အခန်း (၉၉)

အခန်း ၉၉ - အရောင်းအဝယ်

အစားအသောက်စားချိန်မှာ တစ်နာရီကျော်ခန့် ကြာမြင့်ခဲ့သည်။

စကားစမြည် ပြောဆိုကြရင်းဖြင့် ချန်လော့ သည် အခြားသူများ၏ မကြာသေးမီက အခြေအနေများကို သိရှိခဲ့ရ၏။

စီနီယာအစ်ကို တုသဲမှလွဲ၍ ကျန်ရှိသော တုကျီ နှင့် ဂျူနီယာညီမ ရှဲ့ရွှမ်း တို့အားလုံးသည် ချီသန့်စင်ခြင်း အလယ်အလတ်အဆင့်သို့ ဝင်ရောက်သွားခဲ့ကြပြီ ဖြစ်သည်။

ဤသည်မှာ တုကျန်း၏ အကူအညီကြောင့်လည်း တစ်စိတ်တစ်ပိုင်း ပါဝင်ပေသည်။ သူသည် ဆေးဘုရင်တောင်ထိပ်၏ တပည့်တစ်ဦးဖြစ်သဖြင့် အခြေခံ ဆေးလုံးများကို ရံဖန်ရံခါ ထောက်ပံ့ပေးနိုင်ခဲ့သည်။

ပါရမီ အညံ့ဖျင်းဆုံးဖြစ်သော စီနီယာအစ်ကိုပင်လျှင် ယခုအခါ ချီသန့်စင်ခြင်း တတိယအဆင့် သို့ ရောက်ရှိနေပြီ ဖြစ်သည်။

"စောစောက ဆေးဆိုင်မှာ စီနီယာအစ်ကို့ကို ကျွန်တော်တွေ့လိုက်တယ်။ အစ်ကိုက ဝိညာဉ်ပစ္စည်းတွေ ဝယ်ဖို့စီစဉ်နေတာလား။ ဆိုင်ရှင် စွန်းက ကျွန်တော်တို့ ဆေးဘုရင်တောင်ထိပ်က စီနီယာအစ်ကိုတစ်ယောက်ရဲ့ဆွေမျိုး တော်တယ်။ ကျွန်တော် သူ့ကို သွားပြောပြီး အစ်ကို့ကို ဈေးလျှော့ပေးဖို့ တောင်းဆိုပေးလို့ရတယ်။"

ဆေးဘုရင်တောင်ထိပ်သည် ထိုဆေးဆိုင်၏ အဓိက ဖောက်သည်ကြီးဖြစ်သည်။ နတ်ဘုရား

ရေကန်မသေမျိုးဂိုဏ်းအတွင်းရှိ ဆေးဝါးနှင့်ပတ်သက်သော စီးပွားရေးလုပ်ငန်းများ အားလုံးကို ဆေးဘုရင်တောင်ထိပ်မှ ကျောထောက်နောက်ခံ ပေးထားခြင်းဖြစ်သည်။

ဆေးဆိုင်ပိုင်ရှင်သည် ဆေးဘုရင်တောင်ထိပ်နှင့် အဆက်အသွယ်ရှိခြင်းကြောင့်သာ ဂိုဏ်းအတွင်း၌ ဆိုင်ဖွင့်နိုင်ခဲ့ခြင်းဖြစ်သည်။

"ငါ ဆေးဖော်စပ်တာကို သင်နေတယ်။"

ချန်လော့သည် ဖုံးကွယ်မထားခဲ့ချေ။ ဆေးဘုရင်တောင်ထိပ်၏ တပည့်တစ်ဦးအနေဖြင့် တုကျန်းသည် သူ့အား အသုံးဝင်သော အကြံဉာဏ်အချို့ ပေးနိုင်ကောင်း ပေးနိုင်ပေလိမ့်မည်။

မကြာသေးမီက သူသည် ဆေးမီးဖိုကို အကြိမ်ရာနှင့်ချီ၍ ဖွင့်ခဲ့သော်လည်း အကြိမ်တိုင်းတွင် သူရရှိခဲ့သည်မှာ မီးသွေးပြာမည်းမည်း အပုံလိုက်သာ ဖြစ်နေခဲ့၏။

သူ၏ မီးထိန်းချုပ်ခြင်း နည်းစနစ် နှင့် ဆေးဘက်ဝင်ပစ္စည်းများ ရောစပ်တွဲဖက်မှုတို့မှာ အလွန်ကျွမ်းကျင်နေပြီ ဖြစ်သော်လည်း ဆေးလုံးတစ်လုံးကိုမူ မဖော်စပ်နိုင်သေးချေ။

သူ၏ ပြင်ပဦးနှောက်ဖြင့်သာ စူးစမ်းလေ့လာနေသော ဆေးဖော်စပ်ခြင်း၏ တိုးတက်မှုမှာ မျှော်လင့်ထားသလောက် မမြန်ဆန်ခဲ့ချေ။ နောက်ဘက်တောင်ကုန်းတွင် သူတူးဖော်ရရှိခဲ့သော ဦးနှောက်များမှာ ဆေးဖော်စပ်ခြင်းဆိုင်ရာ ဆရာသခင်များ၏ ဦးနှောက်များ မဟုတ်ဘဲ ချီသန့်စင်ခြင်း နှောင်းပိုင်းအဆင့်ရှိ စီနီယာအစ်ကို ကျင့်ကြံသူအချို့၏ ဦးနှောက်များသာ ဖြစ်နေပေသည်။

သူ့တွင် ဆေးဖော်စပ်နိုင်သော ပါရမီရှိသော်လည်း ၎င်းမှာ ကောင်းကင်ဘုံကို အာခံနိုင်လောက်အောင် အစွမ်းထက်လှသည်တော့ မဟုတ်ပေ။

ဤပြဿနာကို ဖြေရှင်းရန်အတွက် ချန်လော့သည် ဆေးဘုရင်တောင်ထိပ်၏ တောင်ခြေသို့ပင် အထူးတလည် သွားရောက်ခဲ့သေး၏။ သို့သော် ကံမကောင်းစွာဖြင့် သူသည် တံခါးပေါက်ကိုပင် ဖြတ်ကျော်မဝင်နိုင်ခဲ့ရာ မြေကြီးသွားတူးပေးရန်အတွက် သူတို့၏ နောက်ဘက်တောင်ကုန်းသို့ သွားရောက်ရန်ဆိုသည်မှာ ဝေးလားဝေးပင်။

ယခုအချိန်အထိ ချန်လော့သည် ယန်ချီဆေးလုံး အတွက် အရန်ဆေး ခုနစ်မျိုးကို ခွဲခြားသတ်မှတ်နိုင်ခဲ့ပြီး အဓိကဆေး သုံးမျိုးကို ရှာဖွေတွေ့ရှိခဲ့သည်။

ပြဿနာအပေးဆုံးအပိုင်းမှာ ဆေးအာနိသင်ကို ခြေဖျက်ပေးသော သစ်ဖုသစ်ဥများသာ ဖြစ်သည်။

ဆေးဘက်ဝင်အပင်များ ဆေးဖိုထဲသို့ ရောက်သွားပြီးနောက် ဆေးဘက်ဆိုင်ရာ ဂုဏ်သတ္တိများ တွန်းကန်မှု ဖြစ်ပေါ်လာလေ၏။

ဆေးလုံးတစ်လုံးတည်းအဖြစ် မည်သို့ ဖွဲ့စည်းရမည်နှင့် ၎င်း၏ ဆေးစွမ်းကို မည်သို့ အမြင့်မားဆုံးဖြစ်အောင် လုပ်ဆောင်ရမည်ဆိုသည်မှာ ဆေးဖော်စပ်ခြင်း၏ အဓိကသော့ချက်ပင်ဖြစ်သည်။

၎င်းတွင် မီးထိန်းချုပ်ခြင်း နည်းစနစ်ရှိ ဝိညာဉ်မီး၏ အပူချိန်ကဲ့သို့သော တိကျသောအသေးစိတ်အချက်အလက်များလည်း ပါဝင်ပေသည်။ မတူညီသော အပူချိန်များတွင် ဖော်စပ်ထားသော ဆေးလုံးများသည် အလွန်ကွဲပြားခြားနားသော ဆေးဘက်ဆိုင်ရာဂုဏ်သတ္တိများ ရှိကြပြီး အနည်းငယ်မျှ အမှားအယွင်းရှိပါက ဆေးမီးဖိုကို ပေါက်ကွဲသွားစေမည်ဖြစ်သည်။

ဆရာတစ်ဦး၏ လမ်းညွှန်မှုမပါဘဲ ကျင့်ကြံခြင်းသည် ထိုအရေးပါသော အချက်တစ်ချက် လွတ်ဟင်းနေခြင်းပင်ဖြစ်သည်။

သူ ကိုယ်ခံပညာ စတင်လေ့ကျင့်စဉ်က ဆရာမာချွယ်ကျိမှ လမ်းညွှန်မှု မပေးခဲ့လျှင် သူ၏ တိုးတက်မှုမှာ ဤမျှ ချောမွေ့ခဲ့မည် မဟုတ်ချေ။

ချန်လော့သည် ဆေးမီးဖိုကို ဆယ်ကြိမ်ထက်မက ပေါက်ကွဲစေခဲ့ပြီး အဆောင်များရေးဆွဲခြင်းမှ ရရှိသော ဝိညာဉ်ကျောက်တုံးများမှာ မလောက်မငှ ဖြစ်နေခဲ့သည်။ နောင်တွင် အုတ်မြစ်တည်ဆောက်ခြင်း ဆေးလုံးများဖော်စပ်ရန် လိုအပ်မှုနှင့် သူ၏ ကိုယ်ပိုင်ကျင့်ကြံခြင်းအတွက်သာ မဟုတ်ပါက၊ ဆေးဆိုင်မှ ချီစုစည်းခြင်း ဆေးလုံးကို တိုက်ရိုက်ဝယ်ယူရန် သူ စဉ်းစားမိမည်ဖြစ်သည်။

သို့သော်လည်း ချီစုစည်းခြင်း ဆေးလုံးများကို ဝယ်ယူရန် လွယ်ကူသော်လည်း အုတ်မြစ်တည်ဆောက်ခြင်း ဆေးလုံးများမှာမူ ထိုသို့မသေချာချေ။

နောက်ပိုင်းအဆင့်များတွင် အုတ်မြစ်တည်ဆောက်ခြင်း ကျင့်ကြံခြင်းအတွက် ဆေးလုံးများနှင့် အမြုတေဖွဲ့စည်းခြင်း အတွက် လိုအပ်သော ဆေးလုံးများမှာ တစ်ခုထက်တစ်ခု ပိုမိုခက်ခဲလာမည်သာ ဖြစ်သည်။

"ဆေးဖော်စပ်တာ ဟုတ်လား။"

တုကျန်းမှာ အနည်းငယ် အံ့အားသင့်သွား၏။ ချန်လော့သည် ဝူတောက်တောင်ထိပ်၏ တပည့်တစ်ဦးဖြစ်ပြီး အဓိကအားဖြင့် သူ၏ စိတ်အခြေအနေနှင့် နတ်ဘုရားစွမ်းရည်ကို ကျင့်ကြံကာ နှလုံးသားမိစ္ဆာများ နှင့် နတ်ဝိညာဉ်တိုက်ခိုက်မှုများကို ရင်ဆိုင်ရာတွင် အားသာချက်ရှိကြောင်း သူ မှတ်မိနေသည်။

သို့သော် သူ၏ ဆေးဖော်စပ်ခြင်း ကျွမ်းကျင်မှုများမှာ ပြောရန်ခက်ခဲပြီး ဝူတောက်တောင်ထိပ်တွင် နာမည်ကြီးသော ဆေးဖော်စပ်ခြင်း ကျွမ်းကျင်ပညာရှင် တစ်ဦးတစ်ယောက်အကြောင်းကိုမျှ သူ မကြားဖူးခဲ့ချေ။

အကယ်၍ သူသည် ဆေးဖော်စပ်လိုပါက အစကတည်းက အဘယ်ကြောင့် ဆေးဘုရင်တောင်ထိပ်သို့ မဝင်ရောက်ခဲ့သနည်း။

"ဂျူနီယာညီလေး တုဆီမှာ ငါ့ကို မျှဝေပေးနိုင်တဲ့ ဆေးဖော်စပ်နည်းတွေများ ရှိမလားမသိဘူး။"

ချန်လော့က မေးလိုက်သည်။

သူ့အတွက်မူ ဆေးဖော်စပ်ခြင်းဖြစ်စေ၊ အဆောင်ရေးဆွဲခြင်းဖြစ်စေ ၎င်းတို့နှစ်ခုစလုံးသည် သူ၏ ကျင့်ကြံခြင်းလမ်းစဉ်အပေါ် အထောက်အကူပြုမည့် အရာများသာ ဖြစ်သည်။

ဝူတောက်တောင်ထိပ်ကို ရွေးချယ်ခြင်းသည်လည်း နောင်ရေးအတွက် စဉ်းစားမှုတစ်ခုဖြစ်သည်။ သူ၏ ကျင့်ကြံခြင်း နောက်ပိုင်းအဆင့်များသို့ ရောက်ရှိလာသည်နှင့်အမျှ၊ သူ၏ စိတ်အခြေအနေနှင့် နတ်ဝိညာဉ်မှာ အထူးအရေးပါလာမည်ဖြစ်ပြီး အထူးသဖြင့် ကပ်ဘေးဒုက္ခကို ဖြတ်ကျော်ရချိန်တွင် ပို၍ပင် အရေးကြီးပေသည်။

ဆိုရိုးစကားရှိသည့်အတိုင်း

'လျှပ်စီးကပ်ဘေးဒုက္ခကို ဖြတ်ကျော်ရန် လွယ်ကူသော်လည်း၊ နှလုံးသားမိစ္ဆာကို အနိုင်ယူရန် ခက်ခဲလှပေသည်။'

ကပ်ဘေးဒုက္ခဖြတ်ကျော်သော ကျင့်ကြံသူများ၏ ထက်ဝက်နီးပါးမှာ နှလုံးသားမိစ္ဆာကပ်ဘေးဒုက္ခကြောင့် ကျရှုံးခဲ့ကြရ၏။

"ဆေးဖော်စပ်နည်းတွေဆိုရင်တော့ နည်းနည်း ဒုက္ခရောက်နိုင်တယ်။" တုကျန်းက မျက်မှောင်ကြုတ်ကာ စဉ်းစားလိုက်သည်။

နတ်ဘုရားရေကန်မသေမျိုးဂိုဏ်းသည် ကျင့်စဉ်များအပေါ် အလွန်တင်းကျပ်သော ထိန်းချုပ်မှုရှိသည်။ အဓိအနေဖြင့် လက်ဆင့်ကမ်း သင်ကြားပေးမှုကို ဂိုဏ်းမှ နှစ်ရက်အတွင်း သိရှိသွားမည်ဖြစ်ပြီး အန္တရာယ်လည်း အလွန်ကြီးမားပေသည်။

"ကျင့်စဉ်တွေကို လျှို့ဝှက်ပြီး လက်ဆင့်ကမ်းခွင့် မရှိဘူးဆိုတဲ့ ဂိုဏ်းစည်းမျဉ်းရှိတယ်။ ဆေးဖော်စပ်နည်းတွေမှာလည်း အတူတူပဲ။"

ချန်လော့ ပြန်မဖြေမီမှာပင် တုကျန်းက ဆက်ပြောလိုက်သည်။

"ဒါပေမယ့် ကျွန်တော်တို့ ထွက်မလာခင်က ဆရာက ကျွန်တော့်ကို ရှေးဟောင်းဆေးဖော်စပ်နည်းတွေအများကြီး သင်ပေးခဲ့တယ်။ အခု အဲဒါတွေကို အသုံးမပြုနိုင်တော့ပေမယ့် ကိုးကားဖို့အတွက်တော့ အဆင်ပြေဆဲဖြစ်ပြီး အတိုင်းအတာတစ်ခုအထိ လမ်းညွှန်မှုတစ်ခုအနေနဲ့ အသုံးပြုနိုင်ပါတယ်။"

ပြောရင်းဖြင့် တုကျန်းသည် သူ၏ ရင်ဘက်ထဲသို့ လက်နှိုက်ကာ ဝိညာဉ်မှတ်တမ်းပြားတစ်ခုကို ထုတ်ယူလိုက်ပြီး သူ၏ မှတ်ဉာဏ်ထဲမှ ဆေးဖော်စပ်နည်းများ အားလုံးကို ၎င်းထဲသို့ ကူးထည့်လိုက်သည်။

"ကျေးဇူးတင်ပါတယ်။"

ချန်လော့သည် ဝိညာဉ်မှတ်တမ်းပြားကို လှမ်းယူကာ လေးလေးနက်နက် ကျေးဇူးတင်စကား ဆိုလိုက်၏။

ဤဆေးဖော်စပ်နည်းက သူ့ကို များစွာ အထောက်အကူ ပြုပါလိမ့်မည်။ သူ အလိုအပ်ဆုံးမှာ ဤအသေးစိတ် အကြောင်းအရာများပင် ဖြစ်သည်။

ဆေးဖော်စပ်နည်းသည် ခေတ်ကုန်နေပြီ ဟုတ်မဟုတ်ဆိုသည်မှာ ထိုမျှလောက် အရေးမကြီးချေ။

ဝမ်းနည်းစရာကောင်းသည်မှာ သူ ယွဲ့နိုင်ငံတွင် ရှိနေစဉ်က အစစ်အမှန်ပုဂ္ဂိုလ် ချန်ချင်း နောက်သို့ လိုက်ပါခဲ့ရသော အချိန်မှာ အလွန်တိုတောင်းလွန်းခဲ့သည်။

သို့မဟုတ်ပါက အစစ်အမှန်ပုဂ္ဂိုလ် ချန်ချင်းသည် ဤအသေးစိတ် အချက်အလက်များကို သူ့အား အသေအချာပင် ပြောပြခဲ့မည် ဖြစ်သည်။

"ကျွန်တော်တို့အားလုံးက ဇာတိမြို့တစ်မြို့တည်းက လာကြတာပဲ။ ဒီလိုစကားတွေ ပြောနေတာက အရမ်း စိမ်းကာရာဆန်လွန်းတယ်။ နောင်တစ်ချိန်မှာ စီနီယာအစ်ကို့ရဲ့ အကူအညီကို ကျွန်တော် လိုအပ်မယ့် အချိန်တွေလည်း ရှိလာနိုင်တာပဲလေ။"

တုကျန်းက ပြုံးလျက် ပြောလိုက်၏။

ချန်လော့ကို သူ ကူညီနိုင်ခဲ့သည်ကို မြင်သောအခါ သူ၏ စိတ်အခြေအနေမှာ များစွာ ပေါ့ပါးသွားခဲ့သည်။

သူတို့အဖွဲ့၏ အခက်အခဲများကို သူတို့ကိုယ်တိုင်သာလျှင် နားလည်နိုင်ပေသည်။ နတ်ဘုရားရေကန်မသေမျိုးဂိုဏ်းကဲ့သို့သော နေရာမျိုးတွင် တုကျန်း လုပ်နိုင်သောအရာမှာ အချင်းချင်း ကူညီရိုင်းပင်းရန်ပင် ဖြစ်သည်။

၎င်းသည် သေးငယ်သော အားထုတ်မှုလေးတစ်ခုမျှသာဖြစ်နေပါစေ သူ တတ်နိုင်သမျှ ကူညီပေးသွားမည်ဖြစ်သည်။

တုကျန်း၏ အမြင်တွင် မသေမျိုးလမ်းစဉ်ကို တစ်ဦးတည်း လျှောက်လှမ်းရသည် မဟုတ်ချေ။

မသေမျိုးလမ်းစဉ်ဆိုသည်မှာ အဖော်အပေါင်းများနှင့် အတူတကွ လျှောက်လှမ်းရခြင်းပင် ဖြစ်သည်။

ချန်လော့သည် ဤကျေးဇူးကို မှတ်သားထားမည်ဖြစ်ပြီး နောင်တစ်ချိန် သူ၏ ကျင့်ကြံခြင်း အောင်မြင်သောအခါတွင် ပြန်လည်ဆပ်ပေးမည်ဖြစ်သည်။

"ဒီနေ့ ကျွန်တော် အချိန်တော်တော်များများ နှောင့်နှေးသွားပြီ။ တာဝန်တစ်ခု သွားအပ်ဖို့ တောင်ပေါ်ကိုပြန်ရဦးမယ်ဆိုတော့ စီနီယာအစ်ကိုနဲ့ ဆက်ပြီး စကားမပြောနိုင်တော့ဘူး။"

တုကျန်းက မတ်တတ်ရပ်ကာ နှုတ်ဆက်လိုက်၏။

ဤမျှကြာမြင့်စွာ နှောင့်နှေးပြီးနောက် အမှန်တကယ်ပင် ပြန်ရမည့်အချိန် ရောက်နေပြီဖြစ်သည်။

ချန်လော့လည်း မတ်တတ်ရပ်ကာ နှုတ်ဆက်လိုက်၏။ မခွဲခွာမီ သူတို့နှစ်ဦးသည် အဆက်အသွယ်လုပ်ရန် နည်းလမ်းများကို ဖလှယ်ခဲ့ကြသည်။

လာမည့် တွေ့ဆုံပွဲသို့လည်း တုကျန်းက သူ့ကို ဖိတ်ကြားခဲ့ပြီး စီနီယာအစ်ကို တုသဲနှင့် ဂျူနီယာညီမလေး ရှဲ့ရွှမ်းတို့ကိုပါ ခေါ်လာခဲ့မည်ဟု ပြောကြားခဲ့သည်။

ဆေးများ ဝယ်ယူပြီးနောက် သူသည် တောင်ပေါ်သို့ ပြန်လာခဲ့၏။

နောက်ဘက်တောင်ကုန်း သင်္ချိုင်း

ချန်လော့သည် ဝယ်ယူလာသော ဆေးဘက်ဝင်အပင်များကို စီစစ်သိမ်းဆည်းကာ ဆေးမီးဖိုကို သန့်စင်လိုက်ပြီးနောက် အပူချိန်မြှင့်တင်ရန်အတွက် မီးကို စတင်ထိန်းချုပ်လေတော့သည်။

ဒေါက်.. ဒေါက်..

ဝိညာဉ်မီးလျှံကို ထွန်းညှိလိုက်သည်နှင့် အပြင်ဘက်မှ တံခါးခေါက်သံတစ်ခုကို သူ ကြားလိုက်ရသည်။

"စီနီယာအစ်ကို ချန်.. ကျွန်တော်ပါ.. ဖူအန်း "

ဖူအန်း ဟုတ်လား။

ချန်လော့သည် သူလုပ်နေသောအရာကို ရပ်တန့်လိုက်ပြီး မီးထိန်းချုပ်ခြင်း နည်းစနစ်ကို ငြိမ်းသတ်ကာ တံခါးဖွင့်ရန် လျှောက်သွားလိုက်၏။

တံခါးအပြင်ဘက်တွင် ရပ်နေသူမှာ ယခင်က ဂျူနီယာညီမလေး ဟွမ်ယင်းနောက်သို့ နေ့စဉ်လိုက်ပါလေ့ရှိသော ဖူအန်းပင် ဖြစ်သည်။

ပြီးခဲ့သည့်တစ်ခေါက်က သူ ဟွမ်ယင်းထံသို့ သွားစဉ်က ဖူအန်းကို မတွေ့ခဲ့ရချေ။ ထိုအချိန်က အခြားသူနှစ်ဦးကဲ့သို့ပင် သူလည်း မတော်တဆမှုတစ်ခုခုနှင့် ကြုံတွေ့ခဲ့ရသည်ဟု သူထင်မှတ်ခဲ့သော်လည်း ယခုကြည့်ရသည်မှာ သူသည် တစ်ဦးတည်း ကျင့်ကြံနေခဲ့ခြင်းသာ ဖြစ်ပုံရ၏။

"ဘာကိစ္စ ရှိလို့လဲ။"

ချန်လော့မှာ အနည်းငယ် အံ့သြနေမိသည်။

ဖူအန်းနှင့် ဤမျှရင်းနှီးသော ဆက်ဆံရေးမျိုး ရှိခဲ့သည်ဟု သူ မမှတ်မိချေ။

သူ တစ်ချက် လှမ်းကြည့်လိုက်ရာ ဖူအန်း၏ ကျင့်ကြံခြင်းမှာ ချီသန့်စင်ခြင်း တတိယအဆင့်တွင်သာ ရှိနေသေးကြောင်း တွေ့လိုက်ရ၏။

နှစ်ဝက်ကျော် ကြာမြင့်ခဲ့ပြီဖြစ်သော်လည်း သူသည် ချီသန့်စင်ခြင်း အလယ်အလတ်အဆင့်၏ ပိတ်ဆို့နေမှုကို မဖောက်ထွက်နိုင်သေးချေ။

သူ တစ်ခါမျှ ဂရုမစိုက်ခဲ့ဖူးသော ချီသန့်စင်ခြင်း စတုတ္ထအဆင့်သည် ဖူအန်းအတွက်မူ ဖြတ်ကျော်၍ မရနိုင်သော ချောက်ကမ်းပါးကြီးတစ်ခုသဖွယ် ဖြစ်နေပြီး အဆင့်တက်ရန် နည်းလမ်းရှာဖွေဖို့ အချိန်နှင့် အားထုတ်မှုများစွာ လိုအပ်နေပုံရသည်။

"စီနီယာအစ်ကိုချန်က ချီသန့်စင်ခြင်း ဆဋ္ဌမအဆင့်ကို ရောက်သွားပြီလား။"

ဖူအန်းက တံခါးဝမှနေ၍ ချန်လော့အား ကြည့်ကာ ရုတ်တရက် မေးလိုက်၏။

ပြီးခဲ့သည့်တစ်ခေါက်က ချန်လော့ ပူးပေါင်းတာဝန်တစ်ခုကို ရယူခဲ့ခြင်းက သူ့ကို အံ့အားသင့်စေခဲ့သည်။

ဤတစ်ကြိမ် ပြန်လာပြီးနောက် သူသည် နောက်ထပ် အဆင့်ငယ်တစ်ခုကို ထပ်မံတက်လှမ်းနိုင်ခဲ့သည်ဟု သူ ကြားခဲ့ရ၏။ ဖူအန်းသည် သူ၏ တိကျသောနယ်ပယ်ကို မခွဲခြားနိုင်တော့ဘဲ သူ၏ ကိုယ်ပိုင်ခံစားချက်အပေါ် အခြေခံ၍သာ ခန့်မှန်းနိုင်တော့သည်။

"စီနီယာအစ်ကို့ရဲ့နယ်ပယ်ကို ကျွန်တော် စူးစမ်းဖို့ ရည်ရွယ်တာတော့ မဟုတ်ပါဘူး။ ဒါပေမယ့် စကားဆက်မပြောခင် စီနီယာအစ်ကို့ရဲ့ နယ်ပယ်ကို ကျွန်တော် အတည်ပြုဖို့ လိုအပ်တဲ့ ကိစ္စတစ်ခု ရှိနေလို့ပါ။"

ဤကိစ္စအကြောင်း ပြောလာသောအခါ ဖူအန်း၏ မျက်လုံးများမှာ အနည်းငယ်မှေးမှိန်နေပြီး ဂိုဏ်းထဲသို့ စတင်ဝင်ရောက်လာစဉ်ကလောက် ယုံကြည်မှု မရှိတော့ချေ။

သူသည် အရာများစွာကို တွေ့ကြုံခံစားခဲ့ရပြီး အလွန်အမင်း စိတ်ပျက်အားလျော့လာကာ ဘဝကိုပင် စတင်သံသယဝင်လာခဲ့ခြင်း ဖြစ်နိုင်ပေသည်။

"ငါ တကယ်ပဲ ချီသန့်စင်ခြင်း ဆဋ္ဌမအဆင့်မှာပါ။"

ချန်လော့က ခေါင်းညိတ်ပြလိုက်၏။ သူ ချီသန့်စင်ခြင်း ဆဋ္ဌမအဆင့်သို့ တက်လှမ်းသွားခြင်းမှာ လျှို့ဝှက်ချက်တစ်ခု မဟုတ်ချေ။

လူအများအပြား သိရှိထားကြပြီး ဖုံးကွယ်ထားစရာလည်း မရှိပေ။

"အဲဒီလိုဆိုရင် စီနီယာအစ်ကို့ကို အကူအညီတစ်ခုလောက် တောင်းချင်ပါတယ်။"

ဖူအန်းက သက်ပြင်းတစ်ချက်ချလိုက်ပြီးနောက် ဆက်ပြောလေ၏။

ဤသင်္ချိုင်းနေရာသည် ဤအတွက် အလွန်ကောင်းမွန်လှသည်။

ဤနေရာမှာ တိတ်ဆိတ်ငြိမ်သက်နေပြီး အခြားသူများ ကြားသွားမည်ကို စိုးရိမ်စရာမလိုဘဲ မည်သည့်အရာကိုမဆို တုံ့ဆိုင်းမနေဘဲ ပြောဆိုနိုင်ပေသည်။

"ကျွန်တော့် မိသားစုအတွက် ရန်သူတချို့ကို ဟန့်တားဖို့ စီနီယာအစ်ကို့ရဲ့ မသေမျိုးဂိုဏ်းက တပည့်ဆိုတဲ့ ဂုဏ်ပုဒ်ကို အသုံးပြုပေးနိုင်ဖို့ မျှော်လင့်ပါတယ်။"

"မင်းကိုယ်တိုင်ကရော ဘာဖြစ်လို့လဲ။"

ချန်လော့မှာ အနည်းငယ် ထူးဆန်းနေမိသည်။ ဤကောင်လေးကိုယ်တိုင်က နတ်ဘုရားရေကန်မသေမျိုးဂိုဏ်း၏ တပည့်တစ်ဦး မဟုတ်ဘူးလော။

အဘယ်ကြောင့် အပြင်လူဖြစ်သော သူ့ထံသို့ လာရောက်ရသနည်း။

"ကျွန်တော် နောက်နှစ် တောင်အောက် ဆင်းတော့မှာ။" ဖူအန်းသည် လက်တွေ့အခြေအနေကို လက်ခံလိုက်ပြီဖြစ်သည်။

သူသည် ကောင်းကင်ဘုံကို အာခံကာ သူ၏ ကံကြမ္မာကို ပြောင်းလဲနိုင်မည်ဟု မူလက ထင်မှတ်ထားခဲ့သော်လည်း မသေမျိုးဂိုဏ်းသို့ ဝင်ရောက်လာပြီးနောက် ဤကမ္ဘာကြီးတွင် ဆယ်ခု၌ ရှစ်ခုကိုးခုခန့်မှာ ကျေနပ်ဖွယ်မရှိကြောင်းကို သူ နားလည်သဘောပေါက်သွားခဲ့၏။

အောက်ခြေရှိ လူတိုင်းတွင် ကိုယ်ပိုင်အတွင်းကျိတ် နာကြည်းချက်များ ရှိကြပြီး လူတိုင်းက အပေါ်သို့ မတက်လှမ်းနိုင်ကြချေ။

"နောက်နှစ် ဟုတ်လား။"

နတ်ဘုရားရေကန်မသေမျိုးဂိုဏ်း၏ စည်းမျဉ်းများအရ အပြင်စည်းတပည့်များသည် တောင်ပေါ်တွင် သုံးနှစ်ကြာ နေထိုင်ခွင့်ရှိသည်။ မမျှော်လင့်ထားသောအရာများ မဖြစ်ပေါ်ခဲ့ပါက ဖူအန်းသည် တောင်ပေါ်တွင် နောက်ထပ် နှစ်နှစ်ကျော်ခန့် ဆက်လက်နေထိုင်နိုင်ဦးမည် ဖြစ်သည်။

"ကျွန်တော်က ချန်နန်နိုင်ငံရဲ့မြောက်ပိုင်းစောင့်ဘုရင်ရဲ့ တစ်ဦးတည်းသော သားပါ။"

ဖူအန်းသည် အသေးစိတ်အချက်အလက်များကို ကျော်ချန်ကာ သူ၏ နောက်ခံသမိုင်းကြောင်းကို အကျဉ်းချုပ် ရှင်းပြလိုက်၏။

ချန်လော့ နားလည်သွားသည်။ ဖူအန်း ထွက်ခွာသွားခြင်းသည် သူ၏ မိသားစုနှင့် သက်ဆိုင်နေပြီး မိသားစု ပဋိပက္ခများနှင့် ပါဝင်ပတ်သက်နေမည်ဖြစ်ရာ ချန်လော့သည် အသေးစိတ် ထပ်မမေးတော့ချေ။

"လွန်ခဲ့တဲ့ရက်ပိုင်းလောက်က အိမ်ကနေ အရေးတကြီး စာတစ်စောင် ရောက်လာတယ်။ အဖေက အပြင်းအထန်ဖျားနာနေပြီး ထီးနန်းဆက်ခံဖို့ ကျွန်တော်ပြန်လာဖို့ လိုအပ်နေတယ်တဲ့။ မသေမျိုးဂိုဏ်းလက်အောက်က နိုင်ငံသုံးခုဆိုတာ မသေမျိုးဂိုဏ်း အာဏာစက်ရဲ့ တိုးချဲ့မှုတွေဆိုတာကို စီနီယာအစ်ကို သိထားသင့်တယ်။ မသေမျိုးဂိုဏ်းအတွင်းက ထောက်ခံမှုကို ဆုံးရှုံးသွားရင် ထီးနန်းက သေချာပေါက် တည်ငြိမ်မှာ မဟုတ်ဘူး။ ကျွန်တော် မသေမျိုးဂိုဏ်းထဲမှာ အခြေကျပြီး အတွင်းစည်းတပည့်တစ်ယောက်ဖြစ်လာပြီး မိသားစုကို လေမိုးဒဏ်ကနေ ကာကွယ်ပေးနိုင်ဖို့ အဖေက မူလက မျှော်လင့်ထားခဲ့တာ။ ဒါပေမယ့် ကံမကောင်းစွာနဲ့ပဲ ကျွန်တော့်ရဲ့ ပါရမီက မလုံလောက်ခဲ့ဘူး။ အတွင်းစည်းတပည့်တစ်ယောက်ဖြစ်လာဖို့ဆိုတာ ဝေးစွ.. ချီသန့်စင်ခြင်း အလယ်အလတ်အဆင့်ကိုတောင် မဖောက်ထွက်နိုင်ဘူး။ ဆက်ပြီး သည်းခံနေလည်း ရလဒ်က ပြောင်းလဲသွားမှာ မဟုတ်ပါဘူး။"

စကား၏နောက်ဆုံးရှိသော အပိုင်းများကို အဆုံးသတ်မပြောတော့သော်လည်း အဓိပ္ပာယ်မှာ အလွန်ရှင်းလင်းလှပေသည်။

သူသည် မသေမျိုးကျင့်ကြံခြင်းကို စွန့်လွှတ်ကာ မိသားစုပိုင်ဆိုင်မှုများကို ဆက်ခံရန် ပြန်သွားရန် ပြင်ဆင်နေခြင်းဖြစ်သည်။

"မင်း ငှားလို့မရဘူးလား။ ဂိုဏ်းမှာ အဲဒီလို လမ်းကြောင်းမျိုးရှိတယ်လို့ ငါမှတ်မိတယ်။ မရှိဘူးဆိုရင်တောင် စီနီယာအစ်ကို ဟွမ်ပူထုန်ကို မင်း သွားမေးလို့ရတယ်။ သူ သေချာပေါက် သိမှာပဲ။"

မသေမျိုးဂိုဏ်းတွင် ဝိညာဉ်ကျောက်တုံးများဖြင့် မဖြေရှင်းနိုင်သော ပြဿနာဟူ၍ မရှိကြောင်း သင်္ချိုင်းစောင့် စီနီယာအစ်ကိုတစ်ခါက ပြောဖူးသည်ကို ချန်လော့ မှတ်မိနေ၏။

"အရမ်းဈေးကြီးတယ်။"

ဖူအန်းက တိုးလျစွာ ပြောလိုက်၏။

ထိုအချက်က အထိနာစေသော နေရာကို ထိမှန်သွားလေသည်။

ချန်လော့မှာ မည်သို့ ပြန်လည်တုံ့ပြန်ရမည်ကို မသိအောင် ဖြစ်သွားရသည်။

"ကျွန်တော် စီနီယာအစ်ကို့ဆီ လာရတဲ့အကြောင်းရင်းက စီနီယာအစ်ကို့ရဲ့ အမှတ်အသားတံဆိပ်ကို ကျွန်တော့်ကို ငှားပေးနိုင်ဖို့ မျှော်လင့်လို့ပါ။ အဲဒီအတွက် ကျေးဇူးဆပ်တဲ့အနေနဲ့ စီနီယာအစ်ကို့အတွက် လက်ဆောင်ကြီးတစ်ခု ကျွန်တော် ပြင်ဆင်ပေးပါ့မယ်။"

အကြောင်းရင်းနှင့် အကျိုးဆက်များကို ရှင်းပြပြီးနောက် ခေါင်းစဉ်မှာ အဓိကအချက်သို့ ရောက်ရှိလာခဲ့သည်။

"ငါ့ရဲ့အမှတ်အသားတံဆိပ် ဟုတ်လား။ အဲဒါက အသုံးဝင်တယ်လို့ မင်း သေချာရဲ့လား။"

ချန်လော့သည် အလျင်စလို သဘောမတူလိုက်ချေ။ ဖူအန်းနှင့် သူ၏ ဆက်ဆံရေးမှာ ထိုအဆင့်ထိ မရောက်သေးပေ။

အကယ်၍ ဂျူနီယာညီမလေး ဟွမ်ယင်း သို့မဟုတ် တုကျန်းသာဆိုလျှင် သူသည် နှစ်ကြိမ်ပြန်မစဉ်းစားဘဲ သေချာပေါက် သဘောတူလိုက်မည် ဖြစ်သည်။

"စီနီယာအစ်ကို့ရဲ့ ပါရမီနဲ့ဆိုရင် အစ်ကိုက နောင်တစ်ချိန်မှာ အတွင်းစည်းတပည့် တစ်ယောက် သေချာပေါက် ဖြစ်လာမှာပါ။"

ချန်လော့အပေါ် ထားရှိသော ဖူအန်း၏ ယုံကြည်မှုမှာ ယခုအခါ မည်သူ့ထက်မဆို ပိုမိုကြီးမားနေပေသည်။

ချန်လော့ တစ်ဆင့်ပြီးတစ်ဆင့် လက်ရှိအဆင့်အထိ ကြီးထွားလာသည်ကို သူ ကိုယ်တိုင်ကိုယ်ကျ စောင့်ကြည့်ခဲ့ရ၏။ သူ အစပိုင်းက မျက်စိကျခဲ့သော စီနီယာအစ်မဟွမ်ယင်းပင်လျှင် ယခုအခါတွင် ယှဉ်နိုင်မည် မဟုတ်တော့ချေ။

အခန်း ၁၀၀ - အမျိုးအစားစုံလင်သော ဦးနှောက်များ

နတ်ဘုရားရေကန်မသေမျိုးဂိုဏ်းသည် ကြီးမားသော စီးပွားရေးလုပ်ငန်းစုကြီးတစ်ခုနှင့် တူလှပေသည်။ ၎င်းသည် အရင်းအမြစ်မြောက်မြားစွာကို ဖြန့်ကြက်ထားပြီး လက်အောက်ခံနိုင်ငံ သုံးခုအား တစ်စိတ်တစ်ပိုင်းစီ စိုက်ပျိုးထုတ်လုပ်စေ၏။

ထိုနိုင်ငံသုံးခု၏ တော်ဝင်မိသားစုများသည် ဂိုဏ်းအတွက် ထိုအရင်းအမြစ်များကို အခွန်အဖြစ် စုဆောင်းပေးရသည့် တာဝန်ရှိကြသည်။ ချန်လော့နှင့် အခြားသူများ အခြေချနေထိုင်ရာ အခြေပြုရာ တောင်နက်ရွာမှာမူ ဤကြီးမားသော နောက်ခံကားချပ်အောက်ရှိ ရွာလေးတစ်ရွာသာဖြစ်ပြီး လူတိုင်းမှာ ကြီးမားလှသော နတ်ဘုရားရေကန်မသေမျိုးဂိုဏ်းအတွက် ပုရွက်ဆိတ်များကဲ့သို့ အလုပ်အကျွေးပြုနေကြရသူများ ဖြစ်သည်။

နိုင်ငံသုံးခု၏ အစစ်အမှန် အုပ်ချုပ်သူများမှာ နတ်ဘုရားရေကန်မသေမျိုးဂိုဏ်းမှ ဆင်းသက်လာကြသည့် ဝါရင့်တပည့်များသာ ဖြစ်သည်။ အကယ်၍ ချန်လော့သာ အမှန်တကယ် အတွင်းစည်းတပည့် တစ်ဦး ဖြစ်လာခဲ့ပါက ထိုသူများသည် လောကီအကျိုးအမြတ်များအတွက်နှင့် ပါရမီရှင်တစ်ဦးဖြစ်သော သူ့ကို သေချာပေါက် ရန်သူပြုဝံ့ကြမည် မဟုတ်ချေ။

"မင်းကို ငါ့ရဲ့ အမှတ်အသားတစ်ခု ပေးလို့ရပါတယ်။" ခဏမျှ စဉ်းစားပြီးနောက် ချန်လော့က ပြောလိုက်၏။

"ဒါပေမဲ့ အဲဒါကို မင်း ဘယ်လောက်အထိ သုံးလို့ရမလဲဆိုတာကတော့ မင်းရဲ့ စိတ်ရင်းစေတနာအပေါ်မှာပဲ မူတည်လိမ့်မယ်။"

ဆေးမီးဖိုများ အကြိမ်ကြိမ် ပေါက်ကွဲပြီးနောက် ယခုအခါ သူသည် အလွန် ဆင်းရဲမွဲတေနေပြီ ဖြစ်သည်။ တစ်စုံတစ်ယောက်က အကူအညီလာတောင်းခြင်းမှာ ရှားပါးလှသဖြင့် သူ အဘယ်ကြောင့် ငြင်းပယ်ရမည်နည်း။

ဖူအန်း၏ မိသားစု ပြဿနာမှာ ချန်လော့မျက်လုံးထဲတွင် ဘာမှမဟုတ်သော ကိစ္စလေးသာ ဖြစ်သည်။ သူ နတ်ဘုရားရေကန်မသေမျိုးဂိုဏ်းတွင် ရှိနေသရွေ့ ထိုပြဿနာများ ပေါ်ပေါက်လာမည် မဟုတ်ချေ။

အပြင်လောကရှိ လူများသည် လောဘကြီးကြသော်လည်း လူမိုက်များတော့ မဟုတ်ကြပေ။

ချန်လော့က သဘောတူကာ ခေါင်းညိတ်ပြသည်ကို မြင်သောအခါ ဖူအန်းလည်း သက်ပြင်းတစ်ချက် ချနိုင်တော့သည်။

အကယ်၍ ချန်လော့နှင့် သဘောတူညီမှုမရပါက သူသည် စီနီယာအစ်မ ဟွမ်ယင်းကိုသာ ရှာဖွေရတော့မည်ဖြစ်သည်။

သူသည် သူ၏ ရင်ဘက်ထဲမှ သိုလှောင်အိတ် တစ်လုံးကို ထုတ်ယူလိုက်၏။

ဖူအန်းသည် အိတ်ဝကို လက်ဖြင့် ပွတ်သပ်လိုက်ရာ လေးမီတာခန့် ရှည်လျားသော အရိုးစုတစ်ခုသည် အခန်းထဲတွင် ပေါ်လာတော့သည်။

"ဒါက ချီသန့်စင်ခြင်းအဆင့်က ကျားဘုရင် မိစ္ဆာသားရဲရဲ့ အရိုးစုပါ။ အဖိုးတန်ဆုံးဖြစ်တဲ့ မိစ္ဆာသွေးတွေကို ဖောက်ထုတ်ပြီးသား ဖြစ်ပေမဲ့ ဒီအရိုးစုက အတော်လေး တန်ဖိုးရှိနေတုန်းပါပဲ။ အကယ်၍ လေလံပွဲမှာ တင်ရောင်းမယ်ဆိုရင် ကံကောင်းရင် ဝိညာဉ်ကျောက်တုံး ငါးရာလောက်အထိ ရနိုင်ပါတယ်။"

ဆုံးဖြတ်ချက် ချပြီးသား ဖြစ်သော်လည်း ဤပစ္စည်းကို အမှန်တကယ် ထုတ်ပေးရသောအခါ ဖူအန်းမှာ နှမြောတသဖြစ်မှုကို ခံစားနေရဆဲပင်။

ဝိညာဉ်ကျောက်တုံး ငါးရာဆိုသည်မှာ သေးငယ်သော ပမာဏ မဟုတ်ချေ။

"မိစ္ဆာသားရဲ အရိုးစုလား။"

ချန်လော့၏ အကြည့်သည် သူ၏ ရှေ့မှ အရိုးစုပေါ်သို့ ဝေ့ဝဲသွား၏။ ကျားမိစ္ဆာအရိုးစုပေါ်ရှိ ပြည့်စုံသောဦးခေါင်းခွံကို မြင်လိုက်ရသောအခါ သူ၏ မျက်လုံးများ အနည်းငယ် တောက်ပသွားသည်။

ယခင်က သူသည် လူသားဦးခေါင်းခွံများနှင့်သာ ကြုံတွေ့ခဲ့ဖူးပြီး မိစ္ဆာသားရဲ၏ ဦးခေါင်းခွံကို မြင်ဖူးခြင်းမှာ ယခုက ပထမဆုံး အကြိမ်ဖြစ်သည်။

'ဒါကိုလည်း ဖော်ထုတ်လို့ ရမလား မသိဘူး။'

သွေးအဆီအနှစ် မရှိခြင်းမှာ နှမြောစရာပင်။ သို့မဟုတ်ပါက ရှေးဟောင်းနည်းလမ်းကို အသုံးပြုကာ ချီသန့်စင်ခြင်း ကိုးခုမြောက်အဆင့်သို့ တိုက်ရိုက်ရောက်အောင် ကြိုးစားကြည့်၍ ရနိုင်ပေသည်။

ထိုသို့တွေးမိသော်လည်း မိစ္ဆာအမြုတေ မရှိသော အရာမှန်သမျှမှာ တောရိုင်းတိရစ္ဆာန်မျှသာ ဖြစ်ကြောင်း အလောင်းခြောက်၏ ဦးနှောက်မှတ်ဉာဏ်ထဲတွင် ရှိနေသည်။

"ဒီကျားမိစ္ဆာကို ကျွန်တော့်အဖေနဲ့ သူ့လူတွေက အရင်းအနှီး အများကြီး စိုက်ထုတ်ပြီး အမဲလိုက်ခဲ့ကြတာပါ။ ချီသန့်စင်ခြင်းအဆင့်က မိစ္ဆာသားရဲတစ်ကောင်ပဲဖြစ်ပေမဲ့ သူ့ကို သတ်နိုင်ဖို့ ကျွန်တော်တို့ နန်းတော်က ကိုယ်ရံတော် ခုနစ်ယောက် သေဆုံးခဲ့ရပြီး အဖေ့ရဲ့ဒဏ်ရာတွေကလည်း ဒီကောင်ဆီက ရခဲ့တာပါ။"

ဖူအန်းက ကျားမိစ္ဆာကို အမဲလိုက်ခဲ့ပုံကို အကျဉ်းချုပ် ရှင်းပြသည်။

နိုင်ငံသုံးခု၏ နယ်မြေအတွင်း တောရိုင်းမိစ္ဆာသားရဲများမှာ အခြေခံအားဖြင့် မျိုးသုဉ်းသလောက် ဖြစ်နေပြီဖြစ်သည်။

အပြင်လောကတွင် တွေ့ရခဲလှသော ထိုမိစ္ဆာသားရဲများသည် ပိုင်ရှင်ရှိသူများ သို့မဟုတ် ရင်ဆိုင်ရန် အလွန်အစွမ်းထက်လွန်းသူများသာ ဖြစ်ကြ၏။

ချီသန့်စင်ခြင်းနယ်ပယ်ရှိ ကျားမိစ္ဆာနှင့် ကြုံတွေ့ရခြင်းမှာပင် အလွန် ကံကောင်းခြင်း ဖြစ်သည်။ အဖိုးတန်သော အသား၊ သွေးနှင့် ကိုယ်တွင်းအင်္ဂါများကို ဖူအန်း၏ မိသားစုက ရောင်းချခဲ့ပြီး ဖြစ်သည်။

ဤအရိုးစုကိုလည်း ရောင်းချရန် ပြင်ဆင်ထားသော်လည်း ဖူအန်းက နောက်ဆုံးမိနစ်တွင် ချန်လော့ကို ပေးအပ်ရန် ဆုံးဖြတ်ခဲ့ခြင်းဖြစ်သည်။

"ဝိညာဉ်ကျောက်တုံး ငါးရာတန်တဲ့ မိစ္ဆာသားရဲအရိုးစုက အတွင်းစည်းတပည့်ဂုဏ်ပုဒ်ကိုတောင် ဝယ်လို့မရဘူးလား။"

ချန်လော့မှာ အနည်းငယ် သိချင်စိတ် ဖြစ်ပေါ်လာ၏။

ဂိုဏ်း၏ အတွင်းစည်းတပည့် ဂုဏ်ပုဒ်ကို မည်သို့ ရောင်းချသည်ကို သူ အမှန်တကယ် သိချင်မိသည်။

ဤမျှအကျိုးအမြတ်များသော စီးပွားရေးကို သူ အဆင့်မြင့်နေရာသို့ ရောက်ရှိပါက သေချာပေါက် အင်တိုက်အားတိုက် မြှင့်တင်ပေးမည်ဖြစ်သည်။

၎င်းမှာ အေးအေးဆေးဆေး အိပ်နေရင်းနှင့်ပင် ပိုက်ဆံရှာနေခြင်းပင် မဟုတ်ပါလော။

"ကျွန်တော်တို့ ဝူတောက်တောင်ထိပ်ရဲ့ အတွင်းစည်းတပည့် ဂုဏ်ပုဒ်က ဝိညာဉ်ကျောက်တုံး သုံးထောင်လောက်ကျသင့်ပြီး ပါရမီအပေါ် မူတည်ပြီး ဈေးနှုန်း အပြောင်းအလဲ ရှိပါတယ်" ဟု ဖူအန်းက စိတ်ပျက်လက်ပျက်ဖြင့် ပြောလိုက်၏။

သူသည် ထိုဂုဏ်ပုဒ်ကို ဝယ်ယူရန်အတွက် ငွေစုနေခဲ့သည်မှာ ကြာပြီဖြစ်သည်။ သို့သော် တစ်ဖက်လူက သူ၏ ပါရမီကို သိသွားပြီးနောက် ဝိညာဉ်ကျောက်တုံး သုံးထောင်အပြင် နောက်ထပ် နှစ်ထောင် ထပ်တိုးတောင်းခဲ့သည်။

ဤသည်မှာ သူ၏ အတွင်းစည်းတပည့်ဖြစ်ရန် အစီအစဉ်ကို တိုက်ရိုက်ဖျက်ဆီးပစ်လိုက်သည့် နောက်ဆုံးလက်ကျန် မျှော်လင့်ချက်ပင် ဖြစ်သည်။

"ကောင်းပြီ၊ ဒီကျားရိုးကို ငါ ယူလိုက်မယ်။" ချန်လော့က လက်ဝှေ့ယမ်းလိုက်ရာ ဝိညာဉ်စွမ်းအင်ဖြင့် ကျားဘုရင်အရိုးကို သူ၏ သိုလှောင်အိတ်ထဲသို့ ထည့်လိုက်သည်။

ထို့နောက် သူ၏ အမှတ်အသားတံဆိပ်မှ စွမ်းအင်လှိုင်းကို ကူးယူကာ ဖူအန်းအား ပေးအပ်လိုက်၏။

ဤစွမ်းအင်လှိုင်းသည် သုံးနှစ်အထိ တည်ရှိနိုင်မည်ဖြစ်သည်။ အကယ်၍ သုံးနှစ်ကြာပြီးနောက် ဆက်လက်အသုံးပြုလိုပါက ထပ်မံပေးချေရမည် ဖြစ်သည်။

"ကျေးဇူးတင်ပါတယ် စီနီယာအစ်ကို။" ဖူအန်းသည် တံဆိပ်ကို ယူကာ စိတ်သက်သာရာရစွာဖြင့် ထွက်ခွာသွားတော့သည်။

ဤအရာရှိပါက သူသည် စိတ်အေးလက်အေးဖြင့် အိမ်ပြန်နိုင်ပြီဖြစ်သည်။

သုံးနှစ်ကြာပြီးနောက်အတွက်မူ ထိုအချိန်ကျမှသာ နည်းလမ်းရှာရပေလိမ့်မည်။ နန်းတော်ရှိ အခြားညီအစ်ကိုများ အားလုံးမှာလည်း အသုံးမကျသူများ ဖြစ်လိမ့်မည်ဟု သူ မယုံကြည်ချေ။

အကယ်၍ အမှန်တကယ် ထိုသို့ဖြစ်နေပါက သုံးနှစ်ကြာပြီးနောက် သက်တမ်းတိုးရန် မလိုအပ်တော့ချေ။ ဂိုဏ်းဝင်ကျင့်ကြံသူ တစ်ဦးတစ်ယောက်မျှမရှိသော မိသားစုမှာ မင်းသားဘွဲ့ကို ဆက်လက်ခံယူရန် အရည်အချင်းမရှိပေ။

တံခါးကို ပိတ်လိုက်၏။

ချန်လော့သည် ပြန်လည်ထိုင်လိုက်ပြီး သူ၏ သိုလှောင်အိတ်ထဲမှ ကျားဘုရင်အရိုးကို ထုတ်ယူလိုက်သည်။

'သေဆုံးနေသောအရာ၏ ဦးနှောက်လှိုင်းများနှင့် ထိတွေ့မှု၊ ပျက်စီးမှုအဆင့် ၉၉%။ ဖတ်ရှုလိုပါသလား။'

အမှန်တကယ်ပင် အလုပ်လုပ်ပေသည်။

ချန်လော့သည် ချက်ချင်းပင် ဖတ်ရှုရန် ရွေးချယ်လိုက်၏။ လုံးဝကွဲပြားခြားနားသော ဦးနှောက်လှိုင်းတစ်ခုသည် သူ၏ စိတ်ထဲသို့ တိုးဝင်လာသည်။

ပြင်ပဦးနှောက် တစ်ရာ့နှစ်ဆယ်ကို လက်ခံထားပြီးသားဖြစ်သော သူ၏ ခန္ဓာကိုယ်မှာ ချက်ချင်းပင် အကန့်အသတ်သို့ရောက်ရှိသွားပြီး နှာခေါင်းသွေးများ ယိုစီးလာခဲ့သည်။

သို့သော် ဤတစ်ကြိမ်တွင်မူ အကန့်အသတ်ကို အမှန်တကယ် ကျော်လွန်သွားခြင်း မဟုတ်ပေ။ ခဏမျှမူးဝေသွားပြီးနောက် သူသည် အမှန်တကယ်ပင် တောင့်ခံနိုင်ခဲ့သည်။

"ဦးနှောက်လှိုင်းပြင်းအားက ကျင့်ကြံသူတစ်ယောက်ထက် အများကြီး နိမ့်ကျနေတာပဲ။"

ချန်လော့သည် ပြန်လည်သက်သာလာပြီးနောက် ထိုနှစ်ခုကြားရှိ ကွဲပြားချက်များကို စတင်ခွဲခြားကြည့်လေ၏။

ကျားမိစ္ဆာ၏ ဦးနှောက်လှိုင်းမှာ သိသိသာသာ အားနည်းလှသည်။ ချီသန့်စင်ခြင်းနယ်ပယ် အတူတူပင်ဖြစ်သော်လည်း တူညီသောအဆင့်ရှိ ကျင့်ကြံသူတစ်ဦးထက် များစွာ နိမ့်ကျနေပေသည်။

သူသည် ကျားမိစ္ဆာ၏ ဦးနှောက်ကို ခေါ်ယူရန် ကြိုးစားလိုက်၏။

'ခန္ဓာကိုယ်က အားနည်းလွန်းလို့ အမဲမလိုက်နိုင်ဘူး။'

အားနည်းသော အသိစိတ်တစ်ခု စီးဆင်းလာသဖြင့် ချန်လော့မှာ အနည်းငယ် အံ့အားသင့်သွားသည်။ သေချာစွာ အာရုံခံကြည့်လိုက်သောအခါ ပြန့်ကျဲနေသော ဗဟုသုတများစွာ သူ၏ စိတ်ထဲတွင် ပေါ်လာကြောင်း တွေ့ရှိရသည်။

၎င်းတို့မှာ များသောအားဖြင့် ဝိညာဉ်စွမ်းအားကို စုပ်ယူကာ ခြေလက်နှင့် လက်သည်းများ၊ အမြီးများကိုပါ လေ့ကျင့်ပေးသည့် နည်းလမ်းများ ဖြစ်သည်။

မတူညီသောရှုထောင့်များမှ ကြည့်ပါက မတူညီသော သတင်းအချက်အလက်များကို မြင်တွေ့နိုင်ပေ၏။

"ဒါကလည်း ရှာဖွေတွေ့ရှိမှု အသစ်တစ်ခုပဲ။"

ချန်လော့သည် စိတ်ကို ပြန်လည်စုစည်းကာ ကျားဘုရင်အရိုးကို သိမ်းဆည်းလိုက်ပြီး ဂျူနီယာညီမလေးဟွမ်ယင်း ကျင့်ကြံခြင်းမှ ထွက်လာမလာကို မနက်ဖြန်တွင် သွားကြည့်ရန် စီစဉ်လိုက်သည်။

အကယ်၍ သူမ ထွက်လာပါက ၎င်းကို ရောင်းချပေးရန် သူမကို အကူအညီတောင်းမည်ဖြစ်သည်။

ဦးနှောက်ကို ဖော်ထုတ်ပြီးပြီဖြစ်ရာ ထိုအရိုးမှာ သူ့အတွက် အသုံးမဝင်တော့ချေ။

သူ၏ အကြည့်မှာ ဆေးမီးဖိုဆီသို့ ပြန်ရောက်သွား၏။

ဆေးမီးဖိုဖွင့်ကာ စမ်းသပ်ရန် သူ ပြင်ဆင်လိုက်သည်။ ပြင်ပဦးနှောက် နှစ်ခုမှာ တုကျန်းထံမှ ရရှိထားသော ဆေးဖော်စပ်နည်းကို အသည်းအသန် လေ့လာနေကြ၏။

ဦးနှောက်အမြောက်အမြား တစ်ပြိုင်နက် အလုပ်လုပ်နေခြင်းမှာ သူ၏ အာရုံစူးစိုက်မှုကို မဟန့်တားနိုင်သလို ဆေးဖော်စပ်ခြင်းကိုလည်း မထိခိုက်စေချေ။

ထိုင်ချလိုက်ပြီးနောက် ချန်လော့သည် လက်ဟန်တစ်ခု ပြုလုပ်လိုက်ရာ ဆေးမီးဖိုမှာ လည်ပတ်လျက် အပေါ်သို့ ပျံတက်သွားပြီး ၎င်း၏ အဖုံးမှာ အလိုအလျောက် ပွင့်သွားသည်။ ဆေးမီးဖိုဖွင့်သည့် ဤနည်းစနစ်မှာ ဆေးဘက်ဝင်ပစ္စည်းများစွာကို အရင်းအနှီးပြုကာ သူ၏ ပြင်ပဦးနှောက်များမှတစ်ဆင့် သိလိုစိတ်ဖြင့် သင်ယူခဲ့သောအရာ ဖြစ်သည်။

'မြက်နက်က အဆိပ်ရှိတယ်။ အများကြီးစားရင် ဝမ်းလျှောတတ်ပေမဲ့ နှစ်လုပ်လောက်ပဲ စားရင်တော့ ခွန်အား အနည်းငယ် တိုးစေနိုင်တယ်။'

သူ၏ လက်ဖဝါးက ဆေးဘက်ဝင်ပစ္စည်းအိတ်ကို ထိလိုက်သည်နှင့် သူ၏ စိတ်ထဲရှိ အသစ်ရရှိထားသော ကျားမိစ္ဆာဦးနှောက်က အတွေးတစ်ခုကို ရုတ်တရက် ပို့လွှတ်လိုက်၏။

ဤသည်မှာ ချန်လော့ကို ခဏမျှ ရပ်တန့်သွားစေသည်။

သူသည် လက်ထဲရှိ ဆေးအိတ်ကို ပြန်ကြည့်လိုက်သည်။ အတွင်းရှိ ဆေးဘက်ဝင်ပစ္စည်းများမှာ သူ စမ်းသပ်ပြီးနောက် စီစဉ်ထားသည့်အရာများ ဖြစ်သည်။

၎င်းတို့မှာ ဆေးလုံးဖြစ်လာရန် အခွင့်အလမ်း အရှိဆုံး ပစ္စည်းများ ဖြစ်သည်။ ဆေးဝါးဘက်ဆိုင်ရာအရလည်း ထိုပစ္စည်းများ၏ ပါဝင်မှုများကို ခွဲခြမ်းစိတ်ဖြာထားသော်လည်း ၎င်းတို့မှာ လူသားဆေးဖော်စပ်သူများ၏ ရှုထောင့်မှသာ ဖြစ်သည်။

မိစ္ဆာသားရဲတစ်ကောင်၏ ရှုထောင့်မှကြည့်လျှင်မူ လုံးဝကွဲပြားနေ၏။

ယခင်က ချန်လော့ ဘယ်သောအခါမျှ ရှာမတွေ့နိုင်ခဲ့သော ဆေးလုံးဖွဲ့စည်းခြင်းကျရှုံးရသည့် အကြောင်းရင်းမှာ ကျားမိစ္ဆာ၏ ရှုထောင့်မှ ကြည့်လိုက်သောအခါ ချက်ချင်းပင် သိသာထင်ရှားသွားတော့သည်။

"ဒါကြောင့်ကိုး"

ချန်လော့သည် သူ၏ လှုပ်ရှားမှုများကို ရပ်တန့်လိုက်ပြီး လက်ထဲရှိ မြက်နက်၏ အချိုးအစားကို လျင်မြန်စွာညှိနှိုင်းကာ ပြန်လည်ပြင်ဆင်ထားသော ဆေးပစ္စည်းများကို ထည့်လိုက်၏။

ကျားမိစ္ဆာဦးနှောက်မှ ရရှိသော ရှုထောင့်အသစ်သည် ချန်လော့အား အတွေးသစ်များစွာ ပေးစွမ်းနိုင်ခဲ့သည်။

အသီးအရွက်စားသော မိစ္ဆာသားရဲအချို့၏ ဦးနှောက်များကို စုဆောင်းနိုင်လျှင် ကောင်းမည်ဟု သူ ခံစားလိုက်ရသည်။ ထို့ပြင် မီးအပူချိန်ကို အာရုံခံနိုင်စွမ်းရှိသော မိစ္ဆာသားရဲများမှာလည်း သူ၏ ပစ်မှတ်များ ဖြစ်လာ၏။

ဆေးဝါးဗေဒ၊ မီးထိန်းချုပ်မှုနှင့် တိုက်ခိုက်ရေးမှော် ပညာရပ်များအထိပါ နယ်ပယ်ချဲ့ထွင်နိုင်ပေသည်။ ဥပမာအားဖြင့် လေခွင်းမသေမျိုးကြိုးကြာငှက်၏ ဦးနှောက်ကိုသာ သူ ဖတ်ရှုနိုင်ပါက လေထိန်းချုပ်ခြင်း နည်းစနစ်ကို အပြည့်အဝ တတ်မြောက်သွားမည် မဟုတ်ပါလော။

ထို့အပြင် နတ်ဘုရားရေကန်မသေမျိုးဂိုဏ်း၏ မဟာအစီရင်စုရှိ သွေးနှောနဂါးမှာလည်း...

ဝူတောက်တောင်ထိပ် တပည့်များ၏ ဦးနှောက်များသည် အကြောင်းအရာ တစ်ခုတည်းမှာပင် ထပ်နေလွန်းလှ၏။

သူ လိုအပ်သည်မှာ အမျိုးအစား စုံလင်မှုပင် ဖြစ်သည်။

ဤအချက်အားလုံးကို သူ၏ ကိုယ်တွင်း၌ ပေါင်းစပ်လိုက်သောအခါ သူသည် မျိုးဆက်သစ် ဆေးဖော်စပ်ခြင်းဆိုင်ရာ ဆရာသခင်တစ်ဦး ဖြစ်လာပေလိမ့်မည်။

"ငါ သားရဲထိန်းကျောင်းရေးတောင်ထိပ် ကို သွားသင့်တယ်" ချန်လော့က ရုတ်တရက် သတိပြုမိသွားသည်။

တစ်နာရီ၏ လေးပုံတစ်ပုံခန့် ကြာပြီးနောက်။

ချန်လော့၏ ထိန်းချုပ်မှုအောက်တွင် လက်ထဲရှိ ဝိညာဉ်မီး၏ အပူချိန်မှာ တဖြည်းဖြည်း တည်ငြိမ်လာ၏။

သူ၏ ကျွမ်းကျင်လှသော မီးထိန်းချုပ်မှုမှာ ဘဝတစ်လျှောက်လုံး ဆေးလုံးများ ဖော်စပ်လာခဲ့သည့် ဝါရင့်ဆေးဖော်စပ်သူတစ်ဦးနှင့် တူလှပေသည်။

ဆေးဘက်ဝင်ပစ္စည်းများမှာ လုံးဝ အရည်ပျော်သွားခဲ့ပြီဖြစ်သည်။

ချန်လော့၏ အမြဲမပြတ် ပြောင်းလဲနေသော မီးထိန်းချုပ်မှု နည်းစနစ်များအောက်တွင် ဆေးမီးဖိုအတွင်းရှိ ဆေးရည်များမှာ တဖြည်းဖြည်း စီးဆင်းသွားပြီး ဆေးမီးဖို၏ အလယ်ဗဟိုသို့ ဖြည်းညှင်းစွာ စုဆုံလာကြ၏။

ယခင်က ချန်လော့၏ ဆေးမီးဖိုမှာ ဤအဆင့်တွင် ပေါက်ကွဲလေ့ရှိသော်လည်း ဤတစ်ကြိမ်တွင်မူ ကျားမိစ္ဆာဦးနှောက်၏ ညှိနှိုင်းမှုကြောင့် ဤအဆင့်ကို ချောမွေ့စွာ ဖြတ်ကျော်နိုင်ခဲ့သည်။

နောက်ထပ် ခဏအကြာတွင် ဆေးမီးဖို၏ မျက်နှာပြင် အပူချိန်မှာ မြင့်တက်လာပြီး ဆေးမီးဖိုတစ်ခုလုံးမှာ အနီရင့်ရောင်သို့ ပြောင်းလဲသွား၏။ အတွင်းရှိ ဆေးရည်မှာလည်း လုံးဝန်းသော ပုံစံသို့ ဖွဲ့စည်းသွားတော့သည်။

ချန်လော့သည် သူ၏ နည်းစနစ်ကို စတင်ပြောင်းလဲလိုက်၏။

ဆေးဖော်စပ်ခြင်းအတွက် အသုံးပြုသော မီးတောက်မှာလည်း ပြင်းထန်သောမီးမှ နူးညံ့သောမီးသို့ ပြောင်းလဲသွားသည်။

ဤလုပ်ငန်းစဉ်အတွင်း သူ၏ ခန္ဓာကိုယ်အတွင်းရှိ ဝိညာဉ်ချီ အမြောက်အမြားမှာ ကုန်ဆုံးသွားခဲ့သည်။

ဆေးဖော်စပ်ခြင်းမှာ ခန္ဓာကိုယ်အတွက် အလွန်ပင်ပန်းလှသည်ဟူသော စကားမှာ အမှန်တကယ်ပင် မှန်ကန်လှပေသည်။

မီးတောက်အပူချိန်မှာ တဖြည်းဖြည်း လျော့နည်းသွားသည်။

နောက်ဆုံးတွင် အပူချိန်လုံးဝကျဆင်းသွားသောအခါ ဆေးမီးဖိုမှာ လေပေါ်မှ မြေကြီးပေါ်သို့ ကျဆင်းလာခဲ့၏။

ချန်လော့သည် အညစ်အကြေးများပါဝင်သော ချီများကို မှုတ်ထုတ်လိုက်ပြီး ခဏမျှ အနားယူကာ ရှေ့သို့ လှမ်းသွားလိုက်သည်။

လက်တစ်ချက် ဝေ့ယမ်းလိုက်ရုံဖြင့်။

ဆေးမီးဖို၏ အဖုံးမှာ အလိုအလျောက် ပွင့်သွားပြီး မွှေးကြိုင်လှသော ဆေးရနံ့များ ထွက်ပေါ်လာပေ၏။

ချန်လော့က လက်လှမ်းကာ ဖမ်းယူလိုက်သည်။

ဝိညာဉ်စွမ်းအားသည် ဆေးဖိုအတွင်း ဝေ့ဝဲသွားပြီး မည်းနက်နေသော ဆေးလုံးတစ်လုံးကို အောင်မြင်စွာ ဆွဲထုတ်နိုင်ခဲ့သည်။

ဆေးလုံးများ အကြိမ်ကြိမ် ဖော်စပ်ခဲ့ပြီးနောက် နောက်ဆုံးတွင် ထွက်လာသောအရာမှာ ဆေးဖတ်မည်းမည်းများ မဟုတ်တော့ချေ။

"ဒါကို ဆေးလုံးတစ်လုံးအဖြစ် သတ်မှတ်လို့ရပြီ မဟုတ်လား။"

ချန်လော့သည် ဆေးလုံးကို နှာခေါင်းနားသို့ ယူကာ နမ်းကြည့်လိုက်၏။ စူးရှပြီး စပ်ဖျားဖျားနိုင်သော အနံ့တစ်ခုမှာ သူ၏ နှာခေါင်းပေါက်ထဲသို့ တိုးဝင်လာသည်။

'အဆိပ်ရှိတယ်'

'ဝမ်းလျှောမယ်'

သူ၏ စိတ်ထဲရှိ ပြင်ပဦးနှောက်နှစ်ခုမှာ တစ်ပြိုင်နက်တည်း တုံ့ပြန်မှု ပေးလိုက်သည်။

တစ်ခုမှာ ဆေးဖော်စပ်ခြင်းအတွေ့အကြုံ အရှိဆုံး ဦးနှောက်ဖြစ်ပြီး ဒုတိယတစ်ခုမှာ ကျားမိစ္ဆာ၏ ဦးနှောက်ဖြစ်သည်။

ဤရလဒ်ကြောင့် ချန်လော့မှာ အနည်းငယ် စိတ်ပျက်သွားခဲ့၏။

သူ ပထမဆုံးအကြိမ် အောင်မြင်စွာ ဖော်စပ်နိုင်ခဲ့သော ဆေးလုံးမှာ စား၍မရသော အရာတစ်ခု ဖြစ်နေသည်။ သို့သော် ချန်လော့သည် ထိုဆေးလုံးကို လွှင့်မပစ်ခဲ့ချေ။

၎င်းမှာ သူ၏ မူလရည်ရွယ်ချက်နှင့် မကိုက်ညီသော်လည်း အခြားရှုထောင့်မှ ကြည့်လျှင် ၎င်းမှာ ကောင်းမွန်သော ဝမ်းနှုတ်ဆေးတစ်ခု ဖြစ်ပေသည်။ တစ်နေ့နေ့တွင် ဂျူနီယာညီမလေး ဟွမ်ယင်းအား ရောင်းခိုင်းရန်နှင့် အနည်းဆုံး သူ၏ အရင်းအနှီးအချို့ ပြန်ရမလားဆိုသည်ကို ကြည့်ရန် သူ စီစဉ်လိုက်သည်။

ဆေးဖော်စပ်သူများသည် အဆောင်ရေးဆွဲသူများထက် ပိုက်ဆံ ပိုမိုရရှိကြ၏။

"အချိုးအစားတွေကို ညှိဖို့ လိုနေသေးတာပဲ။"

စိတ်ကို ပြန်လည်ပြင်ဆင်ပြီးနောက် ချန်လော့သည် ဆေးမီးဖိုကို ဘေးသို့ချကာ တင်ပျဉ်ခွေထိုင်ပြီး သူ၏ ဝိညာဉ်ချီများကို ပြန်လည်စုဆောင်းလေတော့သည်။

လက်ရှိ ချီသန့်စင်ခြင်း ဆဋ္ဌမအဆင့် အစွမ်းဖြင့် ဆေးမီးဖိုတစ်ဖိုဖွင့်ရန်အတွက် အပြည့်အဝ အနားယူရန် လိုအပ်သည်။

ဤသည်မှာ အခြေခံ ယန်ချီဆေးလုံးများအတွက်သာ ဖြစ်သည်။ အကယ်၍ ပိုမိုရှုပ်ထွေးသော ဆေးလုံးများသာ ဖြစ်ပါက သူ၏ ဝိညာဉ်စွမ်းအားမှာ လုံလောက်မည် မဟုတ်ချေ။

"ဂျူနီယာညီလေး တုကျန်းပေးထားတဲ့ ဆေးဖော်စပ်နည်းကို လေ့လာကြည့်ပြီး အဲဒီကနေ သင်ယူစရာ ရှိမလားဆိုတာ ကြည့်ရအောင်။"

ဤနေ့တစ်ဝက်အတွင်း ဆေးဖော်စပ်ခြင်းကို လေ့လာနေသော ဦးနှောက်နှစ်ခုမှာ ထိုဆေးဖော်စပ်နည်းကို အပြည့်အဝ နားလည်သွားခဲ့ကြပြီ ဖြစ်သည်။ သူ၏ ဝိညာဉ်စွမ်းအားများကို ပြန်လည်စုဆောင်းနေစဉ်အတွင်း ထိုဗဟုသုတများကို ပေါင်းစပ်ရန် အခွင့်ကောင်းပင် ဖြစ်ပေသည်။