အခန်း (၂၉၁)

📝အပိုင်း - ၂၉၁

ဘာသာပြန် - Na Gar🐉

ဤအခြေအနေသို့ ရောက်သောအခါ ချန်ဆန်းရှီသည် ဤလောကတွင် မသေမျိုးများ သို့မဟုတ် နဂါးများ ရှိနေနိုင်သည်ဟူသောအချက်ကို သံသယမရှိတော့ပေ။ သို့သော် တံငါသည် ပြောပြသွားသော စကားများထဲတွင် ထင်ရှားသော ယုတ္တိမတန်မှုတစ်ခု ရှိနေသည်။ နဂါးမင်းအား ယဇ်ပူဇော်သည့် အရေအတွက်မှာ နှစ်ပေါင်းရာချီအောင် တည်ငြိမ်ခဲ့ခြင်းဖြစ်ရာ၊ နဂါးမင်းသာ အမျက်ထွက်လိုက လွန်ခဲ့သော နှစ်ပေါင်းများစွာကတည်းက အမျက်ထွက်ခဲ့ပေလိမ့်မည်။

ဤအခြေအနေမှာ လူသားတို့ ဖန်တီးထားခြင်း ဟုတ်မဟုတ် အတည်ပြုရန်အတွက် နဂါးမင်းကျောင်းသို့ တစ်ခေါက်သွားကြည့်ရန်သာ လိုအပ်သည်။

အကယ်၍ ကျောင်းအတွင်းရှိ အမွေးတိုင်အိုးမှ ခရမ်းရောင်ချီများကို ခိုးယူနေသည်ကို တွေ့ရှိပါက၊ ၎င်းသည် သေချာပေါက် အမွေးတိုင်နတ်ဘုရားဂိုဏ်း နှင့် ဆက်စပ်နေမည်ဖြစ်သည်။

သူ ထင်မှတ်ထားသည့်အတိုင်းပင် လက်တွေ့မှာ ဖြစ်ပျက်နေသည်။

နဂါးမင်းကျောင်းအတွင်းရှိ နဂါးမင်းရုပ်တုကြီး၏ ရှေ့တွင်...

စီယွင်ဘုရားကျောင်း ရှိ အမွေးတိုင်အိုးနှင့် တစ်ပုံစံတည်းတူသော အမွေးတိုင်အိုးတစ်ခုမှ ခရမ်းရောင်ချီများ မှိန်ပျပျ ထွက်ပေါ်နေသည်။ အရပ်သားတစ်ဦး လာရောက်ကိုးကွယ်တိုင်း သူတို့၏ ဦးခေါင်းပေါ်မှ ခရမ်းရောင်ချီတစ်မျှင် ထွက်ပေါ်လာပြီး၊ ထိုအမွေးတိုင်အိုးသည် ဒဏ္ဍာရီလာ သတ္တဝါတစ်ကောင်ကဲ့သို့ ၎င်း၏ ဝမ်းဗိုက်ထဲသို့ ဝါးမြိုပစ်လိုက်သည်။ နဂါးမင်းရုပ်တုကိုယ်တိုင်မှာမူ ကြေးနီခေါင်းလောင်းကဲ့သို့ မျက်လုံးအပြူးသားဖြင့်သာ ကြည့်နေရပြီး ထိုနွေးထွေးသော ကိုးကွယ်မှုများကို မခံစားရပေ။

ဤအချက်ဖြင့် အခြေအနေမှာ အလွန်ရှင်းလင်းသွားပြီဖြစ်သည်။

အမွေးတိုင်နတ်ဘုရားဂိုဏ်းသည် တံငါသည်များကို ရည်ရွယ်ချက်ရှိရှိ သတ်ဖြတ်ပြီး လူထုကြားတွင် ထိတ်လန့်မှုကို ဖန်တီးကာ နဂါးမင်းကျောင်းသို့ အမွေးတိုင်များ စုပြုံရောက်ရှိလာအောင် လုပ်ဆောင်နေခြင်း ဖြစ်သည်။ သို့သော် ဤမျှများပြားလှသော လူအရှင်လတ်လတ်ဖြင့် ယဇ်ပူဇော်မှုကြီးမှာ ဘာအတွက်ကြောင့်လဲဟူသည်ကိုမူ မသိရသေးပေ။

"ဒီခရမ်းရောင်ချီတွေကတော့..."

ချန်ဆန်းရှီသည် အလျင်စလို မလှုပ်ရှားသေးပေ။ ကိုးကွယ်မှုပြုပြီးနောက် နဂါးမင်းကျောင်း၏ ပတ်ဝန်းကျင်ကို စတင်အကဲခတ်သည်။

နဂါးမင်းကျောင်းသည် တာအိုကျောင်းဆောင်များ သို့မဟုတ် ဗုဒ္ဓဘာသာ ဘုန်းကြီးကျောင်းများကဲ့သို့ ဂိုဏ်းဂဏများ ပိုင်ဆိုင်ခြင်းမဟုတ်ဘဲ၊ ဒေသခံအရပ်သားများက စုပေါင်းတည်ထားကြခြင်း ဖြစ်သည်။ မူလအားဖြင့် ကျောင်းကို ထိန်းသိမ်းရန် ဘုန်းကြီး တစ်ပါး၊ နှစ်ပါးခန့်သာ ရှိသင့်သော်လည်း ဤနေရာတွင်မူ...

သူ အကြမ်းဖျင်း ရေတွက်ကြည့်ရာ အနည်းဆုံး လူအယောက် ၃၀ ခန့် ရှိနေသည်။

သို့သော် အများစုမှာ ကျင့်စဉ်မရှိသည့် သာမန်လူများဖြစ်ပြီး၊ ၎င်းတို့ထဲမှ ၃ ဦး သို့မဟုတ် ၅ ဦးခန့်မှာ အတွင်းအားသန့်စင်ခြင်းအဆင့်ရှိကာ၊ ကျောင်းထိုင်ဘုန်းကြီးမှာမူ ဟွာကျင်းအဆင့်ဖြစ်သည်။ ထိုဘုန်းကြီး၏ ခန္ဓာကိုယ်ထဲတွင် ခရမ်းရောင်ချီနှင့် ပတ်သက်သည့် ခရမ်းရောင်ချီများ မရှိသည်ကို ကြည့်ခြင်းအားဖြင့် သူသည် အမွေးတိုင်နတ်ဘုရားဂိုဏ်းထဲမှ အဆင့်နိမ့် ခေါင်းဆောင်တစ်ဦးသာ ဖြစ်ပေလိမ့်မည်။

ချန်ဆန်းရှီသည် အခြေအနေကို အတည်ပြုပြီးနောက် မည်သူ့ကိုမျှ မရိပ်မိစေဘဲ တိတ်တဆိတ် ထွက်ခွာလာခဲ့သည်။

ညနက်ပိုင်း လူခြေတိတ်ချိန် ရောက်မှသာ သူသည် တိတ်တဆိတ် ပြန်လာခဲ့သည်။ အမွေးတိုင်အိုး၏ ရှေ့တွင် ဝိညာဉ်ပုတီးစေ့ကို ထုတ်ယူလိုက်ပြီး၊ စီယွင်ဘုရားကျောင်း တုန်းကကဲ့သို့ပင် ခရမ်းရောင်ချီအားလုံးကို တစ်မျှင်မျှ မကျန်အောင် စုပ်ယူပစ်လိုက်သည်။

"ဘယ်သူလဲ"

နောက်ဘက်မှ အပြစ်တင် မေးမြန်းသံတစ်ခု ထွက်ပေါ်လာသည်။

ထူးခြားမှုကို သတိထားမိသွားသော အမွေးတိုင်နတ်ဘုရားဂိုဏ်းသားတစ်ဦး ပြေးဝင်လာခြင်းဖြစ်သည်။

"ချလွန်း—"

ချန်ဆန်းရှီ၏ ခါးကြားမှ ဟယ်မြောင်ဓားရှည်သည် ခဏအတွင်းမှာပင် ထွက်ပေါ်လာပြီး၊ တစ်ချက်တည်းနှင့်ပင် ထိုကျူးကျော်သူကို ပါးပြင်မှ အောက်ခြေအထိ နှစ်ပိုင်းပြတ်အောင် ပိုင်းဖြတ်လိုက်သည်။

"မြန်မြန်လာကြဦး လူတွေလာကြဦး"

"တစ်စုံတစ်ယောက်က အမွေးတိုင်အိုးတွေကို ဖျက်ဆီးနေပြီ"

အတွင်းအားသန့်စင်ခြင်းအဆင့်ရှိသည့် ဂိုဏ်းဝင် ၅ ဦး သို့မဟုတ် ၆ ဦးနှင့် ဟွာကျင်း အဆင့် ကျောင်းထိုင်ဘုန်းကြီးတို့ ရောက်ရှိလာသော်လည်း မဟာသွေးကြောအဆင့် သိုင်းပညာရှင်တစ်ဦးကို မယှဉ်နိုင်ကြပေ။

နဂါးမင်းကျောင်းအတွင်းတွင် ဓားအလင်းတန်းများ ရှုပ်ထွေးသွားပြီးနောက်...

ခဏအကြာတွင် မြေပြင်ပေါ်၌ အသက်မဲ့နေသော အလောင်းများသာ ကျန်ရစ်တော့သည်။

ဟွာကျင်းအဆင့် ကျောင်းထိုင်ဘုန်းကြီးသည်လည်း ပြင်းထန်စွာ ဒဏ်ရာရရှိကာ မြေပြင်ပေါ်တွင် လဲကျနေသည်။ သူသည် ထိတ်လန့်တုန်လှုပ်နေသော မျက်နှာဖြင့် နောက်သို့ တရွတ်တိုက် ဆုတ်ခွာရင်း နံရံနှင့် တိုးမှ ရပ်တန့်သွားသည်။ သူက တုန်တုန်ရင်ရင်ဖြင့် မေးသည်"မင်း... မင်းက ဘယ်သူလဲ အမွေးတိုင်ကျင့်စဉ်ကို မင်း ဘယ်လိုလုပ် သိနေတာလဲ"

"ငါက ကျန်းလိုင်ဇီကွ"

ချန်ဆန်းရှီက လှောင်ပြုံးပြုံးလိုက်ပြီး သူ၏ သိမ်မွေ့သော်လည်း ဟိန်းထွက်နေသော အသံမှာ ကောင်းကင်သို့ ပဲ့တင်ထပ်သွားသည် "မင်းတို့ရဲ့ အဖွဲ့ခေါင်းဆောင် ဒါမှမဟုတ် ဂိုဏ်းချုပ်ကို သွားပြောလိုက်... ငါ လိုင်ဇီက မင်းတို့ အမွေးတိုင်နတ်ဘုရားဂိုဏ်း ရဲ့ လုပ်ရပ်တွေကို ကြည့်မရဘူး။ ဒီနေ့ ငါက တရားမျှတမှုအတွက် လာတာ၊ မင်းတို့ရဲ့ ဒီယုတ်မာတဲ့ ကျောင်းကိုလည်း မီးရှို့ပစ်မယ်"

ပြောပြောဆိုဆိုပင် သူသည် ဖယောင်းတိုင်စင်များကို ကန်လှဲပစ်လိုက်ရာ၊ မကြာမီမှာပင် တစ်ကျောင်းလုံးမှာ မီးဟုန်းဟုန်း တောက်လောင်သွားတော့သည်။

"ဗျစ်—"

အရပ်သားများ၏ အဝေးမှ ကြည့်နေမှုအောက်တွင် ချန်ဆန်းရှီသည် ကျောင်းထိုင်ဘုန်းကြီး၏ ခေါင်းကို တစ်ချက်တည်းနှင့် ပိုင်းဖြတ်လိုက်ပြီး၊ အမှောင်ထဲသို့ လျင်မြန်စွာ ဆုတ်ခွာကာ မျက်စိတစ်မှိတ်အတွင်း ပျောက်ကွယ်သွားတော့သည်။

လျန်ကျိုး၏ အခြေအနေကို ထည့်သွင်းစဉ်းစားပါက၊ နေရာအနှံ့တွင် ခရမ်းရောင်ချီများ စုဆောင်းခံနေရခြင်း ဖြစ်ရာ နှောင့်နှေးခြင်း မရှိဘဲ ချက်ချင်း အရေးယူရန် လိုအပ်ပေသည်။

...

ကောင်းကင်သို့ ဟိန်းတက်နေသော မီးတောက်များကြောင့် မိုင်ပေါင်းများစွာအတွင်းရှိ ဒေသခံများမှာ ထိတ်လန့်တုန်လှုပ်ကုန်ကြသည်။

မြို့စောင့်တပ်ဖွဲ့မှ စစ်သည် ရာပေါင်းများစွာပင်လျှင် မြို့ပြင်သို့ ပြေးထွက်ကာ စုံစမ်းစစ်ဆေးကြရသည်။

အမွေးတိုင်နတ်ဘုရားဂိုဏ်းသားများ သေဆုံးသွားပြီးနောက်၊ ဦးဆောင်မည့်သူ မရှိတော့သဖြင့် ထုံထျန်းမြစ်ဘေးရှိ မပြီးဆုံးသေးသော ယဇ်ပူဇော်ပွဲကြီးမှာလည်း ရပ်တန့်သွားခဲ့ရသည်။

ထိုမီးတောက်ကြီးမှာ မိုးလင်းခါနီးမှသာ တဖြည်းဖြည်း ငြိမ်သက်သွားခဲ့သည်။

ထိုအချိန်မှာပင်...

တောအုပ်တစ်ခုအတွင်း၌...

"အဖွဲ့ခေါင်းဆောင်"

လင်ရွှီဇီသည် ထိတ်လန့်တုန်လှုပ်စွာဖြင့် အပြေးအလွှား ပြန်ရောက်လာသည်။

"ဘယ်လိုဖြစ်တာလဲ"

လျန်ကျိုးမှ အပြေးအလွှား ရောက်ရှိလာသော ယန်ရှောင်ဇီ က အလောတကြီး မေးလိုက်သည် "ဒါကို ဘယ်သူလုပ်တာလဲဆိုတာ သိရပြီလား"

"ကျန်းလိုင်ဇီပါ"

လင်ရွှီဇီက ပြောသည်"မနေ့ညက သူ လူသတ်နေတာကို လူအများကြီး မြင်လိုက်ကြတယ် အရင်တစ်ခါ လျန်ကျိုးမှာ ခရမ်းရောင်ချီတွေ အခိုးခံရတာလည်း ဒီ လိုင်ဇီ လက်ချက်ပဲ ဖြစ်ရမယ်"

"လိုင်ဇီ..."

ယန်ရှောင်ဇီက အလေးအနက် စဉ်းစားနေသည် "ဒီလိုလူမျိုးက ဘယ်ကနေ ရုတ်တရက် ပေါ်လာတာလဲပြီးတော့ သုံးလစာ ခရမ်းရောင်ချီတွေကို အချိန်တိုအတွင်း စုပ်ယူနိုင်တယ်ဆိုရင် သူ့ရဲ့ အမွေးတိုင်ကျင့်စဉ် ပညာ က အလွန် နက်နဲနေပြီ"

"အဖွဲ့ခေါင်းဆောင်၊ အခု ငါတို့ ဘာဆက်လုပ်ကြမလဲ"လင်ရွှီဇီ၏ မျက်နှာမှာ ပျက်ယွင်းနေသည် "သူက ငါတို့နောက်ကို တောက်လျှောက် လိုက်နေတာ သိသာတယ်၊ ငါတို့ရဲ့ ခရမ်းရောင်ချီတွေကိုလည်း ဆက်ပြီး လုယူနေဦးမှာပဲ။ ဒေသခံ အဖွဲ့ငယ်တွေကို အကြောင်းကြားဖို့ဆိုတာလည်း အချိန်ယူရဦးမယ်"

"နောက်ကျသွားပြီ"

ယန်ရှောင်ဇီက ဆိုသည် "သင်္ဘောပေါ် တက်ကြမယ်"

"ခင်ဗျားပြောချင်တာက..."

"ပေထျန်းနန်တို့ အဖွဲ့က အခု ရေလမ်းကနေ အရှေ့ပိုင်းဒေသကို သွားနေတာ၊ သင်္ဘောက ဆိပ်ကမ်းမှာ ဆိုက်ထားတယ်။ ငါတို့ တိုက်ရိုက် သင်္ဘောပေါ် တက်မယ်"

"ဒါပေမဲ့ မင်းသားက အခုထိ မသိသေးဘူး..."

"အရေးမကြီးဘူး။ သူ အနှေးနဲ့အမြန် သိရမှာပဲ၊ ပြီးတော့ သူက ငါတို့ဘက်တော်သားပဲ မဟုတ်လား"

"ကောင်းပြီ၊ ဒါဆို အခုပဲ ထွက်ကြစို့"

...

ခရီးသည်တင် သင်္ဘောကြီးပေါ်တွင်...

နေဝန်းသည် အရှေ့ဘက်မှ ထွက်ပေါ်လာသည်။

ချန်ဆန်းရှီသည် အိပ်ရာမှ နိုးကာစ လူတစ်ယောက်ကဲ့သို့ ကုန်းပတ်ပေါ်သို့ ထွက်လာပြီး လှံ ပညာ ကို လေ့ကျင့်နေသည်။

မကြာမီ...

လုရှုဟွာနှင့် အခြားသူများမှာလည်း တစ်ယောက်ပြီးတစ်ယောက် ပြန်ရောက်လာကြသည်။

"ဗိုလ်ချုပ်ချန်မနေ့ညက ဖြစ်ရပ်ကို သိပြီးပြီလား"

"လောကအနှံ့ လျှောက်သွားနေတဲ့ သူရဲကောင်းတစ်ယောက်က နဂါးမင်းကျောင်းကို မီးရှို့ပစ်လိုက်တယ်တဲ့"

"သူ့နာမည်က... လိုင်ဇီ လို့ ထင်တာပဲ"

"ကျန်းလိုင်ဇီက ပြောတယ်... နဂါးမင်းကျောင်းက ဘုန်းကြီးတွေက မိစ္စာကလူတွေအဖြစ် ဟန်ဆောင်နေတာတဲ့၊ အကုန်လုံးကို အပြတ်ရှင်းသွားတာပဲ"

"..."

"တောက်..."

ရွှီဘင်က သူ၏ ခေါင်းကို ပွတ်လိုက်ရင်း "ဒီနာမည်က ဘာလို့ ဒီလောက် ရင်းနှီးနေရတာလဲ"

ဝူဒါက ဖြည်းညှင်းစွာ ပြောသည် "ယန်ဘင်းရွာမှာလည်း လိုင်ဇီ ဆိုတဲ့ တစ်ယောက် ရှိတယ် မဟုတ်လား"

ကျွမ်းယီက ထပ်လောင်းပြောသည် "ဒါဆို... လိုင်ဇီက တကယ့် ပညာရှင်ကြီးများလား"

"လျှောက်မပြောစမ်းနဲ့၊ အဲဒါ ဘယ်လိုလုပ် ဖြစ်နိုင်မှာလဲ"

တကယ်တော့ လျန်ကျိုးမှာ ထောက်ပံ့ရေးကိစ္စတွေ လုပ်ဖို့ ကျန်ခဲ့တဲ့ ကျောက်ချောင် မှလွဲရင် ကျန်တဲ့သူတွေဟာ ယန်ဘင်းရွာက မဟုတ်ကြသလို၊ လိုင်ဇီဆိုတဲ့ နာမည်ကို ကြားဖူးရင်တောင် သူတို့ မသိကြပေ။

သူတို့တွေ နဂါးမင်းကျောင်းမီးလောင်တဲ့အကြောင်း ဆွေးနွေးနေကြစဉ်မှာပင်...

ချန်ဆန်းရှီသည် လူအုပ်ကြားထဲတွင် ရောနှောကာ သင်္ဘောပေါ် တက်လာပြီး ချောင်ဖန်၏ အခန်းဆီသို့ တိုက်ရိုက် ဦးတည်သွားသည့် လူနှစ်ယောက်ကို သတိထားမိလိုက်သည်။

သူတို့ဆီမှ အမွေးတိုင်နတ်ဘုရားဂိုဏ်းနှင့် ပတ်သက်သည့် ခရမ်းရောင်ချီများ စီးဆင်းနေသည်။

ယန်ရှောင်ဇီ..

ချန်ဆန်းရှီ သူတို့ကို မှတ်မိလိုက်သည်။

ဒီလူတွေက...

ဘာလို့ ချောင်ဖန်ကို လာရှာကြတာလဲ..

ချောင်အိမ်တော်မှာ အမွေးတိုင်အိုးကို တွေ့တုန်းက ဘာမှ ထူးထူးခြားခြား ဖြစ်မလာတာ မဆန်းတော့ပါဘူး။