အခန်း (၁၁၉၃-၁၁၉၄)

အခန်း (၁၁၉၃) ကျိထျန်းကျွင်း

ဧရာမ ရှေးဟောင်းသစ်ပင်ကြီးအောက်မှာ ဝတ်စုံခိုရောင်လူငယ်လေးက ဖန့်ချန်အတွက် လက်ဖက်ရည်တစ်ခွက် ငှဲ့ပေးပြီးနောက် ကျိုးရှန့်တောင် အကြီးကဲရဲ့ နောက်နားမှာ ငြိမ်သက်စွာ သွားရောက်ရပ်နေပါတယ်။

ကျိုးရှန့်တောင် အကြီးကဲက ဖန့်ချန်ကို လက်ဖက်ရည်သောက်ဖို့ အချက်ပြလိုက်ပြီး သူ့မျက်လုံးထဲမှာတော့ အတိတ်ကို ပြန်လည်အမှတ်ရနေတဲ့ အရိပ်အယောင်တွေ ပေါ်လာပါတယ်

"ဒီဘေးဒုက္ခက... ကျုပ် ငယ်ငယ်တုန်းက မာန်တက်ခဲ့မိလို့ ရန်စခဲ့မိတဲ့ ကိစ္စဖြစ်နိုင်တယ်"

"မှတ်မိသလောက်တော့ အဲဒီနှစ်က ကျုပ်အသက် တစ်ထောင်တောင် မပြည့်သေးဘူး အဆင့် ၁ လွတ်လပ်သောမသေမျိုးအဖြစ် စောစောစီးစီး တက်လှမ်းနိုင်ခဲ့ပြီး ဖန်တီးရှင်ဂြိုဟ်ကနေ ထွက်ခွာကာ ရှေးဟောင်းနယ်မြေ ထဲမှာ လှည့်လည်သွားလာခဲ့တယ်"

"ကံကောင်းတာလား၊ ကံဆိုးတာလားတော့ မသိဘူး ခရီးသွားနေရင်းနဲ့ နတ်ဆေးပင် တစ်ပင် ပေါ်ထွက်လာတာနဲ့ ကြုံခဲ့ရတယ်"

"ဘယ်လို ကျင့်ကြံခြင်းလမ်းစဉ်မျိုးပဲ ဖြစ်ဖြစ်၊ နတ်ဆေးပင်ဆိုတာ ကျုပ်တို့လိုလူတွေအတွက်တော့ ကြီးမားတဲ့ ကံကောင်းမှုပဲလေ ဘယ်သူမှ လက်ပိုက်ကြည့်မနေနိုင်သလို ကျုပ်လည်း အတူတူပါပဲ"

"အဲဒီအချိန်တုန်းက အဲဒီနေရာမှာ အဆင့် ၁ လွတ်လပ်သောမသေမျိုးတွေပဲ ရှိကြတယ် လုယူတိုက်ခိုက်တဲ့သူ စုစုပေါင်း ၄၀ ကျော် ရှိခဲ့တယ်"

"အဲဒီတိုက်ပွဲကတော့ ကောင်းကင်နဲ့မြေကြီး မှောင်မိုက်သွားတဲ့အထိပါပဲ ကျုပ်ရဲ့ စွမ်းဆောင်ရည်က သူတို့ထက် အနည်းငယ် သာခဲ့လို့ နောက်ဆုံးမှာ အဲဒီနတ်ဆေးပင်ကို ကျုပ် ရခဲ့တယ်"

"အဲဒီတုန်းက ကျင့်ကြံသူတစ်ချို့က ကျုပ်ကို သတိပေးခဲ့ကြတယ် ဒီနယ်မြေဟာ နတ်မင်းနန်းတော် ရဲ့ အုပ်ချုပ်မှုအောက်မှာ ရှိတာဖြစ်ပြီး၊ နတ်ဆေးပင်ကလည်း နတ်မင်းနန်းတော် ပိုင်တာပါတဲ့"

"ကျုပ်ကတော့ ဂရုမစိုက်ခဲ့ဘူး ပါးစပ်ထဲ ရောက်နေတဲ့ အသားကို ပြန်ထွေးထုတ်ဖို့ ဆိုတာ မဖြစ်နိုင်ဘူးလေ အဲဒါနဲ့ နတ်ဆေးပင်ကို ယူပြီး ထွက်လာခဲ့တယ် အဲဒီနောက်ပိုင်း အတော်ကြာတဲ့အထိ နတ်မင်းနန်းတော် ကျင့်ကြံသူတွေရဲ့ လိုက်လံသတ်ဖြတ်တာကို ခံခဲ့ရတယ်"

"သူတို့က ကျုပ်ကို အကျပ်ကိုင်လွန်းလို့ ကျုပ်လည်း နတ်ဆေးပင်ကို ဖျက်ဆီးပစ်လိုက်ပြီး အားလုံး လက်ဗလာဖြစ်အောင် လုပ်လိုက်တယ် "

"သူတို့ရဲ့ နည်းလမ်းတွေက ထူးဆန်းတယ်၊ နတ်ဆေးပင်ရဲ့ အငွေ့အသက်ကို လိုက်ပြီး ကျုပ်ကို ရှာနိုင်ကြတာ နတ်ဆေးပင် ပျက်စီးသွားတော့ သူတို့လည်း ကျုပ်ကို ရှာမတွေ့တော့ဘူး"

"ကျုပ်လည်း ရာစုနှစ်ပေါင်းများစွာ လှည့်လည်သွားလာပြီး ကျိုးရှန့်တောင် သန့်စင်ရာနယ်မြေကို ပြန်ရောက်လာခဲ့တယ် အဲဒီမှာပဲ အဆင့် ၂ ကို တက်လှမ်းနိုင်ခဲ့ပြီး ကျိုးရှန့်တောင် အရှင်သခင် ရာထူးကို လက်ခံခဲ့တာ "

"ဒီကိစ္စက ကျုပ်ရဲ့ ဘဝမှတ်တမ်းတစ်ခု၊ မှတ်ဉာဏ်တစ်ခု အနေနဲ့ပဲ ကျန်ရစ်ခဲ့ပြီး ဒီကိစ္စနဲ့ ဘာမှမပတ်သက်တော့ဘူးလို့ ထင်ခဲ့တာ "

"လွန်ခဲ့တဲ့ အနှစ် ၆၀ တုန်းက... နတ်မင်းနန်းတော်က ကျင့်ကြံသူတွေ ဒီနေရာကို ရောက်လာတာကို ကျုပ် မတော်တဆ သိလိုက်ရတယ် ကိစ္စတွေက အကြာကြီး ကြာသွားပြီ ဆိုပေမဲ့လည်း သူတို့ ရောက်လာတယ်ဆိုတာ တစ်ခုခုကို အရိပ်အမြွက် မိသွားလို့ ဖြစ်နိုင်တယ်"

"နတ်မင်းနန်းတော်က ကျိုးရှန့်တောင် သန့်စင်ရာနယ်မြေထက် အများကြီး အားကောင်းတယ် အဆင့် ၅ တာ့လော့မသေမျိုး တောင် ရှိတယ် ဒီနှစ်တွေမှာ ကျုပ် ထိုင်မရ ထနိုင်မရ ဖြစ်နေခဲ့တာတစ်နေ့မှာ နတ်မင်းနန်းတော်က တကယ်ပဲ တံခါးဝအထိ ရောက်လာခဲ့ရင် ကျိုးရှန့်တောင်အတွက်တော့ ဂိုဏ်းပျက်မယ့် ဘေးဒုက္ခပဲ"

"စီနီယာက ပူပန်လွန်းနေတာလည်း ဖြစ်နိုင်ပါတယ် နတ်မင်းနန်းတော်က ကျင့်ကြံသူတွေက ဒီအတိုင်း လမ်းကြုံလို့ ဖြတ်သွားတာလည်း ဖြစ်နိုင်တာပဲ အနှစ် ၆၀ တောင် ရှိပြီ ဘာမှ ဖြစ်မလာသေးဘူးဆိုရင် သူတို့ စီနီယာ့ကို ရှာမတွေ့တာလည်း ဖြစ်နိုင်ပါတယ်"

ဖန့်ချန်က ပေါ့ပေါ့ပါးပါးပဲ ပြောလိုက်ပါတယ်။

ကျိုးရှန့်တောင် အကြီးကဲက ခေါင်းကို အသာခါယမ်းလိုက်တယ်

"ကျုပ် ဗေဒင်ကျွမ်းကျင်တဲ့ မိတ်ဆွေတစ်ယောက်ကို တွက်ခိုင်းကြည့်ပြီးပြီ ကျိုးရှန့်တောင်က တကယ်ပဲ ဘေးဒုက္ခနဲ့ ကြုံရမှာ မှန်တယ်"

"စီနီယာအနေနဲ့ လူတွေကို ခေါ်ပြီး ဖန်တီးရှင်ဂြိုဟ်ကနေ ထွက်သွားလို့ ရတာပဲ သိုင်းဝိညာဥ်နယ်မြေကို သွားမလား လူ့လောက နယ်မြေကိုးခုက ကျယ်ပြောလှပါတယ် နတ်မင်းနန်းတော်က ဘယ်လောက်ပဲ အားကောင်းကောင်း လက်လှမ်းမမှီနိုင်ပါဘူး"

ကျိုးရှန့်တောင် အကြီးကဲ ခဏလောက် တိတ်ဆိတ်သွားတယ်

"ကျုပ် ထွက်သွားလို့ ရတယ်၊ ဂိုဏ်းထဲက ကျင့်ကြံသူတွေ ထွက်သွားလို့ ရတယ် ဒါပေမဲ့ ကျိုးရှန့်တောင်က မသေမျိုးလူသားတွေရော ထွက်သွားလို့ ရပါ့မလား "

"ကျုပ်တို့က ကျိုးရှန့်တောင်မှာ မွေးဖွားခဲ့တာ ဘိုးဘေးတွေကလည်း ဒီနေရာမှာပဲ တရားထူးရခဲ့တာ ကျိုးရှန့်တောင်ကြီး ကျုပ်လက်ထဲမှာ ပျက်စီးသွားမှာကိုတော့ ကျုပ် လက်ပိုက်ကြည့်မနေနိုင်ဘူး"

သူက ပြုံးလိုက်ပြီး

"တကယ်လို့ ကျိုးရှန့်တောင်ကြီးကို သယ်ပြီး ထွက်သွားလို့ ရမယ်ဆိုရင် ကျုပ် မိတ်ဆွေလေးဆီမှာ အကူအညီ တောင်းနေမှာ မဟုတ်ပါဘူး"

"စီနီယာနဲ့ နတ်မင်းနန်းတော်ကြားက အာဃာတကို ကျုပ် နားလည်ပါပြီ ကျုပ် နတ်မင်းနန်းတော်အကြောင်း မကြားဖူးသေးပေမဲ့ နောက်ပိုင်းမှာ တွေ့ခဲ့ရင်တော့ စုံစမ်းပေးပါ့မယ် တကယ်လို့ ပတ်သက်မှု တစ်ခုခု ရခဲ့ရင်တော့ ဒီရန်ငြိုးကို ဖြေဖျောက်ဖို့ ဖြစ်နိုင်ခြေ ရှိပါတယ်"

ဖန့်ချန်က ပြောလိုက်ပါတယ်။

ကျိုးရှန့်တောင် အကြီးကဲရဲ့ မျက်လုံးတွေ အနည်းငယ် လင်းလက်သွားပြီး လက်ဖက်ရည်နဲ့ပဲ ဖန့်ချန်ကို အရိုအသေပေးလိုက်ပါတယ်

"မိတ်ဆွေလေးဖန့်ကို ကျေးဇူးတင်ပါတယ်"

"အတတ်နိုင်ဆုံး ကြိုးစားပေးမယ်လို့ပဲ ပြောနိုင်ပါတယ်"

နှစ်ယောက်သား ခဏလောက် စကားစမြည် ပြောဆိုပြီးနောက် ဖန့်ချန်လည်း နှုတ်ဆက် ထွက်ခွာခဲ့ပါတယ်။

ဝတ်စုံခိုရောင် လူငယ်လေးက ကျိုးရှန့်တောင် အကြီးကဲ ဘေးနားကို လျှောက်လာပြီး ထွက်ခွာသွားတဲ့ ဖန့်ချန်ရဲ့ ကျောပြင်ကို ကြည့်ကာ အမူအရာ ထူးဆန်းစွာနဲ့

"အကြီးကဲ... သူက တကယ်ပဲ ကျိုးရှန့်တောင်ကို ကူညီနိုင်မှာလား"

"ထူးခြားသူတွေရဲ့ နည်းလမ်းက တကယ့်ကို ထူးဆန်းတယ် ဗေဒင်ကျွမ်းကျင်တဲ့ ကျုပ်မိတ်ဆွေကလည်း ပြောတယ်၊ ကျိုးရှန့်တောင်မှာ အသက်ရှင်သန်ခွင့် အခွင့်အရေး တစ်ခုတော့ ကျန်သေးတယ်၊ အဲဒါက ဒီလူအပေါ်မှာ မူတည်နေတာတဲ့ ရလဒ်က ဘယ်လိုဖြစ်မလဲဆိုတာ ကျုပ်လည်း မသိဘူး တစ်လှမ်းချင်း လျှောက်ရင်းနဲ့ ကိစ္စတွေ ဖြစ်လာတဲ့အခါမှပဲ ရလဒ်ကို ကြည့်ရတော့မယ်"

ကျိုးရှန့်တောင် အကြီးကဲက စဉ်းစားရင်း

"ဘယ်လိုပဲဖြစ်ဖြစ် အထွတ်ထိပ် ဝိညာဉ်ကျောက်တုံး သုံးတုံးနဲ့... ကျေးဇူးကြွေး တစ်ခုပဲလေ တကယ်လို့ ကျိုးရှန့်တောင်အတွက် အသက်ရှင်ခွင့် အစစ်အမှန် ရနိုင်မယ်ဆိုရင်တော့ တန်ပါတယ်"

သူတို့နှစ်ယောက် မမြင်လိုက်တာကတော့... ဖန့်ချန် ထွက်သွားပြီး မကြာခင်မှာပဲ ဝိညာဉ်တစ်ခု ဟာ ကျိုးရှန့်တောင်ကို ရောက်လာပြီး လှည့်လည်ကြည့်ရှုနေတာပါပဲ။

...

...

ကျိုးရှန့်တောင် အကြီးကဲ ပေးလိုက်တဲ့ အထွတ်ထိပ် ဝိညာဉ်ကျောက်တုံး သုံးတုံးထဲမှာ တစ်တုံးကတော့ အထဲမှာ ရှေးဟောင်းဝိညာဉ်စွမ်းအား နှင်းလေပြည် ကိန်းအောင်းနေပါတယ်။

ဒါဟာ မဟာကောင်းကင်ဘုရင် ဆေးကျမ်းအတွက် လိုအပ်တဲ့ ဝိညာဉ်စွမ်းအား ၉၉ မျိုးထဲက တစ်ခုပါ။

ကျန်တဲ့ နှစ်တုံးကတော့ ဆေးကျမ်းအတွက် အသုံးမဝင်တာကြောင့် နောက်ပိုင်းမှာ တခြားသူနဲ့ လဲလှယ်ဖို့အတွက် သိမ်းထားလို့ ရပါတယ်။

ဒီတစ်ခေါက်မှာ သူ့ရဲ့ ဆရာသခင်က ကျိုးရှန့်တောင် အကြီးကဲကို လမ်းညွှန်ပေးခဲ့တာသာ မဟုတ်ရင် ဖန့်ချန်လည်း ဒီကျောက်တုံး သုံးတုံးကို လက်ခံမှာ မဟုတ်ပါဘူး။

တခြားသူရဲ့ ပုဂ္ဂိုလ်ရေး အာဃာတတွေထဲမှာ သူ မပါဝင်ချင်ပါဘူး။

ဒါပေမဲ့ သူ့ဆရာသခင်က ကျိုးရှန့်တောင် အကြီးကဲနဲ့ တွေ့ဖူးသလို၊ အဲဒီ ကြိုးကြာငှက်ကို လွှတ်ပြီး သူ့ကို ဝိုလုံကျောင်းတိုက်အထိ ပို့ခိုင်းခဲ့တာကို တွေးကြည့်ရင်

နောက်ကွယ်မှာ ကြိုတင်စီစဉ်ထားတာတွေ ရှိနိုင်ပါတယ်။

အနည်းဆုံးတော့ သူ့ဆရာသခင်က ကျိုးရှန့်တောင်ကို အတော်လေး အရေးတယူ ရှိတယ်ဆိုတာ သက်သေပြနေတာပါပဲ။

နောက်ထပ် နှစ်အနည်းငယ်အတွင်းမှာတော့ ဖန်တီးရှင်ဂြိုဟ်ရဲ့ အခြေအနေက တဖြည်းဖြည်း တည်ငြိမ်လာပါတယ်။

ဒီနေရာက ဝိညာဥ်နတ်ဘုရားဂိုဏ်း ကျင့်ကြံသူတွေဟာ ရှင်သန်စရာ နေရာမရှိသလောက် ဖြစ်သွားပြီး၊ လူမသိအောင် ပုန်းအောင်းကာ အိပ်စက်နေတဲ့ အခြေအနေကို ရောက်သွားကြပါတယ်။

ဒါဟာ ဖန့်ချန်နဲ့ ဝိညာဥ်နတ်ဘုရားဂိုဏ်းတို့ တိုက်ခိုက်လာခဲ့တဲ့ အတောအတွင်းမှာ ရရှိခဲ့တဲ့ အကြီးမားဆုံးသော အောင်ပွဲပါပဲ။

ဖန်တီးရှင်ဂြိုဟ်တင်မကဘဲ မြေဝက်ဝံဂြိုဟ်၊ ဟုန်မော့ဂြိုဟ် စတဲ့ နေရာတွေမှာလည်း ဝိညာဥ်နတ်ဘုရားဂိုဏ်းရဲ့ ရှင်သန်မှု နယ်မြေတွေဟာ လျော့နည်းလာခဲ့ပါတယ်။

ပြောရရင် ဖန်တီးရှင်ဂြိုဟ်ကို ဗဟိုပြုပြီး ပတ်ဝန်းကျင်က ဂြိုဟ် ၁၀ လုံးကျော်လောက်မှာ ရှိတဲ့ ဝိညာဥ်နတ်ဘုရားဂိုဏ်း ကျင့်ကြံသူတွေဟာ စုန့်ကျီလီကြောင့် ဝိညာဉ်သုတ်သင်ရေးဌာနရဲ့ အပြင်းအထန် နှိမ်နင်းသတ်ဖြတ်တာကို ခံခဲ့ရပါတယ်။

ဒီကာလအတွင်းမှာ ဖန့်ချန်ဟာ နေရာအသီးသီးက ဝိညာဉ်သုတ်သင်ရေးဌာန ခေါင်းဆောင်တွေနဲ့လည်း ရင်းနှီးသွားခဲ့ပါတယ်။

သူတို့တွေဟာ ဖန်တီးရှင်ဂြိုဟ် ဝိညာဉ်သုတ်သင်ရေးဌာနမှူးဖြစ်တဲ့ သူ့ရဲ့ လက်အောက်ငယ်သားတွေလိုပါပဲ။

သောင်းတာအိုမျှော်စင် ကတော့ ပျက်စီးမသွားပါဘူး။

ဒါပေမဲ့ အဆင့် ၃ လွတ်လပ်သောမသေမျိုး ရှိတဲ့ အင်အားကြီးဂိုဏ်းအဆင့်ကနေ ဒုတိယတန်းစား ဂိုဏ်းအဆင့်ကို လျောကျသွားခဲ့ပါတယ်။

အခုဆိုရင် ဂိုဏ်းမှာ ကျန်ရှိတဲ့ လွတ်လပ်သောမသေမျိုးဟာ ယန်ဟောက်ရန် အပါအဝင် အနည်းငယ်ပဲ ရှိတော့တာကြောင့် ယင်စိန့်ဂိုဏ်း၊ တာ့ရီကျန်းဂိုဏ်းတို့နဲ့ တန်းတူ မဟုတ်တော့ပါဘူး။

သာမန်ကျင့်ကြံသူတွေအတွက်တော့ ချောင်ဖုန်းနယ်မြေရဲ့ လွန်ခဲ့တဲ့ ၁၀ နှစ်ကျော်အတွင်း ပြောင်းလဲမှုတွေဟာ အရင်က နှစ်ပေါင်း တစ်ထောင်၊ တစ်ရာ ပြောင်းလဲမှုတွေထက်တောင် ပိုပြီး များပြားနေပါတယ်။

မျိုးနွယ်ကြီး ၄ ခုထဲက ၂ ခု ပျောက်ကွယ်သွားပြီး၊ ဂိုဏ်းကြီး ၃ ခုထဲမှာ အင်အားအကြီးဆုံး သောင်းတာအိုမျှော်စင်လည်း အတောင်ပံ ကျိုးသွားခဲ့ပါပြီ။

ကံကောင်းတာကတော့ မင်ဟူ၊ စစ်ဝေ၊ လုံယွမ် စတဲ့ နယ်မြေတွေမှာလည်း လွတ်လပ်သောမသေမျိုး အတော်များများ သေဆုံးခဲ့တာကြောင့် ချောင်ဖုန်းနယ်မြေဟာ နယ်မြေ ၄ ခုထဲမှာ အောက်ဆုံးကိုတော့ ရောက်မသွားခဲ့ပါဘူး။

ဒီနေ့မှာတော့ လူတစ်စုဟာ ကြယ်တာရာ အစီရင်ကနေ ထွက်လာပြီး သောင်းတာအိုမျှော်စင်ဆီကို တိုက်ရိုက် လာခဲ့ကြပါတယ်။

သတင်းကို ကြိုတင်ရရှိထားတဲ့ ယန်ဟောက်ရန်ဟာ ဂိုဏ်းတံခါးဝကို တိတ်တဆိတ် ရောက်ရှိလာပြီး စောင့်ကြိုနေပါတယ်။

ရွှီချန်းရှီး ဟာ သူ့ရဲ့ လက်အောက်ငယ်သားတွေကို ခေါ်ပြီး သောင်းတာအိုမျှော်စင်တံခါးဝကို ရောက်လာတဲ့အခါမှာတော့ စောင့်နေတဲ့ ယန်ဟောက်ရန်နဲ့ မျက်လုံးချင်း ဆုံလိုက်ရုံနဲ့တင် တစ်ဖက်လူရဲ့ အဆင့်အတန်းကို သိလိုက်ကြပါတယ်။

"ကျုပ်တို့ဂိုဏ်းရဲ့ ဖန်တီးရှင်ဂြိုဟ်ပေါ်က အခြေအနေကတော့ တကယ့်ကို စိုးရိမ်စရာပဲ"

ရွှီချန်းရှီးက တိုးတိုးလေး ပြောပါတယ်။

ယန်ဟောက်ရန်က ခေါင်းညိတ်ပြတယ်

"အဲဒီလိုပါပဲ"

"ဟိုတစ်ယောက်ကော"

"အတွင်းထဲမှာ စောင့်နေတယ်"

"သွားစို့... သူ့ကို သွားတွေ့ကြတာပေါ့"

ဂိုဏ်းချုပ်နန်းဆောင်

ရွှီချန်းရှီးဟာ ဖန့်ချန်ကို မြင်တာနဲ့ လက်အုပ်ချီ နှုတ်ဆက်လိုက်တယ်

"သခင်လေး... ပေးထားတဲ့ တာဝန်ကို ကျုပ် မပျက်ကွက်ခဲ့ပါဘူး၊ ကျုပ် ရောက်လာပါပြီ"

"ခရီးဝေးက လာရတာ ပင်ပန်းနေရောပေါ့"

ဖန့်ချန်က ပြုံးပြီး ခေါင်းညိတ်ပြတယ်

"ဒီနှစ်တွေအတွင်း မသေမျိုးလောကငယ် ဘက်က ဘာပြောလဲ "

"ကျုပ် ကျိထျန်းတု နဲ့ အကြိမ်အနည်းငယ် ထပ်တွေ့ခဲ့တယ် သူ့ရဲ့ နောက်ခံကိုလည်း အတော်လေး စုံစမ်းမိသွားပြီ ကျိမျိုးနွယ်ဟာ မသေမျိုးလောကငယ် ထဲမှာတော့ သိပ်မအစွမ်းထက်ဘူး၊ ဒါပေမဲ့..."

ရွှီချန်းရှီးက အသံကို နှိမ့်လိုက်ပြီး

"သူ့ရဲ့ အစ်ကို ကျိထျန်းကျွင်း ကတော့ အစွမ်းထက် ကျင့်ကြံသူကြီး တစ်ယောက်ရဲ့ဝင်စားတာ လို့ သိရတယ် လွန်ခဲ့တဲ့ နှစ်အနည်းငယ်က မှတ်ဉာဏ်တွေ ပြန်ရလာလို့ အခု ကျိမျိုးနွယ်က သူ့ကို အပြည့်အဝ ပံ့ပိုးပေးနေတာ"

"ထူးခြားသူ တွေကို လိုက်ဖမ်းနေတာကလည်း စင်ကြယ်သောမသေမျိုး လမ်းစဉ်ကို လျှောက်လှမ်းဖို့တဲ့ ဒါကို ကျိမျိုးနွယ်ကိုယ်တိုင်လည်း မသိဘူး သူ့အစ်ကိုရဲ့ ကိုယ်ပိုင် အကြံအစည်ပဲ"

အခန်း (၁၁၉၄) အငြိုးကြီးတဲ့ အရူး

"ကျိမျိုးနွယ်ကတောင် မသိဘူးလား ကျိထျန်းတုက မင်းကို ဒီလောက်တောင် ယုံကြည်တာလား၊ သူ့အစ်ကို ဘယ်လိုမသေမျိုးလမ်းစဉ်ကို လျှောက်မလဲဆိုတာကိုတောင် မင်းကို ပြောပြတယ်ဆိုတော့"

ဖန့်ချန်က ပြုံးပြီး ပြောလိုက်ပါတယ်။

ဒီသတင်းကို သူ လီကျင်းနျန်ဆီကနေ ကြားသိခဲ့ရပြီးပါပြီ။

ဒါပေမဲ့ လီကျင်းနျန်က ခန့်မှန်းရုံပဲ ရှိတာပါ။

ဒီနေ့မှာတော့ မသေမျိုးလောကငယ်က အဲဒီလူဟာ တကယ်ပဲ "စင်ကြယ်သောမသေမျိုး" လမ်းစဉ်ကို လျှောက်လှမ်းဖို့ ကြံစည်နေတယ်ဆိုတာ အတည်ပြုနိုင်ခဲ့ပါပြီ။

"ကျုပ်ကို ယုံကြည်လို့တော့လည်း မဟုတ်ပါဘူး"

ရွှီချန်းရှီးက အေးစက်စွာ ရယ်မောရင်း

"စုန့်ကျီလီ ကျရှုံးသွားပြီလေ၊ မြေဝက်ဝံဂြိုဟ်က ထူးခြားသူကို မျှားထုတ်ဖို့ သူ ကျုပ်ကို အားကိုးရတော့မှာ"

"လူ့လောက နယ်မြေကိုးခုက ဒီလောက်ကျယ်တာပဲ ဘာဖြစ်လို့ မြေဝက်ဝံဂြိုဟ်မှာမှ ပြဿနာရှာနေရတာလဲလို့ သူ မပြောဘူးလား တခြားနေရာတွေမှာလည်း ထူးခြားသူတွေ ရှိနေနိုင်တာပဲကို"

ဖန့်ချန်က မေးလိုက်ပါတယ်။

"ကျုပ် မေးကြည့်ခဲ့ပါတယ် ကျိထျန်းတု ပြောတာကတော့ မြေဝက်ဝံဂြိုဟ်က ထူးခြားသူက ပတ်သက်မှု နည်းလို့ လက်စဖျောက်ရ လွယ်တယ်တဲ့ တခြားနေရာတွေကတော့... ထူးခြားသူတွေက ဘယ်အချိန်ပေါ်လာမလဲဆိုတာ မသိနိုင်သလို ပတ်သက်မှုတွေကလည်း များတယ်၊ အတင်းအကျပ် လက်စဖျောက်ဖို့ လုပ်ရင် တခြားသူတွေရဲ့ သံသယကို ခံရလွယ်တယ်တဲ့"

ရွှီချန်းရှီးက ဆက်ပြောပါတယ်

"သူတို့က လူ့လောက နယ်မြေကိုးခုကို ကြောက်နေတာ မဟုတ်ပါဘူး မသေမျိုးလောကငယ်ထဲမှာလည်း သူတို့မှာ ရန်သူတွေ ရှိပုံရတယ်၊ အဲဒီလူတွေ သိသွားမှာကို ကြောက်နေတာ"

"ဘယ်လောက်အထိ ထပ်ပြီး အချိန်ဆွဲလို့ ရဦးမလဲ"

"အများဆုံး ဆယ်နှစ်ပါပဲ"

ရွှီချန်းရှီးက ခေတ္တစဉ်းစားပြီး

"ကျိထျန်းတုက အောက်ခြေအထိ ပြောပြခဲ့တယ် အများဆုံး ဆယ်နှစ်ပဲ ထပ်စောင့်မယ်၊ တကယ်လို့ ဆယ်နှစ်အတွင်းမှာ ကျုပ်ဘက်က ဘာမှ မထူးခြားလာရင် သူတို့ ကျိမျိုးနွယ်ကို အသိပေးပြီး ကျိမျိုးနွယ်ကိုယ်တိုင် ထွက်လာခိုင်းတော့မယ်တဲ့"

"အဲဒီအချိန်ကျရင် ကျိမျိုးနွယ်က စစ်မှန်သောမသေမျိုး တွေ မြေဝက်ဝံဂြိုဟ်ကို ဆင်းသက်လာပြီး အင်အားသုံးကာ ထူးခြားသူကို ပေါ်လာအောင် လုပ်လိမ့်မယ်"

"တကယ်လို့ ထူးခြားသူက လုံးဝ ပေါ်မလာရင်ကော"

"မြေဝက်ဝံဂြိုဟ် တစ်ခုလုံးကို အမှုန့်ပြုပစ်လိမ့်မယ် ဝိညာဥ်နတ်ဘုရားဂိုဏ်းက ဒီလိုမျိုး ဖြစ်တာကို ခွင့်မပြုပေမဲ့လည်း မသေမျိုးလောကငယ်က စစ်မှန်သောမသေမျိုးတွေ ကိုယ်တိုင် လက်လှမ်းရင်တော့ သူတို့လည်း ဂရုစိုက်မှာ မဟုတ်ဘူး ဘာဖြစ်လို့လဲဆိုတော့ မြေဝက်ဝံဂြိုဟ်ဟာ အထက်လူကြီးတွေရဲ့ မျက်လုံးထဲမှာ သဲတစ်ပွင့်လောက်ပဲ ရှိတာလေ၊ ရှိရှိ မရှိရှိ ဘာမှ အရေးမပါဘူး"

"ဒါကတော့ နည်းနည်း ကိုင်တွယ်ရ ခက်သွားပြီတကယ်လို့ ကျိထျန်းကျွင်းကို ဒီနေရာကို မျှားခေါ်ပြီး သတ်ပစ်လိုက်ရင်လည်း ကျိမျိုးနွယ်က စစ်မှန်သောမသေမျိုးတွေ ရောက်လာဦးမှာပဲ"

"မင်းမှာ နည်းလမ်းရှိလား သူတို့ကို ယင်လောကထဲ ရောက်အောင် လုပ်ဖို့ "

ဖန့်ချန်က မျက်မှောင်ကြုတ်ပြီး မေးလိုက်ပါတယ်။

"သူတို့က ယင်လောကထဲ မဆင်းကြဘူးဗျ..."

ရွှီချန်းရှီးက ခါးသီးစွာ ပြုံးပြီး

"ကျုပ် အရင်က ကျိထျန်းတုကို စမ်းသပ်ကြည့်ဖူးတယ် မသေမျိုးလောကငယ်က လူတွေဟာ ယင်လောကအပေါ်မှာ... အမြင်စောင်းနေပုံရတယ်၊ အဲဒီမှာ ယင်လောကထဲ ဆင်းတာကို တရားဝင် တားမြစ်ထားတယ်၊ အဲဒါကြောင့် သူတို့မှာ အဲဒီလို အလေ့အကျင့် မရှိကြဘူး"

သူ ခေတ္တရပ်ပြီး ဖန့်ချန်ကို တစ်ချက်ကြည့်ကာ

"ဖြစ်နိုင်တာကတော့... ငရဲမင်းကြီး ရဲ့ နည်းလမ်းတွေကို ကြိုတင် ကာကွယ်နေတာ ဖြစ်လိမ့်မယ်"

ဖန့်ချန်က ခေါင်းညိတ်လိုက်ပါတယ်။

ငရဲမင်းကြီးရဲ့ အမိန့်ပေးအာဏာစက် နည်းလမ်းတွေက တကယ့်ကို အားကြီးလှပါတယ်။

ရှေးဟောင်းကာလတုန်းက ရွှီချန်းရှီးလိုမျိုး ဒီနည်းလမ်းထဲမှာ အမိခံရတဲ့သူတွေ အများကြီး ရှိခဲ့မှာပါ။

မသေမျိုးလောကငယ်ထဲမှာ ဒီအကြောင်းကို သိတဲ့ ပညာရှင်တွေ ရှိနေမှာ ဖြစ်ပြီး၊ အဲဒါကြောင့်ပဲ ယင်လောကထဲ မဆင်းဖို့ စည်းကမ်း ထုတ်ထားတာ ဖြစ်ပါလိမ့်မယ်။

"ဝိညာဥ်နတ်ဘုရားဂိုဏ်းက ဒီကိစ္စကို ဂရုမစိုက်ဘူးဆိုရင် ဝိညာဉ်သုတ်သင်ရေးဌာနဘက်ကလည်း လက်ပိုက်ကြည့်နေမှာ မဟုတ်ပါဘူး ကျုပ် အားတဲ့အချိန်ကျရင် ယွိရွှီဂြိုဟ် ကို တစ်ခေါက်သွားပြီး ဟွမ်ချင်းကျွဲ ဆီကနေ အခြေအနေ စုံစမ်းကြည့်ဦးမယ်"

ဖန့်ချန်က ပြောရင်းနဲ့ ဝိညာဉ်သုတ်သင်ရေးဌာနရဲ့ ခါးချိတ်တံဆိပ်ပြားကို ထုတ်လိုက်ပါတယ်။

တံဆိပ်ပြားက အလင်းဖြူတွေ ထွက်နေပြီး အနည်းငယ် ပူနွေးနေပါတယ်။

ဌာနမှူး တစ်ယောက်ယောက်က သူ့ကို ဆက်သွယ်နေတာပါ။

"ဖန်တီးရှင်ဂြိုဟ်ဘက်မှာတော့ ဝိညာဥ်နတ်ဘုရားဂိုဏ်း ကျင့်ကြံသူတွေ သိပ်မကျန်တော့ဘူး ဒါက မင်းအတွက်လည်း ကောင်းပါတယ် ခဏတဖြုတ်တော့ သွေးဝိညာဉ်ဆေးတွေ ဆက်မပေးနိုင်တဲ့အတွက် အကြောင်းပြချက် ပေးထားလို့ ရတယ်၊ အခုတော့ ဒီနေရာကို အရင်ဆုံး စနစ်တကျ ပြန်စီစဉ်လိုက်ပါဦး"

ဖန့်ချန်က ပြောပြီး ထွက်သွားဖို့ ပြင်ဆင်ရင်းနဲ့မှ နတ်မင်းနန်းတော် ကိစ္စကို သတိရသွားလို့ ပေါ့ပေါ့ပါးပါးပဲ မေးလိုက်ပါတယ်

"မင်း နတ်မင်းနန်းတော် အကြောင်း ကြားဖူးလား"

"နတ်မင်းနန်းတော်"

ရွှီချန်းရှီးက အံ့အားသင့်သွားပြီး ထူးဆန်းတဲ့ အမူအရာနဲ့

"သခင်လေး... ခင်ဗျား အဲဒီအရူးအုပ်စုကို သွားပြီး မရန်စမိပါဘူးနော် "

"အရူး "

"ဟုတ်ပါ့ဗျာ... သူတို့က အငြိုးကြီးတဲ့ အရူးတွေလေ နတ်မင်းနန်းတော်နဲ့ ရန်ဘက်ဖြစ်တဲ့သူမှန်သမျှ အမြစ်ပြတ် သုတ်သင်ခံရလိမ့်မယ်၊ တကယ့်ကို အမြစ်ပြတ် သုတ်သင်တာမျိုးနော်"

"နတ်မင်းနန်းတော်မှာ ဒီကိစ္စကိုပဲ သီးသန့် ကိုင်တွယ်တဲ့ ကျင့်ကြံသူ အုပ်စုတစ်စု ရှိတယ် တစ်ယောက်ယောက်သာ လွတ်သွားရင် နောက်ထပ် နှစ်ပေါင်း တစ်ရာ၊ တစ်ထောင်၊ နှစ်ပေါင်း တစ်သောင်းအထိပါ မနားတမ်း လိုက်ရှာကြမှာ"

"မျိုးဆက်တစ်ခုပြီးတစ်ခု၊ သူတို့စိတ်ထဲမှာ အမြစ်ပြတ်သွားပြီလို့ မယုံကြည်မချင်း လိုက်နေကြမှာပဲ"

ရွှီချန်းရှီးက ဆက်ပြောပြတယ်

"ရှေးဟောင်းနယ်မြေ မှာတော့ နတ်မင်းနန်းတော်က အတော်လေး နာမည်ကြီးတယ် အဆင့် ၅ လွတ်လပ်သောမသေမျိုး ရှိတယ် ကျုပ်တို့ ဝိညာဥ်နတ်ဘုရားဂိုဏ်းတောင် သူတို့ကို အလွယ်တကူ မရန်စဘူး အကြိမ်အနည်းငယ်တောင် ပူးပေါင်းလုပ်ဆောင်ခဲ့ဖူးသေးတယ်"

"ကျုပ် မှတ်မိသလောက်တော့ ဟိုးအရင်တုန်းက နတ်မင်းနန်းတော် အုပ်ချုပ်တဲ့ နယ်မြေမှာ နတ်ဆေးပင် တစ်ပင် ထွက်လာဖူးတယ် နတ်ဆေးပင်က ဘယ်လောက်တန်ဖိုးရှိလဲဆိုတာ သခင်လေးလည်း သိမှာပါ"

"နောက်ဆုံးမှာ အဲဒီနတ်ဆေးပင်က တစ်ယောက်ယောက်ရဲ့ ကြားဖြတ်လုယူတာကို ခံလိုက်ရပြီး ဖျက်ဆီးခံလိုက်ရတယ်။ အဲဒီလူက နတ်မင်းနန်းတော် လက်ထဲကနေ ထွက်ပြေးသွားနိုင်ခဲ့တယ်လို့ ကြားရတယ်"

"အဲဒီနောက်ပိုင်း ဒီနှစ်တွေတစ်လျှောက်လုံး နတ်မင်းနန်းတော်က အဲဒီလူကို လိုက်ရှာနေတာ၊ နှစ်ပေါင်း နှစ်ထောင်၊ သုံးထောင်လောက် ရှိပြီ ထင်တယ်တစ်ခါတုန်းကဆို ကျုပ်ဆီအထိ လာရှာလို့ ကျုပ် ဆဲလွှတ်လိုက်ရသေးတယ်"

"..."

ဖန့်ချန်က ရွှီချန်းရှီးရဲ့ ထူးဆန်းတဲ့ အကြည့်ကို မြင်တော့ ခေါင်းကို အသာခါလိုက်တယ်

"ကျုပ် နတ်မင်းနန်းတော်ကို မရန်စမိပါဘူး"

"ဒါဆိုရင်တော့ ကံကောင်းတာပေါ့၊ မဟုတ်ရင် အတော် ဒုက္ခများမှာ ကြားထဲက လူခေါ်ပြီး ညှိနှိုင်းပေးရင်တောင်မှ၊ နတ်မင်းနန်းတော်ကလည်း နောက်ခံ ရှိတဲ့အတွက် မျက်နှာချင်းဆိုင်မှာ သဘောတူပြီး နောက်ကွယ်မှာ ပြန်လုပ်မှာကိုပဲ ကြောက်ရတာ"

ရွှီချန်းရှီးက သက်ပြင်းချနိုင်ပါတော့တယ်။

ဝိညာဥ်နတ်ဘုရားဂိုဏ်းရဲ့ ပါရမီရှင်တစ်ယောက်ဖြစ်တဲ့ ရွှီချန်းရှီးတောင် နတ်မင်းနန်းတော်ကို ကင်းမြီးကောက် မြင်သလို ကြောက်နေတာကို မြင်တော့ ကျိုးရှန့်တောင် အကြီးကဲ ရန်စမိထားတာ ဘယ်လိုမျိုး တည်ရှိမှုလဲဆိုတာ ဖန့်ချန် သဘောပေါက်သွားပါပြီ။

"မင်း ဒီနှစ်တွေထဲမှာ နည်းနည်း စောင့်ကြည့်ပေးထားပါဦး။ တကယ်လို့ နတ်မင်းနန်းတော် ကျင့်ကြံသူတွေ ဖန်တီးရှင်ဂြိုဟ်ကို ရောက်လာရင် ကျုပ်အတွက် အချိန်နည်းနည်း ဆွဲပေးဖို့ သတိရပါ"

ဖန့်ချန်က မှာလိုက်ပါတယ်။

ရွှီချန်းရှီးက ကြောင်အမ်းအမ်းနဲ့

"သခင်လေး... ခင်ဗျား ခုနက နတ်မင်းနန်းတော်ကို မရန်စမိဘူးလို့ ပြောတယ်မဟုတ်လား "

"ကျုပ်က မရန်စမိဘူး၊ တခြားတစ်ယောက်က ရန်စမိထားတာ"

ဖန့်ချန်က လက်ဝှေ့ယမ်းပြလိုက်ပြီး နန်းဆောင်ထဲကနေ ထွက်ခွာသွားပါတော့တယ်။

"..."

ရွှီချန်းရှီးက ခဏလောက် တိတ်ဆိတ်သွားပြီးမှ ကိုယ့်ကိုယ်ကိုယ် ပြန်ရယ်မိပါတယ်

မသေမျိုးလောကငယ်က တစ်မျိုး၊ နတ်မင်းနန်းတော်က တစ်ဖုံ၊ ဒီနေရာကတော့... တကယ့်ကို ပြဿနာတွေ အများကြီးပဲ။

နောက်ပိုင်းမှာတော့ သူ့ရဲ့ အာရုံအားလုံးက သူတို့ကို ကိုင်တွယ်ဖြေရှင်းဖို့ပဲ သုံးရတော့မယ် ထင်ပါရဲ့။

...

...

"ဒီလမ်းတစ်လျှောက်လုံးမှာ ကျင့်ကြံသူ အများကြီးက ဝိညာဉ်သုတ်သင်ရေးဌာနနဲ့ ဝိညာဥ်နတ်ဘုရားဂိုဏ်းအကြောင်းပဲ ပြောနေကြတာ ဒီနေရာက ဝိညာဥ်နတ်ဘုရားဂိုဏ်းကတော့ ဌာနမှူးဖန့်ရဲ့ သုတ်သင်တာကို တော်တော်လေး ခံလိုက်ရပုံပဲနော်"

"ဌာနမှူးဖန့်က ဓားကျင့်ကြံသူလေ၊ ပြီးတော့ ချင်းကျွဲသခင်လေးရဲ့ အရေးပေးတာကိုလည်း ခံရတာပဲ စုန့်ကျီလီကလည်း သူ့လူတွေရဲ့ လုပ်ကြံတာကို ခံလိုက်ရတာဆိုတော့၊ ဒီနေရာမှာ ဒီလို အောင်မြင်မှု ရတာက ပုံမှန်ပါပဲ"

"ဌာနမှူးချူ... ဌာနမှူးဖူ က ဒီတစ်ခေါက် ဘာလို့ အတူတူ မလိုက်လာတာလဲ ဘာတွေ အလုပ်ရှုပ်နေလို့လဲ ခင်ဗျားတို့ ဖုန်းဟိုင်ဂြိုဟ် ရဲ့ အခြေအနေကလည်း တည်ငြိမ်သွားပြီလို့ ကြားတယ်"

ဝိညာဉ်သုတ်သင်ရေးဌာန ဌာနမှူး အနည်းငယ်က ချူကျား ကို ကြည့်ပြီး မေးလိုက်ကြပါတယ်။

"လွန်ခဲ့တဲ့ နှစ်တွေမှာ ဌာနမှူးဖူ ကူညီပေးလို့ အခြေအနေက အရင်ထက်တော့ ကောင်းလာပါပြီဒါပေမဲ့ ကျမ တို့ နှစ်ယောက်လုံး ထွက်လာလို့ မရဘူးလေ၊ ဝိညာဥ်နတ်ဘုရားဂိုဏ်းက အပေါက်ရှာပြီး ခက်ခက်ခဲခဲ တည်ငြိမ်အောင် လုပ်ထားတဲ့ အခြေအနေကို ဖျက်ဆီးသွားမှာ စိုးရတယ်"

ချူကျားက ပေါ့ပေါ့ပါးပါးပဲ ပြန်ပြောလိုက်ပါတယ်။

သူမ စကားဆုံးတာနဲ့ တစ်ပြိုင်နက် လူရိပ်တစ်ခုက အဝေးကနေ အနီးကို ရောက်လာပြီး လူတိုင်းရဲ့ ရှေ့မှာ ချက်ချင်း ပေါ်လာပါတယ်။

"ဌာနမှူးဖန့်"

လူတိုင်းက ရောက်လာတဲ့သူကို မြင်တော့ အားတက်သရောနဲ့ လက်အုပ်ချီ နှုတ်ဆက်ကြပါတယ်။

"ဌာနမှူးအားလုံး... ပြီးခဲ့တဲ့တစ်ခေါက် ယွိရွှီဂြိုဟ်မှာ တွေ့ပြီးကတည်းက အားလုံးပဲ နေကောင်းကြရဲ့လား"

ဖန့်ချန်က ပြုံးပြီး နှုတ်ဆက်လိုက်ပါတယ်။

ချူကျား အပါအဝင် ဒီတစ်ခေါက်မှာ ဝိညာဉ်သုတ်သင်ရေးဌာန ဌာနမှူး စုစုပေါင်း ၄ ယောက် ရောက်လာတာပါ။

အဆင့် ၂ တစ်ယောက် ပါပြီး ကျန်တဲ့သူတွေကတော့ အဆင့် ၁ တွေပါ။

အဆင့် ၂ ဌာနမှူးကိုလည်း ယွိရွှီဂြိုဟ်မှာ တွေ့ဖူးပါတယ်၊ မျိုးရိုးက ယန် တဲ့။

သူလည်း အစွမ်းအစ မဆိုးပါဘူး၊ သူ အုပ်ချုပ်တဲ့ နယ်မြေမှာ ဝိညာဉ်သုတ်သင်ရေးဌာနက အသာစီး ရနေတာပါ။

"အားလုံးပဲ နေကောင်းကြပါတယ် ပြီးခဲ့တဲ့တစ်ခေါက် ဌာနမှူးဖန့်နဲ့ တွေ့တုန်းက နတ်ဘုံဆွေးနွေးပွဲ အကြောင်း ပြောဖြစ်ခဲ့တာ မှတ်မိသေးလားတကယ်လို့ ဒီမှာ ဘာကိစ္စမှ မရှိတော့ရင် ကျုပ်တို့နဲ့အတူ သွားကြမလား "

ယန်ယွမ်ဝူ က ပြုံးပြီး မေးလိုက်ပါတယ်။

ချူကျားနဲ့ ကျန်တဲ့ ၃ ယောက်ရဲ့ မျက်လုံးထဲမှာတော့ မျှော်လင့်ချက်တွေ ပေါ်လာပါတယ်။

တကယ်လို့ အဆင့် ၂ ဓားကျင့်ကြံသူ တစ်ယောက်သာ အတူတူ လိုက်လာမယ်ဆိုရင် ဒီခရီးက ပိုပြီး စိတ်ချရမှာပါ။

အဆင့် ၂ ဓားကျင့်ကြံသူရဲ့ နည်းလမ်းတွေက အဆင့်တူတွေထဲမှာ ပြိုင်ဘက် ရှားပါးတာကိုး။

"ကျုပ် စောင့်နေတာ ကြာပါပြီ လမ်းကြောင်းကို မကျွမ်းကျင်လို့သာ မဟုတ်ရင် အရင်တောင် သွားနှင့်နေလောက်ပြီ"

ဖန့်ချန်က ရယ်ပြီး ပြောလိုက်ပါတယ်။

သူ နောက်နေတာကို အားလုံး သိကြပါတယ်၊ သူ လိုက်လာမယ်ဆိုတာကို ကြားတော့ အားလုံးလည်း စိတ်အေးသွားကြပါတော့တယ်။