အခန်း (၁၁)

"အမေတစ်ယောက်နဲ့ ညီမနှစ်ယောက်ရှိတယ်။ အဖေကမရှိတော့ဘူးဆိုတော့ ညီမလေးတွေ အိမ်ထောင်ကျတဲ့အထိ သူကပဲ စောင့်ရှောက်ရမှာ"

ထိုအမျိုးသမီးက စကားခေတ္တရပ်လိုက်ပြီး လော့လန်၏ မျက်နှာကို လှမ်းကြည့်ကာ ဆုံးဖြတ်ချက်တစ်ခု ချလိုက်သကဲ့သို့ သူမ၏ ပေါင်ကို ရိုက်လိုက်လေသည်။

"ကောင်းပြီ၊ အဒေါ် မင်းကို ဘာမှ ဖုံးကွယ်မထားပါဘူး။ ပွင့်ပွင့်လင်းလင်းပဲ ပြောပြမယ်။ ဒီလူက စစ်မှုထမ်းဟောင်းတစ်ယောက်ဖြစ်ပြီး ဒဏ်ရာရခဲ့လို့ တခြားအလုပ်ကို ပြောင်းရွှေ့တာဝန်ထမ်းဆောင်နေရတာ။ လူတွေပြောကြတာကတော့ သူက ဒဏ်ရာအပြင်းအထန်ရထားတယ်လို့ ပြောကြပေမယ့် တကယ်တမ်းကျတော့ မဟုတ်ဘူး။ ဒါပေမဲ့ သူ့ဂုဏ်သတင်းက ထိခိုက်သွားတဲ့အတွက် မြို့သူတစ်ယောက်ရဖို့ ခက်ခဲနေတာ။ ကံကောင်းတာတစ်ခုက သူက နိုင်ငံတော်အတွက် စွမ်းဆောင်ချက်တချို့ ရှိထားတော့ သူ့မိန်းမက မြို့ပြအိမ်ထောင်စုစာရင်းဝင်ခွင့် ရနိုင်သလို မြို့ပေါ်မှာလည်း အလုပ်စီစဉ်ပေးလို့ရတယ်"

အောင်သွယ်တော်ဆိုသည်မှာ အရာရာကို ကောင်းမွန်သွားအောင် မည်သို့သော ဇာတ်လမ်းမျိုးကိုမဆို လှည့်ပတ်ပြောဆိုတတ်ကြသည်။ ဒဏ်ရာပြင်းထန်သည်၊ မပြင်းထန်သည်ကို ခေတ္တဘေးဖယ်ထားပြီး အကျိုးကျေးဇူးများကို ဦးစွာမီးမောင်းထိုးပြနေလေသည်။ အကယ်၍ မြို့ပြအိမ်ထောင်စုစာရင်းဝင်ခွင့်နှင့် အလုပ်အကိုင်ရရှိခြင်းသည် အလွန်ကောင်းမွန်သော အရာတစ်ခုဖြစ်နေပါက သူသည် အဘယ်ကြောင့် ယခုချိန်ထိ မိန်းမမရသေးသနည်း။

"သူ့အမေနဲ့ ညီမတွေကရော ဘယ်လိုလဲ"

အောင်သွယ်တော်သည် တွန့်ဆုတ်သွားပြီး သက်ပြင်းတစ်ချက်ချကာ ပြောလိုက်သည်။

"သူ့အမေက.. အရင်တုန်းက သူ့ညီလေး မတော်တဆမှုဖြစ်သွားလို့ စိတ်ထိခိုက်သွားတာပါ။ ဒါပေမဲ့ စိတ်မပူပါနဲ့၊ သူက သွက်သွက်ခါအောင် ရူးနေတာမဟုတ်ပါဘူး၊ နည်းနည်းလေး စိတ်မမှန်ရုံပါ"

"သူ့ညီမတွေကရော"

"ညီမတွေကတော့ တကယ်တမ်း ဘာမှမဖြစ်ပါဘူး။ သူတို့လည်း နောက်ဆုံးကျတော့ အိမ်ထောင်ပြုသွားကြမယ့်သူတွေပဲလေ။ ဒုတိယညီမဖြစ်သူကတော့ နာမည်သတင်း နည်းနည်းထွက်နေပေမယ့် အဲဒါက ပုံကြီးချဲ့ပြောထားကြတာပါ။ အဒေါ်ထင်တာတော့ သိပ်ပြီးအဟုတ်ကြီး မဟုတ်လောက်ပါဘူး"

ထို့ကြောင့် အောင်သွယ်တော်သည် မကောင်းသည့်အချက်များကို ရှောင်လွှဲပြောဆိုသွားခဲ့သည်။ အကယ်၍ အခြေအနေများသာ ဤမျှကောင်းမွန်နေပါက သူသည် အဘယ်ကြောင့် ကျေးလက်တောရွာတွင် လာရှာနေရသနည်း။ မိသားစုအခြေအနေမှာ ရှုပ်ထွေးနေပုံရသည်။ သူ့မိခင်၏ အခြေအနေမှာ မည်မျှဆိုးရွားနေသနည်း။ ညီမဖြစ်သူများမှာ အိမ်ထောင်ပြု၍ ထွက်သွားကြမည်ဖြစ်သော်လည်း သူ့မိခင်ကမူ အချိန်ကြာမြင့်စွာ ရှိနေဦးမည်ဖြစ်သည်။

"သူက အဒေါ့်ကို အောင်သွယ်လုပ်ပေးဖို့ တောင်းဆိုခဲ့တာလား"

အိမ်ထောင်ရေးဆိုသည်မှာ ဘဝနှစ်ခု ပေါင်းစပ်ခြင်းဖြစ်သည်။ အချိန်ကာလက အရာအားလုံးကို ဖော်ပြပေးမည်ဖြစ်သော်လည်း အပြန်အလှန် သံယောဇဉ်ရှိရန်မှာ အရေးကြီးပေသည်။ အကယ်၍ အမျိုးသားဖြစ်သူက ကိုယ့်ကို နှစ်သက်ပါက ခက်ခဲသော အခြေအနေများတွင် ကိုယ့်ဘက်ပါတတ်သည်။ ဤသည်မှာ ဘဝခရီးလမ်းကို အတူလျှောက်လှမ်းရန်အတွက် အလွန်အရေးကြီးလေသည်။

အောင်သွယ်တော်က ပြုံးရွှင်သော အပြုံးဖြင့် ပြောလိုက်သည်။ သူမသည် စိတ်အားထက်သန်စွာဖြင့် ပြောဆိုလာ၏။

"ဟုတ်တယ်၊ သူက မင်းကို မြင်မြင်ချင်း ရွေးချယ်ခဲ့တာ။ အရင်က‌ စေ့စပ်ထားတဲ့သူ ထွက်ပြေးသွားလို့လည်း သူ စိတ်မပျက်ပါဘူး။ သူက မင်းကို ပြည့်စုံလွန်းတယ်လို့ ထင်နေပြီး တခြားသူတစ်ယောက်ယောက်က မင်းကို ယူသွားမှာစိုးလို့ အဒေါ့်ကို ချက်ချင်း မိတ်ဆက်ပေးဖို့ ပြောခဲ့တာ"

ဤကဲ့သို့ မြှောက်ပင့်ပြောဆိုခြင်းများသည် ဟန်ပြသက်သက်သာ ဖြစ်သည်။ လော့လန်သည် ချိုသာသော စကားများအောက်တွင် ယိမ်းယိုင်မသွားဘဲ တည်ငြိမ်စွာပင် ရှိနေခဲ့သည်။

"အဒေါ်.. ကျွန်မရဲ့ အခြေအနေကို သိတယ်မလား"

"သိတာပေါ့၊ အဒေါ် သူ့ကို ပြောပြထားပါတယ်။ အခု မင်းက တစ်ကိုယ်တည်းဖြစ်နေတယ်ဆိုတာ သူသိပါတယ်။ မင်းက ဒုတိယအကြိမ် အိမ်ထောင်ပြုမှာကိုလည်း သူက စိတ်ထဲမထားပါဘူး။ မင်းသာ သဘောတူမယ်ဆိုရင် သူ့အိမ်ကိုသွားလည်ဖို့ ရက်သာရွေးလိုက်။ အဒေါ်က မင်းကို လာလိမ်နေတာ မဟုတ်ပါဘူး။ မင်းကိုယ်တိုင် သွားကြည့်သင့်တယ်"

ဤအချက်အလက်များဖြင့် လော့လန်သည် ဖြစ်နိုင်ချေများကို လေးလေးနက်နက် စဉ်းစားလိုက်သည်။ အရပ်ရှည်ရှည်နှင့် ထိုအမျိုးသား၏ ပုံရိပ်မှာ စိတ်သက်သာရာရဖွယ်ဖြစ်ပြီး သူ့တွင် ကောင်းမွန်သော အလုပ်အကိုင်တစ်ခုလည်း ရှိပေသည်။ အရေးကြီးဆုံးအချက်မှာ လက်ထပ်ပြီးလျှင် သူမအတွက် အလုပ်တစ်ခု စီစဉ်ပေးနိုင်မည်ဟူသော အချက်ပင်ဖြစ်သည်။

နေထိုင်စရာနှင့် အလုပ်အကိုင်ရရှိခြင်းက သူမ၏ အနာဂတ်ကို လုံခြုံစေမည်ဖြစ်ပြီး ဘဝက ပိုတည်ငြိမ်ကာ ဂုဏ်သိက္ခာရှိမည်ဖြစ်သည်။ သို့သော် မိသားစုအခြေအနေကို သူမကိုယ်တိုင် သွားရောက်ကြည့်ရှုရန် လိုအပ်ပေသည်။ သူ၏ မိခင်ဖြစ်သူမှာ သူတို့နှင့်အတူ အချိန်ကြာမြင့်စွာ နေထိုင်ရနိုင်သည့်အတွက် မိခင်၏ ကျန်းမာရေးအခြေအနေမှာ အလွန်အရေးကြီးလေသည်။

"ကောင်းပြီလေ၊ ဒါဆိုရင် ဒီစနေ၊ တနင်္ဂနွေ သွားလည်ဖို့ စီစဉ်လိုက်ကြတာပေါ့။ ဘယ်လိုသဘောရလဲ"

အောင်သွယ်တော်သည် ဝမ်းသာအားရဖြစ်သွားပြီး လက်ခုပ်တီးလိုက်သည်။

"ကောင်းလိုက်တာ၊ တို့တွေ ကွန်မြူးမှာ ဆုံပြီး အတူတူသွားကြတာပေါ့"

အောင်သွယ်တော်နှင့် စီစဉ်ပြီးနောက် သူမ၏ အစ်မဖြစ်သူက သူမလက်ကိုဆွဲကာ သီးသန့်စကားပြောလိုက်သည်။ နှစ်ဦးစလုံး အိမ်ထောင်သည်များဖြစ်ကြသည့်အတွက် သူမတို့၏ စကားဝိုင်းမှာ အထိန်းအကွတ်ထားခြင်း သိပ်မရှိလှပေ။

"တကယ်လို့များ ဒဏ်ရာကြောင့် သူ မစွမ်းဆောင်နိုင်ရင် ဘယ်လိုလုပ်မလဲ။ အဖော်မရှိတဲ့ အိမ်ထောင်သည်ဘဝမျိုးနဲ့ နင် အဆုံးသတ်သွားရင်ရော"

"အဲဒါအတွက်တော့ ငါ စိတ်မပူပါဘူး။ ငါ အဓိက စိုးရိမ်တာက သူ့အမေပဲ။ တကယ်လို့ သူ့အမေက ပြင်းပြင်းထန်ထန် စိတ်ရောဂါဝေဒနာ ခံစားနေရတယ်ဆိုရင် အဲဒါက ပြဿနာအကြီးကြီးဖြစ်သွားလိမ့်မယ်။ သူ့အမေကြောင့်ပဲ မြို့ပေါ်မှာ သူ အိမ်ထောင်ဖက် ရှာမရတာ ဖြစ်နိုင်တယ်"

လော့မေက သူမ၏ နဖူးကို လက်ညှိုးဖြင့်ထိုးကာ ပြောလိုက်သည်။

"နင်ကတော့လေ.. သူ့အမေက နောက်ဆုံးတော့လည်း ဆုံးသွားမှာပါပဲ၊ ဒါပေမဲ့ သူကမှ နင်တစ်သက်လုံး ပေါင်းသင်းသွားရမယ့်လူလေ။ တကယ်လို့ သူ့မှာသာ အဲဒီပြဿနာရှိနေရင် နင့်ဘဝကြီး အလဟဿဖြစ်မသွားဘူးလား"

နုပျိုရွယ်လန်းချိန်နှင့် လှပသော လူငယ်ဘဝကို အလဟဿဖြုန်းတီးပစ်ခြင်းသည် လူ့အဖွဲ့အစည်း၏ အမြင်တွင် သနားစရာကောင်းသော ကိစ္စရပ်တစ်ခု ဖြစ်သည်။ သို့သော် ကိုယ်တိုင် အိမ်ထောင်ပြုဖူးသော လော့လန်သည် ထိုကိစ္စများနှင့် ပတ်သက်၍ သိပ်ပြီး စိုးရိမ်ပူပန်ခြင်းမရှိလှပေ။ ဘဝတွင် အနိမ့်အမြင့် အတက်အကျများ ရှိတတ်စမြဲဖြစ်ပြီး ဤကိစ္စသည် ဒုတိယအဆင့်လောက်သာဖြစ်သည်ဟု ထင်မြင်မိသည်။ သူမသည် ထိုအမျိုးသားနှင့် တွေ့ဆုံဖူးပြီး သူ၏ မျက်ဝန်းများမှာ ကြည်လင်ပြတ်သားကာ ခိုင်မာပြတ်သားမှုရှိသည်၊ သူသည် ထိုကဲ့သို့ အရေးကြီးသော ကိစ္စရပ်မျိုးကို ဖုံးကွယ်ထားမည့်သူမျိုးနှင့် မတူပေ။

သူမ၏ ပြတ်သားမှုကို မြင်လိုက်ရသောအခါ လော့မေသည် ဆက်တိုက်တွန်းခြင်း မပြုတော့ပေ။ သူမ၏ ညီမလေးသည် အမြဲတမ်း ပြတ်သားသူဖြစ်ပြီး ဆုံးဖြတ်ချက်တစ်ခု ချလိုက်ပြီဆိုလျှင် တခြားသူများ၏ ထင်မြင်ယူဆချက်ဖြင့် ပြောင်းလဲပစ်ရန် ခက်ခဲလေသည်။

"ဒါဆိုရင် ငါလည်း နင်နဲ့အတူ လိုက်ခဲ့မယ်"

"ကောင်းပြီလေ"

ဂျုံရိတ်သိမ်းပြီးနောက် ပဲပုပ်နှင့် မုန်လာဥကဲ့သို့သော သက်တမ်းတို သီးနှံများကို စိုက်ပျိုးကြသည်။ ဆောင်းဦးပေါက် ရိတ်သိမ်းချိန်မတိုင်မီတွင် လူတိုင်းသည် ပေါင်းသင်ခြင်းနှင့် မြေဆွခြင်းလုပ်ငန်းများကိုသာ အဓိကလုပ်ကိုင်ကြသည်။ လဆန်းတစ်ရက်နေ့တွင် လူများသည် ရိက္ခာထုတ်ယူရန် သွားရောက်ကြလေသည်။ လော့လန်သည် အိတ်တစ်လုံးကို သယ်ဆောင်လျက် တန်းစီနေသော လူအုပ်ထဲသို့ ဝင်လိုက်သည်။

တိုက်ဆိုင်စွာပင် သူမသည် အိတ်ကြီးတစ်လုံးကို သယ်ဆောင်လာသော ဝမ် မိသားစုမှ ဒုတိယအစ်ကိုဖြစ်သူ၏ အနောက်တည့်တည့်သို့ ရောက်ရှိသွားရာ ဒါကိုကြည့်ခြင်းအားဖြင့် ဝမ် မိသားစုသည် ပိုင်ဆိုင်မှုများ မခွဲဝေရသေးကြောင်း သိသာနေသည်။

အမျိုးသမီးများအတွက် ရိက္ခာမှာ သီးနှံ ၂၅ ပေါင်ဖြစ်သည်။ ဤလတွင် ပြောင်းဖူးနှင့် လူးဆန်များ ရရှိသည်။ သူမသည် တစ်မျိုးစီကို တစ်ဝက်စီ ရွေးချယ်ယူငင်ပြီး ကြိတ်ခွဲစက်ရုံသို့ တန်းသွားလိုက်သည်။ ကြိတ်ခွဲစက်ရုံဆိုသည်မှာ တကယ်တမ်းကျတော့ သက်ကယ်မိုးထားသော တဲအိမ်လေးသာဖြစ်သည်။ သူမ ရောက်သွားချိန်တွင် လူအများအပြားသည် သူတို့၏ သီးနှံများကို ကြိတ်ခွဲရန် စောင့်ဆိုင်းနေကြပြီဖြစ်ရာ အလုပ်အရှုပ်ဆုံးအချိန် ဖြစ်နေသည်။

“တတိယ…” ဝမ် မိသားစု၏ စတုတ္ထ ချွေးမသည် သူမ၏ တတိယယောင်းမကို လှမ်းခေါ်ရန် ပြင်လိုက်သော်လည်း သူမသည် သူမ၏ ယောင်းမ မဟုတ်တော့ကြောင်း ရုတ်တရက် သတိရသွားသည်။

" အစ်မလန်၊ အစ်မလည်း သီးနှံလာကြိတ်တာလား"

"ဟုတ်တယ်"

သူတို့နှစ်ဦးသည် အနီးရှိ ကျောက်တုံးတစ်တုံးပေါ်တွင် ထိုင်လိုက်ကြပြီး တိုးတိုးတိတ်တိတ် စကားစမြည်ပြောနေကြသည်။

"နင်တို့မိသားစုက ပိုင်ဆိုင်မှုတွေ မခွဲဝေရသေးဘူးလား"

"ခွဲပြီးပါပြီ။ ခွဲဝေတုန်းကတော့ တော်တော်လေး ဆူညံပွက်လောရိုက်သွားတယ်။ ဒီလတော့ တို့တွေအားလုံး သီးနှံတွေကို အတူတူ ထုတ်လိုက်ကြတယ်။ အလုပ်ပြီးတဲ့အခါကျရင် အဖွဲ့ကပဲ ခွဲဝေမှုအပိုင်းကို ကိုင်တွယ်ပေးလိမ့်မယ်။ ပြီးမှ တို့တွေ ကိုယ့်ဝေစုကိုယ် ရကြမှာ"

လော့လန် ခေါင်းညိတ်လိုက်ပြီး ခေတ္တမျှ ဘာပြောရမှန်းမသိ ဖြစ်သွားခဲ့သည်။ နှစ်ဦးသား တိတ်ဆိတ်စွာ ထိုင်နေကြပြီး ခဏအကြာတွင် စတုတ္ထချွေးမဖြစ်သူက သူမအား ညည်းတွားပြောဆိုလာသည်။

"နှစ်တိုင်း လူကြီးနှစ်ယောက်အတွက် ဝါဂွမ်းဖိနပ်တစ်ရန် ချုပ်ပေးဖို့ ငါ့ကို ခိုင်းတယ်ဟယ်။ နင်သိတဲ့အတိုင်းပဲ.. ချွေးမ သုံးယောက်ရှိတာတောင်မှ ဖိနပ်ချုပ်တဲ့အလုပ်ကို ငါ့ကိုပဲ ခိုင်းတာ။ ဒုတိယချွေးမကျတော့ ရိုးရှင်းတဲ့ဖိနပ်တွေ ပေးတယ်။ သူက ပျော့တဲ့သူကို အနိုင်ကျင့်ပြီး မာတဲ့သူကို ကြောက်တတ်တာ။ ငါ့ကို ထိန်းချုပ်ရလွယ်တယ်လို့ ထင်နေတာလေ"

"နင် ကန့်ကွက်ပြီးတော့ တစ်ယောက် တစ်ရန်စီ လုပ်သင့်တယ်လို့ ပြောလိုက်ပါလား။ ဝါဂွမ်းဖိနပ်တွေက အထည်စတွေနဲ့ ဝါဂွမ်းတွေ အများကြီး ကုန်တာလေ"

"ငါ အဲ့လိုပြောလိုက်တာနဲ့ သူက ငိုပြီးတော့ ငါ့ကို မိဘမရိုသေဘူးဆိုပြီး ပြောတော့တာပဲ။ ငါ့ယောကျ်ားကလည်း အကယ်၍ ငါသဘောမတူဘူးဆိုရင် သူ့မိဘတွေနဲ့ အတူဆက်နေရမယ်လို့ ပြောတယ်လေ။ ငါလည်း အရမ်းကြောက်သွားပြီး ချက်ချင်း သဘောတူလိုက်ရတာပေါ့။ ပိုပင်ပန်းပြီး ပစ္စည်းတွေ ပိုကုန်ရင်တောင်မှ ငါ သူ့ကို မပြုစုချင်တော့ဘူး။ အခု အဘိုးကြီးက အိပ်ရာထဲလဲနေပြီဆိုတော့ အကယ်၍ ပစ္စည်းမခွဲဘူးဆိုရင် ဘဝက အရမ်းခက်ခဲလိမ့်မယ်။ အနည်းဆုံးတော့ အခု ငါတို့ အလှည့်ကျ လုပ်လို့ရပြီလေ"

လော့လန်သည် တိတ်ဆိတ်စွာဖြင့် နားထောင်နေလိုက်သည်။ အဘွားကြီးဝမ် အကြောင်း သူမ သိထားသည့်အရာများအပေါ် အခြေခံ၍ တွေးကြည့်မည်ဆိုလျှင် ဤကိစ္စက ပြီးဆုံးသွားခြင်း မရှိသေးပေ။ ဖိနပ်ချုပ်ပေးလိုက်လျှင်ပင် ဝါဂွမ်းငင်ပြီး အထည်ရက်သည့်အလုပ်ကို လုပ်ရဦးမည်ဖြစ်သည်။ အကယ်၍ စိတ်ဓာတ်မခိုင်မာပါက သူမသည် ဆက်၍ ပြဿနာရှာနေဦးမည်သာ ဖြစ်သည်။

သို့သော် ဤပြဿနာများသည် သူမနှင့် တိုက်ရိုက်သက်ဆိုင်ခြင်း မရှိပေ။ သူမသည် အတင်းအဖျင်းပြောဆိုမှုများမှ အမှတ်များရရှိပြီး အခင်းဖြစ်ပွားရာနေရာတွင် မရှိလျှင်ပင် အမှတ်ထက်ဝက် ရရှိနေဆဲဖြစ်သည်။ သူမသည် အတင်းအဖျင်းစကားများကို နားထောင်ပြီး အကျိုးကျေးဇူးများကို မျှဝေခံစားရသည်ကို ပျော်ရွှင်နေမိသည်။

ညတိုင်း အိပ်ရာမဝင်မီတွင် သူမ၏ အမှတ်များကို စစ်ဆေးလေ့ရှိသည်။ အမှတ်များ တဖြည်းဖြည်း တိုးပွားလာသည်ကို ကြည့်ရသည်မှာ လေယာဉ်ပေါ်တွင် စီးနင်းလိုက်ပါရသကဲ့သို့ ခံစားရပြီး တိမ်တိုက်များကြားတွင် သက်တောင့်သက်သာ ပျံသန်းနေရသလိုပင်။

"စနစ်.. ငါ အခု ဓာတ်ဘူး လဲလို့ရပြီလား"

"ရပါတယ်.. အမှတ် တစ်ရာ့နှစ်ဆယ် ကျသင့်ပါမယ်။ ပိုင်ရှင် တကယ်ပဲ လဲချင်တာ သေချာပါသလား"

"သေချာတယ်"

သူမ အတည်ပြုလိုက်သည်နှင့်တပြိုင်နက် တဲအိမ်ကြမ်းပြင်ပေါ်တွင် ဓာတ်ဘူးတစ်လုံး ပေါ်လာခဲ့သည်။ ဤဓာတ်ဘူးသည် သမဝါယမအရောင်းဆိုင်များတွင် ရောင်းချသော ဓာတ်ဘူးများနှင့် မတူဘဲ ပိုကြီးမားကာ အရောင်အသွေးစုံလင်ပြီး လှပသော အပြင်ပန်းသဏ္ဌာန် ရှိသည်။

"ဒီဓာတ်ဘူးက တကယ်ကို ကောင်းတာပဲ။ ရေ ဘယ်လောက် ဆံ့လဲ"

စနစ်သည် သင့်တော်မည့် နှိုင်းယှဉ်ချက်တစ်ခုကို ရှာဖွေရန် ကြိုးစားရင်း တုံ့ဆိုင်းသွားသည်။

"၃.၂ လီတာပါ.. အဲ့ဒါက ဘာနဲ့ ညီမျှလဲဆိုတော့ မင်းရဲ့ သမဝါယမအရောင်းဆိုင်မှာ ရောင်းတဲ့ဟာတွေထက် တစ်လီတာ ပိုများပါတယ်"

"အရမ်း လှတာပဲ.. အပြင်က အသားကို ဘာပစ္စည်းနဲ့ လုပ်ထားတာလဲ"

"ကြံ့ခိုင်ပြီး ကြာရှည်ခံတဲ့ ပလပ်စတစ်အမာစားနဲ့ လုပ်ထားတာပါ"

ဓာတ်ဘူးအသစ်နှင့် လဲလှယ်ပြီးနောက် သူမသည် ချက်ချင်းပင် ရေနွေးပူပူဖြင့် ဖြည့်လိုက်သည်။ သူမသည် ထိုဓာတ်ဘူးကို ထောင့်တစ်နေရာတွင် တစ်ညလုံး ထားရှိခဲ့ပြီး နောက်တစ်နေ့နံနက်တွင် သူမ၏ ပထမဆုံးအလုပ်မှာ ရေတစ်ခွက် ငှဲ့လိုက်ခြင်းဖြစ်သည်။

အဖုံးဖွင့်လိုက်သည့် အခိုက်အတန့်တွင် အပူထိန်းသိမ်းမှုစွမ်းရည် အလွန်ကောင်းမွန်ကြောင်း သူမ သိလိုက်ရသည်။ တစ်ည ကုန်လွန်သွားသော်လည်း အပူရှိန်မှာ ပြင်းထန်နေဆဲဖြစ်သည်။ ရေ၏ အပူချိန်အပေါ် သူမ အလွန်ကျေနပ်အားရသွားသည်။

နံနက်ခင်းတွင် စိုက်ခင်းထဲ၌ အလုပ်လုပ်နေစဉ် သူမသည် ဝမ် မိသားစု၏ စတုတ္ထချွေးမနှင့် အတူရှိနေပြန်သည်။ သူတို့သည် အလုပ်လုပ်ရင်း စကားစမြည်ပြောဆိုကြရာ စတုတ္ထချွေးမတွင် သူမ၏ ယောက္ခမနှင့်ပတ်သက်၍ ပြောစရာများ များစွာရှိနေသည်။

"သူ သက်သက်မဲ့ ပြဿနာရှာနေတယ်လို့ နင် မထင်ဘူးလား။ မနက်စောစောစီးစီး ငါက အညစ်အကြေးအိုးကို နေရာမှားထားတယ်ဆိုပြီး အိမ်သာနားမှာ ငါ့ကို ဆဲဆိုနေတော့တာပဲ။ ဒီလိုမိသားစုမျိုးထဲကို ငါဘာလို့ ဝင်လာမိလဲဆိုတာ တကယ်ပဲ စဉ်းစားလို့မရဘူး"

"အရင်တုန်းက သူ ဒီလိုမဟုတ်ပါဘူး။ နင် အိမ်ထောင်ကျပြီး ဒီမိသားစုထဲ ရောက်လာကတည်းက သူ့ဂုဏ်သိက္ခာကို ဂရုစိုက်မှု ပိုနည်းလာပြီးတော့ သူ့ရဲ့ ပင်ကိုစရိုက်အမှန်ကို ဖုံးကွယ်မထားတော့တာ"

"အော်.. ငါ့ကံကလည်း ဆိုးလိုက်တာ။ သူပိုင်တဲ့လယ်က ဝါဂွမ်း အသုတ်လိုက်ကို မကြာခင် ရိတ်သိမ်းတော့မှာလေ။ ဒီနေ့ ငါ့ကို ဆူပူပြီးတဲ့နောက် အဲ့ဒီ ဝါဂွမ်းတွေအကုန်လုံးကို ချည်ဖြစ်အောင်ငင်ဖို့ ငါ့ကို တာဝန်ပေးလိုက်တယ်"

"နင့်ကို ဘယ်လောက်ပေးမယ်လို့ ပြောလဲ"

"အော်.. အစ်မ လန်.. နင်လည်း သူ့အကြောင်း သိသားနဲ့။ သူက ငါ့ကို တစ်ဝက်ပေးမယ်လို့ ကတိပေးထားတယ်.. ဒါပေမဲ့ သုံးပုံတစ်ပုံလောက်ပဲ ရမယ်ဆိုတာ ငါသိနေတယ်.. ဘယ်သူသိမှာလဲ.. ငါ အပင်ပန်းခံ လုပ်ပြီးသွားရင် ဘာမှတောင် ရချင်မှရမှာ"

"မြေးအကြီးဆုံးက မင်္ဂလာဆောင်တော့မှာဆိုတော့.. စရိတ်စကတွေ အများကြီး ရှိမှာပေါ့"

"ဟုတ်တယ်.. သူ ဒါကို ကြိုတင်စီစဉ်ထားတာ နေမှာ။ ဟွန်း.. ဒီတစ်ခါတော့ ငါအလိမ်မခံတော့ဘူး.. ငါ မလုပ်နိုင်ဘူးလို့ပဲ ငိုပြီး ပြောလိုက်တော့မယ်"

နင်က အရမ်း ရိုးအလွန်းတာပဲ။ နင် အလိမ်ခံရတာ ဒါ ပထမဆုံးအကြိမ်မှ မဟုတ်တာ။ သုံးပုံတစ်ပုံ ရလိမ့်မယ်လို့ နင်ဘယ်လိုလုပ် မျှော်လင့်နိုင်ရတာလဲ။ အဘွားကြီးဝမ်ရဲ့ ဉာဏ်နီဉာဏ်နက်များပုံနဲ့ဆို နင့်ကို အလကား ခိုင်းစားလိမ့်မယ်။ ဝါဂွမ်းငင်၊ အထည်ရက်ပြီး စောင်‌နဲ့ ဘောင်းဘီတွေကို ကိုယ်တိုင်ချုပ်လုပ်လိုက်တာကမှ ပိုကောင်းဦးမည်။ သူက နင့်ကို ဘာမှတောင် မပေးချင်လောက်ဘူး။

အဘွားကြီးဝမ်က သူမ၏ အငယ်ဆုံးချွေးမကို ပျက်စီးအောင်လုပ်နေသည်ဟု လော့လန်ကို ဝေဖန်ခဲ့သော်လည်း လော့လန်က ဒါကို လျစ်လျူရှုထားလိုက်သည်။ ဝမ် မိသားစု၏ ဇာတ်လမ်းများသည် သူမအတွက် အမှတ်များရရှိစေသော ဇာတ်လမ်းတွဲများကဲ့သို့ပင်။ သူမသည် ထိုအရာများမှ အမှန်တကယ်ပင် အကျိုးကျေးဇူး ရရှိနေသည်။

ရုံးပိတ်ရက်သို့ ရောက်ရှိလာပြီး သူမသည် သန့်ရှင်းရေးလုပ်ကာ အပြင်သွားရန် အဝတ်အစားအသစ်များကို ဝတ်ဆင်လိုက်သည်။ သူမ၏ အစ်မဖြစ်သူက သူမကို သပ်ရပ်လှပစေရန် ကူညီပြင်ဆင်ပေးခဲ့ပြီး သူမသည် စနစ်ထံမှ ဈေးမကြီးသော်လည်း စတိုင်ကျသော အဖြူရောင်ရှူးဖိနပ်တစ်ရန်ကို လဲလှယ်ယူထားသည်။ သူမ၏ အစ်မဖြစ်သူက ထောင့်တစ်နေရာတွင် ထိုဖိနပ်ကို သတိထားမိပြီး ခေတ္တမျှ သဘောကျကာ ကြည့်နေခဲ့သည်။

"ဒီဖိနပ်က တကယ် လှတာပဲ။ သန့်ရှင်းပြီး ဆွဲဆောင်မှုရှိတယ်.. ငါတို့လုပ်တဲ့ ဖိနပ်တွေထက် အများကြီး ပိုကောင်းတာပဲ။ နင် ဘယ်တုန်းက ဝယ်လိုက်တာလဲ.. ငါတောင် မသိလိုက်ပါလား"

"အစောပိုင်းတုန်းက ဈေးကနေ ဝယ်ခဲ့တာလေ။ အခုချိန်ထိ မဝတ်ရက်လို့ သိမ်းထားတာ"

"ကွက်တိပဲ.. ဒီနေ့ ဝတ်သွားလိုက် အို့ ကြည့်စမ်းပါဦး ငါ့ညီမလေးက ကြည့်ကောင်းလိုက်တာ"

အဖြူရောင် ပန်းပွင့်ပုံ အင်္ကျီ၊ အပြာရင့်ရောင် ဘောင်းဘီနှင့် စတိုင်ကျသော အဖြူရောင်ဖိနပ်ကို တွဲဖက်ဝတ်ဆင်ထားသော လော့လန်၏ ဝတ်စားဆင်ယင်မှုသည် လန်းဆန်းပြီး သန့်ရှင်းသပ်ရပ်နေသည်။ သူမ၏ သဘာဝအလှတရားသည် ဝတ်စုံသစ်နှင့် ပေါင်းစပ်လိုက်သောအခါ တဲအိမ်လေးကိုပင် ပိုလင်းလက်သွားစေသည်။

သူမ၏ အစ်မဖြစ်သူမှာ အလွန်ကျေနပ်အားရနေသဖြင့် မည်သို့ထပ်မံချီးကျူးရမည်ကိုပင် မသိတော့ဘဲ အခွင့်အရေးရတိုင်း သူမကို ငေးမောကြည့်နေတော့သည်။

"နင် ကြည့်ရတာ အရမ်းကောင်းတယ်"

ညီအစ်မနှစ်ယောက်သည် အောင်သွယ်တော်နှင့် တွေ့ဆုံကြသောအခါ အောင်သွယ်တော်သည်လည်း သဘောကျသွားပြီး နွေးထွေးစွာ ပြုံးပြခဲ့သည်။ ကျိုး မိသားစုမှ အမျိုးသားက လော့လန်၏ ဒုတိယအိမ်ထောင်ပြုမည့်သူ ဖြစ်နေသည့်အချက်ကို ဂရုမစိုက်ခြင်းမှာ အံ့သြစရာ မဟုတ်ပေ။ ဤမျှ ရင်သပ်ရှုမောဖွယ်ကောင်းသော မျက်နှာထားမျိုးနှင့်ဆိုလျှင် သူမကို မုဆိုးမတစ်ဦးဖြစ်သည်ဟု မည်သူက ထင်ကြေးပေးမည်နည်း။

သူတို့၏ ကွန်မြူနတီသည် မြို့နှင့် အလွန်နီးကပ်ပြီး မိုင်အနည်းငယ်သာ ဝေးသည်။ ဘတ်စ်ကားသည် မြို့တွင်းကားဂိတ်သို့ လျင်မြန်စွာ ဝင်ရောက်လာသည်။ လူအုပ်ကြီး ကားပေါ်မှ ဆင်းလာချိန်တွင် လော့မေသည် သူမ၏ ညီမဖြစ်သူ၏ ကျော့ရှင်းလှပသော ကိုယ်လုံးလေးကို ကြည့်ပြီး တိတ်တဆိတ် သက်ပြင်းချလိုက်သည်။ သူမ ဘာတွေးနေလဲဆိုသည်ကို သူမ၏ ညီမဖြစ်သူအား မည်သည့်အခါကမျှ ထုတ်မပြောဖူးပေ။

အလှတရားသည် ရေပွက်ပမာဖြစ်ပြီး အမျိုးသမီးတစ်ဦး၏ ကံကြမ္မာသည် ရုပ်ရည်သွင်ပြင်ထက် ကံတရားနှင့် အိမ်ထောင်ရေးအပေါ် ပိုမူတည်ကြောင်း ပုံပြင်များက ဆိုလေ့ရှိသည်။ သူမညီမ၏ ထူးခြားထင်ရှားသော ရုပ်ရည်အသွင်အပြင် ရှိလင့်ကစား သူမ၏ အိမ်ထောင်ရေးမှာ ကံဆိုးခဲ့သည်။

ယခုအခါတွင် သူမ၏ ခင်ပွန်း ကွယ်လွန်သွားပြီးနောက် လော့လန်သည် တဲအိမ်ငယ်လေးတွင် နေထိုင်ကာ သူမ၏ ရှေ့ဆက်လှမ်းရမည့် ခြေလှမ်းများအတွက် စဉ်းစားနေရသည်။ ဒီနေ့ သူမ ဘယ်လိုပုံစံ အမျိုးသားနှင့် တွေ့ဆုံရမှာလဲ၊ ပြီးတော့ သူမ၏ အနာဂတ်က ဖြစ်လာမှာလဲ။