ရေပြာကြေးခွံ ဝံပုလွေတပ်စု ပေါ်ပေါက်လာခြင်း၊ ထိတ်လန့်သွားကြသော ဧကရီနှစ်ပါး (၂)

ဤသည်မှာ သူတို့၏ ကျင့်ကြံခြင်းနည်းစနစ်များနှင့် လိုက်ဖက်ညီမှုကြောင့်သာမက၊ မကြာသေးမီက ကောင်းကင်မိုးကြိုးမုန်တိုင်းဝက်ဝံဘုရင်၏ အသားနှင့် သွေးအနှစ်သာရများကို နေ့စဉ်စားသုံးခဲ့ရသဖြင့် သူတို့၏ ခွန်အားမှာ အဆင့် ၁၉ သို့ တည်ငြိမ်စွာ တက်လှမ်းလာခဲ့သောကြောင့်လည်း ပါလေသည်။

တစ်ချိန်တည်းမှာပင် သူတို့၏ ခန္ဓာကိုယ်အတွင်း စုဆောင်းထားသော ကြီးမားလှသည့် အသက်စွမ်းအင်များက သဘာဝအတိုင်း ကြီးထွားမှုကို လှုံ့ဆော်ပေးနိုင်ခဲ့လေသည်။

တစ်ညတည်းနှင့်တင် သူတို့မှာ လမ်းလျှောက်ခါစ ကလေးငယ်များ၏ အသွင်အပြင်မှ သုံးနှစ်အရွယ်ခန့် ကလေးငယ်များအဖြစ်သို့ ကူးပြောင်းသွားခဲ့ပြီ ဖြစ်သည်။

နုနယ်နေဆဲ ဖြစ်သော်လည်း သူတို့၏ အရိုးများမှာ ပိုမိုကြံ့ခိုင်လာပြီး၊ သူတို့၏ စွမ်းအင်လမ်းကြောင်းများမှာလည်း ပိုမိုကျယ်ပြန့်လာကာ၊ ပြင်ပစွမ်းအင်များကို ပိုမိုကောင်းမွန်စွာ ကြံ့ကြံ့ခံနိုင်လာပြီး သန့်စင်နိုင်ခဲ့ပြီ ဖြစ်သည်။

ဤအခိုက်အတန့်တွင် ဝံပုလွေဖေဖေ၏ ဂရုစိုက်မှုနှင့် သူ့လက်ဆောင်များ၏ တန်ဖိုးကြီးမားမှုကို သူတို့ ပိုမိုနက်ရှိုင်းစွာ နားလည်သဘောပေါက်သွားကြလေတော့သည်။

ကလေးငယ်နှစ်ဦးလုံး ကျင့်ကြံခြင်းအခြေအနေထဲသို့ ဝင်ရောက်သွားသည်ကို မြင်လိုက်ရသောအခါ လင်းထျန်းလုံသည် ကျေနပ်အားရစွာဖြင့် သူ၏အကြည့်များကို ပြန်ရုပ်သိမ်းလိုက်သည်။

“အခုတော့ အလုပ်လုပ်ရမယ့် အချိန်ရောက်ပြီ”

“ရန့်မြဲ့...” သူသည် တိုးညင်းစွာ ဟိန်းဟောက်လိုက်သည်။ ရေခဲကြေးခွံချပ်ဝတ်တန်ဆာ များ ဖုံးလွှမ်းထားသော ခမ်းနားလှသည့် ဝံပုလွေကြီးမှာ ကင်းစောင့်အဖွဲ့ထဲမှ ချက်ချင်း ပြေးထွက်လာပြီး၊ ရိုသေစွာ ခေါင်းငုံ့လိုက်လေသည် “ဘုရင်ကြီး။”

လင်းထျန်းလုံသည် နောက်ဆုံးကျန်ရှိနေသော “ကြမ်းတမ်းသော အရိုးမိစ္ဆာမျောက်ဝံ” ၏ အမြုတေကို ရန့်မြဲ့၏အရှေ့သို့ စိတ်ဝိညာဉ်စွမ်းအင်ဖြင့် တွန်းပို့ပေးလိုက်သည်။ “မြိုချလိုက်... ငါတို့ရဲ့အိမ်ကို ပိုပြီးကောင်းကောင်းကာကွယ်နိုင်ဖို့အတွက် မင်း ပိုပြီးသန်မာလာဖို့ လိုအပ်တယ်။”

ရန့်မြဲ့၏ မျက်လုံးများထဲတွင် ပြင်းထန်သော စိတ်လှုပ်ရှားမှုနှင့် သစ္စာစောင့်သိမှုများ ချက်ချင်း ပေါက်ကွဲထွက်ပေါ်လာခဲ့သည်။

အနည်းငယ်မျှပင် တွန့်ဆုတ်နေခြင်း မရှိဘဲ၊ ကြမ်းတမ်းသော မိစ္ဆာအရှိန်အဝါများ ထွက်ပေါ်နေသည့် အမြုတေကို ရိုသေလေးစားစွာဖြင့် ခေါင်းငုံ့ယူကာ မြိုချလိုက်လေတော့သည်။

ဝုန်း...

အားကောင်းလွန်းသော စွမ်းအင်လှိုင်းတစ်ခုမှာ ရန့်မြဲ့၏ ခန္ဓာကိုယ်အတွင်းမှ ချက်ချင်း ပေါက်ကွဲထွက်လာခဲ့သည်။

ရန့်မြဲ့၏ ခန္ဓာကိုယ်မှာ မျက်စိဖြင့်မြင်နိုင်သော အမြန်နှုန်းဖြင့် သိသာထင်ရှားစွာ ကြီးမားလာပြီး၊ သူ၏ ကြွက်သားအဖုအထစ်များမှာလည်း ပိုမိုတောင့်တင်းလာခဲ့သည်။

သူ၏ ခန္ဓာကိုယ်ကို ဖုံးလွှမ်းထားသော ရေခဲကြေးခွံချပ်ဝတ်တန်ဆာ များ၏ အရောင်မှာ နက်ရှိုင်းလာပြီး၊ ‌ရေခဲကြေးခွံချပ်၀န်တန်ဆာ၏ အစွန်းများတွင် သတ္တုဆန်ဆန် အေးစက်သော အလင်းတန်းများပင် ပေါ်လာခဲ့သည်။

ကြမ်းတမ်းသော အရှိန်အဝါများ ပါဝင်နေသည့် စွမ်းအင်စီးကြောင်းများသည် သူ၏ ခန္ဓာကိုယ်ပေါ်တွင် ပြေးလွှားနေကြပြီး၊ နောက်ဆုံးတွင် ထက်ရှသော လက်သည်းများပေါ်တွင် စုစည်းသွားကာ၊ နှလုံးခုန်ပင် ရပ်သွားစေနိုင်လောက်သည့် ထက်ရှခိုင်ခံ့လွန်းသော အမည်းရောင် စွမ်းအင်ဓားသွားများအဖြစ် ဖုံးလွှမ်းသွားလေတော့သည်။

[စနစ် အသိပေးချက်]။ ။ သင့်လက်အောက်ခံ နှင်းဝံပုလွေ ရန့်မြဲ့သည် အထူးမိစ္ဆာသားရဲအမြုတေ၏ စွမ်းအင်ကို စုပ်ယူလိုက်သဖြင့် အဆင့် ၂၀ (ပါရမီရှင်အဆင့်) သို့ တိုးတက်သွားပါပြီ။

[စနစ် အသိပေးချက်] ။ ။ ရန့်မြဲ့သည် ကြမ်းတမ်းသော မိစ္ဆာဝိညာဉ်လက်သည်း (အဖြူရောင် ငွေအဆင့်) စွမ်းရည်ကို အောင်မြင်စွာ နိုးထလာခဲ့ပါပြီ။

[ကြမ်းတမ်းသော မိစ္ဆာဝိညာဉ်လက်သည်း (အဖြူရောင် ငွေအဆင့်) - ကြမ်းတမ်းလွန်းသော မိစ္ဆာအရှိန်အဝါများကို လက်သည်းများပေါ်တွင် ပေါင်းဆက်ထားပြီး၊ ရုပ်ပိုင်းဆိုင်ရာ ဖျက်ဆီးနိုင်စွမ်းကို သိသိသာသာ မြှင့်တင်ပေးသည်။ တိုက်ခိုက်မှုတိုင်းတွင် ဝိညာဉ်ကို ခြိမ်းခြောက်နိုင်သည့် စိတ်ပိုင်းဆိုင်ရာရိုက်ခတ်ခြင်း အကျိုးသက်ရောက်မှု ပါဝင်မည် ဖြစ်သည်။

[စနစ် အသိပေးချက်] ။ ။ ရန့်မြဲ့၏ ပင်ကိုစွမ်းရည် · အကြွင်းမဲ့ရေခဲဝိညာဉ် (ခရမ်းရောင် ပါရမီရှင်အဆင့်) သည် စွမ်းအင် အမြောက်အမြားကို စုပ်ယူပြီး ဆင့်ကဲပြောင်းလဲသွားပါပြီ။

[အကြွင်းမဲ့ရေခဲဝိညာဉ် (ခရမ်းရောင် ပါရမီရှင်အဆင့်)] – (မူလ ဂုဏ်သတ္တိများ - ‘အကြွင်းမဲ့ ခန္ဓာကိုယ်’ ခန္ဓာကိုယ်ကြံ့ခိုင်မှုကို တိုးစေပြီး၊ ရုပ်ပိုင်းဆိုင်ရာ တိုက်ခိုက်မှုများတွင် အားနည်းသော ရေခဲအကျိုးသက်ရောက်မှု ပါဝင်သည်။

ရေခဲမီးတောက် - အေးခဲခြင်းနှင့် လောင်ကျွမ်းခြင်း လက္ခဏာရပ် နှစ်မျိုးလုံးပါဝင်သော ထူးခြားသည့် ဖြူဖျော့ဖျော့ မီးတောက်တစ်ခုကို ထိန်းချုပ်နိုင်ပြီး၊ စဉ်ဆက်မပြတ်ရောနှောကာ ပျက်စီးဆုံးရှုံးမှုများကို ဖြစ်ပေါ်စေနိုင်သည်။ )

ဂုဏ်သတ္တိအသစ် ဆောင်းလေပြင်းတိုက်ခိုက်မှု - အသက်သွင်းလိုက်သောအခါ ဆောင်းလေပြင်းကဲ့သို့ လျင်မြန်ပြီး တိတ်ဆိတ်ကာ၊ လှုပ်ရှားမှုနှင့် တိုက်ခိုက်မှုအရှိန်ကို သိသိသာသာ မြှင့်တင်ပေးသည်။ အလစ်ငိုက်တိုက်ခိုက်ရာတွင် ပထမဆုံးတိုက်ကွက်မှာ အပိုထပ်ဆောင်း ပျက်စီးဆုံးရှုံးမှုများကို ဖြစ်ပေါ်စေမည်။

[စနစ် အသိပေးချက်] ။ ။ သင့်လက်အောက်တွင် ဒုတိယမြောက် ပါရမီရှင်အဆင့် နှင်းဝံပုလွေတစ်ကောင် မွေးဖွားလာခဲ့ပါပြီ။ အစွမ်းထက်သူများ ပေါ်ထွက်လာခြင်းကြောင့် ငွေပြာရောင်သွေးမျိုးဆက်၏ ဆက်နွယ်ခြင်း အကျိုးသက်ရောက်မှုမှာ ပိုမိုအားကောင်းလာပါပြီ။ လက်ရှိ အာဏာစက် အကျိုးသက်ရောက်မှု - နှင်းဝံပုလွေမျိုးနွယ်စု၏ ကိုယ်ပိုင်စွမ်းရည် အားလုံး ၆၅ ရာခိုင်နှုန်း တိုးလာမည်။

ပိုမို အားကောင်းသော ဆက်နွယ်မှု ခံစားချက်တစ်ခုမှာ လင်းထျန်းလုံနှင့် နှင်းဝံပုလွေအုပ်စု တစ်ခုလုံးကြားတွင် ပဲ့တင်ထပ်သွားခဲ့သည်။

နှင်းဝံပုလွေတိုင်းသည် ဘုရင်ကြီးထံမှ ပြန်လည် စီးဆင်းလာသော စွမ်းအားများနှင့်၊ သူတို့၏ ကိုယ်ပိုင်ခွန်အားများ သိသိသာသာ ကြီးထွားလာသည်ကို ခံစားလိုက်ရပြီး၊ စိတ်လှုပ်ရှားစွာဖြင့် တိုးညင်းသော ဟိန်းဟောက်သံများကို တစ်ကောင်ပြီးတစ်ကောင် ထုတ်လွှတ်လိုက်ကြလေသည်။

ရန့်မြဲ့သည် သူ၏ခန္ဓာကိုယ်အတွင်းရှိ ဆူပွက်နေသော စွမ်းအင်အသစ်များကို ခံစားနေရလေသည်။

သူ၏ ခုခံနိုင်စွမ်း ပိုမိုအားကောင်းလာရုံသာမက၊ လေကဲ့သို့ ပေါ့ပါးသွားသလို ခံစားရပြီး၊ ခြေလက်များအတွင်းတွင်လည်း အေးစက်ပြီး လျင်မြန်သော ခွန်အားများ ကိန်းအောင်းနေသည်ကို ခံစားလိုက်ရလေသည်။

ရန့်မြဲ့သည် စိတ်လှုပ်ရှားစွာဖြင့် သူ၏ခန္ဓာကိုယ်ကို နှိမ့်ချလိုက်ပြီး ရိုသေလေးစားမှုများပြည့်နှက်ကာ လင်းထျန်းလုံကို အမြင့်မားဆုံးသော နည်းလမ်းဖြင့် ဂါရဝပြုလိုက်သည် - “အာဝူး... (ဘုရင်ကြီးကို သေတဲ့အထိ အလုပ်အကျွေးပြုဖို့ ရန့်မြဲ့ကတိသစ္စာပြုပါတယ်။)”

လင်းထျန်းလုံသည် ပိုမိုအစွမ်းထက်လာသော သူ၏စစ်သူကြီးနှင့် ပိုမိုအားကောင်းလာသော နှင်းဝံပုလွေအုပ်စုကို ကြည့်ရင်း၊ သူ၏ နှလုံးသားထဲတွင် ကျေနပ်အားရမှုများဖြင့် ပြည့်နှက်နေခဲ့လေသည်။

ဤကင်းလှည့်အမဲလိုက်မှုမှ ရိတ်သိမ်းရရှိမှုများမှာ သူ မျှော်လင့်ထားသည်ထက် များစွာ သာလွန်နေသည်။

တောအုပ်ကွင်းပြင်ရှိ ယာယီ နားခိုရာ နေရာလေးတွင်၊ စနစ်အသိပေးချက်အသံများ ပျောက်ကွယ်သွားသည်နှင့်အမျှ၊ သူ့ရှေ့ရှိ ရန့်မြဲ့၏ ခန္ဓာကိုယ်အတွင်း ဖြစ်ပေါ်နေသော ကမ္ဘာတုန်လောက်သည့် အပြောင်းအလဲများကို လင်းထျန်းလုံ ရှင်းလင်းစွာ ခံစားလိုက်ရလေသည်။

ရန့်မြဲ့၏ ခန္ဓာကိုယ်မှာ မျက်စိဖြင့်မြင်နိုင်သော အမြန်နှုန်းဖြင့် ပိုမိုကြီးမားထွားကျိုင်းလာပြီး၊ ဟူ၏ အမြင့်မှာ ၁.၇ မီတာနီးပါးအထိ ကြောက်မက်ဖွယ်ကောင်းလောက်အောင် ရုတ်တရက် မြင့်တက်လာခဲ့သည်။

လင်းထျန်းလုံ၏ ဘေးတွင် ယှဉ်ရပ်နေလျှင်ပင် ခေါင်းတစ်လုံးစာခန့်သာ ပုနေပြီး၊ ဝံပုလွေအုပ်စုအတွင်း ဝံပုလွေဘုရင်ပြီးလျှင် ဒုတိယမြောက် ဧရာမတည်ရှိမှုကြီးတစ်ခု ဖြစ်လာခဲ့သည်မှာ ထင်ရှားလှပေသည်။

ထိုမျှသာမက၊ ထူးချွန်အဆင့် မှ ပါရမီရှင်အဆင့်သို့ ဇီ၀အဆင့်ကြီးတစ်ဆင့်ပါ ခုန်တက်သွားခဲ့ပြီဖြစ်ရာ၊ ရန့်မြဲ့ထုတ်လွှတ်လိုက်သော အရှိန်အဝါများမှာ ယခင်ကထက် များစွာ ပိုမိုအေးစက်ပြီး၊ ခိုင်မာကာ၊ ဖိနှိပ်နိုင်စွမ်းများဖြင့် ပြည့်နှက်နေလေသည်။

အသိသာဆုံးသော အပြောင်းအလဲမှာ ရန့်မြဲ့၏ ဝံပုလွေအမြီးပဲ ဖြစ်လေသည်။

မူလက အမြီးဖျားတွင်သာ တဖျတ်ဖျတ် လင်းလက်နေခဲ့သော ဖြူဖျော့ဖျော့ ရေခဲမီးတောက်လေးမှာ ယခုအခါ လုံလောက်သော လောင်စာများ ရရှိသွားသကဲ့သို့ ပြင်းထန်စွာ လောင်ကျွမ်းလာခဲ့လေသည်။

တစ္ဆေဆန်ဆန် အေးစက်လွန်းသော မီးတောက်များက အမြီးတစ်ခုလုံးကို လွှမ်းခြုံလုနီးပါး ဖြစ်သွားပြီး၊ တိတ်တဆိတ် တောက်လောင်ကခုန်နေရင်း နှလုံးခုန်ပင် ရပ်သွားစေနိုင်လောက်သော အအေးဓာတ်၊ လောင်ကျွမ်းခြင်းနှင့် ဖျက်ဆီးနိုင်စွမ်း အားကောင်းလွန်းသော အရှိန်အဝါများကို ထုတ်လွှတ်နေကာ၊ အစွမ်းထက်ပြီး ကြောက်မက်ဖွယ်ကောင်းသည့် ပုံစံပေါက်နေလေသည်။

သို့သော်လည်း မပြောင်းလဲသည့် တစ်ခုတည်းသောအရာမှာ၊ သူမျက်လုံးဖွင့်လိုက်ချိန်တွင် အသန့်စင်ဆုံးသော ရေခဲပြာရောင် နီလာကျောက်များကဲ့သို့ဖြစ်နေသည့် ၀ံပု‌လွေမျက်ဝန်းများအတွင်းတွင် ကိန်းအောင်းနေသော၊ လင်းထျန်းလုံအပေါ် ထားရှိသည့် အကြွင်းမဲ့သစ္စာစောင့်သိမှုနှင့် နှိမ့်ချမှုတို့ပင် ဖြစ်လေသည်။

[မျိုးနွယ်] - နှင်းဝံပုလွေ (ရန့်မြဲ့) — အကြွင်းမဲ့ ရေခဲသွေးမျိုးဆက် (ဗီဇပြောင်း)

[အဆင့်] - အဆင့် ၂၀ (ပါရမီရှင်အဆင့် မိစ္ဆာသားရဲ)

[ပင်ကိုစွမ်းရည် လက္ခဏာရပ်များ] – အကြွင်းမဲ့ရေခဲဝိညာဉ် (ခရမ်းရောင် ပါရမီရှင်အဆင့်) အကြွင်းမဲ့ခန္ဓာကိုယ် (ခရမ်းရောင် ပါရမီရှင်အဆင့်)၊ ရေခဲမီးတောက် (ခရမ်းရောင် ပါရမီရှင်အဆင့်)၊ မရဏလေပြင်းတိုက်ကွက် (ခရမ်းရောင် ပါရမီရှင်အဆင့်)၊ ရေခဲကြေးခွံချပ်ဝတ်တန်ဆာ (ခရမ်းရောင် ပါရမီရှင်အဆင့်)၊ [ရေခဲအရေပြား (အဖြူရောင် ငွေအဆင့်)

[စွမ်းရည်များ] – [ကြမ်းတမ်းသော မိစ္ဆာဝိညာဉ်လက်သည်း (အဖြူရောင် ငွေအဆင့်)]၊ [ဝံပုလွေဟိန်းသံဖြင့် ခြိမ်းခြောက်ခြင်း (အဖြူရောင် ငွေအဆင့်)

[အခြေအနေ] - စိတ်လှုပ်ရှားနေသည်၊ သစ္စာစောင့်သိမှု ၁၀၀ ရာခိုင်နှုန်း၊ စွမ်းအင်များ ပြည့်လျှံနေသည်။

“ဟေး ဟေး.. ငါ့ကောင်ကြီးက အတော်တိုးတက်လာတာပဲ...” လင်းထျန်းလုံသည် ရန့်မြဲ့၏ လက်ရှိ အချက်အလက်ပြ စနစ်မျက်နှာပြင်ကို ဂရုတစိုက် စစ်ဆေးလိုက်ရင်း၊ စိတ်ထဲမှ အလိုအလျောက် နှိုင်းယှဉ်မှုများ ပြုလုပ်လိုက်မိသည်။

စွမ်းရည်များ၏ ခွန်အားကိုချည်း ကြည့်မည်ဆိုလျှင်၊ လက်ရှိ ရန့်မြဲ့မှာ တစ်ချိန်က နယ်မြေတစ်ခုကို လွှမ်းမိုးခဲ့သော အရိပ်ကျားသစ်ဘုရင်ထက် အနည်းငယ်မျှပင် ယုတ်လျော့ခြင်း မရှိတော့ဘဲ၊ ကာကွယ်ရေးနှင့် အထူးစွမ်းရည်များတွင်ပင် သာလွန်နေပြီ ဖြစ်သည်။

သို့သော် လက်တွေ့ တိုက်ခိုက်ရေးစွမ်းအားနှင့် ပတ်သက်၍မူ၊ ယခုအခါ ကင်းစောင့်တပ်ဖွဲ့တစ်ဖွဲ့ကို ပြီးပြည့်စုံစွာ ဦးဆောင်နိုင်ပြီး၊ ငွေပြာရောင်သွေးမျိုးဆက်နှင့် တိုတမ်မိခင်သစ်ပင်တို့၏ နှစ်ထပ်ကွမ်း တိုးမြှင့်မှုများကို ရရှိထားသော ရန့်မြဲ့အနေဖြင့်၊ ထိုကျားသစ်မနှင့် နောက်တစ်ကြိမ် ပြန်ဆုံတွေ့ရမည်ဆိုလျှင်တောင် အလွယ်တကူ အမဲလိုက်နိုင်လိမ့်မည်ဟု လင်းထျန်းလုံ အကြွင်းမဲ့ ယုံကြည်ထားလေသည်။