အခန်း (၉၂၁-၉၂၂)
Vol. 93 Ch. 921-922
အခန်း (၉၂၁) ခရမ်းရောင်စာပေသင်တန်းကျောင်းက ဒီလောက်ပါပဲ
နှစ်ရက်ကြာပြီးနောက်၊ သင်္ဘောပေါ်တွင် လီပါ့တောင်းသည် မရဏလမ်း ထဲမှ ရိုသေကိုင်းညွတ်စွာ ထွက်လာခဲ့သည်။
သူ့နောက်တွင် လိုက်ပါလာသော လင်ဟောင်မှာမူ အသက်မဲ့နေသော ရုပ်သေးရုပ်တစ်ခုကဲ့သို့ မျက်နှာတွင် ထုံထိုင်းမှိုင်တွေလျက် ရှိနေသည်။
"အရှင်၊ သူ အကုန်ဝန်ခံသွားပါပြီ"
လီပါ့တောင်းက ရိုသေစွာ ဂါရဝပြုရင်း
"ငယ်စဉ်ကတည်းကနေ အခုအထိ အသေးစိတ် အကုန်ပါပဲ၊ တကယ်လို့ မပြောရသေးတာ ကျန်နေသေးတယ်ဆိုရင်တောင် အဲဒါက သူကိုယ်တိုင် မေ့သွားလို့ပဲ ဖြစ်ပါလိမ့်မယ်"
"အရှင်... အရှင်သိချင်တာမှန်သမျှ... ကျုပ် အကုန်ပြောပြပြီးပါပြီ၊ အခုတော့ ကျုပ် အေးအေးဆေးဆေးပဲ နေချင်ပါတော့တယ် ကျန်ရှိနေတဲ့ နေ့ရက်တွေကို ယင်လောက မှာပဲ အေးအေးချမ်းချမ်း ဖြတ်သန်းသွားချင်ပါတယ်"
လင်ဟောင်က ဖန့်ချန်ကို ကြည့်လိုက်ရာ သူ၏မျက်လုံးထဲတွင် အလင်းရောင်အနည်းငယ် ထွက်ပေါ်လာသည်။
"ဒီအတောအတွင်း ဝိညာဉ်သုတ်သင်ခြင်းဌာန က ကျင့်ကြံသူ တော်တော်များများကို ဖမ်းမိထားတယ်လို့ မင်းပြောခဲ့တယ် သူတို့ကို ဘယ်မှာ ပိတ်လှောင်ထားတာလဲ"
ဖန့်ချန်က ခပ်အေးအေး ပြုံးကာ မေးလိုက်သည်။
"ဟန်တန်းနိုင်ငံ မှာပါ ဟန်တန်းနိုင်ငံရဲ့ ဘုရင်ကလည်း သွေးဝိညာဉ်ဂိုဏ်း ရဲ့ ဝိညာဉ်အရှင် တစ်ယောက်ပါပဲ ပြီးတော့ လွန်ခဲ့တဲ့ နှစ်အနည်းငယ်ကမှ တိတ်တဆိတ် ဖန်ဆန် အဆင့်ကို တက်လှမ်းသွားခဲ့တာပါ"
" အပြင်ပန်းကြည့်ရင် အဆင့် ၃ အင်ပါယာနိုင်ငံလို့ ထင်ရပေမဲ့ တကယ်တမ်းတော့ အဆင့် ၂ နိုင်ငံတွေရဲ့ အစွမ်းမျိုး ရှိနေပါတယ် ဝိညာဉ်သုတ်သင်ခြင်းဌာန က ဒီကိစ္စကို မသိဘဲ ဟန်တန်းဘုရင်ရဲ့ ထောင်ချောက်ထဲကို တိုးဝင်မိလို့ အများစု အဖမ်းခံလိုက်ရတာပါ"
လင်ဟောင်က ဖြေသည်။
ဖန့်ချန်က လီပါ့တောင်းကို တစ်ချက်ကြည့်လိုက်ရာ လီပါ့တောင်းက ခေါင်းညိတ်ပြလျက်
"သူ ကျုပ်ကို ပြောတာလည်း ဒီအတိုင်းပါပဲ ကျုပ် အခါပေါင်းများစွာ ထပ်ခါတလဲလဲ မေးမြန်းခဲ့တာမို့ မှားဖို့ မရှိပါဘူး"
"ဝိညာဉ်သုတ်သင်ခြင်းဌာန က အလုပ်လုပ်ရင် သတိကြီးကြတယ် လူတိုင်းရဲ့ နောက်ခံကလည်း မတူကြဘူး ဟန်တန်းဘုရင်က သူတို့ကို ဘယ်လိုလုပ် ဖမ်းမိသွားတာလဲ"
ဖန့်ချန်က မေးသည်။
လင်ဟောင်
"ဝိညာဉ်သုတ်သင်ခြင်းဌာန ထဲမှာလည်း ကျုပ်တို့ သွေးဝိညာဉ်ဂိုဏ်း က လူတွေ ရှိနေလို့ပါ အဲဒီလူက အတွင်းလူအဖြစ် သတင်းပေးပြီး အပြင်ကနေ ပူးပေါင်းဆောင်ရွက်ခဲ့လို့သာ ဝိညာဉ်သုတ်သင်ခြင်းဌာန ကျင့်ကြံသူတစ်အုပ်လုံးကို ထောင်ချောက်ဆင် ဖမ်းနိုင်ခဲ့တာပါ"
ဒါကတော့ မထူးဆန်းတော့ပါဘူး။
ဝိညာဉ်သုတ်သင်ခြင်းဌာန ဆိုတာကလည်း တစ်သားတည်း ဖြစ်နေတဲ့ သံမဏိပြားကြီး မဟုတ်ဘူးဆိုတာ ဖန့်ချန် အစောကြီးကတည်းက သိထားခဲ့တာပါ။
သွေးဝိညာဉ်ဂိုဏ်း ကျင့်ကြံသူတွေ ခိုအောင်းနေသလိုမျိုးပဲ၊ သွေးဝိညာဉ်ဂိုဏ်း ထဲမှာလည်း ဝိညာဉ်သုတ်သင်ခြင်းဌာန က ကျင့်ကြံသူတွေ ရှိနေမှာ အသေအချာပါပဲ။
နှစ်ဖက်စလုံးရဲ့ ပြိုင်ဆိုင်မှုက ဘယ်သူ့သတင်းက ပိုတိကျသလဲ၊ ဘယ်သူ့နည်းလမ်းက ပိုမြင့်မားသလဲဆိုတာပေါ်မှာပဲ မူတည်နေတာပါ။
အခုအထိတော့ နှစ်ဖက်စလုံးမှာ အကျအဆုံးတွေ ရှိနေလောက်ပါပြီ။
"ဟန်တန်းဘုရင်က သူတို့ကို ဘာလို့ မသတ်ဘဲ အရှင်ထားထားတာလဲ သူ့ရဲ့ ရည်ရွယ်ချက်က ဘာလဲ"
ဖန့်ချန်က မေးသည်။
လင်ဟောင်
"သူက အဲဒါကို မြှူစာအဖြစ် သုံးပြီး ဝိညာဉ်သုတ်သင်ခြင်းဌာန က ကျင့်ကြံသူတွေ အများကြီး ထပ်လာပြီး ကယ်အောင် ထောင်ချောက်ဆင်နေတာပါ "
"ပေါင်းစပ်ခြင်း အဆင့် ကျင့်ကြံသူတွေ ဝင်ပါလာမှာကို သူ မကြောက်ဘူးလား ဒါမှမဟုတ် မင်းတို့ သွေးဝိညာဉ်ဂိုဏ်း မှာ မသေမျိုး တစ်ပါးပါး အနောက်ကနေ စောင့်ကြည့်ပေးနေတာ ရှိလို့လား"
ဖန့်ချန်က ပြုံးပြီး ဆက်မေးသည်
"အဲဒီ မသေမျိုးက ငါးမျှားချင်နေတာလား"
လင်ဟောင်၏ မျက်လုံးထဲတွင် ထိတ်လန့်မှုများ ယှက်သန်းသွားသည်။ တစ်ဖက်လူက
မသေမျိုး ဆိုတာကိုတောင် သိနေသည်ဆိုကတည်းက သွေးဝိညာဉ်ဂိုဏ်း အကြောင်းကို ပုံမှန်ထက် ပိုပြီး သိနေတာ သိသာလှသည်။
သာမန်လူတွေက ဝိညာဉ်အရှင် ဆိုတဲ့ အခေါ်အဝေါ်ကိုပဲ သိကြတာပါ။
အထက်ပိုင်းအဆင့် ၃ ဆင့် ကျင့်ကြံသူတွေကို သွေးဝိညာဉ်ဂိုဏ်း ထဲမှာ မသေမျိုး လို့ ခေါ်ဆိုကြတာကို ဘယ်သူမှ မသိကြပါဘူး။
ဒီလို တည်ရှိမှုမျိုးတွေကတော့ အလွယ်တကူနဲ့ ကိုယ်တိုင် လက်ဖျားနဲ့ မထိတတ်ကြပါဘူး။
နှစ်ပေါင်း တစ်ရာ၊ နှစ်ရာလောက်အထိ သွေးဝိညာဉ်ဂိုဏ်း ရဲ့ အလုပ်တွေကို ကိုယ်တိုင်ဝင်မပါဘဲ အနောက်ကနေပဲ အစီအစဉ်ဆွဲတတ်ကြတာပါ။
ဒါကြောင့်လည်း ဝိညာဉ်သုတ်သင်ခြင်းဌာန ပေါ်ပေါက်လာကတည်းက မသေမျိုး တစ်ပါးမှ ဝိညာဉ်သုတ်သင်ခြင်းဌာန လက်ထဲမှာ အဖမ်းခံရတာမျိုး မရှိခဲ့ပါဘူး။
အများဆုံး သေဆုံးဖူးတာကတော့ ယောင်ယန်ဝိညာဉ်အရှင် လိုမျိုး တည်ရှိမှုတွေပဲ ရှိခဲ့တာပါ။
"အရှင်... ဒီကိစ္စကိုတော့ ကျုပ်လည်း အသေအချာ မပြောနိုင်ပါဘူး ဒါပေမဲ့ ကျုပ်ရဲ့ ခန့်မှန်းချက်ကတော့ အရှင်နဲ့ အတူတူပါပဲ ဟန်တန်းနိုင်ငံဘက်မှာ မသေမျိုး တစ်ပါးပါး ရှိနေလောက်ပါတယ်"
လင်ဟောင်က ပြောသည်။
ဖန့်ချန်က တခြားမေးခွန်းပေါင်း ဒါဇင်နဲ့ချီပြီး ဆက်မေးခဲ့ပါတယ်။
မေးခွန်းတွေက နယ်ပယ်တော်တော်စုံပါတယ်။
"မဟာချဲ့ထွင်းဂိုဏ်း က ရွှီချင်းဆုန်း က ဒီကိစ္စမှာ ဘယ်လိုအခန်းကဏ္ဍက ပါဝင်နေလဲ"
ဖန့်ချန်က ပြုံးကာ မေးလိုက်သည်။
လင်ဟောင် ခဏ ကြောင်သွားပြီး
"သူက မဟာချဲ့ထွင်းဂိုဏ်း ရဲ့ ပါရမီရှင် လေ သွေးဝိညာဉ်ဂိုဏ်း ထဲ ဝင်စရာ အကြောင်းရင်း မရှိပါဘူး ဒါပေမဲ့ ဒါကိုလည်း ကျုပ် အာမမခံနိုင်ပါဘူး သွေးဝိညာဉ်ဂိုဏ်း အချင်းချင်းကြားမှာလည်း တစ်ယောက်နဲ့တစ်ယောက် အကုန်မသိကြဘူးလေ"
"သိပြီ"
ဖန့်ချန်က ပြုံးပြီး ခေါင်းညိတ်ပြကာ လီပါ့တောင်းကို အမိန့်ပေးလိုက်သည်
"သူ့ကို ပြန်ခေါ်သွားလို့ ရပြီ"
"အရှင်... ကျုပ်ကို သာမန် လွင့်မျောနေတဲ့ ဝိညာဉ်တစ်ခုအနေနဲ့ ရှောက်ယဲ့မြို့ ထဲမှာ နေခွင့်ပေးလို့ ရမလား"
လင်ဟောင်က အမြန်မေးလိုက်သည်။
"မင်းရဲ့ အဆင့်အတန်းနဲ့ဆိုရင်တော့ ခက်လိမ့်မယ် ဒါပေမဲ့ ကိစ္စမရှိပါဘူး လီအရာရှိကို မင်းအတွက် တိတ်ဆိတ်တဲ့ အခန်းလေးတစ်ခန်း စီစဉ်ပေးဖို့ ပြောလိုက်ပါ့မယ် နောက်ပိုင်းမှာ မင်း တစ်ခုခု ရုတ်တရက် သတိရလာတာရှိရင် လီအရာရှိကို ပြောပြလိုက်ပါ သူ ငါ့ကို ပြန်ပြောပြလိမ့်မယ်"
ဖန့်ချန်က ခပ်အေးအေး ပြောလိုက်သည်။
လင်ဟောင် စိတ်ပျက်သွားပေမဲ့ တစ်ဖက်လူရဲ့ စကားက နူးညံ့လာတာကြောင့် သူ ဆက်ပြီး နှိပ်စက်မခံရတော့ဘူးဆိုတာ သိလိုက်ရလို့ တော်သေးတယ်လို့ တွေးလိုက်မိသည်။
"ကျန်တဲ့ ဝိညာဉ်သန္ဓေသား သုံးယောက်ကော ဘာတွေ ဝန်ခံကြသေးလဲ"
ဖန့်ချန်က ထပ်မေးသည်။
လီပါ့တောင်းက ခေါင်းခါပြကာ
"ဒီသုံးယောက်က သွေးဝိညာဉ်ဂိုဏ်း အကြောင်း ဘာမှ မသိကြဘူး ကျုပ် သူတို့ကို နောက်ထပ် တစ်လလောက် ထပ်ပြီး နှိပ်စက်ကြည့်ဦးမလို့ပါ"
"မလိုတော့ဘူး သူတို့ကို လွှတ်ပေးလိုက်တော့ ဘာပဲဖြစ်ဖြစ် ရှောက်ယဲ့မြို့က မင်းရဲ့ နယ်မြေပဲလေ မင်းရဲ့ မျက်စိအောက်မှာပဲဆိုတော့ သူတို့မှာ တစ်ခုခု ထူးဆန်းတာရှိရင် ပိုပြီး သိသာတာပေါ့"
ဖန့်ချန်က ပြောသည်။
"အရှင် ပြောတာ မှန်ကန်ပါတယ်"
လီပါ့တောင်းက ရိုသေစွာ ဂါရဝပြုလိုက်သည်။
......
......
လွန်ခဲ့တဲ့ နာရီဝက်နီးပါးလောက်ကစပြီး ခရမ်းရောင်စာပေသင်တန်းကျောင်း ရဲ့ တံခါးဝက အင်မတန် စည်ကားနေပါတယ်။
နေရာအနှံ့က ကျင့်ကြံသူတွေဟာ ကျိရွှီနိုင်ငံရဲ့ တာအိုဂိုဏ်းကြီး သုံးခုထဲက တစ်ခုဖြစ်တဲ့ ကျုံးထျန်းတာအိုဂိုဏ်း နဲ့ ခရမ်းရောင်စာပေသင်တန်းကျောင်း က တပည့်တွေကြားက ယှဉ်ပြိုင်ပွဲကို ကြည့်ဖို့ အမြန်လာနေကြတာပါ။
ခရမ်းရောင်စာပေသင်တန်းကျောင်း က တာအိုကို ကျင့်သလို၊ ကျုံးထျန်းတာအိုဂိုဏ်း ကလည်း တာအိုကိုပဲ ကျင့်တာပါ၊ ဒါပေမဲ့ ခရမ်းရောင်စာပေသင်တန်းကျောင်း ရဲ့ အခြေခံက နောက်ကလူတွေလောက် မနက်ရှိုင်းပါဘူး။
ပုံမှန်ဆိုရင် နေရာအနှံ့က ကျင့်ကြံသူတွေဟာ ခရမ်းရောင်စာပေသင်တန်းကျောင်း က တပည့်တွေနဲ့တောင် မထိတွေ့နိုင်ကြပါဘူး၊ အခုလို ပိုပြီး အစွမ်းထက်တဲ့ ပါရမီရှင်တွေနဲ့ ယှဉ်ပြိုင်တာကို မြင်တွေ့ရတာကတော့ သူတို့အတွက် ရေစက်တစ်ခု ပါပဲ။
အကယ်၍ တစ်ခုခုကိုသာ နားလည်သွားခဲ့ရင် သူတို့အတွက် အကျိုးကျေးဇူးက အတိုင်းအဆ မရှိပါဘူး။
ဘုန်း
ပြင်းထန်တဲ့ အသံကြီးနဲ့အတူ ခရမ်းရောင်စာပေသင်တန်းကျောင်းက တပည့်တစ်ယောက်ဟာ သွေးတွေအန်ပြီး ပေတစ်ရာကျော်လောက် လွင့်ထွက်သွားပါတယ်။
"အလျှော့ပေးလိုက်ပါပြီ"
သူ့ရဲ့ ပြိုင်ဘက်ကတော့ တည်ငြိမ်စွာနဲ့ပဲ လက်အုပ်ချီ နှုတ်ဆက်လိုက်ပြီး ပတ်ဝန်းကျင်ကို အကြည့်နဲ့ ဝေ့ကြည့်လိုက်တယ်
"ကျုပ် ယွင် နဲ့ ဆက်ပြီး ယှဉ်ပြိုင်ချင်သူများ ရှိသေးလား"
ကျုံးထျန်းတာအိုဂိုဏ်း က ကျင့်ကြံသူတွေနဲ့ ရွှေဝါနန်းတော် က ကျင့်ကြံသူတွေဟာ ဂုဏ်ယူဝင့်ကြွားစွာ ပြုံးလိုက်ကြပါတယ်။
ယွင်ထျန်းချန် စင်ပေါ်တက်လာကတည်းက တူညီတဲ့အဆင့်ရှိ ကျင့်ကြံသူ ခုနစ်ယောက်ကို ဆက်တိုက် အနိုင်ယူထားတာပါ။
ခရမ်းရောင်စာပေသင်တန်းကျောင်း ဘက်ကတော့ တစ်ခါမှ မနိုင်ဘဲ ဆက်တိုက် ရှုံးနေပါတယ်။
"ယွင်ဂျူနီယာလေးက မွေးကတည်းက ဓာတ်ငါးပါး နဲ့ နီးစပ်တယ်၊ တူညီတဲ့ အတတ်ပညာတွေကိုတောင် သူ့လက်ထဲမှာဆိုရင် အစွမ်းက ဆပေါင်းများစွာ ပိုပြင်းထန်သွားတာ ဒီလို ပါရမီမျိုးဆိုရင် သိပ်မကြာခင်မှာပဲ တာအိုဂိုဏ်းတွေထဲမှာ နေရာတစ်နေရာ ရလာတော့မှာပဲ၊ မဟာချဲ့ထွင်းဂိုဏ်း ကတောင် သူ့ကို သဘောကျသွားနိုင်တယ်"
"ဟုတ်ပါ့ တော်သေးတာက ကျုပ်တို့ ကျုံးထျန်းတာအိုဂိုဏ်း က မျက်စိလျင်လို့ ယွင်ဂျူနီယာလေးကို အရင်ဦးအောင် တပည့်အဖြစ် လက်ခံနိုင်ခဲ့တာ နောက်ပိုင်း သူ မဟာချဲ့ထွင်းဂိုဏ်း ကို ရောက်သွားခဲ့ရင်တောင် ကျုပ်တို့ ကျုံးထျန်းတာအိုဂိုဏ်း ရဲ့ ကျေးဇူးတော့ ပါနေမှာပဲ သူ ကျုပ်တို့ကို မေ့မှာ မဟုတ်ပါဘူး"
ကျုံးထျန်းတာအိုဂိုဏ်း က ကျင့်ကြံသူတွေ တိုးတိုးလေး ပြောနေကြပါတယ်။
ဘေးက ရွှေဝါနန်းတော် ကျင့်ကြံသူတွေကလည်း ဂုဏ်ယူနေကြပါတယ်။
ဘာပဲဖြစ်ဖြစ် ယွင်ထျန်းချန် က ရွှေဝါနန်းတော် ကနေ ထွက်သွားခဲ့တာလေ၊ အခု သူ ပိုပြီး အစွမ်းထက်လာလေ ရွှေဝါနန်းတော် အတွက် အကျိုးကျေးဇူးတွေ ပိုရလေပါပဲ။
"တကယ် မထင်ထားဘူး၊ ဆယ်စုနှစ်အနည်းငယ်အတွင်းမှာပဲ ဒီ ယွင်ထျန်းချန် ရဲ့ ကျင့်ကြံမှုက ဒီလောက်အထိ နက်နဲလာလိမ့်မယ်လို့ ကြည့်ရတာ အခြေခံတည်ဆောင်ခြင်း အထွတ်ထိပ် ရောက်ဖို့ သိပ်မလိုတော့ဘူး ထင်တယ်"
"အရင်ကတည်းက သူက ရွှေဝါနန်းတော် ရဲ့ ထိပ်သီးတပည့်ပဲလေ ခရမ်းရောင်စာပေသင်တန်းကျောင်း က သူ့သက်တူရွယ်တူတွေထဲမှာတောင် သူ့ကို ယှဉ်နိုင်သူ မရှိသလောက်ပဲ အခု ကျုံးထျန်းတာအိုဂိုဏ်း ကို ရောက်သွားပြီး အဆင့် ၃ အင်ပါယာနိုင်ငံမှာ နှစ်ပေါင်းများစွာ ကျင့်ကြံနေတာဆိုတော့ ဒီလို အောင်မြင်မှုရတာကလည်း သဘာဝကျပါတယ်"
"ဟုတ်တယ်၊ နောက်တစ်ခါ သူ့ကို တွေ့ရင် ကျုပ်တို့က စီနီယာ လို့တောင် ခေါ်ရတော့မယ် ထင်တယ် ရွှေအမြုတေအဆင့် ဆိုတာ ကျုပ်တို့အတွက်တော့ အလှမ်းဝေးနေပေမဲ့ သူ့အတွက်ကတော့ လက်တစ်ကမ်းမှာပဲ ရှိနေသလိုပဲ..."
ကျင့်ကြံသူအသီးသီးက တိုးတိုးတိတ်တိတ် ဆွေးနွေးနေကြပြီး ယွင်ထျန်းချန် ကို ကြည့်တဲ့ အကြည့်တွေထဲမှာ မနာလိုမှုတွေ၊ အားကျမှုတွေ ပြည့်နေပါတယ်။
သူတို့ကိုယ်တိုင် ယွင်ထျန်းချန် ဖြစ်ချင်နေကြတာပါ။
မုကျောက်ဟဲ ကတော့ ဒီစကားတွေကို ကြားရတဲ့အခါ မျက်လုံးထဲမှာ မနာလိုတဲ့ အရိပ်အယောင်တွေ ဖြတ်ပြေးသွားပါတယ်။
သူတို့က အတူတူ သွေးဝိညာဉ်ဂိုဏ်း က ကျင့်ကြံသူတွေပဲလေ ဘာလို့ ယွင်ထျန်းချန် တစ်ယောက်တည်းကပဲ ဒီလို အထူးအခွင့်အရေးတွေ ရနေရတာလဲဆိုတာ သူ နားမလည်နိုင်ပါဘူး။
ဒီနှစ်တွေမှာ ယွင်ထျန်းချန် ကို သွေးဝိညာဉ်ဆေးလုံး တွေ ဆက်တိုက် ကျွေးမထားခဲ့ဘူးဆိုရင် သူ့ရဲ့ ကျင့်ကြံမှုက ဒီလောက် မြန်မြန် တိုးတက်လာမှာ မဟုတ်ပါဘူး။
လေသင်္ဘောပေါ်မှာတော့ ဖန့်ချန်ဟာ ပတ်ဝန်းကျင်က အရာအားလုံးကို အကုန် မြင်နေရပါတယ်။
ကျုံးထျန်းတာအိုဂိုဏ်း ကို ဦးဆောင်လာတဲ့ စိတ်ဝိညာဉ်ထွက်ခွာခြင်း အဆင့် ကျင့်ကြံသူ၊ ကျိကျီတာအိုကျောင်းဆောင် ရဲ့ အရှင်ဝေဟင်ပြေး ၊ လူအုပ်ထဲက ဖန့်ကျွယ်၊ နွားချေးတုံးလေး၊ ထျန်းယင်းနတ်မိမယ် နဲ့ ဝိတ်ကျသွားတဲ့ တုန်းဖန်းဟောက်ကျဲ တို့ကိုပါ အကုန် မြင်နေရပါတယ်။
ဆယ်စုနှစ်အနည်းငယ်အတွင်းမှာ အရှင်ဝေဟင်ပြေးကလွဲလို့ ကျန်တဲ့သူတွေကတော့ အနည်းငယ် ပြောင်းလဲသွားကြပါပြီ။
နောက်ဆုံးမှာတော့ သူရဲ့ အကြည့်ဟာ ယွင်ထျန်းချန် ဆီမှာ ရပ်တန့်သွားပါတယ်။
ကြည့်ရတာ သူက သွေးဝိညာဉ်ဂိုဏ်း ထဲမှာ ရာထူးတက်သွားပုံရတယ်၊ အခု ကျင့်ကြံမှုက အခြေခံတည်ဆောင်ခြင်းအဆင့်နှောင်းပိုင်း ကို ရောက်နေပြီ။
သူ့ကို မြင်လိုက်ရတဲ့အခါ ဖန့်ချန်ဟာ သူ့ရဲ့တောက်ပသောနတ်ဘုရားမျက်လုံး တတိယအဆင့်ကို တက်လှမ်းဖို့အတွက် ပြင်ဆင်စရာရှိတာတွေကို စတင်လုပ်ဆောင်လို့ ရပြီဆိုတာ သတိရသွားပါတယ်။
"ဘယ်သူမှ မရှိတော့ဘူးလား"
ယွင်ထျန်းချန်က စိတ်ပျက်လက်ပျက်နဲ့ ခေါင်းခါလိုက်ပြီး၊ ဖန့်ကျွယ် ရဲ့ အပေါ်မှာ အကြည့်ကို ခဏကြာအောင် ရပ်ထားလိုက်ပါတယ်။
ကံမကောင်းတာက တစ်ဖက်လူက လူအ မဟုတ်တာကြောင့် ထောင်ချောက်ထဲ မဝင်ခဲ့ပါဘူး။
"ခရမ်းရောင်စာပေသင်တန်းကျောင်းက... ဒီလောက်ပါပဲလား"
သူက ခပ်ဖွဖွ ရယ်မောလိုက်ပြီး ကျုံးထျန်းတာအိုဂိုဏ်း ရဲ့ လူအုပ်ထဲကို ပြန်ဝင်သွားကာ တခြားကျင့်ကြံသူတစ်ယောက်ကို စင်ပေါ်တက်ခိုင်းလိုက်ပါတယ်။
ခရမ်းရောင်စာပေသင်တန်း ကျောင်း က တပည့်တွေကတော့ ဒီစကားကြောင့် ဒေါသထွက်လွန်းလို့ ယွင်ထျန်းချန် ကို သတ်ချင်တဲ့ အကြည့်တွေနဲ့ ကြည့်နေကြပါတော့တယ်...
အခန်း (၉၂၂) ဖန့်မိတ်ဆွေရဲ့ အခု ကျင့်ကြံမှုက ဘယ်အဆင့်လဲလို့ မေးပါရစေ
"ဒီ ယွင်ထျန်းချန် ကတော့ တကယ့်ကို မြေမြှုပ်ထားတဲ့ ဗုံးအိုကြီးပဲဗျာ အရင်တုန်းက ဖန့်ချန်အစ်ကို့လက်ထဲမှာ အရှက်တကွဲ ရှုံးနိမ့်ခဲ့ပြီးတော့ ဘာသံမှမထွက်ဘဲ ပျောက်ကွယ်သွားလိုက်တာ၊ နောက်ဆုံးတော့ ကျုံးထျန်းတာအိုဂိုဏ်း ကို သွားပြီး ကျင့်ကြံနေခဲ့တာကိုး၊ အခုတော့ ကျုပ်တို့ဆီ လာပြီး ဝင့်ကြွားနေပြန်ပြီ"
တုန်းဖန်းဟောက်ကျဲ က မကျေမနပ် ရေရွတ်နေပါတယ်။
ထျန်းယင်းနတ်မိမယ် ရဲ့ မျက်နှာကတော့ လေးနက်နေတယ်
"ကျုံးထျန်းတာအိုဂိုဏ်း က ကျမတို့ဆီမှာ နေနေတာ နေ့ဝက်နီးပါး ရှိနေပြီ၊ တပည့်တွေ တော်တော်များများ ဒဏ်ရာရကုန်ကြပြီ၊ တစ်ခါတလေ ဒဏ်ရာမပျောက်သေးခင်မှာပဲ စင်ပေါ်တက်ပြီး ဆက်တိုက်ရနေရတာ၊ တချို့တပည့်တွေဆိုရင်... သူတို့လက်ထဲမှာတောင် သေကုန်ကြပြီ၊ သူတို့ ဘာရည်ရွယ်ချက်ရှိလဲဆိုတာ မင်းသိလား"
"ခရမ်းရောင်စာပေသင်တန်းကျောင်း က သူတို့ကို မရည်ရွယ်ဘဲ သွားစော်ကားမိလို့လား ဒါ သူတို့ လာပြီး လက်စားချေတာလား"
တုန်းဖန်းဟောက်ကျဲ က အသံတိုးတိုးနဲ့ မေးလိုက်ပါတယ်။
"ဖြစ်နိုင်ခြေ မရှိပါဘူး၊ သူတို့က ကျိရွှီနိုင်ငံမှာ နေတာ၊ ယွင်ချန်း နဲ့ အဝေးကြီးပဲ ကျမတို့ ကျောင်းဆောင်က ကျင့်ကြံသူတွေလည်း ကျိရွှီနိုင်ငံဘက်ကို သွားခဲပါတယ် သူတို့ကို ဘယ်လိုလုပ် သွားစော်ကားမိမှာလဲ"
ထျန်းယင်းနတ်မိမယ် က ခေါင်းခါပြပါတယ်။
"ကျုပ်ကြားတာတော့ ယွီရွှီတောင် နဲ့ စိန့်နံ့သာကျောင်း ဘက်မှာလည်း အခြေအနေ မကောင်းဘူးတဲ့၊ ကျိရွှီနိုင်ငံက ဒီတစ်ခါ ကျုပ်တို့ကို ဦးတည်ပြီး လာတာပဲ ဒီနောက်ကွယ်မှာ တခြားရည်ရွယ်ချက် တစ်ခုခု ရှိနေနိုင်တယ်"
တုန်းဖန်းဟောက်ကျဲ က စကားကို တစ်ဝက်နဲ့ ရပ်လိုက်ပါတယ်။
သူ့ရင်ထဲက ခန့်မှန်းချက်ကိုတော့ ထုတ်မပြောလိုက်ပါဘူး၊ အရင်ရက်တွေက ရထားတဲ့ သတင်းတွေက အမှန်လား အမှားလား သူကိုယ်တိုင် မသေချာသေးလို့ပါ။
အခုလောလောဆယ်တော့ တစ်ဖက်လူ ဘယ်တော့ထွက်သွားမလဲဆိုတာကိုပဲ ကျုံးထျန်းတာအိုဂိုဏ်း နဲ့ ဟန်ဆောင်ပန်ဆောင် ဆက်ဆံရင်း စောင့်ကြည့်ရမှာပါပဲ။
စင်ပေါ်တက်လာတဲ့ ကျင့်ကြံသူကတော့ ချီသန့်စင်ခြင်း အဆင့် ၆ ပဲ ရှိပါသေးတယ် ဒါဟာ ကျုံးထျန်းတာအိုဂိုဏ်း က ဒီတစ်ခါ ခေါ်လာတဲ့ တပည့်တွေထဲမှာ ကျင့်ကြံမှု အနိမ့်ဆုံး တစ်ယောက်ပါ။
သူက စင်ပေါ်ရောက်တာနဲ့ လူအုပ်ကို ဝေ့ကြည့်လိုက်ပြီး ဖန့်ကျွယ် ရဲ့ ဘေးက နွားချေးတုံးလေး ကို လက်ညှိုးထိုးပြလိုက်တယ်
"မင်းရဲ့ ကျင့်ကြံမှုက ကျုပ်နဲ့ မတိမ်းမယိမ်းပဲ တက်လာပြီး တစ်ချက်လောက် ယှဉ်ကြည့်ကြမလား"
နွားချေးတုံးလေး ရဲ့ မျက်နှာ အနည်းငယ် ပျက်သွားပါတယ်။
သူ ဒီနှစ်တွေမှာ ကျင့်ကြံလာခဲ့ပေမဲ့ တစ်ယောက်နဲ့တစ်ယောက် တိုက်ခိုက်ယှဉ်ပြိုင်ရတာ ကတော့ သူ့အတွက် အားနည်းချက်တစ်ခုပါ။
ဖန့်ကျွယ် ရဲ့ မျက်နှာက ညိုမှောင်သွားပြီး နွားချေးတုံးလေး ရဲ့ ပုခုံးကို လှမ်းဖိလိုက်ပါတယ်။
သူ တစ်ခုခု ထူးဆန်းနေတယ်လို့ ခံစားမိတယ်၊ တစ်ဖက်လူက တခြားသူကို မရွေးဘဲ တောင်ပေါ် ပြန်ရောက်တာ မကြာသေးတဲ့ နွားချေးတုံးလေး ကိုမှ ဘာလို့ ရွေးရတာလဲ
သူ ယွင်ထျန်းချန် ကို တစ်ချက် လှမ်းကြည့်လိုက်ရာ ယွင်ထျန်းချန် က သူ့ကို ကြည့်ပြီး ပြုံးနေတာကို မြင်လိုက်ရတော့မှ သူ့ရင်ထဲမှာ အဖြေရသွားပါတော့တယ်။
"ကျုပ်ရဲ့ ဒီညီလေးက တိုက်ခိုက်ရေးမှာ အားနည်းတယ်၊ မိတ်ဆွေ တခြားတစ်ယောက်ကိုပဲ ရွေးလိုက်ပါ"
ဖန့်ကျွယ် က အသံလေးနက်စွာနဲ့ ပြောလိုက်ပါတယ်။
အဝေးက ကျုံးထျန်းတာအိုဂိုဏ်း ရဲ့ အဆင့်မြင့်လူကြီးတွေက စကားပြောတာကို ရုတ်တရက် ရပ်လိုက်ကြပါတယ်။
အဲဒီ စိတ်ဝိညာဉ်ထွက်ခွာခြင်း အဆင့် ကျင့်ကြံသူက အရှင်ဝေဟင်ပြေး ကို တစ်ချက်ကြည့်လိုက်ပြီး ဖန့်ကျွယ် ဆီမှာ အကြည့်ရပ်ကာ ပြုံးစိစိနဲ့ ပြောလိုက်တယ်
"အရှင်ဝေဟင်ပြေး... မင်းတို့ ကျောင်းဆောင်က တပည့်တွေက သံယောဇဉ် တော်တော်ကြီးကြတာပဲဒါပေမဲ့ ကျင့်ကြံသူဖြစ်နေမှတော့ အခက်အခဲတွေကို ရင်ဆိုင်ရဲရမယ်လေ တကယ်လို့ တိုက်ပွဲကို ရှောင်နေမယ်ဆိုရင် ဒါက တာအိုစိတ်ဓာတ် ကို ပျက်စီးစေရုံတင်မကဘူး၊ နောင်မှာ ဘယ်လိုမျိုး တိုးတက်မှု ရှိနိုင်တော့မှာလဲ"
အရှင်ဝေဟင်ပြေး က စဉ်းစားဟန်နဲ့ ဖန့်ကျွယ် တို့ဘက်ကို လှမ်းကြည့်လိုက်ပါတယ်။
ဖန့်ကျွယ် ကလည်း ဒီ စိတ်ဝိညာဉ်ထွက်ခွာခြင်းအဆင့် ကျင့်ကြံသူရဲ့ စကားကို ကြားလိုက်ရတာမို့ ရင်ထဲမှာ ဒိန်းခနဲ ဖြစ်သွားပါတယ်။
ယွင်ထျန်းချန် ရဲ့ ခုနက အကြည့်က သူ့ကို သံသယဝင်စေပါတယ်။
အကယ်၍ နွားချေးတုံးလေး သာ စင်ပေါ်တက်သွားရင် တစ်ဖက်လူက သေကြောင်းကြံစည်မှာကို သူ စိုးရိမ်နေတာပါ။
တစ်ဖက်လူက လက်စားချေနေတာပဲ၊ နွားချေးတုံးလေး ကို ဖန့်ချန် ကိုယ်တိုင် ခရမ်းရောင်စာပေသင်တန်းကျောင်း ဆီ ပို့ပေးခဲ့တာကို သူတို့ စုံစမ်းသိရှိထားပုံရပြီး အရင်တုန်းက အငြိုးကို အခုလို ပြန်ဆပ်ဖို့ ကြံစည်နေတာပဲ ဖြစ်ရမယ်
"ယွင်ထျန်းချန်... ငါ မင်းနဲ့ တိုက်မယ်"
ဖန့်ကျွယ် က လူအုပ်ထဲက ထွက်လာပြီး ယွင်ထျန်းချန် ကို အေးစက်စွာ ကြည့်လိုက်ပါတယ်။
ခရမ်းရောင်စာပေသင်တန်းကျောင်း က ကျင့်ကြံသူတွေ အံ့ဩသွားကြတယ်၊ ဖန့်ကျွယ် က ယွင်ထျန်းချန် ကို စိန်ခေါ်တယ် ဟုတ်လား ဒါ သေတွင်းထဲ တိုးဝင်တာ မဟုတ်ဘူးလား။
အရင်တုန်းကတောင် ဖန့်ကျွယ် က ယွင်ထျန်းချန် ကို မယှဉ်နိုင်ခဲ့တာ၊ အခု နှစ်တွေ အများကြီး ကြာသွားပြီးတဲ့နောက် ယွင်ထျန်းချန် က အခြေခံတည်ဆောင်ခြင်း အဆင့်နှောင်းပိုင်း တောင် ရောက်နေပြီ။
ဖန့်ကျွယ် ကတော့ အခြေခံတည်ဆောင်ခြင်း အလယ်လတ် ပဲ ရှိပါသေးတယ်၊ ဘယ်လိုလုပ်ပြီး ယှဉ်နိုင်မှာလဲ
တုန်းဖန်းဟောက်ကျဲ က နဖူးကို လက်နဲ့ ရိုက်လိုက်တယ်
"ဖန့်ကျွယ် ဒီကောင်က စိတ်အရမ်းမြန်လွန်းတယ်တကယ်လို့ ဒီနေ့ သူတို့နှစ်ယောက် တိုက်ကြရင် ယွင်ထျန်းချန် က ညှာတာမှာ မဟုတ်ဘူး"
"ကောင်းပြီလေ၊ မင်းက အခြေခံတည်ဆောင်ခြင်း အလယ်လတ် ဆိုတော့ ကျုပ်က ကျုပ်ရဲ့ ကျင့်ကြံမှု ၉၀ ရာခိုင်နှုန်းကို ပိတ်ထားပြီး မင်းနဲ့ ယှဉ်ပေးမယ်"
ယွင်ထျန်းချန် က ချက်ချင်း လက်ခံလိုက်ပြီး မျက်နှာမှာ အပြုံးတွေ ပြည့်နှက်နေတယ်
"နှမြောစရာကောင်းတာက ဖန့်ချန် မရှိတာပဲ မဟုတ်ရင် ဒီနေ့မှာ ကျုပ် သူ့ကိုလည်း တစ်ခါလောက် ထပ်ပြီး စိန်ခေါ်ချင်သေးတယ်"
"ဖန့်ချန်အစ်ကိုသာ ဒီမှာရှိရင် မင်း ဒီလို ပြောရဲမှာ မဟုတ်ဘူး"
တုန်းဖန်းဟောက်ကျဲ က တိုးတိုးလေး ရေရွတ်လိုက်ပါတယ်။
"ယွင်မိတ်ဆွေ... မင်းရဲ့ ကျင့်ကြံမှုနဲ့ အခြေခံတည်ဆောင်ခြင်း အလယ်လတ်ကို တိုက်နေတာ ဘာထူးမှာလဲ၊ ဒီလိုလုပ်ပါ... မင်း ကျုပ်နဲ့ တိုက် ဘာပဲဖြစ်ဖြစ် အရင်တုန်းက မင်း ကျုပ်လက်ထဲမှာ ရှုံးခဲ့ဖူးတာဆိုတော့ အခုလည်း ထပ်ပြီး စမ်းကြည့်ချင်မှာပဲ"
လူတိုင်း အံ့ဩသွားကြပြီး လူအုပ်အပြင်ဘက်ကို လှမ်းကြည့်လိုက်ကြပါတယ်။
အပြင်မှာ ဘယ်တုန်းက ရောက်နေမှန်းမသိတဲ့ လူတစ်စုကို တွေ့လိုက်ရတယ်။
ဒီလူတွေထဲမှာ လူသားကျင့်ကြံသူတွေရော၊ မိစ္ဆာကျင့်ကြံသူတွေရော ပါဝင်နေပါတယ်။
ရှေ့ဆုံးက ဦးဆောင်လာသူကတော့ ၁၇ နှစ်၊ ၁၈ နှစ်အရွယ်လောက်ပဲ ရှိဦးမယ့် လှပချောမောတဲ့ လူငယ်လေး တစ်ယောက်ပါ။
သူ့ဆီကနေ လောကီနဲ့ ကင်းစင်နေတဲ့ အရှိန်အဝါတွေ ထွက်ပေါ်နေပါတယ်။
"ဖန့်ချန်"
ဖန့်ကျွယ် အံ့ဩသွားပါတယ်။
အရှင်ဝေဟင်ပြေး ရဲ့ မျက်နှာ အမူအရာ ပြောင်းလဲသွားပါတယ်။
တုန်းဖန်းဟောက်ကျဲ နဲ့ ထျန်းယင်းနတ်မိမယ် တို့ တစ်ယောက်ကိုတစ်ယောက် ကြည့်လိုက်ကြပြီး မျက်နှာတွေ လေးနက်သွားပါတယ်။
ဖန့်ချန်ကို ပြန်တွေ့ရတာ ဝမ်းသာစရာ ဖြစ်ပေမဲ့... ဒီနေ့ အခြေအနေက မကောင်းဘူးလေ၊ သူ ရောက်လာတာက အချိန်မကိုက်လှဘူး။
နွားချေးတုံးလေး ကတော့ သူ့မျက်လုံးသူ ပြန်ပွတ်ပြီး ဖန့်ချန်ကို သေချာ ထပ်ကြည့်လိုက်တယ်၊ သူ့မျက်နှာမှာ စိတ်လှုပ်ရှားမှုတွေ ပြည့်နှက်လာပါတယ်။
အရင်တုန်းက သူ ခရမ်းရောင်စာပေသင်တန်းကျောင်း ကို ပို့ခံရတုန်းက အသက်အရမ်း ငယ်သေးတာပါ၊ အခု ဆယ်စုနှစ်တွေ အများကြီး ကြာသွားပြီဆိုတော့ သူတောင် ဖန့်ချန်ကို မမှတ်မိနိုင်တော့မလို ဖြစ်သွားခဲ့တာပါ။
"ဒီကောင်လေးက ယွင်ဂျူနီယာ အမြဲတမ်း ပြောနေတတ်တဲ့ ဖန့်ချန် ဆိုတဲ့သူလား"
"ဓားကျင့်ကြံသူ တစ်ယောက်လို့ ကြားဖူးတယ် ဒါပေမဲ့ ကြည့်ရတာတော့... မတူသလိုပဲ"
"ဟုတ်တယ်၊ ငါမြင်ဖူးတဲ့ ဓားကျင့်ကြံသူတွေက မျက်မှောင်ကြီးတွေနဲ့ တစ်ကိုယ်လုံးမှာ ပြင်းထန်တဲ့ ဓားဆန္ဒ တွေ ထွက်နေတာ ဒီလူကတော့ နည်းနည်း ထူးခြားနေတယ်"
"ဖန့်မိတ်ဆွေ ဖြစ်နေတာကိုး၊ နှစ်တွေ အများကြီး ကြာသွားပြီပဲ၊ အဆင်ပြေရဲ့လားဗျာ"
ယွင်ထျန်းချန် က ခဏလောက် မှင်တက်သွားပြီးမှ အေးအေးဆေးဆေး ပြုံးလိုက်ပါတယ်။
ထိတ်လန့်သွားတာမျိုး မရှိတဲ့အပြင် စိတ်ထဲမှာ ပိုပြီးတောင် ကြည်နူးသွားပါသေးတယ်။
ဒီတစ်ခါတော့... နှစ်ပေါင်းများစွာ သူ့ရင်ထဲမှာ ပိတ်မိနေတဲ့ အဖုအထစ်ကို သူ နောက်ဆုံးတော့ ရှင်းထုတ်နိုင်တော့မှာပါ။
"သူပဲ..."
လူအုပ်ထဲမှာတော့ လွန်ခဲ့တဲ့ နှစ်ပေါင်းများစွာကတည်းက ပုံရိပ်ယောင်ကျောင်းဆောင် ထဲကို ဝင်ခဲ့တဲ့ ဆွေ့နျန်ဟွာ တစ်ယောက် မျက်နှာ အမူအရာ ရှုပ်ထွေးနေပါတယ်။
အရင်တုန်းက မဟာချန်းနိုင်ငံ က ဖန့်အိမ်တော်မှာ သူမ ဖန့်ချန်ရဲ့လက်ထဲမှာ ရှုံးခဲ့တာက သူမအတွက် နှစ်ပေါင်းများစွာ အဖုအထစ် ဖြစ်ခဲ့တာပါ။
ဒီနေ့မှာ လူဟောင်းကို ပြန်တွေ့ရတဲ့အခါ သူမရဲ့ရင်ထဲမှာ အရင်တုန်းကလို မကျေနပ်ချက်တွေ မရှိတော့တာကို တွေ့လိုက်ရပါတယ်။
"အဆင်ပြေပါတယ်၊ အဆင်ပြေပါတယ်"
ဖန့်ချန် က ပြုံးပြီး ခေါင်းညိတ်ပြလိုက်ပါတယ်။
ကျုံးထျန်းတာအိုဂိုဏ်း က စိတ်ဝိညာဉ်ထွက်ခွာခြင်းအဆင့် ကျင့်ကြံသူကတော့ မျက်မှောင်ကြုတ်လိုက်ပါတယ်။
သူတင်မကဘဲ သူ့တပည့်တွေကလည်း လူအုပ်ကြီးရဲ့ အနောက်မှာ လင်ရွှီတာအိုဂိုဏ်း က ကျင့်ကြံသူအချို့ ပါလာတာကို မြင်လိုက်ရလို့ပါ။
လင်ရွှီတာအိုဂိုဏ်း က ယွီရွှီတောင်မှာ ရှိနေရမှာ မဟုတ်ဘူးလား ဘာလို့ ဒီကို ရောက်နေရတာလဲ
"ချန်ဝမ်ကျင့်... မင်း ယွီရွှီတောင်မှာ လင်ဟောင် နောက်ကို မလိုက်ဘဲ ဒီကို ဘာလာလုပ်တာလဲ "
ကျုံးထျန်းတာအိုဂိုဏ်း က စိတ်ဝိညာဉ်ထွက်ခွာခြင်းအဆင့် ကျင့်ကြံသူက အေးအေးဆေးဆေး မေးလိုက်ပါတယ်။
ချန်ဝမ်ကျင့် ရဲ့ ကိုယ်ခန္ဓာ တုန်ယင်သွားပြီး တစ်ဖက်လူကို ကြည့်တဲ့ အကြည့်တွေက သေလူတစ်ယောက်ကို ကြည့်နေသလိုပါပဲ၊ သူက အသံတိုးတိုးနဲ့ ပြောလိုက်တယ်
"ဝမ်အကြီးအကဲ... လင်အကြီးအကဲ သေသွားပါပြီ"
လူတိုင်း တစ်ယောက်ကိုတစ်ယောက် ကြည့်လိုက်ကြပါတယ်။
ဒီလူပြောတဲ့ လင်အကြီးအကဲ ဆိုတာ လင်ရွှီတာအိုဂိုဏ်း က လင်ဟောင် ကို ပြောတာလား
ဒါက စိတ်ဝိညာဉ်ထွက်ခွာခြင်းအဆင့် ကျင့်ကြံသူ တစ်ယောက်လေ၊ ဘယ်လိုဖြစ်လို့ ရုတ်တရက် သေသွားရတာလဲ သက်တမ်းကုန်လို့ သေတဲ့ လက္ခဏာလည်း မရှိပါဘူး။
ကျုံးထျန်းတာအိုဂိုဏ်း က စိတ်ဝိညာဉ်ထွက်ခွာခြင်းအဆင့် ကျင့်ကြံသူရဲ့ မျက်နှာမှာ လေးနက်မှုတွေ ပေါ်လာတယ်
"မင်း ဘာတွေ ပြောနေတာလဲဆိုတာ မင်း သိလား"
ချန်ဝမ်ကျင့် က ခါးသက်သက် ပြုံးလိုက်တယ်
"လင်အကြီးအကဲ က တကယ်ပဲ သေသွားပါပြီ"
"သူ ဘယ်လို သေတာလဲ"
ကျုံးထျန်းတာအိုဂိုဏ်း က ကျင့်ကြံသူက အသံကျယ်ကြီးနဲ့ မေးလိုက်ပါတယ်။
ဝန်းကျင်တစ်ခုလုံးရဲ့ အခြေအနေက ရုတ်တရက် တင်းမာသွားပါတော့တယ်။
လင်ရွှီတာအိုဂိုဏ်း ရဲ့ စိတ်ဝိညာဉ်ထွက်ခွာခြင်းအဆင့် ကျင့်ကြံသူက ယွင်ချန်း မှာ သေသွားတယ် ဟုတ်လား
ဒါ ဘယ်လိုဖြစ်တာလဲ
"လင်အကြီးအကဲ ကို ဒီစီနီယာ က သတ်လိုက်တာပါ"
ချန်ဝမ်ကျင့် က ဖန့်ချန်ကို ကြည့်လိုက်ပါတယ်။
ဖန့်ချန်က ခေါင်းညိတ်ပြီး အားပေးတာကို မြင်မှ သူက အံကြိတ်ပြီး ပြောလိုက်တာပါ။
လူတိုင်း မှင်တက်သွားကြပါတယ်။
ဒီရှေ့က လူငယ်လေးက လင်ရွှီတာအိုဂိုဏ်း ရဲ့ စိတ်ဝိညာဉ်ထွက်ခွာခြင်းအဆင့် ကျင့်ကြံသူကို သတ်လိုက်တယ် ဟုတ်လား
ကျုံးထျန်းတာအိုဂိုဏ်း က လူကတော့ သံသယတွေနဲ့ ပြည့်နေပါတယ်။
ချန်ဝမ်ကျင့် က လင်ရွှီတာအိုဂိုဏ်း ရဲ့ ဝိညာဉ်သန္ဓေသား တစ်ယောက်လေ သူ့မှာ ဒီလိုကိစ္စမျိုးနဲ့ လာပြီး နောက်ပြောင်ရဲတဲ့ သတ္တိမျိုး မရှိပါဘူး။
ဒါဆိုရင်... ဒီကိစ္စက တကယ်ပေါ့
ဖန့်ချန် ကတော့ အဲဒီလူကို လောလောဆယ် ဂရုမစိုက်ဘဲ မှင်တက်နေတဲ့ ယွင်ထျန်းချန် ကို ကြည့်ပြီး ပြုံးလိုက်တယ်
"ယွင်မိတ်ဆွေ... ငါ ကျင့်ကြံမှုရဲ့ ၉၉.၉ ရာခိုင်နှုန်းကို ပိတ်ထားပြီး မင်းနဲ့ တစ်ပွဲလောက် တိုက်မယ်လေ"
၉၉.၉ ရာခိုင်နှုန်း...
ယွင်ထျန်းချန် ရဲ့ အသံက အနည်းငယ် တုန်ယင်နေတယ်
"ဖန့်မိတ်ဆွေရဲ့ အခု ကျင့်ကြံမှုက... ဘယ်အဆင့်လဲလို့ မေးပါရစေ..."
"ကံကောင်းလို့ပါပဲ၊ စိတ်ဝိညာဉ်ထွက်ခွာခြင်း အဆင့်ကို တက်လှမ်းနိုင်တာ မကြာသေးပါဘူး"
"......"
ယွင်ထျန်းချန် ရဲ့ ကိုယ်ခန္ဓာ ယိုင်နဲ့သွားပြီး တာအိုစိတ်ဓာတ် တစ်ခုလုံး အဲဒီနေရာမှာတင် ပြိုလဲပျက်စီးလုနီးပါး ဖြစ်သွားပါတယ်။
လူတိုင်း တစ်ယောက်ကိုတစ်ယောက် ကြည့်လိုက်ကြတယ်၊ ဒီရှေ့က လူက... တကယ်ပဲ စိတ်ဝိညာဉ်ထွက်ခွာခြင်းအဆင့် ကျင့်ကြံသူ တစ်ယောက်လား