အခန်း (၁၀၂၅-၁၀၂၆)
Vol. 103 Ch. 1025-1026
အခန်း (၁၀၂၅) မင်းနဲ့ငါက တော်တော်လိုက်ဖက်တယ်
နှစ်ဖက်စလုံးရဲ့ လေထုက တော်တော်လေးတိတ်ဆိတ်နေပါတယ်။
ဖန့်ချန်ကတော့ ဒီလူအုပ်ထဲမှာ ရင်းနှီးနေတဲ့သူ တစ်ယောက်မက တွေ့လိုက်ရပါတယ်။
သူကိုယ်တိုင် ဝိညာဉ်ခွဲကို ဖျက်ဆီးပစ်ခဲ့တဲ့ စုန်းယိ နဲ့ ရှောင်းယောင်နတ်မင်းရဲ့သား ကျော့ရွှိ တို့ပဲ ဖြစ်ပါတယ်။
ဒါပေမဲ့ ဒီနှစ်ယောက်လုံးက အဖွဲ့ရဲ့ အရှေ့ဆုံးမှာ ရပ်နေတာ မဟုတ်ဘဲ နောက်နားမှာပဲ ကပ်လိုက်နေကြတာပါ။
ကြည့်ရတာ သူတို့ရဲ့ အဆင့်အတန်းက အရှေ့ဆုံးက လူတွေလောက် မမြင့်မားတာ သိသာပါတယ်။
"ဪ... လုံမျိုးနွယ်စု ပထမအဆောင်က လုံရွှမ်း ပါလား၊ မင်းတို့ လုံမျိုးနွယ်စုက တော်တော် မြန်မြန်ရောက်လာတာပဲ ဘာလဲ... မင်းဘေးက ဒီဓားကျင့်ကြံသူတွေက မင်းရဲ့ ဓားကျင့်ကြံသူ အဖေက သူ့ဇာတိမြေကနေ ရှာလာပေးတဲ့ အကူတွေလား"
အရပ်ရှည်ရှည် အမျိုးသမီးတစ်ယောက်က လုံရွှမ်းကို မဲ့ပြုံး ပြုံးကြည့်ပြီး ပြောပါတယ်။
သူမရဲ့ အကြည့်က ဖန့်ချန်တို့အဖွဲ့ပေါ်မှာ တစ်ယောက်ချင်းစီ ဝေ့ကြည့်သွားပြီး ယန်ခုန်းနဲ့ ပိုင်ချင်းမင်တို့ဆီမှာ ခဏ ရပ်သွားပါတယ်။
လုံရွှမ်းက ခပ်အေးအေးပဲ ပြန်ပြောတယ်
"နင် နဲ့ ဘာဆိုင်လဲ လောင်းကြေးပွဲ စရင် သိရမှာပေါ့"
"ဒါဆိုရင်တော့ နောက်ထပ် ရက်အနည်းငယ် စောင့်ရဦးမယ်၊ ဒီနေ့ ငါလည်း ဓားကျင့်ကြံသူ အချို့ ခေါ်လာတယ်၊ သူတို့ကို ဒီဓားသင်္ချိုင်းနန်းတော်မှာပဲ အရင် ပညာစမ်းခိုင်းကြည့်ရင် ဘယ်လိုလဲ "
အမျိုးသမီးက ရယ်ပြီး ပြောပါတယ်။
"လောင်းကြေးပွဲက နီးနေပြီ၊ အဖေက ငါ့ကို ပြဿနာမရှာဖို့ မှာထားတယ်၊ နင် ပညာစမ်းချင်ရင် လောင်းကြေးပွဲပြီးမှ စမ်းပါ"
"အဲဒီအချိန်ကျရင်တော့ နင့်မှာ စိတ်ပါလက်ပါ ရှိပါဦးမလားဆိုတာပဲ စိုးရိမ်မိတယ်"
လုံရွှမ်းက ပြုံးပြီး ပြန်ပြောလိုက်ပါတယ်။
အဲဒီအချိန်မှာ စုန်းယိ နဲ့ ကျော့ရွှိ တို့ရဲ့ အကြည့်တွေကလည်း လူအုပ်ထဲမှာ ဝေ့ကြည့်နေရင်း ဖန့်ချန်ကို မြင်လိုက်ရတဲ့အခါ နှစ်ယောက်လုံးရဲ့ မျက်နှာတွေ ပြိုင်တူ ပျက်သွားပါတော့တယ်။
ကျော့ရွှိ ရဲ့ မျက်နှာက အလွန်ထူးဆန်းနေပါတယ်။
သူကတော့ လွတ်လပ်သောမသေမျိုးတွေတောင် ဒီလူ့ကို သခင်လေး လို့ ခေါ်တာကို ကိုယ်တိုင် မြင်ခဲ့တာပါ။
ဒါကြောင့် ဒီလူ့ရဲ့ နောက်ခံက မသေးဘူးဆိုတာ သူ စိတ်ထဲမှာ အခိုင်အမာ ယုံကြည်ထားပြီးသားပါ။
ပြီးခဲ့တဲ့ ရက်ပိုင်းက စုန်းယိ တစ်ယောက် ဒီလူ့လက်ထဲမှာ အရေးနိမ့်ခဲ့တယ်လို့ ကြားလိုက်ရတဲ့အခါ သူ့ရဲ့ ထင်မြင်ချက်က ပိုပြီး ခိုင်မာသွားပါတယ်။
"မင်းပဲ "
စုန်းယိ ရဲ့ မျက်နှာက ဒေါသကြောင့် ပြာနှမ်းသွားပြီး အဖွဲ့ရဲ့ အရှေ့ကို အမြန်ပြေးထွက်လာကာ ဖန့်ချန်ကို လက်ညှိုးထိုးပြီး ဟိုအမျိုးသမီးကို ပြောလိုက်တယ်
"မမ... ဒီကောင်ပဲ ကျွန်တော့်ရဲ့ ဝိညာဉ်ခွဲကို သတ်လိုက်တဲ့ကောင် "
အားလုံးရဲ့ အကြည့်တွေက ဖန့်ချန်ဆီ တပြိုင်တည်း ကျရောက်လာပါတယ်။
အဲဒီကိစ္စရဲ့ အသေးစိတ်ကို လူအများကြီး မသိကြပေမဲ့ ဘာဖြစ်ခဲ့တယ်ဆိုတဲ့ အကြမ်းဖျင်းကိုတော့ အားလုံး သိထားကြပါတယ်။
စုန်းယိ ဟာ ဂုဏ်သရေရှိ မျိုးနွယ်စုက သားတစ်ယောက် ဖြစ်ပါလျက်နဲ့ အဲဒီလို တောမြို့လေးမှာ တော်တော်လေး အရှက်ရစရာကောင်းတဲ့ နည်းလမ်းနဲ့ ဝိညာဉ်ခွဲ အဖျက်ဆီးခံလိုက်ရတာပါ။
ဒီသတင်း ပျံ့နှံ့သွားတဲ့အခါ လူအချို့က ခိုးပြီး လှောင်ပြောင်ကြပေမဲ့ အများစုကတော့ တစ်ဖက်သားကို ရန်သူလို သဘောထားပြီး ဒေါသထွက်ခဲ့ကြပါတယ်။
"ဪ..."
စုန်းစုစု က ခေတ္တ မှင်သက်သွားပြီး ဖန့်ချန်ကို အကဲခတ်ကြည့်လိုက်ပါတယ်။
ယန်ခုန်းကတော့ ဖန့်ချန်ကို ဘေးကနေ ကြည့်ပြီး မကျေမနပ် ဖြစ်နေပါတယ်။
ဒီတစ်ခါ ဓားသင်္ချိုင်းလှေကားထစ်မှာ စုန်းမျိုးနွယ်စုရဲ့ ဓားကျင့်ကြံသူတွေက ဒီဖန့်ဓားဦးဆောင်သူကိုပဲ အသေအလဲ လိုက်တိုက်ကြမှာ သေချာပါတယ်။
ဒီလိုအခြေအနေမျိုးမှာ လှေကားထစ် ပထမတစ်ထပ်ကိုတောင် တက်နိုင်ပါဦးမလားပဲ။
"ကြည့်ရတာတော့ ထူးထူးခြားခြား မရှိပါဘူး"
စုန်းစုစု က ရုတ်တရက် မဲ့ပြုံး ပြုံးလိုက်တယ်
"အားလုံး နားထောင်ထားကြ၊ ဒီတစ်ခါ ဓားသင်္ချိုင်းလှေကားထစ်မှာ ထိပ်ဆုံးတက်ဖို့ကိုပဲ အာရုံမစိုက်နဲ့ဦး၊ ဒီလူကို မှတ်ထားကြ၊ ငါ့မောင်လေး စုန်းယိ အတွက် ဒီအညှိုးကို ပြန်ဆပ်ပေးရမယ်"
"ဘယ်သူက ဓားသင်္ချိုင်းလှေကားထစ်ထဲမှာ ဒီလူ့ရဲ့ ခေါင်းကို ဖြတ်နိုင်မလဲ၊ အဲဒီလူကို စုန်းမျိုးနွယ်စုရဲ့ ဓားကျမ်းကို တစ်လကြာ လေ့လာခွင့် ပေးမယ် "
"အမိန့်အတိုင်းပါ "
သူတို့ခေါ်လာတဲ့ စုန်းမျိုးနွယ်စုက ဓားကျင့်ကြံသူတွေရဲ့ မျက်လုံးတွေက ချက်ချင်း တောက်ပလာပြီး ပြိုင်တူ အော်ဟစ်လိုက်ကြပါတယ်။
ဖန့်ချန်ကို ကြည့်တဲ့ သူတို့ရဲ့ အကြည့်တွေက သတ်ဖြတ်လိုတဲ့ အငွေ့အသက်တွေနဲ့ ပြည့်နေပါပြီ။
လုံရွှမ်း ရဲ့ မျက်နှာ ပျက်သွားပါတယ်။
နှစ်ဖက်စလုံးရဲ့ အခြေအနေက တင်းမာလာတဲ့အချိန်မှာပဲ လူငယ်တစ်ယောက်က ဓားကျင့်ကြံသူ အချို့ကို ခေါ်ပြီး လျှောက်လာကာ နှစ်ဖက်စလုံးကို ပြုံးကြည့်ပြီး ပြောလိုက်တယ်
"မိန်းကလေးနှစ်ယောက်... ငါတို့ မတွေ့တာ တော်တော်ကြာပြီပဲ၊ ငါ့ဘက်ကို လာပြီး ခဏထိုင်ကြမလား"
"မိတ်ဆွေကျူ... ငါတို့ မတွေ့တာ ကြာပြီဆိုတာတော့ မှန်ပါတယ်၊ ဒါပေမဲ့ ဒီနေ့ ငါ စိတ်မပါဘူး၊ နောက်မှပဲ တွေ့ကြတာပေါ့"
စုန်းစုစု က မဲ့ပြုံး ပြုံးပြီး ပြောပါတယ်။
"အဲဒီကိစ္စကြောင့် ဖြစ်မှာပေါ့၊ စုန်းမိန်းကလေး စိတ်မပါတာလည်း မဆန်းပါဘူး၊ ငါသာဆိုရင်လည်း စိတ်ပျက်မိမှာပဲ"
လူငယ်က သက်ပြင်းအသာချလိုက်ပြီး ဖန့်ချန်ကို ကြည့်ကာ ပြစ်တင်ဝေဖန်လိုက်တယ်
"စုန်းမျိုးနွယ်စုက လူတွေ မင်းတို့ဆီ ရောက်သွားရင် သေချာ ဧည့်မခံရင်တောင် နေဦး၊ ဘယ်လိုဖြစ်လို့ သူတို့ရဲ့ ဝိညာဉ်ခွဲကို ဖျက်ဆီးရတာလဲ ဓားကျင့်ကြံသူ ဖြစ်ပြီးတော့ အထက်လူကြီးကို ဘယ်လိုများ ပြန်စော်ကားရတာလဲ မင်း သေချာ တောင်းပန်လိုက်ပါ၊ အမှားဝန်ခံလိုက်၊ မင်းရဲ့ မိသားစုအတွက် ပြဿနာမဖြစ်အောင်ပေါ့"
"ဟဲဟဲ..."
စုန်းမျိုးနွယ်စုဘက်က လူတွေက လှောင်ရယ် ရယ်လိုက်ကြပါတယ်။
"မိတ်ဆွေကျူ... အဲဒီကိစ္စကို ငါ့အဖေက ဖြေရှင်းပြီးသားပါ"
လုံရွှမ်း မျက်မှောင်ကြုတ်လိုက်ပါတယ်။
ဖန့်ချန်က ရှေ့က လူကို ကြည့်လိုက်ပါတယ်။
ကျင့်ကြံမှုက မနိမ့်ပေမဲ့ တာအိုပေါင်းစပ်ခြင်း အဆင့်ပဲ ရှိပါသေးတယ်။
ဒါပေမဲ့ သူ့ဆီမှာ ဓားကျင့်ကြံသူရဲ့ အငွေ့အသက် တစ်စက်တောင် မရှိပါဘူး။
"လုံရွှမ်းလေး... မင်းရဲ့ ဒီဓားကျင့်ကြံသူကို စုန်းမိန်းကလေးရှေ့မှာ အမှားဝန်ခံခိုင်းလိုက်ပါ၊ အမှုကြီးတာကို အမှုသေးအောင်၊ အမှုသေးတာကို ပပျောက်အောင် လုပ်လိုက်ရင် ရပြီပဲ"
လူငယ်က ပြောပါတယ်။
"လုံရွှမ်း... ဒါက ဘယ်သူလဲ"
ဖန့်ချန်က စပ်စုတဲ့ ပုံစံနဲ့ မေးလိုက်ပါတယ်။
"ဓားသင်္ချိုင်းနန်းတော်သခင်ရဲ့ သား ကျူခေါ့ရှိုး ပဲ၊ သူက ဓားကျင့်ကြံသူ လမ်းစဉ်ကို မလိုက်ဘူး သူ့အဖေကြောင့် ကျိုရှန်းဆန်း မြင့်မြတ်သောနယ်မြေက လွတ်လပ်သောမသေမျိုး တစ်ဦးက သူ့ကို တပည့်အဖြစ် အထူးလက်ခံထားတာ"
လုံရွှမ်းက အသံလှိုင်းနဲ့ လှမ်းပြောပြပါတယ်။
"ငါက ကျိုရှန်းဆန်း မြင့်မြတ်သောနယ်မြေက ကျူခေါ့ရှိုး ပါ၊ ငါက ကြားဝင်စေ့စပ်ပေးရင် ဘာပြဿနာမှ မရှိဘူးမလား "
ကျူခေါ့ရှိုး က ဖန့်ချန်ကို မဲ့ပြုံး ပြုံးကြည့်ပြီး
"ဒီဓားသင်္ချိုင်းနန်းတော်က ငါ ငယ်ငယ်ကတည်းက ကြီးပြင်းလာတဲ့ နေရာပဲ၊ ဓားကျင့်ကြံသူ တစ်ယောက်ကြောင့် မိန်းကလေးနှစ်ယောက် ဒီနေရာမှာ စိတ်အနှောင့်အယှက် ဖြစ်တာကို ငါ မမြင်ချင်ဘူး၊ ငါပြောတာ မင်း နားလည်မယ် ထင်တယ်"
"ဖန့်ဓားဦးဆောင်သူ... တောင်းပန်လိုက်ရုံတင်ပဲ၊ မခက်ပါဘူး"
ယန်ခုန်းက ဘေးကနေ လှောင်ပြော ပြောလိုက်ပါတယ်။
"ယန်ခုန်း ဟုတ်တယ်မလား မင်းနာမည်ကို ငါ မှတ်မိတယ်၊ အရင်ကလည်း မင်း ဒီကိုလာပြီး ဓားသင်္ချိုင်းလှေကားထစ် တက်ခဲ့ဖူးတယ်"
ကျူခေါ့ရှိုး က ယန်ခုန်းဘက် လှည့်ပြီး ပြုံးပြတယ်
"မင်းက စည်းကမ်း တော်တော် သိတာပဲ၊ မင်းတို့ဘက်က ဓားကျင့်ကြံသူတွေ အကုန်လုံး မင်းလိုသာဆိုရင် ဒီလောက် ပြဿနာတွေ ဖြစ်လာမှာ မဟုတ်ဘူး"
"တချို့ကောင်တွေက မာနက အရမ်းကြီးနေလို့ပါ"
ယန်ခုန်းက ရယ်ပြီး ပြောပါတယ်။
"တချို့ကောင်တွေကတော့ အရိုးက အရမ်းပျော့နေလို့ ဖြစ်မှာပါ"
ဖန့်ချန်က မအောင့်နိုင်ဘဲ ယန်ခုန်းကို ကြည့်ပြီး ပြုံးပြုံးလေး ပြောလိုက်တယ်
"ယန်ဓားဦးဆောင်သူ... မင်းကိုယ်တိုင် အရိုးပျော့ချင်ရင်လည်း ပျော့ပေါ့ ဘာလို့ သူများတွေကိုပါ လိုက်ဆွဲခေါ်နေတာလဲ ငါနဲ့ စုန်းယိ ကိစ္စက မင်းနဲ့ ဘာဆိုင်လို့လဲ"
"ဒါမှမဟုတ် ငါ့ကိစ္စကြောင့် စုန်းမျိုးနွယ်စုက မင်းကိုပါ ရန်ငြိုးထားပြီး ဓားသင်္ချိုင်းလှေကားထစ်မှာ မင်းကို ထိပ်ဆုံးမတက်နိုင်အောင် လုပ်မှာ ကြောက်နေတာလား "
ယန်ခုန်း ရဲ့ မျက်နှာ ပျက်သွားပါတယ်။
သူ့စိတ်ထဲမှာ တကယ်ပဲ အဲဒီလို ကြောက်နေတာပါ။
"အဲဒါကို မပူပါနဲ့"
ဖန့်ချန်က ရယ်ပြီး လက်ယမ်းပြလိုက်တယ်၊ အဲဒီနောက် စုန်းမျိုးနွယ်စုက လူတွေဘက် လှည့်ကြည့်ပြီး
"လောင်းကြေးပွဲနေ့ကျရင် စုန်းမျိုးနွယ်စုက ဓားကျင့်ကြံသူတွေကို တွေ့တာနဲ့ တစ်ယောက်မကျန် သတ်ပစ်မယ်"
အားလုံး ကြောင်သွားကြပါတယ်။
ယန်ခုန်း ရဲ့ မျက်နှာကလည်း ထူးဆန်းသွားပါတယ်။
ဖန့်ချန် ပြောတဲ့ မပူပါနဲ့ ဆိုတဲ့ အဓိပ္ပာယ်ကို သူ အခုမှ နားလည်သွားတာပါ။
ဒီလိုအချိန်မှာတောင် ရာဇသံ ပေးလိုက်တာကြောင့် အဲဒီနေ့ကျရင် စုန်းမျိုးနွယ်စုက လူတွေက ဖန့်ချန် တစ်ယောက်တည်းကိုပဲ အသေအလဲ လိုက်သတ်ကြတော့မှာပါ။
ကျူခေါ့ရှိုး ရဲ့ မျက်နှာပေါ်က အပြုံးတွေ တဖြည်းဖြည်း ပျောက်ကွယ်သွားပါတယ်။
စုန်းစုစု ရဲ့ အကြည့်တွေက အေးစက်သွားပြီး တိုးတိုးလေး ပြောလိုက်တယ်
"နင် ခုနက စကားကို နောက်တစ်ခါ ပြန်ပြောကြည့်စမ်း ငါ့စုန်းမျိုးနွယ်စုက ဓားကျင့်ကြံသူတွေကို ဘယ်လိုလုပ်မယ် ဟုတ်လား "
"မိန်းကလေးက ငယ်ငယ်ရွယ်ရွယ်နဲ့ နားများ ထိုင်းနေတာလား ငါက မျက်စိမမြင်တဲ့သူ၊ မင်းက နားမကြားတဲ့သူ... မင်းနဲ့ငါက တော်တော်လေး လိုက်ဖက်တယ်၊ မင်းတို့ စုန်းမျိုးနွယ်စုက သမက်တော်ချင်ရင် ပြောပါ ငါကတော့ အသက်နဲ့ရင်းပြီး စမ်းကြည့်ဖို့ အသင့်ပဲ"
ဖန့်ချန်က ပြောလိုက်ပါတယ်။
"..."
ခဏချင်းမှာတင် ပတ်ဝန်းကျင်တစ်ခုလုံး အလွန် တိတ်ဆိတ်သွားပါတယ်။
မူလက မဲ့ပြုံး ပြုံးနေကြတဲ့ စုန်းမျိုးနွယ်စုက လူတွေ အားလုံးဟာ အံ့သြဒေါသတွေနဲ့ ပြည့်နှက်သွားပါတော့တယ်။
ခြုံကောင်လို နိမ့်ကျလှတဲ့ ဓားကျင့်ကြံသူတစ်ယောက်က စုန်းစုစု ကို ပြောင်ချော်ချော် စကားပြောရဲတယ် ဟုတ်လား
လုံရွှမ်း ခေတ္တ မှင်သက်သွားပြီးနောက် သူမရဲ့ မျက်လုံးထဲမှာ ရယ်ချင်တဲ့ အရိပ်အယောင်တွေ ဖြတ်ပြေးသွားပါတယ်။
စုန်းမျိုးနွယ်စုက လူတွေ ဒေါသ မပေါက်ကွဲခင်မှာပဲ သူမက ဖန့်ချန်ရဲ့ လက်မောင်းကို ဆွဲပြီး အပြင်ကို ခေါ်ထုတ်သွားပါတော့တယ်။
"အဖေ စောင့်နေပြီ၊ သူ့ကို အကြာကြီး စောင့်ခိုင်းမနေနဲ့"
အဲဒီနောက် သူမက ကျူခေါ့ရှိုး ကို လှမ်းပြောလိုက်ဖို့ မမေ့ပါဘူး
"မိတ်ဆွေကျူ... ငါတို့ သွားပြီနော်"
ချန်ကျော့ကျူး နဲ့ ယန်ခုန်း တို့က လုံရွှမ်း ရဲ့ အပြုအမူကို မြင်တော့ မျက်နှာတွေ ပြိုင်တူ ပျက်သွားကြပေမဲ့ ဘာမှမပြောရဲကြပါဘူး။
ကျူခေါ့ရှိုး ကို လက်အုပ်ချီ နှုတ်ဆက်လိုက်ပြီးနောက် သူတို့နောက်ကို ခပ်မြန်မြန် လိုက်သွားကြပါတော့တယ်။
"တကယ်ပဲ နောက်ခံက မသေးလို့ စုန်းမျိုးနွယ်စုကိုတောင် မကြောက်တာပဲ"
ကျော့ရွှိ က ဒီမြင်ကွင်းကို ကြည့်ပြီး သူ့ရဲ့ ခန့်မှန်းချက် မှန်တယ်ဆိုတာ ပိုပြီး သေချာသွားပါတယ်။
ဒီဖန့်ချန်ဆိုတဲ့လူက ဓားကျင့်ကြံသူ မဟုတ်ဘဲ လုံယွမ် ၊ စစ်ဟွေ ဒါမှမဟုတ် မင်ဟူ ဘက်က အကြီးကဲတစ်ယောက်ယောက် ဖြစ်နေမလားလို့ သူ သံသယဝင်နေပါတယ်။
"တောသားက တောသားပဲ၊ လူကြီးလူကောင်း ပီသမှုလည်း မရှိဘူး၊ ဒီနေရာက စည်းကမ်းတွေကိုလည်း နားမလည်ဘူး အခု အခြေအနေက ထူးခြားနေလို့သာပေါ့၊ မဟုတ်ရင် သူ့ရဲ့ ဒီစကားတစ်ခွန်းတည်းနဲ့တင် ဒီနေ့ သူ အမှုန့်ဖြစ်သွားမှာ သေချာတယ်"
ကျူခေါ့ရှိုး က နှာမှုတ်လိုက်ပါတယ်။
အဲဒီနောက် စုန်းစုစု ဘက် လှည့်ကြည့်လိုက်တဲ့အခါ သူမရဲ့ မျက်နှာက ဒေါသကြောင့် ပြာနှမ်းနေပြီး ဘာမှမပြောတာကို မြင်တော့ သူကပဲ ဖြောင့်ဖျပေးလိုက်တယ်
"စုန်းမိန်းကလေး... စိတ်ထဲ အရမ်းမထားပါနဲ့လောင်းကြေးပွဲနေ့ကျရင် အဲဒီကောင်ကို ရှင်းပစ်လိုက်ရင် ရပြီပဲ"
စုန်းစုစု က ခေါင်းကို ဖြည်းဖြည်းချင်း ညိတ်လိုက်ပြီး သူမဘေးက ဓားကျင့်ကြံသူတွေကို ပြောလိုက်တယ်
"မင်းတို့ သေချာ ကြားလိုက်တယ်မလား အဲဒီနေ့ကျရင် သူ့လျှာကို အရင်ဖြတ်လိုက်၊ ငါ အဲဒါကို ခွေးကျွေးမယ်"
"ဟုတ်ကဲ့ပါ "
"မမ..."
စုန်းယိ က သူ့ကိစ္စကြောင့် စုန်းစုစု ပါ အစော်ကားခံလိုက်ရတာကို မြင်တော့ တော်တော်လေး အားနာနေပုံရပါတယ်။
"ယွင်လူမြို့ ကို သွားတဲ့လူတွေ မကြာခင် ပြန်လာတော့မယ်၊ အဲဒီအချိန်ကျရင် မင်းရဲ့ အစ်ကို သတင်းကိုပဲ အာရုံစိုက်ထားလိုက်၊ ဒီကောင်ကတော့ စိတ်ထဲ ထည့်မနေနဲ့တော့၊ သူက သေလူ ဖြစ်သွားပြီ"
စုန်းစုစု က ခပ်အေးအေး ပြောလိုက်ပါတယ်။
"နားလည်ပါပြီ..."
စုန်းယိ က ကမန်းကတန်း ခေါင်းညိတ်လိုက်ပါတယ်။
အခန်း (၁၀၂၆) လွတ်လပ်သောမသေမျိုး ပြစ်တင်ဝေဖန်ခြင်း
အားလုံး ဓားသင်္ချိုင်းနန်းတော်ကနေ ထွက်လာပြီးနောက်မှာတော့ လုံရွှမ်း ရဲ့ မျက်နှာပေါ်မှာ ရုတ်တရက် အပြုံးတစ်ခု ပေါ်လာပြီး ဖန့်ချန်ကို ခေါင်းညိတ်ပြလိုက်တယ်
"နင် ခုနကပြောတဲ့ စကားတွေက စုန်းစုစုကို ဒေါသထွက်ပြီး မျက်နှာပြာနှမ်းသွားစေတာပဲ သူမရဲ့ စရိုက်အရဆိုရင် နောက်ရက်တွေမှာ ဒီကိစ္စကို ခေါင်းထဲက ထုတ်နိုင်မှာ မဟုတ်ဘူး၊ ရင်ထဲမှာ တော်တော်လေး အောင့်သက်သက် ဖြစ်နေမှာ သေချာတယ်"
"လုံရွှမ်း... နင့်လက်"
ချန်ကျော့ကျူး က ခပ်တိုးတိုး သတိပေးလိုက်ပါတယ်။
အဲဒီတော့မှ လုံရွှမ်း သတိဝင်လာပြီး ဖန့်ချန်ရဲ့ လက်မောင်းကို ဆွဲထားတာကို လွှတ်လိုက်ပါတယ်။
သူမရဲ့ အပြုံးက အနည်းငယ် သဘာဝမကျ ဖြစ်သွားပြီး
"ငါတို့ အရင်ပြန်ရအောင်၊ ဒီမှာလည်း လျှောက်ကြည့်စရာ ဘာမှမရှိတော့ဘူး"
အပြန်လမ်းမှာတော့ ချန်ကျော့ကျူး က အနည်းငယ် နောက်ကျန်ခဲ့ပြီး ဖန့်ချန်ရဲ့ ဘေးကို ရောက်လာပါတယ်။
"ဓားကျင့်ကြံသူတွေရဲ့ တိုက်ခိုက်ရေးစွမ်းအားက ထိပ်တန်းမှာ ရှိတာတော့ အမှန်ပဲ၊ ငါနဲ့ မင်း ကျင့်ကြံချင်း တူရင် ငါလည်း မင်းရဲ့ ပြိုင်ဘက် ဖြစ်မှာ မဟုတ်ဘူး ဒါပေမဲ့ ဓားကျင့်ကြံသူဆိုတာ အမြဲတမ်း လမ်းလွဲကျင့်စဉ် သက်သက်ပဲဆိုတာ မှတ်ထားပါ၊ မင်းရဲ့ အဆင့်အတန်းကိုလည်း မင်း သိသင့်တယ်"
"လုံရွှမ်း က သူ့အဖေကြောင့် မင်းတို့ကို အကောင်းမြင်ပေးထားလို့ အချို့ကိစ္စတွေကို သတိမထားမိတာ ဖြစ်နိုင်တယ်၊ ဒါပေမဲ့ မင်းတို့ကိုယ်တိုင်ကတော့ သတိကြီးကြီးထားပြီး အရှက်မရှိတဲ့ အပြုအမူမျိုးတွေ မလုပ်မိဖို့ လိုအပ်တယ်"
ဖန့်ချန်က ချန်ကျော့ကျူး ကို တစ်ချက် ကြည့်လိုက်ပါတယ်။
ဒီရက်ပိုင်းအတွင်းမှာ ဒီလူက စကားပြောရင် မာန်မာန ကြီးနေပေမဲ့ သူတို့ကို ပြဿနာ လာမရှာခဲ့ပါဘူး။
အခုဟာက ခုနက လုံရွှမ်း က သူ့လက်မောင်းကို ဆွဲလိုက်တဲ့ ကိစ္စကြောင့် ဒီလူ တော်တော်လေး မကျေမနပ် ဖြစ်သွားပုံရပါတယ်။
"လုံမိန်းကလေးရဲ့ အတွေးကိုတော့ ငါ မထိန်းချုပ်နိုင်ဘူး၊ ဒါပေမဲ့ မင်း စိတ်ချပါ ငါနဲ့ မင်းက လမ်းကြောင်းတူသူတွေ မဟုတ်ဘူးဆိုတာ ငါ သိပါတယ်"
ဖန့်ချန်က ပြုံးပြီး ပြောလိုက်ပါတယ်။
ချန်ကျော့ကျူး ခေတ္တ မှင်သက်သွားပြီးနောက် ပြုံးကာ ခေါင်းညိတ်ပြတယ်
"မှန်တယ်၊ ငါနဲ့ မင်းက လမ်းကြောင်းတူသူတွေ မဟုတ်ဘူး"
သူက ဖန့်ချန်ရဲ့ ပခုံးကို ပုတ်လိုက်ပြီး လုံရွှမ်း ရဲ့ ဘေးကို ပျံသွားကာ တစ်ခုခု စကားစမြည် ပြောဆိုနေပါတော့တယ်။
"သူ ခုနက မင်းကို ဘာပြောသွားတာလဲ"
ပိုင်ချင်းမင်က ချန်ကျော့ကျူး ကို တစ်ချက် ကြည့်ပြီး မေးပါတယ်။
"အလကား အပိုစကားတွေပါ၊ ထည့်ပြောနေဖို့ မတန်ပါဘူး"
ဖန့်ချန်က ရယ်ပြီး ပြောလိုက်ပါတယ်။
အချိန်တွေ ရက်အနည်းငယ် ထပ်ကုန်လွန်သွားတဲ့အခါမှာတော့ လုံမျိုးနွယ်စုရဲ့ ဒုတိယ၊ တတိယနဲ့ စတုတ္ထအဆောင်က လူတွေ တစ်ဖွဲဖွဲ ရောက်ရှိလာကြပါတယ်။
စုန်းမျိုးနွယ်စုဘက်ကလည်း လူအများကြီး ရောက်လာကြပြီး တခြား နာမည်ကြီးမျိုးနွယ်စုတွေနဲ့ ပေါင်းလိုက်ရင် ကောင်းကင်ယံမှာ မသေမျိုးလှေ အစင်းတစ်ရာနီးပါး ရပ်နားထားကြပါတယ်။
အဆင့်မြင့်ပုဂ္ဂိုလ်တွေ ဆွေးနွေးတဲ့အခါ လီချန်စန်း လည်း ပါဝင်ခွင့်ရလိမ့်မယ်လို့ အားလုံးက ထင်ထားခဲ့ကြပေမဲ့ တကယ်တမ်း နှစ်ဖက်စလုံးက အဆင့်မြင့်ပုဂ္ဂိုလ်တွေ ဆွေးနွေးတဲ့အခါမှာတော့ လီချန်စန်း ဟာ သူတို့နဲ့အတူတူ မသေမျိုးလှေပေါ်မှာပဲ စောင့်ဆိုင်းနေရတာကို တွေ့လိုက်ရပါတယ်။
"ဖန့်ဓားဦးဆောင်သူ... ဒီနေရာမှာ ဓားကျင့်ကြံသူတွေရဲ့ အဆင့်အတန်းက... တကယ်ကို ကြည့်မကောင်းလှဘူးပဲ"
ပိုင်လင်ယွဲ့ ရဲ့ မျက်နှာက အနည်းငယ် စိတ်ပျက်နေပုံရတယ်
"ဒီကိစ္စပြီးရင် ငါ ပေတု ကိုပဲ ပြန်ချင်တော့တယ်"
"ဒီမှာ ဓားကျင့်ကြံသူတွေရဲ့ အဆင့်အတန်း နိမ့်နေတာ မှန်ပေမဲ့၊ ဒီနေရာက ဝိညာဉ်ပစ္စည်း တွေက ငါတို့ဆီထက် အများကြီး ပိုများတယ်၊ အခွင့်အရေးတွေလည်း ပိုများတယ်"
ဖန့်ချန်က ခပ်အေးအေးပဲ ပြောလိုက်တယ်
"မင်း တကယ်လို့ ပြန်ဖို့ ရွေးချယ်မယ်ဆိုရင် အဲဒါက မင်းရင်ထဲက အရှုံးကို ရင်မဆိုင်ရဲလို့ပဲ ဖြစ်လိမ့်မယ်၊ နောက်ဆိုရင် မင်းရဲ့ ဓားပညာကလည်း တိုးတက်လာမှာ မဟုတ်တော့ဘူး"
"ဒါပေမဲ့ ဒီမှာ ဆက်နေရင် သူတို့က ခဏခဏ နှိမ်ပြီး ပြောဆိုနေတာတွေကို ကြားနေရတော့ စိတ်တိုလွန်းလို့ ဦးနှောက်တွေတောင် အရည်ပျော်တော့မယ် လုံရွှမ်း မိန်းကလေးက တော်သေးတယ်၊ ကျန်တဲ့လူတွေကတော့ ငါတို့ကို သူမလိုမျိုး ကောင်းကောင်းမွန်မွန် ဆက်ဆံကြတာ မဟုတ်ဘူး"
ပိုင်လင်ယွဲ့ က တိုးတိုးလေး ပြောပါတယ်။
"စကားမပြောနဲ့တော့၊ မင်းကို လာရှာနေတဲ့သူ ရှိတယ်"
ပိုင်ချင်းမင်က ဖန့်ချန်ကို တံတောင်နဲ့ ရုတ်တရက် တို့လိုက်ပါတယ်။
လုံရို့ က မလှမ်းမကမ်းမှာ ရပ်ပြီး သူ့ကို လက်ယမ်းပြနေတာပါ။
လုံရို့ က ဖန့်ချန်ကို ဘေးကိုခေါ်ပြီး စကားပြောနေတာကို မြင်တော့ အားလုံးရဲ့ မျက်နှာတွေက ထူးဆန်းသွားကြပါတယ်။
"ကြည့်ရတာ ဒုတိယအဆောင်က ဒီမိန်းကလေးက သူ့အပေါ် အမြင် တော်တော်ကောင်းနေပုံပဲ"
ချန်ကျော့ကျူး က မဲ့ပြုံး ပြုံးပြီး ပြောပါတယ်။
လုံရွှမ်း မျက်မှောင်ကြုတ်သွားပြီး သူတို့နှစ်ယောက်ဆီ လျှောက်သွားပါတယ်။
"လုံရွှမ်း... ငါတို့ သွားပြီး ဝင်မရှုပ်တာ ပိုမကောင်းဘူးလား "
ချန်ကျော့ကျူး ခေတ္တ မှင်သက်သွားပါတယ်။
"လုံရို့ က ဘာအကြံအစည် ရှိနေလဲဆိုတာ ငါ သိချင်လို့"
လုံရွှမ်း က အေးစက်စက် ပြောလိုက်ပါတယ်။
...
...
"မင်း ရှာခိုင်းထားတဲ့သူရဲ့ သတင်း ရပြီ"
လုံရော့ ရဲ့ မျက်နှာက အနည်းငယ် ထူးဆန်းနေတယ်
"သူမက မဟာရဟန္တာသဲကန္တာရထဲမှာ လူအများကြီး သတ်ခဲ့တယ်၊ ပြီးတော့ သဲကန္တာရထဲက စိန့်လော့ဂိုဏ်း ကိုလည်း သွားရန်စမိထားလို့ အခု လိုက်လံ အဖမ်းခံနေရတယ်"
"ကောလာဟလတွေအရတော့ အဲဒီအမျိုးသမီးက မိစ္ဆာဝင် သွားပြီလို့ ဆိုကြတယ်၊ ငါ လွှတ်လိုက်တဲ့သူတွေတောင် သူမလက်ထဲမှာ အပြင်းအထန် ဒဏ်ရာရခဲ့ကြတယ်၊ ဘယ်သူ့စကားကိုမှ နားမထောင်တော့ဘူးတဲ့၊ မင်း သေချာလား သူမကို ဆက်ရှာဦးမှာလား "
ဖန့်ချန်ရဲ့ အကြည့်တွေက လေးနက်သွားပါတယ်။
ကြည့်ရတာ မိစ္ဆာသန္ဓေသား ရဲ့ တိုက်စားမှုက ပိုပြီး ပြင်းထန်လာပုံရပါတယ်။
"သူမ ရှိနေတဲ့ နေရာကို ငါ့အတွက် အတည်ပြုပေးထားပါ၊ ဒီကိစ္စတွေ ပြီးသွားရင် ငါကိုယ်တိုင် သွားရှာမယ်"
ဖန့်ချန်က ပြောလိုက်ပါတယ်။
"ရတာပေါ့၊ ဒါဆို ငါ ရှာခိုင်းထားတဲ့သူကော"
လုံရို့ က ခေါင်းညိတ်ပြီး မေးပါတယ်။
"ရှာနေတုန်းပဲ၊ လောလောဆယ် သတင်းမရသေးဘူး၊ မင်းရှာခိုင်းတဲ့သူက အခက်အခဲ တော်တော်ရှိလို့ အချိန်နည်းနည်း ပိုပေးရမယ် ငါ အားသွားတဲ့အခါ သူ သေဆုံးခဲ့တဲ့နေရာကို ငါ့ကို ခေါ်သွားပေးပါ"
ဖန့်ချန်က ပြောပါတယ်။
"ကောင်းပြီလေ"
လုံရို့ က ခေါင်းညိတ်ပြပြီး လှည့်ထွက်သွားပါတယ်။
"ငါ လာတာနဲ့ သူ ဘာလို့ ထွက်သွားတာလဲ "
လုံရွှမ်း အနားရောက်လာတဲ့အခါ လုံရို့ ထွက်သွားတာကို မြင်တော့ ချက်ချင်း မျက်မှောင်ကြုတ်သွားပါတယ်။
"လုံရို့ မိန်းကလေးက စကားခဏ လာပြောတာပါ"
ဖန့်ချန်က ပြုံးပြီး ပြောလိုက်ပါတယ်။
"သူက မင်းကို သူ့ဘက်ပါအောင် စည်းရုံးနေတာလား၊ ငါ့ကို အမှန်အတိုင်း ပြောစမ်း"
လုံရွှမ်း က တိုးတိုးလေး မေးပါတယ်။
"မစိုးရိမ်ပါနဲ့၊ ဒီတစ်ခါ လုံမျိုးနွယ်စုနဲ့ စုန်းမျိုးနွယ်စုရဲ့ လောင်းကြေးပွဲက ငါ့ရဲ့ ဇာတိမြေနဲ့ ပတ်သက်နေတာမို့ ငါ အစွမ်းကုန် ကြိုးစားမှာပါ"
ဖန့်ချန်က ရယ်ပြီး ပြောလိုက်ပါတယ်။
"ငါက စိုးရိမ်လို့ မဟုတ်ပါဘူး၊ မင်းနဲ့ ဒုတိယအဆောင်ကြားမှာ ပတ်သက်မှု သိပ်မရှိစေချင်ရုံတင်ပါ"
လုံရွှမ်း က ခေါင်းကို ဖြည်းဖြည်းချင်း ခါလိုက်ပါတယ်။
ချန်ကျော့ကျူး က မဲ့ပြုံး ပြုံးပြီး
"မင်းက လီ..."
ကောင်းကင်ယံမှာ မိုးကြိုးပစ်သံလို ဟိန်းခနဲ အသံတစ်ခု ထွက်ပေါ်လာပါတယ်။
ချန်ကျော့ကျူး ရဲ့ စကားတွေ ရပ်တန့်သွားပါတယ်။
အားလုံး မော့ကြည့်လိုက်တဲ့အခါမှာတော့ လူရိပ်တစ်ခုက လေပြင်းမုန်တိုင်းလို ကောင်းကင်ကို ထိုးဖောက်ပြီး ရောက်ရှိလာတာကို တွေ့လိုက်ရပါတယ်။
သူ ရပ်လိုက်တဲ့အခါမှာတော့ သူ့ကိုယ်ပေါ်က လေပြင်းနဲ့ မိုးကြိုးတွေက တဖြည်းဖြည်း ပျောက်ကွယ်သွားပါတယ်။
သူကတော့ နေနဲ့လပုံစံ ပါတဲ့ ဝတ်ရုံနက် ကို ဝတ်ဆင်ထားတဲ့ အဘိုးအို တစ်ယောက်ပါ။
သူ့ရဲ့ အကြည့်တွေက အေးစက်နေပြီး မာန်မာန ကြီးမားလှပါတယ်။
ဒီအတိုင်း ရပ်နေရုံနဲ့တင် မမြင်ရတဲ့ ဖိအားတွေက အရပ်မျက်နှာ အနှံ့ကို ရိုက်ခတ်သွားပါတယ်။
"ဪ... ယွင်လူ မိတ်ဆွေကြီး ရောက်လာတာကိုး"
လုံမျိုးနွယ်စုနဲ့ စုန်းမျိုးနွယ်စုက အဆင့် ၂ လွတ်လပ်သောမသေမျိုးတွေက ချက်ချင်း ကောင်းကင်ပေါ်ကို ပျံတက်သွားပြီး လက်အုပ်ချီ နှုတ်ဆက်ကြပါတယ်။
"ယွင်လူမြို့ က အဲဒီလူလား"
"သူက ဘာလို့ ရောက်လာတာလဲ "
အရပ်ရပ်က ကျင့်ကြံသူတွေ အံ့သြသွားကြပါတယ်။
ယွင်လူမြို့ ဟာ မျိုးနွယ်စုကြီး ၄ ခုကြားက ကိစ္စတွေမှာ ဘယ်တုန်းကမှ ဝင်မပါခဲ့ပါဘူး။
ဒီတစ်ခါ စုန်းမျိုးနွယ်စုနဲ့ လုံမျိုးနွယ်စု လောင်းကြေးပွဲကို တခြား မျိုးနွယ်စုကြီး ၂ ခုတောင် လာကြည့်ဖို့ စိတ်မဝင်စားကြတာပါ။
ယွင်လူမြို့ က အခုမှ အဆင့် ၃ လွတ်လပ်သောမသေမျိုးအဖြစ် တိုးတက်သွားတဲ့ အဲဒီပုဂ္ဂိုလ်က ဒီကို ရောက်လာတယ်ဆိုတော့ တခြား ရည်ရွယ်ချက် ရှိနေတာလား
ဖန့်ချန် နဲ့ လုံရို့ တို့ဟာ မသေမျိုးလှေတွေကို ဖြတ်ပြီး တစ်ယောက်ကိုတစ်ယောက် လှမ်းကြည့်လိုက်ကြပါတယ်။
"ငါ ဒီကို လာတာက မင်းတို့ရဲ့ လောင်းကြေးပွဲမှာ ဝင်ရှုပ်ဖို့ မဟုတ်ဘူး၊ မျိုးဆက်သစ် အချို့ကို စကားအနည်းငယ် မေးချင်လို့ပဲ"
ကျောက်ယွင်လူ က အေးအေးဆေးဆေး ပြောလိုက်ပါတယ်။
မိသားစုနှစ်ခုက အဆင့် ၂ လွတ်လပ်သောမသေမျိုးတွေ တစ်ယောက်ကိုတစ်ယောက် ကြည့်လိုက်ကြပြီး တစ်ယောက်က လှမ်းမေးလိုက်တယ်
"ပြီးခဲ့တဲ့ ရက်ပိုင်းက ကိစ္စကြောင့်လား"
"မှန်တယ်"
ကျောက်ယွင်လူ ရဲ့ အကြည့်တွေက လျှပ်စစ်မီးလို ထက်မြက်နေပြီး အဆင့် ၂ လွတ်လပ်သောမသေမျိုးတွေနဲ့ မသေမျိုးလှေပေါ်မှာ ရှိနေတဲ့ အဆင့် ၁ လွတ်လပ်သောမသေမျိုးတွေပေါ်မှာ ဝေ့ကြည့်လိုက်ပြီး ပြောလိုက်တယ်
"ငါ့သား ကျောက်မင်ရွှမ် မသေခင်မှာ ကိစ္စတစ်ခု လုပ်ခဲ့တယ်၊ အဲဒီကိစ္စက သူ့ဘက်က မှားတာ ဖြစ်နိုင်ပေမဲ့ သေဒဏ်ပေးရမယ့်အထိတော့ မဟုတ်ဘူး"
သူ့သားအတွက် လာတာလား
အားလုံး တစ်ယောက်ကိုတစ်ယောက် ကြည့်လိုက်ကြပါတယ်။
ဒါဆိုရင် စုန်းမျိုးနွယ်စု ဒါမှမဟုတ် လုံမျိုးနွယ်စုက တစ်ယောက်ယောက်က ကျောက်မင်ရွှမ်ကို သတ်လိုက်တာလား
ဒါက အရင်တုန်းကဆိုရင်တော့ ကိစ္စမရှိပေမဲ့ အခု ကျောက်ယွင်လူ က အဆင့် ၃ ကို ရောက်သွားပြီး ချောင်ဖုန်းနယ်မြေရဲ့ ထိပ်တန်းပုဂ္ဂိုလ် ဖြစ်လာတာပါ။
ဒီလို လူမျိုးကို သွားရန်စမိရင် သူက ပြိုင်ဘက်ဘက်ကိုသာ ကူညီလိုက်မယ်ဆိုရင် တော်တော်လေး ဒုက္ခရောက်မှာ သေချာပါတယ်။
"ငါ သေချာ စုံစမ်းပြီးပြီ၊ ငါ့သား ကျောက်မင်ရွှမ် မသေခင်မှာ လုံမျိုးနွယ်စု ဒုတိယအဆောင်က လုံရို့ ဆီကို လူခေါ်သွားခဲ့တယ်၊ အဲဒါက သူမခေါ်လာတဲ့ ဓားကျင့်ကြံသူက စည်းကမ်းမရှိဘဲ ငါ့သားကို ရန်စခဲ့လို့ပဲ၊ ဒါကြောင့် အဲဒီနှစ်ယောက်ကို ငါ တွေ့ချင်တယ်၊ ငါ့သား အခု ဘယ်မှာလဲဆိုတာ မေးကြည့်ရမယ်"
ကျောက်ယွင်လူ က ခပ်အေးအေး ပြောလိုက်ပါတယ်။
လုံအောက် က အစကတော့ ဘေးကနေ ပွဲကြည့်နေတာပါ၊ ဒီစကားကို ကြားလိုက်ရတဲ့အခါမှာတော့ အလိုအလျောက် လုံရို့ ဘက်ကို လှည့်ကြည့်လိုက်ပါတယ်။
လုံရို့ ကတော့ ဘာဖြစ်လို့ ဖြစ်မှန်း မသိတဲ့ ပုံစံနဲ့ ကြောင်နေပုံရပါတယ်။
"လုံအောက်... လုံရို့ က မင်းသမီးပဲ မဟုတ်လား သူမနဲ့ အဲဒီဓားကျင့်ကြံသူကို ခေါ်လိုက်ပါ၊ ယွင်လူ မိတ်ဆွေက စကားမေးရုံတင်ပါ၊ မကြောက်ပါနဲ့"
လုံမျိုးနွယ်စုက အဆင့် ၂ လွတ်လပ်သောမသေမျိုးက အလေးအနက် ပြောလိုက်ပါတယ်။
စုန်းမျိုးနွယ်စုဘက်က လူတွေကတော့ ဒီကိစ္စက သူတို့နဲ့ မဆိုင်တာကြောင့် လက်ပိုက်ပြီး ပျော်ပျော်ကြီး ပွဲကြည့်နေကြပါတော့တယ်။