အခန်း (၉၇-၉၈)

အခန်း ၉၇ - ရွေးချယ်စရာ လေးခု

မသေမျိုးဆရာသခင် ဝူဝေသည် ခန်းမအတွင်း၌ ကျင့်ကြံနေဆဲပင် ဖြစ်၏။ ချန်လော့သည် ခန်းမအတွင်းသို့ ဝင်ရောက်တိုင်း ဆရာသခင် ဝူဝေထံမှ ထွက်ပေါ်နေသော သမုဒ္ဒရာကဲ့သို့ ကျယ်ပြောလှသည့် အရှိန်အဝါကို ခံစားရလေ့ရှိသည်။

ဤဆရာသခင်သည် ကျင့်ကြံနေခြင်းမှလွဲ၍ ပြင်ပသို့ ထွက်ခွာခြင်း ရှိ၊ မရှိကိုလည်း သူ အလွန်ပင် သိချင်နေမိသည်။

စင်စစ် ထိုအတွေးမှာ သူ၏စိတ်ထဲတွင် ခဏတာမျှသာ ပေါ်လာခြင်းဖြစ်၏။

နတ်ဘုရားရေကန်မသေမျိုးဂိုဏ်း၏ တောင်ထွတ်သခင်တစ်ဦးဖြစ်ကာ အုတ်မြစ်တည်ဆောက်ခြင်းအဆင့် ကျင့်ကြံသူဖြစ်သဖြင့် သူ့တွင် ကိုယ်ပိုင်အဆက်အသွယ်ရှိနေမည်မှာ သေချာသော်လည်း ချီသန့်စင်ခြင်းအဆင့် တပည့်တစ်ဦးဖြစ်သော ချန်လော့အနေဖြင့်မူ ထိုအဆင့်ကို လက်လှမ်းမမီနိုင်ပေ။

၎င်းမှာ ကျောင်းတော်မှ ဆရာများသည် ကျောင်းသားများရှေ့တွင် အမြဲတမ်း တည်ကြည်လေးနက်နေတတ်ခြင်းနှင့် ဆင်တူလှသည်။

"ငါ အကုန်လုံး သိပြီးပြီ။"

မသေမျိုးဆရာသခင် ဝူဝေသည် မျက်လုံးများကို ဖွင့်လိုက်ပြီးနောက် လက်ကို ဝေ့ယမ်းလိုက်ရာ ဘေးနားရှိ စာအုပ်စင်ပေါ်မှ ကျောက်စိမ်းပေလွှာ နှစ်ခုမှာ ချန်လော့နှင့် ဖန်ရှန်းတို့၏ လက်ထဲသို့ အလိုလို ပျံသန်းရောက်ရှိလာလေ၏။

"ဒါတွေက မင်းတို့ရဲ့ တာဝန်အတွက် ဆုလာဘ်တွေပဲ။"

"ကျွန်တော်တို့ကိုယ်တိုင် ရွေးချယ်ခွင့်ရမယ်လို့ ပြောထားတာ မဟုတ်ဘူးလားဟင်" ဖန်ရှန်းသည် မိမိလက်ထဲရှိ ကျောက်စိမ်းပေလွှာကို ကြည့်ကာ မေးလိုက်မိသည်။

သူတို့ တာဝန်လက်ခံစဉ်က ပြောကြားခဲ့သည်မှာ ဤသို့မဟုတ်ပေ။

သို့သော် မသေမျိုးဆရာသခင် ဝူဝေသည် ရှင်းပြရန် အစီအစဉ်မရှိဘဲ ကျင့်ကြံခြင်းကိုသာ ပြန်လည်စတင်လေသည်။

သူ ကျင့်ကြံနေစဉ် ခန်းမအတွင်းရှိ နှလုံးသားမိစ္ဆာအရှိန်အဝါများမှာ ပိုမိုပြင်းထန်လာသဖြင့် ချန်လော့နှင့် ဖန်ရှန်းတို့မှာ နောက်ဆုတ်ခဲ့ကြရလေသည်။

"တကယ့်ကို အရှုံးပဲဗျာ။ ဆုလာဘ်က ဒီလိုမှန်းသိရင် ဘာလို့ ဒီလောက် အန္တရာယ်အဖြစ်ခံပြီး သွားပါ့မလဲ"

ဖန်ရှန်းသည် ခန်းမအပေါက်ဝတွင် ရပ်ကာ မိမိလက်ထဲရှိ ကျောက်စိမ်းပေလွှာကို ကြည့်ရင်း စိတ်ပျက်လက်ပျက် ပြောလိုက်သည်။

ထိုကျောက်စိမ်းပေလွှာအတွင်း၌ ဝိညာဉ်ဂျင်ဆင်း စိုက်ပျိုးနည်းပညာရပ်ပါရှိပြီး ချန်လော့၏ လက်ထဲတွင်မူ မီးထိန်းချုပ်ခြင်း ပညာရပ် ပါရှိလေသည်။

နှစ်ခုစလုံးမှာ ဆေးဖော်စပ်ခြင်း နှင့် သက်ဆိုင်သည့် ဗဟုသုတများသာ ဖြစ်ကြ၏။

တာဝန်တွင် ဖော်ပြထားသည့်အတိုင်း ဆေးဘုရင်တောင်ထွတ်မှ ပညာရပ်များပင် ဖြစ်သည်။

သို့သော် ဤဗဟုသုတမျိုးမှာ ဖန်ရှန်း လိုချင်သည့်အရာ မဟုတ်ပေ။ သူသည် လာမည့်နှစ်တွင် တောင်ပေါ်မှ ဆင်းရတော့မည်ဖြစ်ရာ အဆင့်တက်လှမ်းနိုင်ရန်အတွက် လိုအပ်သော အရင်းအမြစ်များရရှိရန် ဤတာဝန်ကို အန္တရာယ်ကြားမှ လုပ်ဆောင်ခဲ့ခြင်း ဖြစ်သည်။

နောက်ဆုံးတွင်မူ ပြန်လည်ရောင်းချရန်မှလွဲ၍ အသုံးမဝင်သော ဝိညာဉ်ဂျင်ဆင်း စိုက်ပျိုးနည်းပညာရပ်ကိုသာ ရရှိခဲ့လေ၏။

"အကောင်းဘက်ကပဲ တွေးပါဗျာ၊ တာဝန်ကျရှုံးသွားတာထက်စာရင် တော်သေးတာပေါ့။" ချန်လော့က သူ့ကို နှစ်သိမ့်လိုက်သည်။

"ဆေးဖော်စပ်တာနဲ့ ပတ်သက်တဲ့ ဗဟုသုတတွေကလည်း ဝိညာဉ်ကျောက်တုံးတချို့တော့ ရနိုင်ပါတယ်။ ဒါကို ပြန်ရောင်းပြီး တခြားလိုအပ်တဲ့ အရင်းအမြစ်တွေနဲ့ လဲလို့ရတာပဲလေ။"

"ဝိညာဉ်ဂျင်ဆင်း စိုက်ပျိုးနည်းက ဝိညာဉ်စိုက်ပျိုးသူတွေအတွက် ပညာရပ်လေဗျာ၊ မင်းရတဲ့ မီးထိန်းချုပ်တဲ့ အတတ်လောက် မကောင်းပါဘူး။" ဖန်ရှန်းသည်လည်း လက်တွေ့ဘဝကို လက်ခံလိုက်ရလေသည်။

မသေမျိုးဆရာသခင် ဝူဝေ၏ သဘောထားကို ကြည့်ခြင်းအားဖြင့် ထိုဆရာသခင်သည် သူ့ကို အထင်မကြီးကြောင်း သိသာလှ၏။ သို့မဟုတ်ပါက ချန်လော့ကို မီးထိန်းချုပ်ခြင်းပညာရပ်ပေးပြီး သူ့ကို ဝိညာဉ်ဂျင်ဆင်း စိုက်ပျိုးနည်းပညာရပ် ပေးလိမ့်မည်မဟုတ်ပေ။

"ကျွန်တော့်မှာသာ ခင်ဗျားလို ပါရမီမျိုး ရှိရင် သိပ်ကောင်းမှာပဲ။" ဖန်ရှန်း၏ မျက်လုံးထဲတွင် မနာလိုစိတ် အနည်းငယ် ဖြတ်ပြေးသွား၏။

တစ်နှစ်မပြည့်မီ ချီသန့်စင်ခြင်း ဆဋ္ဌမအဆင့်သို့ ရောက်ရှိခြင်းမှာ အုတ်မြစ်တည်ဆောက်ခြင်းအဆင့်သို့ တက်လှမ်းရန် လက်တစ်ကမ်းအလိုပင် ဖြစ်ပေသည်။

"ကျွန်တော်က ဝိညာဉ်အမြစ် သုံးခုပဲ ရှိတာပါဗျာ၊ ဂိုဏ်းထဲမှာ ကျွန်တော့်ထက် သာတဲ့သူတွေ အများကြီး ရှိပါတယ်။" ချန်လော့က အေးဆေးစွာပင် ပြန်ဖြေလိုက်သော်လည်း မိမိ၏ အခြေအနေမှန်ကိုမူ သူသာလျှင် သိပေသည်။

"ပြောရုံ ပြောကြည့်တာပါဗျာ။ ဆေးဖော်စပ်တဲ့နေရာမှာ အရေးကြီးဆုံးက ဆေးဝါးဗေဒနဲ့ ဝိညာဉ်ပစ္စည်းတွေရဲ့ ဆေးဖက်ဝင် ဂုဏ်သတ္တိတွေကို ခွဲခြားတတ်ဖို့ပဲ၊ အဲ့ဒါကမှ တန်ဖိုးရှိတာ။" ဖန်ရှန်းသည် ခဏမျှထပ်မံညည်းညူပြီးနောက် ချန်လော့ကို နှုတ်ဆက်၍ ထွက်ခွာသွားလေသည်။

ချန်လော့သည် နောက်ဘက်တောင်ရှိ ဂူသင်္ချိုင်းသို့ တစ်ယောက်တည်း ပြန်လာခဲ့သည်။

ဂူသင်္ချိုင်းစောင့် စီနီယာအစ်ကိုကြီး ထွက်ခွာသွားပြီးနောက် ဤနေရာမှာ ထူးထူးခြားခြား တိတ်ဆိတ်နေ၏။

မိမိ၏အခန်းတွင် ထိုင်နေရင်း ချန်လော့၏စိတ်မှာ တည်ငြိမ်သွားပြီး ယခုတစ်ခေါက် တောင်ပေါ်မှ ဆင်းခဲ့ရသော အတွေ့အကြုံကို ပြန်လည်သုံးသပ်လေသည်။

"ဒီတာဝန်ကို လက်ခံခဲ့တာ နည်းနည်းတော့ အန္တရာယ်များသွားတယ်။"

ချန်လော့၏ မူလအစီအစဉ်မှာ အဖွဲ့နှင့်လိုက်သွားပြီး အတွေ့အကြုံယူရန်နှင့် အခြားတောင်ထွတ်များမှ နတ်ဘုရားစွမ်းရည် နည်းစနစ်များနှင့် လဲလှယ်ရန် ဖြစ်သည်။

သို့သော် တာဝန်မှာ လမ်းချော်သွားခဲ့ပြီး ဆုလာဘ်မှာ ဆေးဘုရင်တောင်ထွတ်မှ မီးထိန်းချုပ်ခြင်းအတတ် ဖြစ်လာခဲ့သည်။

"ကျင့်ကြံခြင်းလမ်းစဉ်မှာ မိမိရဲ့ မူလရည်ရွယ်ချက်ကို စောင့်ထိန်းရမယ်၊ ပြင်ပအရာတွေကြောင့် စိတ်မလှုပ်ရှားစေရဘူး။"

"ဒီတစ်ခေါက်မှာတော့ ဆုလာဘ်ကို မက်မောပြီး နောက်ကွယ်က အန္တရာယ်တွေကို လျစ်လျူရှုမိသွားတယ်။ ဒါဟာ ကျိုးကြောင်းဆီလျော်တဲ့ ချဉ်းကပ်မှု မဟုတ်ဘူး၊ နောင်ဆိုရင် ပိုပြီး သတိထားရမယ်။"

မိမိကိုယ်ကို သတိပေးပြီးနောက် ချန်လော့သည် တာဝန်အတွင်း ကြုံတွေ့ခဲ့ရသော တိုက်ပွဲများကို ပြန်လည်အမှတ်ရလေ၏။

ပထမဆုံးမှာ ကူဝမ်တောင်ထွတ်မှ စီနီယာအစ်မ ချူးဟုန်ယဲ့ နှင့် အဆိပ်ကိုးပါးတောင်ကြားမှ ပေါင်ယွဲ့တို့၏ တိုက်ပွဲဖြစ်၏။

ထိုသူနှစ်ဦး တိုက်ခိုက်ကြစဉ် ပတ်ဝန်းကျင်တစ်ခုလုံးမှာ ကူအဆိပ်ကောင်များနှင့် အဆိပ်ရှိသော ပိုးမွှားများဖြင့် ပြည့်နှက်နေခဲ့သည်။ ၎င်းမှာ သိုင်းပညာရှင်များ၏ တိုက်ခိုက်ပုံနှင့် လုံးဝ ကွာခြားလှသည်။

ဒုတိယမှာ မသေမျိုးကြိုးကြာငှက် နှင့် ယန်ရှီဂိုဏ်းမှ သံမဏိအလောင်းတို့၏ အုတ်မြစ်တည်ဆောက်ခြင်းအဆင့် တိုက်ပွဲဖြစ်၏။

အုတ်မြစ်တည်ဆောက်ခြင်းအဆင့်သို့ ရောက်ရှိပြီးနောက် အင်အားပြိုင်ဆိုင်မှုမှာ နတ်ဘုရားစွမ်းအင်များနှင့် မန္တန်စွမ်းအားများဆီသို့ ကူးပြောင်းသွားလေသည်။

ချီသန့်စင်ခြင်းအဆင့် ကျင့်ကြံသူများသည် အုတ်မြစ်တည်ဆောက်ခြင်းအဆင့် ကျင့်ကြံသူများကို ပြန်လည်ခုခံနိုင်စွမ်း မရှိသလောက်ပင် ဖြစ်သည်။

နောက်ဆုံးမှာတော့ ချန်လော့ကိုယ်တိုင် လေလွင့်ကျင့်ကြံသူကို သတ်ဖြတ်ခဲ့သည့် မြင်ကွင်းဖြစ်၏။

နတ်ဝိညာဉ်နည်းစနစ် ကို ကြိုတင်မြှင့်တင်ထားသဖြင့် သူသည် ပြိုင်ဘက်ကို အပြတ်အသတ် အသာစီးဖြင့် သတ်ဖြတ်နိုင်ခဲ့သည်။

အစမှအဆုံး ပြိုင်ဘက်မှာ သူ့ကို ထိပင်မထိနိုင်ခဲ့ရာ ဤသည်မှာ ဝူတောက်တောင်ထွတ်၏ ကျင့်စဉ်အသာစီးရမှုကို အပြည့်အဝ အသုံးချနိုင်ခြင်းပင် ဖြစ်သည်။

"နတ်ဝိညာဉ်နည်းစနစ်ရဲ့ လမ်းကြောင်းကတော့ မှန်နေပြီ၊ လိုအပ်နေတာက ခံစစ်ပဲ။"

ပေါင်ယွဲ့ ထိန်းချုပ်ထားသော လင်းနို့များနှင့် ပင့်ကူများကို ပြန်လည်စဉ်းစားရင်း ထိုအရာများကို ဖြေရှင်းရန် နည်းလမ်းကောင်း သူ မစဉ်းစားမိသေးပေ။ ၎င်းတို့မှာ အရေအတွက် များပြားလှသဖြင့် သူ၏ ဝိညာဉ်ချီစွမ်းအားမှာ အချိန်ကြာမြင့်စွာ တောင့်ခံနိုင်မည် မဟုတ်ပေ။

"တခြား အကာအကွယ်ဆိုင်ရာ နတ်ဘုရားစွမ်းရည်ကို ထပ်ပြီး ကျင့်ကြံနေရင်တော့ အာရုံများသွားလိမ့်မယ်။ အုတ်မြစ်တည်ဆောက်ခြင်းအဆင့် ရောက်မှပဲ ဒါကို ဖြေရှင်းတာ ပိုကောင်းမယ်။ အဲ့ဒီအချိန်ကျရင် ရွေးချယ်စရာတွေ အများကြီး ရှိလာမှာပဲ။"

ကျင့်ကြံခြင်းတွင် အရေးကြီးဆုံးမှာ မိမိ၏ အဆင့် ပင် ဖြစ်သည်။ ထိုအချက်ကို နားလည်ပြီးနောက် ချန်လော့သည် ထိုပြဿနာကို ဘေးဖယ်ထားလိုက်လေ၏။

သူသည် မသေမျိုးဆရာသခင် ဝူဝေထံမှ ရရှိသော မီးထိန်းချုပ်ခြင်းပညာရပ်ကို ယူကာ ဝိညာဉ်ချီများ ထည့်သွင်း၍ ဗဟုသုတများကို လေ့လာလေသည်။ ယခုတစ်ခေါက်တွင် ပြင်ပဦးနှောက် ဆယ်ခုကျော်ထံမှ တုံ့ပြန်မှု ရရှိခဲ့ရာ အများအပြားမှာ ယခင်သက်ရှင်စဉ်က မီးထိန်းချုပ်ခြင်းပညာရပ်ကို လေ့လာခဲ့ဖူးသူများ ဖြစ်ကြ၏။

"ဆေးဖော်စပ်တာကို ငါ စပြီး လေ့လာရမယ်။ ဆေးလုံးတွေရဲ့အကူအညီနဲ့ဆိုရင် ကျင့်ကြံခြင်းလမ်းစဉ်က ပိုပြီး ခရီးပေါက်နိုင်တယ်။"

အခြားသူများ ဆေးဖော်စပ်ရာတွင် ပါရမီနှင့် ကုန်ကျစရိတ်ကို ထည့်တွက်ရသော်လည်း ချန်လော့အတွက်မူ ထိုအရာများကို စိုးရိမ်ရန်မလိုပေ။

သူ စုဆောင်းထားသော ပြင်ပဦးနှောက်များထဲတွင် အခြေခံဆေးဆရာအချို့ ပါဝင်နေသည်။ သူတို့မှာ အဆင့်မြင့်ဆေးလုံးများကို မဖော်စပ်နိုင်သော်လည်း ချီနှင့်သွေးဆေးလုံး ကဲ့သို့သော အဆင့်နိမ့်ဆေးလုံးများကိုမူ အလွယ်တကူ ဖော်စပ်နိုင်ကြ၏။

သို့သော် ထိုဦးနှောက်များမှာ အလွန်ပင် မပြည့်စုံသဖြင့် လိုအပ်သော ဗဟုသုတများကို သူ ထပ်မံ ရှာဖွေရဦးမည် ဖြစ်သည်။

ချန်လော့ သုံးသပ်မှုများ ပြီးဆုံးချိန်တွင် အပြင်ဘက်၌ မှောင်နေပြီ ဖြစ်သည်။

ညအချိန်တွင် ဂူသင်္ချိုင်းမှာ ထူးထူးခြားခြား တိတ်ဆိတ်နေ၏။

ယခင်က ဂူသင်္ချိုင်းစောင့် စီနီယာအစ်ကိုကြီး၏ ဟောက်သံ ရှိနေသော်လည်း ယခုမူ ပိုးမွှားသံပင် မကြားရတော့ဘဲ တိတ်ဆိတ်လွန်းနေသည်။

"ချီသန့်စင်ခြင်း ဆဋ္ဌမအဆင့်ကို တက်လှမ်းဖို့ အချိန်ကောင်းပဲ။ အပြင်ထွက်ပြီး စီနီယာတွေအတွက်မြေကြီး ပြန်ဆွပေးဦးမှ။"

ချန်လော့သည် ဂေါ်ပြားနှင့် သားရေလက်အိတ်ကို ယူကာ ဂူသင်္ချိုင်းသို့ ထွက်လာခဲ့၏။ လက်တစ်ဖက်တွင် မီးအိမ်၊ လက်တစ်ဖက်တွင် ဂေါ်ပြားဖြင့် သူ၏လှုပ်ရှားမှုများမှာ အလွန်ပင် ကျွမ်းကျင်နေပြီ ဖြစ်၏။

သူ၏ ဦးလေးစန်း သင်ပေးခဲ့သော လက်မှုပညာများကို သူ လုံးဝ မမေ့သေးပေ။

နာရီဝက်ခန့် ကြာပြီးနောက် ချန်လော့သည် မြေဖို့ခြင်းကို အဆုံးသတ်ကာ သက်ပြင်းချလိုက်သည်။

ယခုအခါ သူသည် ပြင်ပဦးနှောက် ၁၂၀ ကို ထိန်းချုပ်နိုင်ပြီဖြစ်ရာ ကျင့်ကြံစဉ်အတွင်း သူ၏ အတွေးအခေါ်များမှာ ပိုမို ထက်မြက်လာလေ၏။

"နောက်တစ်ဆင့်ကတော့ ချီသန့်စင်ခြင်း နှောင်းပိုင်းအဆင့်ကို တက်လှမ်းဖို့ အခွင့်အရေး ရှာရမယ်။"

ချန်လော့၏ လက်ရှိအဆင့်မှာ ဆဋ္ဌမအဆင့် ဖြစ်သည်။ ဝူတောက်တောင်ထွတ်တွင် ဆဋ္ဌမအဆင့်ရှိသူ အများအပြား ရှိသော်လည်း သတ္တမအဆင့်မှာမူ လုံးဝ ကွဲပြားသွား၏။

တစ်တောင်ထွတ်လုံးတွင် ထိုအဆင့်ရှိသူ လက်ချိုးရေတွက်ရုံမျှသာ ရှိသည်။ ဤအဆင့်မှစတင်ကာ ပါရမီ၏ ကွာခြားချက်မှာ ပိုမို ကျယ်ပြန့်လာမည် ဖြစ်သည်။

ချန်လော့၏ ဝိညာဉ်ချီစီးကြောင်းမှာ ကိုးခုအထိ ရောက်ရှိလာသော်လည်း ဤနေရာတွင် ကိုးဆိုသော အရေအတွက်မှာ ကန့်သတ်ချက် ဖြစ်နေပုံရ၏။

ချီသန့်စင်ခြင်း နှောင်းပိုင်းအဆင့်သို့ ရောက်ရန်အတွက် ဤအရေအတွက်ကို သူ ကျော်ဖြတ်ရမည် ဖြစ်သည်။

"အုတ်မြစ်တည်ဆောက်ခြင်းကို ကြိုးစားဖို့ဆိုရင် ဝိညာဉ်ချီမြွေအခုတစ်ရာ လိုတာပဲ၊ ဒီကွာဟချက်က ကြီးလွန်းနေတယ်။"

သူသည် ဖုန်သန့်စင်ခြင်းနည်းစနစ်ကို စမ်းသပ်ထုတ်ဖော်လိုက်ရာ အခန်းအတွင်းရှိ မသန့်စင်သောအရာများ ချက်ချင်း ပျောက်ကွယ်သွားလေသည်။

သူ၏စိတ်ထဲရှိ အလောင်းခြောက်ဦးနှောက်ထံမှ သတင်းစကား နှစ်ခု ရုတ်တရက် ရောက်ရှိလာသည်။

'မိစ္ဆာသားရဲ ရဲ့သွေးအဆီအနှစ်ကို ထုတ်ယူ သန့်စင်ပြီးအသုံးပြုမယ်ဆိုရင် ချီသန့်စင်ခြင်း နှောင်းပိုင်းအဆင့်ကို အပြည့်အဝဝင်ရောက်နိုင်ပြီး နဝမအဆင့်အထိ တိုက်ရိုက် ရောက်နိုင်တယ်။'

'ခြင်ဆီထုတ်ယူခြင်းနည်းစနစ်ကို သုံးပြီး တခြားသူတွေရဲ့ဝိညာဉ်စွမ်းအားကို သိမ်းပိုက်တာကလည်း လက်ရှိအဆင့်ကို ကျော်ဖြတ်နိုင်တယ်။'

ချန်လော့သည် အုတ်မြစ်တည်ဆောက်ခြင်းအဆင့် ဦးနှောက်နှစ်ခုကို ထပ်မံ မေးမြန်းကြည့်ရာ တုံ့ပြန်မှုများ ရရှိခဲ့ပြန်သည်။

'ဝိညာဉ်စုစည်းဆေးလုံး နဲ့ အဆင့်တက်ပါ။'

'ဗာမီလီယံယန်ပန်းကို စားသုံးပြီး အဆင့်တက်လို့ ရတယ်။'

ဤနည်းလမ်းလေးခုအနက် အလောင်းခြောက်ဦးနှောက်ပေးသော ပထမနည်းလမ်း နှစ်ခုမှာ လက်လှမ်းမမီနိုင်ပေ။ မိစ္ဆာသားရဲ၏သွေးအဆီအနှစ်ကို ထုတ်ယူရန်အတွက် ဝူတောက်တောင်ထွတ်တွင် မသေမျိုးကြိုးကြာငှက် တစ်ကောင်သာ ရှိပြီး ထိုကြိုးကြာ၏ သွေးအဆီအနှစ်ကို သွားယူရန်မှာ ကိုယ့်ကိုယ်ကို သေတွင်းထဲ ပို့ခြင်းနှင့် အတူတူပင် ဖြစ်သည်။

ဒုတိယနည်းလမ်းဖြစ်သော သူတပါး၏ စွမ်းအားကို သိမ်းပိုက်ခြင်းမှာလည်း သူ လုံးဝ မလုပ်လိုသော အရာဖြစ်သည်။

စိတ်အချရဆုံးမှာ ဂိုဏ်းမှ စီနီယာကြီးနှစ်ဦး ပေးသော နည်းလမ်းများပင် ဖြစ်သည်။

"ဝိညာဉ်စုစည်းဆေးလုံးနဲ့ ဗာမီလီယံယန်ပန်းအကြောင်းကို စုံစမ်းကြည့်လို့ ရတယ်။ ဂျူနီယာညီမလေး ဟွမ်ယင်းကို မေးခိုင်းကြည့်ရမယ်။"

ချန်လော့သည် ဖြစ်နိုင်ချေရှိသော အစီအစဉ်များကို စဉ်းစားလေသည်။

"ဒီအခွင့်အရေးကို သုံးပြီး ဆေးဖော်စပ်တာကိုလည်း လေ့လာရမယ်။ နောင်ကျရင် အုတ်မြစ်တည်ဆောက်ခြင်း ဆေးလုံးကို ကိုယ်တိုင် ဖော်စပ်ရဦးမှာပဲလေ။"

ခဏမျှ ချိန်ဆပြီးနောက် ချန်လော့သည် ဆုံးဖြတ်ချက် တစ်ခု ချလိုက်၏။

သူသည် မနက်ဖြန်မနက်တွင် စီနီဂျူနီယာညီမလေး ဟွမ်ယင်းထံ သွားရောက်ကာ ဆေးမီးဖိုတစ်ခု ရှာခိုင်းတော့မည် ဖြစ်သည်။

အခန်း ၉၈ - အတွေ့အကြုံ စုဆောင်းခြင်း

နံနက်စောစောအချိန်

ကျယ်ဝန်းသော တာဝန်လွှဲပြောင်းရေးရင်ပြင်ကြီးတွင် သင်ကြားဟောပြောခြင်းစင်မြင့်မှလွဲ၍ ကျန်နေရာများ၌ တပည့်များဖြင့် စည်ကားလျက်ရှိပေသည်။

တာဝန်များထမ်းဆောင်ရန် တောင်အောက်သို့ ဆင်းသွားခဲ့ကြသူ အများအပြားသည် ဤနေရာတွင် အရင်းအမြစ်များကို ဖလှယ်ကြလေသည်။ ဥပမာအားဖြင့် ဖန်ရှန်း သည် တာဝန်တစ်ခုမှ ရရှိခဲ့သော ဝိညာဉ်ဂျင်ဆင်း ပျိုးထောင်နည်းပညာရပ် ကို ဤနေရာ၌ပင် အရောင်းအဝယ် ပြုလုပ်မည်ဖြစ်သည်။

ချန်လော့ သည် ပတ်ချာလှည့်ပတ် ကြည့်ရှုပြီးနောက်ထောင့်တစ်နေရာတွင် အဆောင်များ ရောင်းချနေသော ဟွမ်ယင်း ကို တွေ့လိုက်ရ၏။

ရက်အနည်းငယ် ကြာပြီးနောက် ဟွမ်ယင်း၏ စွမ်းအားမှာ ထပ်မံတိုးတက်လာခဲ့ပြီး ချီသန့်စင်ခြင်း ပဉ္စမအဆင့်သို့ ရောက်ရှိသွားခဲ့ပြီ ဖြစ်သည်။

ဤသည်မှာ ဤကာလအတွင်း စီနီယာအစ်မ ရွှမ်းအား အဆောင်များ ကူညီရောင်းချပေးရင်း အကျိုးအမြတ်များစွာ ရရှိခဲ့ကြောင်းကို ဖော်ပြနေပေသည်။

သို့သော်လည်း သူမနောက်သို့ အမြဲတစေ လိုက်ပါလေ့ရှိသော ဖူအန်းကိုမူ မတွေ့ရချေ။ သူသည် သေဆုံးသွားခဲ့ပြီ သို့မဟုတ် တာဝန်တစ်ခုအတွက် တောင်အောက်သို့ တစ်ယောက်တည်း ဆင်းသွားခဲ့ခြင်းလည်း ဖြစ်နိုင်ပေသည်။

"စီနီယာအစ်ကို ချန်လား။ ပြန်ရောက်လာပြီပဲ။"

ချန်လော့ကို မြင်လိုက်ရသောအခါ ဟွမ်ယင်း၏ မျက်နှာပေါ်တွင် ဝမ်းသာအားရ အံ့သြသွားသော အမူအရာ ပေါ်လာခဲ့၏။

သူတို့နှစ်ဦးသည် ဂိုဏ်းထဲသို့ အတူတကွ ဝင်ရောက်လာခဲ့ကြသူများဖြစ်ပြီး ရှဲ့နိုင်ငံ မှ လာသော နိုင်ငံသားချင်းများလည်း ဖြစ်ကြပေသည်။

ဟွမ်ယင်းအတွက်မူ ချန်လော့သည် သူမ၏ ဝင်ငွေရပေါက်ရလမ်းတစ်ခုလည်း ဖြစ်ပြီး၊ အခြားသော ပတ်သက်မှုများစွာလည်း ရှိနေခြင်းကြောင့် သူတို့၏ ခင်မင်ရင်းနှီးမှုမှာ သဘာဝကျကျပင် အခြားသူများထက် ပိုမိုနက်ရှိုင်းလေသည်။

"တာဝန်က ဘယ်လိုနေလဲ။ အစ်ကို ပူးပေါင်းတာဝန်တစ်ခုမှာ ပါဝင်ခဲ့တယ်လို့ ဖူအန်းဆီကနေ ကြားလိုက်တယ်။ အဲဒါက ချီသန့်စင်ခြင်း ပဉ္စမအဆင့်နဲ့အထက် စီနီယာအစ်ကိုတွေမှ အရည်အချင်းပြည့်မီတာလေ။"

ဟွမ်ယင်း၏ အသံမှာ စကားပြောနေရင်းပင် တဖြည်းဖြည်းတိုးဝင်သွားခဲ့ကာ၊ သူမ၏ မျက်လုံးများမှာ ပြူးကျယ်သွားပြီး ပါးစပ်မှာလည်း အံ့သြတကြီး ဟသွားခဲ့လေ၏။

"အစ်.. အစ်ကို.. အစ်ကို ချီသန့်စင်ခြင်း ဆဋ္ဌမအဆင့် ရောက်သွားပြီလား။"

"အစ်ကို နောက်တစ်ဆင့် ထပ်တက်သွားပြန်ပြီပေါ့"

ဟွမ်ယင်းမှာ ကြီးမားသော ထိုးနှက်ချက်တစ်ခုကို ခံစားလိုက်ရသည်။

သူမသည် ဝိညာဉ်အမြစ်လေးခုပါဝင်သော ပါရမီကို ပိုင်ဆိုင်ထားသူဖြစ်ရာ၊ ယုတ္တိတန်တန် စဉ်းစားကြည့်မည်ဆိုလျှင် သူမနှင့် ချန်လော့ကြားတွင် ဤမျှကြီးမားသော ကွာဟချက်မျိုး မရှိသင့်ချေ။

အထူးသဖြင့် သူမသည် မကြာသေးမီကမှ သူမစုဆောင်းထားသော ဝိညာဉ်ကျောက်တုံးများကို ယန်ချီဆေးလုံး တစ်လုံးနှင့် လဲလှယ်ခဲ့ပြီး၊ ထိုဆေးလုံး၏ အာနိသင်ဖြင့် ချီသန့်စင်ခြင်း ပဉ္စမအဆင့်သို့ တစ်ဟုန်ထိုး တက်လှမ်းနိုင်ခဲ့ကာ၊ ချန်လော့၏ အဆင့်ကို လိုက်မီသွားပြီဟု သူမ ထင်မှတ်ထားခဲ့သည်။

သို့သော် ရက်အနည်းငယ်အတွင်းမှာပင် သူက နောက်ထပ်တစ်ဆင့် ထပ်မံတက်လှမ်းသွားလိမ့်မည်ဟု သူမ မထင်မှတ်ထားခဲ့ချေ။

"ငါ ဆေးမီးဖိုတစ်ခု ဝယ်ချင်တယ်။ နင့်မှာ အဲဒါနဲ့ပတ်သက်ပြီး အဆက်အသွယ် ရှိလား။"

ချန်လော့သည် ဟွမ်ယင်း၏ အံ့အားသင့်နေမှုကို လျစ်လျူရှုကာ သူ၏ ရည်ရွယ်ချက်ကို ပြောလိုက်၏။

သူယခု လုပ်ဆောင်ရန် လိုအပ်နေသည်မှာ အလွန်ရှင်းလင်းလှပေသည်။

ဆေးဖော်စပ်ခြင်းကို သင်ယူရန်နှင့် ချီသန့်စင်ခြင်း နှောင်းပိုင်းအဆင့်သို့ ရောက်ရှိရန် ကြိုးပမ်းဖို့ပင် ဖြစ်သည်။

"ဆေးမီးဖို ဟုတ်လား။ အဆောင်ဆွဲတဲ့ စုတ်တံ မဟုတ်ဘူးလား။"

ဟွမ်ယင်းမှာ သူမ နားကြားမှားသည်ဟုပင် ထင်လိုက်မိသည်။

"အေး ဆေးဖော်ဖို့အတွက် ဆေးမီးဖိုလေ။ ငါ လောလောဆယ် ဆေးပညာသင်ဖို့စီစဉ်ထားတယ်။ အာ.. ပြီးတော့ နင်ငါ့ကို ဆေးပညာစာအုပ်တစ်အုပ်လောက် ရှာပေးနိုင်ရင် ပိုကောင်းမယ်။" ချန်လော့က ထပ်လောင်းပြောလိုက်သည်။

"အစ်ကိုက ဆေးပညာပါ သင်ချင်တာလား။ အစ်ကိုက အဆောင်ဆရာ မဟုတ်ဘူးလား။"

ဟွမ်ယင်းမှာ မတ်တတ်ရပ်ကာ ချန်လော့၏ အင်္ကျီကို ဆွဲကိုင်၍ လျှောက်မလုပ်ရန် ပြောပစ်လိုက်ချင်စိတ် ပေါက်သွားလေသည်။

သူ၏ အလွန်ကောင်းမွန်သော အဆောင်ဆရာပါရမီကို လျစ်လျူရှုကာ ဆေးဖော်စပ်ခြင်းကို သွားရောက်သင်ယူမည်လော။

ဆေးဖော်စပ်ခြင်းဆိုသည်မှာ လူတိုင်း သင်ယူနိုင်သောအရာ ဖြစ်နေ၍လား။ ပါရမီပြဿနာကို ဘေးဖယ်ထားလျှင်ပင်၊ ကုန်ကျသွားမည့် အရင်းအမြစ်များဖြင့် ဆေးလုံးမည်မျှ ဝယ်ယူနိုင်မည်နည်း။

၎င်းသည် ကျင့်ကြံခြင်းကို ဆိုးရွားစွာ နှောင့်နှေးစေရုံသာမက ကြိုးပမ်းအားထုတ်မှုအားလုံး အလဟဿ ဖြစ်သွားနိုင်သည့် အန္တရာယ်လည်း ရှိနေပေသည်။

"ဝိညာဉ်ကျောက်တုံးတွေအတွက်တော့ နင် စိတ်ပူစရာမလိုပါဘူး။ ငါ လောလောဆယ် ကာမိအောင် ဖုန်သန့်စင်ခြင်းအဆောင် တချို့ ဆွဲထားတယ်။ တခြားအဆောင်တွေ ဆွဲတတ်သွားရင် လိုငွေကို ငါပြန်ဖြည့်ပေးပါ့မယ်။"

ချန်လော့သည် သူ၏ ဝတ်ရုံထဲသို့ လက်နှိုက်ကာ ထူထဲသော အဆောင်အထပ်လိုက်ကြီးကို ဆွဲထုတ်လိုက်၏။

ဤအဆောင်များအားလုံးမှာ ပြီးခဲ့သည့်ညက သူရေးဆွဲထားခဲ့ခြင်းဖြစ်သည်။

ချိသန့်စင်ခြင်း ဆဋ္ဌမအဆင့်သို့ ရောက်ရှိပြီးနောက် သူ၏ အဆောင်ရေးဆွဲသည့် အမြန်နှုန်းမှာ သိသိသာသာ တိုးတက်လာခဲ့သည်။

"သြော် ဒါနဲ့၊ ပြီးခဲ့တဲ့တစ်ခေါက်က နင့်ကိုပြောပြဖို့ ဖူအန်းကို ငါမှာလိုက်တဲ့ အဆောင်မိတ္တူစာအုပ်တွေရော နင်ရှာတွေ့ပြီလား။"

"အော်.. ဟုတ်.. ဒီမှာ ရှိပါတယ်။ စစ်ဆေးခြင်းအဆောင်အပြင် တခြားအဆောင်အမျိုးအစားတွေရဲ့ အဆောင်မိတ္တူတွေလည်း ပါပါတယ်။"

အဆောင်လုပ်ငန်းအကြောင်း ပြောလာသောအခါ ဟွမ်ယင်းမှာ လျင်မြန်စွာပင် ပုံမှန်အတိုင်း ပြန်ဖြစ်သွားလေသည်။

သူမက စောစောက ရှာတွေ့ထားသော အဆောင်မိတ္တူများကို ချန်လော့အား ကမ်းပေးလိုက်သည်။

ဤအရာများမှာ ၎င်းတို့ချည်းသက်သက်ဆိုလျှင် တန်ဖိုးသိပ်မရှိလှချေ။

သူမသည် စီနီယာအစ်မ ရွှမ်းထံမှ အကူအညီတောင်းကာ လွယ်ကူစွာ ရရှိခဲ့ခြင်းသာ ဖြစ်သည်။

"ဝိညာဉ်ကျောက်တုံး ဘယ်လောက်ကျလဲ။"

"ငါးတုံး ပေးပါ။" ဟွမ်ယင်းက အရင်းဈေးကို ပြောလိုက်သည်။

"ကောင်းပြီလေ။"

ချန်လော့သည် ဝိညာဉ်ကျောက်တုံး ငါးတုံးကို ထုတ်ပေးလိုက်၏။

တာဝန်ထမ်းဆောင်စဉ်အတွင်း လေလွင့်ကျင့်ကြံသူများထံမှ ရရှိခဲ့သော နည်းပါးလှသည့် ဝိညာဉ်ကျောက်တုံးများမှာ ချက်ချင်းပင် တစ်ဝက်ခန့် ကုန်သွားလေတော့သည်။

"စီနီယာအစ်ကို၊ ဆေးဖော်စပ်တဲ့ကိစ္စကို သေချာစဉ်းစားပါဦး။ အဲဒါက အောက်ခြေမရှိတဲ့ တွင်းနက်ကြီးတစ်ခုပဲ။ ကျရှုံးသွားတဲ့သူတွေကို ကျွန်မ အများကြီး တွေ့ဖူးတယ်။"

ချန်လော့ ထွက်ခွာရန် ပြင်ဆင်နေသည်ကို မြင်သောအခါ ဟွမ်ယင်းမှာ မနေနိုင်ဘဲ သတိပေးလိုက်မိလေသည်။

"စိတ်မပူပါနဲ့။"

ချန်လော့သည် လက်ဝှေ့ယမ်းပြလိုက်ပြီးနောက် အဆောင်များ ရေးဆွဲရန် အလျင်အမြန် ပြန်သွားလေ၏။

ဆေးမီးဖိုနှင့် ဆေးပညာစာအုပ်အတွက် လုံလောက်သော ဝိညာဉ်ကျောက်တုံးများကို စုဆောင်းနိုင်ရန် ယနေ့ညတွင် တစ်ညလုံး မအိပ်ဘဲနေရန် သူ စီစဉ်ထားပေသည်။

နောက်တစ်နေ့ နံနက်စောစော အရုဏ်တက်ချိန်မှာပင်

ချန်လော့သည် ပြီးခဲ့သည့်ညက ညဉ့်နက်သည်အထိ ရေးဆွဲထားခဲ့သော အဆောင်အခုသုံးဆယ်ကျော်ကို ဆုပ်ကိုင်လျက် တာဝန်လွှဲပြောင်းရေး ရင်ပြင်သို့ ထပ်မံရောက်ရှိလာခဲ့သည်။

ပြင်ပဦးနှောက်၏ အကူအညီဖြင့် သူသည် တစ်ညတည်းနှင့် အဆောင်သုံးဆယ့်နှစ်ခုကို ရေးဆွဲနိုင်ခဲ့၏။

သာမန်လူတစ်ယောက်သာ ဤမျှများပြားစွာ ရေးဆွဲရမည်ဆိုလျှင် သူတို့၏ စိတ်ဝိညာဥ်စွမ်းအင်များမှာ ကြာမြင့်စွာကပင် ခန်းခြောက်သွားလောက်ပြီ ဖြစ်သည်။

ဝိညာဉ်ချီကုန်ဆုံးမှုမှာ တစ်ပိုင်းဖြစ်သော်လည်း၊ စိတ်ဝိညာဥ်စွမ်းအင်ကို ပြန်လည်ဖြည့်တင်းရန်မှာ အခက်ခဲဆုံးဖြစ်သည်။

ကံကောင်းထောက်မစွာဖြင့် ချန်လော့တွင် လုံလောက်သော ပြင်ပဦးနှောက်များ ရှိနေသဖြင့် သူသည် စိတ်ဝိညာဥ်စွမ်းအင်များကို ငှားယူသုံးစွဲနိုင်လေသည်။

အဆောင်ရေးဆွဲနည်းကို သိရှိသော ဦးနှောက်အနည်းငယ်သည် အလှည့်ကျ တာဝန်ယူနိုင်သဖြင့် ထိုပြဿနာကို ဖြေရှင်းနိုင်ခဲ့သည်။

"အစ်ကို စစ်ဆေးခြင်းအဆောင်ကို သင်ယူတတ်မြောက်သွားပြီလား။"

ဟွမ်ယင်းသည် ချန်လော့ ထုတ်ပြလိုက်သော အဆောင်အသစ်စက်စက်များကို ကြည့်ကာ လုံးဝ ဆွံ့အသွားလေ၏။

ဤစီနီယာအစ်ကိုချန်မှာ သာမန်လူတစ်ယောက် မဟုတ်ကြောင်း သူမ ယခု နားလည်သွားခဲ့ပြီဖြစ်သည်။ မည်သူမျှ သူမကိုယ်သူမ ချန်လော့နှင့် နှိုင်းယှဉ်ရန် မကြိုးစားသင့်ချေ။

"ငါ့ဆီမှာ တခြားအဆောင်အမျိုးအစား နှစ်ခုလည်း ရှိသေးတယ်။ နင် ဈေးဖြတ်ကြည့်လိုက်လေ။"

ချန်လော့သည် အဆောင်များကို ခွဲခြားလိုက်၏။ အရေအတွက် ပိုနည်းသော ဘယ်ဘက်အခြမ်းတွင် ငါးခုသာရှိပြီး ၎င်းတို့မှာ စိတ်ငြိမ်အဆောင် များ ဖြစ်ကြသည်။

ညာဘက်တွင် မီးလောင်ကျွမ်းအဆောင် ခုနစ်ခုရှိပြီး ကျန်သည့်အရာများမှာ စစ်ဆေးခြင်းအဆောင်များ ဖြစ်ကြသည်။

အားလုံးမှာ ချီသန့်စင်ခြင်း အဆင့်တွင် ရေးဆွဲနိုင်သော အဆင့်နိမ့်အဆောင်များ ဖြစ်ကြ၏။

'သူက မီးလောင်ကျွမ်းအဆောင်နဲ့ စိတ်ငြိမ်အဆောင်ကိုတောင် ဆွဲနိုင်နေပြီလား'

ဟွမ်ယင်းမှာ စကားပင် မပြောနိုင်တော့ချေ။

စိတ်ငြိမ်အဆောင်မှာ အဆင့်နိမ့်အဆောင် ဖြစ်သော်လည်း ၎င်းကို ရေးဆွဲရန် အလွန်အမင်း ခက်ခဲလှသည်။

သူမ၏ သူငယ်ချင်းကောင်းဖြစ်သူ စီနီယာအစ်မ ရွှမ်းပင်လျှင် မကြာသေးမီကမှ သင်ယူတတ်မြောက်ခဲ့ခြင်းဖြစ်သည်။

၎င်းအတွက် သူမ အချိန်သုံးလ အပြည့်ယူခဲ့ရပေ၏။

"ဒီမှာ အစ်ကို လိုချင်တဲ့ ဆေးမီးဖိုနဲ့ ဆေးပညာအကျဉ်းချုပ် စာအုပ်။"

ဟွမ်ယင်းသည် မနေ့က သူမ သူတစ်ပါးကို အကူအညီတောင်း၍ လဲလှယ်ထားခဲ့သော ပစ္စည်းများကို သူမ၏ သိုလှောင်အိတ်ထဲမှ ထုတ်ယူလိုက်သည်။

စီနီယာအစ်ကိုချန်တွင် ဆေးဖော်စပ်ခြင်းပါရမီ အမှန်တကယ် ရှိနေနိုင်သည်ဟု သူမ ခံစားလိုက်ရသည်။

"ဈေးကွာဟချက်ကို ပြန်ဖြည့်ပေးစရာ မလိုတော့ဘူးလား။"

ချန်လော့မှာ အနည်းငယ် အံ့အားသင့်သွားသည်။ ၎င်းဖြင့် လုံလောက်လိမ့်မည်ဟု သူ မထင်ထားခဲ့ချေ။

"စိတ်ငြိမ်အဆောင်သာ မပါရင် နည်းနည်း လိုနေနိုင်တယ်။ စိတ်ငြိမ်အဆောင် အပါအဝင်ဆိုရင် ကျွန်မကတောင် အစ်ကို့ကို ဝိညာဉ်ကျောက်တုံး ခုနစ်တုံး အကြွေးပြန်ဆပ်ရဦးမယ်။"

ဟွမ်ယင်းက အဆောင်အမျိုးအစား သုံးခု၏ ဈေးနှုန်းများကို ရှင်းပြလိုက်၏။

ရေရှည် ပူးပေါင်းဆောင်ရွက်မှုကို ထိန်းသိမ်းထားနိုင်ရန် လိမ်လည်လှည့်ဖြားမှုမျိုး မရှိသင့်ချေ။

သို့မဟုတ်ပါက နောင်တစ်ချိန်တွင် ချန်လော့မှ အဆောင်များ၏ အမှန်တကယ် တန်ဖိုးကို သိရှိသွားပါက ဤပုဂ္ဂိုလ်ရေးဆက်သွယ်မှုနှင့် ပူးပေါင်းဆောင်ရွက်မှုမှာ ဆက်လက်တည်မြဲနိုင်တော့မည် မဟုတ်ချေ။

"အဲဒါတွေ ငါ့ကို မပေးနဲ့ဦး။ ငါ့အတွက် ဆေးဖော်စပ်နည်းတစ်ခုနဲ့ အခြေခံ ဝိညာဉ်ပစ္စည်းတချို့ကို ကူညီပြီး လဲလှယ်ပေးပါ။" ဝိညာဉ်ကျောက်တုံးများ ထုတ်ယူရန် ပြင်နေသော ဟွမ်ယင်း၏ လက်ကို ချန်လော့က ဖိ၍ ပြောလိုက်သည်။

"ဆေးဖော်စပ်နည်း ဟုတ်လား။" ဟွမ်ယင်း မျက်မှောင်ကြုတ်သွား၏။

ဆေးဖော်စပ်နည်းများမှာ သာမန် ပစ္စည်းများ မဟုတ်ချေ။ ၎င်းတို့မှာ သူမ ရရှိနိုင်သော အရာများ မဟုတ်ပေ။

ဆေးဘုရင်တောင်ထိပ် တွင်ပင်လျှင် ဆေးဖော်စပ်နည်းများမှာ အဓိက လျှို့ဝှက်ချက်များဖြစ်ပြီး လွတ်လပ်စွာ ဖြန့်ဝေခွင့် မရှိချေ။

"အခက်အခဲ ရှိလို့လား။ အဆင်မပြေရင် အခြေခံ ဆေးဘက်ဝင်ပစ္စည်းတချို့လောက်ပဲ ကူပြီး ပြင်ဆင်ပေးပါလေ။" ချန်လော့လည်း သဘောပေါက်သွားလေသည်။

ဆေးဖော်စပ်နည်းများမှာ လဲလှယ်ရယူရန် ထိုမျှလောက် မလွယ်ကူကြောင်း အသေအချာပင်ဖြစ်သည်။

၎င်းတို့၏ တန်ဖိုးမှာ သူကိုင်ဆောင်ထားသော ဆေးမီးဖိုနှင့် ဆေးပညာအကျဉ်းချုပ်တို့နှင့် မတူညီချေ။ ၎င်းတို့သည် ဆေးဆရာတစ်ဦး၏ အဓိက အမွေအနှစ်နှင့်ပင် သက်ဆိုင်နေပြီဖြစ်သည်။

"ရပါတယ်။"

ဟွမ်ယင်း သက်ပြင်းတစ်ချက် ချလိုက်၏။ သူက ဆေးဖော်စပ်နည်းကို မတောင်းဆိုသရွေ့ ကျန်သည့်အရာအားလုံးမှာ ကိုင်တွယ်ဖြေရှင်းရန် လွယ်ကူလှသည်။

အဆောင်တာအိုတွင် ပါရမီရှင်တစ်ဦးဖြစ်သော စီနီယာအစ်ကိုချန်ကို အနီးကပ် ပေါင်းထားရမည်ဖြစ်သည်။ သူမအနေဖြင့် ချီသန့်စင်ခြင်း နှောင်းပိုင်းအဆင့်အတွက် ကျင့်ကြံခြင်း အရင်းအမြစ်များကို စုဆောင်းနိုင်ခြင်း ရှိမရှိမှာ သူ့အပေါ်တွင်သာ လုံးလုံးလျားလျား မူတည်နေပေသည်။

နောက်ရက်အနည်းငယ်အတွင်း ချန်လော့သည် အဆောင်များ ရေးဆွဲခြင်းအပြင် ကျန်အချိန်များတွင် ဆေးပညာကို သုတေသနပြုလေ့လာရင်း အချိန်ကုန်ဆုံးခဲ့၏။

ပြင်ပဦးနှောက်၏ အကူအညီဖြင့် သူသည် စာအုပ်ထဲတွင် မှတ်တမ်းတင်ထားသော ဝိညာဉ်ပစ္စည်း သုံးထောင်ကျော်၏ လက္ခဏာရပ်များကို ကျက်မှတ်ရန် သုံးရက်အချိန်ယူခဲ့ပြီး၊ အမှားအယွင်း မရှိစေရန်အတွက် တောင်အောက်ရှိ စျေးသို့သွားကာ အစစ်အမှန် ပစ္စည်းများကို ခွဲခြားသိမြင်နိုင်ရန် နောက်ထပ် နှစ်ရက် အချိန်ယူခဲ့သည်။

ဤလုပ်ငန်းစဉ်အတွင်း သူ၏ ကိုယ်ပိုင် ချီသန့်စင်ခြင်း ကျင့်စဉ်မှာလည်း တဖြည်းဖြည်းနှင့် ပြီးပြည့်စုံသော အနေအထားသို့ ရောက်ရှိလာခဲ့၏။

သူသည် ချီသန့်စင်ခြင်း ဆဋ္ဌမအဆင့်၏ အထွတ်အထိပ်သို့ ရောက်ရှိနေပြီဖြစ်သည်။

ဤအဆင့်သို့ ရောက်ရှိသောအခါ ချန်လော့သည် သူ၏ ပါရမီ ကန့်သတ်ချက်များကို ခံစားလိုက်ရသည်။

အလယ်အလတ်အဆင့် ဝိညာဉ်အမြစ်များ၏ ကျင့်ကြံခြင်း အမြန်နှုန်းမှာ ချီသန့်စင်ခြင်း အလယ်အလတ်အဆင့်မှ စတင်ကာ နှေးကွေးသွားမည်ဖြစ်ပြီး၊ အဆင့်မြင့် ဝိညာဉ်အမြစ်များအတွက်မူ ဤခံစားချက်ကို ချီသန့်စင်ခြင်း နှောင်းပိုင်းအဆင့်သို့ ရောက်သောအခါမှသာ ခံစားရမည်ဖြစ်သည်။

ဤအပြောင်းအလဲကို သတိပြုမိသောအခါ ချန်လော့အတွက် ဆေးဖော်စပ်ရန် လိုအပ်ချက်မှာ ပို၍ပင် အရေးတကြီး ဖြစ်လာခဲ့၏။

သူ၏ ပါရမီမှာ ပြင်ပဦးနှောက်မှ ပေါင်းစပ်ဖန်တီးထားခြင်း ဖြစ်သည်။ မတည်ငြိမ်သော အလောင်းခြောက်ဦးနှောက်မှလွဲ၍၊ အင်အားအကောင်းဆုံးမှာ အုတ်မြစ်တည်ဆောက်ခြင်း ကျင့်ကြံသူ နှစ်ဦး၏ ဦးနှောက်များ ဖြစ်ကြသည်။

ဤပုဂ္ဂိုလ်နှစ်ဦးသည် သူတို့၏ သက်ရှိထင်ရှားရှိစဉ်ကာလအတွင်း အုတ်မြစ်တည်ဆောက်ခြင်း နယ်ပယ်သို့ ရောက်ရှိနိုင်ခဲ့ကြသဖြင့် သူတို့၏ ပါရမီမှာ ကောင်းမွန်ရပေမည်။

ဝမ်းနည်းစရာကောင်းသည်မှာ သူတို့ သေဆုံးသွားခဲ့သည်မှာ အလွန်ကြာမြင့်နေပြီဖြစ်ပြီး သူတို့၏ ဦးနှောက်များမှာ လွန်စွာမပြည့်မစုံဖြစ်နေကာ ချန်လော့အတွက် အလွန်အကန့်အသတ်ဖြင့်သာ စွမ်းအားမြှင့်တင်ပေးနိုင်ခြင်းပင် ဖြစ်သည်။

ချန်လော့၏ ခန့်မှန်းချက်အရ သူသည် ဝိညာဉ်အမြစ်နှစ်ခုရှိသော အဆင့်သို့ တက်လှမ်းလိုပါက အနည်းဆုံး မပြည့်စုံသော အုတ်မြစ်တည်ဆောက်ခြင်း ကျင့်ကြံသူ၏ ဦးနှောက် ဆယ်ခု လိုအပ်မည်ဖြစ်သည်။

အကယ်၍ ၎င်းတို့မှာ အလွန်ပြည့်စုံနေမည်ဆိုပါက ထိုအရာက တစ်ကဏ္ဍ ဖြစ်သွားပေမည်။ တစ်ခုတည်းနှင့်ပင် လုံလောက်ချင် လုံလောက်နိုင်ပေ၏။

သို့သော်လည်း ချန်လော့၏ လက်ရှိအဆင့်အခြေအနေအရ အလွန်ပြည့်စုံသော အုတ်မြစ်တည်ဆောက်ခြင်း ဦးနှောက်တစ်ခုကို ရရှိရန်မှာ မဖြစ်နိုင်သောအရာပင်။

အန္တရာယ်များမှာ အကျိုးအမြတ်ထက် ပိုမိုကြီးမားနေပေသည်။

"စီနီယာအစ်ကို၊ ဒါက အစ်ကိုတောင်းထားတဲ့ ဝိညာဉ်ပစ္စည်းတွေပါ။ အခြေခံ ဝိညာဉ်ပစ္စည်း စုစုပေါင်း အခုနှစ်ဆယ် ပါပါတယ်။"

ဟွမ်ယင်းသည် လဲလှယ်လာသော ဝိညာဉ်ပစ္စည်းများကို ချန်လော့ထံသို့ ကမ်းပေးလိုက်သည်။

ဤငါးရက်အတွင်း ချန်လော့သည် သူမအား ဝိညာဉ်ပစ္စည်းများ ဝယ်ယူခိုင်းသည်မှာ သုံးကြိမ်ရှိပြီဖြစ်ပြီး အကြိမ်တိုင်းတွင် အရေအတွက်များမှာ တိုးလာခဲ့သည်။

"ကောင်းပြီ၊ ငါ့အတွက် ဆက်ပြီး စုဆောင်းပေးပါ။"

ချန်လော့သည် ဝိညာဉ်ပစ္စည်းများကို ယူလိုက်ပြီးနောက် မနေ့က သူရေးဆွဲထားသော အဆောင်ကို ဟွမ်ယင်းထံသို့ ကမ်းပေးလိုက်၏။

"စီနီယာအစ်ကို၊ ခဏနေပါဦး။" အဆောင်ကို လက်ခံရယူပြီးနောက် ထွက်ခွာရန်ပြင်နေသော ချန်လော့အား ဟွမ်ယင်းက လှမ်းခေါ်လိုက်သည်။

"ဒီရက်ပိုင်းအတွင်းမှာ ကျွန်မ အဆောင်တွေ တော်တော်များများ စုဆောင်းထားမိပြီဆိုတော့၊ နောက်ထပ် ထပ်စုဖို့က အချိန်နည်းနည်း ကြာကောင်းကြာနိုင်တယ်။"

ငါးရက်အတွင်းမှာပင် သူမသည် ခြောက်လစာနီးပါးပမာဏကို စုဆောင်းမိနေပြီ ဖြစ်သည်။

ဤမျှများပြားလှသော အဆောင်များ ဈေးကွက်အတွင်းသို့ ဝင်ရောက်လာခြင်းက ၎င်းတို့၏ ဈေးနှုန်းများကို သိသိသာသာ ကျဆင်းသွားစေသည်။

အဆောင်ဈေးကွက်သည် ဆေးဘက်ဝင်ပစ္စည်း ဈေးကွက်ကဲ့သို့ပင် ၎င်းနှင့် သက်ဆိုင်သော စားသုံးသူအုပ်စုများ ရှိလေ၏။ အရေအတွက်မှာ ထိုအုပ်စုထက် ကျော်လွန်သွားသည်နှင့် ဈေးနှုန်းများမှာ လျင်မြန်စွာ ကျဆင်းသွားပေလိမ့်မည်။

ချန်လော့သည် တစ်ခဏမျှ ရပ်တန့်သွားပြီးနောက် ခေါင်းညိတ်ကာ တုံ့ပြန်လိုက်သည်။

"ငါ နားလည်ပါတယ်။"

ဝူတောက်တောင်ထိပ်၏ သုံးစွဲနိုင်စွမ်းမှာ ဤမျှ ညံ့ဖျင်းပြီး ငါးရက်အတွင်းမှာပင် ပြည့်နှက်သွားလိမ့်မည်ဟု သူ မထင်ထားခဲ့ချေ။

ဟွမ်ယင်း အနေဖြင့် နောက်ထပ် လက်မခံနိုင်တော့သဖြင့် သူလည်း ထပ်ဆွဲရန် မစီစဉ်တော့ချေ။ ဤအချိန်သည် ဆေးဖော်စပ်ခြင်းအပေါ်တွင်သာ အာရုံစိုက်ရန် အချိန်ကောင်းတစ်ခု ဖြစ်နေပေ၏။

သူသည် ဆေးဖော်စပ်နည်းကို မရရှိခဲ့သဖြင့် သူ၏ ဆေးဖော်စပ်ခြင်းလုပ်ငန်းစဉ်မှာ အခြားသူများထက် များစွာ ပိုမိုခက်ခဲနေသည်။ ပြင်ပဦးနှောက်၏ သက်ရှိထင်ရှားရှိစဉ်က အသိဉာဏ်အပေါ်တွင်သာ မှီခိုကာ တဖြည်းဖြည်းချင်း ကြိုးစားစမ်းသပ်ရန်သာ ရှိပေသည်။

ဤသည်မှာ ရိုးရှင်းအကြမ်းဖျင်းကျသော နည်းလမ်းတစ်ခု ဖြစ်သော်လည်း၊ ချန်လော့အတွက်မူ ၎င်းသည် ကုန်ကျစရိတ် အသက်သာဆုံးနှင့် လက်တွေ့အကျဆုံး နည်းလမ်းတစ်ခုပင် ဖြစ်သည်။

နှစ်လကြာပြီးနောက်

ဝူတောက်တောင်ထိပ် ခြေရင်းရှိ ဈေးတစ်ခုတွင်

"အခြေခံ ဝိညာဉ်ပစ္စည်း သုံးပုံပဲလား။ အခုနှစ်ဆယ်လုံးပဲ မဟုတ်လား။"

ဆေးဆိုင်ပိုင်ရှင်သည် ဆိုင်ထဲသို့ ဝင်လာသော ချန်လော့ကိုကြည့်ကာ ပျင်းရိငြီးငွေ့စွာဖြင့် သမ်းဝေလိုက်၏။

ဤဆိုင်များအားလုံးမှာ တောင်ခြေတွင် တည်ရှိသောဂိုဏ်းပိုင်ဆိုင်မှုများဖြစ်ပြီး အဓိကတောင်ထိပ် ဆယ်ခုမှ တပည့်များ အရောင်းအဝယ် ပြုလုပ်ကြကာဂိုဏ်းတွင်းဈေးကွက်တစ်ခုအဖြစ် ဆောင်ရွက်ပေးလျက်ရှိသည်။

ယခင်က ချန်လော့သည် ဟွမ်ယင်းကို အမြဲတမ်း ဝယ်ခိုင်းလေ့ရှိသော်လည်း၊ လွန်ခဲ့သော လဝက်ခန့်က ဟွမ်ယင်း၏ ကျင့်ကြံခြင်းမှာ အဆင့်တက်သွားခဲ့သဖြင့် သူမသည် တံခါးပိတ် ကျင့်ကြံနေခဲ့သည်။

ကူညီမည့်သူ မရှိသဖြင့် သူကိုယ်တိုင်သာ တောင်အောက်သို့ဆင်းကာ ဝယ်ယူရတော့သည်။

အကြိမ်ပေါင်းများစွာ ဝယ်ယူခဲ့ပြီးဖြစ်သဖြင့် သူသည် ဆေးဆိုင်ပိုင်ရှင်နှင့် ရင်းနှီးကျွမ်းဝင်နေပြီ ဖြစ်သည်။

"သူဌေး.. ကျွန်တော့်ကို ယန်မြက်ဆယ်ပုံလောက် ပေးပါ။"

ချန်လော့ စကားမပြောနိုင်မီမှာပင် အပြင်ဘက်မှ လူတစ်ယောက် ဝင်လာခဲ့၏။

ချန်လော့ ခေါင်းလှည့်ကြည့်လိုက်ရာ သူ၏ မျက်လုံးများထဲတွင် အံ့အားသင့်မှု အရိပ်အယောင်တစ်ခု ဖြတ်ပြေးသွားလေသည်။

"ဂျူနီယာညီလေး တုကျန်း လား။"

ဝင်လာသူမှာ ယွဲ့နိုင်ငံ ဂူသင်္ချိုင်းကြီးမှ သူနှင့်အတူ ထွက်ပြေးလွတ်မြောက်လာခဲ့သော တုကျန်း ဖြစ်နေသည်။

သူသည် အစစ်အမှန်ပုဂ္ဂိုလ်ရှင်းဟော့ ၏ တပည့်ဖြစ်သည်။ ထိုစဉ်က သူ၏ စီနီယာအစ်ကို လေးယောက်နှင့် ဂျူနီယာညီမလေး ရှဲ့ရွှမ်း တို့သည် သူနှင့်အတူ နတ်ဘုရားကန်မသေမျိုးဂိုဏ်းသို့ ဝင်ရောက်လာခဲ့ကြ၏။

သို့သော် ဂိုဏ်းသို့ ဝင်ရောက်ပြီးနောက် သူတို့၏ ရွေးချယ်မှုများ ကွဲပြားသွားခဲ့ပြီး မတူညီသော အဓိကတောင်ထိပ်များသို့ ရောက်ရှိသွားခဲ့ကြသည်။

နှစ်ဝက်ကျော် ကြာပြီးနောက် တုကျန်းမှာ ယခင်ကထက် များစွာ ရင့်ကျက်လာခဲ့ပြီဖြစ်သည်။ သူသည် ဆေးဘုရင်တောင်ထိပ် တပည့်များကြားတွင် အတွေ့ရများသော အပြာရောင်ဝတ်ရုံရှည်နှင့် သစ်သားသရဖူကို ဆောင်းထားပြီး သူ၏ ကျင့်ကြံခြင်းအဆင့်မှာလည်း ချီသန့်စင်ခြင်း စတုတ္ထအဆင့်သို့ ရောက်ရှိနေပြီဖြစ်ရာ အလယ်အလတ်အဆင့် ဝိညာဉ်အမြစ်တစ်ခုအတွက် မနှေးကွေးလှချေ။

တစ်နှစ်မပြည့်မီမှာပင် ချီသန့်စင်ခြင်း နှောင်းပိုင်းအဆင့်သို့ လမ်းစရှာနေပြီဖြစ်သော ချန်လော့မှာမူ ထူးခြားချက်တစ်ခု ဖြစ်နေပေသည်။

"စီနီယာအစ်ကို ချန်လား။"

တုကျန်းသည်လည်း တစ်ခဏမျှ အံ့သြမှင်တက်သွားပြီး တုံ့ပြန်ရန် အချိန်အနည်းငယ် ယူလိုက်ရသည်။

၎င်းတို့ ယွဲ့နိုင်ငံ ဂူသင်္ချိုင်းကြီးမှ ထွက်ပြေးလွတ်မြောက်လာခဲ့သည်မှာ တစ်နှစ်ပင် မပြည့်သေးချေ။ သို့သော်လည်း နှစ်ဝက်ကျော် ကာလလေးအတွင်းမှာပင် သူတို့သည် သူတို့၏ ယခင်ဘဝတစ်ခုလုံးနှင့် ပေါင်းလိုက်သည်ထက်ပင် ပိုမိုများပြားသော အတွေ့အကြုံများကို ကြုံတွေ့ခဲ့ရပြီးဖြစ်ရာ၊ အသိမိတ်ဆွေတစ်ယောက်ကို ရုတ်တရက် မြင်တွေ့လိုက်ရခြင်းက သူတို့ကို စိမ်းသက်သလိုပင် ခံစားသွားရစေသည်။

"မတွေ့ရတာ ကြာပြီနော်။"

ချန်လော့ကလည်း ပြုံးကာ သူ့ကို နှုတ်ဆက်လိုက်၏။

အသိမိတ်ဆွေတစ်ယောက်နှင့် ဤမျှ တိုက်ဆိုင်စွာ ဆုံတွေ့ရလိမ့်မည်ဟု သူ မထင်ထားခဲ့ချေ။

တုကျန်း၏ အသွင်အပြင်ကို ကြည့်ရခြင်းဖြင့် သူသည် ဆေးဘုရင်တောင်ထိပ်သို့ ဝင်ရောက်သွားခဲ့ခြင်း ဖြစ်ရမည်။ သို့သော် သူ၏ စီနီယာအစ်ကို တုသဲ တစ်ယောက် မည်သို့နေမည်နည်းဟု သူ တွေးမိလိုက်သည်။

စီနီယာအစ်ကို တုသဲ၏ ပါရမီမှာ သိပ်ကောင်းပုံမရဘဲ၊ သူသည် အဆင့်နိမ့် ဝိညာဉ်အမြစ်ကိုသာ ပိုင်ဆိုင်ထားကြောင်း သူ မှတ်မိနေသည်။

"တကယ်ကို စီနီယာအစ်ကို ချန်ပဲ။ အစ်ကို့ကို ဒီမှာ တွေ့ရလိမ့်မယ်လို့ မထင်ထားဘူး။"

တုကျန်းမှာလည်း အလွန်ဝမ်းသာနေခဲ့သည်။

တစ်ပါးသူ၏ နယ်မြေတွင် မိတ်ဆွေဟောင်းတစ်ဦးနှင့် ဆုံတွေ့ရခြင်းမှာ ဘဝ၏ ကြီးမားသော ပျော်ရွှင်မှုကြီးတစ်ခုပင်။

အကြီးအကျယ် သောက်စားရမည့် အချိန်ပင်ဖြစ်လေ၏။

"လာဗျာ.. လာ.. ဘာပဲဖြစ်ဖြစ် ဒီနေ့ အစ်ကိုနဲ့အတူ ကျွန်တော် သောက်ရမှဖြစ်မယ်။" ပြောပြောဆိုဆိုနှင့်ပင် သူသည် သောက်စားရန်အပြင်ထွက်ဖို့ အသင့်ဖြစ်နေကာ ချန်လော့အား မေးခွန်းထုတ်စရာမလိုဘဲ ဆွဲခေါ်သွားလေတော့သည်။

"မင်း ယန်မြက်တွေ မလိုချင်တော့ဘူးလား။"

ဆေးဆိုင်ပိုင်ရှင်သည် အနောက်ဘက်မှ ဆေးများကို ယူဆောင်ထွက်လာစဉ် တုကျန်းက ချန်လော့အား ဆွဲခေါ်သွားသည်ကို မြင်လိုက်ရသည်။

"လိုချင်တယ်.. ခဏနေမှ ပြန်လာယူမယ်။" တုကျန်းက အားရပါးရ ရယ်မောလိုက်ပြီး ဝိညာဉ်ကျောက်တုံးများကို စားပွဲပေါ်တင်ကာ ချန်လော့အား တံခါးအပြင်သို့ ဆွဲခေါ်သွားလေသည်။

သူတို့နှစ်ဦးသည် အထူးတလည် ဈေးကြီးသော စားသောက်ဆိုင်များကို မရှာဖွေတော့ဘဲ၊ ဆေးဆိုင်ဘေးရှိ ဆိုင်ငယ်လေးတစ်ခုသို့သာ ဝင်သွားကြသည်။

"စီနီယာအစ်ကို တုသဲရော ဘယ်မှာလဲ။ သူက မင်းနဲ့အတူ ဘာလို့ဆင်းမလာတာလဲ။ စကားမစပ်၊ မင်းတို့တွေ ဘယ်အဓိကတောင်ထိပ်တွေကို ဝင်သွားကြလဲဆိုတာ ငါ အခုထိ မသိရသေးဘူးနော်။"

အစားအသောက်နှင့် အရည်များ ရောက်လာပြီးနောက် ချန်လော့က စတင်မေးမြန်းလေ၏။

သူ ဝူတောက်တောင်ထိပ်သို့ ဝင်ရောက်ပြီးကတည်းက တောင်အောက်သို့ သိပ်ဆင်းလေ့မရှိခဲ့ချေ။

ယနေ့ သူတို့နှင့် တိုက်ဆိုင်စွာ ဆုံတွေ့ရသဖြင့် သဘာဝကျကျပင် အသေးစိတ် မေးမြန်းချင်နေမိသည်။

"စီနီယာအစ်ကိုက ရှန်းဟော်တောင်ထိပ်ကို ဝင်သွားတယ်။ ဂျူနီယာညီလေး တုကျီနဲ့ တခြားသူတွေက ယွီရှို့တောင်ထိပ်ကို ဝင်ကြတယ်။ ဂျူနီယာညီမလေး ရှဲ့ရွှမ်းက ထျန်းလုတောင်ထိပ်ကို သွားပြီး၊ ကျွန်တော်ကတော့ ဆေးဘုရင်တောင်ထိပ်မှာပါ။" တုကျန်းက သူတို့ဝင်ရောက်ခဲ့သော အဓိကတောင်ထိပ်များအကြောင်းကို အကျဉ်းချုပ် ရှင်းပြလိုက်သည်။

"ဂိုဏ်းထဲဝင်ပြီး ပထမသုံးလလောက်ကတော့ ကျွန်တော်တို့အားလုံး ကျင့်ကြံခြင်းကို ကြိုးကြိုးစားစားလုပ်ခဲ့ကြရတယ်။ ဂိုဏ်းရဲ့ ကျင့်စဉ်တွေက ကျွန်တော်တို့ ဇာတိမြို့က ကျင့်စဉ်တွေနဲ့ အရမ်းကွာခြားတော့၊ အသားကျဖို့အတွက် ကျွန်တော် တော်တော်လေး အားထုတ်လိုက်ရတယ်။"

ကျင့်စဉ်များ ကွာခြားမှုအကြောင်းကို ပြောလာသောအခါ တုကျန်းမှာ ဝမ်းနည်းလွမ်းဆွတ်မှု တစ်ခုကို ခံစားနေရဆဲဖြစ်သည်။

သူနှင့် သူ၏ အစ်ကိုလေးယောက်တို့ကို ငယ်စဉ်ကတည်းက အစစ်အမှန်ပုဂ္ဂိုလ် ရှင်းဟော့မှ ပြုစုပျိုးထောင်ပေးခဲ့ခြင်းဖြစ်ရာ သူတို့၏ အယူအဆများစွာမှာ ပုံဖော်ပြီးသား ဖြစ်နေခဲ့ပြီဖြစ်၏။

ပြောင်းလဲခြင်း လုပ်ငန်းစဉ်မှာ ချန်လော့ထက် များစွာ ပိုမိုနာကျင်စရာ ကောင်းသော်လည်း ကံကောင်းစွာဖြင့် သူတို့၏ နားလည်သဘောပေါက်နိုင်စွမ်းမှာ အတော်လေး ကောင်းမွန်ကြပေသည်။ ကနဦး နာကျင်မှုများကို ကြံ့ကြံ့ခံပြီးနောက် သူတို့အားလုံး အောင်မြင်စွာ ပြောင်းလဲနိုင်ခဲ့ကြ၏။

တုကျန်း၏ အသွင်အပြင်ကို အကဲခတ်ကြည့်ရသလောက် သူ၏ကျင့်စဉ်မှာလည်း တည်ငြိမ်နေပြီဖြစ်ပြီး သူ၏ ကျင့်ကြံခြင်းမှာ ချီသန့်စင်ခြင်း စတုတ္ထအဆင့်သို့ ရောက်ရှိနေပြီဖြစ်ရာ ဤတပည့်အသုတ်တွင် သူ၏ တိုးတက်မှုမှာ မနှေးကွေးလှချေ။