ပင်ကိုစွမ်းရည်များ အဆင့်မြင့်လာခြင်း၊ ပင်ကိုစွမ်းရည်အသစ် (၂)

[ပင်ကိုစွမ်းရည်မ · ငွေပြာရောင်သွေးမျိုးဆက် (ရွှေရောင် ဘုရင်အဆင့်)] ၏ စတုတ္ထမြောက် စွမ်းရည်ဖြစ်သော ‘ငွေပြာရောင် နိုးထခြင်း’ ကို ဖွင့်လိုက်နိုင်ပါပြီ။

ငွေပြာရောင် နိုးထခြင်း - ခန္ဓာကိုယ်အတွင်း နက်ရှိုင်းစွာ ဖုံးကွယ်နေသော ငွေပြာရောင်သွေးမျိုးဆက်၏ စွမ်းအားများကို တက်ကြွစွာ အသက်သွင်းနိုင်ပြီး၊ စက္ကန့် ၆၀ ကြာ နိုးထခြင်းအခြေအနေထဲသို့ ဝင်ရောက်နိုင်သည်။

ပြန်လည်အသုံးပြုနိုင်ရန် ကြာချိန် (၁၂ နာရီ) ဤအခြေအနေတွင် ကိုယ်ပိုင်စွမ်းရည် အားလုံး များစွာ တိုးတက်လာမည်ဖြစ်ပြီး၊ ခွန်အားပြင်း သံချပ်ကာခွဲလက်သည်းနှင့် အစွန်းရောက်အရိပ်လျှပ်စီးခြေလှမ်းတို့၏ အကျိုးသက်ရောက်မှုများလည်း အားကောင်းလာကာ၊ ငွေပြာရောင်မျက်ဝန်း၏ ထိုးထွင်းသိမြင်နိုင်စွမ်းနှင့် အကြည့်တစ်ချက်ဖြင့် ခြိမ်းခြောက်နိုင်စွမ်းတို့ မြင့်တက်လာမည် ဖြစ်သည်။ အလုံးစုံ တိုက်ခိုက်ရေးစွမ်းအား ၃၅ ရာခိုင်နှုန်းအထိ တိုးလာမည် ဖြစ်သည်။

“ငွေပြာရောင် နိုးထခြင်းတဲ့လား...”

လင်းထျန်းလုံ၏ စိတ်ထဲတွင် စိတ်လှုပ်ရှားမှုများဖြင့် ချက်ချင်း ဆူပွက်သွားခဲ့သည်။ ဤသည်မှာ လက်ရှိတွင် သူ အလိုအပ်ဆုံးသော အရာပင် ဖြစ်သည်။ စွမ်းအားကြီးပြီး ဘေးထွက်ဆိုးကျိုးမရှိကာ အပြည့်အ၀ထိန်းချုပ်နိုင်ပြီး နောက်ဆုံးအချိတ်တွင် ရုတ်တရက် ပေါက်ကွဲထွက်လာနိုင်မည့် တိုက်ကွက်တစ်ခု၊

ပြန်လည်အသုံးပြုနိုင်ရန် ကြာချိန် ရှည်လျားသော်လည်း၊ အလုံးစုံ တိုက်ခိုက်ရေးစွမ်းအား ၃၅ ရာခိုင်နှုန်း တိုးလာခြင်းမှာ သေရေးရှင်ရေး တိုက်ပွဲတစ်ခုအတွက် နောက်ဆုံးဝှက်ဖဲ တစ်ခု ဖြစ်လာရန် လုံလောက်လှပေသည်။

ဝမ်းသာပျော်ရွှင်မှုနှင့်အတူ ကြီးမားသော အားအင်ကုန်ခမ်းသည့် ခံစားချက်တစ်ခုကလည်း လိုက်ပါလာခဲ့သည်။ ကြီးမားလှသော စွမ်းအင်များ ပါဝင်နေဆဲဖြစ်သည့် မြေပြင်ပေါ်ရှိ ကောင်းကင်မိုးကြိုးမုန်တိုင်းဝက်ဝံဘုရင်၏ အလောင်းကို ကြည့်ရင်း၊ သူ၏ အစာစားချင်စိတ်များ ချက်ချင်းပင် လှုံ့ဆော်ခံလိုက်ရလေသည်။

“အဆင့်မြင့် မိစ္ဆာသားရဲတစ်ကောင်ရဲ့ အသားနဲ့ သွေးက တကယ့်ကို အကောင်းဆုံးပဲ...”

သူ ထပ်ပြီး ထိန်းချုပ်မနေတော့ဘဲ၊ တိုက်ရိုက် ငုံ့ကာ အစွယ်များထုတ်ပြီး ဝက်ဝံဘုရင်၏ အသားများကို အငမ်းမရ ဆွဲဆုတ်ကာ ဝါးမြိုလေတော့သည်။

ဤခြေလှမ်း၀က်ဘုရင်အဆင့် မိစ္ဆာသားရဲ၏ အသားမှာ အလွန်အမင်း မာကျောလှသဖြင့်၊ ၎င်းတို့ကို ဝါးရသည်မှာ ရေစိမ်ထားသော နွားသားရေကို ဆွဲဆုတ်နေရသကဲ့သို့ ခံစားနေရသော်လည်း၊ အတွင်းတွင် ပါဝင်သော သန့်စင်သည့် ဝိညာဉ်စွမ်းအင်များနှင့် အသက်စွမ်းအားများမှာ နွေးထွေးသော ရေစီးကြောင်းတစ်ခုကဲ့သို့ သူ၏ ခြေလက်များနှင့် အရိုးများအတွင်း စီးဝင်သွားပြီး၊ ကြွက်သား၊ အရိုးနှင့် သွေးကြောတိုင်းကို စွမ်းအင်များ ပြန်လည်ဖြည့်တင်းပေးနေလေသည်။

[စနစ် အသိပေးချက်] ။ ။ ပိုင်ရှင်သည် ခြေလှမ်း၀က်ဘုရင်အဆင့် မိစ္ဆာသားရဲ ကောင်းကင်မိုးကြိုးမုန်တိုင်းဝက်ဝံဘုရင်၏ အသားနှင့် သွေးများကို စားသုံးလိုက်ပါသည်။ ဝိညာဉ်စွမ်းအင် မြင့်တက်လာပြီး လက်ရှိအဆင့်မှာ အဆင့် ၂၆ သို့ တိုးတက်သွားပါပြီ။

[စနစ် အသိပေးချက်] ။ ။ ပိုင်ရှင်သည် ပါရမီရှင်အဆင့် မိစ္ဆာသားရဲ ကောင်းကင်မိုးကြိုးမုန်တိုင်းဝက်ဝံဘုရင်၏ အသားနှင့် သွေးများကို စားသုံးလိုက်ပါသည်။ ဝိညာဉ်စွမ်းအင် မြင့်တက်လာပြီး လက်ရှိအဆင့်မှာ အဆင့် ၂၇ သို့ တိုးတက်သွားပါပြီ။

[စနစ် အသိပေးချက်] ။ ။ ပိုင်ရှင်သည် ပါရမီရှင်အဆင့် မိစ္ဆာသားရဲ ကောင်းကင်မိုးကြိုးမုန်တိုင်းဝက်ဝံဘုရင်၏ အသားနှင့် သွေးများကို စားသုံးလိုက်ပါသည်... လက်ရှိအဆင့်မှာ အဆင့် ၂၈ သို့ တိုးတက်သွားပါပြီ။ (ပါရမီရှင်အဆင့်)

ဗိုက်ပြည့်သွားသည့် ခံစားချက်ကို ခံစားလိုက်ရပြီး လင်းထျန်းလုံ ရပ်တန့်လိုက်ချိန်တွင်၊ စနစ်အသိပေးချက် အသံများမှာ သူ၏ အသိစိတ်ထဲတွင် ဆက်တိုက်ဆိုသလို ထွက်ပေါ်လာနေခဲ့သည်။

ထိုတိုတောင်းသော အချိန်ခဏတာလေးအတွင်းမှာပင် သူ၏ အဆင့်မှာ ဒုံးပျံစီးလိုက်သည့်မလား အဆင့် ၂၈ အထိ ထိုးတက်သွားခဲ့လေပြီ။

“အဆင့် ၂၈...”

လင်းထျန်းလုံ ကိုယ်တိုင်ပင်လျှင် မယုံကြည်နိုင်သေးသလို ခံစားနေရသည်။ သို့သော် ဤသည်မှာ ခြေလှမ်း၀က်ဘုရင်အဆင့် သားရဲတစ်ကောင်ကို အဆင့်ကျော်လွန်၍ အနိုင်ယူကာ၊ ၄င်း၏ သွေးအနှစ်သာရ အများစုကို ဝါးမြိုလိုက်ခြင်း၏ ရလဒ်ဖြစ်ကြောင်း စဉ်းစားမိသောအခါ၊ ကျိုးကြောင်းဆီလျော်သည်ဟုလည်း ခံစားလိုက်ရလေသည်။

သူသည် သူ၏ ခန္ဓာကိုယ်အတွင်းရှိ အပြောင်းအလဲများကို ဂရုတစိုက် အာရုံခံလိုက်သည်။ သူ၏ သားရဲခန္ဓာကိုယ်မှာ ပိုမိုကြံ့ခိုင်ပြီး သွယ်လျလာကာ၊ သူ၏ ကြွက်သားများမှာလည်း ပေါက်ကွဲထွက်တော့မတတ် ခွန်အားများဖြင့် ပြည့်နှက်နေလေသည်။

သူ၏ ငွေဖြူရောင် အမွေးအမျှင်များမှာ လရောင်များစီးဆင်းနေသကဲ့သို့ ပိုမိုလင်းလက်ပြီး တောက်ပလာခဲ့သည်။

သူ၏ ရေခဲပြာရောင် မျက်ဝန်းများ အဖွင့်အပိတ် လုပ်လိုက်တိုင်းတွင် ဓားများကဲ့သို့ ထက်ရှနေပြီး၊ ကြည့်မိသူတိုင်းကို ရိုသေလေးစားမှုများ ဖြစ်ပေါ်စေလေသည်။

[စနစ် အသိပေးချက်] ။ ။ ပိုင်ရှင်၏ အဆင့်သည် အဆင့် ၂၈ (ပါရမီရှင်အဆင့်) သို့ တိုးတက်သွားပြီး၊ သီးသန့်မျိုးနွယ်စုစွမ်းရည်ဖြစ်သော ငွေပြာရောင်မိုးကြိုးလက်သည်း (ခရမ်းရောင် ပါရမီရှင်အဆင့်) အောင်မြင်စွာ နိုးထလာခဲ့ပါပြီ။

[ငွေပြာရောင် မိုးကြိုးလက်သည်း (ခရမ်းရောင် ပါရမီရှင်အဆင့်)] ။ ။ခွန်အားပြင်း သံချပ်ကာခွဲလက်သည်း (ခရမ်းရောင် ပါရမီရှင်အဆင့်)] နှင့် [ငွေပြာရောင်သွေးမျိုးဆက် (ရွှေရောင် ဘုရင်အဆင့်)] တို့ ပေါင်းစပ်မှုမှ ဖြစ်တည်လာသော သီးသန့်စွမ်းရည်တစ်ခု ဖြစ်သည်။ ငွေပြာရောင် စွမ်းအားများကို ထက်ရှသော လက်သည်းများပေါ်တွင် အလွန်အမင်း ဖိသိပ်ပြီး စုစည်းထားနိုင်သည်။

တိုက်ခိုက်ချိန်တွင် လက်သည်းများအပေါ်တွင် ဖျက်ဆီးနိုင်စွမ်း အလွန်မြင့်မားသော ငွေပြာရောင် စွမ်းအင်လှိုင်းများ ဖုံးလွှမ်းသွားမည်ဖြစ်ပြီး၊ တိုက်ရိုက်ထိမိသော ရန်သူများကို ကြီးမားသည့် ရုပ်ပိုင်းဆိုင်ရာ ပျက်စီးဆုံးရှုံးမှုများ ပေးနိုင်ရုံသာမက၊ ပြင်းထန်သော စွမ်းအင်ပိုင်းခြားခြင်းနှင့် ထုံကျင်မှု အကျိုးသက်ရောက်မှုများကိုပါ ဖြစ်ပေါ်စေမည် ဖြစ်သည်။ မကောင်းဆိုးဝါးများနှင့် အမှောင်ဒြပ်စင် ရန်သူများအပေါ်တွင်သုံးလျှင် ထိခိုက်ပျက်စီးမှု ပိုမိုများပြားမည် ဖြစ်သည်။

“[ငွေပြာရောင် မိုးကြိုးလက်သည်း]...”

ဤစွမ်းရည်အသစ်နှင့် ပတ်သက်သော အချက်အလက်များကို သေချာဖတ်ရှုပြီးနောက် လင်းထျန်းလုံ၏ နှလုံးသားထဲတွင် ဝမ်းသာပျော်ရွှင်မှုများဖြင့် ဆူပွက်သွားခဲ့သည်။

ဤသည်မှာ ဝက်ဝံဘုရင်ထံမှ မိုးကြိုးမဟုတ်ဘဲ၊ အဆင့်တက်လာပြီးနောက် သူ၏ ကိုယ်ပိုင် ငွေပြာရောင်သွေးမျိုးဆက်မှ ဆင်းသက်လာသော ထူးခြားသည့် စွမ်းအားတစ်ခု ဖြစ်လေသည်။

၎င်းမှာ သူ၏ တိုက်ခိုက်ရေးဟန်နှင့် အလွန်လိုက်ဖက်ညီနေပြီး၊ စွမ်းအားမှာလည်း ခွန်အားပြင်း သံချပ်ကာခွဲလက်သည်းထက် များစွာ သာလွန်ကာ၊ မည်သည့် ဘေးထွက်ဆိုးကျိုးမျှလည်း မရှိပေ။

“ဒါပဲကွ...” သူ၏ လက်သည်းဖျားတွင် ခပ်သဲ့သဲ့ စီးဆင်းနေပြီး အလွယ်တကူထိန်းချုပ်နိုင်သော ငွေပြာရောင် လျှပ်စီးလှိုင်းများကို ခံစားရင်း၊ လင်းထျန်းလုံသည် နောက်ဆုံးတွင် ‘အဆင့်မြင့် ရတနာတစ်ခုကို ရလိုက်သည့်' လက်တွေ့ကျသော ခံစားချက်ကို ရရှိသွားခဲ့လေသည်။

ပြင်ပမှ အစွမ်းထက်သော ခွန်အားများကို ဝါးမြိုပြီး၊ ၎င်းတို့ကို မိမိ၏ ကိုယ်ပိုင် အခြေခံအုတ်မြစ်အတွက် အာဟာရများအဖြစ် ပြောင်းလဲကာ၊ နောက်ဆုံးတွင် မိမိနှင့် အလိုက်ဖက်ဆုံး စွမ်းရည်ကို ရရှိခဲ့ခြင်း.....

ဤသည်မှာဤသည်မှာ ပြီးပြည့်စုံဆုံးသော ရိတ်သိမ်းမှုတစ်ခုပင် ဖြစ်လေသည်။

“ကောင်းတယ်။ အခုဆိုရင် ဒီကမ္ဘာမြေကြီးပေါ်မှာ အုပ်မြစ်တစ်ခုတည်ထောင်ဖို့ တကယ့်အရင်းအနှီးတစ်ခုကို ငါ ပိုင်ဆိုင်သွားပြီ...”

သူသည် အတွေးများ အနည်းငယ် လှုပ်ရှားလိုက်ပြီး သူ၏ လက်ရှိ အချက်အလက်ပြမျက်နှာပြင်ကို ခေါ်ယူလိုက်သည် -

[ပိုင်ရှင် - လင်းထျန်းလုံ]

[မျိုးနွယ် - နှင်းဝံပုလွေ (ငွေပြာရောင်ဘုရင် သွေးမျိုးဆက်)]

[အဆင့် - ၂၈ (ပါရမီရှင်အဆင့် မိစ္ဆာသားရဲ)]

[ပင်ကိုစွမ်းရည်များ - အလယ်အလတ် စိတ်ထိန်းချုပ်ခြင်း (ခရမ်းရောင် ပါရမီရှင်အဆင့်)၊ ငွေပြာရောင်သွေးမျိုးဆက် (ရွှေရောင် ဘုရင်အဆင့်)၊ ခွန်အားပြင်း သံချပ်ကာခွဲလက်သည်း (ခရမ်းရောင် ပါရမီရှင်အဆင့်)၊ သွေးဆာတိုက်ပွဲဟိန်းသံ (အဖြူရောင် · ငွေအဆင့်)]

[စွမ်းရည်များ - အစွန်းရောက်အရိပ်လျှပ်စီးခြေလှမ်း (ခရမ်းရောင် ပါရမီရှင်အဆင့်)၊ ဝံပုလွေဟိန်းသံဖြင့် ခြောက်လှန့်ခြင်း (အဖြူရောင် ငွေအဆင့်)၊ ငွေပြာရောင်မျက်ဝန်း (အဖြူရောင် · ငွေရောင်)]

(တိုက်ခိုက်ရေးစွမ်းအားမှာ အဆမတန် မြင့်တက်လာခဲ့ပါသည်)

ရဲရင့်သောအတွေးနှင့် စိတ်ဓာတ်တစ်ခုမှာ လင်းထျန်းလုံ၏ နှလုံးသားထဲတွင် မြင့်တက်လာခဲ့သည်။ “အခု ကောင်းကင်မိုးကြိုးမုန်တိုင်းဝက်ဝံဘုရင်ကို ရှင်းလင်းပြီးသွားပြီဆိုတော့၊ ဒီထျန်းစန်းတောအုပ်ကြီးထဲမှာ ငါ့ရဲ့နှင်းဝံပုလွေမျိုးနွယ်စုကို ဘယ်သူကများ တားဆီးနိုင်ဦးမှာလဲ...”

သူတို့၏ နယ်မြေကို တိုးချဲ့ရန်အတွေးမှာလည်း သဘာဝကျကျ ပေါ်ထွက်လာခဲ့သည်။ လက်ရှိတွင် ဝံပုလွေအုပ်စု၏ အရေအတွက်မှာ မများပြားသေးသော်လည်း မျိုးဆက်သစ်များ မကြာမီ မွေးဖွားလာတော့မည် ဖြစ်သည်။

လုံလောက်သော အစားအစာသိုလှောင်မှုများနှင့် တိုတမ်မိခင်သစ်ပင်၏ ကောင်းချီးပေးမှုတို့ ပေါင်းစပ်လိုက်သောအခါ၊ နှင်းဝံပုလွေမျိုးနွယ်စု၏ တိုးတက်မှုလမ်းကြောင်းကို မည်သူမျှ တားဆီးနိုင်တော့မည် မဟုတ်ချေ။

“ဘုရင်ကြီး...” ထျန်းပင်းသည် ရှေ့သို့ တစ်လှမ်း တိုးလာကာ နောက်ထပ်အမိန့်ကို စောင့်ဆိုင်းရင်း တိုးညင်းစွာ ဟိန်းဟောက်လိုက်လေသည်။

အတွေးများထဲမှ နိုးထလာပြီးနောက် လင်းထျန်းလုံသည် ပြတ်သားစွာ အမိန့်ပေးလိုက်သည်။ “ကျန်နေတဲ့ ဝက်ဝံအလောင်းကို နှင်းဝံပုလွေကျေးရွာကို ပြန်သယ်သွားကြ... ဒါက လာမယ့် ကာလမှာ မျိုးနွယ်စုအတွက် အဓိကအကျဆုံး အစားအစာနဲ့ ကျင့်ကြံခြင်း အရင်းအမြစ် ဖြစ်လာလိမ့်မယ်...”

ထို့နောက် သူသည် ထိုဝိညာဉ်စမ်းရေ ရေကန်လေး၏ အစွန်းသို့ လျှောက်သွားလိုက်သည်။ အတွေးတစ်ချက်ဖြင့် အလယ်အလတ် စိတ်ထိန်းချုပ်ခြင်းကို အသက်သွင်းလိုက်ပြီး၊ ဝိညာဉ်စမ်းရေ ရေကန်လေး တစ်ခုလုံးကို ၎င်းအတွင်းရှိ ရေခဲနှလုံးသားကြာပန်းနှင့်အတူ ကျောက်တုံးပေါ်မှ ဂရုတစိုက် ခွာယူလိုက်လေသည်။

သူသည် စွမ်းအင်များကို တတ်နိုင်သမျှ ညင်သာအောင် ထိန်းချုပ်ထားကာ သူ၏ ဘေးတွင် လွင့်မြောနေစေသည်။ ဤရတနာပစ္စည်းမှာ ကြီးမားသော အလားအလာများ ရှိသဖြင့် သေချာစောင့်ရှောက်ရန်အတွက် ဝံပုလွေအသိုက်ဆီသို့ မဖြစ်မနေ ယူဆောင်သွားရမည် ဖြစ်သည်...

တစ်နာရီခန့် ကြာပြီးနောက်၊ နှင်းဝံပုလွေမျိုးနွယ်စု၏ နယ်မြေအတွင်း။

ကင်းစောင့်ရန် တာဝန်ယူထားသော ရန့်မြဲ့သည်၊ အဝေးမှ ပြန်လည်ရောက်ရှိလာသော ဘုရင်နှင့် နှင်းဝံပုလွေအုပ်စုကို၊ အထူးသဖြင့် ကြောက်မက်ဖွယ်ကောင်းသော အရှိန်အဝါများ ထွက်ပေါ်နေပြီး နှင်းဝံပုလွေများ ဒရွတ်တိုက်ဆွဲလာသော ဧရာမဝက်ဝံအလောင်းကြီးကို ပထမဆုံး မြင်တွေ့လိုက်ရလေသည်။

သူသည် ချက်ချင်းပင် စိတ်လှုပ်ရှားသွားပြီး ခေါင်းကို နောက်သို့လှန်ချကာ ရှည်လျားသော ဟိန်းဟောက်သံကြီးကို ထုတ်လွှတ်လိုက်လေတော့သည်။

“အာဝူး...”

“ဘုရင်ကြီး အောင်ပွဲနဲ့အတူ ပြန်လည်ရောက်ရှိလာပြီ၊ အမဲလိုက်မှု အောင်မြင်တယ်”

ဤဟိန်းဟောက်သံမှာ ဗုံးစနက်ကြိုးကို မီးညှိလိုက်သကဲ့သို့ပင်၊ ဝံပုလွေအသိုက် တစ်ခုလုံး ချက်ချင်း ဆူညံပေါက်ကွဲသွားလေတော့သည်။

ကျန်ရစ်နေခဲ့သော နှင်းဝံပုလွေများအားလုံး ဒဏ်ရာရထားသည်ဖြစ်စေ၊ မရထားသည်ဖြစ်စေ၊ သူတို့၏ သစ်ပင်အခေါင်းပေါက်များ သို့မဟုတ် ကင်းတဲများထဲမှ ပြေးထွက်လာကြသည်။