အားလုံးကို မျိုးတုံးသတ်ဖြတ်ခြင်း….

ယွီခရိုင်၊ လီယန်မြို့…

နှင်းများ ထူထပ်စွာ ကျဆင်းနေပြီး ဤစည်ကားသော မြို့ကြီးကို ဖုံးလွှမ်းထားသည်။ လီယန်မြို့ရှိ အဆောက်အအုံ အများစုမှာ နံရံအနီရောင်နှင့် တိုင်အနီရောင်များ ရှိကြပြီး ၎င်းက ကမ္ဘာကျော်သော ထူးခြားသည့် ပုံစံတစ်ခု ဖြစ်သည်။

ဤအချိန်တွင် လီယန်မြို့၏ အရှေ့ဘက် ခရိုင်၌ ဖုန်မှုန့်များနှင့် နှင်းမှုန်များ လွင့်စင်နေပြီး လူများနှင့် ကုန်သည် အမြောက်အမြား ထွက်ပြေးနေကြသည်။ အိမ်တော်တစ်ခု အတွင်းရှိ အဆောက်အအုံများ ပြိုကျနေပြီး နေရာအနှံ့တွင် အပျက်အစီးများ ရှိနေသည်။

သိုင်းပညာရှင်များက ပတ်လည်တွင် ပြန့်ကျဲနေကြပြီး သူတို့၏ မျက်နှာထားများ လွန်စွာ ခက်ထန်နေကာ အားလုံးက လမ်းကြောင်း တစ်ခုတည်းကိုသာ ကြည့်နေကြသည်။

သူတို့၏ အကြည့်ကို အနောက်သို့ လိုက်သွားလျှင် ရွှီကျင်းက အပျက်အစီးများပေါ်တွင် မတ်တတ်ရပ်နေပြီး လက်ထဲတွင် ဓားရှည် တစ်လက် ရှိကာ မျက်လုံးများက အေးစက်နေပြီး သတ်ဖြတ်လိုစိတ်ကို ဖုံးကွယ်မထားချေ။

"ချင်းရှောင်ဂိုဏ်း... မင်းတို့က ငါတို့ အားလုံးကို မျိုးတုံးသတ်ဖြတ်ဖို့ တကယ် ရည်ရွယ်ထားတာလား..."

ဝတ်ရုံနက်နှင့် ဆံပင်ဖားလျားချထားသော အဘိုးကြီး တစ်ယောက်က ဒေါသတကြီး အော်ဟစ်လိုက်ခြင်းပင်။ သူ အစောပိုင်းက ရွှီကျင်းနှင့် တိုက်ခိုက်ခဲ့သော်လည်း သုံးကွက်ပင် မပြည့်မီ အရေးနိမ့်သွားခဲ့ပြီး ခေါင်းဖြတ်ခံရမလိုပင် ဖြစ်ခဲ့သည်။

သူက လင်းထျန်းဂိုဏ်း၏ မဟာကာကွယ်စောင့်ရှောက်သူ ဝူဟွမ်ပင်.

သူသည် သိုင်းပညာကို နှစ်လေးဆယ်ကြာ ကျင့်ကြံခဲ့ပြီး နတ်စွမ်းရည်ကို ကျွမ်းကျင်ပိုင်နိုင်ခဲ့သည်။ သာမန် အဆင့်ဝင်သိုင်းပညာရှင်များ ဆိုလျှင် သူ့ကို တွေ့သည်နှင့် ချက်ချင်း အသတ်ခံရမည် ဖြစ်သော်လည်း ဤမျှ အစွမ်းထက်သော အနေအထားက ရွှီကျင်း ရှေ့တွင်တော့ လုံးဝ အစွမ်းအစ မရှိဖြစ်နေသည်။

သူက ရွှီကျင်းကို ခြုံခိုတိုက်ခိုက်ခဲ့သော်လည်း လက်တုံ့ပြန်မှုကြောင့် သေလုနီးပါး ဖြစ်ခဲ့ရရာ ၎င်းက သူ့အတွက် လက်ခံရန် ခက်ခဲလှပေသည်။ ဝူဟွမ်၏ ဘေးတွင် ရပ်နေသော ခန့်ညားသည့် လူတစ်ယောက်မှာ လင်းထျန်းဂိုဏ်း၏ ဒုတိယ ကာကွယ်စောင့်ရှောက်သူ ရှောင်ဝူဟွေ့ ဖြစ်သည်။

ရှောင်ဝူဟွေ့မှာ အရပ်ရှည်ပြီး ဝါးခမောက် တစ်လုံးကို ဆောင်းထားသည်။ သူ့မျက်နှာက ရာသီဥတုဒဏ်ကို ခံထားရပြီး ဆံပင်ရှည်များက ပခုံးပေါ်သို့ ပေါ့ပေါ့ပါးပါး ကျဆင်းနေသည်။ အဝတ်အစားများက ဝူဟွမ်လောက် မလှပသော်လည်း အရှိန်အဝါကတော့ သိပ်မကွာလှချေ။

ပထမ အမြင်တွင် သူက လူလတ်ပိုင်း အရွယ် ရှောင်ဝူတိနှင့် တူပြီး ရွှီကျင်းကို ရှုပ်ထွေးသော အမူအရာဖြင့် စိုက်ကြည့်နေသည်။

ရွှီကျင်းကလည်း ရှောင်ဝူဟွေ့ကို ပြန်ကြည့်နေသည်။ လင်းထျန်းဂိုဏ်း၏ အကြွင်းအကျန်များ အနက် ရှောင်ဝူဟွေ့ကသာ အသန်မာဆုံး ဖြစ်ကြောင်း သူ ခံစားနိုင်ပေသည်။

ဒါတင်မကသေးဘူး... ဒီလူကလည်း ကျင့်ကြံသူ တစ်ယောက်ပဲ...

"မူလအားဖြည့်နယ်ပယ် စတုတ္ထအလွှာ... ထူးခြားတယ်..."

ရွှီကျင်းက ဝူဟွမ်ကို လျစ်လျူရှုကာ သူ့ အကြည့်က ရှောင်ဝူဟွေ့ အပေါ်သို့ ဖြတ်ပြေးသွားပြီး အေးစက်စွာ ပြောဆိုလိုက်သည်။

ရှောင်ဝူဟွေ့မှာ ဤလူငယ်က သူ့ကို စီနီယာ တစ်ယောက်လို လေသံဖြင့် မှတ်ချက်ပေးနေသည်ကို မြင်သောအခါ သဘာဝကျကျပင် မကျေမနပ် ဖြစ်သွားသည်။ သို့သော် ရွှီကျင်းက သူ့ထက် ပိုသန်မာကြောင်းတော့ သူ ဝန်ခံရမည်ပင်။

ရှောင်ဝူဟွေ့ အဝေးကို လှမ်းကြည့်လိုက်ရာ ခြံဝင်းနံရံပေါ်တွင် လျှောက်နေသော ပုံရိပ်ကြီး တစ်ခုကို တွေ့လိုက်ရပြန်သည်။ ၎င်းမှာ ရှန်ယွဲ့ပင် ဖြစ်သည်။ အခြား လမ်းကြောင်းများကို ကြည့်လိုက်လျှင် ချင်းရှောင်ဂိုဏ်းမှ အခြား တပည့်များ၏ ပုံရိပ်များကို မြင်တွေ့နိုင်ပြီး သူတို့ကို ဝိုင်းရံထားကာ ထွက်ပြေးစရာ နေရာ မရှိတော့ချေ။

ရှောင်ဝူဟွေ့က ခေါင်းကို ဖြည်းညင်းစွာ ငုံ့လိုက်ပြီး ထူးဆန်းသော ရယ်သံတစ်ခု ထွက်ပေါ်လာသည်။

"အသုံးမကျဘူး... တကယ်ကို အသုံးမကျဘူး... အသုံးမကျတဲ့ ကောင်တွေ... ချင်းရှောင်ဂိုဏ်းကို ရန်စဖို့နဲ့ ချီမျိုးနွယ်ကို နာခံဖို့ အတင်းအကျပ် လုပ်နေတာ... သူတို့ ဘယ်တော့မှ ကြီးမားတဲ့ အရာတစ်ခုခုကို အောင်မြင်မှာ မဟုတ်ဘူး..."

ရွှီကျင်းက သူ့ကို စိုက်ကြည့်နေပြီး လှုပ်ရှားရန် မလောချေ။ ၎င်းမှာ သူက အခွင့်အရေး တစ်ခု တမင်တကာ ပေးနေခြင်း မဟုတ်ဘဲ အခြား တပည့်များက လင်းထျန်းဂိုဏ်း၏ ဂိုဏ်းချုပ် ကျီဝူယဲ့ကို ရှာတွေ့ရန် စောင့်နေခြင်းသာ ဖြစ်သည်။

လင်းထျန်းဂိုဏ်းက ရုတ်တရက် ပေါ်လာပြီး သိုင်းလောက တစ်ဝက်ကို စည်းလုံးခဲ့သည်။ ၎င်း၏ ဂိုဏ်းချုပ် အမည်မှာ ကျီဝူယဲ့ ဖြစ်ကြောင်း လူတိုင်း သိကြသော်လည်း ကျီဝူယဲ့ကို လူကိုယ်တိုင် တစ်ခါမှ မမြင်ဖူးကြချေ။

ရွှီနင်းနှင့် ကျန်းကျောက်ရှားတို့က ယခင်က လင်းထျန်းဂိုဏ်းကို ရှင်းလင်းခဲ့ဖူးသော်လည်း ကျီဝူယဲ့ကို တစ်ခါမှ မမြင်ခဲ့ဖူးချေ။ သူတို့ နှစ်ယောက်နှင့် မတူဘဲ ရွှီကျင်းက အလျင်စလို မလုပ်ဘဲ ရန်သူကို သတိပေးမည် မဟုတ်ချေ။ သူက လင်းထျန်းဂိုဏ်း၏ တည်နေရာကို သေချာစွာ ရှာဖွေခဲ့သည်။

သိုင်းပညာရှင်များ စုဝေးသည့်နေ့တွင် သူ လှုပ်ရှားခဲ့ပြီး သူတို့ အားလုံးကို တစ်ချက်တည်းဖြင့် ဖမ်းဆီးခဲ့သော်လည်း ကျီဝူယဲ့ကို ရှာမတွေ့ခဲ့သဖြင့် သူ့ကို သတိထားစေခဲ့သည်။ ကျီဝူယဲ့က ဤအိမ်တော်ထဲတွင် ပုန်းနေပြီး မရှိဟန်ဆောင်နေခြင်းသာ ဖြစ်သည်ဟု သူ၏ ပင်ကိုယ်အသိက သူ့ကို ပြောနေသည်။ မဟုတ်လျှင် လင်းထျန်းဂိုဏ်းက ဤမျှ ကောင်းမွန်စွာ စုဝေးနိုင်မည် မဟုတ်ပေ။

ရှောင်ဝူဟွေ့၏ စကားကို ကြားသောအခါ ဝူဟွမ် ဒေါသထွက်သွားပြီး ရှောင်ဝူဟွေ့ကို ဒေါသတကြီး ကြိမ်းမောင်းလိုက်သည်။

"ချင်းရှောင်ဂိုဏ်းကို ရန်မစရဘူးလား... မင်းက ချင်းရှောင်ဂိုဏ်းကို ကျော်လွန်ပြီး သိုင်းလောက တစ်ခုလုံးကို စည်းလုံးနိုင်မယ် ထင်နေတာလား... တကယ့်ကို နေ့ခင်း အိပ်မက်မက်နေတာပဲ..."

ဘုန်း…

ရှောင်ဝူဟွေ့က ရုတ်တရက် လက်ကို မြှောက်လိုက်ပြီး ဝူဟွမ်ကို ရိုက်ချလိုက်ရာ အဝေးမှနေ၍ ဝူဟွမ်၏ ခေါင်းကို ရိုက်ခွဲပစ်လိုက်သဖြင့်သွေးနှင့် အသားစများ နေရာအနှံ့ လွင့်စင်သွားရာ လင်းထျန်းဂိုဏ်း၏ သိုင်းပညာရှင်များကို လန့်ဖြန့်သွားစေသည်။

သိုင်းပညာရှင်များ အားလုံး နောက်သို့ တစ်လှမ်း ဆုတ်သွားကြပြီး ရှောင်ဝူဟွေ့ကို အကြောက်တရားဖြင့် ကြည့်နေကြသည်။

လုပ်ဖော်ကိုင်ဖက် သိုင်းပညာရှင်များ၏ အကြည့်များကို လျစ်လျူရှုကာ ရှောင်ဝူဟွေ့က ရွှီကျင်းကို ကြည့်၍ ရှေ့သို့ တစ်လှမ်း တိုးကာ ….

"ရွှီကျင်း... မင်းက ငါ့ရဲ့ သိုင်းလျှို့ဝှက်ပညာရပ်ကို ထုတ်သုံးဖို့ အတင်းအကျပ် လုပ်နိုင်တဲ့ ပထမဆုံး လူပဲ... ဒါပေမဲ့ မင်းလို ကျွမ်းကျင်တဲ့ ပြိုင်ဘက်မျိုးနဲ့ဆိုရင် ငါ့ရဲ့ သက်တမ်းကို တိုစေရင်တောင် တန်ပါတယ်..."

ဘုန်း…

ထိုအခါ ပြင်းထန်သော ခွန်အားတစ်ခုက ရှောင်ဝူဟွေ့၏ ခန္ဓာကိုယ်မှ ပေါက်ကွဲထွက်လာပြီး ဝါးခမောက်ကို လွင့်စင်သွားစေကာ ခြေထောက်အောက်ရှိ မြေကြီးကို အက်ကွဲသွားစေသည်။ထိုခွန်အားတွင် သွေးစက်များပင် ရောနှောနေသည်။

လင်းထျန်းဂိုဏ်း၏ သိုင်းပညာရှင်များက ရှောင်ဝူဟွေ့ကို မယုံကြည်နိုင်စွာ စိုက်ကြည့်နေကြ၏။ ဤကဲ့သို့ ကြောက်မက်ဖွယ်ကောင်းသော အရှိန်အဝါမျိုးကို သူတို့ ပထမဆုံးအကြိမ် ကြုံတွေ့ဖူးခြင်း ဖြစ်ပြီး ရှောင်ဝူဟွေ့၏ အစောပိုင်း လုပ်ရပ်များနှင့် ပေါင်းစပ်လိုက်သောအခါ လင်းထျန်းဂိုဏ်းမှ သိုင်းပညာရှင်များမှာ သတိထားနေကြသည်။ ဤသည်က အန္တရာယ်အပေါ် လူတစ်ယောက်၏ ပင်ကိုယ် တုံ့ပြန်မှုပင်….

ရွှီကျင်းက မျက်လုံးများကို ကျဉ်းမြောင်းလိုက်ပြီး အေးစက်သော အလင်းတန်း တစ်ခုက ၎င်းတို့ထဲတွင် တောက်ပသွားသည်။ ရှောင်ဝူဟွေ့၏ အရှိန်အဝါက မူလအားဖြည့်နယ်ပယ် စတုတ္ထအလွှာကို ကျော်လွန်သွားကြောင်းနှင့် ရှောင်ဝူဟွေ့ကို သတ်ရန် နောက်ပိုင်းတွင် သူ့အတွက် ထိုမျှ လွယ်ကူမည် မဟုတ်ကြောင်း သူ ခံစားလိုက်ရသည်။

သို့သော် ရှန်ယွဲ့ ရှိနေသဖြင့် ရွှီကျင်း စိုးရိမ်မနေချေ။ ဘာမှမပြောဘဲ သူ ခုန်တက်လိုက်ပြီး ဓားကို ဆွဲထုတ်ကာ ရှောင်ဝူဟွေ့ဆီသို့ ပြေးဝင်သွားရာ သားကောင်ကို ဖမ်းရန် စိုက်ဆင်းလာသော သိမ်းငှက် တစ်ကောင်ကဲ့သို့ တားဆီး၍ မရနိုင်ချေ။

ရှောင်ဝူဟွေ့က ညာခြေဖြင့် ရှေ့သို့ တစ်လှမ်း တိုးလိုက်ပြီး ကောင်းကင်ယံသို့ လက်ဝါးဖြင့် ရိုက်ချလိုက်တော့ လှိုင်းထန်နေသော မူလချီစွမ်းအင်များက တောင်ကျရေလို တဟုန်ထိုး စီးဆင်းလာပြီး ဖုန်မှုန့်များနှင့် နှင်းများကို လွင့်စင်သွားစေကာ အထက်သို့ ပျံတက်လာသော နဂါးတစ်ကောင်ကဲ့သို့ ရွှီကျင်းဆီသို့ ပြေးဝင်သွားသည်။

……………..

ဒီဇင်ဘာလလယ်တွင် ဝိညာဉ်ကြေးနီ ပထမအသုတ်က ချင်းရှောင်တောင်သို့ ရောက်ရှိလာပြီး လီချင်းချိုးက တပည့်များကို ထျန်းကုန်းဆောင်သို့ တိုက်ရိုက် ပို့ဆောင်ပေးရန် ညွှန်ကြားလိုက်သည်။

သုံးရက် အကြာတွင် ဝူရှင်းယွဲက လီချင်းချိုးကို လာရောက် တွေ့ဆုံခဲ့သည်။

"ဂိုဏ်းချုပ်... ဒီဝိညာဉ်ကြေးနီက မှော်ပစ္စည်းတွေ ဖန်တီးဖို့အတွက် အလွန်ကောင်းမွန်တဲ့ ပစ္စည်းတစ်ခုပါ...သူ့ရဲ့ အခန်းကဏ္ဍက ကြီးမားလှတယ်...ဒါ့ကြောင့် ဝိညာဉ်ကြေးနီကို တင်းကျပ်စွာ ထိန်းချုပ်ထားရမယ်... တခြား ဘယ်သူ့ကိုမှ အလဟဿ မဖြစ်စေရဘူး..."

လီချင်းချိုး လင်းရှောင်ခြံဝင်းသို့ ဝင်လာသည်နှင့် ဝူရှင်းယွဲက လက်ထဲတွင် ဓားတစ်လက်ကို ကိုင်ကာ အပြေးရောက်လာပြီး သူမ၏ အသံမှာ စိတ်လှုပ်ရှားမှုကြောင့် တုန်ယင်နေသည်။

သူမ စကားပြောနေစဉ် လီချင်းချိုးထံသို့ ဓားကို ကမ်းပေးလိုက်သည်။ ဤဓား၏ ပစ္စည်းမှာ ထူးခြားကြောင်း ထင်ရှားပြီး ၎င်းထဲတွင် ထူးဆန်းပြီး အေးစက်သော အလင်းရောင် တစ်ခု စီးဆင်းနေသဖြင့် အလွန် မျက်စိကျစရာ ကောင်းနေ၏။

ဓားသွားမှာ လက်ချောင်း သုံးချောင်းစာ ကျယ်ပြီး လေးပေနီးပါး ရှည်လျားကာ လောကီ သိုင်းလောကမှ ဓားအများစုထက် ပိုရှည်သည်။ လီချင်းချိုးက ဓားရှည်ကို ဆုပ်ကိုင်လိုက်ပြီး မူလချီစွမ်းအင်ကို ထည့်သွင်းလိုက်တော့ ဓားသွား တုန်ခါသွားသဖြင့် သူ မျက်ခုံးပင့်မိသွားသည်။

သာမန် လက်နက်များက မူလချီစွမ်းအင် ထည့်သွင်းမှုကို ခံနိုင်ရည် မရှိချေ။ အများဆုံး အနေဖြင့် တိုက်ခိုက်ရန်အတွက် ဓားသွားပေါ်တွင် မူလချီစွမ်းအင်ကို အုပ်မိုးထားရုံသာ တတ်နိုင်သည်။

ပြီးတော့ ဒီဓားက မူလချီစွမ်းအင်ကို သယ်ဆောင်ထားနိုင်တယ်... ဒါက သာမန် ကိစ္စ မဟုတ်ဘူး... အကယ်၍ ဓားသွားတွင် မူလချီစွမ်းအင်များ ပြည့်နှက်နေပါက ကျင့်ကြံသူများက ဓားကို ပိုမို လွယ်ကူစွာ ထိန်းချုပ်နိုင်မည် ဖြစ်ပြီး ၎င်းက ဓားသွားသည် မူလချီစွမ်းအင်၏ ရိုက်ခတ်မှုကို ခံနိုင်ရည် ရှိပြီး ထိခိုက်မိသောအခါ ကျိုးပဲ့သွားမည် မဟုတ်ကြောင်းကိုလည်း သက်သေပြနေသည်။

"ဒီလို ဓားမျိုး ဖန်တီးဖို့ ခက်လား..."

"သုံးရက်ပဲ ကြာတယ်... အဲဒါကြောင့် ဝိညာဉ်ကြေးနီက အရမ်း အရေးကြီးတယ်လို့ ကျွန်မ ပြောတာပါ... ဖန်တီးရတဲ့ လုပ်ငန်းစဉ်က အရမ်း လွယ်ကူတယ်... ဝိညာဉ်ကြေးနီကို ပုံဖော်ရုံပဲ လိုပြီး အလွယ်တကူ ပျက်စီးမသွားဘူး..."

"ကောင်းတယ်... ဒါဆို မင်း ဒီဓားမျိုး တစ်သောင်းကို အရင် ဖန်တီးလိုက်... နောက်ကျရင် ငါ အဲဒါတွေကို ဂိုဏ်းက တပည့်တွေကို ဝေပေးမယ်..."

လီချင်းချိုးက ချမ်းသာပြီး ရက်ရောစွာဖြင့် အမိန့်ပေးလိုက်၏။ ဤဓားကို အစွမ်းထက်သော မှော်ပစ္စည်း တစ်ခုဟု မသတ်မှတ်နိုင်သော်လည်း နတ်လက်နက်ဟု ခေါ်ဆိုထိုက်သော ထက်မြက်သည့် လက်နက်တစ်ခု ဖြစ်သည်မှာ သေချာပေသည်။

တပည့်များ အနေဖြင့် ဤကဲ့သို့သော ဓားမျိုးဖြင့် ကျန်းဟူတွင် လှည့်လည်သွားလာရသည်မှာ များစွာ ပိုမို အဆင်ပြေပေလိမ့်မည်။ယ

"ပြဿနာ မရှိပါဘူး ဂိုဏ်းချုပ်... ဒီဓားကို နာမည် ပေးချင်လား..."

လီချင်းချိုးက တစ်ခဏမျှ တုံ့ဆိုင်းနေပြီးနောက် …

"အဲဒါကို ချင်းရှောင်ဓားလို့ ခေါ်ကြတာပေါ့... အခုကစပြီး ဓားတိုင်းရဲ့ ဓားရိုးအောက်မှာ ချင်းရှောင် ဆိုတဲ့ စကားလုံးကို ရေးထိုးထားရမယ်... အဲဒါတွေကို ဖျက်လို့ မရရင် ပိုကောင်းတယ်..."

ဤစကားကို ကြားပြီးနောက် ဝူရှင်းယွဲမှာ အတွေးနက်နေပုံ ရသည်။ သူမသည် အခြေခံ ကန့်သတ်ချက်များစွာကို ကျွမ်းကျင်နေပြီ ဖြစ်ပြီး အားလုံးမှာ ဝင်္ကပါများ၏ အခြေခံ မှတ်တမ်း မှ လာခြင်း ဖြစ်သည်။ သူမ၏ သင်ယူမှု အမြန်နှုန်းက မင်ကွမ်းထက် သိပ်မနှေးလှချေ။ သူတို့ နှစ်ယောက်က မတူညီသော အရာများကို လေ့လာနေခြင်းသာ ဖြစ်သည်။

"ကျွန်မ ကြိုးစားကြည့်ပါမယ်..."

ဝူရှင်းယွဲက ယုံကြည်မှု အပြည့်ဖြင့် ကတိမပေးရဲဘဲ ပြန်ဖြေလိုက်သည်။ လီချင်းချိုးက ချင်းရှောင်ဓားကို သူမထံ ပြန်ပေးလိုက်ပြီးနောက် အားပေးစကား အနည်းငယ် ပြောကြားကာ သူမကို ထွက်သွားခွင့် ပြုလိုက်သည်။

ဝူရှင်းယွဲ လင်းရှောင်ခြံဝင်းမှ ထွက်သွားသောအခါ လီချင်းချိုး ပြုံးလိုက်မိသည်။ ဝိညာဉ်ကြေးနီက မှော်ပစ္စည်းများ ဖန်တီးရန် အမှန်တကယ် သင့်တော်ပေသည်။ ဝိညာဉ်ကြေးနီတောင်တန်း ရှိနေခြင်းဖြင့် ချင်းရှောင်ဂိုဏ်းက ရှေ့သို့ ခြေလှမ်းကြီး တစ်လှမ်း လှမ်းနိုင်တော့မည်။

အစွမ်းထက်သော ရန်သူများထံမှ ချက်ချင်း ခြိမ်းခြောက်မှုမျိုး မရှိလျှင်တောင် လီချင်းချိုးက တပည့်များကို မှော်ပစ္စည်းများ တပ်ဆင်ပေးရန် အချိန်ကို အမိအရ ဆုပ်ကိုင်ဖို့ ပြင်ဆင်ထားသည်။

အစွမ်းထက်သော ရန်သူ ပေါ်လာချိန်မှ ပြင်ဆင်မှုများ စတင်၍ မရနိုင်ချေ။ ချင်းရှောင်ဂိုဏ်း အနေဖြင့် မည်သည့် ပြဿနာကိုမဆို ရင်ဆိုင်ဖြေရှင်းနိုင်သည့် ယုံကြည်မှု ရှိစေရန်အတွက် ဂိုဏ်းကို တတ်နိုင်သမျှ အစွမ်းထက်လာစေရန် လုပ်ဆောင်ချင်ခဲ့သည်။ ဝူရှင်းယွဲ ဖန်တီးထားသော ချင်းရှောင်ဓားကြောင့် လီချင်းချိုး၏ စိတ်အခြေအနေ တိုးတက်လာပြီး ချစ်လှစွာသော တပည့်များကို ကျင့်ကြံခြင်းတွင် လမ်းညွှန်ပြသပေးရန် တောင်အောက်သို့ ဆင်းလာခဲ့သည်။

ယခုအခါ ရှောင်ညီနောင်သုံးယောက်နှင့် ယွင်ချိုင်တို့ အားလုံးက ကျင့်ကြံခြင်း လမ်းကြောင်းပေါ်သို့ ရောက်ရှိနေကြပြီ ဖြစ်သည်။ သူတို့က လီချင်းချိုး အမြဲတမ်း စောင့်ကြည့်နေစရာ မလိုဘဲ ကိုယ့်ဘာသာ ကျင့်ကြံနိုင်ပြီ ဖြစ်ရာ လီချင်းချိုး အနေဖြင့် သူတို့အတွက် များသောအားဖြင့် စိုးရိမ်စရာ မလိုဘဲ ရံဖန်ရံခါသာ လမ်းညွှန်မှုများ ပေးရန် လိုအပ်တော့သည်။

ချင်းရှောင်ဓား အကြောင်း သတင်းများက လျင်မြန်စွာ ပျံ့နှံ့သွားပြီး ဂိုဏ်းက သူတို့အတွက် မှော်ပစ္စည်း တစ်ခု ဖန်တီးပေးရန် ပြင်ဆင်နေကြောင်းကိ​ြ သိရှိသွားကြရာ တပည့်များကို စိတ်လှုပ်ရှားသွားစေခဲ့သည်။ သူတို့က အဆက်အသွယ်များကို အသုံးပြု၍ မှော်ပစ္စည်း တစ်ခု ရရှိရန် မည်သို့ အရည်အချင်း ပြည့်မီရန် လိုအပ်သနည်း ဆိုသည်ကို စုံစမ်းမေးမြန်းလာကြသည်။

ဂိုဏ်းက တပည့်တိုင်းအတွက် မှော်ပစ္စည်း တစ်ခု ပြင်ဆင်ပေးနိုင်မည် မဟုတ်ချေ။ သူတို့က စုံစမ်းမေးမြန်းပြီးနောက် မည်သည့် တာအိုလမ်းကြောင်းကို ကြိုးစားရမည် ဆိုသည်ကိုသာ သိကြသည်။

နှစ်ကုန်ပိုင်းသို့ ရောက်ရှိလာပြီ….

ရှန်ယွဲ့နှင့် ရွှီကျင်းတို့က သူတို့၏ လူများနှင့်အတူ ပြန်ရောက်လာကြသည်။ လီချင်းချိုးက သူတို့နှစ်ယောက်ကို လင်းရှောင်ခြံဝင်းထဲသို့ ခေါ်ဆောင်လာပြီး ရွှီကျင်းကို မြင်သောအခါ မျက်မှောင်ကြုတ်သွားသည်။

ရွှီကျင်း၏ ညာဘက်လက်မောင်း ကျိုးနေပြီး ညာဘက်လက် လွတ်ဟာနေရာ သူ့ကို သတ်ဖြတ်လိုစိတ်များ ဖြစ်ပေါ်လာစေပြီး သူ့ မျက်နှာထား အရုပ်ဆိုးသွားသည်။

ရှန်ယွဲ့က လီချင်းချိုး အနားသို့ လာကာ…

"တာဝန် ပြီးဆုံးပါပြီ... ဒါပေမဲ့ ရွှီကျင်းအတွက် ကျွန်တော် စိတ်မကောင်းပါဘူး..."

ရွှီကျင်းက လက်ထဲရှိ အထုပ်ကို စားပွဲပေါ် တင်လိုက်ပြီး ….

"ဒါက လင်းထျန်းဂိုဏ်းရဲ့ ဒုတိယ ကာကွယ်စောင့်ရှောက်သူ ရှောင်ဝူဟွေ့ရဲ့ ခေါင်းပါ... ခွဲခြားသိနိုင်အောင် လျှို့ဝှက်ဆေး တစ်မျိုးနဲ့ ထိန်းသိမ်းထားပါတယ်..."

"ဒါ ဘယ်သူ့လက်ချက်လဲ..."

"ရှောင်ဝူဟွေ့ပါ..."

"ဘာဖြစ်ခဲ့တာလဲ..." လီချင်းချိုး၏ မျက်မှောင်ကြုတ်မှုက ပိုမို နက်ရှိုင်းလာသည်။

ရှန်ယွဲ့က ….

"ရှောင်ဝူဟွေ့ကလည်း ကျင့်ကြံသူ တစ်ယောက်ပါ... သူ့ရဲ့ ကျင့်ကြံခြင်းက မူလအားဖြည့်နယ်ပယ် စတုတ္ထအလွှာကို ရောက်နေတယ်... သူ့ရဲ့ သားသုံးယောက်က ချင်းရှောင်ဂိုဏ်းမှာ ကျင့်ကြံနေပြီး ခင်ဗျားရဲ့ နောက်ကိုတောင် လိုက်နေကြတယ် ဆိုတာ သူ သိတယ်... သူနဲ့ ရွှီကျင်း နှစ်ယောက်စလုံး ပြင်းပြင်းထန်ထန် ဒဏ်ရာရသွားပြီးနောက်မှာ သူက ကျွန်တော့်ကို သနားဖို့ တောင်းဆိုခဲ့တယ်... ခင်ဗျား သူ့ကို သတ်မှာ မဟုတ်ဘူးလို့ ပြောပြီး သူ့ကို အရှင်လတ်လတ် ပြန်ခေါ်သွားပေးဖို့ မျှော်လင့်ခဲ့တယ်... ကျွန်တော် တုံ့ဆိုင်းနေခဲ့ပေမဲ့ ရွှီကျင်းက သူ့ဓားကို တိုက်ရိုက် ဝှေ့ယမ်းပြီး ရှောင်ဝူဟွေ့ကို ခေါင်းဖြတ်ဖို့ ရည်ရွယ်ခဲ့တယ်... ဒါပေမဲ့ ရှောင်ဝူဟွေ့က သာမန်လူ မဟုတ်ဘူး... မသေခင်မှာ သူက ရွှီကျင်းရဲ့ ဓားကိုင်ထားတဲ့ ညာဘက်လက်မောင်းကို လက်ဝါးနဲ့ ရိုက်ချိုးပစ်လိုက်တယ်... အရေးကြီးတဲ့ အချိန်မှာ ရွှီကျင်းက လေထဲမှာ ရှိနေတဲ့ ဓားကို ပါးစပ်ထဲ စုပ်ယူလိုက်ပြီး ဓားရိုးကို ကိုက်ကာ တစ်ချက်တည်းနဲ့ သူ့ကို ခေါင်းဖြတ်ပစ်လိုက်တယ်..."

ဤအကြောင်းကို ပြောရလျှင် ရှန်ယွဲ့၏ မျက်နှာအမူအရာမှာ အလွန် ထူးဆန်းနေသည်။ရွှီကျင်း ဓားကို ကိုက်ထားသည့် မြင်ကွင်းကို ပြန်တွေးကြည့်ရန် သူ အဓိပ္ပာယ်မဲ့နေဆဲဟု ခံစားရသည်။

ရွှီကျင်းက သာမန်လူ မဟုတ်ကြောင်း သူ ပထမဆုံးအကြိမ် သဘောပေါက်သွားခြင်းလည်း ဖြစ်သည်။

ရွှီကျင်းက ….

"စီနီယာရှန်ရဲ့ အမှား မဟုတ်ပါဘူး... သူက နှစ်ဖက်စလုံး အကျိုးမဲ့မယ့် အခြေအနေ ဖြစ်သွားမယ်လို့ ပြောပြီး ကျွန်တော့်ကို မျက်နှာသာ ပေးခဲ့တာပါ... ဒါပေမဲ့ စီနီယာရှန်သာ မလှုပ်ရှားခဲ့ရင် ကျွန်တော် ရှောင်ဝူဟွေ့ရဲ့ ပြိုင်ဘက် ဖြစ်လာမှာ မဟုတ်ဘူး... လက်တစ်ဖက် ဆုံးရှုံးသွားတာနဲ့ ပတ်သက်လို့တော့ အဲဒါက ဘာမှမဟုတ်ပါဘူး..."

သူ့ မျက်နှာအမူအရာက တည်ငြိမ်နေပြီး ဤကိစ္စကို တကယ်ပဲ အလေးအနက် မထားသကဲ့သို့ပင်။

လီချင်းချိုးက …

"မင်းရဲ့ ပြတ်သွားတဲ့ လက်မောင်းကို ပြန်ယူလာခဲ့လား..."

"ကျွန်တော် ယူလာခဲ့တယ်... ဂိုဏ်းချုပ်ရဲ့ ဆေးပညာနဲ့ဆိုရင် အဲဒါကို ပြန်ဆက်ပေးနိုင်မယ် ထင်လို့ ကျွန်တော် ကိုယ်တိုင် သယ်လာခဲ့တာပါ..."

ရှန်ယွဲ့က သူ၏ ကျောမှ အထုပ်ကို ဖြုတ်၍ စားပွဲပေါ် တင်လိုက်ပေးလိုက်တော့ ရွှီကျင်းက လီချင်းချိုးကို ကြည့်ပြီး…

"ဂိုဏ်းချုပ်... ကျွန်တော်က ဂိုဏ်းချုပ်ကို အခက်တွေ့စေမှာ စိုးလို့ သူ့ကို တိုက်ရိုက် သတ်ပစ်လိုက်တာပါ... အကယ်၍ ညီငယ်သုံးယောက်က ဒီအကြောင်းကို မေးရင် အမှန်တိုင်း ပြောလိုက်ပါ... သူတို့ ကျွန်တော့်ကို မုန်းရင်လည်း မုန်းပါစေ... သေချာတာပေါ့... အကယ်၍ ဂိုဏ်းချုပ် ကိုယ်တိုင်ကလည်း သူ့ကို မသတ်ချင်ခဲ့ဘူး ဆိုရင် ကျွန်တော့်ကို အပြစ်ပေးပါ..."

လီချင်းချိုးက သူ့ကို စိုက်ကြည့်လိုက်ပြီး….

"မင်း ဘာ အဓိပ္ပာယ်မရှိတာတွေ ပြောနေတာလဲ... ဒီကိစ္စကို ငါ ခိုင်းခဲ့တာဆိုတော့ ငါ တာဝန်ယူရမှာပေါ့... အဲဒီ သုံးယောက်က မင်းကို တကယ် မုန်းတယ်ဆိုရင် မင်းကို ထွက်သွားခိုင်းမယ့်အစား သူတို့ကိုပဲ ငါ စွန့်လွှတ်လိုက်မယ်..."

ဤစကားကို ကြားသောအခါ ရွှီကျင်း မှင်သက်သွားတောသည်။ ဂိုဏ်းချုပ်က ညီငယ်သုံးယောက်ကို အလွန် အလေးထားကြောင်း မိသားစု တစ်ခုလုံးရှိ လူတိုင်း သိကြပြီး သူတို့က တရားဝင် ဆရာနှင့် တပည့် မဟုတ်သော်လည်း တကယ်တမ်းတွင် ဆရာနှင့် တပည့် ဖြစ်နေကြသည်။

ဤအခြေအနေများအောက်တွင် လီချင်းချိုး၏ စကားကို ကြားသောအခါ သူ ဘယ်လိုလုပ် စိတ်မလှုပ်ရှားဘဲ နေနိုင်မည်နည်း…..