အဆုံးအဖြတ် တိုက်ပွဲ

ဘာသာပြန် - အားသစ်

“ဘာ... အမှတ် ၁၀၀,၀၀၀ ဟုတ်လား။ ဆုကြေးက ဘာလို့ ဒီလောက်တောင် များနေရတာလဲ”

လင်းဖုန်းပင်လျှင် အံ့အားသင့်သွားရသည်။ ၎င်းမှာ အမှတ် တစ်သောင်း၊ နှစ်သောင်း မဟုတ်ဘဲ ၁၀၀,၀၀၀ တိတိ ဖြစ်သည်။ အကယ်၍ ငွေကြေးနှင့် တွက်ချက်မည်ဆိုပါက ယွမ် ဘီလီယံ ၁၀၀ ပင် ဖြစ်သည်။

လင်းဖုန်းသည် စီးပွားရေးသမား မိသားစုမှ မွေးဖွားလာသူ ဖြစ်သဖြင့် ယွမ် ဘီလီယံ ၁၀၀ ၏ တန်ဖိုးကို ကောင်းကောင်း သိသည်။ လင်းကော်ပိုရေးရှင်း တစ်ခုလုံး၏ တန်ဖိုးမှာပင် ဘီလီယံ ရာဂဏန်းခန့်သာ ရှိသည် မဟုတ်ပါလား။ ယခုမူ ဤဆုကြေးတစ်ခုတည်းနှင့်တင် ဘီလီယံ ၁၀၀ ရရှိမည် ဖြစ်သည်။

ဤသည်မှာ မယုံနိုင်စရာပင်။ ထို့အပြင် ဤအမှတ်များကို မည်သူက ပေးအပ်သည်ကိုလည်း လင်းဖုန်း သိရှိထားသည်။ ၎င်းမှာ မျိုးရိုးဗီဇကန့်သတ်ချက်ကို ချိုးဖျက်ထားသော သာလွန်လူသား ၁၆ ဦး စုပေါင်း၍ ဆုချခြင်း ဖြစ်သည်။

မျိုးရိုးဗီဇကန့်သတ်ချက်ကို ချိုးဖျက်ထားသော သာလွန်လူသားများသည် အလွန် ချမ်းသာကြကြောင်း သူ ကြားဖူးသည်။ အထူးသဖြင့် ရှေ့တန်းတွင် နှစ်ရှည်လများ တိုက်ပွဲဝင်နေကြသော သာလွန်လူသားများမှာ ပို၍ပင် ချမ်းသာကြပေလိမ့်မည်။ သို့သော် မျက်မြင်ကိုယ်တွေ့ မကြုံဖူးသဖြင့် သူတို့ မည်မျှအထိ ချမ်းသာသည်ကို လင်းဖုန်း အတိအကျ မသိခဲ့ပေ။

ယခုမူ လင်းဖုန်း ကိုယ်တိုင် မြင်တွေ့လိုက်ရပြီ ဖြစ်သည်။ အမှတ် ၁၀၀,၀၀၀ ကို အလွယ်တကူ ထုတ်ပေးနိုင်ခြင်းက ထိုသာလွန်လူသားများ မည်မျှအထိ ကြွယ်ဝကြောင်း သက်သေပြနေသည်။

သို့သော်လည်း သူတို့ မည်မျှပင် ချမ်းသာပါစေ ဤမျှအထိ ရက်ရောရန် မလိုအပ်ပေ။ ထို့အပြင် ပထမဆုကို အမှတ် ၁၀၀,၀၀၀ ပေးသော်လည်း ဒုတိယနှင့် တတိယဆုကိုမူ ၂၀,၀၀၀ နှင့် ၁၀,၀၀၀ သာ ပေးထားသည်။

ကွာဟချက်မှာ ကြီးမားလွန်းလှသည်။ ဖြစ်နိုင်သည့် အကြောင်းရင်းမှာ တစ်ခုတည်းသာ ရှိသည်။ ယင်းမှာ သိုင်းသမား အားလုံးကို ပထမနေရာ ရရှိရန်အတွက် အပြိုင်အဆိုင် တိုက်ခိုက်စေလိုခြင်းပင် ဖြစ်သည်။

“အမှတ် ၁၀၀,၀၀၀... အနန္တလမ်းစဉ်အကယ်ဒမီရဲ့ အွန်လိုင်းစျေးဆိုင်မှာ ပစ္စည်းဝယ်ရင် ၄၀ ရာခိုင်နှုန်းအထိ လျှော့စျေး ရနိုင်တယ်။ ဒါတင်မကဘူး၊ ဒါက အရမ်းကို များပြားတဲ့ အရင်းအမြစ်တွေပဲ။ အကယ်၍ အမှတ်တွေ ပိုနေရင်တောင် တခြား အရင်းအမြစ်တွေနဲ့ လဲလှယ်ပြီး ငါ့မိသားစုကို ပြန်ပို့ပေးလို့ ရတယ်”

လင်းဖုန်း စိတ်လှုပ်ရှားသွားသည်။ အမှတ် ၁၀၀,၀၀၀ ဆိုသည်မှာ မည်သူမဆို မက်မောမည့် အရေအတွက် ဖြစ်သည်။

“ငါ ဒီပထမဆုကို ရအောင်ယူမယ်”

လင်းဖုန်း တိုးတိုးလေး ရေရွတ်လိုက်ပြီး သူ၏ မျက်ဝန်းထဲတွင် ပြတ်သားသော အရိပ်အယောင်များ ဖြတ်ပြေးသွားသည်။

တပ်ရင်း (၁) တွင်ရှိသော အကျိုးပြုမှတ် စာရင်း၏ နံပါတ် (၁) တောင်ပံနီ ရွှေယွမ်ရှန်းလည်း ဤဆုကြေးသတင်းကို ရရှိထားသည်။ သူ့အတွက်ပင်လျှင် အမှတ် ၁၀၀,၀၀၀ ဆိုသည်မှာ ကြီးမားသော ပမာဏ ဖြစ်သည်။

သူသည် နဂါးတောင် အခြေစိုက်စခန်းတွင် နှစ်ပေါင်းများစွာ နေထိုင်ခဲ့သော်လည်း စုစုပေါင်း အမှတ် ၁၃၀,၀၀၀ သာ ရှာဖွေနိုင်ခဲ့သည်။ ထို့ကြောင့် တစ်ကြိမ်တည်းနှင့် အမှတ် ၁၀၀,၀၀၀ ရရှိမည့် အခွင့်အရေးကို သူ လက်လွတ်ခံလိမ့်မည် မဟုတ်ပေ။

“ဒီပထမနေရာက ငါ့အတွက်ပဲ။ ဘယ်သူမှ လာလုလို့ မရဘူး”

တပ်ရင်း (၃) တွင်မူ ကျောပေါ်၌ ပုဆိန်ကြီး နှစ်လက်ကို ထမ်းထားသည့် လူသန်ကြီးတစ်ဦး၏ မျက်ဝန်းထဲတွင် ရူးသွပ်မှုများ အထင်းသား ပေါ်နေသည်။

“ဟဲ... အမှတ် ၁၀၀,၀၀၀ တဲ့လား။ ရွှေယွမ်ရှန်း... မင်းလို အခြောက်လိုကောင်က ငါ့ကို ယှဉ်နိုင်မှာ မဟုတ်ဘူး။ ဒီတစ်ခါ ပထမနေရာက ငါ့အတွက်ပဲ ဖြစ်ရမယ်၊ ဟားဟား”

ထိုသူမှာ အကျိုးပြုမှတ် စာရင်း၏ ဒုတိယနေရာတွင် ရှိသော အာဏာရှင်ပုဆိန် ဂေါင်ထျန်းချီပင် ဖြစ်သည်။ သူသည် မွေးကတည်းက မျိုးရိုးဗီဇတွင် ထူးခြားသော သန္ဓေပြောင်းလဲမှု တစ်ခု ဖြစ်ပေါ်ခဲ့သူ ဖြစ်သည်။ သူ၏ မိဘများမှာ သာလွန်လူသားများ မဟုတ်ကြသော်လည်း သူသည် ရှားပါးသော မျိုးရိုးဗီဇသန္ဓေပြောင်းလဲမှုကြောင့် ထွားကြိုင်းသော ကိုယ်ခန္ဓာ၊ အံ့မခန်း ခွန်အားနှင့် သိုင်းပညာ ပါရမီတို့ကို ပိုင်ဆိုင်ထားခြင်း ဖြစ်သည်။

ထို့အပြင် ဂေါင်ထျန်းချီတွင် ဒေါသပေါက်ကွဲခြင်း အထူးစွမ်းအားလည်း ရှိသေးသည်။ ထိုအခြေအနေသို့ ရောက်ရှိသွားပါက သူ၏ ခွန်အားမှာ အဆမတန် တိုးပွားလာမည် ဖြစ်သည်။ စွမ်းအားပိုင်းတွင် သူသည် ရွှေယွမ်ရှန်းထက် အနည်းငယ် နိမ့်ပါးနိုင်သော်လည်း သတ်ဖြတ်ခြင်း အပိုင်းတွင်မူ သူသည် အနည်းငယ်မျှ မလျော့ပါးသည့်အပြင် ပို၍ပင် သန်မာနိုင်သေးသည်။ ထို့ကြောင့် ဂေါင်ထျန်းချီမှာ ဤတစ်ကြိမ်တွင် ပထမနေရာကို ရရှိရန် ဆုံးဖြတ်ထားခြင်း ဖြစ်သည်။

တပ်ခွဲ (၆) တွင်မူ သာမန် သိုင်းသမား သုံးဦး စုဝေးကာ ဆွေးနွေးနေကြသည်။

“အစ်ကိုရှန်း... ဒါက အစ်ကို့အတွက် အခွင့်အရေးကောင်းပဲ။ အကယ်၍ အဆုံးအဖြတ် တိုက်ပွဲမှာ အကျိုးပြုမှတ် အများဆုံး အမှတ် ၁၀၀,၀၀၀ ရမှာဗျ”

“ဟုတ်တယ်... အကယ်၍ အစ်ကိုရှန်းသာ ဒီအမှတ် ၁၀၀,၀၀၀ ကို ရရင် နောက်ပိုင်းမှာ အသက်နဲ့ရင်းပြီး အမှတ်ရှာနေဖို့ မလိုတော့ဘူး။ အစ်ကို့မိသားစုရဲ့ အခြေအနေလည်း အများကြီး ကောင်းသွားမှာ”

ထိုသူတို့ ပြောနေသည်မှာ အကျိုးပြုမှတ် စာရင်း၏ တတိယနေရာတွင် ရှိသော ယွီရှန်း အကြောင်းပင် ဖြစ်သည်။ သူ၏ မိသားစုမှာ ဆုတ်ယုတ်ပျက်စီးနေပြီ ဖြစ်ရာ ယွီရှန်းက နှစ်စဉ် ရှာဖွေရရှိသော အမှတ်များကို အရင်းအမြစ်များနှင့် လဲလှယ်ကာ မိသားစုထံ ပြန်ပို့ပေးနေရခြင်း ဖြစ်သည်။

အမှန်တကယ်တော့ ယွီရှန်း၏ ဘက်စုံစွမ်းရည်မှာ အကောင်းဆုံး ဖြစ်သည်။ ထိပ်သီး သုံးယောက်ထဲတွင် သူသည် မျိုးရိုးဗီဇကန့်သတ်ချက်ကို ချိုးဖျက်ရန် အနီးစပ်ဆုံး ဖြစ်သော်လည်း မိသားစုကို အစဉ်တစိုက် ထောက်ပံ့နေရသဖြင့် သူကိုယ်တိုင် တိုးတက်ရန်အတွက် နှောင့်နှေးနေခဲ့ရခြင်း ဖြစ်သည်။

“အမှတ်တစ်သိန်းဆိုတာ တကယ်ကို များပြားတဲ့ ပမာဏပဲ။ ငါ့မိသားစုရဲ့ အခက်အခဲတွေကို ဖြေရှင်းဖို့ လုံလောက်တယ်။ ငါ ပထမနေရာကို ရအောင်ယူရမယ်”

ယွီရှန်းသည် လက်သီးကို တင်းတင်းဆုပ်လိုက်ပြီး သူ၏ မျက်ဝန်းထဲတွင် ပြတ်သားမှုများ ပြည့်နှက်နေသည်။

တစ်ချိန်တည်းမှာပင် မရေမတွက်နိုင်သော သိုင်းသမားများမှာ အဆုံးအဖြတ် တိုက်ပွဲအတွက် ပြင်ဆင်နေကြသည်။ သို့သော်လည်း ထိပ်ဆုံးသုံးယောက် စာရင်းဝင်ရန် မျှော်လင့်ထားသူမှာ အနည်းငယ်သာ ရှိသည်။

အထူးသဖြင့် ပထမနေရာကို လူအများစုက ကြိုတင် လက်လျှော့ထားကြသည်။ အဘယ်ကြောင့်ဆိုသော် အကျိုးပြုမှတ် စာရင်း၏ ထိပ်သီး သုံးယောက်မှာ ဤပထမနေရာကို အခြားသူထံ ပေးလိမ့်မည် မဟုတ်ကြောင်း လူတိုင်း သိထားသောကြောင့် ဖြစ်သည်။

ဤအချိန်တွင် လင်းဖုန်းသည်လည်း ပြိုင်ဘက်များ၏ အချက်အလက်များကို စုဆောင်းနေသည်။ သူသည် ပြိုင်ဘက်များ၊ အထူးသဖြင့် ပထမနေရာတွင် ရှိနေသူကို လေ့လာရန် လိုအပ်သည် မဟုတ်ပါလား။

“ဖုန်းရှို့... မင်း နဂါးတောင် အခြေစိုက်စခန်းမှာ နေလာတာ ကြာပြီဆိုတော့ သာလွန်လူသား အဆင့်အောက်မှာ ဘယ်သူတွေက အသန်မာဆုံးလဲဆိုတာ သိလား” လင်းဖုန်းက မေးလိုက်သည်။

“အသန်မာဆုံးတွေလား... အကျိုးပြုမှတ် အဆင့်ဇယားရဲ့ ထိပ်သီး သုံးယောက်ပဲ ဖြစ်မယ် ထင်တယ်။ သူတို့က တောင်ပံနီ ရွှေယွမ်ရှန်း၊ အာဏာရှင်ပုဆိန် ဂေါင်ထျန်းချီနဲ့ ယွီရှန်းတို့ပဲ။ သူတို့ သုံးယောက်စလုံးက မျိုးရိုးဗီဇကန့်သတ်ချက်ကို ချိုးဖျက်နိုင်ဖို့ အခွင့်အရေး အရှိဆုံး ပါရမီရှင်တွေလေ။ သူတို့ရဲ့ ခွန်အားက အမြင့်ဆုံး အဆင့်ကို ရောက်နေပြီမို့ နဂါးတောင် အခြေစိုက်စခန်းက တခြားသူတွေနဲ့ယှဉ်ရင် အများကြီး ကွာခြားတယ်”

“အင်း... ငါလည်း သူတို့ သုံးယောက်အကြောင်း နည်းနည်း ကြားဖူးတယ်။ သူတို့ သုံးယောက်ပဲ အကျိုးပြုမှတ် ၁၀၀,၀၀၀ ကျော် ရထားတာ မဟုတ်လား”

လင်းဖုန်း စဉ်းစားနေမိသည်။ ထိုသုံးဦးစလုံး ရှေ့တန်းသို့ ရောက်ရှိနေမည်မှာ သေချာလှသည်။ ဤမျှ ဆုကြေးများပြားသော တိုက်ပွဲတွင် သူတို့ အစွမ်းကုန် ကြိုးစားကြပေလိမ့်မည်။

သို့သော် လင်းဖုန်းမှာ ကြောက်ရွံ့ခြင်း မရှိပေ။ သူသည် သားရဲမျိုးရိုးဗီဇ သုံးမျိုးကို ပေါင်းစပ်ထားသလို ကိုးထပ်ကိုယ်ခန္ဓာကျင့်စဉ်၏ ဒုတိယနှင့် တတိယအဆင့်များကိုလည်း ကျွမ်းကျင်ထားပြီ ဖြစ်သည်။ သူ၏ လက်ရှိ ခွန်အားမှာ မည်မျှအထိ ရှိမည်ကို သူကိုယ်တိုင်ပင် အတိအကျ မသိသော်လည်း ပုံရိပ်ယောင် တိုက်ပွဲခန်း၏ ထိပ်သီး ၁၀ ယောက်စာရင်းကို စိန်ခေါ်ရန် ခဲယဉ်းလှမည် မထင်ပေ။

နတ်ဆိုးဘုရင် တုန်ဖန်းရှန်နှင့် ယှဉ်နိုင်၊ မယှဉ်နိုင် ဆိုသည်မှာမူ တိုက်ခိုက်ကြည့်မှသာ သိရပေလိမ့်မည်။

ထို့ကြောင့် ပြိုင်ဘက်များအကြောင်း အနည်းငယ် လေ့လာပြီးနောက် လင်းဖုန်းမှာ ထပ်မံ စုံစမ်းခြင်း မပြုတော့ပေ။ သူ၏ ပြိုင်ဘက်က မည်သူဖြစ်ပါစေ သူသည် ပထမနေရာကိုသာ ရအောင်ယူမည် ဖြစ်သည်။

“ဖုန်းရှို့... အဆုံးအဖြတ် တိုက်ပွဲ စတာနဲ့ ငါတို့ ခဏ လမ်းခွဲကြရအောင်။ မင်း ကိုယ့်ကိုယ်ကိုယ် ဂရုစိုက်ပါ”

“ဟဲ... စိတ်မပူပါနဲ့ အစ်ကိုဖုန်းရဲ့။ ကျွန်တော်က သားရဲရိတ်သိမ်းသူ နှစ်ယောက်ထဲက တစ်ယောက်ပဲ၊ ဒီလောက်လွယ်လွယ်နဲ့ ဒဏ်ရာမရပါဘူး။ အဲဒီအစား အစ်ကိုဖုန်းက ထိပ်ဆုံးသုံးယောက် စာရင်းဝင်ဖို့ အခွင့်အရေး ရှိတယ် မဟုတ်လား။ အစ်ကိုသာ ထိပ်ဆုံး သုံးယောက်ထဲ ပါသွားရင် ကျွန်တော်လည်း မျက်နှာပွင့်ပြီပေါ့၊ ဟားဟား”

လင်းဖုန်း ပြုံးလိုက်သော်လည်း ပြန်မဖြေခဲ့ပေ။ ထိပ်ဆုံး သုံးယောက်လား။ သူ၏ ပန်းတိုင်မှာ ထိပ်ဆုံး သုံးယောက် မဟုတ်ပေ။ ပထမနေရာသာ ဖြစ်သည်။

“စစ်သေနာပတိချုပ်... အချိန်တန်ပါပြီ”

စစ်သေနာပတိချုပ် လုံကျိုးနှင့် အခြား တပ်ရင်းမှူး ၁၅ ဦးစလုံး ရှေ့တန်းသို့ ရောက်ရှိလာကြသည်။ ရှေ့တန်းရှိ ပရော်ဖက်ရှင်နယ် သိုင်းသမား အုပ်ကြီးကို ကြည့်ကာ လုံကျိုး၏ နှုတ်ခမ်းဖျားတွင် အပြုံးတစ်ခု ပေါ်လာခဲ့သည်။

“ဒီကလေးတွေ ကံကောင်းပါစေလို့ပဲ မျှော်လင့်ပါတယ်။ အခုပဲ အမိန့်ပေးလိုက်တော့... တိုက်ခိုက်ကြ”

လုံကျိုး၏ အမိန့်နှင့်အတူ သိုင်းသမား အားလုံး၏ ဆက်သွယ်ရေး စက်များထံသို့ သတင်းစကား တစ်ခု တစ်ပြိုင်နက်တည်း ရောက်ရှိလာခဲ့သည်။

“တိုက်ခိုက်ကြ”

ဝုန်း...

သိုင်းသမား အားလုံးကြားတွင် ဆူညံသံများ ထွက်ပေါ်လာခဲ့သည်။ လူ ၄,၀၀၀ ကျော်၏ အရှိန်အဝါများမှာ ကောင်းကင်ယံသို့ ထိုးတက်သွားပြီး မြေပြင်တစ်ခုလုံး တုန်ခါသွားသကဲ့သို့ပင်။ အဆုံးအဖြတ် တိုက်ပွဲကြီး စတင်ပြီ ဖြစ်သည်။