ကြမ်းကြုတ်သားရဲများ

ကုန်တင်ကား အစီးနှစ်ဆယ်နီးပါးမှာ ရုတ်တရက် ထိုးရပ်သွားပြီး ကားပေါ်မှ လူအများအပြား ခုန်ဆင်းလာကြသည်။ ထိုသူအားလုံးမှာ ပရော်ဖက်ရှင်နယ် သိုင်းသမားများ ဖြစ်ကြသည်။ ပြင်ပနယ်မြေရှိ ကြမ်းကြုတ်သားရဲအများစုမှာ အလွန်ပင် ထူးဆန်းလှရာ သေနတ်ကျည်ဆန်များကို လုံးဝ ကြောက်ရွံ့ခြင်းမရှိပေ။ အလွန်အစွမ်းထက်သော လက်နက်ကြီးများမှလွဲ၍ သာမန်သေနတ်များဖြင့် ပစ်ခတ်ခြင်းမှာ သားရဲများအပေါ် ထိရောက်မှု များစွာမရှိလှပေ။

ထို့ကြောင့်ပင် ပြင်ပနယ်မြေကို နယ်မြေသစ်ချဲ့ထွင်ရာတွင် သိုင်းသမားများသည် အဓိက အင်အားစု ဖြစ်လာရခြင်း ဖြစ်သည်။

လင်းဖုန်းနှင့် ဖုန်းရှို့တို့လည်း ကားပေါ်မှ ခုန်ဆင်းလိုက်ကြသည်။ သူတို့ရှေ့တွင် ကြမ်းကြုတ်သားရဲ အုပ်ကြီးတစ်အုပ်ကို မြင်လိုက်ရသည်။ ထိုသားရဲတို့သည် ခွေးနှင့် တူသော်လည်း အရွယ်အစားမှာ များစွာ ပိုကြီးမားသည်။ ထို့အပြင် တစ်ကိုယ်လုံးမှာ မီးခိုးဖြူရောင် ရှိကြပြီး အကောင်ရေ ရာနှင့်ချီ၍ စုပြုံနေကြသည်။

“အဲ့ဒါတွေက မျိုးကွဲဝံပုလွေတွေပဲ။ သာမန် ကြမ်းကြုတ်သားရဲတွေပေါ့”

ဖုန်းရှို့မှာ ကြမ်းကြုတ်သားရဲများအကြောင်း အနည်းငယ် နားလည်ထားသူ ဖြစ်သည်။ အမှန်တကယ်တော့ ပြင်ပနယ်မြေတွင် ဤမျိုးကွဲဝံပုလွေများမှာ အလွန်ပင် ပေါများလှသဖြင့် လူတိုင်းလိုလို မှတ်မိကြသည်။ သာမန် မျိုးကွဲဝံပုလွေများမှာ သာမန်ကြမ်းကြုတ်သားရဲအဆင့်သာ ရှိသော်လည်း ၎င်းတို့ထဲမှ သန်မာသောကောင်များမှာမူ လက်ရွေးစင်အဆင့် သားရဲများနှင့် ခွန်အားချင်း ယှဉ်နိုင်သည်။

သို့သော် ထိုကဲ့သို့ သန်မာသော အကောင်များမှာ အရေအတွက် အလွန်နည်းပါးလှသည်။ အများစုမှာ သာမန်အဆင့်သာ ဖြစ်ကြသော်လည်း အရေအတွက် များပြားလွန်းသဖြင့် ကိုင်တွယ်ရန် မလွယ်ကူပေ။

“အားလုံး လူစုခွဲလိုက်ကြ”

အစောင့်တပ်ဖွဲ့ကို ဦးဆောင်သူမှာ အစ်မရွှမ် ဖြစ်သည်။ ဤအမျိုးသမီးမှာ အသက်အရွယ်ငယ်ပုံရသော်လည်း အတွေ့အကြုံ အလွန်ရင့်ကျက်သူ ဖြစ်သည်။ သူမသည် ဝင်ရိုးစွန်းအကယ်ဒမီတွင် တက်ရောက်ခဲ့ဖူးသူ ဖြစ်ရာ သူမ၏ ခွန်အားမှာ သေချာပေါက် အားနည်းမည် မဟုတ်ပေ။

သူမ၏ အမိန့်အရ သိုင်းသမားအများအပြားမှာ သူတို့၏ သေနတ်များကို ထုတ်ယူလိုက်ကြသည်။ ဤသေနတ်များမှာ ဝံပုလွေများကို သတ်ရန်မဟုတ်ဘဲ ၎င်းတို့ကို ထိတ်လန့်သွားစေရန်နှင့် လူစုကွဲသွားစေရန်သာ ရည်ရွယ်ခြင်း ဖြစ်သည်။

ရုတ်တရက် အလွန်ကျယ်လောင်သော အသံများ ထွက်ပေါ်လာသည်။ သေနတ်သံများသည် အတော်ပင် ကျယ်လောင်ကာ ပတ်ဝန်းကျင်တစ်ခွင်လုံးကို အလုံးစုံ လွှမ်းခြုံစိုးမိုးသွားသည်။ ဝံပုလွေများမှာ ခေတ္တမျှ ထိတ်လန့်သွားပြီး ဆက်လက်ချီတက်ရန် မဝံ့ရဲတော့ဘဲ နောက်သို့ အလျှိုလျှို ဆုတ်ခွာသွားကြသည်။

ထိုစဉ် ဝံပုလွေအုပ်၏ နောက်ဘက်ဆီမှ ကျယ်လောင်စူးရှသော ဝံပုလွေဝူသံတစ်ခု ထွက်ပေါ်လာသည်။

ရုတ်ချည်းပင် ထိတ်လန့်နေသော ဝံပုလွေများသည် ချက်ချင်း အစီအစဉ်တကျ ပြန်ဖြစ်သွားပြီး ကုန်တင်ယာဉ်တန်းကို သွေးဆာရက်စက်သော အကြည့်ဖြင့် စိုက်ကြည့်နေကြသည်။

အစ်မရွှမ်၏ မျက်နှာမှာ အနည်းငယ် ပျက်ယွင်းသွားသည်။ သူမသည် ဝံပုလွေအုပ်၏ အလယ်သို့ လှမ်းကြည့်လိုက်ရာ သာမန်ဝံပုလွေများထက် သုံးဆခန့် ပိုမိုကြီးမားသော ဝံပုလွေကြီးတစ်ကောင် တဖြည်းဖြည်း လျှောက်လှမ်းလာသည်ကို မြင်လိုက်ရသည်။

“ခေါင်းဆောင်ဝံပုလွေပဲ။ ဝံပုလွေအုပ်ထဲမှာ ခေါင်းဆောင်ဝံပုလွေ တစ်ကောင် ရှိနေတာလား။ ဒါဆိုရင်တော့ ပြဿနာပဲ”

အစ်မရွှမ်၏ မျက်နှာမှာ စိုးရိမ်မှုများ ပြည့်နှက်သွားသည်။ ခေါင်းဆောင်ဝံပုလွေကို ဝံပုလွေဘုရင် ဟုလည်း ခေါ်ဆိုကြပြီး ၎င်းမှာ ဝံပုလွေအုပ်စု၏ အဓိက ဦးဆောင်သူ ဖြစ်သည်။ မျိုးကွဲဝံပုလွေများမှာ သာမန်အဆင့်သာ ဖြစ်သော်လည်း ခေါင်းဆောင်ဝံပုလွေ၏ ခွန်အားမှာမူ ကြောက်စရာကောင်းလှကာ သားရဲအရှင်သခင်အဆင့်နှင့် ညီမျှသည်။

သားရဲအရှင်သခင်တိုင်းမှာ အဆင့်ကိုးထိပ်တန်း ပရော်ဖက်ရှင်နယ် သိုင်းသမားတစ်ဦးနှင့် ခွန်အားချင်း ယှဉ်နိုင်သည်။ အကယ်၍ တစ်ဦးချင်း တိုက်ခိုက်မည်ဆိုပါက သာမန် အဆင့်ကိုး သိုင်းသမားမှာ အရှင်သခင်အဆင့် သားရဲတစ်ကောင်၏ ပြိုင်ဘက် မဟုတ်နိုင်ပေ။

အထူးသဖြင့် ဤနေရာတွင် သာမန် ဝံပုလွေများစွာ ရှိနေသည်။ အကယ်၍ တိုက်ပွဲကြီးတစ်ခု အမှန်တကယ် ဖြစ်ပွားမည်ဆိုပါက အသေအပျောက်များစွာ ရှိလာပေလိမ့်မည်။

အစ်မရွှမ်မှာ အသက်ပြင်းပြင်းတစ်ချက် ရှူလိုက်ပြီး ချက်ချင်းပင် ဆုံးဖြတ်ချက် ချလိုက်သည်။ သူမသည် ယာဉ်တန်းတွင် ပါလာသော အသန်မာဆုံး အဆင့်ကိုး သိုင်းသမား သုံးဦးကို ဖိတ်ခေါ်ကာ ပြောလိုက်သည်။

“ရှင်တို့ သုံးယောက်စလုံးက အတွေ့အကြုံရှိတဲ့ အဆင့်ကိုးသိုင်းသမားတွေပဲ။ ရှင်တို့ သုံးယောက် ပေါင်းပြီး အဲဒီ ခေါင်းဆောင်ဝံပုလွေကို ကိုင်တွယ်နိုင်မလား”

ထိုသုံးဦးမှာ ခေတ္တစဉ်းစားပြီးနောက် ပြန်ပြောသည်။

“‌ခေါင်းဆောင်ဝံပုလွေ တစ်ကောင်တည်းကိုပဲ တိုက်ရမယ်ဆိုရင်တော့ ပြဿနာ မရှိပါဘူး။ ဒါပေမဲ့ သူ့အနားမှာ ဝန်းရံကာကွယ်ပေး‌ထားတဲ့ ဝံပုလွေတွေ အများကြီး ရှိနေတော့ သူ့ကို ဝိုင်းတိုက်ဖို့က တော်တော်ကို ခက်လိမ့်မယ်”

“ဒါက လွယ်ပါတယ်... ကျန်တဲ့သူတွေက သာမန်ဝံပုလွေတွေကို ဝိုင်းတိုက်ပေးမယ်။ ရှင်တို့ သုံးယောက်က ခေါင်းဆောင်ဝံပုလွေကိုပဲ အာရုံစိုက်ပြီး ကိုင်တွယ်ပေးဖို့ လိုတယ်”

“အဲဒီလိုသာ လုပ်ပေးနိုင်ရင်တော့ ကျွန်တော်တို့အတွက် ဘာမှ အခက်အခဲမရှိပါဘူး”

ထိုသုံးဦးမှာ အလွန်ပင် ယုံကြည်မှု ရှိနေကြသည်။ ခေါင်းဆောင်ဝံပုလွေမှာ သားရဲအရှင်သခင်အဆင့် ဖြစ်သော်လည်း သူတို့ သုံးဦးပေါင်းပြီး သားရဲအရှင်သခင်ကို မသတ်ဖူးသည်တော့ မဟုတ်ပေ။

အစ်မရွှမ်သည် ချက်ချင်းပင် အစီအစဉ်များ ချမှတ်လိုက်သည်။ သူမသည် သိုင်းသမား အများအပြားကို အဖွဲ့ဖွဲ့ကာ ခေါင်းဆောင်ဝံပုလွေကို သွားရောက်သတ်ဖြတ်မည့် အဆင့်ကိုးသိုင်းသမား သုံးဦးကို လမ်းဖွင့်ပေးရန် စေလွှတ်လိုက်သည်။

ကျန်လူများမှာမူ ကုန်တင်ယာဉ်တန်းကို စောင့်ကြပ်ရန် နေရစ်ခဲ့သည်။

“လင်းဖုန်း၊ ဖုန်းရှို့... ရှင်တို့နှစ်ယောက်ကတော့ ဒီမှာပဲနေပြီး ယာဉ်တန်းကို စောင့်ကြပ်ပေးကြပါ။ ပြီးတော့ ရှောင်မိုကိုလည်း ကူပြီး ကြည့်ပေးပါဦး။ ရှောင်မိုက စကားပြော နည်းနည်း ရိုင်းတာကလွဲရင် မကောင်းတဲ့ စိတ်တော့ မရှိပါဘူး”

အစ်မရွှမ်၏ စကားကို ကြားရသောအခါ လင်းဖုန်းက ခေါင်းညိတ်လိုက်သည်။

“ဒါက ကျွန်တော်တို့ရဲ့ တာဝန်ပဲလေ”

တာဝန်ကို လက်ခံထားပြီဖြစ်ရာ ယာဉ်တန်းရှိ လူများကို ကာကွယ်ပေးရန်မှာ သူတို့၏ တာဝန်သာ ဖြစ်သည်။

“ဟွန်း...”

ဖုန်းရှို့ကမူ ရှောင်မိုကို ကာကွယ်ပေးရန် အလွန်ပင် ဝန်လေးနေသည်။ ဤကလေးမမှာ အလွန်တရာ အပေါက်ဆိုးလှ‌ချေသည်။ သို့သော် လင်းဖုန်း ရှိနေသဖြင့် သူ ဘာမှ ပြန်မပြောခဲ့ပေ။ တစ်ဖက်တွင်မူ ရှောင်မိုမှာလည်း လင်းဖုန်းတို့၏ ကာကွယ်မှုကို မခံယူလိုသကဲ့သို့ နှုတ်ခမ်းကို စူထားလေသည်။ သို့သော် အစ်မရွှမ်ကိုယ်တိုင် သားရဲများကို သွားတိုက်နေပြီဖြစ်ရာ သူမ ဘာမှ မတတ်နိုင်ပေ။

လင်းဖုန်းမှာမူ ရှောင်မိုကို အာရုံမထားပေ။ အမှန်တကယ်တော့ သူတို့မှာ လူအုပ်၏ နောက်ဆုံးတွင် ရှိနေခြင်း ဖြစ်သဖြင့် ဝံပုလွေများ ဤနေရာအထိ ရောက်မလာသရွေ့ အန္တရာယ် မရှိနိုင်ပေ။

ထိုစဉ် အစ်မရွှမ်သည် သိုင်းသမားများကို စုစည်းကာ ဝံပုလွေများကို စတင် တိုက်ခိုက်တော့သည်။ ဤသည်မှာ လင်းဖုန်းအနေဖြင့် သိုင်းသမားများနှင့် ကြမ်းကြုတ်သားရဲများကြားမှ တိုက်ပွဲကို ပထမဆုံးအကြိမ် မြင်ဖူးခြင်း ဖြစ်သည်။ အစ်မရွှမ်မှာ ဤကဲ့သို့သော တိုက်ပွဲများတွင် အလွန်ပင် အတွေ့အကြုံ ရှိပုံရသည်။

သူမသည် အဆင့်ငါး နှင့် အဆင့်ခြောက် အနည်းဆုံးရှိသော သိုင်းသမား သုံးဆယ်ခန့်ကို စုစည်းထားသည်။ အများစုမှာ အဆင့်ခုနစ် သိုင်းသမားများ ဖြစ်ကြပြီး ထိပ်တန်း အဆင့်ကိုး သိုင်းသမား သုံးဦးလည်း ပါဝင်သည်။

ထို့အပြင် ထိုသိုင်းသမား အားလုံးမှာ သံမဏိဓားမော့ သို့မဟုတ် အမှုန်ဖြတ်ဓားမော့များကို အသုံးပြုနေကြသည်။ ကြမ်းကြုတ်သားရဲများနှင့် ရင်ဆိုင်တိုက်ခိုက်ရာတွင် ဓားမော့များကို အသုံးပြုခြင်းမှာ အမှန်တကယ်ပင် အားသာချက် ရှိလှသည်။ ခေါင်းဆောင်ဝံပုလွေ၏ အမိန့်ကို ရရှိလိုက်သော မျိုးကွဲဝံပုလွေများသည် သိုင်းသမားများဆီသို့ အရူးအမူး ပြေးဝင်လာကြသည်။

သို့သော်လည်း သာမန်ဝံပုလွေများမှာ သိုင်းသမား အမြောက်အမြားကို ခြိမ်းခြောက်နိုင်စွမ်း မရှိပေ။ ထို့ကြောင့် သိုင်းသမားများ၏ ချီတက်နှုန်းမှာ အလွန် မြန်ဆန်လှသည်။ ခုနစ်မိနစ်၊ ရှစ်မိနစ်အတွင်းမှာပင် သူတို့သည် ခေါင်းဆောင်ဝံပုလွေနှင့် မနီးမဝေး နေရာသို့ ရောက်ရှိသွားကြပြီ ဖြစ်သည်။

“သတ်...”

အဆင့်ကိုးသိုင်းသမား သုံးဦးသည် လူအုပ်ထဲမှ ချက်ချင်း ခွဲထွက်လိုက်ပြီး ဝံပုလွေခေါင်းဆောင်ဆီသို့ လျှပ်တစ်ပြတ်အတွင်း ပြေးဝင်သွားကြသည်။ ခေါင်းဆောင်ဝံပုလွေကို ကာကွယ်ရန် ကြိုးစားနေကြသော ဝံပုလွေများစွာ ရှိနေသော်လည်း အဆင့်ကိုး သိုင်းသမား သုံးဦးကို မည်သို့ တားဆီးနိုင်ပါမည်နည်း။

ထို့အပြင် အခြားသော သိုင်းသမားများကလည်း ခေါင်းဆောင်ဝံပုလွေ အနားရှိ ဝံပုလွေများကို ရှင်းလင်းပေးနေကြသည်။

ခေါင်းဆောင်ဝံပုလွေမှာ ထွက်ပြေးတိမ်း‌ရှောင်ခြင်းမရှိပေ။ ထိုအစား သူသည် ကောင်းကင်သို့ မော့ကာ ဟိန်းဟောက်လိုက်သည်။ ထို့နောက် သူ၏ ခန္ဓာကိုယ်မှာ သိသိသာသာ ပြန်လည် ကြီးမားလာပြီး အဆင့်ကိုးသိုင်းသမား သုံးဦးနှင့် စတင် တိုက်ခိုက်တော့သည်။

ဝံပုလွေခေါင်းဆောင်မှာ အားနည်းခြင်းမရှိဘဲ အဆင့်ကိုး သိုင်းသမား သုံးဦးနှင့် လက်ရည်တူ ယှဉ်ပြိုင်တိုက်ခိုက်နေနိုင်လေသည်။

“ဟက်... ဒါပဲလား”

ဖုန်းရှို့ကမူ အထင်မကြီးသလို ကြည့်နေသည်။ ထိုအဆင့်ကိုးသိုင်းသမား သုံးဦးမှာ တိုက်ပွဲအတွေ့အကြုံ ကြွယ်ဝသော်လည်း သူတို့၏ စစ်မှန်သော ခွန်အားမှာ များစွာ မရှိလှပေ။ ဖုန်းရှို့အနေဖြင့် ထိုသူနှစ်ယောက်ကို တစ်ယောက်တည်းနှင့်ပင် ယှဉ်ပြိုင်နိုင်ကြောင်း ယုံကြည်မှု ရှိနေသည်။

ဘာပဲဖြစ်ဖြစ် ဖုန်းရှို့မှာ အနန္တလမ်းစဉ်အကယ်ဒမီ၏ ပါရမီရှင် ကျောင်းသားတစ်ဦး ဖြစ်ပြီး ကျောင်းအတွင်း၌ ဆန်းပြားသော သိုင်းပညာရပ်များစွာကို လေ့ကျင့်ခွင့် ရရှိထားသူ ဖြစ်သည်။ ကျောင်းပြင်ပမှ သိုင်းသမားများမှာမူ ထိုကဲ့သို့သော အခွင့်အရေးမျိုး မရှိကြပေ။

ရှောင်မိုမှာ ဖုန်းရှို့၏ စကားကြောင့် စိတ်တိုသွားကာ လက်သီးကို တင်းတင်းဆုပ်ပြီး ပြောလိုက်သည်။

“ဟွန်း... ရှင်က အရမ်းတော်နေရင် သွားတိုက်လေ။ မမရွှမ်တို့ကတော့ အဲဒီ ခေါင်းဆောင်ဝံပုလွေကို သတ်ပြီး ဝံပုလွေတွေကို မောင်းထုတ်နိုင်မှာ သေချာတယ်။ သူတို့က ရှင့်လိုမျိုး အပျော်အပါးပဲ မက်တဲ့ အကယ်ဒမီက သူဌေးသားလေးတွေ မဟုတ်ဘူး။ ရှင်ကတော့ ဒီလောက် ကြောက်စရာကောင်းတဲ့ သားရဲတွေကို မြင်တောင် မြင်ဖူးမှာ မဟုတ်ပါဘူး”

ဖုန်းရှို့၏ မျက်နှာမှာ မည်းမှောင်သွားတော့သည်။ သူသည် ကလေးမလေးတစ်ယောက်နှင့် အဆင့်အတန်းတူ မဆက်ဆံချင်သော်လည်း အလွန် ဒေါသထွက်နေမိသည်။ ဖုန်းရှို့သည် အဆင့်ကိုး ထိပ်တန်း သိုင်းသမားတစ်ဦးဖြစ်သလို အကယ်ဒမီ၏ ထိပ်တန်း ပါရမီရှင်တစ်ယောက်လည်း ဖြစ်ရာ ရောက်လေရာတွင် အလေးထားခြင်း ခံရသူ ဖြစ်သည်။ ယခု ဤကဲ့သို့သော ယာဉ်တန်းလေးထဲတွင် ကလေးမလေးတစ်ယောက်၏ နှိမ့်ချဆက်ဆံခြင်းကို ခံနေရသည် မဟုတ်ပါလား။

ဖုန်းရှို့မှာ စိတ်ကို မနည်းထိန်းထားရသည်။

ထို့နောက် ဖုန်းရှို့က လှောင်ပြောင်သလို ပြောလိုက်သည်။

“ကောင်းပြီလေ... မင်းရဲ့ မမရွှမ်တို့က ဒီသားရဲတွေကို တကယ်ပဲ နှိမ်နင်းနိုင်မလားဆိုတာ ကြည့်ကြတာပေါ့”

သူတို့နှစ်ဦးမှာ တစ်ယောက်ကိုတစ်ယောက် ရန်စောင်နေကြသော်လည်း လင်းဖုန်းကမူ သူတို့ကို ဂရုမစိုက်ပေ။ ဝံပုလွေအုပ်ထဲတွင် ထူးဆန်းသော ပြောင်းလဲမှုတစ်ခု ရှိနေကြောင်း သူ ခံစားလိုက်ရသည်။ အန္တရာယ်ရှိသော အရှိန်အဝါတစ်ခုကိုပင် သူ ခံစားမိလိုက်သည်။

“တစ်ခုခုတော့ မှားနေပြီ... ဘာဖြစ်တာလဲ”

လင်းဖုန်း ရုတ်တရက် ခေါင်းမော့လိုက်သည်။ သူ၏ မျက်ဝန်းများမှာ အလွန်ပင် တည်ကြည်‌လေးနက်သွားတော့သည်။

“သတိထားကြ... နောက်ထပ် ခေါင်းဆောင်ဝံပုလွေ တစ်ကောင် ရှိသေးတယ်”

လင်းဖုန်း ချက်ချင်းပင် အော်ဟစ်သတိ‌ပေးလိုက်သည်။