အခန်း (၄၉၇-၄၉၈)

အပိုင်း(၄၉၇) ဒိုင်ဆန်စက်လုံး

နွေဦးပွဲတော်ကာလဖြစ်နေသော်လည်း များစွာသောသူတို့က မိမိတို့၏ တာဝန်ကျရာနေရာများတွင် ဆန္ဒအလျောက် ဆက်လက်တာဝန်ထမ်းဆောင်နေကြဆဲဖြစ်သည်။

ယခုခေတ်ကြီးသည် လူအများစုအတွက် အလွန်ဆင်းရဲဒုက္ခရောက်စရာကောင်းလှသည်မှာ ယုံမှားဖွယ်မရှိပေ။

ကမ္ဘာပျက်ကပ် စတင်ချိန်က အလောင်းများ နေရာအနှံ့ ပြန့်ကျဲနေပြီး နေရာတိုင်း ကျဆုံးခဲ့ရသည့် အခြေအနေမှသည် ပြန်လည်ထူထောင်ရေးဇုန်ခေတ်၏ မနက်ဖြန်အတွက် အာမခံချက်မရှိဘဲ အသက်ရှင်သန်ရေးအတွက် ရုန်းကန်နေရချိန်အထိ၊ ပြင်းထန်သော မလုံခြုံမှုခံစားချက်ကြီးက လူတိုင်း၏စိတ်ထဲတွင် အမြဲတစေ ခြောက်လှန့်နေခဲ့သည်။

ယခုကဲ့သို့ နည်းပညာများ အရှိန်အဟုန်ဖြင့် တိုးတက်လာသောခေတ်တွင် လူ့အဖွဲ့အစည်းက ယာယီအားဖြင့် ပြန်လည်တည်ငြိမ်လာပြီဆိုသော်လည်း၊ မကြာမီအချိန်အတွင်း အမှန်တရားကို ရင်ဆိုင်ကာ အရှက်တကွဲ ထွက်ပြေးရတော့မည့် အခြေအနေက လူသားများ၏ ရင်ထဲတွင် စိုးရိမ်ပူပန်မှုများကို ဖြစ်ပေါ်စေဆဲပင်။

သို့သော် ကံကောင်းသည်မှာ ထိုစိုးရိမ်ပူပန်မှုများက ဆိုးကျိုးချည်းသာ မဟုတ်ပေ။ ၎င်းက လူသားများကို အလုပ်လုပ်ရာတွင် ပိုမိုကြိုးစားလာစေပြီး ကိုယ်ကျိုးစွန့် အနစ်နာခံလိုစိတ်များကိုလည်း ပိုမိုနက်ရှိုင်းလာစေသည်။

ဤအချက်ကို သိပ္ပံသုတေသနပညာရှင်များအကြားတွင် အထင်အရှား တွေ့မြင်နိုင်သည်။

၎င်းတို့အနက် ၆၀ ရာခိုင်နှုန်းခန့်က ပုံမှန်အတိုင်း အလုပ်ဆင်းနေကြပြီး ၁၀ ရာခိုင်နှုန်းခန့်ကမူ နွေဦးပွဲတော်နေ့တွင်ပင် အိမ်မပြန်ကြချေ။

သေချာသည်ကတော့ ဤသည်မှာ ထိုပညာရှင်များ၏ ထူးခြားသော သဘာဝကြောင့်လည်း ဖြစ်သည်။

သုတေသနလုပ်ငန်းများအတွက် တည်ငြိမ်စွာ အာရုံစိုက်နိုင်စွမ်းက အခြေခံအကျဆုံး အရည်အချင်းတစ်ခု ဖြစ်သည်။

သူတို့ထဲမှ အများစုက နေ့စဉ်နှင့်အမျှ အေးစက်နေသော စက်ကိရိယာများ၊ ခြောက်သွေ့ပျင်းရိဖွယ်ကောင်းသော ကိန်းဂဏန်းများနှင့်သာ အချိန်ဖြုန်းနေကြရသူများဖြစ်သည်။

စိတ်ရှည်သည်းခံနိုင်စွမ်းမရှိသူများကမူ ပထမဆုံး ဖယ်ရှားခံရမည့်သူများ ဖြစ်ပေလိမ့်မည်။

ထို့အပြင် သူတို့အတွက် အောင်မြင်ရန် နီးစပ်နေသော ပရောဂျက်တစ်ခုလောက် ရင်ခုန်စိတ်လှုပ်ရှားဖွယ်ကောင်းပြီး စွဲလမ်းစရာကောင်းသည့်အရာမျိုး မရှိတော့ပေ။

ဤသို့သောအချိန်မျိုးတွင် မိသားစုကိုပင် ဘေးဖယ်ထားတတ်ကြသည်။

အမြင့်ဆုံးခေါင်းဆောင်ဖြစ်သူ လော်ယွမ်ကလည်း ထိုနည်းတူပင် အားလပ်ချိန်မရှိခဲ့ပေ။

နွေဦးပွဲတော်၏ တတိယမြောက်နေ့တွင် ပြင်ပကမ္ဘာ ထောက်လှမ်းရေးဌာနက အီးမေးလ်တစ်စောင် ပေးပို့လာခဲ့သည်။ ဗိုရှင်းဂြိုဟ် နှင့်ပတ်သက်သော အသေးစိတ် အချက်အလက်များကို စုစည်းပြီးစီးသွားပြီဖြစ်ကြောင်း အကြောင်းကြားလာခြင်းဖြစ်သည်။

ပြင်ပကမ္ဘာ ထောက်လှမ်းရေးဌာနက လော်ယွမ်၏ တိုက်ရိုက်ကွပ်ကဲမှုအောက်ရှိ နိုင်ငံခြားထောက်လှမ်းရေးအဖွဲ့အစည်းတစ်ခုဖြစ်ပြီး အာကာသစစ်တပ်၏ အရေးကြီးသော အစိတ်အပိုင်းတစ်ခုလည်း ဖြစ်သည်။

ယင်းဌာနသည် အနီးတစ်ဝိုက်ရှိ ကြယ်တာရာနယ်မြေများမှ သတင်းအချက်အလက်အားလုံးကို စုဆောင်းရန် တာဝန်ရှိသည်။

ထိုအထဲတွင် ပြင်ပကမ္ဘာမှ ယဉ်ကျေးမှုအဖွဲ့အစည်း၏ အချက်ပြမှုများကို ဖမ်းယူခြင်း၊ လုံခြုံသော အာကာသခရီးစဉ်လမ်းကြောင်းများ ရေးဆွဲခြင်းနှင့် နောင်တစ်ချိန် အာကာသခရီးရှည်ထွက်ခွာရန် ပြင်ဆင်သည့်အနေဖြင့် အနီးအနားရှိ ကမ္ဘာနှင့်တူသော ဂြိုဟ်များကို ကင်းထောက်ခြင်းစသည်တို့ ပါဝင်သည်။

သို့သော် လက်ရှိအချိန်တွင် အဓိကအကျဆုံး တာဝန်မှာ ဗိုရှင်းဂြိုဟ်၏ သတင်းအချက်အလက်များကို စုဆောင်းရန်နှင့် ဗိုရှင်းဂြိုဟ်သားများ၏ နည်းပညာအဆင့်အတန်းကို ခွဲခြမ်းစိတ်ဖြာရန်ပင် ဖြစ်သည်။

အာကာသယာဉ် ထိန်းချုပ်ခန်းအတွင်း၌...

"မြို့တော်ဝန်... ဉာဏ်တုစနစ်ထဲမှာ ဗိုရှင်းဂြိုဟ်နဲ့ပတ်သက်တဲ့ အချက်အလက် မှတ်တမ်းတွေက အတော်လေး နည်းပါးတယ်... ဒါက အာကာသယာဉ်ရဲ့ ဉာဏ်တုစနစ်ထဲကနေ ကျွန်တော်တို့ ရှာတွေ့ခဲ့တဲ့ တစ်ခုတည်းသော ဗီဒီယိုမှတ်တမ်းပါပဲ"

ပြင်ပကမ္ဘာ ထောက်လှမ်းရေးဌာန၏ ဌာနမှူးဖြစ်သူ ဝူရှင်းဖန်က ဗီဒီယိုကို အာကာသယာဉ် ထိန်းချုပ်ခန်းရှိ သုံးဖက်မြင်ဖန်သားပြင်ပေါ်သို့ ဖွင့်ပြလိုက်သည်။

သူသည် ယခင်က တက္ကသိုလ်တစ်ခုမှ နက္ခတ္တဗေဒပါမောက္ခတစ်ဦးဖြစ်ပြီး၊ ပြင်ပကမ္ဘာ ထောက်လှမ်းရေးဌာနကို တည်ထောင်ပြီးနောက် ဤနေရာသို့ ဆင့်ခေါ်ခံရကာ ဌာနမှူးအဖြစ် တာဝန်ပေးအပ်ခံခဲ့ရခြင်း ဖြစ်သည်။

အမှန်စင်စစ် ဤဌာနရှိ လူအများစုမှာလည်း ထိုကဲ့သို့ပင် ဖြစ်သည်။ ဤနေရာက အလွန်မြင့်မားသော ကျွမ်းကျင်မှုအဆင့်အတန်းကို လိုအပ်သောကြောင့် တိကျသေချာသော ပညာရပ်ဆိုင်ရာ စွမ်းရည်မရှိလျှင် ဤရာထူးနှင့် လုံးဝကိုက်ညီမည် မဟုတ်ပေ။

ဤနေရာရှိ လူအများစုမှာ ယခင်က ပညာရှင်အသိုင်းအဝိုင်းမှ လာသူများဖြစ်ကြပြီး သင်္ချာ၊ နက္ခတ္တဗေဒနှင့် ရူပဗေဒနယ်ပယ်များမှ အများဆုံးဖြစ်သည်။

၎င်းကို ထောက်လှမ်းရေးဌာနဟု ခေါ်ဆိုမည့်အစား အထူးသုတေသနအဖွဲ့အစည်းတစ်ခုဟု ခေါ်ဆိုလျှင် ပို၍ မှန်ကန်ပေလိမ့်မည်။

လော်ယွမ်က ခေတ္တမျှ စိတ်ရှည်လက်ရှည် ကြည့်ရှုနေလိုက်သည်။ ၎င်းမှာ ဗိုရှင်းဂြိုဟ်သားများ အာကာသယာဉ်ပေါ်သို့ တက်ရောက်တော့မည့် ဗီဒီယိုမှတ်တမ်းတစ်ခုဖြစ်သည်။

ပတ်ဝန်းကျင်တွင် လူပင်လယ်ကြီးသဖွယ် မရေမတွက်နိုင်သော ဗိုရှင်းဂြိုဟ်သားများ ပြည့်နှက်နေပြီး မြင်ကွင်းက အတော်လေး စည်ကားသိုက်မြိုက်နေသည်။

ထိုအချိန်က ဖြစ်ပေါ်ခဲ့မည့် ရူးသွပ်မတတ် စိတ်အားထက်သန်နေကြသော မြင်ကွင်းကို သူ ကောင်းကောင်း မှန်းဆကြည့်နိုင်သည်။

ဗိုရှင်းဂြိုဟ်သားများအတွက် ဤခရီးရှည်ချီတက်ပွဲကြီးက ကြီးမားသော အဓိပ္ပာယ်သက်ရောက်မှုရှိသည်မှာ အသေအချာပင်။

ဤသည်မှာ သူတို့၏ ယဉ်ကျေးမှုအဖွဲ့အစည်းအတွက် ကြီးမားသော ခြေလှမ်းတစ်ရပ်ဖြစ်ပြီး၊ နေအဖွဲ့အစည်းအတွင်းရှိ ယဉ်ကျေးမှုအဖွဲ့အစည်းအဆင့်မှ ကြယ်တာရာများအကြား ယဉ်ကျေးမှုအဖွဲ့အစည်းအဆင့်သို့ ကူးပြောင်းမည့် ပထမဆုံးခြေလှမ်းကို ကိုယ်စားပြုသည်။

ထို့အပြင် ဂြိုဟ်သားများအပေါ် ပထမဆုံးအကြိမ် စစ်ပွဲဆင်နွှဲခြင်းလည်း ဖြစ်သည်။ သို့သော် ဝမ်းနည်းစရာကောင်းသည်မှာ နောက်ဆုံးရလဒ်က မလှပခဲ့ခြင်းပင်။

ဗီဒီယိုကို ဗိုရှင်းဂြိုဟ်သားတစ်ဦးအား အဓိကဇာတ်ကောင်အနေဖြင့် ရိုက်ကူးထားခြင်း ဖြစ်သည်။

လော်ယွမ်က အချိန်အတော်ကြာအောင် ကြည့်နေခဲ့သော်လည်း ထိုသူမှာ မည်သူဖြစ်ကြောင်း မခွဲခြားနိုင်ခဲ့ပေ။

သူတို့၏ ရုပ်ရည်သွင်ပြင်နှင့် ပတ်သက်၍ လော်ယွမ်၌ ပြင်းထန်သော မျက်နှာခွဲခြားနိုင်စွမ်း ကင်းမဲ့သည့် ရောဂါရှိနေသည်။

ဤအချက်က သူ၏ ထူးကဲသော မှတ်ဉာဏ်စွမ်းရည်ဖြင့်ပင် များစွာ အထောက်အကူ မဖြစ်ခဲ့ပေ။

သို့သော် ထိုဗိုရှင်းဂြိုဟ်သားမှာ သူကိုယ်တိုင် သတ်ဖြတ်ခဲ့သူများထဲမှ တစ်ဦးဖြစ်သည်ကတော့ ထင်ရှားနေသည်။

ထို့အပြင် လူအုပ်ကြီးကြားတွင် ကြယ်ရံလမင်းပမာ ခြံရံခံထားရပြီး ခမ်းနားထည်ဝါသော ဝတ်စုံကို ဝတ်ဆင်ထားပုံထောက်လျှင် ထိုသူမှာ အာကာသယာဉ်မှူး ဖြစ်ရမည်မှာ ယုံမှားဖွယ်မရှိချေ။

သို့သော် လော်ယွမ် သတိပြုမိသည်က ထိုအရာများမဟုတ်ပေ။ ဤနေရာက ဂြိုဟ်ပေါ်တွင် မဟုတ်သည်မှာ သိသာထင်ရှားလှသည်။

ဖန်သားနှင့်တူသော ပွင့်လင်းမြင်သာသည့် နံရံများမှတစ်ဆင့် အပြင်ဘက်ရှိ မှောင်မိုက်နေသော အာကာသဟင်းလင်းပြင်ကြီးကို လော်ယွမ်က မြင်တွေ့နေရသည်။

"ဒါက အာကာသ ဆိပ်ကမ်းတစ်ခုပဲ... ဒီအစက်လေးတွေကို ကြည့်ပါဦး" ဟု ဘေးနားမှ ဝူရှင်းဖန်က ရှင်းပြလိုက်သည်။

ဝူရှင်းဖန်က ဖန်သားပြင်၏ ထောင့်တစ်နေရာရှိ သေချာမကြည့်လျှင် မမြင်နိုင်သော အလင်းစက်လေးများကို လက်ညှိုးထိုးပြလိုက်သည်။

"ဒါတွေက ဆိုက်ကပ်တော့မယ့် အာကာသယာဉ်တချို့ပါ... သူတို့ဆီမှာ အာကာသခရီးသွားလာမှုက အလွန်အမင်း အသုံးများနေပြီဆိုတာကို ဖော်ပြနေပါတယ်"

လော်ယွမ်က ခေါင်းညိတ်လိုက်သော်လည်း ထိုအရာအတွက် အံ့သြမသွားခဲ့ပေ။

ဗိုရှင်းဂြိုဟ်သားများ၏ အိပ်မက်ထဲတွင် ဗိုရှင်းလူ့အဖွဲ့အစည်း၏ မြင်ကွင်းများစွာကို သူမြင်တွေ့ခဲ့ဖူးပြီးသားဖြစ်၍ အဆန်းတကြယ် မဖြစ်တော့ပေ။

ဤသည်မှာ အလွန်တိုးတက်စည်ပင်သော ယဉ်ကျေးမှုအဖွဲ့အစည်းတစ်ခုဖြစ်ပြီး အဆင့်မြင့်နည်းပညာများကြောင့် အာကာသခရီးသွားလာမှုမှာ သာမန် သယ်ယူပို့ဆောင်ရေးနည်းလမ်းတစ်ခုအဖြစ် ကာလရှည်ကြာကတည်းက တည်ရှိနေခဲ့ပြီဖြစ်သည်။

ထို့ကြောင့်သာ ကြယ်တာရာခရီးသွား အာကာသယာဉ်များကို တည်ဆောက်နိုင်ခဲ့ခြင်း ဖြစ်သည်။

လူသားများအနေဖြင့် သမုဒ္ဒရာဖြတ်ကျော် ခရီးရှည်များ မထွက်ခွာမီ ရေတိမ်ပိုင်း ရေကြောင်းခရီးသွားလာမှုများ ကျယ်ကျယ်ပြန့်ပြန့် ရှိနေခဲ့သကဲ့သို့ပင်။

ဝူရှင်းဖန်က ပုံရိပ်ကို လက်ညှိုးထိုးပြရင်း ဆက်ပြောသည်။

"ကံကောင်းတာက ဗီဒီယိုရဲ့ ထောင့်ချိုးက အရမ်းကောင်းပြီး အတော်လေးကို ရှင်းလင်းပါတယ်... ခပ်လှမ်းလှမ်းက ကြယ်တစ်လုံး... တစ်နည်းအားဖြင့် ဗိုရှင်းဂြိုဟ်ရဲ့ နေကို ကျွန်တော်တို့ မြင်တွေ့နိုင်ပါတယ်"

တစ်ဖက်လူက ကျောင်းဆရာလုပ်သက် ရင့်နေသောကြောင့် ရှင်းပြသည့်အခါတိုင်း စွဲမက်ဖွယ်ကောင်းအောင် ပြောဆိုတတ်သည့် အလေ့အထရှိနေသည်ကို လော်ယွမ် သတိထားမိလိုက်သည်။

သို့သော် သူက လောဆော်ခြင်းမပြုခဲ့ပေ။ ထိုသူက အရေးကြီးဆုံးအချက်ကို မကြာမီ ပြောပြတော့မည်မှာ ထင်ရှားနေသည်။

"သူ့ရဲ့ တောက်ပမှုက အရမ်းမြင့်မားတာကို ကျွန်တော်တို့ မြင်တွေ့နိုင်ပါတယ်... တွက်ချက်မှုတွေအရ သူ့ရဲ့ တောက်ပမှုက ကမ္ဘာက နေထက် ၁.၃ ဆ ပိုများပါတယ်"

ထို့နောက် ဝူရှင်းဖန်က ထိုဗီဒီယိုကို ဖယ်ရှားလိုက်ပြီး ပုံရိပ်တစ်ခုဖြင့် အစားထိုးလိုက်သည်။

"ဒါက ဗိုရှင်းဂြိုဟ် တည်ရှိနေတဲ့ နေအဖွဲ့အစည်းကို ကျွန်တော်တို့ ရိုက်ကူးထားတဲ့ ပုံပါ... အလင်းအမှောင်ကို ဖြည့်တင်းတာတွေ... ပြုပြင်တာတွေ လုပ်ပြီးတဲ့နောက်မှာ အဲ့ဒီ နေအဖွဲ့အစည်းရဲ့ မြင်ကွင်းကို ကျွန်တော်တို့ အခြေခံအားဖြင့် ပုံဖော်နိုင်ခဲ့ပါပြီ"

လော်ယွမ်က နေအဖွဲ့အစည်းပုံထဲတွင် ကမ္ဘာမြေနှင့်တူသော အပြာနှင့်အဖြူ ရောယှက်နေသည့် ဂြိုဟ်သုံးလုံးကို မြင်လိုက်ရသဖြင့် မနေနိုင်ဘဲ စကားဖြတ်ပြောလိုက်သည်။

"ဘယ်တစ်လုံးက ဗိုရှင်းဂြိုဟ်လဲ"

သူက နက္ခတ္တဗေဒအကြောင်း များများစားစား မသိသော်လည်း ဤသို့ အရောင်ကွဲပြားပြီး အပြာရောင်အချို့ ပါဝင်နေသော ဂြိုဟ်မျိုးက များသောအားဖြင့် ရာသီဥတု တည်ငြိမ်ကာ အပူချိန် သင့်တင့်လျောက်ပတ်ပြီး ရေအရင်းအမြစ် ပေါများစွာ ရှိတတ်ကြောင်းကိုတော့ သူ သိထားသည်။

"လောလောဆယ်တော့ မခွဲခြားနိုင်သေးပါဘူး... ဘာလို့လဲဆိုတော့ ဒီဂြိုဟ်သုံးလုံးစလုံးက သက်ရှိနေထိုင်လို့ရတဲ့ ဂြိုဟ်တွေဖြစ်နေလို့ပါ... ဗိုရှင်းဂြိုဟ်သားတွေက ဂြိုဟ်တွေကို ပြုပြင်ပြောင်းလဲနိုင်တဲ့ စွမ်းရည်ရှိနေပါပြီ" ဝူရှင်းဖန်က ပြန်ဖြေလိုက်ပြီး ဂြိုဟ်တစ်လုံးကို ဆွဲချဲ့ပြလိုက်သည်။

ထိုအခါ ဂြိုဟ်၏ အပြင်ဘက်တွင် အနက်ရောင်အစက်အပြောက်များစွာ လွင့်မျောနေသည်ကို လော်ယွမ် ချက်ချင်း မြင်လိုက်ရသည်။

ဂြိုဟ်၏ မျက်နှာပြင်ပေါ်တွင်လည်း မြေမျက်နှာသွင်ပြင် အနိမ့်အမြင့်များကို မြင်တွေ့နိုင်ပြီး နေရာတော်တော်များများတွင် လူတို့ ဖန်တီးထားသော အရာများကို တွေ့မြင်နိုင်ပေသည်။

"ဒီထက် ပိုချဲ့လို့ရသေးလား"

ဝူရှင်းဖန်က ခေါင်းခါလိုက်သည်။

"မြို့တော်ဝန်... ချဲ့ကြည့်လည်း အဓိပ္ပာယ်မရှိဘူး... အဲဒီနေရာက ဒီကနေဆိုရင် အလင်းနှစ် ၃၀ နီးပါးလောက် ဝေးတယ်... တိကျတဲ့ အကွာအဝေးကတော့ ၂၈.၅ အလင်းနှစ်ပါ... ဘယ်လောက်ပဲ ကြီးတဲ့ အရာဝတ္ထုဖြစ်ပါစေ... ဂြိုဟ်တစ်လုံးဖြစ်နေရင်တောင် ဒီလို အလှမ်းဝေးလွန်းတဲ့ အကွာအဝေးမှာ အပ်ဖျားလေးထက်တောင် ပိုသေးငယ်သွားပါတယ်"

"ဒါ့အပြင် ဂြိုဟ်ရဲ့ အလင်းရောင်က ကြယ်ရဲ့ အလင်းရောင်ထက် အများကြီး ပိုအားနည်းတယ်... အာကာသယာဉ်ရဲ့ အဆင့်မြင့် အလင်းရောင် ထောက်လှမ်းရေးစနစ်က ဖမ်းယူထားတဲ့ ပုံရိပ်ဖြစ်ပေမဲ့လည်း ရုပ်ထွက်က အတော်လေး ပုံပျက်နေတုန်းပဲ... အခု ကျွန်တော်တို့ မြင်နေရတဲ့ မြင်ကွင်းက အလင်းအမှောင်ကို ဖြည့်တင်းပြီး ပြုပြင်ထားတဲ့ ရလဒ်သက်သက်ပါ... ပိုချဲ့လေ၊ ပုံပျက်လေ ဖြစ်လာမှာမို့လို့ အများဆုံး အကိုးအကားအနေနဲ့ပဲ သုံးလို့ရပါလိမ့်မယ်"

လော်ယွမ်က နားလည်သဘောပေါက်စွာဖြင့် ခေါင်းညိတ်လိုက်သည်။

ဝူရှင်းဖန်က ယခင်စကားကို ဆက်ပြောသည်။

"ဗီဒီယိုနဲ့ ပုံတွေကို နှိုင်းယှဉ်ကြည့်တဲ့အခါမှာ အရေးကြီးတဲ့ သတင်းအချက်အလက်တစ်ခုကို ကျွန်တော်တို့ တွေ့ရှိခဲ့ပါတယ်... ဒီကြယ်(နေ)ရဲ့ တကယ့်တောက်ပမှုက ကျွန်တော်တို့ မျက်မြင်တွေ့ရှိထားတာထက် ပိုပြီး လင်းနေသင့်ပါတယ်"

"အစကတော့ ကျွန်တော်တို့ သိပ်သတိမထားမိခဲ့ဘူး... ဘာပဲဖြစ်ဖြစ် အကွာအဝေးက အရမ်းဝေးတော့ အနည်းနဲ့အများ ပုံပျက်တာတွေ ရှိနိုင်တာပဲလေ... ဒီအလင်းရောင် ထောက်လှမ်းရေးစနစ်ရဲ့ ဉာဏ်တု အလင်းဖြည့်တင်းမှုနဲ့တောင် ပြီးပြည့်စုံအောင် ပုံဖော်ဖို့ဆိုတာ မဖြစ်နိုင်ပါဘူး... ဒါပေမဲ့ မကြာသေးခင်ကမှ လွန်ခဲ့တဲ့ တစ်နှစ်က ရိုက်ကူးထားတဲ့ ပုံတွေနဲ့ နှိုင်းယှဉ်ကြည့်လိုက်တဲ့အခါမှာတော့ အချက်တစ်ချက်ကို အတည်ပြုနိုင်ခဲ့ပါတယ်"

လော်ယွမ်က မျက်မှောင်ကြုတ်လိုက်ကာ မေးလိုက်သည်။

"ဘာအကြောင်းကြောင့်လို့ ခင်ဗျားတို့ ထင်လဲ"

"အကြောင်းရင်းတွေကတော့ အများကြီးပါပဲ... ဥပမာ- မကြာသေးခင်က ရိုက်ကူးတဲ့အချိန်မှာ ကြယ်ရဲ့ မီးတောက်တွေ ရုတ်တရက် ထွက်ပေါ်နေတာမျိုး ဖြစ်နိုင်သလို... ပြီးခဲ့တဲ့အကြိမ်က ရိုက်ထားတဲ့ပုံကို ဥက္ကာပျံလေးတစ်ခုက ကွယ်သွားတာမျိုးလည်း ဖြစ်နိုင်ပါတယ်... ဒါပေမဲ့ အဖြစ်နိုင်ဆုံးကတော့ နေရဲ့ တစ်စိတ်တစ်ပိုင်းကို တမင်တကာ ဖုံးကွယ်ထားတာမျိုးပါပဲ"

"ခင်ဗျားပြောချင်တာက ဒိုင်ဆန်စက်လုံးကိုလား"

လော်ယွမ်၏ တွေးခေါ်နိုင်စွမ်းက ထက်မြက်လှသဖြင့် ကျော်ကြားသော သီအိုရီတစ်ခုကို ချက်ချင်း သတိရသွားသည်။

"ဒီလိုဖြစ်နိုင်ခြေ အများကြီးရှိပါတယ်... ဒါနဲ့ပတ်သက်ပြီး သော့ချက်ကျတဲ့ သက်သေအထောက်အထားတချို့ကိုလည်း ကျွန်တော်တို့ ရှာတွေ့ထားပါတယ်" ဝူရှင်းဖန်က တစ်နှစ်ခြားစီ ရိုက်ကူးထားသော ပုံနှစ်ပုံထဲမှ ကြယ်များကို ဆွဲချဲ့ပြလိုက်သည်။

လော်ယွမ်က သေချာစိုက်ကြည့်လိုက်ရာ ပုံနှစ်ပုံစလုံး၏ မျက်နှာပြင်ပေါ်တွင် အမည်းစက်တစ်ခုစီ ရှိနေသည်ကို ချက်ချင်း တွေ့လိုက်ရသည်။

အကယ်၍ ပုံတစ်ပုံတည်းတွင်သာဆိုလျှင် ဥက္ကာခဲ သို့မဟုတ် နေပြောက်စသည်ဖြင့် ထင်မှတ်နိုင်သော်လည်း၊ ပုံနှစ်ပုံစလုံးတွင် ရှိနေပြီး တစ်နှစ်တာ ကွာဟနေသည်ဆိုပါက အခြေအနေက အလွန်ထင်ရှားနေပြီဖြစ်သည်။

ထို့အပြင် မကြာသေးမီက ရိုက်ကူးထားသောပုံနှင့် နှိုင်းယှဉ်ပါက အမည်းစက်မှာ ယခင်ပုံထက် သိသိသာသာ ပိုမိုကြီးမားနေသည်။

ဒိုင်ဆန်စက်လုံး (Dyson Sphere) ဆိုသည်မှာ ဖရီးမန်းဒိုင်ဆန်က ၁၉၆၀ ပြည့်နှစ်ကတည်းက တင်ပြခဲ့သော သီအိုရီတစ်ခုဖြစ်သည်။

ထိုသီအိုရီအရ ကမ္ဘာကဲ့သို့သော ဂြိုဟ်များတွင် သိုလှောင်ထားနိုင်သော စွမ်းအင်မှာ အလွန်အကန့်အသတ်ရှိပြီး ၎င်းပေါ်တွင် မှီတင်းနေထိုင်ကြသော ယဉ်ကျေးမှုအဖွဲ့အစည်းများ အဆင့်မြင့်မားလာစေရန် ထောက်ပံ့ပေးဖို့ လုံးဝမလုံလောက်ကြောင်း ဆိုထားသည်။

နေအဖွဲ့အစည်းတစ်ခုတွင် နေမှ ထုတ်လွှတ်သော စွမ်းအင်အများစုမှာ အလဟဿ ဆုံးရှုံးသွားလေ့ရှိသည်။

နေသည် စက္ကန့်တိုင်းတွင် အလင်းရောင် မီဂါဝပ် သန်းပေါင်းများစွာကို အပြင်ဘက်သို့ ဖြာထွက်စေသည်။

ကမ္ဘာပျက်ကပ်မတိုင်မီ လူသားသန်း ၇၀၀၀ ၏ ထုတ်လုပ်မှုလုပ်ငန်းစဉ်များတွင် အသုံးပြုခဲ့သော စွမ်းအင်ပမာဏနှင့် တွက်ကြည့်မည်ဆိုလျှင် ထိုစွမ်းအင်က လူသားတို့အတွက် နှစ်ပေါင်း ၂၇၀,၀၀၀ တိုင်တိုင် လုံလောက်အောင် ထောက်ပံ့ပေးနိုင်သည်။

ယင်းမှာ လူသားတို့၏ သမိုင်းကြောင်းထက်ပင် ပိုမိုရှည်ကြာပေသည်။

ဤသည်မှာ နေမှ တစ်စက္ကန့်အတွင်း ထုတ်လွှတ်သော စွမ်းအင်ပမာဏသာ ရှိသေးသည်။

အကယ်၍ တစ်ရက်၊ တစ်နှစ်ဆိုပါက ထိုပမာဏမှာ အလွန်ကြောက်မက်ဖွယ်ကောင်းသော နက္ခတ်ဗေဒဆိုင်ရာ ကိန်းဂဏန်းကြီးတစ်ခု ဖြစ်လာပေလိမ့်မည်။

ထို့ကြောင့် ဤသီအိုရီအရ အလွန်ဖွံ့ဖြိုးတိုးတက်သော ယဉ်ကျေးမှုအဖွဲ့အစည်းတစ်ခုသည် နေကို ဧရာမ စက်လုံးပုံသဏ္ဍာန် အဆောက်အအုံကြီးဖြင့် ဝန်းရံထားနိုင်စွမ်းရှိပြီး နေမှ ထွက်ပေါ်လာသော စွမ်းအင်အများစုကို ဖမ်းယူရယူနိုင်မည်ဟု ယူဆထားသည်။

ထိုသို့ပြုလုပ်ခြင်းဖြင့်သာ ထိုယဉ်ကျေးမှုအဖွဲ့အစည်းကို ရေရှည်ထောက်ပံ့နိုင်မည်ဖြစ်ပြီး လုံလောက်သော အမြင့်တစ်နေရာအထိ တိုးတက်လာစေမည်ဖြစ်သည်။

ဤသီအိုရီကို တင်ပြပြီးသည်နှင့် သိပ္ပံပညာရှင်များစွာ၏ ထောက်ခံမှုကို ချက်ချင်းရရှိခဲ့သည်။

၎င်းမှာ နေအဖွဲ့အစည်းကို ကျော်လွန်ပြီး အာကာသထဲသို့ ခြေဆန့်မည့် ယဉ်ကျေးမှုအဖွဲ့အစည်းတိုင်း မဖြစ်မနေ ဖြတ်သန်းရမည့် အဆင့်တစ်ခုအဖြစ် မှတ်ယူထားကြသည်။

သို့သော်လည်း မည်သို့ပင်ဆိုစေကာမူ ၎င်းမှာ ယူဆချက်တစ်ခုသာဖြစ်ပြီး လူသားများ၏ နည်းပညာအဆင့်အတန်းဖြင့်မူ ယင်းကို သက်သေပြနိုင်ရန် အလွန်အလှမ်းဝေးနေဆဲပင်။

လော်ယွမ်အနေဖြင့် ယနေ့တွင် ဤအရာကို ကိုယ်တိုင်ကိုယ်ကျ မျက်မြင်ကိုယ်တွေ့ မြင်ရလိမ့်မည်ဟု ထင်မှတ်မထားခဲ့မိပေ။

(ဒိုင်ဆန်စက်လုံးသီအိုရီကို အထောက်အကူပြုနေတဲ့ နောက်တစ်ချက်က အာကာသသိပ္ပံပညာရှင်တွေ နက္ခတ္တဗေဒမှန်ပြောင်းတွေနဲ့ စကြဝဠာထဲကိုကြည့်တော့ အလင်းနှစ်အရမ်းဝေးတဲ့ နေအဖွဲ့အစည်းတွေမှာ တစ်ချို့နေတွေက အခုဒိုင်ဆန်စက်လုံးသီအိုရီလိုမျိုး နေကို တစ်စုံတစ်ခုနဲ့လွှမ်းခြုံပြီး စွမ်းအင်တွေစုပ်ယူနေတာမျိုးကို မြင်တွေ့ခဲ့ရတယ်။ ဖြစ်နိုင်တာက အဲ့ဒီနေအဖွဲ့အစည်းမှာ သက်ရှိတွေရှိပြီး နေကစွမ်းအင်တွေကို စုပ်ယူနိုင်တဲ့အထိ တိုးတက်နေတယ်လို့ပြောလို့ရတယ်။ ဒါပေမဲ့ဒါကလည်း ထင်မြင်ချက်သက်သက်ဖြစ်ပြီး အလင်းနှစ်အရမ်းဝေးတဲ့နေရာကပုံကို ခန့်မှန်းပြောဆိုထားတာဖြစ်တဲ့အပြင် သက်သေပြလို့လည်း မရတဲ့အတွက် ဒိုင်ဆန်စက်လုံးသီအိုရီက အခုထိသီအိုရီအဆင့်မှာပဲ ရှိနေသေးတာပါ။ မင်မင့်အထင်တော့ ဒီသီအိုရီထက် လူသားတွေ အနုမြူပေါင်းစပ်သီအိုရီက ပိုပြီး အရင်ဆုံးအောင်မြင်နိုင်ချေရှိတယ်။ ဒီအနုမြူပေါင်းစပ်သီအိုရီက အမေရီကန်ရော ရုရှားရော ၁၉ရာစုနှစ်ထဲက စလုပ်နေခဲ့တာ အခုထိတော့ မအောင်မြင်သေးပေမဲ့ တော်တော်လေးခရီးရောက်နေပြီ။ ဒီသီအိုရီကို စမ်းသတ်နေတဲ့အထဲမှာတောင်ကိုရီးယားတောင်ပါသေးတယ်။ ဒီအနုမြူပေါင်းစပ်သီအိုရီသာ အောင်မြင်သွားရင် တစ်ကမ္ဘာလုံးကို လျှပ်စစ်မီး အခမဲ့ ၂၄နာရီပေးမယ်ဆိုရင်တောင် အေးဆေးပဲတဲ့။ ပြီးတော့ အဲ့ကရတဲ့ စွမ်းအင်ကလည်း အရမ်းလုံခြုံစိတ်ချရပြီး သန့်ရှင်းစင်ကြယ်ပြီး အနုမြူပေါင်းစပ်ဖြစ်စဉ်ကနေ ထုတ်ပေးနိုင်တဲ့ စွမ်းအင်က အကန့်အသတ်မဲ့ နီးနီးထိ ရှိတယ်တဲ့။ ဒါကကြုံလို့ပြောပြတာပါ)

ဤအမည်းစက်က မကြီးမားလှဘဲ ကြယ်၏ မျက်နှာပြင် အကျယ်အဝန်းနှင့် နှိုင်းယှဉ်ပါက အပုံ ၅၀ ပုံ ၁ ပုံခန့်သာ ရှိသဖြင့် ပြီးပြည့်စုံသော ဒိုင်ဆန်စက်လုံးတစ်ခု ဖြစ်လာရန် အလှမ်းဝေးနေသေးသော်လည်း၊ ဤကြယ်က ကမ္ဘာနှင့် အလင်းနှစ် ၂၈.၅ နှစ် ကွာဝေးနေသည်။

ယခု ရိုက်ကူးထားသော ပုံရိပ်မှာပင် လွန်ခဲ့သော နှစ်ပေါင်း ၂၈.၅ နှစ်က သမိုင်းဝင် မြင်ကွင်းတစ်ခုသာ ဖြစ်ပေသည်။

ဤမျှ နှစ်ကာလများစွာ ကြာမြင့်သွားပြီးနောက် ယခုအချိန်တွင် မူလပုံစံအတိုင်း ရှိနေတော့မည်မဟုတ်သည်မှာ သေချာလှသည်။

ယဉ်ကျေးမှုအဖွဲ့အစည်းလူမျိုးနွယ်တစ်ခုမှ ထုတ်လုပ်အသုံးပြုသော စုစုပေါင်း စွမ်းအင်ပမာဏက ထိုယဉ်ကျေးမှုအဖွဲ့အစည်း၏ နည်းပညာအဆင့်အတန်းနှင့် ယဉ်ကျေးမှုအဖွဲ့အစည်းအဆင့်ကို ထင်ဟပ်ပြသနေလေ့ရှိသည်။

လူသားတို့၏ စက်မှုတော်လှန်ရေးကာလ ကျောက်မီးသွေးနှင့် ရေနွေးငွေ့ခေတ်မှသည် နောက်ဆက်တွဲဖြစ်သော အပူစွမ်းအင်နှင့် လျှပ်စစ်ခေတ်၊ ထိုမှတစ်ဆင့် လက်ရှိ အနုမြူစွမ်းအင်ခေတ်အထိ ထုတ်လုပ်အသုံးပြုသော စွမ်းအင်ပမာဏမှာ ဆတိုးကိန်းဖြင့် တိုးပွားလာခဲ့သည်။

ဗိုရှင်းဂြိုဟ်သားများ၏ ဒိုင်ဆန်စက်လုံးမှာ ယခုအချိန်အထိ ပြီးပြည့်စုံခြင်း မရှိသေးလျှင်တောင်မှ ၎င်းမှ ထုတ်လွှတ်သော စွမ်းအင်ပမာဏက လူသားများအတွက် မျှော်လင့်ချက်မဲ့စေရန် လုံလောက်နေပြီဖြစ်သည်။

၎င်း၏ စွမ်းအားက အာကာသယာဉ်တစ်စင်း ပြသခဲ့သော စွမ်းအားလေးလောက်သာ မဟုတ်ဘဲ အဆပေါင်းများစွာ ပိုမိုကြီးမားနေသည်။ တစ်သောင်းပုံ တစ်ပုံမျှပင် မရှိနိုင်ပေ။

တစ်နေ့နေ့တစ်ချိန်ချိန်တွင် ဗိုရှင်းဂြိုဟ်သို့ သွားရောက် လက်စားချေရန် တွေးတောထားသော လော်ယွမ်အတွက်မူ ယခုအချက်က ကြီးမားသော ထိုးနှက်ချက်တစ်ခု ဖြစ်လာသည်မှာ ယုံမှားဖွယ်မရှိပေ။

"ဒီ ဒိုင်ဆန်စက်လုံးနဲ့ပတ်သက်ပြီး နည်းပညာပိုင်းဆိုင်ရာ ဆွေးနွေးသုံးသပ်မှုတွေနဲ့ ဖြစ်နိုင်ခြေ စိစစ်မှုတွေကို လုပ်ဆောင်ထားပါ... အခုလောလောဆယ် အသုံးမဝင်သေးရင်တောင် နောင်တစ်ချိန်မှာ သေချာပေါက် အသုံးဝင်လာလိမ့်မယ်" လော်ယွမ်က မထွက်ခွာမီ လေးနက်သော မျက်နှာထားဖြင့် ပြောကြားခဲ့သည်။

ဆက်ရန်...

အပိုင်း(၄၉၈) ဝေစုလုပွဲ

"ဒီ ဒိုင်ဆန်စက်လုံးနဲ့ပတ်သက်ပြီး နည်းပညာပိုင်းဆိုင်ရာ ဆွေးနွေးသုံးသပ်မှုတွေနဲ့ ဖြစ်နိုင်ခြေ စိစစ်မှုတွေကို လုပ်ဆောင်ထားပါ... အခုလောလောဆယ် အသုံးမဝင်သေးရင်တောင် နောင်တစ်ချိန်မှာ သေချာပေါက် အသုံးဝင်လာလိမ့်မယ်" လော်ယွမ်က မထွက်ခွာမီ လေးနက်သော မျက်နှာထားဖြင့် ပြောကြားခဲ့သည်။

လူသားတို့သည် အာကာသယာဉ်ပျံကြီးပေါ်တွင် တစ်သက်လုံး နေထိုင်သွားရန် မဖြစ်နိုင်ပေ။

ကမ္ဘာမြေသို့ ပြန်သွားရန် မဖြစ်နိုင်တော့လျှင်တောင်မှ အခြေချနေထိုင်မည့် နေရာတစ်ခုကိုတော့ ရှာဖွေရမည်သာ ဖြစ်သည်။

ထိုအခါမျိုးရောက်လျှင် ဤနည်းပညာက အလွန်အရေးပါလာလိမ့်မည်။

ယာဉ်ပျံပေါ်ရှိ နက်ရှိုင်းအနုမြူပေါင်းစပ်ဓာတ်အားဖိုအားလုံး၊ အထူးသဖြင့် စွမ်းအင်ခန်းမဆောင်ရှိ ဧရာမပေါင်းစပ်ဓာတ်အားဖို ၂၄ လုံးက အစွမ်းကုန် လည်ပတ်မည်ဆိုလျှင် ထွက်ပေါ်လာမည့် လျှပ်စစ်စွမ်းအင်သည် ကမ္ဘာမပျက်မီက တစ်ကမ္ဘာလုံး အသုံးပြုခဲ့သော လျှပ်စစ်စွမ်းအင်ပမာဏထက် အဆပေါင်းရာနှင့်ချီ၍ ပိုမိုများပြားမည် ဖြစ်သည်။

သို့သော်လည်း ဤယာဉ်ပျံကြီးအတွက်မူ ထိုစွမ်းအင်ပမာဏသည် ယာဉ်ပျံ အစွမ်းကုန် ပျံသန်းနိုင်ရန်အတွက်သာ လုံလောက်ပြီး ပိုလျှံသည်ဆိုလျှင်တောင်မှ အနည်းငယ်သာ ရှိပေလိမ့်မည်။

ယဉ်ကျေးမှုအဖွဲ့အစည်းအဆင့်အတန်း ကွာခြားသွားသည်နှင့်အမျှ စွမ်းအင်လိုအပ်ချက် ပမာဏကလည်း ကွာခြားသွားလေသည်။

ဥပမာအားဖြင့် ငွေတစ်သန်းသည် ဆင်းရဲသားတစ်ဦးအတွက် ကြီးမားလှသော ပမာဏဖြစ်သော်လည်း ဘီလီယံနာ သူဌေးကြီးတစ်ဦးအတွက်မူ တစ်လစာ သုံးစွဲရန်ပင် လောက်ငမည် မဟုတ်ချေ။

စွမ်းအင် အမြောက်အမြား အသုံးပြုရမည့် ဆန့်ကျင်ဘက်ဒြပ်သား ထုတ်လုပ်ရေး စက်ရုံမျိုးကို ယာဉ်ပျံပေါ်တွင် တပ်ဆင်ထားခြင်း မရှိပေ။

ဉာဏ်ရည်တု စနစ်ထဲတွင်လည်း ထိုအရာနှင့် ပတ်သက်သည့် နည်းပညာများ မှတ်တမ်းတင်ထားခြင်း မရှိချေ။

ယာဉ်ပျံအတွင်း ပုန်ကန်မှုများ ဖြစ်ပေါ်လာမည်ကို စိုးရိမ်၍ ဖုံးကွယ်ထားခြင်းလည်း ဖြစ်နိုင်သော်လည်း ပို၍အရေးကြီးသော အကြောင်းရင်းမှာ ယာဉ်ပျံ၏ စွမ်းအင်က ထိုသို့ထုတ်လုပ်ရန်အတွက် လုံလောက်မှု မရှိခြင်းကြောင့်သာ ဖြစ်ပေမည်။

ဆန့်ကျင်ဘက်ဒြပ်သား ထုတ်လုပ်ရန်မှာ မခက်ခဲလှပေ။ လူသားတို့သည် ၁၉၉၅ ခုနှစ်ကတည်းက ဥရောပ အနုမြူ သုတေသနအဖွဲ့မှ သိပ္ပံပညာရှင်များက ဓာတ်ခွဲခန်းအတွင်း ကမ္ဘာ့ပထမဆုံးသော ဆန့်ကျင်ဘက်ဒြပ်သားဖြစ်သည့် ဆန့်ကျင်ဘက် ဟိုက်ဒရိုဂျင် အက်တမ်တစ်လုံးကို စမ်းသပ်ထုတ်လုပ်နိုင်ခဲ့ကြသည်။

၂၀၀၀ ပြည့်နှစ် စက်တင်ဘာလ ၁၈ ရက်နေ့တွင်မူ ဥရောပ အနုမြူ သုတေသနအဖွဲ့က စွမ်းအင်နိမ့် ဆန့်ကျင်ဘက် ဟိုက်ဒရိုဂျင် အက်တမ် ၅ သောင်းခန့်ကို အောင်မြင်စွာ ဖန်တီးနိုင်ခဲ့ကြောင်း ကြေညာခဲ့သည်။

ဤသည်မှာ လူသားတို့ သမိုင်းတစ်လျှောက် ဓာတ်ခွဲခန်းအတွင်း ဆန့်ကျင်ဘက်ဒြပ်သား အမြောက်အမြားကို ပထမဆုံးအကြိမ် အောင်မြင်စွာ ထုတ်လုပ်နိုင်ခဲ့ခြင်းပင် ဖြစ်သည်။

ထုတ်လုပ်နိုင်ခဲ့သည့် ပမာဏမှာ အလွန်နည်းပါးလွန်းပြီး လက်တွေ့အသုံးပြုနိုင်ရန် အလှမ်းဝေးနေဆဲ ဖြစ်သည်။

လေထုထဲသို့ ထုတ်လွှတ်လိုက်လျှင်တောင်မှ ယင်း၏ ပေါက်ကွဲမှုအင်အားက ဗျောက်အိုးတစ်လုံးလောက်ပင် ပြင်းထန်မည် မဟုတ်ပေ။

သို့သော် ထိုဆန့်ကျင်ဘက်ဒြပ်သားများကို ထုတ်လုပ်ရန်အတွက် လျှပ်စစ်စွမ်းအင် ကုန်ကျစရိတ်မှာ ယူရိုငွေ သန်းရာနှင့်ချီ၍ ကုန်ကျခဲ့ရာ စွမ်းအင်ပြောင်းလဲမှုနှုန်းမှာ သနားစရာကောင်းလောက်အောင် နိမ့်ကျနေခဲ့သည်။

သိပ္ပံပညာရှင်များက ဤယာဉ်ပျံကြီးကို အခြေခံ၍ ဗိုရှင်းဂြိုဟ်သားများ၏ နည်းပညာကို အကြမ်းဖျင်း တွက်ချက်ကြည့်ခဲ့ဖူးသည်။

ဆန့်ကျင်ဘက်ဒြပ်သား နယ်ပယ်တွင် ဗိုရှင်းဂြိုဟ်သားများ၏ ထုတ်လုပ်နိုင်စွမ်းနှင့် စွမ်းအင်ပြောင်းလဲနိုင်စွမ်းမှာလည်း သိပ်မမြင့်မားလှပေ။

ဗိုရှင်းဂြိုဟ်သားများအတွက်လည်း ဆန့်ကျင်ဘက်ဒြပ်သားသည် အလွန်တန်ဖိုးကြီးမားလှသော မဟာဗျူဟာမြောက် သယံဇာတတစ်မျိုး ဖြစ်နေဆဲပင် ဖြစ်တန်ရာသည်။

ဤယာဉ်ပျံပေါ်ရှိ ဆန့်ကျင်ဘက်ဒြပ်သား သိုလှောင်မှုပမာဏကပင် သူတို့၏ စုစုပေါင်း သိုလှောင်မှုပမာဏ၏ အရေးပါသော ဝေစုတစ်ရပ်အဖြစ် ပါဝင်နေလောက်ပေသည်။

ထိုအချက်ကို ထောက်ခံနေသည့် သက်သေအထောက်အထား များစွာလည်း ရှိနေသည်။ ဥပမာအားဖြင့် ဗိုရှင်းဂြိုဟ်သားများ၏ အဆင့်အမြင့်ဆုံး ကြယ်တာရာသွား ယာဉ်ပျံကြီး ဖြစ်သော်လည်း အသုံးပြုထားသည့် စွမ်းအင်မှာ အင်အားပိုမိုကြောက်မက်ဖွယ်ကောင်းသည့် ဆန့်ကျင်ဘက်ဒြပ်သားဖို မဟုတ်ဘဲ အနုမြူပေါင်းစပ်ဖိုများသာ ဖြစ်နေခြင်းဖြစ်သည်။

နောက်တစ်ချက်မှာ ယာဉ်ပျံ၏ လက်နက်တိုက်အတွင်းရှိ ဆန့်ကျင်ဘက်ဒြပ်သား ဗုံးအရေအတွက်မှာလည်း သိပ်မများလှပေ။

ယခုအခါ ပေါင် ၆၆၀ ခန့်သာ ကျန်ရှိတော့သည်။

ကမ္ဘာမြေနှင့် လကမ္ဘာပေါ်သို့ ပစ်ချခဲ့သည့် အရေအတွက်ကိုပါ ထည့်ပေါင်းမည်ဆိုလျှင်တောင် စုစုပေါင်းပမာဏမှာ ပေါင် ၂,၂၀၀ ပင် မပြည့်လှချေ။

လူသားများအမြင်တွင်မူ ဤပမာဏသည် နည်းပါးလှသည်မဟုတ်ဟု ထင်ရသော်လည်း ခြိမ်းခြောက်နိုင်စွမ်းရှိသည့် ယဉ်ကျေးမှုအဖွဲ့အစည်းကမ္ဘာတစ်ခုကို ဖျက်ဆီးပစ်ရန်အတွက်မူ တကယ်တမ်းတွင် များပြားလှခြင်း မရှိဘဲ ကွက်တိလောက်သာ ရှိပေလိမ့်မည်။

……

လော်ယွမ်၏ တောင်းဆိုမှုကို ကြားလိုက်ရချိန်တွင် ဝူရှင်းဖန်သည် အနည်းငယ် တုံ့ဆိုင်းသွားပြီးနောက် အံကြိတ်ကာ ပြောလိုက်သည်။

"မြို့တော်ဝန်... ဒီစီမံကိန်းက ကြီးမားလွန်းတယ်… ပြင်ပကမ္ဘာ ထောက်လှမ်းရေးဌာနက ဒီလောက်ကြီးလေးတဲ့ တာဝန်ကို ထမ်းဆောင်နိုင်ဖို့ မလွယ်ပါဘူး"

"ဒီနှစ်ပိုင်းတွေမှာ သိပ္ပံနဲ့နည်းပညာတွေက တစ်နေ့တခြား တိုးတက်ပြောင်းလဲလာတာ အရမ်းမြန်လွန်းတယ်"

"ရှေ့တန်းကနေ သုတေသနလုပ်နေတဲ့ နေရာတွေကနေ ဆုတ်ခွာလာခဲ့တဲ့ ကျွန်တော်တို့လိုလူတွေက နောက်ဆုံးပေါ် သုတေသနရလဒ်တွေကို အမြဲစောင့်ကြည့်နေတဲ့ အလေ့အကျင့် ရှိတယ်ဆိုပေမယ့် တကယ်တမ်းမှာတော့ သူတို့ရဲ့ ခြေလှမ်းတွေကို မမီတော့ပါဘူး… တချို့ ပညာရပ်ဆိုင်ရာ စာတမ်းတွေကို ဖတ်ရတာတောင် တော်တော်လေး ခေါင်းစားနေပါပြီ"

ဝူရှင်းဖန်က အခက်အခဲများကို တသီတတန်းကြီး ညည်းတွားလိုက်သည်။ တစ်ဖက်တွင် သူတို့အနေဖြင့် ဤမျှကြီးလေးသော တာဝန်ကို အမှန်တကယ် မထမ်းဆောင်နိုင်ခြင်းကြောင့် ဖြစ်သည်။

ဒိုင်ဆန်စက်လုံး၏ ဖြစ်နိုင်ခြေကို လေ့လာဆန်းစစ်ရန်မှာ အလွန်ကြီးမားကျယ်ပြန့်သော လုပ်ငန်းရပ်ကြီးတစ်ခု ဖြစ်ပြီး နောက်ဆုံးပေါ် နည်းပညာရပ်ပေါင်းစုံနှင့် သက်ဆိုင်နေကာ ပြီးပြည့်စုံသော သိပ္ပံနည်းကျ စစ်တမ်းကောက်ယူမှုကြီးတစ်ခုနှင့်ပင် တူနေသည်။

အခြားတစ်ဖက်တွင်လည်း မြို့တော်ဝန်နှင့် လူချင်းတွေ့ရခဲသော ဤအခွင့်အရေးတွင် သူ၏ ဌာနအတွက် အကျိုးအမြတ်အချို့ ရရှိစေရန် ကြိုးပမ်းခြင်းလည်း ဖြစ်သည်။

အငိုသန်သောကလေးသာ နို့ပိုစို့ရသည် မဟုတ်ပါလော။ ယနေ့ခေတ်တွင် ဉာဏ်ပညာဆေးရည်များသည် သိပ္ပံသုတေသီများအကြားတွင် လျှို့ဝှက်ချက်တစ်ခု မဟုတ်တော့ပေ။

ပညာရှင်အသိုင်းအဝိုင်းတွင် မိမိတို့နှင့်သက်ဆိုင်သော အသင်းအဖွဲ့ငယ်လေးများ ရှိကြသည်။

အထူးသဖြင့် ကွမ်တမ်ကွန်ပျူတာများ ကျယ်ကျယ်ပြန့်ပြန့် အသုံးပြုလာနိုင်ပြီး ကွန်ရက်ဆက်သွယ်ရေးများ ပြန်လည်ပွင့်လန်းလာချိန်တွင် ထိုအသိုင်းအဝိုင်းများကြား ဆက်သွယ်ဆွေးနွေးမှုများက ပိုမိုများပြားလာပြီး အကြိတ်အနယ် ရှိလာကြသည်။

အစပိုင်းတွင် သူတို့သည် အခြားသူများနှင့် အပြန်အလှန် ဆွေးနွေးမှုများ၊ အယူအဆ ဖလှယ်မှုများ ပြုလုပ်နိုင်ခဲ့ကြသေးသည်။

သို့သော် ဉာဏ်ပညာဆေးရည်များ ပေါ်ထွက်လာပြီးနောက်ပိုင်းတွင်မူ ဤပညာရှင်အသိုင်းအဝိုင်းသည် သူတို့အမြင်တွင် တစိမ်းတရံသဖွယ် ဖြစ်လာခဲ့တော့သည်။

အစောပိုင်းကာလများက ပြဿနာတစ်ခုကို တင်ပြလာလျှင် သူတို့က အဖြေရှာရန် အပြင်းအထန် စဉ်းစားနေဆဲမှာပင် အောက်ဘက်ရှိ မှတ်ချက်များတွင် ဖြေရှင်းနည်းပေါင်း ဆယ်ဂဏန်းကျော်မျှ ရောက်ရှိနေတတ်သည်။

အဖြေတိုင်းကလည်း ပြဿနာကို ဖြေရှင်းနိုင်စွမ်း ရှိပုံရသည်။ တစ်ဖက်လူ၏ အဆင့်အတန်းက အလွန်မြင့်မားကြောင်း ခံစားမိသော်လည်း သူတို့အနေဖြင့် သဘောတရားကို နားလည်နိုင်သေးသည်။

သို့သော် နောက်ပိုင်းတွင်မူ ပညာရပ်ဆိုင်ရာ ဖိုရမ်များတွင် တင်ပြလာသော ပြဿနာများသည် တစ်နေ့တခြား ပိုမိုနက်နဲလာပြီး ပြန်လည်ဖြေကြားချက်များသည်လည်း နတ်စာများကို ဖတ်နေရသကဲ့သို့ နားလည်ရခက်လာသည်။

နှစ်ဖက်ကြား ကွာဟချက်က ကြီးမားလွန်းသွားသဖြင့် လုံးဝ ဆက်သွယ်ပြောဆို၍ မရနိုင်တော့ဘဲ မူလတန်းကျောင်းသားက တက္ကသိုလ်ကျောင်းသားကို ရင်ဆိုင်နေရသလိုမျိုး ဖြစ်လာသည်။

ဉာဏ်ရည်ဉာဏ်သွေးအရ အပြတ်အသတ် အနိုင်ကျင့်ခံလိုက်ရသည့် ဤစိတ်ပျက်အားငယ်မှုမျိုးက သူတို့ကိုယ်သူတို့ ဆင့်ကဲမပြောင်းလဲရသေးသည့် လူဝံများအလား ခံစားလာရစေသည်။

ဉာဏ်ပညာဆေးရည်များအကြောင်း သတင်းများ အသိုင်းအဝိုင်းငယ်လေးတစ်ခုအတွင်း ပျံ့နှံ့လာမှသာ သူတို့၏ စိတ်ပျက်အားငယ်မှုက အနည်းငယ် လျော့ပါးသွားခဲ့သည်။

သူတို့ ဉာဏ်မမီခြင်း မဟုတ်ဘဲ တစ်ဖက်လူက ဆေးစွမ်းဖြင့် လိမ်လည်လှည့်ဖြားနေခြင်းကြောင့်သာ ဖြစ်သည်မဟုတ်လော။

မည်သို့ပင်ဆိုစေကာမူ လိုချင်သူများပြားပြီး ဆေးထုတ်လုပ်နိုင်မှုက ကန့်သတ်ချက်ရှိနေသည်။

အစိုးရ၏ အမြင်တွင်လည်း သူတို့၏ ပြင်ပကမ္ဘာ ထောက်လှမ်းရေးဌာနသည် ရှေ့တန်းမှ သုတေသီများလောက် အရေးမပါပေ။

အဘိုးအဘွားများကလည်း မချစ်၊ ဦးလေးများကလည်း မနှစ်သက်သည့် အခြေအနေမျိုးသို့ ရောက်ရှိနေပြီး ယခုအချိန်အထိ ဆေးရရှိမည့် ခွဲတမ်း တစ်နေရာပင် မရသေးချေ။

လော်ယွမ်က ထိုးထွင်းသိမြင်နိုင်စွမ်း မြင့်မားသူပီပီ ဝူရှင်းဖန်၏ စိတ်ကူးကို ချက်ချင်း ရိပ်မိလိုက်သည်။

သူက ခေတ္တမျှ စဉ်းစားလိုက်ပြီးနောက် "အခုချိန်မှာ သုတေသန ဌာနတိုင်းက ကိုယ့်အလုပ်နဲ့ကိုယ် အလုပ်ရှုပ်နေကြတာ… သေချာစဉ်းစားကြည့်ရင် ခင်ဗျားတို့ ဌာနလောက်ပဲ ဒီအလုပ်ကို လုပ်နိုင်စွမ်းရှိတာ… ခင်ဗျားတို့က တာဝန်ကနေ ရှောင်လွှဲလို့ မရဘူးနော်" ဟု ပြောလိုက်သည်။

လော်ယွမ်၏ လေသံက သိမ်မွေ့သော်လည်း သွယ်ဝိုက်သော သတိပေးစကားကြောင့် ဝူရှင်းဖန် မျက်နှာဖြူရော်သွားသည်။

ကံကောင်းထောက်မစွာဖြင့် လော်ယွမ်က လေသံပြောင်းကာ ပြန်ပြောလိုက်သည်။

"ဝန်ထမ်းအင်အားကိုတော့ ကျွန်တော် ထပ်တိုးပေးလို့ ရပါတယ်… နောက်ဆုံးရောက်လာမယ့် အလုပ်သင်တွေထဲက တစ်သုတ်ကို ဒီကို ဦးစားပေးပြီး ခွဲပေးလိုက်မယ်… ဉာဏ်ပညာဆေးရည်က နှစ်စဉ်ထုတ်လုပ်နိုင်တဲ့ ပမာဏ ကန့်သတ်ချက်ရှိတော့ ခင်ဗျားတို့ကို အများကြီး ပေးဖို့တော့ မဖြစ်နိုင်ဘူး… ဒါပေမယ့် အချိန်တန်ရင်တော့ ခွဲတမ်းအချို့ ပေးပါ့မယ်"

"မြို့တော်ဝန်... ခွဲတမ်း နေရာဘယ်လောက်လောက် ရနိုင်မလဲ" ဝူရှင်းဖန်က မနေနိုင်ဘဲ မေးလိုက်သည်။

"ခွဲတမ်းဆယ်နေရာလောက်တော့ ရမှာပါ" လော်ယွမ်က စဉ်းစားပြီး ပြန်ဖြေလိုက်သည်။

လော်ယွမ်သည် ပြင်ပကမ္ဘာ ထောက်လှမ်းရေးဌာနကို သိပ်ပြီး ဂရုမစိုက်ဖြစ်သော်လည်း ထိုဌာနက အရေးမပါခြင်းတော့ မဟုတ်ပေ။ အမှန်တကယ်တွင် အလွန်အရေးကြီးလှသည်။

ကြယ်တာရာများဆီသို့ ခရီးရှည်နှင်မည့်အချိန်တွင် လုံခြုံစိတ်ချရသော လမ်းကြောင်းတစ်ခုကို ရွေးချယ်နိုင်ခြင်းက လူသားတို့၏ အသက်အန္တရာယ်ကို အဆုံးအဖြတ်ပေးမည် ဖြစ်သည်။

ယခုအချိန်အထိ အာရုံစိုက်မှု နည်းပါးနေခြင်းမှာလည်း ယာဉ်ပျံကြီး ထွက်ခွာရန် အချိန်လိုနေသေးသောကြောင့်သာ ဖြစ်သည်။

……

"ဌာနမှူးဝူ... ဌာနမှူးဝူ... သတိထားပါဦး" လုပ်ဖော်ကိုင်ဖက် တစ်ဦးက တံခါးတွန်းဖွင့်ဝင်လာပြီး ဝူရှင်းဖန်တစ်ယောက် ပယောဂဖမ်းစားခံထားရသကဲ့သို့ မလှုပ်မယှက် ရပ်နေသည်ကို မြင်သောအခါ အသံကျယ်ကျယ်ဖြင့် ခေါ်လိုက်သည်။

"အာ... ကိုရှန်ပဲ… မြို့တော်ဝန် ပြန်သွားပြီလား" ဝူရှင်းဖန်က အိပ်မက်ထဲမှ လန့်နိုးလာသကဲ့သို့ မေးလိုက်သည်။

"ပြန်သွားတာ ကြာပေါ့… ခင်ဗျား မြို့တော်ဝန်ကို ပြောလိုက်သေးလား" ကိုရှန်က မျှော်လင့်ချက်အပြည့်ရှိသော မျက်နှာဖြင့် မေးလိုက်သည်။

"ဘာကိုပြောရမှာလဲ" ဝူရှင်းဖန်၏ ဦးနှောက်က ကြည်လင်မှု မရှိသေးပေ။

"ဉာဏ်ပညာဆေးရည်လေဗျာ… မနေ့ကတည်းက တိုင်ပင်ထားပြီးပြီ မဟုတ်လား" ကိုရှန်က ခေါင်းကုတ်လိုက်ပြီး မျှော်လင့်ထားသလို ဖြစ်မလာ၍ စိတ်ပျက်စွာ ပြောလိုက်သည်။

သုတေသနရလဒ် အချို့ထွက်လာပြီး မြို့တော်ဝန်ကို လာရောက်စစ်ဆေးအောင် ခဲယဉ်းစွာ ဆွဲဆောင်နိုင်ခဲ့သည့် ဤမျှကောင်းမွန်သော အခွင့်အရေးကို လက်လွတ်ခံရမည်ဆိုလျှင် တစ်ဖက်လူသာ ဌာနမှူး မဟုတ်ခဲ့ပါက သူက အင်္ကျီကော်လာကိုဆွဲကာ မျက်နှာကို တံတွေးများဖြင့် ပက်ဖျန်းပစ်လိုက်မည် ဖြစ်သည်။

သူ့အသံက ကျယ်လွန်းသွားသောကြောင့် လူတစ်စု အခန်းထဲသို့ ရုတ်တရက် ဝင်လာကြသည်။

"ဘာ... ဌာနမှူးက မတောင်းဆိုလိုက်ဘူးလား"

"အကုန်လုံး တိုင်ပင်ပြီးသားကိစ္စကို... ခင်ဗျား... ခင်ဗျား တကယ်ကို အသုံးမကျတာပဲ"

ပြင်ပကမ္ဘာ ထောက်လှမ်းရေးဌာနရှိ လူအားလုံးမှာ လုပ်သက်ရင့် သုတေသီများ ဖြစ်ကြပြီး အများစုမှာ သဘောတရားရေးရာများကိုသာ လုပ်ဆောင်ကြသဖြင့် လောကီရေးရာများကို ဂရုမစိုက်တတ်ကြပေ။ ထို့ကြောင့် ဌာနမှူးကိုလည်း လုံးဝမကြောက်ကြချေ။

ဝူရှင်းဖန်သည် တံတွေးမိုး ရွာသွန်းခံလိုက်ရပြီးနောက်တွင် ဦးနှောက်က အနည်းငယ် ပြန်ကြည်လင်လာသည်။

သူက ချောင်းတစ်ချက်ဟန့်လိုက်ပြီး "မင်းတို့ကောင်တွေ... အားလုံး ငြိမ်ငြိမ်နေကြစမ်း… ငါက ဘယ်တုန်းက မတောင်းဆိုလိုက်ဘူးလို့ ပြောလို့လဲ" ဟု ပြောလိုက်သည်။

"တကယ် တောင်းဆိုလိုက်တာလား… မြို့တော်ဝန်က ဘာပြောလဲ… သဘောတူလား" ပြဿနာစခဲ့သူ ကိုရှန်က သူ့အသံကို အမြန်နှိမ့်ချလိုက်သည်။

ဝူရှင်းဖန်က အရှိန်အဝါ သိသိသာသာ ကျဆင်းသွားသော လူအုပ်ကြီးကို ကြည့်ကာ စိတ်ထဲတွင် ကျေနပ်ဂုဏ်ယူသွားသည်။

"သေချာပေါက် သဘောတူတာပေါ့… ဒါ့အပြင် ခွဲတမ်းက..."

သူက အသံကို ရှည်ရှည်ဆွဲလိုက်သည်။

"ဘယ်လောက်တဲ့လဲ"

သင်္ချာပါမောက္ခတစ်ဦးက တစ်ဖက်လူက သက်သက် အထာကိုင်နေမှန်း သိသော်လည်း မနေနိုင်ဘဲ မျိုချကာ မေးလိုက်သည်။

"ဆယ်နေရာ"

နောက်တစ်စက္ကန့်တွင် အားလုံး အသက်ရှူမှားသွားကြသည်။

သူတို့ ဌာနတစ်ခုလုံးတွင်မှ လူသုံးဆယ်ကျော်သာ ရှိရာ ဆယ်နေရာဆိုသည်မှာ ဝန်ထမ်း သုံးပုံတစ်ပုံခန့် ဉာဏ်ပညာဆေးရည် ရရှိမည်ဟု ဆိုလိုခြင်း ဖြစ်သည်။

မိမိတို့၏ လုပ်သက်နှင့် ပတ်သက်၍ ယုံကြည်မှုရှိသူ အချို့ဆိုလျှင် စိတ်လှုပ်ရှားလွန်း၍ မျက်နှာများပင် နီရဲလာကြသည်။

ဤသည်မှာ သူတို့၏ ဒုက္ခများ ပြီးဆုံးကာ မျက်နှာပွင့်လန်းခွင့် ရတော့မည်ဟု အဓိပ္ပာယ်သက်ရောက်နေသည် မဟုတ်ပါလော။

ဆက်ရန်...