အခန်း (၁၁၈၅-၁၁၈၆)

အခန်း (၁၁၈၅) ဒီအလေးချိန်က လောက်ရဲ့လား

မျက်တောင်တစ်ခတ်အတွင်းမှာပဲ ဖန့်ချန်ဟာ အဆင့် ၁ ဓားကျင့်ကြံသူ အများအပြားရဲ့ ဝိုင်းရံခြင်းကို ခံလိုက်ရပြီး အေးစိမ့်လှတဲ့ ဓားဆန္ဒတွေက ပတ်ဝန်းကျင်တစ်ခုလုံးမှာ ဖုံးလွှမ်းသွားပါတယ်။

ဒီအဆင့် ၁ ဓားကျင့်ကြံသူတွေထဲမှာ အနည်းဆုံး တစ်ယောက်ကတော့ ဓားနယ်ပယ် ကို နားလည်သဘောပေါက်ထားပြီး သူ့ရဲ့ အရှိန်အဝါက တခြားသူတွေထက် သိသိသာသာ ထူးကဲနေပါတယ်။

"လာတဲ့သူက ဧည့်သည်ပဲ၊ မင်းတို့ ဘာလုပ်နေကြတာလဲ ဆုတ်ခွာကြစမ်း"

အဆင့် ၂ ဓားကျင့်ကြံသူတစ်ယောက်မှ ထွက်မလာဘဲ ကြိုဆိုဖို့ ထွက်လာသူကတော့ လီဝူဝမ့် ပါပဲ။

သူ့ရဲ့စကားက ကောင်းကင်ဓားဌာနထဲမှာတော့ ပယ်ဖျက်လို့မရတဲ့ အမိန့်တော်ပါပဲ။

အနီးအနားက အဆင့် ၁ ဓားကျင့်ကြံသူတွေဟာ တစ်ဖက်ကို ဆုတ်ခွာသွားကြပေမဲ့ သူတို့ရဲ့ မျက်လုံးတွေကတော့ သတိကြီးစွာ ရှိနေဆဲဖြစ်သလို မျက်လုံးအိမ်ထဲမှာလည်း သံသယအရိပ်အယောင်တွေ ရှိနေပါတယ်။

ဒီလူက ဒီနေရာကို ဘယ်လိုရှာတွေ့တာလဲ

ကောင်းကင်ဓားဌာနမှာ နေရာအနှံ့အပြားမှာ ဌာနခွဲတွေ ရှိနေတာကြောင့် လူတွေက အဲဒီနေရာတွေကိုပဲ ဌာနချုပ်လို့ ထင်နေကြတာပါ။

ဒါတွေက လှည့်စားထားတာသက်သက်ပဲ ဖြစ်ပြီး၊ ကောင်းကင်ဓားဌာနရဲ့ တကယ့်အခြေစိုက်စခန်းက ဒီလိုမျိုး ဝိညာဉ်စွမ်းအင် ခေါင်းပါးတဲ့နေရာမှာ ရှိနေလိမ့်မယ်လို့ ဘယ်သူမှ ထင်မှာမဟုတ်ပါဘူး။

"လီမိတ်ဆွေ... ခင်ဗျားတို့ ကောင်းကင်ဓားဌာန တည်နေရာက တကယ်ကို ဝေးလံခေါင်သီတာပဲ ကျုပ် ဒီအထိ လာခဲ့ရတာ အချိန်နဲ့ အင်အား တော်တော်ကုန်သွားတယ်"

ဖန့်ချန်က လီဝူဝမ့်ကို နှုတ်ဆက်လိုက်ပါတယ်။

"စကားအပိုတွေ ပြောမနေနဲ့တော့ ကျုပ် လက်ဖက်ရည် တိုက်ပါ့မယ် ဝင်ခဲ့ပါ"

လီဝူဝမ့်က တည်ငြိမ်စွာ ပြောပါတယ်။

အနီးအနားက ဓားကျင့်ကြံသူတွေဟာ ဖန့်ချန်ကို မျက်တောင်မခတ်တမ်း ကြည့်နေကြပြီး သူတို့ရဲ့ သတိထားတဲ့ အကြည့်တွေထဲမှာ ခနဲ့တဲ့တဲ့ အရိပ်အယောင်လေးတွေလည်း ပါနေပါတယ်။

သူ ဝင်ရဲပါ့မလား

ရလဒ်ကတော့ သူတို့ သေချာမစဉ်းစားရသေးခင်မှာပဲ ဖန့်ချန်ဟာ ဓားအလင်းတန်းတစ်ခုအဖြစ် ပြောင်းလဲသွားပြီး လီဝူဝမ့်ရဲ့ ဘေးနားမှာ ပေါ်လာကာ၊ သူနဲ့အတူ ပုခုံးချင်းယှဉ်ပြီး ကောင်းကင်ဓားဌာန အတွင်းထဲကို လျှောက်လှမ်းသွားပါတော့တယ်။

"တကယ်ကို သတ္တိကောင်းတာပဲ အပြင်မှာဆိုရင် သူ့ကို ကိုင်တွယ်ဖို့ ခက်ကောင်းခက်လိမ့်မယ်၊ ဒါပေမဲ့ ဒီနေရာက ကျုပ်တို့နယ်မြေပဲ"

"မှန်တယ်၊ ဂိုဏ်းချုပ်ကသာ သူ့ကို ဖမ်းဖို့ ဆုံးဖြတ်လိုက်ရင် ဒီနေ့ သူ လုံးဝ ထွက်ပြေးနိုင်မှာ မဟုတ်ဘူး"

အနီးအနားက အဆင့် ၁ ဓားကျင့်ကြံသူတွေဟာ တစ်ယောက်ကိုတစ်ယောက် ကြည့်လိုက်ကြပြီး အနောက်ကနေ အမြန်လိုက်သွားကြပါတယ်။

ကောင်းကင်ဓားဌာနရဲ့ အတွင်းပိုင်းက ဖန့်ချန် ထင်ထားတာထက် ပိုပြီး ရိုးရှင်းလှပါတယ်။

သူ့လက်အောက်က လူတွေဆီကနေ အကြိမ်ကြိမ် ကြားဖူးထားပေမဲ့ ကိုယ်တိုင်မြင်ရတဲ့ ခံစားချက်ကတော့ မတူပါဘူး။

လက်ဖက်ရည်ပဲ ဖြစ်ဖြစ်၊ ဝိညာဉ်သစ်သီးပဲ ဖြစ်ဖြစ် အားလုံးက အရမ်းကို သာမန်ပါပဲ။

ဒါဟာ လီဝူဝမ့်က တမင်တကာ လုပ်ထားတာ မဟုတ်ဘဲ ဒီနေရာက လူတွေက ဒီလိုအရာတွေကို တကယ်ပဲ အလေးမထားကြလို့ပါပဲ။

"ကျုပ်ဆီက တခြားနေရာတွေလို ခမ်းခမ်းနားနား ဧည့်ခံဖို့ မရှိဘူး ပြောစမ်းပါဦး... မင်း ဒီတစ်ခေါက် လာတာ ဘာလုပ်ဖို့လဲ"

လီဝူဝမ့်က တည်ငြိမ်စွာ မေးပါတယ်။

"ခင်ဗျားတို့ ကောင်းကင်ဓားဌာနရဲ့ ဒု-ဌာနချုပ်မှူးရော ကျုပ် ဒီအဆင့် ၃ ဓားကျင့်ကြံသူကို တစ်ခါမှ မတွေ့ဖူးသေးဘူး။ သူ့ကိုပါ ခေါ်ပြီး အတူတူ စကားပြောရင် မကောင်းဘူးလား "

ဖန့်ချန်က ပတ်ဝန်းကျင်ကို တစ်ချက်ကြည့်ပြီး မေးလိုက်ပါတယ်။

သူဟာ ဒီအဆင့် ၃ ကျင့်ကြံသူကို တကယ်ပဲ မတွေ့ဖူးသလို ယင်လောကက နေ့ကင်းလှည့်သူ၊ ညကင်းလှည့်သူတွေတောင် ရှာမတွေ့ခဲ့ပါဘူး။

"မင်း သူ့ကို တွေ့ရမှာ မဟုတ်ဘူး"

လီဝူဝမ့်က ပြုံးလိုက်ပြီး

"ကောင်းကင်ဓားဌာနက ကြက်ဥအားလုံးကို ခြင်းတောင်းတစ်လုံးထဲ ထည့်မထားပါဘူး ကျုပ်တို့ နှစ်ပေါင်းများစွာ ကြိုးစားလာခဲ့တာတွေ တစ်ခဏချင်းမှာ ရေစုန်မျောသွားမှာကို ကြောက်လို့ပါ"

"အော်... အဲဒီလိုလား..."

ဖန့်ချန်က ခေါင်းညိတ်လိုက်ပြီး

"နားလည်ပါတယ် ခင်ဗျားတို့ ကောင်းကင်ဓားဌာနက ဝိညာဥ်နတ်ဘုရားဂိုဏ်း နဲ့ ပူးပေါင်းတာဟာ ဓားကျင့်ကြံသူတွေ ဒီလောကမှာ ပိုပြီး သိက္ခာရှိရှိ ရှင်သန်နိုင်ဖို့ မျှော်လင့်ချက်နဲ့ မဟုတ်လား"

လီဝူဝမ့်က ဘာမှမပြောဘဲ ဖန့်ချန်ကို တည်ငြိမ်စွာ ကြည့်နေပါတယ်။

"ဒါပေမဲ့ ခင်ဗျားတို့ လမ်းမှားသွားပြီ ဝိညာဥ်နတ်ဘုရားဂိုဏ်းနဲ့ ပူးပေါင်းတာက ခင်ဗျားတို့ ဓားကျင့်ကြံသူတွေကို ပိုပြီး သိက္ခာရှိစေမှာ မဟုတ်ဘူးခင်ဗျားတို့ဟာ ဒီနယ်မြေက မျိုးနွယ်ကြီးတွေ၊ ဂိုဏ်းကြီးတွေရဲ့ ချုပ်ကိုင်မှုကနေ လွတ်မြောက်သွားနိုင်ပေမဲ့ ဝိညာဥ်နတ်ဘုရားဂိုဏ်းရဲ့ ခိုင်းဖတ်ပဲ ဆက်ဖြစ်နေမှာပဲ"

"သူတို့က ခိုင်းရင် ခင်ဗျားတို့ လူသတ်ရမယ် ဘာအကြောင်းကြောင့်ပဲဖြစ်ဖြစ်၊ သတ်ပြီးရင် ဘာတွေဖြစ်လာမလဲဆိုတာကိုလည်း ခင်ဗျားတို့ ဂရုစိုက်လို့မရဘူး"

"သူတို့မျက်လုံးထဲမှာ ခင်ဗျားတို့ဟာ ခံစားချက်မရှိတဲ့ ဓားတွေပဲ၊ လူသတ်ဖို့ပဲ သုံးတာ "

ဖန့်ချန်က ပြုံးပြီး ပြောလိုက်တယ်

"ဒါက သိက္ခာရှိရှိ ရှင်သန်တာလား "

အနီးအနားမှာ ရပ်နေတဲ့ အဆင့် ၁ ဓားကျင့်ကြံသူ အများအပြားဟာ ဖန့်ချန်ရဲ့ စကားကို ကြားတဲ့အခါ မျက်လုံးထဲမှာ ဒေါသရိပ်တွေ ထွက်လာပါတယ်။

တစ်ဖက်လူက သူတို့ နှစ်ပေါင်းများစွာ လျှောက်လှမ်းလာခဲ့တဲ့ လမ်းစဉ်ကို စော်ကားနေတာဟာ လုံးဝ သည်းမခံနိုင်စရာပါပဲ။

တစ်ယောက်က ချက်ချင်းပဲ အော်ပြောလိုက်တယ်

"စကားပြောရတာ လွယ်တာပေါ့ မင်း ဒီလို အလကားစကားတွေ မပြောခင်မှာ ကျုပ်တို့ ခံစားခဲ့ရတဲ့ အခြေအနေမျိုးကို ကြုံဖူးလို့လား"

"ဓားတိုက်ခိုက်ရေးနန်းတော် တွေ ဘာလို့ ချောင်ဖုန်း၊ လုံယွမ်၊ မင်ဟု၊ စစ်ဝေ စတဲ့ နေရာတွေမှာ ခေတ်စားနေရတာလဲ မင်းသိလား"

"ဘာလို့လဲဆိုတော့ လူတိုင်းက ကျုပ်တို့ ဓားကျင့်ကြံသူတွေကို အလားအလာမရှိတဲ့ လူရမ်းကားတွေလို့ သတ်မှတ်ကြလို့ပဲ ဓားကျင့်ကြံသူတွေက သက်တမ်းတိုတယ်၊ ဘယ်သူမှ အဆင့် ၂ မရောက်နိုင်ဘူး၊ အဆင့် ၃ မရောက်နိုင်ဘူးလို့ သူတို့ ထင်ထားကြတာ"

"ဒါကြောင့် သူတို့က ကျုပ်တို့ကို လက်လွတ်စပယ် လုပ်ရဲကြတာ၊ လက်စားချေမှာကို မကြောက်ကြလို့ပဲဒါပေမဲ့ ဝိညာဥ်နတ်ဘုရားဂိုဏ်းက ကျုပ်တို့ကို အဆင့်တက်ဖို့ အခွင့်အရေး ပေးခဲ့တယ် အခု ချောင်ဖုန်းနယ်မြေမှာ ကောင်းကင်ဓားဌာနကို ဘယ်သူ ရန်စရဲသေးလဲ"

"လုံမျိုးနွယ် ပြုတ်သွားပြီ၊ စုန့်မျိုးနွယ် ပြုတ်သွားပြီချီမျိုးနွယ်နဲ့ တုမျိုးနွယ် မပြုတ်သေးတာကလည်း သူတို့ထဲမှာ ဝိညာဥ်နတ်ဘုရားဂိုဏ်းကို ခိုလှုံတဲ့သူ ရှိနေလို့ပဲ"

"မှန်တယ် အခု ကျုပ်တို့ ကောင်းကင်ဓားဌာနက ဘယ်သူ့ကို ချချင်ချင် ချလို့ရတယ် ကျိုးရှင်းတောင်တန်း သန့်စင်ရာနယ်မြေကို သွားတိုက်မယ်ဆိုရင်တောင် သူတို့ ကြောက်လန့်ပြီး ထွက်ပြေးကြမှာပဲ "

"ဒါတွေအားလုံးက ဝိညာဥ်နတ်ဘုရားဂိုဏ်း ဝင်မလာခင်တုန်းက မဖြစ်နိုင်ခဲ့တဲ့ အရာတွေပဲ"

"ဝိညာဥ်နတ်ဘုရားဂိုဏ်း မရှိရင် ကောင်းကင်ဓားဌာနရဲ့ ဒီနေ့ဆိုတာ ရှိလာမှာမဟုတ်ဘူး မင်း ဒီနေ့ လာပြီးတော့ ကျုပ်တို့နဲ့ ဝိညာဥ်နတ်ဘုရားဂိုဏ်းကို သွေးခွဲဖို့ ကြိုးစားနေတာဆိုရင်တော့ အစောကြီးသာ ပြန်လိုက်ပါတော့"

"ဂိုဏ်းချုပ်ကလည်း သဘောတူမှာ မဟုတ်သလို ကျုပ်တို့ကလည်း လုံးဝ သဘောမတူဘူး"

"ခင်ဗျားတို့ရဲ့ ရပ်တည်ချက်အရဆိုရင် ဝိညာဥ်နတ်ဘုရားဂိုဏ်းက ခင်ဗျားတို့အပေါ် ကျေးဇူးရှိတာပေါ့"

ဖန့်ချန်က စဉ်းစားရင်း ပြောလိုက်ပါတယ်။

လူတိုင်းက ပြန်မဖြေကြပေမဲ့ သူတို့မျက်လုံးထဲက ခနဲ့တဲ့တဲ့ အကြည့်တွေနဲ့ လှောင်ပြုံးတွေက အဲဒီအချက်ကို သက်သေပြနေပါတယ်။

"မင်း ဒီနေ့ လာတာ အလကား ဖြစ်သွားလိမ့်မယ် ထင်တယ်"

လီဝူဝမ့်က ပြုံးလိုက်ပြီး

"ဒီနေ့ ကျုပ် မင်းကို ဘာမှမလုပ်ပါဘူး၊ ဒါပေမဲ့ နောက်တစ်ခါ ပြန်ဆုံရင်တော့ ကျုပ်တို့ အရှုံးအနိုင် ဆုံးဖြတ်ရလိမ့်မယ်"

"စုန့်ကျစ်လီ တစ်ခုခု ဖြစ်သွားပြီ"

ဖန့်ချန်က တည်တည်ငြိမ်ငြိမ်ပဲ ပြောလိုက်ပါတယ်။

ဒီစကားကို ကြားလိုက်ရတဲ့အခါ လူတိုင်းရဲ့ အမူအရာ ပျက်သွားပါတယ်။

လီဝူဝမ့်ကတော့ တော်တော်လေး တည်ငြိမ်နေဆဲပါပဲ၊ သူက လက်ဖက်ရည်ခွက်ကို မော့သောက်လိုက်ပြီး အေးအေးဆေးဆေး မေးတယ်

"သူက ဘာဖြစ်နိုင်မှာမို့လို့လဲ "

"သူ ဟန်ရွှေမသေမျိုးမီးတောက် ကို ပျောက်ဆုံးသွားစေခဲ့တယ် အခု ဝိညာဥ်နတ်ဘုရားဂိုဏ်းရဲ့ စည်းကမ်းထိန်းသိမ်းရေး ကျင့်ကြံသူတွေက သူ့ကို စစ်ဆေးဖို့ ဖမ်းသွားပြီ ကျုပ်ထင်တာကတော့ မကြာခင်မှာ ဒီနေရာက ဝိညာဥ်နတ်ဘုရားဂိုဏ်း ကိစ္စတွေကို လာပြီး ကိုင်တွယ်မယ့်သူ အသစ် ရောက်လာတော့မယ်"

ဖန့်ချန်က ဆိုပါတယ်။

"မင်းပြောတာ အမှန်ပဲထားဦး၊ ကျုပ်တို့နဲ့ ဘာဆိုင်လို့လဲ ကျုပ်တို့က ဝိညာဥ်နတ်ဘုရားဂိုဏ်းနဲ့ ပူးပေါင်းလာတာ နှစ်ပေါင်းများစွာ ရှိပြီ အသစ်လာတဲ့လူကလည်း ကျုပ်တို့ကို အသုံးချမှာပဲလေ"

လီဝူဝမ့်က ပြုံးပြီး ခေါင်းခါလိုက်ပါတယ်။

"မဟုတ်ဘူး၊ အသစ်လာမယ့်လူက ခင်ဗျားတို့ ကောင်းကင်ဓားဌာနကို အသုံးမပြုရုံတင်မကဘဲ ခင်ဗျားတို့ကိုပါ နှိပ်ကွပ်လိမ့်မယ် နောက်ဆို ခင်ဗျားတို့ ကောင်းကင်ဓားဌာနက သွေးဝိညာဉ်ဆေးတောင်တစ်လုံးတောင် ရမှာမဟုတ်တော့ဘူး"

ဖန့်ချန်က ပြုံးပြီး ပြောလိုက်ပါတယ်။

ခန်းမထဲက လေထုက ရုတ်တရက် အေးစိမ့်သွားပါတယ်။

သူတို့က ဒီလူဟာ လျှောက်ပြောနေတာလို့ မသိစိတ်က ထင်နေပေမဲ့ ဖန့်ချန်ရဲ့ မျက်နှာပေါ်က ယုံကြည်မှုအပြည့်ရှိတဲ့ အပြုံးကို မြင်တဲ့အခါ သူတို့ရဲ့ စိတ်ထဲမှာ သံသယတွေ ဝင်လာပါတယ်။

"လီမိတ်ဆွေ ခင်ဗျားတို့က ဓားကျင့်ကြံသူတွေ ဒီနယ်မြေမှာ ခြေကုပ်ယူနိုင်ဖို့ပဲ လိုချင်တာ ဒါပေမဲ့... ခင်ဗျားမှာ အဆင့် ၄ ကို တက်လှမ်းဖို့ အခွင့်အရေးတောင် မရှိဘူး"

"နောင်တစ်ချိန်မှာ ခင်ဗျားနဲ့ ဟိုတစ်ယောက် သေဆုံးသွားခဲ့ရင်၊ ဒီနေရာမှာ အဆင့် ၂ ဓားကျင့်ကြံသူ အနည်းငယ်ပဲ ကျန်တော့မယ် သူတို့ပါ ထပ်သေသွားရင် ဘယ်လို အခြေအနေမျိုး ဖြစ်လာမလဲ"

ဖန့်ချန်က ပြုံးပြီး ခေါင်းခါလိုက်တယ်

"ကျုပ်ကြည့်ရသလောက်တော့ နှစ်အနည်းငယ်အတွင်းမှာပဲ ခင်ဗျားတို့ရဲ့ ကြိုးစားမှုတွေ အားလုံး အလကား ဖြစ်သွားလိမ့်မယ် နေရာအနှံ့က ဓားတိုက်ခိုက်ရေးနန်းတော် တွေလည်း ပြန်ပွင့်လာလိမ့်မယ်"

"ခင်ဗျားတို့ လမ်းမှားနေတယ်လို့ ကျုပ် မပြောပါဘူး ဒါပေမဲ့ ခင်ဗျားတို့ နောက်ထပ် လုပ်မယ့် ရွေးချယ်မှုဟာ ခင်ဗျားတို့ရဲ့ အနာဂတ်အတွက် အရမ်း အရေးကြီးလိမ့်မယ်လို့ပဲ ကျုပ် ပြောချင်တာ"

"ဂိုဏ်းချုပ်က ပါရမီရှင်ပဲ၊ အဆင့် ၄ ကို တက်လှမ်းဖို့ဆိုတာ အချိန်စောင့်ဖို့ပဲ လိုတာ မင်း ထပ်ပြီး လျှောက်ပြောနေဦးမယ်ဆိုရင်တော့ ကျုပ်တို့ မယဉ်ကျေးတော့ဘူးနော်"

ဓားကျင့်ကြံသူတစ်ယောက်က ပြင်းပြင်းထန်ထန် အော်ဟစ်လိုက်ပါတယ်။

"ကြည့်ရတာ သူတို့ မသိကြသေးဘူးပဲ "

ဖန့်ချန်က မျက်မှောင်ကြုတ်လိုက်ပြီး

"လူ့လောက ၉ နယ်မြေမှာ အဆင့် ၄ ဓားကျင့်ကြံသူ ဆိုတာ မရှိဖူးဘူး ဘာလို့လဲဆိုတော့ အဆင့် ၄ ဓားကျင့်ကြံသူ ဖြစ်မယ့် လမ်းစဉ် က အစောကြီးကတည်းက ပြတ်တောက်သွားခဲ့လို့ပဲ"

လမ်းစဉ်က အစောကြီးကတည်းက ပြတ်တောက်သွားခဲ့ပြီ

လူ့လောက ၉ နယ်မြေမှာ အဆင့် ၄ ဓားကျင့်ကြံသူ မရှိဖူးဘူး

သူ့လက်အောက်က လူတွေ တစ်ယောက်ပြီးတစ်ယောက် ကြောင်အသွားတာကို မြင်တော့ လီဝူဝမ့်က မျက်မှောင်ကြုတ်ပြီး ပြောလိုက်တယ်

"မင်းတို့ အရင် ထွက်သွားကြဦး"

"ဂိုဏ်းချုပ်... ဟုတ်ကဲ့"

သူတို့တွေဟာ ခန်းမထဲကနေ မကျေမနပ်နဲ့ ထွက်သွားကြပေမဲ့ စိတ်ထဲမှာတော့ ဖန့်ချန် ခုနက ပြောသွားတဲ့ စကားတွေကိုပဲ ထပ်ခါတလဲလဲ စဉ်းစားနေကြပါတယ်။

"ကျုပ်လည်း ကြားဖူးပါတယ်၊ ဓားကျင့်ကြံသူတွေ အဆင့် ၃ ပြီးရင် ရှေ့ဆက်စရာ လမ်းမရှိတော့ဘူးဆိုတာ ကျုပ်တို့ရဲ့ လမ်းစဉ်က ထူးခြားတယ်၊ သာမန် လွတ်လပ်သောမသေမျိုး လမ်းစဉ်အတိုင်း သွားမယ်ဆိုရင်တောင် နတ်ဆေးပင်တွေက ကျုပ်တို့အတွက် အသုံးမဝင်ဘူး"

လီဝူဝမ့်က ပြုံးလိုက်ပြီး

"ဒီလိုဆိုမှတော့ ကျုပ်က ဝိညာဥ်နတ်ဘုရားဂိုဏ်းနဲ့ လမ်းခွဲပြီး မင်းနဲ့ ပူးပေါင်းဖို့ အကြောင်းပြချက် ပိုမရှိတော့ဘူးပေါ့ မင်းက လုံလောက်တဲ့ အကျိုးကျေးဇူး မပေးနိုင်သရွေ့ပေါ့"

"ဓားကျင့်ကြံသူတွေအတွက် အဆင့် ၄ တက်လှမ်းမယ့် လမ်းစဉ်... ဒီအလေးချိန်က လောက်ရဲ့လား "

ဖန့်ချန်က တည်ငြိမ်စွာ မေးလိုက်ပါတယ်။

အခန်း (၁၁၈၆) ဝိညာဉ်သုတ်သင်ရေးဌာန ကျင့်ကြံသူ၊ ကျောက်ယွင်လူ အမိန့်နာခံလျက်

"ဓားကျင့်ကြံသူတွေရဲ့ အဆင့် ၄ လမ်းစဉ် ဟုတ်လား"

လီဝူဝမ့်က ကြည့်ရတာ တည်ငြိမ်နေပေမဲ့ သူ့လက်ထဲမှာ ကြေမွသွားတဲ့ လက်ဖက်ရည်ခွက်ကတော့ သူ့ရဲ့ စိတ်လှုပ်ရှားမှုကို သက်သေပြနေပါတယ်။

"မင်း ငါ့ကို လိမ်နေတာပဲ"

လီဝူဝမ့်ရဲ့ မျက်လုံးတွေက အေးစက်သွားတယ်

"ဟိုလူအိုကြီးတောင်မှ ဓားကျင့်ကြံသူရဲ့ အဆင့် ၄ လမ်းစဉ်ကို မသိခဲ့ဘူး၊ မင်းက ဘာမို့လို့ သိရမှာလဲ"

"ယွမ်ဟယ် ဆရာသခင်မှာ နာမည်ရှိပါတယ်၊ ခင်ဗျားက သူ့ကို လူအိုကြီးလို့ ထပ်ခေါ်နေဦးမယ်ဆိုရင်တော့ ဒီက ဓားကျင့်ကြံသူတွေ သိက္ခာရှိရှိ ရှင်သန်နိုင်မလားဆိုတာ ကျုပ် ဂရုမစိုက်တော့ဘူး"

"နောက်ဆိုရင် ဝိညာဉ်သုတ်သင်ရေးဌာနက ဝိညာဥ်နတ်ဘုရားဂိုဏ်းကို မတိုက်တော့ဘူး၊ ခင်ဗျားတို့ ကောင်းကင်ဓားဌာနကိုပဲ တိုက်တော့မယ်။"

ဖန့်ချန်က လက်ဖက်ရည်ခွက်ကို ချလိုက်ပြီး

"သုံးနှစ်အတွင်းမှာ ခင်ဗျားတို့ကို မူလအခြေအနေအတိုင်း ပြန်ရောက်သွားအောင် လုပ်ပစ်နိုင်တယ်"

လီဝူဝမ့် တိတ်ဆိတ်သွားပါတယ်။ ခဏကြာမှ သူက ခပ်ပြုံးပြုံးနဲ့

"ကောင်းပြီ... ကျုပ် သူ့ကို စီနီယာ ယွမ်ဟယ် လို့ပဲ ခေါ်ပါ့မယ် သူက ထူးခြားသူ တစ်ယောက်အနေနဲ့ လူ့လောက ၉ နယ်မြေမှာ နှစ်ပေါင်းများစွာ နေထိုင်ခဲ့ပြီး နေရာအနှံ့ ရောက်ခဲ့တာတောင် ဓားကျင့်ကြံသူရဲ့ အဆင့် ၄ လမ်းစဉ်ကို မသိခဲ့ဘူး မင်းက ဘာလို့ သိနေတာလဲ "

"ခင်ဗျား အစောကြီးကတည်းက ရိပ်မိသင့်တာပါ"

ဖန့်ချန်က အနည်းငယ် စိတ်ပျက်သလိုနဲ့

"အဲဒီတုန်းက ခင်ဗျားကို ကျုပ် ခုတ်ခဲ့တဲ့ ဓားချက်က အဆင့် ၃ ဓားကျင့်ကြံသူတစ်ယောက် တီထွင်နိုင်တဲ့ အရာမျိုးလား "

"..."

လီဝူဝမ့်က ဘာမှမပြောဘဲ သူ့ဘာသာ လက်ဖက်ရည်ခွက်အသစ်တစ်ခု ယူလိုက်ပြီး လက်ဖက်ရည်ထည့်ကာ တစ်ကျိုက်တည်း မော့သောက်လိုက်ပါတယ်။

ပြီးတော့ ထပ်ထည့်တယ်၊ ထပ်သောက်တယ်။

သုံးခွက်ဆက်တိုက် သောက်ပြီးနောက်မှာတော့ သူက တိုးတိုးလေး ပြောတယ်

"လူ့လောက ၉ နယ်မြေမှာ တကယ့် ဓားမသေမျိုးတွေ ရှိခဲ့ဖူးတယ်ဆိုတာ ကျုပ်သိပါတယ် ဒါက ငြင်းလို့မရတဲ့ အမှန်တရားပဲ ဓားကျင့်ကြံသူတွေရဲ့ နောက်ဆက်တွဲ လမ်းစဉ်က အမွေအနှစ် ပြတ်တောက်သွားခဲ့တာ"

"စုန့်ကျစ်လီ ရဲ့ နောက်ကွယ်မှာ ဝိညာဥ်နတ်ဘုရားဂိုဏ်း ရှိတယ် ဝိညာဥ်နတ်ဘုရားဂိုဏ်းသားတွေက လူ့လောက ၉ နယ်မြေအနှံ့မှာ ရှိနေတာတောင် အဆင့် ၄ လမ်းစဉ်ကို ရှာမတွေ့ခဲ့သလို အဆင့် ၄ ဓားကျင့်ကြံသူကိုတောင် မမြင်ဖူးကြဘူး မင်းဆီမှာ အဆင့် ၄ လမ်းစဉ် ရှိတယ်ဆိုတာကို ကျုပ်က ဘာလို့ ယုံရမှာလဲ "

"ခင်ဗျားမှာ ရွေးချယ်စရာ ရှိလို့လား ကျုပ်ပြောပြီးပြီလေ... ဒီက ဝိညာဥ်နတ်ဘုရားဂိုဏ်းက ခင်ဗျားတို့နဲ့ ဆက်ပြီး ပူးပေါင်းမှာ မဟုတ်တော့ဘူး ခင်ဗျားတို့ ပူးပေါင်းလို့ရမယ့်လူက ကျုပ်တစ်ယောက်ပဲ ရှိတော့တယ် "

ဖန့်ချန်က တည်ငြိမ်စွာ ဆိုပါတယ်

"ကျုပ်သာ ဓားကျင့်ကြံသူလမ်းစဉ်ကို မလျှောက်ခဲ့ဘူးဆိုရင် ဒီနေ့ ခင်ဗျားနဲ့ ထိုင်ပြီး စကားပြောနေမှာ မဟုတ်ဘူး ဒီနေရာကို တိုက်ရိုက် အမှုန့်လုပ်ပြီး ခင်ဗျားတို့ကို ဝိညာဥ်နတ်ဘုရားဂိုဏ်းသားတွေလိုပဲ တစ်ယောက်ပြီးတစ်ယောက် သတ်ပစ်မှာ"

"ခဏစောင့်ဦး"

လီဝူဝမ့်က သတင်းပို့အဆောင်လက်ဖွဲ့တစ်ခုကို ထုတ်လိုက်ပြီး တစ်စုံတစ်ယောက်ကို ဆက်သွယ်လိုက်ပုံရပါတယ်။

တော်တော်ကြာ စောင့်လိုက်ပေမဲ့ အဆောင်လက်ဖွဲ့က မှိန်ဖျော့နေဆဲဖြစ်ပြီး ဘာတုံ့ပြန်မှုမှ မရှိပါဘူး။

သူက အဆောင်လက်ဖွဲ့ကို ပြန်သိမ်းလိုက်ပြီး ဖန့်ချန်ကို ကြည့်ကာ

"ကျုပ်တို့ ကောင်းကင်ဓားဌာနက ဘာလုပ်ပေးရမလဲ "

"ဒီမှာ စာရင်းတစ်ခု ရှိတယ် အဲဒီထဲကလူတွေက တချို့ လုံယွမ် မှာ၊ တချို့ စစ်ဝေ မှာ၊ တချို့ မင်ဟု မှာ ရှိကြတယ် "

ဖန့်ချန်က စာရင်းတစ်ခုကို လီဝူဝမ့်ဆီ ကမ်းပေးလိုက်တယ်

"သူတို့ကို ရှင်းပစ်လိုက်ပါ ဒါတွေအားလုံး ပြီးသွားရင် ကျုပ်တို့က မိတ်ဖက်တွေ ဖြစ်သွားပြီ ကျုပ် ခင်ဗျားကို အဆင့် ၄ ဓားကျင့်ကြံသူ လမ်းစဉ် ပေးမယ် ဒီလမ်းစဉ်က ဘာကို ဆိုလိုလဲဆိုတာ ခင်ဗျား သိမှာပါ"

"အမွေအနှစ်ကို ဆိုလိုတာပေါ့..."

လီဝူဝမ့်က စာရင်းကို ကြည့်ရင်း မျက်လုံးတွေက လှုပ်ရှားနေပါတယ်။

ဒီလမ်းစဉ်က ဘာကို ဆိုလိုလဲဆိုတာ သူ ကောင်းကောင်းသိပါတယ်။

တကယ်လို့ အဲဒါသာ တကယ်ရှိခဲ့ရင် ဓားကျင့်ကြံသူတွေအတွက်တော့ ဒါဟာ မကြုံစဖူး ထူးခြားတဲ့ ပြောင်းလဲမှုကြီး ဖြစ်လာမှာပါ။

ဝိညာဥ်နတ်ဘုရားဂိုဏ်းဆီက ရတဲ့ အကျိုးကျေးဇူးတွေက ဒါနဲ့ယှဉ်ရင် ဘာမှမဟုတ်တော့ပါဘူး။

"ကျုပ်ကိုတော့ မလိမ်နဲ့နော်... ဒီကိစ္စအတွက်ဆိုရင် ကျုပ် သေရမှာကို မကြောက်ဘူးဆိုတာ မင်းသိတယ်မဟုတ်လား"

လီဝူဝမ့်က ဖန့်ချန်ကို ကြည့်ပြီး ပြုံးကာ စာရင်းကို သိမ်းလိုက်တယ်

"ခြောက်လအတွင်းမှာ သူတို့အားလုံး သေသွားတာကို မင်း မြင်ရလိမ့်မယ်"

ဖန့်ချန်က နှုတ်ဆက်ပြီး ထွက်ခွာလာခဲ့ပါတယ်။

တစ်ချိန်တည်းမှာပဲ ဘေးနားက တုယွန်းရွှီ ကို စာရင်းထဲကလူတွေကို သေချာစောင့်ကြည့်ဖို့ မှာကြားလိုက်ပါတယ်။

တကယ်လို့ သူတို့ သတင်းရပြီး ထွက်ပြေးဖို့ ကြိုးစားရင်လည်း မလှုပ်ရှားဘဲ နောက်ကနေပဲ လိုက်သွားဖို့ ပြောလိုက်ပါတယ်။

ကောင်းကင်ဓားဌာနကနေ ထွက်လာပြီးနောက် ဖန့်ချန်ဟာ တန့်ယင်တောင်တန်း ဂိုဏ်းချုပ် ရဲ့ ပုခုံးပေါ်မှာ ရပ်နေပြီး၊ ဂိုဏ်းချုပ်က ခြေတစ်လှမ်း လှမ်းလိုက်တာနဲ့ မိုင်တစ်ထောင်ဝေးတဲ့ နေရာကို ရောက်သွားပါတော့တယ်။

...

ရက်အနည်းငယ် ကြာပြီးနောက် ဟွမ်ချင်းကျွဲ ပေးထားတဲ့ စာရင်းအရ ဖန့်ချန်ဟာ ဖန်တီးရှင်ဂြိုဟ်ပေါ်မှာ ရှိနေတဲ့ လွတ်လပ်သောမသေမျိုးအဆင့် ဝိညာဉ်သုတ်သင်ရေးဌာန ကျင့်ကြံသူ ၆ ယောက်ထဲက တစ်ယောက်ကို ရှာတွေ့ခဲ့ပါတယ်။

ဖန်တီးရှင်ဂြိုဟ်ရဲ့ ဝိညာဉ်သုတ်သင်ရေးဌာန ဌာနမှူးဟောင်း ထွက်သွားပြီးနောက်မှာ အဆင့် ၂ လွတ်လပ်သောမသေမျိုး ၂ ယောက်နဲ့ အဆင့် ၁ လွတ်လပ်သောမသေမျိုး ၄ ယောက် ကျန်ရစ်ခဲ့ပါတယ်။

ဒါတွေက ဖန်တီးရှင်ဂြိုဟ် ဝိညာဉ်သုတ်သင်ရေးဌာနရဲ့ အဓိက အင်အားစုတွေပါပဲ။

ဝိညာဥ်နတ်ဘုရားဂိုဏ်းနဲ့ ယှဉ်လိုက်ရင်တော့ တော်တော်လေး အင်အားနည်းပါတယ်။

အခု ဖန့်ချန် လာတွေ့တဲ့လူကတော့ အဲဒီထဲက တစ်ယောက်ပါပဲ။

ဒါပေမဲ့ ဒီလူက အဆင့်တက်သွားပြီဖြစ်လို့ အဆင့် ၂ မဟုတ်တော့ဘဲ အဆင့် ၃ လွတ်လပ်သောမသေမျိုး ဖြစ်နေပါပြီ။

ယွန်းလူမြို ။

ပြီးခဲ့တဲ့တစ်ခေါက် ဖန့်ချန် လာတုန်းက လုံရို့ နဲ့အတူ လာခဲ့တာပါ။

အဲဒီတုန်းကပဲ ဖန့်ချန်ဟာ ကျောက်မင်ရွှမ်၊ စုန်းကု နဲ့ နန်ကုန်းယွမ်ချန် တို့ကို သတ်ပစ်ခဲ့ပါတယ်။

ဒါကြောင့် ယွန်းလူမြို့စားက အဆင့် ၃ ရောက်ပြီးနောက်မှာ ဖန့်ချန်နောက်ကို တကောက်ကောက် လိုက်လံဖမ်းဆီးခဲ့ပြီး နောက်ဆုံး ဓားသင်္ချိုင်းလှေကား အထိတောင် လိုက်လာခဲ့ပါသေးတယ်။

"မင်း ယွန်းလူမြို့ကို လာတာ... အဖိုးကြီးဆီကို ဝိညာဉ်ရတနာ လာပေးတာလား ဒါမှမဟုတ် ကျုပ်သားရဲ့ သတင်းကို လာပြောတာလား "

ကျောက်ယွင်လူ က ဖန့်ချန်ကို ကျောပေးပြီး လက်နောက်ပစ်ကာ ရပ်နေပါတယ်။

"ဝိညာဉ်သုတ်သင်ရေးဌာန ကျင့်ကြံသူ ကျောက်ယွင်လူ အမိန့်နာခံပါ "

ကျောက်ယွင်လူရဲ့ ကိုယ်ခန္ဓာက သိသိသာသာ တုန်ခါသွားပြီး ဖန့်ချန်ဘက်ကို လှည့်ကြည့်လိုက်ပါတယ်။

သူ့ရဲ့ အကြည့်တွေက ဖန့်ချန်လက်ထဲက ခါးချိတ်တံဆိပ်ပြားဆီကို ချက်ချင်း ရောက်သွားပါတယ်။

"ဒါက ဘာလဲဆိုတာ ခင်ဗျားကို အရှည်ကြီး ရှင်းပြဖို့ မလိုဘူး ထင်တယ်"

ဖန့်ချန်က လက်ထဲက တံဆိပ်ပြားကို မြှောက်ပြလိုက်ပါတယ်။

ကျောက်ယွင်လူရဲ့ မျက်နှာက ပျက်သွားတယ်

"မင်းဆီမှာ ဒီက ဝိညာဉ်သုတ်သင်ရေးဌာန ဌာနမှူးရဲ့ တံဆိပ်ပြား ဘာလို့ ရှိနေတာလဲ "

"ကျုပ်က ဖန်တီးရှင်ဂြိုဟ် ဝိညာဉ်သုတ်သင်ရေးဌာနရဲ့ ဌာနမှူးအသစ်ပဲ"

ဖန့်ချန်က ဆိုပါတယ်။

ကျောက်ယွင်လူရဲ့ မျက်နှာပေါ်က တင်းမာမှုတွေ ပျောက်သွားပြီး ရုတ်တရက် ရယ်မောလိုက်တယ်

"မင်းက ဌာနမှူးအသစ် ဟုတ်လား မင်းလို လူငယ်လေးက ဖန်တီးရှင်ဂြိုဟ် ဝိညာဉ်သုတ်သင်ရေးဌာန ဌာနမှူး လုပ်ဖို့ ဘယ်လောက်အဆင့်ရှိရမလဲ သိရဲ့လား"

"ကျုပ်ကိုယ်တိုင်တောင် အရည်အချင်း လိုသေးတာ၊ မင်းက ဘာမို့လို့လဲ ပြောစမ်း... ဒီတံဆိပ်ပြား ဘယ်ကရတာလဲ"

"သိုင်းဝိညာဥ်နယ်မြေက ဟွမ်ချင်းကျွဲ ပေးတာ"

ဖန့်ချန်က ပြုံးလိုက်တယ်

"ဒါက အတုတော့ မဖြစ်နိုင်ဘူးမလား "

'ဟွမ်ချင်းကျွဲ' ဆိုတဲ့ နာမည်ကို ကြားလိုက်ရတဲ့အခါ ကျောက်ယွင်လုရဲ့ မျက်နှာပေါ်က အပြုံးတွေ ချက်ချင်း ပျောက်ကွယ်သွားပြီး သံသယတွေ ဝင်လာပါတယ်။

သူ့ရဲ့ လက်တွေကလည်း တဖြည်းဖြည်း တင်းကျပ်သွားပါတယ်။

သိုင်းဝိညာဥ်နယ်မြေ ဟွမ်မိသားစု။

ဒီသတင်းကို သိတဲ့လူဟာ သာမန်လူ မဟုတ်နိုင်ပါဘူး။

ဒီနေရာက ရှေးဟောင်းနယ်မြေ ဖြစ်တာကြောင့် တကယ်လို့ ဟွမ်ချင်းကျွဲ နဲ့ မတွေ့ခဲ့ဖူးရင် တစ်ဖက်လူက ဟွမ်မိသားစုရဲ့ ဖြစ်တည်မှုကို သိမှာ မဟုတ်ပါဘူး။

သူကိုယ်တိုင်တောင်မှ ဟွမ်မိသားစုရဲ့ နာမည်ကို ဌာနမှူးဟောင်းက မတော်တဆ ပြောပြခဲ့လို့ သိခဲ့တာပါ။

ကျောက်ယွင်လူဟာ ပုံမှန်အတိုင်း ပြန်ဖြစ်သွားအောင် ထိန်းလိုက်ပြီး ရှေ့ကို အမြန်လှမ်းလာကာ လက်အုပ်ချီ နှုတ်ဆက်လိုက်တယ်

"ကျောက်ယွင်လူ၊ ဌာနမှူးကို ဂါရဝပြုပါတယ်"

"သွားရအောင်၊ နောက်ထပ် တွေ့ရမယ့်သူတွေ ရှိသေးတယ် ဒီက ဝိညာဉ်သုတ်သင်ရေးဌာနက အလုပ်မလုပ်တာ ကြာပြီဆိုတော့ သံချေးတက်နေပြီလား မသိဘူး၊ အမြန် ပြန်လည်ပတ်အောင် လုပ်ရမယ်"

ဖန့်ချန်က ပြုံးပြီး လှည့်ထွက်သွားပါတယ်။

ကျောက်ယွင်လူက ခဏလောက် တိတ်ဆိတ်သွားပြီးမှ အနောက်ကနေ အမြန်လိုက်သွားပါတယ်။

သူတို့နှစ်ယောက် ယွန်းလူမြို့ကနေ ထွက်လာပြီးနောက် တစ်ယောက်က ဓားစီးပြီး သွားသလို၊ နောက်တစ်ယောက်က အနောက်ကနေ ကပ်လိုက်လာပါတယ်။

အဲဒီအချိန်အတွင်းမှာပဲ ကျောက်ယွင်လူဟာ ဒီလူငယ်လေးရဲ့ အစွမ်းက သူထင်ထားတာထက် အများကြီး ပိုသာနေတာကို အံ့သြစွာ တွေ့လိုက်ရပါတယ်။

"အနည်းဆုံးတော့ အဆင့် ၂ လွတ်လပ်သောမသေမျိုးပဲ၊ ဓားကျင့်ကြံသူ လမ်းစဉ်ကိုလည်း လိုက်ထားသေးတယ်..."

ကျောက်ယွင်လူက စိတ်ထဲကနေ ရေရွတ်လိုက်ပါတယ်။

ရက်အနည်းငယ် ကြာပြီးနောက် သူတို့နှစ်ယောက်ဟာ ပစ်ပယ်ထားတာ ကြာပြီဖြစ်တဲ့ ဂိုဏ်းဟောင်းတစ်ခုဆီကို ရောက်လာကြပါတယ်။

အစကတော့ ဒါဟာ ဂိုဏ်းကြီးတစ်ခု ဖြစ်သင့်ပေမဲ့ အခုတော့ လွတ်လပ်သော ကျင့်ကြံသူတွေ စုဝေးရာ ဈေးတန်းတစ်ခု ဖြစ်နေပါပြီ။

အဆောက်အဦးတစ်ခုပေါ်မှာတော့ ပျက်စီးနေတဲ့ ဆိုင်းဘုတ်တစ်ခု ရှိနေပြီး အဲဒီပေါ်မှာ စာလုံးကြီး သုံးလုံး ရေးထွင်းထားပါတယ် - စုန်းလင်ဂိုဏ်း ။

"စုန်းလင်မိတ်ဆွေက အဆင့် ၂ လွတ်လပ်သောမသေမျိုး ဖြစ်သင့်တာပဲ၊ ဘာလို့ သူ အခြေစိုက်တဲ့ ဂိုဏ်းက ဒီလို ဖြစ်သွားရတာလဲ "

ဖန့်ချန်က အဲဒီဆိုင်းဘုတ်ကို ကြည့်ပြီး မျက်မှောင်ကြုတ်လိုက်ပါတယ်။

ကျောက်ယွင်လူလည်း မျက်မှောင်ကြုတ်သွားတယ်

"ကျုပ်ရဲ့ အဆင့်အတန်းက ထူးခြားနေတာကြောင့် စုန်းလင်မိတ်ဆွေနဲ့ မဆက်သွယ်ဖြစ်တာ ကြာပြီ ဒီလို ဖြစ်သွားလိမ့်မယ်လို့ မထင်ထားဘူး"

ပြောပြီးတာနဲ့ သူက လမ်းသွားလမ်းလာ ကျင့်ကြံသူတစ်ယောက်ကို ခေါ်လိုက်တယ်

"ညီလေး... ဒီစုန်းလင်ဂိုဏ်းက ဘာလို့ ဒီလို ဖြစ်သွားတာလဲ "

အဲဒီကျင့်ကြံသူက အောက်ပိုင်း ၄ ဆင့် ကျင့်ကြံသူ တစ်ယောက်ပဲ ဖြစ်ပြီး ကျောက်ယွင်လူ ရဲ့ အရှိန်အဝါကို မြင်တာနဲ့ မရဲတရဲနဲ့ ပြန်ဖြေပါတယ်

"စီနီယာ... စုန်းလင်ဂိုဏ်းက ပျက်စီးသွားတာ နှစ်ပေါင်း ၈၀၀ ကျော်ပြီဗျ "