အခန်း (၅၅)

ထိုစကားကို ကြားလိုက်ရသောအခါ သူမ၏ ကိုယ်ဝန်ရှိနေသည့်ကိစ္စကို အခြားသူများ သိနေကြပြီဖြစ်ကြောင်း လော့လန် သတိရသွားသည်။ အနောက်ဘက်အိမ်မှ အိမ်ရှင်မ ပြန်ရောက်လာပြီး ဆူညံပွက်လောရိုက်မှုတွင် ပါဝင်လာသောအခါ သူမက လော့လန်နှင့် သူမ၏ ခင်ပွန်းအကြောင်းကို ထည့်ပြောလာခဲ့သည်။

"လန်အာ၊ ညည်းက သိပ်ပြီး ထိခိုက်မှုရှိပုံမပေါ်ဘူးပဲ။ ညည်း ကံကောင်းတာ! အရင်တုန်းက ငါဘယ်လိုဖြစ်ခဲ့လဲဆိုတာ ညည်းသိမှာမဟုတ်ဘူး။ အူတွေတောင် အပြင်ထွက်လာမတတ် အန်ခဲ့ရတာလေ။"

အရှေ့ဘက်အိမ်မှ အိမ်ရှင်မက ဖြည့်စွက်ပြောခဲ့သည်။ "ငါ့ပထမဆုံး ကိုယ်ဝန်တုန်းကလည်း အဲဒီလိုပဲ။ ဘာမှတောင် စားလို့မရဘူး။ အစားအသောက် အနံ့ရတာနဲ့တင် ပျို့ချင်နေတာ။ လည်ချောင်းထဲက သွေးတွေထွက်လာတဲ့အထိ အန်ခဲ့ရတာ။ ငါ့ယောက်ျားဆို လန့်တောင်လန့်သွားတယ်၊ ဟားဟား။"

အမျိုးသမီးနှစ်ဦးစလုံးမှာ ယခင်က ကလေးမွေးဖွားဖူးကြသော်လည်း လော့လန်မှာမူ ရွှီဟုန်ပင်း၏ ကိစ္စများဖြင့်သာ အလုပ်များနေခဲ့သဖြင့် အခြားသူများ၏ အမြင်တွင် သူမကို ယခုအခါ ကိုယ်ဝန်ဆောင်အမျိုးသမီးတစ်ဦးအဖြစ် ရှုမြင်နေကြပြီဖြစ်ကြောင်း ယခုမှသာ သတိပြုမိတော့သည်။

ထို့ပြင် ရက်စွဲများကို တွက်ချက်ကြည့်သောအခါ သူမ ဓမ္မတာလာရန် အတော်လေး နောက်ကျနေပြီဖြစ်ကြောင်း တွေ့ရသည်။

"အစ်မ၊ အန်တာအပြင် တခြားရောဂါလက္ခဏာတွေရော ရှိသေးလား။"

အရှေ့ဘက်အိမ်မှ အိမ်ရှင်မက ညင်သာစွာ ပြန်ဖြေသည်။

"ငါ့ရင်သားတွေ ရောင်ရမ်းနေပြီး အသစ်ပြန်ဖွံ့ဖြိုးလာသလို ခံစားရတယ်။"

အနောက်ဘက်အိမ်မှ အိမ်ရှင်မက ဝင်ရောက်ပြောဆိုသည်။ "ငါကတော့ အရမ်းအိပ်ချင်တာပဲ၊ နှစ် ၈၀၀ လောက် မအိပ်ခဲ့ရသလို ခံစားရတယ်။ ထမင်းစားနေရင်းတောင် ငိုက်မိတယ်။"

လော့လန်က တိတ်ဆိတ်စွာ ခေါင်းညိတ်လိုက်သည်။ ယခုအချိန်အထိ သူမ သိရှိထားသော ကိုယ်ဝန်ရှိခြင်း၏ လက္ခဏာနှစ်ရပ်မှာ ဓမ္မတာနောက်ကျခြင်းနှင့် ရင်သားများရောင်ရမ်းခြင်းတို့ဖြစ်သည်။ ထိုလူကို ဖြုတ်ချရန် အလွန်အမင်း အာရုံစိုက်နေခဲ့ပြီး သူမ ခန္ဓာကိုယ်၏ ပြောင်းလဲမှုများကို ဂရုမစိုက်မိလောက်အောင် မည်မျှပေါ့ဆခဲ့ကြောင်း သူမ သဘောပေါက်သွားခဲ့သည်။

လော့လန် - 'စနစ်၊ ငါ့မှာ ကိုယ်ဝန်ရှိမရှိ အတည်ပြုလို့ရမယ့် နည်းလမ်းရှိလား'

စနစ် - 'ကိုယ်ဝန်ရှိမရှိ စစ်ဆေးနိုင်တဲ့ ဆီးစစ်တံတွေရှိတယ်၊ တိကျမှုနှုန်း ၉၉% ရှိတယ်'

ထိုစဉ်အတွင်း တောင်ဘက်အိမ်ရှိ အခြေအနေမှာ အကြီးအကျယ် ရန်ပွဲတစ်ခုအဖြစ်သို့ ပြောင်းလဲသွားခဲ့သည်။ မောင်နှမများက ရှုပ်ထွေးမှုများထဲသို့ ပါဝင်ရန် အပြင်သို့ထွက်လာလုနီးပါးတွင် အရှေ့ဘက်အိမ်မှ အိမ်ရှင်မက လော့လန်ကို အနောက်သို့ဆွဲယူကာ လုံခြုံသော အရှေ့ဘက်အိမ်သို့ ဆုတ်ခွာရန် တိုက်တွန်းခဲ့သည်။

မောင်နှမများကြား ရန်ပွဲစတင်လာသည်နှင့်အမျှ ယောက်ဖဖြစ်သူကလည်း ဝင်ရောက်လာပြီး သူ၏ဇနီးသည် အမျိုးသမီးတစ်ဦးဖြစ်ကြောင်းနှင့် အစ်ကိုဖြစ်သူအနေဖြင့် ညီမဖြစ်သူအား အနိုင်မကျင့်သင့်ကြောင်း အော်ဟစ်ပြောဆိုခဲ့သည်။ ရုတ်တရက် အငယ်ဆုံး ညီမဖြစ်သူက သူ၏ထံသို့ ပြေးဝင်လာကာ သူ့ကို ယိုင်လဲသွားစေပြီး သူ၏နှာခေါင်းကို လက်ညှိုးထိုးကာ ကျိန်ဆဲလေတော့သည်။

"ပါးစပ်ပိတ်ထား! နင်ကလည်း သူတော်စင်မဟုတ်ဘူး။ တခြားမိသားစုက ယောက်ျားတစ်ယောက်ဖြစ်ပြီး ငါတို့ရဲ့ ပိုင်ဆိုင်မှုတွေကို ယူဖို့ ကြိုးစားနေတာလား။ အဲဒီအကြံကို စွန့်လွှတ်လိုက်စမ်း!"

"အဒေါ်၊ အဒေါ်က ခွေးရူးလိုပဲ..." အစ်မဖြစ်သူ၏ မိသားစုမှ ကလေးများကလည်း ဝင်ရောက်လာကြသည်။

"နင်က အပြင်လူပဲ၊ ဝင်ပြောပိုင်ခွင့် မရှိဘူး!" အစ်ကိုဖြစ်သူ၏ မိသားစုမှ ကလေးများကလည်း ဝင်ရောက်အော်ဟစ်ကြသည်။

လော့လန်နှင့် အိမ်နီးချင်းနှစ်ဦးတို့မှာ အိမ်ရှေ့ဆင်ဝင်ပေါ်တွင် ရပ်ကာ ဆူညံပွက်လောရိုက်မှုများကို စောင့်ကြည့်နေကြပြီး သူမ၏ ယောက္ခမနှင့် ယောက်မငယ်များမှာလည်း ဆူညံသံများကြောင့် ထွက်လာကြသည်။ မကြာမီတွင် အပြင်ဘက်မှ အိမ်နီးချင်းများ စုရုံးလာကြရာ ပွဲကြည့်ပရိသတ်အုပ်စုကြီးတစ်ခု ဖြစ်ပေါ်လာခဲ့သည်။

"ဝိုး၊ နာရေးကိစ္စတွေကို စီစဉ်ရမယ့်အစား သူတို့က အရင်ဆုံး ရန်စဖြစ်နေကြတာပဲ။"

"အခန်းနှစ်ခန်းလေးအတွက်နဲ့လေ။ ဒီမောင်နှမတွေရဲ့ ပြိုင်ဆိုင်မှုက ရူးချင်စရာပဲ!"

"အခန်းနှစ်ခန်းဆိုပေမယ့် မျိုးဆက်သစ်တွေထဲက တစ်ယောက်ရဲ့ အိမ်ထောင်ရေးကိစ္စကို ဖြေရှင်းပေးနိုင်လောက်တယ်။"

လူတိုင်းက ရှုပ်ထွေးမှုများအကြောင်းကို ဆွေးနွေးနေကြပြီး တောင်ဘက်အိမ်မှ မိသားစုမှာမူ လုံးဝ ဖရိုဖရဲဖြစ်နေခဲ့သည်။ လူကြီးများမှာ ရောထွေးရှုပ်ယှက်ခတ်နေကြပြီး လူငယ်မျိုးဆက်များကလည်း ပျော်စရာအဖြစ် ဝင်ရောက်ပါဝင်နေကြသည်။

ဤရှုပ်ထွေးသောခေတ်တွင် မည်သူကမျှ ထိုကဲ့သို့သော ကိစ္စများကို ဂရုစိုက်ပုံမပေါ်ပေ။ နောက်ဆုံးတွင် လူအတော်များများ ဒဏ်ရာရရှိသွားကြပြီး မြေးတစ်ယောက်မှာ ခေါင်းမှ သွေးများ အလွန်အမင်း ထွက်လာရာမှသာ လူအုပ်ကြီး ငြိမ်သက်သွားခဲ့သည်။

"မြန်မြန်၊ သူ့ကို ဆေးရုံပို့ကြ!"

ဤရှုပ်ထွေးမှုများကြားတွင် လော့လန်သည် အမှတ်မည်မျှရရှိခဲ့သည်ကိုသာ အာရုံစိုက်နေခဲ့ပြီး ထိုအမှတ်များကို အသုံးပြုကာ ကိုယ်ဝန်ရှိမရှိ စစ်ဆေးနိုင်သည့် ဆီးစစ်တံတစ်ခုနှင့် လဲလှယ်လိုက်သည်။

လမ်းညွှန်ချက်များအရ နံနက်ခင်း၏ ပထမဆုံးဆီးမှာ အတိကျဆုံးဖြစ်ကြောင်း ပြသထားသဖြင့် ထိုည၌ အသုံးမပြုသေးဘဲ ထိန်းထားကာ ကျိုးချင်းရှန်ကို တွေ့သောအခါတွင်လည်း ထိုအကြောင်းကို ထုတ်မပြောခဲ့ပေ။

"စက်ရုံညွှန်ကြားရေးမှူးက ဘယ်မှာလဲ။"

"သူ လယ်ထဲကို အပို့ခံလိုက်ရပြီ။” အမျိုးသားဖြစ်သူက သူမအား စိုးရိမ်တကြီးကြည့်ကာ တိုးညှင်းစွာ ပြောလိုက်သည်။ “သူက တိရစ္ဆာန်တွေကို အစာကျွေးပြီး လက်လုပ်လက်စား အလုပ်တွေပဲ လုပ်ရမယ်လို့ ကြားတယ်။ ဒါပေမယ့် ဝေဖန်ရေး အစည်းအဝေးတွေတော့ လုပ်မှာမဟုတ်ဘူး။”

“အင်း၊ အဲဒါ ကောင်းတာပေါ့။”

ညွှန်ကြားရေးမှူး၏ ဒဏ်ရာများ ကျက်သွားပြီဖြစ်သဖြင့် ဤအချိန်တွင် အခက်အခဲအချို့ကို သည်းခံရမည်ဆိုလျှင်တောင်မှ ခြံထဲတွင် အလုပ်လုပ်ရသည်မှာ သူ့အတွက် အဆင်ပြေသည်။ သူ့ကို ဆက်မရိုက်နှက်တော့သရွေ့ အလွန်ဆိုးရွားမည်မဟုတ်ပေ။

သူမ ထွက်သွားပြီးနောက် သူမ ပုံမှန်စောင့်နေကျ လူသူကင်းမဲ့သော ထောင့်နေရာတွင် ရပ်စောင့်နေခဲ့သည်။ မကြာမီပင် မာထျန်းလျန် ရောက်ရှိလာခဲ့သည်။

"စိတ်မပူပါနဲ့၊ မင်းယောက်ျား မကြာခင် အလုပ်ပြန်ဆင်းရပါလိမ့်မယ်။ သူ့မှာ ရှုပ်ထွေးတဲ့ နောက်ခံသမိုင်းကြောင်းမှ မရှိတာ။ သူက သူ့အမှားကို ဝန်ခံပြီး ကိုယ်တိုင်ဝေဖန်ရေးစာ တစ်စောင် ရေးပေးဖို့ပဲ လိုတာပါ။"

"သူက ဘာလို့ အမှားကိုဝန်ခံပြီး ကိုယ်တိုင်ဝေဖန်ရေးစာ ရေးဖို့ လိုတာလဲ။" ကျိုးချင်းရှန်၏ ခေါင်းမာသော စရိုက်နှင့်ဆိုလျှင် သူ အမှန်တကယ် ထိုသို့လုပ်နိုင်ပါ့မလား။

“ဒါမှမဟုတ်ရင် ဘာအကြောင်းပြချက်မှမရှိဘဲ သူတို့က သူ့ကို ဒီတိုင်း လွှတ်ပေးလိုက်မယ်လို့ မင်းထင်နေတာလား။” မာထျန်းလျန် သက်ပြင်းချလိုက်သည်။ “မင်းရဲ့ ယောက်ျားကို မင်း အကြံပေးသင့်တယ်။ ဒါက အန္တရာယ်များတဲ့အချိန်ပဲ၊ စကားတစ်ခွန်း မှားသွားတာနဲ့တင် ပြင်းထန်တဲ့ အကျိုးဆက်တွေ ဖြစ်လာနိုင်တယ်။ သူက သူ့အမှားကိုဝန်ခံပြီး ဒီတစ်ကြိမ် လွတ်လာရင်တောင်မှ နောင်ကျရင် သူ့ရဲ့ အပြောအဆိုနဲ့ လုပ်ရပ်တွေကို တော်တော်လေး ဂရုစိုက်ဖို့ လိုတယ်။ သူတို့က သူ့အပေါ် တစ်ခုခုအပြစ်တင်ဖို့ အကြောင်းပြချက် ရှာမတွေ့စေနဲ့။"

အခြေအနေမှာ ကြီးလေးကြောင်း လော့လန် သိထားပြီး မည်သည့်အခြေအနေမှမရှိဘဲ သူ့ကို လွှတ်ပေးလိမ့်မည်ဟု မထင်ရပေ။ ထို့ကြောင့် သူမ၏ခင်ပွန်း ထွက်သွားပြီးနောက် ထိုအခန်းငယ်လေးဆီသို့ ပြန်သွားခဲ့သည်။ မာထျန်းလျန်၏ ညွှန်ကြားချက်များကို လိုက်နာကာ မည်သူကမျှ အခက်အခဲမပေးဘဲ သူမ ဝင်ရောက်သွားခဲ့သည်။

"ကိုယ်တိုင်ဝေဖန်ရေးစာ ရေးပြီး ကိုယ့်အမှားကို ဝန်ခံရမယ် ဟုတ်လား။ ကိုယ် ဘာအမှားမှ မလုပ်ခဲ့ဘူး!" ကျိုးချင်းရှန်သည် ဤစကားကို ကြားသောအခါ ချက်ချင်းပင် ဒေါသထွက်သွားခဲ့သည်။

"ရှင် မှားသည်ဖြစ်စေ မှန်သည်ဖြစ်စေ ရှင် ဒီကနေ ထွက်သွားတဲ့အထိ စောင့်လို့ရတယ်။ ဒါမှမဟုတ်ရင် တစ်သက်လုံး ဒီထဲမှာ ပိတ်မိနေချင်လို့လား။"

"ကိုယ် ဘာအမှားမှ မလုပ်ခဲ့ဘူး။” သူက ပြင်းပြင်းထန်ထန် အသက်ရှူလိုက်သည်။ “အဆိုးဆုံးဖြစ်လာရင်လည်း ကိုယ့်ကို ခြံထဲသာ ပို့လိုက်ပါ။ ကိုယ် မကြောက်ဘူး။"

“ကျိုးချင်းရှန်” လော့လန်မှာလည်း စိတ်အနှောင့်အယှက်ဖြစ်သွားသည်။ “ရှင့်မိသားစုကို ကူညီဖို့ ကျွန်မ ခေါင်းစားခံပြီး ပိုက်ဆံတွေ အကုန်ခံခဲ့ရတာ။ အခု ရှင့်အတွက် လမ်းစတစ်ခု ရှာတွေ့ပြီဆိုတော့မှ ရှင်က ခေါင်းမာနေတယ်။”

"ရှင် ဖြေရှင်းနိုင်လို့လား။ ကောင်းပြီ၊ ကောင်းပြီလေ။”

လော့လန်မှာ အလွန်ဒေါသထွက်သွားသဖြင့် ကုလားထိုင်ပေါ်မှ ထရပ်လိုက်သည်။ “သတ္တိရှိရင် မရေးနဲ့။ တစ်သက်လုံး ဒီမှာပဲ နေတော့။”

သူမသည် စကားပြောပြီးနောက် ဒေါသတကြီး နှာမှုတ်လိုက်ကာ အမြန်ထွက်မသွားဘဲ အပေါ်ကစီး၍ သူ့ကို စိုက်ကြည့်နေခဲ့သည်။ ဒါသည် သူတို့လက်ထပ်ပြီးကတည်းက ပထမဆုံးအကြိမ်အဖြစ် ကြီးမားသော သဘောထားကွဲလွဲမှုဖြစ်ပြီး ကျိုးချင်းရှန်၏ မျက်နှာအမူအရာမှာလည်း မကောင်းလှပေ။

"ကိုယ့မှာကိုယ့် စည်းမျဥ်းနဲ့ ကိုယ်ရှိတယ်။"

"ကောင်းပြီ။ ရှင့်မူဝါဒတွေကိုပဲ ဆက်ကိုင်စွဲထားလိုက်၊ ပြီးတော့ ဘယ်တော့မှ လွတ်လာဖို့ မမျှော်လင့်နဲ့တော့။"

လော့လန်က ထိုသို့ပြောပြီး ဒေါသတကြီး ထွက်သွားခဲ့ကာ ဤခေါင်းမာသော အမျိုးသားနှင့် ဆက်လက်အငြင်းပွားရန် ပျင်းရိနေခဲ့သည်။ အိမ်အပြန်လမ်းတွင် သူမ ဒေါသထွက်နေဆဲဖြစ်ပြီး ခြေထောက်ဆေးရန် သွားသောအခါ ရေဇလုံတစ်ဝက်ခန့်ကို နေရာအနှံ့ အမှတ်တမဲ့ ဖိတ်စင်သွားစေခဲ့သည်။

ဖရိုဖရဲဖြစ်နေသည်ကို ကြည့်လိုက်သောအခါ သူမ၏ စိတ်အခြေအနေမှာ ပို၍ဆိုးရွားသွားခဲ့သည်။ သူမ ခြေမဆေးတော့ဘဲ အိပ်ရာဝင်ရန် စဉ်းစားလိုက်စဉ် သူမ၏ ယောက္ခမ ဝင်လာခဲ့သည်။

ယောက္ခမက ရေဇလုံကို ကောက်ကိုင်ကာ ရေပြန်ဖြည့်ပေးလိုက်ပြီး သူမ၏ ဆူပွက်နေသော ဒေါသများကို တဖြည်းဖြည်း လျော့ကျသွားစေသည့် လေပြေအေးလေးကဲ့သို့ ညင်သာစွာ ပြောဆိုလိုက်သည်။

"ဘာဖြစ်လို့လဲ။ အလုပ်ကိစ္စလား၊ ဒါမှမဟုတ် ချင်းရှန်က ညည်းကို ဒေါသထွက်အောင် လုပ်လိုက်တာလား။"

"ကျွန်မ ကြိုးဆွဲပေးပြီးသွားပြီ။ သူသာ ကိုယ်တိုင်ဝေဖန်ရေးစာ ရေးလိုက်ရင် သူ့အလုပ် ပြန်ရပြီး လွတ်လာနိုင်တယ်..."

“အဲ့ ခေါင်းမာတဲ့မြည်းလိုကောင်က မရေးချင်ဘူးမှတ်လား?” အမေကျိုးက မေးလိုက်တာ မဟုတ်ဘဲ ကောက်ချက်ချလိုက်တာဖြစ်သည်။ “ငါသူ့ကို မနက်ဖြန် စကားသွားပြောကြည့်လိုက်မယ်။ သူ ငါ့ကို အဖက်မလုပ်ဘဲ နေရဲရင် သူ့ကို နာနာရိုက်ပစ်မယ်။ စိတ်မတိုနဲ့။ ဒီလို ခေါင်းမာတဲ့ မြည်းလိုကောင်နဲ့က စိတ်တိုလည်း ဘာမှ မထူးဘူး”

သူမ ယောက္ခမ၏ ခေါင်းမာသောမြည်း မှတ်ချက်က သူမကို ဖွဖွ ရယ်စေခဲ့၏။ “တကယ်ပါ။ သူ့ကို စိတ်တိုတော့ရော ဘာထူးမှာလဲ?” သူမက သူ့ကို စတွေ့ကတည်းက သူ၏ စကားနှင့် အပြုအမူများမှတစ်ဆင့် အလွန်ကိုယ်ပိုင်စံနှုန်းမူဝါဒတွေ များသူဖြစ်ကြောင်း သူမသတိထားမိခဲ့သည်ကို သတိရလိုက်၏။

သူလိုလူမျိုးက ဤကဲ့သို့သော အချိန်ကာလမျိုးတွင် ဒုက္ခရောက်တတ်သော်လည်း ဒါက သူ၏ အားသာချက်လည်း ဖြစ်သည်။ မည်မျှပင် သွေးဆောင်ဖြားယောင်းမှုများ ရှိစေကာမူ သူသည် လှည့်စားခံရမည်မဟုတ်ပေ။ သူ၏ မူဝါဒများကို ဘယ်သောအခါမျှ အလျှော့ပေးမည်မဟုတ်ပေ။ သူ အမှားမလုပ်ခဲ့သောအရာကို သူ ဝန်ခံမည်မဟုတ်သော်လည်း အိမ်ထောင်ပြင်ပ ဆက်ဆံရေးများတွင် ဘယ်သောအခါမျှ မပါဝင်ခြင်းကဲ့သို့သော သူ၏ကိုယ်ပိုင် ကန့်သတ်ချက်များလည်း ရှိသည်။

သူမ ပြုံးလိုက်သည်ကို မြင်သောအခါ အမေကျိုးမှာ နောက်ဆုံးတွင် စိတ်သက်သာရာရသွားခဲ့သည်။ သူမက ခွေးခြေခုံတစ်လုံးကို ယူကာ သူမဘေးတွင် ထိုင်လျက် အလွတ်သဘော စကားပြောဆိုလိုက်သည်။

"သူက သူ့အဖေနဲ့ တစ်ပုံစံတည်းပဲ၊ ဘယ်သူ့ကိုမဆို ရူးသွပ်သွားစေနိုင်လောက်အောင် ခေါင်းမာတယ်။ ဒါပေမယ့် အဲဒါက ကောင်းကျိုးတွေလည်း ရှိပါတယ်။ သူ တခြားမိန်းမတွေနဲ့ ရှုပ်ပွေနေမှာကို ငါ ဘယ်တုန်းကမှ ပူပန်စရာမလိုခဲ့ဘူး။ မိန်းမတွေက ဘယ်လောက်ပဲ လှနေပါစေ သူက ကြည့်တောင်ကြည့်မှာ မဟုတ်ဘူး။ သူက သူ့လစာတစ်ခုလုံးကို အပ်ပြီး အလုပ်ဆင်းရင်လည်း အိမ်မှာ ကူညီပေးတယ်။"

"အမေ၊ အမေ အဖေ့ကို လွမ်းနေတာလား။"

"ဟူး၊ အချိန်တွေလည်း အတော်ကြာခဲ့ပြီပဲ။ ငါ မတွေးရဲတော့ပါဘူး။"

သူမက နှစ်သိမ့်ပေးချင်သော်လည်း ပြောရမည့်စကားများမှာ အတုအယောင် ဆန်လွန်းနေသည်ဟု ခံစားလိုက်ရသည်။ ဟက်၊ သူတို့က တစ်သားတည်းကျနေပုံရသည်။ သူမ၏ စိတ်နှလုံးနက်ရှိုင်းရာတွင်လည်း ခိုင်မာသော မူဝါဒများနှင့် မြင့်မားသော စံနှုန်းများ ရှိနေခဲ့သည်။

"ဖြစ်နိုင်တာက..."

ရေချိုးသန့်စင်ပြီးနောက် သူမ အိပ်ရာဝင်ခဲ့သည်။ သို့သော် စိုးရိမ်ပူပန်မှုများဖြင့် ပြည့်နှက်နေသဖြင့် ထိုညက သူမ ကောင်းကောင်း အိပ်မပျော်နိုင်ခဲ့ပေ။ ထိုခေါင်းမာသော မြည်းကြီးသာ အလျှော့မပေးလျှင် သူတို့၏ ဘဝများသည် ပို၍ ခက်ခဲလာဖွယ်ရှိသည်။

သူမက အခက်အခဲများကို မကြောက်သလို သူလည်း မကြောက်ပေ။ သို့သော် သူမတွင် ကိုယ်ဝန်ရှိနေလျှင် မည်သို့လုပ်မည်နည်း။ စိတ်ပူစရာမလိုပါ၊ ကူညီပေးမည့် ယောက္ခမရှိနေပါသည်။ သူမတွင် ကိုယ်ဝန်ရှိနေလျှင်တောင်မှ ပြဿနာဖြစ်မည်မဟုတ်ပေ။ ကလေးမွေးပြီးသည်နှင့် ကလေးကို စောင့်ရှောက်ပေးမည့်သူ ရှိနေမည်ဖြစ်သည်။ ဤစိုးရိမ်မှု ပြေလည်သွားသရွေ့ အလုပ်အကိုင်ရှိနေခြင်းက ကျန်ရှိသောအရာများကို ကိုင်တွယ်ဖြေရှင်းနိုင်သယောင် ထင်ရစေသည်။

ထို့ပြင် သူမတွင် စနစ်ရှိနေသောကြောင့် ပို၍ပင် စိုးရိမ်စရာ နည်းပါးသွားသည်။ သူက သူ၏မူဝါဒများကို ကိုင်စွဲထားချင်လျှင် သူ့ကို ခွင့်ပြုလိုက်ပါမည်။ တစ်ခါတစ်ရံတွင် အချို့သော မူဝါဒများကို မချိုးဖောက်သင့်ဟု သူမ ခံစားရသည်။

သူမ သဘောပေါက်သွားသည်နှင့် တစ်ပြိုင်နက် လျင်မြန်စွာ အိပ်ပျော်သွားခဲ့သည်။ သူမ နိုးလာချိန်တွင် နံနက် ၇ နာရီ ၃၀ မိနစ်ပင် ရှိနေပြီဖြစ်သည်။ အရေးကြီးဆုံးကိစ္စကို မမေ့ဘဲ သူမ ကမန်းကတန်း ထရပ်လိုက်သည်။ ညွှန်ကြားချက်များကို လိုက်နာကာ လုပ်ဆောင်လိုက်ရာ ထင်ရှားသော အနီရောင်မျဉ်းနှစ်ကြောင်းကို လျင်မြန်စွာ တွေ့လိုက်ရသည်။

'ဒါဆို ဒါက သူမမှာ ကိုယ်ဝန်ရှိနေတယ်ဆိုတဲ့ အဓိပ္ပာယ်လား။'

လော့လန် - 'စနစ်၊ ဒီအရာက ၁% မတိကျဘူးဆိုတာမျိုးတော့ မဖြစ်နိုင်ဘူးမလား'

စနစ် - 'မင်း စိတ်ပူနေရင် ဆေးရုံသွားပြီး စစ်ဆေးလိုက်လေ'

လော့လန် - 'ဒါပေမယ့် အဲဒါက ပိုက်ဆံပိုကုန်မှာပေါ့'

စနစ် - 'မင်းက တကယ့်ကို ကပ်စေးနည်းတာပဲ'

ဒါက ကပ်စေးနည်းတာလား။ သူမက လက်တွေ့ကျကျ တွေးနေခြင်းသာဖြစ်သည်။ သူမ၏ ဓမ္မတာမှာ နောက်ကျနေပြီဖြစ်ပြီး အရာအားလုံးက ကိုယ်ဝန်ရှိနိုင်ခြေရှိကြောင်း ညွှန်ပြနေသဖြင့် နေ့လယ်စာစားချိန်အတွင်း ဆေးရုံသို့သွားရန် သူမ ဆုံးဖြတ်လိုက်သည်။

သွေးဖောက်ပြီးနောက် သားဖွားမီးယပ် အထူးကုဆရာဝန်မှာ ပြီးခဲ့သည့်အကြိမ်က ဆရာဝန်နှင့် မတူညီသည်မှာ သူမ ကံကောင်းခဲ့သည်။ ဆရာဝန်က စစ်ဆေးမှုအမှာစာကို ချောမွေ့စွာ ထုတ်ပေးခဲ့ပြီး သွေးဖောက်ပြီးနောက် အစီရင်ခံစာကို ညနေ ၅ နာရီတွင် အဆင်သင့်ဖြစ်မည်ဟု သူမက ပြောကြားခဲ့သည်။ အလုပ်ဆင်းပြီးနောက် လော့လန်သည် ဆေးရုံသို့ အပြေးအလွှားသွားခဲ့ပြီး ပြီးခဲ့သည့်အကြိမ်က ရလဒ်များနှင့် တူညီနေသော အစီရင်ခံစာကို မြင်လိုက်ရချိန်တွင် သူမ ခဏတာ အံ့အားသင့်သွားခဲ့သည်။

ထို့နောက်တွင်တော့ အလွန်အမင်း ပျော်ရွှင်မှုများ ဝင်ရောက်လာခဲ့သည်။ သူမသည် အလွန်ဝမ်းသာနေသဖြင့် သူမကိုယ်သူမပင် မထိန်းချုပ်နိုင်လုနီးပါး ဖြစ်သွားခဲ့သည်။

ကံကောင်းထောက်မစွာဖြင့် သူမတွင် အသိတရားအနည်းငယ် ကျန်ရှိနေသေးပြီး သူမ၏ လွန်ကဲသော စိတ်လှုပ်ရှားမှုများကို ဖိနှိပ်ထားလိုက်သည်။ သူမသည် အိမ်သို့မပြန်ဘဲ စက်ယန္တရားစက်ရုံဆီသို့ တိုက်ရိုက်သွားခဲ့သည်။

"ကြည့်စမ်း—"

ကျိုးချင်းရှန်သည် ဇနီးဖြစ်သူအား မည်သို့အားပေးရမည် သို့မဟုတ် မည်သို့ဆက်သွယ်ပြောဆိုရမည်ကို စဉ်းစားနေဆဲဖြစ်စဉ် သူမက သူ့ထံသို့ အစီရင်ခံစာတစ်စောင်ကို ရုတ်တရက် ကမ်းပေးလိုက်သည်။ သူက အောက်သို့ ငုံ့ကြည့်လိုက်ပြီးနောက် ခေါင်းကိုမော့လိုက်ရာ စိတ်လှုပ်ရှားမှု အရိပ်အယောင် အနည်းငယ်မျှပင် မပြသခဲ့ပေ။

"ကျွင်းဟွေ့ရဲ့ အစီရင်ခံစာက ဘာဖြစ်လို့လဲ။ အဲဒါကို ဘာလို့ ငါ့ကို လာပြနေတာလဲ။"

သူ၏ ဇဝေဇဝါဖြစ်နေသော မျက်လုံးများကို ကြည့်ကာ ကျိုးကျွင်းဟွေ့၏ ယခင်စစ်ဆေးမှုမှာလည်း သူမ၏ အမည်ဖြင့်ဖြစ်ကြောင်း ရုတ်တရက် သတိရသွားသည်။

"ဒါ ကျွန်မဟာ။"

အမျိုးသားဖြစ်သူမှာ တွေဝေသွားပြီး အောက်သို့ တစ်ဖန် ပြန်ငုံ့ကြည့်လိုက်သည်။ အမှန်ပင် ထိုအရာက သူမတွင် ကိုယ်ဝန်ရှိနေကြောင်း ဖော်ပြနေသည်။

"မင်းဟာလား... မင်းမှာ ကိုယ်ဝန်ရှိနေတာလား။"

"ဟုတ်တယ်။"

"တကယ်လား။"

သူမက နောက်မှ ကိုယ်ဝန်အယောင်ဆောင်ရန် စီစဉ်ထားသော်လည်း ယခုလို ဖြစ်လာမည်ဟု မမျှော်လင့်ထားခဲ့ပေ။

"ဒါမှမဟုတ်ရင် ရှင့်ကို ကျွန်မက ဘာလို့ လှည့်စားရမှာလဲ။"

"မိန်းမ”

ကောင်းပြီ၊ သူမ သူ့ကို ဆွံ့အသွားစေရန် အောင်မြင်စွာ လုပ်ဆောင်နိုင်ခဲ့သည်။ သူ၏မျက်နှာတွင် စိတ်လှုပ်ရှားမှု၊ ဇဝေဇဝါဖြစ်မှုနှင့် စိုးရိမ်ပူပန်မှုတို့ ရောယှက်ကာ ပေါ်လွင်နေပြီး ခံစားချက်ပေါင်းစုံက ဖြတ်ပြေးသွားခဲ့သည်။ သူ၏ လက်မောင်းများမှာ တုန်ယင်နေပြီး သူမကို ဖက်ချင်သော်လည်း တွန့်ဆုတ်နေကာ ငိုရမလား ရယ်ရမလား မသိဖြစ်နေခဲ့သည်။

"ကိုယ် အဖေဖြစ်တော့မယ်!"

"ကဲ၊ ဒါဆို ဘယ်လိုလုပ်မလဲ။ ရှင် ကိုယ်တိုင်ဝေဖန်ရေးစာ မရေးဘူးဆိုတာ သေချာသေးလား။"

"ကိုယ် မရေးချင်တာတော့ မဟုတ်ပါဘူး၊ ဒါပေမယ့်..."

"ကျိုးချင်းရှန်၊ ကျွန်မတို့ သားအမိ သေရေးရှင်ရေး ကိစ္စ ဖြစ်လာရင်ရော ဘယ်လိုလုပ်မလဲ။"

"ကိုယ် ရေးပါ့မယ်။" အမျိုးသားဖြစ်သူက ချက်ချင်း ခေါင်းငုံ့သွားကာ ပြင်းပြင်းထန်ထန် အသက်ရှူလိုက်ပြီး အတင်းအကြပ် ပြုံးပြလိုက်သည်။ သူ၏ မူဝါဒများကို လက်လွှတ်လိုက်တော့မည့်အချိန်တွင် လော့လန်က စကားစပြောလာခဲ့သည်။