သိုင်းပညာရွေးချယ်ခြင်း

"အစ်ကိုဖုန်း... မင်း အစွမ်းထက်မှန်း ငါသိပေမဲ့ ဒီလောက်အထိတောင် ကြမ်းလိမ့်မယ်လို့ မထင်ထားခဲ့မိဘူး။ ပထမဆုံးအကြိမ် စိန်ခေါ်မှုမှာတင် ပုံရိပ်ယောင်တိုက်ပွဲခန်းရဲ့ အဆင့် ၈,၀၀၀ ချိတ်တယ်ဆိုတာ ဟို ပါရမီရှင် ခြောက်ယောက်ဆိုတာတွေထက် အများကြီး သာတာပဲ။ ဟဲဟဲ... အစ်ကိုဖုန်း၊ အစ်ကိုကမှ ကျောင်းသားသစ်တွေထဲမှာ တကယ့် နံပါတ်တစ် ပါရမီရှင်အစစ်ပဲ"

အမှန်တကယ်တန်းတွင် လင်းဖုန်းသည် ထိုမျှလောက်ထိ စိတ်လှုပ်ရှားမနေပေ။ သူ၏ဘေးမှ ကျန်းချီကျီကသာ ဇောကြွနေခြင်း ဖြစ်သည်။ လင်းဖုန်းမှာ ပါရမီရှင်ဆိုသည့် ဘွဲ့ထူးဂုဏ်ထူးများကို စိတ်မဝင်စားပေ။ သူ အနန္တလမ်းစဉ်အကယ်ဒမီသို့ လာခဲ့သည့် တစ်ခုတည်းသော ရည်ရွယ်ချက်မှာ မျိုးရိုးဗီဇကန့်သတ်ချက်ကို ချိုးဖျက်ပြီး သာလွန်လူသားတစ်ယောက် ဖြစ်လာရန်သာ ဖြစ်သည်။

အကယ်၍ ဤရည်မှန်းချက် မအောင်မြင်ပါက သူ မည်မျှပင် အစွမ်းထက်နေပါစေ၊ မည်မျှပင် နာမည်ကျော်နေပါစေ အရာအားလုံးက အဓိပ္ပာယ်မဲ့နေပေလိမ့်မည်။ နောက်ထပ် သုံးနှစ်အတွင်းမှာပင် သူသည် ထူးဆန်းသော ရောဂါဝေဒနာဖြင့် သေဆုံးသွားမည်ဖြစ်ပြီး သူ့ကို မည်သူမျှ မှတ်မိနေကြတော့မည် မဟုတ်ပေ။

"အစ်ကိုဖုန်း... ဒီနေ့တော့ ငါ မင်းကို မနှောင့်ယှက်တော့ဘူး။ ဟဲဟဲ... နောက်ရက်ကျမှပဲ အပြင်ထွက်ပြီး အောင်ပွဲခံကြမယ်‌လေ။ အစ်ကိုဖုန်းအတွက် ကြိုဆိုပွဲ လုပ်ပေးတဲ့ အနေနဲ့ပေါ့"

ကျန်းချီကျီသည် ပျော်ပျော်ရွှင်ရွှင်ဖြင့်ပင် လှည့်ထွက်သွားတော့သည်။ သူသည် အနန္တလမ်းစဉ်အကယ်ဒမီသို့ အချိန်ဖြုန်းရန်သာ လာခဲ့ခြင်းဖြစ်သည်။ လင်းဖုန်းကဲ့သို့ တကယ့် ပါရမီရှင်တစ်ဦးနှင့် ချိတ်ဆက်မိသွားသည်ကိုပင် သူ အလွန် စိတ်လှုပ်ရှားနေမိသည်။ ကျန်းချီကျီသည် ဒယ်တာမြို့တွင် သြဇာအာဏာရှိပုံရသော်လည်း အနန္တလမ်းစဉ်အကယ်ဒမီတွင်မူ သူ့ထက် အစွမ်းထက်သူများစွာ ရှိနေသည်။ ထို့ပြင် ဤအကယ်ဒမီတွင် ပြိုင်ဆိုင်မှုဟူသည် သိုင်းပညာအပေါ်တွင်သာ အခြေခံသဖြင့် ကျန်းချီကျီမှာ ဘာမှမဟုတ်သလို ဖြစ်နေပြီး လူရာမဝင်လှချေ။

လင်းဖုန်း ခေါင်းခါလိုက်ပြီး ထိုကျန်းချီကျီကို ဂရုမစိုက်တော့ဘဲ နေလိုက်သည်။

အဆောင်သို့ ပြန်ရောက်ပြီးနောက် သူသည် ပုံရိပ်ယောင်တိုက်ပွဲခန်းတွင် သူ စိန်ခေါ်ခဲ့သော လူများအကြောင်းကို ဖြည်းဖြည်းချင်း ပြန်လည် စဉ်းစားနေသည်။ အမှန်စင်စစ် သူ၏ ခွန်အားဖြင့်ဆိုလျှင် အဆင့်များကို အဆမတန် ကျော်ဖြတ်ပြီး စိန်ခေါ်ခြင်း မပြုခဲ့ပါက သူ၏ အဆင့်မှာ ယခုထက် များစွာ ပိုမြင့်နေပေလိမ့်မည်။ သို့သော် လင်းဖုန်းအတွက်မူ ထိုအဆင့်မှာ အဓိပ္ပာယ်မရှိပေ။ လင်းဖုန်းသည် သူ၏ လက်ရှိ ခွန်အား အကန့်အသတ်ကိုသာ စမ်းသပ်ကြည့်လိုခဲ့ခြင်း ဖြစ်သည်။

ယခု စိန်ခေါ်မှုအပြီးတွင် လင်းဖုန်းသည် သူ၏ စွမ်းအားကို အကြမ်းဖျင်း နားလည်သွားခဲ့ပြီ ဖြစ်သည်။ သူသည် အဆင့် (၈) သို့မဟုတ် အဆင့် (၉) ပရော်ဖက်ရှင်နယ် သိုင်းသမားတစ်ဦးနှင့် တန်းတူ ရှိနေပြီဟု ဆိုနိုင်သည်။ အကယ်၍ အဆင့်သတ်မှတ်ပွဲများတွင် အားနည်းသော ပညာရှင်များနှင့် တွေ့ဆုံပါက သူသည် အဆင့် (၉) ပရော်ဖက်ရှင်နယ် သိုင်းသမား ဖြစ်လာရန် အခွင့်အရေး များစွာ ရှိနေသည်။

သို့သော် စိန်ခေါ်မှုများစွာ ပြုလုပ်ပြီးနောက် လင်းဖုန်းသည် သူ၏ အားနည်းချက်ကိုလည်း သတိပြုမိသွားသည်။ အထူးသဖြင့် အိုးရန်ထျန်းနှင့် ရင်ဆိုင်ရစဉ်က ထိုထူးဆန်းသော ဓားချက်မှာ သူ့ကို အမှတ်ရစရာ ဖြစ်စေခဲ့သည်။

သိုင်းပညာ...။ ယခု လင်းဖုန်း လိုအပ်နေသည်မှာ နက်နဲသော သိုင်းပညာနှင့် သိုင်းကွက်များ ဖြစ်သည်။ 'နွားရိုင်း၏ အရှိန်အဝါ' တစ်ခုတည်းအပေါ် အားကိုးနေခြင်းမှာ လုံးဝ မလုံလောက်ပေ။ ထို့ပြင် သူသည် နွားရိုင်း၏ အရှိန်အဝါဖြင့် သူ၏ ခန္ဓာကိုယ်တစ်ခုလုံးကို အပြည့်အဝ မထိန်းချုပ်နိုင်သကဲ့သို့ ခန္ဓာကိုယ်ထဲရှိ ခွန်အားအလုံးစုံကိုလည်း ထုတ်ဖော်နိုင်ခြင်း မရှိသေးပေ။

အနည်းဆုံးတော့ သူ ဒုတိယအကြိမ် ပေါင်းစပ်ခဲ့သော ကြမ်းကြုတ်သားရဲ ယူနီကွန်းဆီမှ ရရှိသည့် မျိုးရိုးဗီဇ စွမ်းအားများမှာ သူ၏ ခန္ဓာကိုယ်ထဲတွင် ငြိမ်သက်နေဆဲ ဖြစ်ပုံရသည်။ 'နွားရိုင်း၏ အရှိန်အဝါ' ဖြင့်ပင် ထိုစွမ်းအားများကို မထုတ်ဖော်နိုင်သေးပေ။

"နက်နဲတဲ့ သိုင်းပညာတွေကို တခြားနေရာမှာ ရဖို့ ခက်နိုင်ပေမဲ့ အနန္တလမ်းစဉ်အကယ်ဒမီမှာတော့ မတူဘူး။ အမှတ်တွေနဲ့ ဝယ်လို့ရတာပဲ"

ထို့ကြောင့် လင်းဖုန်းသည် ကျောင်း၏ ကွန်ရက်ကို ချက်ချင်း ဖွင့်လိုက်ပြီး သိုင်းကျင့်စဥ်နှင့် သိုင်းနည်းစနစ်များကို လိုက်လံ ရှာဖွေတော့သည်။ သိုင်းကျင့်စဉ်နှင့် သိုင်းနည်းစနစ်များ တွဲလျက်ပါသော အရာမျိုးကို သူ ပို၍ လိုချင်သည်။

ထို့ပြင် လင်းဖုန်းသည် ယခုအချိန်တွင် သူ့အတွက် မည်သို့သော သိုင်းပညာမျိုး အလိုအပ်ဆုံးဖြစ်သည်ကိုလည်း ကောင်းကောင်း သိထားသည်။ ၎င်းမှာ သူ၏ ခန္ဓာကိုယ်ထဲရှိ ခွန်အားအလုံးစုံကို အပြည့်အဝ ထိန်းချုပ်နိုင်စေပြီး သူ၏ အစွမ်းအစများကို အစွမ်းကုန် ထုတ်ဖော်ပေးနိုင်မည့် သိုင်းပညာမျိုး ဖြစ်ရမည်။

ဤနည်းလမ်းဖြင့်သာ လင်းဖုန်းသည် အခြားသော ကြမ်းကြုတ်သားရဲများ၏ မျိုးရိုးဗီဇများကို ဆက်လက် ပေါင်းစပ်နိုင်မည်ဖြစ်ပြီး သူ၏ ခန္ဓာကိုယ်ကို အစဉ်တစိုက် သန်မာလာအောင် လုပ်ဆောင်နိုင်ပေလိမ့်မည်။

အနန္တလမ်းစဉ်အကယ်ဒမီတွင် မရေမတွက်နိုင်သော ပရော်ဖက်ရှင်နယ်အဆင့် သိုင်းပညာရပ်များ အပါအဝင် သိုင်းကျင့်စဉ်နှင့် သိုင်းနည်းစနစ်များစွာကိုလည်း မှတ်တမ်းတင် သိမ်းဆည်းထားသည်။ လင်းဖုန်းသည် ထို ပရော်ဖက်ရှင်နယ်အဆင့် သိုင်းပညာရပ်များကို လှည့်ပင် မကြည့်ပေ။ ပရော်ဖက်ရှင်နယ်အဆင့် သိုင်းပညာဟု ခေါ်ဆိုခြင်းမှာ ပရော်ဖက်ရှင်နယ် သိုင်းသမားများ ကျင့်ရမည့်အရာဟု ဆိုလိုခြင်း မဟုတ်ဘဲ ပရော်ဖက်ရှင်နယ် သိုင်းသမားများက ဖန်တီးထားခြင်း ဖြစ်သည်ဟု ဆိုလိုခြင်း ဖြစ်သည်။ ထိုသိုင်းပညာရပ်များကို တီထွင်ဖန်တီးခဲ့သူများပင် မျိုးရိုးဗီဇကန့်သတ်ချက်ကို ချိုးဖျက်နိုင်ခြင်း မရှိခဲ့ပါက ထိုသိုင်းပညာများကို ကျင့်ကြံနေခြင်းမှာ အဘယ်အသုံးကျပါမည်နည်း။

မျိုးရိုးဗီဇကန့်သတ်ချက်ကို ချိုးဖျက်ရန် သန္နိဋ္ဌာန်ချထားသော လင်းဖုန်းအတွက်မူ မျိုးရိုးဗီဇကန့်သတ်ချက်ကို ချိုးဖျက်စေပြီး သာလွန်လူသားအဆင့်သို့ ရောက်ရှိစေနိုင်မည့် သိုင်းပညာမျိုးကိုသာ သူ လက်ခံနိုင်သည်။

သို့သော် ဤကဲ့သို့သော သိုင်းပညာမျိုးမှာ များသောအားဖြင့် အလွန်တရာ စျေးကြီးလှသည်။ အနည်းဆုံး အမှတ်ပေါင်း ဒါဇင်နှင့်ချီ ပေးရသည်။ တစ်မှတ်လျှင် ယွမ်တစ်သန်း ဖြစ်သဖြင့် အမှတ် ဒါဇင်ပေါင်းများစွာဆိုသည်မှာ ယွမ်သန်းပေါင်း ဆယ်ချီ တန်ကြေးရှိသည်။

ဒါက စိတ်ကူးယဉ်နေရုံသက်သက် မဟုတ်ပါချေ။ အနန္တလမ်းစဉ်အကယ်ဒမီသာ မဟုတ်ပါက မည်မျှပင် ချမ်းသာကြွယ်ဝပါစေ မျိုးရိုးဗီဇကန့်သတ်ချက်ကို ချိုးဖျက်နိုင်မည့် သိုင်းပညာမျိုးကို ဝယ်ယူခွင့် ရရှိလိမ့်မည် မဟုတ်ပေ။

တကယ်တန်းတွင် သိုင်းပညာရပ်များ မရှိလျှင် မျိုးရိုးဗီဇကန့်သတ်ချက်ကို ချိုးဖျက်၍ မရနိုင်သည် မဟုတ်ပေ။ သမိုင်းတစ်လျှောက်၌ ပထမဆုံး မျိုးရိုးဗီဇကန့်သတ်ချက်ကို ချိုးဖျက်ခဲ့သည့် သာလွန်လူသားမှာလည်း မည်သည့်သိုင်းပညာမျှ မရှိခဲ့ပါချေ။ သို့သော် သိုင်းပညာရပ် တစ်ခုခုကို အသုံးပြုခြင်းမရှိဘဲ မျိုးရိုးဗီဇ ကန့်သတ်ချက်ကို ချိုးဖျက်ခြင်းသည် လမ်းညွှန်ပြသပေးမည့်သူ မရှိခြင်းနှင့် အတူတူပင် ဖြစ်သည်။ ထို့ကြောင့် မျိုးရိုးဗီဇကန့်သတ်ချက်ကို ချိုးဖျက်ရန်မှာလည်း ခက်ခဲပါလိမ့်မည်မှာ အသေအချာပင်။

လင်းဖုန်းတွင် အချိန်များစွာ မကျန်တော့ပေ။ အရာအားလုံးကို ခြုံငုံတွက်ချက်ကြည့်ပါက သူ့တွင် သုံးနှစ်မပြည့်သော အချိန်သာ ကျန်တော့သည်။ ထို့ကြောင့် သူသည် ရသမျှ အခွင့်အရေးကို အရယူကာ မည်သည့် စျေးပေးရသည်ဖြစ်စေ သုံးနှစ်အတွင်း မျိုးရိုးဗီဇကန့်သတ်ချက်ကို ချိုးဖျက်ပြီး သာလွန်လူသားအဆင့်သို့ ရောက်ရှိအောင် လုပ်ဆောင်ရမည် ဖြစ်သည်။

ထို့ကြောင့် လင်းဖုန်းသည် သာမန် သိုင်းပညာရပ်များကို ထည့်ပင် မစဉ်းစားတော့ပေ။ အထူးသဖြင့် ခန္ဓာကိုယ်ကို အပြည့်အဝ ထိန်းချုပ်လိုသည့် သူ၏ လိုအပ်ချက်နှင့် ကိုက်ညီမည့် အရာမျိုးကိုသာ သူ ရှာဖွေနေသည်။

“အရိုးချိုးဖျက် လက်သီးသိုင်း”

ယင်းသိုင်းပညာရပ်မှာ အရိုးများကို သန်မာအားကောင်းစေရန် အထူးပြု ကျင့်ကြံရသည့် သိုင်းပညာရပ်တစ်ခု ဖြစ်သည်။ ထူးခြားသည်ဟု ဆိုနိုင်သော်လည်း လင်းဖုန်းမှာမူ သိပ်သဘောမကျသဖြင့် ဆက်လက် ရွေးချယ်နေသည်။

“သွေးမူလ လျှို့ဝှက်မန္တန်”

လင်းဖုန်း သေသေချာချာ ကြည့်လိုက်သည်။ စျေးနှုန်းမှာ အတော်မြင့်ပြီး စုစုပေါင်း ၅၃ မှတ် ပေးရမည် ဖြစ်သည်။ ဤသည်မှာ သိုင်းပညာရှင်များ၏ သွေးကို ကျင့်ကြံရန်နှင့် ရှာဖွေလေ့လာမှုပြုရန် အထူးပြုထားသော နက်နဲသော သိုင်းပညာရပ်တစ်ခု ဖြစ်သည်။ သွေးကို ကြားခံအဖြစ် အသုံးပြုကာ မျိုးရိုးဗီဇ၏ လျှို့ဝှက်ချက်များကို နားလည်စေရန်နှင့် မျိုးရိုးဗီဇကန့်သတ်ချက်ကို ချိုးဖျက်ကာ သာလွန်လူသားအဆင့်သို့ ရောက်ရှိစေရန် ရည်ရွယ်ခြင်း ဖြစ်သည်။

လင်းဖုန်းမှာ ထိုသိုင်းပညာကို အနည်းငယ် စိတ်ဝင်စားသွားသည်။ ကံမကောင်းစွာဖြင့် ၎င်းမှာ သွေးကိုသာ အထူးပြုထားခြင်း ဖြစ်သဖြင့် သူ၏ ခန္ဓာကိုယ်တစ်ခုလုံး၏ အခြေအနေကို ထိန်းချုပ်နိုင်ရန် အထောက်အကူ မပြုနိုင်ပေ။

ထို့ကြောင့် လင်းဖုန်း ဆက်လက် ရှာဖွေနေပြန်သည်။

အနန္တလမ်းစဉ်အကယ်ဒမီ၏ နက်နဲသော သိုင်းပညာရပ်များမှာ အမှန်တကယ်ပင် အလွန်အဆင့်မြင့်လှသည်။ လင်းဖုန်း ဆက်ကြည့်နေမိသည်။ ဆင်နဂါးအတတ်ပညာ၊ နတ်ဆင်အတတ်ပညာ၊ ကြမ်းကြုတ်သော ကျား အတတ်ပညာ စသည်တို့မှာ မျိုးရိုးဗီဇကန့်သတ်ချက်ကို ချိုးဖျက်ထားသော သာလွန်လူသားများက ဖန်တီးခဲ့သည့် ပုံရိပ်နှင့် စိတ်ဆန္ဒကို အခြေပြုထားသော သိုင်းပညာများ ဖြစ်ကြသည်။

ထို့အပြင် နေပြင်းသုတ္တန်၊ ထာဝရ ရေစင်သုတ္တန်၊ ရေခဲခေတ်မန္တန် စသည့် ထူးဆန်းသော သိုင်းပညာရပ်များစွာလည်း ရှိနေသေးသည်။ သို့သော် လင်းဖုန်းကို စိတ်ကျေနပ်စေမည့် အရာ တစ်ခုမှ မတွေ့သေးပေ။

နောက်ဆုံးတွင် လင်းဖုန်းသည် အမှတ် ၁၀၀ ပေးရသော သိုင်းပညာတစ်ခုကို တွေ့လိုက်ရသည်။

ယင်းမှာ အနှိုင်းမဲ့လက်သီးပဏ္ဍိတ ကိုယ်တိုင် ဖန်တီးထားသည့် ကိုးထပ် ခန္ဓာကိုယ်ကျင့်စဉ် ဖြစ်သည်။ ပထမအဆင့်ကို အမှတ် ၁၀၀ ဖြင့် ဝယ်ယူနိုင်သည်။

ထိုပညာရပ်ကို မြင်လိုက်ရသည့်အခါ လင်းဖုန်းမှာ မျက်တောင်ပင် မခတ်နိုင်တော့ပေ။

အနှိုင်းမဲ့လက်သီးပဏ္ဍိတသည် အနန္တလမ်းစဉ်အကယ်ဒမီကို တည်ထောင်ခဲ့သူဖြစ်သလို ကမ္ဘာ့ပဏ္ဍိတ ကိုးပါးထဲမှ တစ်ပါးလည်း ဖြစ်သည်။ သူ ဖန်တီးထားသော သိုင်းပညာမှာ သေချာပေါက် သာမန်ထက် ထူးကဲနေပေလိမ့်မည်။

လင်းဖုန်းသည် ကိုးထပ် ခန္ဓာကိုယ်ကျင့်စဉ်၏ အသေးစိတ် မိတ်ဆက်ကို အမြန်ကြည့်လိုက်သည်။ ဤပညာရပ်သည် ခန္ဓာကိုယ် ကျင့်ကြံခြင်း၊ ခန္ဓာကိုယ်အင်အားအလုံးစုံကို အပြည့်အဝ ထိန်းချုပ်ခြင်း၊ ခန္ဓာကိုယ်၏ အမြင့်ဆုံး အလားအလာကို ဖော်ထုတ်ခြင်းနှင့် ခန္ဓာကိုယ်၏ အကန့်အသတ်ကို ကျော်လွန်သော စွမ်းအားကို ထုတ်ဖော်ခြင်းတို့တွင် အဓိကဦးစား‌ပေးထားသည့် အစွန်းရောက် စွမ်းအားနှင့် ခွန်အားကို ပေးစွမ်းနိုင်သည့် သိုင်းပညာရပ်တစ်ခု ဖြစ်သည်။

ပထမအဆင့်ကို တတ်မြောက်သွားပါက မိမိ၏ ခွန်အားကို နောက်ထပ် တစ်ဆ တိုးပွားစေမည်ဖြစ်သည်။ ဥပမာအားဖြင့် လင်းဖုန်းသည် ယခုအခါ ခွန်အား ၂ တန်ကို ထုတ်ဖော်နိုင်သည်။ အကယ်၍ သူသည် ကိုးထပ် ခန္ဓာကိုယ်ကျင့်စဉ် ပထမအဆင့်ကို တတ်မြောက်ပါက ခွန်အား ၄ တန်အထိ ထုတ်ဖော်နိုင်မည် ဖြစ်သည်။

ထိုကဲ့သို့ပင် ဒုတိယအဆင့်တွင် နောက်ထပ် ခွန်အား နှစ်ဆ တိုးပွားသွားမည် ဖြစ်ပြီး၊ တတိယအဆင့်တွင် နောက်ထပ် သုံးဆ စသည်ဖြင့် တိုးပွားသွားမည်ဖြစ်ပေသည်။ နဝမအဆင့်တွင်မူ တစ်စုံတစ်ယောက်၏ ခွန်အားကို ကိုးဆအထိ တိုးပွားနိုင်သည်ဟု ကောလာဟလများလည်း ရှိနေသည်။

ဤသည်မှာ အလွန်တရာပင် ကြောက်မက်ဖွယ်ကောင်းလှပေသည်။ ဤကဲ့သို့သော သိုင်းပညာရပ်မျိုးကို လင်းဖုန်း တစ်ခါမျှ မကြားဖူးခဲ့ပေ။

ထို့ပြင် ဤသိုင်းပညာ၏ အရေးကြီးဆုံးအချက်မှာ ခန္ဓာကိုယ်ကို လေ့ကျင့်ပေးခြင်းနှင့် ခန္ဓာကိုယ်၏ အလားအလာကို အပြည့်အဝ ဖော်ထုတ်ပေးခြင်း ဖြစ်သည်။ လင်းဖုန်းသည် ခန္ဓာကိုယ်၏ လက်မဝက်မကျန် အစိတ်အပိုင်းတိုင်းကို အပြည့်အဝ ထိန်းချုပ်နိုင်ရန် လိုအပ်နေသည်။ ဤအချက်မှာ လင်းဖုန်း၏ ခန္ဓာကိုယ်ထဲရှိ ခွန်အားများကို မထိန်းချုပ်နိုင်သည့် အားနည်းချက်ကို လုံးဝ ဖြေရှင်းပေးနိုင်ပေလိမ့်မည်။

“ဒီသိုင်းပညာရပ်က ငါ့အတွက် တကယ့်ကွက်တိပဲ... ကိုးထပ် ခန္ဓာကိုယ်ကျင့်စဉ်”

လင်းဖုန်း၏ မျက်နှာမှာ စိတ်လှုပ်ရှားမှုများဖြင့် ပြည့်နှက်နေပြီး သူ၏ မျက်လုံးများမှာလည်း တောက်ပနေသည်။ ဤသိုင်းပညာရပ်မှာ သူ့အတွက် အထူးဖန်တီးထားသလားပင် ထင်မှတ်ရသည်။ သူ၏ အားသာချက်မှာ မျိုးရိုးဗီဇ ပေါင်းစပ်ခြင်း ဖြစ်ပြီး ယင်း၏ ခွန်အားမှာလည်း မယုံနိုင်စရာ ကောင်းလှသည်။ ကိုးထပ် ခန္ဓာကိုယ်ကျင့်စဉ် ကဲ့သို့သော သိုင်းပညာတစ်ခု၏ ပံ့ပိုးကူညီမှုကိုပါ ရရှိမည်ဆိုပါက လင်းဖုန်းမှာ နောက်ဆုံးတွင် မည်မျှအထိ အစွမ်းထက်လာမည်ကို သူကိုယ်တိုင်ပင် မခန့်မှန်းနိုင်တော့ပေ။

သို့သော် အနှိုင်းမဲ့လက်သီးပဏ္ဍိတ ကိုယ်တိုင် ဖန်တီးထားသော သိုင်းပညာဖြစ်သဖြင့် ကိုးထပ် ခန္ဓာကိုယ်ကျင့်စဉ်၏ စျေးနှုန်းမှာ အလွန်တရာ မြင့်မားလှသည်။ ပထမအဆင့် တစ်ခုတည်းကိုပင် အမှတ် ၁၀၀ ပေးရသည်။

ဤသည်မှာ ပထမအဆင့် တစ်ခုတည်းသာ ဖြစ်ပြီး ကိုးထပ် ခန္ဓာကိုယ်ကျင့်စဉ် တစ်ခုလုံး မဟုတ်သေးပေ။ ယင်းဈေးနှုန်းမှာ အခြားသော ပြည့်စုံသည့် သိုင်းပညာအများစုထက်ပင် ပို၍ စျေးကြီးနေသေးသည်။

ထို့ပြင် ၎င်းမှာ ပထမအဆင့်အတွက် ကုန်ကျစရိတ်သာ ဖြစ်သည်။ လင်းဖုန်း ဆက်လက် စစ်ဆေးကြည့်ရာတွင် 'ကိုးထပ် ခန္ဓာကိုယ်ကျင့်စဉ်' ၏ ဒုတိယအဆင့်အတွက် အမှတ် ၁,၀၀၀ လိုအပ်ပြီး တတိယအဆင့်အတွက်မူ အမှတ် ၁၀,၀၀၀ လိုအပ်ကြောင်း တွေ့လိုက်ရသည်။

ဤသည်ကို မြင်လိုက်ရသည့်အခါ လင်းဖုန်းမှာ ပါးစပ်အဟောင်းသား ဖြစ်သွားပြီး ဘာစကားမှပင် မပြောနိုင်တော့ပေ။