မစ်ရှင်

'ကိုးထပ် ခန္ဓာကိုယ်ကျင့်စဉ်' ၏ ပထမသုံးဆင့်ကိုသာ အရောင်းအဝယ် ပြုလုပ်နိုင်သော်လည်း ၎င်းသည် အခြားမည်သည့် သိုင်းပညာထက်မဆို ပို၍ ဆွဲဆောင်မှု ရှိနေသည်။ ကံမကောင်းသည်မှာ ၎င်း၏ မယုံနိုင်လောက်စရာ စျေးနှုန်းကြီးမြင့်မှုကပင် လူတိုင်းကို တွန့်ဆုတ်သွားစေရန် လုံလောက်နေခြင်း ဖြစ်သည်။

ပထမအဆင့်အတွက် ယွမ် သန်း ၁၀၀ ခန့်တန်ဖိုးရှိသော အမှတ် ၁၀၀လိုအပ်‌သည်။ ဒုတိယအဆင့်အတွက် ထပ်မံ၍ ယွမ် ၁ ဘီလီယံနှင့် ညီမျှသော အမှတ် ၁,၀၀၀ လိုအပ်ပြီး တတိယအဆင့်အတွက်မူ ယွမ် ၁၀ ဘီလီယံနှင့် ညီမျှသော အမှတ် ၁၀,၀၀၀ အထိ လိုအပ်သည်။

အနန္တလမ်းစဉ်အကယ်ဒမီမှ ကျောင်းသားများသည် ချမ်းသာကြွယ်ဝပြီး ထူးခြားသော နောက်ခံရှိသူများ ဖြစ်ကြသော်လည်း ဤစျေးနှုန်းများမှာ တကယ့်ကို တုန်လှုပ်စရာပင်။

ထို့အပြင် တတိယအဆင့်ထက် မြင့်သောအဆင့်များကိုမူ ဝယ်ယူ၍ပင် မရနိုင်ပေ။

လင်းဖုန်းသည် အခြားသိုင်းပညာရပ်များသို့ ပြောင်းလဲရန် စဉ်းစားခဲ့သော်လည်း ရှာဖွေကြည့်ပြီးနောက်တွင်မူ 'ကိုးထပ် ခန္ဓာကိုယ်ကျင့်စဉ်' တစ်ခုတည်းသာ သူနှင့် အသင့်တော်ဆုံး ဖြစ်နေသည်ကို တွေ့လိုက်ရသည်။ ထို့ကြောင့် လင်းဖုန်းမှာ အံကြိတ်ကာ ဆုံးဖြတ်ချက် တစ်ခု ချလိုက်သည်။ သူသည် ကိုးထပ် ခန္ဓာကိုယ်ကျင့်စဉ်ကိုသာ ရွေးချယ်မည် ဖြစ်သည်။

ပထမအဆင့်တစ်ခုတည်း ရရှိလျှင်ပင် လင်းဖုန်းအတွက် အသုံးပြုရန် လုံလောက်သည်။ သူ၏ ခန္ဓာကိုယ်တစ်ခုလုံးရှိ ခွန်အားကို အပြည့်အဝ ထိန်းချုပ်နိုင်သည်နှင့် လင်းဖုန်း၏ စွမ်းအားမှာ နောက်ထပ် တစ်ဆ တိုးလာမည် ဖြစ်သည်။ သူ ပေါင်းစပ်ထားသော ကြမ်းကြုတ်သားရဲ မျိုးရိုးဗီဇများနှင့် ပေါင်းစပ်လိုက်ပါက 'ကိုးထပ် ခန္ဓာကိုယ်ကျင့်စဉ်' ၏ ပထမအဆင့်စွမ်းအားမှာ မည်သည့် ထိပ်တန်းသိုင်းပညာ၏ အကျိုးသက်ရောက်မှုနှင့်မဆို ယှဉ်နိုင်ပေလိမ့်မည်။

သို့သော် အမှတ် ၁၀၀ ဆိုသည်က တကယ့် ပြဿနာပင် ဖြစ်သည်။

လောလောဆယ်တွင် လင်းဖုန်း၏ ဘဏ်ကတ်ထဲ၌ ယွမ် ၁၁ သန်းသာ ရှိသည်။ အားလုံးကို အမှတ်အဖြစ် ပြောင်းလဲလိုက်လျှင်ပင် ၁၁ မှတ်သာ ရမည်ဖြစ်သည်။ အိမ်သို့ ဖုန်းဆက်ပြီး ငွေတောင်း၍ ရနိုင်သော်လည်း လင်းကော်ပိုရေးရှင်း၏ လက်ရှိအခြေအနေနှင့် အရှေ့ပင်လယ်ကော်ပိုရေးရှင်း၏ ဖိနှိပ်မှုကို ခံနေရချိန်တွင် ရန်ပုံငွေမှာ အလွန် ကျပ်တည်းနေပေလိမ့်မည်။ ဤကဲ့သို့ အချိန်မျိုးတွင် သူသည် မိသားစု၏ ဝန်ထုပ်ဝန်ပိုးကို ထပ်မတိုးလိုပေ။

မိသားစုထံမှ မတောင်းနိုင်လျှင် သူကိုယ်တိုင်ပင် အားကိုးရတော့မည်။ ကံကောင်းသည်မှာ အနန္တလမ်းစဉ်အကယ်ဒမီတွင် အမှတ်များကို ငွေဖြင့် လဲလှယ်နိုင်သည့်အပြင် မစ်ရှင်များ ဆောင်ရွက်ခြင်းဖြင့်လည်း ရှာဖွေနိုင်ခြင်း ဖြစ်သည်။

ထို့ကြောင့် လင်းဖုန်းသည် မစ်ရှင်ဖိုရမ်ကို ဖွင့်လိုက်သည်။ မစ်ရှင်စာရင်းမှာ မစ်ရှင်များစွာနှင့် ပြည့်နှက်နေသည်။ ထိုမစ်ရှင်အများစုမှာ ပြင်ပနယ်မြေရှိ မစ်ရှင်များဖြစ်ပြီး ပစ္စည်းတစ်ခုခု သို့မဟုတ် လူတစ်ဦးဦးကို ပြင်ပနယ်မြေသို့ လိုက်ပါပို့ဆောင်ပေးရခြင်းမျိုး ဖြစ်သည်။

ထိုလူများသည် အနန္တလမ်းစဉ်အကယ်ဒမီကို မစ်ရှင်များ ထုတ်ပြန်ခိုင်းရန်အတွက် သေချာပေါက် စျေးကြီးပေးခဲ့ကြရသည်။ ထို့ကြောင့် ဤမစ်ရှင်များထဲမှ မည်သည့်အရာမှ မရိုးရှင်းပေ။ ပြင်ပနယ်မြေရှိ မစ်ရှင်များမှာ အမှန်တကယ် အန္တရာယ်ရှိပြီး သေဆုံးနှုန်းပင် ရှိနိုင်သည်။ အဆင့်မြင့် ပရော်ဖက်ရှင်နယ် သိုင်းသမားတစ်ဦးပင် ဖြစ်ပါစေ၊ ကံမကောင်း၍ ပြင်ပနယ်မြေရှိ ကြောက်မက်ဖွယ် သားရဲကြီးများနှင့် တွေ့ဆုံပါက သေဆုံးသွားနိုင်သည်။

အနန္တလမ်းစဉ်အကယ်ဒမီတွင် နှစ်စဉ် သေဆုံးမှုနှုန်း သတ်မှတ်ချက်တစ်ခု ရှိသည်။ မစ်ရှင်များ ဆောင်ရွက်ရင်း သေဆုံးသွားသော မည်သည့်ကျောင်းသားကိုမဆို အကယ်ဒမီက လျော်ကြေးပေးမည် မဟုတ်ပေ။ ၎င်းသည် မျိုးရိုးဗီဇကန့်သတ်ချက်ကို ချိုးဖျက်ရန် တစ်ခုတည်းသော လမ်းစလည်း ဖြစ်သည်။

ကျောင်းသားများသည်လည်း အတိုင်းအတာတစ်ခုအထိ အသက်ဘေးနှင့် ရင်ဆိုင်ရသော တိုက်ပွဲများကို လိုအပ်သည်။ ကျောင်းသားများစွာသည် သေခြင်းနှင့် ရှင်ခြင်းကြားတွင် မျိုးရိုးဗီဇကန့်သတ်ချက်ကို ချိုးဖျက်နိုင်ရန်အတွက် ပြင်ပနယ်မြေရှိ ကြောက်မက်ဖွယ် သားရဲကြီးများနှင့် တိုက်ခိုက်ရန် မိမိတို့ဘာသာ အစပြု လျှောက်ထားကြလေ့ ရှိသည်။

ပြင်ပနယ်မြေရှိ မစ်ရှင်များ၏ အမှတ်များမှာ အလွန်မြင့်မားသော်လည်း လင်းဖုန်းမှာ ယခုလောလောဆယ်တွင် ပြင်ပနယ်မြေသို့ သွားရန် အစီအစဉ် မရှိသေးပေ။ ထို့ကြောင့် သူသည် ပြင်ပနယ်မြေ မစ်ရှင်များကို လက်လျှော့လိုက်ရသည်။

နိုင်ငံအတွင်း၌လည်း မစ်ရှင်များ ရှိပြီး အထူးသဖြင့် ဒယ်တာမြို့တွင် ဖြစ်သည်။ သို့သော် ဤမစ်ရှင်များ၏ ဆုလာဘ်အမှတ်မှာ အလွန်နည်းပါးသည်။ ဥပမာ - ရဲတပ်ဖွဲ့ကို ကူညီပြီး ရာဇဝတ်ကောင်ကို ဖမ်းဆီးပေးလျှင် တစ်မှတ်သာ ရမည်ဖြစ်သည်။

ထို့နည်းတူ မစ်ရှင်များရှိသေးသည်။

သိုင်းသင်တန်းကျောင်းတစ်ခုတွင် အချိန်အတိုင်းအတာတစ်ခုအထိ သွားရောက် သင်ကြားပေးရန်။ နှစ်မှတ်။

တစ်စုံတစ်ယောက်၏ ကိုယ်ရံတော်အဖြစ် အချိန်အတိုင်းအတာတစ်ခုအထိ ဆောင်ရွက်ပေးရန်။ တစ်မှတ်။

အခြေခံအားဖြင့် ဤမစ်ရှင်အားလုံးမှာ အမှတ်အနည်းငယ်သာ ရရှိပြီး ၁၀ မှတ်ထက် ကျော်သော မစ်ရှင်မှာ အလွန် ရှားပါးလှသည်။ အမှန်မှာ တစ်မှတ်သည် ယွမ်တစ်သန်းနှင့် ညီမျှနေသည် မဟုတ်ပါလား။ အရေးမကြီးသော မစ်ရှင်များအတွက် မည်သူကမျှ ငွေအမြောက်အမြား အကုန်အခံပြီး အနန္တလမ်းစဉ်အကယ်ဒမီကို မစ်ရှင်ထုတ်ပြန်ခိုင်းမည် မဟုတ်ပေ။

“အာ... ဒီမစ်ရှင်က မဆိုးဘူးပဲ။ ပိုင်မိသားစုရဲ့ အဓိက အဖွဲ့ဝင်တွေကို သုံးရက်ကြာ ကာကွယ်ပေးဖို့တဲ့။ ငါးမှတ်။ အကယ်၍ လူသတ်သမားကို သတ်နိုင်ရင် အမှတ် ၅၀ ရမယ်”

လင်းဖုန်းသည် ဤမစ်ရှင်ကို ချက်ချင်း စိတ်ဝင်စားသွားသည်။ ကာကွယ်ရေး မစ်ရှင်များသည် ပုံမှန်အားဖြင့် တစ်မှတ် သို့မဟုတ် နှစ်မှတ်သာ ရရှိပြီး အချိန်မှာလည်း အတော်ကြာမြင့်တတ်သည်။ သို့သော် ဤမစ်ရှင်မှာမူ သုံးရက်ကြာ ကာကွယ်ပေးရုံဖြင့် ငါးမှတ် ရရှိမည် ဖြစ်သည်။

ဆုလာဘ် မြင့်မားခြင်းမှာ အန္တရာယ် ကြီးမားခြင်းကို ဆိုလိုခြင်း ဖြစ်သည်။ ဤမစ်ရှင်၏ ခက်ခဲမှုမှာ သေချာပေါက် မြင့်မားနေပေလိမ့်မည်။ ထို့အပြင် လူသတ်သမားကို သတ်နိုင်ပါက အမှတ် ၅၀ ရရှိမည် ဖြစ်သည်။ အမှတ် ၅၀ ဆိုသည်မှာ မည်သည့် အဓိပ္ပာယ်နည်း။ ဤသည်မှာ ယွမ် သန်း ၅၀ နှင့် ညီမျှသည်။

အနန္တလမ်းစဉ်အကယ်ဒမီ၏ စည်းမျဉ်းများအရ အကယ်ဒမီမှ ထုတ်ပြန်သော မည်သည့်မစ်ရှင်မှမဆို ကော်မရှင်ခ၏ တစ်ဝက်ကို အကယ်ဒမီက အလိုအလျောက် ရယူမည် ဖြစ်သည်။ တစ်နည်းအားဖြင့်ဆိုသော် ပိုင်မိသားစုသည် ဤမစ်ရှင်အတွက် အနည်းဆုံး ယွမ် သန်း ၁၀၀ ကို ဆုလာဘ်အဖြစ် ပြင်ဆင်ထားခြင်း ဖြစ်သည်။

လင်းဖုန်းသည် မစ်ရှင်ကို ချက်ချင်း လက်မခံသေးပေ။ ယင်းအစား သူသည် မစ်ရှင်၏ အသေးစိတ် အချက်အလက်များကို ဆက်လက် ကြည့်ရှုနေလိုက်သည်။

ဤမစ်ရှင်ထဲမှ လူသတ်သမားမှာ ကြောက်မက်ဖွယ်ကောင်းသော သိုင်းသမားတစ်ဦး ဖြစ်နေပြီး အဆင့် (၈) ပရော်ဖက်ရှင်နယ်သိုင်းပညာရှင်ဟု သံသယရှိရသည်။ ထို့အပြင် သူသည် ပြင်ပနယ်မြေမှ ပြန်လာသူ ဖြစ်သည်။ ပုံမှန်အားဖြင့် ပြင်ပနယ်မြေမှ ပြန်လာသော သိုင်းသမားများသည် အလွန် ကြောက်စရာ ကောင်းလှသည်။ ထိုသူတို့သည် ကြမ်းကြုတ်သားရဲများနှင့် အချိန်ကြာမြင့်စွာ တိုက်ခိုက်လာသူများ ဖြစ်သဖြင့် အေးချမ်းသော ပတ်ဝန်းကျင်တွင် ကြီးပြင်းလာသော သိုင်းသမားများမှာ သူတို့၏ တိုက်ခိုက်ရေးစွမ်းရည်ကို သေချာပေါက် မယှဉ်နိုင်ပေ။

လူသတ်သမား၏ နာမည်မှာ လုံဝေ့ပင်း ဖြစ်သည်။ လုံဝေ့ပင်း ပြင်ပနယ်မြေသို့ သွားစဉ်က အဆင့် (၄) ပရော်ဖက်ရှင်နယ် သိုင်းသမားတစ်ဦးအဖြစ်သာ ရှိသေးသည်။ သူသည် ကုမ္ပဏီတစ်ခု၏ ကိုယ်ရံတော်အဖြစ် ရွေးချယ်ခံခဲ့ရခြင်း ဖြစ်သည်။

မစ်ရှင်တစ်ခု ဆောင်ရွက်နေစဉ်တွင် ကုမ္ပဏီ၏ အခြေစိုက်စခန်းမှာ တိုက်ခိုက်ခံခဲ့ရသည်။ အတွင်းရှိ လူတိုင်း အသတ်ခံခဲ့ရပြီး လုံဝေ့ပင်းမှာ ပျောက်ဆုံးသွားခဲ့သည်။ ဤကဲ့သို့သော အခြေအနေမျိုးတွင် လုံဝေ့ပင်းကို သေဆုံးသွားပြီဟုသာ အခြေခံအားဖြင့် သတ်မှတ်နိုင်ခဲ့သည်။

ငါးနှစ်အကြာတွင် လုံဝေ့ပင်းသည် ပြင်ပနယ်မြေမှ အမှန်တကယ် ပြန်လာလိမ့်မည်ဟု မည်သူမျှ မထင်ထားခဲ့ကြပေ။ ထို့ပြင် သူ၏ ခွန်အားမှာလည်း မတွေးဝံ့စရာ အဆင့်အထိ တိုးတက်လာခဲ့သည်။

လုံဝေ့ပင်း ပြန်ရောက်လာပြီးနောက် သူ၏ ဇနီးနှင့် သမီးဖြစ်သူတို့မှာ ကားတိုက်မှုဖြင့် သေဆုံးသွားခဲ့ကြောင်း သိလိုက်ရသည်။ နောက်ပိုင်းတွင် လုံဝေပင်း၏ စုံစမ်းစစ်ဆေးမှုအရ သူဌေးကြီးတစ်ဦး၏ သားဖြစ်သူမှာ လုံဝေ့ပင်း၏ သမီးကို စိတ်ဝင်စားခဲ့ကြောင်း သိရှိခဲ့ရသည်။ သူသည် နည်းလမ်းအမျိုးမျိုး သုံးခဲ့သော်လည်း မအောင်မြင်ခဲ့ပေ။ နောက်ဆုံးတွင် သူသည် လုံဝေ့ပင်း၏ ဇနီးနှင့် သမီးကို ကားဖြင့် တိုက်သတ်ရန် တစ်စုံတစ်ယောက်ကို လျှို့ဝှက် စေလွှတ်ခဲ့ခြင်း ဖြစ်သည်။

လုံဝေ့ပင်းမှာ ဒေါသအကြီးအကျယ် ဖြစ်သွားပြီး ထိုသူဌေးကြီး၏ မိသားစု တစ်ခုလုံးကို သတ်ပစ်ခဲ့သည်။ ဤသည်မှာ အကြီးအကျယ် ပြဿနာ မဟုတ်ပေ။ အဘယ်ကြောင့်ဆိုသော် သိုင်းသမားများတွင် အထူးအခွင့်အရေးများ ရှိသောကြောင့် ဖြစ်သည်။ ထို့အပြင် ထိုသူဌေးကြီး မိသားစုမှာလည်း အမှားပြုလုပ်ခဲ့သည်။ လုံဝေ့ပင်းက ထိုမိသားစုကို သတ်လိုက်လျှင်ပင် သူ အပြစ်ပေးခံရမည် မဟုတ်ပေ။

သို့သော်လည်း လုံဝေ့ပင်းသည် ပြင်ပနယ်မြေတွင် သတ်ဖြတ်မှုများ အလွန်အကျွံ ပြုလုပ်ခဲ့ခြင်းနှင့် ယခုကဲ့သို့ စိတ်ထိခိုက်စရာ အခြေအနေနှင့် ရင်ဆိုင်လိုက်ရခြင်းတို့ကြောင့် သူ၏ စိတ်နေစိတ်ထားမှာ ရူးသွပ်ပြီး သွေးဆာလာခဲ့သည်။ သူသည် ချမ်းသာပြီး သြဇာအာဏာရှိသော မိသားစုအားလုံးကို ပစ်မှတ်ထားလာခဲ့ပြီး မိသားစု ခုနစ်စုခန့်နှင့် လူပေါင်း ဒါဇင်နှင့်ချီကို ဆက်တိုက် သတ်ဖြတ်ခဲ့လေတော့သည်။

ဤဖြစ်ရပ်၏ သက်ရောက်မှုမှာ အလွန်ပင် ဆိုးရွားလှသည်။ ဒယ်တာမြို့၏ ရဲချုပ်မှာပင် ဤအမှုကြောင့် အကြိမ်ကြိမ် ပြောင်းလဲခန့်အပ်ခြင်း ခံခဲ့ရသော်လည်း မည်သည့်ရဲချုပ်မှ လုံဝေ့ပင်းကို မဖမ်းဆီးနိုင်ခဲ့ပေ။ မကြာသေးမီက လုံဝေ့ပင်းမှာ ထပ်မံ လှုပ်ရှားလာခဲ့ပြန်သည်။ အစိုးရက လုံဝေ့ပင်းကို သတ်ရန် အစွမ်းထက်သော အဆင့် (၉) ပညာရှင် အချို့ကို စေလွှတ်ခဲ့သော်လည်း ထိုချမ်းသာသူများမှာ ထိတ်လန့်နေကြဆဲပင်။ သာမန်ရဲများနှင့် သူတို့ ငှားရမ်းထားသော သာမန်သိုင်းသမားများမှာ လုံ‌ဝေ့ပင်းကို ခုခံရန် လုံးဝ မလုံလောက်ပေ။

ထို့ကြောင့် ဤသူဌေးကြီးများသည် အနန္တလမ်းစဉ်အကယ်ဒမီတွင် မစ်ရှင်များ ထုတ်ပြန်လာကြခြင်း ဖြစ်သည်။

လင်းဖုန်း ဆက်လက် ဖတ်ရှုနေမိသည်။ အလားတူ ကာကွယ်ရေး မစ်ရှင်အချို့ ရှိနေသော်လည်း အမှတ်အများဆုံး ပေးသည်မှာ ပိုင်မိသားစုပင် ဖြစ်သည်။

“ပိုင်မိသားစုရဲ့ အဓိက အဖွဲ့ဝင်တွေကို ကာကွယ်ပေးပြီး သုံးရက်အတွင်း ငါးမှတ် ရမှာဆိုတော့ တော်တော်ကောင်းတာပဲ။ ဒယ်တာမြို့မှာ ချမ်းသာတဲ့သူတွေ အများကြီး ရှိတာပဲ။ လုံဝေ့ပင်းနဲ့ တွေ့ဖို့ ဖြစ်နိုင်ခြေက အရမ်းနည်းပါတယ်။ လုံဝေ့ပင်းနဲ့ တွေ့ခဲ့ရင်တောင် ငါ့ရဲ့ ခွန်အားနဲ့ဆိုရင် ကြောက်စရာ မလိုလောက်ပါဘူး”

အမှန်တကယ်တော့ လင်းဖုန်းသည် လုံဝေ့ပင်းကို လိုက်လံ အမဲလိုက်ချင်မိသည်။ ကံမကောင်းစွာဖြင့် ထိုကဲ့သို့သော မစ်ရှင်မျိုး မရှိပေ။ သူ၏ စိတ်ထဲတွင် လုံဝေ့ပင်း ပေါ်လာစေရန် တိတ်တဆိတ် မျှော်လင့်နေမိသော်လည်း ဖြစ်နိုင်ခြေမှာ အလွန်နည်းပါးကြောင်းလည်း သူ သိထားသည်။

လင်းဖုန်းသည် လျင်မြန်စွာပင် ဆုံးဖြတ်ချက် ချလိုက်သည်။ သူသည် ပိုင်မိသားစုကို ကာကွယ်ပေးရမည့် မစ်ရှင်ကို ချက်ချင်း လက်ခံလိုက်သည်။

“လင်းဖုန်း... ပုံရိပ်ယောင်တိုက်ပွဲခန်း အဆင့် ၈,၀၀၀။ သင်သည် ဤမစ်ရှင်ကို လက်ခံရန် လိုအပ်ချက်နှင့် ကိုက်ညီပါသည်။ မစ်ရှင်ကို လက်ခံပြီးပါပြီ။ ကျေးဇူးပြု၍ ပိုင်မိသားစုထံသို့ အမြန်ဆုံး သွားရောက်ပြီး မစ်ရှင်ကို ဆောင်ရွက်ပါ”

လင်းဖုန်း မျက်ခုံးပင့်လိုက်မိသည်။ မစ်ရှင် ထွက်လာသည်မှာ နာရီအနည်းငယ် ရှိနေပြီ ဖြစ်သော်လည်း အဘယ်ကြောင့် မည်သူမျှ လက်မခံသေးသနည်းဟု သူ စဉ်းစားနေခဲ့ခြင်း ဖြစ်သည်။ ၎င်းမှာ ကန့်သတ်ချက်တစ်ခု ရှိနေသောကြောင့် ဖြစ်သည်။ ပုံရိပ်ယောင်တိုက်ပွဲခန်းတွင် အဆင့် ၁၀,၀၀၀ အတွင်းရှိသော ကျောင်းသားများသာ ဤမစ်ရှင်ကို လက်ခံနိုင်ပြီး လင်းဖုန်းမှာမူ ထိုလိုအပ်ချက်နှင့် တိုက်တိုက်ဆိုင်ဆိုင် ကိုက်ညီနေခြင်း ဖြစ်သည်။

“ဒါကတော့ တရားမျှတပါတယ်လေ။ ဘယ်သူမဆို လက်ခံလို့ ရမယ်ဆိုရင် ပိုင်မိသားစုအတွက် နစ်နာမှာပေါ့”

ပိုင်မိသားစုမှာလည်း ထုံအအ မဟုတ်ပေ။ သေချာပေါက် ကန့်သတ်ချက်အချို့ ထားရှိမည်သာ ဖြစ်သည်။ ပုံရိပ်ယောင်တိုက်ပွဲခန်းတွင် အဆင့် ၁၀,၀၀၀ အတွင်းရှိသူများသည် အခြေခံအားဖြင့် အဆင့် (၈) ပရော်ဖက်ရှင်နယ် သို့မဟုတ် ထို့ထက်မြင့်သော စွမ်းအားများ ရှိကြသူများ ဖြစ်သည်။ အကယ်၍ သူတို့သည် လုံဝေ့ပင်းကို မယှဉ်နိုင်လျှင်ပင် အချိန်အတိုင်းအတာတစ်ခုအထိ ထိန်းထားနိုင်မည်ဖြစ်ပြီး ၎င်းမှာ ပိုင်မိသားစုကို ကာကွယ်ရန် လုံလောက်ပေလိမ့်မည်။

မစ်ရှင်ကို လက်ခံပြီးနောက် လင်းဖုန်းမှာ ပိုင်မိသားစုထံသို့ သွားရန် ပြင်ဆင်လိုက်သည်။ သို့သော် သူ တံခါးဖွင့်လိုက်သည်နှင့် အပြင်ဘက်တွင် ရပ်နေသော ကျန်းချီကျီကို တွေ့လိုက်ရသည်။

“အစ်ကိုဖုန်း... ကြည့်စမ်း၊ မင်းတော့ နာမည်ကြီးသွားပြီ”

ကျန်းချီကျီက သူ၏ဖုန်းကို ထုတ်ပြလိုက်သည်။ ဖုန်းမျက်နှာပြင်ပေါ်တွင် သတင်းတစ်ခု တက်နေသည်။ ထိုသတင်းမှာ လင်းဖုန်းက အရှိန်လွန်နေသော အားကစားကားကို လက်သီးတစ်ချက်ဖြင့် ထိုးခွဲကာ မိန်းကလေး နှစ်ဦးကို ကယ်တင်ခဲ့သည့် အကြောင်း ဖြစ်သည်။ ဗီဒီယိုဖိုင်ပင် ပါဝင်နေသည်။

ဤဗီဒီယိုမှာ သတင်းများတွင် ရေပန်းအစားဆုံး ဖြစ်နေသည်။ အမာခံ ပရိသတ် မိန်းကလေးများစွာမှာ လင်းဖုန်း၏ မည်သူမည်ဝါဖြစ်ကြောင်းကို ခန့်မှန်းနေကြသည်။ သူ၏ ထိုလက်သီးချက်မှာ တကယ်ပင် ပေါက်ကွဲအား ကောင်းပြီး ထိတ်လန့်တုန်လှုပ်စရာ ဖြစ်ပေသည်။

လင်းဖုန်း ခေါင်းခါလိုက်သည်။ သူသည် ဤကဲ့သို့ လူအများ၏ အာရုံစိုက်မှုကို ခံရရန် ဆန္ဒမရှိပေ။

“အစ်ကိုဖုန်း... ဘယ်သွားမလို့လဲ”

“ပိုင်မိသားစုရဲ့ အဓိက အဖွဲ့ဝင်တွေကို သုံးရက်ကြာ ကာကွယ်ပေးဖို့ မစ်ရှင်တစ်ခု လက်ခံထားလို့။ အဲဒီကို အမြန်ဆုံး သွားရမယ်”

“ပိုင်မိသားစု ဟုတ်လား။ မြို့မြောက်ဘက်က တန်ရှန်းခရိုင်မှာ ရှိတဲ့ ပိုင်မိသားစုလား”

“ဘာလဲ... မင်း သူတို့ကို သိလို့လား”

ကျန်းချီကျီ၏ ထူးဆန်းသော မျက်နှာပေးကို မြင်ရသဖြင့် လင်းဖုန်းမှာ ခေတ္တ ရပ်တန့်သွားသည်။

“ဟဲဟဲ... သိတာပေါ့ဗျ။ ပိုင်မိသားစုက နာမည်ကြီးပြီးတော့ အရမ်းလည်း ရက်ရောတယ်ဗျ။ သူတို့ မစ်ရှင်က လုံဝေ့ပင်းနဲ့ ပတ်သက်တာ ဖြစ်ရမယ်။ ဟုတ်တယ်မလား။ အစ်ကိုဖုန်း... ငါ လိုက်ပို့ပေးမယ်။ ငါက ပိုင်မိသားစုနဲ့ ရင်းနှီးပြီးသား”

လင်းဖုန်း ခေတ္တမျှ ဝေခွဲမရဖြစ်သွားပြီးနောက် ခေါင်းညိတ်ပြလိုက်သည်။ သူဘာသာ ကားငှားသွားရလျှင်လည်း အလုပ်ရှုပ်ပေလိမ့်မည်။

ထို့ကြောင့် လင်းဖုန်းသည် ကျန်းချီကျီ၏ ကားပေါ်သို့ တက်လိုက်ပြီး အနန္တလမ်းစဉ်အကယ်ဒမီမှ ထွက်ခွာလာခဲ့လေတော့သည်။