အခန်း (၉၈၁-၉၈၂)
Vol. 99 Ch. 981-982
အခန်း (၉၈၁) ငါ့ဆရာ ဟွမ်ချန်မသေမျိုးဘုရင်
"မင်းက ဆင်စိမ်းဂိုဏ်း ကို သူငယ်ချင်းဆီ အလည်သွားမလို့လား ဒါဆိုရင်လည်း မြန်မြန်သွား မြန်မြန်ပြန်လာခဲ့၊ မင်းပြန်လာပြီးရင် ငါတို့ ခွန်လွန်ဓားဂိုဏ်းကို ထွက်ခွာကြဖို့ အချိန်တော်ပြီ"
ဝမ်ကျိလုံက စဉ်းစားပြီး ပြောလိုက်ပါတယ်။
ပိုင်ချင်းမင်က အနည်းငယ် ထူးဆန်းနေတဲ့ အမူအရာနဲ့
"မင်းက ဆင်စိမ်းဂိုဏ်းက ကျင့်ကြံသူနဲ့လည်း အဆက်အသွယ် ရှိတာလား ဘယ်သူလဲ"
"ရွှီဖုန်း ပါ"
ဖန့်ချန်က ပြုံးပြီး ပြောလိုက်ပါတယ်။
"အဲဒီလူက ကျီးလျန်နဲ့ အရမ်းနီးစပ်တာ မဟုတ်ဘူးလား ငါမြင်ရသလောက်တော့ မင်းတို့နှစ်ယောက်က သိပ်တည့်ကြတာ မဟုတ်ဘူးထင်တယ်"
ပိုင်ချင်းမင်က ပိုပြီး ထူးဆန်းသွားပါတယ်။
"ပြီးခဲ့တဲ့ရက်ပိုင်း လီရှောင်မှာတုန်းက သူနဲ့ စကားစမြည် ပြောဖြစ်ကြတာ တော်တော်လေး အဆင်ပြေသွားလို့ပါ အခု ချောင်ဖုန်းဒေသကို သွားရမှာဆိုတော့ လမ်းခရီးက အမြဲတမ်း ချောမွေ့နေမှာ မဟုတ်ဘူးလေ၊ ဒါကြောင့် သူ့ဆီ သွားတွေ့လိုက်ဦးမယ်"
ဖန့်ချန်က ရယ်မောရင်း ပြောပါတယ်။
သူ ထွက်သွားပြီးတဲ့နောက်မှာတော့ ပိုင်ချင်းမင်က မနေနိုင်ဘဲ တိုးတိုးလေး ရေရွတ်နေမိတယ်
"ရွှီဖုန်းနဲ့ စကားပြောလို့ ကောင်းတယ် ဟုတ်လား ဖန့်ညီလေးရဲ့ သူငယ်ချင်း ရွေးချယ်တဲ့ စံနှုန်းကတော့ တကယ်ကို နားလည်ရခက်တာပဲ"
"ဒီတစ်ခေါက် ချောင်ဖုန်းကို သွားရင် ဖန့်ချန်ကို သေချာစောင့်ကြည့်ဦး သူ့ကို ချောင်ဖုန်းမှာ ဘာမှ အဖြစ်မခံနဲ့"
ဝမ်ကျိလုံက မှာကြားပါတယ်။
ပိုင်ချင်းမင်က အသာအယာ ခေါင်းညိတ်ပြတယ်
"တပည့် နားလည်ပါတယ် ဒီခရီးစဉ်မှာ ကျွန်တော်နဲ့ ဖန့်ညီလေးတို့ အစစအရာရာ သတိထားသွားမှာပါ ပြဿနာတွေ အပိုမရှာစေရပါဘူး"
"ငါက မင်းကို စိတ်မပူပါဘူး သူ့ကိုပဲ နည်းနည်း စိုးရိမ်နေတာ သူ့ရဲ့ စရိုက်အရဆိုရင် ဘယ်သူမှ လာမရှုပ်ရင် သူက ပြဿနာရှာမှာ မဟုတ်ပါဘူး ဒါပေမဲ့ ချောင်ဖုန်းဒေသက ဓားကျင့်ကြံသူတွေအပေါ် ဆက်ဆံပုံက အရမ်းဆိုးဝါးတာလေ၊ တစ်ယောက်ယောက်က တမင်လာနှောင့်ယှက်မှာကိုပဲ ကြောက်တာ"
ဝမ်ကျိလုံက သက်ပြင်းအသာချလိုက်တယ်
"ငါ့မှာ တပည့် ၃ ယောက်ပဲ ရှိတာ၊ ပထမ ၂ ယောက်က ပါရမီ ထူးချွန်ကြပေမဲ့ လမ်းခုလတ်မှာတင် ဆုံးရှုံးခဲ့ရတယ် အခုလည်း တတိယမြောက် တပည့်ကို ထပ်လက်ခံဖို့ အားအင် မရှိတော့ဘူး ဖန့်ချန်က ငါ့ရဲ့ နောက်ဆုံးပိတ် တပည့် ပဲ နောင်တစ်ချိန်မှာ ဟင်လင်းပြင်ထာဝရဓားဂိုဏ်းရဲ့ ဂုဏ်ဆောင်ဖြစ်လာဖို့က... သူ့အပေါ်မှာပဲ မူတည်နေတော့တယ်"
"ဒါကတော့ ဂိုဏ်းချုပ် ရှိနေသေးတာပဲလေ"
ပိုင်ချင်းမင်က ပြုံးပြီး ပြောလိုက်ပါတယ်။
ဝမ်ကျိလုံက ဓားနတ်ဘုရားအို ကွယ်လွန်သွားတာကြောင့် နည်းနည်း စိတ်ဓာတ်ကျနေတာလို့ သူ ထင်နေတာပါ။
"အဲဒီ ကောင်စုတ်လေးလား တစ်နေကုန် လူတွေကို ကျောပေးပြီး ရပ်နေတတ်တဲ့ကောင် လူသားအားလုံးကို ကျောခိုင်းပြီး ထာဝရ ကောင်းကင်ဧကရာဇ် ဖြစ်မယ်ဆိုတဲ့ကောင်က ဓားဂိုဏ်းရဲ့ ဂုဏ်ကို ဆောင်နိုင်မယ်လို့ မင်း ထင်နေတာလား "
ဝမ်ကျိလုံက လက်ခါပြလိုက်တယ်
"အဓိပ္ပာယ် မရှိတာတွေ"
"အဖေ... ကျွန်တော့်ကို အဲဒီလို ပြောလိုက်တာကတော့ ကျွန်တော့်စိတ်ထဲမှာ သိပ်မကျေနပ်ဘူးနော်"
ခန်းမအပြင်ဘက်မှာ လူရိပ်တစ်ခုရဲ့ ကျောပြင် ပေါ်လာပါတယ်။
ပိုင်ချင်းမင် ဒါကို မြင်တဲ့အခါ ချက်ချင်းပဲ အလိုက်တသိနဲ့ နှုတ်ဆက်ပြီး ထွက်ခွာသွားပါတော့တယ်။
သူ သိပ်မဝေးတဲ့ နေရာကို ရောက်တဲ့အခါ အနောက်ဘက်ကနေ ဓားချီတွေ လွင့်ပျံလာတာကို ခံစားလိုက်ရပြီး၊ ဝမ်ချုံစုန်းရဲ့ နာကျင်စွာ အော်ဟစ်သံကိုလည်း ကြားလိုက်ရသလိုလို ရှိတာကြောင့် မနေနိုင်ဘဲ ခေါင်းခါရင်း ရယ်မောမိပါတယ်။
"ဖန့်ချန်က ငါ့ဆီကို အလည်လာမလို့ ဟုတ်လား "
ရွှီဖုန်းက သတင်းကြားတဲ့အခါ ကြောင်အမ်းအမ်း ဖြစ်သွားပါတယ်။
သူနဲ့ ဖန့်ချန်ကြားမှာ ဆက်ဆံရေးက အဲဒီလောက်ကြီး မနက်ရှိုင်းပါဘူး၊ လီရှောင်ကိစ္စမှာမှ အရင်က အဆင်မပြေတာတွေကို ဖြေရှင်းနိုင်ခဲ့ကြတာပါ။
ဒါပေမဲ့ မိုင်ပေါင်း ထောင်ချီဝေးတဲ့ နေရာကနေ သူ့ဆီကို တကူးတက အလည်လာရလောက်တဲ့အထိတော့ မဟုတ်ဘူး မဟုတ်လား
"အစ်ကို... အခု အစ်ကိုပြောတာ ဖန့်ချန်လား ဟင်လင်းပြင်ထာဝရဓားဂိုဏ်းရဲ့ ဖန့်ဓားဦးဆောင်သူလား "
ရွှီဖုန်းရဲ့ ဘေးမှာ အမျိုးသမီး ကျင့်ကြံသူ တစ်ယောက် ရပ်နေပါတယ်။
သူမရဲ့ မျက်လုံးတွေက တောက်ပနေပြီး ရွှီဖုန်းကို အနည်းငယ် ရင်ခုန်စွာနဲ့ လှမ်းကြည့်နေပါတယ်။
"ဟုတ်တယ်လေ"
ရွှီဖုန်းက ကြောင်တောင်တောင်နဲ့ ခေါင်းညိတ်ပြပါတယ်။
ရွှီယင်း က အံ့ဩဝမ်းသာသွားတယ်
"အစ်ကိုက ဖန့်ဓားဦးဆောင်သူနဲ့တောင် အဆက်အသွယ် ရှိတာလား ကျွန်မတို့ ကျင်ဖုန်းတောင်ထွတ် က ညီအစ်မတွေ အခုတလော ဖန့်ဓားဦးဆောင်သူအကြောင်းပဲ အမြဲပြောနေကြတာ"
"သူက နိမ့်ကျတဲ့ နေရာကနေ ဆင်းသက်လာပေမဲ့ ထူးခြားတဲ့ ပါရမီ ရှိတယ်ဆိုတာ ကြားဖူးတယ် အချိန်တိုအတွင်းမှာတင် သူ့ရဲ့ မျိုးဆက်တူတွေကြားမှာ ပြိုင်ဘက်ကင်း ဖြစ်ခဲ့ရုံတင်မကဘူး သူ့ထက် မျိုးဆက်တစ်ဆက်ကြီးတဲ့ ကျင့်ကြံသူတွေတောင် သူ့ကို မယှဉ်နိုင်ကြဘူးတဲ့"
"မျိုးဆက်တစ်ဆက်တင် ဘယ်ကမလဲ အသက်အတော်များများ ကြီးတဲ့ ကျင့်ကြံသူတွေတောင် သူ့ကို မယှဉ်နိုင်ကြတာပါ"
ရွှီဖုန်းက ထူးဆန်းတဲ့ အမူအရာနဲ့ ပြောလိုက်ပါတယ်။
လီရှောင်မှာ ဖြစ်ပျက်ခဲ့တဲ့ ကိစ္စတွေကို သူတို့အားလုံးက အပြင်ကို လျှောက်မပြောဖို့ ဆုံးဖြတ်ထားကြတာပါ။
ဒါကြောင့် သူ့ရဲ့ ဖခင်ဖြစ်တဲ့ ကျင်ဖုန်းမသေမျိုးဘုရင် တောင်မှ အခြေအနေအသေးစိတ်ကို မသိပါဘူး။
အခု သူ့အမြင်အရဆိုရင် ဖန့်ချန်သာ အလိုရှိမယ်ဆိုရင် သူ့အဖေတောင်မှ ခေါင်းငုံ့ အရှုံးပေးရမှာပါ။
"ဂျူနီယာညီလေး... ခုနက မင်းတို့ ဖန့်ချန်အကြောင်း ပြောနေတာ ငါ ကြားလိုက်သလိုပဲ "
လူရိပ်တစ်ခု အသာအယာ လမ်းလျှောက်လာပါတယ်။
"စီနီယာအစ်ကိုကြီး... ဖန့်ဓားဦးဆောင်သူက ကျုပ်တို့ ဆင်စိမ်းဂိုဏ်း ကို လာပြီး ကျွန်မအစ်ကိုနဲ့ စကားစမြည် ပြောဖို့ လာနေတာပါ"
"ဒီလို ကိစ္စမျိုးတောင် ရှိတာလား ဒါဆိုရင်တော့ သေချာ ပြင်ဆင်ထားမှ ဖြစ်မယ် ဘာပဲဖြစ်ဖြစ် သူက ဓားဂိုဏ်းရဲ့ ဓားဦးဆောင်သူပဲလေ ကျုပ်တို့ကတော့ လူတကာ ရှေ့မှာ အရှက်မကွဲစေရဘူး"
မကြာခင်မှာပဲ ရွှီယင်းရဲ့ ဝါဒဖြန့်မှုကြောင့် ကျင်ဖုန်းတောင်ထွတ် တင်မကဘဲ ဆင်စိမ်းဂိုဏ်းရဲ့ တောင်ထွတ်အသီးသီးက တပည့်တွေပါ ဒီသတင်းကို ကြားသွားကြပါတယ်။
အားလုံးက အဲဒီ ဖန့်ဓားဦးဆောင်သူကို တွေ့ဖို့အတွက် ဆူညံနေကြပါတော့တယ်။
ဟွမ်ချန်တောင်ထွတ်
ဆင်စိမ်းဂိုဏ်းမှာဆိုရင် ဟွမ်ချန်တောင်ထွတ်က တပည့်အနည်းဆုံးပါပဲ။
ဒီတောင်ထွတ်မှာ ကျင့်ကြံတဲ့သူတွေကတော့ အခြေခံအားဖြင့် တွားသွားသတ္တဝါအမျိုးအစား သားရဲကျင့်ကြံသူတွေ ဖြစ်ကြပါတယ်။
"မင်းပြောပုံအရဆိုရင် ဖန့်ချန် ဆိုတဲ့ ကောင်လေးက ဆင်စိမ်းဂိုဏ်းကို လာပြီး ရွှီဖုန်းနဲ့ စကားစမြည် ပြောဖို့ လာနေတာပေါ့ "
ဟွမ်ချန်က တစ်ခုခုကို စဉ်းစားနေပုံရပါတယ်။
"ဆရာ... တပည့်ကပဲ ထွက်ပြီးတော့ သူ ဘာရည်ရွယ်ချက်နဲ့ လာတာလဲဆိုတာကို သွားစုံစမ်းကြည့်ရမလား "
ဟွမ်ချန်ရဲ့ ရှေ့မှာ လူငယ်တစ်ယောက် ရပ်နေပါတယ်။
တကယ်လို့ ဖန့်ချန်သာ ဒီမှာရှိရင် ဒီလူဟာ တောရိုင်းကျောင်းတော်က တပည့်တစ်ယောက် ဖြစ်သလို နိမိတ်ဖတ်ဆရာ တစ်ယောက်ဖြစ်တဲ့ တာအိုပေါင်းစပ်ခြင်းအဆင့် ကျင့်ကြံသူ ဖြစ်နေတာကို မှတ်မိမှာပါ။
"အော် မင်းလည်း သူက ရွှီဖုန်းနဲ့ တကယ် စကားလာပြောတာ မဟုတ်ဘူးလို့ ထင်နေတာလား "
ဟွမ်ချန်က အေးအေးဆေးဆေး ပြုံးပြီး မေးလိုက်ပါတယ်။
လူငယ်က ခဏလောက် စဉ်းစားပြီး ခေါင်းခါပြတယ်
"ရွှီဖုန်းက အခုထိ ဝိညာဉ်သန္ဓေသားအဆင့် တောင် မရောက်သေးဘူး ဖန့်ချန်က သူ့ဆီ ဘာလာစကားပြောမှာလဲ ဒီကောင်လေးက ဆရာ ရှိနေတာကို ရိပ်မိသွားပြီး ဆရာ့ဆီကို ဦးတည်လာတာလားလို့ ကျွန်တော် သံသယရှိမိတယ်"
"သူက ရွှီဖုန်းနဲ့ စကားပြောဖို့ လာတာ မဟုတ်နိုင်ပေမဲ့ ငါ့ဆီကို ဦးတည်လာဖို့ကတော့ ပိုပြီး မဖြစ်နိုင်ဘူး"
ဟွမ်ချန်က ပြုံးရင်း
"ငါက ဒီနှစ်တွေအတွင်းမှာ သတိထားပြီး နေထိုင်လာတာ ဒီကောင်လေးနဲ့ တစ်ခါမှတောင် မဆုံဖူးဘူး သူက ဘာလို့ ငါ့ဆီကို လာမှာလဲ တခြား ရည်ရွယ်ချက် ရှိရင် ရှိလိမ့်မယ် ဒါပေမဲ့...
"ဒါက ငါတို့အတွက် အခွင့်အရေးတစ်ခုလည်း ဖြစ်နိုင်တယ် လီရှောင်မှာ ပေါ်လာတဲ့ အဲဒီလူ (၂) ယောက်က သူ့နောက်ကို အမြဲတမ်း လိုက်နေမှာ မဟုတ်ဘူးလို့ ငါ ယုံကြည်တယ်"
" အဲဒီနှစ်ယောက်က ဝိညာဉ်သုတ်သင်ရေးဌာနက ခေါ်လာတဲ့ ကူညီသူတွေ ဖြစ်နိုင်ပြီး လူတွေကို မျက်စိလည်အောင် တမင် သရုပ်ဆောင်ပြခဲ့တာ ဖြစ်မှာပါ"
"ဆရာ ပြောတာ အမှန်ပါပဲ"
လူငယ်က အသာအယာ ခေါင်းညိတ်ပါတယ်။
"မင်းလည်း အဲဒီအချိန်ကျရင် သူ့ကို သွားတွေ့လိုက်ဦး၊ တကယ်လို့ ဒုတိယအဆင့် ဆေးလုံး က သူ့ဆီမှာ ရှိနေရင် ဘာပဲဖြစ်ဖြစ် ပြန်ယူရမယ်"
ဟွမ်ချန်က အေးအေးဆေးဆေး ပြောလိုက်ပါတယ်။
ရွှီဖုန်းက သတင်းရရချင်းမှာတင် တောင်တံခါးဝကို စောစောစီးစီး လာစောင့်နေပါတယ်။
သူ့ရဲ့ဘေးမှာတော့ ရွှီယင်းလည်း ပါလာပါတယ်။
သူတို့နှစ်ယောက် သိပ်မစောင့်လိုက်ရခင်မှာပဲ ကောင်းကင်ယံကနေ ဓားအလင်းတန်းတစ်ခု အရှိန်အဟုန်နဲ့ ပျံသန်းလာတာကို မြင်လိုက်ရပါတယ်။
သူတို့ ဓားအလင်းတန်းကို မြင်လိုက်တဲ့ ခဏမှာတင် လူက သူတို့ရှေ့ကို ရောက်နေပါပြီ။
"ရွှီမိတ်ဆွေ"
ဖန့်ချန်က ပြုံးပြီး နှုတ်ဆက်လိုက်ပါတယ်။
"ဖန့်မိတ်ဆွေ"
ရွှီဖုန်းက ပြန်လည်နှုတ်ဆက်ရင်း သူ့စိတ်ထဲက သံသယတွေကို ဖိနှိပ်ကာ ဘေးက ရွှီယင်းကို ညွှန်ပြလိုက်တယ်
"ဒါက ကျွန်တော့်ညီမ ရွှီယင်း ပါ ဖန့်မိတ်ဆွေ လာမယ်ဆိုတာ ကြားတော့ သူက ကျွန်တော်နဲ့အတူ လိုက်ကြိုချင်တယ်ဆိုပြီး ဇွတ်လိုက်လာတာ"
ရွှီယင်းရဲ့ မျက်နှာလေးက နီမြန်းသွားပြီး ရှက်ကိုးရှက်ကန်းနဲ့
"ကျွန်မ ဖန့်ဓားဦးဆောင်သူကို နှုတ်ဆက်ပါတယ်ရှင်"
"ရွှီညီမလေး"
ဖန့်ချန်က ခေါင်းညိတ်ပြလိုက်ပါတယ်။
"ဖန့်မိတ်ဆွေ ခင်ဗျားလာမယ်ဆိုတာ သိတော့ ဆင်စိမ်းဂိုဏ်းက လူငယ်တပည့် အများအပြားက ခင်ဗျားကို တွေ့ချင်နေကြတယ် အခုလည်း ကျင်ဖုန်းတောင်ထွတ်မှာ စောင့်နေကြတယ် ခင်ဗျား စိတ်မရှိဘူးမလား "
ရွှီဖုန်းက အကဲခတ်ရင်း မေးလိုက်ပါတယ်။
"ရပါတယ်"
ဖန့်ချန်က ပြုံးပြီး ခေါင်းညိတ်ပြလိုက်ပါတယ်။
ရွှီဖုန်း စိတ်အေးသွားပါတယ်။
ဒီလူက သားရဲမျိုးနွယ်တွေကို မမုန်းတီးဘူးဆိုရင် အဆင်ပြေပါတယ်။
သားရဲမျိုးနွယ်တွေကို မုန်းရင် သားရဲကျင့်ကြံသူ (၃) ယောက်ကို တပည့်အဖြစ် ဘယ်လက်ခံပါ့မလဲ
ဒါကို တွေးမိရင်းနဲ့ ရွှီဖုန်းရဲ့ မျက်နှာမှာ အပြုံးတွေ ပေါ်လာပြီး
"ဖန့်မိတ်ဆွေ ကျွန်တော့်နောက်ကို လိုက်ခဲ့ပါဦး"
သူတို့ သုံးယောက် ကျင်ဖုန်းတောင်ထွတ်ဆီကို ပျံသန်းသွားကြပါတယ်။
လမ်းမှာတော့ ရွှီယင်းက ဖန့်ချန်နဲ့ တဖြည်းဖြည်း ရင်းနှီးလာပါတယ်။
ဖန့်ချန်ဟာ စိတ်ထားနူးညံ့ပြီး မေးသမျှကို ဖြေပေးသလို၊ သူမ တွေ့ဖူးတဲ့ တခြား ပါရမီရှင်တွေလို မာနမကြီးတာကို တွေ့လိုက်ရတဲ့အခါ သူမက ပိုပြီးတော့ ရင်းရင်းနှီးနှီး ပြောဆိုလာပါတော့တယ်။
ကျင်ဖုန်းတောင်ထွတ်ကို ရောက်တဲ့အခါ ရွှီယင်းဟာ ရွှီဖုန်းထက်တောင် ဖန့်ချန်နဲ့ ပိုပြီး ရင်းနှီးနေပုံ ပေါ်နေပါတယ်။
"ညီမလေး... နင် ဖန့်မိတ်ဆွေ ကို နင့်ရဲ့ ကျင့်ကြံဖော် အဖြစ် စဉ်းစားနေတာတော့ မဟုတ်ဘူးမလား အဲဒီအတွေးကို မြန်မြန် ဖျောက်ပစ်လိုက်စမ်း"
ရွှီဖုန်းက ထူးဆန်းတဲ့ အမူအရာနဲ့ စိတ်ချင်းဆက်သွယ်ပြီး သတိပေးလိုက်ပါတယ်။
"ဘာလို့ မရရမှာလဲ "
ရွှီယင်းက ရွှီဖုန်းကို တစ်ချက်ကြည့်ပြီး မကျေမနပ် ပြောလိုက်ပါတယ်။
"ဘာပဲဖြစ်ဖြစ် မရဘူးဆို မရဘူးပဲ"
ရွှီဖုန်းက ဘယ်လို ရှင်းပြရမှန်း မသိတာကြောင့် လက်ခါပြပြီး ပြီးစလွယ် ပြောလိုက်ပါတယ်။
အခု သူသိထားတဲ့ ဖန့်ချန်ရဲ့ အကြောင်းတွေအရဆိုရင် ဒီလူ လုပ်နေတဲ့ ကိစ္စတွေက အရမ်းကို နက်နဲလွန်းပါတယ်။
ရွှီယင်းကို ဒီလို အန္တရာယ်များတဲ့ လှေပေါ် မတင်ချင်ပါဘူး၊ လှေမှောက်သွားရင် သူတို့အားလုံး ဒုက္ခရောက်ကုန်မှာပါ။
အဲဒီအချိန်မှာ ဆင်စိမ်းဂိုဏ်းက ကျင့်ကြံသူတစ်စုက သူတို့သုံးယောက်ကို မြင်တော့ လှိုက်လှိုက်လှဲလှဲ ကြိုဆိုကြပါတယ်။
ရှေ့ဆုံးက ကျင့်ကြံသူအချို့ဟာ ကျင့်ကြံခြင်းအဆင့် မနိမ့်ကြပါဘူး။
အဲဒီထဲက တစ်ယောက်က ဖန့်ချန်ကို ပြုံးကာ ပြောလိုက်ပါတယ်
"ဖန့်မိတ်ဆွေ ကျွန်တော့်နာမည်က ရွှီရွေ့နျန် ပါ ကျွန်တော့်ရဲ့ ဆရာကတော့ ဟွမ်ချန်မသေမျိုးဘုရင် ပါပဲ"
ရွှီရွေ့နျန်ရဲ့ မျက်လုံးအစုံထဲမှာတော့ နက်နဲတဲ့ အဓိပ္ပာယ်တွေ ပါဝင်နေပါတယ်။
"ဟင်လင်းပြင်ထာဝရဓားဂိုဏ်း က ဖန့်ချန် ပါ ရွှီအစ်ကို ကို တွေ့ရတာ ဝမ်းသာပါတယ်"
ဖန့်ချန်ရဲ့ မျက်နှာပေါ်မှာလည်း အပြုံးတစ်ခု ပေါ်လာပါတယ်။
သူ့ရဲ့ မျက်လုံးအစုံထဲမှာလည်း နက်နဲတဲ့ အဓိပ္ပာယ်တွေ အပြည့်ပါပဲ။
အခန်း (၉၈၂) တွေ့ရတာက နာမည်ကြီးတာထက် မသာဘူး
အားလုံးက တစ်ယောက်နဲ့တစ်ယောက် မိတ်ဆက်ပြီးတဲ့နောက် ပိုပြီးရင်းနှီးသွားကြသလို ခံစားရတာကြောင့် နေရာယူလိုက်ကြပြီး လက်ဖက်ရည်သောက်ရင်း စကားစမြည် ပြောဆိုကြပါတယ်။
ရွှီဖုန်းကတော့ တစ်ခုခု မှားနေသလို အမြဲခံစားနေရတာကြောင့် တိုးတိုးလေး စိတ်ချင်းဆက်သွယ်ပြီး မေးလိုက်တယ်
"ဖန့်မိတ်ဆွေ... ခင်ဗျား ဒီကိုလာတာ ကျွန်တော့်ဆီ အလည်လာတာအပြင် တခြားလုပ်စရာ ကိစ္စရှိသေးလို့လား"
"မရှိပါဘူး၊ ခင်ဗျားဆီ အလည်လာတာလေ၊ မရဘူးလား"
ဖန့်ချန်က ပြုံးပြီး ရွှီဖုန်းကို တစ်ချက်ကြည့်လိုက်ပါတယ်။
"ဒါကတော့ ရတာပေါ့..."
ရွှီဖုန်းက ရှက်ကိုးရှက်ကန်းနဲ့ ခေါင်းညိတ်ပြပေမဲ့ စိတ်ထဲမှာတော့ သံသယတွေ တရစပ် ဖြစ်ပေါ်နေပါတယ်။
မလှမ်းမကမ်းမှာတော့ လူလတ်ပိုင်း အမျိုးသားတစ်ယောက် ရပ်နေပြီး ထက်ရှတဲ့ အကြည့်တွေနဲ့ ဟိုးအဝေးက မြင်ကွင်းတွေကို အကုန်လုံး မြင်နေရပါတယ်။
"မောင်ကြီး... ဘာဖြစ်လို့လဲ"
အမျိုးသမီးတစ်ယောက်က ထိုလူလတ်ပိုင်း အမျိုးသားဘေးကို လျှောက်လာပြီး တိုးတိုးလေး မေးပါတယ်။
လူလတ်ပိုင်း အမျိုးသားရဲ့ မျက်နှာက အနည်းငယ် တည်ကြည်နေတယ်
"ဟင်လင်းပြင်ထာဝရဓားဂိုဏ်းရဲ့ ဓားဦးဆောင်သူက ဖုန်းအာ (ရွှီဖုန်း) ဆီကို ရောက်နေတယ်"
"ဟင်လင်းပြင်ထာဝရဓားဂိုဏ်းရဲ့ ဓားဦးဆောင်သူ အဲဒီ ဖန့်ချန် လား"
အမျိုးသမီးက ခဏလောက် ကြောင်သွားပြီးမှ ပြုံးလိုက်တယ်
"သူက ဖုန်းအာနဲ့လည်း အဆက်အသွယ် ရှိတာလား ကြည့်ရတာ ဖုန်းအာလည်း တကယ်ပဲ ကြီးပြင်းလာပြီ ထင်တယ်၊ ဒီလို ပါရမီရှင်မျိုးနဲ့တောင် မိတ်ဆွေဖွဲ့နိုင်နေပြီ"
"ကြီးပြင်းလာပြီ ဟုတ်လား သူက ရွှေအမြုတေအဆင့် ရောက်နေတာ ကြာလှပြီ၊ အစောကြီးကတည်းက ကြီးပြင်းလာတာပါ ဒါပေမဲ့..."
လူလတ်ပိုင်း အမျိုးသားက မျက်မှောင်ကြုတ်လိုက်တယ်
"သူ့ကို ဖန့်ချန်နဲ့ သိပ်ပြီး မနီးစပ်စေချင်ဘူး ဒီကောင်လေးက ကံကြမ္မာ အကျိုးအကြောင်း တွေနဲ့ အရမ်းပတ်သက်နေတယ် ငါ့အတွက်တော့ ခံစားချက် သိပ်မကောင်းဘူး"
"ဘာလို့လဲ ကျွန်မ ကြားတာတော့ ဒီဖန့်ဓားဦးဆောင်သူက ကောင်းကင်က ပေးတဲ့ ပါရမီရှင်တဲ့ ပြီးခဲ့တဲ့ ရက်ပိုင်းကပဲ ဓားစိန်ခေါ်ခြင်းခြင်းလမ်းစဉ် ကို လျှောက်လှမ်းပြီး ခွန်လွန်ဓားဂိုဏ်းက ဓားကျင့်ကြံသူတွေကို စကားမပြောနိုင်အောင် လုပ်ခဲ့တယ်ဆို"
အမျိုးသမီးက ပြုံးပြီး ဆက်ပြောတယ်
"သူ့ရဲ့ ကျင့်ကြံခြင်းအဆင့်ကလည်း အရမ်းမြန်တာပဲ အရင်က ဖုန်းအာလောက်တောင် မမြင့်ဘူး မဟုတ်လား အခု ဖုန်းအာက ရွှေအမြုတေအဆင့်မှာပဲ ရှိသေးပေမဲ့ သူကတော့ စိတ်ဝိညာဉ်ထွက်ခွာခြင်းအဆင့် ကို ရောက်နေပြီ"
"အဲဒါကြောင့်ပဲ ဖုန်းအာကို သူ့နဲ့ မနီးစပ်စေချင်တာ"
"ကိုးဆက်မြောက်ဘုရင်နန်းတော် က အဲဒီလူကလည်း ပါရမီရှင်လို့ ပြောလို့ရပေမဲ့ ဖန့်ချန်ကိုတော့ ဘယ်လိုမှ မယှဉ်နိုင်ဘူး ဖုန်းအာက နဝမမင်းသား နဲ့ ဆက်ဆံတာက အကျိုးရှိပေမဲ့ ဖန့်ချန်နဲ့ ဆက်ဆံရင်တော့ ဘေးဒုက္ခတွေ ကြုံရမှာကို ကြောက်တယ်"
လူလတ်ပိုင်း အမျိုးသားက သက်ပြင်းချလိုက်တယ်
"ပြီးခဲ့တဲ့ရက်ပိုင်း လီရှောင်ကိစ္စကို မင်း ကြားပြီးပြီလား ကိုင်ဟွမ် မှာ သားနှစ်ယောက်ပဲ ရှိတာ တစ်ယောက်ပြီးတစ်ယောက် သေကုန်ကြပြီ တစ်ယောက်က ဖန့်ချန်ရဲ့ လက်ချက်နဲ့ သေတာတောင် အခုထိ ကိုင်ဟွမ် က ဘာမှ မပြောရဲဘူး ဒီကိစ္စက နေရာတိုင်းမှာ ထူးဆန်းမှုတွေ ရှိနေတယ်..."
"ကြားမိပါတယ် ကောင်းကင်ဘုရင်ကျန့် က ဘာမှမပြောတာကလည်း သူတို့ဘက်က မှားနေလို့ ဖြစ်မှာပါ ဘာပဲဖြစ်ဖြစ် ကိုင်ဝူ နဲ့ ယွီမိသားစုက သွေးဝိညာဉ်ဂိုဏ်းနဲ့ ပတ်သက်မှု အရမ်းနက်ရှိုင်းနေတာဆိုတော့ သေတာကလည်း ထိုက်တန်ပါတယ်"
အမျိုးသမီးက တိုးတိုးလေး ပြောပါတယ်။
"သွေးဝိညာဉ်ဂိုဏ်းနဲ့ ပတ်သက်မှု နက်ရှိုင်းတာက... ကောင်းတဲ့အချက် ဖြစ်နိုင်သလို မကောင်းတာလည်း ဖြစ်နိုင်တယ်"
လူလတ်ပိုင်း အမျိုးသားရဲ့ မျက်နှာက ရှုပ်ထွေးသွားပါတယ်။
"မောင်ကြီးက ဘာလို့ အဲဒီလို ပြောတာလဲ"
အမျိုးသမီးက အံ့ဩတကြီး မေးလိုက်ပါတယ်။
"မင်း မကြားဖူးတဲ့ ကိစ္စတွေ အများကြီး ရှိသေးတယ် သွေးဝိညာဉ်ဂိုဏ်းရဲ့ အခြေခံအုတ်မြစ်က... ကျုံးကျိုးက ဘယ်ဂိုဏ်းနဲ့မှ မနှိုင်းယှဉ်နိုင်ဘူး သူတို့ရဲ့ လုပ်ရပ်တွေက အရမ်း ယုတ်မာလွန်းလို့သာ မသေမျိုးဘုရင် အတော်များများက အခုထိ သူတို့ရဲ့ ရပ်တည်ချက်ကို လူသိရှင်ကြား မထုတ်ဖော်ရဲကြတာ"
"တကယ်တော့... ငါသိထားသလောက် သွေးဝိညာဉ်ဂိုဏ်းနဲ့ ပတ်သက်နေတဲ့ မသေမျိုးဘုရင်တွေဟာ ၂၀ ထက်မနည်းဘူး"
လူလတ်ပိုင်း အမျိုးသားက ပြောပြပါတယ်။
အမျိုးသမီးရဲ့ မျက်နှာက ချက်ချင်းပဲ တည်ကြည်သွားပါတယ်။
သူမဟာ ဒီနေ့ကျမှ သူမရဲ့ ခင်ပွန်းဆီကနေ ဒီသတင်းကို ကြားလိုက်ရတာပါ။
သွေးဝိညာဉ်ဂိုဏ်းရဲ့ အခြေခံက ဒီလောက်တောင် ခိုင်မာတာလား
"သူ ထွက်သွားပြီးရင် ဖုန်းအာကို ငါ့ဆီ လွှတ်လိုက်ဦး၊ ငါ သူ့ကို သေသေချာချာ စကားပြောရမယ်"
လူလတ်ပိုင်း အမျိုးသားက မှာကြားလိုက်ပါတယ်။
အမျိုးသမီးကလည်း အသာအယာ ခေါင်းညိတ်ပြပါတယ်။
နောက်တစ်နေ့မှာတော့ ဖန့်ချန်က နှုတ်ဆက်ပြီး ထွက်ခွာလာခဲ့ပါတယ်။
ရွှီယင်းဟာ ဖန့်ချန်က တစ်ရက်ပဲ နေတာကို တွေ့တော့ စိတ်ထဲမှာ မပျော်မရွှင် ဖြစ်သွားပြီး ရွှီဖုန်းကို မျက်ရိပ်ပြကာ ဖန့်ချန်ကို ထပ်မံဆွဲထားဖို့ အချက်ပြပါတယ်။
ရွှီဖုန်းကတော့ ဘယ်လိုလုပ် ဆွဲထားပါ့မလဲ သူက ဖန့်ချန်ကို မြန်မြန် ပို့လိုက်ချင်နေတာပါ။
ဒီကိစ္စက နေရာတိုင်းမှာ ထူးဆန်းနေတယ်လို့ သူ ခံစားနေရလို့ပါ။
"ဖန့်မိတ်ဆွေ... နောက်တစ်ခေါက် အားရင် လာလည်ဦးနော်"
ရွှီဖုန်းက လက်ပြနှုတ်ဆက်လိုက်ပါတယ်။
ဖန့်ချန်က ပြုံးပြီး လက်အုပ်ချီကာ ဓားအသွင်ပြောင်းခြင်းအတတ် ကို အသုံးပြုပြီး ကောင်းကင်ယံမှာ ပျောက်ကွယ်သွားပါတော့တယ်။
"ဟော... ဒါ ဖန့်မိတ်ဆွေ မဟုတ်လား ဘာလို့ ဒီနေ့တင် ပြန်သွားတာလဲ ဆင်စိမ်းဂိုဏ်းမှာ နောက်ထပ် ရက်အနည်းငယ်လောက် ထပ်မနေတော့ဘူးလား "
ရောင်စဉ်တန်းတစ်ခု အဝေးကနေ ပျံသန်းလာပြီး ဖန့်ချန်ရဲ့ ရှေ့မှာ ပေါ်လာပါတယ်။
ရောင်စဉ်တန်းတွေ ပျောက်ကွယ်သွားတဲ့အခါ ရွှီရွေ့နျန် ရဲ့ ပုံရိပ် ပေါ်လာပြီး သူက အံ့ဩဟန် ပြုလိုက်ပါတယ်။
"ရွှီအစ်ကို... ကျုပ်မှာ အရေးကြီးတဲ့ ကိစ္စရှိလို့ ဆင်စိမ်းဂိုဏ်းမှာ တစ်ရက်ပဲ နေနိုင်တာပါ နောက်တစ်ခေါက် ကံပါရင် ပြန်တွေ့ကြတာပေါ့"
ဖန့်ချန်က ပြုံးပြီး ခေါင်းညိတ်ပြကာ ထွက်ခွာဖို့ ပြင်ပါတယ်။
ရွှီရွေ့နျန်က ဖန့်ချန် ထွက်သွားတာကို ကြည့်နေပြီး တားဆီးခြင်း မပြုပါဘူး။
ဒါပေမဲ့ သူက ဖန့်ချန်ကို တစ်ခုခု စဉ်းစားနေတဲ့ အကြည့်နဲ့ ကြည့်နေပါတယ်။
ဖန့်ချန်ရဲ့ ဓားအလင်းတန်းက ကောင်းကင်ယံမှာ ပျောက်ကွယ်တော့မယ့် အချိန်မှာတင် ရွှီရွေ့နျန်က ရုတ်တရက် သူ့ရဲ့ ဝတ်ရုံစကို အသာအယာ ဝှေ့ယမ်းလိုက်ပါတယ်။
စကြဝဠာထဲက ဝိညာဉ်စွမ်းအားတွေဟာ ချက်ချင်းပဲ ဆူပွက်လာပြီး ခဏချင်းမှာတင် ဖန့်ချန်ဟာ မီးပင်လယ်ကြီးရဲ့ ဝိုင်းရံခြင်းကို ခံလိုက်ရပါတယ်။
ဒီမီးရဲ့ စွမ်းအားတွေက မရိုးရှင်းပါဘူး။
စိတ်ဝိညာဉ်ထွက်ခွာခြင်းအဆင့် ကျင့်ကြံသူတွေ နေနေသာသာ၊ ပေါင်းစပ်ခြင်းအဆင့် ကျင့်ကြံသူတွေတောင် နည်းနည်း ထိလိုက်တာနဲ့ ဝိညာဉ်စွမ်းအား အကာအကွယ်တွေဟာ ဘယ်လိုမှ တားဆီးနိုင်မှာ မဟုတ်ပါဘူး။
ဖန့်ချန်ရဲ့ မျက်လုံးတွေ အေးစက်သွားပြီး ဖြည်းညင်းစွာ ပြန်လှည့်ကြည့်လိုက်တဲ့အခါ၊ မီးပင်လယ်ထဲကနေ လမ်းလျှောက်လာတဲ့ ရွှီရွေ့နျန်ကို တွေ့လိုက်ရပါတယ်။
"ရွှီမိတ်ဆွေ... ဒါက ဘာသဘောလဲ "
ဖန့်ချန်က မျက်မှောင်ကြုတ်ပြီး မေးလိုက်ပါတယ်။
"ဖန့်မိတ်ဆွေ... လီရှောင်တိုက်ပွဲမှာ ဒုတိယအဆင့် သွေးဝိညာဉ်နတ်ဆေးလုံး က ခင်ဗျားလက်ထဲ ရောက်သွားတယ်လို့ ကြားမိတယ်"
"ခင်ဗျားက ဝိညာဉ်သုတ်သင်ရေးဌာန က ကျင့်ကြံသူဆိုတော့ သွေးဝိညာဉ်ဂိုဏ်းရဲ့ လုပ်ရပ်တွေကို မနှစ်မြို့မှာ သေချာပါတယ် အဲဒီတော့ ခင်ဗျားလည်း ဒီဆေးလုံးကို သောက်မှာ မဟုတ်ဘူး မဟုတ်လား ဒါကြောင့် ဒီဆေးလုံးကို ကျုပ်ဆီ ရောင်းပေးလို့ ရမလား"
ရွှီရွေ့နျန်က ပြုံးပြီး နှုတ်ဆက်လိုက်တယ်
"တာအိုပေါင်းစပ်ခြင်းအဆင့် ကိုးဆင့်မှာ ကျုပ်က ခုနစ်ဆင့်ကို ဖြတ်ကျော်ပြီးပြီ ကျန်တဲ့ နှစ်ဆင့်ကို ဖြတ်ကျော်ဖို့ကတော့ တကယ်ကို ယုံကြည်မှု မရှိဘူး တကယ်လို့ သွေးဝိညာဉ်နတ်ဘုရားဆေးလုံးရဲ့ အကူအညီသာ ရမယ်ဆိုရင် ဒီအဆင့်ကို အလွယ်တကူ ကျော်ဖြတ်ပြီး ဘေးဒုက္ခရင်ဆိုင်ခြင်းအဆင့် ကို ရောက်နိုင်မှာပါ ဖန့်မိတ်ဆွေ အနေနဲ့ ကူညီပေးပါဦး"
"ရွှီမိတ်ဆွေ... ခင်ဗျားက ဆင်စိမ်းဂိုဏ်းရဲ့ ကျင့်ကြံသူ တစ်ယောက်အနေနဲ့ ဒီသွေးဝိညာဉ်နတ်ဆေးလုံးကို သောက်မယ်ဆိုရင် သွေးဝိညာဉ်ဂိုဏ်းကို အားပေးရာ မရောက်ဘူးလား "
ဖန့်ချန်ရဲ့ မျက်နှာက ညိုမှောင်သွားတယ်
"ဒုတိယအဆင့် သွေးဝိညာဉ်နတ်ဆေးလုံးက ကျုပ်ဆီမှာ မရှိတော့တာ ကြာပြီ ခင်ဗျား လူမှားရှာနေပြီ ထင်တယ် ခင်ဗျားရဲ့ နည်းလမ်းတွေကို အခုချက်ချင်း ရုပ်သိမ်းလိုက်ပါ ဒီနေ့ ကိစ္စကို ကျုပ်က နားလည်မှုလွဲတာလို့ပဲ သဘောထားပြီး ခင်ဗျားကို အပြစ်ရှာမှာ မဟုတ်ဘူး"
"ခင်ဗျားဆီမှာ မရှိတော့ဘူး ဟုတ်လား..."
ရွှီရွေ့နျန်က မျက်မှောင်ကြုတ်လိုက်ပြီးနောက် အသာအယာ ခေါင်းခါပြတယ်
"ကျုပ်ကတော့ သိပ်မယုံဘူး ဖန့်မိတ်ဆွေက ခင်ဗျားဆီက သိုလှောင်လက်စွပ်ကို ထုတ်ပေးပြီး ကျုပ်ကို အစစ်ဆေးခံမယ်ဆိုရင်တော့ တစ်မျိုးပေါ့"
"ဒါဆို ရွှီမိတ်ဆွေက လူသတ်ပြီး ပစ္စည်းလုဖို့ ကြံစည်နေတာပေါ့"
ဖန့်ချန်က ရုတ်တရက် ရယ်မောလိုက်တယ်
"တကယ်လို့ ဒီကိစ္စကို ဟင်လင်းပြင်ထာဝရဓားဂိုဏ်းနဲ့ တောရိုင်းကျောင်းတော်က သိသွားရင် ဆင်စိမ်းဂိုဏ်းက ခင်ဗျားကို ကာကွယ်ပေးနိုင်ပါ့မလား"
"ကျုပ်က ဒီနေရာကို ပိတ်ဆို့ထားပြီးသား ဒီနေ့ဖြစ်တဲ့ ကိစ္စကို ဘယ်သူမှ သိမှာ မဟုတ်ဘူး"
ရွှီရွေ့နျန်က အေးအေးဆေးဆေး ပြုံးလိုက်တယ်
"တကယ်လို့ ဖန့်မိတ်ဆွေက အဲဒီ ဒုတိယအဆင့် သွေးဝိညာဉ်နတ်ဘုရားဆေးလုံးကို မထုတ်ပေးချင်ဘူးဆိုရင်တော့ ကျုပ်ကလည်း ဒီနေ့ ခင်ဗျားကို အသက်ရှင်လျက် ထွက်သွားခွင့် ပေးလို့ မရတော့ဘူး"
မီးပင်လယ်ကြီးဟာ တစ်ခဏချင်းမှာတင် ကျုံ့ဝင်လာပါတယ်။
ဖန့်ချန်ရဲ့ ကိုယ်ထဲက ဝိညာဉ်စွမ်းအားတွေဟာ အကာအကွယ်အဖြစ် ထွက်ပေါ်လာပေမဲ့၊ ဒီမီးပင်လယ်ရှေ့မှာတော့ အရမ်းကို အားနည်းလွန်းပြီး မီးနဲ့ ထိလိုက်တာနဲ့ အရည်ပျော်သွားပါတယ်။
မီးပင်လယ်က ဆက်တိုက် ကျုံ့ဝင်လာတာကြောင့် ဖန့်ချန်ရဲ့ ခန္ဓာကိုယ်ပေါ်က အမွေးအမျှင်တွေဟာ မျက်စိရှေ့မှာတင် ခြောက်ကပ်လာပါတယ်။
ကြောက်စရာကောင်းတဲ့ အပူရှိန်ဟာ သူ့ခန္ဓာကိုယ်ကို တိုက်ရိုက် မထိတွေ့သေးပေမဲ့ အရေပြားတွေဟာ စတင်ပြီး လောင်ကျွမ်းနေပါပြီ။
ရွှီရွေ့နျန်က ခဏလောက် စဉ်းစားပြီး ရုတ်တရက် လက်အုပ်ချီလိုက်တယ်
"ဆရာ... ဒီထက် ပိုသွားရင် သူ သေသွားလိမ့်မယ်"
မီးပင်လယ်ထဲကနေ လူရိပ်တစ်ခု ထပ်မံ ထွက်ပေါ်လာပါတယ်။
အသက် ၅၀ ကျော်အရွယ် အဘိုးအိုတစ်ယောက်ဖြစ်ပြီး သူက ဖန့်ချန်ကို ပြုံးပြုံးလေး ကြည့်နေပါတယ်
"မင်းက ဟင်လင်းပြင်ထာဝရဓားဂိုဏ်းထဲမှာ နေရင်တော့ တကယ်ကို ဘေးကင်းမှာပါ ဒါပေမဲ့ မင်းက ဆင်စိမ်းဂိုဏ်းရဲ့ နယ်မြေထဲကို တမင်တကာ လာခဲ့တယ်ဆိုတော့ ကိုယ့်သေတွင်းကိုယ် တူးလိုက်တာပဲ"
"စီနီယာက ဘယ်သူလဲ "
ဖန့်ချန်ရဲ့ မျက်လုံးတွေ လှုပ်ရှားသွားပါတယ်။
"ငါ့နာမည်က ဟွမ်ချန် ပါ မင်း ငါ့ကို တစ်ခါမှ မမြင်ဖူးပါဘူး"
ဟွမ်ချန်က ပြုံးရင်း
"အဲဒီ ဒုတိယအဆင့် ဆေးလုံးက အခု မင်းဆီမှာ ရှိနေတုန်းပဲလား "
"တစ်ယောက်ယောက်က ယူသွားတာ ကြာပါပြီ"
ဖန့်ချန်က ပြောလိုက်ပါတယ်။
"ဒါဆိုရင်တော့ နှမြောစရာပဲ... ဒါပေမဲ့ ကိစ္စမရှိပါဘူး၊ မင်းကို အထက်ကို ပို့လိုက်ရင်လည်း ဒါက အောင်မြင်မှု တစ်ခုပါပဲ ဘာပဲဖြစ်ဖြစ် အဘိုးကြီးကျိ တောင်မှ မင်းရဲ့ လက်ချက်နဲ့ သေခဲ့ရတာလေ"
ဟွမ်ချန်က အေးအေးဆေးဆေး ပြောလိုက်ပါတယ်။
"ဒါဆို ခင်ဗျားတို့ နှစ်ယောက်လုံးက သွေးဝိညာဉ်ဂိုဏ်းက ကျင့်ကြံသူတွေပေါ့"
ဖန့်ချန်က သက်ပြင်းအသာ ချလိုက်ပါတယ်။
"မင်း အခုမှ သိတာလား ကြည့်ရတာ တွေ့ရတာက နာမည်ကြီးတာထက် မသာဘူးပဲ "
ရွှီရွေ့နျန်က ရယ်မောလိုက်ပါတယ်။
"မျိုးဆက်သစ် ကောင်လေးတစ်ယောက်က နောက်ကွယ်မှာ လူတော်တစ်ယောက်ရဲ့ လမ်းညွှန်မှု မရှိဘဲနဲ့ ငါတို့ဂိုဏ်းရဲ့ အစီအစဉ်တွေကို ဒီလောက်အများကြီး ဖျက်ဆီးနိုင်ပါ့မလား"
ဟွမ်ချန်က အေးစက်စက် ပြုံးလိုက်ပါတယ်။
ခဏအကြာမှာ သူက ဖန့်ချန်ကို ဖမ်းဆီးဖို့ လက်ကို မြှောက်လိုက်တဲ့ အချိန်မှာတင်၊ သူ့ရဲ့ လက်မောင်းဟာ ရုတ်တရက် ကျုံ့ဝင်သွားတာကို တွေ့လိုက်ရပါတယ်။
ဟွမ်ချန်ရဲ့ မျက်နှာဟာ ထိတ်လန့်သွားပြီး၊ နောက်တစ်ခဏမှာတင် သူဟာ ခြောက်ကပ်နေတဲ့ ဖားပြုတ်ကြီး တစ်ကောင်အဖြစ် ပြောင်းလဲသွားကာ မီးပင်လယ်ထဲကို ကျသွားပြီး ဖုန်မှုန့်အဖြစ် ပြောင်းလဲသွားပါတော့တယ်။