အခန်း (၂၁၅-၂၁၆)

အခန်း ၂၁၅ - ယင်းဟွမ်ဟွမ်ကို ဆုံးမခြင်း

လင်းတုန်က တိုက်ခိုက်ရာတွင် ပြတ်သားသူသည်ဖြစ်ရာ ရှောင်ထျန်းနောက်သို့ လိုက်လံတိုက်ခိုက်ရန် လေ၊မိုးကြိုးကပ်ဘေးကို တိုက်ရိုက်ပင် ဆွဲယူအသုံးပြုလိုက်လေသည်။

ကောင်းကင်ယံထက်တွင် မိုးကြိုးတန်းများက မြွေနဂါးများကဲ့သို့ လူးလာတုံ့ခေါက်နေပြီး လေထုထဲ၌ မိုးကြိုးဓာတ်များကြောင့် တစီစီမြည်သံနှင့်အတူ အပူရှိန်များ လွှမ်းခြုံနေခဲ့၏။

ဤမြင်ကွင်းက လူတိုင်းကို မိန်းမောတုန်လှုပ်သွားစေခဲ့သည်။ ယခင်က ထိုသတင်းကို ကြားဖူးရုံသာ ရှိခဲ့သော ကျန်းခွန်းနှင့် ယွမ်လင်တို့မှာ တုန်လှုပ်ချောက်ချားဖွယ်ရာ မြင်ကွင်းကို ကြည့်ရင်း မျက်နှာများ ပျော့ခွေသွားကြတော့သည်။ သူတို့ရှေ့မှ အမျိုးသားသည် လေ၊မိုးကြိုးကပ်ဘေးကို မိမိလက်ဖဝါးထဲမှ ကစားစရာတစ်ခုကဲ့သို့ သဘောထားနေလေသည်။

“ဒီလူက တကယ်ပဲ လေ၊မိုးကြိုးကပ်ဘေးကို တိုက်ခိုက်ရေးလက်နက်တစ်ခုလို သဘောထားနေတာလား...”

ယင်းဟွမ်ဟွမ်က သူမ၏နှုတ်ခမ်းအစုံကို တင်းတင်းစေ့ထားလိုက်မိပြီး မျက်ခုံးတန်းများကြားတွင် ဇဝေဇဝါဖြစ်ဟန်ဖြင့် တိုးတိုးလေး ရေရွတ်လိုက်မိသည်။ “သူ့လက်ထဲမှာ လေ၊မိုးကြိုးကပ်ဘေးက ဘယ်လိုလုပ် ဒီလောက်လွယ်လွယ်ကူကူ ပေါ်လာရတာလဲ...”

သူမကိုယ်တိုင်က ဝိညာဉ်စွမ်းအင်ကို ကျင့်ကြံသူဖြစ်သော်လည်း လေ၊မိုးကြိုးကပ်ဘေးကို တစ်ကြိမ်သာ ဖြတ်ကျော်ဖူးပြီး ထိုတစ်ကြိမ်မှာပင် အသက်ဘေးနှင့် နီးကပ်လွန်းလှသည်ဟု ခံစားခဲ့ရသည်။

ပြန်လည်တွေးတောမိတိုင်း ယခုထိ ထိတ်လန့်တုန်လှုပ်နေရဆဲပင်။ သို့သော် ယခုအခါတွင်မူ လေ၊မိုးကြိုးကပ်ဘေးသည် လင်းတုန်၏လက်ထဲ၌ ကလေးကစားစရာတစ်ခုပမာ ဖြစ်နေချေပြီ။

“အော်... ပြီးတော့ ဝူယွမ်ဆိုတဲ့ ဂျူနီယာမောင်လေးလည်း ရှိသေးတာပဲ”

သူမ၏ လှပသောမျက်ဝန်းအစုံသည် ဝူယွမ်ထံသို့ ရောက်ရှိသွားကာ အကြည့်တို့က အတန်ငယ် ရှုပ်ထွေးနေခဲ့သည်။

ဤအမျိုးသားကို သူမ ပို၍ပင် နားမလည်နိုင်တော့ချေ။

ဝူယွမ်က ဤကဲ့သို့ မိုးကြိုးကိုစတင်ကစားခဲ့သူဖြစ်သည်။ သူမသည် ပြည်ထောင်တစ်ရာတိုက်ပွဲ၏ အသေးစိတ်အချက်အလက်များကို စုံစမ်းကြည့်ဖူးရာ မြောက်ပိုင်းရွှမ်နယ်မြေ၏ အကျပ်အတည်းကို ဖြေရှင်းရန် လေ၊မိုးကြိုးကပ်ဘေး လေးထပ်ကို ဆင့်ခေါ်ခဲ့သူမှာ ဝူယွမ် ဖြစ်သည်ဟု သိရှိခဲ့ရသည်။

“သူတို့နှစ်ယောက်စလုံးမှာ တူညီတဲ့ ထူးခြားချက်တစ်ခုရှိတယ်၊ အဲဒါက သူတို့ရဲ့ ခန္ဓာကိုယ်တွေက အံ့မခန်း သန်မာနေတာပဲ၊ အဲဒါကြောင့်လည်း ဒီလောက်ကြီးမားတဲ့ လေ၊မိုးကြိုးစွမ်းအင်ကို လွယ်လွယ်ကူကူ တောင့်ခံနိုင်တာ”

“ပြီးတော့ သူတို့ရဲ့ နီဝမ်နယ်ပယ်ကိုလည်း တစ်ခုခုနဲ့ ကာကွယ်ထားပုံရတယ်၊ မဟုတ်ရင် ခန္ဓာကိုယ်တစ်ခုတည်း သန်မာရုံနဲ့ ဒီကောင်းကင်မိုးကြိုးရဲ့ ရိုက်ခတ်မှုကို နီဝမ်နယ်ပယ်က ခံနိုင်မှာမဟုတ်ဘူး...”

ယင်းဟွမ်ဟွမ်က ထိုသူနှစ်ဦး၏ ထိတ်လန့်ဖွယ်ရာ ကိုယ်ခန္ဓာကြံ့ခိုင်မှုကို ကြည့်ရင်း သေချာ စဉ်းစားနေမိသည်။

လင်းတုန်က ရှောင်ထျန်းနှင့် တိုက်ခိုက်စဉ် ထိုင်နေရုံသာရှိသော်လည်း ရှောင်ထျန်းမှာ သူ၏ ခုခံမှုကိုပင် မဖောက်ထွင်းနိုင်ခဲ့ချေ။ ဝူယွမ်မှာမူ ပို၍ပင် ထိတ်လန့်ဖွယ်ကောင်းလေသည်။

နတ်ဆိုးယွမ် ကျိန်စာသင့်ခန္ဓာကို အသက်သွင်းထားသော ယောင်လင်ကို ကိုယ်ခန္ဓာစွမ်းအားသက်သက်ဖြင့် အစိမ်းလိုက် ထုနှက်နိုင်ခဲ့သည်။

ယောင်လင်း အသုံးပြုခဲ့သော နတ်ဆိုးယွမ် ကျိန်စာသင့်ခန္ဓာသည် ယွမ်ဂိတ်၏ အသန်မာဆုံး ခန္ဓာကျင့်စဉ်များထဲမှ တစ်ခုဖြစ်ပြီး သူတို့တောင်ဂိုဏ်း လေပြင်းခန်းမမှ မဟာရှေးဟောင်းခန္ဓာထက်ပင် သန်မာသေးသည်။

သို့သော် ဝူယွမ်မှာ ကျင့်ကြံခြင်းအဆင့် သုံးဆင့်မျှ နိမ့်ပါးနေသော်လည်း ပြိုင်ဘက်ကို ကိုယ်ခန္ဓာစွမ်းအားဖြင့်ပင် ဖိနှိပ်ခြေမှုန်းနိုင်ခဲ့သည်။

အရေးကြီးဆုံးအချက်မှာ ဝူယွမ်၏ ခန္ဓာကိုယ်က အလွန်သန်မာလှသော်လည်း ယောင်လင်းကဲ့သို့ ကြည့်ရဆိုးသော ဘီလူးကြီးတစ်ကောင်ပမာ ဖောင်းကားမလာခြင်းပင် ဖြစ်သည်။ ဝူယွမ်၏ ကိုယ်ခန္ဓာက သန်မာလာလေ ပို၍ ခန့်ညားလာလေဖြစ်ပြီး ပို၍ပင် အရှိန်အဝါ ကြီးမားလာလေ ဖြစ်သည်။

“သူတို့မှာ အစွမ်းထက်တဲ့ ကိုယ်ခန္ဓာကျင့်စဉ်တစ်ခုခု ရှိနေမှာ အသေအချာပဲ၊ အဲဒါကလည်း ဝိညာဉ်သိုင်းပညာရပ်ထက်တောင် သာလွန်နိုင်တယ်၊ မဟုတ်ရင် ဒီလောက် ကြောက်စရာကောင်းတဲ့ စွမ်းအားကို သူတို့ ခန္ဓာကိုယ်က ခံနိုင်မှာမဟုတ်ဘူး၊ ဝူယွမ်ရဲ့ စွမ်းအားအရှိန်အဟုန်ပဲဖြစ်ဖြစ်၊ လင်းတုန်ရဲ့ ဝိညာဉ်တံဆိပ်ပဲဖြစ်ဖြစ်၊ နိဗ္ဗာန်အဆင့် ကိုးနဲ့အထက် သန်မာတဲ့ ခန္ဓာကိုယ်ရှိမှ ဖြစ်နိုင်မှာ...”

ယင်းဟွမ်ဟွမ်က သူမ၏ရင်ထဲတွင် တွေးဆနေမိသည်။ ဤသို့ဆိုမှသာ အရာအားလုံးက ယုတ္တိတန်ပေလိမ့်မည်။

“ဒီလူက လျှို့ဝှက်ချက်တွေ အများကြီးကို ဖုံးကွယ်ထားတာပဲ...”

သူမသည် ဝူယွမ်အပေါ် ပိုပိုပြီး စပ်စုချင်စိတ် ပြင်းပြလာကာ ထိုလျှို့ဝှက်ချက်အားလုံးကို အကုန်အစင် သိရှိလိုစိတ်များ တဖွားဖွား ပေါ်ပေါက်လာတော့သည်။

“သူတို့နှစ်ယောက်လုံးက တောင်ဂိုဏ်းတပည့်တွေ ဖြစ်နေတာ တော်သေးတာပေါ့...” ဟု တွေးရင်း ယင်းဟွမ်ဟွမ်သည် စိတ်သက်သာရာရစွာ ပြုံးလိုက်မိသည်။

ယခုအချိန်တွင် ထိုသူနှစ်ဦးမှာ တောင်ဂိုဏ်းအတွက်၊ သူတို့အတွက် အသက်စွန့်၍ တိုက်ပွဲဝင်ပေးနေကြခြင်းဖြစ်သည်။

ဝုန်း။

မိုးချိန်းသံများ ဟိန်းထွက်လာခဲ့သည်။ လင်းတုန်က ရှောင်ထျန်းကို အမီလိုက်နိုင်သွားပြီး လက်နှစ်ဖက်ဖြင့် တိုက်ရိုက်ဖမ်းဆီးကာ မြင့်မားသော မိုးကြိုးတိမ်တိုက်များရှိရာ ကောင်းကင်ယံသို့ ပျံတက်သွားပြီး မိုးကြိုးပင်လယ်ထဲတွင် နှစ်ဦးသား ရေချိုးနေကြတော့သည်။

တစ်ဖက်တွင်မူ ဝူယွမ်က ယောင်လင်ကို အဆက်မပြတ် ထိုးနှက်နေဆဲဖြစ်ရာ ယောင်လင်၏ ဘီလူးကဲ့သို့ ဖောင်းကားနေသော ခန္ဓာကိုယ်မှာ ဝူယွမ်၏ လက်သီးချက်များအောက်တွင် တဖြည်းဖြည်း ပြန်လည် ကျုံ့ဝင်သွားတော့သည်။

“ငါ မသေမျိုးအနှစ်သာရ ရှေးဟောင်းမျိုးစေ့ကို မလိုချင်တော့ဘူး၊ ငါ့ကိုလွှတ်ပေးပါ...”

ယောင်လင်က နာကျင်စွာ အော်ဟစ်ဆဲဆိုရင်း ထွက်ပြေးရန် ပြင်လေသည်။ ဤကဲ့သို့ မိစ္ဆာကောင်နှင့် တွေ့ဆုံရခြင်းက သူ၏ ယုံကြည်ချက်အားလုံးကို မြေလှန်ဖျက်ဆီးပစ်လိုက်ချေပြီ။

“မင်း အနှစ်သာရမျိုးစေ့ကို လိုချင်တာ၊ မလိုချင်တာက အရေးမကြီးဘူး၊ အရေးကြီးတာက မင်းရဲ့ခေါင်းက ငါ့အတွက် ဆုလာဘ်အဖြစ် လိုအပ်နေတာပဲ...” ဝူယွမ်က အေးစက်စက် ပြန်ပြောလိုက်လေသည်။

“ကောင်လေး... အကန့်အသတ်ကို မကျော်နဲ့၊ ငါက ယွမ်ဂိတ်ရဲ့ ဝရမ်းစာရင်းထဲမှာ ရှိနေပေမဲ့ တစ်ချိန်က ယွမ်ဂိတ်ရဲ့ အကြီးအကဲ တစ်ယောက်ပဲ၊ ယွမ်ဂိတ်က ငါ့ကို တကယ်မသတ်နိုင်ဘူးလို့ မင်းထင်နေတာလား၊ သူတို့ ငါ့ကို လိုက်လံရှာဖွေနေပေမဲ့ ငါ့မှာ ယွမ်ဂိတ်ထဲက အဆက်အသွယ်တွေ ရှိသေးတယ်၊ မင်းသာ ငါ့ခေါင်းကိုယူပြီး ဆုလာဘ်သွားတောင်းမယ်ဆိုရင် မင်းရဲ့ခေါင်းပါ အဲဒီမှာ ကျန်ရစ်ခဲ့လိမ့်မယ်...”

ယောင်လင်က အခြေအနေမလှသဖြင့် ယွမ်ဂိတ်၏အမည်ကို အသုံးချကာ ခြိမ်းခြောက်လိုက်သည်။

“ရယ်စရာပဲ၊ သူတို့က မင်းကို သတ်ဖို့ လိုက်နေတာတောင် မင်းက သူတို့ ဖိနပ်ကို လျက်နေတုန်းပဲလား၊ မင်းက တကယ့်ကို ခွေးတစ်ကောင်ပဲ၊ ‘ဖားလွန်းတဲ့သူဟာ ဘာမှမကျန်တော့တဲ့အထိ ဖားတတ်တယ်’ ဆိုတဲ့ စကားကို မကြားဖူးဘူးလား...” ဝူယွမ်က ‌ေလှာင်ပြောင်လိုက်သည်။

ယောင်လင်၏ မျက်နှာသည် ဒေါသကြောင့် ပုံပျက်ပန်းပျက် ဖြစ်သွားကာ “မဖြစ်နိုင်ဘူး၊ ယွမ်ဂိတ်က ငါ့ကို အရင်က ပြောခဲ့တယ်၊ သွေးကျောက်မြေရိုင်းမှာ သေချာအခြေချပြီး သူတို့အတွက် သတင်းအချက်အလက်တွေ စုဆောင်းပေးရင် ငါ့အပြစ်တွေကို ခွင့်လွှတ်ပေးမယ်လို့...”

“ဖားတတ်တဲ့သူကတော့ ဘယ်တော့မှ နောင်တရမှာမဟုတ်ဘူး...”

ဝူယွမ်သည် စကားဆက်မပြောတော့ဘဲ သူ၏ ကြီးမားလှသော လက်သီးချက်ဖြင့် ယောင်လင်းကို အပြတ်အသတ် ခြေမှုန်းဖို့ပြင်လိုက်တော့သည်။

ယောင်လင်၏ စကားများက မှန်သည်ဖြစ်စေ၊ မှားသည်ဖြစ်စေ သူ့ကို အရင်သတ်ပစ်ရန် ဝူယွမ် ဆုံးဖြတ်ထားပြီးသား ဖြစ်သည်။

ဘုန်း... ဘုန်း... ဘုန်း... လက်သီးချက်များ ဆက်တိုက် ကျရောက်လာပြီးနောက် ယောင်လင်းသည် သူ၏ ရုပ်ခန္ဓာကို စွန့်ခွာကာ ဝိညာဉ်ငယ်လေး အဖြစ် ထွက်ပြေးရန် ကြိုးစားလေသည်။

သို့သော် ဝူယွမ်၏ မျက်စိအောက်မှ မလွတ်နိုင်ခဲ့ပေ။

ဝူယွမ်၏ ဝိညာဉ်စွမ်းအင်များ တဟုန်ထိုး ထွက်ပေါ်လာကာ ဝါးမျိုခြင်းရူန်းက လင်းလက်သွားပြီး ဝါးမျိုခြင်းစွမ်းအားဖြင့် ယောင်လင်း၏ ဝိညာဉ်ငယ်လေးကို သူ၏ နီဝမ်နယ်ပယ်ထဲသို့ အတင်းအကျပ် ဆွဲသွင်းလိုက်တော့သည်။

“ဟဟဟ... မိုက်မဲလိုက်တဲ့ ကောင်လေး၊ မင်းက ငါ့ရဲ့ ဝိညာဉ်ကို မင်းရဲ့ နီဝမ်နယ်ပယ်ထဲကို ဆွဲသွင်းရဲတယ်ပေါ့၊ မင်း သေပြီသာမှတ်ပေတော့၊ နိဗ္ဗာန်အဆင့် ကိုး တစ်ယောက်ရဲ့ ဝိညာဉ်က ဘယ်လောက် စွမ်းအားကြီးလဲဆိုတာ မင်း မသိသေးဘူးပဲ...”

ယောင်လင်းသက ဝူယွမ်၏ ကိုယ်ခန္ဓာကို သိမ်းပိုက်နိုင်တော့မည်ဟု ထင်မှတ်ကာ ဝမ်းသာအားရ အော်ဟစ်လိုက်လေသည်။ ထိုအချိန်တွင် ဝူယွမ်၏ အသံက နီဝမ်နယ်ပယ်ထဲတွင် ဟိန်းထွက်လာခဲ့သည်။

“လူအ... လူတိုင်းက မင်းလိုပဲ မိုက်မဲနေမယ်လို့ ထင်နေတာလား၊ မင်းရဲ့ ရုပ်ခန္ဓာကို ငါခြေမှုန်းနိုင်ခဲ့ရင် မင်းရဲ့ ဝိညာဉ်ကိုလည်း ငါ ဘာမှကြောက်စရာ မလိုဘူး...”

“မင်းက ဒီနေရာကို ရောက်လာတဲ့ ပထမဆုံးလူ မဟုတ်သလို၊ ဒီလိုစိတ်ကူးမျိုး ရှိတဲ့ ပထမဆုံးလူလည်း မဟုတ်ဘူး...”

“နောင်မှာလည်း တခြားလူတွေ ရှိဦးမှာပါ၊ ငါကတော့ ယွမ်ဂိတ်က လူအိုကြီးတွေရဲ့ ဝိညာဉ်တွေကို မင်းအဖော်ရအောင် ဝါးမျိုပေးဖို့ ကြိုးစားရမှာပေါ့...”

ယွမ်ဂိတ်က ဝူယွမ်၏ ရန်သူဖြစ်ရန် ကံပါလာပြီးသား ဖြစ်သည်။ တောင်ဂိုဏ်းနှင့် ပဋိပက္ခရှိခြင်း၊ ကောင်းကင်မြွေပါမျိုးနွယ်နှင့် ရန်ငြိုးရှိခြင်းတို့ကြောင့်သာမက ၎င်းတို့သည် နတ်ဆိုးအကြွင်းအကျန်များ၏ ခိုအောင်းရာ ဖြစ်နေသောကြောင့်လည်း ဖြစ်သည်။

နတ်ဆိုးများနှင့် ဤကမ္ဘာရှိ လူသားများမှာ အတူယှဉ်တွဲ၍ မနေနိုင်ပေ။ နောင်တစ်ချိန်တွင် ယွမ်ဂိတ်နှင့် သူ၏ကြား၌ ပြင်းထန်သော တိုက်ပွဲတစ်ခု ဖြစ်လာဦးမည်မှာ ဧကန်မလွဲပင်။

“ဒါ... ဒါက ဘာကြီးလဲ...”

ယောင်လင်း၏ ဝိညာဉ်ငယ်လေးက ဝူယွမ်၏ နီဝမ်နယ်ပယ်ထဲရှိ ကစဉ်ကလျားသန္ဓေသားကို မြင်ပြီး ထိတ်လန့်တုန်လှုပ်သွားခဲ့သည်။

ဝူယွမ်၏ နီဝမ်နယ်ပယ်ထဲတွင် ဤကဲ့သို့သော အရာမျိုး ရှိနေလိမ့်မည်ဟု သူ လုံးဝ ထင်မထားခဲ့ချေ။

“ဝါးမျိုခြင်းစွမ်းအား၊ မိုးကြိုးစွမ်းအား၊ လေပြင်းစွမ်းအား... ဒါက ဘာကြီးလဲ...”

“မင်း သိခွင့်ရမှာ မဟုတ်တော့ဘူး...”

“ကစဉ်ကလျားထိန်းချုပ်ခြင်း ဓားအတတ်...”

ဝူယွမ်က အေးစက်စက် ဆိုလိုက်ရာ ကစဉ်ကလျားသန္ဓေသားသည် စတင်လည်ပတ်လာပြီး ဝိညာဉ်ဓားသန္ဓေသားအဖြစ် ပြောင်းလဲသွားကာ ယောင်လင်း၏ ဝိညာဉ်ကို အပိုင်းပိုင်းအစစ ဆွဲဖြဲပစ်လိုက်တော့သည်။

အော်ဟစ်သံများ ခဏ ထွက်ပေါ်လာပြီးနောက် အရာအားလုံး ငြိမ်သက်သွားတော့သည်။ ယောင်လင်း၏ ဝိညာဉ်သည် ဝူယွမ်၏ ဝိညာဉ်အတွက် စွမ်းအင်အာဟာရအဖြစ်သို့ လုံးဝဥဿုံ ပြောင်းလဲသွားချေပြီ။

ဝူယွမ်သည် ထိုဝိညာဉ်စွမ်းအင်များကို ဝါးမျိုခြင်းစွမ်းအားဖြင့် သန့်စင်ကာ ကိုယ်ပိုင်ဝိညာဉ်စွမ်းအင်များအဖြစ် ပြောင်းလဲလိုက်တော့သည်။

တစ်ဖက်တွင်လည်း လင်းတုန်၏ တိုက်ပွဲမှာ ပြီးဆုံးသွားပြီဖြစ်သည်။ လင်းတုန်က ကောင်းကင်အဆောင်သခင် အဆင့်ခုနှစ်မှ ရှစ်ကိုတက်သည့် လေ၊မိုးကြိုးကပ်ဘေးကို အသုံးချခဲ့ခြင်းဖြစ်သည်။

ရှောင်ထျန်းမှာမူ ထိုဒဏ်ကို မခံနိုင်တော့ဘဲ မေ့မြောသွားကာ လင်းတုန်၏ ဖမ်းဆီးခြင်းကို ခံလိုက်ရသည်။

တိုက်ပွဲပြီးဆုံးသွားသောအခါ ဝူယွမ်နှင့် လင်းတုန်တို့က အလောင်းများထံမှ သိုလှောင်အိတ်များနှင့် ဝိညာဉ်ရတနာများကို ကျွမ်ူကျွမ်းကျင်ကျင် သိမ်းဆည်းလိုက်ကြတော့သည်။

သူတို့၏ စနစ်တကျရှိလှသော လုယက်မှုပုံစံကို ကြည့်ပြီး ကျန်းခွန်းနှင့် အခြားသူများမှာ အံ့အားသင့်နေကြသည်။

“ရှင်တို့နှစ်ယောက်က အထူးလူသတ်သမားတွေနဲ့ ဓားပြတွေလား...” ယင်းဟွမ်ဟွမ်က မအောင့်နိုင်တော့ပဲ မျက်လုံးအဝိုင်းသားဖြင့် မေးလိုက်မိသည်။

“အော်... ပြည်ထောင်တစ်ရာတိုက်ပွဲတုန်းက အကျင့်ဖြစ်သွားလို့ပါ...” ဝူယွမ်က ခေါင်းကို ကုတ်ရင်း ရယ်မောလိုက်သည်။ ထို့နောက် သူက ဤဒေသရှိ မြို့သုံးမြို့ကို သိမ်းပိုက်ရန်နှင့် တောင်ဂိုဏ်း၏ အာဏာစက်ကို ချဲ့ထွင်ရန် အကြံပြုလိုက်သည်။

သို့သော် ယင်းဟွမ်ဟွမ်က လူအများအပြား သေကြေပျက်စီးမည်ကို စိုးရိမ်သဖြင့် ကန့်ကွက်လေသည်။ ထိုအခါ ဝူယွမ်က သူမကို အေးစက်စက် ကြည့်ရင်း အပြင်းအထန် ဆုံးမလေတော့သည်။

“နုနယ်လိုက်တာ...”

“ဒီလို ပရမ်းပတာဖြစ်နေတဲ့ နေရာမှာ မင်းက ရိုးသားဖြူစင်နေလို့ မရဘူး၊ မင်းက ပြတ်ပြတ်သားသား မလုပ်နိုင်ရင် ဒီမှာ ခြေကုပ်ယူနိုင်မှာ မဟုတ်ဘူး...”

“မင်း တွေးကြည့်စမ်း၊ ဒီနေရာမှာ နေ့တိုင်း လူတွေ သေနေကြတာ၊ ပြီးတော့ ဒီမှာ စုဝေးနေတဲ့သူတွေက ဘယ်လိုလူတွေလဲဆိုတာ မင်းသိရဲ့လား၊ အများစုက သေသင့်တဲ့သူတွေချည်းပဲ၊ ဒီမှာ စည်းစနစ်မရှိလို့ ပြဿနာတွေ အများကြီး ဖြစ်နေတာ၊ ငါတို့ တောင်ဂိုဏ်းတပည့်တွေတောင် ဒီမှာ အသက်အန္တရာယ် စိုးရိမ်နေရတာ၊ နှစ်တိုင်း ငါတို့ တပည့်တွေ ဘယ်လောက်တောင် ဒီမြေအောက်မှာ မြှုပ်နှံခဲ့ရပြီလဲ...”

“အကယ်၍ ငါတို့က ဒီမြို့သုံးမြို့ကို သိမ်းပိုက်ပြီး စည်းစနစ်တကျ အုပ်ချုပ်နိုင်မယ်ဆိုရင် လူတွေ ဒီလောက် သေမှာမဟုတ်တော့ဘူး၊ အနည်းဆုံးတော့ ငါတို့ တပည့်တွေ လွတ်လွတ်လပ်လပ် သွားလာနိုင်မယ်၊ ဒီနေ့ရဲ့ စတေးမှုဟာ နောင်အနာဂတ်ရဲ့ ငြိမ်းချမ်းရေးအတွက်ပဲ၊ မင်းက လူ‌တွေသေမှာကို ကြောက်နေရင် နောက်ဆုံးမှာ မင်းလည်း သေရမှာပဲ၊ ဂိုဏ်းတစ်ခုက ဒီနေ့ လူအနည်းငယ် သေမှာကို ကြောက်ပြီး ရှေ့မဆက်ဘဲ နေလို့မရဘူး၊ ပြဿနာကို အခုမဖြေရှင်းရင် နောင်ကြရင် ဒီထက်ကြီးတဲ့ ပြဿနာ ဖြစ်လာလိမ့်မယ်...”

“ယောင်လင်တို့ သေသွားတာက ငါတို့အတွက် အကောင်းဆုံးအခွင့်အရေးပဲ၊ ဒါဟာ ငါတို့ကိုယ်တိုင်အတွက်တင် မကဘူး၊ နောက်ပိုင်းမှာ နတ်ဆိုးအမှတ်အသားအဖွဲ့က တခြားတောင်ဂိုဏ်းတပည့်တွေကို လက်စားမချေနိုင်အောင် အမြစ်ပြတ်အောင် လုပ်ရမှာပဲ၊ မင်းက ငါတို့တပည့်တွေ ထပ်ပြီး အသတ်ခံရတာကို ကြည့်ချင်လို့လား...”

“ငါ... ငါက...” ယင်းဟွမ်ဟွမ်က ပြန်လည်ပြောဆိုရန် စကားလုံး ရှာမတွေ့တော့ချေ။ ဝူယွမ်၏ ပြင်းထန်သော ဆုံးမစကားများက ရက်စက်လှသော လက်တွေ့လောက၏ အမှန်တရားဖြင့် သူမအား ထိုးနှက်လိုက်သကဲ့သို့ ဖြစ်သွားတော့သည်။

ငြိမ်းချမ်းရေးကို စတေးမှုများဖြင့်သာ ဝယ်ယူရမည်ဖြစ်ကြောင်း သူမ နားလည်သွားခဲ့ရသည်။

ယခုအခါတွင်မူ ဝူယွမ်နှင့် လင်းတုန်တို့၏ ဦးဆောင်မှုဖြင့် တောင်ဂိုဏ်းက သွေးကျောက်မြေရိုင်းတွင် အင်အားကြီးမားသော ခြေကုပ်တစ်ခုကို စတင်တည်ဆောက်ရန် ပြင်ဆင်ကြလေပြီ။

အခန်း (၂၁၆) - ရွှမ်းစု။ ။စကားတွေအများကြီးပြောမနေနဲ့၊ ဒီကိုလာခဲ့(၁)

ယင်းဟွမ်ဟွမ်သည် တာဝန်များဖြင့် အပြင်လောကသို့ မကြာခဏ ထွက်လေ့ရှိသူဖြစ်သော်လည်း သူမက တောင်ဂိုဏ်းကဲ့သို့သော အထက်တန်းစားဂိုဏ်းကြီးတစ်ခုတွင် ကြီးပြင်းလာခဲ့ပြီး တောင်ဂိုဏ်း ဂိုဏ်းချုပ်၏ မျက်စိအောက်က အပြောက်မခံသော ရတနာတစ်ပါး ဖြစ်ကာ အခြားသူများထက် ပိုမြင့်မြတ်သော ဘဝမျိုးဖြင့် မွေးဖွားလာခဲ့ခြင်း ဖြစ်သည်၊၊

ထို့ကြောင့်ပင် လောက၏ အမှောင်ဘက်ခြမ်းမှ ပြဿနာအတော်များများကို သူမ မြင်နိုင်စွမ်း မရှိခဲ့ပေ၊၊

၎င်းနှင့် နှိုင်းယှဉ်ပါက အောက်ခြေအလွှာမှ ရုန်းကန်တက်လှမ်းလာခဲ့ရသည့် ဝူယွမ်နှင့် ဖန်းယွမ်ကဲ့သို့သော တပည့်များမှာမူ နေရာတစ်ခုကို ခိုင်ခိုင်မာမာ တည်ဆောက်နိုင်ရန်မှာ မလွယ်ကူကြောင်း ကောင်းစွာ သိရှိထားကြသည်၊၊ နေရာကို ထိန်းသိမ်းရန်အတွက် သူတို့က ရက်စက်ကြမ်းကြုတ်ကြရမည်သာ ဖြစ်သည်၊၊

သို့သော်လည်း ယင်းဟွမ်ဟွမ်သည် လူအမဟုတ်ပေ၊၊ ဆန့်ကျင်ဘက်အနေဖြင့် သူမသည် အလွန်တရာ ထက်မြက်သူဖြစ်ပြီး စိတ်နှလုံး နူးညံ့လွန်းနေခြင်းသာ ဖြစ်သည်၊၊

ဝူယွမ်၏ လမ်းညွှန်မှုကို ကြားရပြီးနောက် သူမ နားလည်သွားခဲ့သည်၊၊

“ကိုယ့်အတွက် မဟုတ်လျှင် ကျန်တဲ့သူ ဘယ်သူသေသေ” ဟူ၍ ရှေးစကားပုံတစ်ခုပင် ရှိသေးသည်။

သူမသည် တောင်ဂိုဏ်းကို ချစ်မြတ်နိုးသူဖြစ်ရာ ဂိုဏ်း၏ အကျိုးစီးပွားကို သဘာဝအတိုင်း ကာကွယ်လိုလေသည်၊၊ ဝူယွမ်၏ အကြံပြုချက်က တောင်ဂိုဏ်းအတွက် အကျိုးရှိစေရုံသာမက သွေးကျောက်မြေရိုင်းတွင် ကျင့်ကြံနေထိုင်ကြမည့် တောင်ဂိုဏ်းတပည့်များအတွက်လည်း မမြင်ရသော အကာအကွယ်တစ်ခု ဖြစ်လာပေလိမ့်မည်၊၊

ယွမ်ဖန်း အဘယ်ကြောင့် ဤမျှအထိ ကြောက်ရွံ့နေခဲ့ရသနည်။

အတိုင်းအတာတစ်ခုအထိ ပြောရလျှင် ၎င်းမှာ သွေးကျောက်မြေရိုင်းရှိ လူသတ်သမားများက လုံလောက်အောင် ရက်စက်သောကြောင့်ပင် ဖြစ်သည်၊၊

အခြားသူများက သင့်ကို ကြောက်ရွံ့မှသာလျှင် သင့်ကို လေးစားလာအောင် ပြုလုပ်နိုင်မည်။

ဝူယွမ်၏ အကြံပြုချက်မှာ အမှန်စင်စစ် အခြားအတွေးတစ်ခုသာ ဖြစ်သည်၊၊ သူ၏ တကယ့်အကြောင်းအရင်းအမှန်မှာ တောင်ဂိုဏ်းသို့ ချက်ချင်း မပြန်လိုသေးဘဲ ကူမိုနှင့် အခြားသူများ မသေမျိုးအနှစ်သာရ ရှေးဟောင်းသစ်ပင်ကို ပြုစုပျိုးထောင်ရန် အချိန်ဆွဲလိုခြင်းသာ ဖြစ်သည်၊၊

အကယ်၍ သူတို့က တောင်ဂိုဏ်းသို့ စောစောစီးစီး ပြန်သွားခဲ့ပြီး တောင်ဂိုဏ်းမှ စေလွှတ်လိုက်သော အင်အားကြီး ကျင့်ကြံသူများနှင့် တွေ့ဆုံခဲ့လျှင် ထိုသူများသကမသေမျိုးအနှစ်သာရ ရှေးဟောင်းမျိုးစေ့ကို ချက်ချင်း စစ်ဆေးကြမည်မှာ သေချာသည်၊၊

ထိုအခါ ဝူယွမ်အနေဖြင့် လက်ဖဝါးထဲကကောင်းကင်ပုလင်း ကဲ့သို့သော အထွဋ်အထိပ်ရတနာကို တောင်ဂိုဏ်းနှင့် မခွဲဝေလိုသရွေ့ မသေမျိုးအနှစ်သာရ ရှေးဟောင်းမျိုးစေ့ကို ကိုယ်တိုင် ပြုစုပျိုးထောင်ခွင့် ရတော့မည် မဟုတ်ပေ၊၊

ဝူယွမ်က ဤအစီအစဉ်ကို စဉ်းစားခဲ့ဖူးသော်လည်း ၎င်းမှာ သူ၏ အစွမ်းက တောင်ဂိုဏ်းတစ်ခုလုံးကို ထိန်းချုပ်နိုင်သည့် အဆင့်သို့ ရောက်ရှိမှသာ ဖြစ်နိုင်ပေလိမ့်မည်၊၊

ဆွေးနွေးမှုများ ပြီးဆုံးပြီးနောက် သူတို့က ချက်ချင်းပင် စတင်လှုပ်ရှားကြတော့သည်၊၊

ဝူယွမ်က မီးပုံဆောင်ခဲ မိစ္ဆာမျောက်၀ံအားလုံးကို ကျောက်တိုင်အာကာသထဲမှ လွှတ်ပေးလိုက်ပြီး မိစ္ဆာမျောက်၀ံဘုရင်၏ ဦးဆောင်မှုဖြင့် အစွမ်းထက်သော တိုက်ခိုက်ရေးတပ်ဖွဲ့တစ်ခုကို ချက်ချင်း ဖွဲ့စည်းလိုက်သည်၊၊

ဤမိစ္ဆာမျောက်၀ံများက အနည်းဆုံး နိဗ္ဗာန်အဆင့် ငါး ခွန်အားလောက် ရှိကြပြီး ‌မိစ္ဆာမျောက်ဝံဘုရင်၏ လက်အောက်တွင် သူတို့၏ တိုက်ခိုက်ရေးစွမ်းရည်မှာ ဖန်းယွမ် ဦးဆောင်သည့် တပည့်များထက်ပင် သာလွန်နေသေးသည်၊၊

ဤအင်အားစုနှင့်ဆိုလျှင် သူတို့၏ အလုပ်များက ပိုမို လွယ်ကူချောမွေ့သွားပေလိမ့်မည်၊၊

ထို့အပြင် ဝူယွမ်က ဆေး၀ိညာဥ်အလောင်း တပ်ဖွဲ့ကိုလည်း ထုတ်ဖော်လိုက်သည်၊၊

၎င်းတို့မှာ နိဗ္ဗာန်အဆင့် တစ်ဆင့်သာ ရှိကြသော်လည်း ဆေးဝိညာဉ်အလောင်း သုံးထောင်ကျော်က ခိုင်မာတောင့်တင်းသော စစ်တပ်တစ်ခုအဖြစ် တည်ရှိနေသေးသည်၊၊

အထက်တန်းစား ဂိုဏ်းကြီးတစ်ခုနှင့် နှိုင်းယှဉ်လျှင်မူ သူတို့က မယှဉ်နိုင်သေးသော်လည်း ဤသွေးကျောက်မြေရိုင်းတွင်၊ အထူးသဖြင့် တောင်ဂိုဏ်း၏ သတ္တုတွင်းအနီးရှိ မြို့သုံးမြို့တွင်မူ ယောင်လင် ကဲ့သို့ အဆင့်မြင့် တိုက်ခိုက်ရေးအင်အားစုများ မရှိတော့သည့်နောက် ဤဆေးဝိညာဉ်အလောင်းများ၏ ခြိမ်းခြောက်နိုင်စွမ်းမှာ အလွန်ပင် ကြီးမားလာခဲ့သည်။

ဝူယွမ်သည် နတ်ဆိုးသားရဲ တပ်ဖွဲ့နှင့် ဆေးဝိညာဉ်အလောင်း တပ်ဖွဲ့ကို လွယ်လွယ်ကူကူ ဖန်တီးပြလိုက်သည်ကို ကြည့်ပြီး ဖန်းယွမ်နှင့် ကျန်းခွန်း ကဲ့သို့သော တပည့်များက ဝူယွမ်အပေါ် ပိုမို၍ပင် ကြောက်ရွံ့ရိုသေစိတ်များ ဖြစ်ပေါ်လာကြသည်၊၊

ဤသည်မှာ သူတို့ မြင်တွေ့ခဲ့ရသော နည်းလမ်းများသာ ရှိသေးသည်၊၊ ဝူယွမ်၏ သိုလှောင်အိတ်ထဲတွင် အခြား မည်သည့်အရာများ ရှိနေသေးသည်ကို သူတို့ မသိနိုင်သော်လည်း ယခုအရာများသည် ဝူယွမ်၏ အားအကောင်းဆုံး နည်းလမ်းများ မဟုတ်ကြကြောင်းကိုမူ သူတို့ သေချာပေါက် သိရှိနေကြသည်၊၊

ဝူယွမ်၊ လင်းတုန် နှင့် ယင်းဟွမ်ဟွမ်တို့သည် တပည့်များကို အသီးသီး ခွဲဝေဦးဆောင်ကာ မြို့သုံးမြို့ဆီသို့ ချီတက်လာခဲ့ကြသည်၊၊

ဝူယွမ်က မိစ္ဆာမျောက်ဝံဘုရင်က်ု ယင်းဟွမ်ဟွမ်အား လွှဲပေးကာ အမိန့်ပေးခိုင်းစေ စေခဲ့သည်၊၊ အကြောင်းမှာ ဤနေရာက သွေးကျောက်မြေပြင် ဖြစ်နေသောကြောင့်ပင်၊၊ ယောင်လင်းနှင့် လော့ယီတို့အပြင် နိဗ္ဗာန်အဆင့် ခုနစ် အစွမ်းထက် ကျင့်ကြံသူ အများအပြား ရှိနေသေးသည်၊၊

ယင်းဟွမ်ဟွမ်နှင့် သူမ၏အဖွဲ့သည် ထိုသူများကို ကိုင်တွယ်နိုင်မည် မဟုတ်ပေ၊၊ မိစ္ဆာမျောက်၀ဲဘုရင်နှင့်ဆိုလျှင် နိဗ္ဗာန်အဆင့် ရှစ်ဆင့်ရှိသူနှင့် တွေ့လျှင်ပင် သူတို့ ခုခံနိုင်စွမ်း ရှိပေလိမ့်မည်၊၊

ဤကဲ့သို့သော ကိစ္စရပ်များတွင် လျှင်မြန်ပြတ်သားသော လုပ်ဆောင်ချက်များ လိုအပ်သည် ... နားထောင်သူကို သိမ်းသွင်းပြီး ဆန့်ကျင်သူကို သတ်ဖြတ်ရမည် ဖြစ်သည်၊၊

ဝူယွမ်၏ သံမဏိသွေးစည်းကမ်းများအောက်တွင် တစ်ရက်မပြည့်မီ အချိန်အတွင်းမှာပင် မြို့သုံးမြို့လုံးက တောင်ဂိုဏ်းလက်အောက်သို့ ဒူးထောက်ဝင်ရောက်လာခဲ့ကြရသည်၊၊

တောင်ဂိုဏ်းအနေဖြင့် စောင့်ကြပ်ရန် အစွမ်းထက် ကျင့်ကြံသူများကို စေလွှတ်ရန်သာ လိုတော့သည်၊၊

ညနေခင်းတွင် ဝူယွမ်က တိတ်ဆိတ်သော နေရာတစ်ခုကို ရှာဖွေကာ မဟာရှေးဟောင်းကျောက်တိုင် အာကာသထဲသို့ ဝင်ရောက်လာခဲ့သည်၊၊

ကမ္ဘာသစ်ပင်၏ အောက်ခြေတွင် မီတာတစ်ရာခန့် မြင့်မားကာ စိမ်းလန်းစိုပြေနေပြီး ကြွယ်ဝသော သက်စောင့်စွမ်းအားများ ထုတ်လွှတ်နေသည့်အပြင် အသီးများ ဝေဆာနေသော မသေမျိုးအနှစ်သာရ ရှေးဟောင်းသစ်ပင် တစ်ပင် တည်ရှိနေသည်၊၊

“သခင်... ကျွန်တော် အပင်မြန်မြန်ကြီးစေတဲ့ ဝိညာဉ်အရည်အားလုံးကို ဒီရှေးဟောင်းသစ်ပင်ပေါ် လောင်းချလိုက်တယ်၊၊ အခုဆိုရင် ဒီအသီးတွေက မှည့်တော့မယ်...” ဟု ကူမိုက ပျော်ရွှင်စွာဖြင့် အသိပေးကာ သူ၏ အလုပ်ကြိုးစားမှုကို ဖော်ပြလိုက်သည်၊၊

“အင်း... ကောင်းတယ်၊ ဒါပေမဲ့ မင်း ပိုမြန်ဖို့ လိုသေးတယ်၊ ကမ္ဘာသစ်ပင်ဆီက သက်စောင့်ဇီ၀အရည်တွေကို ထပ်ထုတ်ပြီး ဒီအသီးတွေ မြန်မြန်မှည့်အောင် လုပ်ပါဦး၊၊ မသေမျိုးအနှစ်သာရ ရှေးဟောင်းမျိုးစေ့အသစ်တွေကို မြန်မြန် ရအောင် ကြိုးစားရမယ်”

ဝူယွမ်က ချီးကျူးစကား ဆိုလိုက်သည်၊၊

ယခုအခါ ကမ္ဘာသစ်ပင်၏ အာဟာရကြောင့် ကူမို၏ ဝိညာဉ်အသိစိတ်မှာ ပိုအားကောင်းလာခဲ့သည်၊၊

စင်ကြယ်သော ယွမ်ရတနာ ဖြစ်သည့် ကောင်းကင်ပိတ်ဆို့ခြင်း အစီအရင်မြေပုံ၏ ဝိညာဉ် ချိတ်ပိတ်ခြင်းတိမ် ပင်လျှင် ကူမိုကို မယှဉ်နိုင်တော့ပေ၊၊

သို့သော်လည်း မြေပုံဝိညာဉ်သည်လည်း ယခုအခါ ကမ္ဘာသစ်ပင်၏ အာဟာရကို ရရှိနေပြီး လျှင်မြန်စွာ ကြီးထွားလာနိုင်ပြီ ဖြစ်သည်၊၊

သူတို့ ရင့်ကျက်လာသည်နှင့်အမျှ သူတို့ကိုယ်တိုင် ကျင့်ကြံနိုင်ပြီး တိုက်ခိုက်နိုင်လာကြလိမ့်မည်၊၊

ဤသည်မှာ လူအများ ပြောလေ့ရှိသည့်အတိုင်း ... “မင်းက ရင့်ကျက်တဲ့ ဝိညာဉ်ရတနာတစ်ခု ဖြစ်နေပြီဆိုတော့ ရန်သူတွေကို ကိုယ်တိုင် ဘယ်လိုသတ်ရမလဲဆိုတာ သင်ယူရမယ်” ဟူ၍ ဖြစ်သည်၊၊

ကူမိုက ကမ္ဘာသစ်ပင်မှ သက်စောင့်ဇီ၀အရည်များကို ထုတ်ယူကာ မသေမျိုးအနှစ်သာရ ရှေးဟောင်းသစ်ပင်အတွင်းသို့ ထည့်သွင်းပေးလိုက်သည်၊၊

ရှေးဟောင်းသစ်ပင်မှာ မျက်စိဖြင့်မြင်နိုင်လောက်သည့်အရှိန်ဖြင့် လျှင်မြန်စွာ ကြီးထွားလာပြီး မီတာနှစ်ရာခန့်သို့ ချက်ချင်း ရောက်ရှိသွားကာ သစ်ကိုင်းသစ်ရွက်များမှာလည်း စိမ်းစိုဝေဆာလာခဲ့သည်၊၊ အသီးများမှာလည်း ကြီးထွားဖောင်းကြွလာပြီး သင်းပျံ့သော အသီးရနံ့များ စတင် ထွက်ပေါ်လာတော့သည်၊၊

သိပ်မကြာမီပင် ထိုအသီးများသည် တုန်ခါလာကာ သစ်ပင်ပေါ်မှ ကြွေကျလာကြသည်၊၊

ထို့နောက်တွင်မူ မသေမျိုးအနှစ်သာရ ရှေးဟောင်းသစ်ပင်က ကောင်းကင်ယံသို့ မြစိမ်းရောင် အလင်းတန်းတစ်ခုကို ထုတ်လွှတ်လိုက်လေသည်၊၊ ထိုမြစိမ်းရောင် အလင်းတန်းမှာ ကမ္ဘာသစ်ပင်၏ အလင်းရောင်နှင့်ပင် ယှဉ်ပြိုင်နိုင်စွမ်း ရှိနေခဲ့သည်၊၊

ထိုအလင်းတန်းထဲတွင် နောက်ထပ် မသေမျိုးအနှစ်သာရ ရှေးဟောင်းမျိုးစေ့ တစ်ခု ပေါက်ဖွားလာခဲ့သည်၊၊ သို့သော်လည်း ယခုတစ်ကြိမ်တွင်မူ မသေမျိုးအနှစ်သာရ ရှေးဟောင်းသစ်ပင်က ခိုင်မာသော အခြေခံနှင့် ကမ္ဘာသစ်ပင်၏ သက်စောင့်ဇီ၀အရည် အထောက်အပံ့များ ရှိနေသောကြောင့် ယခင်ကကဲ့သို့ မျိုးစေ့တစ်ခု ပေါက်ဖွားပြီးနောက် အသက်စွမ်းအားများ ကုန်ဆုံးသွားခြင်း မရှိတော့ပေ၊၊

ဝူယွမ်က မျိုးစေ့အသစ်ကို သိမ်းဆည်းလိုက်ပြီး သူ၏ စိတ်ထဲမှ စိုးရိမ်မှုများမှာ ကွယ်ပျောက်သွားတော့သည်၊၊ တောင်ဂိုဏ်းသို့ ပေးအပ်ရန် မျိုးစေ့ရှိပြီဖြစ်သောကြောင့် သူ၏ရှေ့မှ မသေမျိုးအနှစ်သာရ ရှေးဟောင်းသစ်ပင်မှာ ယခုမှစ၍ သူတို့၏ မဟာရှေးဟောင်းဂိုဏ်းအပိုင် ဖြစ်သွားပြီ ဖြစ်သည်၊၊

“ဒီအပင်က အသီးတွေ အများကြီး သီးတာပဲ”

ဝူယွမ်က အံ့အားသင့်စွာ ရေရွတ်လိုက်မိသည်၊၊ လက်ဖဝါးထဲကကောင်းကင်ပုလင်း၏ အရည်နှင့် ကမ္ဘာသစ်ပင်၏ သက်စောင့်ဇီ၀အရည်တို့၏ အကျိုးသက်ရောက်မှုကြောင့် မသေမျိုးအနှစ်သာရ ရှေးဟောင်းသစ်ပင်သည် ပထမဆုံးအကြိမ်အဖြစ် အသီးပေါင်း တစ်ထောင်ကျော် သီးပွင့်လာခဲ့သည်၊၊

သူသည် အသီးတစ်လုံးကို ချက်ချင်း စားကြည့်လိုက်ရာ အရသာမှာ ထူးကဲရုံသာမက အာနိသင်မှာလည်း အံ့မခန်း ဖြစ်နေလေသည်၊

၎င်းထဲရှိ စွမ်းအင်မှာ ယခင်အသီး ငါးလုံးထက် ပိုပြင်းကာ ပိုအားကောင်းပြီး နိဗ္ဗာန်အဆင့် ကိုးမှာရှိသော ကျင့်ကြံသူတစ်ဦးအတွက်ပင် ကောင်းကျိုးများစွာ ပေးနိုင်သည်၊၊

“ဒီမသေမျိုးအနှစ်သာရ ဝိညာဉ်အသီးက တကယ်ကို ထူးခြားတာပဲ၊ အသီးတစ်လုံးဟာ နိဗ္ဗာန်ဆေးလုံး တစ်သန်းရဲ့ စွမ်းအင်နဲ့ ညီမျှတယ်၊ ဒါဟာ နိဗ္ဗာန်ဆေးလုံး တစ်သန်းရဲ့ စွမ်းအင်ကို အသီးတစ်လုံးထဲမှာ ချုံ့ထားတာပဲ၊ နိဗ္ဗာန်အဆင့် ငါးအောက်မှာရှိတဲ့သူတွေအတွက် တစ်လုံးစားလိုက်ရုံနဲ့ ချက်ချင်း အဆင့်တက်နိုင်မှာပဲ”

“နိဗ္ဗာန်အဆင့် တစ်မှာရှိတဲ့သူတွေအတွက်ဆိုရင် အသီးတစ်လုံးကို လူအတော်များများ ခွဲဝေစားမယ်ဆိုရင် အဆင့်တက်ဖို့ လုံလောက်နေပြီ”

“အကယ်၍ ငါ့ရဲ့ ညီနှစ်ကသာ ဒါကို မသေမျိုးအနှစ်သာရ ဝိညာဉ်ဆေးလုံးအဖြစ် ဖော်စပ်နိုင်မယ်ဆိုရင် အာနိသင်က ပိုတောင် ကောင်းလာဦးမှာ”

“မလိုလောက်ပါဘူး၊ ဒီအသီးရဲ့ စွမ်းအင်က အရမ်းကို စင်ကြယ်ပြီးသားပါ၊ အညစ်အကြေးလည်း နည်းပါးတယ်၊ တိုက်ရိုက် စားသုံးတာကလည်း ပြဿနာ မရှိလောက်ဘူး။

“အကယ်၍ ဒီအပင်ကို မီတာတစ်ထောင် ဒါမှမဟုတ် တစ်သောင်းအထိ ကြီးအောင် လုပ်နိုင်မယ်ဆိုရင် အသီးတွေ ဘယ်လောက်တောင် သီးမလဲ”

“တောင်ဂိုဏ်းကို ကျော်တက်ဖို့၊ ယွမ်ဂိတ်ကိုတောင် ကျော်တက်ဖို့ဆိုတာ မဖြစ်နိုင်တာ မဟုတ်တော့ဘူး”

ဝူယွမ်သည် အိမ်မက်ထဲတွင် နစ်မျောသွားတော့သည်၊၊

ဤဝိညာဉ်ပစ္စည်း၏ အာနိသင်မှာ တကယ့်ကို ကောင်းကင်ကို ဆန့်ကျင်နေသကဲ့သို့ ဖြစ်သည်၊၊

“သခင်... ကျွန်တော် ဒီရှေးဟောင်းသစ်ပင်နဲ့ ပေါင်းစည်းကြည့်လို့ရတယ်၊၊ အဲဒါဆိုရင် ကမ္ဘာသစ်ပင်ကလည်း ဒီလိုအသီးမျိုး သီးနိုင်လိမ့်မယ်”

ကူမိုက ရုတ်တရက် ပြောလိုက်သည်၊၊

သူသည် ကမ္ဘာသစ်ပင်၏ ဝိညာဉ်ဖြစ်လာပြီးနောက် ၎င်းအပေါ်တွင် နက်နက်ရှိုင်းရှိုင်း နားလည်မှု ရှိလာခဲ့သည်၊၊

သူသည် ယခင်ကလည်း ဝိညာဉ်ဆေးပင်များစွာနှင့် ပေါင်းစည်းရန် ကြိုးစားခဲ့ဖူးပြီး ၎င်းတို့၏ ဆေးဖက်ဝင် အာနိသင်များကို ခွဲခြမ်းစိတ်ဖြာကာ သူ၏ သစ်ရွက်များ၊ သစ်စေးများနှင့် အသီးများမှတစ်ဆင့် ပိုမိုကောင်းမွန်သော အာနိသင်များကို ဖော်ပြနိုင်ခဲ့သည်၊၊

ကမ္ဘာသစ်ပင် သို့မဟုတ် ဘိုးဘေးသစ်ပင်ဟု ခေါ်ဝေါ်သော ဤအပင်က အပင်အားလုံး၏ ဘိုးဘေးဖြစ်ပြီး ၎င်းကိုယ်တိုင်က မည်သည့်အပင်မျိုးမဆို ဖြစ်လာနိုင်သည်၊၊

“အိုး... ဒါဆိုရင် နောက်ထပ် မျိုးစေ့တစ်ခု ထပ်ပြီး ပေါက်ဖွားလာတဲ့အထိ စောင့်ပါဦး၊၊ အဲဒီကျမှ ပေါင်းစည်းဖို့ ကြိုးစားကြည့်တာပေါ့”

အပင်ဘေးကင်းစေရန်အတွက် ဝူယွမ်က ခဏစောင့်ရန် ဆုံးဖြတ်လိုက်သည်၊၊

လက်ဖဝါးထဲကကောင်းကင်ပုလင်းနှင့်ဆိုလျှင် ရှေးဟောင်းသစ်ပင်ကို အသီးမြန်မြန်သီးအောင် ပြုလုပ်ရန် မခက်ခဲပေ၊၊ အပြည့်အဝ ပြုစုပျိုးထောင်မည်ဆိုလျှင် ရက်အနည်းငယ်သာ ကြာပေလိမ့်မည်၊၊

ထိုအချိန်တွင် မျိုးစေ့တစ်ခု ရပြီးနောက် ကမ္ဘာသစ်ပင်အား ၎င်းကို ဝါးမျိုစေမည် ဖြစ်သည်၊၊ အကယ်၍ အောင်မြင်ခဲ့လျှင် ရှေးဟောင်းသစ်ပင် တောအုပ်ကြီးကို စိုက်ပျိုးနေစရာ မလိုတော့ဘဲ ကမ္ဘာသစ်ပင်ကိုသာ ပြုစုပျိုးထောင်ခြင်းက လုံလောက်တာထက်ပိုပေလိမ့်မည်၊၊

ယခုအခါ ကမ္ဘာသစ်ပင်၏ သစ်ကိုင်းများနှင့် အမြစ်များသည် ကျောက်တိုင်နယ်ပယ်တစ်ခုလုံးသို့ ပျံ့နှံ့နေပြီဖြစ်ရာ ၎င်း၏ ပင်စည်မှာလည်း ကျယ်ပြန့်လာခဲ့သည်၊၊

အကယ်၍ မသေမျိုးအနှစ်သာရ ဝိညာဉ်အသီးများ သီးလာခဲ့လျှင် ၎င်း၏ အရေအတွက်မှာ သန်းပေါင်း ရာနှင့်ချီရှိပေလိမ့်မည်၊၊

“ဟုတ်ပြီ... မင်းက ဒီဆေးပင်တွေကို ဝါးမျိုပြီး ဆေးဖက်ဝင် အာနိသင်တွေကို ရနိုင်တယ်ဆိုရင်၊ အဲဒီအာနိသင်တွေက ဘာအတွက်လဲဆိုတာလည်း မင်း သိမှာပေါ့”