ကျွမ်းကျင်အဆင့်

ဘာသာပြန် - အားသစ်

ကိုးထပ်ကိုယ်ခန္ဓာကျင့်စဉ်၏ ဒုတိယနှင့် တတိယအဆင့်များမှာ ဝဲကယက်စွမ်းအား နှစ်ခုနှင့် သုံးခုကို အသီးသီး စုစည်းရန်ပင် ဖြစ်သည်။ တိုက်ပွဲအတွင်း ဝဲကယက်စွမ်းအား နှစ်ခု သို့မဟုတ် သုံးခုကို တစ်ပြိုင်နက်တည်း ထုတ်ဖော်လိုက်ပါက ထွက်ပေါ်လာမည့် တိုးပွားလာသော ခွန်အားမှာ ကြောက်မက်ဖွယ်ကောင်းလှသည်။

ပြိုင်ဘက်ကင်း လက်သီးပဏ္ဍိတအား ဤဘွဲ့အမည်ဖြင့် ခေါ်တွင်ကြခြင်းမှာ သူ၏ လက်သီးသိုင်းမှာ ပဏ္ဍိတအဆင့်သို့ ရောက်ရှိနေသောကြောင့် ဖြစ်သည်။ သူ၏ ကိုးထပ်ကိုယ်ခန္ဓာကျင့်စဉ် တစ်ခုတည်းနှင့်တင် သူ၏ ဘွဲ့အမည်မှာ ဂုဏ်ဒြပ်နှင့် ထိုက်တန်လှပေသည်။

လင်းဖုန်းသည် ကိုးထပ်ကိုယ်ခန္ဓာကျင့်စဉ်၏ ဒုတိယနှင့် တတိယအဆင့်များကို နေ့စဉ်မပြတ် လေ့ကျင့်နေခဲ့သည်။ အမှန်တကယ်တော့ ထိုအဆင့်နှစ်ခုစလုံး၏ အခြေခံသဘောတရားမှာ တူညီသဖြင့် တစ်ပြိုင်နက်တည်း လေ့ကျင့်၍ ရနိုင်သည်။ ကွာခြားချက်မှာ နောက်ထပ် ဝဲကယက်စွမ်းအား တစ်ခု ပိုလာခြင်းသာ ဖြစ်သည်။

သို့သော် လေ့ကျင့်နေစဉ်အတွင်း လင်းဖုန်းသည် ကိုးထပ်ကိုယ်ခန္ဓာကျင့်စဉ်၏ အရေးအကြီးဆုံး အချက်တစ်ချက်ကို ရှာဖွေတွေ့ရှိခဲ့သည်။ ယင်းမှာ ခန္ဓာကိုယ် ကြံ့ခိုင်မှုပင် ဖြစ်သည်။ ဝဲကယက်စွမ်းအားများ ပေါက်ကွဲထွက်လာချိန်တွင် ခန္ဓာကိုယ်အပေါ် သက်ရောက်မည့် ရိုက်ခတ်မှုမှာ မည်မျှအထိ ပြင်းထန်မည်နည်း။

သာမန်လူတစ်ယောက်အတွက် မှန်းဆရန် ခက်ခဲသော်လည်း လက်တွေ့တွင် ဝဲကယက်စွမ်းအား တစ်ခုတည်းကိုပင် ကျွမ်းကျင်ရန်နှင့် ၎င်း၏ ပေါက်ကွဲအားကို ခံနိုင်ရည်ရှိရန်အတွက် ထိပ်တန်း အဆင့်ကိုး ပရော်ဖက်ရှင်နယ် သိုင်းသမားတစ်ဦး၏ ကြံ့ခိုင်မှုမျိုး လိုအပ်သည်။

အကယ်၍ ဒုတိယနှင့် တတိယအဆင့်များဆိုလျှင် ဝဲကယက်စွမ်းအား သုံးခု၏ ပေါက်ကွဲအားကို မည်သူက တောင့်ခံနိုင်ပါမည်နည်းဟု လင်းဖုန်း တွေးတောမိသည်။ ဖြစ်နိုင်သည်မှာ မွေးရာပါ ထူးခြားသော စွမ်းအားရှိသူများ သို့မဟုတ် အလွန်အမင်း သန်မာသော ခန္ဓာကိုယ် ပိုင်ဆိုင်ထားသူများသာလျှင် ၎င်းကို ကျွမ်းကျင်နိုင်ပေလိမ့်မည်။

ဤသည်မှာလည်း ကိုးထပ်ကိုယ်ခန္ဓာကျင့်စဉ်၏ ပထမသုံးဆင့်ကိုသာ အများပြည်သူသို့ ရောင်းချရသည့် အကြောင်းရင်းဖြစ်ကြောင်း အကောင်းဆုံး သက်သေပင်။ စတုတ္ထအဆင့်မှာမူ မည်သည့်နေရာတွင်မှ ဝယ်ယူ၍မရပေ။ ပြိုင်ဘက်ကင်း လက်သီးပဏ္ဍိတအနေဖြင့် ဤအခြေအနေကို ကြိုတင်တွက်ချက်ထားပုံရသည်။ ဝဲကယက်စွမ်းအား သုံးခုမှာ သာလွန်လူသား အဆင့်အောက်ရှိ သိုင်းသမားများ တောင့်ခံနိုင်သည့် အမြင့်ဆုံး အကန့်အသတ် ဖြစ်ပေလိမ့်မည်။

လင်းဖုန်းသည် ကိုးထပ်ကိုယ်ခန္ဓာကျင့်စဉ်၏ ဒုတိယနှင့် တတိယအဆင့်များကို ဝယ်ယူသူ အရေအတွက်ကိုလည်း သေချာ စစ်ဆေးကြည့်ခဲ့သည်။ ဒုတိယအဆင့်ကို ဝယ်ယူသူမှာ ၃၆ ဦး ရှိပြီး တတိယအဆင့်မှာ ၃၀ သာ ရှိသည်။

ထိုအထဲတွင် ငွေအလွန်ပေါသော အထက်တန်းလွှာ မိသားစုများမှ သားသမီးများလည်း ပါဝင်နိုင်ပေသည်။ သူတို့သည် အမြင်ကျယ်စေရန်အတွက်သာ ဝယ်ယူထားခြင်း ဖြစ်နိုင်သည်။ ထိုသူများကို ဖယ်ထုတ်လိုက်လျှင်ပင် အမှန်တကယ် ကျွမ်းကျင်သွားသူမှာ အယောက် ၂၀ ခန့် ရှိနိုင်သေးသည်။

ဤအရေအတွက်မှာ ယခင်နှစ်များစွာကတည်းက စုစုပေါင်း ဝယ်ယူထားသည့် အရေအတွက် ဖြစ်သည်။ သမိုင်းတစ်လျှောက် ပါရမီရှင် မည်မျှအထိ ပေါ်ထွက်ခဲ့သည်ကို ထည့်တွက်ကြည့်လျှင် ဤကျင့်စဉ်ကို ကျွမ်းကျင်သည့် ပါရမီရှင် အခါအားလျော်စွာ ပေါ်ထွက်လာခြင်းမှာ အံ့သြစရာ မဟုတ်ပေ။

နေ့ရက်များ ကုန်ဆုံးသွားသော်လည်း လင်းဖုန်းသည် ဒုတိယနှင့် တတိယအဆင့်များကို မကျွမ်းကျင်သေးပေ။ ဤသည်မှာ ပုံမှန်သာ ဖြစ်သည်။ အကယ်၍ လွယ်လွယ်ကူကူ ကျွမ်းကျင်နိုင်မည်ဆိုပါက ပြိုင်ဘက်ကင်း လက်သီးပဏ္ဍိတ ဖန်တီးထားသော သိုင်းပညာ ဖြစ်လိမ့်မည် မဟုတ်ပေ။

လင်းဖုန်းမှာ စိုးရိမ်စိတ် မဝင်ခဲ့ပေ။ သူသည် အပြင်သို့ပင် မထွက်တော့ဘဲ အဆောင်အတွင်း၌သာ ဆက်လက် လေ့ကျင့်နေတော့သည်။

အဆောင်အတွင်း၌သာ အချိန်ကုန်ဆုံးနေသည့် လင်းဖုန်းနှင့် မတူဘဲ ဖုန်းရှို့မှာမူ လူသိထင်ရှား လှုပ်ရှားနေသည်။ ဘာပဲဖြစ်ဖြစ် သူသည် "သားရဲရိတ်သိမ်းသူ" အတွဲထဲမှ တစ်ဦး မဟုတ်ပါလား။

ယခုအခါ နဂါးတောင် အခြေစိုက်စခန်းတွင် သားရဲရိတ်သိမ်းသူများမှာ အတော်ပင် နာမည်ကြီးနေသည်။ ဖုန်းရှို့သည် အမှတ်များစွာ ရရှိထားသဖြင့် အရင်းအမြစ်များ ဝယ်ယူနိုင်စွမ်းမှာလည်း သိသိသာသာ မြင့်တက်လာခဲ့ပြီး နဂါးတောင် အခြေစိုက်စခန်း၏ နာမည်ကျော် တစ်ဦး ဖြစ်လာခဲ့သည်။

“ဖုန်းရှို့... မင်း အခုတလော အမှတ်တွေ အများကြီး ရထားတယ် မဟုတ်လား”

ဖုန်းရှို့နှင့် သိကျွမ်းသော သိုင်းသမားအချို့က မနာလိုစွာဖြင့် မေးမြန်းကြသည်။

“အစ်ကိုဖုန်းက အခုတလော သိုင်းကျင့်နေလို့ အပြင်မထွက်ဖြစ်သေးဘူး”

ဖုန်းရှို့က အအေးတစ်ပုလင်းကို တစ်ငုံသောက်ကာ ပေါ့ပေါ့ပါးပါးပင် ပြန်ဖြေလိုက်သည်။ ထိုသူများမှာ ဖုန်းရှို့ကို အလွန်ပင် မနာလိုဖြစ်နေကြသည်။ ဖုန်းရှို့မှာ ဘာမှပင် မလုပ်ရဘဲ အမှတ်များစွာ ရရှိနေသော်လည်း သူတို့မှာမူ အသက်နှင့်လဲ၍ ကြိုးစားလျှင်ပင် အမှတ်အနည်းငယ်သာ ရရှိကြသည် မဟုတ်ပါလား။

ဖုန်းရှို့မှာ ကံကောင်းစွာဖြင့် လင်းဖုန်းနောက်သို့ လိုက်ပါခွင့်ရခဲ့ခြင်း ဖြစ်ရာ သူတို့ ဘာမှ မတတ်နိုင်ပေ။

“ဖုန်းရှို့... ငါတို့တော့ မင်းကို တကယ် မနာလိုတာပဲ။ မင်းမှာ ဘာအန္တရာယ်မှ မရှိဘဲ နေ့တိုင်း အမှတ်တွေ အများကြီး ရနေတာ။ ဒါနဲ့ မင်းတို့ နှစ်ယောက် ဘာလို့ ရှေ့တန်းကို မသွားတာလဲ။ မင်းခေါင်းဆောင်ရဲ့ ခွန်အားနဲ့ဆိုရင် ရှေ့တန်းမှာလည်း အန္တရာယ် ရှိမှာ မဟုတ်ပါဘူး။ အဲဒီမှာ သားရဲတွေ အများကြီး ရှိသလို အခုတလော အထက်လူကြီးတွေက အဆုံးအဖြတ် တိုက်ပွဲအတွက် ပြင်ဆင်နေကြတယ်လို့ ကြားတယ်။ အဲဒီ တိုက်ပွဲသာ စတင်လိုက်ရင် အမှတ်တွေ ရှာဖို့ အခွင့်အရေးကြီးပဲ။ အဲဒီကာလအတွင်းမှာ အမှတ်တွေက နှစ်ဆ ရမှာကွ”

“ဘာ... နှစ်ဆ ဟုတ်လား။ အဲဒါ ဘယ်ကကြားခဲ့တာလဲ”

ဖုန်းရှို့၏ မျက်လုံးများမှာ တောက်ပသွားပြီး အလျင်အမြန် မေးလိုက်သည်။

“ဘယ်ကမှ ကြားစရာတောင် မလိုဘူး။ ရှေ့တန်းမှာ ဒါက နာမည်ကြီးနေတာ။ မျိုးရိုးဗီဇကန့်သတ်ချက်ကို ချိုးဖျက်ထားတဲ့ သာလွန်လူသား ကျွမ်းကျင်သူ ၁၀ ယောက်ကျော်တောင် ရောက်နေပြီလို့ ကြားတယ်။ ဒါက အဆုံးအဖြတ် တိုက်ပွဲဖြစ်တော့မယ့် လက္ခဏာပဲ။ ရှေ့တန်းက အကျိုးပြုမှတ် စာရင်းမှာ ပါတဲ့ ထိပ်သီး ၂၀ စလုံးလည်း ဒီအခွင့်အရေးကို လက်လွတ်မခံချင်လို့ ရှေ့တန်းကို သွားကုန်ကြပြီ”

ဖုန်းရှို့ စဉ်းစားစရာ ဖြစ်သွားသည်။ သူတို့သည် နဂါးတောင် နယ်မြေတစ်ခုလုံးကို လှည့်ပတ်ကာ သားရဲများကို ရိတ်သိမ်းခဲ့သော်လည်း ရှေ့တန်းသို့မူ မရောက်ဖြစ်သေးပေ။ အခြေစိုက်စခန်း အနီးတဝိုက်တွင်လည်း ရိတ်သိမ်းစရာ သားရဲ အများအပြား မကျန်တော့ပေ။

အကယ်၍ ရှေ့တန်းတွင် တိုက်ပွဲကြီး ဖြစ်ပွားတော့မည်ဆိုပါက အမှတ်များမှာလည်း နှစ်ဆ ရရှိမည် ဖြစ်ရာ ၎င်းမှာ အလွန် ကောင်းမွန်သော အရာပင်။ လင်းဖုန်းအနေဖြင့် ဤအခွင့်အရေးကို လက်လွတ်ခံစရာ အကြောင်းမရှိပေ။

“ကောင်းပြီ... ငါ စုံစမ်းကြည့်လိုက်ဦးမယ်။ အဲဒါ တကယ်ဆိုရင် အစ်ကိုဖုန်း စိတ်ဝင်စားမှာ သေချာတယ်”

ဖုန်းရှို့သည် ချက်ချင်းပင် အရေးတယူပြုကာ အလျင်အမြန် ဆောင်ရွက်သည်။ ဖုန်းရှို့သည် သူ၏ အဆက်အသွယ်များကို အသုံးပြုကာ ရှေ့တန်းမှ သတင်းများကို အလျင်အမြန် စုံစမ်းတော့သည်။

ဤကိစ္စမှာ လျှို့ဝှက်ချက် မဟုတ်ပေ။ ရှေ့တန်းတွင် လူအများအပြား ရှိနေသဖြင့် အဆုံးအဖြတ် တိုက်ပွဲကြီးမှာ မကြာမီ စတင်တော့မည် ဖြစ်ကြောင်း အတည်ပြုနိုင်ခဲ့သည်။

ဖုန်းရှို့သည် ဤသည်မှာ တစ်သက်တွင် တစ်ခါသာ ကြုံရမည့် အခွင့်အရေး ဖြစ်ကြောင်း သိလိုက်ရသည်။ လင်းဖုန်း၏ ခွန်အားဖြင့် ရှေ့တန်း တိုက်ပွဲတွင် ပါဝင်မည်ဆိုပါက အကယ်ဒမီအမှတ်နှင့် အကျိုးပြုမှတ် မည်မျှအထိ ရရှိနိုင်မည်နည်း။ တွေးကြည့်ရုံနှင့်ပင် အံ့မခန်းလှသည်။

ထို့ကြောင့် ဖုန်းရှို့သည် လင်းဖုန်းရှိရာ အဆောင်သို့ ချက်ချင်း အပြေးအလွှား သွားလိုက်တော့သည်။

ဝုန်း...

လင်းဖုန်း၏ လက်မောင်းမှာ ရုတ်တရက် ဖောင်းကားလာပြီး သူ၏ ပေါင်ထက်ပင် ပိုမို ကြီးမားသွားသည်။ သူ ခပ်ဖွဖွ တစ်ချက် ထိုးလိုက်ရုံဖြင့် အဆောင်တစ်ခုလုံး တုန်ခါသွားသကဲ့သို့ပင်။

“အောင်မြင်ပြီ။ ဝဲကယက်စွမ်းအား သုံးခုရဲ့ ပေါက်ကွဲအားက တကယ့်ကို ကြောက်စရာပဲ။ ငါ့ရဲ့ လက်ရှိ ကြံ့ခိုင်မှုနဲ့တောင် တောင့်ခံဖို့ မလွယ်ဘူး။ တတိယအဆင့်ကို တခြား ဘယ်သူတွေ ကျွမ်းကျင်နိုင်ဦးမလဲဆိုတာ တကယ် သိချင်မိတယ်”

လင်းဖုန်း သက်ပြင်းရှည်ကြီး တစ်ချက် ချလိုက်သည်။ သူသည် ကိုးထပ်ကိုယ်ခန္ဓာကျင့်စဉ်၏ တတိယအဆင့်အပေါ် အလွန် ကျေနပ်နေမိသည်။ ဝဲကယက်စွမ်းအား သုံးခု တစ်ပြိုင်နက်တည်း ပေါက်ကွဲထွက်လာပါက ခွန်အားမှာ သုံးဆကျော် တိုးသွားမည် ဖြစ်ပြီး တစ်ခဏချင်းအတွင်း ၃၂ တန်ကျော်သော ခွန်အားကို ထုတ်ဖော်နိုင်မည် ဖြစ်သည်။

ဤမျှ ကြောက်မက်ဖွယ်ကောင်းသော ခွန်အားမှာ မှန်းဆကြည့်ရန်ပင် ခက်ခဲလှသည်။ လင်းဖုန်းသည် ယခုအခါ လက်သီးတစ်ချက်တည်းနှင့်ပင် သားရဲဘုရင် တစ်ကောင်ကို သတ်နိုင်လိမ့်မည်ဟု ခံစားနေရသည်။

သို့သော် ဝဲကယက်စွမ်းအား သုံးခုကို အသုံးပြုခြင်းမှာ လင်းဖုန်း၏ ခန္ဓာကိုယ်အတွက်လည်း များစွာ ဝန်ထုပ်ဝန်ပိုး ဖြစ်စေသည်။ သူ၏ လက်ရှိ ကြံ့ခိုင်မှုဖြင့်ဆိုလျှင် ၁၂ ကြိမ်ခန့်သာ ဆက်တိုက် အသုံးပြုနိုင်ပြီး ထို့ထက် ပိုပါက ခန္ဓာကိုယ်ကို ထိခိုက်စေနိုင်ပေလိမ့်မည်။

ဤစကားကို အခြား သိုင်းသမားများ ကြားလျှင် ဆွံ့အသွားကြမည်မှာ သေချာသည်။ အခြားသူများမှာ တတိယအဆင့်ကို ကျွမ်းကျင်လျှင်ပင် အသက်ဘေးကြုံမှသာ နောက်ဆုံးလက်နက်အဖြစ် သုံးကြရခြင်း ဖြစ်သည်။

အသုံးပြုလိုက်တိုင်း သူတို့၏ ခန္ဓာကိုယ်မှာ ထိခိုက်ဒဏ်ရာ ရသွားတတ်ပြီး တိုက်ခိုက်နိုင်စွမ်းပင် ဆုံးရှုံးသွားတတ်ကြသည်။ လင်းဖုန်းကဲ့သို့ ၁၂ ကြိမ်ခန့် ဆက်တိုက် အသုံးပြုနိုင်ရန်မှာ မဖြစ်နိုင်ပေ။ အကယ်၍ လင်းဖုန်းက အသက်နှင့်လဲ၍ တိုက်ခိုက်မည်ဆိုပါက ခန္ဓာကိုယ် ဒဏ်ရာရမည်ကို ဂရုမစိုက်ဘဲ အကြိမ် ၂၀ အထိပင် ထုတ်ဖော်နိုင်ပေလိမ့်မည်။

ဤမျှ သန်မာသော ကြံ့ခိုင်မှုမျိုးမှာ သားရဲမျိုးရိုးဗီဇ သုံးမျိုးကို ပေါင်းစပ်ထားသော လင်းဖုန်းအတွက်သာ ဖြစ်နိုင်ပေသည်။

“အစ်ကိုဖုန်း... ကျွန်တော် အရေးကြီးကိစ္စ ပြောစရာ ရှိတယ်”

ရုတ်တရက် အခန်းပြင်ပမှ ဖုန်းရှို့၏ အသံ ထွက်ပေါ်လာသည်။