ဝံပုလွေအရိပ်က မိုးကြိုးကို အမဲလိုက်ခြင်း၊ ၀က်ဝံဘုရင်နှင့် နှင်းဝံပုလွေဘုရင် ထိတ်တိုက်တွေ့ဆုံခြင်း (၂)

သူတို့သည် ကျန်ရှိနေသော လူသားများကို လျင်မြန်စွာ အပြတ်ရှင်းလိုက်ကြပြီး စစ်မြေပြင်၏ အလယ်ဗဟိုသို့ စုစည်းလာကြချေပြီ။

တစ်ခဏအတွင်းမှာပင် ကောင်းကင်မိုးကြိုးမုန်တိုင်းဝက်ဝံ၏ ဧရာမ မျက်၀န်းများမှာ ရုတ်တရက် ကျုံ့ဝင်သွားခဲ့သည်။ သူ့ရှေ့ရှိ ငွေရောင်ဝံပုလွေမှာ မတော်တဆ တွေ့ရှိရသည့် သားကောင် လုံးဝမဟုတ်ဘဲ... စနစ်တကျ ဖွဲ့စည်းထားပြီး၊ တိကျသော အချိန်ကို ဖမ်းဆုပ်ကာ၊ သူနှင့် လူသားများကိုပါ တစ်ချက်တည်းဖြင့် အမြစ်ပြတ် သုတ်သင်ရန် ရည်ရွယ်ထားသည့် ကြောက်မက်ဖွယ်ကောင်းသော မုဆိုးတစ်ဦး ဖြစ်ကြောင်းကို နောက်ဆုံးတွင် သူ သဘောပေါက်သွားခဲ့လေသည်။

သို့သော် သူ ထပ်မံ၍ မတွေးတောနိုင်မီမှာပင် လင်းထျန်းလုံ၏ တိုက်ခိုက်မှုမှာ ရောက်ရှိလာခဲ့ပြီ ဖြစ်သည်။

လင်းထျန်းလုံသည် သွေးဆာသားရဲဟိန်းသံ (စိမ်းပြာရောင် · ကြေးအဆင့်) ကို ချက်ချင်း အသက်သွင်းလိုက်သည်။ ရေခဲပြာရောင် မျက်ဝန်းများ၏ အနက်ထဲတွင် ကြမ်းတမ်းသော သွေးနီရောင် အလင်းတန်းတစ်ခု ပေါ်ထွက်လာခဲ့ပြီး၊ သူ၏ ခွန်အားနှင့် အမြန်နှုန်းမှာလည်း ချက်ချင်းပင် မြင့်တက်သွားခဲ့သည်။ ထို့နောက် -

‘အစွန်းရောက်အရိပ်လျှပ်စီးခြေလှမ်း (ခရမ်းရောင် · ပါရမီရှင်အဆင့်)'နှင့် ခွန်အားပြင်း သံချပ်ကာခွဲလက်သည်း (ခရမ်းရောင် · ပါရမီရှင်အဆင့်) ၏ ထက်ရှမှုများဖြင့် ပေါင်းစပ်လိုက်သောအခါ၊ လင်းထျန်းလုံ၏ ပုံရိပ်မှာ ညအမှောင်ထုကို ဆုတ်ဖြဲသွားသည့် ငွေဖြူရောင် တစ္ဆေတစ်ကောင်အဖြစ် ချက်ချင်း ပြောင်းလဲသွားတော့သည်။

သူ၏ အမြန်နှုန်းမှာ အဆင့်သစ်တစ်ခုသို့ ရောက်ရှိသွားခဲ့ရာ၊ မီတာ ဒါဇင်ပေါင်းများစွာသော အကွာအဝေးမှ နေရာကူးပြောင်းလာသကဲ့သို့ ၀က်ဝံဘုရင်၏ ရှေ့သို့ ချက်ချင်း ရောက်ရှိသွားပြီး အေးစက်စက် လက်သည်းများမှာ လေထုကို ဆုတ်ဖြဲကာ ကောင်းကင်မိုးကြိုး မုန်တိုင်းဝက်ဝံ၏ အကာအကွယ် အားနည်းသော နေရာဖြစ်သည့် လည်ပင်းဆီသို့ တည့်တည့်မတ်မတ် ဦးတည်သွားလေတော့သည်။

ဤသည်မှာ ကြာရှည်စွာ ပြင်ဆင်ထားခဲ့သော အားလုံးကို ပုံအောထားသည့် အသေသတ် တိုက်ကွက်ပင် ဖြစ်လေသည်။

အန္တရာယ်ကိုခံစားလိုက်ရသောကြောင့် ကောင်းကင်မိုးကြိုးမုန်တိုင်းဝက်ဝံ၏ မျက်၀န်းများမှာ ဒေါင်လိုက်မျဉ်းကြောင်းများအဖြစ် ချက်ချင်း ကျုံ့ဝင်သွားခဲ့ပြီး၊ ပြင်းထန်သော သေခြင်းတရား၏ ခြိမ်းခြောက်မှုက သူ၏ အာရုံကြောတိုင်းကို လှုံ့ဆော်လိုက်လေသည်။

သို့သော် ဤအဆုံးအဖြတ်ပေးမည့် အခိုက်အတန့်လေးတွင် မမျှော်လင့်ထားသော အပြောင်းအလဲတစ်ခု ဖြစ်ပေါ်လာခဲ့သည်။

“‌‌ဝေါင်း...”

“ယုတ်မာတဲ့ နှင်းဝံပုလွေ၊ မင်း ငါ့ကို ရန်စလိုက်တာပဲ” ထိတ်လန့်ခြင်းနှင့် မယုံကြည်နိုင်ခြင်းတို့ဖြင့် ပြည့်နှက်နေသော ကြမ်းတမ်းပြီး ဒေါသထွက်နေသည့် စိတ်စွမ်းအင်လှိုင်းတစ်ခုမှာ ဝက်ဝံဘုရင်၏ နားကွဲမတတ် ဟိန်းဟောက်သံနှင့်အတူ ပေါက်ကွဲထွက်လာခဲ့သည်။

“ဂျိန်း”

ယခင်ကထက် ပိုမိုသိပ်သည်းပြင်းထန်လှသော ရေပြာရောင် မိုးကြိုးစီးကြောင်းများမှာ အားပြင်းသော လှုံ့ဆော်မှုတစ်ခုကြောင့် သူ၏ ခန္ဓာကိုယ်အတွင်းမှ ရုတ်တရက် ပေါက်ကွဲထွက်ပေါ်လာခဲ့သည်။

၎င်းတို့သည် ခိုင်မာသော မိုးကြိုးဒိုင်းတစ်ခုအဖြစ် ချက်ချင်း ယှက်နွယ်သွားကြပြီး၊ လင်းထျန်းလုံ၏ လက်သည်းများကို အချိန်မီလေး ကာကွယ်လိုက်နိုင်လေသည်။

“ဘုန်း...”

နားကွဲမတတ် ပေါက်ကွဲသံကြီး ထွက်ပေါ်လာခဲ့သည်။ စွမ်းအင်များမှာ ပြင်းထန်စွာ ရိုက်ခတ်မိပြီး ပျောက်ကွယ်သွားကြလေသည်။

လင်းထျန်းလုံ၏ အသေသတ်တိုက်ကွက်မှာ မျှော်လင့်ထားသည်ထက် များစွာ ခိုင်မာနေသော ဤရုတ်တရက် ပေါ်ထွက်လာသည့် မိုးကြိုးဒိုင်းကြောင့် အမှန်တကယ်ပင် တားဆီးခြင်း ခံလိုက်ရသည်လေသည်။ ကြီးမားလှသော ရိုက်ခတ်မှု အရှိန်ကြောင့် သူသည်လည်း နောက်သို့ ခုန်ဆုတ်လိုက်ရပြီး မြေပြင်ပေါ်သို့ ပေါ့ပါးစွာ ဆင်းသက်လိုက်လေသည်။

“ဘာကြီးလဲ...” လင်းထျန်းလုံ၏ ငွေပြာရောင် မျက်ဝန်းများတွင် အမှန်တကယ် အံ့အားသင့်မှု အရိပ်အယောင်တစ်ခု ပေါ်လာခဲ့သည်။ “ဒီစွမ်းအားက... လူသားတွေနဲ့ တိုက်တုန်းကတောင် ဒီလောက် မပြင်းထန်ပါဘူး...”

“ကြောက်စရာကောင်းလိုက်တာ။ ဒီကောင်က တကယ်တော့ ဒီလောက်တောင် အစွမ်းထက်တဲ့ နောက်ဆုံး တိုက်ကွက်ကို ဖုံးကွယ်ထားတာပဲ”

ထို့နောက်တွင် ကောင်းကင်မိုးကြိုးမုန်တိုင်းဝက်ဝံမှာ သူ၏ နောက်ခြေထောက်များနှင့် ရုတ်တရက် မတ်တတ်ရပ်လိုက်သည်။

ကြီးမားလှသော ခွန်အားများနှင့် ဆူပွက်နေသော မိုးကြိုးများကို သယ်ဆောင်ထားသည့် သူ၏ ဧရာမ လက်ဝါးကြီးများဖြင့် မြေပြင်ပေါ်သို့ ပြင်းထန်စွာ ရိုက်ချလိုက်လေတော့သည်။

‘ပြင်းထန်သော မိုးကြိုးလက်ဝါး (အဖြူရောင် · ငွေအဆင့်) ပြောင်းလဲထားသော ပုံစံ၊’

“ဂျိန်း”

အသက်ဝင်နေသကဲ့သို့ တွန့်လိမ်နေသော လျှပ်စီးမြွေ ဒါဇင်ပေါင်းများစွာမှာ၊ လောင်ကျွမ်းပျက်စီးနေသော မြေပြင်တစ်လျှောက်မှ ယုံကြည်နိုင်လောက်စရာမရှိသော အမြန်နှုန်းဖြင့် ပြေးထွက်လာကာ လင်းထျန်းလုံဆီသို့ ရစ်ပတ်ကိုက်ခတ်ရန် ဦးတည်လာနေကြလေသည်။

“တစ်ခုခုတော့ မှားနေပြီ”

လင်းထျန်းလုံ၏ ဝံပုလွေဘုရင် ဗီဇအရ သတိပေးချက်တစ်ခုကို ထုတ်လွှတ်နေခဲ့လေသည်။ လင်းထျန်းလုံသည် သူ၏ ခန္ဓာကိုယ်ကို ကွေးချလိုက်ပြီး သူ၏ ခြေလက်လေးဖက်လုံးမှ ကြောက်မက်ဖွယ်ကောင်းသော ခွန်အားများ ချက်ချင်း ပေါက်ကွဲထွက်လာကာ အနောက်ဘက်သို့ ခုန်ရှောင်လိုက်လေသည်။

အစွန်းရောက်အရိပ်လျှပ်စီးခြေလှမ်း (ခရမ်းရောင် · ပါရမီရှင်အဆင့်) သည် ၎င်း၏ ထူးကဲသော စွမ်းဆောင်ရည်ကို နောက်တစ်ကြိမ် ထပ်မံ ပြသလိုက်ပြန်ပြီ ဖြစ်သည်။

သူ မူလ ရပ်နေခဲ့သော နေရာတွင် ပျက်စီးလု‌နီးပါးဖြစ်နေသော မှုန်ဝါးဝါး ငွေရောင် ပုံရိပ်တစ်ခုသာ ကျန်ရစ်ခဲ့လေသည်။

သူ၏ အစစ်အမှန် ခန္ဓာကိုယ်မှာ ဘေးသို့ရောက်နေခဲ့ချေပြီး။

သူ ရှောင်တိမ်းလိုက်သည်နှင့် တစ်ပြိုင်နက်၊ သူ၏ ပုံရိပ်နှင့် သူ ရပ်နေခဲ့သော မြေပြင်မှာ ထိုပြင်းထန်လှသော လျှပ်စီးမြွေများ၏ ဝါးမြိုဖမ်းဆီးခြင်းကို ခံလိုက်ရလေသည်။

ပုံရိပ်ယောင်မှာ ပျောက်ကွယ်သွားခဲ့ပြီး မြေပြင်ပေါ်တွင်လည်း တဖျတ်ဖျတ် မြည်နေသော လျှပ်စီးဖန်သားပြင်ပုံစံ မျက်နှာပြင်ကြီးတစ်ခု ထပ်မံပေါ်ထွက်လာခဲ့သည်။

လင်းထျန်းလုံသည် ပေါ့ပေါ့ပါးပါးပင် ရှောင်တိမ်းလိုက်နိုင်သော်လည်း သူ၏ မျက်ခွံများမှာ အနည်းငယ် တုန်ရီနေလေသည်။

“ဒါက ဘာစွမ်းရည်ကြီးလဲ...” သူ လေးနက်တည်ကြည်နေလေသည်။ “ငါ သူ့ရဲ့ အချက်အလက်ပြ မျက်နှာပြင်ကိုလည်း မြင်ပြီးသား၊ ပြီးတော့ လူသားတွေနဲ့ သူ တိုက်ခဲ့တဲ့ တစ်ပွဲလုံးကိုလည်း စောင့်ကြည့်ခဲ့တာပဲ၊ သူ့ရဲ့ စွမ်းရည်တွေနဲ့ တိုက်ခိုက်ရေးဟန်ကို အကုန် သိနေရမှာလေ... ဒါပေမဲ့ ဘာလို့... ဘာလို့ ဒီဝက်ဝံသားရဲက ဒီလောက် ထူးဆန်းပြီး အစွမ်းထက်တဲ့ နည်းလမ်းကို ပိုင်ဆိုင်ထားရသေးတာလဲ...”

သူ တွေးတောနေစဉ်မှာပင် ကောင်းကင်မိုးကြိုး မုန်တိုင်းဝက်ဝံ၏ အချက်အလက်ပြ မျက်နှာပြင် ဘေးနားတွင်၊ စူးရှသော အနီရောင်အလင်းများ လင်းလက်နေသည့် အရေးပေါ်အခြေအနေ အသိပေးချက် အသစ်တစ်ခု အလိုအလျောက် ပေါ်ထွက်လာခဲ့သည်။

[နိုးထခြင်း အခြေအနေ ။ ။ မိုးကြိုး၀က်ဝံမှာ မိုးကြိုးအရင်းအမြစ် (ခရမ်းရောင် ပါရမီရှင်အဆင့်) ၏ မူလစွမ်းအားကို ထုတ်လွှတ်ပြီးနောက်၊ အချိန်တိုအတွင်း အလားအလာများကို များစွာ လှုံ့ဆော်ပေးလိုက်နိုင်ခြင်း ဖြစ်သည်။ ပိုမို သန့်စင်ပြီး အစွမ်းထက်သော မိုးကြိုးထိန်းချုပ်နိုင်စွမ်းကို ရရှိကာ၊ ကိုယ်ပိုင်စွမ်းရည်အားလုံး သိသိသာသာ တိုးတက်လာပြီး တိုက်ခိုက်ရေးစွမ်းအားမှာလည်း အဆမတန် မြင့်တက်လာမည် ဖြစ်သည်။ ကျန်ရှိချိန် - ၅၅ စက္ကန့်]

“သြော်... ဒါကြောင့်ကိုး။” လင်းထျန်းလုံ ချက်ချင်း သဘောပေါက်သွားခဲ့သည်။ “ဒါက သူ့ရဲ့ ပါရမီရှင်အဆင့် ပင်ကိုစွမ်းရည်ဖြစ်တဲ့ မိုးကြိုးအရင်းအမြစ် (ခရမ်းရောင် ပါရမီရှင်အဆင့်) ရဲ့ ဖုံးကွယ်နေတဲ့ အကျိုးသက်ရောက်မှုပဲကိုး၊ သေခါနီးအခြေအနေ ဒါမှမဟုတ် ပြင်းထန်လွန်းတဲ့ ဒေါသတွေကြောင့် ဖြစ်ပေါ်လာတဲ့ ခဏတာ နိုးထမှုပေါ့။”

“ဒါပေမဲ့... ဒီအကျိုးသက်ရောက်မှုရဲ့ ခွန်အားက... မဟုတ်သေးဘူး၊ တကယ်ကို တစ်ခုခုတော့ မှားနေပြီ။” လင်းထျန်းလုံ၏ ထက်မြက်လှသော တိုက်ပွဲဝင်ဗီဇက သူ့ကို မှားယွင်းနေကြောင်း သတိပေနေခဲ့ပြန်သည်။

“ဒီလောက်အထိ တိုးတက်လာတာက သာမန် ပါရမီရှင်အဆင့် ပင်ကိုစွမ်းရည်တစ်ခုမှာ ရှိသင့်တဲ့ အတိုင်းအတာကို လုံးဝကျော်လွန်သွားပြီလေ။”

လင်းထျန်းလုံသည် သူ၏ စိတ်ကို စုစည်းလိုက်ပြီး မိုးကြိုးအရင်းအမြစ် (ခရမ်းရောင် · ပါရမီရှင်အဆင့်) ပင်ကိုစွမ်းရည်ကို သေချာစူးစိုက်ကြည့်လိုက်ပြန်သည်။

ဤတစ်ကြိမ်တွင်မူ သူ ယခင်က လျစ်လျူရှုခဲ့မိသော အသေးအမွှား အချက်အလက်လေးတစ်ခုကို သတိပြုမိသွားခဲ့သည်။ ထိုပင်ကိုစွမ်းရည်၏ လင်းလက်နေသော ခရမ်းရောင် အလင်းတန်း၏ အနက်ထဲတွင် ခရမ်းရောင်ကို ကျော်လွန်နေပုံရသော၊ အလွန် မှုန်ဝါးနေသော်လည်း ယုံကြည်နိုင်လောက်စရာမရှိအောင် မြင့်မြတ်လှသည့် အရှိန်အဝါတစ်ခု... အတိအကျဆိုလျှင် မှုန်ဝါးဝါး ရွှေရောင် အလင်းတန်းလေး တစ်ခု ရှိနေခြင်းပင်။

“ဒါက... ဘုရင်အဆင့် ပင်ကိုစွမ်းရည်ရဲ့ ပုန်းအောင်းနေတဲ့ လက္ခဏာလား၊ အခုထိတော့ လုံးဝနိုးမထသေးလို့ စနစ်မျက်နှာပြင်က ခရမ်းရောင် ပါရမီရှင်အဆင့် လို့ပဲ သတ်မှတ်ထားတာပေါ့...” လင်းထျန်းလုံ၏ နှလုံးသားထဲတွင် တုန်လှုပ်မှုလှိုင်းလုံးများ ဆူပွက်သွားခဲ့သည်။ “နားလည်ပြီ။ ဒီဝက်ဝံဘုရင်ရဲ့ ပင်ကိုစွမ်းရည် အလားအလာက မျက်နှာပြင်မှာ ပြထားတာထက် အများကြီး ပိုပြီး ကြောက်စရာကောင်းတာပဲ။”

သစ်ပင်အိမ်လေးအတွင်းတွင် ပြတင်းပေါက် အက်ကွဲကြောင်းမှတစ်ဆင့် ခြေဖျားထောက်ကာ အပြင်ဘက်ကို ချောင်းကြည့်နေကြသော ရှောင်လန်နှင့် ရှောင်ယင်းတို့သည် ဝံပုလွေဖေဖေ၏ တုန်လှုပ်မှုနှင့်အတူ တောက်လောင်နေသော တိုက်ပွဲဝင်လိုစိတ်တို့ကို တစ်ပြိုင်နက်တည်းနီးပါး အာရုံခံမိလိုက်ကြသည်။

ကလေးငယ်နှစ်ဦးလုံး အသက်ရှူမှားသွားကြပြီး၊ သူတို့၏ ပြည့်ပြည့်ဖောင်းဖောင်း မျက်နှာငယ်လေးများပေါ်တွင် ပြင်းထန်သော စိုးရိမ်ပူပန်မှုများ၊ မယုံကြည်နိုင်မှုများဖြင့် ပြည့်နှက်သွားခဲ့သည်။

“ဒါက ၀က်ဝံဘုရင်နဲ့ဝံပုလွေဖေဖေ ထိတ်တိုက်တွေ့နေကြတာပဲ” ရှောင်လန်၏ အတွေးများမှာ အလောတကြီးဖြစ်နေပြီး ယခင်က မရှိခဲ့ဖူးသော လေးနက်တည်ကြည်မှုများ ပါဝင်နေလေသည်။ “ဝံပုလွေဖေဖေက ဒီကောင် ဘယ်လိုကောင်လဲဆို‌တာရော သိရဲ့လား၊ သူက အနာဂတ် ထျန်းစန်းတောင်တန်းရဲ့ သားရဲဘုရင်ကြီး လေးကောင်ထဲက တစ်ကောင်ပဲ။”

“နောက်ပိုင်းမှာ သူက နင်းမြို့တော်ကို တိုက်ခိုက်သိမ်းပိုက်ပြီး ဓာတ်အားပေးစက်ရုံကို အပိုင်စီးလိုက်တာလေ၊ စွမ်းအင်နိုးထပြီး ၂ နှစ်အတွင်းမှာတင် လျှပ်စစ်ဓာတ်အားတွေကို စုပ်ယူပြီး ဧကရာဇ်အဆင့် ထိရောက်အောင် အတင်းအဓမ္မ တက်လှမ်းခဲ့တဲ့ကောင်...”

ရှောင်ယင်း၏ အတွေးများမှာလည်း အလောတကြီးဖြစ်နေပြီး သူမ၏ လေသံမှာလည်း တုန်လှုပ်ခြောက်ခြားမှု အရိပ်အယောင်များ ပါ၀င်နေလေသည်။

“ဝိညာဉ်စွမ်းအင်အဆင့် ပြန်လည်နိုးထလာစ အစောပိုင်းကာလမှာ သူက မိစ္ဆာသားရဲမျိုးနွယ်စုဝင်တွေထဲမှာ အကြမ်းဆုံး တစ်ကောင်ပဲ၊ မိုးကြိုးအရင်းအမြစ် ရဲ့ အလားအလာကလည်း အရမ်းကြောက်ဖို့ကောင်းတယ်၊ ဝံပုလွေဖေဖေ အခု သူ့ကို အသေသတ်ဖို့ သွားတိုက်တာက အရမ်းကို စွန့်စားရာကျလွန်းတယ်။”

ဤအခိုက်အတန့်တွင်။

စစ်မြေပြင်ပေါ်တွင် “နိုးထခြင်း အခြေအနေ” ထဲသို့ ခဏတာ ဝင်ရောက်သွားခဲ့သော ကောင်းကင်မိုးကြိုးမုန်တိုင်းဝက်ဝံမှာ၊ ပြင်းထန်သော ဒဏ်ရာများကြောင့် ဖြစ်ပေါ်နေသည့် အားနည်းမှုများကို လုံးဝ ဖယ်ရှားပစ်နိုင်ခဲ့ပုံရသည်။

သူ၏ အရှိန်အဝါမှာ မီးတောင်ပေါက်ကွဲလာသကဲ့သို့ အမြင့်ဆုံးအခြေအနေထိ ပြန်လည် ထိုးတက်သွားခဲ့ပြီ ဖြစ်သည်။

၀က်ဝံဘုရင်ကြီးသည် သူ၏ လက်သီးများဖြင့် ထူထဲလှသော ရင်ဘတ်ကြီးကိုပင် စည်တီးသံကဲ့သို့ အသံထွက်သည်အထိ ထုနှက်လိုက်ပြီး၊ ကောင်းကင်ကို တုန်ခါသွားစေမည့် ဟိန်းဟောက်သံကြီးကို ထုတ်လွှတ်လိုက်လေသည်။

“ဝေါင်းးး”

ဤဟိန်းဟောက်သံထဲတွင် ယခင်ကထက် များစွာသာလွန်သော စွမ်းအားများ ပါဝင်နေပြီး၊ လေထုထဲတွင် သာမန်မျက်စိဖြင့်ပင် မြင်နိုင်သော တွန့်လိမ်နေသည့် လှိုင်းဂယက်များ ပေါ်ထွက်လာခဲ့သည်။

မိုးကြိုးစီးကြောင်းများစွားမှာ သူ၏ ခန္ဓာကိုယ်မျက်နှာပြင်မှသာ ပေါက်ကွဲထွက်လာခြင်း မဟုတ်တော့ဘဲ၊ ချွေးပေါက်တိုင်းမှနေ၍ ပွင့်လန်းလာသကဲ့သို့ပင်။

၀က်ဝံဘုရင်ကြီးအား ဝန်းရံထားသော မိုးကြိုးများ၏ အရောင်မှာ ပိုမိုနက်ရှိုင်းလာပြီး ခရမ်းပြာရောင်ဘက်သို့ နီးကပ်လာခဲ့သည်။

နောက်တစ်စက္ကန့်တွင် ဧရာမ သားရဲကြီးမှာ ပြင်းထန်လှသော ခရမ်းပြာရောင် မိုးကြိုးမုန်တိုင်းကြီး တစ်ခုအဖြစ် အသွင်ပြောင်းသွားပြီး၊ လင်းထျန်းလုံဆီသို့ ကြောက်မက်ဖွယ်ကောင်းသော အရှိန်အဟုန်ဖြင့် တည့်တည့်မတ်မတ် ပြေး၀င်လာကာ စတင်တိုက်ခိုက် လိုက်လေတော့သည်။ ၎င်း၏ အမြန်နှုန်းမှာ ယခင်ကထက် နှစ်ဆနီးပါး ရှိနေလေပြီ။ ကောင်းကင်မိုးကြိုးမုန်တိုင်း၀က်ဝံကြီးမှာ ၎င်း၏ လမ်းကြောင်းပေါ်ရှိ မည်သည့်အရာကိုမဆို ခြေမှုန်းပြီး လျှပ်စီးဖြင့် အမှုန့်ဖြစ်အောင် လုပ်ပစ်တော့မည့်အလား ဖြစ်နေလေသည်။

အကယ်၍သာ ဤတစ်ချက် ထိသွားခဲ့လျှင် ငွေပြာရောင် သွေးမျိုးဆက် (ရွှေရောင် · ဘုရင်အဆင့်) ကြောင့် သန်မာနေသော လင်းထျန်းလုံ၏ ခန္ဓာကိုယ်ပင်လျှင် ချက်ချင်းဆိုသလို အရိုးများ ကျိုးကြေကာ ဒဏ်ရာအပြင်းအထန် ရရှိသွားနိုင်လေသည်။

သို့ပေမဲ့…

“မြန်တယ်၊ ဒါပေမဲ့ အခုထိတော့ မလုံလောက်သေးဘူး”

လင်းထျန်းလုံ၏ ရေခဲပြာရောင် မျက်ဝန်းများမှာ ကြောက်မက်ဖွယ်ကောင်းလောက်အောင် တည်ငြိမ်နေလေသည်။

အစွန်းရောက်အရိပ်လျှပ်စီးခြေလှမ်း (ခရမ်းရောင် ပါရမီရှင်အဆင့်) သည် ပါရမီရှင်အဆင့်ကိုပင် ကျော်လွန်သော ၎င်း၏ အရှိန်အဟုန်ကို နောက်တစ်ကြိမ် ထပ်မံ ပြသလိုက်ပြန်သည်။

မိုးကြိုးမုန်တိုင်းကြီးက သူ့ကို တိုက်မိတော့မည့် အခိုက်အတန့်မှာပင်၊ သူ၏ ငွေဖြူရောင်ပုံရိပ်မှာ တစ္ဆေတစ်ကောင်ကဲ့သို့ လျှပ်တပြက်လှုပ်ရှားလာခဲ့ပြီး ခန္ဓာကိုယ်က်ု တွန့်လိမ်လှည့်ပတ်လိုက်ရာ၊ ထိုအဖျက်စွမ်း‌အားကောင်းသော မိုးကြိုးမုန်တိုင်းကြီးကို သီသီလေးကပ်ကာ ရှောင်တိမ်းလိုက်နိုင်လေသည်။

သူတို့နှစ်ဦး ဘေးချင်းကပ် ဖြတ်ကျော်သွားသည့် အခိုက်အတန့်မှာပင်၊ ခွန်အားပြင်း သံချပ်ကာခွဲလက်သည်း (ခရမ်းရောင် · ပါရမီရှင်အဆင့်) ကို အသက်သွင်းထားသဖြင့် အေးစက်စက် အလင်းတန်းများ လင်းလက်နေသည့် သူ၏ ညာဘက်လက်သည်းဖြင့် ၀က်ဝံဘုရင်ကို မြွေဆိုးတစ်ကောင်ကဲ့သို့ ထိုးနှက်လိုက်ရာ၊ မိုးကြိုးများ ဖုံးလွှမ်းနေပြီး အသားထူထဲလှသော ဝက်ဝံဘုရင်၏ နံဘေးတွင် မီတာတစ်ဝက်ခန့် ရှည်လျှားသော ဒဏ်ရာတစ်ခု ကျန်ရစ်ခဲ့လေသည်။

နက်ရှိုင်းလှသည် မဟုတ်သော်လည်း အသားများ ဆုတ်ပြဲသွားပြီး သွေးများမှာလည်း ချက်ချင်းပင် စိမ့်ထွက်လာခဲ့သည်။

မိုးကြိုးများကြောင့် ထိုဒဏ်ရာမှာ တဖျတ်ဖျတ် မြည်သံနှင့်အတူ မီးကျွမ်းသွားသော်လည်း၊ ဝံပုလွေဘုရင်၏ လက်သည်းများဖြင့် ဖြတ်တောက်သွားခြင်းကိုတော့ မတားဆီးနိုင်ခဲ့ပေ။

သူတို့၏ ပထမဆုံး ထိပ်တိုက်ရင်ဆိုင်မှုတွင်၊ သူ၏ အပြတ်အသတ် သာလွန်သော အမြန်နှုန်း အားသာချက်နှင့် တိုက်ခိုက်ရေး နည်းစနစ်များကို အားကိုး၍၊ လင်းထျန်းလုံသည် “နိုးထခြင်း အခြေအနေ” တွင် တိုက်ခိုက်ရေးစွမ်းအား အဆမတန် မြင့်တက်နေသည့် ခြေလှမ်း၀က်ဘုရင်အဆင့် ၍ဝက်ဝံဘုရင်အပေါ် အမှန်တကယ် အသာစီး ရရှိသွားခဲ့ပြီ ဖြစ်လေသည်။

“ဂါးး...” ဒဏ်ရာမှ စူးရှသော နာကျင်မှုကြောင့် ကောင်းကင်မိုးကြိုးမုန်တိုင်းဝက်ဝံမှာ ပို၍ပင် ဒေါသထွက်သွားခဲ့ပြီး၊ မိုးကြိုးသံများမှာလည်း ညကောင်းကင်ယံတွင် ပဲ့တင်ထပ်သွားလေတော့သည်။

တကယ့် ပြင်းထန်သော အစစ်အမှန် တိုက်ပွဲကြီးမှာ ယခုမှ စတင်ချင်းဖြစ်လေသည်။