ဖြစ်သူက မျက်မှောင်ကြုတ်ကာ ရှေ့သို့ တက်၍ တားဆီးလိုက်သည်
"တာအိုဆရာ... ဒါက မဟာရှနန်းတော်ဖြစ်တယ်၊ အကြောင်းမဲ့ ဝင်လို့မရဘူး"
"ရှရွှမ်ကျိကို ပြောလိုက်ပါ၊ ဖန့်ချန် လာခဲ့ပြီလို့"
ဖန့်ချန်က ပြုံးလျက် ပြောလိုက်သည်။
ဖန့်... ချန်
နန်းတော်ရှေ့ရှိ အစောင့်စစ်သည်များမှာ ခဏမျှ မှင်တက်သွားပြီးနောက် မျက်လုံးများထဲတွင် ထိတ်လန့်တုန်လှုပ်မှုများ ပြည့်နှက်လာတော့သည်။
သူတို့သည် ရှေ့မှ တာအိုဆရာ၏ ရုပ်သွင်မှာ နန်းတော်ထဲရှိ ပုံတူပန်းချီကားနှင့် အလွန်တူနေသည်ကို သတိပြုမိလိုက်သောအခါ တစ်ကိုယ်လုံး ကြက်သီးများ ထသွားပြီး ဦးရေပြားများ ထုံကျင်သွားတော့သည်။
ထိုအမည်နာမ၏ ပိုင်ရှင်မှာ ဆယ်စုနှစ်ပေါင်းများစွာ မဟာရှတွင် ပေါ်မလာခဲ့သဖြင့် သူတို့ လူကိုယ်တိုင် တစ်ခါမျှ မမြင်ဖူးဘဲ ပုံတူပန်းချီကားများကိုသာ မြင်ဖူးကြခြင်း ဖြစ်သည်။
"လူ... လူကြီးမင်း... ခဏစောင့်ပါဦး ကျုပ် အခုပဲ သွားသတင်းပို့ပါ့မယ်"
အစောင့်ခေါင်းဆောင်မှာ စကားများပင် ထစ်ကုန်ပြီး နန်းတော်ထဲသို့ အပြေးအလွှား ဝင်သွားတော့သည်။
မူလက နန်းတော်ထဲတွင် သိုင်းပညာ များကို အသုံးမပြုရန် တားမြစ်ထားသော်လည်း ယခုအချိန်တွင်မူ သူ ဘာကိုမှ ဂရုမစိုက်နိုင်တော့ပေ။
ဖန့်ချန်က ပြုံးလိုက်ပြီး သူနှင့် ရင်းနှီးလှသလို စိမ်းသက်နေသော လမ်းမကြီးကို လှည့်ကြည့်လိုက်သည်။
သူသည် လူ့လောက၏ ဤသို့သော အငွေ့အသက်မျိုးကို အနှစ်သက်ဆုံးပင် ဖြစ်သည်။
၎င်းက သူ၏ စိတ်နှလုံးကို ငြိမ်သက်စေနိုင်သောကြောင့် ဖြစ်သည်။