အခန်း (၇၇-၇၈)

အခန်း ၇၇ - ကျင့်စဉ်ရွေးချယ်ခြင်း

"စီနီယာအစ်ကို ဝမ်၊ အလုပ်လုပ်ရမယ့် အချိန်ရောက်ပြီ"

ဟွမ်ပုထုန်သည် ပြတင်းပေါက်နားသို့ လျှောက်သွားကာ ပြတင်းပေါက်ဘောင်ကို ခေါက်လိုက်လေ၏။

"ဂိုဏ်းဝင်ခါစ တပည့်သစ်တွေလား"

လွှဲကုလားထိုင်ပေါ်တွင် လှဲလျောင်းနေသော အဘိုးအိုသည် မျက်ခွံများကို ပင့်ကြည့်လိုက်၏။ ဟွမ်ပုထုန်ဖြစ်နေသည်ကို မြင်သောအခါ သူသည် ပြန်လည် လှဲချလိုက်လေသည်။

သူသည် စားပွဲကို လက်ဖြင့် နှစ်ချက်ခေါက်လိုက်ရာ အနီးရှိဗီရိုတစ်ခုထဲမှ အကြွေစေ့တစ်စေ့ အလိုအလျောက် ပျံထွက်လာပြီး ဟွမ်ပုထုန်၏ လက်ထဲသို့ ကျဆင်းလာလေ၏။

အကြွေစေ့ကို လက်ခံရရှိသည်နှင့် တစ်ပြိုင်နက် ဟွမ်ပုထုန်၏ မျက်နှာမှာ ချက်ချင်း ဝင်းလက်သွားလေတော့သည်။

သူ ဒီလောက် ကြိုးစားပမ်းစား လုပ်ဆောင်နေခဲ့တာ ဒီအရာအတွက်ပဲ မဟုတ်ပါလား။

"ကျွန်တော့်ဆရာက သူတို့ကို ခင်ဗျားဆီခေါ်လာခဲ့ဖို့ ညွှန်ကြားလိုက်လို့ပါ" ဟွမ်ပုထုန်က အကြွေစေ့ကို သိမ်းဆည်းပြီးနောက် ရိုသေစွာ ပြောလိုက်၏။

"သူတို့ကို စာရင်းသွင်းလိုက်"

အဘိုးအိုသည် လက်ကို ထပ်မံဆန့်ထုတ်လိုက်ပြီး အနီးရှိ ကျင့်ကြံခြင်းပညာရပ် လေးခု နှင့် သက်ဆိုင်သော ပစ္စည်းများကို လက်ညှိုးထိုးပြလိုက်သည်။

ဗလာစာအုပ်ငယ်သည် နှစ်ကြိမ်ခန့် လှုပ်ရှားသွားပြီးနောက် ဝှစ်ခနဲ အသံနှင့်အတူ စာအုပ်စင်ပေါ်မှ ပျံထွက်လာကာ လိပ်ပြာတစ်ကောင်ကဲ့သို့ အခန်းတွင်း လှည့်ပတ်ပျံသန်းပြီးနောက် စားပွဲပေါ်တွင် ပွင့်လျက်သား ကျဆင်းလာလေ၏။

မှင်အိုးမှာ အလိုအလျောက် မှင်သွေးလာပြီး မှင်ရည်အသင့်ဖြစ်သောအခါ စုတ်တံသည် ပျံတက်လာကာ မှင်ရည်ကို တို့ယူလိုက်ပြီး စာအုပ်ငယ်ပေါ်တွင် ဝဲပျံနေလေသည်။

ဤမြင်ကွင်းကြောင့် ဟွမ်ယင်း၊ ချန်လော့နှင့် အခြားသော တပည့်သစ်များ၏ မျက်လုံးများမှာ အရောင်လက်သွားကြလေ၏။

မသေမျိုးဆရာသခင်တို့၏ နည်းလမ်းများပင်တည်း။ ဤသည်မှာ သူတို့ အပြင်ဘက်တွင် သင်ယူခဲ့ရသော မှော်မန္တန်အသေးစားလေးများထက် များစွာ ပိုမို သိမ်မွေ့နက်နဲလှပေသည်။

စုတ်တံ၊ မှင်၊ စက္ကူနှင့် မှင်အိုးတို့သည် အသက်ရှင်နေသော သက်ရှိများကဲ့သို့ပင် ဖြစ်နေလေသည်။

"ဒါက ပစ္စည်းဝတ္ထုတွေကို ထိန်းချုပ်တဲ့မန္တန် ပဲ။ ကျင့်ကြံသူတွေ မဖြစ်မနေ လေ့ကျင့်ရမယ့် မြင့်မြတ်တဲ့ စွမ်းရည်မန္တန်တွေထဲက တစ်ခုပေါ့။ မင်းတို့တွေ ချီသန့်စင်ခြင်း အလယ်အလတ်အဆင့်ကို ရောက်သွားပြီဆိုရင် ဒါကို သင်ယူဖို့ ကြိုးစားကြည့်လို့ ရပြီ"

သူတို့၏ တုံ့ပြန်မှုကို မြင်သောအခါ ဟွမ်ပုထုန်က ပြောလိုက်လေ၏။

"ဟွမ်ယင်း လေ၊ သတ္တု၊ မြေ နဲ့ ရေ ဝိညာဉ်အမြစ် လေးခု"

"အလယ်အလတ်အဆင့် ဝိညာဉ်အမြစ် လေးမျိုး။ဒြပ်စင်ငါးပါး ဝိညာဉ်‌အမြစ် သုံးမျိုး ပါဝင်ပြီး စိတ်ဝိညာဉ်ငါးပါး ဝိညာဉ်အမြစ်သုံးခု ပါဝင်တယ်။ ပါရမီအဆင့်က အလယ်အလတ်-အောက် အဆင့်"

စုတ်တံသည် လျင်မြန်စွာ လှုပ်ရှားသွားပြီး စာအုပ်ငယ်ပေါ်တွင် မှတ်တမ်းတင်လိုက်လေ၏။

ချန်လော့သည် အနီးသို့ ကပ်ရပ်လိုက်ပြီး စုတ်တံ ရေးသားလိုက်သည်များကို မြင်တွေ့လိုက်ရသည်။

ဒြပ်စင်ငါးပါး စိတ်ဝိညာဉ်ငါးပါး ဂိုဏ်းဝင် မှတ်တမ်းသည် အလွန်ပင် အသေးစိတ်ကျလှပေသည်။ သို့သော် ဤဒြပ်စင်ငါးပါးနှင့် စိတ်ဝိညာဉ်ငါးပါး အကြောင်းပြောဆိုမှုမှာ သူ၏အတွက် အသစ်အဆန်း ဖြစ်နေလေသည်။

သူ ယွဲ့နိုင်ငံ၌ ရှိနေစဉ်က အစစ်အမှန်ပုဂ္ဂိုလ် ချန်ချင်းသည် သူ့အား ဤဗဟုသုတများနှင့် ပတ်သက်၍ တစ်ကြိမ်တစ်ခါမျှ မပြောပြခဲ့ဖူးပေ။

ဖြစ်နိုင်သည်မှာ အစစ်အမှန်ပုဂ္ဂိုလ် ချန်ချင်း ကိုယ်တိုင်ကပင် ဝိညာဉ်အမြစ်များကို မည်သို့ ခွဲခြားသတ်မှတ်သည်ကို ရှင်းလင်းစွာ သိရှိပုံ မရပေ။

"ဖူအန်း သတ္တု၊ သစ်သား၊ ရေ၊ မီး နဲ့ မြေ ဝိညာဉ်အမြစ် ငါးခု"

"ရွှင်ရှန်း သစ်သား၊ မီး၊ မြေ၊ လေ၊ မိုးကြိုး နဲ့ ရေ ဝိညာဉ်အမြစ် ခြောက်ခု"

"ယောင်ကျန်းဟိုင်..."

နောက်ထပ် လူသုံးဦးသည်လည်း သူတို့၏ ပါရမီအဆင့်များကို အသီးသီး ပြောပြကြပြီး စုတ်တံက လျင်မြန်စွာပင် မှတ်တမ်းတင်ပေးလိုက်လေ၏။

"ချန်လော့ ရေ၊ သစ်သား နဲ့ မိုးကြိုး ဝိညာဉ်အမြစ် သုံးခု"

ချန်လော့သည်လည်း သူ စောစောက စမ်းသပ်ထားခဲ့သော ပါရမီအဆင့်ကို ပြောပြလိုက်လေသည်။

"အလယ်အလတ်အဆင့် ဝိညာဉ်အမြစ် သုံးခု။ ဒြပ်စင်ငါးပါး ဝိညာဉ်အမြစ် နှစ်ခု ပါဝင်ပြီး၊ စိတ်ဝိညာဉ်ငါးပါး ဝိညာဉ်အမြစ် နှစ်ခု ပါဝင်တယ်။ ပါရမီအဆင့်က အလယ်အလတ် အဆင့်"

စုတ်တံသည် ချန်လော့၏ အချက်အလက်များကို မှတ်တမ်းတင်ပြီးစီးသွားသောအခါ စာအုပ်ငယ်သည် လေထဲတွင် ခဏတာမျှနေပြီးနောက် စာအုပ်စင်ပေါ်သို့ အလိုအလျောက် ပြန်လည်ပျံသန်းသွားလေသည်။

စုတ်တံနှင့် မှင်အိုးတို့သည်လည်း အသက်ရှင်နေသော ဝိညာဉ်ပစ္စည်းများကဲ့သို့ သူတို့၏ သက်ဆိုင်ရာ နေရာများသို့ ပြန်လည်ရောက်ရှိသွားကြလေ၏။

"အလယ်အလတ်အဆင့် ဝိညာဉ်အမြစ် နှစ်ယောက်၊ အဆင့်နိမ့် သုံးယောက်။ မဆိုးပါဘူး လက်ခံလို့ ရပါတယ်"

လွှဲကုလားထိုင်ပေါ်ရှိ အဘိုးအိုသည် လက်ကို ထပ်မံဝှေ့ယမ်းလိုက်လေသည်။ ဝေဟင်သင်္ဘောပေါ်တွင် သူတို့ ရရှိခဲ့သော ရေစက်ပုံစံ သက်သေခံ အမှတ်အသားများသည် သူတို့၏ ခန္ဓာကိုယ်များထဲမှ ပျံထွက်သွားပြီး အဘိုးအို၏ လက်ထဲသို့ ရောက်ရှိသွားလေသည်။

ထို့နောက် အနီးရှိ အခြားစင်တန်းတစ်ခုပေါ်မှ သက်သေခံ တိုကင်ပြားအသစ်များ ပျံထွက်လာလေ၏။ ဤတစ်ကြိမ်တွင်မူ သက်သေခံ တိုကင်ပြားများသည် ယခင်ကကဲ့သို့ ယာယီအရောင် မဟုတ်တော့ဘဲ အညိုရင့်ရောင်ဖြစ်နေကာ ရေစက်၏ အလယ်ဗဟို၌ ကြီးမားသော ဝူတောက်ဟူသော စာလုံးတစ်လုံး ပါရှိလေသည်။

တိုကင်ပြားများကို ဝေငှပြီးနောက် တာအိုဝတ်ရုံ တစ်ထည်နှင့် မှော်ဓား တစ်လက်တို့လည်း ပျံထွက်လာကြလေ၏။ ဂိုဏ်းဝင်ပစ္စည်းများ ဝေငှခြင်း ကိစ္စမှာ ပြီးစီးသွားခဲ့လေပြီ။

"ကဲ.. တခြား ဘာမှမရှိတော့ရင် သွားကြတော့။ ဒီမှာ တံခါးကို လာမပိတ်ထားကြနဲ့"

ပစ္စည်းများ ဝေငှပေးပြီးသည်နှင့် တစ်ပြိုင်နက် အဘိုးအိုသည် သူတို့ကို လျစ်လျူရှုထားလိုက်လေသည်။ ဟွမ်ပုထုန်ကလည်း သူတို့ကို ထိုနေရာမှ ချက်ချင်း ခေါ်ဆောင်သွားလေ၏။

ထို့နောက် ဟွမ်ပုထုန်သည် သူတို့ကို မူလ ဘေးဘက်အခန်းများရှိရာ ဧရိယာသို့ခေါ်ဆောင်သွားပြီး တိတ်ဆိတ်သော အခန်းတစ်ခန်းကို ရှာဖွေကာ သူတို့အတွက် နေရာချထားပေးပြီး လမ်းညွှန်ပြသပေးခဲ့လေသည်။

တပည့်အရေအတွက် နည်းပါးခြင်းကလည်း နည်းပါးခြင်း၏ အားသာချက်တစ်ခု ရှိပေသည်။ အနည်းဆုံးတော့ သူတို့သည် ကြီးမားသော အိပ်ဆောင်ကြီးထဲတွင် ပြည့်ကျပ်စွာ စုပေါင်း အိပ်စက်ရခြင်းမျိုး မရှိတော့ပေ။

"နောက်ဆုံးအနေနဲ့ ကျင့်စဉ်တွေ ကျန်သေးတယ်"

ဟွမ်ပုထုန်သည် သူတို့ကို အခြားသော ဘေးဘက်ခန်းမဆောင် တစ်ခုဆီသို့ ခေါ်ဆောင်သွားလေ၏။ စီနီယာအစ်ကိုကြီး ဝမ် ဟုခေါ်သော အဘိုးအို ပေးလိုက်သည့် သက်သေခံ တိုကင်ပြားများကြောင့် လမ်းတစ်လျှောက်တွင် မည်သည့် အတားအဆီးနှင့်မျှ ထပ်မံ မကြုံတွေ့ရတော့ဘဲ ကျင့်ကြံခြင်းကျင့်စဉ်ခန်းမသို့ အလွယ်တကူ ရောက်ရှိသွားကြလေသည်။

"မင်းတို့အားလုံးက ဂိုဏ်းဝင်ခါစ တပည့်သစ်တွေပဲ။ ဝူတောက်တောင်ထိပ်ရဲ့ စည်းမျဉ်းတွေအရ မင်းတို့ ကျင့်စဉ်တစ်ခုကို အခမဲ့ ရွေးချယ်ခွင့် ရှိတယ်"

ကျင့်စဉ်ခန်းမ၏ အဝင်ဝတွင် ဟွမ်ပုထုန်သည် အတွင်းသို့ ဝင်ရောက်ခြင်း မပြုခဲ့ပေ။ ဤနေရာသို့ ဝင်ရောက်ရန် ငွေကြေးကုန်ကျလေသည်။

နတ်ဘုရားရေကန် မသေမျိုးဂိုဏ်းတွင် တန်ဖိုးအရှိဆုံးအရာမှာ တာဝန်များမှ ရရှိသော အမှတ်များ ပင် ဖြစ်သည်။ စားရေး၊ ဝတ်ရေး၊ နေရေးနှင့် ကျင့်ကြံရေး အားလုံးအတွက် ဤအမှတ်များ လိုအပ်ပေသည်။

ဟွမ်ပုထုန်၏ ကျင့်ကြံခြင်းမှာ တစ်ဆို့နေသည့် အခြေအနေသို့ မရောက်ရှိသေးသလို၊ သူ၏ လက်ရှိကျင့်စဉ်မှာလည်း သူ ကျင့်ကြံရန်အတွက် လုံလောက်နေပြီ ဖြစ်ရာ၊ သူသည် အမှတ်များကို အလဟဿ အကုန်ခံ၍ ဝင်ရောက်မည် မဟုတ်ပေ။

"ကျေးဇူးတင်ပါတယ် စီနီယာအစ်ကို"

ကျေးဇူးတင်စကား ဆိုပြီးနောက် ထိုလူအနည်းငယ်သည် ကျမ်းစာတိုက် အတွင်းသို့ ဝင်ရောက်သွားကြလေသည်။ သူတို့ ဝင်ရောက်သွားသည်နှင့် တစ်ပြိုင်နက် ကျမ်းစာတိုက်၏ အစီအရင်မှာ တောက်ပသွားလေသည်။

သူတို့၏ ကိုယ်ပေါ်ရှိ သက်သေခံ တိုကင်ပြားများကို ထောက်လှမ်းသိရှိပြီးနောက် အလင်းရောင်မှာ ပြန်လည် မှေးမှိန်သွားလေ၏။

"နောက်ဆုံးတော့ ငါ ကျင့်စဉ်တွေနဲ့ လက်လှမ်းမီသွားပြီ"

ချန်လော့သည် တိတ်တဆိတ် သက်ပြင်းတစ်ချက် ချလိုက်မိသည်။ ဤကမ္ဘာတွင် မွေးဖွားလာကြသော ဟွမ်ယင်းနှင့် အခြားသူများနှင့် မတူဘဲ ချန်လော့သည် ကျင့်ကြံခြင်းဆိုင်ရာ အခြေခံ အသိပညာ ဗဟုသုတများ အလွန် နည်းပါးလှပေသည်။

ယွဲ့နိုင်ငံ၏ ဂူသင်္ချိုင်းကြီးမှ သူ သင်ယူခဲ့ရသော အသိပညာများသည် ဤနေရာ၌ အလွန်ပင် ခေတ်နောက်ကျနေလေပြီ။ ဂူသင်္ချိုင်းကြီးမှ ရရှိခဲ့သော အမွေအနှစ်အများစုမှာ ရှေးဟောင်းနည်းလမ်းများ ဖြစ်ကြပြီး ကျင့်ကြံရာတွင် အန္တရာယ် ကြီးမားလှသဖြင့် ဤနေရာတွင် အခြေခံအားဖြင့် ဖယ်ရှားပစ်ခြင်းခံခဲ့ရပြီး ဖြစ်လေသည်။

"ဘယ်ဘက်က ဒုတိယမြောက် စာအုပ်စင်တန်းက အခြေခံအဆင့်ကျင့်စဉ်တွေ ထားတဲ့ နေရာပဲ။ ကိုယ့်ဟာကိုယ် ရွေးကြ၊ တစ်ယောက်ကို တစ်ခုပဲ ရွေးခွင့်ရှိတယ်"

စာအုပ်စင် နောက်ကွယ်မှ အသံတစ်သံ ထွက်ပေါ်လာလေ၏။ ထိုအခါမှသာ အစိမ်းရောင် ဝတ်ရုံဝတ်ဆင်ထားသော လူငယ်ကျင့်ကြံသူတစ်ဦး စာအုပ်စင်ဘေး၌ မည်သည့်အချိန်ကတည်းက ရောက်ရှိနေမှန်း မသိ ပေါ်လာကြောင်းကို လူတိုင်း သတိပြုမိသွားကြသည်။

ထိုသူသည် စာအုပ်တစ်အုပ်ကို ကိုင်ဆောင်ထားပြီး သူတို့ကို စကားပြောနေသည့်တိုင် ခေါင်းမော့မကြည့်ခဲ့ပေ။

"ဟုတ်ကဲ့ပါ"

လူအနည်းငယ်မှာ များစွာ မပြောရဲကြပေ။ မသေမျိုးဂိုဏ်းထဲသို့ ယခုမှ ဝင်ရောက်လာသော လူသစ်များအနေဖြင့် လူတိုင်းသည် သူတို့အတွက် မှန်းဆ၍ မရနိုင်လောက်အောင် နက်နဲနေပုံပေါ်လေသည်။

ထိုလူအနည်းငယ်သည် အစိမ်းရောင်ဝတ်ရုံနှင့် ကျင့်ကြံသူကို သတိထား၍ ကွေ့ပတ်သွားကာ အခြေခံအဆင့် ကျင့်စဉ်များရှိရာ နေရာတွင် ရပ်တန့်လိုက်ကြ၏။ လမ်းတစ်လျှောက်လုံး စိတ်လှုပ်ရှားမှုကို မြိုသိပ်ထားခဲ့ရသော ထိုလူစုသည် ကျင့်စဉ်များကို အလျင်အမြန် စတင် လေ့လာကြည့်ရှုကြလေတော့သည်။

အခြားသော တပည့်သစ် အများစုကဲ့သို့ပင် သူတို့အားလုံးသည် အထင်ကြီးလောက်စရာ အမည်နာမများရှိသော ကျင့်စဉ် လျှို့ဝှက်သိုင်းစာအုပ်များကို လိုက်လံ ကြည့်ရှုနေကြလေသည်။

ဥပမာအားဖြင့် ဟွမ်ယင်း ကိုင်ထားသော စာအုပ်မှာ မဟာတာအိုပညာရပ် ဟု အမည်ရသော အခြေခံအဆင့် ကျင့်စဉ်တစ်ခု ဖြစ်လေသည်။

ကျန်ရှိသော သုံးဦးမှာလည်း ထိုနည်းတူပင် ဖြစ်ပြီး လူတိုင်းက ဤစာအုပ်ပင်လယ်ကြီးထဲတွင် ရတနာတစ်ခုခုကို ရှာတွေ့နိုင်မည်ဟု ခံစားနေကြလေ၏။

ချန်လော့ကမူ ရွေးချယ်ရန် အလျင်မလိုခဲ့ပေ။

သူ၏ အစစ်အမှန် မသေမျိုးကျမ်း အခြေခံနှင့်ဆိုလျှင် သူသည် အခြေခံအသိပညာများကို ပို၍ပင် လေ့လာသင်ယူချင်နေလေသည်။ ထို့ကြောင့် သူသည် အခြားသူများကို ကျော်ဖြတ်သွားကာ အစွန်ဆုံးရှိ စာအုပ်ကို စတင် ကြည့်ရှုလိုက်လေ၏။

ဝင်ရောက်ကြည့်ရှုခွင့် ကန့်သတ်ချက်များကြောင့် သူတို့သည် စာအုပ်တစ်အုပ်ချင်းစီ၏ မျက်နှာဖုံးနှင့် မိတ်ဆက်အကျဉ်းချုပ်ကိုသာ မြင်တွေ့နိုင်လေသည်။

ချန်လော့ ကောက်ကိုင်လိုက်သော စာအုပ်၏ အမည်မှာ ကျင့်ကြံခြင်းပညာရပ် လေးခု ဟု အမည်ရပြီး ၎င်း၏ မိတ်ဆက်အကျဉ်းချုပ်တွင် တိုတောင်းသော စာကြောင်းတစ်ကြောင်းတည်းသာ ပါရှိလေသည်။

"ကျင့်ကြံခြင်းပညာရပ် လေးခု၏ အခြေခံ အသိပညာများ။ ၎င်းကို ဖတ်ရှုပြီးနောက် သင်သည် တစ်ပိုင်းတစ်စတတ်ကျွမ်းသော လိမ်လည်လှည့်ဖြားသူတစ်ဦးအဖြစ် သွားရောက် လုပ်ကိုင်နိုင်သည်"

"..."

ချန်လော့သည် စာအုပ်ကို မူလနေရာတွင် တိတ်ဆိတ်စွာ ပြန်ထားလိုက်လေ၏။ အခမဲ့ ရရှိသောတပည့်သစ်များအတွက် ပေးထားသည့် အရာဖြစ်သည့် အားလျော်စွာ လက်တွေ့အသုံးကျမည့် အကြောင်းအရာများ များများစားစား ပါဝင်မည်ဟု မျှော်လင့်၍ မရနိုင်ပေ။

"အခြေခံ ချီသန့်စင်ခြင်း ကျင့်စဉ်"

ချန်လော့၏ လက်မှာ ခေတ္တရပ်တန့်သွားပြီး အနီးရှိ အခြားစာအုပ်တစ်အုပ်ကို ဆွဲထုတ်လိုက်လေ၏။

"သာမန် ချီသန့်စင်ခြင်း နည်းလမ်း၊ ချီသန့်စင်ခြင်း အလယ်အလတ်အဆင့်အထိ ကျင့်ကြံရန် မှတ်သားထားပါ"

လျှို့ဝှက်ကျင့်စဉ်ကို အောက်ချထားလိုက်ပြီးနောက် ချန်လော့သည် အခြားစာအုပ်များကို အကဲခတ်ကြည့်လိုက်သည်။ ဟွမ်ယင်းနှင့် အခြားသူများ ကိုင်ထားသော စာအုပ်များကိုပါ ငှားရမ်း၍ ကြည့်ရှုခဲ့လေသည်။

စာအုပ်စင်ကြီးမှာ အလွန်ကြီးမားပုံရသော်လည်း သူတို့ ကြည့်ရှုခွင့်ရှိသော လျှို့ဝှက်သိုင်းစာအုပ်များမှာ အလွန် နည်းပါးလှပြီး စုစုပေါင်း အုပ်နှစ်ဆယ်ခန့်သာ ရှိလေသည်။

ချန်လော့၏ စိတ်စွမ်းရည်ဖြင့်ဆိုလျှင် သူသည် ထိုစာအုပ် အုပ်နှစ်ဆယ်ခန့်ကို အလျင်အမြန်ပင် ဖတ်ရှုပြီးစီးသွားလေသည်။ နောက်ဆုံးတွင် သူသည် မူလနေရာသို့ ပြန်လည်ရောက်ရှိလာပြီး အခြေခံ ချီသန့်စင်ခြင်း ကျင့်စဉ်စာအုပ်ကို ထပ်မံ ကောက်ကိုင်လိုက်လေ၏။

"မင်းတို့အားလုံး ရွေးချယ်ပြီးကြပြီလား"

သူတို့အဖွဲ့၏ နောက်ကျောဘက်မှ အသံတစ်သံ ထွက်ပေါ်လာလေသည်။ စောစောက စာအုပ်စင်ဘေးတွင် စာဖတ်နေသော အစိမ်းရောင်ဝတ်ရုံနှင့် ကျင့်ကြံသူသည် မည်သည့်အချိန်ကတည်းက သူတို့၏ နောက်တွင် ရောက်ရှိနေမှန်း မသိ ပေါ်လာလေသည်။

ထိုသူသည် အလွန်ငယ်ရွယ်ပုံရပြီး အသက် နှစ်ဆယ်ခန့်သာ ရှိမည်ဟု ခန့်မှန်းရသည်။ ရေကန်တစ်ခုကဲ့သို့ နက်ရှိုင်းသော အနက်ရောင် မျက်လုံးများ ရှိပြီး၊ သူ၏ အသားအရေမှာ နေရောင်ခြည်နှင့် ကာလကြာရှည်စွာ မထိတွေ့ခဲ့ရသကဲ့သို့ အနည်းငယ် ဖြူဖျော့နေလေသည်။

"ဟုတ်ကဲ့၊ ရွေးပြီးပါပြီ"

လူအနည်းငယ်က အလျင်အမြန် ပြန်လည်ဖြေကြားလိုက်ကြ၏။ အခမဲ့ ရရှိသော အခြေခံအဆင့်ကျင့်စဉ်များမှာ အလွန်နည်းပါးလွန်းလှရာ ရွေးချယ်စရာ များများစားစား မရှိပေ။

ထို့အပြင် နောက်ပိုင်းတွင် သူတို့အနေဖြင့် မလွဲမသွေ ပြောင်းလဲ ကျင့်ကြံရဦးမည် ဖြစ်လေသည်။

"ကောင်းပြီ"

အစိမ်းရောင်ဝတ်ရုံနှင့် ကျင့်ကြံသူသည် လက်ကို ဆန့်ထုတ်ကာ သူတို့အဖွဲ့ကို လက်ညှိုးထိုးလိုက်လေ၏။ သူ၏ လှုပ်ရှားမှုမှာ အလွန် နှေးကွေးလွန်းလှသော်လည်း ထူးဆန်းစွာပင် ချန်လော့ အပါအဝင် ထိုနေရာရှိ မည်သူကမျှ ရှောင်တိမ်းနိုင်ခြင်း မရှိခဲ့ပေ။

သူ၏ လက်ညှိုးသည် သူတို့၏ နဖူးများကို ထိမိသွားပြီးအလင်းစက်တစ်ခုက သူတို့၏ စိတ်အာရုံထဲသို့ ပေါင်းစပ် ဝင်ရောက်သွားလေသည်။

သူတို့ ကိုင်ဆောင်ထားသော စာအုပ်များသည် လျင်မြန်စွာအရည်ပျော်သွားပြီး စာမျက်နှာများထဲမှ အစိမ်းရောင် အလင်းတန်းတစ်ခု ထွက်ပေါ်လာကာ အစိမ်းရောင်ဝတ်ရုံနှင့် ကျင့်ကြံသူ၏ လက်ညှိုးနှင့်အတူ သူတို့၏ စိတ်အာရုံထဲသို့ ပေါင်းစပ် ဝင်ရောက်သွားလေတော့သည်။

"ကျင့်စဉ်တွေကို မင်းတို့ဆီလက်ဆင့်ကမ်း ပေးပြီးသွားပြီ။ ပြန်သွားပြီးတော့ အကြောင်းအရာတွေကို ကိုယ့်ဟာကိုယ် ဖတ်ကြတော့။ ကဲ... အခု မင်းတို့အားလုံး ထွက်သွားကြတော့"

စကားပြောပြီးနောက် အစိမ်းရောင်ဝတ်ရုံနှင့် ကျင့်ကြံသူသည် သူတို့၏ တုံ့ပြန်မှုကို စောင့်ဆိုင်းမနေခဲ့ပေ။ သူသည် လက်စကို တစ်ချက် ဝှေ့ယမ်းလိုက်ရုံမျှဖြင့် သူတို့၏ ခြေအောက်မှ လေဆင်နှာမောင်းတစ်ခု ထွက်ပေါ်လာကာ ထိုလူအနည်းငယ်ကို ပင်မတံခါးပေါက် အပြင်ဘက်သို့ တိုက်ရိုက် လွင့်ထွက်သွားစေတော့သည်။

အခန်း ၇၈ - အခြေခံ ချီသန့်စင်ခြင်း ကျင့်စဉ်

"ဒီလောက်ကြီးတော့ အရမ်းလွန်လွန်းနေပြီ..."

ဟွမ်ယင်းသည် အနည်းငယ် စိတ်အနှောင့်အယှက် ဖြစ်နေလေသည်။ သူမသည် လူများကို အမှိုက်သဖွယ်ပစ်ပေါက်လိုက်သည်ကို တစ်ခါမျှ မမြင်ဖူးခဲ့ပေ။

အကယ်၍ ဤနေရာသည် လောကီကမ္ဘာတွင်သာဆိုလျှင် သူမအနေဖြင့် လူများကို ခုတ်ထစ်ပစ်ရန် ဓားကိုပင် ဆွဲထုတ်ပြီးလောက်ပြီဟု သူမကိုယ်သူမ တွေးထင်မိလေသည်။

"မင်းတို့ရဲ့ ကျင့်စဉ်တွေကို ရွေးချယ်ပြီးပြီဆိုရင် ပြန်ကြစို့။"

အပြင်ဘက်တွင် အချိန်အတော်ကြာ စောင့်ဆိုင်းနေခဲ့ရသော ဟွမ်ပုထုန်မှာ အနည်းငယ် စိတ်မရှည်ဖြစ်နေပြီ ဖြစ်၏။ ၎င်းတို့ ထွက်လာသည်ကို မြင်သောအခါ သူသည် ချက်ချင်းပင် လှည့်၍ လာရာလမ်းအတိုင်း ပြန်လျှောက်သွားလေတော့သည်။

ဤအချိန်ကုန်လွန်သွားပြီးနောက် သူ၏တာဝန်မှာ ပြီးမြောက်သွားပြီဟု မှတ်ယူရမည် ဖြစ်ပေသည်။

ကျန်ရှိနေသည်များမှာ ၎င်းတို့၏ တစ်ဦးချင်း ကျင့်ကြံမှုများသာ ဖြစ်လေတော့မည်။

ဘေးအခန်းသို့ ပြန်ရောက်သောအခါ နေ့လယ်ပိုင်းပင် ကျော်လွန်နေပြီ ဖြစ်၏။

အချင်းချင်း နှုတ်ဆက်ပြီးနောက် ထိုအဖွဲ့သည် ၎င်းတို့၏ အခန်းအသီးသီးသို့ ပြန်သွားကြလေ၏။

ချန်လော့သည် သူ၏အခန်းသို့ ပြန်လာပြီး တံခါးကို ပိတ်လိုက်၏။ သူသည် အခြေခံ ချီသန့်စင်ခြင်း ကျင့်စဉ်ကို ချက်ချင်း နားလည်သဘောပေါက်ရန် မကြိုးစားသေးပေ။

ယင်းအစား ပုံမှန်အတိုင်းပင် သူ၏ ချီသန့်စင်ခြင်းကို မပျက်မကွက် စတင်လုပ်ဆောင်လိုက်လေသည်။

အချိန်အတော်ကြာပြီးနောက် စိတ်ဝိညာဉ်ချီ မှာ သန့်စင်သွားလေသည်။

သူ၏ ကျင့်ကြံခြင်းသည် အနည်းငယ် တိုးတက်လာပြီး သူ၏ ဝန်းကျင်ရှိ အငွေ့အသက်မှာလည်း တည်ငြိမ်သွား၏။

သူသည် ချီသန့်စင်ခြင်း ဒုတိယအဆင့် တွင်သာ ရှိနေသေး၏။

သို့သော်လည်း သူသည် နောက်ထပ် ခြေလှမ်းတစ်လှမ်း ရှေ့သို့ တိုးနိုင်ခဲ့ပြီ ဖြစ်ပေသည်။

ဤကဲ့သို့ မျက်မြင်ကိုယ်တွေ့ ပိုမို အားကောင်းလာသည်ဟူသော ခံစားချက်မျိုးသည် ယွဲ့နိုင်ငံ၏ ဂူသင်္ချိုင်းကြီးတွင် လုံးဝ မရရှိနိုင်သည့် အရာပင် ဖြစ်ပေသည်။

"ဒီနေရာက ချီသန့်စင်ခြင်း ကျင့်စဉ်ကို ဘယ်လို ကျင့်ကြံရမလဲဆိုတာ ကြည့်ရအောင်။"

တင်ပလ္လင်‌ထိုင်ရင်း ချန်လော့သည် သူ၏ စိတ်ထဲတွင် ပေါင်းစပ်သွားခဲ့သော အခြေခံ ချီသန့်စင်ခြင်း ကျင့်စဉ်ကို စတင် ပြန်လည်အောက်မေ့လိုက်လေသည်။

သူ တွေးလိုက်သည်နှင့် သူ၏ စိတ်ထဲတွင် အပြာရောင်အလင်းတန်းတစ်ခု ရုတ်တရက် ပေါက်ကွဲထွက်လာ၏။

ချန်လော့သည် ခဏတာမျှ မိန်းမောတွေဝေသွားသလို ခံစားလိုက်ရပြီး သူ၏ မျက်လုံးများကို ပြန်ဖွင့်လိုက်သောအခါ ဟင်းလင်းပြင်နေရာလပ်တစ်ခုအတွင်းသို့ ရောက်ရှိနေပြီး အလင်းစက်လေးများကဲ့သို့သော စာလုံးမြောက်မြားစွာသည် ထိုနေရာတွင် လွင့်မျောနေသည်ကို တွေ့လိုက်ရလေသည်။

သူသည် ထိုအလင်းစက်စာလုံးများ၏ အကြောင်းအရာကို သေချာစွာ စစ်ဆေးကြည့်ရှုရန်အတွက် ခြေလှမ်းလှမ်းရန် ပြင်လိုက်၏။

သို့သော်လည်း သူ ခြေတစ်လှမ်း လှမ်းလိုက်သည်နှင့် တစ်ပြိုင်နက် ပတ်ဝန်းကျင်ရှိ မြင်ကွင်းမှာ သိသိသာသာ ပြောင်းလဲသွားလေတော့သည်။

သူ သတိပြန်ဝင်လာသောအခါ မြက်ခင်းပြင်တစ်ခုပေါ်တွင် ထိုင်နေလျက်သား ဖြစ်နေသည်ကို တွေ့လိုက်ရလေ၏။

သူ၏ အရှေ့တွင် ငယ်ရွယ်သော ချီသန့်စင်ခြင်း ကျင့်ကြံသူတစ်တန်း ထိုင်နေကြပြီး၊ ပို၍ ရှေ့ရောက်သော အမြင့်စင်မြင့်တစ်ခုပေါ်တွင် အဖြူရောင်ဝတ်ရုံဝတ်ဆင်ထားသော အဘိုးအိုတစ်ဦးက အခြေခံ ချီသန့်စင်ခြင်း ကျင့်စဉ်နှင့် ပတ်သက်သော ဗဟုသုတများကို ရှင်းလင်းသင်ကြားပေးနေလေသည်။

သဘာဝကျပြီး ကြည်လင်သန့်စင်သော ခံစားချက်တစ်ခုက သူ၏ ခန္ဓာကိုယ်ကို လွှမ်းခြုံထား၏။ လိပ်ပြာများပျံဝဲနေပြီး ပန်းရနံ့များက လေထုထဲတွင် ပျံ့နှံ့နေကာ မသေမျိုးနယ်မြေတစ်ခုထဲသို့ ရောက်ရှိနေသကဲ့သို့ပင် ဖြစ်ပေသည်။

"တာအိုကို သင်ကြားပေးတဲ့ ဒီနည်းလမ်းက တကယ့်ကို နက်နဲသိမ်မွေ့တာပဲ။"

ချန်လော့သည် သူ၏ဘေးရှိ တပည့်များ၏ ပုံရိပ်ယောင်များနှင့် အထက်တွင် စာသင်ကြားပေးနေသော အဘိုးအိုကို ကြည့်လိုက်၏။ တစ်ဖက်လူမှာ အစစ်အမှန် လူတစ်ဦးမဟုတ်ဘဲ ပုံရိပ်တစ်ခုသာ ဖြစ်ကြောင်း သူ ရှင်းလင်းစွာ ခံစားသိရှိနိုင်ပေသည်။

ဤပုံရိပ်သည် အတိတ်က ဖြစ်ရပ်များကို မှတ်တမ်းတင်ထားခြင်း ဖြစ်ပေသည်။ အခြေခံ ချီသန့်စင်ခြင်း ကျင့်စဉ်သည် ဤမြင်ကွင်းကို မှတ်တမ်းတင်ထားသော စာအုပ်တစ်အုပ်ဖြစ်ပြီး ဤနည်းလမ်းဖြင့်ကျင့်စဉ်ကို လက်ဆင့်ကမ်း သင်ကြားပေးခြင်း ဖြစ်လေသည်။

စာအုပ်တစ်အုပ်တွင် စာသားများ ပါရှိရန် မလိုအပ်ပေ။

ကျင့်စဉ်အမွေအနှစ်များဆိုလျှင် ပို၍ပင် မှန်ကန်လှပေသည်။

ကံမကောင်းစွာဖြင့် အထက်မှ အဘိုးအို၏ ပြောစကားများမှာ အလွန်နက်နဲလွန်းလှသဖြင့် အလွန်သေးငယ်သော အစိတ်အပိုင်းကိုသာ နားလည်နိုင်ပေသည်။

အဖြူရောင်ဝတ်ရုံနှင့် အဘိုးအိုသည် အလွန်အဟောအပြောကောင်းစွာဖြင့် ရှင်းပြနေသော်လည်း နောက်ဆုံး ပုံရိပ်ပျက်ကွဲသွားသည့် အချိန်အထိ ချန်လော့သည် အစိတ်အပိုင်း အနည်းငယ်ကိုသာ နားလည်ခဲ့ပြီး အသေးစိတ် အပိုင်းများမှာမူ ပုံရိပ် ပျက်ကွဲသွားပြီးနောက် အလိုအလျောက် မေ့ပျောက်သွားလေတော့သည်။

ဤသည်မှာ စတင်လေ့လာသူတိုင်း ကြုံတွေ့ရလေ့ရှိသည့် ပြဿနာတစ်ခု ဖြစ်ကောင်းဖြစ်နိုင်ပေသည်။ မသေမျိုးလမ်းစဉ် ဆိုသည်မှာ ရရှိရန် ခက်ခဲလှ၏။

ကျင့်စဉ်တစ်ခုကို တစ်ကြိမ် နားထောင်ရုံဖြင့် သင်ယူနိုင်သူဆိုသည်မှာ နှစ်ပေါင်းသောင်းချီ၍မှ တစ်ကြိမ်သာတွေ့ရခဲသော ပြိုင်ဘက်ကင်း ပါရမီရှင်တစ်ဦးသာ ဖြစ်ပေလိမ့်မည်။

မျက်စိကို ဖွင့်လိုက်ပြီးနောက် ချန်လော့သည် သူ ယခုလေးတင် သင်ယူခဲ့သော အပိုင်းများကို ပြန်လည်အောက်မေ့လိုက်လေ၏။

သူ တွေးလိုက်သည်နှင့် သင်ယူခဲ့သော အကြောင်းအရာများသည် သူ၏ စိတ်ထဲတွင် တဖြည်းဖြည်း စွဲထင်လာလေသည်။ မေ့ပျောက်သွားသောအပိုင်းများကိုလည်း အလောင်းခြောက်ဦးနှောက်က ပြန်လည် မှတ်မိပေးလေသည်။

တစ်ကြိမ် နားထောင်ရုံဖြင့် သင်ယူနိုင်သူဆိုသည်မှာ အမှန်တကယ်ပင် နှစ်ပေါင်းသောင်းချီ၍မှ တစ်ကြိမ်သာ တွေ့ရခဲသော ပါရမီရှင်တစ်ဦး ဖြစ်ပေသည်။

ချန်လော့သည် ထိုသို့သော ပါရမီရှင်မျိုး မဟုတ်သော်လည်း သူ့တွင် ပြင်ပအလောင်းခြောက်ဦးနှောက်တစ်ခု ရှိနေလေ၏။

အလောင်းခြောက်ဦးနှောက်၏ အကူအညီဖြင့် အပြည့်အစုံရှိသော အမွေအနှစ်သည် ချန်လော့၏ စိတ်ထဲတွင် ပေါ်လာလေတော့သည်။

'ဝိညာဉ်အမြစ် အားလုံးရဲ့ချီသန့်စင်ခြင်း နည်းလမ်းတွေ၊ ရွှေ ဝိညာဉ်အမြစ် ကျင့်ကြံခြင်းတွေမှာ ဂရုပြုသင့်တာကတော့...'

အကြောင်းအရာမှာ စာအုပ်၏ ခေါင်းစဉ်ကဲ့သို့ပင် အခြေခံကျလှပေသည်။ ဒြပ်စင်ငါးပါး ဝိညာဉ်အမြစ်မှစ၍ ဝိညာဉ်ငါးပါး ဝိညာဉ်အမြစ်အထိ ဝိညာဉ်အမြစ် တစ်ခုချင်းစီအတွက် ချီသန့်စင်ခြင်း နည်းလမ်းများကို အသေးစိတ် မှတ်တမ်းတင်ထားလေ၏။

ကျင့်ကြံခြင်းလောကတွင်...

အခြေခံအကျဆုံး ဝိညာဉ်အမြစ်များမှာ ဒြပ်စင်ငါးပါး ဝိညာဉ်အမြစ်များဖြစ်သော သတ္တု၊ သစ်သား၊ ရေ၊ မီး၊ မြေ တို့ ဖြစ်ကြသည်။ ဒြပ်စင်ငါးပါး ဝိညာဉ်အမြစ်များ၏ စွမ်းအားသည် လောကရှိ စွမ်းအားအားလုံးကို လွှမ်းခြုံထားပြီး ကျင့်ကြံခြင်း တာအို၏ အခြေခံအုတ်မြစ်ဖြစ်ပေသည်။

ရှေးခေတ်ကာလက ကျင့်ကြံသူများ၏ ဝိညာဉ်အမြစ် ခွဲခြားမှုတွင် ဒြပ်စင်ငါးပါးသာ ပါဝင်ခဲ့လေ၏။

ဝိညာဉ်ငါးပါး ကျင့်ကြံခြင်း နည်းလမ်းကို နောက်ပိုင်းမှသာ အကျဉ်းချုံး မှတ်တမ်းတင်ခဲ့ခြင်း ဖြစ်သည်။ ဝိညာဉ်ငါးပါး ဆိုသည်မှာ ရေ၊ မီး၊ မိုးကြိုး၊ လေ၊ မြေ တို့ကို ရည်ညွှန်းခြင်း ဖြစ်သည်။

၎င်းအသွင်သတ္တိများထဲမှ သုံးခုမှာ ဒြပ်စင်ငါးပါးနှင့် တူညီသော်လည်း တိကျသော အသေးစိတ် အချက်အလက်များတွင် ကွာခြားချက်များ ရှိလေသည်။

ဝိညာဉ်ငါးပါး ဒဏ္ဍာရီနှင့် ပတ်သက်သည့် ရှေးအကျဆုံး မှတ်တမ်းမှာ ကောင်းကင်ဖာထေးခြင်း ကျမ်းစာဖြစ်ပြီး ထိုကျမ်းစာထဲတွင် စွမ်းအားကြီးမားသော ပုဂ္ဂိုလ်ကြီးတစ်ဦးသည် ဝိညာဉ်ငါးပါး မန္တန်ကို အသုံးပြု၍ အရောင်ငါးမျိုးရှိသော ကျောက်တုံးများကို သန့်စင်ကာ ကောင်းကင်ပြိုကျမည့် ဘေးအန္တရာယ်ကို တားဆီးခဲ့ကြောင်း ပါရှိလေသည်။

ထိုအရောင်ငါးမျိုးရှိသော ကျောက်တုံးများ၏ အခြေခံဂုဏ်သတ္တိများမှာ ရေ၊ မီး၊ မိုးကြိုး၊ လေ၊ မြေ တို့ ဖြစ်ကြသည်။

အစောဆုံး ဝိညာဉ်ငါးပါး ကျင့်ကြံသူများအုပ်စုမှာ ထိုအရောင်ငါးမျိုးရှိသော ကျောက်တုံးများကို သန့်စင်ရာတွင် ကူညီပေးခဲ့ကြသော ချီသန့်စင်ခြင်း ကျင့်ကြံသူများ ဖြစ်ကြပေသည်။

"ငါ့ရဲ့ လက်ရှိ ဂုဏ်သတ္တိ ဝိညာဉ်အမြစ်တွေက ရေ၊ သစ်သား နဲ့ မိုးကြိုး ဖြစ်တယ်။ ငါ့အတွက် အသင့်တော်ဆုံးကတော့ ဒြပ်စင်ငါးပါးချီသန့်စင်ခြင်း ပဲ ဖြစ်သင့်တယ်။"

ဗဟုသုတများကို စုစည်းပြီးနောက် ချန်လော့၏ စိတ်ထဲတွင် သူ့အတွက် သင့်တော်မည့် လမ်းစဉ်နှင့် ပတ်သက်၍ ပိုမို ရှင်းလင်းသော နားလည်မှုတစ်ခု ရရှိလာလေသည်။

သူသည် ရေနှင့် သစ်သားနှင့် သက်ဆိုင်သော ချီသန့်စင်ခြင်း နည်းလမ်းများဖြင့် စတင်မည်ဖြစ်ပြီး၊ ထို့နောက် နောက်ပိုင်းအဆင့်တွင် မိုးကြိုး မန္တန်များ ကို ကျင့်ကြံမည် ဖြစ်ပေသည်။

သာမန် ဝိညာဉ်အမြစ် သုံးမျိုးရှိသော ကျင့်ကြံသူတစ်ဦးသည် သေချာပေါက် ၎င်းတို့ထဲမှ တစ်ခုကိုသာ ကျင့်ကြံမည် ဖြစ်သည်။ အကြောင်းမှာ လူတစ်ဦး၏ စွမ်းအင်မှာ အကန့်အသတ် ရှိသောကြောင့် ဖြစ်၏။

သို့သော်လည်း ချန်လော့အတွက်မူ ဤပြဿနာ မရှိပေ။ သူ၏ ပြင်ပ အလောင်းခြောက်ဦးနှောက်၏ အကူအညီဖြင့် သူသည် ၎င်းတို့အားလုံးကို ပိုင်ဆိုင်နိုင်ပေသည်။

နောက်တစ်လခန့် အကြာတွင် ချန်လော့သည် ဝူတောက် တောင်ထွတ်၏ ဘဝနှင့် တဖြည်းဖြည်း အသားကျလာလေ၏။

ဟွမ်ယင်းနှင့် သူနှင့်အတူ ဝင်ရောက်လာကြသော အခြားသူများသည်လည်း ဝူတောက် တောင်ထွတ်နှင့် ပေါင်းစည်းသွားကြပြီး စီနီယာအစ်ကို၊ စီနီယာအစ်မများစွာနှင့် ရင်းနှီးကျွမ်းဝင်လာကာ ၎င်းတို့၏ ကိုယ်ပိုင်အဆက်အသွယ် ကွန်ရက်တစ်ခုကို စတင်တည်ဆောက်လာကြလေသည်။

၎င်းတို့နှင့် နှိုင်းယှဉ်ပါက ချန်လော့မှာ ပွင့်လင်းမြင်သာသော လူငယ်လေးတစ်ဦးနှင့် တူလှပေ၏။ နံနက်ပိုင်းတွင် သူသည် ဝူတောက် တောင်ထွတ်သို့ သွားရောက်ကာ တာအိုဟောပြောမှုများကို နားထောင်ပြီး၊ မွန်းလွဲပိုင်းတွင် ကျမ်းစာတိုက်သို့ သွားရောက်ကာ အခမဲ့ ဖတ်ရှုခွင့်ရသော စာအုပ်များကို ဖတ်ရှုလေ့လာလေသည်။

ဆေးလုံးများ ၊ အဆောင်များ၊ အစီအရင်များ ၊ လက်နက်သန့်စင်ခြင်း ၊ ကု ပညာရပ်များ၊ သားရဲထိန်းချုပ်ခြင်း စသည်ဖြင့်။ ကျမ်းစာတိုက်အတွင်း၌ သူ ဖတ်ရှုနိုင်သော စာအုပ်ဖြစ်သရွေ့ သူသည် မည်သည့်စာအုပ်ကိုမျှ ငြင်းပယ်ခြင်းမရှိဘဲ လက်ခံလေ့လာခဲ့လေသည်။

ဤဗဟုသုတများကို ဖြည့်ဆည်းလိုက်ခြင်းဖြင့် ချန်လော့၏ကျင့်ကြံခြင်းဆိုင်ရာ အခြေခံဗဟုသုတမှာ ဤလောက၏ အဆင့်အတန်းနှင့် အလျင်အမြန်ပင် တန်းတူဖြစ်လာခဲ့လေသည်။

ထိုအချိန်တွင်ပင် နတ်ဘုရားရေကန် မသေမျိုးဂိုဏ်း၏ အဓိက တောင်ထွတ် ဆယ်ခု၏ ခွဲခြားသတ်မှတ်မှုများကို သူ နားလည်သဘောပေါက်သွားခဲ့လေသည်။

၎င်းတို့၏ ဝူတောက် တောင်ထွတ်မှာ အဆင့်ခုနစ် နေရာတွင် ရှိပြီး စိတ်ပညာတာအိုနည်းစနစ် ကို အဓိကထား ကျင့်ကြံရလေသည်။

ဤတာအိုနည်းလမ်းများသည် ဝိညာဉ်အမြစ် ဂုဏ်သတ္တိများကို ဂရုမစိုက်ဘဲ နားလည်သဘောပေါက်နိုင်စွမ်းကိုသာ အဓိကထားလေသည်။ ၎င်းတို့၏ မန္တန်များ နှင့် နတ်ဘုရားစွမ်းရည်များသည်လည်း အခြားသော အဓိက တောင်ထွတ်များထက် များစွာ ပိုမိုစိတ်ကူးယဉ်ဆန်လှပေသည်။

ဂိုဏ်းသို့ ဝင်ရောက်စဉ်က ချန်လော့ ရွေးချယ်ခဲ့သော အခြေခံ ချီသန့်စင်ခြင်း ကျင့်စဉ်တွင် စိတ်ပညာတာအိုနည်းစနစ်များ၏ အနှစ်ချုပ် ပါဝင်ပြီး၊ ၎င်းတွင် အိပ်မက်ထဲသို့ ဝင်ရောက်ခြင်း ဟုခေါ်သော ရိုးရှင်းသည့် မန္တန်ငယ်လေးတစ်ခုလည်း ပါဝင်လေသည်။

အိပ်မက်ထဲသို့ ဝင်ရောက်ခြင်း သည် ဝူတောက် တောင်ထွတ်ရှိ တပည့်များအားလုံး တတ်ကျွမ်းသော နတ်ဘုရားစွမ်းရည်တစ်ခု ဖြစ်ပြီး၊ နောက်ပိုင်းတွင်စွမ်းအားကြီးမားသော တိုက်ခိုက်ရေး နတ်ဘုရားစွမ်းရည်များစွာသည် အိပ်မက်ထဲသို့ ဝင်ရောက်ခြင်း၏ ပြောင်းလဲမှုများပင် ဖြစ်ပေသည်။

သေချာသည်မှာ အခြေခံအကျဆုံးအရာသည် ချီသန့်စင်ခြင်း အဆင့် သာ ဖြစ်လေသည်။

အခမဲ့ သင်ယူခဲ့ရသော အခြေခံ ချီသန့်စင်ခြင်း ကျင့်စဉ်အပြင်၊ ချန်လော့သည် ကျင့်စဉ်များ သင်ကြားပေးသော စီနီယာအစ်ကိုထံမှ ဝူရှန်း ကျွယ် တစ်ခုကိုလည်း သင်ယူခဲ့လေသည်။ ၎င်းသည် ဝူတောက် တောင်ထွတ်၏ အဓိက ကျင့်စဉ် ဖြစ်ပေသည်။

ထိုကျင့်စဉ်ကို နားထောင်ရုံမျှဖြင့် သူသည် လဝက်ခန့် အချိန်ယူခဲ့ရလေ၏။

ထိုကျင့်စဉ်တွင် ပထမသုံးဆင့်သာ ပါဝင်ပြီး၊ ချီသန့်စင်ခြင်း အလယ်အလတ်အဆင့် အထိသာ ကျင့်ကြံနိုင်ပေသည်။

နောက်ပိုင်းအပိုင်းများကိုမူ တာဝန်များထမ်းဆောင်၍ ရရှိသော အမှတ်များဖြင့် လဲလှယ်ရမည် ဖြစ်သည်။

ထို့ကြောင့်ပင် အစပိုင်း၌ ဂိုဏ်းသို့ ဝင်ရောက်လာသောအဓိက တောင်ထွတ်များမှ တပည့်များအားလုံးသည် တာဝန်များကို ထမ်းဆောင်ရန် အလုပ်ရှုပ်နေကြခြင်း ဖြစ်ပေသည်။

နတ်ဘုရားရေကန် မသေမျိုးဂိုဏ်းတွင် အရာအားလုံးကို တာဝန်ရမှတ်များဖြင့် လဲလှယ်ရမည် ဖြစ်လေသည်။

ချန်လော့သည် လူသစ်တစ်ဦး ဖြစ်နေသေးပြီး သုံးလကြာအကာအကွယ်ပေးသည့် ကာလကို မကျော်လွန်သေးပေ။

သုံးလကြာပြီးနောက် သူ၏ ခံစားခွင့်များမှာ သာမန်တပည့်များနှင့် အတူတူပင် ဖြစ်သွားမည် ဖြစ်သည်။ ထိုအချိန်တွင် အကယ်၍ သူသည် ကျင့်ကြံခြင်းလမ်းစဉ်တွင် ဆက်လက် လျှောက်လှမ်းလိုပါက အခြားသော တပည့်များကဲ့သို့ပင် နတ်ဘုရားရေကန် မသေမျိုးဂိုဏ်းဟူသော အဖွဲ့အစည်းအတွက် အလုပ်အကျွေးပြုရမည် ဖြစ်ပေသည်။

ဤသည်မှာလည်း နတ်ဘုရားရေကန် မသေမျိုးဂိုဏ်း၏ ပုံသေလည်ပတ်မှုပင် ဖြစ်လေသည်။

'အဆောင်ရေးဆွဲခြင်း အခြေခံတွေကိုတော့ သင်ယူပြီးပြီ၊ အခြေခံ အဆောင်တွေကို စမ်းရေးကြည့်လို့ ရပြီ။'

'အစီအရင် အခြေခံတွေကတော့ ကောင်းကင်ဘုံ ကိုးထပ်လိုအပ်နေသေးတယ်။'

'ဆေးဖော်စပ်ခြင်း တိုးတက်မှုကတော့ နှေးကွေးတယ်။ ဆေးပညာ သီအိုရီပေါင်းစပ်မှုတွေမှာ ကွာခြားချက်တွေ အများကြီးရှိပြီး ဆေးဖော်စပ်ဖို့ စတင်တဲ့အခါ မီးဖိုပေါက်ကွဲနိုင်ခြေက အရမ်းကို မြင့်မားတယ်။'

'အိပ်မက်ထဲသို့ ဝင်ရောက်ခြင်း ကိုတော့ ကျွမ်းကျင်သွားပြီ။'

သူ၏ စိတ်ထဲတွင် ပြင်ပ အလောင်းခြောက်ဦးနှောက်တစ်ခုပြီးတစ်ခုက တုံ့ပြန်ချက်များ ပေးပို့လာလေ၏။ ဤကာလအတွင်း ချန်လော့သည် ပြင်ပ အလောင်းခြောက်ဦးနှောက်နှင့် တစ်ခုစီတိုင်းကို တာဝန်တစ်ခုစီ ခွဲဝေပေးထားခဲ့သည်။

၎င်းတို့၏ မတူညီသော ပါရမီစွမ်းရည်များအရ ခွဲဝေပေးထားသော တာဝန်များမှာလည်း ကွဲပြားခြားနားလေ၏။ အချို့သော ဦးနှောက်များကို အစီအရင်များ လေ့လာရန် တာဝန်ပေးထားပြီး၊ အချို့ကိုမူ အဆောင်များ လေ့လာရန် တာဝန်ပေးထားလေသည်။

ပါရမီစွမ်းရည် ကွာခြားမှုများသည် ကျင့်ကြံခြင်းနှင့် သက်ဆိုင်သော ကိစ္စရပ်များတွင် ပို၍ပင် သိသာထင်ရှားလာလေသည်။

တူညီသော ပြင်ပဦးနှောက်များသည်ပင် တိုးတက်မှု မတူညီကြပေ။ အချို့သည် ၎င်းတို့၏ တာဝန်များကိုတစ်ရက်အတွင်း အပြီးသတ်နိုင်ခဲ့သော်လည်း အချို့မှာမူ မည်သည့်နေရာမှ စတင်ရမည်ကိုပင် မသိကြသေးပေ။

ယေဘုယျအားဖြင့် တိုးတက်မှုမှာ အတော်လေး ကောင်းမွန်လှပေ၏။

ဤပြင်ပဦးနှောက်များသည် ဤနေရာရှိ ကျင့်ကြံခြင်းလောက၏ အခြေခံဗဟုသုတများကို သူ အလျင်အမြန်သင်ယူနိုင်ရန် များစွာ အထောက်အကူ ပြုခဲ့ကြပေသည်။