အခန်း (၂၃၂)

အခန်း။ ၂၃၂

"အနိုင်မခံ အရှုံးမပေးတဲ့... ရွှီရန်"

ဒါက ကိုယ့်ကိုယ်ကိုယ် မိတ်ဆက်တဲ့ ပုံစံမျိုးလား။

ချန်ကျွင်း၏ မျက်ခုံးအစုံမှာ လှုပ်ခတ်သွားသည်။

သူငယ်ချင်း... မင်း ဘာတွေ ပြောနေတာလဲ။

အနိုင်မခံ အရှုံးမပေးဘူး ဟုတ်လား။

နောက်ဆုံးအချိန်အထိ ဘယ်သူကများ ကိုယ့်ကိုယ်ကိုယ် အနိုင်မခံဘူးလို့ ပြောရဲမှာလဲ။

မှန်တင်ပုံရိပ် အရှင်သခင်က အဖြစ်နိုင်ဆုံးပဲ။ ပြီးတော့ စကြာဝဠာငယ်၏ ပုံစံအသွယ်သွယ်၊ စင်ကြယ်ခြင်း မိုးကြိုးတစ်ထောင်နဲ့ လက်ရှစ်ဖက် နတ်သားတို့ကလည်း ချန်ပီယံဆုအတွက် ရေပန်းစားနေတဲ့သူတွေ၊ သူတို့မှာ တောက်ပတဲ့ စစ်တလင်းမှတ်တမ်းတွေ ရှိပြီးသား….

မင်းက တကယ်ရော တတ်နိုင်လို့လား။

ချန်ကျွင်း၏ မျက်ဝန်းတို့မှာ အတန်ကြာ လှုပ်ရှားသွားပြီး တစ်စုံတစ်ခုကို စဉ်းစားမိသွားပုံရသည်။

ခုနက ချစ်စရာကောင်းတဲ့ ကျန်းလျိုလီတောင် သူ့ကို အထင်အမြင်သေးတဲ့ အကြည့်နဲ့ အပေါ်အောက် အကဲခတ်ပြီး အစ်ကိုရွှီရန်ရဲ့ ပုံစံကို လိုက်တုနေတာပဲ။ ဒါပေမဲ့ မတူပါဘူး။ နှစ်မှတ်ပဲ ပေးမယ် လို့ ပြောသွားခဲ့တာလေ။

"သူပြောတဲ့ အစ်ကိုရွှီရန်ဆိုတာ မင်းကို ပြောတာပေါ့"

ရွှီရန်မှာ ကြက်သီးများပင် ထသွားရသည်။

"အဲဒီလိုကြီး မခေါ်ပါနဲ့ဦး ကြားရတာ တစ်မျိုးကြီးပဲ။ ကျားမလေးခေါ်မှပဲ နားထဲမှာ အဆင်ပြေတာ"

အမှန်တိုင်းပြောရလျှင် ၎င်းမှာ အနည်းငယ် ထူးဆန်းလှသည်။

ကျားမလေးကဲ့သို့ တက်ကြွလန်းဆန်းသည့် မိန်းကလေးငယ်လေး ခေါ်မှသာ နားထဲတွင် နားဝင်ပီသလှခြင်းဖြစ်သည်။ အခြားသူများ ခေါ်လျှင်မူ ထိုရသကို မရနိုင်ချေ။

ကျားမလေး၏ ရယ်မောသံကဲ့သို့ပင် သူမကဲ့သို့ ကျားတစ်ကောင်၏ အရှိန်အဝါမျိုး၊ ထွက်ပြူစ နေဝန်းကဲ့သို့သော တက်ကြွမှုမျိုး ရှိသူမှသာ ထိုကဲ့သို့ ဟန်ဆောင်မှုကင်းမဲ့စွာ ရယ်မောနိုင်ခြင်းဖြစ်ပြီး ထိုရယ်သံမှာ သူမနှင့်မှ အမှန်တကယ် လိုက်ဖက်ကာ တောက်ပနုပျိုနေခြင်းပင်။

ချန်ကျွင်း၏ သိက္ခာမှာ တကယ်ပင် ထိခိုက်သွားရရှာသည်။

"ဘယ်သူက မင်းကို အဲဒီလို ခေါ်ချင်နေလို့လဲ ခုနက ကောင်မလေးက ငါ့ကို နှစ်မှတ်ပဲ ပေးသွားတာကွ တကယ့်ကို သည်းခံရခက်တဲ့ ကိစ္စပဲ"

ရွှီရန်က အားရပါးရ ရယ်မောလိုက်ပြီး "နှစ်မှတ်ပဲလား အမှတ်တစ်ရာမှာ နှစ်မှတ်ပဲ ရတာလား မင်းကတော့ တကယ်ကို အသုံးမကျတာပဲနော်"

ချန်ကျွင်း၏ မျက်နှာမှာ အရောင်အမျိုးမျိုး ပြောင်းသွားကာ သူ၏မာနမှာ နောက်တစ်ကြိမ် ထပ်မံရိုက်ခတ်ခြင်း ခံလိုက်ရသည်။

"ကောင်းပြီလေ... မင်းမှာ ဘာအရည်အချင်းရှိလဲဆိုတာ ငါစမ်းကြည့်ရသေးတာပေါ့။ ငါ့ရဲ့ သံချပ်ကာကို သုံးပြီး မင်းကို ပညာပေးမယ်လို့ ငါကျိန်ဆိုရဲတယ်"

ရွှီရန်မှာ ရယ်မောခြင်းကို မရပ်နိုင်တော့ချေ။ ဤကောင်လေးမှာ ဒေါသထွက်လွန်းသဖြင့် သူ၏ မူလလေယူလေသိမ်းများပင် ပျောက်ရှကာ ရှုပ်ထွေးပွေလီသော စကားလုံးများပင် ထွက်ပေါ်လာတော့သည်။

သူ့ကိုကြည့်ကာ ရွှီရန် စိတ်ဝင်စားသွားမိသည်။

ထို့နောက် ရွှီရန်သည် သူ၏အမူအရာကို ပြန်လည်ထိန်းညှိလိုက်ပြီး ရုတ်တရက် ခန့်ညားထည်ဝါသော အသွင်ဖြင့် "မင်း... အသင့်... ဖြစ်ပြီလား"

ချန်ကျွင်းက ရုတ်တရက် အော်ပြောလိုက်သည်။

"အဲဒါ ငါမင်းကို မေးရမယ့် မေးခွန်းကွ"

ဤတစ်ကြိမ် ပြိုင်ပွဲ၏ အစွမ်းအထက်ဆုံး ဒဏ္ဍာရီလာ ပြိုင်ပွဲဝင် ငါးဦးထဲမှ တစ်ဦးအနေဖြင့် လက်ရှစ်ဖက် နတ်သားကဲ့သို့သော ပြိုင်ဘက်မျိုးနှင့် မတွေ့မချင်း သူသည် အောင်ပွဲအတွက် အမြဲတမ်း ယုံကြည်ချက်ရှိသူဖြစ်သည်။ သို့သော် ယခုကဲ့သို့ အမေးခံရခြင်းမှာ သူ့ကို ရူးသွပ်သွားစေရန် လုံလောက်သည်။

သူ၏ကိုယ်ပေါ်တွင် စူးရှတောက်ပသော အလင်းတန်းများ စီးဆင်းသွားပြီးနောက် နတ်ဘုရားသတ် သံချပ်ကာအသွင်သို့ လျင်မြန်စွာ ပြောင်းလဲသွားသည်။

ရွှီရန် စဉ်းစားနေမိသည်။

စက္ကူရုပ်တပ်သားတွေကို အသုံးပြုပြီး ပြိုင်ဘက်ကို တိုက်ရိုက် အနိုင်ယူလိုက်ရမလား။

သို့သော် ခဏမျှ စဉ်းစားပြီးနောက် သူ ထိုသို့မလုပ်ရန် ဆုံးဖြတ်လိုက်သည်။

"ခုနက မင်းရဲ့ နည်းစနစ်တွေကို ကြည့်ရတာ အရမ်းညံ့လွန်းနေသေးတယ်။ ဒါကြောင့် ငါကပဲ နည်းပြတစ်ယောက်အနေနဲ့ မင်းကို သင်ခန်းစာပေးရတော့မှာပေါ့"

ရွှီရန်က သူ့ဘာသာ ရေရွတ်လိုက်ပြီး ရုပ်ပိုင်းဆိုင်ရာ ခွန်အားကိုသာ အသုံးပြုရန် ဆုံးဖြတ်လိုက်သည်။

ဝိဇ္ဇာအဆောင်နှစ်ခုဖြင့် မြှင့်တင်ထားသော သူ၏ ရုပ်ပိုင်းဆိုင်ရာ ခွန်အားမှာ သွေးစွမ်းအင် နှစ်သိန်းခန့်ရှိသော တိုက်ခိုက်မှုကိုပင် လက်ဗလာဖြင့် ဖမ်းနိုင်စွမ်း ရှိသည်။ ထို့ကြောင့် ပြိုင်ဘက်၏ သံချပ်ကာမှာ သူ၏ ခံစစ်ကို ဖောက်ထွက်နိုင်လိမ့်မည် မဟုတ်ပေ။

"ဝုန်း"

"ဝုန်း"

"ဝုန်း"

ချန်ကျွင်းက စတင်ဦးဆောင်ကာ ရှေ့သို့ ပြေးထွက်လာသည်။ တစ်လှမ်းချင်းစီမှာ ပိုမိုမြန်ဆန်လာပြီး လမ်းလျှောက်နှုန်းမှသည် အရှိန်ပြင်းပြင်း ပြေးလွှားသည့်အရှိန်သို့ ပြောင်းလဲသွားကာ သားရဲတိုက်ခိုက်ရေးကွင်း၏ မြေပြင်တစ်ခုလုံးပင် တုန်ခါသွားရသည်။ ရွှေရောင်ဝင်းပနေသော သံချပ်ကာဝတ် စစ်သည်တော်ကြီးမှာ ရူးသွပ်စွာ အဟုန်ပြင်းပြင်း ပြေးဝင်လာရာ သူ၏ဖိအားမှာ အမှန်တကယ်ပင် အံ့မခန်းလှသည်။

လေပြင်းများမှာ ဝူးခနဲ မြည်လာသည်။

ထိုလေပြင်းများမှာ ပွဲကြည့်စင်ပေါ်ရှိ ကျောင်းသားများ၏ မျက်နှာကိုပင် လာရောက်ရိုက်ခတ်နေသည်။ ကျောင်းသားများမှာလည်း ချန်ကျွင်း၏ ထိတ်လန့်ဖွယ်ကောင်းသော အရှိန်အဟုန်ကို ကြည့်ကာ မျက်နှာပျက်သွားကြသည်။

ရွှီရန်ကမူ မည်သို့မျှ တုန်လှုပ်ခြင်းမရှိဘဲ ဒူးကိုအနည်းငယ်ညွှတ်၍ ခါးကိုလှည့်ကာ ခြေအစုံကို မြဲမြဲနင်းထားလိုက်သည်။ သူ၏ ခြေဖျားများမှာလည်း အသင့်ဖြစ်နေပြီဖြစ်သည်။

ချန်ကျွင်းမှာ ရွှေရောင်လျှပ်စီးတန်းတစ်ခုကဲ့သို့ အလွန်မြန်ဆန်လှပြီး ရွှီရန်၏ မျက်နှာရှေ့သို့ ချက်ချင်းပင် ရောက်ရှိလာခဲ့သည်။

သူက လက်ကို ဝှေ့ယမ်းကာ ရွှီရန်အား ဖမ်းဆီးရန် ကြိုးစားလိုက်သည်။

သို့သော် ၎င်းမှာ အလှည့်အပတ်သာ ဖြစ်သည်။ သူ၏ တကယ့်အကွက်မှာ အသင့်ပြင်ထားသော ညာခြေတွင် ရှိနေခြင်းဖြစ်သည်။ ရွှီရန်သာ ရှောင်တိမ်းခြင်း သို့မဟုတ် ခုခံခြင်းပြုလုပ်ပါက အားနည်းချက်တစ်ခု ပေါ်ပေါက်လာမည်ဖြစ်ပြီး ထိုအခါ ချန်ကျွင်းက ရွှီရန်၏ ခန္ဓာကိုယ်အထက်ပိုင်းကို ဒူးဖြင့် ခုန်ဝင်တိုက်ခိုက်ကာ အဝေးသို့ လွင့်စင်သွားအောင် ပြုလုပ်မည်ဖြစ်သည်။

ရွှီရန်က သူ၏ အကြံအစည်ကို သိရှိနေလျှင်တောင်မှ သူ့ထက် ပိုမြန်နိုင်ပါဦးမလား။

သူ၏ နတ်ဘုရားသတ် သံချပ်ကာမှာ အမြန်နှုန်းနှင့် ခံစစ်ကို အဆပေါင်းများစွာ တိုးမြှင့်ပေးနိုင်သည်။ သံချပ်ကာမှာ လေးလံပုံရသော်လည်း သူ၏အပေါ်တွင်မူ အလွန်ပင် ပေါ့ပါးလှသဖြင့် သူသည် လျင်မြန်ဖြတ်လတ်သော သံချပ်ကာဝတ် စစ်သည်တော်တစ်ဦး ဖြစ်နေခြင်းပင်။

သို့သော်လည်း သူ၏ အတွေးအားလုံးကို ရွှီရန်က ရှင်းလင်းစွာ မြင်နေရသည်။

ရွှီရန်၏ ခန္ဓာကိုယ်မှာ ယိမ်းနွဲ့သွားသည်။

အထွတ်အထိပ်အဆင့်သို့ ရောက်ရှိနေသော ဆန်းကြယ်သည့် ခြေလှမ်းကို ထုတ်ဖော်လိုက်ရာ ချန်ကျွင်း၏ လက်သီးချက်နှင့် ဒူးတိုက်ကွက်တို့ကို လှပစွာ လှည့်ပတ်၍ ရှောင်ကွင်းသွားသည်။ သူသည် လေထဲတွင် လွင့်မျောနေသော သစ်ရွက်တစ်ရွက်ကဲ့သို့ လက်သီးနှင့် ဒူးကြားတွင် လွတ်လပ်စွာ လှုပ်ရှားသွားသည်။

အမှန်တကယ်ပင် ရေထဲ၌ ကစားနေသော နဂါးတစ်ကောင်ကဲ့သို့ အံ့ဩဖွယ်ကောင်းလှပြီး ငှက်တစ်ကောင်ကဲ့သို့ ကျော့ရှင်းလှပေတော့သည်

ချန်ကျွင်းမှာ ထိတ်လန့်သွားပြီး သူ၏ မျက်စိသူငယ်အိမ်တို့မှာ တုန်ယင်သွားတော့သည်။

"ဒါ... ဒါ ဘယ်လိုလုပ် ဖြစ်နိုင်မှာလဲ"

သူ့မျက်နှာမှာ ထိတ်လန့်တုန်လှုပ်မှုတို့ဖြင့် ပြည့်နှက်သွားပြီး မျက်တောင်တစ်ခတ်အတွင်းမှာပင် ရွှီရန်မှာ သူ၏ မြင်ကွင်းမှ ပျောက်ကွယ်သွားခဲ့ပြီ ဖြစ်သည်။

ထို့နောက် နောက်ကျောဘက်မှ ပြင်းထန်သော တွန်းကန်မှုတစ်ခုကြောင့် သူ၏ ခန္ဓာကိုယ်မှာ ဒုံးပျံစက်တပ်ထားသကဲ့သို့ ဖြစ်သွားကာ တစ်ကိုယ်လုံး ရူးသွပ်စွာ လွင့်ထွက်သွားပြီး စစ်တလင်း၏ အကာအကွယ်အတားအဆီးကို ပြင်းထန်စွာ တိုက်မိသွားသည်။

သူ၏ ရွှေရောင်သံချပ်ကာမှာလည်း ဖန်သားပြင်ကဲ့သို့ အစိတ်စိတ်အမွှာမွှာ ကွဲအက်သွားတော့သည်။

ပွဲကြည့်စင်တစ်ခုလုံး ဆူညံပွက်လောရိုက်သွားတော့သည်

ပွဲကြည့်စင်ပေါ်ရှိ နည်းပြများမှာလည်း မှင်တက်သွားကြသည်။

"ဒါ ချန်ချီ ပြောနေတဲ့ ချန်ပီယံဆိုတာလား"

"ခုနက ခြေလှမ်းတွေက မန္တန်တစ်ခုခုလား"

"အဲဒီ နည်းစနစ်က ဆရာကြီးတစ်ယောက်ရဲ့ အဆင့်မျိုးပဲ သူ၏ ဟန်ပန်နဲ့ တည်ငြိမ်မှုက အနိုင်မခံအရှုံးမပေးတဲ့ အရှိန်အဝါတွေနဲ့ ပြည့်နှက်နေတာပဲ။ သာသာယာယာ လှုပ်ရှားလိုက်တာတောင်မှ ကြည့်ရတာ အရမ်းကို သက်သောင့်သက်သာရှိတယ်"

"သူ အားကုန်တောင် မသုံးသေးဘူးလား"

"မဆန်းပါဘူး... အဲဒီအဘိုးကြီးက မနေ့ညက ငါတို့ဆီ တစ်အိမ်ဆင်း တစ်အိမ်တက်ပြီး ရင်ဖွင့်စကားတွေ ပြောနေတာ"

မနေ့ညက ပြည်နယ်အသီးသီးမှ ကျောင်းအုပ်ကြီးများ ရောက်ရှိလာပြီးနောက် ကျောင်းအုပ်ကြီးဟောင်း ချန်ချီမှာ လူမှုရေးကောင်းလှသော လိပ်ပြာတစ်ကောင်ကဲ့သို့ သူတို့၏ တည်းခိုခန်းများဆီသို့ လှည့်လည်သွားလာနေခဲ့သည်။

တရားဝင်အားဖြင့်တော့ ရင်ဖွင့်စကားပြောသည်ဟု ဆိုသော်လည်း လက်တွေ့တွင်မူ ကြွားလုံးထုတ်နေခြင်းပင်။

"သူ့မှာ နက်နဲတဲ့ နားလည်သဘောပေါက်နိုင်စွမ်းရှိတဲ့ ပါရမီအရိုးအဆစ်ရှိတယ်လို့ ကြားတယ်။ ပင်ကိုယ်ကတည်းက နားလည်သဘောပေါက်နိုင်စွမ်း ပါရမီပါလာတာပေါ့။ ဒီလို အဆင့်မြင့် တိုက်ခိုက်ရေးနည်းစနစ်တွေက သူကိုယ်တိုင် နားလည်သဘောပေါက်ထားတာ ဖြစ်လိမ့်မယ်။ အမှန်အတိုင်းပြောရရင် ဒါက တကယ်ကို ထိတ်လန့်စရာပဲ"

ရွှီရန်၏ စွမ်းဆောင်ရည်မှာ ကြက်သီးထဖွယ်ပင်။

ဒေသအသီးသီးမှ ကျောင်းအုပ်ကြီးများနှင့် နည်းပြများမှာ တည်ကြည်လေးနက်သော မျက်နှာထားများ ရှိနေကြသည်။

ရွှီရန်၏ တိုက်ခိုက်ရေးနည်းစနစ်များသည် သူတို့၏ မျှော်လင့်ချက်ထက် ကျော်လွန်နေသည်မှာ ထင်ရှားလှသည်။ တိုက်ခိုက်ရေးနည်းစနစ်ဆိုသည်မှာ ပါရမီအပေါ်တွင် မူတည်သည်။ အချို့လူများသည် တစ်သက်လုံး လေ့ကျင့်သော်လည်း ရရှိလာသည့် တိုက်ခိုက်ရေးစွမ်းအားမှာ ပါရမီပါသူတစ်ယောက် တစ်နှစ်အတွင်း တိုးတက်လာသည့် စွမ်းအားကိုပင် မမီနိုင်ချေ။

ထို့ကြောင့်ပင် ဤနယ်ပယ်တွင် အထူးတလည် အာရုံစိုက် လေ့ကျင့်သူ အလွန်နည်းပါးကြသည်။

လွန်ခဲ့သော နှစ်ပေါင်းများစွာအတွင်း၌ပင် ဤလမ်းစဉ်တွင် ထူးချွန်ထက်မြက်သော အစွမ်းထက်ပုဂ္ဂိုလ် အနည်းငယ်သာ ရှိခဲ့ဖူးသည်။