အခန်း (၁၀၁၃-၁၀၁၄)
Vol. 102 Ch. 1013-1014
အခန်း (၁၀၁၃) တပ်မတော်ကြီး ချီတက်ပြီ
မြို့တော် ရဲ့ တံခါးမကြီးမှာတော့ မရေမတွက်နိုင်တဲ့ ယင်စစ်သည်တော်တွေဟာ စစ်ကြောင်းလိုက် ချီတက်နေကြပြီး၊ တစ်စစချင်း ပေါ်ပေါက်လာတဲ့ တံတားတွေပေါ်ကနေတစ်ဆင့် နေရာအနှံ့အပြားဆီကို သွားနေကြပါတယ်။
ရှန်းထူချန်းနဲ့ အခြားသူတွေဟာ ကောင်းကင်ယံမှာ ရပ်တန့်နေပြီး ဒီမြင်ကွင်းကို အဝေးကနေ လှမ်းကြည့်နေကြရာ သူတို့ရဲ့ မျက်နှာတွေဟာ တစ်ယောက်ထက်တစ်ယောက် ပိုပြီး လေးနက်နေကြပါတယ်။
"မြို့တော်မှာ ယင်စစ်သည်တော် တစ်သန်းရှိတယ်၊ နေရာအနှံ့က ယင်စစ်သည်တော်ဌာနတွေက စစ်သည်တော်တွေကိုပါ ပေါင်းလိုက်ရင် အရေအတွက်က ကြောက်စရာကောင်းလောက်အောင် များလွန်းတယ်"
"ဒီပုံစံအတိုင်းဆိုရင်တော့ ဟိုလူကြီးမင်းက ယင်စစ်သည်တော် အားလုံးကို လှုပ်ရှားခိုင်းလိုက်ပုံပဲ ဒီလို မြင်ကွင်းမျိုးကို နောက်ဆုံးမြင်ခဲ့ရတာက အရင်တုန်းက ဖူထူလောကရဲ့ ယင်မိစ္ဆာတွေ ကျူးကျော်လာတုန်းကပဲ"
"ယိုဖန့်... မင်းပြောပုံအရဆိုရင် ဒီကိစ္စရဲ့ အစက ဝိညာဉ်နတ်ဘုရားဂိုဏ်းက ကျင့်ကြံသူတစ်ယောက်က အဲဒီနေကင်းလှည့်အရှင်ကို လုပ်ကြံဖို့ ကြိုးစားခဲ့လို့ဆိုတာ သေချာလား "
အားလုံးက ယိုဖန့်ဆီကို လှည့်ကြည့်လိုက်ကြပါတယ်။
ယိုဖန့်က ခပ်ဖွဖွ ခေါင်းညိတ်ပြတယ်
"သူ ပြောတာတော့ အဲဒီအတိုင်းပဲ ပြီးခဲ့တဲ့ ရက်ပိုင်းက ဖန့်ချန် လုပ်ကြံခံရတာကလည်း တကယ်ပဲ အမှန်တရားဖြစ်သလို အခုတလောမှာလည်း ဖန့်ချန်ရဲ့ လူယုံဖြစ်တဲ့ ဟူကျောက်မြို့က နေကင်းလှည့်နတ်ဘုရားအသစ်လည်း လုပ်ကြံခံခဲ့ရတယ်"
"ရန်သူက လုပ်ကြံဖို့ ကျရှုံးသွားပြီးနောက် ချန်ရစ်ခဲ့တဲ့ သဲလွန်စတွေက လင်ခုန်းမြို့ မြို့စား ကျိုးနင်ဆီကို ညွှန်ပြနေတယ်"
ကျိုးနင်
အားလုံးရဲ့ မျက်နှာတွေ ပြောင်းလဲသွားကြတယ်၊ အဲဒါက ရှန်းထူချန်းရဲ့ လူယုံ မဟုတ်လား
ရှန်းထူချန်းက ယိုဖန့်ကို ကြည့်လိုက်တယ်
"ပြီးတော့ရော"
ကိစ္စက ဒီမှာတင် မပြီးနိုင်တာ သေချာပါတယ်။
မဟုတ်ရင်တော့ ဒီယင်စစ်သည်တော်တွေဟာ တရားသူကြီးဌာနရှိရာဘက်ကို ဦးတည်လာမှာဖြစ်ပြီး အခုလို တခြားနေရာတွေကို သွားနေမှာ မဟုတ်ဘူးလေ။
"ပြီးတော့ ဖန့်ချန်က ဒါဟာ ဝိညာဉ်နတ်ဘုရားဂိုဏ်းက တရားသူကြီးဌာနကို အပြစ်ပုံချပြီး ငရဲပြည်ကို ဖရိုဖရဲ ဖြစ်အောင် လုပ်ချင်နေတာလို့ ဆုံးဖြတ်လိုက်တယ် ဒါကြောင့် အခု စစ်တပ်လွှတ်တာက ငရဲပြည်ထဲက ဝိညာဉ်နတ်ဘုရားဂိုဏ်းဝင်တွေကို ရှင်းလင်းဖို့ပဲ"
"အောက်ဆင်းသူပဲ ဖြစ်ဖြစ်၊ လေလွင့်ဝိညာဉ်ပဲ ဖြစ်ဖြစ် အခုချိန်မှာတော့ အားလုံးက သူ့ရဲ့ ပစ်မှတ်တွေပဲ"
ယိုဖန့်က အေးစက်စက် အသံနဲ့ ပြောလိုက်ပါတယ်။
"ဝိညာဉ်နတ်ဘုရားဂိုဏ်းက သူနဲ့ ရန်ငြိုးရှိလို့လားဘာလို့ သူ့ကို လုပ်ကြံခိုင်းရတာလဲ ဝိညာဉ်နတ်ဘုရားဂိုဏ်းက ကျင့်ကြံသူတွေက တော်တော်လေး ယဉ်ကျေးပြီး အကျိုးအကြောင်း သိတတ်ကြတယ် ငရဲပြည်ကြီး ဖရိုဖရဲ ဖြစ်သွားတာမျိုးကိုတော့ သူတို့လည်း အလိုရှိမှာ မဟုတ်ပါဘူး"
"ဝိညာဉ်နတ်ဘုရားဂိုဏ်းက ဖော်စပ်တဲ့ ဆေးလုံးတွေက ယင်သက်တမ်း နဲ့ အနည်းငယ် ဆင်တူတယ်၊ အာနိသင်က ပိုတောင် ပြင်းသေးတယ် နေကင်းလှည့်နတ်ဘုရား တချို့ဆီက ကြားတာတော့ လူ့လောကမှာ ဝိညာဉ်နတ်ဘုရားဂိုဏ်းရဲ့ အင်အားက အရမ်းကို ကြောက်ဖို့ကောင်းတယ်တဲ့"
"ဒီကိစ္စကို အားလုံး ခဏလောက် ငြိမ်နေကြပါ အကယ်၍ ဒီအတောအတွင်းမှာ ဝိညာဉ်နတ်ဘုရားဂိုဏ်းက ကျင့်ကြံသူတွေ အကူအညီ လာတောင်းရင်လည်း မကူညီကြဖို့ ကျုပ် တိုက်တွန်းချင်တယ် ဖြစ်နိုင်တာက ဒါတွေအားလုံးဟာ တကယ်ပဲ ငရဲမင်းကြီးရဲ့ အလိုတော် ဖြစ်နေလို့ပါပဲ"
ရှန်းထူချန်းက လေးနက်စွာ ပြောလိုက်ပါတယ်။
အားလုံး တစ်ယောက်ကိုတစ်ယောက် ကြည့်လိုက်ကြပြီး တစ်ခုခုကို စဉ်းစားသလိုနဲ့ ခေါင်းညိတ်လိုက်ကြပါတယ်။
လူနည်းစုရဲ့ မျက်ဝန်းတွေမှာတော့ ဒေါသရိပ်တွေ ဖြတ်ပြေးသွားပြီး ထိုယင်စစ်သည်တော်အုပ်စုကြီးကို မကျေမနပ် ကြည့်နေကြပါတယ်။
ယင်စစ်သည်တော်ဌာန။
တုယွန်းရွှီက မြို့တော်မှာရှိတဲ့ ဝိညာဉ်နတ်ဘုရားကျောင်း တွေရဲ့ အသေးစိတ် အချက်အလက်တွေကို ယူလာပေးပါတယ်။
ဖန့်ချန်က တစ်ချက်ကြည့်လိုက်ပြီး အံ့အားသင့်စွာနဲ့
"ဝိညာဉ်နတ်ဘုရားကျောင်း ခုနစ်ရာ သုံးဆယ့်နှစ်ကျောင်း တောင်လား "
မြို့တော် တစ်ခုတည်းမှာတင် ဝိညာဉ်နတ်ဘုရားကျောင်း ခုနစ်ရာ သုံးဆယ့်နှစ်ကျောင်း ရှိနေတာလား
ဝိညာဉ်နတ်ဘုရားဂိုဏ်းနဲ့ မြို့တော်က အရာရှိကြီးတွေကြားမှာ ပတ်သက်မှု မရှိဘူးလို့ ပြောရင် ဖန့်ချန်ကတော့ လုံးဝ ယုံမှာ မဟုတ်ပါဘူး။
အခုချိန်မှာ သိချင်တာက သူတို့ရဲ့ ပတ်သက်မှုက ဘယ်လောက်အထိ နက်ရှိုင်းသလဲ ဆိုတာပါပဲ။
ချိုးကျင်က တိုးတိုးလေး ပြောတယ်
"လူကြီးမင်းဖန့်... ဝိညာဉ်နတ်ဘုရားကျောင်းတွေက အကျိုးအမြတ် အများကြီး ပေးတာကြောင့် လူအတော်များများက သူတို့နဲ့ ဆက်ဆံရေး အရမ်းကောင်းကြတယ်"
"ဒါ့အပြင် လူ့လောကမှာ ဝိညာဉ်နတ်ဘုရားဂိုဏ်းရဲ့ အင်အားက သာမန်မဟုတ်ဘူးလို့ ကြားရတယ် အောက်ဆင်းသူ အတော်များများက သူတို့ဆီက ဆေးဝယ်ကြသလို၊ အောက်ဆင်းသူ အတော်များများကလည်း ဝိညာဉ်နတ်ဘုရားဂိုဏ်းက ကျင့်ကြံသူတွေ ကိုယ်တိုင် ဖြစ်နေကြတာ..."
"ဝိညာဉ်နတ်ဘုရားဂိုဏ်းနဲ့ ဆက်ဆံရေးကောင်းရင် အဲဒီလူတွေ အားလုံးနဲ့ ဆက်ဆံရေးကောင်းသွားသလို ဖြစ်နေတာပါ"
"အကြီးဆုံးကျောင်းက ဘယ်မှာလဲ "
ဖန့်ချန်က ပြုံးပြီး မေးလိုက်ပါတယ်။
တုယွန်းရွှီက မြို့တော် မြေပုံကို ယူလာပြီး အလယ်ဗဟို ဧရိယာက နေရာတစ်ခုကို လက်ညှိုးထိုးပြပါတယ်။
"သွားကြစို့၊ မြို့တော်ထဲက ဝိညာဉ်နတ်ဘုရားကျောင်းတွေကို အရင် ရှင်းထုတ်လိုက်မယ်"
ဖန့်ချန်က ထရပ်ပြီး အပြင်ကို လှမ်းထွက်သွားပါတယ်။
"ဝိညာဉ်နတ်ဘုရားက လူ့လောကမှာရှိတဲ့ ကျွန်တော့်ရဲ့ သားမြေးမြစ်တွေကို ဘေးကင်းပါစေ၊ တစ်သက်လုံး ရောဂါဘယ ကင်းဝေးပါစေလို့ ဆုတောင်းပေးတော်မူပါ"
"ကျွန်တော့်ရဲ့ အဖေနဲ့အမေကို ပြန်တွေ့ပါရစေလို့ ဝိညာဉ်နတ်ဘုရားကို ဆုတောင်းပါတယ်၊ ကူညီပေးတော်မူပါ"
ခမ်းနားထည်ဝါလှတဲ့ ကျောင်းဆောင်ကြီးထဲမှာ လူတွေဟာ ဝိညာဉ်နတ်ဘုရားရုပ်တုကို တစ်ယောက်ပြီးတစ်ယောက် ဦးချနေကြပါတယ်။
ပြီးနောက် ကျောင်းဆောင်မှာရှိတဲ့ အစေခံတွေဆီကို သွားပြီး ယင်သက်တမ်း တစ်ပြား (သို့မဟုတ်) တစ်ဝက်ကို ပေးလှူနေကြပါတယ်။
ဒါဟာ ဝိညာဉ်နတ်ဘုရားအတွက် ပူဇော်မှုပါပဲ။
အလှူငွေ ပိုပေးလေလေ၊ ဝိညာဉ်နတ်ဘုရားက ပိုပြီး ဆုတောင်းပြည့်လေလေလို့ ယုံကြည်နေကြတာမို့ နေရာအနှံ့က ဝိညာဉ်နတ်ဘုရားကျောင်းတွေမှာ အခုလို မြင်ကွင်းမျိုးကို အချိန်တိုင်း မြင်တွေ့နေရပါတယ်။
"အခုတလော ငရဲပြည်မှာ အခြေအနေတွေ အေးဆေးရဲ့လား "
ခံ့ညားထည်ဝါတဲ့ လူလတ်ပိုင်း အမျိုးသားတစ်ဦးဟာ လက်ကို နောက်ပစ်ပြီး ကျောင်းဆောင်ထဲ လမ်းလျှောက်နေပါတယ်၊ သူ့ဘေးမှာတော့ ဝိညာဉ်နတ်ဘုရားဂိုဏ်းဝင် ကျင့်ကြံသူတွေ အများကြီး ဝိုင်းရံနေကြပါတယ်။
ထိုအမျိုးသားရဲ့ ကျင့်ကြံမှု အရှိန်အဝါက သာမန်မဟုတ်ဘဲ အရှင် တစ်ယောက်နဲ့ ညီမျှနေပါတယ်။
လူ့လောကမှာဆိုရင်တော့ ဒါဟာ မသေမျိုးဘုရင်အဆင့် အစွမ်းထက်ပုဂ္ဂိုလ် တစ်ယောက်ပါပဲ။
"လူကြီးမင်းဟွမ်... အခြေအနေတွေက အေးဆေးပါပဲ၊ ဒါပေမဲ့ မကြာသေးခင်က ကျွန်တော်တို့ အခွန်ဆောင်ရတော့မယ်တဲ့ ဒီအခွန်က မနည်းလှဘူးနော်"
"ကျွန်တော်တို့ ဝိညာဉ်နတ်ဘုရားကျောင်းတွေက ငရဲပြည်အနှံ့မှာ ရှိနေတာ နေ့တိုင်း ရရှိတဲ့ ယင်သက်တမ်း က မနည်းဘူး မူလကတည်းက နေရာအစုံကို လာဘ်ထိုးနေရတာ အခု အခွန်ပါ ထပ်ဆောင်ရမယ်ဆိုရင် ဆုံးရှုံးမှုက တော်တော်ကြီးမားလိမ့်မယ်"
"ယင်စစ်သည်တော်ဌာနကို အသစ်ရောက်လာတဲ့ နေကင်းလှည့်အရှင်က ဒီနည်းလမ်းကို တင်ပြခဲ့တာလို့ ကြားတယ်၊ အခု ကျွန်တော်တို့တင် မဟုတ်ဘဲ တခြားအောက်ဆင်းသူတွေလည်း အခွန်ဆောင်နေရပြီ"
"လူကြီးမင်းဟွမ်... ကျွန်တော်တို့ လက်ဆောင်အနည်းငယ် သွားပေးကြည့်ရင်ရော အဲဒီလူက ကျွန်တော်တို့ ဝိညာဉ်နတ်ဘုရားကျောင်းတွေအတွက် အခွန် ကင်းလွတ်ခွင့် ပေးနိုင်မလားလို့လေ"
လူတိုင်းက အပြိုင်အဆိုင် အကြံပေးနေကြပါတယ်။
ဟွမ်ဝမ်ချင်း က မျက်မှောင်ကြုတ်လိုက်တယ်
"တကယ်ပဲ ပြဿနာရှာတတ်တာပဲ အရင်လို အေးအေးဆေးဆေး နေတာ ဘယ်လောက်ကောင်းလဲ ငါတို့ ဝိညာဉ်နတ်ဘုရားကျောင်းတွေက နှစ်တိုင်း နှစ်တိုင်း သူတို့အတွက် ပေးနေရတဲ့ လက်ဆောင်တွေက နည်းတာကျလို့ မင်းတို့ တခြားဌာနက အရှင် တွေကို မေးကြည့်ပြီးပြီလားအထူးသဖြင့် ယင်စစ်သည်တော်ဌာနရဲ့ ယိုဖန့် က ဘာပြောလဲ "
"မေးပြီးပါပြီ... ဒါပေမဲ့ မရဘူး"
"အရှင်ယို ပြောတာတော့ ဒီကိစ္စက နေကင်းလှည့်အရှင်အသစ်က ဇွတ်လုပ်တာတဲ့ သူတို့က ရာထူးတူတူပဲမို့ သူက ဝင်စွက်ဖက်ရင် ယင်စစ်သည်တော်ဌာနမှာ အတွင်းရေး ပြဿနာတွေ တက်နိုင်တယ်လို့ ဆိုတယ် ဒါကြောင့် ကျွန်တော်တို့ကိုပဲ အသာတကြည် အခွန်ဆောင်လိုက်ပါလို့ ပြောပါတယ်"
"ငါတို့ ဝိညာဉ်နတ်ဘုရားကျောင်းဆီကနေ အကျိုးအမြတ်တွေ အများကြီး ယူပြီးတော့ အခုကျ ငါတို့ကို ဒီလိုမျိုး နှိပ်ကွပ်ချင်နေတာလား၊ ဒီကောင်တွေက တကယ်ကို ကျေးဇူးကန်းတဲ့ ကောင်တွေပဲ"
ဟွမ်ဝမ်ချင်းက အေးစက်စက် နှာခေါင်းရှုံ့လိုက်ပါတယ်။
စကားပြောနေတုန်းမှာပဲ အခန်းထဲကို သူတို့ လူတစ်ယောက် အပြေးအလွှား ဝင်လာပါတယ်၊ မျက်နှာကလည်း ဖြူဖတ်ဖြူလျော် ဖြစ်နေပြီး
"လူကြီးမင်းတို့ မကောင်းတော့ဘူး ကျွန်တော်တို့ကို ယင်စစ်သည်တော်ဌာနက ဝိုင်းထားလိုက်ပြီ "
အခန်း (၁၀၁၄) အဲဒီလို မလိုအပ်ပါဘူး
ယင်စစ်သည်တော်ဌာနက ဝိုင်းထားတာလား
အားလုံး တစ်ယောက်ကိုတစ်ယောက် ကြည့်လိုက်ကြပြီး တစ်ယောက်က ဒေါသတကြီး ပြောတယ်
"ယင်စစ်သည်တော်ဌာနက ဘာလုပ်ချင်တာလဲ ငါတို့က အကျိုးအမြတ်တွေလည်း အပြည့်အဝ ပေးထားတာပဲကို၊ ဘာလို့ ငါတို့ ဝိညာဉ်နတ်ဘုရားကျောင်းကို ဝိုင်းထားရတာလဲ "
"ထွက်ကြည့်ကြစို့"
အားလုံး ထရပ်လိုက်ကြတယ်၊ ဒီလူတွေအားလုံးက မသေမျိုးဘုရင် တွေဖြစ်ကြပြီး ငရဲပြည်မှာဆိုရင် သူတို့ရဲ့ အစွမ်းက အရှင် တွေနဲ့ ညီမျှပါတယ်။
အရှင်တွေနဲ့ ကွာခြားချက်တစ်ခုတည်းက သူတို့မှာ အရာရှိရာထူး မရှိတာပဲ ဖြစ်ပါတယ်။
ဒါကြောင့် သူတို့စိတ်ထဲမှာ ယိုဖန့်တို့လို လူမျိုးကို သိပ်ပြီး အထင်မကြီးကြပါဘူး။
လူ့လောကမှာဆိုရင် လွတ်လပ်သောမသေမျိုး တွေတောင် ရှိသေးတာပဲ၊ ဘယ်သူ့ရဲ့ အစွမ်းက ဒီက အရှင်တွေထက် မသာဘဲ နေမှာလဲ
"အားလုံးပဲ... စိတ်မလောကြနဲ့ဦး"
ဟွမ်ဝမ်ချင်းက မျက်နှာပျက်သွားပြီး
"ခဏနေရင် ငါပဲ ထွက်ပြီး စကားပြောမယ် ကိစ္စတွေ ပိုကြီးမသွားအောင် မင်းတို့တွေ ဝင်မပြောနဲ့ ဝိညာဉ်နတ်ဘုရားဂိုဏ်းက အားကောင်းတယ်ဆိုပေမဲ့ ဒီနေရာက ငရဲပြည်ပဲ"
"နယ်မြေခံမြေခွေးကို တောကလာတဲ့ နဂါးက မနိုင်ဘူး ဆိုတဲ့ စကားကို မင်းတို့လည်း နားလည်မယ် ထင်ပါတယ်"
"ငရဲပြည် ဖြစ်နေတော့ရော ဘာဖြစ်လဲ အကယ်၍ လွတ်လပ်သောမသေမျိုး တစ်ယောက်ယောက်သာ ဒီထဲကို ဝင်လာနိုင်ရင် အဲဒီအရှင်တွေ ရိုင်းစိုင်းရဲဦးမလား ကြည့်ချင်သေးတယ်"
တစ်ယောက်က ဒေါသတကြီး ပြောပါတယ်။
ဟွမ်ဝမ်ချင်းက ထိုလူကို တစ်ချက်ကြည့်ပြီး အလွန်လေးနက်စွာ ပြောလိုက်တယ်
"အခု ပြဿနာက အဲဒါပဲ၊ ငါကြားတာတော့ ငရဲမင်းကြီး ကိုယ်တိုင် လမ်းပြမှပဲ လွတ်လပ်သောမသေမျိုးတွေ ဝင်လာနိုင်တာတဲ့"
"ဒါ့အပြင် ကျင့်ကြံသူလွတ်တွေ အောက်ဆင်းရင်လည်း ဖူထူလောက ဘက်ကိုပဲ သွားကြတာ၊ မင်းတို့လည်း ကြားဖူးမှာပါ ဖူထူလောကထဲက ယင်မိစ္ဆာကြီးတွေရဲ့ အစွမ်းက လွတ်လပ်သောမသေမျိုး တွေထက် မနိမ့်ဘူး"
"ဒီနေရာကို အထင်မသေးနဲ့ ငါတို့ ဒီမှာ လာအလုပ်လုပ်နေတာက ယင်သက်တမ်း အနည်းငယ်လောက် အတွက်တင် မဟုတ်ဘူး"
အားလုံး ဖြည်းဖြည်းချင်း ငြိမ်သက်သွားကြပါတယ်။
ဒါကို မြင်တော့မှ ဟွမ်ဝမ်ချင်းက ထရပ်ပြီး အားလုံးကို ဦးဆောင်ကာ ဝိညာဉ်နတ်ဘုရားကျောင်း အပြင်ဘက်ကို ထွက်လာခဲ့ပါတယ်။
အပြင်က အစေခံတွေကတော့ ဒေါသတဖြတ်ဖြတ် ဖြစ်နေကြပါပြီ။
ဝတ်ပြုသူတွေကို တစ်ယောက်ပြီးတစ်ယောက် မောင်းထုတ်နေတာကို ကြည့်ပြီး အော်ဟစ်တားဆီးချင်ပေမဲ့ သတ်ဖြတ်လိုတဲ့ အငွေ့အသက်တွေ ထွက်နေတဲ့ ယင်စစ်သည်တော်တွေကြောင့် ကြောက်လန့်နေကြရပါတယ်။
ဟွမ်ဝမ်ချင်းတို့ ရောက်လာတော့မှ သူတို့ သက်ပြင်းချနိုင်တော့ပြီး ဟွမ်ဝမ်ချင်းတို့ ဘေးကို ပြေးလာကာ ယင်စစ်သည်တော်ဌာန ဘက်ကို ဒေါသတကြီး စိုက်ကြည့်ကြပါတယ်။
ဟွမ်ဝမ်ချင်းက ဖန့်ချန်ကို မမြင်ဖူးသလို ချိုးကျင်နဲ့လည်း ထိတွေ့မှု နည်းပါတယ်။
သူက ဝှေ့ဝဲကြည့်လိုက်ပြီးနောက် တစ်ဦးတည်းသော အသိဖြစ်တဲ့ ကျင်ရွှေကို မြင်သွားပါတယ်။
သူက စိတ်အားထက်သန်စွာနဲ့ ကျင်ရွှေကို လက်အုပ်ချီ နှုတ်ဆက်လိုက်တယ်
"အရှင်ကျင်... ဒီနေ့ ဒီလို အင်အားအလုံးအရင်းနဲ့ လာရတာက ဘာကိစ္စရှိလို့လဲခင်ဗျာ ဝိညာဉ်နတ်ဘုရားကျောင်းထဲကို ရာဇဝတ်သား ပြေးဝင်သွားလို့လား အရှင်ကျင် စိတ်ချပါ၊ အရှင်က အမိန့်ပေးတာနဲ့ ကျွန်တော်တို့ အစွမ်းကုန် ပူးပေါင်းပါ့မယ်"
"မိတ်ဆွေဟွမ်... ဒီလူကြီးမင်းက အရှင်ဖန့် ပါ"
ကျင်ရွှေက ဘာမှ အများကြီး မပြောဘဲ ဖန့်ချန်နဲ့ မိတ်ဆက်ပေးလိုက်ပါတယ်။
"ဪ... အရှင်ဖန့် ကိုး နာမည်ကြီးတာ ကြားဖူးတာ ကြာပါပြီဗျာ "
ဟွမ်ဝမ်ချင်းက ဖန့်ချန်ကို ချက်ချင်း လှည့်ကြည့်ပြီး မျက်နှာမှာ အံ့သြဝမ်းသာတဲ့ အမူအရာ ဖမ်းလိုက်ပါတယ်။
"အရှင်ချိုး... လူလွှတ်ပြီး ဒီနေရာကို ဖျက်ဆီးလိုက်ပါ၊ ပြီးတော့ ဒီအောက်ဆင်းသူတွေကိုလည်း အကုန်လုံး ဖမ်းသွားပြီး သေချာ စစ်ဆေးမေးမြန်းပါ"
ဖန့်ချန်က အေးအေးဆေးဆေး ပြောလိုက်ပါတယ်။
"ဟုတ်ကဲ့ပါ"
ချိုးကျင်က ခေါင်းညိတ်ပြပြီး လက်ဝေ့ယမ်းလိုက်တယ်
"ဒီနေရာကို ဖျက်ဆီးပစ်ကြ "
ယင်စစ်သည်တော်ဌာနက စစ်သည်တော်တွေဟာ အထက်လူကြီးရဲ့ အမိန့်ကို မဆန့်ကျင်ရဲတာကြောင့် ဝိညာဉ်နတ်ဘုရားကျောင်းကို ချက်ချင်း စတင်ဖျက်ဆီးပါတော့တယ်။
ဟွမ်ဝမ်ချင်းဟာ အချိန်အတော်ကြာအောင် ကြောင်အသွားပြီးမှ သတိဝင်လာကာ ဖန့်ချန်ကို ထိတ်လန့်တုန်လှုပ်စွာ ကြည့်ပြီး
"အရှင်ဖန့်... ဒါက ဘာဖြစ်လို့လဲခင်ဗျာ "
သူ့နောက်က အောက်ဆင်းသူတွေကတော့ အလွန်ဒေါသထွက်နေကြပါပြီ။
အကယ်၍ ဟွမ်ဝမ်ချင်းက ကြိုတင်မှာမထားခဲ့ရင် သူတို့တွေ လက်ပါနေကြလောက်ပါပြီ။
"ဘာဖြစ်လို့လဲ ဟုတ်လား "
ချိုးကျင်က လှည့်ကြည့်လိုက်ပြီး အေးစက်စက် ပြုံးကာ
"မင်းတို့ ဝိညာဉ်နတ်ဘုရားဂိုဏ်းက ဒီက အရှင် ကို လုပ်ကြံဖို့ လူလွှတ်ရဲတယ်ဆိုတော့ ဒါက ပုန်ကန်တာပဲ၊ အခုမှ ဘာလို့လဲလို့ လာမေးနေသေးတာလား "
"လုပ်ကြံတာ အထင်လွဲတာပါ ဒါ လုံးဝ အထင်လွဲတာပါ ကျွန်တော်တို့ ဝိညာဉ်နတ်ဘုရားဂိုဏ်းက အရှင်ဖန့်ကို လုပ်ကြံဖို့ ဘယ်လိုလုပ် လူလွှတ်မှာလဲ "
ဟွမ်ဝမ်ချင်းက အလောတကြီး ပြောပါတယ်။
ဖန့်ချန်က အေးအေးဆေးဆေး မေးလိုက်တယ်
"အထင်လွဲတာ ဟုတ်မဟုတ်ဆိုတာ မင်းပြောတာနဲ့ ပြီးရောလား "
"..."
ဟွမ်ဝမ်ချင်း ခဏလောက် ဆွံ့အသွားပြီးနောက် သွားကို တင်းတင်းကြိတ်ကာ ဖန့်ချန်အနားကို တိုးသွားပါတယ်။
သူက သူ့ရဲ့ အင်္ကျီလက်ထဲကနေ ငွေအိတ်တစ်အိတ်ကို တိတ်တဆိတ် ထုတ်ပြီး ဖန့်ချန်ကို ကမ်းပေးလိုက်တယ်
"ဒါကတော့ အရှင်ဖန့် ပြောတာပဲ အမှန်ဖြစ်ရမှာပေါ့ဗျာ"
ဖန့်ချန်က အိတ်ကို ယူပြီး အလေးချိန်ကို ချိန်ကြည့်လိုက်တယ်၊ ပြီးမှ ပြုံးနေတဲ့ ဟွမ်ဝမ်ချင်းကို ကြည့်ပြီး အိတ်ကို သိမ်းလိုက်ကာ ခပ်ဖွဖွ ခေါင်းညိတ်ပြတယ်
"ဒီ ယင်သက်တမ်း တွေကိုတော့ အစိုးရဘဏ္ဍာအဖြစ် သိမ်းလိုက်ပြီ"
ဘာ
ဟွမ်ဝမ်ချင်းဟာ ရှေ့က အရှင်ဖန့်ကို မယုံနိုင်စရာ ကောင်းလောက်အောင် ကြည့်နေမိပါတယ်။
ငရဲပြည်မှာ ဒီလောက်အရှက်မရှိတဲ့လူ ဘယ်တုန်းက ပေါ်လာတာလဲ
စကားပြောနေတုန်းမှာတင် ဝိညာဉ်နတ်ဘုရားကျောင်းရဲ့ တစ်ဝက်ကျော်က ပြိုကျသွားပါပြီ။
အပြင်က ဝတ်ပြုသူတွေက ဒါကို မြင်တော့ မျက်နှာတွေမှာ ကြောက်ရွံ့မှုတွေ ယှက်သန်းကုန်ပါတယ်။
သူတို့က ဝိညာဉ်နတ်ဘုရားဂိုဏ်းကို ယုံကြည်ကြပေမဲ့ ဌာနက အရာရှိတွေကို ပိုကြောက်ကြပါတယ်။
ပြောရရင် ငရဲပြည်မှာ သူတို့ ဘယ်လောက်အဆင်ပြေပြေ နေထိုင်နိုင်မလဲဆိုတာက ဒီအရာရှိတွေအပေါ်မှာပဲ မူတည်နေတာကိုး
ဟွမ်ဝမ်ချင်းက ရင်ထဲက ဒေါသကို ဖိသိပ်လိုက်ပြီး မျက်နှာမှာ အပြုံးတုကို ဆင်မြန်းကာ ဖန့်ချန်ကို ကြည့်လိုက်တယ်
"အရှင်ဖန့်... ကိစ္စတွေကို ဒီလောက်အထိ အပြတ်မလုပ်သင့်ပါဘူး တကယ်ပဲ အထင်လွဲတာ ရှိရင် အားလုံး ဝိုင်းထိုင်ပြီး ဆွေးနွေးကြတာပေါ့တရားသူကြီးဌာနက အရှင်ရှန်းထူချန်းကိုလည်း ခေါ်လိုက်မယ်လေ၊ အတူတူ စကားပြောကြရင် ဘယ်လိုလဲ "
"အဲဒီလို မလိုအပ်ပါဘူး"
ဖန့်ချန်က ပြုံးပြီး ပြောလိုက်ပါတယ်။
ဟွမ်ဝမ်ချင်း ခဏလောက် တိတ်ဆိတ်သွားပြီးနောက် အေးအေးဆေးဆေး ပြောလိုက်တယ်
"ကျွန်တော်တို့ ဝိညာဉ်နတ်ဘုရားဂိုဏ်းက ငရဲပြည်မှာ အခြေစိုက်လာတာ နှစ်ပေါင်းများစွာ ရှိပါပြီအရှင်ဖန့်လည်း ကျွန်တော်တို့ရဲ့ အခြေအနေကို နည်းနည်းပါးပါး သိမယ် ထင်ပါတယ်"
"လူ့လောကမှာဆိုရင် ကျွန်တော်တို့ ဝိညာဉ်နတ်ဘုရားဂိုဏ်းက ဘယ်သူ့ကိုမှ မကြောက်ခဲ့ဖူးဘူး ငရဲပြည်မှာတောင်မှ ကျွန်တော်တို့မှာ အရှင် မိတ်ဆွေတွေ အများကြီး ရှိပါတယ်"
"ဒါဆိုရင်လည်း... အဲဒီအရှင်တွေကို သွားအသိပေးလိုက်လေ၊ မင်းအတွက် လာပြီး တောင်းပန်ပေးတဲ့လူ သုံးယောက်ထက် ကျော်ရင် ဒီဝိညာဉ်နတ်ဘုရားကျောင်းကို ငါ ဆက်မဖျက်တော့ဘူး"
ဖန့်ချန်က ပြုံးပြီး ပြောပါတယ်။
"တကယ်လား"
ဟွမ်ဝမ်ချင်းရဲ့ မျက်ဝန်းတွေ လှုပ်ရှားသွားပါတယ်။
သူ့အတွက် လာတောင်းပန်ပေးမယ့် အရှင် သုံးယောက် ရှာရတာ ဘယ်လောက် ခက်မှာမို့လို့လဲ
"အရှင်ဖန့် ပြောတဲ့စကားက လွဲမှာ မဟုတ်ပါဘူး"
ချိုးကျင်က ဘေးကနေ လှောင်ပြောင်လိုက်တယ်
"မင်း မြန်မြန် သွားခေါ်တော့လေ၊ နောက်ကျသွားရင်တော့ ဒီနေရာက မြေဖြစ်သွားလိမ့်မယ် ဪ... ပြောဖို့မေ့လို့၊ ဒီကျောင်းတင် မကဘူး၊ တခြား ဝိညာဉ်နတ်ဘုရားကျောင်းတွေဆီကိုလည်း ငါတို့ လူတွေ လွှတ်ထားပြီးပြီ"
အားလုံး ထိတ်လန့်သွားကြပါတယ်။
ဟွမ်ဝမ်ချင်းရဲ့ ရင်ထဲမှာလည်း အေးခနဲ ဖြစ်သွားတယ်၊ တစ်ဖက်လူက ဝိညာဉ်နတ်ဘုရားဂိုဏ်းကို အမြစ်ပြတ် နှိမ်နင်းတော့မှာလား
သူက မသိမသာနဲ့ ကျင်ရွှေကို လှမ်းကြည့်လိုက်တယ်
"အရှင်ကျင်... ရှင်..."
"သွားခေါ်လိုက်ပါ"
ကျင်ရွှေက အေးအေးဆေးဆေး ပြောလိုက်ပါတယ်။
ဟွမ်ဝမ်ချင်း သဘောပေါက်သွားပါပြီ၊ ရှေ့ကလူကတော့ သူတို့ကို ကူညီမှာ မဟုတ်တော့ဘူး။
သူက အောက်ဆင်းသူ ကျင့်ကြံသူ အနည်းငယ်ကို ချက်ချင်း အမိန့်ပေးပြီး အကူအညီတောင်းဖို့ လွှတ်လိုက်ပါတယ်။
အဲဒီကျင့်ကြံသူတွေဟာ တချို့က တရားသူကြီးဌာန၊ တချို့က တရားရုံးဌာန ၊ တချို့က ဝိညာဉ်ဖမ်းဆီးရေးဌာန ဆီကို ပြေးသွားကြပါတယ်။
တရားသူကြီးဌာနရဲ့ တံခါးကတော့ တင်းတင်းပိတ်ထားပြီး လုံးဝ အတွေ့မခံပါဘူး။
တရားရုံးဌာနဘက်မှာတော့ ချီထျန်းရန်က ပျူပျူငှငှ ထွက်ကြိုပါတယ်။
ဝိညာဉ်နတ်ဘုရားဂိုဏ်းက ကျင့်ကြံသူဟာ သက်ပြင်းချနိုင်သွားပြီး အလောတကြီး ပြောလိုက်တယ်
"အရှင်ချီ... ဒီတစ်ခါတော့ ကျွန်တော်တို့ ဝိညာဉ်နတ်ဘုရားဂိုဏ်းကို ကူညီပေးပါဦး"
"ရပါတယ်၊ ရပါတယ်၊ ဘာဖြစ်လို့လဲ "
ချီထျန်းရန်က ပြုံးရွှင်စွာ ပြောပါတယ်
"ကျွန်တော်တို့ကြားက ဆက်ဆံရေးအရ အားမနာပါနဲ့၊ ပြောသာပြောပါ"
"ဒီလိုပါ..."
အဲဒီကျင့်ကြံသူက ကိစ္စအစအဆုံးကို ရှင်းပြလိုက်ပြီး၊ နောက်ဆုံးမှာတော့ ယင်စစ်သည်တော်ဌာနက အရှင်ဖန့်ကို မကျေမနပ်နဲ့ ကဲ့ရဲ့လိုက်ပါသေးတယ်။
"အရှင် အထင်တော့ အဲဒီလူက ဘာရည်ရွယ်ချက် ရှိတာလဲ၊ သူက ကျွန်တော်တို့ ဝိညာဉ်နတ်ဘုရားဂိုဏ်းဆီကနေ ဘာအကျိုးအမြတ် လိုချင်နေတာလဲ "
"ဪ... ဒီကိစ္စလား၊ မင်း ဒီမှာ ခဏ စောင့်နေဦးနော်"
ချီထျန်းရန်က ခေါင်းညိတ်ပြပြီးနောက် လှည့်ထွက်သွားကာ တရားရုံးဌာနရဲ့ တံခါးကြီးကို ပိတ်လိုက်ပါတော့တယ်။
အဲဒီကျင့်ကြံသူဟာ အပြင်မှာ စောင့်ရင်း၊ စောင့်ရင်းနဲ့ နောက်ဆုံးမှာတော့ အခြေအနေကို ရိပ်မိသွားပါတယ်။
သူက တရားရုံးဌာနကို ဒေါသတကြီးနဲ့ အော်ဟောက်ပါတော့တယ်
"ချီထျန်းရန် ငါတို့ဆီက အကျိုးအမြတ်တွေ ယူတုန်းကတော့ ဘယ်လိုမျက်နှာမျိုးလဲ အခု မျက်နှာလေး ပြပြီး တောင်းပန်ပေးဖို့ ပြောတာကို ဒီလိုမျိုး အတွေ့မခံဘဲ နေရက်တယ်ပေါ့ "
နာရီဝက်ခန့် ကြာပြီးနောက်...
ခမ်းနားလှတဲ့ ဝိညာဉ်နတ်ဘုရားကျောင်းဟာ မြေပြန့်သွားပါပြီ။
ဟွမ်ဝမ်ချင်းဟာ အကူအညီသွားတောင်းတဲ့ လူတွေ တစ်ယောက်ပြီးတစ်ယောက် ပြန်လာတာကို မြင်ပေမဲ့ သူတို့နောက်မှာ အရှင် တစ်ယောက်မှ ပါမလာတာကို တွေ့လိုက်ရတဲ့အခါ သူ့ရဲ့ မျက်နှာဟာ ဒေါသကြောင့် စိမ်းဖန့်လာပါတော့တယ်။