အခန်း (၁၆၃၉-၁၆၄၁)

အခန်း (၁၆၃၉) ကြယ်ကြွေကောင်းကင်ဂိုဏ်း

“ကျွန်တော့်ကို သက်သေခံအထောက်အထားတစ်ခုလောက် ထုတ်ပေးစေချင်ပါတယ်” ချူးယွင်ဖန်းသည် ခဏမျှ စဉ်းစားပြီးနောက် ပြောလိုက်သည်။

သခင်ကြီးယီသည် မျက်မှောင်ကြုတ်လိုက်သည်။ ချူးယွင်ဖန်းက ဤကဲ့သို့ တောင်းဆိုလာလိမ့်မည်ဟု သူ မမျှော်လင့်ထားပေ။ သို့သော် သူ စကားဆက်မပြောမီ ဧည့်ခန်းအပြင်ဘက်မှ ရုတ်တရက် အသံတစ်သံ ထွက်ပေါ်လာသည်။

“ယီမိသားစုဆီကနေ သက်သေခံအထောက်အထား လိုချင်တာတဲ့လား။ ရှင်က ကြယ်ကြွေကောင်းကင်ဂိုဏ်းရဲ့ ဝင်ခွင့်စမ်းသပ်မှုကို ဝင်ဖြေမလို့လား” ဤသည်မှာ သာယာနာပျော်ဖွယ်ကောင်းသော်လည်း စိတ်မကျေနပ်သည့် အရိပ်အမြွက်များ ပါဝင်နေသော အမျိုးသမီးအသံဖြစ်သည်။

ခန်းမထဲသို့ လူရိပ်တစ်ခု ရောက်ရှိလာသည်။ ၎င်းသည် ဝတ်စုံဖြူ ဝတ်ဆင်ထားသော အမျိုးသမီးတစ်ဦးဖြစ်၏။ သူမ၏ မျက်နှာသည် ပြစ်မျိုးမှဲ့မထင် လှပကျော့ရှင်း၍ အသားအရေသည်လည်း နှင်းများကဲ့သို့ ဖြူဝင်းနေကာ မြင့်မြတ်လှသော နတ်ဘုရားမတစ်ပါးနှင့်ပင် ဆင်တူပေသည်။ ထိုဝတ်စုံဖြူနှင့် အမျိုးသမီးကို မြင်လိုက်ရသည့် အခိုက်အတန့်တွင် ချူးယွင်ဖန်း၏ ခန္ဓာကိုယ်ရှိ အမွေးအမျှင်များ ထောင်မတ်သွားသည်။ ၎င်းသည် ဟုတ်သားရဲနှင့် ပေါင်းစပ်ပြီးနောက် ရရှိလာသည့် စူးရှသော အာရုံခံစားမှုဖြစ်၏။ ဤအမျိုးသမီးသည် အလွန်အန္တရာယ်များ၍ အင်အားကြီးမားသော အရှိန်အဝါများ ထုတ်လွှတ်နေသည်။ သူမသည် ဒြပ်မဲ့အဆင့်ကို ကျော်လွန်နေသည့် နောက်ထပ် ကြောက်မက်ဖွယ် တည်ရှိမှုတစ်ခုဖြစ်သည်။ ၎င်းသည် လီရှန်ယွမ်နှင့် တွေ့ဆုံစဉ်က ခံစားခဲ့ရသည့် ခံစားချက်မျိုးနှင့် ဆင်တူပေသည်။

“ရောက်လာပြီလား၊ ယွမ်ယောင်” အမျိုးသမီးကို မြင်သောအခါ သခင်ကြီးယီက ပြုံးလိုက်သည်။

“မိတ်ဆက်ပေးပါရစေ၊ သခင်လေးချူး။ ဒါက ကျုပ်ရဲ့မြေးမလေး ယီယွမ်ယောင်ပါ”

“တွေ့ရတာ ဝမ်းသာပါတယ်၊ မိန်းကလေး” ချူးယွင်ဖန်းက ပြောလိုက်သည်။

“ကျုပ်က ဝင်ခွင့်စမ်းသပ်မှုဖြေမယ်လို့ ဘာလို့ ထင်ရတာလဲ”

ယီယွမ်ယောင်က နှုတ်ခမ်းဆူကာ ပြောလိုက်သည်။

“ခန့်မှန်းရ မခက်ပါဘူး။ ကြယ်ကြွေကောင်းကင်ဂိုဏ်းက ငါးနှစ်တစ်ကြိမ် တပည့်သစ် ခေါ်ယူလေ့ရှိတာ။ လူငယ်ပါရမီရှင်တွေ အများကြီးက ဂိုဏ်းထဲဝင်ချင်ကြပေမယ့် သူတို့က ကြီးမြတ်တဲ့ တရှရဲ့ ထိပ်တန်းဂိုဏ်းကြီး ဆယ်ခုထဲက တစ်ခုဆိုတော့ ရွေးချယ်ခံရတဲ့ တပည့်တွေက ပြင်းထန်တဲ့ စစ်ဆေးမှုတွေကို ဖြတ်ကျော်ရမယ်။ ရှင့်လို နောက်ခံမရေရာတဲ့သူမျိုးသာ ရွေးချယ်ခံရရင် အနည်းဆုံး အနှစ်နှစ်ဆယ်လောက် စစ်ဆေးခံရလိမ့်မယ်”

ယီယွမ်ယောင်၏ စကားသည် အချက်ကျလှသည်။ ချူးယွင်ဖန်း၏ ရည်မှန်းချက်သည် ကြယ်ကြွေကောင်းကင်ဂိုဏ်းဖြစ်သည်။ သူသည် ကြီးမြတ်သော တရှ၏ တိမ်ပြည်နယ်အတွင်းသို့ လျှို့ဝှက်စွာ ခိုအောင်းနေခဲ့ရာ သူ၏ ပန်းတိုင်သည် ကြယ်ကြွေကောင်းကင်ဂိုဏ်းဖြစ်သည်။ ကြီးမြတ်သော တရှတွင် ထိပ်တန်းဂိုဏ်းကြီး ဆယ်ခုရှိရာ ကြယ်ကြွေကောင်းကင်ဂိုဏ်းသည် တစ်ခုအပါအဝင်ဖြစ်သည်။ ၎င်းတို့သည် အလွန်အစွမ်းထက်၍ ကျွမ်းကျင်သူ အမြောက်အမြားရှိသည့်အပြင် ၎င်းတို့၏ အရှိန်အဝါသည် တိုင်းပြည်အတွင်း နက်ရှိုင်းစွာ အမြစ်တွယ်လျက်ရှိသည်။ ချူးယွင်ဖန်းနှင့် လီရှန်ယွမ်တို့ကြားတွင် ပြန်လည်သင့်မြတ်ရန် လမ်းစမရှိသောကြောင့် သူသည် လီရှန်ယွမ်ကို သတ်ဖြတ်ရမည်ဖြစ်သည်။ လတ်တလောတွင်မူ သူသည် လီရှန်ယွမ်၏ နောက်ကွယ်ရှိ အင်အားစုများကို ယှဉ်ပြိုင်နိုင်မည့် ခိုင်မာသော ကျောထောက်နောက်ခံတစ်ခု လိုအပ်နေသည်။

ထို့ကြောင့်ပင် ချူးယွင်ဖန်းသည် ကြယ်ကြွေကောင်းကင်ဂိုဏ်းကို ရွေးချယ်ခဲ့ခြင်းဖြစ်သည်။ ဤဂိုဏ်းသည် တိုင်းပြည်တစ်ခုလုံးတွင် ဩဇာအာဏာ ကြီးမားသည့်အပြင် နန်းမြို့တော်၌ပင် အခရာကျသူများဖြစ်ကြသည်။ ချူးယွင်ဖန်းသည် လီရှန်ယွမ်ကို အနှေးနှင့်အမြန် သတ်နိုင်မည်ဟု ယုံကြည်သော်လည်း အချိန်ယူရဦးမည်ဖြစ်သည်။ ထို့ကြောင့် သခင်ကြီးယီကို သက်သေခံအထောက်အထား ပြုလုပ်ပေးရန် တောင်းဆိုခဲ့ခြင်းဖြစ်သည်။ ထိုလက်မှတ်ရရှိပါက ချူးယွင်ဖန်းသည် အနှစ်နှစ်ဆယ်ကြာ စစ်ဆေးခံရမည့် ဘေးမှ ကင်းလွတ်နိုင်မည်ဖြစ်သည်။

“ဟုတ်ပါတယ်။ အဲဒါ ကျုပ်ရဲ့ ရည်မှန်းချက်ပဲ။ ကျုပ်ကို ကူညီပေးနိုင်မလား” ချူးယွင်ဖန်းက မေးလိုက်သည်။

“ရတယ်၊ ထုတ်ပေးနိုင်တယ်။ နောင်ကျရင် ရှင် ကျွန်မအမည်အောက်မှာ ရှိနေလိမ့်မယ်” ယီယွမ်ယောင်က ပေါ့ပါးစွာ ပြောလိုက်သည်။

"ရှင်က ဦးလေးထျန်ရှင်းရဲ့ သတင်းကို ယူလာပေးတဲ့လူလေ။ ဒီလောက် အကူအညီလေးက မပြောပါ့လောက်ပါဘူး”

“ကျေးဇူးတင်ပါတယ်။ ကျုပ် မနက်ဖြန် ပြန်လာခဲ့ပါ့မယ်” ချူးယွင်ဖန်းသည် ထိုသို့ ပြောကာ ချက်ချင်း နှုတ်ဆက်၍ ထွက်ခွာသွားသည်။

ချူးယွင်ဖန်း​၏နောက်ကျောကို ကြည့်နေစဉ် သခင်ကြီးယီက မေးမြန်းလိုက်သည်။

"ဒီလူငယ်ရဲ့ နောက်ခံအကြောင်း ဘာမှမသိထားဘူးလေ။ သူ့ကို သမီးအမည်နဲ့ စမ်းသပ်မှုဖြေဖို့ လွှတ်လိုက်ရင် သမီးအတွက် ဝန်ထုပ်ဝန်ပိုး မဖြစ်ရဘူးလား”

ယီယွမ်ယောင်က ခေါင်းခါလိုက်သည်။

“ဘာမှမဖြစ်ပါဘူး။ သမီးက အခု တပည့်အရင်းဖြစ်သွားပြီဆိုတော့ လူတွေအများကြီးက သမီးကို ဖော်လံဖားဖို့ ကြိုးစားနေကြတာ။ ဒီလောက်က အသေးအမွှားပါ။ ဘာပဲဖြစ်ဖြစ်၊ သူက ဦးလေးထျန်ရှင်းရဲ့ သတင်းကို ယူလာပေးတဲ့သူပဲလေ”

“တပည့်အရင်းဖြစ်သွားပြီ ဟုတ်လား”

သခင်ကြီးယီသည် ယီယွမ်ယောင်ကို ပါးစပ်အဟောင်းသားဖြင့် ငေးကြည့်နေသည်။ သူ၏ မျက်ဝန်းများတွင် မယုံကြည်နိုင်ဖြစ်နေသော အကြည့်များ၊ တုန်လှုပ်မှုများဖြင့် ပြည့်နှက်နေသည့်အပြင် တစ်ချိန်တည်းမှာပင် စိတ်လှုပ်ရှားမှုများ ပေါ်ပေါက်လာသည်။

ယီယွမ်ယောင်သည် ယခုအခါ ကြယ်ကြွေကောင်းကင်ဂိုဏ်း၏ တပည့်အစစ်အမှန်တစ်ဦး ဖြစ်လာလေသည်။ ထိုဂိုဏ်း၏ တပည့်တိုင်းသည် တိုင်းပြည်တွင် အရေးပါသော မှတ်တမ်းများရှိကြ၍ နန်းတွင်းအရာရှိများနှင့် တန်းတူကျပေသည်။ ယခုအခါ သူမသည် တပည့်အစစ်အမှန် ဖြစ်လာခြင်းကြောင့် ယီမိသားစုရဲတိုက် အကျိုးကျေးဇူးများသည် အဆုံးမဲ့ပေသည်။ တပည့်အစစ်အမှန်တစ်ဦးသည် ဂိုဏ်းတစ်ခုလုံးကို ဦးဆောင်ရန်ပင် လုံလောက်သည်။

“ဟုတ်တယ်၊ သမီး တပည့်အရင်း ဖြစ်သွားပြီ။ မကြာမီ နန်းတော်က ဆုလာဘ်တွေ ချီးမြှင့်လာလိမ့်မယ်၊ အဘိုး။ သမီးကိုယ်စား လက်ခံပေးပါဦး” ယီယွမ်ယောင်က ပြောလိုက်သည်။

“ဒါပေါ့၊ ဟားဟားဟား... ငါတို့မိသားစုကတော့ တကယ့်ကို ကံကောင်းတာပဲ” သခင်ကြီးယီက ကျယ်လောင်စွာ ရယ်မောလိုက်သည်။

ထိပ်တန်းဂိုဏ်းကြီး ဆယ်ခု​၏ တပည့်အစစ်အမှန်တိုင်းသည် အင်ပါယာနန်းတော်က တန်ဖိုးထားရသော ပါရမီရှင်များဖြစ်ကြသည်။ ၎င်းသည် ယီမိသားစုရဲတိုက်အတွက် ကြီးမားသော အကျိုးကျေးဇူးဖြစ်၏။ နန်းတော်သည် ယင်းကဲ့သို့သော ပါရမီရှင်များကို မွေးထုတ်ပေးသည့် မိသားစုများကို အမြဲတစေ ဆုလာဘ်များစွာ ပေးသနားလေ့ရှိသည်။

“ဒါက ဘာမှမဟုတ်ပါဘူး။ ဂိုဏ်းထဲမှာ တပည့်ရင်းတွေ အများကြီးရှိသေးတယ်။ သမီး ဒီထက်ပိုပြီး ကြိုးစားရမယ်။ အခု လီရှန်ယွမ်က မြို့ဝန်အဖြစ် ချီးမြှောက်ခံထားရပြီဆိုတော့ သမီးထက် တစ်လှမ်းသာနေပြီ။ သမီးရဲ့ ကျင့်ကြံမှုကို အရှိန်မြှင့်မှရမယ်။ သမီးတို့မိသားစုအတွက် မြို့ဝန်ရာထူးကို အရယူပေးမယ်” ယီယွမ်ယောင်က ကြွေးကြော်လိုက်သည်။

လီရှန်ယွမ်အကြောင်း ပြောသည့်အခါ သူမ၏ မျက်ဝန်းများတွင် ရှုံးနိမ့်မှုကို အရှုံးမပေးလိုသည့် အရိပ်အမြွက်များဖြင့် လင်းလက်လာသည်။

“သိပ်ကိုကြီးမြတ်တဲ့ ရည်မှန်းချက်ပဲ” သခင်ကြီးယီသည် ဝမ်းသာလွန်းသဖြင့် မျက်ရည်ပင် ဝဲလာသည်။

ယီမိသားစုရဲတိုက်သည် မိုင်တစ်ထောင်အတွင်း ဩဇာကြီးမားသည်ဟု ဆိုရသော်လည်း ကြီးမြတ်သောတရှ တစ်ခွင်၌ ၎င်းတို့ကဲ့သို့ အင်အားစုမျိုးသည် တောကျသော ဒေသဟုပင် မဆိုနိုင်ပေ။ အကယ်၍ ယီယွမ်ယောင်သာ မြို့ဝန်တစ်ဦးဖြစ်လာပါက ၎င်းတို့မိသားစု​၏ အရှိန်အဝါများ တိုးမြင့်လာကာ မြင့်မြတ်သော မှူးမတ်အသိုင်းအဝိုင်းများကြားသို့ အောင်မြင်စွာ တက်လှမ်းနိုင်မည်ဖြစ်သည်။

“သမီးရဲ့ ကွယ်လွန်သွားတဲ့ အဖေသာ ဒါကို သိရင် သိပ်ဝမ်းသာမှာပဲ” သခင်ကြီးယီက မျက်ရည်များကို သုတ်လျက် လေးနက်စွာ ပြောလိုက်သည်။

“ဒါပေမယ့် ဒီချူးယွင်ဖန်းဆိုတဲ့ လူငယ်ကိုတော့ မျက်ခြေမပြတ် စောင့်ကြည့်ရမယ်။ သူက သာမန်လူ မဟုတ်ဘူး။ သူကနေတစ်ဆင့် ထျန်းရှင်းကို ရှာရမယ်” သခင်ကြီးယီက ပြောလိုက်သည်။

“သူ စာလာပို့တာလို့ ပြောတုန်းက အစပိုင်းတော့ မယုံခဲ့ဘူး။ လက်ရေးက လိမ်လို့ရပေမယ့် နတ်အာရုံကတော့ လိမ်လို့မရဘူးလေ။ ထျန်းရှင်းမှာ အဘိုးတို့ကို ပြောပြလို့မရတဲ့ ကိစ္စတစ်ခုခုရှိနေလို့ ဒီလူငယ်ကို စာပို့ခိုင်းလိုက်တာပဲ ဖြစ်ရမယ်။ သူ့ကို စောင့်ကြည့်နေရင် ထျန်းရှင်းကိုလည်း ရှာတွေ့နိုင်လိမ့်မယ်”

ယီယွမ်ယောင်က ခေါင်းညိတ်လိုက်သည်။ “သမီးလည်း အဲဒီလိုပဲ တွေးထားတာ။ မဟုတ်ရင် သာမန် ဝင်ခွင့်စမ်းသပ်မှုလေး တစ်ခုအတွက် သမီး ကိုယ်တိုင် ဝင်ပတ်သက်နေမှာ မဟုတ်ဘူး”

ချူးယွင်ဖန်းနှင့် ကနဦး စတင်တွေ့ဆုံချိန်ကို သတိရသွားသောအခါ သူမ၏ လှပသော မျက်နှာသည် အနည်းငယ် တင်းမာလာသည်။ သူမသည် ချူးယွင်ဖန်းကို တစ်ချက်ကြည့်ရုံဖြင့် ထိုးဖောက်မမြင်နိုင်သည့် ခံစားချက်မျိုးရရှိခဲ့သည်။ ၎င်းသည် အလွန်ရှားပါးသော အခြေအနေမျိုးဖြစ်သည်။

ထိုအခိုက်တွင် သူမ၏ နှလုံးသားထဲ၌ ထူးဆန်းသော ခံစားချက်တစ်ခု ဖြစ်ပေါ်လာသည်။ ‘စိတ်ဝင်စားစရာပဲ’

အခန်း (၁၆၄၀) ရွှေအမတေပြီးပြည့်စုံအဆင့် အထွတ်အထိပ်

ယီမိသားစုရဲတိုက်မှ ထွက်ခွာလာပြီးနောက် ချူးယွင်ဖန်းသည် လူသူကင်းမဲ့သော နေရာတစ်ခုသို့ သွားရောက်ကာ တောင်မြစ်ပန်းချီကားထဲသို့ ဝင်ရောက် ပျောက်ကွယ်သွားသည်။ သူသည် တောင်မြစ်ပန်းချီကားထဲတွင် လုံးလုံးလျားလျား ဘေးကင်းလုံခြုံလှသည့်အတွက် အခြားလူများ ရှာဖွေတွေ့ရှိသွားမည်ကို စိုးရိမ်ရန် မလိုအပ်ပေ။ ယီယွင်ယောင်၏ ဖြစ်တည်မှုသည် သူ့ကို အံ့အားသင့်စွာ စုတ်သပ်စေခဲ့သည်။ ကြီးမြတ်သော တရှ၏ အခြေခံအုတ်မြစ် အမှန်တကယ်ပင် ကြောက်မက်ဖွယ်ကောင်းလှသည်။ ဥပမာအားဖြင့် ရှန်ဖေးယွင်၊ လျန်ရွေ့ချိုင်နှင့် အခြားလူများသည် ပြည်ထောင်စုတွင် ထိပ်တန်းပါရမီရှင်များဟု သတ်မှတ်ခံရသူများဖြစ်ကြသည်။

ပါရမီရှင်ဆိုသည်မှာ မည်သို့သော ဖြစ်တည်မှုမျိုးဖြစ်သနည်း။ ၎င်းတို့သည် ကောင်းကင်ဘုံက ချီးမြှောက်ထားသော ပါရမီရှင်များဖြစ်ကြသည်။ သို့သော်လည်း ဤနေရာတွင်မူ ထိုသို့သောဖြစ်တည်မှုများကို နေရာတိုင်း၌ တွေ့မြင်နိုင်သည်။ အထူးသဖြင့် လီရှန်ယွမ်သည် ချူးယွင်ဖန်း တစ်ခါမျှ မကြုံတွေ့ဖူးသေးသော ကြောက်မက်ဖွယ် ကျွမ်းကျင်သူတစ်ဦးဖြစ်သည်။ ယီယွင်ယောင်သည် လီရှန်ယွမ်ကဲ့သို့ မသန်မာသေးသော်လည်း သူမသည် အလွန်ထိတ်လန့်ဖွယ်ကောင်းသူဖြစ်သည်။ ထို့ပြင် ယီယွင်ယောင်၏ ခန္ဓာကိုယ်အတွင်း၌ တစ်စုံတစ်ရာသော စွမ်းအင်များကို ဖိနှိပ်ထားကြောင်း ချူးယွင်ဖန်း အထင်အရှား ခံစားမိသည်။ သူမသည် အပြင်ပန်း မြင်တွေ့ရသည်ထက် ပိုမိုနက်ရှိုင်းသူဖြစ်သည့်အပြင် ထူးခြားသော ကံကြမ္မာ ကြုံကြိုက်မှုများ ပိုင်ဆိုင်ထားသူဖြစ်ပေသည်။

ကြီးမြတ်သော တရှသို့ ရောက်ရှိလာချိန်တွင် ချူးယွင်ဖန်းသည် ပြည်ထောင်စု၌ သူသိရှိထားခဲ့သော အခြေခံဗဟုသုတအချို့သည် ဤနေရာတွင် လုံးလုံးလျားလျား ပြောင်းပြန်ဖြစ်နေကြောင်း သဘောပေါက်လာသည်။ ကြီးမြတ်သော တရှ၏ ဝိညာဉ်စွမ်းအင်သည် အလွန်သိပ်သည်းလှကာ ခရမ်းရောင်မိုးကြိုးပြည်နယ်ထက် အဆပေါင်းများစွာ ပိုမိုများပြားကြောင်း တွေ့ရှိလိုက်ရသည်။ ဝိညာဉ်စွမ်းအင် ပိုမိုများပြားလေ၊ ဝိညာဉ်ရေး သက်ရှိများ ပိုမိုမွေးဖွားလာလေဟူသော ရှေးယခင်က စကားစုကို ကြီးမြတ်သော တရှတွင် မြင်တွေ့နိုင်သည်။ ကလေးငယ်များပင် မွေးဖွာခြင်းနယ်မြေအဆင့်ဖြင့် မွေးဖွားလာကြ၍ အချိန်ကြာလာသော်လည်း မရီးဒျန်အဆင့်သို့ နိမ့်ကျသွားခြင်း မရှိကြပေ။

ပေါများသန့်စင်သော ဝိညာဉ်စွမ်းအင်များရှိခြင်း၊ ငယ်စဉ်ကတည်းက အသက်ရှူကျင့်စဉ်များကို သင်ကြားပေးခြင်းတို့ကြောင့် ဤတိုင်းပြည်သားများ၏ စတင်ရာ ကျင့်ကြံမှုအဆင့်သည် မွေးဖွားခြင်းနယ်မြေအဆင့်ဖြစ်နေသည်။ ဤသည်မှာ ပြည်ထောင်စုတွင် စိတ်ကူးကြည့်ရန်ပင် မဖြစ်နိုင်သော အချက်ဖြစ်သည်။ ကြီးမြတ်သော တရှ၏ စစ်တပ်သည် အရာအားလုံးကို ချေမှုန်းနိုင်သည်အထိ အစွမ်းထက်လှသည်။ သာမန်စစ်သည်များသည် ရွှေအမတေအဆင့်တွင်ရှိနေ၍ ရွှေအမတေပြီးပြည့်စုံအဆင့်ကို စစ်တပ်အတွင်း နေရာအနှံ့ တွေ့ရှိနိုင်သည်။ ထိုသို့သော ပတ်ဝန်းကျင်မှ မွေးဖွားလာသည့် ပါရမီရှင်တစ်ဦးကို ပြည်ထောင်စုတွင် ထားရှိမည်ဆိုပါက နှစ်ပေါင်းရာချီမှ တစ်ဦးပေါ်ထွန်းတတ်သော သူတော်စင်တစ်ဦးဟု သတ်မှတ်ခံရပေလိမ့်မည်။

သို့သော်လည်း ချူးယွင်ဖန်းသည် အနည်းငယ်မျှ ကြောက်ရွံ့ခြင်း မရှိဘဲ ထိုအချက်ကို စိတ်ဝင်စားစရာကောင်းသည်ဟုသာ ခံစားနေရသည်။ ဤသည်မှာ သူတောင့်တခဲ့သော ကမ္ဘာဖြစ်သည်။ ပထမဆုံး လုပ်ဆောင်ရမည့်အရာသည် ကြီးမြတ်သော တရှအတွင်းသို့ ဝင်ဆံ့ရန် ကြိုးစားခြင်းဖြစ်သည်။ ဤနေရာရှိ အဖွဲ့အစည်းတိုင်းကို နှစ်ပေါင်းသောင်းချီသော အဖွဲ့အစည်းများအဖြစ် တွက်ချက်ထားကြသည်။ တပည့်များ လက်ခံရာ၌ပင် ရွေးချယ်မှုစံနှုန်း အလွန်တင်းကျပ်လှသည်။ ခွန်အားသည် စံနှုန်းတစ်ခုသာဖြစ်ရာ၊ မျိုးရိုးနောက်ခံ သန့်ရှင်းစင်ကြယ်ကာ စုံစမ်း၍ရနိုင်သော မိသားစုမျိုးဆက် ပိုင်ဆိုင်ရန် လိုအပ်ပေသည်။ ဤသည်မှာ ချူးယွင်ဖန်း မပိုင်ဆိုင်ထားသည့်အရာဖြစ်သည့်အတွက် သခင်ကြီးယီထံမှ အကူအညီ တောင်းခံခဲ့ခြင်းဖြစ်သည်။

ချူးယွင်ဖန်းသည် ကြယ်ကြွေကောင်းကင်ဂိုဏ်းသို့ ဝင်ရောက်နိုင်သည်နှင့် သူ၏စွမ်းအင်ကို အမှန်တကယ် ပြသနိုင်မည်ဖြစ်သည်။ ချူးယွင်ဖန်းသည် တင်ပျဉ်ခွေ ထိုင်ကာ ဆက်လက်ကျင့်ကြံလိုက်သည်။ သူ၏ ကျင့်ကြံမှုများသည် လွန်ခဲ့သော တစ်နှစ်အတွင်း ကမ္ဘာတမျှ ပြောင်းလဲသွားခဲ့သည်။ သူ၏ ကျင့်ကြံမှုသည် အစပိုင်း ရွှေအမတေပြီးပြည့်စုံအဆင့်မှ နှောင်းပိုင်း ရွှေအမတေပြီးပြည့်စုံအဆင့် အထွတ်အထိပ်သို့ မြင့်တက်သွားခဲ့ရာ သူသည် ရွှေအမတေပြီးပြည့်စုံအထွတ်အထိပ်အဆင့်သို့ ရောက်ရှိရန် ခြေတစ်လှမ်းသာ လိုအပ်တော့သည်။

ချူးယွင်ဖန်းသည် နောက်ဆုံးကျန်ရှိသော ဇစ်မြစ်ပေါင်းစည်းမှုဆေးကို ထုတ်ယူလိုက်သည်။ သူသည် တစ်နှစ်ကျော်အတွင်း ထိုဆေးလုံးများကို တစ်လုံးပြီးတစ်လုံး သောက်သုံးခဲ့ရာ ယခု ဆေးလုံးသည် နောက်ဆုံးတစ်လုံးဖြစ်သည်။ ဤဆေးလုံးများသည် သူ ရွှေအမတေပြီးပြည့်စုံအဆင့် အထွတ်အထိပ်သို့ တက်လှမ်းလာရသည့် အဓိကအကြောင်းရင်းဖြစ်သည်။ ထိုအချိန်တွင် သူ၏ တိုက်ခိုက်ရေးစွမ်းရည်သည် ဒြပ်မဲ့အဆင့် အထွတ်အထိပ်သို့ မြင့်တက်သွားမည်ဖြစ်ရာ ကြယ်ကြွေကောင်းကင်​ဂိုဏ်း၏ စမ်းသပ်ချက်သည် သူ့အတွက် အလွန်လွယ်ကူသွားပေလိမ့်မည်။

ချူးယွင်ဖန်းသည် နောက်ဆုံး ဇစ်မြစ်ပေါင်းစည်းမှုဆေးကို မျိုချလိုက်ရာ အစွမ်းထက်သော ဆေးစွမ်းအင်များ ခန္ဓာကိုယ်အတွင်း စီးဆင်းသွားသည်။ ကံကောင်းထောက်မစွာဖြင့် သူသည် ယခင်က ထိုအခြေအနေကို အကြိမ်ကြိမ် ကြုံတွေ့ခဲ့ဖူးသောကြောင့် ကျင့်သားရနေပြီဖြစ်ရာ ဆေးစွမ်းအင်များကို လျင်မြန်စွာ ထိန်းချုပ်၍ နတ်စွမ်းအင်အဖြစ် ပြောင်းလဲသန့်စင်လေသည်။ အချိန်အတော်ကြာပြီးနောက် သူ၏မျက်လုံးများ ပွင့်လာကာ နတ်စွမ်းအင်များ ပေါက်ကွဲထွက်လာသည်။ သူ၏ ခန္ဓာကိုယ်အတွင်းရှိ ရွှေအမတေသည် နောက်ဆုံးတွင် အောင်မြင်စွာ ဖွဲ့စည်းသွား၍ မရီးဒျန်များအတွင်း ငြိမ်သက်စွာ လည်ပတ်နေသည်။

ချူးယွင်ဖန်းသည် နောက်ဆုံးတွင် ရွှေအမတေပြီးပြည့်စုံအဆင့်၏ အထွတ်အထိပ်သို့ ရောက်ရှိသွားသည်။ ချူးယွင်ဖန်း​၏ ခန္ဓာကိုယ်အတွင်းရှိ ရွှေအမတေကို မြင်တွေ့နိုင်ပါက သာမန်လူများထက် အဆပေါင်းများစွာ ပိုမိုစွမ်းအားကြီးကြောင်း လူတိုင်း သိရှိသွားပေလိမ့်မည်။ ၎င်းသည် ထိတ်လန့်ဖွယ်ကောင်းသော စွမ်းအင်များကို သိုလှောင်ထားပုံရ၍ အလွန်ကြောက်မက်ဖွယ်ကောင်းလှသည်။ ချူးယွင်ဖန်းသည် ယခုအချိန်မှသာ သူ၏ အသွင်ကူးပြောင်းမှုကို အမှန်တကယ် ပြီးမြောက်သွားခဲ့သည်။ ရွှေအမတေ ဖွဲ့စည်းပြီးနောက် လူတစ်ယောက်၏ ဘဝသည် မိမိလက်ထဲ၌သာ ရှိပေသည်။

ချူးယွင်ဖန်းသည် နောက်ဆုံးတွင် အဆင့်ဖြတ်ကျော်နိုင်ခဲ့သည်။ လွန်ခဲ့သော တစ်နှစ်နှင့် နှိုင်းယှဉ်ပါက သူသည် အနည်းဆုံး ဆယ်ဆခန့် ပိုမိုသန်မာလာခဲ့သည်။ အကယ်၍ ယခုအချိန်တွင် ဟွမ်ဖုန်းနှင့် အခြားသူများကို ပြန်လည်ရင်ဆိုင်ရပါက လက်တစ်ချက်တည်းဖြင့် အနိုင်ယူနိုင်ပေလိမ့်မည်။ ဟွမ်ဖုန်းနှင့် အခြားသူများလည်း တိုးတက်လာနိုင်သော်လည်း ၎င်းတို့သည် ဇစ်မြစ်ပေါင်းစည်းမှုဆေးများ သောက်သုံးကာ သုံးဆင့်တိုင်တိုင် အဆင့်ဖြတ်ကျော်လာခဲ့သည့် ချူးယွင်ဖန်းနှင့် ယှဉ်ပြိုင်နိုင်ရန် မဖြစ်နိုင်ပေ။

"ဒါနဲ့ မလုံလောက်သေးဘူး။ လီရှန်ယွမ်နဲ့ ရင်ဆိုင်ဖို့ဆိုရင် ဒီစွမ်းအင်လောက်နဲ့ မရသေးဘူး"

ချူးယွင်ဖန်းသည် သူ၏ အဆင့်ဖြတ်ကျော်မှုကို အပြည့်အဝ စိတ်ကျေနပ်ခြင်း မရှိသေးပေ။ သူသည် လီရှန်ယွမ်နှင့် တိုက်ခိုက်ခဲ့ဖူးသည့်အတွက် လီရှန်ယွမ် မည်မျှကြောက်မက်ဖွယ်ကောင်းသည်ကို သိရှိထားသည်။ သူသည် ယီယွင်ယောင်ကိုပင် အနိုင်မယူနိုင်သေးပေ။ ရုတ်တရက်ဆိုလိုပင် ချူးယွင်ဖန်း၏ နောက်ကျောဘက်တွင် ဓားအလင်းတန်း ခုနစ်ခု ပေါ်ထွက်လာသည်။ ၎င်းဓားအလင်းတန်းများကို ခရမ်းရောင်မိုးကြိုးများက ဝန်းရံထားရာ မိုးကြိုးပုံသဏ္ဌာန် ဓားများသဖွယ် ထင်မှတ်ရစေသည်။

"ခရမ်းရောင်မိုးကြိုး ဓားခုနစ်စဉ်…"

ဤသည်မှာ ချူးယွင်ဖန်း ကျင့်ကြံထားသော ဓားကျင့်စဉ်၏ အမည်ဖြစ်သည်။ ၎င်းသည် ခရမ်းရောင်မိုးကြိုးဓားကျမ်းထဲတွင် မှတ်တမ်းတင်ထားသော အတုမဲ့ဓားပညာဖြစ်သည်။

ထိုဓားအလင်းတန်း ခုနစ်စဉ်သည် သူ၏ ခန္ဓာကိုယ်ပတ်လည်တွင် လှည့်လည်နေသည်။ စတင် တိုက်ခိုက်သည်နှင့် လျှပ်စီးများ လင်းလက်သွားကာ တစ်ချက်တည်းဖြင့် လူ့အသက်ကို နှုတ်ယူနိုင်သည်။ ဤကျင့်စဉ်သည် အမှန်တကယ် အံ့ဩဖွယ်ကောင်းလှသည်။ ချူးယွင်ဖန်းသည် ယခင်က ဤကျင့်စဉ်ကို အသုံးပြုစဉ် အနည်းငယ် အားနည်းခဲ့သော်လည်း ယခုအခါ အဆင့်ဖြတ်ကျော်လာသောကြောင့် ခရမ်းရောင်မိုးကြိုးဓားခုနစ်စဉ်၏ စွမ်းအင်သည်လည်း အလွန်မြင့်မားလာသည်။ အကယ်၍ သူသာ ခွန်အားကြီးနတ်မန္တန်၏ အကူအညီကို ပေါင်းထည့်၍ ဓားခုနစ်လက်လုံးကို တစ်ပြိုင်နက်တည်း အသုံးပြုမည်ဆိုပါက ဒြပ်မဲ့အဆင့်ထက် မြင့်မားသော ဒြပ်မဲ့လေ့လာသူတစ်ဦးနှင့်ပင် ယှဉ်ပြိုင်နိုင်စွမ်းရှိပေလိမ့်မည်။

ချူးယွင်ဖန်းသည် ယီယွင်ယောင်ထံမှ သက်သေခံအထောက်အထားကို ရရှိခဲ့ပြီးနောက် ဆယ်ရက်အကြာတွင် ကြယ်ကြွေကောင်းကင်ဂိုဏ်း၏ တံခါးဝသို့ ရောက်ရှိလာသည်။ ဤသည်မှာ မိုင်ပေါင်းသောင်းချီ၍ ရှည်လျားလှသော တောင်တန်းကြီးဖြစ်ကာ မြေပြင်ပေါ်တွင် ဝပ်စင်းနေသည့် နဂါးတစ်ကောင်ကဲ့သို့ အရှေ့မှ အနောက်သို့ သွယ်တန်းနေသည်။ ဤသည်မှာ ကြီးမြတ်သော တရှ၏ ဂိုဏ်းကြီးဆယ်ဂိုဏ်းအနက် တစ်ခုဖြစ်သော ကြယ်ကြွေကောင်းကင်ဂိုဏ်း၏ ဂိတ်တံခါးဝဖြစ်သည်။ ချူးယွင်ဖန်း မော့ကြည့်လိုက်သည့်နေရာတိုင်းတွင် မိုင်ပေါင်းသောင်းချီ ရှည်လျားသော တောင်တန်းကြီးသည် အတားအဆီးများနှင့် ဖွဲ့စည်းပုံများအောက်တွင် ဖုံးကွယ်နေသည်။ ၎င်းတို့ကို ဖြတ်ကျော်ရန် မဖြစ်နိုင်ပေ။ ထို့ကြောင့် လူအများသည် ရှေ့တည့်တည့်ရှိ ပင်မတံခါးကြီးမှသာ ဝင်ထွက်သွားလာနိုင်သည်။

ပင်မတံခါးကြီးသည် ပို၍ပင် ခန့်ညားထည်ဝါလှသည်။ ၎င်းသည် ဝေဟင်ယံတွင် တည်ရှိနေ၍ ၎င်း​၏ဆိုင်းဘုတ်ပေါ်၌ "ကြယ်ကြွေကောင်းကင်ဂိုဏ်း" ဟု ရေးသားထားသည်။ လက်ရေးများ နဂါးနှင့် မြွေများကဲ့သို့ ရစ်ပတ်ကာ တက်ကြွ၍ အင်အားကြီးမားလှသည်။ ထိုနေ့တွင် ကြယ်ကြွေကောင်းကင်ဂိုဏ်း၏ တံခါးဝတွင် မှိန်ပျပျ အလင်းတန်းများ ထွက်ပေါ်နေသည်။ ချူးယွင်ဖန်းသည် ဒဏ္ဍာရီလာ နတ်ဘုံနတ်နန်း တံခါးဝသို့ ရောက်ရှိနေသကဲ့သို့ ခံစားနေရကာ ပင်မတံခါးကြီး၏ အောက်တွင်မူ မြေပြင်မှ ကောင်းကင်သို့ သွယ်တန်းထားသော ကျောက်စိမ်းဖြူလမ်းမကြီးရှိနေသည်။

အခန်း (၁၆၄၁) ဝင်ခွင့်စမ်းသပ်မှု

ချူးယွင်ဖန်းသည် ဤဒဏ္ဍာရီဆန်ဆန် မြင်ကွင်းကို ကြည့်ရှုနေစဉ် စိတ်လှုပ်ရှားမှုများ ခံစားလိုက်ရသည်။ ဤကျောက်ဖြူများနှင့် ခင်းထားသော လမ်းကြောင်း၏ အောက်ဘက်တွင် လူအုပ်ကြီးရှိနေသည်။ ယနေ့သည် ကြယ်ကြွေကောင်းကင်ဂိုဏ်းက တပည့်သစ်များ လက်ခံရန် တံခါးဖွင့်ပေးသည့် နေ့ဖြစ်သည်။ ကြီးမြတ်သော တရှတစ်ခုလုံးရှိ လူတိုင်း ထိုသတင်းကို ကြားသိထားကြသဖြင့် လာရောက်ယှဉ်ပြိုင်ကြသူများသည် မရေတွက်နိုင်အောင် များပြားလှသည်။

မရေတွက်နိုင်သော စကားသံများ ချူးယွင်ဖန်း၏ နားထဲသို့ တိုးဝင်လာသည်။

“လူတွေ အများကြီးပဲ၊ ကြယ်ကြွေကောင်းကင်ဂိုဏ်းလို ဂိုဏ်းမျိုးသာ ဒီလောက်အာရုံစိုက်မှုကို ရရှိနိုင်မှာ”

“ဘုရားရေ... ဘယ်လောက်တောင် များလိုက်သလဲ၊ ကျုပ် မြင်ရသလောက်တော့ ကျုပ် သိတဲ့လူတွေပါနေတာပဲ။ ကမ္ဘာအရပ်ရပ်က ပါရမီရှင်တွေ အများကြီး ဒီမှာစုစည်းနေကြတာပဲ၊ ပြည်နယ်ကိုယ်စီမှာ နာမည်ကြီးတဲ့သူတွေတောင် ပါသေးတယ်”

“ဟုတ်တယ်၊ ဒါ့အပြင် သူတို့အားလုံးက အစွမ်းထက် ကျွမ်းကျင်သူတွေချည်းပဲ။ ရွှေအမတေပြီးပြည့်စုံအဆင့်ဆိုတာ ကြယ်ကြွေကောင်းကင်ဂိုဏ်းမှာ အပြင်စည်း တပည့်သာသာပဲ ရှိသေးတာ၊ ဒီတော့ သူတို့တောင် အောင်မြင်ချင်မှ အောင်မြင်မှာ။ ဒီတစ်ခေါက် အပြင်စည်း တပည့်အရေအတွက်ကို ဂိုဏ်းက လူငါးထောင်ပဲ လက်ခံမှာတဲ့”

“ရာသီတိုင်း လာလျှောက်တဲ့သူတွေထဲမှာ တစ်ဆယ်ပုံ တစ်ပုံတောင် ဂိုဏ်းထဲ မဝင်နိုင်ကြဘူးဆိုပဲ၊ ကျွတ် ကျွတ်"

“အပြင်စည်းတပည့်ဖြစ်ရတာက ဘာမှမပြောပလောက်ပါဘူး၊ တကယ့် အစွမ်းထက်တဲ့သူတွေက စစချင်းမှာတင် အတွင်းစည်းတပည့်ဖြစ်သွားကြတာ”

“အဲဒါတော့ ဟုတ်တယ်။ ကျုပ်လည်း ကြားဖူးတယ်၊ အဲဒီလူတွေက တခြားလူတွေနဲ့ မတူကြဘူး။ သူတို့က မျိုးစေ့တပည့်ဖြစ်ဖို့ လာကြတာ၊ မဟုတ်ရင် သူတို့တွေ ကြယ်ကြွေကောင်းကင်ဂိုဏ်းရဲ့ တပည့်ဖြစ်နေတာ ကြာလှပေါ့”

“ဒါပေါ့ အတွင်းစည်းတပည့်တွေထဲမှာတောင် အဆင့်အတန်းတွေ ကွဲသေးတာပဲ။ တကယ် အင်အားကြီးတဲ့လူတွေက မျိုးစေ့တပည့်တွေလေ၊ နောင်တစ်ချိန် တကယ့်တပည့်အရင်းဖြစ်လာနိုင်တဲ့ မျိုးစေ့တွေပေါ့၊ ဒါပေမယ့် လူတစ်ဆယ်မှာ တစ်ယောက်နှုန်းပဲ ထွက်ပေါ်နိုင်ကြတာ။ အံ့ဩဖို့သိပ်ကောင်းတာပဲ”

ချူးယွင်ဖန်းသည် ထိုအကြောင်းအရာအားလုံးကို ကြားနေရသည်။ သူသည် လူအုပ်ကြီးကို လှည့်ပတ်ကြည့်ရှုလိုက်သောအခါ ပုန်းအောင်နေသည့် အင်အားကြီး အငွေ့အသက်များကို မြင်တွေ့လိုက်ရသည်။ ထို့အပြင် ၎င်းတို့အနက် အများစုသည် ကြွယ်ဝချမ်းသာသူများ သို့မဟုတ် မှူးမတ်မျိုးဆက်များဖြစ်ကြရာ၊ ထူးခြားသော နောက်ခံအသိုင်းအဝိုင်းများရှိပုံရသည်။

ဤသည်မှာ မျှော်လင့်ထားသည့်အတိုင်းဖြစ်ပေသည်။ ကျင့်ကြံခြင်းသည် အရင်းအမြစ်များစွာ ကုန်ကျတတ်သည့်အတွက် ချူးယွင်ဖန်းကဲ့သို့ ဤအဆင့်အထိ ကျင့်ကြံနိုင်ခြင်းသည် ထူးခြားလှသည်။ ပုံမှန်အားဖြင့်ဆိုလျှင် အင်အားကြီးမားသော အင်အားစုတစ်ခု၏ ထောက်ပံ့မှုမပါဘဲ ဤအဆင့်သို့ ကျင့်ကြံရန် မဖြစ်နိုင်ပေ။

အင်အားအကောင်းဆုံး ကျောထောက်နောက်ခံသည် တော်ဝင်နန်းတော်သို့မဟုတ် ဂိုဏ်းကြီးဆယ်ဂိုဏ်း ဖြစ်ပေလိမ့်မည်။ ထို့အပြင် ဂိုဏ်းကြီးများသို့ ဝင်ရောက်ခြင်းသည် တော်ဝင်နန်းတော်သို့ ဝင်ရောက်ရန် အမြန်ဆုံးလမ်းစလည်းဖြစ်ပေသည်။ ဂိုဏ်းကြီးများ​၏ တပည့်အများအပြားသည် နှစ်စဉ်နှစ်တိုင်း တော်ဝင်နန်းတော်သို့ ဝင်ရောက်ကာ ကြီးမြတ်သော တရှအတွက် တာဝန်ထမ်းဆောင်ကြသည်။ လီရှန်ယွမ်သည် ၎င်းတို့အနက် အတော်ဆုံးတစ်ယောက်ဖြစ်သည်။ အကယ်၍ ရွှေအမတေပြီးပြည့်စုံအဆင့်သည် အပြင်စည်းတပည့်သာ ဖြစ်နိုင်မည်ဆိုလျှင် အတွင်းစည်းတပည့်တစ်ဦးသည် အနည်းဆုံးလျှင် ဒြပ်မဲ့အဆင့်ဖြစ်ရပေလိမ့်မည်။ တစ်ဖက်တွင် ချူးယွင်ဖန်းသည် ထိုအဆင့်နှင့်ပင် လုံလောက်ချင်မှ လုံလောက်မည်ဟု ခန့်မှန်းလိုက်သည်။ မျိုးစေ့တပည့်တစ်ဦးဖြစ်လာရန်အတွက် ဒြပ်မဲ့အဆင့် ကျွမ်းကျင်သူများအနက် အတော်ဆုံးဖြစ်နေရပေလိမ့်မည်။

ချူးယွင်ဖန်း၏ အကြည့်သည် လူအုပ်ကြားသို့ ရောက်ရှိသွားပြီးနောက် ဟွမ်ဖုန်းကို တွေ့လိုက်ရသောအခါ အံ့အားသင့်သွားသည်။ သူသည်လည်း ကြယ်ကြွေကောင်းကင်ဂိုဏ်းတွင် ဝင်ရောက်ယှဉ်ပြိုင်ရန် လာရောက်ခြင်းဖြစ်သည်။ ဤဖြစ်စဉ်သည် သူ့ကို အံ့အားသင့်စေသည်။ ဟွမ်ဖုန်းက မည်သည့်အင်အားစု၏ ပံ့ပိုးမှုဖြင့် ဤစမ်းသပ်မှုသို့ လာရောက်ခဲ့ဆိုသည်ကို သူ မသိရှိပေ။ လွန်ခဲ့သော တစ်နှစ်နှင့် နှိုင်းယှဉ်ပါက ဟွမ်ဖုန်းသည် ယခုအခါ ပို၍ သန်မလာကာ သူ၏ခွန်အားသည်လည်း ကြီးမားစွာ ပြောင်းလဲသွားသည်။ လွန်ခဲ့သော တစ်နှစ်က သူသည် ဒြပ်မဲ့အဆင့် အစပျိုးရုံသာဖြစ်သော်လည်း ယခုအခါ အနည်းဆုံးလျှင် ဒြပ်မဲ့ အလယ်အဆင့်သို့ ရောက်ရှိနေသည်။ ဤတိုးတက်မှုသည် အလွန်ပင် ထိတ်လန့်ဖွယ်ကောင်းလှသည်။ သူသည် ယခင်ကထက် အဆပေါင်းများစွာ ပို၍ သန်မာလာခဲ့သော်လည်း ချူးယွင်ဖန်း၏ တိုးတက်မှုနှင့် ယှဉ်လျှင် မပြောပလောက်ပေ။

ရုတ်တရက် လွင့်မျောနေသော တံခါးဝမှ ပုံရိပ်များစွာ ပျံသန်းဆင်းသက်လာကြသည်။ ပုံရိပ်တစ်ခုချင်းစီသည် အလင်းတန်းတစ်ခုစီ စီးနင်းလျက်ရှိသည်။ ထိုသူများအားလုံးသည် ဒြပ်မဲ့အဆင့်အထက်တွင် တည်ရှိသူများဖြစ်ကြသည်။ ၎င်းတို့ ပေါ်ထွက်လာသည်နှင့် စမ်းသပ်မှုအတွက် လာရောက်ကြသည့် ထောင်ပေါင်းများစွာသော ကျွမ်းကျင်သူများ မှင်သက်သွားကြသည်။ ၎င်းတို့အနက် အသန်မာဆုံးဟူသည် ဒြပ်မဲ့အဆင့်သာဖြစ်ကြသော်လည်း အလင်းတန်းပေါ်ရှိ ပုံရိပ်များသည် ဒြပ်မဲ့အဆင့်နှင့် ၎င်းအထက် မြင့်မားသူများဖြစ်ကြသည်။ အချို့သော ဒြပ်မဲ့အဆင့်ကျွမ်းကျင်သူများသာ ဂရုမစိုက်စွာ ပြုမူနေကြရာ အချို့သည် ထိုကျွမ်းကျင်သူများကို အထင်အမြင်သေးသော အကြည့်များဖြင့် တိုက်ရိုက် ကြည့်နေကြသည်။

ဤကြယ်ကြွေကောင်းကင်ဂိုဏ်းသားများသည် ဝတ်ရုံဖြူများ ဝတ်ဆင်ထားကြသည်။ ၎င်းတို့၏ အင်္ကျီလက်စများသည် လေထဲတွင် တလွင့်လွင့် လှုပ်ခတ်နေကာ ကောင်းကင်ဘုံ​၏ အင်မော်တယ်များအလား ထင်မှတ်ရစေသည်။ ထိုအချိန်တွင် တပည့်တစ်ဦးက အရှေ့သို့ တိုးလာခဲ့သည်။ သူ၏ အေးစက်စူးရှသော အကြည့်ဖြင့် လူအုပ်ကြီးကို ဝေ့ဝိုက်ကြည့်ရှုလိုက်သည်။ ထိုအခါ ရွှေအမတေပြီးပြည့်စုံအဆင့်များသာမက ဒြပ်မဲ့အဆင့်ကျွမ်းကျင်သူများပင် သူ၏ အကြည့်ကို တိုက်ရိုက် မရင်ဆိုင်ရဲကြပေ။ သူသည် ဒြပ်မဲ့အဆင့် အထွတ်အထိပ်သို့ ရောက်ရှိနေသူဖြစ်သည်။

ဤလူသည် ချူးယွင်ဖန်း မြင်ဖူးသမျှအနက် ကြောက်မက်ဖွယ်အကောင်းဆုံး ဒြပ်မဲ့အဆင့် အထွတ်အထိပ် ကျွမ်းကျင်သူဖြစ်ပေလိမ့်မည်။ သူ၏ ခန္ဓာကိုယ်အတွင်းရှိ နတ်စွမ်းအင်များသည် ချူးယွင်ဖန်းနှင့်ပင် နှိုင်းယှဉ်နိုင်ဟန်ရှိသည်။ မှန်သည်၊ ဤသည်မှာ ချူးယွင်ဖန်း၏ အတွေးသာ ဖြစ်သည်။ အကယ်၍ သာမန်လူသာဆိုလျှင် ကြောက်လန့်တကြားဖြစ်နေပေလိမ့်မည်။ ထိုသူသည် ဒြပ်မဲ့အဆင့် အထွတ်အထိပ်ဖြစ်၍ ချူးယွင်ဖန်းသည် ရွှေအမတေပြီးပြည့်စုံအဆင့်တွင်သာ ရှိသေးသည်။ ထိုအဆင့်နှင့် ဒြပ်မဲ့အဆင့်အထွတ်အထိပ်ကို နှိုင်းယှဉ်နိုင်ခြင်းသည် အမှန်တကယ် အံ့ဩဖွယ်ကောင်းလှသည်။

‘ဝါး... ကြယ်ကြွေကောင်းကင်ဂိုဏ်းက တကယ့်ကို အထင်ကြီးစရာပဲ၊ အတွင်းစည်းတပည့် ခေါင်းဆောင်ရဲ့ ခွန်အားကတင် ဒီလောက်အင်အားကြီးနေတာ၊ မျိုးစေ့တပည့်တွေနဲ့ တပည့်အရင်းတွေဆိုရင် ဘယ်လောက်တောင် သန်မာလိုက်မလဲ’ ချူးယွင်ဖန်းသည် အံ့ဩတကြီး ရေရွတ်လိုက်သော်လည်း အနည်းငယ်မျှ ကြောက်ရွံ့ခြင်းမရှိပေ။

“ဖန်းယွီကို ဒီမှာ တွေ့ရလိမ့်မယ်လို့ မထင်ထားဘူး” တစ်စုံတစ်ယောက်က ထိုတပည့်၏ အမည်ကို ထုတ်ပြောလိုက်သည်။

“သူက လွန်ခဲ့တဲ့ တစ်နှစ်က နယ်စပ်တပ်ဖွဲ့မှာ သွားလေ့ကျင့်နေတာ မဟုတ်လား၊ ဒီလောက် မြန်မြန် ပြန်ရောက်လာလိမ့်မယ်လို့ ဘယ်သူ ထင်မှာလဲ၊ ဒါပေမယ့် သူ့ခွန်အားတွေတော့ တော်တော်လေး တိုးတက်လာတာပဲ၊ သူ ဒြပ်မဲ့လေ့လာသူအဆင့်ကိုရောက်ဖို့ ခြေလှမ်းတစ်ဝက်ပဲ လိုတော့တယ်”

“သူ့အကြောင်း ကျုပ်ကြားဖူးတယ်၊ ဖန်းယွီက တုနှိုင်းမဲ့ ပါရမီရှင်တစ်ယောက်လေ၊ သူ့ရဲ့ ဘိုးဘေးတွေကလည်း ကြယ်ကြွေကောင်းကင်ဂိုဏ်းရဲ့ တပည့်တွေချည်းပဲ။ သူက ဂိုဏ်းရဲ့တပည့်မျိုးဆက်ကနေ မွေးဖွားလာတာဆိုတော့ ကျုပ်တို့လို အပြင်လူတွေနဲ့ မတူဘူး၊ သူ လွန်ခဲ့တဲ့ သုံးနှစ်ကတည်းက ဒြပ်မဲ့အဆင့်ကို ရောက်ခဲ့တာတဲ့။ သုံးနှစ်အတွင်း ဒီအဆင့်ရဲ့ အထွတ်အထိပ်ကို ရောက်သွားတာဆိုတော့ သူ့ရဲ့ အနာဂတ်က အကန့်အသတ်မဲ့နေမှာ၊ မျိုးစေ့တပည့်အဖြစ် ပြုစုပျိုးထောင်ခံနေရတာလို့လည်း ကျုပ် ကြားဖူးတယ်၊ နောက်ပိုင်း တပည့်အရင်းတစ်ယောက်တောင် ဖြစ်လာနိုင်တယ်”

“ဒါတွေက သတင်းအဟောင်းတွေပါ၊ ဖန်းယွီက ဒြပ်မဲ့လေ့လာသူအဆင့်ကို ရောက်နေတာ ကြာလှပြီ၊ ပြီးတော့ သူက ဒြပ်မဲ့ကျွမ်းကျင်အဆင့် နတ်ဆိုးအိုကြီးတစ်ကောင်နဲ့ တွေ့ပြီး နောက်တန်းကနေ တစ်ယောက်တည်း ခုခံပေးရင်း ပြင်းပြင်းထန်ထန် ဒဏ်ရာရခဲ့တာ၊ သေဘေးကနေ သီသီလေး လွတ်လာခဲ့ပေမယ့် သူ့ရဲ့ ကျင့်စဉ်တွေ အခုထိ ပြန်မကောင်းသေးဘူးဆိုပဲ”

ပတ်ဝန်းကျင်ရှိ လူများသည် အံ့အားသင့်စွာဖြင့် ပင့်သက်ရှိုက်လိုက်ကြသည်။ ဖန်းယွီသည် ဒဏ်ရာမရမီက ဒြပ်မဲ့အဆင့်၏ အထွတ်အထိပ်သို့ ရောက်ရှိနေခဲ့သည်။ သူသာ ပြန်လည် ကျန်းမာလာလျှင် မည်မျှပင် အစွမ်းထက်လာမည်နည်း။ ချူးယွင်ဖန်းပင် ဖန်းယွီကို မချီးကျူးဘဲ မနေနိုင်ဖြစ်နေမိသည်။ သူသာ ထိုကဲ့သို့ ဒြပ်မဲ့ကျွမ်းကျင်အဆင့် ကျွမ်းကျင်သူနှင့် တွေ့ဆုံခဲ့လျှင် ကိုယ့်ကိုယ်ကိုယ် မနည်းကာကွယ်၍ ထွက်ပြေးရပေလိမ့်မည်။ ဖန်းယွီ၏ ခွန်အားသည် တကယ်ပင် ထူးခြားလှပေသည်။

“စမ်းသပ်မှု စတော့မယ်၊ ရွှေအမတေပြီးပြည့်စုံအဆင့် ကျွမ်းကျင်သူတွေက အပြင်စည်းတပည့် စမ်းသပ်ပွဲအတွက် ဘယ်ဘက်မှာ ရပ်ပေးပါ၊ ရွှေအမတေပြီးပြည့်စုံအဆင့် ကျွမ်းကျင်သူ အရေအတွက်က ငါးထောင်ပဲ လက်ခံမှာ၊ ဒြပ်မဲ့အဆင့် ကျွမ်းကျင်သူတွေက ညာဘက်မှာ ရပ်ပေးပါ၊ ဒြပ်မဲ့အဆင့် ကျွမ်းကျင်သူတွေကတော့ သတ်မှတ်ချက်နဲ့ ကိုက်ညီသရွေ့ အရေအတွက် ကန့်သတ်ချက် မရှိပါဘူး” ဖန်းယွီက ပြောလိုက်သည်။

ချူးယွင်ဖန်းက ခေါင်းညိတ်လိုက်သည်။ ကြယ်ကြွေကောင်းကင်ဂိုဏ်းသည် ရွှေအမတေပြီးပြည့်စုံအဆင့်များ လက်ခံရာတွင် ကန့်သတ်ချက်များရှိပုံရသည်။ ၎င်းတို့သည် အသန်မာဆုံးနှင့် ပါရမီအရှိဆုံး ကျွမ်းကျင်သူများကိုသာ ရွေးချယ်လိုကြခြင်းဖြစ်သည်။