အခန်း (၁၀၃၃-၁၀၃၄)
Vol. 104 Ch. 1033-1034
အခန်း (၁၀၃၃) မင်းတို့ရဲ့ အသက်ရှူသံကို ငါကြားနေရတယ်
အဲဒီ စုန်းမျိုးနွယ်စု ဓားကျင့်ကြံသူ အုပ်စုဟာ မှင်တက်သွားကြပြီး မျက်နှာတွေက အရမ်းကို ကြည့်ရဆိုးသွားပါတယ်။
အခုအချိန်မှာ သူတို့အတွက်က ရှေ့တိုးဖို့ကော နောက်ဆုတ်ဖို့ကော မလွယ်တော့တာကြောင့် သွားကြိတ်ပြီး အတင်းတိုးတိုက်ဖို့ပဲ ဆုံးဖြတ်လိုက်ကြပါတယ်။
ဖန့်ချန်က လက်တစ်ဖက်နဲ့ နွယ်ပင်ကို မြဲမြဲဆုပ်ကိုင်ထားပြီး ပါးစပ်ထဲက ဓားရှည်ကို လက်ထဲပြောင်းကိုင်လိုက်ပါတယ်။
အဲဒီနောက် ကိုယ်ကို အရှိန်ပြင်းပြင်း လွှဲလိုက်ပြီး အရှိန်အဟုန်ကို သုံးကာ စုန်းမျိုးနွယ်စု ဓားကျင့်ကြံသူတွေကြားထဲမှာ ဟိုဟိုဒီဒီ ဖြတ်သန်းသွားပါတယ်။
ဓားတစ်ချက် ထုတ်လိုက်တိုင်း လူတစ်ယောက်က အော်ဟစ်ကာ ပြုတ်ကျသွားပြီး မြေပြင်ပေါ်မှာ အသားစတုံးအဖြစ် ပြောင်းလဲသွားပါတယ်။
စက္ကန့်အနည်းငယ်အတွင်းမှာတင် ဖန့်ချန်ကို တားဆီးဖို့ ဆင်းလာတဲ့ စုန်းမျိုးနွယ်စု ဓားကျင့်ကြံသူတွေ အားလုံး ပြုတ်ကျသေဆုံးကုန်ပါပြီ။
ဖန့်ချန်က ဓားပေါ်က သွေးစွန်းတွေကို ဂရုမစိုက်ဘဲ ဓားရှည်ကို ပါးစပ်နဲ့ ပြန်ကိုက်ကာ အပေါ်ကို ဆက်တက်ပါတယ်။
စုန်းစုစု ရဲ့ မျက်နှာက အရမ်းကို ကြည့်ရဆိုးနေပြီး စုန်းယိ နဲ့ တခြားလူတွေကတော့ ဒီအချိန်မှာ သူမရဲ့ ဒေါသနဲ့ မတိုးမိအောင် ဘယ်သူမှ စကားမဟရဲကြပါဘူး။
အချိန်အနည်းငယ်အတွင်းမှာတင် စုန်းမျိုးနွယ်စုက ဓားကျင့်ကြံသူ ဒါဇင်နဲ့ချီ သေဆုံးသွားပါပြီ။
တကယ်လို့ ဒီဓားကျင့်ကြံသူတွေသာ အပေါ်ကိုပဲ အာရုံစိုက်တက်မယ်ဆိုရင် အနည်းဆုံးတော့ အဆင့် ၆၀ လောက်အထိ ရောက်နိုင်ကြမှာပါ။
"ငါတို့... အပေါ်ကိုပဲ ဆက်တက်ကြမလား"
အောက်ကို ငုံ့ကြည့်နေတဲ့ စုန်းမျိုးနွယ်စု ဓားကျင့်ကြံသူတွေဟာ တစ်ယောက်ကိုတစ်ယောက် ကြည့်လိုက်ကြပြီး နောက်ဆုံးမှာတော့ တစ်ယောက်က ဆက်တက်ဖို့ အကြံပြုတာကို အားလုံးက သဘောတူလိုက်ကြပါတယ်။
သူတို့တွေဟာ ကိုယ့်အသက်ကို ဒီနေရာမှာ အလဟသ အဆုံးမခံချင်ကြတော့ပါဘူး။
ဘယ်လိုပဲဖြစ်ဖြစ် တစ်ဖက်လူက ထိပ်ဆုံးရောက်ဖို့ မဖြစ်နိုင်တာကြောင့် ဂရုမစိုက်တာကပဲ အကောင်းဆုံးပါ။
တတိယအဆောင်ရဲ့ မသေမျိုးလှေပေါ်မှာတော့ သျှောင်နတ်နဂါးမလေး က ဒါကို မြင်တဲ့အခါ ခပ်ဖွဖွ ပြုံးလိုက်ပြီး
"သူ့ရဲ့ ဆရာသခင် လီကျန်းနျန် ရဲ့ မျက်နှာကို တကယ်ပဲ အပျက်မခံဘူးပဲ"
တတိယအဆောင်က လွတ်လပ်သောမသေမျိုးတွေကလည်း လိုက်ပြီး ပြုံးပြကြပေမဲ့ စိတ်ထဲမှာတော့ သိပ်ပြီး အရေးမထားကြပါဘူး။
သူတို့ ပိုပြီး အလေးထားတာက ဖုတုန်းဟိုင် တို့လို လူတွေကိုပါ။
ဒါတွေကမှ လုံမျိုးနွယ်စုရဲ့ ဒီလောင်းကြေးပွဲမှာ အကြီးမားဆုံး အားကိုးရာတွေ မဟုတ်လား။
ဖန့်ချန် ပထမအဆင့် လှေကားထစ်ကို ရောက်တဲ့အချိန်မှာ ဖုတုန်းဟိုင် တို့ကတော့ တတိယအဆင့် လှေကားထစ်ကို အောင်မြင်စွာ တက်လှမ်းနိုင်ခဲ့ပါပြီ။
ကြီးမားလှတဲ့ လှေကားထစ်ပေါ်မှာတော့ ဖန့်ချန်တစ်ယောက်တည်းကလွဲလို့ တခြား ဘယ်သူမှ မရှိဘဲ ဟောင်းလောင်းကြီး ဖြစ်နေပါတယ်။
"ခြေလှမ်းတွေက အနည်းငယ် လေးလာသလိုပဲ"
ဖန့်ချန်က ခန္ဓာကိုယ်ရဲ့ ပြောင်းလဲမှုကို တိတ်တဆိတ် ခံစားကြည့်ပါတယ်။
လေဟာနယ်ထဲမှာတော့ မမြင်ရတဲ့ ဖိအားတစ်ခုက သူ့အပေါ် ကျရောက်နေသလိုပါပဲ။
ကံကောင်းတာက ဒီဖိအားက သိပ်မပြင်းထန်သေးတာကြောင့် လောလောဆယ် သူ့အတွက် အဟန့်အတား မဖြစ်သေးပါဘူး။
ဖန့်ချန်က ဒုတိယအဆင့် လှေကားထစ်ဆီကို ဆက်တက်သွားပါတယ်။
သူ ဒုတိယအဆင့် လှေကားထစ်ကို ရောက်တဲ့အခါမှာလည်း ဘယ်သူမှ မရှိပါဘူး။
လူတိုင်းက တတိယအဆင့် ဒါမှမဟုတ် စတုတ္ထအဆင့်ကို ရောက်နေကြပါပြီ။
စတုတ္ထအဆင့် လှေကားထစ်မှာ ရှိနေတဲ့ ဖုတုန်းဟိုင် က အောက်ကို တစ်ချက် ငုံ့ကြည့်လိုက်တဲ့အခါ ဖန့်ချန် တစ်ယောက်တည်း ဒုတိယအဆင့်မှာ ရပ်နေတာကို မြင်ပြီး ပြုံးလိုက်ပါတယ်။
"စီနီယာအစ်ကို... အစ်ကို ခုနက လုပ်လိုက်တာက လုံရို့ လေးကို စိတ်ဆိုးအောင် လုပ်လိုက်သလို ဖြစ်နေပြီ"
ကျန်းကောင်းထျန်း က ဖုတုန်းဟိုင် ရဲ့ ဘေးကို လျှောက်လာပြီး ခပ်တိုးတိုး ပြောပါတယ်။
"ကိစ္စမရှိပါဘူး၊ ဒုတိယအဆောင်မှာ သခင်လေးတွေ၊ သခင်မလေးတွေ အများကြီး ရှိတာပဲ ငါသာ ဒီတစ်ခါ ထိပ်ဆုံးရောက်သွားရင် သူမ တစ်ယောက်တည်းကို စိတ်ဆိုးအောင် လုပ်မိတာက ဘာဖြစ်မှာလဲ"
ဖုတုန်းဟိုင် က လက်လှမ်းမမီနိုင်တဲ့ ဟင်းလင်းပြင်ကြီးကို လှမ်းကြည့်လိုက်ပါတယ်။
ဓားသင်္ချိုင်းလှေကားထစ်ရဲ့ အဆုံးသတ်က သူ့ကို လက်ယပ်ခေါ်နေသလိုပါပဲ။
"ငါတို့ ဓားကျင့်ကြံသူတွေဆိုတာ လုံမျိုးနွယ်စုရဲ့ လက်ထဲက ဓားတွေပဲ ဒီဓားကသာ လုံလောက်အောင် ထက်မြက်နေမယ်ဆိုရင် သူတို့ ငါတို့ကို အသာတကြည် ပစ်ထားမှာ မဟုတ်ဘူး"
ဖုတုန်းဟိုင် က ပြောပြီးတာနဲ့ ပဉ္စမအဆင့် လှေကားထစ်ဆီ သွားတဲ့ နွယ်ပင်တွေဆီ လျှောက်သွားပါတယ်။
ထိပ်ဆုံးရောက်ရင် ဓားကျမ်းတစ်စောင် ရမယ်။
အဲဒါက လုံမျိုးနွယ်စုမှာ ရှိပြီးသား ဓားကျမ်း ၃၆ စောင်ထဲက တစ်စောင် မဟုတ်ဘူးဆိုရင် သူဟာ နောက်ပိုင်းမှာ လီချန်စန်း တို့၊ ကျူးယွမ်ချန်း တို့လို ဓားကျင့်ကြံသူမျိုး ဖြစ်လာမှာပါ။
သူ့ရဲ့ အဆင့်အတန်းကလည်း နိမ့်ကျမှာ မဟုတ်တော့ပါဘူး
တကယ်လို့ ဓားကျမ်းကို မရနိုင်ခဲ့ရင်တောင် ထိပ်ဆုံးရောက်တာက သူ့ရဲ့ ဓားလမ်းစဉ် ပါရမီဟာ ထူးခြားပြောင်မြောက်ကြောင်း သက်သေပြပြီးသား ဖြစ်သွားပါလိမ့်မယ်။
အဲဒီအချိန်ကျရင် လုံမျိုးနွယ်စုက သူ့ကို အားသွန်ခွန်စိုက် ပြုစုပျိုးထောင်ပေးမှာ အသေအချာပါပဲ။
ကိုယ့်ရဲ့ လက်အောက်မှာ လွတ်လပ်သောမသေမျိုး ဓားကျင့်ကြံသူ တစ်ယောက် တိုးလာမှာကို ဘယ်သူက မလိုချင်ဘဲ နေမလဲ
လုံရို့ လို မိန်းကလေးမျိုးကတော့ ဂရုစိုက်နေစရာ မလိုပါဘူး။
အချိန်တွေ တဖြည်းဖြတ် ကုန်ဆုံးသွားပြီး နာရီအနည်းငယ်အကြာမှာတော့ လူအချို့ဟာ အဆင့် ၁၇ လှေကားထစ်ကို ရောက်နေကြပါပြီ။
သူတို့တွေက လောင်းကစားဒိုင်တွေမှာ ရေပန်းစားနေသူတွေ ဖြစ်တာကြောင့် ဒီလောက်မြန်မြန် တက်နိုင်တာက လူတိုင်း ခန့်မှန်းထားတဲ့အတိုင်းပါပဲ။
ဒါပေမဲ့ ဒီထဲမှာ မျှော်လင့်မထားတဲ့ လူအချို့လည်း ပါလာပါတယ်။
"လုံမျိုးနွယ်စု ပထမအဆောင်က သမက် ခေါ်လာတဲ့ ဓားကျင့်ကြံသူလည်း မဆိုးဘူးပဲ၊ နာမည်က ဘယ်သူပါလိမ့် ယန်ခုန်း ဟုတ်လား "
"သူ့ရဲ့ အဆပေါင်း တွေ ကျလာပြီဟ ဒီအချိန်မှာ အခွင့်ကောင်းယူပြီး နည်းနည်းလောက် လောင်းထားရင် မကောင်းဘူးလား"
"နောက်တစ်ယောက်လည်း မဆိုးဘူး အဆင့် ၁၆ ကို ရောက်နေပြီ သူ့ကို လောင်းလိုက်ပါ၊ ပေါက်ရင် အများကြီး ရမယ်"
"ရှုံးရင်လည်း နာမှာပေါ့၊ မင်းပဲ လောင်းတော့၊ ငါကတော့ သေချာတဲ့လူကိုပဲ ရွေးမယ်"
ယန်ခုန်း က အမောတကော အသက်ရှူရင်း အားပြန်ဖြည့်ဖို့ အချိန်ကို အလဟသ အဆုံးမခံရဲပါဘူး။
ဒီအချိန်မှာ သူ အောက်ကို ငုံ့ကြည့်လိုက်တဲ့အခါ ပိုင်ချင်းမင် နဲ့ ဖန့်ချန် တို့ကို တွေ့လိုက်ရပါတယ်။
ဖန့်ချန်ကို ထားလိုက်ပါဦး၊ အခု ပိုင်ချင်းမင် တောင် အဆင့် ၁၆ မှာ နားနေတုန်းပါ။
သူ့မျက်လုံးထဲမှာတော့ အထင်အမြင်သေးတဲ့ အရိပ်အယောင်တွေ ဖြတ်ပြေးသွားပြီးနောက် ကောင်းကင်ယံကို မော့ကြည့်လိုက်ပါတယ်။
အဲဒီဘက်က ပထမအဆောင်ရဲ့ မသေမျိုးလှေ ရှိတဲ့ ဘက်ပါ။
"ဆရာက ဖန့်ချန်ကို အထင်ကြီးနေပေမဲ့၊ ဒီနေ့အတွက် ငါ ဘယ်လောက်အထိ ပြင်ဆင်ခဲ့ရလဲဆိုတာ သူ မသိဘူး"
ယန်ခုန်း က အကြည့်ကို ရုပ်သိမ်းလိုက်ပြီး အဆင့် ၁၈ လှေကားထစ်ဆီ သွားတဲ့ နွယ်ပင်ဆီကို လျှောက်သွားပါတယ်။
......
......
တဖြည်းဖြည်းနဲ့ ဖန့်ချန်ရဲ့ အရှိန်က စုန်းမျိုးနွယ်စုနဲ့ လုံမျိုးနွယ်စုက ဓားကျင့်ကြံသူ အတော်များများကို မှီလာပါတယ်။
သူတို့တွေက ဖန့်ချန် သူတို့ကို မှီလာတာကို မြင်တော့ မျက်နှာတွေ ပျက်ကုန်ကြပါတယ်။
တစ်ဖက်လူက နောက်ကျမှ ထွက်လာတာဖြစ်သလို လမ်းမှာလည်း ဝိုင်းတိုက်တာကို နှစ်ကြိမ်တောင် ကြုံခဲ့ရတာပါ။
အခုတော့ သူတို့နဲ့ တစ်နေရာတည်း ရောက်နေပြီဆိုတာက သူတို့ဟာ ဒီကလေးကို မမီဘူးဆိုတာ သွယ်ဝိုက်ပြီး သက်သေပြနေသလိုပါပဲ။
"သူ့ကို အပေါ် ဆက်တက်ခွင့် မပေးနဲ့တော့"
စုန်းမျိုးနွယ်စု ဓားကျင့်ကြံသူတစ်ယောက်က ဖန့်ချန် နားနေတာကို မြင်တော့ ချက်ချင်း ထရပ်လိုက်ပြီး ပတ်ဝန်းကျင်ကို ဝေ့ကြည့်ကာ အသံကျယ်ကျယ်နဲ့ ပြောလိုက်ပါတယ်
"ဒီကောင် ငါတို့ရဲ့ လုပ်ဖော်ကိုင်ဖက်တွေ အများကြီးကို သတ်ခဲ့တာ၊ အခု မရှင်းပစ်ရင် နောက်မှ နောင်တရနေမှာလား"
နားနေကြတဲ့ လုံမျိုးနွယ်စု ဓားကျင့်ကြံသူတွေကတော့ တစ်ယောက်ကိုတစ်ယောက် ကြည့်လိုက်ကြပါတယ်။
သူတို့ရဲ့ အမူအရာက ထူးဆန်းနေပေမဲ့ ဘယ်သူမှ ဝင်မပြောကြပါဘူး။
သူတို့က ထိပ်ဆုံးရောက်ဖို့ပဲ စိတ်ဝင်စားကြပြီး ဒီလိုကိစ္စတွေမှာ ဝင်မပါချင်ကြပါဘူး။
အားအင်တွေကို နောက်ဆုံးအထိ ချန်ထားချင်ကြတာပါ။
ဒီနေ့ ဓားကျင့်ကြံသူ တစ်ထောင်ကျော် ရှိတဲ့အနက် အခု သူတို့ရဲ့ အထက်မှာ ခုနစ်ရာ၊ ရှစ်ရာလောက် ရှိနေတာမို့ နောက်ကနေ ပြတ်ကျမကျန်ခဲ့ဖို့ပဲ အာရုံစိုက်နေကြပါတယ်။
"ငါတို့ ဒီကိစ္စမှာ ဝင်မပါဘူး"
လုံမျိုးနွယ်စု ဓားကျင့်ကြံသူတစ်ယောက်က နှာခေါင်းရှုံ့ပြီး ပြောလိုက်ကာ အပေါ်ကို ဆက်တက်ဖို့ ပြင်ပါတယ်။
ကျန်တဲ့လူတွေလည်း ဒါကို မြင်တော့ အားလုံး ထရပ်ပြီး ဒီနေရာကနေ ထွက်သွားဖို့ ပြင်ကြပါတယ်။
စုန်းမျိုးနွယ်စု ဓားကျင့်ကြံသူတွေအတွက်တော့ နောက်ဆံအေးသွားပါပြီ။
သူတို့မျက်နှာမှာ အပြုံးတစ်ခု ပေါ်လာပြီး ဖန့်ချန်ကို သားကောင်ကို ချောင်းနေတဲ့ ကျားတွေ၊ ဝံပုလွေတွေလိုမျိုး ရက်စက်တဲ့ အကြည့်တွေနဲ့ စိုက်ကြည့်နေကြပါတယ်။
"အခု သူက ငါတို့လိုပဲ သာမန်လူ ခန္ဓာကိုယ်ပဲ ရှိတော့တာ၊ ပြီးတော့ သူက မျက်စိမမြင်တဲ့ လူကန်းတစ်ယောက်ပဲ အခု အားအင်တွေလည်း တော်တော် ကုန်နေလောက်ပြီ၊ သူ့မှာ ဘာလက်နက်မှ ကျန်တော့မှာ မဟုတ်ဘူး"
"ဟုတ်တယ်၊ ငါတို့ အားလုံး အတူတူ တိုက်ခိုက်ရင် ရှုံးစရာ အကြောင်းမရှိဘူး"
သူတို့တွေဟာ ကိုယ့်ကိုယ်ကိုယ် အားပေးစကား ပြောနေကြသလိုပါပဲ။
မကြာခင်မှာပဲ စုန်းမျိုးနွယ်စု ဓားကျင့်ကြံသူ တစ်ရာကျော် ထရပ်လိုက်ပြီး ဖန့်ချန်ဆီကို တန်းစီလျှောက်သွားကြပါတယ်။
"သွားပြီ..."
တုန်းဖန်းဟောက်ကျဲ က အရမ်းကို စိုးရိမ်နေပါပြီ
"ဖန့်ချန်အစ်ကိုက အခု သာမန်လူ ဖြစ်နေတာ၊ သူ့ရဲ့ ကြံ့ခိုင်မှုက ဘယ်လောက်ပဲ ကောင်းကောင်း လူတစ်ရာကျော် ဝိုင်းတိုက်တာကိုတော့ ဘယ်လိုမှ နိုင်မှာ မဟုတ်ဘူး"
လုံဝူ က သက်ပြင်းတစ်ချက် ချလိုက်တယ်
"ဒါက သူ့ရဲ့ ကံကြမ္မာပဲ ဒါပေမဲ့ ပထမအဆောင်ဘက်မှာတော့ အခွင့်အရေး ရှိပါသေးတယ် ယန်ခုန်း ရဲ့ အရှိန်က ဖုတုန်းဟိုင် တို့နဲ့ မတိမ်းမယိမ်းပဲ"
"ယန်ခုန်း က လူယုတ်မာပဲ၊ သူသာ ထိပ်ဆုံးရောက်သွားရင် လူယုတ်မာတွေ အောင်ပွဲခံသလို ဖြစ်မှာပေါ့"
တုန်းဖန်းဟောက်ကျဲ က နှာခေါင်းရှုံ့လိုက်ပါတယ်။
ဖန့်ချန် ဝိုင်းထားခံရတာကို မြင်တော့ သူလည်း ဘာမှ ထပ်မပြောတော့ဘဲ ဒီမြင်ကွင်းကို ရင်တထိတ်ထိတ်နဲ့ စောင့်ကြည့်နေပါတော့တယ်။
"မျက်စိမမြင်တဲ့ကောင်... မင်း အနားယူလို့ ဝပြီလား မင်း အခု ကိုယ့်ဘာသာကိုယ် အောက်ကို ပြန်ဆင်းသွားရင် ငါတို့ မင်းကို လက်ဖျားနဲ့တောင် မတို့ဘူး"
"ဘယ်လိုပဲဖြစ်ဖြစ် ဒီပွဲပြီးရင် ယွင်လူမြို့ကလူက မင်းကို အပြစ်ပေးမှာပဲ"
စုန်းမျိုးနွယ်စု ဓားကျင့်ကြံသူတစ်ယောက်က ပြုံးပြီး ပြောလိုက်ပါတယ်။
ဖန့်ချန်က ရယ်လိုက်ပြီး
"ငါ ခုနက အနားယူနေတာ မဟုတ်ဘူး"
"အနားယူနေတာ မဟုတ်ဘူး ဒါဆို ဘာလုပ်နေတာလဲ"
"ငါက မင်းတို့ရဲ့ အသက်ရှူသံကို နားထောင်ပြီး မင်းတို့ ဘယ်နှယောက် ရှိလဲဆိုတာကို ရေတွက်နေတာ"
စုန်းမျိုးနွယ်စု ဓားကျင့်ကြံသူတွေ အံ့သြသွားကြပါတယ်။
သူတို့ သတိမဝင်ခင်မှာပဲ ဖန့်ချန်က ဓားကို ဆွဲပြီး သူတို့ဆီ လျှောက်လာတာကို တွေ့လိုက်ရပါတယ်။
သူ့နဲ့ အနီးဆုံးမှာ ရှိတဲ့ ဓားကျင့်ကြံသူဆိုရင် ဓားတောင် မထုတ်ရသေးဘူး၊ သူ့ရဲ့ ခေါင်းက ပုခုံးပေါ်ကနေ လျောကျသွားပါပြီ။
တစ်ဖက်လူက အရင် စတိုက်တာလား
သူတို့တွေဟာ ဒေါသတကြီးနဲ့ အော်ဟစ်ကာ ဖန့်ချန်ဆီကို ဝိုင်းအုံ ပြေးဝင်သွားကြပါတော့တယ်။
အခန်း (၁၀၃၄) အားလုံးပဲ... ထွက်သွားဖို့ မလောကြပါနဲ့ဦး
ဒါဟာ အရမ်းကို ရှုပ်ထွေးလှတဲ့ တိုက်ပွဲတစ်ခုပါ။
အော်ဟစ်သံတွေ၊ ဟိန်းဟောက်သံတွေနဲ့အတူ ဓားအလင်းတန်းတွေ ထွက်ပေါ်လာပြီး ခဏချင်းမှာတင် မြေပြင်ပေါ်မှာ သွေးတွေ အိုင်ထွန်းနေပါပြီ။
အချို့က သွေးတွေကြောင့် ချော်လဲကုန်ကြပြီး အချို့ကတော့ မတ်တတ်တောင် မရပ်နိုင်ကြပါဘူး။
ဘက်ပေါင်းစုံကနေ ဒီတိုက်ပွဲကို ကြည့်နေကြသူတွေဟာ တဖြည်းဖြည်းနဲ့ အမှန်တရားတစ်ခုကို သဘောပေါက်လာကြပါတယ်။
စုန်းမျိုးနွယ်စုက ဒီဓားကျင့်ကြံသူတွေဟာ လူသာမန် ဖြစ်သွားတဲ့အခါ သူတို့ရဲ့ ဓားကွက်တွေက အရမ်းကို နုနယ်လွန်းနေတာပါ။
ဒါဟာ ဒီလိုအခြေအနေမျိုးမှာ တိုက်ခိုက်ရတဲ့ အတွေ့အကြုံ မရှိတာကြောင့် ဖြစ်မှာ အသေအချာပါပဲ။
ဖန့်ချန်ကတော့ ဆန့်ကျင်ဘက်ပါပဲ။
သူ့ရဲ့ ဓားချက်တိုင်းမှာ ထူးခြားတဲ့ အနှစ်သာရတွေ ပါဝင်နေပြီး အင်အားအနည်းဆုံး သုံးကာ အထိရောက်ဆုံး သတ်ဖြတ်နိုင်စွမ်း ရှိနေပါတယ်။
ဒီလို အတွေ့အကြုံမျိုးဟာ တစ်ရက်၊ နှစ်ရက်နဲ့ ရနိုင်တာ မဟုတ်ပါဘူး။
အနည်းဆုံးတော့ နှစ်ပေါင်းများစွာ သတ်ဖြတ်ခြင်းတွေကို ဖြတ်သန်းလာမှသာ အခြေခံကို ရနိုင်တာမျိုးပါ။
"ဒီကလေးက ဘယ်နှနှစ်ကတည်းက စပြီး ကျင့်ကြံခဲ့တာလဲ"
ချန်ချင်းထိုက် တို့က လီချန်စန်း ကို အံ့သြတကြီး ကြည့်ပြီး မေးလိုက်ကြပါတယ်။
"အတိအကျတော့ မသိဘူး၊ ဒါပေမဲ့ သူ ကျင့်ကြံခြင်းလောကထဲ မဝင်ခင်ကတည်းက စစ်မြေပြင်တွေမှာ နှစ်ပေါင်းများစွာ တိုက်ခိုက်ခဲ့ဖူးတယ်လို့ ငါသိထားတယ် ဒီသတ်ကွက်တွေက စစ်မြေပြင်ကနေ ရလာတာ ဖြစ်နိုင်တယ်"
လီချန်စန်း က ပြုံးပြီး ပြောလိုက်ပါတယ်။
အားလုံးက တစ်ယောက်ကိုတစ်ယောက် ကြည့်လိုက်ကြပြီး အမူအရာတွေက ထူးဆန်းနေပါတယ်။
အရင်တုန်းက သူတို့တွေဟာ သာမန်လူတွေထဲက ပါရမီရှင်တွေကို ရွေးထုတ်ပြီး ဒီဓားသင်္ချိုင်းလှေကားထစ်ကို တက်ခိုင်းဖို့ မစဉ်းစားခဲ့ဖူးတာ မဟုတ်ပါဘူး။
တကယ်လည်း အောင်မြင်မှုအချို့ ရခဲ့ပါတယ်။
အဲဒီသာမန်လူတွေဟာ ကျင့်ကြံသူတွေနဲ့ ရင်ဆိုင်ရတဲ့အခါ ကြောက်ရွံ့ခြင်း မရှိသလို တိုက်ပွဲအတွေ့အကြုံကလည်း အရမ်းကို ပြည့်စုံလှပါတယ်။
တကယ်တမ်း ထိပ်ဆုံးကို ရောက်သွားတဲ့ သာမန်လူတောင် ရှိခဲ့ဖူးပါတယ်။
ဒါပေမဲ့... သူတို့ထဲက အများစုဟာ ဓားကျမ်းကို မရရှိခဲ့ကြပါဘူး။
အကြောင်းကတော့ သူတို့မှာ ကျင့်ကြံဖို့ ပါရမီ မရှိတာကြောင့်ပါ။
အဲဒီနောက်ပိုင်းမှာတော့ အဖွဲ့အစည်းအသီးသီးက ဒါကို လက်လျှော့လိုက်ကြပါတယ်။
သာမန်လူတွေထဲကနေ လိုက်ရွေးနေရတာက အချိန်ကုန်သလို ထိုက်တန်တဲ့ ရလဒ်လည်း မရနိုင်တာကြောင့်ပါ။
ဖန့်ချန်လိုမျိုး သာမန်လူဘဝမှာ နှစ်ပေါင်းများစွာ တိုက်ခိုက်ခဲ့ဖူးပြီး ကျင့်ကြံရေးပါရမီလည်း ရှိသလို ဓားကျင့်ကြံသူ အစစ်အမှန်လည်း ဖြစ်နေတဲ့သူမျိုးကတော့ အလွန်တရာ ရှားပါးလှပါတယ်။
ပုံမှန်ဆိုရင် ဘယ်လိုမှ ရှာမတွေ့နိုင်ပါဘူး။
၁၅ မိနစ် ခန့် ကြာတဲ့အခါ။
စုန်းမျိုးနွယ်စု ဓားကျင့်ကြံသူအချို့ဟာ ကိုယ်ကိုလှည့်ပြီး နွယ်ပင်တွေဆီ ပြေးသွားကာ အပေါ်ကို ကုတ်ကတ်တက်နေကြပါပြီ။
သူတို့မျက်နှာတွေက အရမ်းကို ထိတ်လန့်နေပြီး ခန္ဓာကိုယ်တွေကလည်း တုန်ယင်နေပါတယ်။
သူတို့ရဲ့ နောက်ကွယ်မှာတော့ မရေမတွက်နိုင်တဲ့ အလောင်းတွေ လဲလျောင်းနေပါတယ်။
ဒါတွေဟာ သူတို့ရဲ့ လုပ်ဖော်ကိုင်ဖက်တွေဖြစ်ပေမဲ့ အခုတော့ အသက်ရှင်သူနဲ့ သေသူအဖြစ် ကွဲပြားသွားပါပြီ။
"အားလုံးပဲ... ထွက်သွားဖို့ မလောကြပါနဲ့ဦး"
နောက်ဘက်ကနေ ရယ်မောသံတစ်ခု ထွက်ပေါ်လာပါတယ်။
စုန်းမျိုးနွယ်စု ဓားကျင့်ကြံသူတစ်ယောက် ငုံ့ကြည့်လိုက်တဲ့အခါ သူ့ရဲ့ ဝိညာဉ်ပါ လွင့်ထွက်မတတ် ထိတ်လန့်သွားပါတယ်။
သွေးတွေ ရွှဲနစ်နေတဲ့ လူရိပ်တစ်ခုဟာ သူ့ဆီကို တက်လာနေတာပါ။
မျက်နှာပေါ်က အပြုံးက နွေးထွေးနေပေမဲ့ သူ့အတွက်တော့ အရမ်းကို ကြောက်စရာ ကောင်းလှပါတယ်။
"မလာနဲ့ ငါ့နား မလာနဲ့ဦး"
သူက ထိတ်လန့်တကြီး အော်ဟစ်လိုက်ပါတယ်။
ကြောက်လေလေ လက်တွေက မမြဲလေလေ ဖြစ်လာပြီး နောက်ဆုံးမှာတော့ နွယ်ပင်ကို မဖမ်းနိုင်တော့ဘဲ အောက်ကို ပြုတ်ကျသွားပါတယ်။
ပြုတ်ကျနေတုန်းမှာ ဖန့်ချန်ကို လှမ်းဆွဲဖို့ ကြိုးစားခဲ့သေးပေမဲ့ အကွာအဝေးကြောင့် မမီဘဲ အော်ဟစ်ရင်း မြေပြင်ပေါ်မှာ အသားစတုံးအဖြစ် ပြောင်းလဲသွားပါတယ်။
ဖန့်ချန်က စုန်းမျိုးနွယ်စု ဓားကျင့်ကြံသူ တစ်ယောက်ပြီးတစ်ယောက်ကို လိုက်မှီပြီး အောက်ကို ကန်ချတာဖြစ်ဖြစ်၊ ဓားနဲ့ ထိုးသတ်တာဖြစ်ဖြစ် လုပ်လိုက်ပါတယ်။
ဒီဓားကျင့်ကြံသူတွေရဲ့ ကျင့်ကြံမှုဟာ အပြင်လောကမှာဆိုရင် ဖန့်ချန်ထက် မြင့်ကြပါတယ်။
ဝိညဥ်ခွဲဖြာခြင်းအဆင့်တွေ၊ ပေါင်းစပ်ခြင်းအဆင့်တွေနဲ့ အထက်အဆင့် ၃ ဆင့် ထဲက လူတွေတောင် ပါပါတယ်။
အခုတော့ အားလုံးဟာ တန်းတူရည်တူ ဖြစ်သွားပြီး တူညီတဲ့ နိဂုံးကိုပဲ ရရှိကြပါတယ်။
ဝိညာဥ်ခွဲဖြာခြင်းအဆင့် ဓားကျင့်ကြံသူတွေသာလျှင် သူတို့ရဲ့ ဝိညာဉ်ခွဲ ကြောင့် အသက်အစစ်ကို ဆက်ထိန်းထားနိုင်တာပါ။
စုန်းမျိုးနွယ်စုက လွတ်လပ်သောမသေမျိုးတွေဟာ တဖြည်းဖြည်း စကားနည်းသွားပြီး မျက်မှောင်ကြုတ်ကာ ဒါကို ကြည့်နေကြပါတယ်။
ဓားကျင့်ကြံသူအချို့ သေတာက သူတို့အတွက် ဘာမှ မဟုတ်ပါဘူး။
ဓားကျမ်းတွေ ရှိနေသရွေ့ ဓားကျင့်ကြံသူ ဘယ်လောက်ပဲ ဖြစ်ဖြစ် ပြန်မွေးမြူလို့ ရပါတယ်။
ဒါပေမဲ့ တစ်ဖက်လူက ဒီလိုလုပ်နေတာဟာ စုန်းမျိုးနွယ်စုရဲ့ ပါးကို ခပ်ပြင်းပြင်း ရိုက်လိုက်သလိုပါပဲ။
နှစ်ပေါင်းများစွာ တည်ဆောက်ခဲ့တဲ့ စုန်းမျိုးနွယ်စုရဲ့ ဂုဏ်သတင်းက ဓားကျင့်ကြံသူ တစ်ယောက်လေးကိုတောင် မဖိနှိပ်နိုင်တော့ဘူးလား ဆိုတဲ့ ပုံစံမျိုး ဖြစ်နေပါတယ်။
"ဒီကောင်က တကယ်ပဲ စုန်းမျိုးနွယ်စုရဲ့ နောက်ပိုင်းစာရင်းရှင်းတာကို မကြောက်ဘူးလား"
လှေကားထစ်ပေါ်မှာတော့ လုံမျိုးနွယ်စု ဓားကျင့်ကြံသူတွေဟာ ဒီမြင်ကွင်းကို ကြည့်ရင်း မှင်တက်နေကြပါတယ်။
သူတို့ရင်ထဲမှာလည်း ထိတ်လန့်မှုတွေ ပေါ်လာပါတယ်။
လုံမျိုးနွယ်စုနဲ့ စုန်းမျိုးနွယ်စုက မတည့်ကြဘူးဆိုပေမဲ့ ဒီလို အထက်တန်းလွှာ မျိုးနွယ်စုကြီးတွေကြားက ဆက်ဆံရေးကို ဘယ်သူက အသေအချာ ပြောနိုင်မှာလဲ
သူတို့လို ဓားကျင့်ကြံသူတွေဆိုတာ ဒီအထက်တန်းလွှာတွေရဲ့ လက်ထဲက ဓားတွေပဲ။
သုံးလို့ကောင်းတုန်းမှာတော့ သူတို့က ဂရုစိုက်သလို လုပ်မှာပေါ့၊ ဒါပေမဲ့ မလိုအပ်တော့တဲ့အခါ ဒါမှမဟုတ် မင်းကို ပေးလိုက်ရုံနဲ့ ပိုကြီးမားတဲ့ အကျိုးအမြတ် ရမယ်ဆိုရင်တော့ သူတို့က တွန့်ဆုတ်နေမှာ မဟုတ်ပါဘူး။
ဒီလို သာဓကတွေ အများကြီး ရှိပါတယ်။
အရင်စက္ကန့်မှာတင် ကိုယ့်ရဲ့ ဓားကျင့်ကြံသူတွေကို ဓားချင်းယှဉ်ခိုင်းနေပေမဲ့ နောက်စက္ကန့်မှာတော့ အကြောင်းအမျိုးမျိုးကြောင့် အဲဒီဓားကျင့်ကြံသူကို တစ်ဖက်လူဆီ လက်ဆောင်ပေးလိုက်တာမျိုးတွေပါ။
တစ်ဖက်လူက သတ်မလား၊ ဖြတ်မလား ဆိုတာကို သူတို့ ဂရုစိုက်တော့မှာ မဟုတ်ပါဘူး။
အခု ဖန့်ချန် လုပ်နေတာဟာ သူတို့အမြင်မှာတော့ မိုက်မဲလွန်းပြီး အမျှော်အမြင် မရှိတဲ့ လုပ်ရပ်ပါ။
"သူ ဒီလိုလုပ်နေတာက လုံမျိုးနွယ်စုရဲ့ အထင်ကြီးမှုကို ရမှာ မဟုတ်ဘူး အကြီးကဲတွေက သူ့ကို ဦးနှောက်မရှိတဲ့ လူကြမ်း တစ်ယောက်လို့ပဲ မြင်ကြလိမ့်မယ်"
လုံမျိုးနွယ်စု ဓားကျင့်ကြံသူတစ်ယောက်က မျက်နှာပျက်ပျက်နဲ့ ပြောလိုက်တယ်
"ငါတို့ မြန်မြန်သွားရအောင်၊ ဒီကိစ္စထဲ ဝင်မပါနဲ့၊ ကိုယ့်ဆီ မီးကူးလာရင် မကောင်းဘူး"
အားလုံးက ခေါင်းညိတ်လိုက်ကြပြီး မနားတော့ဘဲ ဖန့်ချန်နဲ့ အဝေးဆုံးကို အရင် ရောက်သွားအောင် တစ်ရှိန်ထိုး တက်ဖို့ ပြင်လိုက်ကြပါတယ်။
ဓားနန်းတော် ပတ်ပတ်လည်မှာတော့ မရေမတွက်နိုင်တဲ့ ကျင့်ကြံသူတွေ ရှိနေပါတယ်။
ဖန့်ချန်က စုန်းမျိုးနွယ်စု ဓားကျင့်ကြံသူတွေကို ဝက်တွေ၊ ခွေးတွေကို သတ်သလိုမျိုး အလွယ်တကူ သတ်ဖြတ်နေတာကို မြင်တော့ အားလုံးက လောင်းကစားဒိုင်တွေရဲ့ အဆပေါင်း တွေကို လိုက်စုံစမ်းကြပါတော့တယ်။
မျှော်လင့်ထားတဲ့အတိုင်းပါပဲ၊ ဒိုင်တွေက ဖန့်ချန်ရဲ့ အဆပေါင်းကို လျှော့ချလိုက်ပါပြီ။
မူလက လုံးဝ ရေပန်းမစားတဲ့သူ ကနေ အခုတော့ ရေပန်းစားသူ စာရင်းထဲကို ဖြည်းဖြည်းချင်း ဝင်လာပါပြီ။
......
"ဒီကလေးက တကယ် သတ်နိုင်တာပဲ၊ စုန်းမျိုးနွယ်စုရဲ့ နောက်ပိုင်းစာရင်းရှင်းတာကိုလည်း မကြောက်ဘူးလား လုံမျိုးနွယ်စုက သျှောင်နတ်နဂါးမလေး က ဓားကျင့်ကြံသူ တစ်ယောက်ကို အလေးထားလိမ့်မယ်လို့ တကယ်ပဲ ထင်နေတာလား "
ကျူးရှုခေါ့ က နှာခေါင်းရှုံ့လိုက်ပါတယ်။
ကျူးယွမ်ချန်း က ခပ်အေးအေး ပြောလိုက်တယ်
"တကယ်လို့ သူ ထိပ်ဆုံးရောက်သွားမယ်ဆိုရင် လီကျန်းနျန် ရဲ့ ပတ်သက်မှုနဲ့တင် ဒီနေ့ သူ စုန်းမျိုးနွယ်စု ဓားကျင့်ကြံသူ ဘယ်လောက်ပဲ သတ်သတ် သျှောင်နတ်နဂါးမလေး က သူ့ကို ကာကွယ်ပေးလိမ့်မယ်"
"အဖေ... စုန်းမျိုးနွယ်စုဘက်ကတော့ အရမ်းကြီး ဒေါသထွက်မှာ မဟုတ်ပါဘူး၊ ဓားကျင့်ကြံသူ အနည်းငယ်ရဲ့ အသက်က သူတို့အတွက်တော့ ပြောပလောက်တာ မဟုတ်ဘူး ဒါပေမဲ့ ယွင်လူမြို့ကလူ ကတော့ ဒါကို ဒီအတိုင်း လွှတ်ထားမှာ မဟုတ်ဘူး"
ကျူးရှုခေါ့ က ဆိုပါတယ်။
ကျူးယွမ်ချန်း က ရယ်လိုက်တယ်
"လုံမျိုးနွယ်စုက ခိုင်းစေနိုင်တဲ့ အဆင့် ၁ လွတ်လပ်သောမသေမျိုး တောင် လူတစ်ရာကျော် ရှိတယ်၊ ချောင်ဖုန်း နယ်မြေအနှံ့မှာ သူတို့ရဲ့ လုပ်ငန်းတွေ ရှိတယ်"
"ဒါ့အပြင် အဆင့် ၂ လွတ်လပ်သောမသေမျိုး တွေလည်း အများကြီး ရှိသလို အဆင့် ၃ အဆင့် ဘိုးဘေးကြီးလည်း ရှိသေးတယ် ကျောက်ယွင်လူ က မျက်နှာပျက်ချင်တယ် ဆိုရင်တောင် သေချာ စဉ်းစားရလိမ့်မယ်"
"သူက အဆင့် ၃ လွတ်လပ်သောမသေမျိုး ဆိုတာ မှန်ပေမဲ့၊ သူ့မှာ နောက်ခံအင်အား မရှိတာကလည်း အမှန်ပဲ"
ကျူးရှုခေါ့ မှင်တက်သွားပါတယ်
"ဒါဆို သုံးဆင့် လွတ်လပ်သောမသေမျိုး အဆင့် ရောက်သွားရင်တောင် ဒီလိုမျိုးနွယ်စုကြီးတွေရဲ့ မျက်နှာကို ကြည့်နေရတုန်းလား "
"အဆင့် ၄ ကို ရောက်သွားရင်တော့ သူတို့မျက်နှာကို ကြည့်စရာ မလိုတော့ဘူး"
ကျူးယွမ်ချန်း က ခပ်အေးအေး ပြောလိုက်ပါတယ်။
အဆင့် ၄
ကျူးရှုခေါ့ က ခါးသီးစွာ ပြုံးလိုက်ပါတယ်။
ဒီလောကမှာ အဆင့် ၄ လွတ်လပ်သောမသေမျိုး ရှိ၊ မရှိ ဆိုတာတောင် မေးခွန်းထုတ်စရာပါ။
နှစ်ပေါင်းများစွာအတွင်းမှာ လုံယွမ် ၊ မင်ဟူ ဒါမှမဟုတ် စစ်ဝေ ဘယ်နေရာမှာမှ အဆင့် ၄ လွတ်လပ်သောမသေမျိုး မပေါ်ထွက်ခဲ့ပါဘူး။
ဒါကို ကြည့်ရင် ဒီအဆင့်ဟာ အဆင့် ၃ တွေအတွက်တောင် လက်လှမ်းမမီနိုင်တဲ့ အဆင့်ဆိုတာ သိသာလှပါတယ်။
နာရီဝက်ခန့် ကြာတဲ့အခါ။
ဖန့်ချန်ဟာ အဆင့် ၁၈ လှေကားထစ်ကို ရောက်လာပါတယ်။
ခြေလှမ်းတွေက ပိုပြီး လေးလံလာသလို ခံစားရပါတယ်။
ဒီနေရာကို ရောက်တော့ လုံမျိုးနွယ်စုနဲ့ စုန်းမျိုးနွယ်စုက ဓားကျင့်ကြံသူတွေဟာ ပွင့်ပွင့်လင်းလင်း ရန်မစကြသေးပေမဲ့ တစ်ဖက်လူရဲ့ အားနည်းချက်ကိုတော့ အဆက်မပြတ် ရှာဖွေနေကြပါပြီ။
လုံမျိုးနွယ်စု ဓားကျင့်ကြံသူတွေက ဖန့်ချန်ကို မြင်တော့ မျက်နှာတွေ ပြောင်းသွားပါတယ်။
စုန်းမျိုးနွယ်စု ဓားကျင့်ကြံသူတွေကတော့ ချက်ချင်းပဲ ထရပ်ပြီး ဒီနေရာကနေ ထွက်သွားဖို့ ပြင်ကြပါတယ်။
"ထွက်သွားဖို့ မလောကြပါနဲ့ဦး"
ဖန့်ချန်က ပြုံးပြီး ပြောလိုက်ပါတယ်။
စုန်းမျိုးနွယ်စု ဓားကျင့်ကြံသူတွေကတော့ ဂရုမစိုက်ဘဲ နွယ်ပင်တွေကို ဆွဲကာ အပေါ်ကို အမြန်ဆုံး တက်သွားကြပါတယ်။
မသွားဘဲ နေရင် သေဖို့ စောင့်နေတာနဲ့ အတူတူပဲ မဟုတ်လား
စုန်းမျိုးနွယ်စု ဓားကျင့်ကြံသူတွေဟာ ဖန့်ချန်ရဲ့ လက်ထဲမှာ အကြိမ်ကြိမ် အသတ်ခံခဲ့ရပြီးပြီမို့ အခုတော့ သင်ခန်းစာ ရသွားကြပါပြီ။
တစ်ဖက်လူ အားမကုန်မချင်း သူတို့ ထိပ်တိုက် မတွေ့ချင်ကြတော့ပါဘူး။
ဖန့်ချန်က ရယ်လိုက်ပြီး လိုက်ဖို့ ပြင်လိုက်ပေမဲ့ မလှမ်းမကမ်းကနေ အားနည်းတဲ့ အသံတစ်ခု ထွက်ပေါ်လာတာကို ကြားလိုက်ရပါတယ်
"ဖန့်ဓားခေါင်းဆောင်... ကျွန်တော့်ကို ကယ်ပါဦး..."
လုံမျိုးနွယ်စု ဓားကျင့်ကြံသူ အတော်များများရဲ့ မျက်နှာတွေ ချက်ချင်း ပြောင်းသွားပြီး တစ်ခြားဘက်ကို အတင်း လွှဲကြည့်လိုက်ကြပါတယ်။
ဖန့်ချန်က စုန်းမျိုးနွယ်စု ဓားကျင့်ကြံသူတွေကို မလိုက်တော့ဘဲ လုံမျိုးနွယ်စု ဓားကျင့်ကြံသူတွေကို ပြုံးကြည့်ရင်း ပြောလိုက်တယ်
"အားလုံးပဲ... လမ်းဖယ်ပေးကြပါဦး ဒီအသံက အရမ်းရင်းနှီးနေလို့ ဘယ်သူလဲဆိုတာ ကြည့်ပါရစေဦး"
"မင်း စုန်းမျိုးနွယ်စု ဓားကျင့်ကြံသူတွေကိုပဲ ဆက်လိုက်ပါ ငါတို့ ဒီမှာ ခဏနားပြီးမှ ဆက်တက်တော့မယ်"
လုံမျိုးနွယ်စု ဓားကျင့်ကြံသူတစ်ယောက်က အတင်းပြုံးပြီး ပြောပါတယ်။
ဖန့်ချန်ရဲ့ မျက်နှာပေါ်က အပြုံးတွေ တဖြည်းဖြည်း ပျောက်ကွယ်သွားပါတယ်
"လမ်းဖယ်ပေး"
အေးစက်တည်ငြိမ်တဲ့ စကားသံ ဖြစ်ပေမဲ့ ခေါင်းပေါ်မှာ ဓားတစ်လက် ချိတ်ထားသလိုမျိုး တစ်ကိုယ်လုံးကို စိမ့်တက်သွားစေပြီး ကြက်သီးမွေးညင်းတွေ ထသွားစေပါတယ်။