အခန်း (၃၉၉-၄၀၀)

အခန်း (၃၉၉) အစ်ကို... ဒါ ကျွန်မရဲ့ ချစ်သူပါ

ခယ်ဟယ်သည် အချိန်တန်ပြီဖြစ်ကြောင်းနှင့် ရလဒ်ကောင်းများကို မြင်တွေ့ရတော့မည်ကို သိရှိလိုက်သည်။ ယခုတစ်ကြိမ်တွင်မူ သူ၏မျက်နှာထက်၌ ဖြစ်တောင့်ဖြစ်ခဲ စစ်မှန်သော အပြုံးတစ်ခု ပေါ်လွင်နေ၏။

"ဒါပေါ့... ရှောင်တီးရယ်"

ကျန်တီးသည် အတိုင်းအထက်အလွန် ဝမ်းသာသွားပြီး သူ့ကို ဖက်တွယ်ကာ ရယ်မောလိုက်မိသည်။ ခယ်ဟယ်သည် စကားထက် အလုပ်ဖြင့် သက်သေပြတတ်သူဖြစ်ပြီး သူမအပေါ် အလွန်ကောင်းသည်ဟု သူမ ခံစားရသည်။

မကြာသေးမီကလည်း သူသည် သူမကို သိသိသာသာ အပူတပြင်း လိုက်နေခဲ့သည် မဟုတ်ပါလား။ သူက ဤမျှ ကြိုးစားအားထုတ်နေမှတော့ သူမဘက်ကလည်း စတင်ပြီး တုံ့ပြန်သင့်ပြီဟု သူမ ယူဆမိသည်။

သူတို့နှစ်ဦး၏ အတွေးကိုယ်စီသည် လားရာမတူသော်လည်း အခြေအနေများမှာမူ ခယ်ဟယ် တွက်ချက်ထားသည့်အတိုင်း တိတိကျကျ ဖြစ်ပေါ်လာခဲ့သည်။

ခယ်ဟယ်သည် လူတန်းရှည်ကြီးထဲတွင် စိတ်ရှည်လက်ရှည် စောင့်ဆိုင်းပြီး ကျန်တီးအတွက် နို့လက်ဖက်ရည် ဝယ်ပေးခဲ့သည်။ ထို့နောက် အမှတ်မထင်သလိုပင် မေးလိုက်၏။

"မင်းအစ်ကို အခုတလော ဘာတွေလုပ်နေလဲ"

ကျန်တီး အံ့အားသင့်သွားသည်။

ခယ်ဟယ်က သူမကို တကယ်ချစ်မြတ်နိုးပြီး သူမ၏ မိသားစုအကြောင်းကို သိချင်နေသည်ဟု သူမ ထင်မှတ်လိုက်မိသည်။ သူမသည် ရှက်သွေး ဖြာလျက်ဖြင့်—

"အစ်ကိုက အိမ်ကို ခဲခဲယဉ်ယဉ်မှ ပြန်လာတတ်တာရှင်၊ အခုတလော သူ ဘာတွေလုပ်နေလဲဆိုတာ ကျွန်မလည်း တကယ်မသိဘူး"

ဟု ဖြေလိုက်သည်။

တစ်ဖက်တွင်မူ ကျန်ကျွင်းသည် ဘားတစ်ခု၌ အရက်သောက်နေရင်း ရုတ်တရက် နှာချေလိုက် မိသည်။

"ကျွင်းကော... ဘာဖြစ်လို့လဲ၊ ဆက်ကစားလေဗျာ"

ကျန်ကျွင်းက လက်ကာပြလိုက်ပြီး

“မင်းတို့ပဲ ဆက်ကစားကြတော့၊ ငါ ဒီနေ့တော့ အိမ်ပြန်မှဖြစ်မယ်၊ မဟုတ်ရင် အဖေက ဖုန်းဆက်ပြီး ထပ်ဆူနေဦးမယ်"

သူ အိမ်သို့ပြန်ရောက်ချိန်တွင် ရှက်သွေးဖြာနေသော မျက်နှာဖြင့် ကားပေါ်မှ ဆင်းလာသည့် ကျန်တီးနှင့် တိုးလေတော့သည်။

ထိုကားမှာ သူတို့အိမ်က ကားမဟုတ်ပေ။ ကျန်ကျွင်းသည် ခြေလှမ်းရပ်တန့်ကာ ထိုကားမောင်းလာသူမှာ မည်သူဖြစ်ကြောင်း သိလိုစိတ်ဖြင့် စောင့်ကြည့်နေမိသည်။

ကျန်တီးအပေါ် သူ အလွန်အမင်း ဂရုစိုက်လှသည်တော့ မဟုတ်ပါ။

ကျန်တီးသည် သူ၏ မိထွေးပါလာသော ညီမဖြစ်ပြီး သူတို့ကြားတွင် ဟန်ပြဆက်ဆံရေးသာ ရှိသည်။ ကျန်ကျွင်းသည် ဒေါသကြီးသူဖြစ်သဖြင့် ဤအိမ်သို့ ခဲခဲယဉ်ယဉ်မှ လာတတ်ပြီး အများအားဖြင့် တစ်ကိုယ်တည်းသာ ခွဲနေလေ့ရှိသည်။

သို့သော်လည်း မစ္စတာကျန်မှာ စိတ်နှလုံး မာကျောသူမဟုတ်ပေ။ မစ္စတာကျန်၏ ဇနီးဟောင်း (ကျန်ကျွင်းမိခင်) မကွယ်လွန်မီက သူမ စိတ်အေးလက်အေး ရှိစေရန်အတွက် ဇနီးမောင်နှံနှစ်ဦးစလုံး၏ ပိုင်ဆိုင်မှုအားလုံးကို ကျန်ကျွင်းအား ပေးအပ်မည်ဟု ပူးတွဲသေတမ်းစာ ရေးထိုးခဲ့ကြသည်။

ထို့ကြောင့် ကျန်ကျွင်း၏ မိခင်အမည်ပေါက် ပိုင်ဆိုင်မှုများမှာ ကျန်ကျွင်းထံသို့ လွှဲပြောင်းပြီးသား ဖြစ်နေပြီဖြစ်သည်။

ယခုအခါ မစ္စတာကျန်က ကျန်မိသားစုကို ဦးစီးနေသော်လည်း ကျန်ကျွင်းမှာမူ မည်သူ့ကိုမျှ ဂရုစိုက်ရန်မလိုဘဲ လွတ်လပ်စွာ နေထိုင်နေခြင်း ဖြစ်သည်။

ကားထဲမှ လူမှာ အတော်ကြာသည်အထိ ထွက်မလာသဖြင့် ကျန်ကျွင်း စိတ်မရှည်တော့ဘဲ လှည့်ထွက်ရန် ပြင်လိုက်သည်။

စင်စစ်တွင် ခယ်ဟယ်သည် ကားပေါ်မှ ဆင်းရန် အစီအစဉ်မရှိသေးပါ။ ကျန်မိသားစုထံ တရားဝင် လာရောက်လည်ပတ်ခြင်း မရှိသေးသဖြင့် အထင်အမြင်သေးမည့် အပြုအမူမျိုး မလုပ်လိုသောကြောင့် ဖြစ်သည်။

သူမကို လာပို့ပြီးသည်နှင့် ချက်ချင်း ပြန်ရန်သာ ရည်ရွယ်ထားခြင်း ဖြစ်သည်။

"အစ်ကို..."

ကျန်တီးသည် ကျန်ကျွင်း၏ ကျောပြင်ကို မြင် လိုက်သဖြင့် လှမ်းခေါ်လိုက်သည်။

သူမသည် ငယ်စဉ်ကတည်းက အစ်ကိုရှိသူများကို အားကျခဲ့ရသူ ဖြစ်သည်။ သူမမိခင် နောက်အိမ်ထောင်ပြုချိန်တွင် ထိုဆန္ဒ ပြည့်ဝပြီဟု ထင်မှတ်ခဲ့သော်လည်း ကျန်ကျွင်းကမူ သူမကို အမြဲတစေ လျစ်လျူရှုထားခဲ့သည်။

ကျန်တီး ကျန်မိသားစုထဲ ရောက်လာချိန်တွင် မျိုးရိုးအမည် ပြောင်းခဲ့ရသည်။ ကျန်ကျွင်းက သူမအား သူ၏ဖခင်နှင့် ခိုးစားရာမှ ရလာသည့် သမီးဟု သံသယဝင်ခဲ့ဖူးသော်လည်း စုံစမ်းစစ်ဆေးပြီးနောက်တွင်မူ သွေးသားမတော်စပ်ကြောင်း အတည်ပြုနိုင်ခဲ့သည်။

ကျန်တီး၏ မိခင်မှာ ယခင်က အချစ်ကို ဦးစားပေးပြီး မိသားစု၏ ကန့်ကွက်မှုများကို လျစ်လျူရှုကာ ဆင်းရဲသား လူငယ်တစ်ဦးနှင့် အိမ်ထောင်ပြုခဲ့သူ ဖြစ်သည်။ သို့သော် သူမ၏ လောင်းကြေးမှာ ရှုံးနိမ့်ခဲ့ပြီး ထိုလူက သူမအပေါ် မကောင်းခဲ့ပေ။

အစပိုင်းတွင် သူမ၏ မိသားစုမှာ ချမ်းသာသည်ဟု ထင်မှတ်ကာ ထိုလူက ကောင်းမွန်စွာ ဆက်ဆံခဲ့သော်လည်း၊ နောက်ပိုင်းတွင် သူမ၏ မိသားစုက သူမကို လုံးဝစွန့်လွှတ်လိုက်ပြီဖြစ်ကြောင်း သိသွားသောအခါ ထိုလူ၏ သဘောထားမှာ လုံးဝ ပြောင်းလဲသွားခဲ့သည်။

အလိုလိုက်ခံရသော သူဌေးသမီးလေးဘဝမှ အချိန်ပြည့် အိမ်ဖော်ဘဝသို့ ရောက်ရှိသွားခဲ့ရသည်။ သူမသည် လင်မယားကွာရှင်းလိုသော်လည်း ထိုအချိန်တွင် ကိုယ်ဝန်ရှိနေပြီ ဖြစ်သည်။

တစ်နေ့တွင် ထိုလူက သူမအား ရိုက်နှက်လိုက်သည့်အခါတွင်မူ သူမ ထပ်မံသည်းမခံနိုင်တော့ဘဲ မိဘများရှေ့၌ ဒူးထောက် တောင်းပန်ခဲ့ရသည်။ မိသားစုဟူသည် အမှန်တကယ် အဆက်အသွယ် ဖြတ်တောက်၍ မရနိုင်သော သွေးသားရင်းချာများ ဖြစ်ကြသည် မဟုတ်ပါလား။

ထို့ကြောင့် သူမ၏ မိသားစုဝင်များက ထိုလူ့ထံ လာရောက်ပြဿနာရှာပြီး ချက်ချင်းပင် ကွာရှင်းခိုင်းလိုက်ကြသည်။

ထိုမိသားစုမှာ ကလေးတစ်ယောက်ကို ကောင်းကောင်းမွန်မွန် ပြုစုပျိုးထောင်နိုင်စွမ်း ရှိသဖြင့် ကျန်တီး၏ ဘဝမှာ သက်သောင့်သက်သာ ရှိခဲ့သည်။ နောက်ပိုင်းတွင် မစ္စတာကျန်နှင့် ကျန်တီးမိခင်တို့ မတော်တဆ ဆုံတွေ့ကြရာမှ အကြောင်းပါခဲ့ကြခြင်း ဖြစ်သည်။

ခယ်ဟယ်သည် သူ နေ့ညမပြတ် စောင့်စားနေရသော သူနှင့် ဤသို့ တိုးလိမ့်မည်ဟု မထင်မှတ်ထားခဲ့ပေ။

ယခုအချိန်မှာ တွေ့ဆုံရန် အကောင်းဆုံးအချိန် မဟုတ်သော်လည်း ရင်ဆိုင်မိသွားပြီဖြစ်ရာ ပြန်လှည့်သွား၍ မရတော့ပေ။ ကားတံခါး ပွင့်သွားပြီး သူ ကားပေါ်မှ ဆင်းလာခဲ့သည်။

ကျန်ကျွင်းသည် မျက်မှောင်ကြုတ်ကာ ခယ်ဟယ်၏ မျက်နှာကို သေချာကြည့်လိုက်သည်။ သူသည် အနည်းငယ် မျက်စိမှုန်သော်လည်း မျက်မှန်ကိုမူ ပုံမှန်တပ်လေ့မရှိပေ။ သို့သော် သူသည် ဤလူကို မမှတ်မိပါ။

"သခင်လေးကျန်..."

ခယ်ဟယ်သည် ယဉ်ကျေးပျူငှာသော လူကြီးလူကောင်းတစ်ဦးကဲ့သို့ ပြုမူလိုက်ရာ မြင်ရသူအဖို့ သဘောကျစရာ ဖြစ်နေသည်။ ကျန်တီးတစ်ယောက် သူ့အပေါ် အစွဲအလမ်းကြီးနေသည်မှာ မဆန်းတော့ပေ။

သို့သော် ကျန်ကျွင်းကမူ ဤလူ၏ အပြုအမူများနှင့် အပြုံးများမှာ ဟန်ဆောင်မှုများဟု ခံစားနေရသည်။

"မင်းတို့က ဘာပတ်သက်တာလဲ"

ကျန်ကျွင်းသည် အပိုစကားများဖြင့် အချိန်မဖြုန်းဘဲ တိုက်ရိုက်ပင် မေးလိုက်သည်။

ခယ်ဟယ်သည် ကျန်ကျွင်းက သူ့အပေါ် ဤမျှ ရိုင်းစိုင်းလိမ့်မည်ဟု မမျှော်လင့်ထားသော်လည်း မျက်နှာထက်မှ အပြုံးကို မပျက်စေဘဲ ကမ်းပေးထားသော လက်ကို ရှက်ကိုးရှက်ကန်းဖြင့် ပြန် ရုပ်လိုက်ရသည်။

"အစ်ကို... ဒါ ကျွန်မရဲ့ ချစ်သူပါ"

ကျန်တီးသည် ခယ်ဟယ်အတွက် စိတ်မကောင်းဖြစ်သွားပြီး သူ့လက်ကို အမြန်ဆုပ်ကိုင်ကာ မိတ်ဆက်ပေးလိုက်သည်။

"အင်း..."

ကျန်ကျွင်းသည် မည်သည့် မှတ်ချက်မျှ မပေးဘဲ လှည့်ထွက်သွားခဲ့သည်။ သူမသည် သူ၏ ညီမအရင်းလည်း မဟုတ်ရာ သူတပါး၏ အချစ်ရေးကို ဝင်ရောက်စွက်ဖက်ရန် သူ စိတ်မဝင်စားပေ။

ခယ်ဟယ်သည် ကျန်ကျွင်း၏ အေးစက်မှုကို သတိပြုမိသွားပြီး သူ၏ အကွက်ရွှေ့မှု မှားယွင်းသွားလေသလားဟု သံသယဝင်လာမိသည်။

"အစ်ကိုက အမြဲတမ်း ဒီလိုပဲ၊ စိတ်ထဲမထားပါနဲ့နော်"

ဟု ကျန်တီးက ချော့မော့ရှာသည်။

ခယ်ဟယ်က အခြားတစ်ခုကို တွေးတောနေမိသည်။ ကျန်ကျွင်းသည် အမှန်တကယ်တွင် ပေါင်းသင်းရလွယ်ကူပြီး သူငယ်ချင်းများစွာ ရှိသူဖြစ်ကြောင်း သူ သိထားသည်။

"နောက်ရက်ကျရင် အမေနဲ့ မိတ်ဆက်ပေးမယ်လေ"

ဟု ကျန်တီးက ပျော်ရွှင်စွာ ပြောလိုက်သည်။

သူမအတွက် စစ်မှန်သော မိသားစုဝင်မှာ သူမ၏ မိခင်သာ ဖြစ်သဖြင့် ခယ်ဟယ်ကို သူမ၏ မိခင် နှင့် အမြန်ဆုံး တွေ့ပေးချင်နေသည်။

ခယ်ဟယ်သည် အနည်းငယ် စိတ်မကျေမနပ် ဖြစ်သွားသည်။

အကယ်၍ မင်ယွဲ့သာ သူ၏ အစီအစဉ်ကို မဖျက်ဆီးခဲ့လျှင် ကျန်မိသားစု၏ မိထွေးပါသမီးဖြစ်သော ကျန်တီးကို သူ လှည့်ကြည့်မည် မဟုတ်ပေ။

ကျန်မိသားစု၏ ဂုဏ်ဒြပ်မှာ ကောင်းမွန်သော်လည်း သူမမှာ သမီးအရင်း မဟုတ်သည်က အားနည်းချက် ဖြစ်နေသည်။

သို့သော် သူ၏ လက်ရှိ အခြေအနေအရ သူ့ကို ထောက်ပံ့ပေးနိုင်မည့် အရှိန်အဝါကြီးမားသော အမျိုးသမီးကို ရှာဖွေရန် ခက်ခဲနေပြီဖြစ်ရာ ဤရိုးအအနှင့် အချစ်တစ်ခုတည်းကိုသာ ကြည့်တတ်သော ကျန်တီးမှာ သူ၏ အကောင်းဆုံး ရွေးချယ်မှု ဖြစ်လာခဲ့သည်။

"ကောင်းပါပြီ၊ မင်းအဖေနဲ့ရော တွေ့ဖို့ စီစဉ် လိုက်ကြတာပေါ့"

ဤအခြေအနေအထိ ရောက်လာပြီးမှတော့ နောင်တရရန် နေရာမရှိတော့ပေ။

ခယ်ဟယ်သည် ရှေ့သို့တိုးကာ ကျန်တီးကို ပွေ့ဖက်လိုက်ပြီး သာယာပျူငှာသော စကားလုံးများ ဆိုလိုက်သည်။

သူ၏ မျက်ဝန်းများထဲမှ စက်ဆုပ်ရွံရှာဖွေသော အကြည့်များကိုမူ သူမ မမြင်နိုင်အောင် ဖုံးကွယ်ထားလိုက်၏။

"ယောက္ခမ" ဟူသော စကားလုံးကို ကြားလိုက်ရသည့်အခါ ကျန်တီးသည် ရှက်သွေးဖြာကာ ခယ်ဟယ်၏ ရင်ခွင်ထဲသို့ မျက်နှာဝှက်လိုက် မိသည်။

ခယ်ဟယ်၏ မျက်နှာထက်တွင် စိတ်ပျက်အားမရမှုများ ခဏတာ ဖြတ်ပြေးသွားပြီးနောက် သူက အသံကိုနှိမ့်ကာ—

"ကဲ... အိမ်ထဲဝင်တော့လေ"

ဟု ညင်သာစွာ ပြောလိုက်သည်။

သူသည် သူ၏ သရုပ်ဆောင်မှုကို အဆုံးထိ ပီပြင်အောင် လုပ်ဆောင်ခဲ့ပြီး ကျန်တီး၏ အရိပ်အယောင် ပျောက်ကွယ်သွားမှသာ ကားမောင်းထွက်ခွာခဲ့သည်။

ယခု ကျန်ကျွင်းနှင့် တွေ့ဆုံပြီးပြီဖြစ်ရာ နောက်တစ်ဆင့်မှာ ကျန်ကျွင်းနှင့် ပိုမို ရင်းနှီးအောင် လုပ်ဆောင်ရန်ပင် ဖြစ်သည်။

ခယ်ဟယ်၏ မျက်ဝန်းထဲတွင် မှောင်မိုက်ပြီး ဂုဏ်သိက္ခာမဲ့သော အရောင်အဝါများ လက်ခနဲ ဖြစ်သွားသည်။

တစ်နေ့တွင် သူသည် အထက်တန်းလွှာတစ်ယောက် ဖြစ်လာခဲ့လျှင် ဤမြင့်မြတ်လှပါသည်ဆိုသော လူမျိုးစုများကို သူ၏ ခြေဖဝါးအောက်၌ နင်းခြေပစ်မည်ဟု ကြုံးဝါးနေမိသည်။ အမှန်အတိုင်းဆိုရလျှင် ခယ်ဟယ်သည် မိမိကိုယ်ကိုယ် ယုံကြည်မှု ကင်းမဲ့နေသူဖြစ်ပြီး ထိုသို့သော သူများသည် အလွန်ပင် ခံစားလွယ် တတ်ကြသည်။

သူသည် သူတပါးရှေ့တွင် ဟန်ဆောင်ကောင်းသော်လည်း ရင်ထဲ၌မူ ကြီးမားသော ရည်မှန်းချက် အတ္တများကို မွေးမြူထားသူ ဖြစ်သည်။

ကျန်ကျွင်းမှာမူ ခယ်ဟယ် ဘာတွေးနေသည်ကို ဂရုမစိုက်ဘဲ အိမ်ထဲသို့ ရောက်ရှိနေပြီဖြစ်သည်။

"အဖေ၊ အန်တီ"

ဟု အိမ်ထဲရှိ လူနှစ်ဦးကို နှုတ်ဆက်လိုက်သည်။

"မင်းလို လူလေလူလွင့်က အိမ်ကို ပြန်လာဖို့ ဆုံးဖြတ်လိုက်ပြီပေါ့လေ"

ထိုအချိန်တွင် ကျန်တီးလည်း အပြင်မှ ဝင်လာသည်။

"အဖေ၊ အမေ"

"မင်းတို့ နှစ်ယောက် အတူတူ ပြန်လာတာလား"

မစ္စတာကျန်က ကျန်ကျွင်းကို ထူးဆန်းသော အကြည့်ဖြင့် ကြည့်လိုက်သည်။

သူ၏ သားအကြောင်းကို သူ ကောင်းကောင်းသိသည်။ ကျန်ကျွင်းသည် အပြင်လူ မည်သူနှင့်မဆို သင့်တင့်အောင် ပေါင်းသင်းနိုင်သော်လည်း သူ၏ ညီမ ကျန်တီးနှင့်မူ အပေါ်ယံသာ ဆက်ဆံတတ်ပြီး တတ်နိုင်သမျှ ရှောင်ရှားလေ့ရှိသူ ဖြစ်သည် မဟုတ်ပါလား။

အခန်း (၄၀၀) သူက လူကောင်းတစ်ယောက်ပါ

"မဟုတ်ပါဘူး"

"အိမ်အဝင်ဝမှာ မတော်တဆ ဆုံမိတာပါ"

သူတို့နှစ်ဦးစလုံးက တစ်ပြိုင်နက်တည်း ဖြေလိုက်ကြသည်။

မစ္စတာကျန်ကတော့ ဤသို့ဖြစ်လာမည်ကို ကြိုတင်ခန့်မှန်းထားပြီးသားပင်။

"ရှောင်တီး... မင်း အခုတလော ဘာလို့ အပြင်တွေ ခဏခဏ ထွက်နေတာလဲ"

ကျန်တီး၏မိခင်က စိုးရိမ်တကြီး မေးလိုက်သည်။ သူမ၏ သမီးဖြစ်သူ အချစ်ရေးတစ်ခုခုထဲ ရောက်နေပြီလားဟု သူမ သံသယဝင်နေခြင်း ဖြစ်သည်။

"ဟို... ကျွန်မ..."

ကျန်တီးသည် စကားပြောရင်း ကျန်ကျွင်းဘက်သို့ အကူအညီတောင်းသလို လှည့်ကြည့် လိုက်သည်။

"ဘာလို့ ငါ့ကို ကြည့်နေတာလဲ၊ အန်တီ... သူ အချစ်မှာ ကျရှုံးနေပြီဗျ"

ကျန်ကျွင်းသည် ဆိုဖာပေါ်တွင် သက်သောင့်သက်သာ လှဲလျောင်းလိုက်ရင်း လျှို့ဝှက်ချက်ကို ဗြောင်ကျကျပင် ဖွင့်ချလိုက်တော့သည်။

ကျန်တီး၏မိခင်၏ မျက်နှာတွင် စိတ်ရှုပ်ထွေးမှုများ ယှက်သန်းသွားသည်။

ကျိုးကြောင်းဆီလျော်စွာ စဉ်းစားလျှင် သူမ၏သမီးမှာ ဤအရွယ်တွင် ရည်းစားထားသင့်ပြီ ဖြစ်သော်လည်း၊ သူမ၏ ရိုးအလွန်းသော ပုံစံကြောင့် တစ်ဖက်လူ၏ လှည့်ဖြားခြင်း ခံရမည်ကို အမှန်တကယ်ပင် စိုးရိမ်မိသည်။

အတိတ်က သူမကိုယ်တိုင်လည်း လူမှားကို ရွေးချယ်မိခဲ့ဖူးရာ၊ သူမ၏ သမီးကိုလည်း သူမကဲ့သို့ အဖြစ်မျိုး မကြုံစေချင်ပါ။

သို့သော် အချစ်ကို အကန်းယုံတတ်သည့် အကျင့်မှာ မျိုးရိုးလိုက်တတ်သည် ထင်၏။ အကယ်၍ ကျန်တီး၏ အချစ်ရေးကို အချိန်မီ မတားဆီးနိုင်ခဲ့လျှင် သူမသည်လည်း ဒုတိယမြောက် ကျန်တီးမိခင် ဖြစ်သွားနိုင်ပေသည်။

"အဲဒါ ဘယ်သူ့သားလဲ၊ သူက ဘယ်လိုလူမျိုးလဲ"

မေးခွန်းမှာ ကျန်တီးထံ ဦးတည်ထားသော်လည်း ကျန်တီး၏မိခင်မှာ မသိစိတ်ဖြင့် ကျန်ကျွင်းကို လှမ်းကြည့်လိုက်မိသည်။

သူမအတွက်မူ ဤလင်ပါသားမှာ သူမ၏ သမီးထက် ပိုမိုအားကိုးထိုက်သူ ဖြစ်နေသည် မဟုတ်ပါလား။

"ကျွန်တော် မသိဘူး၊ သူ့ကိုပဲ တိုက်ရိုက်မေးလိုက်ပါ"

ကျန်ကျွင်းသည် စားပွဲပေါ်မှ ငှက်ပျောသီးတစ်လုံးကို ယူ၍ အေးအေးလူလူ အခွံနွှာစားနေလိုက် သည်။

"ခယ်ဟယ်က ကျွန်မရဲ့ စီနီယာပါ၊ သူက အရမ်းကို စိတ်သဘောထားကောင်းတဲ့ လူကောင်းတစ်ယောက်ပါရှင်"

ကျန်တီးသည် စကားလုံးများ ထစ်ငေါ့နေသော်လည်း ခယ်ဟယ်က သူမအပေါ် မည်မျှ ညင်သာပျူငှာကြောင်း၊ မည်မျှ ဂရုစိုက်ကြောင်းများကိုသာ တတွတ်တွတ် ရွတ်ဆိုနေတော့သည်။

မစ္စတာကျန်မှာမူ လောကအတွေ့အကြုံများသော မြေခွေးအိုကြီးပီပီ ကျန်တီးပြောသမျှကို အလွယ်တကူ မယုံကြည်နိုင်ပေ။

ကျန်တီး၏ တောက်ပနေသော မျက်နှာလေးကို ကြည့်ရင်း ကျန်တီး၏မိခင်မှာ ဤမြင်ကွင်းသည် အလွန်ပင် ရင်းနှီးနေသလို ခံစားလိုက်ရသည်။

ဤပုံစံသည် သူမငယ်စဉ်က မိဘများကို ဆန့်ကျင်ခဲ့စဉ်က ပုံစံနှင့် အတိအကျပင် ဖြစ်သည်။ အချစ်တစ်ခုထဲတွင်သာ နစ်မွန်းပြီး မိမိကိုယ်ကိုယ် ပျောက်ဆုံးသွားခြင်းသည် နောက်ဆုံးတွင် နာကျင်မှုများဖြင့်သာ နိဂုံးချုပ် ရတတ်သည် မဟုတ်ပါလား။

"မင်းတို့ ဘယ်တော့တွေ့ဖို့ စီစဉ်ထားလဲ"

မိဘတစ်ဦးအနေဖြင့် သူမ၏သမီးအတွက် လက်တွဲဖော်လောင်းကို စစ်ဆေးရန်မှာ လက်ခံနိုင်စရာပင်။

ကျန်တီးကလည်း ချက်ချင်းပင် သဘောတူလိုက်သည်။ သူမသည် ပေါ့ပါးသော ခြေလှမ်းများဖြင့် အပေါ်ထပ်သို့ တက်သွားပြီးနောက် ဖုန်းပြောရင်း ရယ်မောနေသော အသံကို ကြားနေရသည်။ ၎င်းမှာ သူမ၏ ချစ်သူဖြစ်သူ ခယ်ဟယ် ဖြစ်ကြောင်း ဧကန်မလွဲပင်။

"အာကျွင်း... မင်း ရှောင်တီးရဲ့ ချစ်သူကို တွေ့လိုက်လား"

မစ္စတာကျန်သည် ကျန်တီးကို အလွန်ချစ်မြတ်နိုးသော်လည်း သူမက အနည်းငယ် ရှက်တတ်သူဖြစ်ပြီး သူကိုယ်တိုင်မှာလည်း အမျိုးသားတစ်ဦး ဖြစ်သဖြင့် သူမ၏ ကိစ္စများတွင် တိုက်ရိုက် ဝင်ရောက် စွက်ဖက်လေ့မရှိပေ။

သူမ အပေါ်ထပ်သို့ တက်သွားတော့မှသာ ကျန်ကျွင်းကို လှမ်းမေးလိုက်ခြင်း ဖြစ်သည်။

ကျန်တီး၏မိခင်မှာလည်း သိချင်စိတ် ပြင်းပြနေဟန်ဖြင့် ကျန်ကျွင်းကို စိုက်ကြည့်နေသည်။

"အပြင်မှာ ခဏတွေ့လိုက်ရတယ်၊ သူက ရိုးသားတဲ့လူတော့ မဟုတ်ဘူးဗျ၊ သူ့အကြောင်းကို သေချာစုံစမ်းထားသင့်တယ်"

ထိုသို့ပြောပြီးနောက် ကျန်ကျွင်းသည် ငှက်ပျောသီးခွံကို အမှိုက်ပုံးထဲသို့ ပစ်ထည့်ကာ အပေါ်ထပ်သို့ တက်သွားလေတော့သည်။

"မောင်... ကျွန်မတို့ ဒါကို သေချာစုံစမ်းမှ ဖြစ်မယ်၊ ရှောင်တီးကို မရိုးသားတဲ့ ရည်ရွယ်ချက်ရှိသူတွေရဲ့ လှည့်ဖြားမှု မခံစေချင်ဘူး"

ကျန်တီး၏မိခင်သည် ကျန်ကျွင်း၏ စကားကို ကြားပြီးနောက် ပို၍ပင် စိုးရိမ်သွားလေသည်။

"ငါ လုပ်လိုက်ပါ့မယ်၊ စိတ်မပူပါနဲ့"

မစ္စတာကျန်သည် ချက်ချင်းပင် သူ၏လက်ထောက်ကို ဖုန်းဆက်လိုက်သည်။

"အခုတလော သမီးလေးနဲ့ ပတ်သက်နေတဲ့ ခယ်ဟယ် ဆိုတဲ့လူက ဘယ်သူလဲဆိုတာ စုံစမ်းလိုက်စမ်း..."

အမိန့်ပေးပြီးမှသာ သူ အနည်းငယ် စိတ်အေးသွားတော့သည်။

ခယ်ဟယ်သည် အိမ်သို့ ပြန်ရောက်သောအခါ သူ၏ ဟန်ဆောင်မှုများကို ချွတ်ချလိုက်သည်။ ညှိုးငယ်မှောင်မိုက်သော မျက်နှာထားဖြင့် သူ၏ ဝတ်စုံကို ဆိုဖာပေါ်သို့ ပစ်တင်လိုက်ပြီး လည်စည်းကို ဖြေလျော့ကာ မှီထိုင်လိုက်သည်။

သူ၏ဖခင် ခယ်ကျွန့်ရှန်းမှာ မလျော်ကန်သော ရည်ရွယ်ချက်ဖြင့် လူကို ဒဏ်ရာရအောင် ပြုမူခဲ့မှုကြောင့် ထောင်ဒဏ် (၂) နှစ် ချမှတ်ခြင်းခံခဲ့ရရာ သူ၏ မိသားစုမှာလည်း ပြိုကွဲလုနီးပါး ဖြစ်နေပြီဖြစ်သည်။

"နင် ပြန်လာရဲသေးတယ်ပေါ့၊ နင့်အဖေကို ဘာလို့ မကယ်တာလဲ"

သူသည် ပင်ပန်းနွမ်းနယ်နေသဖြင့် လှေကားထိပ်တွင် ရပ်နေသော အမျိုးသမီးကို သတိမထားမိလိုက်ပေ။

"အမေ... ဘာမှ မပြောတော့ဘူးလား"

ခယ်ဟယ်မှာ လန့်သွားပြီး မျက်လုံးကို ပွတ်ကာ ထိုဘက်သို့ လှည့်ကြည့်လိုက်သည်။

"ကျွန်တော် ပြောပြီးပြီပဲ၊ အဖေက ဥပဒေကို ချိုးဖောက်ခဲ့တာ၊ ကုမ္ပဏီက လူတိုင်းလည်း သိနေတာပဲ၊ ကျွန်တော် သူ့ကို မကယ်နိုင်ဘူး"

သူ၏ဖခင်မှာ ရုံးခန်းထဲ၌ပင် ဝန်ခံခဲ့ပြီး ရဲများကလည်း ဖမ်းဆီးသွားခဲ့ပြီး ဖြစ်သည်။

မင်ယွဲ့ဆိုသော အမျိုးသမီးမှာလည်း သူ အလွယ်တကူ တုန်လှုပ်အောင် လုပ်နိုင်မည့်သူ မဟုတ်ပေ။ ထို့ကြောင့် သူ၏ဖခင် ထောင်ကျခြင်းကို ငွေကြေးဖြင့်ပင် ပြောင်းလဲ၍ မရနိုင်တော့ပါ။

"ငါမယုံဘူး... နင်က အတ္တကြီးနေတာ၊ ပိုက်ဆံမသုံးချင်လို့ပဲ၊ နင်က ကျေးဇူးကန်းတဲ့ ကောင် လေး..."

ရှည်လျားသော ဝတ်ရုံကို ဝတ်ဆင်ထားသည့် ထိုအမျိုးသမီးမှာ အမျိုးသားတစ်ဦး မရှိလျှင် သူမ၏ လောကကြီးတစ်ခုလုံး ပျက်စီးသွားသကဲ့သို့ ရူးသွပ်စွာ အော်ဟစ်နေတော့သည်။

"အမေ... မအော်ပါနဲ့တော့၊ (၂) နှစ်ကြာရင် သူ ပြန်ထွက်လာမှာပါ"

သူမသည် အခုတလော ဤသို့ပင် အမြဲတစေ ပြုမူနေသဖြင့် ခယ်ဟယ်မှာ အမှန်တကယ် သည်းမခံနိုင်တော့ပေ။

သူသည် ကုမ္ပဏီတွင်လည်း ကောလာဟလများကြား၌ တည်ငြိမ်နေသယောင် ဟန်ဆောင်နေရသူ ဖြစ်သည်။ အိမ်ပြန်ရောက်သည့်အခါတွင်လည်း ရူးသွပ်နေသော မိခင်နှင့် ရင်ဆိုင်ရခြင်းမှာ တင်းကျပ်နေသော ကြိုးတစ်မျှင် တုန်ခါနေသကဲ့သို့ပင် စိတ်ပျက်ဖွယ် ကောင်းလှသည်။

အကယ်၍ သူ၏မိခင်သာ ဆက်လက်၍ မဆင်မခြင် ပြုမူနေမည်ဆိုပါက သူ ဘာလုပ်မိမည်ကို သူကိုယ်တိုင်ပင် မသိတော့ပေ။

"ဒါတွေ အားလုံးက နင့်ကြောင့်ပဲ၊ နင်သာ မရှိရင် နင့်အဖေက ကုမ္ပဏီကို သိမ်းပိုက်ဖို့ ကြိုးစားမှာမဟုတ်ဘူး၊ ဒီလို အမှားမျိုးလည်း လုပ်မှာမဟုတ်ဘူး၊ ငါတို့ အရင်က ပိုက်ဆံတွေ အများကြီးနဲ့ အေးအေးဆေးဆေး နေခဲ့ရတာလေ၊ အခုတော့ နင့်ကြောင့် အားလုံး ပျက်စီးကုန်ပြီ၊ နင် ဘာလို့ မွေးလာရတာလဲ"

ထိုအမျိုးသမီးသည် လှေကားထိပ်၌ ရပ်ကာ မှောင်မိုက်ထဲမှ သားရဲတစ်ကောင်ကဲ့သို့ အော်ဟစ်နေတော့သည်။

သူမသည် ခယ်ကျွန့်ရှန်းအပေါ်တွင်သာ တစ်သက်လုံး မှီခိုလာခဲ့သည့် အမျိုးသမီး ဖြစ်သည်။ သူမ၏ ကမ္ဘာကြီးမှာ ခင်ပွန်းသည် ထောင်ကျသွားသောအခါ ပြိုလဲသွားခဲ့ပြီး သူမ၏ သားဖြစ်သူအပေါ်သို့ အမုန်းတရားများ ပုံချနေတော့သည်။

ကျယ်လောင်လွန်းသော အော်ဟစ်သံများကြောင့် ခယ်ဟယ်၏ ခေါင်းမှာ ပေါက်ထွက်မတတ် ခံစားလိုက်ရသည်။

"အမေ စိတ်မအေးဘူးဆိုရင်၊ မနက်ဖြန် ကျွန်တော် အမေ့ကို စိတ္တဇဆေးရုံ ပို့လိုက်မယ်၊ ဘာလုပ်သင့်လဲဆိုတာ သေချာစဉ်းစားပါ"

ခယ်ဟယ်သည် ဒေါသတကြီးဖြင့် သူမကို ကျော်ဖြတ်ကာ အပေါ်ထပ်ရှိ သူ၏အခန်းထဲသို့ ဝင်၍ တံခါးကို ဝုန်းခနဲ ပိတ်လိုက်သည်။

ခဏအကြာတွင် အပြင်ဘက်မှ အမျိုးသမီးတစ်ဦး၏ ရှိုက်ကြီးတငင် ငိုသံကို ကြားလိုက်ရသည်။

ခယ်ဟယ်သည် သူ၏မိခင်ကို လျစ်လျူရှုကာ အိပ်ရာမဝင်မီ ကျန်တီးထံသို့ ဖုန်းဆက်လိုက်သေးသည်။

လူမသိသူမသိဆိုလျှင် သူသည် အလွန်ချစ်တတ်သော ချစ်သူကောင်းတစ်ဦးဟုပင် ထင်မှတ်ရပေမည်။

သူ၏ စနစ်တကျ ပြုစုပျိုးထောင်မှုအောက်တွင် ကျန်တီးမှာ အလွန်ပင် ရူးသွပ်စွာ ချစ်မိနေခဲ့ပြီ ဖြစ်သည်။

ကျန်ကျွင်းသည် ကျန်တီး၏ ကိစ္စတွင် မပါဝင်ချင်သော်လည်း သူမသည် ယခုအခါ ကျန်မိသားစု၏ အမည်ကို ခံယူထားသူဖြစ်သဖြင့် ခယ်ဟယ်၏ နောက်ကြောင်းကို စုံစမ်းရန် လူလွှတ်လိုက်သည်။

ခယ်ဟယ်၏ ဖခင် ထောင်ကျခြင်းနှင့် ကျန်တီးကို ချဉ်းကပ်လာခြင်းမှာ အချိန်ကိုက်လွန်းနေသည် မဟုတ်ပါလား။

မစ္စတာကျန်၏ လက်ထောက်ကလည်း ခယ်ဟယ်၏ အထောက်အထားကို လျင်မြန်စွာ ရှာဖွေတွေ့ရှိခဲ့သည်။ ခယ်မိသားစုတွင် ဖြစ်ပျက်ခဲ့သမျှ အကြောင်းအရာများအားလုံးကို သူ၏ အစီရင်ခံစာတွင် အပြည့်အစုံ ဖော်ပြထားသည်။

ထိုအချက်အလက်များကို ဖတ်ပြီးနောက် ကျန်တီး၏မိခင်မှာ စိုးရိမ်စိတ်များ ပြည့်နှက်သွားကာ ကျန်တီး၏ အခန်းထဲသို့ သွားရောက် စကားပြောလေတော့သည်။

"အမေ... ဒါတွေအားလုံးကို အဟယ်က ကျွန်မကို ပြောပြပြီးသားပါ၊ သူ့အဖေက အမှားလုပ်ခဲ့လို့ ပြစ်ဒဏ်ခံနေရတာပဲလေ၊ ကျွန်မတို့က တက္ကသိုလ်ကတည်းက သိလာတာ၊ သူ့အကြောင်းကို အမေတို့ထက် ကျွန်မက ပိုသိတယ်၊ ပြီးတော့ အမေတို့ အခုလို သူ့နောက်ကြောင်း စုံစမ်းတာက သူ့အပေါ် အရမ်းရိုင်းစိုင်းရာ ကျပါတယ်"

ကျန်တီး၏ မျက်နှာမှာ မသာမယာ ဖြစ်သွားသည်။ ကျန်တီးမိခင်မှာ စကားပြောရန် ပြင်လိုက်သော်လည်း နောက်ဆုံးတွင် သက်ပြင်းချကာ အခန်းထဲမှ ထွက်ခွာခဲ့တော့သည်။

သူမ ပြုစုပျိုးထောင်ခဲ့သော ကလေးမှာ အမျိုးသားတစ်ဦးအတွက်ကြောင့် သူမအပေါ် စိတ်ဆိုးလိမ့်မည်ဟု သူမ မထင်မှတ်ထားခဲ့ပေ။

ကျန်တီး၏ ခေါင်းမာမှုကြောင့် သူမ ဘာမှမတတ်နိုင်တော့ဘဲ ခယ်ဟယ်၏ မရိုးသားသော ရည်ရွယ်ချက်များကိုသာ စောင့်ကြည့်ရန် ဆုံးဖြတ်လိုက်သည်။

သို့သော် ခယ်ဟယ်သည် ကျောင်းတွင်ရော အလုပ်ခွင်တွင်ပါ နှစ်ပေါင်းများစွာ ဟန်ဆောင်ကောင်းခဲ့သူ ဖြစ်သည်။

ယခုတိုင် ဟယ်ယူ ကုမ္ပဏီအတွင်း၌ ခယ်ကျွန့်ရှန်းကို မုန်းတီးသူများ ရှိသော်လည်း ခယ်ဟယ်ကိုမူ လေးစားကြည်ညိုသူများစွာ ရှိနေသေးသည်။ မစ္စတာကျန်ကမူ သူလိုအပ်သော သက်သေအထောက်အထားများ ရရှိရန် ဆက်လက် စုံစမ်းနေတော့သည်။

ခယ်ကျင်းနှင့် သူ၏သမီးဖြစ်သူတို့သည် အလုပ်တွင် လျင်မြန်ကြပြီး မင်ယွဲ့ ပေးပို့ထားသော ဒီဇိုင်းမူကြမ်းမှာလည်း မကြာမီ အတည်ပြုပြီးစီးသွားခဲ့သည်။

သို့သော် မင်ယွဲ့၏ ဒီဇိုင်းများမှာ အထက်တန်းစား ဆန်လွန်းသဖြင့် သူတို့က အမြောက်အမြား မထုတ်လုပ်ဘဲ အကန့်အသတ်ဖြင့်သာ ထုတ်လုပ်ခဲ့သည်။

မင်ယွဲ့၏ ဒီဇိုင်းများ ဈေးကွက်ထဲသို့ ရောက်ရှိသွားသည်နှင့် မင်ယွဲ့၏ ဘဏ်အကောင့်ထဲသို့ ငွေအမြောက်အမြား ထပ်မံဝင်ရောက်လာခဲ့သည်။

ခယ်ကျင်းသည် အွန်လိုင်းမှတစ်ဆင့်လည်း ကုမ္ပဏီကို ကြော်ငြာခဲ့သည်။ ဟယ်ယူတွင် အလွန်ထူးချွန်ပြီး လျှို့ဝှက်ချက်များသော ဒီဇိုင်နာတစ်ဦး ရှိနေကြောင်း လူတိုင်း သိရှိသွားကြသော်လည်း ထိုလူမှာ မည်သူဖြစ်ကြောင်းကိုမူ မည်သူမျှ မသိရှိကြပေ။

ဟယ်ယူ ကုမ္ပဏီသည် အခက်အခဲများစွာ ကြုံတွေ့ခဲ့ရသော်လည်း ယခုအခါ လမ်းကြောင်းမှန်ပေါ်သို့ ပြန်လည်ရောက်ရှိနေပြီ ဖြစ်သည်။

ရုတ်တရက် ပေါ်ပေါက်လာသော ရှယ်ယာရှင် တစ်ဦးနှင့် လျှို့ဝှက်ဒီဇိုင်နာ 'Y'...။

"မင်ယွဲ့... ရပ်ကွက်ဟောင်း ပြန်လည်ပြုပြင်ရေး ပထမအဆင့် ပြီးသွားပြီ၊ လာကြည့်ဦးမလား"

ဟု ကျန်ဟင်က ဖုန်းဆက်ပြောလာသည်။

မင်ယွဲ့သည် ထိုနေရာသို့ ကားမောင်းသွားခဲ့သည်။

ကျန်ဟင်မှာ အလုပ်ကိစ္စကြောင့် မလာနိုင်သော်လည်း ဝမ်ကျန်း ရောက်ရှိနေသည်။ မြို့တော် စည်ပင်သာယာရေး အရာရှိများလည်း ရောက်ရှိနေကြပြီး မင်ယွဲ့ကို မြင်သောအခါ အလွန်ပင် ပျူငှာစွာ နှုတ်ဆက်ကြသည်။

"မင်ယွဲ့လေးကို တကယ်ပဲ ကျေးဇူးတင်ပါတယ်၊ နောက်မှ အတူတူ ထမင်းစားကြတာပေါ့"

အရာရှိများသည် စီးပွားရေးသမားများနှင့် တိုက်ရိုက်ထိတွေ့လေ့ မရှိသော်လည်း မင်ယွဲ့မှာမူ ထူးခြားသည်။

သူမသည် ယန်ကျင်းတက္ကသိုလ်မှ ကျောင်းသူတစ်ဦးဖြစ်သလို ရပ်ကွက်ဟောင်း ပြန်လည်ပြုပြင်ရေးတွင်လည်း အဓိက ရင်းနှီးမြှုပ်နှံသူ ဖြစ်သည် မဟုတ်ပါလား။