ရေပြာကြေးခွံ ဝံပုလွေတပ်စု ပေါ်ပေါက်လာခြင်း၊ ထိတ်လန့်သွားကြသော ဧကရီနှစ်ပါး (၃)

ထိုအချိန်မှာပင် အလျင်စလိုဖြစ်နေပြီး ပေါ့ပါးသော ခြေသံများနှင့်အတူ၊ ကွင်းပြင်ပတ်ဝန်းကျင်ဧရိယာတွင် ရှင်းလင်းရေးနှင့် ကင်းစောင့်တာဝန်များကို ထမ်းဆောင်ရန် အမိန့်ပေးခံထားရသော ယင်းဖုန်းနှင့် ထျန်းပင်းတို့သည်၊ အမဲလိုက်သမားများနှင့် လုပ်ကြံသတ်ဖြတ်သူများစသည့် အဖွဲ့များကို အသီးသီး ဦးဆောင်ကာ ယာယီ နားခိုရာ နေရာလေးသို့ ပြန်လည်ရောက်ရှိလာကြလေသည်။

သူတို့ ပြန်ရောက်ရောက်ချင်းမှာပင်၊ ရန့်မြဲ့ထံမှ လုံးဝ ကွဲပြားခြားနားနေပြီး အလွန်အမင်း အစွမ်းထက်လှသော ပါရမီရှင်အဆင့် အရှိန်အဝါ လှိုင်းဂယက်များကို ချက်ချင်း အာရုံခံမိသွားကြလေသည်။

အားကျမှုနှင့် လိုလားတောင့်တမှု တစ်ခုမှာ လူသားတစ်ဦးနှင့် အလွန်တူညီသော ယင်းဖုန်း၏ မျက်လုံးများထဲတွင် လျှပ်တစ်ပြက် ဖြတ်ပြေးသွားခဲ့သည်။

ထျန်းပင်း၏ တုံ့ပြန်မှုမှာမူ ပိုမိုတိုက်ရိုက်ကျလေသည်။ သူ၏ စိတ်မှာ ယင်းဖုန်းလောက် မရှုပ်ထွေးဘဲ ဝံပုလွေဘုရင်အပေါ် သန့်စင်သော သစ္စာစောင့်သိမှုနှင့် တိုက်ခိုက်လိုစိတ်များဖြင့်သာ ပြည့်နှက်နေသည်။

ထျန်းပင်းသည် ရန့်မြဲ့၏ အမြီးပေါ်ရှိ အေးစက်သော ဖြူဖျော့ဖျော့ မီးတောက်များကို မျက်လုံးပြူးကြီးများဖြင့် စူးစိုက်ကြည့်နေမိလေသည်။

ထျန်းပင်းသည် သူ၏ သွားများကို ဖြဲပြကာ လည်ချောင်းထဲမှနေ၍ တိုးညှင်းသော ညည်းတွားသံကို ထုတ်လွှတ်လိုက်သည်။

ထိုညည်းတွားသံထဲတွင် အားကျမှုများနှင့် မခံချင်စိတ်များ အနည်းငယ် ပါ၀င်သော်လည်း မနာလိုမှုများ လုံး၀မပါဝင်ဘဲ၊ အပေါင်းအဖော်တစ်ဦး ပိုမိုသန်မာလာသည်ကို မြင်တွေ့ရသောကြောင့် သဘာ၀အလျောက် ဖြစ်ပေါ်လာသည့် စိတ်လှုပ်ရှားမှုများသာ ပါဝင်နေလေသည်။

လင်းထျန်းလုံသည် ထျန်းပင်း၏ တုံ့ပြန်မှုကိုကြည့်ရင်း မပြုံးဘဲ မနေနိုင်အောင် ဖြစ်သွားခဲ့သည်။

သူ၏စိတ်စွမ်းအင်ကို အနည်းငယ်လှုပ်ရှားလိုက်ရာ၊ တူညီသော အရင်းအမြစ်မှ လာသည့် ကျန်ရှိနေသော မိစ္ဆာအမြုတေ (ရေပြာခွာဝိညာဉ်မြင်း) ခြောက်ခုမှာ မျက်စိဖြင့်မမြင်ရသော စိတ်ဝိညာဉ်စွမ်းအင်များဖြင့် ရစ်ပတ်ခံလိုက်ရပြီး နှင်းဝံပုလွေအုပ်စုရှေ့တွင် လွင့်မြောလာခဲ့လေသည်။

ထို့နောက် လင်းထျန်းလုံ လမ်းညွှန်ထားသည့်အတိုင်း ၎င်းတို့သည် ထျန်းပင်းနောက်သို့ အမြဲတမ်း လိုက်ပါလေ့ရှိပြီး အဆင့် ၁၉ (ခြေလှမ်း၀က်ပါရမီရှင်အဆင့်) သို့ ရောက်ရှိနေကြပြီဖြစ်သော လက်ရွေးစင် လုပ်ကြံသတ်ဖြတ်သူ ခြောက်ကောင်၏ အရှေ့သို့ တိကျစွာ ပျံသန်းသွားလေသည်။

“ဝေါင်းး...” ထျန်းပင်းသည် တစ်ခဏမျှ ကြက်သေသေသွားပြီး လင်းထျန်းလုံကို နားမလည်နိုင်စွာဖြင့် လှမ်းကြည့်လိုက်လေသည်။

“မြိုချလိုက်ကြ...” လင်းထျန်းလုံ၏ ရည်ရွယ်ချက်မှာ ရိုးရှင်းပြီး တိုက်ရိုက်ကျလှသည်။ ဤအမြုတေခြောက်ခုမှာ ထျန်းပင်းနှင့် သူ၏ လက်ရွေးစင်တပ်ဖွဲ့အတွက် သူရည်ရွယ်ထားသော လက်ဆောင်များပင် ဖြစ်လေသည်။

ရေပြာရောင် ဝိညာဉ်ချပ်ဝတ်တန်ဆာမှ ပေးစွမ်းမည့် အစွမ်းထက်သော အကာအကွယ် စွမ်းအားများကို အသုံးပြု၍၊ ဤအဖွဲ့ကို ဝံပုလွေအုပ်စု၏ အထက်ရှဆုံးနှင့် အခိုင်ခံ့ဆုံးသော ထိုးစစ်၊ ရှေ့ပြေးတပ်ဖွဲ့... ‘ရေပြာကြေးခွံအစောင့်အရှောက်များ’ အဖြစ်သို့ ပြောင်လဲပေးလိုခြင်း ဖြစ်လေသည်။

“ထျန်းပင်း အတွက်ကတော့...” လင်းထျန်းလုံ၏ အကြည့်များမှာ အထူးပြုလုပ်ထားသော ထိုဖန်ပြွန်ချောင်းကြီးဆီသို့ အလိုအလျောက် ရောက်ရှိသွားလေသည်။

‘နက်ရှိုင်းစွာ သတိလစ်မေ့မြောနေခြင်း' အခြေအနေထဲသို့ ကျရောက်နေပြီး မွေးရာပါ ရေခဲဒြပ်စင် မူလစွမ်းအင်များ ပါဝင်နေသော ထို ‘အိပ်မောကျနေသည့် ရေခဲနဂါးလေး' ၏ အလောင်းမှာ ထျန်းပင်းနှင့် တကယ်ကို လိုက်ဖက်ညီနိုင်လောက်ပြီး သူ့အတွက် အခွင့်အရေးကောင်းတစ်ခု ဖြစ်လာနိုင်လေသည်။

“လွှတ်မြောက်လာဖို့ လေးနာရီတောင်လိုသေးတာပဲ... အလျင်မလိုသေးပါဘူး...” သူ၏ စိတ်ထဲတွင် အစီအစဉ်တစ်ခု ရှိပြီးသား ဖြစ်လေသည်။

လက်ရွေးစင် နှင်းဝံပုလွေခြောက်ကောင်မှာ ဝံပုလွေဘုရင်၏ ငြင်းဆန်၍မရသော အမိန့်ကို လက်ခံရရှိလိုက်သဖြင့် အနည်းငယ်မျှ တွန့်ဆုတ်မနေတော့ချေ။

သူတို့သည် ချက်ချင်းပင် ခေါင်းငုံ့ကာ သူတို့ရှေ့တွင် လွင့်မြောနေသော စိမ်းပြာရောင် အမြုတေများကို မြိုချလိုက်ကြလေတော့သည်။

“အာဝူး...”

နောက်တစ်ခိုက်အတန့်တွင် နာကျင်မှုနှင့် စိတ်လှုပ်ရှားမှုများ ရောယှက်နေသော ဝံပုလွေဟိန်းဟောက်သံများမှာ၊ ယခင်က တိတ်ဆိတ်မှုကို ဖြိုခွင်းကာ တောအုပ်ကွင်းပြင်လေးထဲတွင် တစ်ခုပြီးတစ်ခု ရုတ်တရက် ပေါက်ကွဲထွက်ပေါ်လာခဲ့သည်။

နှင်းဝံပုလွေ ခြောက်ကောင်၏ ခန္ဓာကိုယ်များမှာ တစ်ပြိုင်နက်တည်း ပြင်းထန်စွာတုန်ခါသွားကြပြီး၊ သူတို့၏ ကြွက်သားများ ဖောင်းကားလာကာ ကြီးထွားလာကြသည်။

သူတို့၏ အရိုးများမှလည်း သွားကျိန်းစရာကောင်းသော 'တဂျွတ်ဂျွတ်’ အသံများ ထွက်ပေါ်လာရာ၊ ပြင်းထန်လွမ်းသော အသွင်ပြောင်းလဲမှု တစ်ခုကို ဖြတ်သန်းနေရကြောင်း ထင်ရှားလှပေသည်။

စူးရှသော နာကျင်မှုများက သူတို့၏ ခန္ဓာကိုယ်တစ်ခုလုံးကို လွှမ်းခြုံသွားသော်လည်း၊ နှင်းဝံပုလွေတိုင်းသည် စိတ်ဆန္ဒခိုင်ခိုင်မာမာဖြင့် ကြံ့ကြံ့ခံနေကြလေသည်။

အကြောင်းမှာ သူတို့၏ ခန္ဓာကိုယ် အနက်ထဲမှနေ၍ ဤနာကျင်မှုများကြားမှ အစွမ်းထက်သော ခွန်အားသစ်တစ်ခု နိုးထလာပြီး ပုံပေါ်လာနေသည်ကို သူတို့ ရှင်းလင်းစွာ ခံစားနေရသောကြောင့်ပင်။

လင်းထျန်းလုံ၏ ငွေပြာရောင် မျက်ဝန်းများမှာ အနည်းငယ် တဖျတ်ဖျတ် လင်းလက်သွားပြီး၊ သူတို့၏ အရိုးများနှင့် အသားများအတွင်းမှ ရှေးဟောင်းဆန်ပြီး နက်ရှိုင်းသော လျှို့ဝှက်ဆန်းကြယ်သည့် စိမ်းပြာရောင် အလင်းတန်းများ ပေါက်ကွဲထွက်ပေါ်လာကာ၊ သူတို့၏ ခန္ဓာကိုယ်တစ်ခုလုံးသို့ လျင်မြန်စွာ ပြန့်နှံ့သွားသည်ကို ရှင်းလင်းစွာ မြင်တွေ့လိုက်ရသည်။

လျှို့ဝှက်ဆန်းကြယ်သည့် စိမ်းပြာရောင် အလင်းတန်းများသည် နောက်ဆုံးတွင် သတ္တုဆန်ဆန် အေးစက်သော အလင်းတန်းများ လင်းလက်နေသည့် သိပ်သည်းသော စိမ်းပြာရောင် ကြေးခွံအလွှာ တစ်ခုအဖြစ် စုစည်းသွားပြီး၊ သူတို့၏ ခါးများ၊ ခြေလက်များနှင့် သူတို့၏ ဦးခေါင်းများရှိ အရေးကြီးသော အစိတ်အပိုင်းတိုင်း ဖုံးလွှမ်းသွားလေတော့သည်။

ဆယ်မိနစ်ကြာပြီးနောက် နာကျင်စွာ ညည်းတွားသံများ တဖြည်းဖြည်း ငြိမ်သက်သွားပြီး တည်ငြိမ်ကာ အားကောင်းသော အသက်ရှူသံများအဖြစ် ပြောင်းလဲသွားလေသည်။ အသွင်ပြောင်းလဲမှု ပြီးစီးသွားကြသော နှင်းဝံပုလွေ ခြောက်ကောင်မှာ ဖြည်းညင်းစွာ မတ်တတ်ရပ်လာကြသည်။

သူတို့၏ ခန္ဓာကိုယ်များမှာ အနည်းငယ် ပိုမိုကြီးမားလာပုံရပြီး၊ တောအုပ်ကြားမှ ဖြာကျနေသော အလင်းရောင်အောက်တွင် အေးစက်ပြီး မာကျောသော အလင်းတန်းများ ရောင်ပြန်ဟပ်နေသည့် စိမ်းပြာရောင် ကြေးခွံများက တစ်ကိုယ်လုံးကို ဖုံးလွှမ်းနေလေသည်။

သူတို့၏ အကြည့်များမှာ ပိုမိုထက်မြက်ပြီး အရိုင်းဆန်လာကာ၊ သူတို့၏ အရှိန်အဝါများ အားလုံးမှာလည်း အဆင့် ၁၉ အထွတ်အထိပ်တွင် တည်ငြိမ်သွားခဲ့ပြီး၊ ပါရမီရှင်အဆင့် သို့ ခြေချရန် အခွင့်အရေး တစ်ခုသာ လိုအပ်တော့လေသည်။

[မျိုးနွယ်] - နှင်းဝံပုလွေ — ရေပြာကြေးခွံသွေးမျိုးဆက် (ဗီဇပြောင်း)

[အဆင့်] - အဆင့် ၁၉ (ထူးချွန်အဆင့် အထွတ်အထိပ်)

[ပင်ကိုစွမ်းရည် လက္ခဏာရပ်] – [ရေပြာရောင် ဝိညာဉ်ချပ်ဝတ်တန်ဆာ (အဖြူရောင် ငွေအဆင့်)]

[အခြေအနေ] - စိတ်လှုပ်ရှားနေခြင်း၊ သစ္စာစောင့်သိမှု ၁၀၀ ရာခိုင်နှုန်း

“ဂါးး...” ထျန်းပင်းသည် အသွင်အပြင်များ များစွာ ပြောင်းလဲသွားပြီး ကာကွယ်ရေး စွမ်းအားမှာလည်း အလွန်အမင်း တိုးတက်လာသည့်ပုံ ပေါက်နေသည့် သူ၏ လက်အောက်ငယ်သား ခြောက်ကောင်ကို ကြည့်လိုက်သည်။

ထျန်းပင်းမှာ တစ်ခဏမျှ ကြက်သေသေသွားပြီးနောက်၊ ကြီးမားလှသော ဝမ်းမသာပျော်ရွှင်မှုနှင့် တိုက်ပွဲဝင်စိတ်ဓာတ်များက သူ၏ ရိုးရှင်းသော စိတ်ထဲသို့ ချက်ချင်းပင် လွှမ်းမိုးသွားလေတော့သည်။

သူ နားလည်သွားချေပြီ။ ဘုရင်ကြီးက သူ့အား အစွမ်းထက်သည့် ကိုယ်ပိုင် အစောင့်အရှောက်တပ်ဖွဲ့တစ်ဖွဲ့ ပေးလိုက်ခြင်းပင်။

ယခုကစပြီး ထျန်းပင်းနှင့် သူ၏ “ရေပြာကြေးခွံ အစောင့်အရှောက်များ” ဟာ ဝံပုလွေအုပ်စုအတွက် ရန်သူတွေရဲ့ ကာကွယ်ရေးလိုင်း အားလုံးကို ဆုတ်ဖြဲပစ်မည့် သံတူကြီးတစ်ခု ဖြစ်လာတော့ပေမည်။

“အာဝူး...” အလွန်အမင်း စိတ်လှုပ်ရှားနေသဖြင့် ထျန်းပင်းသည် နောက်ခြေထောက်များကိုအားပြု၍ မတ်တတ်ရပ်ကာ တိမ်တိုက်များကိုပင် ပြိုကွဲသွားစေနိုင်လောက်သည့် ကြမ်းတမ်းရှည်လျားသည့် ဟိန်းဟောက်သံကြီးကို ထုတ်လွှတ်လိုက်ကာ၊ သူ၏ နှလုံးသားထဲရှိ စိတ်လှုပ်ရှားမှုများကို ထုတ်ဖော်လိုက်လေသည်။

ကာကွယ်ရေးပိုင်းတွင် အလွန်ကောင်းမွန်သော ဤရေပြာကြေးခွံ နှင်းဝံပုလွေသားရဲခြောက်ကောင်၏ ပူးပေါင်းဆောင်ရွက်မှုနှင့်အတူ၊ ထျန်းပင်းကိုယ်တိုင်က အဓိက ထိုးစစ်အင်အားစုအဖြစ် ပါဝင်လိုက်မည်ဆိုလျှင်.... ဤအဖွဲ့၏ တိုက်ခိုက်ရေးစွမ်းအားမှာ အရည်အသွေးပိုင်းအရ ထိတ်ဆုံးအဆင့်ထိ ခုန်တက်သွားချေပြီ။

ခုနစ်ကောင်လုံး တစ်စုတစ်စည်းတည်း ဖြစ်သွားသောအခါ၊ အစစ်အမှန် ပါရမီရှင်အဆင့် မိစ္ဆာသားရဲ တစ်ကောင်ကိုပင် တိုက်ရိုက် စိန်ခေါ်လာနိုင်ကြမည် ဖြစ်သည်။

မည်သို့ပင်ဆိုစေကာမူ ဝံပုလွေဘုရင်၏ အာဏာစက်နှင့် အဝေး နှင်းဝံပုလွကျေးရွာမှ မိခင်သစ်ပင်၏ ကောင်းချီးပေးမှုတို့အောက်တွင်၊ သူတို့၏ လက်တွေ့တိုက်ခိုက်ရေးစွမ်းအားမှာ အခြား အဆင့်တူများထက် များစွာ သာလွန်နေလေသည်။

တစ်ချိန်တည်းမှာပင် အခြားတစ်ဖက်တွင်လည်း၊ ရှောင်လန်နှင့် ရှောင်ယင်းတို့သည် သူတို့၏ မျက်လုံးများကို တစ်ပြိုင်နက်တည်းနီးပါး ဖွင့်လိုက်ကြသည်။

သူတို့လက်ထဲရှိ အမြုတေနှစ်ခုမှာ အမှုန့်များအဖြစ် ပြောင်းလဲသွားခဲ့ပြီဖြစ်ပြီး၊ ၎င်းတို့ထဲတွင် ပါ၀င်သော သန့်စင်သည့် စွမ်းအင်များကို သူတို့ လုံးဝ စုပ်ယူပြီးစီးသွားခဲ့လေပြီ။

ဤအရာအားလုံးမှာ လင်းထျန်းလုံ၏ တိကျလှသော အလိုအလျောက် သိစိတ်ကြောင့်ဟု ဆိုရမည်ပင်။

‘အရိပ်မြွေပါ’ အမြုတေ၏ အပြာရောင်ရင့်ရင့် အလင်းများမှာ ရှောင်ယင်း၏ မျက်လုံးအရောင်နှင့် ဆင်တူပြီး၊ “ရေခဲလင်းယုန်” အမြုတေ၏ ရေခဲပြာရောင် အလင်းများမှာ ရှောင်လန်၏ မျက်လုံးအရောင်နှင့် ဆင်တူသောကြောင့်သာ ထိုအမြုတေနှစ်ခုကို လက်ဆောင်များအဖြစ် ရွေးချယ်လိုက်ခြင်းဖြစ်ပြီး တကယ်ကြီး ထပ်တူကျသွားလိမ့်မည်ဟုတော့ သူ ဘယ်တော့မှ စိတ်ကူးမိလိမ့်မည် မဟုတ်ပေ။

ဤ ‘အရောင်ကို အခြေခံ၍ လက်ဆောင်ပေးခြင်း' ဟူသော လုပ်ဆောင်ချက်မှာ ထူးဆန်းသော တိုက်ဆိုင်မှုတစ်ခုသာ ဖြစ်သည်။

သို့သော် ထိုတိုက်ဆိုင်မှုလေးက သူတို့ ကျင့်ကြံနေသော ခရမ်းအကျဉ်းထောင် မိစ္ဆာသိုင်းကျမ်း၊ ရေခဲနှလုံးသား သိုင်းကျမ်းတို့နှင့် ပြီးပြည့်စုံစွာ ပေါင်းစပ်သွားခဲ့ပြီး၊ သူတို့၏ ကျင့်ကြံသူလမ်းစဉ် အခြေခံအုတ်မြစ်များကို ခိုင်မာစေရန်အတွက် မမျှော်လင့်ထားသော အခွင့်အရေးတစ်ခုကို ပေးစွမ်းလိုက်နိုင်လေသည်။

အဆင့် ၁၉ (ထူးချွန်အဆင့် အထွတ်အထိပ်)

ဟုတ်ပေသည်။ အမြုတေထဲမှ စွမ်းအင်များကို စုပ်ယူပြီးနောက် သူတို့၏ အဆင့်များမှာ အဆင့် ၁၉ (ထူးချွန်အဆင့် အထွတ်အထိပ်) တွင် လုံးဝ တည်ငြိမ်သွားခဲ့ပြီဖြစ်ပြီး၊ ပါရမီရှင်အဆင့်သို့ တက်လှမ်းနိုင်ရန် ခြေနှစ်လှမ်းသာ လိုတော့လေသည်။

ပထမဦးစွာ ခြေလှမ်း၀က်ပါရမီရှင်အဆင့်သို့ တက်လှမ်းပြီး၊ ထို့နောက် အဆင့်ကြီးတစ်ဆင့်ကို ထိုးဖောက်နိုင်ရန် အချိန်ယူကာ စွမ်းအင်များ စုဆောင်းရန်သာ လိုအပ်တော့လေသည်။

ရှောင်လန်သည် သူမ၏ ခန္ဓာကိုယ်အတွင်းမှ အပြောင်းအလဲများကို သေချာ စစ်ဆေးကြည့်လိုက်သည်။

သူမသာ ပါရမီရှင်အဆင့်သို့ တရားဝင် ခြေချလိုက်သည်နှင့် တစ်ပြိုင်နက်၊ သူမ၏ ပတ်ဝန်းကျင်ရှိ ရုပ်ဝတ္ထုပစ္စည်းများအပေါ် အကျိုးသက်ရောက်စေရန်အတွက် ဗလာဟင်းလင်းပြင်နယ်ပယ်၏ စွမ်းအားအနည်းငယ်အား အသုံးပြုနိုင်တော့မည်ကို သူမ ဝေဝါးစွာ အာရုံခံနိုင်လေသည်။