အခန်း (၁၇-၁၈)

အခန်း ၁၇ လီမင်းဆက်အင်ပါယာက သေလမ်းကို ရှာနေပြီ

“ကောင်းပြီ... မင်းက တော်တော် စိတ်ဝင်စားစရာကောင်းတဲ့ လူပဲ... ဒီလိုဆိုရင်တော့ သေလိုက်တော့...”

လျှို့ဝှက်သူလျှိုက ဝူရူလုံ၏ အဖြေကို ကြားသောအခါ ဝူရူလုံက ငြင်းပယ်လိမ့်မည်ဟု သူ မထင်ထားခဲ့သည်မှာ ထင်ရှားသည်။ သူက မဆိုင်းမတွပင် လက်လှုပ်ရှားလိုက်၏။ အကယ်၍ ဝူရူလုံက လက်မခံလိုပါက သူ့ကို သတ်ပစ်လိုက်ရုံသာ ရှိသည်။ ဘာပဲဖြစ်ဖြစ် သူတို့ လိုအပ်သည်မှာ ဝူမျိုးနွယ်ကုန်သွယ်ရေးဖြစ်ပြီး ဝူရူလုံ မဟုတ်ချေ။

တစ်ဖက်လူက လက်လှုပ်ရှားလိုက်သည်ကို မြင်သောအခါ ဝူရူလုံ၏ မျက်လုံးများမှာ အနည်းငယ် တုန်လှုပ်သွားသည်။ တစ်ဖက်လူက စကားတစ်ခွန်းနှင့်ပင် သဘောမတူဘဲ အမှန်တကယ် လက်ပါလိမ့်မည်ဟု သူ မထင်ထားခဲ့ပေ။

သူတော်စင်ဘုရင်အထွတ်အထိပ်အဆင့် တစ်ယောက်၏ ရှေ့တွင် ကပ်ဘေးဖြတ်ကျော်ခြင်း အထွတ်အထိပ်အဆင့်မှာ လုံးဝ မယှဉ်နိုင်ပေ။ ဝူရူလုံမှာ လုံးဝ တုံ့ပြန်ချိန်မရဘဲ နေရာတွင်သာ မျက်စိမှိတ်၍ ရပ်နေရုံသာ တတ်နိုင်၏။

သို့သော် တစ်ဖက်လူက ဝူရူလုံကို သတ်ဖြတ်ခါနီးတွင် ကြောက်မက်ဖွယ်ကောင်းသော အရှိန်အဝါတစ်ခုက ဝူရူလုံ၏ ကိုယ်ပေါ်မှ ပေါက်ကွဲထွက်လာပြီး ထိုသူတော်စင်ဘုရင်အထွတ်အထိပ်အဆင့် လျှို့ဝှက်သူလျှိုကို ချက်ချင်းပင် သတ်ဖြတ်ပစ်လိုက်သည်။

ဝူရူလုံနှင့် တစ်ဖက်လူတို့ပင် တုံ့ပြန်ချိန် မရလိုက်ခင်မှာပင် အဖြစ်အပျက်များက ထိုသို့ ဖြစ်ပွားသွားခဲ့သည်။

“အရမ်း ကြောက်စရာကောင်းတဲ့ စွမ်းအားပဲ... ဒါက အဖေရဲ့ လက်ချက်လား...”

ဝူရူလုံက နေရာတွင် အချိန်အတော်ကြာ ရပ်နေပြီးမှ သတိပြန်ဝင်လာကာ တိုးတိုးလေး ရေရွတ်လိုက်သည်။ ဤမျှ အစွမ်းထက်သော ရန်သူက သူ၏ ဖခင် ချန်ထားခဲ့သော စွမ်းအင်တစ်ခု၏ လက်ထဲတွင် တစ်ခဏလေးပင် မခံနိုင်လိမ့်မည်ဟု သူ မထင်ထားခဲ့ပေ။

ဤအချက်က ဝူရူလုံကို သူ၏ ဖခင်ဖြစ်သူ၏ ကျင့်ကြံမှုအဆင့်ကို စတင် စပ်စုစေခဲ့သည်။ ဖေဖေက ဧကရာဇ်တစ်ပိုင်းအဆင့်သို့ပင် ရောက်ရှိနေပြီလား။

တစ်ဖက်တွင်မူ သုတေသနပြုလုပ်နေသော ဝူဟောက်မှာ တစ်စုံတစ်ခုကို ခံစားမိလိုက်သကဲ့သို့ သူ့မျက်ခုံးများမှာ အနည်းငယ် တွန့်ချိုးသွားပြီး အဝေးမှ တောင်ပိုင်းနယ်မြေသို့ လှမ်းမျှော်ကြည့်လိုက်သည်။

“ရူလုံ့ကိုယ်ပေါ်က အကာအကွယ်က အသက်ဝင်သွားပြီပဲ... ငါတို့ ဝူမျိုးနွယ်ကို ဒီလောက်မြန်မြန် ပစ်မှတ်ထားတဲ့သူ ပေါ်လာပြီလား...”

အကာအကွယ်၏ ပိုင်ရှင်ဖြစ်သူ ဝူဟောက်က မည်သူ့ကိုယ်ပေါ်မှ အကာအကွယ် အသက်ဝင်သွားသည်ကို သဘာဝအလျောက်ပင် ခံစားမိနိုင်သည်။ ထိုသူမှာ ဝူရူလုံပင် ဖြစ်၏။

အစကတည်းက ဝူဟောက်က သူတို့ ဝူမျိုးနွယ်က ဝူမျိုးနွယ်ကုန်သွယ်ရေးကို တည်ထောင်ပါက လူအချို့၏ ပစ်မှတ်ထားခြင်းကို ခံရမည်ဟု သိထားခဲ့သည်။ သို့သော် တစ်ဖက်လူက တိုက်ရိုက် သေကြောင်းကြံလိမ့်မည်ဟု သူ မထင်ထားခဲ့ပေ။

အဘယ်ကြောင့်ဆိုသော် ဝူဟောက် ချန်ထားခဲ့သော အကာအကွယ်၏ အသက်ဝင်စေသည့် အခြေအနေမှာ အကာအကွယ် ချထားခံရသူကို သတ်ဖြတ်နိုင်လောက်သည့် တိုက်ခိုက်မှုမျိုးနှင့် ကြုံတွေ့ရမှသာ အသက်ဝင်မည် ဖြစ်သောကြောင့် ဖြစ်သည်။ ဆိုလိုသည်မှာ တစ်ဖက်လူ၏ တိုက်ခိုက်မှုက ဝူရူလုံကို သတ်ဖြတ်ရန် လုံလောက်သည်ဟု ဆိုလို၏။

“ဒါပေမဲ့ ရူလုံကတော့ ဘာမှ မဖြစ်လောက်ပါဘူး... အကာအကွယ်ရဲ့ စွမ်းအင်တောင်မှ အများကြီး မကုန်သွားဘူး... ရန်သူက သိပ်မစွမ်းဘူးဆိုတဲ့ သဘောပဲ... ငါ ပြန်ရောက်မှ ဖြေရှင်းတော့မယ်...”

ဝူဟောက်က ချက်ချင်း ပြန်မသွားခဲ့ပေ။ အဘယ်ကြောင့်ဆိုသော် ဤကိစ္စမှာ သိပ်မပြင်းထန်သေးသောကြောင့် ဖြစ်သည်။ နောက်တစ်ချက်မှာ ဝူဟောက်က ဤကိစ္စကို ဝူရူလုံအတွက် စမ်းသပ်မှုတစ်ခုအဖြစ် သတ်မှတ်လိုပြီး ဝူရူလုံတွင် တစ်ဦးတည်း ရပ်တည်နိုင်စွမ်း ရှိ၊ မရှိကို ကြည့်လိုသောကြောင့် ဖြစ်သည်။

တစ်ဖက်တွင်မူ လီမင်းဆက်အင်ပါယာ တွင် အုပ်ချုပ်ရေးကိစ္စများ ဆောင်ရွက်နေသော လီရွှီခွင်၏ မျက်ခုံးများမှာ ရုတ်တရက် တွန့်ချိုးသွား၏။

သူက လျှို့ဝှက်သူလျှို၏ သခင်ဖြစ်သောကြောင့် လျှို့ဝှက်သူလျှို သေဆုံးသွားကြောင်းကို အလိုအလျောက်ခံစားမိနိုင်သည်။ သူ၏ မျက်နှာအမူအရာမှာ ချက်ချင်းပင် မဲမှောင်သွား၏။

“ဝူမျိုးနွယ်ကုန်သွယ်ရေး... မင်းတို့ရဲ့ နောက်ကွယ်မှာ ဘယ်သူ ရှိနေတာလဲ... ငါ့ရဲ့ သူတော်စင်ဘုရင်အထွတ်အထိပ်အဆင့် သူလျှိုတောင် မင်းတို့ရဲ့ ပြိုင်ဘက် မဟုတ်ဘူးဆိုမှတော့... ဒီလိုဆိုရင် ငါကိုယ်တော် ဝူမျိုးနွယ်ကုန်သွယ်ရေးကို တစ်ခေါက်လောက် သွားကြည့်ဖို့ လိုအပ်နေပုံပဲ...”

လီရွှီခွင်မှာ သေးငယ်သော ဝူမျိုးနွယ်ကုန်သွယ်ရေးလေးက သူ၏ လျှို့ဝှက်သူလျှိုကို သတ်ဖြတ်နိုင်စွမ်း ရှိလိမ့်မည်ဟု မထင်ထားခဲ့သည်မှာ ထင်ရှားသည်။

သူကလည်း ဝူမျိုးနွယ်ကုန်သွယ်ရေး၏ နောက်ကွယ်တွင် အင်အားကြီးမားသော အဖွဲ့အစည်း မရှိကြောင်း စုံစမ်းသိရှိပါက ဝူမျိုးနွယ်ကုန်သွယ်ရေးကို လက်အောက်ခံအဖြစ် သိမ်းသွင်းရန် အမိန့်ပေးခဲ့ပြီးသား ဖြစ်သည်။

သို့သော် ယခု ဝူမျိုးနွယ်ကုန်သွယ်ရေးက သူ၏ လျှို့ဝှက်သူလျှိုကို သတ်ဖြတ်ရဲသည် ဆိုမှတော့ ဤကိစ္စမှာ သေလျှင်သေ၊ ရှင်လျှင်ရှင် အခြေအနေသို့ ရောက်ရှိသွားပြီ ဖြစ်သည်။ ဝူမျိုးနွယ်ကုန်သွယ်ရေး၏ နောက်ကွယ်တွင် မည်သူ ရှိသည်ဖြစ်စေ၊ ဖြေရှင်းပစ်ရမည်သာ။

ထိုအချိန်တွင် ဝူမျိုးနွယ်ကုန်သွယ်ရေးအတွင်း၌ ဧည့်သည် သူတော်စင်ဘုရင်အဆင့် သုံးဦးမှာ ဝူရူလုံရှိရာမှ လှုပ်ရှားမှုကို ခံစားမိပြီး မကြာမီမှာပင် ဝူရူလုံရှိရာသို့ ရောက်ရှိလာကြသည်။

“ခေါင်းဆောင်... ဘာဖြစ်တာလဲ...”

ထိုသူတော်စင်ဘုရင်အဆင့် သုံးဦး၏ အမည်များမှာ အိုးယန်ဖုန်း၊ ချန်ချူချန်နှင့် ဝမ်ကျောက်ယွီတို့ ဖြစ်ကြသည်။

“ဘာမှ မဖြစ်ပါဘူး... လီမင်းဆက်အင်ပါယာက လူလွှတ်လိုက်တာ... ကျွန်တော် ဖြေရှင်းလိုက်ပြီ...”

ဝူရူလုံ၏ စကားကို ကြားသောအခါ အိုးယန်ဖုန်းတို့၏ မျက်နှာများတွင် အံ့အားသင့်သော အမူအရာများ ပြည့်နှက်သွားသည်။

သူတို့က ဝူရူလုံတွင် သူတော်စင်ဘုရင်အထွတ်အထိပ်အဆင့်ကိုပင် သတ်ဖြတ်နိုင်လောက်သည့် အစွမ်း ရှိနေခြင်းကို အံ့အားသင့်ခြင်း ဖြစ်သည်။

အစောက အရှိန်အဝါကို ခံစားမိစဉ်ကပင် သူတို့က သတ်ဖြတ်ခံရသူ၏ အဆင့်ကို ခံစားမိခဲ့သည်။ တစ်ခဏမျှသာ ဖြစ်သော်လည်း သူတော်စင်ဘုရင်အထွတ်အထိပ်အဆင့် ဖြစ်ကြောင်း သူတို့ သိရှိခဲ့၏။

လီမင်းဆက်အင်ပါယာမှာ သူတို့ ဝူမျိုးနွယ်ကုန်သွယ်ရေးကို ပစ်မှတ်ထားနေပြီ ဖြစ်ကြောင်း မထင်မှတ်ထားခဲ့ပေ။

သို့သော် ဤအချိန်အတောအတွင်း သူတို့ ဝူမျိုးနွယ်ကုန်သွယ်ရေး၏ တောင်ပိုင်းနယ်မြေ တစ်ခုလုံးရှိ ဖွံ့ဖြိုးတိုးတက်မှု အရှိန်အဟုန်မှာ အလွန်ပင် ပြင်းထန်ခဲ့သောကြောင့် လီမင်းဆက်အင်ပါယာ၏ ပစ်မှတ်ထားခြင်းကို ခံရသည်မှာ သိပ်တော့ မထူးဆန်းလှပေ။

“ခေါင်းဆောင်... ခင်ဗျား ခုနက လီမင်းဆက်အင်ပါယာက လူကို သတ်လိုက်တာလား...”

ချန်ချူချန်၏ မျက်နှာတွင် စိုးရိမ်သော အမူအရာများ ပြည့်နှက်နေ၏။

ဝူရူလုံက ဟွန်းခနဲ အသံတစ်ချက်ပြု၍ တည်ငြိမ်စွာ ဆိုလိုက်သည်။

“ဘာဖြစ်လဲ... သူတို့ လီမင်းဆက်အင်ပါယာက ငါတို့ ဝူမျိုးနွယ်ကုန်သွယ်ရေးကို လက်ဝါးကြီးအုပ်ချင်တာကို ငါတို့က ပြန်မတိုက်ခိုက်ရဘူးလား...”

“အဲဒီလို မဟုတ်ပါဘူး... ဒါပေမဲ့ လီမင်းဆက်အင်ပါယာမှာ ဧကရာဇ်တစ်ပိုင်းအဆင့် ဘိုးဘေးတွေ အများကြီး ရှိတယ်... ကျွန်တော်တို့ ဝူမျိုးနွယ်ကုန်သွယ်ရေးရဲ့ လက်ရှိ အင်အားနဲ့ လီမင်းဆက်အင်ပါယာရဲ့ ပြိုင်ဘက် မဟုတ်လောက်ဘူး...”

ချန်ချူချန်က အလျင်အမြန် ဆို၏။ အစောက ဝူရူလုံက သူတော်စင်ဘုရင်အထွတ်အထိပ်အဆင့် တစ်ယောက်ကို သတ်ဖြတ်ခဲ့သော်လည်း ချန်ချူချန်တို့က ဝူမျိုးနွယ်ကုန်သွယ်ရေးက လီမင်းဆက်အင်ပါယာ၏ ပြိုင်ဘက်ဖြစ်နိုင်မည်ဟု မထင်ကြပေ။

အဘယ်ကြောင့်ဆိုသော် ဝူမျိုးနွယ်ကုန်သွယ်ရေးသာ အမှန်တကယ် အင်အားကြီးပါက သူတို့ကဲ့သို့ အဆင့်အတန်းမျိုးကို ငှားရမ်းထားမည် မဟုတ်ပေ။

ဤသို့ တွေးမိသည်နှင့် ချန်ချူချန်က အလျင်အမြန် ရှင်းပြလိုက်သည်။

“ခေါင်းဆောင် ခင်ဗျား မသိသေးလို့ပါ... လီမင်းဆက်အင်ပါယာက ထင်သလောက် မရိုးရှင်းဘူး... အခု လီမျိုးနွယ်မင်းဆက်မှာ အင်အားအကြီးဆုံးက သူတို့ရဲ့ ဧကရာဇ် လီရွှီခွင်လို့ ဆိုပေမယ့် တကယ်တော့ လီမျိုးနွယ်မင်းဆက်မှာ အိပ်စက်နေတဲ့ ဘိုးဘေးတွေ ရှိသေးတယ်... ဧကရာဇ်တစ်ပိုင်းအဆင့်တွေချည်းပဲ...”

ဤသို့ ပြောချိန်တွင် ဧည့်သည် သူတော်စင်သုံးဦးလုံး၏ မျက်နှာများမှာ အလွန်ပင် လေးနက်သွား၏။

ဝူရူလုံမှာလည်း ချန်ချူချန်၏ စကားသံထဲမှ ဆိုလိုရင်းကို နားလည်နိုင်ပြီး မဆိုင်းမတွပင် ဆိုလိုက်သည်။

“ခင်ဗျားတို့ လီမင်းဆက်အင်ပါယာနဲ့ ရန်သူဖြစ်ရမှာ ကြောက်ရင် အခုပဲ ကျွန်တော့် ဝူမျိုးနွယ်ကုန်သွယ်ရေးကနေ ထွက်သွားလို့ရပါတယ်...”

“ခေါင်းဆောင်... ကျွန်တော်တို့ ကြောက်လို့ မဟုတ်ပါဘူး... အကြံပေးရုံသက်သက်ပါ... ကျွန်တော်တို့ အခက်အခဲကြုံနေတုန်း ခေါင်းဆောင်က ကူညီခဲ့တာ... အခု အခက်အခဲကြုံနေချိန်မှာ ဘယ်လိုလုပ်ပြီး ထွက်သွားနိုင်မှာလဲ...”

ချန်ချူချန်တို့ သုံးဦးမှာ အချင်းချင်း တစ်ချက်ကြည့်လိုက်ပြီးနောက် တစ်ပြိုင်နက်တည်း ဆိုလိုက်ကြသည်။

သူတို့အားလုံးမှာ ဝိညာဉ်ကျောက်တုံးများ အလွန်အမင်း လိုအပ်နေချိန်တွင် ဝူရူလုံ၏ ကူညီမှုကို ရရှိခဲ့ကြပြီး ကျေးဇူးဆပ်သည့်အနေဖြင့် ဝူမျိုးနွယ်ကုန်သွယ်ရေး၏ ဧည့်သည် ဖြစ်လာခဲ့ကြခြင်း ဖြစ်သည်။

ဝူမျိုးနွယ်ကုန်သွယ်ရေး၏ ဧည့်သည်ဖြစ်ခြင်းက လစာ ပိုမိုရရှိနိုင်သော်လည်း သူတို့၏ စိတ်ထဲတွင် ကျေးဇူးဆပ်လိုစိတ်က ပိုမို ကြီးစိုးနေ၏။

ဤသည်မှာ သူတို့၏ လောင်းကြေးလည်း ဖြစ်သည်။ ခေါင်းဆောင်၏ နောက်ကွယ်တွင် လီမင်းဆက်အင်ပါယာကို မရှုံးနိမ့်နိုင်သော အင်အားစု ရှိနေလိမ့်မည်ဟု သူတို့ လောင်းကြေးထပ်နေကြခြင်း ဖြစ်သည်။

ထိုသို့ မဟုတ်ပါက လီမင်းဆက်အင်ပါယာက သူတို့ကို ပစ်မှတ်ထားနေကြောင်း သိရှိပြီးနောက် ဤမျှ တည်ငြိမ်နေမည် မဟုတ်ချေ။

“အင်း၊ ငါ သိပြီ... အရင် ဆင်းသွားကြတော့... လီမင်းဆက်အင်ပါယာရဲ့ ဒီတစ်ခေါက် လှုပ်ရှားမှုနဲ့ ပတ်သက်ပြီး ကျွန်တော့်မှာ အစီအစဉ် သီးသန့် ရှိတယ်...”

“ဟုတ်ကဲ့ပါ ခေါင်းဆောင်..”

ချန်ချူချန်တို့ ထွက်သွားပြီးနောက် ဝူရူလုံက သတင်းပို့ကျောက်တုံးကို ထုတ်၍ သူ၏ ဖခင်ထံသို့ သတင်းပို့လိုက်သည်။

“ဖေဖေ... လီမင်းဆက်အင်ပါယာက ကျွန်တော်တို့ ဝူမျိုးနွယ်ကုန်သွယ်ရေးကို လာထိဖို့ လှုပ်ရှားနေပြီ... ဖေဖေ့မှာ တောင့်ခံနိုင်တဲ့ အင်အား ရှိရဲ့လား...”

မကြာမီပင် သတင်းပို့ကျောက်တုံးမှ တုန်ခါမှုတစ်ခု ထွက်ပေါ်လာပြီး တစ်ဖက်မှ ဝူဟောက်၏ အသံ ထွက်ပေါ်လာ၏။

“စိတ်ကြိုက်သာ လုပ်... နောက်ကွယ်မှာ မင်းအဖေ ရှိတယ်...”

ဝူဟောက်၏ စကားက ဝူရူလုံအတွက် စိတ်ငြိမ်ဆေးတစ်လုံး ထိုးပေးလိုက်သကဲ့သို့ပင် သူ၏ စိတ်ထဲတွင် ယုံကြည်မှုများ ပြည့်နှက်လာသည်။

“ကျွန်တော် သိပါပြီ ဖေဖေ... ကျွန်တော် လီမင်းဆက်အင်ပါယာကို ကျွန်တော်တို့ ဝူမျိုးနွယ်ရဲ့ အစွမ်းကို သိစေရမယ်...”

အခန်း ၁၈: မျက်နှာပြောင်တိုက်တာလား

ဝူရူလုံက ပြောလျှင်ပြောသလိုပင် ချက်ချင်း အကောင်အထည်ဖော်ကာ လီမင်းဆက်အင်ပါယာ ပစ်မှတ်ထားသော လုပ်ဆောင်မှုများကို စတင်လိုက်သည်။

တစ်လအတွင်းမှာပင် လီမင်းဆက်အင်ပါယာ၏ လက်အောက်မှ စီးပွားရေးလုပ်ငန်းများမှာ အကြီးအကျယ် နစ်နာဆုံးရှုံးခဲ့၏။

ဤသတင်းကို ကြားသိရသော လီရွှီခွင်၏ မျက်နှာအမူအရာမှာ ချက်ချင်းပင် မဲမှောင်သွားသည်။ ဝူမျိုးနွယ်ကုန်သွယ်ရေးက သူ့ လီမင်းဆက်အင်ပါယာကို ထိပါးရဲလိမ့်မည်ဟု သူ မထင်ထားခဲ့ပေ။

“မဟုတ်သေးဘူး... လုံးဝ မဟုတ်သေးဘူး... ဝူမျိုးနွယ်ကုန်သွယ်ရေးက ငါတို့ လီမင်းဆက်အင်ပါယာကို ထိပါးရဲတယ်ဆိုတာ နောက်ကွယ်မှာ အားကိုးတစ်ခုခု ရှိနေလို့ပဲ... ငါတို့ လီမင်းဆက်အင်ပါယာကို ထောင်ချောက်ဆင်နေတာ ဖြစ်နိုင်တယ်...”

လီရွှီခွင်က ဤကဲ့သို့သော အချိန်တွင် ပိုမို တည်ငြိမ်ရမည်ဟု ကောင်းကောင်း သိသည်။ ခဏတာ ဒေါသကြောင့် လီမင်းဆက်အင်ပါယာတစ်ခုလုံးကို ပျက်စီးစေလို့ မဖြစ်ချေ။

ယခု ဝူမျိုးနွယ်ကုန်သွယ်ရေးက ဤမျှ ရဲတင်းစွာ သူ၏ လီမင်းဆက်အင်ပါယာ လုပ်ငန်းများကို တိုက်ခိုက်နေသည် ဆိုမှတော့ သူတို့ နောက်ကွယ်တွင် သူနှင့် ရင်ဆိုင်ရဲသည့် အစွမ်းထက်သော ပုဂ္ဂိုလ်တစ်ဦး ရှိနေရမည် ဖြစ်သည်။

အသက်ကို ပြင်းပြင်းရှူ၍ လီရွှီခွင်က သူ၏ ဒေါသကို ထိန်းချုပ်လိုက်ပြီးနောက် လက်ကို ဝှေ့ယမ်း၍ အစေခံတစ်ယောက်ကို ခေါ်လိုက်သည်။

“အမိန့်ပေးလိုက်... ငါကိုယ်တော် သုံးရက်ကြာရင် ဝူမျိုးနွယ်ကုန်သွယ်ရေးကို ဧည့်သည်အဖြစ် သွားရောက်မယ်...”

“ဟုတ်ကဲ့ပါ အရှင်မင်းကြီး...”

“ဝူမျိုးနွယ်ကုန်သွယ်ရေး... မင်းတို့ နောက်ကွယ်မှာ ဘယ်လို မိစ္ဆာတွေ ရှိနေလဲဆိုတာ ငါကိုယ်တော် ကြည့်ရသေးတာပေါ့... ငါတို့ လီမင်းဆက်အင်ပါယာနဲ့ ရန်သူ မဖြစ်တာ အကောင်းဆုံးပဲ... မဟုတ်ရင်တော့ ငါကိုယ်တော် ဘိုးဘေးတွေကို ပင့်ဖိတ်ပြီး မင်းတို့ကို ချေမှုန်းပစ်ရလိမ့်မယ်...”

ဤသို့ ပြောချိန်တွင် လီရွှီခွင်၏ ကိုယ်ပေါ်မှ ကြောက်မက်ဖွယ်ကောင်းသော သတ်ဖြတ်လိုစိတ်များ ပေါက်ကွဲထွက်လာသည်။ သူ၏ အထွတ်အထိပ်အဆင့် စွမ်းအားက သူ့ကို မည်သည့်အရာမဆို လုပ်ဆောင်နိုင်သည့် ယုံကြည်မှုကို ပေးစွမ်း၏။

တစ်ဖက်မှ ဝူရူလုံမှာမူ ဤသတင်းကို မကြာမီမှာပင် ရရှိခဲ့ပြီး သူ၏ မျက်နှာပေါ်တွင် စိတ်ဝင်စားသော အပြုံးတစ်ခု ပေါ်လာသည်။

“စိတ်ဝင်စားဖို့ကောင်းသားပဲ... ဒီအထိတောင် လာရဲသေးတယ်ပေါ့... ဒီလိုဆိုရင်တော့ မျက်နှာပြောင်တိုက်ပေးရသေးတာပေါ့...”

ဖခင်ဖြစ်သူ၏ အားပေးမှုကြောင့် ဝူရူလုံမှာ ဘာကိုမှ မကြောက်ရွံ့တော့ပေ။ အထူးသဖြင့် အရင်က လျှို့ဝှက်သူလျှိုက သူ့ကို သတ်ရန် ကြိုးစားခဲ့ရာ ဝူရူလုံက နောက်ကွယ်မှ ကြိုးကိုင်သူ လီရွှီခွင်အပေါ် ကောင်းပြစရာ အကြောင်းမရှိပေ။

မကြာမီမှာပင် အချိန်က သုံးရက် ပြည့်မြောက်သွားသည်။ လီရွှီခွင်က နန်းတော်ရှေ့တွင် ရပ်၍ လက်ကို ဝှေ့ယမ်းလိုက်ရာ နောက်တစ်ခဏတွင် အလွန်ကြီးမားသော ပုံရိပ်ကိုးခုက အဝေးမှ ပျံသန်းလာသည်ကို တွေ့လိုက်ရသည်။

ထိုပုံရိပ်များမှာ နဂါးကိုးကောင်ပင် ဖြစ်ပြီး သူတို့၏ ကိုယ်ပေါ်မှ အရှိန်အဝါများက သူတော်စင်မဟာအထွတ်အထိပ်အဆင့်တွင် ရှိနေကြ၏။

ဤသည်မှာ လီမျိုးနွယ်မင်းဆက်၏ ဧကရာဇ် ခရီးထွက်ရာတွင် အသုံးပြုသည့် သီးသန့်ယာဉ် 'နဂါးကိုးကောင်တင် ရထား' ပင် ဖြစ်သည်။

လီရွှီခွင်က စိတ်အာရုံကို လှုပ်ရှားလိုက်သည်နှင့် နောက်တစ်ခဏတွင် သူက နဂါးကိုးကောင်တင် ရထားပေါ်သို့ ရောက်ရှိသွားသည်။

မဟာသူတော်စင် အထွတ်အထိပ်အဆင့် နဂါးကိုးကောင်က ဟိန်းဟောက်လိုက်ရာ ကြောက်မက်ဖွယ်ကောင်းသော နဂါးဟိန်းသံက လီမင်းဆက်အင်ပါယာ နန်းတော်တစ်ခုလုံးကို ပျံ့နှံ့သွား၏။

ထို့နောက်တွင်တော့ ဝူမျိုးနွယ်ကုန်သွယ်ရေးရှိရာသို့ ပျံသန်းထွက်ခွာသွားသည်။ အကယ်၍ ဝူမျိုးနွယ်ကုန်သွယ်ရေးကို ခြိမ်းခြောက်ရန် မဟုတ်ပါက လီရွှီခွင်က နဂါးကိုးကောင်တင် ရထားကို အသုံးမပြုပေ။ ယင်းက ကုန်ကျစရိတ်မှာ အလွန်ပင် ကြီးမားသောကြောင့် ဖြစ်သည်။

လီရွှီခွင်၏ ဘေးတွင် သူတော်စင်ဘုရင်အထွတ်အထိပ်အဆင့် အစောင့်အရှောက်များစွာကလည်း လိုက်ပါ၍ ဝူမျိုးနွယ်ကုန်သွယ်ရေးရှိရာသို့ လိုက်ပါသွားကြသည်။

အကယ်၍ လီရွှီခွင်ပင် မဖြေရှင်းနိုင်သော ပြဿနာနှင့် ကြုံတွေ့ရပါက သူတော်စင်ဘုရင်အထွတ်အထိပ်အဆင့်များမှာ အသုံးမဝင်သော်လည်း အဓိကရည်ရွယ်ချက်မှာ လီရွှီခွင်ကိုယ်တိုင် လှုပ်ရှားရန် မသင့်တော်ချိန်တွင် သူတို့က ဝင်ရောက်တိုက်ခိုက်ရန် ဖြစ်သည်။

လီရွှီခွင်ရဲ့ အဆင့်အတန်းက ဘယ်အဆင့်မို့လို့လဲ ။ ကိစ္စတိုင်းကို သူကိုယ်တိုင် လုပ်ဆောင်ဖို့ မဖြစ်နိုင်ဘူး မဟုတ်လား။

မကြာမီမှာပင် လီရွှီခွင်က နဂါးကိုးကောင်တင် ရထားနှင့် သူတော်စင်ဘုရင်အထွတ်အထိပ်အဆင့် အစောင့်အရှောက်များစွာ၏ ဝန်းရံမှုဖြင့် ဝူမျိုးနွယ်ကုန်သွယ်ရေးရှေ့သို့ ရောက်ရှိလာသည်။

သို့သော် ဝူမျိုးနွယ်ကုန်သွယ်ရေး ဌာနချုပ်၏ တံခါးဝသို့ ရောက်သောအခါ လီရွှီခွင်၏ မျက်နှာအမူအရာမှာ မဲမှောင်သွား၏။

ယခု ဝူမျိုးနွယ်ကုန်သွယ်ရေး၏ တံခါးဝမှာ ပုံမှန်အတိုင်းပင် ဖြစ်နေပြီး သူ လီရွှီခွင်၏ လာရောက်ခြင်းကို လုံးဝ မျက်နှာသာမပေးကြောင်း ထင်ရှားနေသည်။

ဤသို့ တွေးမိသည်နှင့် လီရွှီခွင်၏ စိတ်ထဲတွင် ဒေါသများ ပိုမို ထွက်လာသည်။

ဝူမျိုးနွယ်ကုန်သွယ်ရေး... မင်းတို့ ငါ့ကို ခြောက်လှန့်နေတာ မဟုတ်တာ အကောင်းဆုံးပဲ... မဟုတ်ရင်တော့ ဝူမျိုးနွယ်ကုန်သွယ်ရေးတစ်ခုလုံးကို ငါ ရှင်းလင်းသုတ်သင်ပစ်မယ်။

မကြာမီမှာပင် လီရွှီခွင်၏ စိတ်အာရုံ ကျဆင်းသွားသည်နှင့် သူတော်စင်ဘုရင်အထွတ်အထိပ်အဆင့် အစောင့်အရှောက်တစ်ဦးက ဝူမျိုးနွယ်ကုန်သွယ်ရေး၏ အပေါ်သို့ ရောက်ရှိသွားပြီး သူ၏ အသံက မိုးခြိမ်းသံကဲ့သို့ ထွက်ပေါ်လာ၏။

“အရှင်မင်းကြီး ကိုယ်တိုင် ကြွရောက်လာပြီ... မင်းတို့ ဝူမျိုးနွယ်ကုန်သွယ်ရေးက အမြန်ဆုံး ထွက်ကြိုကြစမ်း...”

မူလက လီရွှီခွင်က သူ ဝူမျိုးနွယ်ကုန်သွယ်ရေးကို မျက်နှာသာအပြည့် ပေးထားပြီးပြီဟု ထင်ထားခဲ့ပြီး ဝူရူလုံကလည်း သူ့ကို မျက်နှာသာပေး၍ ထွက်ကြိုလိမ့်မည်ဟု ထင်ထားခဲ့သည်။ သို့သော် ဝူမျိုးနွယ်ကုန်သွယ်ရေးအတွင်းမှ လှုပ်ရှားမှု တစ်စုံတစ်ရာ မရှိသည်ကို တွေ့လိုက်ရ၏။

လီရွှီခွင် ဒေါသထွက်တော့မည်အကြံတွင် ဝူမျိုးနွယ်ကုန်သွယ်ရေးအတွင်းမှ ပုံရိပ်တစ်ခု ဖြည်းဖြည်းချင်း ထွက်လာပြီးနောက် ကောင်းကင်အထက်မှ လီရွှီခွင်တို့ကို မော့ကြည့်ကာ မျက်နှာပေါ်တွင် ကြောက်ရွံ့မှု တစ်စုံတစ်ရာ မရှိဘဲ ဆိုလိုက်သည်။

“အရှင်မင်းကြီး ကြွရောက်လာမှတော့ အတွင်းသို့ ကြွပါ... ဒါပေမဲ့ လူအားလုံးတော့ လိုက်ဝင်လို့ မရဘူး... အရှင်မင်းကြီးက အစောင့်အရှောက် သုံးယောက်ပဲ ခေါ်လာလို့ရမယ်...”

ထွက်လာသူမှာ ဝူမျိုးနွယ်၏ တတိယမျိုးဆက် ဝူချန်းခွင်ပင် ဖြစ်သည်။ ဝူရူလုံ၏ သတင်းကို ရရှိပြီးနောက် သူက ဝူမျိုးနွယ်ကုန်သွယ်ရေးသို့ လာရောက် ကူညီခြင်း ဖြစ်သည်။

တကယ်တော့ လီမျိုးနွယ်မင်းဆက်က သူတို့ ဝူမျိုးနွယ်ကုန်သွယ်ရေးကို ပစ်မှတ်ထားနေကြောင်း သိရှိပြီးနောက် ဝူချန်းခွင်၏ စိတ်ထဲတွင် အလွန်ပင် ထိတ်လန့်နေခဲ့သည်။ သို့သော် ဖခင်ဖြစ်သူထံမှ အဘိုးဖြစ်သူမှာ အလွန် အင်အားကြီးပြီး သေးငယ်သော လီမင်းဆက်အင်ပါယာ ကို စိုးရိမ်ရန် မလိုကြောင်း ကြားသိပြီးနောက် ဝူချန်းခွင်မှာ ရဲတင်းစွာ ထွက်လာရဲခြင်း ဖြစ်သည်။

ယခု ဝူချန်းခွင်မှာ နတ်ဝိညာဉ်ပြောင်းလဲခြင်းအထွတ်အထိပ်အဆင့်တွင်သာ ရှိသေးသောကြောင့် လီရွှီခွင်တို့နှင့် ရင်ဆိုင်ရချိန်တွင် အနည်းငယ် ကြောက်ရွံ့နေဆဲ ဖြစ်သည်။

အဘယ်ကြောင့်ဆိုသော် ကောင်းကင်အထက်မှ လီရွှီခွင်တို့ထဲမှ မည်သူမဆို နှာချေလိုက်ရုံနှင့်ပင် သူ့ကို အကြိမ်ပေါင်းမရေမတွက်နိုင်အောင် သတ်ဖြတ်နိုင်သောကြောင့် ဖြစ်သည်။

ဝူချန်းခွင် ဝင်သွားသည်ကို မြင်သောအခါ လီရွှီခွင်၏ မျက်နှာအမူအရာမှာလည်း မဲမှောင်သွားသည်။ သူကိုယ်တိုင် လာရောက်သည့်တိုင် ဝူမျိုးနွယ်ကုန်သွယ်ရေးက လုံးဝ မျက်နှာသာမပေးကြောင်း ထင်ရှားနေ၏။

“အရှင်မင်းကြီး... ဝူမျိုးနွယ်ကုန်သွယ်ရေးက ဒီလောက် အလိုက်ကန်းဆိုးမသိမှတော့ ကျွန်တော်တို့က ဘာလို့ မျက်နှာသာပေးနေတော့မှာလဲ... တိုက်ရိုက် လှုပ်ရှားလိုက်ရအောင်...”

လီရွှီခွင်နှင့်အတူ လိုက်ပါလာသော သူတော်စင်ဘုရင်အထွတ်အထိပ်အဆင့် စစ်သူကြီးတစ်ဦး၏ မျက်နှာမှာ အလွန်ပင် မဲမှောင်နေပြီး လီရွှီခွင်ရှေ့သို့ လာရောက် အကြံပြုလိုက်သည်။

သို့သော်လည်း ဝူရူလုံ၏ အပြုအမူက လီရွှီခွင်ကို ပိုမို သတိထားစေခဲ့သည်။ အကယ်၍ လုံးဝ ယုံကြည်မှု မရှိပါက ဤမျှ ရဲတင်းနေမည် မဟုတ်ချေ။

“အားလုံး... နေရာမှာပဲ စောင့်နေ... ချန်ကျယ်၊ ယွီဝန်ချန်၊ ဝမ်ဖုန်း... မင်းတို့ သုံးယောက် ငါနဲ့အတူ ဝင်လိုက်ခဲ့...”

လီရွှီခွင် ပြောလိုက်သည့် သုံးဦးမှာ သူ၏ အရင်းနှီးဆုံးလူများ ဖြစ်ကြပြီး သူတို့၏ ကျင့်ကြံမှုမှာ အထွတ်အထိပ်အဆင့်တွင် ရှိသည်။

လီရွှီခွင်၏ စကားကို ကြားသောအခါ ကျန်လူများမှာ စိတ်ထဲတွင် မကျေမနပ် ဖြစ်နေသော်လည်း အပြင်တွင်သာ စောင့်ဆိုင်းနေရုံသာ တတ်နိုင်၏။

လီရွှီခွင်မှာမူ ချန်ကျယ်တို့ သုံးဦး၏ ဝန်းရံမှုဖြင့် ဝူမျိုးနွယ်ကုန်သွယ်ရေး၏ တံခါးဝသို့ ရောက်ရှိလာပြီးနောက် ဝူမျိုးနွယ်ကုန်သွယ်ရေး၏ လမ်းညွှန်သူကို တွေ့လိုက်ရသည်။

လမ်းညွှန်သူ၏ မျက်နှာတွင် ယဉ်ကျေးသော အပြုံးတစ်ခုဖြင့် ဆို၏။

“ခင်ဗျားက အရှင်မင်းကြီး ဖြစ်မယ်ထင်တယ်... အရှင်မင်းကြီး... ကျွန်တော့်နောက်ကို လိုက်ခဲ့ပါ...”

ဆိုပြီးသည်နှင့် သူက ဝူမျိုးနွယ်ကုန်သွယ်ရေး၏ အတွင်းပိုင်းသို့ တန်းတန်းမတ်မတ် လျှောက်သွားရာ လီရွှီခွင်တို့မှာလည်း လိုက်သွားရုံသာ တတ်နိုင်၏။

မကြာမီမှာပင် လီရွှီခွင်တို့က ဝူမျိုးနွယ်ကုန်သွယ်ရေး၏ အတွင်းပိုင်းသို့ ရောက်ရှိသွားကြသည်။ ထိုနေရာတွင် ဝူရူလုံက စားပွဲတစ်လုံးအပြည့် စားသောက်ပွဲကို ပြင်ဆင်ထားပြီး လီရွှီခွင်ကို မြင်သည့်တိုင် အဓိကနေရာတွင်သာ ထိုင်နေပြီး မျက်နှာတွင် အပြုံးတစ်ခုဖြင့် ဆိုလိုက်သည်။

“ဒီတစ်ယောက်က အရှင်မင်းကြီး ဖြစ်မယ်ထင်တယ်... အရှင်မင်းကြီး... ကျေးဇူးပြုပြီး ထိုင်ပါ...”

“မင်းမှာ သတ္တိတွေ သိပ်ရှိနေပါလား... အရှင်မင်းကြီး ကိုယ်တိုင် ကြွရောက်လာတာကို မင်းက ထိုင်နေရဲသေးတယ်ပေါ့...”

ချန်ကျယ်မှာ မူလကတည်းက ဒေါသကြီးသူတစ်ယောက် ဖြစ်ပြီး ဝူရူလုံ၏ မရိုမသေပြုမှုကို မြင်သောအခါ ချက်ချင်း ဒေါသထွက်လာသည်။ သူ လှုပ်ရှားတော့မည်အကြံတွင် လီရွှီခွင်က သူ့ကို တားဆီးလိုက်၏။

“အရှင်မင်းကြီး...”

ချန်ကျယ်က နားမလည်စွာ မေးလိုက်သည်။ လီရွှီခွင်မှာမူ အသက်ကို ပြင်းပြင်းရှူ၍ ဝူရူလုံကို ကြည့်လိုက်သော သူ့မျက်ဝန်းများထဲတွင် နက်ရှိုင်းမှုများ ပြည့်နှက်နေ၏။

သူ့ရှေ့မှ ဝူရူလုံမှာ ကပ်ဘေးဖြတ်ကျော်ခြင်းအထွတ်အထိပ်အဆင့်တွင်သာ ရှိသော်လည်း သူ့ကိုယ်ပေါ်တွင် ခြိမ်းခြောက်မှု အငွေ့အသက် အနည်းငယ်ကို ခံစားနေရသည်ဟု သူ ခံစားမိသည်။ ထိုခြိမ်းခြောက်မှု အငွေ့အသက်ကပင် လီရွှီခွင်ကို ဝူရူလုံမှာ သာမန်လူတစ်ယောက် မဟုတ်ကြောင်း ပြောပြနေ၏။