အခန်း (၂၃၇)

အခန်း။ ၂၃၇

ရွှီရန်က ပတ်ဝန်းကျင်ကို ဝေ့ဝဲကြည့်လိုက်သည်။ မည်သူမျှ တိုက်ခိုက်ရန် ဆန္ဒမရှိကြသည်ကို မြင်သောအခါ သူက စိတ်ထဲမှ တွေးလိုက်မိသည်မှာ ဤသည်မှာ မွေးရာပါ နတ်ဘုရားအတတ်ပညာများစွာကို မျက်မြင်တွေ့ရှိရန် အခွင့်ကောင်းပင်။

ဤအတတ်များကို အတွေ့အကြုံများများ မြင်တွေ့ထားမှသာ နောင်တစ်ချိန်တွင် ရန်ငြိုးဖွဲ့နတ်ဘုရားများ၊ တစ္ဆေသရဲများ သို့မဟုတ် သားရဲများ၏ မွေးရာပါအတတ်များနှင့် ရင်ဆိုင်ရသည့်အခါ ချက်ချင်းပင် ဆက်စပ်တွေးတောနိုင်ပြီး တန်ပြန်နည်းလမ်းများကို ရှာဖွေနိုင်မည်ဖြစ်သည်။

အတွေ့အကြုံများများရှိပြီး နောင်တွင် ဉာဏ်အလင်းပွင့်ခြင်းတွင် ကျွမ်းကျင်မှုနှင့် ပေါင်းစပ်

လိုက်ပါက စက်ယန္တရားမိစ္ဆာများ၏ လုပ်ဆောင်ချက် ယန္တရားများကို ချက်ချင်းပင် ခွဲခြမ်းစိတ်ဖြာနိုင်လိမ့်မည်။

ထိုအချိန်ကျလျှင် သူသည် စက်ယန္တရားမိစ္ဆာများ၏ ကံကြမ္မာပါ ရန်သူတော် ဖြစ်လာတော့မည်ပင်။

ထိုသို့ တွေးတောရင်း ရွှီရန်က လက်နှစ်ဖက်ကို နောက်ပစ်လျက် မတ်တတ်ရပ်ကာ "အားလုံး တစ်ပြိုင်တည်း လာခဲ့ရင်လည်း ကိစ္စမရှိပါဘူး။ ခုနစ်ယောက်တစ်ဖွဲ့ ဖွဲ့ပြီး ငါ့ကို တိုက်ကြည့်ကြမလား။ ဒါမှမဟုတ် ဆယ်ယောက်၊ အယောက်နှစ်ဆယ် အဖွဲ့ဖွဲ့ပြီး လာရင်လည်း ရပါတယ်" ဟု ပြောလိုက်သည်။

လူအုပ်ကြီး "..."

အေးလေ... အေးလေ... မင်းက တကယ်ကြီး မောက်မာချင်နေတာကိုး။

ရောက်ရှိနေသော ပါရမီရှင်ကလေးများမှာ အနည်းငယ် မကျေမနပ် ဖြစ်သွားကြသည်။

မင်း သန်မာတာတော့ ဟုတ်ပါပြီ။ ဒါပေမဲ့ ငါတို့ကို ဒီလောက်အထိတော့ အထင်မသေးသင့်ဘူး မဟုတ်ဘူးလား။

ငါတို့ကို အပျော်တမ်း ကျင့်ကြံသူတွေများ ထင်နေတာလား။

ငါတို့ကလည်း အထူးပါရမီရှင်တွေပဲလေ။

"အဖွဲ့လိုက် ဆိုရင်တော့ စမ်းကြည့်လို့ ရနိုင်ပါတယ်"

မှန်ရိပ်ပုံတူ အရှင်သခင် ချင်ရိဟို၊ လက်ရှစ်ဖက် နတ်သူငယ် ပိုင်ဖုန်း နှင့် အနုစိတ် ပုံသဏ္ဌာန်မျိုးစုံ ချီမုန့်လီတို့က မတ်တတ်ရပ်လိုက်ကြသည်။

"ငါတို့အတွက် အစွမ်းထက်တဲ့ ဒိုင်းတစ်ခု၊ စွမ်းအင်မြှင့်တင်ပေးမယ့်သူ၊ သွေးဖြည့်ပေးမယ့်သူနဲ့ ထိန်းချုပ်မယ့်သူတွေ လိုသေးတယ်"

လူအုပ်ထဲမှ ကွမ်ပြည်နယ် မူကြိုကျောင်း၏ ထန်ချီချီက မတ်တတ်ရပ်လိုက်သည်။

"ကျွန်မ စမ်းကြည့်လို့ ရပါတယ်။ ကျွန်မရဲ့ ပါရမီအရိုးအဆစ်က အသွင်သုံးမျိုးပြောင်း ဒိုင်းပါ။ ကောင်းချီး သုံးမျိုး ပေးနိုင်တယ်။ ဒီမျိုးဆက်ရဲ့ ဒိုင်းမှာတော့ ကျွန်မက အသန်မာဆုံး ဖြစ်ရမယ်..."

နင်ရွှမ်း "ကျွန်မလည်း စမ်းကြည့်မယ်။ ကျွန်မရဲ့ ပါရမီအရိုးအဆစ်က နတ်ဘုရားနဂါးအမှတ်အသားပါ။ အဘက်ဘက်ကနေ အင်အား မြှင့်တင်ပေးနိုင်တယ်"

ကွမ်းရှင်း "ကျွန်မလည်း ပါမယ်။ ကျွန်မရဲ့ ပါရမီအရိုးအဆစ်က ပဲစေ့များမှ မသေမျိုးစစ်သည်များ ဖန်တီးခြင်းပါ။ သွေးဖြည့်ပေးရုံတင်မကဘဲ ရန်သူကို ထိန်းချုပ်တာနဲ့ အင်အားမြှင့်တင်တာတွေပါ လုပ်နိုင်တယ်"

ဟုတီး "ကျွန်မလည်း လုပ်နိုင်တယ်။ ကျွန်မရဲ့ ပါရမီအရိုးအဆစ်က အိပ်မက်တစ်ခုအတွင်းမှ သေခြင်းနှင့် ရှင်ခြင်းပါ။ ထိန်းချုပ်တဲ့နေရာမှာ ကျွန်မက အတော်ဆုံးပဲ"

သူတို့သည် အခြားသူများထက် ပို၍ ယုံကြည်မှုရှိရှိဖြင့် သားရဲတိုက်ခိုက်ရေးကွင်းထဲသို့ လှမ်းဝင်လာကြသည်။

ရွှီရန်က တစ်ချက်ကြည့်လိုက်ရာ အားလုံးက မိန်းကလေးတွေချည်းပဲလား။

"ကောင်းပြီ... မင်းတို့ အချင်းချင်း တိုက်ပွဲဝင်ဗျူဟာကို တိုင်ပင်လိုက်ကြဦး"

သူက ပြောလိုက်သည်။

ပြောပြောဆိုဆိုပင် ရွှီရန်သည် သူ၏ မိုဓားစစ်သည်တော်များကို ပြန်သိမ်းလိုက်သည်။ ထို့နောက် ငြိမ်သက်စွာ စောင့်ဆိုင်းနေတော့သည်။ တိုက်ပွဲတစ်ခုတွင် အုပ်စုလိုက် ဝိုင်းတိုက်ခြင်းကို သူ တစ်ခါမှ မကြုံဖူးသေးချေ။

ဒီကနေ အတွေ့အကြုံသစ်တွေလည်း ရနိုင်တာပေါ့။

ယာယီဖွဲ့စည်းထားသော ခုနစ်ယောက်တစ်ဖွဲ့အသင်းသည် နာရီဝက်ခန့်ကြာအောင် သီးသန့်တိုင်ပင် ဆွေးနွေးခဲ့ကြသည်။

နောက်ဆုံးတွင် သူတို့သည် ဗျူဟာတစ်ခုကို ချမှတ်နိုင်ခဲ့ကြသည်။

"အဆင်သင့်ဖြစ်ပြီ"

ရွှီရန်က ခေါင်းညိတ်ပြလိုက်သည်။

"အဆင်သင့်ဖြစ်ပြီလား ဒါဆိုရင် တိုက်ခိုက်တော့"

ခုနစ်ယောက်စလုံးမှာ နေရာအသီးသီးသို့ လူခွဲကာ ရပ်လိုက်ကြသည်။

ရှေ့တန်းတွင် မှန်ရိပ်ပုံတူ အရှင်သခင် ချင်ရိဟိုနှင့် လက်ရှစ်ဖက် နတ်သူငယ် ပိုင်ဖုန်းတို့က နေရာယူထားသည်။

အလယ်တန်းတွင်မူ အနုစိတ် ပုံသဏ္ဌာန်မျိုးစုံ ချီမုန့်လီ၊ နတ်ဘုရားနဂါးအမှတ်အသား နင်ရွှမ်း နှင့် အသွင်သုံးမျိုးပြောင်းဒိုင်း ထန်ချီချီတို့က ရပ်နေကြသည်။

နောက်တန်းတွင်မူ အိပ်မက်တစ်ခုအတွင်းမှ သေခြင်းနှင့် ရှင်ခြင်း ဟုတီး နှင့် ပဲစေ့များမှ မသေမျိုးစစ်သည်များ ဖန်တီးခြင်း ကွမ်းရှင်းတို့က နေရာယူထားကြသည်။

အရောင်သုံးမျိုးပါသော အလင်းတန်းများ လင်းလက်လာပြီး အသွင်သုံးမျိုးပြောင်း ဒိုင်းသည် လူတိုင်း၏ကိုယ်ပေါ်တွင် ကောင်းချီးအဖြစ် ကျရောက်သွားသည်။ ပါးလွှာသော အကာအကွယ်ဒိုင်းလွှာတစ်ခု လူတိုင်းတွင် ပေါ်လာပြီး ၎င်းပေါ်၌ ဆန်းကြယ်သော သားရဲပုံစံ သုံးမျိုးမှာလည်း လွင့်မျောနေသည်။

ရွှီရန်က ခေါင်းညိတ်လိုက်မိသည်။ ဤဒိုင်းမှာ တကယ်ကို စိတ်ဝင်စားစရာကောင်းသည်။ ပုံစံတစ်ခုချင်းစီတွင် မတူညီသော စွမ်းရည်များ ရှိနေပုံပင်။

ထို့နောက် နင်ရွှမ်းမှာ တည်ကြည်လေးနက်သော မျက်နှာထားဖြင့် သူမ၏ အမှတ်အသား ခုနစ်ခုကို ချင်ရိဟို၊ ပိုင်ဖုန်းနှင့် ချီမုန့်လီတို့ထံသို့ ပစ်လွှတ်လိုက်သည်။

သူတို့၏ အရှိန်အဝါများမှာလည်း တုန်ခါသွားတော့သည်။

ချက်ချင်းဆိုသလိုပင် ရေလှိုင်းဂယက်များကဲ့သို့ စွမ်းအင်များ လျင်မြန်စွာ ပြန့်နှံ့သွားသည်။ ရွှီရန်က မျက်လုံးကို ကျဉ်းလိုက်မိသည်။ အဘယ်ကြောင့်ဆိုသော် မြေပြင်တစ်ခုလုံးမှာ အိပ်မက်ကမ္ဘာကဲ့သို့ အရောင်များအဖြစ် ပြောင်းလဲသွားသောကြောင့်ပင်။ သူ ခြေတစ်လှမ်း လှမ်းလိုက်သည်နှင့် တစ်ကိုယ်လုံး ဟာလာဟင်းလင်း ဖြစ်သွားကာ မြေပြင်မှာလည်း လှိုင်းများကဲ့သို့ နိမ့်တုံ့မြင့်တုံ့ ဖြစ်လာသည်။

သူ၏ရင်ထဲတွင် ကိုယ်အလေးချိန် မရှိတော့သကဲ့သို့ ခံစားချက်မျိုး စီးဆင်းလာတော့သည်။

ရွှီရန်မှာ ခေတ္တမျှ မှင်တက်သွားသည်။

သူ မြေပြင်ပေါ်သို့ ပြုတ်ကျတော့မည့်အချိန်မှာပင် လေထုအကာအကွယ်နံရံတစ်ခု ပေါ်လာပြီး သူသည် လေထဲတွင် ပြန်လည်မတ်တတ်ရပ်နိုင်ခဲ့သည်။

အောက်ဘက်မှ လှိုင်းထနေသော အိပ်မက်မြေပြင်ကို သူ ငုံ့ကြည့်လိုက်သည်။

မြေပြင်မှာ လှုပ်ရှားနေသော်လည်း သူ့အား မထိခိုက်နိုင်ပေ။

"တိုက်ခိုက်မှုတွေ စပြီလား"

တိုက်ခိုက်မှုမှာ အလွန်လျင်မြန်စွာ ရောက်ရှိလာသည်။ အိပ်မက်အတားအဆီးအတွင်းမှ ထူးဆန်းသော ရုပ်သေးရုပ်တစ်ခု ရုတ်တရက် ပေါ်ထွက်လာပြီး ရွှီရန်၏ ပုခုံးကို တည့်တည့်ကို ခုတ်ပိုင်းလိုက်သည်။

တကယ်လို့ ရွှီရန်သာ လှုပ်ရှားနေတဲ့ မြေပြင်ပေါ်မှာ ရပ်နေခဲ့ရင် သူ သေချာပေါက် အထိခံရမှာ ဖြစ်သည်။

သို့သော် သူသည် လေထုနံရံပေါ်တွင် ရပ်နေသဖြင့် ခန္ဓာကိုယ်ကို အနည်းငယ် လှည့်လိုက်ရုံဖြင့် အသာလေး ရှောင်တိမ်းနိုင်ခဲ့သည်။

ထိုအခါ ဓားချက်မှာ လွဲချော်သွားတော့သည်။

ခရမ်းရွှေရောင် ရုပ်သေးရုပ်မှာလည်း အိပ်မက်ဆိုးတစ်ခုကဲ့သို့ လျင်မြန်စွာ ပြန်လည်ပျောက်ကွယ်သွားသည်။

"ဟားဟား... စိတ်ဝင်စားစရာပဲ။ အိပ်မက်ကမ္ဘာလို ပတ်ဝန်းကျင်မျိုးဆိုတော့ ဒါက အိပ်မက်

တစ်ခုအတွင်းမှ သေခြင်းနှင့် ရှင်ခြင်းစွမ်းရည်ပဲ ဖြစ်ရမယ်။ သူမက ငါ့ကို ဒီထဲကို အတင်းအကျပ် ဆွဲသွင်းဖို့အတွက် တစ်ခုခုကိုတော့ ပေးဆပ်ခဲ့ရမှာပဲ"

"ပြီးတော့ ဒီနေရာမှာ ငါ့ကို ပိုပြီး နက်ရှိုင်းတဲ့ အိပ်မက်ယောင်ချောက်ထဲ ဆွဲသွင်းဖို့ ကြိုးစားနေတဲ့ အိပ်မွေ့ချစေတဲ့ အချက်တွေလည်း ရှိနေသေးတယ်။ ဒါကတော့ အနုစိတ် ပုံသဏ္ဌာန်မျိုးစုံရဲ့ စွမ်းရည်ပဲ ဖြစ်လိမ့်မယ်"

"အိပ်မက်ကမ္ဘာရဲ့ အပြင်ဘက်မှာတော့ မှန်ကမ္ဘာအလွှာတစ်ခု ရှိနေသေးတာပဲ"

"ဒါပေမဲ့ ငါ့ရဲ့ စင်ကြယ်သောဝိညာဉ်ခန္ဓာက အိပ်မွေ့ချစေတဲ့အချက်တွေကို ခုခံနိုင်စွမ်းရှိတယ်။ အိပ်မက်ပတ်ဝန်းကျင်ကိုလည်း ငါ့ရဲ့ ထူးခြားတဲ့မျက်ဝန်းနဲ့ ဖောက်ထွင်းမြင်နိုင်တယ်။ မှန်ကမ္ဘာနဲ့ပတ်သက်လို့တော့ သူမက ရုပ်သေးတစ်ရုပ်ပဲ သုံးရသေးတာဆိုတော့... နောက်ထပ် အရန်စီမံချက်တွေ ရှိဦးမှာပဲ"

ရွှီရန်က လက်နှစ်ဖက်ကို နောက်ပစ်လျက် ရပ်နေဆဲပင်။ တစ်ဖက်ရန်သူ၏ လှုပ်ရှားမှုကို အေးအေးဆေးဆေး စောင့်ကြည့်နေသည်။

အိပ်မက်ကမ္ဘာအတွင်း၌မူ အပင်များမှာ ရုတ်တရက် လျင်မြန်စွာ ပေါက်ရောက်လာပြီး အပြာရောင်ငွေမြက်ပင်များအဖြစ် ပြောင်းလဲကာ ရွှီရန်ကို ရစ်ပတ်နှောင်ဖွဲ့ရန် ကြိုးစားလာသည်။ တစ်ချိန်တည်းမှာပင် ရွှေရောင်သံကြိုးများမှာလည်း ဝှေ့ယမ်းကာ ထွက်ပေါ်လာတော့သည်။

ရွှီရန်က ရှောင်တိမ်းခြင်းပင် မပြုပေ။ သို့သော်လည်း စိတ်မကောင်းစရာမှာ ထိုရွှေရောင်သံကြိုးများမှာ သူ၏ခန္ဓာကိုယ်ကို ဖောက်ထွင်းနိုင်စွမ်း မရှိခဲ့ခြင်းပင်။

"ကောင်းပြီ... ကြည့်စရာ သိပ်မရှိတော့ဘူး။ အဆုံးသတ်လိုက်ရအောင်..."

ရွှီရန်က ခေါင်းကို အသာအယာခါလိုက်ရင်း စိတ်အာရုံဖြင့် ခိုင်းစေလိုက်ရာ မိုဓားစစ်သည်တော်ငါးဦးမှာ ပျံထွက်လာသည်။ သို့သော်လည်း ၎င်းတို့မှာ လှိုင်းထနေသော မြေပြင်၏ ဝါးမြိုခြင်းကို ခံလိုက်ရပြီး အောက်ခြေမခိုင်ဘဲ ဖြစ်နေတော့သည်။

"အိပ်မက်ကမ္ဘာက တော်တော်လေး ကောင်းမွန်တာပဲ။ အတော်လေး အသုံးဝင်တဲ့ အကူအညီမျိုးဆိုတော့ ငါ့အဖွဲ့ထဲ ဝင်လို့ရနိုင်တယ်"

ရွှီရန်က သာသာယာယာပင် နောက်ထပ် စက္ကူရုပ် ၂၀ ကို ပစ်လွှတ်လိုက်ပြန်သော်လည်း ၎င်းတို့မှာလည်း ဝါးမြိုခြင်း ခံလိုက်ရပြန်သည်။

ရွှီရန်က မျက်ခုံးပင့်လိုက်မိသည်။

"ဒီလူတွေက တော်တော်လေးကို ရင်းနှီးပြီး ပေးဆပ်ထားပုံပဲ... ဒါပေမဲ့ ငါ့မှာ ကျန်ပါသေးတယ်"

ထိုသို့ပြောကာ နောက်ထပ် ၂၅ ရုပ်ကို ထပ်မံထုတ်လိုက်သည်။

ထိုအချိန်တွင် အိပ်မက်ကမ္ဘာ၏ အပြင်ဘက်၌မူ ဟုတီးမှာ သွေးတစ်လုပ် အန်ထုတ်လိုက်ရပြီး နောက်သို့ တန်းတန်းမတ်မတ် လဲကျသွားတော့သည်။ နင်ရွှမ်း၏ မျက်နှာမှာလည်း ဖြူလျော်သွားပြီး နှုတ်ခမ်းထောင့်မှ သွေးစများ စီးကျလာသည်။ ကွမ်းရှင်းက သူမတို့နှစ်ဦးကို ဖမ်းထိန်းလိုက်ပြီး ပဲပင်ပေါက်များကို ပါးစပ်ထဲသို့ ခွံကျွေးလိုက်ကာ "မင်းတို့ အနားယူလိုက်တော့" ဟု ပြောလိုက်သည်။

ချီမုန့်လီမှာလည်း ချွေးများ တရစပ် ထွက်နေပြီး ပဲပင်ပေါက်များကို ဝါးစားလျက် သူ၏ သွေးစွမ်းအင်ကို ပြန်လည်ဖြည့်တင်းနေရသည်။

"ငါ ပြောသားပဲ... သူ့မှာ စက္ကူရုပ် ၅၀ ရှိတယ်လို့။ ဒီရင်းနှီးပေးဆပ်မှုက အရမ်းမများလွန်းဘူးလား"

"ငါတော့ လုံးဝ ပြိုလဲတော့မယ်"

လက်ရှစ်ဖက် နတ်သူငယ် ပိုင်ဖုန်း၏ မျက်ဝန်းများမှ သွေးမျက်ရည်များ စီးကျလာသည်။

"ငါ အကောင်းဆုံး လုပ်ခဲ့ပြီးပြီ။ ကျန်တာတော့ မင်းအပေါ်မှာပဲ မူတည်တော့တယ် ချင်ရိဟို..."

ပြောပြီးသည်နှင့် ပိုင်ဖုန်းသည် အားအင်ကုန်ခမ်းစွာ လဲကျသွားတော့သည်။ ထန်ချီချီက သူမတို့ကို မလျက် သားရဲတိုက်ခိုက်ရေးကွင်း၏ အပြင်ဘက်သို့ အမြန်ဆုံး ခေါ်ထုတ်သွားသည်။ သူမတို့အားလုံးမှာ တိုက်ပွဲမှ ဆုတ်ခွာသွားကြပြီ ဖြစ်သည်။

စစ်တလင်းအတွင်း၌မူ မှန်ရိပ်ပုံတူ အရှင်သခင် ချင်ရိဟို၊ အသွင်သုံးမျိုးပြောင်းဒိုင်း ထန်ချီချီ နှင့် ပဲစေ့များမှ မသေမျိုးစစ်သည်များ ဖန်တီးခြင်း ကွမ်းရှင်းတို့ သုံးဦးသာ ကျန်ရှိတော့သည်။

သူတို့နှင့် မျက်နှာချင်းဆိုင်တွင်မူ တောင်ကြီးတစ်လုံးကဲ့သို့ မားမားမတ်မတ် ရပ်နေသော တည်ရှိမှုတစ်ခု ရှိနေသည်။

ဖိအားများဖြင့် ပြည့်နှက်နေသော စက္ကူရုပ်စစ်တပ်ကြီးပင်။

ဤမြင်ကွင်းကို ကြည့်ပြီး ပွဲကြည့်စင်ပေါ်ရှိ ကျောင်းအုပ်ကြီးများနှင့် နည်းပြများမှာ ရုတ်ရုတ်သဲသဲ ဖြစ်သွားကြတော့သည်။

"တစ်ရုပ်ချင်းစီက ဒီလောက်တောင် သန်မာတာလား"

"ဘုရားရေ... သက်တူရွယ်တူ ပါရမီရှင်တွေက ဒါကို ဘယ်လိုလုပ် ယှဉ်တိုက်နိုင်မှာလဲ"

"ရုပ်သေးတစ်ရုပ်တည်းနဲ့တင် စင်ကြယ်ခြင်း မိုးကြိုးတစ်ထောင်ကို ချက်ချင်းသတ်နိုင်တာလေ။ အခု အခု အယောက် ၅၀ ဆိုရင် ဒီမျိုးဆက်ရဲ့ ပါရမီရှင်တွေအားလုံးကို အသာလေး အပြတ်ရှင်းနိုင်တာပေါ့ ဟုတ်တယ်မလား"

"ငါ အခုမှ သတိရတယ် ဒီကောင်လေးက... အရင်တုန်းက တစ်နိုင်ငံလုံးကို ဟိုးဟိုးကျော်သွားစေခဲ့တဲ့ ကြယ်စင်သစ် တစ်ကိုယ်တော် စစ်တပ်ပဲ"

"လွန်ခဲ့တဲ့ ရက်ပေါင်းနှစ်ရာတုန်းက သူ ဂြိုဟ်သားစစ်တလင်းမှာ ပေါ်လာပြီး စက္ကူရုပ်

စစ်တပ်ကို အမိန့်ပေးပြီးတော့ သွေးစွမ်းအင် တစ်သိန်းကျော်ရှိတဲ့ သရဲသတ္တဝါ တစ်သောင်းကျော်ကို အပြတ်ရှင်းခဲ့တာလေ"

"ပြီးတော့ လွန်ခဲ့တဲ့ ရက်ပိုင်းကလည်း သူ ဂြိုဟ်သားစစ်တလင်းမှာပဲ သွေးစွမ်းအင် သုံးသောင်းရှိတဲ့ ဂြိုဟ်သားသားရဲတွေကို ရူးသွပ်မတတ် လိုက်ခုတ်နေတာ"

"သူ့ရဲ့ တိုက်ခိုက်နိုင်စွမ်းက တကယ့်ကို ကြောက်စရာကြီးပဲ။ ဒါက လူတစ်ယောက်တည်းရဲ့ အင်အား တကယ်ပဲလား"

"စစ်တပ်ကို ကြည့်ရတာ တစ်ပုံစံတည်းပဲ။ မိုဓားစစ်သည်တော်တွေ၊ သံချပ်ကာစစ်သည်တွေ၊ ကျားတွေ၊ ဝက်ဝံနက်တွေ၊ လင်းယုန်ကြီးတွေ... အရေအတွက်နဲ့ အမျိုးအစားတွေက အတူတူပဲ သေချာပေါက် သူပဲ ဖြစ်ရမယ်"

"ဒါဆိုရင်... ဒါက တကယ့်ကို အနိုင်မခံနိုင်တဲ့ အစွမ်းပဲ မဟုတ်လား"

ကျောင်းအုပ်ကြီးများဖြစ်စေ၊ နည်းပြများဖြစ်စေ အားလုံးက စိတ်ပျက်အားငယ်မှုကို ခံစားလိုက်ရသည်။

ဂြိုဟ်သားစစ်တလင်းမှာ သွေးစွမ်းအင် သုံးသောင်းရှိတဲ့ သားရဲတွေကို အစုလိုက်အပြုံလိုက် ချေမှုန်းနိုင်တဲ့ စစ်တပ်မျိုးကို သူတို့က ဘယ်လိုနည်းနဲ့ အနိုင်ယူနိုင်မှာလဲ။

"သူတို့ကို ရပ်ခိုင်းလိုက်ပါတော့... အနိုင်ရဖို့က အရမ်းခက်ခဲလွန်းပါတယ်..."

နည်းပြတစ်ဦးက သက်ပြင်းချလိုက်မိသည်။

ထိုလူငယ်လေးမှာ ထိတ်လန့်စရာ ကောင်းလွန်းသည်။

...

ချင်ရိဟိုသည် အသက်ကို ပြင်းပြင်းရှူသွင်းလိုက်သည်။ သူမသည် ငေးငိုင်ပြီး ချစ်စရာကောင်းသော ပုံစံရှိသော်လည်း ယခုအချိန်တွင်မူ သူမ၏မျက်ဝန်းများမှာ ထူးထူးခြားခြား တောက်ပနေသည်။

"သူတို့တွေ ဒီလောက်တောင် ရင်းနှီးပေးဆပ်ခဲ့ကြပြီပဲ... ငါတို့လည်း စမ်းကြည့်ရမှာပေါ့"

"မှန်ရိပ် ပုံတူကူးခြင်း"

သူမသည် သူမ၏ အပြင်းထန်ဆုံး တိုက်ကွက်ကို အသက်သွင်းလိုက်သည်။

ချက်ချင်းပင် သူမ၏ မျက်နှာရှိ အပေါက်တိုင်းမှ သွေးများပန်းထွက်လာပြီး နောက်သို့ လဲကျသွားတော့သည်။ သူမ၏ အခြေအနေမှာ ဟုတီးထက်ပင် ပိုဆိုးလှသည်။ ဟုတီးက စကားပြောနိုင်သေးသော်လည်း သူမကမူ သတိပင် မေ့သွားသည်။

တကယ်လို့ ထန်ချီချီသာ အချိန်မီ လှမ်းမဖမ်းလိုက်ပါက သူမသည် မြေပြင်ပေါ်သို့ ပြုတ်ကျသည့်အရှိန်ကြောင့် ဦးနှောက်ထိခိုက်သွားနိုင်သည်။

သူမ သတိမေ့သွားသည်နှင့် တစ်ပြိုင်နက် ရွှီရန်၏ ရှေ့မှောက်တွင် မှန်တစ်ချပ်မှာ အစိတ်စိတ်အမွှာမွှာ ကွဲအက်သွားပြီး အတွင်းမှ မီးခိုးရောင် ကောင်လေးတစ်ဦး လမ်းလျှောက်ထွက်လာသည်။

ထိုကောင်လေး၏ ရုပ်ရည်သွင်ပြင်မှာ ရွှီရန်နှင့် ထပ်တူပင်။ သို့သော်လည်း ထိုကောင်လေးမှာ မီးခိုးရောင် အသွေးအယောင်များသာ ရှိပြီး တည်ငြိမ်အေးစက်သော မျက်နှာထား၊ အသက်မဲ့သော အသွင်အပြင်များကြောင့် မီးခိုးရောင် ကျောက်သားတစ်ခုမှ ထွင်းထုထားသကဲ့သို့ပင်။

သူသည် တောင့်တင်းနေပြီး အသက်ဝင်မှုမရှိသော်လည်း ထိုပုံတူကောင်လေးထံမှ ထွက်ပေါ်လာသော အရှိန်အဝါနှင့် ဖိအားများက လူတိုင်း၏ ကျောရိုးထဲအထိ စိမ့်တက်သွားစေသည်။

ရွှီရန် "….."